໖໓. ປຸພ຺ເພ+ກກຕ຺ຕຸການໍ

ເອໂກ ກຕ຺ຕາ ເຍສໍ ພ຺ຍາປາຣານໍ, ເຕສຸ ໂຍ ປຸພ຺ໂພ, ຕທຕ຺ຖໂຕ ກ຺ຣິຍຕ຺ຖາ ຕຸນາທໂຍ ໂຫນ຺ຕິ ຠາເວ. ‘‘ຕຸໍຕຸນາ’’ ທິນາ ກຣສ຺ສ ອາ, ໂສ ກາຕຸນ ກມ຺ມໍ ຄຈ຺ຉຕິ, ອກາຕຸນ ປຸຎ຺ຎໍ ກິລິສ຺ສນ຺ຕິ. ຣໂລເປ ກມ຺ມໍ ກຕ຺ວານ ຠທ຺ຣກໍ, ປຸຎ຺ຎານິ ກຕ຺ວາ ສຄ຺ຄໍ ຄຈ຺ຉຕິ. ອຠິສງ຺ຂຣຓໍ ກຕ຺ວາ ອຠິສງ຺ຂຣິຕ຺ວາ ກຣິຕ຺ວາ ວາ. ຕຖາ ສິພ຺ພິຕ຺ວາ ຉາທຍິຕ຺ວາ ຊານິຕ຺ວາ ຘມ຺ມໍ ສຸຕ຺ວາ ສຸຕ຺ວານ ຘມ຺ມໍ ໂມທຕິ, ສຸຓິຕ຺ວາ, ປຕ຺ວາ ປາປຸຓິຕ຺ວາ, ກິນິຕ຺ວາ, ເຊຕ຺ວາ ຊິນິຕ຺ວາ ຊິຕ຺ວາ, ໂຈເຣຕ຺ວາ ໂຈຣຍິຕ຺ວາ, ປູເຊຕ຺ວາ ປູຊຍິຕ຺ວາ, ຕຖາ ເມຕ຺ຕໍ ຠາເວຕ຺ວາ ຠາວຍິຕ຺ວາ, ວິຫາຣໍ ກາເຣຕ຺ວາ ກາຣຍິຕ຺ວາ ກາຣາເປຕ຺ວາ ກາຣາປຍິຕ຺ວາ ສຄ຺ຄໍ ຄມິສ຺ສນ຺ຕິ+ຈ຺ຈາທິ. ປຸພ຺ເພຕິ ກິໍ, ຠຸຎ຺ຊຕິ ຈ ປຈຕິ ຈ. ‘‘ອປຕ຺ວາ ນທິໍ ປພ຺ພໂຕ, ອຕິກ຺ກມ຺ມ ປພ຺ພຕໍ ນທີ’’ຕິອາທີສຸ ຠູຘາຕຸສ຺ສ ສມ຺ຠວາ ເອກກຕ຺ຕຸກຕາ ປຸພ຺ພກາລຕາ ຈ ຄມ຺ຍເຕ. ‘‘ຠຸຕ຺ວາ ຠຸຕ຺ວາ ຄຈ຺ຉຕີ’’ຕິ ອິມິນາວ ສິທ຺ຘໍ, ອາຠິກ຺ຂຎ຺ຎນ຺ຕຸ ທ຺ວິພ຺ພຈນາວ ຄມ຺ຍເຕ. ກຖໍ ‘‘ຊີວຄ຺ຄາຫໍ ອຄາຫຍິ, ກາຍປ຺ປຈາລກໍ ຄຈ຺ຉຕີ’’ຕິ, ຆຓນ຺ເຕນ ກ຺ຣິຍາວິເສສເນນ ສິທ຺ຘໍ, ຍຖາ ໂອທນປາກໍ ສຍຕີຕິ.