໕. ຓາທິກຓ຺ຑ
ສມາໂສ ປທສໍເຂໂປ, ປທປຈ຺ຈຍສໍຫິຕໍ;
ຕທ຺ຘິຕໍ ນາມ ໂຫຕີຕິ, ວິຎ຺ເຎຍ຺ຍໍ ເຕສ+ມນ຺ຕຣໍ.
໑. ໂຓ ວາ+ປຈ຺ເຈ
ຉຏ຺ຐີຍນ຺ຕາ ນາມສ຺ມາ ວາ ຓປຈ຺ຈໂຍ ໂຫຕິ ອປຈ຺ເຈ+ຠິເຘຍ຺ເຍ. ອປຈ຺ຈສທ຺ທສມ຺ພນ຺ຘິຕ຺ເຕນ ອປຈ຺ຈວນ຺ຕໂຕ ກຕສຣປຈ຺ຈໂຍ ສມຕ຺ຖ຺ຍໂຕ ຉຏ຺ຐ຺ຍນ຺ຕໂຕ ໂຫຕີຕິ ‘‘ຉຏ຺ຐີຍນ຺ຕາ ນາມສ຺ມາ’’ຕິ ສຸຕ຺ເຕ ອວຸຕ຺ຕມ຺ປິ ວຸຕ຺ຕໍ. ຓາທີນໍ ຕທ຺ຘິຕນ຺ຕິ ປຸພ຺ພາຈຣິຍສຎ຺ຎາ. ຓກາໂຣ ວຸທ຺ຘ຺ຍຕ຺ໂຖ. ເອວ+ມຎ຺ຎຕ຺ຣາປິ. ຓາທິວຸຕ຺ຕິຕ຺ຕາ ‘‘ເອກຕ຺ຖຕາຍໍ’’ຕິ ວິຠຕ຺ຕິໂລໂປ.
໑໒໔. ສຣານ+ມາທິສ຺ສາ+ຍຸວຓ຺ຓສ຺ສາ+ເອໂອ ຓານຸພນ຺ເຘ
ສຣານ+ມາທິຠູຕາ ເຍ ອກາຣິ+ວຓ຺ຓຸ+ວຓ຺ຓາ, ເຕສໍ ອາ+ເອ+ໂອ ວາ ໂຫນ຺ຕິ ຍຖາກ຺ກມໍ ຓານຸພນ຺ເຘຕິ ອກາຣສ຺ສ ອາກາໂຣ. ອາ+ເອ+ໂອນໍ ວຸທ຺ຘີຕິປິ ປຸພ຺ພາຈຣິຍສຎ຺ຎາ. ວສິຏ຺ຐສ຺ສາ+ປຈ຺ຈໍ ວາສິຏ຺ໂຐ. ວີມ຺ຫິ ວາສິຏ຺ຐີ. ເວຕິ ວສິຏ຺ຐສ຺ສາ+ປຈ຺ຈໍຕິ ວາກ຺ຍສ຺ສ ຈ ວສິຏ຺ຐາປຈ຺ຈໍຕິ ສມາສສ຺ສ ຈ ວິກປ຺ປຕ຺ຖໍ. ໂສ ຈ ວາສທ຺ໂທ ຍາວ ‘‘ສກຕ຺ເຖ’’ຕິ ອຘິກຣີຍຕິ.
ນປຸໍສເກນ ລິງ຺ເຄນ, ສທ຺ໂທ+ທາຫຸ ປຸເມນ ວາ;
ນິທ຺ທິສ຺ສຕີຕິ ຎາຕພ຺ພ+ມວິເສເສ ປນິ+ຈ຺ຉິເຕຕິ –
ວຸຕ຺ຕຕ຺ຖາ ອປຈ຺ຈສທ຺ທສ຺ສ ນປຸໍສກຕ຺ເຖປິ ປຸຕ຺ຕປຸຕ຺ຕີນໍ ທ຺ວິນ຺ນມ຺ປິ ວາຈໂກ ໂຫຕິ.
ຓາທໂຍ+ຠິເຘຍ຺ຍລິງ຺ຄາ, ອປຈ຺ເຈ ຕ຺ວ+ນປຸໍສກາ;
ນປຸໍສເກ ສກຕ຺ເຖ ຓ຺ໂຍ, ຠິຍ຺ໂຍ ຠາວສມູຫຊາ;
ຕາ ຕຸ+ຕ຺ຖິຍ+ມສໍຂ຺ຍາເນ, ຕ຺ວາທິຈີປຈ຺ຈຍນ຺ຕກາ.
ຠາຣທ຺ວາຊສ຺ສ ອປຈ຺ຈໍ=ປຸຕ຺ໂຕ ຠາຣທ຺ວາໂຊ, ເອວໍ ເວສ຺ສາມິຕ຺ໂຕ, ໂຄຕໂມ. ເອຕ຺ຖ ຈ ອ+ຍຸວຓ຺ຓນ຺ຕາຠາວາ ອາ+ເອ+ໂອນໍ ນ ວຸທ຺ຘິ. ວາສຸເທວສ຺ສ ອປຈ຺ຈໍ ວາສຸເທໂວ, ພລເທໂວ. ຈິຕ຺ຕໂກຕິອາທີສຸ ປນ ສໍໂຍຄນ຺ຕຕ຺ຕາ ‘‘ສໍໂຍເຄ ກ຺ວຈີ’’ຕິ ກ຺ວຈິ ນ ວຸທ຺ຘິ. ອຸປຄຸໂນ ອປຈ຺ຈໍ ໂອປຄໂວ ໂອປຄວີ. ເອຕ຺ຖ ‘‘ອຸວຓ຺ຓສ຺ສາ+ວງ ສເຣ’’ຕິ ອຸກາຣສ຺ສ ອວງ.
ວຈ຺ຉສ຺ສາ+ປຈ຺ຈນ຺ຕິ ວິຄ຺ຄຍ຺ຫ ປຸພ຺ພສຸຕ຺ເຕນ ຓປຈ຺ຈເຍ ກເຕ ປຸນ ວຈ຺ຉສ຺ສາ+ປຈ຺ຈໍຕິ ວິຄ຺ຄໂຫ.
໒. ວຈ຺ຉາທິໂຕ ຓານ+ຓາຍນາ
ວຈ຺ຉາທີຫິ ອປຈ຺ຈປຈ຺ຈຍນ຺ເຕຫິ ໂຄຕ຺ຕາທີຫິ ຈ ສທ຺ເທຫິ ຓານ+ຓາຍນປຈ຺ຈຍາ ວາ ໂຫນ຺ຕິ ອປຈ຺ເຈ. ວຈ຺ຉາໂນ, ວຈ຺ຉາຍໂນ, ‘‘ສໍໂຍເຄ ກ຺ວຈີ’’ຕິ ນ ວຸທ຺ຘິ. ກຕິສ຺ສາ+ປຈ຺ຈໍ ກຈ຺ໂຈ, ‘‘ຓ຺ຍ ທິຈ຺ຈາທີຫີ’’ຕິ ຓ຺ໂຍ, ‘‘ໂລໂປ+ວຓ຺ຓິ+ວຓ຺ຓານໍ’’ຕິ ອກາຣໂລເປ ຈວຄ຺ຄປຸພ຺ພຣູປານິ. ກຈ຺ຈສ຺ສາ+ປຈ຺ຈໍ ກຈ຺ຈາໂນ, ກຈ຺ຈາຍໂນ, ຍາຄເມ ກາຕິຍາໂນ. ມຸຄ຺ຄສ຺ສາ+ປຈ຺ຈໍ=ນຕ຺ຕາທີຕິ ວາກ຺ເຍ ວຸທ຺ຘິ+ອິກາຣໂລປ+ປຸພ຺ພຣູປານິ. ໂມຄ຺ຄລ຺ລສ຺ສາ+ປຈ຺ຈໍຕິ ປຸນຓານ+ຓາຍນາ ໂຫນ຺ຕິ, ໂມຄ຺ຄລ຺ລາໂນ ໂມຄ຺ຄລ຺ລາຍໂນ. ອິເມ ຈຕ຺ຕາໂຣ ອປຈ຺ຈປຈ຺ຈຍນ຺ຕາ. ໂຄຕ຺ຕາທິໂຕ ຍຖາສກຏສ຺ສາ+ປຈ຺ຈໍ ນຕ຺ຕາທີຫິ ສກຏາໂນ ສກຏາຍໂນ. ກຓ຺ຫສ຺ສາ+ປຈ຺ຈໍ ນຕ຺ຕາທິ ກຓ຺ຫາໂນ ກຓ຺ຫາຍໂນ. ເອວໍ ອຄ຺ຄິເວສ຺ສາໂນ ອຄ຺ຄິເວສ຺ສາຍໂນ, ມຸຎ຺ຊາໂນ ມຸຎ຺ຊາຍໂນ, ກຸຎ຺ຊາໂນ ກຸຎ຺ຊາຍໂນ. ສພ຺ພຕ຺ຖ ສໍໂຍຄຕ຺ຕາ ນ ວຸທ຺ຘິ. ອາກຕິຄໂຓ+ຍໍ.
໓. ກຕ຺ຕິກາວິຘວາທີຫິ ເຓຍ຺ຍເຓຣາ
ກຕ຺ຕິກາທີຫິ ວິຘວາທີຫິ ຈ ເຓຍ຺ຍເຓຣປ຺ປຈ຺ຈຍາ ໂຫນ຺ຕິ ວາ ຍຖາກ຺ກມໍ. ກຕ຺ຕິກາຍ ອປຈ຺ຈໍ ກຕ຺ຕິເກຍ຺ໂຍ, ຄຣຸໂຬ ວິນຕາຍ=ສຸປຓ຺ຓມາຕຸຍາ ອປຈ຺ຈໍ ເວນເຕຍ຺ໂຍ. ໂຣຫິຓິຍາ ອປຈ຺ຈໍ ໂຣຫິເຓຍ຺ໂຍ, ຄງ຺ຄາຍ ອປຈ຺ຈໍ ຄງ຺ເຄຍ຺ໂຍ. ເອວໍ ຠາຄິເນຍ຺ໂຍ, ນາເທຍ຺ໂຍ, ອນ຺ເຕຍ຺ໂຍ, ອາເຫຍ຺ໂຍ, ກາເປຍ຺ໂຍ, ສຸຈິຍາ ອປຈ຺ຈໍ ໂສເຈຍ຺ໂຍ, ພາເລຍ຺ໂຍ. ເຓເຣ-ວິຘວາຍ ອປຈ຺ຈໍ ເວຘເວໂຣ. ພນ຺ຘກິຍາ=ອຠິສາຣິກາຍ ອປຈ຺ຈໍ ພນ຺ຘ-ເກໂຣ. ສມຓສ຺ສ ອຸປຊ຺ຌາຍສ຺ສາ+ປຈ຺ຈໍ ສາມເຓໂຣ, ນາຬິເກໂຣ ອິຈ຺ຈາທິ.
໔. ຓ຺ຍ ທິຈ຺ຈາທີຫິ
ທິຕິປ຺ປຠຸຕີຫິ ຓ຺ໂຍ ໂຫຕິ ອປຈ຺ເຈ.
໑໒໕. ສໍໂຍເຄ ກ຺ວຈິ
ສໍໂຍຄວິສເຍ ກ຺ວຈິ ອາ+ເອ+ໂອວຸທ຺ຘິໂຍ ໂຫນ຺ຕິ ຓານຸພນ຺ເຘ.
໑໓໑. ໂລໂປ+ວຓ຺ຓິ+ວຓ຺ຓານໍ
ອວຓ຺ຓິ+ວຓ຺ຓານໍ ໂລໂປ ໂຫຕິ ຍກາຣາໂທ ປຈ຺ຈເຍ. ທິຕິຍາ=ອສຸຣມາຕຸຍາ ອປຈ຺ຈໍ ເທຈ຺ໂຈ ອາທິຈ຺ໂຈ. ກຸຓ຺ຑນິຍາ ອປຈ຺ຈໍ ໂກຓ຺ຑຎ຺ໂຎ, ນສ຺ສ ຎ຺ເຎ ປຸພ຺ພຣູປໍ. ອທິຕີຕິ ເທວມາຕາ.
ຠາຕຸໂນ ອປຈ຺ຈໍ ຠາຕພ຺ໂຍ, ‘‘ຍມ຺ຫິ ໂຄສ຺ສ ຈາ’’ຕິ ຍມ຺ຫິ ອຸສ຺ສ ອວງ ອກາຣໂລປປຸພ຺ພຣູປານິ.
໕. ອາ ຓິ
ອກາຣນ຺ຕໂຕ ຓິ ວາ ໂຫຕ+ປຈ຺ເຈ ພຫຸລໍ. ອາ=ຕິ ນາມວິເສສນຕ຺ຕາ ອ-ກາຣນ຺ຕໂຕຕິ ວຸຕ຺ຕໍ. ທກ຺ຂສ຺ສາ+ປຈ຺ຈໍ ທກ຺ຂິ, ທຕ຺ຕິ, ໂທຓິ, ວາສວິ, ວາຣຸຓິ. ຊິນທຕ຺ຕສ຺ສາ+ປຈ຺ຈໍ ເຊນທຕ຺ຕິ, ສຸທ຺ໂຘທນິ, ອານຸຣຸທ຺ຘິ ອິຈ຺ຈາທິ.
໖. ຣາຊໂຕ ຎ຺ໂຎ ຊາຕິຍໍ
ຣາຊໂຕ ຎ຺ໂຎ ວາ ໂຫຕ+ປຈ຺ເຈ ຂຕ຺ຖິຍຊາຕິຍໍ ຄມ຺ຍມານາຍໍ. ຣຎ຺ໂຎ ອປຈ຺ຈໍ ຣາຊຎ຺ໂຎ. ຊາຕີຍນ຺ຕິ ກິໍ, ຣາຊາປຈ຺ຈໍ.
໗. ຂຕ຺ຕາ ຍິ+ຍາ
ຕິຊາຕິຍໍ ອປຈ຺ເຈ ຍ+ອິຍາ ໂຫນ຺ຕິ. ຂຕ຺ຕສ຺ສາ+ປຈ຺ຈໍ ຂຕ຺ໂຍ ຂຕ຺ຕິໂຍ. ຊາຕິຍໍ ຕ຺ເວວ, ຂຕ຺ຕິ.
໘. ມນຸໂຕ ສ຺ສ+ສຓ
ມນຸໂຕ ຊາຕິສມຸທາເຍ ສ຺ສ+ສຓ ໂຫນ຺ຕຸ+ປຈ຺ເຈ. ມນຸໂນ ອປຈ຺ຈໍ ມນຸສ຺ໂສ ມານຸໂສ, ມນຸສ຺ສີ ມານຸສີ. ຊາຕິຍໍ ຕ຺ເວວ, ມານໂວ, ນສ຺ສ ໂຓ, ມາຓໂວ.
໙. ຊນປທນາມສ຺ມາ ຂຕ຺ຕິຍາ ຣຎ຺ເຎ ຈ ໂຓ
ຊນປທສ຺ສ ຍໍ ນາມໍ, ຕໍ ນາມສ຺ມາ ຂຕ຺ຕິຍາ ອປຈ຺ເຈ ຣຎ຺ເຎ ຈ ໂຓ ໂຫຕິ. ປຎ຺ຈາລານໍ ອປຈ຺ຈໍ ຣາຊາ ວາ ປຎ຺ຈາໂລ, ໂກສໂລ, ມາຄໂຘ, ໂອກ຺ກາໂກ. ຊນປທນາມສ຺ມາຕິ ກິໍ, ທາສຣຖິ. ຂຕ຺ຕິຍາຕິ ກິໍ, ປຎ຺ຈາລສ຺ສ ພ຺ຣາຫ຺ມຓສ຺ສາ+ປຈ຺ຈໍ ປຎ຺ຈາລິ.
໑໐. ຓ຺ຍ ກຸຣຸສິວີຫິ
ກຸຣຸສິວີຫິ ອປຈ຺ເຈ ຣຎ຺ເຎ ຈ ຓ຺ໂຍ ໂຫຕິ. ກຸຣູນໍ ອປຈ຺ຈໍ ຣາຊາ ວາ ໂກຣພ຺ໂຍ. ‘‘ຍມ຺ຫິ ໂຄສ຺ສ ຈາ’’ຕິມິນາ ອວງ, ພກາຣປຸພ຺ພຣູປານິ. ເສພ຺ໂພ, ອິໂລໂປ. (ອປຈ຺ຈຕທ຺ຘິຕໍ).
໑໑. ຓ ຣາຄາ ເຕນ ຣຕ຺ຕໍ
ຣາຄວາຈີຕຕິຍນ຺ຕໂຕ ຣຕ຺ຕ+ມິຈ຺ເຈ+ຕສ຺ມິໍ ອຕ຺ເຕ ໂຓ ໂຫຕິ. ກຸສຸມ຺ຠາທີຫິ ວຓ຺ຓນ຺ຕຣປຕ຺ຕໍ ຣຕ຺ຕໍ ນາມ. ກສາເວນ ຣຕ຺ຕໍ ກາສາວໍ. ເອວໍ ກຸສຸມ຺ເຠນ ຣຕ຺ຕໍ ໂກສຸມ຺ຠໍ, ຫາລິທ຺ທໍ, ປຕ຺ຕງ຺ຄໍ, ມຎ຺ເຊຏ຺ຐໍ, ກຸງ຺ກຸມໍ. ອິຘ ນ ໂຫຕິ ນີລໍ ປີຕນ຺ຕິ, ຄຸຓວຈນຕ຺ຕາ ເຓນ ວິນາປິ ທພ຺ພສ຺ສາ+ຠິຘານໂຕ.
໑໒. ນກ຺ຂຕ຺ເຕນິ+ນ຺ທຸຍຸຕ຺ເຕນ ກາເລ
ຕຕິຍນ຺ຕໂຕ ນກ຺ຂຕ຺ຕາ ເຕນ ລກ຺ຂິເຕ ກາເລ ໂຓ ໂຫຕິ, ຕໍ ເຈ ນກ຺ຂຕ຺ຕ+ມິນ຺ທຸຍຸຕ຺ຕໍ ໂຫຕິ. ຜຸສ຺ເສນ ອິນ຺ທຸຍຸຕ຺ເຕນ ລກ຺ຂິຕາ ປຸຓ຺ຓມາສີ ຜຸສ຺ສີ ຣຕ຺ຕິ, ຜຸສ຺ໂສ ອໂຫ, ມຆາຍ ອິນ຺ທຸຍຸຕ຺ຕາຍ ລກ຺ຂິຕາ ປຸຓ຺ຓມາສີ ມາຆີ, ມາໂຆ.
໑໓. ສາ+ສ຺ສ ເທວຕາ ປຸຓ຺ຓມາສີ
ເສຕິ ປຐມນ຺ຕາ ອສ຺ເສຕິ ຉຏ຺ຐິຍຕ຺ເຖ ໂຓ ໂຫຕິ, ຍໍ ປຐມນ຺ຕໍ, ສາ ເຈ ເທວຕາ ປຸຓ຺ຓມາສີ ວາ. ສຸຄໂຕ ເທວຕາ ອສ຺ສ ໂສຄໂຕ, ມາຫິນ຺ໂທ, ຍາໂມ, ວາຣຸໂຓ. ພຸທ຺ໂຘ ອສ຺ສ ເທວຕາຕິ ພຸທ຺ໂຘ. ຜຸສ຺ສີ ປຸຓ຺ຓມາສີ ອສ຺ສ ສມ຺ພນ຺ຘິນີຕິ ຜຸສ຺ໂສ ມາໂສ. ເອວໍ ມາໂຆ, ຜຄ຺ຄຸໂນ, ຈິຕ຺ໂຕ, ເວສາໂຂ, ເຊຏ຺ຐມູໂລ, ອາສາຬ຺ໂຫ, ສາວໂຓ, ໂປຏ຺ຐປາໂທ, ອສ຺ສຍຸໂຊ, ກຕ຺ຕິໂກ, ມາຄສິໂຣ. ປຸຓ຺ຓມາສີ ຈ ຠຕກມາສສມ຺ພນ຺ຘິນີ ນ ໂຫຕິ, ປຸຓ຺ໂຓ ມາ ອສ຺ສນ຺ຕິ ນິພ຺ພຈນາ, ອໂຕ ເອວ ນິປາຕນາ ໂຓ, ສາຄໂມ ຈ.
໑໔. ຕ+ມຘີເຕ ຕໍ ຊານາຕິ ກ+ຓິກາ ຈ
ທຸຕິຍນ຺ຕໂຕ ຕ+ມຘີເຕ ຕໍ ຊານາຕີຕິ ເອເຕສ຺ວ+ຕ຺ເຖສຸ ໂຓ ໂຫຕິ ໂກ ຓິໂກ ຈ. ເອຕ຺ຖ ຈສທ຺ໂທ ໂກ ຈຓິໂກ ຈ ໂຫຕີຕິ ສມຸຈ຺ຈິໂນ, ໂນ ຓປຈ຺ຈຍໍ. ພ຺ຍາກຣຓ+ມຘີເຕ ຊານາຕີຕິ ວາ ເວຍ຺ຍາກຣໂຓ, ວິ+ອາ+ກຣຓນ຺ຕິ ວິຈ຺ຉິຊ຺ຊ ກຕຍາເທສສ຺ສິ+ກາຣສ຺ສ ‘‘ຕທາເທສາ ຕທີວ ຠວນ຺ຕີ’’ຕິ ຎາຍາ ‘‘ສຣານ’’ມິຈ຺ຈາທິນາ ເອກາເຣ ຍາຄມທ຺ວິຕ຺ຕານິ. ເອວໍ ໂມຫຸຕ຺ໂຕ, ເນມິຕ຺ໂຕ, ອງ຺ຄວິຊ຺ໂຊ, ວຕ຺ຖຸວິຊ຺ໂຊ, ຉນ຺ທໂສ, ‘‘ມນາ, ທີນໍ ສກ’’ ອິຕິ ສກາຄໂມ. ກມໂກ, ປທໂກ, ເວນຍິໂກ, ສຸຕ຺ຕນ຺ຕິໂກ, ອາຠິຘມ຺ມິໂກ. ທ຺ວິຕຄ຺ຄຫຓໍ ອຊ຺ເຌນຊານເນ ຈ ວິສຸໍ ວິສຸໍ ປຈ຺ຈຍວິຘານຕ຺ຖໍ, ອຊ຺ເຌນວິສຍທສ຺ສນຕ຺ຖໍ, ປສິທ຺ຘຸປສໍຫຣຓຕ຺ຖຎ຺ຈ.
໑໕. ຕສ຺ສ ວິສເຍ ເທເສ
ຉຏ຺ຐິຍນ຺ຕາ ວິສເຍ ເທສສຣູເປ ໂຓ ໂຫຕິ. ວສາຕີນໍ ວິສໂຍ ເທໂສ ວາສາໂຕ. ເທເສຕິ ກິໍ, ຈກ຺ຂຸສ຺ສ ວິສໂຍ ຣູປໍ, ເທວທຕ຺ຕສ຺ສ ວິສໂຍ+ນຸວາໂກ.
໑໖. ນິວາເສ ຕນ຺ນາເມ
ຕິ ຕນ຺ນາເມ ນິວາເສ ເທເສ ໂຓ ໂຫຕິ. ສິວີນໍ ນິວາໂສ ເທໂສ ເສພ຺ໂພ. ເອຕ຺ຖ ‘‘ຍວາ ສເຣ’’ຕິ ຍກາເຣ ພກາຣປຸພ຺ພຣູປານິ. ວາສາໂຕ.
໑໗. ອທູຣຠເວຕິ
ໂຓ, ວິທິສາຍ ອທູຣຠວໍ ເວທິສໍ.
໑໘. ເຕນ ນິພ຺ພຕ຺ເຕຕິ
ຕຕິຍນ຺ຕາ ນິພ຺ພຕ຺ຕຕ຺ເຖ ໂຓ ໂຫຕິ. ກຸສມ຺ເພນ ນິພ຺ພຕ຺ຕາ ໂກສມ຺ພີ ນຄຣໍ, ເອວໍ ກາກນ຺ທີ, ມາກນ຺ທີ, ສຫສ຺ເສນ ນິພ຺ພຕ຺ຕາ ສາຫສ຺ສີ ປຣິຂາ, ເຫຕຸມ຺ຫິ ກຕ຺ຕຣິ ກຣເຓ ຈ ຍຖາໂຍຄໍ ຕຕິຍາ.
໑໙. ຕ+ມິຘ+ຕ຺ຖິ
ຕນ຺ຕິ ປຐມນ຺ຕາ ອິຘາຕິ ສຕ຺ຕມ຺ຍຕ຺ເຖ ເທເສ ຕນ຺ນາເມ ໂຓ ໂຫຕິ, ຍໍ ຕໍ ປຐມນ຺ຕ+ມຕ຺ຖິ ເຈ. ອຸທຸມ຺ພຣາ ອສ຺ມິໍ ເທເສ ສນ຺ຕີຕິ ໂອທຸມ຺ພໂຣ, ພາທໂຣ, ປພ຺ພໂຊ.
໒໐. ຕຕ຺ຣ ຠເວຕິ
ສຕ຺ຕມ຺ຍນ຺ຕາ ຠວຕ຺ເຖ ໂຓ. ອຸທເກ ຠໂວ ໂອທໂກ, ໂອຣໂສ, ຊານປໂທ, ມາຄໂຘ, ກາປິລວຕ຺ຖໂວ, ໂກສມ຺ໂພ, ມນສິ ຠວໍ ມານສໍ ສຸຂໍ, ສກາຄໂມ. ສາຣໂສ ສກຸໂຓ, ສາຣສີ ສກຸຓີ, ສາຣສໍ ປຸປ຺ຜໍ. ມິຕ຺ເຕ ຠວາ ເມຕ຺ຕາ ເມຕ຺ຕີ ວາ. ປຸເຣ ຠວາ ໂປຣີ ວາຈາ. ປາວຸເສ ຠໂວ ປາວຸໂສ ເມໂຆ. ປາວຸສາ ຣຕ຺ຕິ, ປາວຸສໍ ອພ຺ຠໍ. ສາຣໂທ, ສາຣທາ, ສາຣທໍ ປຸປ຺ຜໍ. ມາຘຸໂຣ ຊໂນ, ມາຘຸຣາ ຄຓິກາ, ມາຘຸຣໍ ວຕ຺ຖໍ.
໒໑. ອຊ຺ຊາທີຫິ ຕໂນຕິ
ຠວຕ຺ເຖ ຕໂນ. ອຊ຺ຊ ຠໂວ ອຊ຺ຊຕໂນ, ສ຺ວາຕໂນ, ຫິຍ຺ຍຕໂນ. ‘‘ເອໂອນ+ມ ວຓ຺ເຓ’’ຕິ ເອໂອນໍ ອ ໂຫຕິ.
໒໒. ປຸຣາໂຕ ໂຓ ຈຕິ
ຠວຕ຺ເຖ ໂຓ ຕໂນ ຈ. ເອຕ຺ຖ ຓກາໂຣ ອວຍໂວ, ເນວາ+ນຸພນ຺ໂຘ. ປຸຣາໂຓ, ປຸຣາຕໂນ.
໒໓. ອມາຕ຺ວ+ຈ຺ໂຈຕິ
ຠວຕ຺ເຖ ອຈ຺ໂຈ ໂຫຕິ. ອມາ=ສຫ ຠໂວ ອມຈ຺ໂຈ.
໒໔. ມຊ຺ຌາທິຕ຺ວິ+ໂມຕິ
ຠວຕ຺ເຖ ອິໂມ, ມຊ຺ເຌ ຠໂວ ມຊ຺ຌິໂມ. ເອວໍ ອນ຺ຕິໂມ, ເຫຏ຺ຐິໂມ, ອຸປຣິໂມ, ໂອຣິໂມ, ປາຣິໂມ, ປຈ຺ຉິໂມ, ອພ຺ຠນ຺ຕຣິໂຘ, ປຈ຺ຈນ຺ຕິໂມ.
໒໕. ກຓ+ເຓຍ຺ຍ+ເຓຍ຺ຍກ+ຍິ+ຍາຕິ
ຠວຕ຺ເຖ ກຓອາທໂຍ ໂຫນ຺ຕິ. ກຓ-ກຸສິນາຣາຍໍ ຠໂວ ໂກສິນາຣໂກ, ມາຄຘໂກ, ອາຣຎ຺ຎໂກ ວິຫາໂຣ, ຣາຊຄຫໂກ, ໂກສມ຺ພໂກ, ອິນ຺ທປຕ຺ຕໂກ, ກາປິລໂກ, ຠາຣຸກຈ຺ຉໂກ, ນາຄຣໂກ. ອງ຺ເຄສຸ ຊາໂຕ ອງ຺ຄໂກ, ໂກສລໂກ, ເວເທຫໂກ, ກມ຺ໂພຊໂກ, ຄນ຺ຘາຣໂກ, ໂສວີຣໂກ, ສິນ຺ຘວໂກ, ອສ຺ສໂກ ອິຈ຺ຈາທິ. ເຓຍ຺ຍ-ຄງ຺ເຄຍ຺ໂຍ, ປພ຺ພເຕຍ຺ໂຍ, ວາເນຍ຺ໂຍ. ເຓຍ຺ຍກ-ໂກສເລຍ຺ຍໂກ, ພາຣາຓເສຍ຺ຍໂກ, ຈມ຺ເປຍ຺ຍໂກ, ສິລາຍ ຊາຕໍ ເສເລຍ຺ຍກໍ, ມິຖິເລຍ຺ຍໂກ. ພາຣາຓເສຍ຺ຍໂກຕ຺ຍາທີສຸ ‘‘ທິສ຺ສນ຺ຕ+ຎ຺ເຎປິ ປຈ຺ຈຍາ’’ຕິ ເອຍ຺ຍໂກ, ເອວໍ ອຸປຣິ ສຸຕ຺ເຕ ທສ຺ສິຕປຈ຺ຈຍໂຕ ວິສຸໍ ປຈ຺ຈເຍ ທສ຺ສິເຕ ອິມິນາ ສຸຕ຺ເຕນາຕິ ທຏ຺ຐພ຺ພໍ. ຍ-ຄມ຺ໂມ, ຍມ຺ຫິ ອກາຣໂລເປ ປຸພ຺ພຣູປໍ ຣສ຺ໂສ ຈ. ທິພ຺ໂພ. ອິຍ-ອຸທຣິໂຍ, ທິວິໂຍ, ປຎ຺ຈາລິໂຍ, ໂພຘິປກ຺ຂິໂຍ, ໂລກິໂຍ.
໒໖. ຓິໂກ
ສຕ຺ຕມ຺ຍນ຺ຕາ ຠວຕ຺ເຖ ຓິໂກ ໂຫຕິ. ສຣເທ ຠໂວ ສາຣທິໂກ ທິວໂສ, ສາຣທິກາ ຣຕ຺ຕິ.
໒໗. ຕ+ມສ຺ສ ສິປ຺ປໍ ສີລໍ ປຓ຺ຍໍ ປຫຣຓໍ ປໂຍຊນໍ
ປຐມນ຺ຕາ ສິປ຺ປາທິວາຈກາ ອສ຺ເສຕິ ຉຏ຺ຐ຺ຍຕ຺ເຖ ຓິໂກ ໂຫຕິ. ວີຓາວາທນໍ ສິປ຺ປ+ມສ຺ສ ເວຓິໂກ, ວີຓາວາທນໍ ອເຠໂທປຈາເຣນ ວີຓາ ນາມ. ໂມທິງ຺ຄິໂກ, ວໍສິໂກ. ປໍສຸກູລຘາຣຓໍ ສີລ+ມສ຺ສ ປໍສຸກູລິໂກ, ເຕຈີວຣິໂກ. ຄນ຺ໂຘ ປຓ຺ຍ+ມສ຺ສ ຄນ຺ຘິໂກ, ເຕລິໂກ, ໂຄຬິໂກ, ປູວິໂກ, ປຓ຺ຓິໂກ, ຕມ຺ພຸລິໂກ, ໂລຓິໂກ. ຈາໂປປຫຣຓ+ມສ຺ສ ຈາປິໂກ, ໂຕມຣິໂກ, ມຸຄ຺ຄຣິໂກ, ໂມສລິໂກ. ອຸປຘິ=ກ຺ຂນ຺ຘາທິ ປໂຍຊນ+ມສ຺ສ ໂອປຘິກໍ, ສາຕິກໍ, ສາຫສ຺ສິກໍ.
໒໘. ຕໍ ຫນ຺ຕ+ຣຫຕິ ຄຈ຺ຉຕຸ+ຎ຺ຉຕິ+ຈຣຕິ
ທຸຕິຍນ຺ຕາ ຫນ຺ຕີຕິ ເອວມາທີສ຺ວ+ຕ຺ເຖສຸ ຓິໂກ ໂຫຕິ. ປກ຺ຂິໂນ ຫນ຺ຕີຕິ ປກ຺ຂິໂກ, ສາກຸຓິໂກ, ມາຍູຣິໂກ, ມຈ຺ເຉ ຫນ຺ຕີຕິ ມຈ຺ຉິໂກ, ເມນິໂກ. ມິເຄ ຫນ຺ຕີຕິ ມາຄວິໂກ, ວກາຣາຄໂມ. ມິຄສ຺ສ ‘‘ຕທມິນາ’’ທິນາ ມຄວາເທເສປິ ມາຄວິໂກ. ໂອຣພ຺ຠິໂກ, ຫາຣິຓິໂກ. ສູກຣິໂກຕິ ອິໂກ. ສຕ+ມຣຫຕີຕິ ສາຕິກໍ, ສນ຺ທິຏ຺ຐິກໍ, ເອຫິ ປສ຺ສ ວິຘິໍ ອຣຫຕີຕິ ເອຫິປສ຺ສິໂກ. ເອຕ຺ຖ ຕ຺ຍາທ຺ຍນ຺ຕສມຸທາຍໂຕ ອນຸກຣຓຕ຺ຕາ ວາ ຕທ຺ຘິຕສ຺ສ ອຠິຘານລກ຺ຂຓຕ຺ຕາ ວາ ພຫຸລໍວິຘາເນນ ວາ ປຈ຺ຈໂຍ. ສາຫສ຺ສິໂກ, ກຸມ຺ຠິໂກ, ໂທຓິໂກ, ອທ຺ຘມາສິໂກ, ກຫາປຓິໂກ, ອາສີຕິກາ ຄາຖາ, ນາວຸຕິກາ. ສຫສ຺ສິໂຍຕິ ອິໂຍ. ປຣທາຣໍ ຄຈ຺ຉຕີຕິ ປາຣທາຣິໂກ, ມຄ຺ຄິໂກ, ປຎ຺ຎາສໂຍຊນິໂກ, ປຖິໂກ. ພທເຣ ອຸຎ຺ຉຕີຕິ ພາທຣິໂກ, ສາມາກິໂກ. ຘມ຺ມໍ ຈຣຕີຕິ ຘມ຺ມິໂກ, ອຘມ຺ມິໂກ.
໒໙. ເຕນ ກຕໍ ກີຕໍ ພທ຺ຘ+ມຠິສງ຺ຂຕໍ ສໍສຏ຺ຐໍ ຫຕໍ ຫນ຺ຕິ ຊິຕໍ ຊຍຕິ ທິພ຺ພຕິ ຂນຕິ ຕຣຕິ ຈຣຕິ ວຫຕິ ຊີວຕິຕິ
ກຕາທີສ຺ວ+ຕ຺ເຖສຸ ຓິໂກ. ກາເຍນ ກຕໍ ກາຍິກໍ, ວາຈສິກໍ, ມານສິກໍຕິ ສກາຄໂມ. ວາເຕນ ກໂຕ ອາພາໂຘ ວາຕິໂຕ, ເສມ຺ຫິໂກ, ປິຕ຺ຕິໂກ. ສເຕນ ກີຕໍ ສາຕິກໍ, ສາຫສ຺ສິກໍ, ວຕ຺ເຖນ ກີຕໍ ວຕ຺ຖິກໍ, ກຸມ຺ຠິກໍ, ໂສວຓ຺ຓິກໍ, ຆາຕິກໍ. ມູລໂຕວ ປຈ຺ຈໂຍ, ອມູລວາຈິຕ຺ຕາ ເທວທຕ຺ເຕນ ກີໂຕຕິ ນ ໂຫຕິ, ຕທຕ຺ຖາປ຺ປຕີຕິຍາ. ວຣຕ຺ຖາຍ ພທ຺ໂຘ ວາຣຕ຺ຕິໂກ, ອາຍສິໂກ, ປາສິໂກ, ສຸຕ຺ຕິໂກ. ຆເຕນ ອຠິສງ຺ຂຕໍ ສໍສຏ຺ຐໍ ວາ ຆາຕິກໍ, ໂຄຬິກໍ, ທຘິກໍ, ມາຣີຈິກໍ. ຊາເລນ ຫໂຕ ຫນ຺ຕີຕິ ວາ ຊາລິໂກ, ພາລິສິໂກ. ອກ຺ເຂຫິ ຊິຕໍ ອກ຺ຂິກໍ ຘນໍ, ສາລາກິກໍ, ຕິນ຺ທຸກິໂກ, ອມ຺ພຜລິໂກ. ອກ຺ເຂຫິ ຊຍຕິ ທິພ຺ພຕິ ວາ ອກ຺ຂິໂກ. ຂຓິຕ຺ຕິຍາ ຂນຕີຕິ ຂາຓິຕ຺ຕິໂກ, ກຸທ຺ທາລິໂກ. ເທວທຕ຺ເຕນ ຊິຕໍ, ອງ຺ຄຸລ຺ຍາ ຂນຕີຕິ ນ ໂຫຕິ, ຕທຕ຺ຖານວຄມາ. ອຸຬຸມ຺ເປນ ຕຣຕີຕິ ໂອຬຸມ຺ປິໂກ, ອຸຬຸມ຺ປິໂກຕິ ອິໂກ. ກຸລ຺ລິໂກ, ໂຄປຸຈ຺ຉິໂກ, ນາວິໂກ. ສກເຏນ ຈຣຕີຕິ ສາກຏິໂກ, ຣຖິໂກ. ປຣປ຺ປິໂກຕິ ອິໂກ. ຂນ຺ເຘນ ວຫຕີຕິ ຂນ຺ຘິໂກ. ອໍສິໂກ, ສີສິໂກຕິ ອິໂກ. ເວຕເນນ ຊີວຕີຕິ ເວຕນິໂກ, ຠຕິໂກ, ກຍິໂກ, ວິກ຺ກຍິໂກ, ກຍວິກ຺ກຍິໂກຕິ ອິໂກ.
໓໐. ຕສ຺ສ ສໍວຕ຺ຕຕິ
ຈຕຸຕ຺ຖ຺ຍນ຺ຕາ ສໍວຕ຺ຕຕີຕິ ອສ຺ມິໍ ອຕ຺ເຖຓິໂກ ໂຫຕິ. ປຸນພ຺ຠວາຍ ສໍວຕ຺ຕຕີຕິ ໂປໂນພ຺ຠວິໂກ, ອິຕ຺ຖິຍໍ ໂປໂນພ຺ຠວິກາ. ໂລກາຍ ສໍວຕ຺ຕຕີຕິ ໂລກິໂກ. ສຸຏ຺ຐຸ ອຄ຺ໂຄຕິ ສຄ຺ໂຄ, ສຄ຺ຄາຍ ສໍວຕ຺ຕຕີຕິ ໂສວຄ຺ຄິໂກ, ສສ຺ໂສ+ວກ ຕທມິນາທີປາຐາ. ຘນາຍ ສໍວຕ຺ຕຕີຕິ ຘຎ຺ຎໍ.
໓໑. ຕໂຕ ສມ຺ຠູຕ+ມາຄຕໍ
ປຎ຺ຈມ຺ຍນ຺ຕາ ສມ຺ຠູຕ+ມາຄຕນ຺ຕິ ເອເຕສ຺ວ+ຕ຺ເຖສຸ ຓິໂກ ໂຫຕິ. ມາຕິໂຕ ສມ຺ຠູຕ+ມາຄຕໍວາ+ຕິ ເອຕ຺ຖ ‘‘ມາຕິໂຕ ຈ ຠຄິນິຍໍຈ຺ໂຉ’’ຕິ ‘‘ມາຕິໂຕ’’ຕິ ຠາເຄນ ອຸສ຺ສ ອິມ຺ຫິ ວາກ຺ຍໍ, ຣສ຺ສທ຺ວິຕ຺ເຕສຸ ມຕ຺ຕິກໍ, ເປຕ຺ຕິກໍ. ຓ຺ຍ+ຣິຍຓ+ຣ຺ຍປຈ຺ຈຍາປິ ທິສ຺ສນ຺ຕິ. ສຸຣຠິໂຕ ສມ຺ຠູຕໍ ໂສຣຠ຺ຍໍ. ຍມ຺ຫິ ຖຎ຺ຎໍ. ອຸຠຍຕ຺ຖ ‘‘ໂລໂປ+ວຓ຺ຓິ+ວຓ຺ຓານໍ’’ຕິ ໂລໂປ. ຣິຍຓ-ປິຕຸໂຕ ສມ຺ຠູໂຕ ເປຕ຺ຕິໂຍ, ມາຕິໂຍ, ‘‘ຣານຸພນ຺ເຘ+ນ຺ຕສຣາທິສ຺ສາ’’ຕິ ອຸໂລໂປ, ມຕ຺ຕິໂຍ. ຣ຺ຍມ຺ຫິ-ອຸໂລໂປ, ຈວຄ຺ຄປຸພ຺ພຣູປານິ, ມຈ຺ໂຈ ວາ.
໓໒. ຕຕ຺ຖ ວສຕິ ວິທິໂຕ ຠຕ຺ໂຕ ນິຍຸຕ຺ໂຕ
ສຕ຺ຕມ຺ຍນ຺ຕາ ວສຕີຕ຺ເວວມາທີສ຺ວ+ຕ຺ເຖສຸ ຓິໂກ ໂຫຕິ. ຣຸກ຺ຂມູເລ ວສຕີຕິ ຣຸກ຺ຂມູລິໂກ, ອາຣຎ຺ຎິໂກ, ຣາຊຄຫິໂກ, ມາຄຘິໂກ, ໂສສານິໂກ. ໂລເກ ວິທິໂຕ ໂລກິໂກ. ຈຕຸມຫາຣາເຊສຸ ຠຕ຺ຕາ ຈາຕຸມ຺ມຫາຣາຊິກາ. ທ຺ວາເຣ ນິຍຸຕ຺ໂຕ ໂທວາຣິໂກ, ທສ຺ໂສກ ຕທມິນາທິປາຐາ. ຠຓ຺ຑາຄາຣິໂກ. ອິເກ-ນວກມ຺ມິໂກ, ອາທິກມ຺ມິໂກ. ກິເຍ-ຊາຕິກິໂຍ, ອນ຺ຘກິໂຍ.
໓໓. ຕສ຺ສິ+ທໍ
ຉຏ຺ຐິຍນ຺ຕາ ອິທ+ມິຈ຺ຈ+ສ຺ມິໍ ອຕ຺ເຖ ຓິໂກ ໂຫຕິ. ສງ຺ຆສ຺ສ ອິທໍ ສງ຺ຆິກໍ, ປຸຄ຺ຄລິກໍ, ສກ຺ຍປຸຕ຺ຕິໂກ, ນາຏປຸຕ຺ຕິໂກ, ເຊນທຕ຺ຕິໂກ. ກິເຍ-ສສ຺ສ ອິທໍ ສກິໂຍ, ປຣກິໂຍ. ນິເຍອຕ຺ຕນິຍໍ. ເກ-ສໂກ, ຣຎ຺ໂຎ ອິທໍ ຣາຊກໍ ຠຓ຺ຑໍ.
໓໔. ໂຓ
ຉຏ຺ຐິຍນ຺ຕາ ອິທ+ມິຈ຺ຈ+ສ຺ມິໍ ອຕ຺ເຖ ໂຓ ໂຫຕິ. ກຈ຺ຈາຍນສ຺ສ ອິທໍ ກຈ຺ຈາຍນໍ, ພ຺ຍາກຣຓໍ, ໂສຄຕໍ ສາສນໍ, ມາຫິສໍ ມໍສາທິ.
໓໕. ຄວາທີຫິ ໂຍ
ຄວາທີຫິ ຉຏ຺ຐິຍນ຺ເຕຫິ ອິທ+ມິຈ຺ຈ+ສ຺ມິໍ ອຕ຺ເຖ ໂຍ ໂຫຕິ. ຄຸນ຺ນໍ ອິທໍ ຄພ຺ຍໍ, ອວງ, ມໍສາທິ. ອິໂລເປ ກພ຺ພໍ. ທຸໂນ ອິທໍ ທພ຺ພໍ.
໓໖. ປິຕິໂຕ ຠາຕຣິ ເຣຍ຺ຍຓ
‘‘ປິຕິໂຕ ມາຕິໂຕ’’ຕິ ເຕນ ເຕນ ສຸຕ຺ຕນິປາເຕເນວ ອຸສ຺ສ ອິ. ປິຕຸສທ຺ທາ ຕສ຺ສ ຠາຕຣິ ເຣຍ຺ຍຓ. ປິຕຸ ຠາຕາ ເປຕ຺ເຕຍ຺ໂຍ.
໓໗. ມາຕິໂຕ ຈ ຠຄິນິຍໍ ຈ຺ໂຉ
ມາຕຸໂຕ ຈ ປິຕຸໂຕ ຈ ເຕສໍ ຠຄິນິຍໍ ຈ຺ໂຉ ໂຫຕິ. ມາຕຸ ຠຄິນິ ມາຕຸຈ຺ຉາ, ປິຕຸ ຠຄິນິ ປິຕຸຈ຺ຉາ. ກຖໍ ‘‘ມາຕຸ ຠາຕາ ມາຕຸໂລ’’ຕິ, ‘‘ມາຕຸລາທິຕ຺ວານີ’’ຕິ ນິປາຕນາ ລປຈ຺ຈໂຍ.
໓໘. ມາຕາປິຕູສ຺ວາ+ມໂຫ
ມາຕາປິຕູຫິ ເຕສໍ ມາຕາປິຕູສ຺ວາ+ມໂຫ ໂຫຕິ. ມາຕຸ ມາຕາ ມາຕາມຫີ, ມາຕຸ ປິຕາ ມາຕາມໂຫ. ປິຕຸ ມາຕາ ປິຕາມຫີ, ປິຕຸ ປິຕາ ປິຕາມໂຫ. ນ ຍຖາສງ຺ຂ຺ຍໍ ປຈ຺ເຈກາຠິສມ຺ພນ຺ຘໂຕ ວິສຸໍ ວິສຸໍ ມາຕາປິຕຸສທ຺ເທຫິ ເຕສໍ ມາຕາປິຕຸນ຺ນໍ ອຕ຺ເຖ ປຈ຺ຈໂຍ ໂຫຕິ.
໓໙. ຫິເຕ ເຣຍ຺ຍຓ
ມາຕາປິຕູຫິ ຫິເຕ ເຣຍ຺ຍຓ ໂຫຕິ. ມາຕຸ ຫິໂຕ ມຕ຺ເຕຍ຺ໂຍ, ເປຕ຺ເຕຍ຺ໂຍ.
໔໐. ນິນ຺ທາ+ຎ຺ຎາຕ+ປ຺ປ ປຏິຠາຄ ຣສ຺ສ ທຍາ ສຎ຺ຎາສຸ ໂກ
ນິນ຺ທາທີສ຺ວ+ຕ຺ເຖສຸ ນາມສ຺ມາ ໂກ ໂຫຕິ. ນິນ຺ທາຍໍ-ນິນ຺ທິໂຕ ມຸຓ຺ໂຑ ມຸຓ຺ຑໂກ, ເອວໍ ສມຓໂກ, ປຓ຺ຑິຕໂກ, ພ຺ຣາຫ຺ມຓໂກ, ເວຍ຺ຍາກຣຓໂກ. ອຎ຺ຎາເຕ-ກສ຺ສາ+ຍໍ ອສ຺ໂສ ອສ຺ສໂກ, ປໂຍຄສາມຕ຺ຖິຍາ ສມ຺ພນ຺ຘິວິເສສານາວຄໂມ+ວຄມ຺ຍເຕ. ອປ຺ປຕ຺ເຖ-ອປ຺ປກໍ ເຕລໍ ເຕລກໍ, ຆຕກໍ. ປຏິຠາຄຕ຺ເຖ-ຫຕ຺ຖີ ວິຍ ຫຕ຺ຖິໂກ, ອສ຺ສໂກ, ພລີພທ຺ຘໂກ. ‘‘ອິເມ ໂນ ຫຕ຺ຖິກາ ອສ຺ສາ, ພລີພທ຺ຘາ ຈ ໂນ ອິເມ’’ຕ຺ຍາທິປາເຐ ‘‘ໂລໂປ’’ຕິ ກປຈ຺ຈຍໂລເປນ ວາ ອເຠໂທປຈາເຣນ ວາ ທຏ຺ຐພ຺ພໍ, ອິເມ ຈ ທາຣຸອາທີຫິ ກຕຣູປານິ. ຣສ຺ເສຣສ຺ໂສ ມານຸໂສ ມານຸສໂກ, ຣຸກ຺ຂໂກ, ປິລກ຺ຂໂກ. ທຍາຍໍ-ທຍິໂຕ=ນຸກມ຺ປິໂຕ ປຸຕ຺ໂຕ ປຸຕ຺ຕໂກ, ວຈ຺ຉໂກ. ສຎ຺ຎາຍໍ-ໂມໂຣ ວິຍ ໂມຣໂກ, ກຕໂກ, ຠຕໂກ.
໔໑. ຕ+ມສ຺ສ ປຣິມາຓໍ ຓິໂກ ຈ
ປຐມນ຺ຕາ ອສ຺ເສຕິ ອສ຺ມິໍ ອຕ຺ເຖ ຓິໂກ ໂຫຕິ ໂກ ຈ, ຕຎ຺ເຈ ປຐມນ຺ຕໍ ປຣິມາຓໍ ຠວຕິ. ໂທຓາທີນໍ ປຣິມິຕວີຫາທີນໍ ກຣຓຕ຺ຕາ ‘‘ປຣິມີຍນ຺ຕ຺ຍ+ເນນາຕິ ປຣິມາຓ’’ນ຺ຕິ ໂຫຕິ. ໂທໂຓ ປຣິມາຓ+ມສ຺ສາຕິ ໂທຓິໂກ ວີຫິ, ຂາຣສຕິໂກ, ຂາຣສຫສ຺ສິໂກ, ອາສີຕິໂກ ວໂຍ, ອຸປຑ຺ຒກາໂຍ ປຣິມາຓ+ມສ຺ສ ອຸປຑ຺ຒກາຍິກໍ ພິມ຺ໂພຫນໍ. ປຎ຺ຈກໍ, ຉກ຺ກໍ.
໔໒. ຍ+ເຕ+ເຕຫິ+ຕ຺ຕໂກ
ຍາທີຫິ ປຐມນ຺ເຕຫິ ອສ຺ເສຕິ ຉຏ຺ຐ຺ຍຕ຺ເຖ ຕ຺ຕໂກ ໂຫຕິ, ຕຎ຺ເຈ ປຐມນ຺ຕໍ ປຣິມາຓໍ ຠວຕິ. ຍໍ ປຣິມາຓ+ມສ຺ສ ຍຕ຺ຕກໍ, ຕຕ຺ຕກໍ, ‘‘ເອຕສ຺ເສຏ ຕ຺ຕເກ’’ຕິ ເອຕສ຺ສ ເອຏ, ເອຕ຺ຕກໍ. ອາວຕເກ-ຍໍ ປຣິມາຓ+ມສ຺ສ ຍາວຕໂກ, ຕາວຕໂກ.
໔໓. ສພ຺ພາ ຈາ+ວນ຺ຕຸ
ສພ຺ພໂຕ ປຐມນ຺ຕາ ຍາທີຫິ ຈ ອສ຺ເສຕິ ຉຏ຺ຐ຺ຍຕ຺ເຖ ອາວນ຺ຕຸ ໂຫຕິ, ຕຎ຺ເຈ ປຐມນ຺ຕໍ ປຣິມາຓໍ ຠວຕິ. ສພ຺ພໍ ປຣິມາຓ+ມສ຺ສ ສພ຺ພາວນ຺ຕໍ, ‘‘ອໍງໍ ນປຸໍສເກ’’ຕິ ອໍ. ຍາວນ຺ຕໍ, ຕາວນ຺ຕໍ.
໔໔. ກິມ຺ຫາ ຣຕິ+ຣີວ+ຣີວຕກ+ຣິຕ຺ຕກາ
ກິມ຺ຫາ ປຐມນ຺ຕາ ອສ຺ເສຕິ ຉຏ຺ຐ຺ຍຕ຺ເຖ ຣຕິ+ຣີວ+ຣີວຕກ+ຣິຕ຺ຕກາ ໂຫນ຺ຕິ. ກິໍສງ຺ຂ຺ຍານໍ ປຣິມາຓ+ເມສໍ ກຕິ, ຣານຸພນ຺ຘຕ຺ຕາ ອິໍຠາຄໂລໂປ. ກີວ, ກີວຕກໍ, ກິຕ຺ຕກໍ. ຣີວນ຺ໂຕ ສຠາວໂຕ ອສໍຂ຺ໂຍ.
໔໕. ສຎ຺ຊາຕໍ ຕາຣກາທິຕ຺ວິ+ໂຕຕິ
ສຎ຺ຊາຕຕ຺ເຖ ອິໂຕ. ຕາຣກາ ສຎ຺ຊາຕາ ອສ຺ສ ຕາຣກິຕໍ ຄຄນໍ, ປຸປ຺ຜານິ ສຎ຺ຊາຕານິ ອສ຺ສ ປຸປ຺ຜິໂຕ ຣຸກ຺ໂຂ, ປລ຺ລວິຕາ ລຕາ.
໔໖. ມາເນ ມຕ຺ໂຕ
ປຐມນ຺ຕາ ມານວຸຕ຺ຕິໂຕ ອສ຺ເສຕິ ອສ຺ມິໍ ອຕ຺ເຖ ມຕ຺ໂຕ ໂຫຕິ. ປລໍ ອຸມ຺ມານ+ມສ຺ສ ປລມຕ຺ຕໍ. ຫຕ຺ໂຖ ປຓາມ+ມສ຺ສ ຫຕ຺ຖມຕ຺ຕໍ. ສຕໍ ມານ+ມສ຺ສ ສຕມຕ຺ຕໍ. ໂທໂຓ ປຣິມາຓ+ມສ຺ສ ໂທຓມຕ຺ຕໍ. ອເຠໂທປຈາຣາ ໂທໂຓຕິປິ ໂຫຕິ. ມີຍເຕ+ເນນາຕິ ມານໍ, ມານສ຺ສ ສມ຺ພນ຺ຘິຕ຺ຕາ ຉຏ຺ຐ຺ຍນ຺ຕຠູຕານເມວ ວິຘິ ໂຫຕິ. ເອຕ຺ຖ ຈ –
ອຸທ຺ຘມານນ຺ຕຸ ອຸມ຺ມານໍ, ປຣິມາຓນ຺ຕຸ ສພ຺ພໂຕ;
ປມາຓໍ ໂຫຕິ ອາຍາໂມ, ສໍຂ຺ຍາເສໂສ ຕຸ ສພ຺ພໂຕ.
໔໗. ຕຄ຺ໂຆ ຈຸ+ທ຺ຘໍ
ອຸທ຺ຘມານວຸຕ຺ຕິໂຕ ຕຄ຺ໂຆ ໂຫຕິ ມຕ຺ໂຕ ຈ. ຊຓ຺ຓຸ ປຣິມາຓ+ມສ຺ສ ຊຓ຺ຓຸຕຄ຺ຆໍ, ຊຓ຺ຓຸມຕ຺ຕໍ.
໔໘. ໂຓ ຈ ປຸຣິສາຕິ
ປຸຣິສາ ໂຓ ໂຫຕິ ມຕ຺ຕາທໂຍ ຈ. ປຸຣິໂສ ປຣິມາຓ+ມສ຺ສ ໂປຣິສໍ, ປຸຣິສມຕ຺ຕໍ+ປຸຣິສຕຄ຺ຆໍ.
໔໙. ອຍຸ+ຠທ຺ວິຕີຫໍ+ເສ
ອຸຠທ຺ວິຕີຫິ ອວຍວວຸຕ຺ຕີຫິ ອໂຍ ໂຫຕິ. ອຸໂຠ ອໍສາ ອສ຺ສ ອຸຠຍໍ, ທ຺ວຍໍ, ຕຍໍ. ອໍສສມ຺ພນ຺ເຘນ ສມຸທາເຍ ວິຘິ ໂຫຕີຕິ ນ ອຸຠຍາທິໂຕ ພຫຸວຈນນ຺ຕິ ເຈ, ‘‘ຣາຫຸໂນ ສິໂຣ’’ ຕ຺ຍາໂທ ອເຠເທປິ ເຠທວິວກ຺ຂາຍ ລພ຺ຠມານໂຕ ພຫຸວຈນໍ ໂຫເຕວ.
໕໐. ສງ຺ຂ຺ຍາຍ ສຈ຺ຈຸ+ຕີ+ສາ+ສ+ທສນ຺ຕາຍາ+ຘິກາ+ສ຺ມິໍ ສຕສຫສ຺ເສ ໂຑ
ສຕ຺ຍນ຺ຕາຍ ອຸຕ຺ຍນ຺ຕາຍ ອີສນ຺ຕາຍ ອາສນ຺ຕາຍ ທສນ຺ຕາຍ ສງ຺ຂ຺ຍາຍ ປຐມນ຺ຕາຍ ອສ຺ມິນ຺ຕິ ສຕ຺ຕມ຺ຍຕ຺ເຖ ໂຑ ໂຫຕິ, ສາ ເຈ ສງ຺ຂ຺ຍາ ອຘິກາ ໂຫຕິ, ຍ+ທສ຺ມິນ຺ຕິ, ຕໍ ເຈ ສຕໍ ສຫສ຺ສໍ ສຕສຫສ຺ສໍ ວາ ໂຫຕິ. ວີສຕິ ອຘິກາ ອສ຺ມິໍ ສເຕຕິ ວີສໍສຕໍ.
໑໓໙. ເຑ ສຕິສ຺ສ ຕິສ຺ສຕິ
ເຑ ປເຣ ສຕ຺ຍນ຺ຕສ຺ສ ຕິກາຣສ຺ສ ໂລໂປ ໂຫຕິ. ເອກວີສໍສຕໍ ສຫສ຺ສໍ ສຕສຫສ຺ສໍ ວາ. ຕິໍສຕິ ອຘິກາ ອສ຺ມິໍ ສຕາທິເກຕິ ຕິໍສສຕໍ ເອກຕິໍສສຕໍ ອິຈ຺ຈາທິ. ອຸຕ຺ຍນ຺ຕາຍນວຸຕິ ອຘິກາ ອສ຺ມິໍ ສຕາທິເກຕິ ນວຸຕໍສຕໍ ສຫສ຺ສໍ ສຕສຫສ຺ສໍ ວາ. ອີສນ຺ຕາຍ-ຈຕ຺ຕາລີສໍ ອຘິກາ ອສ຺ມິໍ ສເຕ ສຫສ຺ເສ ສຕສຫສ຺ເສຕິ ຈຕ຺ຕາລີສສຕ+ມິຈ຺ຈາທິ. ອາສນ຺ຕາຍ ເອວໍ, ປຎ຺ຎາສໍສຕ+ມິຈ຺ຈາທິ. ທສນ຺ຕາຍ-ເອກາທສໍສຕ+ມິຈ຺ຈາທິ.
໕໑. ຕສ຺ສ ປູຣເຓ+ກາທສາທິໂຕ ວາ
ຉຏ຺ຐິຍນ຺ຕາເຍ+ກາທສາທິກາຍ ສໍຂ຺ຍາຍ ໂຑ ໂຫຕິ ປູຣຓຕ຺ເຖ ວິຠາສາ. ສາ ສໍຂ຺ຍາ ປູຣິຍເຕ ເຍນ ຕໍ ປູຣຓໍ. ເອກາທສນ຺ນໍ ປູຣໂຓ ເອກາທໂສ. ອຎ຺ຎຕ຺ຣ ‘‘ມ ປຎ຺ຈາທິກຕີຫີ’’ຕິ ໂມ, ເອກາທສໂມ. ວີສຕິຍາ ປູຣໂຓ ວີໂສ ວີສຕິໂມ, ຕິໍໂສ, ຕິໍສຕິໂມ. ວາສທ຺ທສ຺ສ ວວຕ຺ຖິຕວິຠາສຕ຺ຕາ ນິຈ຺ຈໍ ຈຕ຺ຕາລີໂສ ປຎ຺ຎາໂສ.
໕໒. ມ ປຎ຺ຈາທິກຕີຫິຕິ
ມປຈ຺ຈເຍ ປຎ຺ຈໂມ, ປຎ຺ຈມີ. ສຕ຺ຕໂມ, ສຕ຺ຕມີ. ອຏ຺ຐໂມ, ອຏ຺ຐມີ. ກຕິໂມ, ກຕິມີ ອິຈ຺ຈາທິ.
໕໓. ສຖາທີນ+ມິ ຈຕິ
ສຕາທີນໍ ໂມ ຈ ອນ຺ຕາເທໂສ ອິ ຈ. ສຕສ຺ສ ປູຣໂຓ ສຕິໂມ, ສຫສ຺ສິໂມ.
໕໔. ຉາ ຏ຺ຐ+ຏ຺ຐມາຕິ
ຉສທ຺ທາ ປູຣຓຕ຺ເຖ ຏ຺ຐ+ຏ຺ຐມາ. ຉນ຺ນໍ ປູຣໂຓ ຉຏ຺ໂຐ, ຉຏ຺ຐໂມ. ອິຕ຺ຖິຍໍ ຉຏ຺ຐີ, ຉຏ຺ຐມີ. ‘‘ຈຕຸຕ຺ຖທຸຕິເຍສ຺ເວ+ສໍ ຕຕິຍປຐມາ’’ຕິ ນິປາຕນາ ປູຣຓຕ຺ເຖ ທ຺ວິໂຕ ຕິໂຍ ທ຺ວິສ຺ສ ທຸ ຈ, ຕິຈຕູຫິ ຕິສ຺ສ ອ, ຕິຍ+ຕ຺ຖາ ຈ ຍຖາກ຺ກມໍ, ທຸຕິໂຍ ຕຕິໂຍ, ຈຕຸຕ຺ໂຖ.
໕໕. ເອກາ ກາ+ກ຺ຍ+ສຫາເຍ
‘‘ສຕິ ພ຺ຍຠິຈາເຣ ວິເສສນໍ ສາຕ຺ຖກໍ’’ຕິ ຎາຍາ ສໍຂ຺ຍາໂຕ ວິເສເສຕຸໍ ‘‘ອສຫາເຍ’’ຕິ ວຸຕ຺ຕໍ. ເອກສ຺ມາ ອສຫາຍຕ຺ເຖ ກ+ອາກີ ໂຫນ຺ຕິ ວາ. ເອໂກວ ເອກໂກ, ເອກາກີ, ເອໂກ ວາ.
໕໖. ວຈ຺ຉາທີຫິ ຕນຸຕ຺ເຕ ຕໂຣ
ວຈ຺ຉາທີນໍ ສຠາວສ຺ສ ຕນຸຕ຺ເຕ=ກິຎ຺ຈິມຕ຺ຕາວເສເສ ຕໂຣ ໂຫຕິ. ໂສ=ສໂກ ຠາໂວ ສຠາໂວ ອຕ຺ຕນິຍປວຕ຺ຕິນິມິຕ຺ຕໍ. ສຸສຸຕ຺ຕສ຺ສ ຕນຸຕ຺ເຕ ວຈ຺ຉຕໂຣ, ອິຕ຺ຖິຍໍ ວຈ຺ຉຕຣີ. ໂຍພ຺ພນສ຺ສ ຕນຸຕ຺ເຕ ໂອກ຺ຂຕໂຣ. ໂອກ຺ຂາ=ທຸຕິຍວຍຏ຺ຐໂຄໂຓ. ອສ຺ສຠາວສ຺ສ ຕນຸຕ຺ເຕ ອສ຺ສຕໂຣ. ຄາໂວຕິ ຊາຕິສາມຕ຺ຖິຍສ຺ສ ຕນຸຕ຺ເຕ ອຸສຠຕໂຣ. ເອຕ຺ຖ ຕນຸຕ຺ຕໍ ອປ຺ປພລຕາ.
໕໗. ກິມ຺ຫາ ນິທ຺ຘາຣເຓ ຣຕຣ+ຣຕມາ
ກິໍສທ຺ທາ ນິທ຺ຘາຣເຓ ຣຕຣ+ຣຕມາ ໂຫນ຺ຕິ. ໂກ ເອວາຕິ ກຕໂຣ ຠວຕໍ ເທວທຕ຺ໂຕ, ກຕໂຣ ຠວຕໍ ກຏ຺ໂຐ. ກຕໂມ ຠວຕໍ ເທວທຕ຺ໂຕ, ກຕໂມ ຠວຕໍ ກຏ຺ໂຐ. ຠາຣທ຺ວາຊານໍ ກຕໂມ+ສິ ພ຺ຣຫ຺ເມ.
໕໘. ເຕນ ທຕ຺ເຕ ລິ+ຍາຕິ
ທຕ຺ເຕ+ຠິເຘຍ຺ເຍ ລ+ອິຍາ ໂຫນ຺ຕິ ພຫຸລາຘິກາຣາ ມນຸສ຺ສສຎ຺ຎາຍໍ. ເທເວນ ທຕ຺ໂຕ ເທວໂລ ເທວິໂຍ, ພ຺ຣຫ຺ມໂລ ພ຺ຣຫ຺ມິໂຍ. ສີວໂລ ສີວິໂຍ ສິສ຺ສ ທີໂຆ. ເທວ+ພ຺ຣຫ຺ມ+ສິວາຕິ ຕນ຺ນາມກາ ມນຸສ຺ສາ. (ຣຕ຺ຕມິຈ຺ຈາທິອເນກຕ຺ຖຕທ຺ຘິຕໍ).
໕໙. ຕສ຺ສ ຠາວກມ຺ເມສຸຕ຺ຕ+ຕາ+ຕ຺ຕນ+ຓ຺ຍ+ເຓຍ຺ຍ+ຓິ+ຍ+ຓິຍາ
ຉຏ຺ຐິຍນ຺ຕາ ຠາເວ ກມ຺ເມ ຈ ຕ຺ຕາທໂຍ ໂຫນ຺ຕິ ພຫຸລໍ. ນ ສພ຺ເພ ປຈ຺ຈຍາ ສພ຺ພໂຕ ໂຫນ຺ຕິ ອຎ຺ຎຕ຺ຣຕ຺ຕ+ຕາຫິ. ຠວນ຺ຕິ ເອຕສ຺ມາ ພຸທ຺ຘິສທ຺ທາຕິ ຠາໂວ ສທ຺ທປວຕ຺ຕິນິມິຕ຺ຕໍ. ວຸຕ຺ຕຎ຺ຈ –
ໂຫນ຺ຕ຺ຍ+ສ຺ມາ ສທ຺ທພຸທ຺ຘີຕິ, ຠາໂວ ຕໍ ສທ຺ທວຸຕ຺ຕິຍາ;
ນິມິຕ຺ຕຠູຕໍ ນາມຎ຺ຈ, ຊາຕິ ທພ຺ພໍ ກ຺ຣິຍາ ຄຸໂຓຕິ.
ນີລສ຺ສ ປຏສ຺ສ ຠາໂວ ນີລຕ຺ຕໍ ນີລຕາຕິ ຄຸໂຓ ຠາໂວ. ເອຕ຺ຖ ນີລຄຸຓວເສນ ປເຏ ນີລສທ຺ທສ຺ສ ວຸຕ຺ຕິຍາ ປຏພຸທ຺ຘິຍາ ນິມິຕ຺ຕໍ ຠາໂວ ນາມ. ນີລສ຺ສ ຄຸຓສ຺ສ ຠາໂວ ນີລຕ຺ຕໍ ນີລຕາຕິ ນີລຄຸຓຊາຕິ, ເອຕ຺ຖ ນີລຄຸຓຊາຕິ ນິມິຕ຺ຕໍ ຫຸຕ຺ວາ ນີລສທ຺ທສ຺ສ ຄຸຓວຸຕ຺ຕິຍາ ນີລຄຸຓຊາຕິ ນິມິຕ຺ຕໍ. ໂຄຕ຺ຕໍ ໂຄຕາຕິ ໂຄຊາຕິ, ເອຕ຺ຖ ຊາຕິສທ຺ທານໍ ທພ຺ພວຸຕ຺ຕິຍາ ສຕິ ຊາຕິ ນິມິຕ຺ຕໍ. ປາຈກສ຺ສ ຠາໂວ ປາຈກຕ຺ຕໍຕິ ກ຺ຣິຍາສມ຺ພນ຺ຘິຕ຺ຕໍ ຠາໂວ, ເອຕ຺ຖ ປຈນກ຺ຣິຍາສມ຺ພນ຺ຘິຕ຺ຕໍ ຠາໂວ. ທຓ຺ຑິຕ຺ຕໍ ວິສາຓິຕ຺ຕໍ ຣາຊປຸຣິສຕ຺ຕໍຕິ ທຓ຺ຑ+ວິສາຓ+ຣາຊທພ຺ພານໍ ສມ຺ພນ຺ຘິຕ຺ຕໍ ຠາໂວ, ທຓ຺ຑີຕ຺ຍາທິສທ຺ທປວຕ຺ຕິຍາ ນິມິຕ຺ຕຕ຺ຕາ.
ເທວທຕ຺ຕສ຺ສ ຠາໂວ ເທວທຕ຺ຕຕ຺ຕໍ, ຈນ຺ທຕ຺ຕໍ, ສູຣິຍຕ຺ຕໍຕິ ຕທວຕ຺ຖາ ວິເສສສາມຎ຺ຎໍ, ເທວທຕ຺ຕສ຺ສ ພາລຕາທິອວຕ຺ຖາເຠໂທ, ຈນ຺ທສ຺ສ ກລາທິອວຕ຺ຖເຠໂທ ຈ, ສູຣິຍສ຺ສ ມນ຺ທປຏຸຕາທິອວຕ຺ຖາເຠໂທ ຈ ສາມຎ຺ຎໍ, ຕເທຕ຺ຖ ນິມິຕ຺ຕໍ. ເອຕ຺ຖ ວິຊ຺ຊມານປທຕ຺ຖານໍ ວິສຍຠູຕສຎ຺ຎາສທ຺ທານໍ ປວຕ຺ຕິນິມິຕ຺ຕໍ ວຸຕ຺ຕໍ. ອາກາສຕ຺ຕໍ ອຠາວຕ຺ຕໍຕິ, ຕຕ຺ຖ ຆຏາກາສ+ປີຐຣາກາສ, ປຏາຠາວ+ຆຏາຠາວາທິນາ ອຸປຈຣິຕເຠທສາມຎ຺ຎໍ ຠາໂວ.
ຕ຺ຕນ-ປຸຖຸຊ຺ຊນຕ຺ຕນໍ. ເວທນາຍ ຠາໂວ ເວທນຕ຺ຕນໍ, ຣສ຺ໂສ. ເອວໍ ຊາຍຕ຺ຕນໍ, ຊາຣຕ຺ຕນໍ.
ຓ຺ຍ-ອລສສ຺ສ ຠາໂວ ກມ຺ມໍ ວາ ອາລສ຺ຍໍ, ເອຕ຺ຖ ‘‘ໂລໂປ+ວຓ຺ຓິ+ວຓ຺ຓານໍ’’ຕິ ອ-ໂລເປ ‘‘ສຣານ+ມາທິສ຺ສາ’’ທິນາ ອາກາໂຣ, ເອວ+ມຸປຣິ ຈ. ພ຺ຣາຫ຺ມຓສ຺ສ ຠາໂວ ພ຺ຣຫ຺ມຎ຺ຎໍ, ຎ຺ຎກາຣປຸພ຺ພຣູປານິ. ຈາປລ຺ຍໍ, ເນປຸຎ຺ຎໍ, ເປສຸຎ຺ຎໍ, ຣຎ຺ໂຎ ຠາໂວ ຣຊ຺ຊໍ, ອາຘິປຈ຺ຈໍ, ທາຍຊ຺ຊໍ, ເວສມ຺ມໍ, ເວສມໍ, ຓປຈ຺ຈໂຍ. ສຂິໂນ ຠາໂວ ສຂ຺ຍໍ, ວາຓິຊ຺ຊໍ, ອາໂຣຄ຺ຍໍ, ໂອທຄ຺ຍໍ, ອານຓ຺ຍໍ, ທຸພ຺ພລ຺ຍໍ, ພລ຺ຍໍ, ປຓ຺ຑິຈ຺ຈໍ, ພາຫຸສ຺ສຈ຺ຈໍ, ໂປໂຣຫິຈ຺ຈໍ. ມຸຏ຺ຐສ຺ສຕິສ຺ສ ຠາໂວ ມຸຏ຺ຐສ຺ສຈ຺ຈໍ, ອິໂລໂປ. ໂກສລ຺ລໍ, ເວປຸລ຺ລໍ. ສມານສ຺ສ ຠາໂວ ສາມຎ຺ຎໍ, ເປຣິສ຺ສໍ, ໂສມນສ຺ສໍ, ໂທມນສ຺ສໍ, ໂສວຈສ຺ສໍ, ໂທວຈສ຺ສໍ, ນິປກສ຺ສ ຠາໂວ ເນປກ຺ກໍ, ອາຘິກ຺ກໍ, ທຸຠຄສ຺ສ ຠາໂວ ໂທຠຄ຺ຄໍ, ສຣູປສ຺ສ ຠາໂວ ສາຣຸປ຺ປໍ, ໂອປມ຺ມໍ, ໂສຂຸມ຺ມໍ, ຕຖສ຺ສ ຠາໂວ ຕຈ຺ຉໍ. ທຸມ຺ເມຘສ຺ສ ຠາໂວ ທຸມ຺ເມຊ຺ຌໍ. ເຠສຊສ຺ສ ຠາໂວ ເຠສຊ຺ຊໍ, ພ຺ຍາວຏສ຺ສ ກມ຺ມໍ ເວຍ຺ຍາວຈ຺ຈໍ ຍຖາ ເວຍ຺ຍາກຣຓໍ.
ເຓຍ຺ຍ-ສຸຈິໂນ ຠາໂວ ໂສເຈຍ຺ຍໍ, ອາຘິປເຕຍ຺ຍໍ, ກປິສ຺ສ ຠາໂວ ກາເປຍ຺ຍໍ. ສຐສ຺ສ ຠາໂວ ກມ຺ມໍ ວາ ສາເຐຍ຺ຍໍ.
ຓ-ຄຣູນໍ ຠາໂວ ຄາຣວໍ, ອຸ ອວງ. ປາຏວໍ, ອຊ຺ຊວໍ, ມທ຺ທວໍ, ‘‘ໂກສຊ຺ຊາ’’ທິນາ ອຸສ຺ສ ອຕ຺ຕໍ ທ຺ວິຕ຺ຕຎ຺ຈ. ປຣມານໍ ຠາໂວ ປາຣມີ, ວີປຈ຺ຈໂຍ. ສມຄ຺ຄານໍ ຠາໂວ ສາມຄ຺ຄີ.
ອິຍ-ອຘິປຕິໂນ ຠາໂວ ອຘິປຕິຍໍ, ປຓ຺ຑິຕິຍໍ, ພຫຸສ຺ສຸຕິຍໍ, ນຄ຺ຄິຍໍ, ສູຣິຍໍ.
ຓິຍ-ອລສສ຺ສ ຠາໂວ ກມ຺ມໍ ວາ ອາລສິຍໍ, ຕາລຸສິຍໍ, ມນ຺ທິຍໍ, ທກ຺ຂິຍໍ, ໂປໂຣຫິຕິຍໍ, ເວຍ຺ຍຕ຺ຕິຍໍ.