໖໑. ຕຸໍ ຕາເຍ ຕເວ ຠາເວ ຠວິສ຺ສຕິ ກ຺ຣິຍາຍໍ ຕທຕ຺ຖາຍໍ

ຠວິສ຺ສຕິອຕ຺ເຖ ວຕ຺ຕມານໂຕ ກ຺ຣິຍຕ຺ຖາ ຠາເວ ຕຸມາທໂຍ ໂຫນ຺ຕິ ກ຺ຣິຍາຍໍ ຕທຕ຺ຖາຍໍ ປຕີຍມານາຍໍ. ກຣຓາຍ ຄຈ຺ຉຕິ ກາຕຸໍ ຄຈ຺ຉຕິ. ‘‘ຕຸໍຕຸນຕພ຺ເພສຸ ວາ’’ຕິ ກຣສ຺ສ ວາ ອາ ໂຫຕິ, ປຸພ຺ພຣູເປ ກຕ຺ຕາເຍ. ‘‘ກຣສ຺ສາ ຕເວ’’ຕິ ນິຈ຺ຈໍ ອາ, ກາຕເວ. ນິປາຕຕ຺ຕາ ‘‘ອສງ຺ຂ຺ເຍຫິ ສພ຺ພາສໍ’’ຕິ ຈຕຸຕ຺ຖີສສ຺ສ ໂລໂປ. ເອວ+ມຸປຣິ ຕຸນາທີສຸ. ກຕ຺ຕຸໍ ກາເມຕີຕິ ກຕ຺ຕຸກາໂມ, ອຠິສງ຺ຂຣິຕຸ+ມາກງ຺ຂຕິ. ສທ຺ຘມ຺ມໍ ສຸຓິຕຸໍ, ຎິມ຺ຫິ ນາຄເມ ຕສ຺ສ ໂຓ, ນາຄມຕ຺ຕາ ນ ວຸທ຺ຘິ. ໂສຕເວ ໂສຕຸໍ ສຸຓິຕຸໍ ວາ ປຕ຺ເຖຫິ. ເອວໍ ອນຸຠວິຕຸໍ, ປຈິຕຸໍ. ຄນ຺ຕຸໍ, ‘‘ມນານໍ ນິຄ຺ຄຫີຕໍ’’ຕິ ນິຄ຺ຄຫີຕໍ. ຄມິຕຸໍ, ຂນ຺ຕຸໍ, ຂນິຕຸໍ, ຫນ຺ຕຸໍ, ຫນິຕຸໍ, ມນ຺ຕຸໍ, ມນິຕຸໍ, ຫຣິຕຸໍ, ອນຸສ຺ສຣິຕຸໍ ອິຈ຺ຉຕິ. ຕຖາ ຕຸທິຕຸໍ, ປວິສິຕຸໍ, ອຸທ຺ທິສິຕຸໍ, ໂຠຕ຺ຕຸໍ, ສຍິຕຸໍ, ເນຕຸໍ, ຊຸໂຫຕຸໍ, ປຊຫິຕຸໍ, ປຫາຕຸໍ, ທາຕຸໍ, ໂຣທ຺ຘຸໍ, ຣຸນ຺ຘິຕຸໍ, ໂຠຕ຺ຕຸໍ, ຠຸຎ຺ຊີຕຸໍ, ເຉຕ຺ຕຸໍ, ຉິນ຺ທິຕຸໍ, ສິພ຺ພິຕຸໍ, ອູມ຺ຫິ ວສ຺ສ ໂພ, ທ຺ວິຕ຺ຕໍ, ພຸທ຺ຘຸໍ, ຕສ຺ສ ໂຘ. ພຸຊ຺ຌິຕຸໍ, ຍຸກ. ຊານິຕຸໍ ຎາ=ອວໂພຘເນ. ຊນິຕຸໍ. ເຊຕຸໍ ຊິນິຕຸໍ. ປຕ຺ຕຸໍ ປາປຸຓິຕຸໍ. ເກຕຸໍ ກິຓິຕຸໍ. ວິນິຈ຺ເຉຕຸໍ, ອິສ຺ສ ເອ, ວິນິຈ຺ຉິນິຕຸໍ. ຄເຫຕຸໍ ຄຓ຺ຫິຕຸໍ. ໂຈຣິຕຸໍ ໂຈເຣຕຸໍ ໂຈຣຍິຕຸໍ, ປາເລຕຸໍ ປາລຍິຕຸໍ. ປໂຍຊເກ-ຠາເວຕຸໍ ຠາວຍິຕຸໍ, ກາເຣຕຸໍ ກາຣຍິຕຸໍ ກາຣາເປຕຸໍ ກາຣາປຍິຕຸໍ ອິຈ຺ຉຕິ+ຈ຺ຈາທິ.

ເອວໍ ກ຺ຣິຍຕ຺ຖກ຺ຣິຍາຍໍ ຄມ຺ຍມານາຍໍ, ຍຖາ ສຸໂພທ຺ຘຸໍ ວກ຺ຂາມິ, ເອວໍ ທຏ຺ຐຸໍ ຄຈ຺ຉຕິ, ຄນ຺ຕຸ+ມາຣຠຕິ, ຄນ຺ຕຸໍ ປໂຍເຊຕິ, ທສ຺ເສຕຸ+ມາຫ ອິຈ຺ຈາທິ.

ອຣຫສກ຺ກາທີສຸປິ ສິທ຺ຘໍ, ຕຖາ ກາລ ສມຍເວລາສຸ. ໂກ ຕໍ ນິນ຺ທິຕຸ+ມຣຫຕິ, ຣາຊາ ຠວິຕຸ+ມຣຫຕິ, ອຣໂຫ ຠວໍ ວຕ຺ຕຸໍ, ສກ຺ກາ ເຊຕຸໍ ຘເນນ ວາ, ສກ຺ກາ ລທ຺ຘຸໍ, ຠສ຺ສ ໂຘ. ກຕ຺ຕຸໍ ສກ຺ຂິສ຺ສຕິ. ຠພ຺ໂພ ນິຍາມໍ ໂອກ຺ກມິຕຸໍ, ອຠພ຺ໂພ ກາຕຸໍ. ອນຸຈ຺ຉວິໂກ ຠວໍ ທານໍ ປຏິຄ຺ຄເຫຕຸໍ, ອິທໍ ກາຕຸໍ ອນຸຣູປໍ, ທານໍ ທາຕຸໍ ຍຸຕ຺ຕໍ, ທາຕຸໍ ວຕ຺ຕຸຎ຺ຈ ລຠຕິ. ເອວໍ ວຏ຺ຏຕິ ຠາສິຕຸໍ, ຉິນ຺ທິຕຸໍ ນ ຈ ກປ຺ປຕິ ອິຈ຺ຈາທິ. ຕຖາກາໂລ ຠຸຎ຺ຊິຕຸໍ, ສມໂຍ ຠຸຎ຺ຊິຕຸໍ, ເວລາ ຠຸຎ຺ຊິຕຸໍ.

ອລມຕ຺ເຖປິ ສິທ຺ຘໍ, ອລເມວ ທານານິ ທາຕຸໍ, ອລເມວ ປຸຎ຺ຎານິ ກາຕຸໍ.