໑໒. ນຎ

ນອູຈ຺ເຈຕໍ ສ຺ຍາທ຺ຍນ຺ຕໍ ສ຺ຍາທ຺ຍນ຺ເຕນ ສເຫ+ກຕ຺ຖໍ ໂຫຕິ. ຎ຺ຎກາໂຣ ‘‘ຏ ນຎສ຺ສາ’’ຕິ ວິເສສນຕ຺ໂຖ ‘ປາມນປຸຕ຺ຕາທີສຸ ນສ຺ສ ໂຏ ມາ ໂຫຕູ’ຕິ. ນ ພ຺ຣາຫ຺ມໂຓ ອພ຺ຣາຫ຺ມໂຓ, ‘‘ຏ ນຎສ຺ສາ’’ຕິ ນສ຺ສ ຏາເທໂສ. ຎ຺ຎ-ກາໂຣ ເອຕ຺ເຖວ ວິເສສນຕ຺ໂຖ.

ນ-ນິເສໂຘ ສໂຕ ຍຸຕ຺ໂຕ, ເທສາທິນິຍມໍ ວິນາ;

ອສໂຕ ວາ+ຜໂລ ຕສ຺ມາ, ກຖ+ມພ຺ຣາຫ຺ມໂຓຕິເຈ.

ນິເສຘຕ຺ຖານຸວາເທນ, ປຏິເສຘວິຘິ ກ຺ວຈິ;

ປຣສ຺ສ ມິຈ຺ຉາຎາຓຕ຺ຕາ+ຂ຺ຍາປນາໂຍ+ປປຊ຺ຊເຕ.

ທຸວິໂຘ ຈ+ສ຺ສ ນສ຺ສ ອຕ຺ໂຖ ປສຊ຺ຊປຏິເສຘ+ປຣິຍຸທາສວເສນ. ຕຕ຺ຖ ໂຍ ‘‘ອສູຣິກປສ຺ສາຣາຊທາຣາ’’ຕິອາທີສຸ ວິຍ ອຸຕ຺ຕຣປທຕ຺ຖສ຺ສ ສພ຺ພທາ ອຠາວໍ ທີເປຕິ, ໂສ ປສຊ຺ຊປຏິເສຘວາຈີ ນາມ. ໂຍ ປນ ‘‘ອພ຺ຣາຫ຺ມຓ+ມານຍາ’’ຕິອາທີສຸ ວິຍ ອຸຕ຺ຕຣປທຕ຺ຖໍ ປຣິຍຸທາສິຕ຺ວາ ປຏິກ຺ຂິປິຕ຺ວາ ຕໍສທິເສ ວຕ຺ຖຸມ຺ຫິ ກາຣິຍໍ ປຏິປາທຍຕິ, ໂສ ປຣິຍຸທາສວາຈີ ນາມ. ວຸຕ຺ຕຎ຺ຈ –

ປສຊ຺ຊປຏິເສຘສ຺ສ, ລກ຺ຂຓໍ ວຕ຺ຖຸນຕ຺ຖິຕາ;

ວຕ຺ຖຸໂຕ+ຎ຺ຎຕ຺ຣ ຍາ ວຸຕ຺ຕິ, ປຣິຍຸທາສລກ຺ຂຓໍ.

ຍຕ຺ຣ ອພ຺ຣາຫ຺ມຓາທີສຸ, ວຕ຺ຖຸໍ ປຣິຍຸທສ຺ສຕິ;

ຕກ຺ຣິຍາຍຸຕ຺ຕຣາຊາທິໍ, ວເທ ໂສ ປຣິຍຸທາສໂກ.

ປສຊ຺ຊປຏິເສໂຘ ຕຸ, ວຕ຺ຖນ຺ຕຣ+ມນາທິຍ;

ກິຎ຺ຈິວຕ຺ຖຸນິເສຘສ຺ສ, ປສງ຺ໂຄ ນ ຠເວຍ຺ຍ ໂສ.

ຕທຎ຺ໂຎ ຈ ຕໍວິຣຸທ຺ໂຘ,

ຕທຠາໂວ ຈ ນຎ຺ຎຕ຺ໂຖ.

ຕທຎ຺ຎຕ຺ເຖ – ອພ຺ຣາຫ຺ມໂຓ, ພ຺ຣາຫ຺ມຓໂຕ ອຎ຺ໂຎ ຕໍສທິໂສຕິ ວຸຕ຺ຕໍ ໂຫຕິ. ເອວໍ ອມນຸສ຺ໂສ, ອສ຺ສມໂຓ, ນ ພ຺ຍາກຕາ ອພ຺ຍາກຕາ ຘມ຺ມາ. ຕພ຺ພິຣຸທ຺ຘຕ຺ເຖ-ນ ກຸສລາ ອກຸສລາ, ກຸສລປຏິປກ຺ຂາຕິ ອຕ຺ໂຖ. ເອວໍ ອໂລໂຠ, ອມິຕ຺ໂຕ, ອຍໍ ປຣິຍຸທາສນໂຍ. ຕທຠາເວ-ນ ກຕ຺ວາ ອກຕ຺ວາ, ອກາຕຸນ ປຸຎ຺ຎໍ, ອກໂຣນ຺ໂຕ, ອຠາໂວ ຠວຕິ. ອຍໍ ປສຊ຺ຊປຏິເສຘນໂຍ.

ເອຕ຺ຖ ຈ ອຸໂຠສຸ ປຣິຍຸທາເສ ພ຺ຣາຫ຺ມຓາ ອຎ຺ໂຎ ພ຺ຣາຫ຺ມຓຘມ຺ເມ ອປ຺ປຕິຏ຺ຐິໂຕ ຂຕ຺ຕິຍາທິ ພ຺ຣາຫ຺ມຓສທິໂສວ ອພ຺ຣາຫ຺ມໂຓຕິ ວຸຕ຺ເຕ ປຕີຍເຕ. ອິຕຣສ຺ມິໍ ປນ ປກ຺ເຂ ເກນຈິ ສໍສຍນິມິຕ຺ເຕນ ຂຕ຺ຕິຍາໂທ ພ຺ຣາຫ຺ມໂຓຕິ ວຸຕ຺ຕສ຺ສ ມິຈ຺ຉາຎາຓນິວຸຕ຺ຕິ ກຣີຍຕິ ‘‘ພ຺ຣາຫ຺ມໂຓ+ຍໍ ນ ຠວຕິ ອພ຺ຣາຫ຺ມໂຓ’’ຕິ, ພ຺ຣາຫ຺ມຓຕ຺ຕຊ຺ຌາສິໂຕ ນ ຠວຕີຕ຺ຍຕ຺ໂຖ. ຕຕ຺ຖ ສທິສຕ຺ຕໍ ວິນາ ມິຈ຺ຉາຎາຓາສມ຺ຠວາ ປໂຍຄສາມຕ຺ຖິຍາ ຈ ສທິສປຏິປຕ຺ຕິ, ຕຄ຺ຄຕາ ຈ ລິງ຺ຄ+ສງ຺ຂ຺ຍາ ຠວນ຺ຕິ. ອໂຕເຍວ ອຸຈ຺ຈເຕ ‘‘ນຎ຺ຎິວຍຸຕ຺ຕ+ມຎ຺ຎສທິສາຘິກຣເຓ, ກຖາ ຫິ ອຕ຺ຖສມ຺ປຈ຺ຈໂຍ’’ຕິ.