ມຊ຺ຌິມປຓ຺ຓາສປາຬິ

ກນ຺ທຣກສຸຕ຺ຕ

ປຸຈ຺ຉາ – ເຕນາວຸໂສ ຊານຕາ…ເປ… ສມ຺ມາສມ຺ພຸທ຺ເຘນ ກນ຺ທຣກສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ຈມ຺ປາຍໍ ຠນ຺ເຕ ຄຄ຺ຄຣາຍ ໂປກ຺ຂຣຓິຍາ ຕີເຣ ເປສ຺ສຎ຺ຈ ຫຕ຺ຖາໂຣຫປຸຕ຺ຕໍ ກນ຺ທຣກຎ຺ຈ ປຣິພ຺ພາຊກໍ ອາຣພ຺ຠ ຠາສິຕໍ, ກນ຺ທຣໂກ ຠນ຺ເຕ ປຣິພ຺ພາຊໂກ ຠຄວໂຕ ຈ ຠິກ຺ຂຸສງ຺ຆສ຺ສ ຈ ວຓ຺ຓໍ ອຠາສິ, ເປສ຺ໂສ ຈ ຠນ຺ເຕ ຫຕ຺ຖາໂຣຫປຸຕ຺ໂຕ ຠຄວໂຕ ຈ ຘມ຺ມເທສນາຍ ຈ ວຓ຺ຓໍ ອຠາສິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ປຸຈ຺ຉາ – ເອວໍ ໂຂ ອາວຸໂສ ກນ຺ທຣເກນ ປຣິພ຺ພາຊເກນ ຠຄວໂຕ ຈ ຠິກ຺ຂຸສງ຺ຆສ຺ສ ຈ ອຠິປ຺ປສນ຺ເນນ ວຓ຺ເຓ ຠາສິເຕ ກຖໍ ຠຄວາ ຕໍ ສມນຸຊານິຕ຺ວາ ຘມ຺ມເທສນາຣມ຺ຠໍ ອາຣຠິ, ກຖຎ຺ຈ ເປສ຺ໂສ ຫຕ຺ຖາໂຣຫປຸຕ຺ໂຕ ຠຄວໂຕ ຈ ຘມ຺ມເທສນາຍ ຈ ວຓ຺ຓໍ ອຠາສິ, ກຖຎ຺ຈ ເປສ຺ສສ຺ສ ຫຕ຺ຖາໂຣຫປຸຕ຺ຕສ຺ສ ອຊ຺ຌາສຍານຸຣູປໍ ຘມ຺ມໍ ເທເສສິ.

ວິສ຺ສຊ຺ຊນາ – ເອວໍ ໂຂ ຠນ຺ເຕ ກນ຺ທຣເກນ ປຣິພ຺ພາຊເກນ ຠຄວໂຕ ຈ ຠິກ຺ຂຸສງ຺ຆສ຺ສ ຈ ອຠິປ຺ປສນ຺ເນນ ວຓ຺ເຓ ຠາສິເຕ ‘‘ເອວເມຕໍ ກນ຺ທຣກ ເອວເມຕໍ ກນ຺ທຣກ’’ ເອວມາທິນາ ຠຄວາ ຕໍ ສມນຸຊານິຕ຺ວາ ‘‘ສນ຺ຕິ ຫິ ກນ຺ທຣກ ຠິກ຺ຂູ ອິມສ຺ມິໍ ຠິກ຺ຂຸສງ຺ເຆ ອຣຫນ຺ໂຕ ຂີຓາສວາ ວຸສິຕວນ຺ໂຕ ກຕກຣຓີຍາ ໂອຫິຕຠາຣາ ອນຸປ຺ປຕ຺ຕສທຕ຺ຖາ ປຣິກ຺ຂີຓຠວສໍໂຍຊນາ ສມ຺ມທຎ຺ຎາ ວິມຸຕ຺ຕາ’’ຕິ ເອວມາທິນາ ຘມ຺ມເທສນໍ ສມາຣຠິ. ອຖ ໂຂ ຠນ຺ເຕ ເປສ຺ໂສ ຫຕ຺ຖາໂຣຫປຸຕ຺ໂຕ ‘‘ອຈ຺ຉຣິຍໍ ຠນ຺ເຕ ອພ຺ຠຸຕໍ ຠນ຺ເຕ ຍາວ ສຸປຎ຺ຎຕ຺ຕາ ຈິເມ ຠນ຺ເຕ ຠຄວຕາ ຈຕ຺ຕາໂຣ ສຕິປຏ຺ຐານາ ສຕ຺ຕານໍ ວິສຸທ຺ຘິຍາ ໂສກປຣິເທວານໍ ສມຕິກ຺ກມາຍ ທຸກ຺ຂໂທມນສ຺ສານໍ ອຕ຺ຖງ຺ຄມາຍ ຎາຍສ຺ສ ອຘິຄມາຍ ນິພ຺ພານສ຺ສ ສຈ຺ຉິກິຣິຍາຍາ’’ຕິ ເອວມາທິນາ ຠຄວໂຕ ຈ ຘມ຺ມເທສນາຍ ວຓ຺ຓໍ ອຠາສິ, ຠຄວາປິ ຠນ຺ເຕ ‘‘ຄຫນຎ຺ເຫຕໍ ເປສ຺ສ ຍທິທໍ ມນຸສ຺ສາ, ອຸຕ຺ຕານກຎ຺ເຫຕໍ ເປສ຺ສ ຍທິທໍ ປສໂວ’’ຕິອາທິນາ ເປສ຺ສສ຺ສ ຫຕ຺ຖາໂຣຫປຸຕ຺ຕສ຺ສ ອຊ຺ຌາສຍານຸຣູປໍ ຘມ຺ມກຖໍ ເທເສສິ.

ປຸຈ຺ຉາ – ຕໍ ປນາວຸໂສ ຘມ຺ມເທສນໍ ສຸຕ຺ວາ ເປສ຺ສສ຺ສ ຫຕ຺ຖາໂຣຫປຸຕ຺ຕສ຺ສ ກີທິໂສ ອານິສໍໂສ ອຘິຄໂຕ, ກຖຎ຺ຈ ຠຄວາ ຕໍ ປຸຄ຺ຄລຈຕຸກ຺ກເທສນໍ ສໍຂິຕ຺ເຕນ ຠາສິຕໍ, ຠິກ຺ຂູນໍ ວິຕ຺ຖາເຣນ ວິຠຊິຕ຺ວາ ເທເສສິ.

ວິສ຺ສຊ຺ຊນາ – ຕໍ ໂຂ ປນ ຠນ຺ເຕ ຘມ຺ມໍ ສຸຕ຺ວາ ເປສ຺ສສ຺ສ ຫຕ຺ຖາໂຣຫປຸຕ຺ຕສ຺ສ ທ຺ເວ ອານິສໍສາ ອຘິຄຕາ ສງ຺ເຆ ຈ ປສາໂທ ສຕິປຏ຺ຐານປຣິຄ຺ຄຫຓູປາໂຍ ຈ ອຠິນໂວ. ຠຄວາ ຈ ຠນ຺ເຕ ຕໍ ປຸຄ຺ຄລຈຕຸກ຺ກເທສນໍ ຠິກ຺ຂູຫິ ຍາຈິໂຕ ‘‘ກຕໂມ ຈ ຠິກ຺ຂເວ ປຸຄ຺ຄໂລ ອຕ຺ຕປຣິຕາປນານຸໂຍຄມນຸຍຸຕ຺ໂຕ’’ຕິອາທິນາ ສໍຂິຕ຺ເຕນ ຠາສິຕໍ, ວິຕ຺ຖາເຣນ ອຕ຺ຖໍ ອວິຠຕ຺ຕໍ. ວິຕ຺ຖາເຣນ ວິຠຊິຕ຺ວາ ເທເສສິ.

ອຏ຺ຐກນາຄຣສຸຕ຺ຕ

ປຸຈ຺ຉາ – ອຏ຺ຐກນາຄຣສຸຕ຺ຕໍ ປນາວຸໂສ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ເກນ ຠາສິຕໍ.

ວິສ຺ສຊ຺ຊນາ – ເວສາລິຍໍ ຠນ຺ເຕ ເວຬຸວຄາມເກ ຄຫປຕິໍ ອຏ຺ຐກນາຄຣໍ ອາຣພ຺ຠ ອາຍສ຺ມຕາ ອານນ຺ທຕ຺ເຖເຣນ ຘມ຺ມຠຓ຺ຑາຄາຣິເກນ ຠາສິຕໍ. ທສໂມ ຠນ຺ເຕ ຄຫປຕິ ອຏ຺ຐກນາຄໂຣ ອາຍສ຺ມນ຺ຕໍ ອານນ຺ທໍ ອຸປສງ຺ກມິຕ຺ວາ ເອຕທໂວຈ ‘‘ອຕ຺ຖິ ນຸ ໂຂ ຠນ຺ເຕ ອານນ຺ທ ເຕນ ຠຄວຕາ ຊານຕາ ປສ຺ສຕາ ອຣຫຕາ ສມ຺ມາສມ຺ພຸທ຺ເຘນ ເອກຘມ຺ໂມ ອກ຺ຂາໂຕ, ຍຕ຺ຖ ຠິກ຺ຂຸໂນ ອປ຺ປມຕ຺ຕສ຺ສ ອາຕາປິໂນ ປຫິຕຕ຺ຕສ຺ສ ວິຫຣໂຕ ອວິມຸຕ຺ຕຎ຺ເຈວ ຈິຕ຺ຕໍ ວິມຸຈ຺ຈຕິ, ອປຣິກ຺ຂິຓາ ຈ ອາສວາ ປຣິກ຺ຂຍໍ ຄຈ຺ຉນ຺ຕິ, ອນນຸປ຺ປຕ຺ຕຎ຺ຈ ອນຸຕ຺ຕຣໍ ໂຍຄກ຺ເຂມໍ ອນຸປາປຸຓາຕີ’’ຕິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ເສຂສຸຕ຺ຕ

ປຸຈ຺ຉາ – ເສຂສຸຕ຺ຕໍ ປນາວຸໂສ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ເກນ ຠາສິຕໍ.

ວິສ຺ສຊ຺ຊນາ – ສກ຺ເກສຸ ຠນ຺ເຕ ກປິລວຕ຺ຖຸສ຺ມິໍ ສນ຺ຖາຄາເຣ ອາຍສ຺ມຕາ ອານນ຺ທຕ຺ເຖເຣນ ຘມ຺ມຠຓ຺ຑາຄາຣິເກນ ກາປິລວຕ຺ຖເວ ສກ຺ເຍ ອາຣພ຺ຠ ຠາສິຕໍ. ຠຄວາ ຠນ຺ເຕ ກາປິລວຕ຺ຖເວ ສກ຺ເຍ ພຫຸເທວຣຕ຺ຕິໍ ຘມ຺ມິຍາ ກຖາຍ ສນ຺ທສ຺ເສຕ຺ວາ ສມາທເປຕ຺ວາ ສມຸຕ຺ເຕເຊຕ຺ວາ ສມ຺ປຫໍເສຕ຺ວາ ອາຍສ຺ມນ຺ຕໍ ອານນ຺ທໍ ອາມນ຺ເຕສິ ‘‘ປຏິຠາຕຸ ຕໍ ອານນ຺ທ ກາປິລວຕ຺ຖວານໍ ສກ຺ຍານໍ ເສໂຂ ປາຏິປໂທ, ປິຏ຺ຐິ ເມ ອາຄິລາຍຕິ, ຕມຫໍ ອາຍມິສ຺ສາມີ’’ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ໂປຕລິຍສຸຕ຺ຕ

ປຸຈ຺ຉາ – ໂປຕລິຍສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ອງ຺ຄຸຕ຺ຕຣາເປສຸ ຠນ຺ເຕ ອາປເຓ ນາມ ອງ຺ຄຸຕ຺ຕຣາປານໍ ນິຄເມ ໂປຕລິຍໍ ຄຫປຕິໍ ປຏິກ຺ຂິຕ຺ຕສພ຺ພກມ຺ມນ຺ຕໍ ອາຣພ຺ຠ ຠາສິຕໍ. ໂປຕລິໂຍ ຠນ຺ເຕ ຄຫປຕິ ປຏິກ຺ຂິຕ຺ຕສພ຺ພກມ຺ມນ຺ໂຕ ເຍນ ຠຄວາ ເຕນຸປສງ຺ກມິ, ອຸປສງ຺ກມນ຺ໂຕ ຠຄວຕາ ຄຫປຕິວາເທນ ສມຸທາຈຣິຍມາໂນ ກຸປິໂຕ ອນຕ຺ຕມໂນ ຠຄວນ຺ຕໍ ເອຕທໂວຈ ‘‘ຕຍິທໍ ໂຠ ໂຄຕມ ນຈ຺ຉນ຺ນໍ ຕຍິທໍ ນປ຺ປຕິຣູປໍ, ຍໍ ມໍ ຕ຺ວໍ ຄຫປຕິວາເທນ ສມຸທາຈຣສີ’’ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ປຸຈ຺ຉາ – ກຖຎ຺ຈາວຸໂສ ຠຄວາ ກາມານໍ ອາທີນວໍ ວິຕ຺ຖາເຣນ ປກາເສຕ຺ວາ ອຣິຍສ຺ສ ວິນເຍ ໂວຫາຣສມຸຈ຺ເຉທໍ ທສ຺ເສສິ.

ວິສ຺ສຊ຺ຊນາ – ອຖ ຠນ຺ເຕ ຠຄວາ ອຣິຍສ຺ສ ວິນເຍ ໂວຫາຣສມຸຈ຺ເຉທາຍ ອຏ຺ຐ ຘມ຺ເມ ວິຠຊິຕ຺ວາ ‘‘ເສຍ຺ຍຖາປິ ຄຫປຕິ ກຸກ຺ກຸໂຣ ຊິຆຈ຺ຉາທຸພ຺ພລ຺ຍປເຣໂຕ ໂຄຆາຕກສູນໍ ປຈ຺ຈຸປຏ຺ຐິໂຕ ອສ຺ສ’’ ເອວມາທິນາ ກາເມສຸ ອາທີນວໍ ທສ຺ເສຕ຺ວາ ປຣິໂຍສາເນ ຕີຫິ ວິຊ຺ຊາຫິ ອຣິຍສ຺ສ ວິນເຍ ໂວຫາຣສມຸຈ຺ເຉທໍ ສພ຺ເພນສພ຺ພໍ ສພ຺ພຖາສພ຺ພໍ ໂວຫາຣສມຸຈ຺ເຉທໍ ວິຕ຺ຖາເຣນ ວິຠຊິຕ຺ວາ ເທເສສິ.

ຊີວກສຸຕ຺ຕ

ປຸຈ຺ຉາ – ເຕນາວຸໂສ ຠຄວຕາ…ເປ… ສມ຺ມາສມ຺ພຸທ຺ເຘນ ຊີວກສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ຊີວກໍ ໂກມາຣຠຈ຺ຈໍ ອາຣພ຺ຠ ຠາສິຕໍ. ຊີວໂກ ຠນ຺ເຕ ໂກມາຣຠຈ຺ໂຈ ຠຄວນ຺ຕໍ ອຸປສງ຺ກມິຕ຺ວາ ເອຕທໂວຈ ‘‘ສຸຕໍ ເມຕໍ ຠນ຺ເຕ ສມຓໍ ໂຄຕມໍ ອຸທ຺ທິສ຺ສ ປາຓໍ ອາຣຠນ຺ຕິ, ຕໍ ສມໂຓ ໂຄຕໂມ ຊານໍ ອຸທ຺ທິສ຺ສ ກຕໍ ມໍສໍ ປຣິຠຸຎ຺ຊຕິ ປຏິຈ຺ຈ ກມ຺ມນ຺ຕິ. ເຍ ເຕ ຠນ຺ເຕ ເອວມາຫໍສຸ ‘ສມຓໍ ໂຄຕມໍ ອຸທ຺ທິສ຺ສ ປາຓໍ ອາຣຠນ຺ຕິ, ຕໍ ສມໂຓ ໂຄຕໂມ ຊານໍ ອຸທ຺ທິສ຺ສ ກຕໍ ມໍສໍ ປຣິຠຸຎ຺ຊຕິ ປຏິຈ຺ຈ ກມ຺ມ’ນ຺ຕິ, ກຈ຺ຈິ ເຕ ຠນ຺ເຕ ຠຄວໂຕ ວຸຕ຺ຕວາທິໂນ ນ ຈ ຠຄວນ຺ຕໍ ອຠູເຕນ ອພ຺ຠາຈິກ຺ຂນ຺ຕິ, ຘມ຺ມສ຺ສ ຈານຸຘມ຺ມໍ ພ຺ຍາກໂຣນ຺ຕິ, ນ ຈ ໂກຈິ ສຫຘມ຺ມິໂກ ວາທານຸວາໂທ ຄາຣຍ຺ຫໍ ຐານໍ ອາຄຈ຺ຉຕີ’’ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ອຸປາລິສຸຕ຺ຕ

ປຸຈ຺ຉາ – ອຸປາລິສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ນາຬນ຺ທາຍໍ ຠນ຺ເຕ ອຸປາລິໍ ຄຫປຕິໍ ອາຣພ຺ຠ ຠາສິຕໍ. ອຸປາລິ ຠນ຺ເຕ ຄຫປຕິ ຠຄວນ຺ຕໍ ອຸປສງ຺ກມິຕ຺ວາ ເອຕທໂວຈ ‘‘ອາຄມາ ນຸຂ຺ວິຘ ຠນ຺ເຕ ທີຆຕປສ຺ສີ ນິຄຓ຺ໂຐ’’ຕິ, ເອວມາທິນາ ຈ ຠນ຺ເຕ ອຸປາລິ ຄຫປຕິ ຠຄວໂຕ ປຏິສນ຺ຘາຣໍ ກຕ຺ວາ ອຕ຺ຕໂນ ອາຈຣິຍສ຺ສ ນິຄຓ຺ຐສ຺ສ ນາຏປຸຕ຺ຕສ຺ສ ວາທໍ ປກາເສສິ, ວາທໍ ວຓ຺ເຓສິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ປຸຈ຺ຉາ – ອຖ ໂຂ ອາວຸໂສ ຠຄວາ ອຸປາລິໍ ຄຫປຕິໍ ຕສ຺ມິໍ ວາເທ ກຖໍ ສມນຸຍຸຎ຺ຊີ ສມນຸຄາຫີ ສມນຸຠາສີ, ກຖຎ຺ຈສ຺ສ ອຸປາຍໍ ທສ຺ເສຕ຺ວາ ຍຖາຠູຕໍ ອຕ຺ຖໍ ຎາເປສິ.

ວິສ຺ສຊ຺ຊນາ – ອຖ ໂຂ ຠນ຺ເຕ ຠຄວາ ອຸປາລິໍ ຄຫປຕິໍ ‘‘ສເຈ ໂຂ ຕ຺ວໍ ຄຫປຕິ ສຈ຺ເຈ ປຕິຏ຺ຐາຍ ມນ຺ເຕຍ຺ຍາສິ, ສິຍາ ໂນ ເອຕ຺ຖ ກຖາສລ຺ລາໂປ’’ຕິ ອຸປາລິໍ ຄຫປຕິໍ ກຖໍ ສມຸຏ຺ຐາເປຕ຺ວາ ‘‘ຕໍ ກິໍມຎ຺ຎສິ ຄຫປຕິ, ອິຘສ຺ສ ນິຄຓ຺ໂຐ ອາພາຘິໂກ ທຸກ຺ຂິໂຕ ພາຎ຺ຫຄິລາໂນ ສີໂຕທກປຣິກ຺ຂິຕ຺ໂຕ ອຸຓ຺ໂຫທກປຏິເສວີ, ໂສ ສີໂຕທກໍ ອລຠມາໂນ ກາລງ຺ກເຣຍ຺ຍາ’’ຕິ ເອວມາທິນາ ຠນ຺ເຕ ຠຄວາ ຈຕ຺ຕາໂຣ ອຸປາເຍ ທສ຺ເສຕ຺ວາ ອຸປາລິໍ ຄຫປຕິໍ ຍຖາຠູຕມຕ຺ຖໍ ຎາເປສິ.

ປຸຈ຺ຉາ – ເອວໍ ໂຂ ອາວຸໂສ ອຸປາລິ ຄຫປຕິ ຠຄວຕາ ສຎ຺ຎາປິໂຕ ອິມສ຺ມິໍ ຘມ຺ມວິນເຍ ປສນ຺ໂນ ກີທິສໍ ປສນ຺ນາກາຣໍ ອກາສິ, ກຖຎ຺ຈ ຠຄວາ ຕໍ ປຸນ ອນຸສາສິຕ຺ວາ ອຸຕ຺ຕຣິ ວິເນສິ.

ວິສ຺ສຊ຺ຊນາ – ‘‘ປຸຣິເມເນວາຫໍ ຠນ຺ເຕ ໂອປມ຺ເມນ ຠຄວໂຕ ອຕ຺ຕມໂນ ອຠິຣທ຺ໂຘ, ອປິຈາຫໍ ອິມານິ ຠຄວໂຕ ວິຈິຕ຺ຣານິ ປຎ຺ຫປຏິຠານານິ ໂສຕຸກາໂມ, ເອວາຫໍ ຠຄວນ຺ຕໍ ປຈ຺ຈນີກໍ ກາຕພ຺ພໍ ອມຎ຺ຎິສ຺ສ’’ນ຺ຕິ, ເອວມາທິນາ ຠນ຺ເຕ ອຸປາລິ ຄຫປຕິ ຠຄວຕາ ວິຎ຺ຎາປິໂຕ ອິມສ຺ມິໍ ຘມ຺ມວິນເຍ ປສນ຺ໂນ ປສນ຺ນາກາຣໍ ອກາສິ. ຕຕ຺ຖ ຠຄວາ ຈ ຠນ຺ເຕ ‘‘ອນຸວິຈ຺ຈກາຣໍ ໂຂ ຄຫປຕິ ກໂຣຫິ, ອນຸວິຈ຺ຈກາໂຣ ຕຸມ຺ຫາທິສານໍ ຎາຕມນຸສ຺ສານໍ ສາຘຸ ໂຫຕີ’’ຕິ ເອວມາທິນາ ປຸນ ອນຸສາສິຕ຺ວາ ອຸຕ຺ຕຣິ ຍາວ ຘມ຺ມຈກ຺ຂຸປຏິລາຠາ ວິເນສິ.

ປຸຈ຺ຉາ – ກຖຎ຺ຈາວຸໂສ ນິຄຓ຺ຐສ຺ສ ນາຏປຸຕ຺ຕສ຺ສ ອຸປາລິສ຺ສ ຄຫປຕິສ຺ສ ນິເວສນໍ ຄນ຺ຕ຺ວາ ອາວີມໍສນາ ຈ ອຸປາລິສ຺ສ ຄຫປຕິສ຺ສ ປຈ຺ຈຸຕ຺ຕຣາ ກຖາ ຈ ອໂຫສິ.

ວິສ຺ສຊ຺ຊນາ – ‘‘ອຸມ຺ມຕ຺ໂຕສິ ຕ຺ວໍ ຄຫປຕິ ທຕ຺ໂຕສິ ຕ຺ວໍ ຄຫປຕີ’’ຕິ ເອວມາທິນາ ຠນ຺ເຕ ນິຄຓ຺ຐສ຺ສ ນາຏປຸຕ຺ຕສ຺ສ ອຸປາລິສ຺ສ ຄຫປຕິສ຺ສ ນິເວສນໍ ຄນ຺ຕ຺ວາ ວີມໍສາ ຈ ‘‘ຠທ຺ທິກາ ຠນ຺ເຕ ອາວຏ຺ຏນີມາຍາ ກລ຺ຍາຓີ ຠນ຺ເຕ ອາວຏ຺ຏນີມາຍາຕິ’’ ເອວມາທິນາ ອຸປາລິສ຺ສ ຄຫປຕິສ຺ສ ປຈ຺ຈຸຕ຺ຕຣກຖາ ຈ ອໂຫສິ.

ຘີຣສ຺ສ ວິຄຕໂມຫສ຺ສ,

ປຠິນ຺ນຂີລສ຺ສ ວິຊິຕວິຊຍສ຺ສ;

ອນີຆສ຺ສ ສຸສມຈິຕ຺ຕສ຺ສ,

ວຸທ຺ຘສີລສ຺ສ ສາຘຸປຎ຺ຎສ຺ສ;

ເວສມນ຺ຕຣສ຺ສ ວິມລສ຺ສ,

ຠຄວໂຕ ຕສ຺ສ ສາວໂກຫມສ຺ມິໍ.

ອກຖໍ ກຖິສ຺ສ ຕຸສິຕສ຺ສ,

ວນ຺ຕໂລກາມິສສ຺ສ ມຸທິຕສ຺ສ;

ກຕສມຓສ຺ສ ມນຸຊສ຺ສ,

ອນ຺ຕິມສາຣີຣສ຺ສ ນຣສ຺ສ.

ອໂນປມສ຺ສ ວິຣຊສ຺ສ,

ຠຄວໂຕ ຕສ຺ສ ສາວໂກ ຫມສ຺ມິ –

ຕຓ຺ຫຈ຺ຉິທສ຺ສ ພຸທ຺ຘສ຺ສ,

ວີຕຘູມສ຺ສ ອນຸປລິຕ຺ຕສ຺ສ.

ອາຫຸເນຍ຺ຍສ຺ສ ຍກ຺ຂສ຺ສ,

ອຸຕ຺ຕມປຸຄ຺ຄລສ຺ສ ອຕຸລສ຺ສ;

ມຫໂຕ ຍສຄ຺ຄປຕ຺ຕສ຺ສ,

ຠຄວໂຕ ຕສ຺ສ ສາວໂກ ຫມສ຺ມິ –

ກຸກ຺ກຸຣວຕິກສຸຕ຺ຕ

ປຸຈ຺ຉາ – ກຸກ຺ກຸຣວຕິກສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ໂກລິເຍສຸ ຠນ຺ເຕ ຫລິທ຺ທວສເນ ນາມ ໂກລິຍານໍ ນິຄເມ ປຸຓ຺ຓຎ຺ຈ ໂກລິຍປຸຕ຺ຕໍ ໂຄວຕິກໍ ອເຈລຎ຺ຈ ເສນິຍໍ ກຸກ຺ກຸຣວຕິກໍ ອາຣພ຺ຠ ຠາສິຕໍ. ປຸຓ຺ໂຓ ຠນ຺ເຕ ໂກລິຍ ປຸຕ຺ໂຕ ໂຄວຕິໂກ ຠຄວນ຺ຕໍ ເອຕທໂວຈ ‘‘ອຍໍ ຠນ຺ເຕ ອເຈໂລ ເສນິໂຍ ກຸກ຺ກຸຣວຕິໂກ ທຸກ຺ກຣກາຣໂກ ຉມານິກ຺ຂິຕ຺ຕໍ ໂຠຊນໍ ຠຸຎ຺ຊຕິ, ຕສ຺ສ ຕໍ ກຸກ຺ກຸຣວຕໍ ທີຆຣຕ຺ຕໍ ສມຕ຺ຕໍ ສມາທິນ຺ນໍ, ຕສ຺ສ ກາ ຄຕິ, ໂກ ອຠິສມ຺ປຣາໂຍ’’ຕິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ອຠຍຣາຊກຸມາຣສຸຕ຺ຕ

ປຸຈ຺ຉາ – ເຕນາວຸໂສ ຊານຕາ…ເປ… ສມ຺ມາສມ຺ພຸທ຺ເຘນ ອຠຍຣາຊກຸມາຣສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ຣາຊຄເຫ ເມ ຠນ຺ເຕ ອຠຍໍ ຣາຊກຸມາຣໍ ອາຣພ຺ຠ ຠາສິຕໍ. ອຠໂຍ ຠນ຺ເຕ ຣາຊກຸມາໂຣ ຠຄວນ຺ຕໍ ອຸປສງ຺ກມິຕ຺ວາ ເອຕທໂວຈ ‘‘ຠາເສຍ຺ຍ ນຸ ໂຂ ຠນ຺ເຕ ຕຖາຄໂຕ ຕໍ ວາຈໍ, ຍາ ສາ ວາຈາ ປເຣສໍ ອປ຺ປິຍາ ອມນາປາ’’ຕິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ພຫຸເວທນີຍສຸຕ຺ຕ

ປຸຈ຺ຉາ – ພຫຸເວທນີຍສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອາຍສ຺ມນ຺ຕຎ຺ຈ ອຸທາຍິໍ ປຎ຺ຈກງ຺ຄຎ຺ຈ ຖປຕິໍ ອາຣພ຺ຠ ຠາສິຕໍ, ປຎ຺ຈກງ຺ໂຄ ຠນ຺ເຕ ຖປຕິ ອາຍສ຺ມນ຺ຕໍ ອຸທາຍິໍ ອຸປສງ຺ກມິຕ຺ວາ ເວທນໍ ປຸຈ຺ຉິ, ອາຍສ຺ມາ ຠນ຺ເຕ ອຸທາຍີ ປຎ຺ຈກງ຺ຄໍ ຖປຕິໍ ເອຕທໂວຈ ‘‘ຕິສ຺ໂສ ໂຂ ຖປຕິ ເວທນາ ວຸຕ຺ຕາ ຠຄວຕາ ສຸຂາ ເວທນາ ທຸກ຺ຂາ ເວທນາ ອທຸກ຺ຂມສຸຂາ ເວທນາ’’ຕິ. ເອວໍ ວຸຕ຺ເຕ ຠນ຺ເຕ ປຎ຺ຈກງ຺ໂຄ ຖປຕິ ອາຍສ຺ມນ຺ຕໍ ອຸທາຍິໍ ເອຕທໂວຈ ‘‘ນ ໂຂ ຠນ຺ເຕ ອຸທາຍິ ຕິສ຺ໂສ ເວທນາ ວຸຕ຺ຕາ ຠຄວຕາ, ທ຺ເວ ເວທນາ ວຸຕ຺ຕາ ຠຄວຕາ ສຸຂາ ເວທນາ ທຸກ຺ຂາ ເວທນາ, ຍາຍໍ ຠນ຺ເຕ ອທຸກ຺ຂມສຸຂາ ເວທນາ, ສນ຺ຕສ຺ມິໍ ເອສາ ປຓີເຕ ສຸເຂ ວຸຕ຺ຕາ ຠຄວຕາ’’ຕິ. ເນວ ອສກ຺ຂິ ໂຂ ຠນ຺ເຕ ອາຍສ຺ມາ ອຸທາຍີ ປຎ຺ຈກງ຺ຄໍ ຖປຕິໍ ສຎ຺ຎາເປຕຸໍ, ນ ປນ ອສກ຺ຂິ ປຎ຺ຈກງ຺ໂຄ ຖປຕິ ອາຍສ຺ມນ຺ຕໍ ອຸທາຍິໍ ສຎ຺ຎາເປຕຸໍ. ອສ຺ໂສສິ ໂຂ ອາຍສ຺ມາ ອານນ຺ໂທ ອາຍສ຺ມໂຕ ອຸທາຍິສ຺ສ ປຎ຺ຈກງ຺ເຄນ ຖປຕິນາ ສທ຺ຘິໍ ອິມໍ ກຖາສລ຺ລາປໍ, ອຖ ໂຂ ຠນ຺ເຕ ອາຍສ຺ມາ ອານນ຺ໂທ ຍາວຕໂກ ອໂຫສິ ອາຍສ຺ມໂຕ ອຸທາຍິສ຺ສ ປຎ຺ຈກງ຺ເຄນ ຖປຕິນາ ສທ຺ຘິໍ ກຖາສລ຺ລາໂປ, ຕໍ ສພ຺ພໍ ຠຄວໂຕ ອາໂຣເຈສິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ອປຓ຺ຓກສຸຕ຺ຕ

ປຸຈ຺ຉາ – ອປຓ຺ຓກສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ໂກສເລສຸ ຠນ຺ເຕ ສາລາຍໍ ນາມ ໂກສລານໍ ພ຺ຣາຫ຺ມຓຄາເມ ສາເລຍ຺ຍເກ ພ຺ຣາຫ຺ມຓຄຫປຕິເກ ອາຣພ຺ຠ ຠາສິຕໍ. ສມ຺ພຫຸລາ ຠນ຺ເຕ ອຎ຺ຎຕິຕ຺ຖິຍາ ສາເລຍ຺ຍການໍ ພ຺ຣາຫ຺ມຓຄຫປຕິການໍ ອຕ຺ຕໂນ ອຕ຺ຕໂນ ມິຈ຺ຉາທິຏ຺ຐິໂຍ ປຏິຄ຺ຄຓ຺ຫາເປສຸໍ ອຸຄ຺ຄຓ຺ຫາເປສຸໍ. ເຕ ປນ ຠນ຺ເຕ ສາເລຍ຺ຍກາ ພ຺ຣາຫ຺ມຓຄຫປຕິກາ ເອກທິຏ຺ຐິຍມ຺ປິ ປຕິຏ຺ຐາຕຸໍ ນ ສກ຺ຂິໍສຸ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ປຸຈ຺ຉາ – ຕຕ຺ຣ ອາວຸໂສ ຠຄວຕາ ປຐມໍ ມິຈ຺ຉາວາໂທ ຈ ສມ຺ມາວາໂທ ຈ ກຖໍ ວິຠຊິຕ຺ວາ ປກາສິໂຕ.

ວິສ຺ສຊ຺ຊນາ – ຕຕ຺ຣ ຠນ຺ເຕ ຠຄວຕາ ‘‘ສນ຺ຕິ ຄຫປຕໂຍ ເອເກ ສມຓພ຺ຣາຫ຺ມຓາ ເອວໍວາທິໂນ ເອວໍທິຏ຺ຐິໂນ ນຕ຺ຖິ ທິນ຺ນໍ ນຕ຺ຖິ ຍິຏ຺ຐໍ ນຕ຺ຖິ ຫຸຕໍ ນຕ຺ຖິ ສຸກຕທຸກ຺ກຏານໍ ກມ຺ມານໍ ຜລໍ ວິປາໂກ’’ຕິ ເອວມາທິນາ ປຐມໍ ມິຈ຺ຉາວາໂທ ຈ ສມ຺ມາວາໂທ ຈ ວິຠຊິຕ຺ວາ ປກາສິໂຕ.

ປຸຈ຺ຉາ – ຕຕ຺ຖ ອາວຸໂສ ຠຄວຕາ ມິຈ຺ຉາວາທີນຎ຺ຈ ໂທໂສ ສມ຺ມາວາທີນຎ຺ຈ ຄຸໂຓ ກຖໍ ວິຈາເຣຕ຺ວາ ປກາສິໂຕ.

ວິສ຺ສຊ຺ຊນາ – ຕຕ຺ຖ ຠນ຺ເຕ ຠຄວຕາ ‘‘ຕຕ຺ຣ ຄຫປຕໂຍ ເຍເຕ ສມຓພ຺ຣາຫ຺ມຓາ ເອວໍວາທິໂນ ເອວໍທິຏ຺ຐິໂນ ນຕ຺ຖິ ທິນ຺ນໍ ນຕ຺ຖິ ຍິຏ຺ຐໍ ນຕ຺ຖິ ຫຸຕໍ ນຕ຺ຖິ ສຸກຕທຸກ຺ກຏານໍ ກມ຺ມານໍ ຜລໍ ວິປາໂກ’’ຕິ ເອວມາທິນາ ຠນ຺ເຕ ມິຈ຺ຉາວາທີນຎ຺ຈ ໂທໂສ ສມ຺ມາວາທີນຎ຺ຈ ຄຸໂຓ ຠຄວຕາ ວິຈາເຣຕ຺ວາ ປກາສິໂຕ.

ປຸຈ຺ຉາ – ກຖຎ຺ຈາວຸໂສ ຕຕ຺ຖ ຠຄວຕາ ວິຎ຺ຎຸໂນ ປຸຣິສປຸຄ຺ຄລສ຺ສ ປຏິສຎ຺ຈິກ຺ຂຓາ ປກາສິຕາ.

ວິສ຺ສຊ຺ຊນາ – ຕຕ຺ຣ ຄຫປຕໂຍ ວິຎ຺ຎູ ປຸຣິໂສ ອິຕິ ປຏິສຎ຺ຈິກ຺ຂຕີຕິ ເອວມາທິນາ ຠນ຺ເຕ ຕຕ຺ຖ ຠຄວຕາ ວິຎ຺ຎຸໂນ ປຸຣິສປຸຄ຺ຄລສ຺ສ ປຏິສຎ຺ຈິກ຺ຂຓາ ປກາສິຕາ.

ປຸຈ຺ຉາ – ກຖຎ຺ຈາວຸໂສ ຠຄວຕາ ອຎ຺ເຎສຸປິ ມິຈ຺ຉາວາທສມ຺ມາວາເທສຸ ອປຓ຺ຓກປຏິປທາ ວິຈາເຣຕ຺ວາ ປກາສິຕາ, ຕໍ ສງ຺ເຂປໂຕ ກເຖສິ.

ວິສ຺ສຊ຺ຊນາ – ຍເຖວ ຠນ຺ເຕ ປຐເມ ວາເທ, ເອວເມວ ໂຂ ຠນ຺ເຕ ອກິຣິຍວາທາທີສຸ ຈຕູສຸ ຈ ມິຈ຺ຉາວາເທສຸ ໂທສໍ ກິຣິຍວາທາທີສຸ ຈ ຈຕູສຸ ສມ຺ມາວາເທສຸ ຄຸຓໍ, ຕຕ຺ຖ ຈ ວິຎ຺ຎຸໂນ ປຸຣິສສ຺ສ ປຏິສຎ຺ຈິກ຺ຂຓາກາຣໍ ທສ຺ເສຕ຺ວາ ຠຄວຕາ ອປຓ຺ຓກປຏິປທາ ປກາສິຕາ.

ອມ຺ພລຏ຺ຐິກຣາຫຸໂລວາທສຸຕ຺ຕ

ປຸຈ຺ຉາ – ອມ຺ພລຏ຺ຐິກຣາຫຸໂລວາທສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ຠາສິຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ອາຍສ຺ມນ຺ຕໍ ຣາຫຸລໍ ອາຣພ຺ຠ ຠາສິຕໍ.

ມຫາຣາຫຸໂລວາທສຸຕ຺ຕ

ປຸຈ຺ຉາ – ມຫາຣາຫຸໂລວາທສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອາຍສ຺ມນ຺ຕໍ ຣາຫຸລໍ ອາຣພ຺ຠ ຠາສິຕໍ. ອາຍສ຺ມາ ຠນ຺ເຕ ຣາຫຸໂລ ຠຄວໂຕ ເຈວ ອຕ຺ຕໂນ ຈ ອຕ຺ຕຠາວສມ຺ປຕ຺ຕິໍ ນິສ຺ສາຍ ເຄຫສ຺ສິຕໍ ຉນ຺ທຣາຄໍ ອຸປ຺ປາເທສິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ຈູຬມາລຸກ຺ຍສຸຕ຺ຕ

ປຸຈ຺ຉາ – ຈູຬມາລຸກ຺ຍສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອາຍສ຺ມນ຺ຕໍ ມາລຸກ຺ຍປຸຕ຺ຕໍ ອາຣພ຺ຠ ຠາສິຕໍ. ອາຍສ຺ມາ ຠນ຺ເຕ ມາລຸກ຺ຍປຸຕ຺ໂຕ ອຕ຺ຕໂນ ປວິວິຕ຺ຕສ຺ສ ຣໂຫຄຕສ຺ສ ປຏິສລ຺ລີນສ຺ສ ເຈຕໂສ ປຣິວິຕກ຺ກໍ ຠຄວໂຕ ອາໂຣເຈສິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ມຫາມາລຸກ຺ຍສຸຕ຺ຕ

ປຸຈ຺ຉາ – ມຫາມາລຸກ຺ຍສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ຕສ຺ມິໍເຍວ ຠນ຺ເຕ ສາວຕ຺ຖິຍໍ ອາຍສ຺ມນ຺ຕໍ ມຫາມາລຸກ຺ຍປຸຕ຺ຕໍ ອາຣພ຺ຠ ຠາສິຕໍ.

ຠທ຺ທາລິສຸຕ຺ຕ

ປຸຈ຺ຉາ – ເຕນາວຸໂສ ຠຄວຕາ…ເປ… ສມ຺ມາສມ຺ພຸທ຺ເຘນ ຠທ຺ທາລິສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອາຍສ຺ມນ຺ຕໍ ຠທ຺ທາລິໍ ອາຣພ຺ຠ ຠາສິຕໍ. ອາຍສ຺ມາ ຠນ຺ເຕ ຠທ຺ທາລິ ຠຄວຕາ ສິກ຺ຂາປເທ ປຎ຺ຎາປິຍມາເນ ຠິກ຺ຂຸສງ຺ເຆ ສິກ຺ຂໍ ສມາທິຍມາເນ ອນຸສ຺ສາຫໍ ປເວເທສິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ອຈ຺ຈໂຍ ມໍ ຠນ຺ເຕ ອຈ຺ຈຄມາ ຍຖາພາລໍ ຍຖາມູຬ຺ຫໍ ຍຖາອກຸສລໍ, ໂຍຫໍ ຠຄວຕາ ສິກ຺ຂາປເທ ປຎ຺ຎາປິຍມາເນ ຠິກ຺ຂຸສງ຺ເຆ ສິກ຺ຂໍ ສມາທິຍມາເນ ອນຸສ຺ສາຫໍ ປເວເທສິໍ, ຕສ຺ສ ເມ ຠນ຺ເຕ ຠຄວາ ອຈ຺ຈຍໍ ອຈ຺ຈຍໂຕ ປຏິຄ຺ຄຓ຺ຫາຕຸ ອາຍຕິໍ ສໍວຣາຍ –

ປຸຈ຺ຉາ – ອຖ ໂຂ ອາວຸໂສ ອາຍສ຺ມາ ຠທ຺ທາລິ ຠຄວນ຺ຕໍ ກີທິສໍ ປຎ຺ຫໍ ປຸຈ຺ຉິ, ກຖຎ຺ຈສ຺ສ ຠຄວາ ຕໍ ວິຠຊິຕ຺ວາ ພ຺ຍາກາສິ.

ວິສ຺ສຊ຺ຊນາ – ອຖ ໂຂ ຠນ຺ເຕ ອາຍສ຺ມາ ຠທ຺ທາລິ ‘‘ໂກ ນຸ ໂຂ ຠນ຺ເຕ ເຫຕຸ, ໂກ ປຈ຺ຈໂຍ, ເຍນ ມິເຘກຈ຺ຈໍ ຠິກ຺ຂຸໍ ປສຍຸ ປສຍຸ ກາຣຓໍ ກໂຣນ຺ຕີ’’ຕິ ເອວມາທິນາ ຠຄວນ຺ຕໍ ປຎ຺ຫໍ ອປຸຈ຺ຉິ. ຠຄວາ ຈ ຠນ຺ເຕ ‘‘ອິຘ ຠທ຺ທາລິ ເອກຈ຺ໂຈ ຠິກ຺ຂຸ ອຠິຓ຺ຫາປຕ຺ຕິໂກ ໂຫຕິ, ອາປຕ຺ຕິພຫຸໂລ’’ ເອວມາທິນາ ອາຍສ຺ມໂຕ ຠທ຺ທາລິສ຺ສ ວິຠຊິຕ຺ວາ ພ຺ຍາກາສິ.

ປຸຈ຺ຉາ – ຕທາປິ ໂຂ ອາວຸໂສ ອາຍສ຺ມາ ຠທ຺ທາລິ ປຸນປິ ຠຄວນ຺ຕໍ ກີທິສໍ ປຎ຺ຫໍ ປຸຈ຺ຉິ, ກຖຎ຺ຈສ຺ສ ຠຄວາ ຕມ຺ປິ ວິຠຊິຕ຺ວາ ພ຺ຍາກາສິ.

ວິສ຺ສຊ຺ຊນາ – ຕທາປິ ຠນ຺ເຕ ອາຍສ຺ມາ ຠທ຺ທາລິ ‘‘ໂກ ນຸ ໂຂ ຠນ຺ເຕ ເຫຕຸ, ໂກ ປຈ຺ຈໂຍ, ເຍນ ປຸພ຺ເພ ອປ຺ປຕຣານິ ເຈວ ສິກ຺ຂາປທານິ ອເຫສຸໍ, ພຫຸຕຣາ ຈ ຠິກ຺ຂູ ອຎ຺ຎາຍ ສຓ຺ຑຫິໍສຸ. ໂກ ປນ ຠນ຺ເຕ ເຫຕຸ, ໂກ ປຈ຺ຈໂຍ ເຍນ ເອຕຣຫິ ພຫຸຕຣານິ ເຈວ ສິກ຺ຂາປທານິ ໂຫນ຺ຕິ ອປ຺ປຕຣາ ຈ ຠິກ຺ຂູ ອຎ຺ຎາຍ ສຓ຺ຑຫນ຺ຕີ’’ຕິ ຠຄວນ຺ຕໍ ປຸນປິ ປຎ຺ຫໍ ອປຸຈ຺ຉິ. ຠຄວາ ຈ ຠນ຺ເຕ ‘‘ເອວເມຕໍ ຠທ຺ທາລິ ໂຫຕິ, ສຕ຺ເຕສຸ ຫາຍມາເນສຸ ສທ຺ຘມ຺ເມ ອນ຺ຕຣຘາຍມາເນ ພຫຸຕຣານິ ໂຫນ຺ຕິ ອປ຺ປຕຣາ ຈ ຠິກ຺ຂູ ອຎ຺ຎາຍ ສຓ຺ຑຫນ຺ຕີ’’ຕິ, ເອວມາທິນາ ອາຍສ຺ມໂຕ ຠທ຺ທາລິສ຺ສ ວິຠຊິຕ຺ວາ ວິຠຊິຕ຺ວາ ພ຺ຍາກຕາ.

ລຏຸກິໂກປມສຸຕ຺ຕ

ປຸຈ຺ຉາ – ລຏຸກິໂກປມສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ອງ຺ຄຸຕ຺ຕຣາເປສຸ ຠນ຺ເຕ ອາປເຓ ນາມ ອງ຺ຄຸຕ຺ຕຣາປານໍ ນິຄເມ ອາຍສ຺ມນ຺ຕໍ ອຸທາຍິໍ ອາຣພ຺ຠ ຠາສິຕໍ. ອາຍສ຺ມາ ຠນ຺ເຕ ອຸທາຍີ ຠຄວນ຺ຕໍ ອຸປສງ຺ກມິຕ຺ວາ ເອຕທໂວຈ ‘‘ອິຘ ມຍ຺ຫໍ ຠນ຺ເຕ ຣໂຫຄຕສ຺ສ ປຏິສລ຺ລີນສ຺ສ ເອວໍ ເຈຕໂສ ປຣິວິຕກ຺ໂກ ອຸທປາທິ ‘‘ພຫູນໍ ວຕ ໂນ ຠຄວາ ທຸກ຺ຂຘມ຺ມານໍ ອປຫຕ຺ຕາ, ພຫູນໍ ວຕ ໂນ ຠຄວາ ສຸຂຘມ຺ມານໍ ອຸປຫຕ຺ຕາ, ພຫູນໍ ວຕ ໂນ ຠຄວາ ອກຸສລານໍ ຘມ຺ມານໍ ອປຫຕ຺ຕາ, ພຫູນໍ ວຕ ໂນ ຠຄວາ ກຸສລານໍ ຘມ຺ມານໍ ອຸປຫຕ຺ຕາ’ຕິ’’. ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ປຸຈ຺ຉາ – ອຖ ໂຂ ອາວຸໂສ ຠຄວາ ກີທິສີ ອຸປມາໂຍ ທສ຺ເສຕ຺ວາ ຠິກ຺ຂູນໍ ໂອວາທໍ ອທາສິ.

ວິສ຺ສຊ຺ຊນາ – ອຖ ໂຂ ຠນ຺ເຕ ຠຄວາ ລຏຸກິໂກປມໍ ຫຕ຺ຖິນາໂຄປມໍ ທລິທ຺ທປຸຣິໂສປມໍ ຄຫປຕິໂກປມນ຺ຕິ ຈຕສ຺ໂສ ອຸປມາໂຍ ທສ຺ເສຕ຺ວາ ຠິກ຺ຂູນໍ ໂອວາທມທາສິ.

ປຸຈ຺ຉາ – ເອວຎ຺ຈາວຸໂສ ຠຄວາ ຈຕູຫິ ອຸປມາຫິ ຠິກ຺ຂູນໍ ໂອວາທໍ ທຕ຺ວາ ກຖໍ ອຸຕ຺ຕຣິ ຘມ຺ມເທສນໍ ປວຑ຺ເຒສິ.

ວິສ຺ສຊ຺ຊນາ – ເອວໍ ໂຂ ຠນ຺ເຕ ຠຄວາ ຈຕູຫິ ອຸປມາຫິ ຠິກ຺ຂູນໍ ໂອວາທໍ ທຕ຺ວາ ‘‘ຈຕ຺ຕາໂຣ ເມ ອຸທາຍິ ປຸຄ຺ຄລາ ສນ຺ໂຕ ສໍວິຊ຺ຊມານາ ໂລກສ຺ມິໍ’’ນ຺ຕິ ເອວມາທິນາ ອຸຕ຺ຕຣິ ຠິກ຺ຂູນໍ ຘມ຺ມກຖໍ ປວຑ຺ເຒສິ.

ຈາຕຸມສຸຕ຺ຕ

ປຸຈ຺ຉາ – ຈາຕຸມສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ຈາຕຸມາຍໍ ຠນ຺ເຕ ອາຍສ຺ມນ຺ຕານໍ ສາຣິປຸຕ຺ຕໂມຄ຺ຄລານຕ຺ເຖຣານໍ ສທ຺ຘິວິຫາຣິເກ ອຘຸນາ ປພ຺ພຊິເຕ ສມ຺ພຫຸເລ ຠິກ຺ຂູ ອາຣພ຺ຠ ຠາສິຕໍ. ສາຣິປຸຕ຺ຕໂມຄ຺ຄລ຺ລານປ຺ປມຸຂານິ ຠນ຺ເຕ ປຎ຺ຈມຕ຺ຕານິ ຠິກ຺ຂຸສຕານິ ຈາຕຸມໍ ອນຸປ຺ປຕ຺ຕານິ ໂຫນ຺ຕິ ຠຄວນ຺ຕໍ ທສ຺ສນາຍ, ເຕ ຈ ອາຄນ຺ຕຸກາ ຠິກ຺ຂູ ເນວາສິເກຫິ ຠິກ຺ຂູຫິ ສທ຺ຘິໍ ປຏິສມ຺ໂມທມານາ ເສນາສນານິ ປຎ຺ຎາປຍມານາ ປຕ຺ຕຈີວຣານິ ປຏິສາມຍມານາ ອຸຈ຺ຈາສທ຺ທາ ມຫາສທ຺ທາ ອເຫສຸໍ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ປຸຈ຺ຉາ – ກຖຎ຺ຈາວຸໂສ ຕຕ຺ຖ ຠຄວາ ຠິກ຺ຂູນໍ ໂອວາທໍ ອທາສິ.

ວິສ຺ສຊ຺ຊນາ – ຈຕ຺ຕາຣິມານິ ຠິກ຺ຂເວ ຠຍານິ ອຸທໂກໂຣຫນ຺ເຕ ປາຕິກງ຺ຂິຕພ຺ພານີຕິ ເອວມາທິນາ ຠນ຺ເຕ ຠຄວາ ຕຕ຺ຖ ຠິກ຺ຂູນໍ ໂອວາທໍ ອທາສິ.

ນຬກປານສຸຕ຺ຕ

ປຸຈ຺ຉາ – ນຬກປານສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ຠາສິຕໍ.

ວິສ຺ສຊ຺ຊນາ – ນຬກປາເນ ຠນ຺ເຕ ອນຸຣຸທ຺ຘຕ຺ເຖຣປ຺ປມຸເຂ ສມ຺ພຫຸເລ ອຠິຎ຺ຎາເຕ ອຠິຎ຺ຎາເຕ ກຸລປຸຕ຺ເຕ ອາຣພ຺ຠ ຠາສິຕໍ.

ໂຄລິຍານິສຸຕ຺ຕ

ປຸຈ຺ຉາ – ໂຄລິຍານິສຸຕ຺ຕໍ ປນາວຸໂສ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ເກນ ຠາສິຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ອາຍສ຺ມນ຺ຕໍ ໂຄລິຍານິໍ ອາຣພ຺ຠ ອາຍສ຺ມຕາ ສາຣິປຸຕ຺ຕຕ຺ເຖເຣນ ຘມ຺ມເສນາປຕິນາ ຠາສິຕໍ. ອາຍສ຺ມາ ຠນ຺ເຕ ໂຄລິຍານິ ອາຣຎ຺ຎິໂກ ປທສມາຈາໂຣ ສງ຺ຆມຊ຺ເຌ ໂອສໂຏ ໂຫຕິ ເກນຈິເທວ ກຣຓີເຍນ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ກີຏາຄິຣິສຸຕ຺ຕ

ປຸຈ຺ຉາ – ເຕນາວຸໂສ ຠຄວຕາ…ເປ… ສມ຺ມາສມ຺ພຸທ຺ເຘນ ກີຏາຄິຣິສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ກາສີສຸ ຠນ຺ເຕ ກີຏາຄິຣິສ຺ມິໍ ກາສີນໍ ນິຄເມ ອສ຺ສຊິປຸນພ຺ພສຸເກ ຠິກ຺ຂູ ອາຣພ຺ຠ ຠາສິຕໍ. ອສ຺ສຊິປຸນພ຺ພສຸກາ ຠນ຺ເຕ ຠິກ຺ຂູ ຠິກ຺ຂູຫິ ສຫຘມ຺ມິກໍ ວຸຈ຺ຈມານາ ເອວມາຫໍສຸ ‘‘ມຍໍ ໂຂ ອາວຸໂສ ສາຍຎ຺ເຈວ ຠຸຎ຺ຊາມ ປາໂຕ ຈ ທິວາ ຈ ວິກາເລ, ເຕ ມຍໍ ສາຍຎ຺ເຈວ ຠຸຎ຺ຊມານາ ປາໂຕ ຈ ທິວາ ຈ ວິກາເລ ອປ຺ປາພາຘຕຎ຺ຈ ສຎ຺ຊານາມ ອປ຺ປາຕງ຺ກຕຎ຺ຈ ລຫຸຏ຺ຐານຎ຺ຈ ພລຎ຺ຈ ຜາສຸວິຫາຣຎ຺ຈ, ເຕ ມຍໍ ກິໍ ສນ຺ທິຏ຺ຐິກໍ ຫິຕ຺ວາ ກາລິກໍ ອນຸຘາວິສ຺ສາມ, ສາຍຎ຺ເຈວ ມຍໍ ຠຸຎ຺ຊິສ຺ສາມ ປາໂຕ ຈ ທິວາ ຈ ວິກາເລ’’ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ເຕວິຊ຺ຊວຈ຺ຉສຸຕ຺ຕ

ປຸຈ຺ຉາ – ເຕວິຊ຺ຊວຈ຺ຉສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ເວສາລິຍໍ ຠນ຺ເຕ ວຈ຺ຉໂຄຕ຺ຕໍ ປຣິພ຺ພາຊກໍ ອາຣພ຺ຠ ຠາສິຕໍ. ວຈ຺ຉໂຄຕ຺ໂຕ ຠນ຺ເຕ ປຣິພ຺ພາຊໂກ ຠຄວນ຺ຕໍ ເອຕທໂວຈ ‘‘ສຸຕໍ ເມ ຠນ຺ເຕ ສມໂຓ ໂຄຕໂມ ສພ຺ພຎ຺ຎູ ສພ຺ພທສ຺ສາວີ ອປຣິເສສໍ ຎາຓທສ຺ສນໍ ປຏິຊານາຕິ, ຈຣໂຕ ຈ ເມ ຕິຏ຺ຐໂຕ ຈ ສຸຕ຺ຕສ຺ສ ຈ ຊາຄຣສ຺ສ ຈ ສຕຕໍ ສມິຕໍ ຎາຓທສ຺ສນໍ ປຈ຺ຈຸປຏ຺ຐິຕ’’ນ຺ຕິ. ເຍ ເຕ ຠນ຺ເຕ ເອວມາຫໍສຸ ‘‘ສມໂຓ ໂຄຕໂມ ສພ຺ພຎ຺ຎູ ສພ຺ພທສ຺ສາວີ ອປຣິເສສໍ ຎາຓທສ຺ສນໍ ປຏິຊານາຕິ, ຈຣໂຕ ຈ ເມ ຕິຏ຺ຐໂຕ ຈ ສຸຕ຺ຕສ຺ສ ຈ ຊາຄຣສ຺ສ ຈ ສຕຕໍ ສມິຕໍ ຎາຓທສ຺ສນໍ ປຈ຺ຈຸປຏ຺ຐິຕ’’ນ຺ຕິ. ກຈ຺ຈິ ເຕ ຠນ຺ເຕ ຠຄວໂຕ ວຸຕ຺ຕວາທິໂນ, ນ ຈ ຠຄວນ຺ຕໍ ອຠູເຕນ ອພ຺ຠາຈິກ຺ຂນ຺ຕິ, ຘມ຺ມສ຺ສ ຈານຸຘມ຺ມໍ ພ຺ຍາກໂຣນ຺ຕິ, ນ ຈ ໂກຈິ ສຫຘມ຺ມິໂກ ວາທານຸວາໂທ ຄາຣຍ຺ຫໍ ຐານໍ ອາຄຈ຺ຉຕີ’’ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ອຄ຺ຄິວຈ຺ຉສຸຕ຺ຕ

ປຸຈ຺ຉາ – ອຄ຺ຄິວຈ຺ຉສຸຕ຺ຕໍ ປນາວຸໂສ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ວຈ຺ຉໂຄຕ຺ຕໍ ປຣິພ຺ພາຊກໍ ຠາສິຕໍ. ວຈ຺ຉໂຄຕ຺ໂຕ ຠນ຺ເຕ ປຣິພ຺ພາຊໂກ ຠຄວນ຺ຕໍ ອຸປສງ຺ກມິຕ຺ວາ ‘‘ກິໍ ນຸ ໂຂ ໂຠ ໂຄຕມ ‘ສສ຺ສໂຕ ໂລໂກ ອິທເມວ ສຈ຺ຈໍ ໂມຆມຎ຺ຎ’ນ຺ຕິ ເອວໍທິຏ຺ຐິ ຠວໍ ໂຄຕໂມ’’ຕິ ເອວມາທິກໍ ປຎ຺ຫໍ ອປຸຈ຺ຉິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ມຫາວຈ຺ຉສຸຕ຺ຕ

ປຸຈ຺ຉາ – ມຫາວຈ຺ຉສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ວຈ຺ຉໂຄຕ຺ຕໍເຍວ ປຣິພ຺ພາຊກໍ ອາຣພ຺ຠ ຠາສິຕໍ. ວຈ຺ຉໂຄຕ຺ໂຕ ຠນ຺ເຕ ປຣິພ຺ພາຊໂກ ຠຄວນ຺ຕໍ ອຸປສງ຺ກມິຕ຺ວາ ເອຕທໂວຈ ‘‘ທີຆຣຕ຺ຕາຫໍ ໂຠຕາ ໂຄຕເມນ ສຫກຖີ, ສາຘຸ ເມ ຠວໍ ໂຄຕໂມ ສໍຂິຕ຺ເຕນ ກຸສລາກຸສລໍ ເທເສຕູ’’ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ປຸຈ຺ຉາ – ເອວໍ ວຸຕ຺ເຕ ໂຂ ອາວຸໂສ ວຈ຺ຉໂຄຕ຺ໂຕ ປຣິພ຺ພາຊໂກ ອິມສ຺ມິໍ ຘມ຺ມວິນເຍ ປສນ຺ໂນ ຫຸຕ຺ວາ ກີທິສໍ ປສນ຺ນາກາຣໍ ອກາສິ, ກຖຎ຺ຈສ຺ສ ຘມ຺ມາຠິສມໂຍ ອໂຫສິ.

ວິສ຺ສຊ຺ຊນາ – ເອວໍ ວຸຕ຺ເຕ ຠນ຺ເຕ ວຈ຺ຉໂຄຕ຺ໂຕ ປຣິພ຺ພາຊໂກ ‘‘ສເຈ ຫິ ໂຠ ໂຄຕມ ອິມໍ ຘມ຺ມໍ ຠວໍເຍວ ໂຄຕໂມ ອາຣາຘໂກ ອຠວິສ຺ສ, ໂນ ຈ ໂຂ ຠິກ຺ຂູ ອາຣາຘກາ ອຠວິສ຺ສໍສຸ, ເອວມິທໍ ພ຺ຣຫ຺ມຈຣິຍໍ ອປຣິປູຣໍ ອຠວິສ຺ສ ເຕນງ຺ເຄນາ’’ຕິ ເອວມາທິນາ ອິມສ຺ມິໍ ຘມ຺ມວິນເຍ ປສນ຺ໂນ ປສນ຺ນາກາຣມກາສິ. ຍາວ ອຣຫຕ຺ຕຎ຺ຈສ຺ສ ຘມ຺ມາຠິສມໂຍ ອໂຫສິ.

ທີຆນຂສຸຕ຺ຕ

ປຸຈ຺ຉາ – ທີຆນຂສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ທີຆນຂໍ ປຣິພ຺ພາຊກໍ ອາຣພ຺ຠ ຠາສິຕໍ. ທີຆນໂຂ ຠນ຺ເຕ ປຣິພ຺ພາຊໂກ ຠຄວນ຺ຕໍ ອຸປສງ຺ກມິຕ຺ວາ ເອຕທໂວຈ ‘‘ອຫຎ຺ຫິ ໂຠ ໂຄຕມ ເອວໍວາທີ ເອວໍທິຏ຺ຐິ ສພ຺ພໍ ເມ ນກ຺ຂມຕີ’’ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ປຸຈ຺ຉາ – ອິມສ຺ມິໍ ຈ ປນາວຸໂສ ເວຍ຺ຍາກຣຓສ຺ມິໍ ຠຎ຺ຎມາເນ ເກສໍ ປຸຄ຺ຄລານໍ ວິເສສາຘິຄໂມ ອໂຫສິ.

ວິສ຺ສຊ຺ຊນາ – ອິມສ຺ມິຎ຺ຈ ປນ ຠນ຺ເຕ ເວຍ຺ຍາກຣຓສ຺ມິໍ ຠຎ຺ຎມາເນ ອາຍສ຺ມໂຕ ສາຣິປຸຕ຺ຕສ຺ສ ອນຸປາທາຍ ອາສເວຫິ ຈິຕ຺ຕໍ ວິມຸຈ຺ຈິ, ທີຆນຂສ຺ສ ປນ ປຣິພ຺ພາຊກສ຺ສ ຕສ຺ມິໍເຍວ ອາສເນ ວິຣຊໍ ວີຕມລໍ ຘມ຺ມຈກ຺ຂຸໍ ອຸທປາທິ ຍໍກິຎ຺ຈິ ສມຸທຍຘມ຺ມໍ, ສພ຺ພໍ ຕໍ ນິໂຣຘຘມ຺ມ’’ນ຺ຕິ.

ມາຄຓ຺ຑິຍສຸຕ຺ຕ

ປຸຈ຺ຉາ – ມາຄຓ຺ຑິຍສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ກຸຣູສຸ ຠນ຺ເຕ ກມ຺ມາສຘມ຺ເມ ນາມ ກຸຣູນໍ ນິຄເມ ຠາຣທ຺ວາຊ ໂຄຕ຺ຕສ຺ສ ພ຺ຣາຫ຺ມຓສ຺ສ ອຄ຺ຍາຄາເຣ ຕິຓສນ຺ຖາຣເກ ມາຄຓ຺ຑິຍໍ ປຣິພ຺ພາຊກໍ ອາຣພ຺ຠ ຠາສິຕໍ. ມາຄຓ຺ຑິໂຍ ຠນ຺ເຕ ປຣິພ຺ພາຊໂກ ຠຄວນ຺ຕໍ ‘‘ຠູນຫຸ ສມໂຓ ໂຄຕໂມ’’ຕິ ວເທສິ, ຕສ຺ມິໍ ຠນ຺ເຕ ວຏ຺ຐຸສ຺ມິໍ ຠາສິຕໍ.

ປຸຈ຺ຉາ – ກຖຎ຺ຈາວຸໂສ ຠຄວາ ຕຕ຺ຖ ມາຄຓ຺ຑິຍສ຺ສ ປຣິພ຺ພາຊກສ຺ສ ສມນຸຍຸຎ຺ຊິຕ຺ວາ ສມນຸຍຸຎ຺ຊິຕ຺ວາ ຘມ຺ມໍ ເທເສສິ.

ວິສ຺ສຊ຺ຊນາ – ‘‘ຈກ຺ຂຸໍ ໂຂ ມາຄຓ຺ຑິຍ ຣູປາຣຕໍ ຣູປສມ຺ມຸທິຕໍ, ຕໍ ຕຖາຄຕສ຺ສ ທນ຺ຕໍ ຄຸຕ຺ຕໍ ຣກ຺ຂິຕໍ ສໍວຸຕໍ, ຕສ຺ສ ຈ ສໍວຣາຍ ຘມ຺ມໍ ເທເສຕີ’’ຕິ ເອວມາທິນາ ຠນ຺ເຕ ຕຕ຺ຖ ຠຄວາ ມາຄຓ຺ຑິຍສ຺ສ ປຣິພ຺ພາຊກສ຺ສ ສມນຸຍຸຎ຺ຊິຕ຺ວາ ສມນຸຍຸຎ຺ຊິຕ຺ວາ ຘມ຺ມໍ ເທເສສິ.

ປຸຈ຺ຉາ – ເອວໍ ໂຂ ອາວຸໂສ ມາຄຓ຺ຑິເຍນ ປຣິພ຺ພາຊເກນ ‘‘ນກິຎ຺ຈິ ໂຠ ໂຄຕມາ’’ຕິ ຍຖາຠູຕໍ ປຏິສ຺ສຸເຕ ກຖໍ ຠຄວາ ອຕ຺ຕໂນປິ ນ ກິຎ຺ຈິ ເກນຈິປິ ວຕ຺ຕພ຺ພຕໍ ປກາເສສິ.

ວິສ຺ສຊ຺ຊນາ – ເອວໍ ໂຂ ຠນ຺ເຕ ມາຄຓ຺ຑິເຍນ ປຣິພ຺ພາຊເກນ ນກິຎ຺ຈິ ໂຠໂຄຕມາຕິ ຍຖາຠູຕໍ ປຏິສ຺ສຸເຕ ‘‘ອຫໍ ໂຂ ປນ ມາຄຓ຺ຑິຍ ປຸພ຺ເພ ອຄາຣິຍຠູໂຕ ສມາໂນ ປຎ຺ຈຫິ ກາມຄຸເຓຫິ ສມປ຺ປິໂຕ ສມງ຺ຄີຠູໂຕ ປຣິຈາເຣສິໍ ຈກ຺ຂຸວິຎ຺ເຎຍ຺ຍຫິ ຣູເປຫິ ອິຏ຺ເຐຫິ ມນາເປຫິ ປິຍຣູເປຫິ ກາມູປສໍຫິເຕຫິ ຣຊນີເຍຫີ’’ຕິ ເອວມາທິນາ ຠຄວາ ອຕ຺ຕໂນປິ ນ ກິຎ຺ຈິ ເກນຈິປິ ວຕ຺ຕພ຺ພຕໍ ປກາເສສິ.

ປຸຈ຺ຉາ – ອິມສ຺ມິໍ ສຸຕ຺ເຕ ປຣິໂຍສານປຸຈ຺ຉໍ ປຸຈ຺ຉິສ຺ສາມິ ອິມຎ຺ຈ ປນາວຸໂສ ຘມ຺ມເທສນໍ ສຸຕ຺ວາ ມາຄຓ຺ຑິໂຍ ປຣິພ຺ພາຊໂກ ອິມສ຺ມິໍ ຘມ຺ມວິນເຍ ປສນ຺ໂນ ຫຸຕ຺ວາ ກີທິສໍ ປສນ຺ນາກາຣມກາສິ.

ວິສ຺ສຊ຺ຊນາ – ອິມໍ ຈ ປນ ຠນ຺ເຕ ຘມ຺ມເທສນໍ ສຸຕ຺ວາ ມາຄຓ຺ຑິໂຍ ປຣິພ຺ພາຊໂກ ‘ອຠິກ຺ກນ຺ຕໍ ໂຠ ໂຄຕມ ອຠິກ຺ກນ຺ຕໍ ໂຠ ໂຄຕມາ’’ຕິ ເອວມາທິນາ ອິມສ຺ມິໍ ຘມ຺ມວິນເຍ ປສນ຺ໂນ ປສນ຺ນາກາຣມກາສິ.

ສນ຺ທກສຸຕ຺ຕ

ປຸຈ຺ຉາ – ສນ຺ທກສຸຕ຺ຕໍ ປນາວຸໂສ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ເກນ ຠາສິຕໍ.

ວິສ຺ສຊ຺ຊນາ – ໂກສມ຺ພິຍໍ ຠນ຺ເຕ ສນ຺ທກໍ ປຣິພ຺ພາຊກໍ ອາຣພ຺ຠ ອາຍສ຺ມຕາ ອານນ຺ທຕ຺ເຖເຣນ ຘມ຺ມຠຓ຺ຑາຄາຣິເກນ ຠາສິຕໍ. ສນ຺ທໂກ ຠນ຺ເຕ ປຣິພ຺ພາຊໂກ ອາຍສ຺ມນ຺ຕໍ ອານນ຺ທໍ ເອຕທໂວຈ ‘‘ສາຘຸວຕ ຠວນ຺ຕໍເຍວ ອານນ຺ທໍ ປຏິຠາຕຸ ສເກ ອາຈຣິຍ ເກ ຘມ຺ມິກຖາ’’ຕິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ປຸຈ຺ຉາ – ກຖຎ຺ຈາວຸໂສ ຕຕ຺ຖ ຈຕ຺ຕາໂຣ ອພ຺ຣຫ຺ມຈຣິຍວາສາ ອາຍສ຺ມຕາ ອານນ຺ທຕ຺ເຖເຣນ ຘມ຺ມຠຓ຺ຑາຄາຣິເກນ ວິຈາເຣຕ຺ວາ ປກາສິຕາ.

ວິສ຺ສຊ຺ຊນາ – ອິຘ ສນ຺ທກ ເອກຈ຺ໂຈ ສຕ຺ຖາ ເອວໍວາທີ ໂຫຕິ ເອວໍທິຏ຺ຐິ ນຕ຺ຖິ ທິນ຺ນໍ, ນຕ຺ຖິ ຍິຏ຺ຐໍ, ນຕ຺ຖິ ຫຸຕໍ, ນຕ຺ຖິ ສຸກຕທຸກ຺ກຏານໍ ກມ຺ມານໍ ຜລໍວິປາໂກ, ນຕ຺ຖິ ອຍໍໂລໂກ, ນຕ຺ຖິ ປໂຣໂລໂກ, ນຕ຺ຖິ ມາຕາ, ນຕ຺ຖິ ປິຕາ, ນຕ຺ຖິ ສຕ຺ຕາ ໂອປປາຕິກາຕິ

ເອວມາທິນາ ຠນ຺ເຕ ຕຕ຺ຖ ອາຍສ຺ມຕາ ອານນ຺ທຕ຺ເຖເຣນ ຘມ຺ມຠຓ຺ຑາຄາຣິເກນ ຈຕ຺ຕາໂຣ ອພ຺ຣຫ຺ມຈຣິຍວາສາ ວິຈາເຣຕ຺ວາ ປກາສິຕາ.

ປຸຈ຺ຉາ – ກຖຎ຺ຈາວຸໂສ ຕຕ຺ຖ ຈຕ຺ຕາຣິ ອນສ຺ສາສິການິ ພ຺ຣຫ຺ມຈຣິຍານິ ອາຍສ຺ມຕາ ອານນ຺ທຕ຺ເຖເຣນ ຘມ຺ມຠຓ຺ຑາຄາຣິເກນ ວິຈາເຣຕ຺ວາ ປກາສິຕານິ.

ວິສ຺ສຊ຺ຊນາ – ອິຘ ສນ຺ທກ ເອກຈ຺ໂຈ ສຕ຺ຖາ ສພ຺ພຎ຺ຎູ ສພ຺ພທສ຺ສາວີ ອປຣິເສສໍ ຎາຓທສ຺ສນໍ ປຏິຊານາຕິ ‘‘ຈຣໂຕ ຈ ເມ ຕິຏ຺ຐໂຕ ຈ ສຸຕ຺ຕສ຺ສ ຈ ຊາຄຣສ຺ສ ຈ ສຕຕໍ ສມິຕໍ ຎາຓທສ຺ສນໍ ປຈ຺ຈຸປຏ຺ຐິຕ’’ນ຺ຕິ ເອວມາທິນາ ຠນ຺ເຕ ຕຕ຺ຖ ອາຍສ຺ມຕາ ອານນ຺ທຕ຺ເຖເຣນ ຘມ຺ມຠຓ຺ຑາຄາຣິເກນ ຈຕ຺ຕາຣິ ອນສ຺ສາສິການິ ພ຺ຣຫ຺ມຈຣິຍານິ ວິຠຊິຕ຺ວາ ປກາສິຕານິ.

ປຸຈ຺ຉາ – ອຖ

ໂຂ ອາວຸໂສ ສນ຺ທໂກ ປຣິພ຺ພາຊໂກ ອາຍສ຺ມນ຺ຕໍ ອານນ຺ທຕ຺ເຖຣໍ ກຖໍ ປຸຈ຺ຉິ, ຕຖຎ຺ຈສ຺ສາຍສ຺ມານນ຺ທຕ຺ເຖໂຣ ພ຺ຍາກາສິ.

ວິສ຺ສຊ຺ຊນາ – ອຖ ໂຂ ຠນ຺ເຕ ສນ຺ທໂກ ປຣິພ຺ພາຊໂກ ‘‘ໂສ ປນ ໂຠ ອານນ຺ທ ສຕ຺ຖາ ກິໍວາທີ ກິໍ ອກ຺ຂາຍີ’’ຕິ ເອວມາທິນາ ອາຍສ຺ມນ຺ຕໍ ອານນ຺ທຕ຺ເຖຣໍ ປຸຈ຺ຉິ, ອາຍສ຺ມາ ຈ ຠນ຺ເຕ ອານນ຺ທຕ຺ເຖໂຣ ‘‘ອິຘ ສນ຺ທກ ຕຖາຄໂຕ ໂລເກ ອຸປ຺ປຊ຺ຊຕິ ອຣຫໍ ສມ຺ມາສມ຺ພຸທ຺ໂຘ ວິຊ຺ຊາຈຣຓສມ຺ປນ຺ໂນ’’ຕິ ເອວມາທິນາ ສນ຺ທກສ຺ສ ປຣິພ຺ພາຊກສ຺ສ ວິຠຊິຕ຺ວາ ວິຠຊິຕ຺ວາ ພ຺ຍາກາສິ.

ປຸຈ຺ຉາ – ອິມຎ຺ຈ ປນາວຸໂສ ຘມ຺ມເທສນໍ ສຸຕ຺ວາ ສນ຺ທໂກ ປຣິພ຺ພາຊໂກ ອິມສ຺ມິໍ ຘມ຺ມວິນເຍ ປສນ຺ໂນ ກີທິສໍ ປສນ຺ນາກາຣມກາສິ.

ວິສ຺ສຊ຺ຊນາ – ອິມຎ຺ຈ ຠນ຺ເຕ ຘມ຺ມເທສນໍ ສຸຕ຺ວາ ສນ຺ທໂກ ປຣິພ຺ພາຊໂກ ‘‘ອຈ຺ຉຣິຍໍ ໂຠ ອານນ຺ທ, ອພ຺ຠຸຕໍ ໂຠ ອານນ຺ທ, ນ ຈ ນາມ ສຘມ຺ໂມກ຺ກໍສນາ ຠວິສ຺ສຕິ, ນ ປຣຘມ຺ມວມ຺ຠນາ, ອາຍຕເນ ຈ ຘມ຺ມເທສນາ, ຕາວ ພຫຸກາ ຈ ນິຍ຺ຍາຕາໂຣ ປຎ຺ຎາຍິສ຺ສນ຺ຕີ’’ຕິ ເອວມາທິນາ ອິມສ຺ມິໍ ຘມ຺ມວິນເຍ ປສນ຺ໂນ ປສນ຺ນາກາຣມກາສິ.

ມຫາສກຸລຸທາຍີສຸຕ຺ຕ

ປຸຈ຺ຉາ – ມຫາສກຸລຸທາຍິສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.