ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ

ສຸຕ຺ຕນ຺ຕປິຏກ

ມຊ຺ຌິມນິກາຍ

ມູລປຓ຺ຓາສປາຬິ

ສໍຄາຍນສ຺ສ ປຸຈ຺ຉາ ວິສ຺ສຊ຺ຊນາ

ປຸຈ຺ຉາ – ປຐມມຫາສໍຄີຕິກາເລ ອາວຸໂສ ຘມ຺ມສໍຄາຫກາ ມຫາກສ຺ສປາທໂຍ ມຫາເຖຣວຣາ ທີຆນິກາຍໍ ສໍຄາຍິຕ຺ວາ ຕທນນ຺ຕຣໍ ກິໍ ນາມ ປາວຈນໍ ສໍຄາຍິໍສຸ.

ວິສ຺ສຊ຺ຊນາ – ປຐມມຫາສໍຄີຕິກາເລ ຠນ຺ເຕ ຘມ຺ມສໍຄາຫກາ ມຫາກສ຺ສປາທໂຍ ມຫາເຖຣວຣາ ທີຆນິກາຍໍ ສໍຄາຍິຕ຺ວາ ຕທນນ຺ຕຣໍ ມຊ຺ຌິມໍ ນາມ ນິກາຍໍ ສໍຄາຍິໍສຸ.

ປຸຈ຺ຉາ – ມຊ຺ຌິມນິກາໂຍ ນາມ ອາວຸໂສ ມູລປຓ຺ຓາສໂກ ມຊ຺ຌິມ ປຓ຺ຓາສໂກ ອຸປຣິປຓ຺ຓາສໂກຕິ ປຓ຺ຓາສກວເສນ ຕິວິໂຘ, ຕຕ຺ຖ ກຕຣໍ ປຓ຺ຓາສກໍ ປຐມໍ ສໍຄາຍິໍສຸ.

ວິສ຺ສຊ຺ຊນາ – ຕີສຸ ຠນ຺ເຕ ປຓ຺ຓາສເກສຸ ມູລປຓ຺ຓາສກໍ ນາມ ປາວຈນໍ ຘມ຺ມສໍຄາຫກາ ມຫາເຖຣວຣາ ປຐມໍ ສໍຄາຍິໍສຸ.

ປຸຈ຺ຉາ – ມູລປຓ຺ຓາສເກປິ ອາວຸໂສ ປຎ຺ຈວຄ຺ຄາ ປຓ຺ຓາສ ຈ ສຸຕ຺ຕານິ, ເຕສຸ ກຕຣໍ ວຄ຺ຄໍ ກຕຣຎ຺ຈ ສຸຕ຺ຕໍ ປຐມໍ ສໍຄາຍິໍສຸ.

ວິສ຺ສຊ຺ຊນາ – ມູລປຓ຺ຓາສເກ ຠນ຺ເຕ ປຎ຺ຈສຸ ວຄ຺ເຄສຸ ປຐມໍ ມູລປຣິຍາຍວຄ຺ຄໍ ປຓ຺ຓາສເກສຸ ຈ ສຸຕ຺ເຕສຸ ປຐມໍ ມູລປຣິຍາຍສຸຕ຺ຕໍ ສໍຄາຍິໍສຸ.

ສາຘຸ ອາວຸໂສ ມຍມ຺ປິ ທານິ ຕໂຕເຍວ ປຏ຺ຐາຍ ສໍຄີຕິປຸພ຺ພງ຺ຄມານິ ປຸຈ຺ຉາວິສ຺ສຊ຺ຊນກິຈ຺ຈານິ ກາຕຸໍ ສມາຣຠາມ.

ມູລປຣິຍາຍສຸຕ຺ຕ

ປຸຈ຺ຉາ – ເຕນ ອາວຸໂສ ຠຄວຕາ ຊານຕາ ປສ຺ສຕາ ອຣຫຕາ ສມ຺ມາສມ຺ພຸທ຺ເຘນ ມູລປຣິຍາຍສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ອຸກ຺ກຏ຺ຐາຍໍ ຠນ຺ເຕ ປຎ຺ຈສເຕ ພ຺ຣາຫ຺ມຓກຸລາ ປພ຺ພຊິເຕ ອາຣພ຺ຠ ຠາສິຕໍ, ປຎ຺ຈສຕາ ຠນ຺ເຕ ພ຺ຣາຫ຺ມຓກຸລາ ປພ຺ພຊິຕາ ຠິກ຺ຂູ ປຣິຍຕ຺ຕິໍ ນິສ຺ສາຍ ມານໍ ອຸປ຺ປາເທສຸໍ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ປຸຈ຺ຉາ – ຕໍ ປນາວຸໂສ ສຸຕ຺ຕໍ ຠຄວຕາ ກຕິຫິ ວາເຣຫິ ກຕິຫິ ຈ ອນ຺ໂຕຄຘປເທຫິ ວິຠຊິຕ຺ວາ ຠາສິຕໍ.

ວິສ຺ສຊ຺ຊນາ – ຕໍ ປນ ຠນ຺ເຕ ມູລປຣິຍາຍສຸຕ຺ຕໍ ຠຄວຕາ ອຏ຺ຐຫິ ຈ ວາເຣຫິ ຈຕຸວີສຕິຍາ ຈ ອນ຺ໂຕຄຘປເທຫິ ວິຠຊິຕ຺ວາ ເທສິຕໍ.

ສພ຺ພາສວສຸຕ຺ຕ

ປຸຈ຺ຉາ – ທຸຕິຍໍ ປນາວຸໂສ ສພ຺ພາສວສຸຕ຺ຕໍ ຠຄວຕາ ກຕ຺ຖ ກໍ ອາຣພ຺ຠ ຠາສິຕໍ.

ວິສ຺ສຊ຺ຊນາ – ສພ຺ພາສວສຸຕ຺ຕໍ ປນ ຠນ຺ເຕ ຠຄວຕາ ສາວຕ຺ຖິຍໍ ສມ຺ພຫຸເລ ຠິກ຺ຂູ ອາຣພ຺ຠ ຠາສິຕໍ.

ປຸຈ຺ຉາ – ຕຕ຺ຖາວຸໂສ ຠຄວຕາ ອາສວາ ກຕິຫິ ປກາເຣຫິ ວິຠຊິຕ຺ວາ ທສ຺ສິຕາ.

ວິສ຺ສຊ຺ຊນາ – ສຕ຺ຕຫິ ຠນ຺ເຕ ປກາເຣຫິ ວິຠຊິຕ຺ວາ ອາສວາ ຠຄວຕາ ປກາສິຕາ.

ຘມ຺ມທາຍາທສຸຕ຺ຕ

ປຸຈ຺ຉາ – ຘມ຺ມທາຍາທສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ຠາສິຕໍ, ຠຄວໂຕ ຈ ຠນ຺ເຕ ຠິກ຺ຂຸສງ຺ຆສ຺ສ ຈ ຕທາ ມຫາລາຠສກ຺ກາໂຣ ອຸທປາທິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ປຸຈ຺ຉາ – ຕຕ຺ຖາວຸໂສ ທ຺ເວ ອນຸສນ຺ຘໂຍ, ເຕສຸ ປຐເມ ອນຸສນ຺ຘິມ຺ຫິ ກຖໍ ຠຄວຕາ ຠິກ຺ຂູນໍ ໂອວາໂທ ທິນ຺ໂນ.

ວິສ຺ສຊ຺ຊນາ – ປຐເມ ຠນ຺ເຕ ອນຸສນ຺ຘິມ຺ຫິ ຘມ຺ມທາຍາທາ ເມ ຠິກ຺ຂເວ ຠວຖ ມາ ອາມິສທາຍາທາ, ອຕ຺ຖິ ເມ ຕຸມ຺ເຫສຸ ອນຸກມ຺ປາ, ກິນ຺ຕິ ເມ ສາວກາ ຘມ຺ມທາຍາທາ ຠເວຍ຺ຍຸໍ ໂນ ອາມິສທາຍາທາຕິ ເອວມາທິນາ ຠຄວຕາ ຠິກ຺ຂູນໍ ໂອວາໂທ ທິນ຺ໂນ.

ຘມ຺ມທາຍາທາ ເມ ຠິກ຺ຂເວ ຠວຖ ມາ ອາມິສທາຍາທາ, ອຕ຺ຖິ ເມ ຕຸມ຺ເຫສຸ ອນຸກມ຺ປາ ກິນ຺ຕິ ເມ ສາວກາ ຘມ຺ມທາຍາທາ ຠເວຍ຺ຍຸໍ, ໂນ ອາມິສທາຍາທາ.

ປຸຈ຺ຉາ – ທຸຕິເຍ ປນາວຸໂສ ອນຸສນ຺ຘິມ຺ຫິ ອາຍສ຺ມຕາ ສາຣິປຸຕ຺ຕຕ຺ເຖເຣນ ຘມ຺ມເສນາປຕິນາ ກີທິສີ ຘມ຺ມເທສນາ ວິຠຊິຕ຺ວາ ປກາສິຕາ.

ວິສ຺ສຊ຺ຊນາ – ທຸຕິເຍ ປນ ຠນ຺ເຕ ອນຸສນ຺ຘິມ຺ຫິ ອາຍສ຺ມຕາ ສາຣິປຸຕ຺ຕຕ຺ເຖເຣນ ຘມ຺ມເສນາປຕິນາ ສຕ຺ຖຸ ປວິວິຕ຺ຕສ຺ສ ວິຫຣໂຕ ສາວການໍ ວິເວກໍ ອນນຸສິກ຺ຂຕໍ ຕີຫິ ຐາເນຫິ ຄາຣຍຸຕໍ, ອນຸສິກ຺ຂນ຺ຕານຎ຺ຈ ຕີຫິ ຐາເນຫິ ປາສໍສຕໍ, ໂສຬສ ຈ ປາປເກ ຘມ຺ເມ ເຕສຎ຺ຈ ປຫານາຍ ມຊ຺ຌິມາ ປຏິປທາ ວິຠຊິຕ຺ວາ ປກາສິຕາ.

ຠຍເຠຣວສຸຕ຺ຕ

ປຸຈ຺ຉາ – ຠຍເຠຣວສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ຊາຓຸສ຺ໂສຓິໍ ພ຺ຣາຫ຺ມຓໍ ອາຣພ຺ຠ ຠາສິຕໍ, ຊາຓຸສ຺ໂສຓິ ຠນ຺ເຕ ພ຺ຣາຫ຺ມໂຓ ຠຄວນ຺ຕໍ ອຸປສງ຺ກມິຕ຺ວາ ເອຕທໂວຈ ‘‘ເຍ ເມ ໂຠ ໂຄຕມ ກຸລປຸຕ຺ຕາ ຠວນ຺ຕໍ ໂຄຕມໍ ອຸທ຺ທິສ຺ສ ສທ຺ຘາ ອຄາຣສ຺ມາ ອນຄາຣິຍໍ ປພ຺ພຊິຕາ, ຠວໍ ເຕສໍ ໂຄຕໂມ ປຸພ຺ພງ຺ຄໂມ, ຠວໍ

ເຕສໍ ໂຄຕໂມ ພຫຸກາໂຣ, ຠວໍ ເຕສໍ ໂຄຕໂມ ສມາທເປຕາ, ໂຠໂຕ ຈ ປນ ໂຄຕມສ຺ສ ສາ ຊນຕາ ທິຏ຺ຐານຸຄຕິໍ ອາປຊ຺ຊຕີ’’ຕິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ອນງ຺ຄຓສຸຕ຺ຕ

ປຸຈ຺ຉາ – ອນງ຺ຄຓສຸຕ຺ຕໍ ປນາວຸໂສ ກຕ຺ຖ ກໍ ອາຣພ຺ຠ ເກນ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ອາຍສ຺ມຕາ ສາຣິປຸຕ຺ຕຕ຺ເຖເຣນ ຘມ຺ມເສນາປຕິນາ ຠາສິຕໍ.

ອາກງ຺ເຂຍ຺ຍສຸຕ຺ຕ

ປຸຈ຺ຉາ – ອາກງ຺ເຂຍ຺ຍສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ຠາສິຕໍ.

ວຕ຺ຖສຸຕ຺ຕ

ປຸຈ຺ຉາ – ວຕ຺ຖສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ຠາສິຕໍ.

ສລ຺ເລຂສຸຕ຺ຕ

ປຸຈ຺ຉາ – ສລ຺ເລຂສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອາຍສ຺ມນ຺ຕໍ ມຫາຈຸນ຺ທໍ ອາຣພ຺ຠ ຠາສິຕໍ, ອາຍສ຺ມາ ມຫາຈຸນ຺ໂທ ຠນ຺ເຕ ຠຄວນ຺ຕໍ ອຸປສງ຺ກມິຕ຺ວາ ເອຕທໂວຈ ‘‘ຍາ ອິມາ ຠນ຺ເຕ ອເນກວິຫິຕາ ທິຏ຺ຐິໂຍ ໂລເກ ອຸປ຺ປຊ຺ຊນ຺ຕິ, ອຕ຺ຕວາທປຏິສໍຍຸຕ຺ຕາ ວາ ໂລກວາທປຏິສໍຍຸຕ຺ຕາ ວາ, ອາທິເມວ ນຸ ໂຂ ຠນ຺ເຕ ຠິກ຺ຂຸໂນ ມນສິກໂຣໂຕ ເອວເມຕາສໍ ທິຏ຺ຐີນໍ ປຫານໍ ໂຫຕິ, ເອວເມຕາສໍ ທິຏ຺ຐີນໍ ປຏິນິສ຺ສຄ຺ໂຄ ໂຫຕີ’’ຕິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ປຸຈ຺ຉາ – ຕຕ຺ຖ ຈ ອາວຸໂສ ກຕິ ປຣິຍາຍາ ກຕິ ຈ ອນ຺ໂຕຄຘປທານິ ຠຄວຕາ ວິຠຊິຕ຺ວາ ປກາສິຕານິ.

ວິສ຺ສຊ຺ຊນາ – ຕຕ຺ຖ ຠນ຺ເຕ ປຎ຺ຈ ປຣິຍາຍາ ຈຕຸຈຕ຺ຕາລີສ ຈ ອນ຺ໂຕຄຘປທານິ ຠຄວຕາ ວິຕ຺ຖາເຣນ ຠາສິຕານິ.

ສມ຺ມາຏ຺ຐິສຸຕ຺ຕ

ປຸຈ຺ຉາ – ສມ຺ມາທິຏ຺ຐິສຸຕ຺ຕໍ ປນາວຸໂສ ກຕ຺ຖ ກໍ ອາຣພ຺ຠ ເກນ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ອາຍສ຺ມຕາ ສາຣິປຸຕ຺ຕຕ຺ເຖເຣນ ຘມ຺ມເສນາປຕິນາ ຠາສິຕໍ.

ປຸຈ຺ຉາ – ກສ຺ສ ອາວຸໂສ ວຈນໍ.

ວິສ຺ສຊ຺ຊນາ – ຠຄວໂຕ ຠນ຺ເຕ ວຈນໍ ອຣຫໂຕ ສມ຺ມາສມ຺ພຸທ຺ຘສ຺ສ.

ປຸຈ຺ຉາ – ເກນາວຸໂສ ອາຠຕໍ.

ວິສ຺ສຊ຺ຊນາ – ປຣມ຺ປຣາຍ ຠນ຺ເຕ ອາຠຕໍ.

ມຫາສຕິປຏ຺ຐານສຸຕ຺ຕ

ປຸຈ຺ຉາ – ມຫາສຕິປຏ຺ຐານສຸຕ຺ຕໍ ປນາວຸໂສ ໂຍຄາວຈຣານໍ ພຫຸປກາຣຕ຺ຕາ ທີຆນິກາເຍ ຈ ອິຘ ຈາຕິ ທ຺ວີສຸ ນິກາເຍສຸ ໂປຣາຓເກຫິ ສໍຄີຕິກາເຣຫິ ທ຺ວິກ຺ຂຕ຺ຕຸໍ ສໍຄາຍິຕ຺ວາ ວິຕ຺ຖາເຣນ ປຕິຏ຺ຐາປິຕໍ, ຕໍ ອມ຺ເຫຫິ ທີຆນິກາເຍ ຍຖານຸປ຺ປຕ຺ຕວເສນ ປຸຈ຺ຉິຕຎ຺ຈ ວິສ຺ສຊ຺ຊິຕຎ຺ຈ. ຕຖາປິ ໂຍຄາວຈຣານໍ ພຫຸປກາຣຕ຺ຕາເຍວ ຕໍ ອິທານິປິ ຍຖານຸປ຺ປຕ຺ຕວເສນ ປຸນ ປຸຈ຺ຉິສ຺ສາມິ, ຕໍ ປເນຕໍ ອາວຸໂສ ມຫາສຕິປຏ຺ຐານສຸຕ຺ຕໍ ຠຄວຕາ ກຕ຺ຖ ກໍ ອາຣພ຺ຠ ຠາສິຕໍ.

ວິສ຺ສຊ຺ຊນາ – ກຸຣູສຸ ຠນ຺ເຕ ກມ຺ມາສຘມ຺ເມ ນາມ ກຸຣູນໍ ນິຄເມ ສມ຺ພຫຸເລ ຠິກ຺ຂູ ອາຣພ຺ຠ ຠາສິຕໍ.

ປຸຈ຺ຉາ – ກຖຎ຺ຈາວຸໂສ ຕຕ຺ຖ ອານາປານສ຺ສຕິ ກາຍານຸປສ຺ສນາ ຠຄວຕາ ວິຠຊິຕ຺ວາ ປກາສິຕາ.

ວິສ຺ສຊ຺ຊນາ – ອິຘ ຠິກ຺ຂເວ ຠິກ຺ຂຸ ອຣຎ຺ຎຄໂຕ ວາ ຣຸກ຺ຂມູລຄໂຕ ວາ ສຸຎ຺ຎາຄາຣຄໂຕ ວາ ນິສີທຕິ ປລ຺ລງ຺ກໍ ອາຠຸຊິຕ຺ວາ ອຸຊຸໍ ກາຍໍ ປຓິຘາຍ ປຣິມຸຂໍ ສຕິໍ ອຸປຏ຺ຐເປຕ຺ວາ ໂສ ສໂຕວ ອສ຺ສສຕິ, ສໂຕວ ປສ຺ສສຕິ, ທີຆໍ ວາ ອສ຺ສສນ຺ໂຕ ‘ທີຆໍ ອສ຺ສສາມີ’ຕິ ປຊານາຕິ, ທີຆໍ ວາ ປສ຺ສສນ຺ໂຕ ‘ທີຆໍ ປສ຺ສສາມີ’ຕິ ປຊານາຕິ, ເອວມາທິນາ ຠນ຺ເຕ ຕຕ຺ຖ ອານາປານສ຺ສຕິ ກາຍານຸປສ຺ສນາ ຠຄວຕາ ວິຠຊິຕ຺ວາ ປກາສິຕາ.

ປຸຈ຺ຉາ – ກຖຎ຺ຈາວຸໂສ ຕຕ຺ຖ ອິຣິຍາປຖກາຍານຸປສ຺ສນາ ຠຄວຕາ ວິຠຊິຕ຺ວາ ປກາສິຕາ.

ວິສ຺ສຊ຺ຊນາ – ປຸນ ຈປຣໍ ຠິກ຺ຂເວ ຠິກ຺ຂຸ ຄຈ຺ຉນ຺ໂຕ ວາ ຄຈ຺ຉາມີຕິ ປຊານາຕິ, ຐິໂຕ ວາ ຐິໂຕມ຺ຫີຕິ ປຊານາຕິ, ນິສິນ຺ໂນ ວາ ນິສິນ຺ໂນມ຺ຫີຕິ ປຊານາຕິ, ສຍາໂນ ວາ ສຍາໂນມ຺ຫີຕິ ປຊານາຕິ, ເອວມາທິນາ ຠນ຺ເຕ ຠຄວຕາ ອິຣິຍາປຖກາຍານຸປສ຺ສນາ ຠາວນາ ວິຠຊິຕ຺ວາ ປກາສິຕາ.

ປຸຈ຺ຉາ – ກຖຎ຺ຈາວຸໂສ ຕຕ຺ຖ ສມ຺ປຊຎ຺ຎກາຍານຸປສ຺ສນາ ຠຄວຕາ ວິຠຊິຕ຺ວາ ປກາສິຕາ.

ວິສ຺ສຊ຺ຊນາ – ປຸນ ຈປຣໍ ຠິກ຺ຂເວ ຠິກ຺ຂຸ ອຠິກ຺ກນ຺ເຕ ປຏິກ຺ກນ຺ເຕ ສມ຺ປຊານກາຣີ ໂຫຕິ, ອາໂລກິເຕ ວິໂລກິເຕ ສມ຺ປຊານກາຣີ ໂຫຕິ, ສມິຎ຺ຊິເຕ ປສາຣິເຕ ສມ຺ປຊານກາຣີ ໂຫຕິ, ສງ຺ຆາຏິປຕ຺ຕຈີວຣຘາຣເຓ ສມ຺ປຊານກາຣີ ໂຫຕິ, ອສິເຕ ປີເຕ ຂາຍິເຕ ສາຍິເຕ ສມ຺ປຊານກາຣີ ໂຫຕິ, ອຸຈ຺ຈາຣປສ຺ສາວກມ຺ເມ ສມ຺ປຊານກາຣີ ໂຫຕິ, ຄເຕ ຐິເຕ ນິສິນ຺ເນ ສຸຕ຺ເຕ ຊາຄຣິເຕ ຠາສິເຕ ຕຸຓ຺ຫີຠາເວ ສມ຺ປຊານກາຣີ ໂຫຕິ, ເອວມາທິນາ ຠນ຺ເຕ ຠຄວຕາ ຕຕ຺ຖ ສມ຺ປຊຎ຺ຎກາຍານຸປສ຺ສນາ ວິຠຊິຕ຺ວາ ປກາສິຕາ.

ປຸຈ຺ຉາ – ກຖຎ຺ຈາວຸໂສ ຕຕ຺ຖ ປຏິກູລມນສິກາຣກາຍານຸປສ຺ສນາ ຠຄວຕາ ວິຠຊິຕ຺ວາ ປກາສິຕາ.

ວິສ຺ສຊ຺ຊນາ – ປຸນ ຈປຣໍ ຠິກ຺ຂເວ ຠິກ຺ຂຸ ອິມເມວ ກາຍໍ ອຸທ຺ຘໍ ປາທຕລາ ອໂຘ ເກສມຕ຺ຖກາ ຕຈປຣິຍນ຺ຕໍ ປູຣໍ ນານປ຺ປກາຣສ຺ສ ອສຸຈິໂນ ປຈ຺ຈເວກ຺ຂຕິ ອຕ຺ຖິ ອິມສ຺ມິໍ ກາເຍ ເກສາໂລມາ ນຂາ ທນ຺ຕາ ຕໂຈ ເອວມາທິນາ ຠນ຺ເຕ ຕຕ຺ຖ ຠຄວຕາ ປຏິກູລມນສິກາຣກາຍານຸປສ຺ສນາ ວິຠຊິຕ຺ວາ ປກາສິຕາ.

ປຸຈ຺ຉາ – ກຖຎ຺ຈາວຸໂສ ຕຕ຺ຖ ຘາຕຸມນສິກາຣກາຍານຸປສ຺ສນາ ຠຄວຕາ ວິຠຊິຕ຺ວາ ປກາສິຕາ.

ວິສ຺ສຊ຺ຊນາ – ປຸນ ຈປຣໍ ຠິກ຺ຂເວ ຠິກ຺ຂຸ ອິມເມວ ກາຍໍ ຍຖາຐິຕໍ ຍຖາປຓິຫິຕໍ ຘາຕຸໂສ ປຈ຺ຈເວກ຺ຂຕິ ອຕ຺ຖິ ອິມສ຺ມິໍ ກາເຍ ປຖວີຘາຕຸ ອາໂປຘາຕຸ ເຕໂຊຘາຕຸ ວາໂຍຘາຕຸ ເອວມາທິນາ ຠນ຺ເຕ ຠຄວຕາ ຘາຕຸມນສິກາຣກາຍານຸປສ຺ສນາ ວິຠຊິຕ຺ວາ ປກາສິຕາ.

ປຸຈ຺ຉາ – ກຖຎ຺ຈາວຸໂສ ຕຕ຺ຖ ນວ ສິວຖິກກາຍານຸປສ຺ສນາ ຠຄວຕາ ວິຠຊິຕ຺ວາ ປກາສິຕາ.

ວິສ຺ສຊ຺ຊນາ – ປຸນ ຈປຣໍ ຠິກ຺ຂເວ ຠິກ຺ຂຸ ເສຍ຺ຍຖາປິ ປສ຺ເສຍ຺ຍ ສຣີຣໍ ສິວຖິກາຍ ຉຑ຺ຑິຕໍ ເອກາຫມຕໍ ວາ ທ຺ວີຫມຕໍ ວາ ຕີຫມຕໍ ວາ ອຸທ຺ຘຸມາຕກໍ ວິນີລກໍ ວິປຸພ຺ພກຊາຕໍ ໂສ ອິມເມວ ກາຍໍ ອຸປສໍຫຣຕິ ‘‘ອຍມ຺ປິ ໂຂ ກາໂຍ ເອວໍຘມ຺ໂມ ເອວໍຠາວີ ເອວໍອນຕີໂຕ’’ຕິ ເອວມາທິນາ ຠນ຺ເຕ ຕຕ຺ຖ ຠຄວຕາ ນວ ສິວຖິກກາຍານຸປສ຺ສນາ ຠາວນາ ວິຠຊິຕ຺ວາ ປກາສິຕາ.

ປຸຈ຺ຉາ – ກຖຎ຺ຈາວຸໂສ ຕຕ຺ຖ ເວທນານຸປສ຺ສນາ ຠຄວຕາ ວິຠຊິຕ຺ວາ ເທສິຕາ.

ວິສ຺ສຊ຺ຊນາ – ອິຘ ຠິກ຺ຂເວ ຠິກ຺ຂຸ ສຸຂໍ ວາ ເວທນໍ ເວທຍມາໂນ ‘‘ສຸຂໍ ເວທນໍ ເວທຍາມີ’’ຕິ ປຊານາຕິ, ທຸກ຺ຂໍ ວາ ເວທນໍ ເວທຍມາໂນ ‘‘ທຸກ຺ຂ ເວທນໍ ເວທຍາມີ’’ຕິ ປຊານາຕິ, ອທຸກ຺ຂມສຸຂໍ ວາ ເວທນໍ ເວທຍມາໂນ ‘‘ອທຸກ຺ຂມສຸຂໍ ເວທນໍ ເວທຍາມີ’’ຕິ ປຊານາຕິ, ເອວມາທິນາ ຠນ຺ເຕ ຕຕ຺ຖ ຠຄວຕາ ເວທນານຸປສ຺ສນາ ວິຠຊິຕ຺ວາ ປກາສິຕາ.

ປຸຈ຺ຉາ – ກຖຎ຺ຈາວຸໂສ ຕຕ຺ຖ ຈິຕ຺ຕານຸປສ຺ສນາ ຠຄວຕາ ວິຠຊິຕ຺ວາ ເທສິຕາ.

ວິສ຺ສຊ຺ຊນາ – ອິຘ ຠິກ຺ຂເວ ຠິກ຺ຂຸ ສຣາຄໍ ວາ ຈິຕ຺ຕໍ ‘‘ສຣາຄໍ ຈິຕ຺ຕ’’ນ຺ຕິ ປຊານາຕິ, ວີຕຣາຄໍ ວາ ຈິຕ຺ຕໍ ‘‘ວີຕຣາຄໍ ຈິຕ຺ຕ’’ນ຺ຕິ ປຊານາຕິ, ສໂທສໍ ວາ ວີຕໂທສໍ ວາ ສໂມຫໍ ວາ ວີຕໂມຫໍ ວາ ສໍຂິຕ຺ຕໍ ວາ ຈິຕ຺ຕໍ ‘‘ສໍຂິຕ຺ຕໍ ຈິຕ຺ຕ’’ນ຺ຕິ ປຊານາຕິ, ວິກ຺ຂິຕ຺ຕໍ ວາ ຈິຕ຺ຕໍ ‘‘ວິກ຺ຂິຕ຺ຕໍ ຈິຕ຺ຕ’’ນ຺ຕິ ປຊານາຕິ, ເອວມາທິນາ ຕຕ຺ຖ ຠຄວຕາ ຈິຕ຺ຕານຸປສ຺ສນາ ວິຠຊິຕ຺ວາ ປກາສິຕາ.

ປຸຈ຺ຉາ – ກຖຎ຺ຈາວຸໂສ ຕຕ຺ຖ ຘມ຺ມານຸປສ຺ສນາ ຠຄວຕາ ວິຠຊິຕ຺ວາ ເທສິຕາ, ຕໍ ສງ຺ເຂປມຕ຺ເຕເນວ ວິສ຺ສຊ຺ເຊຫິ.

ວິສ຺ສຊ຺ຊນາ – ອິຘ ຠິກ຺ຂເວ ຠິກ຺ຂຸ ຘມ຺ເມສຸ ຘມ຺ມານຸປສ຺ສີ ວິຫຣຕິ, ປຎ຺ຈສຸ ນີວຣເຓສຸ ເອວມາທິນາ ຠນ຺ເຕ ຕຕ຺ຖ ຠຄວຕາ ປຎ຺ຈຫິ ປພ຺ເພຫິ ຘມ຺ມານຸປສ຺ສນາ ວິຠຊິຕ຺ວາ ປກາສິຕາ.

ຈູຬສີຫນາທສຸຕ຺ຕ

ປຸຈ຺ຉາ – ຈູຬນສີຫນາທສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ປຣິຫີນລາຠສກ຺ກາເຣ ນານາຕິຕ຺ຖິເຍ ອາຣພ຺ຠ ຠາສິຕໍ, ນານາຕິຕ຺ຖິຍາ ຠນ຺ເຕ ປຣິຫີນລາຠສກ຺ກາຣາ ເຕສຸ ເຕສຸ ຐາເນສຸ ປຣິເທວິໍສຸ, ຈຕສ຺ໂສ ຈ ຠນ຺ເຕ ປຣິສາ ຠຄວໂຕ ເອກມຕ຺ຖໍ ອາໂຣເຈສຸໍ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ມຫາສີຫນາທສຸຕ຺ຕ

ປຸຈ຺ຉາ – ເຕນາວຸໂສ ຠຄວຕາ ຊານຕາ ປສ຺ສຕາ ອຣຫຕາ ສມ຺ມາສມ຺ພຸທ຺ເຘນ ມຫາສີຫນາທສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ເວສາລິຍໍ ຠນ຺ເຕ ສຸນກ຺ຂຕ຺ຕໍ ລິຈ຺ຉວິປຸຕ຺ຕໍ ອາຣພ຺ຠ ຠາສິຕໍ, ສນຸກ຺ຂຕ຺ໂຕ ຠນ຺ເຕ ລິຈ຺ຉວິປຸຕ຺ໂຕ ອຈິຣປກ຺ກນ຺ໂຕ ໂຫຕິ ອິມສ຺ມາ ຘມ຺ມວິນຍາ, ໂສ ເວສາລິຍໍ ປຣິສຕິ ເອວໍ ວາຈໍ ຠາສຕິ ‘‘ນຕ຺ຖິ ສມຓສ຺ສ ໂຄຕມສ຺ສ ອຸຕ຺ຕຣິມນຸສ຺ສຘມ຺ມາ ອລມຣິຍຎາຓທສ຺ສນວິເສໂສ, ຕກ຺ກປຣິຍາຫຕໍ ສມໂຓ ໂຄຕໂມ ຘມ຺ມໍ ເທເສຕິ ວີມໍສານຸຈຣິຕໍ ສຍໍ ປຏິຠານໍ. ຍສ຺ສ ຈ ຂ຺ວາສ຺ສ ອຕ຺ຖາຍ ຘມ຺ໂມ ເທສິໂຕ, ໂສ ນິຍ຺ຍາຕິ ຕກ຺ກຣສ຺ສ ສມ຺ມາ ທຸກ຺ຂກ຺ຂຍາຍາ’’ຕິ, ເອຕມຕ຺ຖໍ ຠນ຺ເຕ ອາຍສ຺ມາ ສາຣິປຸຕ຺ໂຕ ຠຄວໂຕ ອາໂຣເຈສິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ປຸຈ຺ຉາ – ກຕິ ປນາວຸໂສ ຕຕ຺ຖ ຠຄວຕາ ຕຖາຄຕສ຺ສ ຕຖາຄຕພລານິ ວິຠຊິຕ຺ວາ ປກາສິຕານິ, ເຍຫິ ພເລຫິ ສມນ຺ນາຄໂຕ ຕຖາຄໂຕ ອາສຠໍ ຐານໍ ປຏິຊານາຕິ, ປຣິສາສຸ ສີຫນາທໍ ນທຕິ, ພ຺ຣຫ຺ມຈກ຺ກໍ ປວຕ຺ເຕຕິ.

ວິສ຺ສຊ຺ຊນາ – ທສ ຠນ຺ເຕ ຕຖາຄຕສ຺ສ ຕຖາຄຕພລານິ ຠຄວຕາ ວິຠຊິຕ຺ວາ ປກາສິຕານິ, ເຍຫິ ພເລຫິ ສມນ຺ນາຄໂຕ ຕຖາຄໂຕ ອາສຠໍ ຐານໍ ປຏິຊານາຕິ, ປຣິສາສຸ ສີຫນາທໍ ນທຕິ, ພ຺ຣຫ຺ມຈກ຺ກໍ ປວຕ຺ເຕຕິ.

ປຸຈ຺ຉາ – ກຖຎ຺ຈາວຸໂສ ຕຕ຺ຖ ຠຄວຕາ ຈຕຸເວຣຊ຺ຊຎາຓານິ ວິຠຊິຕ຺ວາ ປກາສິຕານິ, ເຍຫິ ເວສາຣຊ຺ເຊຫິ ສມນ຺ນາຄໂຕ ຕຖາຄໂຕ ອາສຠໍ ຐານໍ ປຏິຊານາຕິ, ປຣິສາສຸ ສີຫນາທໍ ນທຕິ, ພ຺ຣຫ຺ມຈກ຺ກໍ ປວຕ຺ເຕຕິ.

ວິສ຺ສຊ຺ຊນາ – ຂີຓາສວສ຺ສ ເຕ ປຏິຊານໂຕ ອິເມ ອາສວາ ອປຣິກ຺ຂີຓາຕິ ຕຕ຺ຣ ວຕ ມໍ ສມໂຓ ວາ ພ຺ຣາຫ຺ມໂຓ ວາ ເທໂວ ວາ ມາໂຣ ວາ ພ຺ຣຫ຺ມາ ວາ ໂກຈິ ວາ ໂລກສ຺ມິໍ ສຫຘມ຺ເມນ ປຏິໂຈເທສ຺ສຕີຕິ ນິມິຕ຺ຕເມຕໍ ສາຣິປຸຕ຺ຕ ນ ສມນຸປສ຺ສາມິ, ເອຕມຫໍ ສາຣິປຸຕ຺ຕ ນິມິຕ຺ຕໍ ອສມນຸປສ຺ສນ຺ໂຕ ເຂມປ຺ປຕ຺ໂຕ ອຠຍປ຺ປຕ຺ໂຕ ເວສາຣຊ຺ຊປ຺ປຕ຺ໂຕ ວິຫຣາມິ. ເອວມາທິນາ ຠນ຺ເຕ ຕຕ຺ຖ ຈຕຸເວສາຣຊ຺ຊຎາຓານິ ຠຄວຕາ ວິຕ຺ຖາເຣນ ວິຠຊິຕ຺ວາ ປກາສິຕານິ.

ປຸຈ຺ຉາ – ກຖຎ຺ຈາວຸໂສ ຕຕ຺ຖ ຠຄວຕາ ປຎ຺ຈຄຕິປຣິຈ຺ເຉທຎາຓໍ ວິຠຊິຕ຺ວາ ປກາສິຕໍ.

ວິສ຺ສຊ຺ຊນາ – ປຎ຺ຈ ໂຂ ອິມາ ສາຣິປຸຕ຺ຕ ຄຕິໂຍ, ກຕມາ ປຎ຺ຈ, ນິຣໂຍ ຕິຣຈ຺ຉານໂຍນິ ເປຕ຺ຕິວິສໂຍ ມນຸສ຺ສາ ເທວາ, ເອວມາທິນາ ຠນ຺ເຕ ຠຄວຕາ ຕຕ຺ຖ ປຎ຺ຈຄຕິປຣິຈ຺ເຉທກຎາຓໍ ວິຠຊິຕ຺ວາ ປກາສິຕໍ.

ປຸຈ຺ຉາ – ກຖຎ຺ຈາວຸໂສ ຕຕ຺ຖ ຕຖາຄໂຕ ອຕ຺ຕໂນ ປຎ຺ຎາເວຍ຺ຍຕ຺ຕິຍາ ອປຣິຫານິໍ ປກາເສສິ.

ວິສ຺ສຊ຺ຊນາ – ສນ຺ຕິ ໂຂ ປນ ສາຣິປຸຕ຺ຕ ເອເກ ສມຓພ຺ຣາຫ຺ມຓາ ເອວໍວາທິໂນ ເອວໍທິຏ຺ຐິໂນ ຍາວເທວາຍໍ ຠວໍ ປຸຣິໂສ ທຫໂຣ ໂຫຕິ, ເອວມາທິນາ ຠນ຺ເຕ ຕຕ຺ຖ ຕຖາຄໂຕ ອຕ຺ຕໂນ ປຎ຺ຎາເວຍ຺ຍຕ຺ຕິຍາ ອປຣິຫານິໍ ປກາເສສິ.

ມຫາທຸກ຺ຂກ຺ຂນ຺ຘສຸຕ຺ຕ

ປຸຈ຺ຉາ – ມຫາທຸກ຺ຂກ຺ຂນ຺ຘສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອຎ຺ຎຕິຕ຺ຖິເຍ ອາຣພ຺ຠ ຠາສິຕໍ, ສມ຺ພຫຸລາ ຠນ຺ເຕ ອຎ຺ຎຕິຕ຺ຖິຍາ ຠິກ຺ຂູ ເອຕທໂວຈຸໍ ‘‘ສມໂຓ ອາວຸໂສ ໂຄຕໂມ ກາມານໍ ປຣິຎ຺ຎໍ ປຎ຺ຎເປຕິ, ມຍມ຺ປິ ກາມານໍ ປຣິຎ຺ຎໍ ປຎ຺ຎເປມ, ສມໂຓ ອາວຸໂສ ໂຄຕໂມ ຣູປານໍ ເວທນານໍ ປຣິຎ຺ຎໍ ປຎ຺ຎເປຕິ, ມຍມ຺ປິ ຣູປານໍ ເວທນານໍ ປຣິຎ຺ຎໍ ປຎ຺ຎເປມ, ອິຘ ໂນ ອາວຸໂສ ໂກ ວິເສໂສ, ໂກ ອຘິປ຺ປຍາໂສ, ກິໍ ນານາກຣຓໍ ສມຓສ຺ສ ວາ ໂຄຕມສ຺ສ ອມ຺ຫາກໍ ວາ ຍທິທໍ ຘມ຺ມເທສນາຍ ວາ ຘມ຺ມເທສນໍ ອນຸສາສນິຍາ ວາ ອນຸສາສນິ’’ນ຺ຕິ, ເອຕມຕ຺ຖໍ ຠິກ຺ຂູ ຠຄວໂຕ ອາໂຣເຈສຸໍ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ຈູຬທຸກ຺ຂກ຺ຂນ຺ຘສຸຕ຺ຕ

ປຸຈ຺ຉາ – ຈູຬທຸກ຺ຂກ຺ຂນ຺ຘສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ສກ຺ເກສຸ ຠນ຺ເຕ ກປິລວຕ຺ຖຸສ຺ມິໍ ມຫານາມໍ ສກ຺ກໍ ອາຣພ຺ຠ ຠາສິຕໍ, ມຫານາໂມ ຠນ຺ເຕ ສກ຺ໂກ ຠຄວນ຺ຕໍ ອຸປສງ຺ກມິຕ຺ວາ ເອຕທໂວຈ ‘‘ທີຆຣຕ຺ຕາຫໍ ຠນ຺ເຕ ຠຄວຕາ ເອວໍ ຘມ຺ມໍ ເທສິຕໍ ອາຊານາມິ ‘ໂລໂຠ ຈິຕ຺ຕສ຺ສ ອຸປກ຺ກິເລໂສ, ໂທໂສ ຈິຕ຺ຕສ຺ສ ອຸປກ຺ກິເລໂສ, ໂມໂຫ ຈິຕ຺ຕສ຺ສ ອຸປກ຺ກິເລໂສ’ຕິ, ເອວຎ຺ຈາຫໍ ຠນ຺ເຕ ຠຄວຕາ ຘມ຺ມໍ ເທສິຕໍ ອາຊານາມິ ‘ໂລໂຠ ຈິຕ຺ຕສ຺ສ ອຸປກ຺ກິເລໂສ, ໂທໂສ ຈິຕ຺ຕສ຺ສ ອຸປກ຺ກິເລໂສ, ໂມໂຫ ຈິຕ຺ຕສ຺ສ ອຸປກ຺ກິເລໂສ’ຕິ. ອຖ ຈ ປນ ເມ ເອກທາ ໂລຠຘມ຺ມາປິ ຈິຕ຺ຕໍ ປຣິຍາທາຍ ຕິຏ຺ຐນ຺ຕິ, ໂທສຘມ຺ມາປິ ຈິຕ຺ຕໍ ປຣິຍາທາຍ ຕິຏ຺ຐນ຺ຕິ, ໂມຫຘມ຺ມາປິ ຈິຕ຺ຕໍ ປຣິຍາທາຍ ຕິຏ຺ຐນ຺ຕິ, ຕສ຺ສ ມຍ຺ຫໍ ຠນ຺ເຕ ເອວໍ ໂຫຕິ ‘ໂກ ສຸ ນາມ ເມ ຘມ຺ໂມ ອຊ຺ຌຕ຺ຕໍ ອປ຺ປຫິໂນ, ເຍນ ເມ ເອກທາ ໂລຠຘມ຺ມາປິ ຈິຕ຺ຕໍ ປຣິຍາທາຍ ຕິຏ຺ຐນ຺ຕິ, ໂທສຘມ຺ມາປິ ຈິຕ຺ຕໍ ປຣິຍາທາຍ ຕິຏ຺ຐນ຺ຕິ, ໂມຫຘມ຺ມາປິ ຈິຕ຺ຕໍ ປຣິຍາທາຍ ຕິຏ຺ຐນ຺ຕີ’ຕິ’’, ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ອນຸມານສຸຕ຺ຕ

ປຸຈ຺ຉາ – ອນຸມານສຸຕ຺ຕໍ ປນາວຸໂສ ກຕ຺ຖ ກໍ ອາຣພ຺ຠ ເກນ ຠາສິຕໍ.

ວິສ຺ສຊ຺ຊນາ – ຠຄ຺ເຄສຸ ຠນ຺ເຕ ສຸສຸມາຣຄິເຣ ເຠສກຬາວເນ ອາຍສ຺ມຕາ ມຫາໂມຄ຺ຄລ຺ລານຕ຺ເຖເຣນ ສມ຺ພຫຸເລ ຠິກ຺ຂູ ອາຣພ຺ຠ ຠາສິຕໍ.

ເຈໂຕຂິລສຸຕ຺ຕ

ປຸຈ຺ຉາ – ເຈໂຕຂິລສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ຠາສິຕໍ.

ວນປຕ຺ຖສຸຕ຺ຕ

ປຸຈ຺ຉາ – ວນປຕ຺ຖສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ຠາສິຕໍ.

ມຘຸປິຓ຺ຑິກສຸຕ຺ຕ

ປຸຈ຺ຉາ – ມຘຸປິຓ຺ຑິກສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ສກ຺ເກສຸ ຠນ຺ເຕ ທຓ຺ຑປາຓິໍ ສກ຺ກໍ ອາຣພ຺ຠ ຠາສິຕໍ, ທຓ຺ຑປາຓິ ຠນ຺ເຕ ສກ຺ໂກ ຠຄວນ຺ຕໍ ອຸປສງ຺ກມິຕ຺ວາ ເອຕທໂວຈ ‘‘ກິໍ ວາທີ ສມໂຓ ກິມກ຺ຂາຍີ’’ຕິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ທ຺ເວຘາວິຕກ຺ກສຸຕ຺ຕ

ປຸຈ຺ຉາ – ທ຺ເວຘາວິຕກ຺ກສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ຠາສິຕໍ.

ວິຕກ຺ກສຓ຺ຐານສຸຕ຺ຕ

ປຸຈ຺ຉາ – ວິຕກ຺ກສຓ຺ຐານສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ຠາສິຕໍ.

ກກຈູປມສຸຕ຺ຕ

ປຸຈ຺ຉາ – ເຕນາວຸໂສ ຠຄວຕາ…ເປ… ສມ຺ມາສມ຺ພຸທ຺ເຘນ ກກຈູປມສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອາຍສ຺ມນ຺ຕໍ ໂມຬິຍຜຄ຺ຄຸນໍ ອາຣພ຺ຠ ຠາສິຕໍ, ອາຍສ຺ມາ ຠນ຺ເຕ ໂມຬິຍຜຄ຺ຄຸໂນ ຠິກ຺ຂຸນີຫິ ສທ຺ຘິໍ ອຕິເວລໍ ສໍສຏ຺ໂຐ ວິຫຣຕິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ປຸຈ຺ຉາ – ອຖ ໂຂ ອາວຸໂສ ອາຍສ຺ມໂຕ ໂມຬິຍຜຄ຺ຄຸນສ຺ສ ຕໍ ຠຄວໂຕ ໂອວາທໍ ສຸຕ຺ວາ ກຖໍ ຈິຕ຺ຕໍ ອຸປ຺ປນ຺ນໍ, ກຖຎ຺ຊ ຠຄວາ ອຸຕ຺ຕຣິ ຠິກ຺ຂູນ ໂອວາທມທາສິ.

ວິສ຺ສຊ຺ຊນາ – ອຖ ໂຂ ຠນ຺ເຕ ໂມຬິຍຜຄ຺ຄຸນສ຺ສ ຠຄວໂຕ ອິມໍ ໂອວາທໍ ສຸຕ຺ວາ ຠິກ຺ຂຸນິສໍສຄ຺ຄໂຕ ໂອຣມິສ຺ສາມິ ວິຣມິສ຺ສາມີຕິປິ ຈິຕ຺ຕໍ ນ ອຸປ຺ປນ຺ນໍ, ອສໍວຣເມວ ຠນ຺ເຕ ຈິຕ຺ຕໍ ອຸປ຺ປນ຺ນໍ, ຠຄວາ ຈ ຠນ຺ເຕ ອາຣາຘຍິໍສຸ ວຕ ເມ ຠິກ຺ຂເວ ຠິກ຺ຂູ ເອກໍ ສມຍໍ ຈິຕ຺ຕໍ, ເອວມາທິນາ ອຸຕ຺ຕຣິ ຠິກ຺ຂູນໍ ໂອວາທມທາສິ.

ອຸຠໂຕ ທຓ຺ຑເກນ ເຈປິ ຠິກ຺ຂເວ ກກເຈນ ໂຈຣາ ໂອຈຣກາ ອງ຺ຄມງ຺ຄານິ ໂອກນ຺ເຕຍ຺ຍຸໍ.

ອລຄທ຺ທູປມສຸຕ຺ຕ

ປຸຈ຺ຉາ – ອລຄທ຺ທູປມສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອຣິຏ຺ຐໍ ຠິກ຺ຂຸໍ ຄທ຺ຘພາຘິປຸພ຺ພໍ ອາຣພ຺ຠ ຠາສິຕໍ, ອຣິຏ຺ຐສ຺ສ ຠນ຺ເຕ ຠິກ຺ຂຸໂນ ຄທ຺ຘພາຘິປຸພ຺ພສ຺ສ ເອວຣູປໍ ປາປກໍ ທິຏ຺ຐິຄຕໍ ອຸປ຺ປນ຺ນໍ ‘‘ຕຖາຫໍ ຠຄວຕາ ຘມ຺ມໍ ເທສິຕໍ ອາຊາທາມິ, ຍຖາ ເຍເມ ອນ຺ຕຣາຍິກາ ຘມ຺ມາ ວຸຕ຺ຕາ ຠຄວຕາ, ເຕ ປຏິເສວໂຕ ນາລໍ ອນ຺ຕຣາຍາຍາ’’ຕິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ປຸຈ຺ຉາ – ອຖ ໂຂ ອາວຸໂສ ອາຍສ຺ມໂຕ ອຣິຏ຺ຐສ຺ສ ຄທ຺ຘພາຘິປຸພ຺ພສ຺ສ ກຖໍ ເຈຕໂສ ປຣິວິຕກ຺ໂກ ອຸທປາທິ, ກຖຎ຺ຈ ຠຄວາ ອຸຕ຺ຕຣິ ຠິກ຺ຂຸນໍ ຘມ຺ມເທສນໍ ປວຕ຺ເຕສິ.

ວິສ຺ສຊ຺ຊນາ – ອຖ ໂຂ ຠນ຺ເຕ ອຣິຏ຺ຐສ຺ສ ຠິກ຺ຂຸໂນ ຄທ຺ຘພາຘິປຸພ຺ພສ຺ສ ‘‘ກິຎ຺ຈາປິ ມໍ ຠຄວາ ໂມຆປຸຣິສວາເທນ ວເທສິ, ນ ໂຂ ປນ ເມ ມຄ຺ຄຜລານໍ ອຸປນິສ຺ສໂຍ ນ ໂຫຕິ, ສ຺ວາຫໍ ອາຣຠິຕ຺ວາ ຆຏ຺ເຏຕ຺ວາ ມຄ຺ຄຜລານິ ນິພ຺ພຕ຺ເຕສ຺ສາມີ’’ຕິ, ເອວໍ ໂຂ ຠນ຺ເຕ ເຈຕໂສ ປຣິວິຕກ຺ໂກ ອຸທປາທິ, ຠຄວາ ຈ ຠນ຺ເຕ ທຸປ຺ປຎ຺ຎສ຺ສ ອລຄທ຺ທູປມໍ ທສ຺ເສຕ຺ວາ ອລຄທ຺ທູປມໍ ປຣິຍຕ຺ຕິຎ຺ຈ ທສ຺ເສຕ຺ວາ ປຎ຺ຎວໂຕ ອລຄທ຺ທູປມາຍ ຈ ກຸລ຺ລູປມາຍ ຈ ປຎ຺ຎວໂຕ ນິສ຺ສຣຓປຣິຍຕ຺ຕິໍ ທສ຺ເສຕ຺ວາ ຉ ຈ ທິຏ຺ຐິຏ຺ຐານານິ, ເຕສຎ຺ຈ ຉນ຺ນໍ ທິຏ຺ຐິຏ຺ຐານານໍ ວິນິເວຐນາກາຣໍ ທສ຺ເສຕ຺ວາ ປຣິໂຍສາເນ ຈ ຂນ຺ຘກມ຺ມຏ຺ຐານໍ ອຣຫຕ຺ຕນິກູເຏນ ທສ຺ເສຕ຺ວາ ອຸຕ຺ຕຣິ ຠິກ຺ຂູນໍ ຘມ຺ມກຖໍ ປວຕ຺ເຕສິ.

ວມ຺ມິກສຸຕ຺ຕ

ປຸຈ຺ຉາ – ຘມ຺ມິກສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອາຍສ຺ມນ຺ຕໍ ກຸມາຣກສ຺ສປໍ ອາຣພ຺ຠ ຠາສິຕໍ. ອາຍສ຺ມາ ຠນ຺ເຕ ກຸມາຣກສ຺ສໂປ ຠຄວນ຺ຕໍ ອຸປສງ຺ກມິຕ຺ວາ ວມ຺ມິກປຎ຺ຫໍ ປຸຈ຺ຉິ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ຣຖວິນີຕສຸຕ຺ຕ

ປຸຈ຺ຉາ – ຣຖວິນີຕສຸຕ຺ຕໍ ປນາວຸໂສ ກຕ຺ຖ ເກນ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອາຍສ຺ມຕາ ຈ ສາຣິປຸຕ຺ຕຕ຺ເຖເຣນ ຘມ຺ມເສນາປຕິນາ ອາຍສ຺ມຕາ ຈ ປຸຓ຺ເຓນ ມນ຺ຕາຓິປຸຕ຺ເຕນ ອຎ຺ຎມຎ຺ຎໍ ປຸຈ຺ຉາວິສ຺ສຊ຺ຊນວເສນ ຠາສິຕໍ.

ນິວາປສຸຕ຺ຕ

ປຸຈ຺ຉາ – ນິວາປສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ຠາສິຕໍ.

ປຸຈ຺ຉາ – ອິມສ຺ມິໍ ອາວຸໂສ ສຸຕ຺ເຕ ໂກ ນິວາໂປ ໂກ ເນວາປິໂກ ກາ ເນວາປິກປຣິສາ ກາ ມິຄຊາຕາ ກຖຎ຺ເຈຕິສ຺ສາ ອຸປມາຍ ອຕ຺ໂຖ ທຏ຺ຐພ຺ໂພ.

ວິສ຺ສຊ຺ຊນາ – ອິມສ຺ມິໍ ຠນ຺ເຕ ສຸຕ຺ເຕ ນິວາໂປຕິ ໂຂ ຠນ຺ເຕ ປຎ຺ຈນ຺ເນຕໍ ກາມຄຸຓານໍ ອຘິວຈນໍ, ເນວາປິໂກຕິ ໂຂ ຠນ຺ເຕ ມາຣສ຺ເສຕໍ ປາປິມໂຕ ອຘິວຈນໍ, ເນວາປິກປຣິສາຕິ ໂຂ ຠນ຺ເຕ ມາຣປຣິສາເຍຕໍ ອຘິວຈນໍ, ມິຄຊາຕາຕິ ໂຂ ຠນ຺ເຕ ສມຓພ຺ຣາຫ຺ມຓານເມຕໍ ອຘິວຈນໍ, ອິມສ຺ມິໍ ຠນ຺ເຕ ສຸຕ຺ເຕ ເອຕສ຺ສ ອຕ຺ໂຖ ເອວໍ ທຏ຺ຐພ຺ໂພ.

ປາສຣາສິສຸຕ຺ຕ

ປຸຈ຺ຉາ – ເກນາວຸໂສ ຠຄວຕາ…ເປ… ສມ຺ມາສມ຺ພຸທ຺ເຘນ ປາສຣາສິສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ຠາສິຕໍ, ສມ຺ພຫຸລາ ຠນ຺ເຕ ຠິກ຺ຂູ ຣມ຺ມກສ຺ສ ພ຺ຣາຫ຺ມຓສ຺ສ ອສ຺ສເມ ຠຄວນ຺ຕໍ ອາຣພ຺ຠ ຘມ຺ມິຍາ ກຖາຍ ສນ຺ນິສີທິໍສຸ, ຕສ຺ມິໍ ຠນ຺ເຕ ວຕ຺ຖຸສ຺ມິໍ ຠາສິຕໍ.

ປຸຈ຺ຉາ – ອຖ ໂຂ ອາວຸໂສ ເຕສໍ ສມ຺ພຫຸລານໍ ຠິກ຺ຂູນໍ ຘມ຺ມິຍາ ກຖາຍ ສນ຺ນິສິນ຺ນານໍ ກີທິສໍ ຘມ຺ມກຖໍ ກເຖສິ.

ວິສ຺ສຊ຺ຊນາ – ສາຘຸ ຠິກ຺ຂເວ ເອຕໍ ໂຂ ຠິກ຺ຂເວ ຕຸມ຺ຫາກໍ ປຕິຣູປໍ ກຸລປຸຕ຺ຕານໍ ສທ຺ຘາ ອຄາຣສ຺ມາ ອນຄາຣິຍໍ ປພ຺ພຊິຕານໍ, ຍໍ ຕຸມ຺ເຫ ຘມ຺ມິຍາ ກຖາຍ ສນ຺ນິສີເທຍ຺ຍາຖ, ສນ຺ນິປຕິຕານໍ ໂວ ຠິກ຺ຂເວ ທ຺ວຍໍ ກຣຓີຍໍ ຘມ຺ມີ ວາ ກຖາ ອຣິໂຍ ວາ ຕຸຓ຺ຫີຠາໂວ. ທ຺ເວມາ ຠິກ຺ຂເວ ປຣິເຍສນາ ອຣິຍາ ຈ ປຣິເຍສນາ ອນຣິຍາ ຈ ປຣິເຍສນາ. ເອວມາທິນາ ຠນ຺ເຕ ຠຄວາ ສນ຺ນິປຕິຕານໍ ເຕສໍ ຠິກ຺ຂູນໍ ອຣິຍປຣິເຍສນຎ຺ຈ ອນຣິຍປຣິເຍສນຎ຺ຈ ວິຠຊິຕ຺ວາ ເທເສສິ.

ປຸຈ຺ຉາ – ກຖຎ຺ຈາວຸໂສ ຠຄວາ ອຕ຺ຕນາປິ ອນຣິຍປຣິເຍສນໍ ປຫາຍ ອຣິຍປຣິເຍສນາຍ ປຣິເຍສິຕຠາວໍ ປກາເສສິ.

ວິສ຺ສຊ຺ຊນາ – ອຫມ຺ປິ ສຸທໍ ຠິກ຺ຂເວ ປຸພ຺ເພວ ສມ຺ໂພຘາ ອນຠິສມ຺ພຸທ຺ໂຘ ໂພຘິສຕ຺ໂຕວ ສມາໂນ ອຕ຺ຕນາ ຊາຕິຘມ຺ໂມ ສມາໂນ ຊາຕິຘມ຺ມໍເຍວ ປຣິເຍສາມິ, ອຕ຺ຕນາ ຊຣາຘມ຺ໂມ ພ຺ຍາຘິຘມ຺ໂມ ມຣຓຘມ຺ໂມ ໂສກຘມ຺ໂມ ສໍກິເລສຘມ຺ໂມ ສມາໂນ ສໍກິເລສຘມ຺ມໍເຍວ ປຣິເຍສາມິ. ເອວມາທິນາ ຠນ຺ເຕ ຠຄວາ ອຕ຺ຕນາປິ ອນຣິຍປຣິເຍສນໍ ປຫາຍ ອຣິຍປຣິເຍສນາຍ ປຣິເຍສິຕຠາວໍ ປກາເສສິ.

ປຸຈ຺ຉາ – ເອວໍ ປຐມາຠິສມ຺ພຸທ຺ຘສ຺ສ ອາວຸໂສ ຠຄວໂຕ ອຊປາລນິຄ຺ໂຣຘຣຸກ຺ຂມູເລ ນິສິນ຺ນສ຺ສ ຘມ຺ມເທສນາຍ ກຕສນ຺ນິຏ຺ຐານສ຺ສ ກີທິໂສ

ເຈຕໂສ ປຣິວິຕກ຺ໂກ ອຸທປາທິ, ກຖຎ຺ຈ ຘມ຺ມເທສນາຍ ຈາຣິກາ ອໂຫສິ, ກຖຎ຺ຈ ປຐມາ ຘມ຺ມເທສນາ ອໂຫສິ.

ວິສ຺ສຊ຺ຊນາ – ‘‘ກສ຺ສ ນຸ ໂຂ ອຫໍ ປຐມໍ ຘມ຺ມໍ ເທເສຍ຺ຍໍ, ໂກ ອິມໍ ຘມ຺ມໍ ຂິປ຺ປເມວ ອາຊານິສ຺ສຕີ’’ຕິ ເອວໍ ໂຂ ຠນ຺ເຕ ຠຄວໂຕ ປຐມາຠິສມ຺ພຸທ຺ຘສ຺ສ ອຊປາລນິຄ຺ໂຣຘມູເລ ຘມ຺ມເທສນາຍ ກຕສນ຺ນິຏ຺ຐານສ຺ສ ປຣິວິຕກ຺ໂກ ອຸທປາທິ, ອຖ ຠນ຺ເຕ ຠຄວາ ອຸຣຸເວລາຍໍ ຍຖາຠິຣນ຺ຕໍ ວິຫຣິຕ຺ວາ ເຍນ ພາຣາຓສີ, ເຕນ ປທສາເຍວ ຈາຣິກໍ ປກ຺ກາມິ ຘມ຺ມເທສນາຍ, ທ຺ເວເມ ຠິກ຺ຂເວ ອນ຺ຕາ ປພ຺ພຊິເຕນ ນ ເສວິຕພ຺ພາ, ກຕເມ ທ຺ເວ, ໂຍ ຈາຍໍ ກາເມສຸ ກາມສຸຂລ຺ລິການຸໂຍໂຄ ຫີໂນ ຄາມ຺ໂມ ໂປຖຸຊ຺ຊນິໂກ ອນຣິໂຍ ອນຕ຺ຕສໍຫິໂຕ, ເອວມາທິນາ ຠນ຺ເຕ ຠຄວໂຕ ປຐມາ ຘມ຺ມເທສນາ ອໂຫສິ.

ສພ຺ພາຠິຠູ ສພ຺ພວິທູຫມສ຺ມິ,

ສພ຺ພຘມ຺ເມສຸ ອນູປລິຕ຺ໂຕ;

ສພ຺ພຎ຺ຊໂຫ ຕຓ຺ຫາກ຺ຂເຍ ວິມຸຕ຺ໂຕ,

ສຍໍ ອຠິຎ຺ຎາຍ ກມຸທ຺ທິເສຍ຺ຍໍ.