໑໙. ຈຕ຺ເຖ

ອເນກໍສ຺ຍາທ຺ຍນ຺ຕໍ ຈຕ຺ເຖ ເອກຕ຺ຖໍ ວາ ໂຫຕິ. ສມຸຈ຺ຈໂຍ ອນ຺ວາຈໂຍ ອິຕຣີຕຣໂຍໂຄ ສມາຫາໂຣຕິ ຈສທ຺ທສ຺ສ ອຕ຺ໂຖ ຈຕຸພ຺ພິໂຘ.

ຕຕ຺ຖ ສມຸຈ຺ຈຍາ+ນ຺ວາຈເຍສຸ ສມາໂສ ນ ໂຫຕິ, ກ຺ຣິຍາສາເປກ຺ຂຕາຍ ນາມານໍ ອຎ຺ຎມຎ຺ຎໍ ອຍຸຕ຺ຕຕ຺ຖຕ຺ຕາ, ຍຖາ-ຈີວຣໍ ປິຓ຺ຑປາຕຎ຺ຈ ປຈ຺ຈຍໍ ສຍນາສນໍ ອທາສິ, ທານຎ຺ຈ ເທຫິ, ສີລຎ຺ຈຣກ຺ຂາຫິ. ອິຕຣີຕຣໂຍເຄ ສມາຫາເຣ ຈ ອຎ຺ຎມຎ຺ຎາເປກ຺ຂຕ຺ຕາ ສມາໂສ.

ອຸຠຍຕ຺ຖປຘາເນ ຈຕ຺ເຖ ກຖ+ເມກຕ຺ຖີຠາໂວ ສມ຺ຠເວ+ຕິ ເຈ, ວຸຕ຺ຕຎ຺ຫິ –

ສປ຺ປຘານາປິ ຍຕ຺ຖ+ຕ຺ຖາ, ມິໂຖ ສາເປກ຺ຂຕາ ອິວ;

ກ຺ຣິຍາສມ຺ພນ຺ຘສາມຎ຺ຎາ, ຈຕ຺ເຖ+ກຕ຺ຖໍ ຕ+ທຸຈ຺ຈເຕຕິ.

ຍສ຺ມາ ເອກຕ຺ຖີຠາເວປິ ສຕີຍສຕີຍຕ຺ເຖ ປຘານໍ, ຕສ຺ມາ ອິທໍ ວຸຈ຺ຈເຕ –

ນ+ຎ຺ຎມຎ຺ຎໍ ວິເສເສນ຺ຕິ, ຈຕ຺ເຖ ອຕ຺ຖາ ປທານິວ;

ສຕ຺ຖວຸຕ຺ຍີ ອໂຕ ເຕສໍ, ປຘານຕ຺ຖໍ+ຠິຍຸຊ຺ຊເຕ.

ອິຕຣີຕຣໂຍໂຄ ຈ, ສມາຫາໂຣຕ຺ຍ+ຍໍ ທ຺ວິຘາ;

ສມາໂສ ຕຸ ອິມໍ ອຎ຺ເຎ, ຊານນ຺ເຕ ທ຺ວນ຺ທນາມໂຕ.

ອິຕຣີຕຣໂຍຄສ຺ມິໍ+ວຍວຕ຺ຖສ຺ສ ສມ຺ຠໂວ;

ສມຸທາຍຕິໂຣຠາໂວ, ປຣໍວ ລິງ຺ຄ+ມສ຺ສ ຈ.

ສມຸທາຍພ຺ຠໂວ ຍສ຺ມິໍ+ວຍວາ ຈ ຕິໂຣຫິຕາ;

ສມາຫາໂຣຕ຺ຍ+ຍໍ ຈຕ຺ໂຖ, ໂສ ຈ ໂຫຕິ ນປຸໍສເກ.

ອິຕຣີຕຣໂຍໂຄ ຍຖາ-ສາຣິປຸຕ຺ໂຕ ຈ ໂມຄ຺ຄລ຺ລາໂນ ຈ ສາຣິປຸຕ຺ຕໂມຄ຺ຄລ຺ລານາ, ໂຠ ສາຣິປຸຕ຺ຕໂມຄ຺ຄລ຺ລານາ ອິຈ຺ຈາທິ. ອວຍວປຘານຕ຺ຕາ ພຫຸວຈນເມວ. ສມຓາ ຈ ພ຺ຣາຫ຺ມຓາ ຈ ສມຓພ຺ຣາຫ຺ມຓາ, ເອວໍ ພ຺ຣາຫ຺ມຓຄຫປຕິກາ, ຂຕ຺ຕິຍພ຺ຣາຫ຺ມຓາ, ເທວມນຸສ຺ສາ, ຈນ຺ທິມສູຣິຍາ.