໙໑. ຍ຺ວາໂທ ນ຺ຕຸສ຺ສ

ໂຍອາທີສຸ ນ຺ຕຸສ຺ສ ອ ໂຫຕິ. ຄຸຓວນ຺ຕອິຕິ ອກາຣນ຺ຕາ ຏາ+ເຏອາເທສາ ໂຫນ຺ຕິ, ຄຸຓວນ຺ຕາ. ‘‘ຏຏາອໍ ເຄ’’ຕິ ຏາທໂຍ, ໂຠ ຄຸຓວ ຄຸຓວາ ຄຸຓວໍ, ຄຸຓວນ຺ໂຕ ຄຸຓວນ຺ຕາ. ‘‘ນ຺ຕສ຺ສ ຈ ຏ ວໍ+ເສ’’ຕິ ອໍເສສຸ ນ຺ຕສ຺ສ ໂຏ ວາ, ຄຸຓວໍ ຄຸຓວນ຺ຕໍ, ຄຸຓວນ຺ເຕ. ‘‘ໂຕ+ຕາ+ຕິ+ຕາ ສ+ສ຺ມາ+ສ຺ມິໍ+ນາສູ’’ຕິ ຕາອາທໂຍ ໂຫນ຺ຕິ, ຄຸຓວຕາ ຄຸຓວນ຺ເຕນ, ຄຸຓວນ຺ເຕຫິ ຄຸຓວນ຺ເຕຠິ. ‘‘ລກ຺ຂຓິກປຏິປໂທຕ຺ເຕສຸ ປຏິປໂທຕ຺ຕສ຺ເສວ ຄຫຓໍ, ນ ລກ຺ຂຓິກສ຺ສາ’’ຕິ ຎາຍາ ‘‘ນ ລກ຺ຂຓິກສ຺ສາ’’ຕິ ວຸຕ຺ຕພ຺ຍຕ຺ຕິປກ຺ຂ+ມນເປກ຺ຂິຕ຺ວາ ‘‘ອໂຕ’’ຕິ ຣສ຺ສາກາຣຊາຕິຍາ ເປກ຺ຂິຕຕ຺ຕາ ຄຸຓວນ຺ເຕນາຕິ ‘‘ອເຕນາ’’ ຕ຺ຍ+ເນນ ສິຊ຺ຌຕິ. ຊາຕິ=ສາມຎ຺ຎໍ, ພ຺ຍຕ຺ຕິ=ວິເສໂສ. ຄຸຓວໂຕ ຄຸຓວສ຺ສ ຄຸຓວນ຺ຕສ຺ສ, ‘‘ຕໍ ນໍມ຺ຫິ’’ຕິ ນໍມ຺ຫີ ຕໍ ວາ, ຄຸຓວຕໍ ຄຸຓວນ຺ຕານໍ. ຄຸຓວຕາ ຄຸຓວນ຺ຕາ ຄຸຓວນ຺ຕມ຺ຫາ ຄຸຓວນ຺ຕສ຺ມາ. ຄຸຓວຕິ ຄຸຓວນ຺ເຕ ຄຸຓວນ຺ຕມ຺ຫິ ຄຸຓວນ຺ຕສ຺ມິໍ, ຄຸຓວນ຺ເຕສຸ. ‘‘ນ຺ຕສ຺ສ ຈ ຏ ວາ’’ຕິ ໂຍຄວິຠາຄາ ໂຍສຸ ຈ ນ຺ຕຸສ຺ສ ວາ ຏາເທເສ ກເຕ ໂຍສ຺ສ ຏາ, ‘‘ຈກ຺ຂຸມາ ອນ຺ຘິຕາ ໂຫນ຺ຕິ’’, ‘‘ວຄ຺ຄຸມຸທາຕີຣິຍາ ຠິກ຺ຂຸ ວຓ຺ຓວາ’’ ອິຈ຺ຈາທີ ໂຫນ຺ຕິ.

ເອວໍ ຄຓວາ ກຸລວາ ຜລວາ ຍສວາ ຘນວາ ສຸຕວາ ຠຄວາ ຫິມວາ ພລວາ ສີລວາ ປຎ຺ຎວາ ອິຈ຺ຈາທີ.