ຣູປ ສງ຺ຄຫ ປຣມຕ຺ຖທີປນີ

໑໕໖. ເອວໍ ຈິຕ຺ຕເຈຕສິເກ ທ຺ວີຫິ ປເຠທປ຺ປວຕ຺ຕີຫິ ທສ຺ເສຕ຺ວາ ອິທານິ ຍຖານຸປ຺ປຕ຺ຕໍ ຣູປໍ ທສ຺ເສນ຺ໂຕ ອາທິຄາຖ ມາຫ. ຕຕ຺ຖ ເອຕໍ ປຣິມາຓໍ ອສ຺ສາຕິ ເອຕ຺ຕາວໍ. ເຕນ ເອຕ຺ຕວຕາ. ນິປາຕປທໍວາ ເອຕໍ. ຫິ ສທ຺ໂທ ປທປູຣເຓ. ປເຠໂທຈ ປວຕ຺ຕິຈ ປເຠທປ຺ປວຕ຺ຕິໂຍ. ຕາຫິ ສຫ ເຍ ວຕ຺ຕນ຺ຕິ ເຕ ສປ຺ປເຠທປ຺ປວຕ຺ຕິກາ. ເອຕ຺ຕາວຕາ ສປ຺ປເຠທປ຺ປວຕ຺ຕິກາ ຈິຕ຺ຕເຈຕສິກາ ຘມ຺ມາ ມຍາ ວິຠຕ຺ຕາ. ອິທານິ ຣູປໍ ປວຸຈ຺ຈຕີຕິ ໂຍຊນາ. ສງ຺ເຂປໂຕ ອຸທ຺ທິສນໍ ກຖນໍ ສມຸທ຺ເທໂສ. ສມຸທ຺ທິຏ຺ຐສ຺ສ ຣູປສ຺ສ ປຸນ ວິຠຊນໍ ວິຠາໂຄ. ສມຸຏ຺ຐາຕິ ຣູປໍ ເອເຕນາຕິ ສມຸຏ຺ຐານໍ. ກມ຺ມາທິ. ກລາ ວຸຈ຺ຈນ຺ຕິ ອວຍວາ. ຕາ ອປ຺ເປນ຺ຕິ ປວິສນ຺ຕິ ເອຕ຺ຖາຕິ ກລາໂປ. ປິຓ຺ຑີຕິ ອຕ຺ໂຖ. ປວຕ຺ຕິກ຺ກມໂຕຕິ ອຸປ຺ປຕ຺ຕິກ຺ກມໂຕ. ສລກ຺ຂຓໂຕ ສສມ຺ຠາຣໂຕຈ ມຫນ຺ຕານິ ຫຸຕ຺ວາ ຠວນ຺ຕິ ປາຕຸຠວນ຺ຕີຕິ ມຫາຠູຕານິ. ຕານິ ຫິ ອຕ຺ຕໂນ ສຠາວໂຕປິ ມຫນ຺ຕານິເອວ ຫຸຕ຺ວາ ປາຕຸຠວນ຺ຕິ ອຸປາທາຣູປານິ ອຸປາທາຍາຕິ.

[໑໗໕] ວິຠາວນິຍໍ ປນ ມຫາຏີກາຍຎ຺ຈ

‘‘ສສມ຺ຠາຣຘາຕຸວເສນາຕິ’’ ວຸຕ຺ຕໍ. ຕໍ ອນຸປປນ຺ນໍ.

ນ ຫິ ສສມ຺ຠາຣວຕ຺ຖຸວເສເນວ ເຕສໍ ອຍໍ ໂວຫາໂຣ ປວຕ຺ໂຕຕິ ສກ຺ກາ ວຕ຺ຕຸໍ. ນຈ ສລກ຺ຂຓໂຕ ມຫຕ຺ເຕນ ວິນາ ເຕສໍ ສສມ຺ຠາຣໂຕ ມຫຕ຺ຕໍນາມ ສມ຺ຠວຕີຕິ. ຕສ຺ມາ ຍໍ ເຕສໍ ອິນ຺ທ຺ຣິຍານິນ຺ທ຺ຣິຍພທ຺ຘສນ຺ຕາເນສຸ ປຖວິປພ຺ພຕາທິວເສນ ສມຸທ຺ເທ ມຈ຺ຉກຈ຺ຉປາທິວເສນ ສສມ຺ຠາຣໂຕ ມຫຕ຺ຕໍ. ຕໍປິ ສລກ຺ຂຓມຫຕ຺ຕມູລກເມວາຕິ ທຏ຺ຐພ຺ພໍ. ມຫາຠູຕາຕິວາ ໂລເກ ວິສໍວາທ ກຏ຺ເຐນ ມາຍາກາຣາວາ ອາວິສນຄຫເຓສຸ ອຈິນ຺ເຕຍ຺ຍຏ຺ຐານຏ຺ເຐນ ຍກ຺ຂາທໂຍວາ ວຎ຺ຈກຏ຺ເຐນ ຍກ຺ຂິນິໂຍວາ ວຸຈ຺ຈນ຺ຕິ. ເຕເນວຏ຺ເຐນ ເຕຫິ ສທິສຕ຺ຕາ ອິມານິປິ ມຫາຠູຕາວິຍາຕິ ມຫາຠູຕານິ. ອຸຠຍຕ຺ຖປິຈ ມຫນ຺ຕານິ ອຠູຕານິ ອພ຺ຠຸຕານິວາ ເອເຕສູຕິ ນິພ຺ພຈນໍ ຍຸຊ຺ຊຕິເຍວ.

[໑໗໖] ວິຠາວນິຍໍ ປນ

ຍກ຺ຂິນິໍ ວິສຸໍ ອຸປມາມຕ຺ຕໍ ກຕ຺ວາ ‘‘ມນາປວຓ຺ຓສຓ຺ຐານາ ທີຫິວາ ສຕ຺ຕານໍ ວຎ຺ຈິກາ ຍກ຺ຂິນີອາທໂຍ ວິຍ ມນາປ ອິຕ຺ຖິປຸຣິສຣູປທສ຺ສນາທິນາ ສຕ຺ຕານໍ ວຎ຺ຈກຕ຺ຕາ ມຫນ຺ຕານິ ອຠູຕານິ ເອເຕສູຕິ ມຫາຠູຕາຕິ’’ ວຸຕ຺ຕໍ. ຕໍ ອຏ຺ຐກຖາ ຍ ນ ສເມຕິ.

ອຏ຺ຐກຖາຍຎ຺ຫິ ມຫາຠູຕສາມຎ຺ຎໂຕຕິ ປທສ຺ສ ວິຕ຺ຖາເຣ ເອວ ມາຍາກາໂຣ ຍກ຺ໂຂ ຍກ຺ຂິນີຕິ ຕໂຍ ມຫາຠູຕາ ວຸຕ຺ຕາຕິ. ຈຕຸນ຺ນຎ຺ຈມຫາຠູຕານນ຺ຕິ ອຸປໂຍຄຕ຺ເຖ ສາມິວຈນໍ. ອຸປາທາຍາຕິ ທຬ຺ຫໍ ນິສ຺ສາຍ. ປວຕ຺ຕນ຺ຕິ ປາຐເສໂສ. ອຸປາທາຍ ຣູປນ຺ຕິວາ ສມາສປທໍ ທຏ຺ຐພ຺ພໍ.

[໑໗໗] ວິຠາວນິຍໍ ປນ

‘‘ອຸປາທາຍ ປວຕ຺ຕໍ ຣູປໍ ອຸປາທາຣູປນ຺ຕິ’’ ວຸຕ຺ຕໍ. ຕໍ ອິຘ ນ ຍຸຊ຺ຊຕິ.

ນ ຫິ ອິມສ຺ມິໍ ປາເຐ ກຕ຺ຖຈິ ຍກາຣວິຣໂຫ ທິຏ຺ໂຐ. ຕຖາ ຫິ ມູລຏີກາຍໍ ອຸປາທາຍຕິ ນິສ຺ສຍຕີຕິ ອຸປາທາຍໍ. ຕເມວ ຣູປນ຺ຕິປິ ວຸຕ຺ຕໍ. ປຖຍຕີຕິ ປຖວີ. ສຫຊາຕຣູປານໍ ປຕິຏ຺ຐານ ຠາເວນ ປກ຺ຂາຍຕິ ອຸປຏ຺ຐາຕີຕິ ອຕ຺ໂຖ. ປຸຖຸ ມຫນ຺ຕີ ຫຸຕ຺ວາ ຊາຍຕີຕິປິ ປຖວີ. ປກາເຣນ ຖວີຍຕິ ສພ຺ເພສໍ ຣູປສມ຺ຠາຣານໍ ອຘິຏ຺ຐານຕ຺ຕາ. ອຍໍ ເຕສໍ ອຘິຏ຺ຐານາ ປຕິຏ຺ຐານາ ວຕ຺ຖຸຠູຕາ ຠູມິ ຠູຕາຕິອາທິນາ ນານາປ຺ປກາເຣນ ຄຸຓປເທນ ອຠິຕ຺ຖວີຍຕີຕິ ປຖວີ. ສາເອວ ນິສຕ຺ຕນິຊີວຏ຺ເຐນ ຘາຕູຕິ ປຖວີຘາຕຸ. ອາເປຕິ ສຫຊາຕຣູປານິ ພ຺ຍາເປຕ຺ວາ ຕິຏ຺ຐຕິ, ອປ຺ປາຍຕິ ວາ ຕານິ ສຸຏ຺ຐຸ ພ຺ຣູເຫຕິ ວຑ຺ເຒຕີຕິ ອາໂປ. ຕານິວາ ອວິປ຺ປກິຓ຺ຓານິ ກຕ຺ວາ ຠຸໂສ ປາຕິ ຣກ຺ຂຕິ, ປິວຕິວາ ວິວນ຺ໂຕ ວິຍ ຕານິ ສງ຺ຄຓ຺ຫຕິ ສມ຺ປິຓ຺ເຑຕີຕິ ອາໂປ. ໂສເຍວ ຘາຕູຕິ ອາໂປຘາຕຸ. ເຕ ຊຕິ ຕິກ຺ຂຠາເວນ ສມຸຊ຺ຊລນ຺ໂຕ ວິຍ ສຫຊາຕຘມ຺ມານໍ ມຊ຺ເຌ ປກາສຕິ, ເຕເຊຕິວາ ນິເສຕິ ສຫຊາຕຘມ຺ເມ ຕິກ຺ຂຖາມ ພເລ ກໂຣຕິ, ປຣິປາເຈຕິວາ ອຸສ຺ມາເປຕີຕິ ເຕໂຊ, ໂສ ເອວ ຘາຕູຕິ ເຕໂຊຘາຕຸ. ວາຍຕິ ສມີເຣຕິ ເທສນ຺ຕຣຸປ຺ປຕ຺ຕິ ເຫຕຸຠາເວນ ຠູຕສງ຺ຆາຏໍ ເທສນ຺ຕຣໍ ຄເມຕີຕິ ວາໂຍ. ວາຍຕິ ວາ ສຫຊາຕຘມ຺ເມ ອປຕມາເນ ກຕ຺ວາ ວຫຕີຕິ ວາໂຍ. ໂສເອວ ຘາຕູຕິ ວາໂຍຘາຕຸ. ຕຕ຺ຖ ກກ຺ຂຬລກ຺ຂຓາ ປຖວີ. ອາພນ຺ຘນລກ຺ຂໂຓ ອາໂປ. ອຸຓ຺ຫຕ຺ຕລກ຺ຂໂຓ ເຕໂຊ. ວິຕ຺ຖມ຺ຠນລກ຺ຂໂຓ ວາໂຍ. ເອຕ຺ຖ ສິຍາ, ກສ຺ມາ ປຖວີ ກກ຺ຂຬລກ຺ຂຓາຕິ ວຸຕ຺ຕາ. ນນຸ ສາ ມຸທຸຠູຕາປິ ໂຫຕີຕິ. ສຈ຺ຈໍ, ມຸທຸຠູຕາປິ ປນ ສາ ເສສຠູຕຕ຺ຕຍໍ ອຸປາທາຍ ກກ຺ຂຬາ ຕ຺ເວວ ສງ຺ຂ຺ຍໍ ຄຈ຺ຉຕິ. ອຎ຺ຎມຎ຺ຎໍ ອຸປາທາເຍວ ປນ ອຍໍມຸທຸ ອຍໍ ກກ຺ຂຬາຕິ ຠວຕິ. ເຕເນວ ມຸທຸກກ຺ຂຬານໍ ທີຆຣສ຺ສານໍ ວິຍ ອນວຏ຺ຐານຕາ ໂຫຕິ. ມຸທຸຠູຕາປິ ຫິ ຕໂຕ ມຸທຸຕຣໍ ປຕ຺ວາ ກກ຺ຂຬານາມ ຊາຕາ. ກກ຺ຂຬາປິ ກກ຺ຂຬຕຣໍ ປຕ຺ວາ ມຸທຸຠູຕານາມ ຊາຕາຕິ. ອາພນ຺ຘນລກ຺ຂໂຓ ອາໂປຕິ ວຸຕ຺ໂຕ. ໂສຈ ປກຕິອຸທເກ ອຘິມຕ຺ໂຕຕິ ປກຕິອຸທກໍ ພທ຺ຘໍ ຆນີຠູຕເມວ ສິຍາຕິ ເຈ. ນ. ອາພນ຺ຘິຕພ຺ພາຍ ປຖວິຍາ ຕຕ຺ຖ ປຣິທຸພ຺ພລຕ຺ຕາຕິ, ຍຕ຺ຖ ປນ ປຖວີ ພລວຕີ ໂຫຕິ ຕຕ຺ເຖວ ໂສ ພທ຺ຘຕຣໍ ອາພນ຺ຘຕີຕິ. ອຸຓ຺ຫຕ຺ຕ ລກ຺ຂໂຓ ເຕໂຊຕິ ວຸຕ຺ໂຕ. ເອວຎ຺ຈສຕິ ສີຕຠາໂວ ເຕໂຊເຍວ ນ ສິຍາຕິ ເຈ. ນ. ອຸສຕິ ທຫຕິ ປຣິປາເຈຕິ ປຣິຓ ຕຠາວໍ ຄເມຕີຕິ ອຸຓ຺ໂຫນາມ. ສີຕຠາໂວຈ ທຫຕິ ປຣິປາເຈຕິ ຕພ຺ຠາວໍ ຄເມຕິເຍວາຕິ. ວຸຕ຺ຕຎ຺ຈ ມູລຏີກາຍໍ ເຕໂຊເອວ ຫິ ສີຕໍ. ຫິມປາຕສມຍາທີສຸ ສີຕສ຺ສ ປຣິປາຈກຕາທສ຺ສນ ໂຕຕິ. ວິຕ຺ຖມ຺ຠນ ລກ຺ຂໂຓ ວາໂຍຕິ ວຸຕ຺ໂຕ. ໂສ ປນ ຆນ ຖທ຺ເຘສຸ ສິລາຖມ຺ຠາທີສຸ ນລພ຺ຠຕີຕິ ເຈ. ນ. ຕຕ຺ຖ ຫິ ປຖວີ ອຕ຺ຕນາ ສຫຊາຕວາຍຸວິຕ຺ຖມ຺ຠນໍ ລຠິຕ຺ວາ ຖາມປ຺ປຕ຺ຕາ ຖິຣຕຣປ຺ປຕ຺ຕາຈ ຫຸຕ຺ວາ ວຫຕີຕິ. ຈກ຺ຂຕີຕິ ຈກ຺ຂຸ. ສມວິສມໍ ອາຈິກ຺ຂຕິ ສມວິສມຊານນສ຺ສ ຕມ຺ມູລກຕ຺ຕາ. ຣູປໍວາ ອສ຺ສາເທຕິ ອາປາຕໍ ອາຄຕາຄຕສ຺ສ ຣູປສ຺ສ ອນິຣາກຣຓໂຕ. ຕໍວາ ວິຠາເວຕີຕິ ອຕ຺ໂຖ. ສຸຓາຕີຕິ ໂສຕໍ. ສຸຓນ຺ຕິ ສຸຍ຺ຍນ຺ຕິວາ ເອເຕ ນາຕິ ໂສຕໍ. ຆາຍຕີຕິ ຆານໍ. ຆາຍນ຺ຕິ ຆາຍິຍນ຺ຕິວາ ເອເຕນາຕິ ຆານໍ. ຊີວິຕນິມິຕ຺ຕໍ ຣໂສ ຊີວິຕນ຺ຕິ ວຸຈ຺ຈຕິ. ຕສ຺ມິໍ ນິນ຺ນຕາຍ ຕໍ ອວ຺ຫາຍຕີຕິ ຊິວ຺ຫາ. ອຖວາ. ຊີວິຕໍ ວຫຕິ ເອຕາຍວາ ຕໍ ວຫນ຺ຕິ ປວຕ຺ເຕນ຺ຕິ ຊີວິຕວຸຕ຺ຕິສມ຺ປາທນຕ຺ຕາຕິ ຊິວ຺ຫາ. ຊີຕິວາ ຊໂຍ ປຣາຊໂຍວາ ວຸຈ຺ຈຕິ. ຕທຸຠຍໍ ວຫຕິ ວຫນ຺ຕິວາ ເອຕາຍາຕິ ຊິວ຺ຫາ. ສສມ຺ຠາຣຊິວ຺ຫາ. ຍຖາຫ –

ປຸຣິສສ຺ສ ຫິ ຊາຕສ຺ສ, ກຸທາຣີ ຊາຍເຕ ມຸເຂ;

ຍາຍ ຉິນ຺ທຕິ ອຕ຺ຕານໍ, ນໂຣ ທຸພ຺ຠາສິຕໍ ຠຓນ຺ຕິ.

ອິຘ ປນ ຕໍ ສຫຈຣິຕຕ຺ຕາ ຊິວ຺ຫາຕິ ປສາທຣູປໂມ ວຸຈ຺ຈຕິ. ກຸຈ຺ຉິຕານໍ ເກສາທີນໍ ປາປຘມ຺ມານຎ຺ຈ ອາໂຍ ອຸປ຺ປຕ຺ຕິຏ຺ຐານນ຺ຕິ ກາໂຍ. ສສມ຺ຠາຣກາໂຍ. ອິຘ ປນ ຕໍ ສຫຈຣິໂຕ ປສາທ ກາໂຍເອວ ອຘິປ຺ເປໂຕ. ປສີທນ຺ຕີຕິ ປສາທາ. ປສີທນ຺ຕິ ວາ ເອຕ຺ຖ ຈນ຺ທມຓ຺ຑລາທີນິ ອາຣມ຺ມຓນິມິຕ຺ຕານິ ຕຕ຺ຖ ສໍສີທມານານິ ວິຍ ສຣູປໂຕ ສນ຺ທິສ຺ສນ຺ຕີຕິ ປສາທາ, ສຸປຣິສຸທ຺ຘອາທາສມຓ຺ຑສທິສາ ກມ຺ມຊມຓ຺ຑາ. ອິເມ ປນ ປຎ຺ຈ ທຏ຺ຐຸກາມຕາທິ ນິທານ ກມ຺ມສມຸຏ຺ຐານ ຠູຕປສາທ ລກ຺ຂຓາ ຣູປາທິ ອຠິຆາຕາຣຫ ຠູຕປສາທລກ຺ຂຓາ ວາ ຈກ຺ຂຸປສາທາທໂຍ ທຏ຺ຐພ຺ພາ. ຕຕ຺ຖ ຈກ຺ຂຸ ຕາວ ເສຕມຓ຺ຑລ ປຣິກ຺ຂິຕ຺ຕສ຺ສ ກຓ຺ຫມຓ຺ຑລສ຺ສ ມຊ຺ເຌ ອູກາສິຣປມາເຓ ອຕິມຸເຂ ຐິຕານໍ ສຣີຣສຓ຺ຐານຸປ຺ປຕ຺ຕິ ປເທສຠູເຕ ທິຏ຺ຐມຓ຺ຑເລ ເຕລມິວ ສຕ຺ຕປິຈຸປຏລານິ ສຕ຺ຕອກ຺ຂິປຏລານິ ພ຺ຍາເປຕ຺ວາ ຕິຏ຺ຐຕິ. ໂສຕໍ ໂສຕພິລພ຺ຠນ຺ຕເຣ ອງ຺ຄຸລິເວຐນາກາຣໍ ອຸປຈິຕຕນຸຕມ຺ພໂລມໍ ປເທສໍ ພ຺ຍາເປຕ຺ວາ ຕິຏ຺ຐຕິ. ຆານໍ ນາສິກພ຺ຠນ຺ຕເຣ ອຊປທສຓ຺ຐານໍ ປເທສໍ ພ຺ຍາເປຕ຺ວາ ຕິຏ຺ຐຕິ. ຊິວ຺ຫາ ສສມ຺ຠາຣ ຊິວ຺ຫາມຊ຺ເຌ ອຸປ຺ປລ ທລຄ຺ຄ ສຓ຺ຐານໍ ປເທສໍ ພ຺ຍາເປຕ຺ວາ ຕິຏ຺ຐຕິ. ກາໂຍ ປນ ມຫນ຺ຕິ ຍາ ກປ຺ປາສ ປຏລວຏ຺ຏິຍໍ ອາສິຕ຺ຕເຕລໍວິຍ ຖເປຕ຺ວາ ປາຈກ ເຕຊສ຺ສ ປຕິຏ຺ຐານຏ຺ຐານໍ ເກສຄ຺ຄ ໂລມຄ຺ຄ ນຂຄ຺ຄ ສຸກ຺ຂຈມ຺ມານິຈ ອວເສສໍ ສກລສຣີຣໍ ພ຺ຍາເປຕ຺ວາ ຕິຏ຺ຐຕີຕິ. ເຕ ປນ ປຎ຺ຈ ຍຖາຣຫໍ ປຎ຺ຈທ຺ວາຣິກຈິຕ຺ຕານໍ ວຕ຺ຖຸທ຺ວາຣຠາວໍ ສາເຘນ຺ຕິ. ເຕສຸຈ ເອເກກສ຺ສ ຈຕສ຺ໂສ ຈຕສ຺ໂສ ຘາຕຸໂຍ ສນ຺ຘາຣຓອາພນ຺ຘນ ປຣິປາຈນ ສມຸທີຣຓ ກິຈ຺ເຈຫິ ອຸປກາຣໍ ກໂຣນ຺ຕິ. ຍຖາຂຕ຺ຕິ ຍກຸມາຣສ຺ສ ຈຕສ຺ໂສ ຘາຕິໂຍ ຘາຣຓ ນຫາປນ ມຓ຺ຑນ ພີຊນ ກິຈ຺ເຈຫີຕິ. ອຸຕຸຈິຕ຺ຕາຫາຣາຈ ນໍ ອຸປຕ຺ຖມ຺ເຠນ຺ຕິ. ຍຖາ ຕໍ ຂຕ຺ຕິຍກຸມາຣໍ ປິຕຸ ເຊຏ຺ຐຠາຕຸ ເຊຏ຺ຐຠຄິນິໂຍວິຍ. ອາຍຸຈ ນໍ ສຸຏ຺ຐຸ ອນຸປາເລຕິ. ຍຖາ ຕໍ ຂຕ຺ຕິຍກຸມາຣໍ ທິສາປາໂມກ຺ໂຂ ຣາຊສມ຺ມໂຕ ມຫາຠິສກ຺ໂກວິຍ. ວຓ຺ຓາທໂຍຈ ນໍ ປຣິວາເຣນ຺ຕິ. ຍຖາ ຕໍ ຂຕ຺ຕິຍກຸມາຣໍ ສຫຊາຕາ ອມຈ຺ຈປຸຕ຺ຕາ ວິຍາຕິ. ຍສ຺ມາ ປນ ສຕ຺ຕານໍ ຈິຕ຺ຕໍ ນາມ ວິຈິຕ຺ຕໍ ໂຫຕິ. ຈິຕ຺ຕວິຈິຕ຺ຕຕາຍ ສຎ຺ຎາວິຈິຕ຺ຕາ. ສຎ຺ຎາວິຈິຕ຺ຕຕາຍ ຕຓ຺ຫາວິຈິຕ຺ຕາ. ຕຓ຺ຫາວິຈິຕ຺ຕ ຕາຍ ກມ຺ມານິ ວິຈິຕ຺ຕານິ. ກມ຺ມວິຈິຕ຺ຕຕາຍ ກມ຺ມສມຸຏ຺ຐານານິ ຠູຕານິ ວິຈິຕ຺ຕານິ. ຠູຕວິຈິຕ຺ຕຕາຍ ອິເມ ປສາທາ ວິຈິຕ຺ຕາ. ອຎ຺ຎມຎ຺ຎໍ ອສທິສາ ໂຫນ຺ຕິ. ເຕຫິ ປສາທມຓ຺ຑຠູຕາປິ ສມານາ ເກຈິ ຣູປສ຺ເສວ ອຠິຆາຕາຣຫາ ໂຫນ຺ຕິ, ນ ສທ຺ທາທີນໍ. ເກຈິ ສທ຺ທາທີນໍ ເອວ, ນ ຣູປສ຺ສາຕິ. ຕສ຺ມາ ເຕສໍ ອຎ຺ຎມຎ຺ຎຎ຺ຈ ອຎ຺ຎຣູເປຫິຈ ລກ຺ຂຓໂຕ ອສໍມິສ຺ສຕາ ເວທິຕພ຺ພາຕິ.

ຣູປຍຕີຕິ ຣູປໍ. ວຓ຺ຓວິເສສໍ ອາປຊ຺ຊິຕ຺ວາ ຫທຍງ຺ຄຕຠາວໍ ປກາເສຕິ. ປກຕິຍາປິ ວາ ຍໍກິຎ຺ຈິທພ຺ພໍ ສມວິສມໍວາ ປກາເສ ຕີຕິ ອຕ຺ໂຖ. ສປ຺ປຕິ ໂສຕວິຎ຺ເຎຍ຺ຍຠາວໍ ຄຈ຺ຉຕີຕິ ສທ຺ໂທ. ສທ຺ທຍຕີຕິ ສທ຺ໂທ. ຕໍ ຕໍ ອຕ຺ຖໍວາ ອຕ຺ຕໂນ ວຕ຺ຖຸໍວາ ອາຈິກ຺ຂຕີຕິ ອຕ຺ໂຖ. ສທຕິວາ ຕໍ ຕໍ ທິສໍວາ ເທສໍວາ ຂເຓນ ວິສ຺ສຣຕິ ວິປ຺ຜຣຕີຕິ ສທ຺ໂທ. ຄນ຺ຘຍຕີຕິ ຄນ຺ໂຘ. ອຕ຺ຕໂນ ວຕ຺ຖຸໍສູເຈຕີຕິ ອຕ຺ໂຖ. ຄຈ຺ຉຕີຕິ ໂຄ. ວາໂຕ. ເຕນ ຘາຣີຍຕີຕິ ຄນ຺ໂຘ. ຣສີຍຕິ ອສ຺ສາທີຍຕີຕິ ຣໂສ. ຣສນ຺ຕິວາ ຕໍ ອສ຺ສາເທນ຺ຕີຕິ ຣໂສ. ຜຸສີຍຕີຕິ ໂຜຏ຺ຐພ຺ພໍ. ຜຸສນຎ຺ເຈຕ຺ຖ ປສາເທນ ສຫ ຆຏ຺ຏນໍ ກລາປນ຺ຕຣຠູເຕຫິ ສທ຺ຘິໍ ປຏິຫນນຎ຺ຈ ເວທິຕພ຺ພໍ. ຕທຸຠຍໍປິ ອາໂປ ຘາຕຸຍາ ນຕ຺ຖີຕິ ວຸຕ຺ຕໍ ອາໂປຘາຕຸວິວຊ຺ຊິຕນ຺ຕິ. ກສ຺ມາ ປນ ຕໍ ຕສ຺ສາ ນຕ຺ຖິ. ນນຸ ສີຕຕາວາ ທ຺ຣວຕາວາ ຜຸສິຕ຺ວາ ຄຍ຺ຫຕີຕິ. ວຸຈ຺ຈເຕ, ສີຕຕາ ຫິ ເຕໂຊເຍວ, ນ ອາໂປ. ຍທິ ຫິ ສາ ອາໂປເຍວ ສິຍາ. ປກ຺ກຸມິເຕ ສນ຺ຕຕ຺ເຕ ໂລຫຣເສປິສ຺ສ ສີຕຕາ ລພ຺ຠມານາ ສິຍາ. ໂສ ຫິ ຣໂສ ອາປາຘິໂກ ໂຫຕີຕິ. ເອວໍ ປນ ນລພ຺ຠຕິ. ຕສ຺ມາ ສາ ເຕໂຊເຍວ, ນ ອາໂປຕິ. ອປິຈ, ສີຕຸຓ຺ຫານໍ ເອກສ຺ມິໍ ກລາເປ ສຫ ອປ຺ປວຕ຺ຕນໂຕ ໂອຣປາຣານໍ ວິຍ ເຕສໍ ອນວຏ຺ຐານໂຕຈ ວິຎ຺ຎາຍຕິ. ນ ຫິ ສີຕກລາເປ ອຸຓ຺ຫໍ, ອຸຓ຺ຫກລາເປວາ ສີຕໍ ສຫ ປວຕ຺ຕຕິ. ຍສ຺ມິໍຈ ວຕ຺ຖຸມ຺ຫິ ປຸພ຺ເພ ສີຕສຎ຺ຎາ ສຓ຺ຐາຕິ. ປຈ຺ຉາ ຕໂຕ ສີຕຕເຣ ອາຄເຕ ຕສ຺ມິໍເຍວ ປຸນ ອຸຓ຺ຫສຎ຺ຎາ ສຓ຺ຐາຕິ. ປຸພ຺ເພ ອຸຓ຺ຫສຎ຺ຎາຍໍປິ ເອເສວ ນໂຍ. ຕຖາ ອຸຓ຺ເຫ ມນ຺ເທ ສີຕສຎ຺ຎາ ສຓ຺ຐາຕິ. ສີເຕ ມນ຺ເທ ອຸຓ຺ຫສຎ຺ຎາຕິ.

ອຖ ປນ ທ຺ຣວຠາວຠູໂຕ ອາໂປ ຜຸສິຕ຺ວາ ຄຍ຺ຫຕິ. ອໂຍ ປິຓ຺ຑາທີສຸ ອາພນ຺ຘນຠູໂຕປິ ຜຸສິຕ຺ວາວ ຄຍ຺ເຫຍ຺ຍ. ເອວຎ຺ຈ ສຕິ ຍຖາ ເຕສຸ ອິຕຣານິ ຕີຓິ ຠູຕານິ ວິນາ ອິຕຣີຕເຣນ ວິສຸໍ ວິສຸໍ ກາຍິກ ສຸຂທຸກ຺ຂານໍ ອາຣມ຺ມຓຠູຕານິ ໂຫນ຺ຕິ. ຕຖາ ໂສປິ ວິນາ ອິຕເຣຫິ ວິສຸໍ ກາຍິກສຸຂທຸກ຺ຂານໍ ອາຣມ຺ມຓຠູໂຕເອວ ສິຍາ. ນ ປນ ໂຫຕິ. ຍຎ຺ຫິ ຕານິ ອໂຍປິຓ຺ຑາທີນິ ຜຸສນ຺ຕານໍ ກາຍິກໍ ສຸຂໍວາ ທຸກ຺ຂໍວາ ອຸປ຺ປຊ຺ຊຕິ, ຕໍ ສຓ຺ຫຖທ຺ຘຕາ ວເສນວາ ອຸປ຺ປຊ຺ຊຕິ. ສີຕຸຓ຺ຫຕາວເສນວາ ອພ຺ຠນ຺ຕຣຖມ຺ຠນສ຺ສ ມນ຺ທຄາຬ຺ຫຕາວເສນວາ. ໂນ ອຎ຺ຎຖາຕິ. ຕສ຺ມາ ປຸຣິມຠາເຄ ຕີຓິ ຠູຕານິ ຜຸສິຕ຺ວາວາ ວຓ຺ຓໍ ທິສ຺ວາວາ ປຈ຺ຉາ ຠາເຄ ສຸທ຺ເຘນ ມໂນ ວິຎ຺ຎາຓສນ຺ຕາເນນ ທີຆຣສ຺ສາທິສຓ຺ຐານໍວາ ຣຕ຺ຕິຍໍ ອລາຕຈກ຺ກໍ ວາ ຕໍຕໍຉິທ຺ທວິວຣໍວາ ຊານນ຺ຕາ ວິຍ ປຖມໍ ທ຺ຣວຕາສຫິຕານິ ວິລີນານິ ມຸທູນິ ຕີຓິ ຠູຕານິ ປຖວິໍ ເອວ ວາ ຜຸສິຕ຺ວາ ປຈ຺ຉາ ສຸທ຺ເຘນ ມໂນ ວິຎ຺ຎາຓສນ຺ຕາເນນ ວິສຸໍ ທ຺ຣວຠາວໍ ອທ຺ທຕິນ຺ຕຠາວໍ ຊານນ຺ຕິ. ເອວໍ ສນ຺ເຕປິ ຕໍ ຜຸສິຕ຺ວາ ຊານນ຺ຕາ ອິຈ຺ເຈວ ມຎ຺ຎນ຺ຕິ ອວິເສສວິທຸໂນຕິ. ຄຸນ຺ນໍ ອຠິຓ຺ຫໍ ຈຣຓຏ຺ຐານໍ ໂຄຈໂຣ. ໂຄຈຣສທິສຕ຺ຕາ ອິຘ ໂຄຈໂຣ. ໂຄຕິວາ ອິຘ ຈກ຺ຂາທີນິ ອິນ຺ທ຺ຣິຍານິ ວຸຈ຺ຈນ຺ຕິ. ຕານິ ວິຎ຺ຎາຓາຘິຏ຺ຐິຕານິ ຫຸຕ຺ວາ ເອເຕສຸ ຈຣນ຺ຕິ. ເອຕານິວາເຕສຸ ຈຣນ຺ຕິ ປວຕ຺ຕນ຺ຕິ ຆຏ຺ເຏນ຺ຕີຕິ ໂຄຈຣາ. ເຕເຍວ ອິຘ ເອກຕ຺ຕໍ ອຸປເນຕ຺ວາ ໂຄຈຣຣູປນ຺ຕິ ວຸຕ຺ຕໍ. ອິມານິປນ ປຎ຺ຈ ຍຖາກ຺ກມໍ ຈກ຺ຂາທີສຸ ປຏິຫນນ ລກ຺ຂຓານິ ຣູປາທີນີຕິ ເວທິຕພ຺ພານິ.

ອິຕ຺ຖີ ວຸຈ຺ຈຕິ ອວິສທາກາຣສຓ຺ຐິຕໍ ຂນ຺ຘປຎ຺ຈກໍ. ຍສ຺ສ ປນ ຘມ຺ມສ຺ສ ອານຸຠາເວນ ຕໍ ຕຖາ ສຓ຺ຐາຕິ ປວຕ຺ຕຕິ. ໂສ ອິຕ຺ຖິ ຍາ ຠາໂວຕິ ອິຕ຺ຖຕ຺ຕໍ. ປຸຣິໂສ ວຸຈ຺ຈຕິ ວິສທາກາຣສຓ຺ຐິຕໍ ຂນ຺ຘປຎ຺ຈກໍ. ເສສໍ ວຸຕ຺ຕນຍເມວ. ຕຕ຺ຖ ອິຕ຺ຖິລິງ຺ຄ ອິຕ຺ຖິນິມິຕ຺ຕ ອິຕ຺ຖິ ກຸຕ຺ຕ ອິຕ຺ຖາກປ຺ປານໍ ເຫຕຸຠາວ ລກ຺ຂຓໍ ອິຕ຺ຖຕ຺ຕໍ. ປຸຣິສລິງ຺ຄ ປຸຣິສນິມິຕ຺ຕ ປຸຣິສກຸຕ຺ຕ ປຸຣິສາກປ຺ປານໍ ເຫຕຸຠາວ ລກ຺ຂຓໍ ປຸຣິສຕ຺ຕໍ. ຕຕ຺ຖ ລິງ຺ຄນ຺ຕິ ປຘານງ຺ຄຠູຕໍ ມຫາສຓ຺ຐານໍ. ນິມິຕ຺ຕນ຺ຕິ ປຈ຺ຈງ຺ຄຠູຕໍ ຂຸທ຺ທກສຓ຺ຐານໍ. ກຸຕ຺ຕນ຺ຕິ ກີຬາລິລາທິ ກ຺ຣິຍາວິເສໂສ. ອາກປ຺ໂປຕິ ຄມນາທິໂກ ອາກາຣວິກາໂຣ. ສພ຺ເພເປເຕ ຂນ຺ຘປຎ຺ຈກສ຺ສ ປວຕ຺ຕິວິເສສາເອວ. ເຍ ສທ຺ທສຕ຺ເຖສຸ ລິງ຺ຄນ຺ຕິ ວຸຈ຺ຈນ຺ຕິ. ເຍສຎ຺ຈ ວເສນ ອຍໍ ອິຕ຺ຖີເອວ, ນ ປຸຣິໂສ. ອຍໍ ປຸຣິໂສເອວ, ນ ອິຕ຺ຖີຕິ ສຎ຺ຊານນ຺ຕິ. ຍສ຺ມາ ປເນຕ຺ຖ ສຓ຺ຐານາທີນໍ ອວິສທາທິຠາໂວເອວ ອຕ຺ຖໂຕ ອິຕ຺ຖິປຸຣິສຕາ ໂຫຕິ. ຕທຸຠຍມຸຕ຺ຕຠາໂວຈ ນປຸໍສກຕາ. ໂສຈ ອກ຺ຂຣປທ ສງ຺ຂາເຕສຸ ວຈເນສຸ ຈ ວຈນຕ຺ເຖສຸຈ ຍຖາຣຫໍ ສນ຺ທິສ຺ສຕິເຍວ. ຕສ຺ມາ ອິນ຺ທ຺ຣິຍຣຫິເຕສຸປິ ປເທສຸຈ ຣຸກ຺ຂາທີສຸ ປທຕ຺ເຖສຸຈ ປຣິຍາເຍນ ອິຕ຺ຖິປຸມນປຸໍສກຕາສິທ຺ຘິ ເວທິຕພ຺ພາຕິ.

[໑໗໘] ຍໍ ປນ ວິຠາວນິຍໍ

‘‘ອິຕ຺ຖີນໍ ອງ຺ຄຊາຕໍ ອິຕ຺ຖິລິງ຺ຄ’’ນ຺ຕິ ວຸຕ຺ຕໍ. ຕໍ ນ ສຸນ຺ທຣໍ.

ນ ຫິ ກຕ຺ຖຈິ ປາຬິຍໍ ອຏ຺ຐກຖາສຸຈ ນິມິຕ຺ຕສທ຺ໂທວິຍ ລິງ຺ຄສທ຺ໂທ ອງ຺ຄຊາເຕ ປາກໂຏ ທິຏ຺ໂຐຕິ.

[໑໗໙] ຍຎ຺ຈ ຕຕ຺ຖ

‘‘ອິຕ຺ຖິສຓ຺ຐານໍ ອິຕ຺ຖາກປ຺ໂປ’’ຕິ ວຸຕ຺ຕໍ. ຕໍປິ ນ ສຸນ຺ທຣໍ.

ນ ຫິ ລິງ຺ຄສທ຺ໂທ ວິຍ ອາກປ຺ປສທ຺ໂທ ສຓ຺ຐາເນ ປາກໂຏ ທິຏ຺ໂຐຕິ. ເສສໍປນ ຕຕ຺ຖ ວຸຕ຺ຕໍ ຍໍກິຎ຺ຈິ ອຏ຺ຐກຖາຍ ອສເມນ຺ຕໍປິ ເຕນ ປຣິຍາເຍນ ຍຸຊ຺ຊຕິເຍວ. ຠວນ຺ຕິ ປວຕ຺ຕນ຺ຕິ ຕໍສຫິເຕ ຂນ຺ຘສນ຺ຕາເນ ເອສາ ອິຕ຺ຖີ, ເອໂສ ປຸຣິໂສຕິ ເອວໍ ປວຕ຺ຕາ ສທ຺ທ ພຸທ຺ຘິໂຍ ເອເຕນາຕິ ຠາໂວ ຠວນ຺ຕິວາ ປາຕຸຠວນ຺ຕິ ຕໍສຫິເຕ ຂນ຺ຘສນ຺ຕາເນ ລິງ຺ຄາທີນິ ເອຕສ຺ມິໍ ສຕີຕິ ຠາໂວ. ໂສ ເອວ ຣູປນ຺ຕິ ຠາວຣູປໍ. ຫທນ຺ຕິ ສຕ຺ຕາ ຕໍຕໍອຕ຺ຖໍວາ ອນຕ຺ຖໍວາ ປູເຣນ຺ຕິ ເອເຕນາຕິ ຫທຍໍ. ຫທນ຺ຕິວາ ສຕ຺ຕາ ອິໂຕ ນານາວິກກ຺ເກ ໂອສຊນ຺ຕິ ມຸຎ຺ຈນ຺ຕີຕິ ຫທຍໍ. ຫຣນ຺ຕິວາ ປຣິຫຣນ຺ຕິ ຕໍ ສຕ຺ຕາ ຊີວິຕໍວິຍ ທຍນ຺ຕິ ຣກ຺ຂນ຺ຕິຈາຕິ ຫທຍໍ. ວສນ຺ຕິ ນິວສນ຺ຕິ ຈິຕ຺ຕເຈຕ ສິກາຘມ຺ມາ ເອຕ຺ຖາຕິ ວຕ຺ຖຸ. ຫທຍຎ຺ຈ ຕໍ ວຕ຺ຖຸຈາຕິ ຫທຍວຕ຺ຖຸ. ຘາຕຸທ຺ວຍນິສ຺ສຍລກ຺ຂຓໍ ວຕ຺ຖຸຣູປໍ. ຕໍ ປນ ຫທຍໂກສພ຺ຠນ຺ຕເຣ ອຑ຺ຒປສຕມຕ຺ຕໍ ໂລຫິຕໍ ພ຺ຍາເປຕ຺ວາ ຕິຏ຺ຐຕີຕິ ເວທິຕພ຺ພໍ. ຘມ຺ມສງ຺ຄຓິຍໍ ປນ ເທສນາເຠທຣກ຺ຂນຕ຺ຖໍ ອວຕ຺ວາ ປຏ຺ຐາເນເອວ ຕໍ ວຸຕ຺ຕໍ. ຍຖາຫ-ວຕ຺ຖຸ ກຸສລານໍ ຂນ຺ຘານໍ ນິສ຺ສຍປຈ຺ຈເຍນ ປຈ຺ຈໂຍ. ວຕ຺ຖຸ ອກຸສລານໍ ຂນ຺ຘານໍ ນິສ຺ສຍປຈ຺ຈເຍນ ປຈ຺ຈໂຍຕິອາທິ. ເອຕ຺ຖຈ ຉຫິ ວຕ຺ຖູຫິ ອຎ຺ຎໍ ວຕ຺ຖຸນາມ ນຕ຺ຖິ. ເຕສຸຈ ປຸຣິມານິ ປຎ຺ຈ ກຸສລາທີນໍ ນິສ຺ສຍາເອວ ນ ໂຫນ຺ຕິ. ຕສ຺ມາ ເຕສໍ ນິສ຺ສຍຠາເວນ ຕຕ຺ຖ ວຸຕ຺ຕໍ ວຕ຺ຖຸນາມ ວິສຸໍ ເອກໍ ວຕ຺ຖຸຣູປເມວາຕິ ສິທ຺ຘນ຺ຕິ.

[໑໘໐] ວິຠາວນິຍໍ ປນ

ຍໍ ຣູປໍ ນິສ຺ສາຍາຕິ ປາຐສ຺ສ ອຸທ຺ຘຏຕ຺ຕາ ຣູປສາມຎ຺ຎປສງ຺ໂຄ ໂຫຕີຕິ ຕໍ ວິໂສເຘຕຸໍ ຍຸຕ຺ຕິນາມ ວຸຕ຺ຕາ. ປຏ຺ຐາເນ ປນ ພຫູສຸ ອນຎ຺ຎສາຘາຣເຓສຸ ຐາເນສຸ ວຕ຺ຖຸນາເມນ ວິເສເສຕ຺ວາ ວຸຕ຺ຕຕ຺ຕາ ໂສປສງ຺ໂຄ ນຕ຺ຖິເຍວາຕິ ທຏ຺ຐພ຺ພໍ.

ຊີວນ຺ຕິ ສຫຊາຕຘມ຺ມາ ເຍນາຕິ ຊີວິຕໍ. ເຕສໍ ຊີວເນ ອາຘິປຈ຺ຈໂຍເຄນ ເຕສຸ ອິນ຺ທໍ ອິສ຺ສຣໍ ອຕ຺ຕານໍ ກໂຣຕີຕິ ອິນ຺ທ຺ຣິຍໍ. ຊີວິຕຎ຺ຈ ຕໍ ອິນ຺ທ຺ຣິຍຎ຺ຈາຕິ ຊີວິຕິນ຺ທ຺ຣິຍໍ. ສຫຊາຕາ ນຸປາລນ ລກ຺ຂຓໍ ຊີວິຕິນ຺ທ຺ຣິຍໍ. ຍຖາ ຫິ ພີຊນິພ຺ພຕ຺ຕານິ ອຸປ຺ປລາທີນິ ພີເຊວິນຏ຺ເຐປິ ອຸທການຸປາລິຕານິ ຈິຣໍປິ ກາລໍ ຊີວນ຺ຕິ. ເອວເມວໍ ນິຣຸທ຺ຘ ກມ຺ມນິພ຺ພຕ຺ຕານິ ກມ຺ມຊຣູປານິ ກມ຺ເມ ອສນ຺ເຕປິ ຊີວິຕານຸປາລິຕານິ ສນ຺ຕຕິວເສນ ວສ຺ສສຕໍປິ ວສ຺ສສຫສ຺ສໍປິ ກປ຺ປໍປິ ໂສຬສກປ຺ປສຫສ຺ສານິປິ ຊີວນ຺ຕິເຍວ, ຕຖາ ຫິ ຊີວິຕຣຫິຕານິ ອິຕຣຣູປານິ ຊີວນ຺ຕານິນາມ ນໂຫນ຺ຕິ. ຕານິ ຫິ ເຍນ ເອເກນ ຈິຕ຺ເຕນວາ ອຸຕຸນາວາ ອາຫາເຣນວາ ຊາຍນ຺ຕິ. ຕສ຺ມິໍ ນິຣຸທ຺ເຘ ນິຣຸຊ຺ຌນ຺ຕິ, ປຣໍ ມຸຫຸຕ຺ຕມຕ຺ຕໍປິ ສນ຺ຕານໍ ຆເຏຕຸໍ ນສກ຺ໂກນ຺ຕິ. ເຕສຸ ຫິ ຈິຕ຺ຕຊຣູປານໍ ສນ຺ຕຕິປຈ຺ຈຸປ຺ປນ຺ນໍ ເອກວີຖິ ເອກຊວນວາຣ ເອກສມາປຕ຺ຕິວາເຣນ ປຣິຈ຺ຉິນ຺ນໍ ໂຫຕິ. ອຸຕຸຊາຫາຣຊານຎ຺ຈ ສຠາເຄກ ອຸຕຸອາຫາຣ ວເສນ ປຣິຈ຺ຉິນ຺ນໍ ໂຫຕິ. ກມ຺ມຊຣູປານໍ ປນ ວິສຸໍ ສນ຺ຕຕິປຈ຺ຈຸປ຺ປນ຺ນໍນາມ ນຕ຺ຖິ. ເຕສໍ ເອກຠວປຣິຈ຺ຉິນ຺ນໍ ອທ຺ຘາປຈ຺ຈຸປ຺ປນ຺ນເມວ ໂຫຕີຕິ. ຍທິ ເອວໍ ອຣູປຘມ຺ມານໍ ກຖນ຺ຕິ. ເຕຫິ ຊີວິຕໂຍເຄນ ຊີວນ຺ຕາເອວ ໂຫນ຺ຕິ. ເອວໍສນ຺ເຕປິ ເຕສໍ ສນ຺ຕຕິປຈ຺ຈຸປ຺ປນ຺ນໍ ທິສ຺ສຕີຕິ. ວຸຈ຺ຈເຕ, ອຣູປຘມ຺ເມສຸ ວິປາການິ ຕາວ ກມ຺ມຊຣູປສທິສານິ. ຕານິປິ ຫິ ອສຕິ ວີຖິຈິຕ຺ຕຸປ຺ປາເທ ຍາວຊີວໍປິ ເອກສນ຺ຕຕິວເສນ ປວຕ຺ຕິສ຺ສນ຺ຕິເຍວ. ອິຕຣານິ ປນ ຍສ຺ສ ອາຣມ຺ມຓສ຺ສ ອາປາຕາຄຕຕ຺ຕາ ອຸປ຺ປຊ຺ຊນ຺ຕິ. ຕສ຺ມິໍ ນິຣຸທ຺ເຘ ຕທຠາເວປິ ຕທາຣມ຺ມຓາ ພຫູ ຈິຕ຺ຕສນ຺ຕຕິໂຍ ຊີວິຕສ຺ສອທ຺ຘານຜຣຓານຸຠາເວນ ປວຕ຺ຕນ຺ຕິເຍວ. ອປິຈ, ຍາວຂນ຺ຘປຣິນິພ຺ພານາ ອນນ຺ຕຣປຈ຺ຈຍຸປນິພນ຺ເຘນ ອພ຺ໂພຈ຺ຉິນ຺ນໍ ປວຕ຺ຕມານາຍ ຈິຕ຺ຕສນ຺ຕຕິຍາວເສນປິ ອຍມຕ຺ໂຖ ວຕ຺ຕພ຺ໂພ. ເຕເນວ ຫິ ກິເລສສີສໍ ອວິຊ຺ຊາ. ປວຕ຺ຕສີສໍ ຊີວິຕິນ຺ທ຺ຣິຍນ຺ຕິ ວຸຕ຺ຕໍ.

[໑໘໑] ວິຠາວນິຍໍ ປນ

ອາຫາຣຊາທີນໍ ອາຫາຣາທິເຍວ ອຸປ຺ປຕ຺ຕິຍາປິ ຐິຕິຍາປິ ກາຣຓໍ ໂຫຕິ. ກສ຺ມາ, ຕງ຺ຂເຓ ຘຣມານຕ຺ຕາ. ກມ຺ມ ຊານໍ ປນ ກມ຺ມໍ ອຸປ຺ປຕ຺ຕິຍາເອວ ກາຣຓໍ, ນ ຐິຕິຍາ. ກສ຺ມາ, ຕງ຺ຂຓາຠາວໂຕ. ຊີວິເຕນ ປນ ອນຸປາລິຕຕ຺ຕາ ເອວ ເຕສໍ ຂຓຏ຺ຐິຕິ ສິທ຺ຘາຕິ ອິມິນາ ຘິປ຺ປາເຍນ ຍໍ ວຸຕ຺ຕໍ ‘‘ຍຖາສກໍ ຂຓມຕ຺ຕຏ຺ຐາຍີນໍປິ ຫິ ສຫຊາຕານໍ ປວຕ຺ຕິເຫຕຸຠາເວນ ອນຸປາລກໍ. ນ ຫິ ເຕສໍ ກມ຺ມໍເຍວ ຐິຕິກາຣຓໍ ໂຫຕິ. ອາຫາຣຊາທີນໍ ອາຫາຣາທິ ວິຍ ກມ຺ມສ຺ສ ຕງ຺ຂຓາຠາວ ໂຕຕິ’’. ຕໍ ນ ຍຸຕ຺ຕໍ.

ຘມ຺ມານຎ຺ຫິ ຂຓຏ຺ຐິຕິນາມ ເອກກລາປຄຕສຫຊາຕປຈ຺ຈຍາ ຍຕ຺ຕາເອວ ໂຫຕິ. ນ ນານາກລາປຄຕຊນກປຈ຺ຈຍາຍຕ຺ຕາ. ອິຕຣຖາ ອຸປ຺ປາທກ຺ຂເຓ ລພ຺ຠມານານໍ ອຸປຈຍສນ຺ຕຕີນໍ ວິຍ ຐິຕິກ຺ຂເຓ ລພ຺ຠມານາຍ ຊຣຕາຍປິ ກຸໂຕຈິສມຸຏ຺ຐານຕາ ປາຬິຍໍ ວຸຕ຺ຕາ ສິຍາຕິ. ອປິຈ, ຂຓຏ຺ຐິຕິນາມ ສຠາວສິທ຺ຘາເອວ. ນ ຫິ ອຸປ຺ປນ຺ນາ ຘມ຺ມາ ປຈ຺ຈຍເວກລ຺ເລນ ອຕ຺ຕໂນ ຂເຓສຸ ປຣິປຸຓ຺ຓໍ ອຏ຺ຐຕ຺ວາ ອນ຺ຕຣາວ ຠິຊ຺ຊນ຺ຕີຕິ ອຕ຺ຖິ. ນຈ ປຈ຺ຈຍາຘິມຕ຺ເຕນ ອຕິເຣ ກຕຣໍ ຕິຏ຺ຐນ຺ຕີຕິ ອຕ຺ຖິ. ຕສ຺ມາ ຂຓຏ຺ຐິຕິຍໍ ອຸປຕ຺ຖມ຺ຠຍມານາປິ ອາຫາຣາທໂຍ ອນຸປາລຍມານຎ຺ຈ ຊີວິຕໍ ປຈ຺ຉາ ພລວຣູປສນ຺ຕຕິ ປວຕ຺ຕິອຕ຺ຖາຍເອວ ອຸປຕ຺ຖມ຺ເຠນ຺ຕິ ປາເລຕິຈ. ນ ຂຓຏ຺ຐິຕິປວຕ຺ຕິຍາຕິ. ເອຕ຺ຕາວຕາ ສພ຺ເພສໍປິ ຂຓຏ຺ຐິຕິນາມ ຘຣມານຊນກາຍຕ຺ຕາ ວາ ຊີວິຕາຍຕ຺ຕາວາ ນໂຫຕີຕິ ສິທ຺ຘໍ ໂຫຕິ. ຍທິ ປນ ຕໍ ສນ຺ຕຕິປວຕ຺ຕິເມວ ສນ຺ຘາຍ ວຸຕ຺ຕໍ ສິຍາ, ເອວໍສຕິ ຍຸຊ຺ເຊຍ຺ຍາຕິ. ອຏ຺ຐ ກຖາຍໍປິ ສນ຺ເຕປິຈ ອນຸປາລນ ລກ຺ຂຓາທິມ຺ຫິ ວິຘາເນ ອຕ຺ຖິກ຺ຂເຓເຍວ ຕໍ ເຕຘມ຺ເມ ປາເລຕີຕິອາທິວຈເນ ຍຖາສນ຺ຕຕິຏ຺ຐິຕິ ລພ຺ຠຕິ. ຕຖາ ວິຈາເຣຕ຺ວາ ຄເຫຕພ຺ພາຕິ. ອິທໍ ປນ ປາຈກຄ຺ຄິນາ ສຫ ສກລໍ ອຸປາທິນ຺ນກສຣີຣໍ ພ຺ຍາເປຕ຺ວາ ຕິຏ຺ຐຕີຕິ. ກພຬໍ ກຣີຍຕີຕິ ກພຬີກາໂຣ. ອາຫຣີຍຕິ ອຊ຺ໂຌຫຣີຍຕີຕິ ອາຫາໂຣ. ກພຬີກາໂຣຈ ໂສ ອາຫາໂຣຈາຕິ ກພຬີກາຣາຫາໂຣ. ກພຬີກາໂຣ ອາຫາໂຣຕິປິ ປາໂຐ. ອິທຎ຺ຈ ສວຕ຺ຖຸກ ວຈນໍ ທຏ຺ຐພ຺ພໍ. ອຖວາ, ກພຬີກາຣາຫາຣຠກ຺ຂານໍ ສຕ຺ຕານໍ ອຕ຺ຕຠາວໍ ຠຸໂສ ຫຣຕິ ອທ຺ຘານໍ ປວຕ຺ເຕຕີຕິ ອາຫາໂຣ. ຂຊ຺ຊ ໂຠຊ຺ຊາທິເກ ກພຬີກາເຣ ອາຫາໂຣ ຕນ຺ນິສ຺ສິຕຕ຺ຕາ ຕປ຺ປຣິຍາ ປນ຺ນຕ຺ຕາຈາຕິ ກພຬີກາຣາຫາໂຣ. ອິມສ຺ມິໍອຕ຺ເຖ ສຕິ ນິພ຺ພຕ຺ຕິຕ ໂອຊາ ເອວ ລພ຺ຠຕິ. ອຕ຺ຖໂຕ ປນ ອງ຺ຄມງ຺ຄານຸສາຣິໂນ ຣສສ຺ສ ສາຣຠູໂຕ ອຸປຕ຺ຖມ຺ຠພລກາໂຣ ຠູຕນິສ຺ສິໂຕ ປຣມສິນິທ຺ຘສິ ເນໂຫ ອິຘ ອາຫາຣຣູປໍນາມ. ຕຕ຺ຖ ອງ຺ຄມງ຺ຄານຸສາຣິໂນ ຣສສ຺ສາຕິ ອຊ຺ໂຌຫຣິຕ຺ວາ ອາມາສເຍ ປຕິຏ຺ຐິຕານິ ອາຫາຣວຕ຺ຖູນິ ປາຈກເຕເຊນ ວິເວຈິຕານິ ຣສາທິຠາເວນ ປຎ຺ຈຘາ ວິຠາຄໍ ຄຈ຺ຉນ຺ຕິ. ຕຕ຺ຖ ປຓີຕ ສິນິທ຺ຘ ລຫຸກ ສິເນຫ ໂກຏ຺ຐາໂສ ຣໂສນາມ. ເຍ ໂລເກ ຣສຘາຕູຕິ ວຸຈ຺ຈຕິ. ໂສ ປາຈກ ເຕຊພເລນ ຕໂຕ ອຸຕ຺ຕຣິຕ຺ວາ ຣສຫຣຓິຘມນິຊາລານຸສາເຣນ ເຫຏ຺ຐາຈ ອຸທ຺ຘຎ຺ຈ ສກລສຣີເຣ ອງ຺ຄມງ຺ຄານິ ອນຸສຣນ຺ໂຕ ອນຸຜຣນ຺ໂຕ ອງ຺ຄມງ຺ຄານຸສາຣີຕິ ວຸຈ຺ຈຕິ. ຕສ຺ສ ສາຣຠູໂຕ ອຸປຕ຺ຖມ຺ຠໍ ພລໍ ກໂຣຕີຕິ ອຸປຕ຺ຖມ຺ຠພລກາໂຣ. ໂສ ຫິ ອາມາສເຍ ປຕິຏ຺ຐິຕ ມຕ຺ໂຕວ ສກລສຣີເຣ ຠູເຕສຸ ອຸປຕ຺ຖມ຺ຠກພລໍ ຊເນຕີຕິ.

[໑໘໒] ວິຠາວນິຍໍ ປນ

‘‘ອງ຺ຄມງ຺ຄາ ນສາຣິ ຣສຫຣ ສງ຺ຂາຕາຕິ’’ ປາໂຐ. ໂສ ທຸປ຺ປາໂຐ.

ຕໍ ປນ ເສນ຺ທ຺ຣິຍກາໂຍປຕ຺ຖມ຺ຠນລກ຺ຂຓໍ ອາຫາຣຣູປໍ. ໂອຊາລກ຺ຂຓໍ ວາ. ຕຕ຺ຖ ອຸທຍຕິ ປສວຕີຕິ ໂອຊາ. ອວສທ຺ໂທວາ ຣກ຺ຂເຓ. ຣກ຺ຂຓຎ຺ເຈຕ຺ຖ ອຸປຕ຺ຖມ຺ຠນເມວ. ອວຕິ ຊເນຕິຈາຕິ ໂອຊາ. ກິໍ ອວຕິ. ອຕ຺ຕໂນ ນິສ຺ສຍວຕ຺ຖຸໍ. ກິໍຈ ຊເນຕິ. ອາຫາຣສມຸຏ຺ຐານຣູປໍ. ອຸທຍານນ຺ຕຣໍ ຣູປໍ ຊເນຕີຕິ ໂອຊາຕິປິ ວທນ຺ຕິ. ອຎ຺ຎາປເທສຣຫິເຕນ ກກ຺ຂຬຕ຺ຕາທິນາ ອຕ຺ຕໂນ ຠາເວນ ສິທ຺ຘໍ ຣູປໍ ສຠາວຣູປໍ. ອຸປ຺ປາທາທິນາ ອນິຈ຺ຈຕາທິນາຈ ສງ຺ຂຫລກ຺ຂເຓນ ສຫິຕໍ ຣູປໍ ສລກ຺ຂຓຣູປໍ. ອຸຊຸກໂຕວ ກມ຺ມາທີຫິ ປຈ຺ຈເຍຫິ ນິປ຺ຜາທິຕໍ ຣູປໍ ນິປ຺ຜນ຺ນຣູປໍ. ຣຸປ຺ປນລກ຺ຂຓສມ຺ປນ຺ນໍ ນິປ຺ປຣິຍາຍຣູປໍ ຣູປຣູປໍ. ຍຖາ ທຸກ຺ຂທຸກ຺ຂໍ ອຊ຺ຌຕ຺ຕອຊ຺ຌຕ຺ຕນ຺ຕິ. ສງ຺ຂຕລກ຺ຂຓຍຸຕ຺ຕ ຕາຍ ອນິຈ຺ຈຕາທິກໍ ລກ຺ຂຓຕ຺ຕຍໍ ອາໂຣເປຕ຺ວາ ສມ຺ມສນາຣຫໍ ຣູປໍ ສມ຺ມສນຣູປໍ. ເຕ ເຕ ທພ຺ພສມ຺ຠາຣາວາ ຣູປກລາປາວາ ວິສຸໍວິສຸໍ ຠຸໂສ ກາສນ຺ຕິ ປກາສນ຺ຕິ ເອເຕນາຕິ ອາກາໂສ. ນິສຕ຺ຕ ນິຊີວຏ຺ເຐນ ຘາຕຸ. ອາກາສສງ຺ຂາຕາ ຘາຕູຕິ ອາກາສຘາຕຸ. ປຣິໂຕ ສມນ຺ຕໂຕ ຉິນ຺ທຕິ ກລາປນ຺ຕຣຠູຕານິ ກລາປນ຺ຕຣ ຠູເຕຫິ ສທ຺ຘິໍ ອສໍມິສ຺ສໍ ເອກຕ຺ຕໍ ອນຸປຄມນໍ ກໂຣຕີຕິ ປຣິຈ຺ເຉໂທ. ເຕຫິວາ ປຣິຈ຺ຉິນ຺ທີຍຕິ ອຕ຺ຕໂນວາ ປເຣສໍວາ ອກຕ຺ວາມຊ຺ເຌ ວິສຸໍ ຖປີຍຕິ. ເຕສໍວາ ຉິທ຺ທວິວຣມຕ຺ຕຠູໂຕ. ນ ວິສຸໍ ເອໂກ ອຸປ຺ປາທສຫິໂຕ ສຠາວຘມ຺ໂມ. ນາປິ ກສ຺ສຈິ ຣູປກລາປສ຺ສ ປກ຺ຂຠູໂຕຕິ ປຣິຈ຺ເຉໂທ. ວິກາຣລກ຺ຂຓຣູປານິ ຫິ ອສຠາວຘມ຺ມຠູຕານິປິ ຕໍຕໍ ຣູປກລາເປສຸ ສນ຺ທິສ຺ສມານຕາ ຕໍຕໍຣູປກລາປປກ຺ຂິການິເອວ ໂຫນ຺ຕິ. ອຍໍ ປນ ເຕຫິ ຣູປ ກລາເປຫິ ສພ຺ພໂສ ວິມຸຕ຺ຕຠາເວນ ພຫິຠູຕຕ຺ຕາ ກສ຺ສຈິ ຣູປ ກລາປສ຺ສ ປກ຺ຂຠູໂຕ ນ ໂຫຕີຕິ. ອສຠາວຘມ຺ມຕ຺ຕາຈ ປນ ເກນຈິ ຣູເປນ ຜຸສນ ປຣິຍາໂຍປິ ຕສ຺ສ ສພ຺ພໂສ ນຕ຺ຖີຕິ ກຕ຺ວາ ໂສ ອສໍຜຸຏ຺ຐໍ ຈຕູຫິ ມຫາຠູເຕຫີຕິ ປາຬິຍໍ ວຸຕ຺ໂຕ. ອຏ຺ຐກຖາຍໍ ປນ ຆນປິຓ຺ຑວຕ຺ຖູສຸ ປຏິຆໂຜຏ຺ຐພ຺ພສຠາວານໍ ນານາ ກລາປຄຕຠູຕານໍ ອຎ຺ຎມຎ຺ຎສໍຜຸຏ຺ຐຕາ ອຕ຺ຖີຕິ ກຕ຺ວາ ອສໍຜຸຏ຺ຐໍ ຈຕູຫິ ມຫາຠູເຕຫີຕິ ເອເຕຫິ ອສໍຜຸຏ຺ຐໍ ອຊຏາກາສໍ ກໍຖິຕນ຺ຕິ ວຸຕ຺ຕໍ. ຏີກາຍໍ ປນ ອຍໍ ນິທ຺ເທໂສ ອຊຏາກາສນິທ຺ເທໂສ ນໂຫຕິ, ປຣິຈ຺ເຉທຣູປນິທ຺ເທໂສເຍວ. ໂສຈ ຆນປິຓ຺ຑ ວຕ຺ຖູສຸເອວ ເວທິຕພ຺ໂພ. ເຕສຸຈ ຠູຕານໍ ອສໍຜຸຏ຺ຐຕານາມ ນຕ຺ຖິ. ຕສ຺ມາ ຠູຕານໍ ອຎ຺ຎມຎ຺ຎອພ຺ຍາປິຕາ ເອກຕ຺ຕໍ ອນຸປຄຕຕາເອວ. ຕຕ຺ຖ ອສໍຜຸຏ຺ຐຕານາມ ຍຸຕ຺ຕາ ສິຍາຕິ ອຘິປ຺ປາເຍນ ອພ຺ຍາປິກຕາ ຫິ ອສໍຜຸຏ຺ຐຕາຕິ ວຸຕ຺ຕໍ. ອຕ຺ຖໂຕ ປນ ນານາກລາປຄຕານໍ ຠູຕານໍ ປຣິຍນ຺ຕຕາ ສງ຺ຂາໂຕ ອນ຺ຕຣາຬຘມ຺ໂມ. ຣູປປຣິຈ຺ເຉທລກ຺ຂຓໍ ປຣິຈ຺ເຉທຣູປໍ. ຍາ ປນ ຈລມາເນນ ກາຍງ຺ເຄນ ອຕ຺ຕານຎ຺ຈ ອຕ຺ຕສມງ຺ຄິໂນ ປຸຄ຺ຄລສ຺ສ ອຘິປ຺ປາຍຎ຺ຈ ປຈ຺ຈກ຺ເຂ ຐິເຕ ຊເນ ວິຎ຺ຎາເປຕິ ປາກຏໍ ກຕ຺ວາ ທສ຺ເສຕິ. ສຍຎ຺ຈ ເຕນ ກາຍງ຺ເຄນ ເຕຫິ ຊເນຫິ ວິຎ຺ຎາຍຕິ. ສາ ກາຍວິຎ຺ຎຕ຺ຕິນາມ. ຍາ ອຸຈ຺ຈາຣີຍມາເນນ ວາຈງ຺ເຄນ ສທ຺ເທນ ອຕ຺ຕານຎ຺ຈ ອຕ຺ຕສມງ຺ຄິໂນ ປຸຄ຺ຄລສ຺ສ ອຘິປ຺ປາຍຎ຺ຈ ໂສຕປເຖ ຐິເຕ ຊເນ ວິຎ຺ຎາເປຕິ. ສຍຎ຺ຈ ເຕນວາຈງ຺ເຄນ ເຕຫິ ຊເນຫິ ວິຎ຺ຎາຍຕິ. ສາ ວຈີວິຎ຺ຎຕ຺ຕິນາມ. ອຖວາ, ວິຎ຺ຎາເປນ຺ຕິ ຊນາ ວິຎ຺ຎາຍນ຺ຕິວາ ຊເນຫິ ອຎ຺ຎມຎ຺ຎສ຺ສ ຈິຕ຺ຕານິ ເອຕາຍາຕິ ວິຎ຺ຎຕ຺ຕິ. ສສມ຺ຠາເຣ ອງ຺ຄປຈ຺ຈງ຺ຄຠູເຕ ກາເຍ ປວຕ຺ຕາ ວິຎ຺ຎຕ຺ຕິ ກາຍວິຎ຺ຎຕ຺ຕິ. ໂຈປນ ກາຍສງ຺ຂາໂຕ ກາໂຍ ເອວວາ ວິຎ຺ຎຕ຺ຕິ ກາຍວິຎ຺ຎຕ຺ຕິ. ຈິຕ຺ຕຊສທ຺ທສງ຺ຂາຕາຍ ວາຈາຍ ປວຕ຺ຕາ ວິຎ຺ຎຕ຺ຕິ ວຈີວິຎ຺ຎຕ຺ຕິ. ໂຈປນວາຈາ ສງ຺ຂາຕາ ວາຈາ ເອວວາ ວິຎ຺ຎຕ຺ຕິ ວຈີວິຎ຺ຎຕ຺ຕິ. ຕຕ຺ຖ ຈິຕ຺ຕວເສນ ຍໍກິຎ຺ຈິ ກາຍງ຺ຄວິກາຣໍ ກໂຣນ຺ຕສ຺ສ ຕໍຕໍອງ຺ຄໍ ສນ຺ຕມ຺ຠນ຺ຕາ ສນ຺ຘາເຣນ຺ຕາ ຈາເລນ຺ຕາ ອງ຺ຄມງ຺ຄານຸສາຣິສງ຺ຂາຕາ ຈິຕ຺ຕຊວາຕກລາປາ ຕໍຕໍອງ຺ຄໍ ປູເຣຕ຺ວາ ອຸປ຺ປຊ຺ຊນ຺ຕິ. ອຸປ຺ປຊ຺ຊນ຺ຕາຈ ຍຖາວາ ຕຖາວາ ອນຸປ຺ປຊ຺ຊິຕ຺ວາ ຍສ຺ສ ເຕຫິ ຈິຕ຺ຕຊວາຕກລາເປຕິ ສຫຊາຕສ຺ສ ໂຈປນກາຍສ຺ສ ອານຸຠາເວນ ສພ຺ເພ ເຕ ກລາປາ ຍຖາຘິປ຺ເປຕທິສາຠິມຸຂາເອວ ອຸປ຺ປຊ຺ຊນ຺ຕິ. ອຍໍ ໂຈປນກາຍສງ຺ຂາໂຕ ອາກາຣວິກາໂຣ ກາຍວິຎ຺ຎຕ຺ຕິ ນາມ. ນິຍາມກສທິສີ ຫິ ອຍໍ ກາຍວິຎ຺ຎຕ຺ຕິ. ເຕຈ ນາວາສທິ ສາຕິ. ຍຖາ ຫິ ນິຍາມໂກ ນາວາຍ ມູລຠາເຄ ຐຕ຺ວາ ເອກໍ ມຫາຜິຍໍ ທຬ຺ຫໍ ຄເຫຕ຺ວາ ນທິໂສເຕ ຈາເຣຕ຺ວາ ສກລໍ ມຫານາວໍ ອິຈ຺ຉິຕທິສາຠິມຸຂໍ ນິໂຍເຊຕິ. ນ ຍໍວາ ຕໍວາ ທິສໍ ຄນ຺ຕຸໍ ເທຕິ. ເອວໍ ສມ຺ປທມິທໍ ທຏ຺ຐພ຺ພໍ. ເອກຈິຕ຺ຕກ຺ຂຓິກາ ຫິ ວິຎ຺ຎຕ຺ຕິ ເຕສໍ ມູລຠາເຄເອວ ລພ຺ຠມານາ ເຕ ຍຖາຘິປ຺ເປຕທິສາຠິມຸເຂ ເອວໍ ກຕ຺ວາ ນິໂຍເຊຕີຕິ ສາ ນິຍາມກສທິສີ ໂຫຕີຕິ. ເອຕ຺ຖຈ ຍເທຕໍ ອຏ຺ຐກຖາຍໍ. ເອກຊວນວີຖິຍໍ ສຕ຺ຕສຸ ຊວເນສຸ ປຖມ ຊວນສມຸຏ຺ຐິຕາ ວາໂຍຘາຕຸ ອຕ຺ຕນາ ສຫຊາຕຣູປກາຍໍ ສໍຖມ຺ເຠຕຸໍ ສນ຺ຘາເຣຕຸໍ ສກ຺ໂກຕິ. ອປຣາປຣໍ ປນ ຈາເລຕຸໍ ນສກ຺ໂກຕິ. ທຸຕີຍາທີສຸປິ ເອເສວ ນໂຍ. ສຕ຺ຕມຈິຕ຺ເຕນ ປນ ສມຸຏ຺ຐິຕາ ວາໂຍຘາຕຸ ເຫຏ຺ຐາ ຉຫິຈິຕ຺ເຕຫິ ສມຸຏ຺ຐິຕໍ ວາໂຍຘາຕຸໍ ອຸປຕ຺ຖມ຺ຠນປຈ຺ຈຍໍ ລຠິຕ຺ວາອຕ຺ຕນາສຫຊາຕໍ ຣູປກາຍໍ ສໍຖມ຺ເຠຕຸໍ ສນ຺ຘາເຣຕຸໍ ຈາເລຕຸໍ ອຠິກ຺ກມາເປຕຸໍ ສກ຺ໂກຕີຕິ ວຸຕ຺ຕໍ. ຕໍ ອຠິກ຺ກມາມີຕິ ກາຍໍ ປຄ຺ຄຓ຺ຫນ຺ຕານໍ ອເນກສຫສ຺ເສສຸ ຊວນ ວາເຣສຸ ປວຕ຺ຕມາເນສຸ ຍສ຺ມິໍວາເຣ ຈລນສງ຺ຂາຕໍ ເທສນ຺ຕຣປາປນໍ ຊາຍຕິ, ຕໍ ສນ຺ຘາຍ ວຸຕ຺ຕໍ. ນ ຫິ ກຕິປຍຊວນວາເຣຫິ ຈລນໍ ຊາຍຕິ. ຍທິ ຊາເຍຍ຺ຍ, ອິທ຺ຘິມນ຺ຕານໍ ອິທ຺ຘິຍາຄມນໍ ວິຍ ສພ຺ເພສໍປິ ສີຆຕຣໍ ຄມນໍ ປຎ຺ຎາເຍຍ຺ຍ. ກສ຺ມາ, ເອກຈ຺ຉຣກ຺ຂເຓປິ ອເນກໂກຏິສຕສຫສ຺ສຈິກ຺ກປວຕ຺ຕິຍາ ສມ຺ຠວໂຕ. ອຍຎ຺ຈ ອຕ຺ໂຖ ອຸປຣິ ອກ຺ຂຣຸປ຺ປຕ຺ຕິວິຈາຣຓາຍໍ ປາກໂຏ ຠວິສ຺ສຕີຕິ. ຕສ຺ມາ ຕໂຕ ປຸຣິມວາເຣສຸ ສໍຖມ຺ຠນສນ຺ຘາຣຓານິເອວ ສມ຺ປຊ຺ຊນ຺ຕີຕິ ເວທິຕພ຺ພໍ. ຍາ ເຈຕ຺ຖ ສຕ຺ຕຍຸຄສກໂຏປມາ ວຸຕ຺ຕາ, ສາປິ ນານາຊວນວີຖີສຸ ສມຸຏ຺ຐິຕານໍ ວາໂຍຘາຕູນໍ ອປຣາປຣໍ ອຸປຕ຺ຖມ຺ຠເນຈ ຍຸຊ຺ຊຕິເຍວ. ຕຖາ ຫິ ຈລນຈິຕ຺ຕຊຣູປສນ຺ຕຕິຍໍ ປວຕ຺ຕານິ ອຸຕຸຊຣູປສງ຺ຆາຏານິປິ ວິຎ຺ຎຕ຺ຕິສຫິຕານິ ວິຍ ຕທາກາຣວນ຺ຕານິ ສເວຄານິ ສວິປ຺ຜາຣານິເອວ ປວຕ຺ຕນ຺ຕິ. ຕສ຺ມາ ປຸພ຺ພາປຣປວຕ຺ຕານໍ ນານາ ຊວນວີຖີນໍ ອນ຺ຕຣນ຺ຕຣາ ຠວງ຺ຄສມເຍສຸປິ ອຠິກ຺ກມນາທິກໍ ຈລນໍ ສມ຺ປຊ຺ຊຕິເຍວ. ເອກາພທ຺ຘປວຕ຺ຕານິຈ ຈຕຸສມຸຏ຺ຐານິກຣູປານິນາມ ເອກສ຺ສ ວິສເຍ ອິຕຣານິ ເອກສມຸຏ຺ຐານານິ ວິຍ ສພ຺ພໂສ ຕທນຸ ປຣິວຕ຺ຕີນິ ໂຫນ຺ຕີຕິ ຈິຕ຺ຕເຊ ຈລນ຺ເຕ ອິຕຣານິປິ ຈລນ຺ຕິ ເຍວາຕິ ທຏ຺ຐພ຺ພໍ. ຈລນຎ຺ເຈຕ຺ຖ ປຈ຺ຉິມປຈ຺ຉິມານໍ ຣູປກລາປສງ຺ຆາຏານໍ ປຸຣິມ ປຸຣິມານໍ ອຸປ຺ປນ຺ນເທສໂຕ ເທສນ຺ຕເຣ ຍຖາປວຕ຺ຕສນ຺ນິເວສາກາເຣນ ອປຣາປຣໍ ອຸປ຺ປຊ຺ຊມານໍ ເວທິຕພ຺ພໍ. ນ ຫິ ຣູປາຣູປຘມ຺ມານໍ ອຸປ຺ປນ຺ນ ເທເສ ອນິຣຸຊ຺ຌິຕ຺ວາ ເກສຄ຺ຄມຕ຺ຕໍປິ ເທສນ຺ຕຣ ສງ຺ກມນໍນາມ ອຕ຺ຖິ. ອິຕຣຖາ ຂຓິກຘມ຺ມຕາ ອພ຺ຍາປາຣຘມ຺ມຕາ ອວສວຕ຺ຕິຕາຈ ເຕສໍ ນສິຍາຕິ. ຍໍກິຎ຺ຈິ ວຈີເຠທໍ ກໂຣນ຺ຕສ຺ສ ກຓ຺ຐຏ຺ຐານາທິ ຄຕອຸປາທິນ຺ນກ ປຖວີຘາຕູສຸ ຈລມານກຓ຺ຐປເທສາທິຄຕຈິຕ຺ຕຊ ປຖວີຘາຕູນໍ ສງ຺ຆຏ຺ຏນສງ຺ຂາເຕນ ຐານກຣຓສນ຺ນິປາເຕນ ສເຫວໂຍ ວຈີໂຆສສງ຺ຂາໂຕ ຈິຕ຺ຕຊສທ຺ໂທ ຊາຍຕິ. ໂສ ເຍນ ອຕ຺ຕນາ ສຫ ຊາເຕນ ອາກາຣວິກາເຣນ ຍຖາຘິປ຺ປາຍໍ ຕໍຕໍ ວຓ຺ຓວິເສສຕ຺ຕໍ ອຸປຄຈ຺ຉຕິ. ເຍນຈ ສຸຓນ຺ຕານໍ ຕໍຕໍອຕ຺ຖໂຊຕໂກ ອກ຺ຂຣສນ຺ນິປາຕຠູໂຕ ປທພ຺ຍຎ຺ຊນວິເສໂສ ອຸປລພ຺ຠຕິ. ໂສ ໂຈປນວາຈາສງ຺ຂາໂຕ ອາກາຣວິກາໂຣ ວຈີວິຎ຺ຎຕ຺ຕິນາມ. ອຏ຺ຐກຖາຍໍ ປນ ຕສ຺ສາ ປນ ຈິຕ຺ຕສມຸຏ຺ຐານາຍ ປຖວີຘາຕຸຍາ ອຸປາທິນ຺ນຆຏ຺ຏນສ຺ສ ປຈ຺ຈຍຠູໂຕ ເອໂກ ອາກາຣວິກາໂຣ ວຈີ ວິຎ຺ຎຕ຺ຕິນາມາຕິ ວຸຕ຺ຕໍ. ຕຕ຺ຖ ອຸປາທິນ຺ນຆຏ຺ຏນສ຺ສ ປຈ຺ຈຍຠູໂຕຕິ ກມ຺ມຊຠູຕາຍ ຈຕຸຊຠູຕາຍເອວວາ ອຸປາທິນ຺ນປຖວີຘາຕຸຍາ ສຫຆຏ຺ຏນໍ ປຏິຈ຺ຈ ສທ຺ທວິເສສປວຕ຺ຕິຍາ ປຈ຺ຈຍຠູໂຕຕິ ອຕ຺ໂຖ. ຆຏ຺ຏນສ຺ສ ປຈ຺ຈໂຍ ປນ ຈລມານກຓ຺ຐປເທສາທິວິກາຣຠູໂຕ ກາຍງ຺ຄວິເສໂສເອວ ສິຍາ. ວິກາຣທ຺ວຍຎ຺ຈ ອສໍມິສ຺ສໍ ກຕ຺ວາ ເວທິຕພ຺ພນ຺ຕິ. ເອຕ຺ຖຈ ອຸປາທິນ຺ນກປຖວີຫິ ສຫ ຆຏ຺ຏນໍ ຈິຕ຺ຕຊປຖວີນໍ ກິຈ຺ຈໍ. ຍໍ ປນ ຕາສໍ ຍຖາວາ ຕຖາວາ ອຆຏ຺ເຏຕ຺ວາ ຍຖາ ອິຈ຺ຉິຕກ຺ຂຣໍ ສມ຺ປຊ຺ຊຕິ. ຕຖາ ຆຏ຺ຏນປກາຣວິຘານໍ. ອິທໍ ກາຍວິຎ຺ຎຕ຺ຕິຍາ ກິຈ຺ຈໍ. ຆຏ຺ຏເນນ ສເຫວ ອຸປ຺ປນ຺ນສທ຺ທານໍ ຕໍຕໍວຓ຺ຓຕ຺ຕ ປຕ຺ຕິຍາ ວິທຫນເມວ ວຈີວິຎ຺ຎຕ຺ຕິຍາ ກິຈ຺ຈໍ. ກຸມ຺ຠຖຸນຕລໍ ວິຍຈ ອຸປາທິນ຺ນກປຖວີ. ປຫຣຓຫຕ຺ໂຖ ວິຍ ຈິຕ຺ຕຊປຖວີ. ຫຕ຺ຖປຣິ ວຕ຺ຕນ ວິກາໂຣ ວິຍ ກາຍວິຎ຺ຎຕ຺ຕິ. ສທ຺ທວິກາໂຣ ວິຍ ວຈີວິຎ຺ຎຕ຺ຕິ. ກຸມ຺ຠຖຸນສ຺ສ ນານາສທ຺ທປເຠໂທວິຍ ນານາວຓ຺ຓເຠໂທຕິ. ເອຕ຺ຖຈ ຍເທຕໍ ອຏ຺ຐກຖາຍໍ ອິທໍ ວກ຺ຂາມິ ເອຕໍ ວກ຺ຂາມີຕິ ອຸປ຺ປຊ຺ຊມານໍ ຈິຕ຺ຕໍ ອຏ຺ຐຣູປານິ ສມຸຏ຺ຐາເປຕິ. ເຕສໍ ອພ຺ຠນ຺ຕເຣ ຈິຕ຺ຕ ສມຸຏ຺ຐານາ ປຖວີຘາຕຸ ອຸປາທິນ຺ນກໍ ຆຏ຺ຏຍມານາວ ອຸປ຺ປຊ຺ຊຕິ. ເຕນ ຘາຕຸຆຏ຺ຏເນນ ສເຫວ ສທ຺ໂທ ອຸປ຺ປຊ຺ຊຕີຕິຈ ປຸຣິມຈິຕ຺ຕສມຸຏ຺ຐາ ນາຍ ອຸປຕ຺ຖມ຺ຠນກິຈ຺ຈໍປິ ນຕ຺ຖີຕິຈ ວຸຕ຺ຕໍ. ຕໍປິ ອເນກສເຕສຸ ຊວນວາເຣສຸ ປວຕ຺ຕມາເນສຸ ຍສ຺ມິໍວາເຣ ປຣິພ຺ຍຕ຺ຕໍ ອກ຺ຂຣໍ ປວຕ຺ຕຕິ, ຕໍ ສນ຺ຘາຍ ວຸຕ຺ຕນ຺ຕິ ຄເຫຕພ຺ພໍ. ເຕເນວ ຫິ ມູລ ຏີກາຍໍ ອຸປຕ຺ຖມ຺ຠນກິຈ຺ຈໍ ນຕ຺ຖິ ລທ຺ຘາເສວເນນ ຈິຕ຺ເຕເນວ ຆຏ຺ຏນສ຺ສ ພລວຠາວໂຕຕິ ວຸຕ຺ຕໍ. ເອຕ຺ຖຈ ລທ຺ຘາເສວເນນາຕິ ເອເຕນ ປຸພ຺ພຠາເຄ ນານາຊວນວີຖີຫິ ລທ຺ຘາເສວນຠາວໍ ທສ຺ເສຕິ. ປຖມ ຊວນຈິຕ຺ຕສ຺ສປິ ລທ຺ຘາເສວນຕາຍ ອຘິປ຺ເປຕຕ຺ຕາ. ນຈ ເອກຊວນ ວາຣມຕ຺ເຕນ ປຣິພ຺ຍຕ຺ຕໍ ເອກກ຺ຂຣໍ ສມ຺ປຊ຺ຊຕີຕິ ສກ຺ກາ ວິຎ຺ຎາຕຸໍ. ກສ຺ມາ, ຕສ຺ສ ເອກທ຺ວິອຈ຺ຉຣກ຺ຂຓມຕ຺ເຕນ ກາເລນ ວຕ຺ຕພ຺ພຕ຺ຕາ ເອກຈ຺ຉຣກ຺ຂເຓຈ ອເນກສຕສຫສ຺ສານໍ ຊວນວີຖີນໍ ປວຕ຺ຕິສມ຺ຠວໂຕ. ວຸຕ຺ຕຎ຺ຈ –

ເອກມຕ຺ຕາ ຕໂຍ ຣສ຺ສາ, ທ຺ວິມຕ຺ຕາ ທີຆມຸຈ຺ຈເຣ;

ຕິມຕ຺ໂຕ ຕຸ ຄີໂຕ ເຎຍ຺ໂຍ, ພ຺ຍຎ຺ຊນາ ອຑ຺ຒມຕ຺ຕິກາຕິ.

ມິລິນ຺ທປຎ຺ເຫຈ ສາຘິເກ ວີຫິວາຫສເຕ ວີຫິພີຊານິ ເອກຈ຺ຉຣກ຺ຂເຓ ອຸປ຺ປນ຺ນສ຺ສ ຈິຕ຺ຕສ຺ສ ກລໍປິ ນອຸເປນ຺ຕິ. ກລຠາຄໍປິ ນອຸເປນ຺ຕີຕິ ທີປິຕໍ. ເອກກ຺ຂຣໍ ອຸຈ຺ຈາເຣນ຺ຕສ຺ສຈ ຕຕ຺ຕກໍປິ ກາລໍ ອຸຈ຺ຈາຣຓຈິຕ຺ຕພ຺ຍາປາໂຣ ສນ຺ທິສ຺ສຕິເຍວ. ນຈ ປຣມຕ຺ຖໂຕ ເອກເມວ ສທ຺ທໍ ອຸຈ຺ຈາເຣມີຕິວາ ສຸໂຓມີຕິວາ ສກ຺ກາ ນິຍເມຕ຺ວາ ອຸຈ຺ຈາເຣຕຸໍ ໂສຕຸຎ຺ຈ. ຕຖາ ນິຍເມນ຺ຕສ຺ສປິ ສທ຺ທານໍ ປຸພ຺ພາປຣໂຕ ອເນກສຕສຫສ຺ສສ຺ເສວ ອຸຈ຺ຈາຣຓ ສວນ ສມ຺ຠວໂຕ. ເອກເມວາຕິ ອຠິມາໂນ ປນ ສມູຫຆນ ສນ຺ຕຕິຆເນຫິ ປຏິຈ຺ຉນ຺ນຕ຺ຕາເອວ ໂຫຕີຕິ ທຏ຺ຐພ຺ພໍ. ເສສເມຕ຺ຖ ກາຍວິຎ຺ຎຕ຺ຕິຍໍ ວຸຕ຺ຕນ ເຍນ ຍຖາສມ຺ຠວໍ ເວທິຕພ຺ພນ຺ຕິ. ເອຕ຺ຖຈ ວິຎ຺ຎຕ຺ຕິສທ຺ໂທ ກາເຍນ ວິຎ຺ຎາເປຕິ ວາຈາຍ ວິຎ຺ຎາເປຕີຕິອາທິສຸ ໂພຘນຕ຺ໂຖ. ສຸທິນ຺ນ ກຓ຺ເຑ ຕິກ຺ຂຕ຺ຕຸໍ ວິຎ຺ຎາເປຕີຕິອາທີສຸ ປວຕ຺ຕນຕ຺ໂຖ. ອິຘ ປນ ທຸວິໂຘປິ ຍຸຊ຺ຊຕິ. ເອວຎ຺ຫິ ສຕິ ປຣໍ ໂພເຘຕຸກາມຕາຣຫິ ເຕສຸ ສພ຺ເພສຸ ກາຍງ຺ຄວາຈງ຺ຄໂຈປເນສຸປິ ປວຕ຺ຕກວິຎ຺ຎຕ຺ຕິຍາ ລພ຺ຠມານຕາ ເວທິຕພ຺ພາ ໂຫຕີຕິ. ມູລຏີກາຍໍ ປນ ປຣໍ ໂພເຘຕຸກາມຕາຍ ວິນາປິ ອຠິກ຺ກມນາທິປວຕ຺ຕເນນ ໂສ ຈິຕ຺ຕ ສຫຠູວິກາໂຣ ອຘິປ຺ປາຍໍ ວິຎ຺ຎາເປຕິ. ສຍຎ຺ຈ ວິຎ຺ຎາຍຕີຕິ ທ຺ວິຘາປິ ວິຎ຺ຎຕ຺ຕິເຍວາຕິ ວຸຕ຺ຕໍ, ຕຕ຺ຖ ທ຺ວີສຸ ໂພຘນວິຎ຺ຎຕ຺ຕີສຸ ປຸຣິມາ ກາຍວິຎ຺ຎຕ຺ຕິ ອງ຺ຄປຈ຺ຈງ຺ຄສ຺ສ ຈລມານວຓ຺ຓໍ ຈກ຺ຂຸວິຎ຺ຎາຓວີຖິຍາ ຈລມານງ຺ຄປຈ຺ຈງ຺ຄໍ ກາຍວິຎ຺ຎາຓວີຖິຍາ ຄເຫຕ຺ວາ ປຈ຺ຉາ ສຸທ຺ເຘນ ມໂນທ຺ວາຣິກຊວເນນເອວ ວິຎ຺ຎາຍຕິ ປຈ຺ຉິມາຈ ວຈີວິຎ຺ຎຕ຺ຕິ ອຸຈ຺ຈາຣິຍມານໍ ສທ຺ທໍ ໂສຕວິຎ຺ຎາຓວີຖິຍາ ຄເຫຕ຺ວາ ປຈ຺ຉາ ສຸທ຺ເຘນ ມໂນທ຺ວາຣິກຊວເນນເອວ ວິຎ຺ຎາຍຕິ, ນ ປຎ຺ຈທ຺ວາຣິກຊວເນນ. ສາ ຫິ ອຕ຺ຕານໍ ຊານນ຺ເຕເອວ ປຣສຕ຺ເຕ ອຕ຺ຕນາ ສມງ຺ຄິໂນ ປຸຄ຺ຄລສ຺ສ ຈິຕ຺ຕໍ ວິຎ຺ຎາເປຕິ, ນ ອຊານນ຺ເຕ. ຎາປກ ເຫຕຸ ຫິ ນາມ ອຕ຺ຕານໍ ຊານນ຺ເຕເອວ ຎາເປຕພ຺ພໍ ຎາເປຕິ, ໂນ ອຊານນ຺ເຕ. ເອວຎ຺ຈ ກຕ຺ວາ ກາຍງ຺ຄ ໂຈປນໍ ທິສ຺ວາວາ ປຣາມສິຕ຺ວາວາ ສທ຺ທໍ ສຸຕ຺ວາວາ ປຣສ຺ສ ຕໍຕໍອຘິປ຺ປາຍໍ ຊານນ຺ຕານໍ ຕິຣຈ຺ຉານ ຄຕານໍປິ ປຖຘໍ ວິຎ຺ຎຕ຺ຕິຊານນໍ ສິທ຺ຘໍ ຠວຕິ. ຕໍຊານເນນ ວິນາ ອຘິປ຺ປາຍຊານນສ຺ສ ອສມ຺ຠວໂຕ. ວິຎ຺ຎຕ຺ຕິໍ ຊານນ຺ຕານໍຈ ປຸຣິມສິທ຺ຘສງ຺ເກຕ ສມ຺ພນ຺ຘ ຊານເນນ ວິນາ ອຘິປ຺ປາຍຊານນໍ ນ ສມ຺ຠວຕີຕິ ມຊ຺ເຌ ວິສຸໍ ປຸພ຺ພສງ຺ເກຕ ສມ຺ພນ຺ຘຄຫນໍປິ ອິຈ຺ຉນ຺ຕິ, ທ຺ວີສຸ ປນ ປວຕ຺ຕກວິຎ຺ຎຕ຺ຕີສຸ ປຣໍ ອຠິກ຺ກມນ຺ຕໍ ຈກ຺ຂຸວິຎ຺ຎາຓວີຖິຍາ ທິສ຺ວາ ອຠິກ຺ກມນວິຎ຺ຎຕ຺ຕິຎ຺ຈ ອຠິກ຺ກມນຈິຕ຺ຕຎ຺ຈ ມໂນວິຎ຺ຎາຓວີຖິຍາ ຊານນ຺ຕິ. ເອສນໂຍ ປຏິກ຺ກມນາທີສຸ. ຕຖາ ປຣສ຺ສ ກຖໍ ໂສຕວິຎ຺ຎາຓວີຖິຍາ ສຸຕ຺ວາ ກຖນວິຎ຺ຎຕ຺ຕິຎ຺ຈ ກຖນຈິຕ຺ຕຎ຺ຈ ມໂນວິຎ຺ຎາຓວີຖິຍາ ຊານນ຺ຕິ. ປຣໍ ຣຕ຺ຕຈິຕ຺ເຕນ ກາຍງ຺ຄໍ ຈາເລນ຺ຕໍ ທິສ຺ວາ ຈລນວິຎ຺ຎຕ຺ຕິຎ຺ຈ ຣາຄຈິຕ຺ຕຎ຺ຈ ຊານນ຺ຕິ. ຣຕ຺ຕສ຺ສ ກຖໍ ສຸຕ຺ວາ ກຖນ ວິຎ຺ຎຕ຺ຕິຎ຺ຈ ຣາຄຈິຕ຺ຕຎ຺ຈ ຊານນ຺ຕິ. ເອສນໂຍ ສພ຺ພາສຸ ກາຍິກວາຈສິກກ຺ຣິຍາສູຕິ. ລຫຸໂນ ຠາໂວ ລຫຸຕາ. ມຸທຸໂນ ຠາໂວ ມຸທຸຕາ. ກມ຺ມນິ ສາຘຸ ກມ຺ມຎ຺ຎໍ. ກມ຺ມໂຍຄ຺ຍນ຺ຕິ ອຕ຺ໂຖ. ກມ຺ມຎ຺ຎສ຺ສ ຠາໂວ ກມ຺ມຎ຺ຎຕາ.

ອທນ຺ຘຕາລກ຺ຂຓາ ຣູປສ຺ສ ລຫຸຕາ. ອຖທ຺ຘຕາ ລກ຺ຂຓາ ຣູປສ຺ສ ມຸທຸຕາ. ສຣີຣກ຺ຣິຍານຸກູລກມ຺ມຎ຺ຎຠາວລກ຺ຂຓາ ຣູປສ຺ສ ກມ຺ມຎ຺ຎຕາ. ອຎ຺ຎມຎ຺ຎໍ ອວິຊຫນ຺ຕິໂຍປິ ເອຕາ ວິຣຸທ຺ຘປຈ຺ຈຍສປ຺ປາຍ ປຈ຺ຈຍານໍ ວເສນ ອສໍມິສ຺ສໂຕ ເວທິຕພ຺ພາ. ຕຖາ ຫິ ອຕ຺ຕໂນ ກາຍວິຣຸທ຺ຘໍ ອຸຕຸໍວາ ອາຫາຣໍວາ ຈິຕ຺ຕກ຺ຣິຍໍວາ ເສວນ຺ຕານໍ ສຣີຣຄຕາ ຘາຕຸໂຍ ກທາຈິ ສກລສຣີຣໍວາ ສຣີເຣກເທສໍວາ ໂຂເຠຕ຺ວາ ວິເສສໂຕ ປູຕິມຸຂ ສປ຺ປສງ຺ຂາຕອາໂປ ປຣິຍຸຏ຺ຐານໍ ກຕ຺ວາ ກາຍໍ ອສຍ຺ຫຠາຣໍ ວິຍ ຄຣຸໍ ຠາຣິຍໍ ກໂຣນ຺ຕິ. ອິຣິຍາ ປຖປຣິວຕ຺ຕເນ ກາຍຠາຣິຍນິມິຕ຺ຕໍ ທຸກ຺ຂໍ ອຸປ຺ປາເທນ຺ຕິ. ຕທາຣູປສ຺ສ ລຫຸຕາ ນປວຕ຺ຕຕິ. ປຸນ ອຕ຺ຕໂນ ສຣີຣສປ຺ປາຍໍ ອຸຕຸໍວາ ອາຫາຣໍວາ ຈິຕ຺ຕກິຣິຍໍວາ ເສວນ຺ຕານໍ ໂສ ຘາຕຸກ຺ໂຂໂຠ ວູປສມ຺ມຕິ. ກາໂຍ ສລ຺ລຫຸໂກ ໂຫຕິ. ອິຣິຍາປຖປຣິວຕ຺ຕເນ ກາຍ ຠາຣິຍນິມິຕ຺ຕໍ ທຸກ຺ຂໍນາມ ນຕ຺ຖິ. ຕທາ ສາ ປວຕ຺ຕຕິ. ເອສນໂຍ ເສສາສຸປິ. ວິເສສນໂຕ ປເນຕ຺ຖ ມຸທຸຠາຍໍ ກຏ຺ຐມຸຂສປ຺ປສງ຺ຂາຕ ປຖວີປຣິຍຸຏ຺ຐານໍ ກຕ຺ວາ ສຸກ຺ຂກຏ຺ຐໍວິຍ ກາຍໍ ຖທ຺ຘໍ ກກ຺ຂຬໍກໂຣນ຺ຕິ. ອິຣິຍາປຖປຣິວຕ຺ຕເນ ອງ຺ຄມງ຺ຄານໍຉິຊ຺ຊນຠິຊ຺ຊນາກາຣປຕ຺ຕໍ ຖທ຺ຘໍ ກກ຺ຂຬນິມິຕ຺ຕໍ ທຸກ຺ຂໍ ອຸປ຺ປາເທນ຺ຕີຕິ ວຕ຺ຕພ຺ພໍ. ກມ຺ມຎ຺ຎຕາຍໍ ສຕ຺ຖມຸຂສປ຺ປສງ຺ຂາຕ ວາໂຍ ປຣິຍຸຏ຺ຐານໍ ວາໂຍວິສມໍ ກຕ຺ວາ ທາມຣິກໂຈຣປຣິຍຸຏ຺ຐິຕໍ ປຈ຺ຈນ຺ຕຣຏ຺ຐໍ ວິຍ ກາຍໍ ວິວຏ຺ຏມານໍ ກໂຣນ຺ຕິ, ສພ຺ພອິຣິຍາປເຖສຸ ສຸຂໍນາມ ນຕ຺ຖີຕິ ວຕ຺ຕພ຺ພໍ. ເຕໂຊຘາຕຸ ປນ ຕາສໍ ສພ຺ພາສໍປິ ມູລຠູຕາ ໂຫຕີຕິ ເວທິຕພ຺ພາ.

ອິມາ ປນ ອໂຣຄິໂນ ກລ຺ລຠາໂວວິຍ ສຸປຣິມທ຺ທິຕຈມ຺ມສ຺ສ ມຸທຸຠາໂວວິຍ ສຸທນ຺ຘສຸວຓ຺ຓສ຺ສ ກມ຺ມກ຺ຂມຠາໂວວິຍ ຣູປກາຍສ຺ສ ອິຣິຍາປຖປຣິວຕ຺ຕເນ ສລ຺ລຫຸກຕາທິວເສນ ສນ຺ທິສ຺ສມານາ ວິເສສາກາຣາ ໂຫນ຺ຕີຕິ ກຕ຺ວາ ວິກາຣຣູປໍ ນາມ. ຈຍນໍ ຈໂຍ. ປິຓ຺ຑວເສນ ອຠິນິພ຺ພຕ຺ຕີຕິ ອຕ຺ໂຖ. ອາທິໂຕ ອຸປຣິໂຕຈ ຈໂຍ ອຸປຈໂຍ. ປຖມາຠິນິພ຺ພຕ຺ຕິ ອຸປຣຸປຣິວຑ຺ຒິຈາຕິ ອຕ຺ໂຖ. ອຍຎ຺ຫິ ອຸປສທ຺ໂທ ອຸປຎ຺ຎຕ຺ຕນ຺ຕິອາທີສຸ ວິຍ ປຖມຕ຺ໂຖ ອຸປສິຕ຺ຕນ຺ຕິອາທີສຸ ວິຍຈ ອຸປຣິ ອຕ຺ໂຖຕິ. ວຸຕ຺ຕຎ຺ຈ ມູລຏີກາຍໍ ອຸປສທ຺ໂທ ປຖມຕ຺ໂຖ ອຸປຣິອຕ຺ໂຖຈ ໂຫຕີຕິ. ເຕເນວຫິ ປາຬິຍໍ ໂຍ ອາຍຕນານໍ ອາຈໂຍ, ໂສ ຣູປສ຺ສ ອຸປຈໂຍ. ໂຍຣູປສ຺ສ ອຸປຈໂຍ, ສາ ຣູປສ຺ສ ສນ຺ຕຕີຕິ ວຸຕ຺ຕໍ. ຕນນໍ ວິຕ຺ຖາຣຓໍ ຕຕິ. ສມ຺ພນ຺ຘາ ຕຕິ ປຸນປ຺ປຸນໍວາ ຕຕິ ສນ຺ຕຕິ. ຍຖາ ປວຕ຺ຕານໍ ອາຍຕນານໍ ອທ຺ຘານປູຣຓວເສນ ປວຕ຺ຕີຕິ ອຕ຺ໂຖ. ຕຕ຺ຖ ຄພ຺ຠເສຍ຺ຍການໍ ສຕ຺ຕານໍ ປຏິສນ຺ຘິກ຺ຂເຓ ຣູປານໍ ອຸປ຺ປາໂທ ປຖມານິພ຺ພຕ຺ຕິອຕ຺ເຖນ ອຸປຈໂຍນາມ. ຕໂຕ ປຣໍ ຍາວ ສພ຺ພປຖມໍ ອຸປ຺ປນ຺ນານໍ ຈກ຺ຂຸ ໂສຕ ຆານຊິວ຺ຫານໍ ອຸປ຺ປາໂທ, ເອຕ຺ຖນ຺ຕເຣ ຣູປານໍ ອຸປ຺ປາໂທ ອຸປຣິ ວຑ຺ຒິອຕ຺ເຖນ ອຸປຈໂຍນາມ. ຕໂຕ ປຣໍ ຍາວຊີວໍ ຈຕຸສນ຺ຕຕິຣູປານໍ ອຸປ຺ປາໂທ ສນ຺ຕຕິນາມ. ວຸຕ຺ຕຎ຺ເຫຕໍ ອຏ຺ຐກຖາຍໍ ນທີຕີເຣ ນິຂາຕກູປສ຺ມິໍ ອຸທກຸຄ຺ຄມນກາໂລວິຍ ອາຈໂຍ ນິພ຺ພຕ຺ຕິ. ປຣິປຸຓ຺ຓກາໂລວິຍ ອຸປຈໂຍ ວຑ຺ຒິ. ອຊ຺ໂຌຕ຺ຖຣິຕ຺ວາ ຄມນກາໂລ ວິຍ ສນ຺ຕຕິ ປວຕ຺ຕີຕິ.

ວິຠາວນິຍໍ ປນ

ປຏິສນ຺ຘິໂຕ ປຏ຺ຐາຍ ຍາວຈກ຺ຂາທິ ທສການໍ ອຸປ຺ປຕ຺ຕິ. ເອຕ຺ຖນ຺ຕເຣ ຣູປຸປ຺ປາໂທ ອຸປຈໂຍນາມ. ຕໂຕ ປຣໍ ສນ຺ຕຕິ ນາມາຕິ ວຸຕ຺ຕໍ. ຕໍປິ ເຕນ ປຣິຍາເຍນ ຍຸຊ຺ຊຕິເຍວ.

ສໍເສທໂຊປວາຕິການໍ ປນ ປຏິສນ຺ຘິກ຺ຂເຓ ຣູປານໍ ອຸປ຺ປາໂທ ປຖມາ ຠິນິພ຺ພຕ຺ຕິ ອຕ຺ເຖນ ປຣິປຸຓ຺ຓ ວຑ຺ຒິ ອຕ຺ເຖນຈ ອຸປຈໂຍ ນາມ, ຕໂຕ ປຣໍ ຣູປານໍ ອຸປ຺ປາໂທ ສນ຺ຕຕິນາມ. ອປິຈ, ຕິສມຸຏ຺ຐານິກ ຣູປານໍປິ ວິສຸໍ ວິສຸໍ ສນ຺ຕຕິປຈ຺ຈຸປ຺ປນ຺ນໍນາມ ອຕ຺ຖິ. ຕສ຺ສຈ ເອເກກສ຺ສ ນິພ຺ພຕ຺ຕິ ວຑ຺ຒິ ປວຕ຺ຕິ ວເສນ ຕິສ຺ໂສ ຕິສ຺ໂສອວຕ຺ຖາ ໂຫນ຺ຕິ. ຕຕ຺ຖ ເອເກກສນ຺ຕຕິຍໍ ອາທິມ຺ຫິ ສນ຺ຕຕິສີສຣູປານໍ ສພ຺ພປຖມໍ ອຸປ຺ປາໂທ ນິພ຺ພຕ຺ຕິນາມ. ຕໂຕ ວຑ຺ຒນຣູປານໍ ອຸປ຺ປາໂທ ວຑ຺ຒີນາມ. ວຑ຺ຒເນ ສມຕ຺ເຕ ອວຑ຺ຒິຕ຺ວາ ປພນ຺ຘຏ຺ຐິຕິວເສນ ວຕ຺ຕນວເສນອຸປ຺ປາໂທປວຕ຺ຕິນາມ. ຕຕ຺ຖ ຈ ນິພ຺ພຕ຺ຕິວຑ຺ຒິໂຍ ອຸປຈໂຍນາມ. ປວຕ຺ຕິສນ຺ຕຕິ ນາມ. ສງ຺ເຂປໂຕ ປນ ໂລເກ ສພ຺ພາສຸ ອິນ຺ທ຺ຣິຍານິນ຺ທ຺ຣິຍພທ຺ຘຣູປປວຕ຺ຕີສຸ ສນ຺ທິສ຺ສມາເນ ຊາຍນ ວຑ຺ຒນ ປວຕ຺ຕນສງ຺ຂາເຕ ອວຕ຺ຖາເຠເທ ທິສ຺ວາ ອຸປຈຍສນ຺ຕ ຕິໂຍ ເວທິຕພ຺ພາ. ຕຕ຺ຣາຍໍ ນໂຍ-ຣຸກ຺ຂຕິຓາທີນິວາ ສາຂາ ປຕ຺ຕປຸປ຺ຜຜລາທີນິວາ ອາທິມ຺ຫິ ຊາຍນ຺ຕິ. ຊາຍິຕ຺ວາ ວຑ຺ຒນ຺ຕິ. ວຑ຺ຒເນ ສມຕ຺ເຕ ອວຑ຺ຒິຕ຺ວາ ປພນ຺ຘວເສນ ປວຕ຺ຕິຕ຺ວາ ຠິຊ຺ຊນ຺ຕີຕິ. ຊີຣຓໍ ຊຣາ, ຊີຣນ຺ຕິ ຊິຓ຺ຓຠາວໍ ຄຈ຺ຉນ຺ຕິ ເອຕາຍາຕິ ຊຣາ. ສາເຍວ ຊຣຕາ. ອຸປ຺ປາທຊຣາຠງ຺ເຄຫິ ນິຈ຺ຈລຕິ ນກມ຺ປຕີຕິ ນິຈ຺ໂຈ ອສງ຺ຂຕ ຘມ຺ໂມ. ນ ນິຈ຺ໂຈ ອນິຈ຺ໂຈ, ສງ຺ຂຕຘມ຺ໂມ. ອນິຈ຺ຈສ຺ສ ຠາໂວ ອນິຈ຺ຈຕາ, ຠງ຺ໂຄ.

[໑໘໓] ວິຠາວນິຍໍ ປນ

‘‘ນິຈ຺ຈຘຸວຠາເວນ ນ ອິຈ຺ຈໍ ອນຸຄນ຺ຕພ຺ພນ຺ຕິ ອນິຈ຺ຈ’’ນ຺ຕິ ວຸຕ຺ຕໍ. ຕໍ ນ ສຸນ຺ທຣໍ.

ນິຈ຺ຈສທ຺ໂທ ຫິ ສາສເນ ໂລເກຈ ປາກໂຏ. ໂສ ເອວ ອິຘ ນກາຣຍຸຕ຺ໂຕ ອນິຈ຺ໂຈຕິ ວຸຕ຺ໂຕຕິ. ລກ຺ຂີຍນ຺ຕິ ສລ຺ລກ຺ຂີຍນ຺ຕິ ວິນິຈ຺ຉີຍນ຺ຕິ ຘມ຺ມາ ອິເມ ສງ຺ຂຕາຕິ ເອເຕນາຕິ ລກ຺ຂຓໍ. ສງ຺ຂຕ ຠາວຊານນນິມິຕນ຺ຕິ ອຕ຺ໂຖ. ຍຖາຫ- ອງ຺ຄຸຕ຺ຕເຣ ຕີຓິ ມານິ ຠິກ຺ຂເວ ສງ຺ຂຕສ຺ສ ສງ຺ຂຕລກ຺ຂຓານິ. ກຕມານິ ຕີຓິ, ອຸປ຺ປາໂທ ປຎ຺ຎາຍຕິ, ວໂຍ ປຎ຺ຎາຍຕິ, ຐິຕສ຺ສ ອຎ຺ຎຖຕ຺ຕໍ ປຎ຺ຎາຍຕີຕິ. ນນຸ ປາຬິຍໍ ຊາຕິນາມ ອາຄຕາ. ຕສ຺ມາ ສາປິ ອິຘ ວຕ຺ຕພ຺ພາຕິ ວຸຕ຺ຕໍ ຊາຕິຣູປເມວາຕິອາທິ. ເອຕ຺ຖາຕິ ຣູປສມຸທ຺ເທເສ. ຊນນໍ ປາຕຸຠວນໍ ຊາຕິ. ຊາຍນ຺ຕິວາ ເອຕາຍາຕິ ຊາຕິ, ອຸປຈຍ ສນ຺ຕຕິ ນາເມນປວຸຈ຺ຈຕິ ຕສ຺ສາຊາຕິຍາຕຖາ ອວຕ຺ຖາເຠທໂຍຄໂຕຕິ ອຘິປ຺ປາໂຍ. ສາ ຫິ ອາທິໂຕ ປຏິສນ຺ຘິຣູປານິ ປາຕຸຠວນ຺ຕານິ ກໂຣຕິ. ປຸນ ອປຣິປຸຓ຺ຓານິຈ ອາຍຕນານິ ປູເຣຕິ. ປູຣິຕານິ ຈ ທີຆໍປິ ອທ຺ຘານໍ ອພ຺ໂພຈ຺ຉິນ຺ນໍ ກຕ຺ວາ ປວຕ຺ເຕຕິ ປພນ຺ຘຍຕີຕິ. ເອກາ ທສວິຘໍປີຕິ ມຫາຠູຕາທິຠາເວນ ເອກຕ຺ຕໍ ອຸປນຍນວເສນ ເອກາ ທສປເຠທໍປິ. ກຖໍ ສຣູປວເສນ ອຏ຺ຐວີສຕິວິຘໍ ໂຫຕີຕິ ປຸຈ຺ຉິຕ຺ວາ ຠູຕປ຺ປສາທ ວິສຍາຕິອາທິນາ ເອກາທສວິຘສ຺ເສວ ສຣູປໂຕ ທສ຺ສນໍ ອນ຺ໂຕຄຘເຠທານໍ ປຸພ຺ເພ ວຸຕ຺ຕຠາເວນ ສຸປາກຏຕ຺ຕາຕິ ທຏ຺ຐພ຺ພໍ. ເຕນາຫ-ອຏ຺ຐາຣສວິຘນ຺ຕິ.

ຈຕ຺ຕາຣິ ຠູຕານິ ປຎ຺ຈປສາທາ ອຄຫິຕຄຫເຓນ ຈຕ຺ຕາໂຣ ວິສຍາ ໂຄຈຣາ. ທຸວິໂຘ ຠາໂວ. ເອກໍ ຫທຍໍ. ອິຕິ ອິທໍ ໂສຬສວິຘໍ ຣູປໍ ຊີວິຕາຫາຣຣູເປຫິ ສຫ ອຏ຺ຐາຣສວິຘໍ ໂຫຕິ ຕຖາ ເອໂກ ປຣິຈ຺ເຉໂທ. ທຸວິຘາ ວິຎ຺ຎຕ຺ຕິ. ອຄຫິຕຄຫເຓນ ຕິວິໂຘ ວິກາໂຣ. ຈຕຸພ຺ພິຘໍ ລກ຺ຂຓນ຺ຕິ ທສ ອນິປ຺ຜນ຺ນາຈາຕິ ຣູປໍ ສຣູປໂຕ ອຏ຺ຐວີສຕິວິຘໍ ຠເວຕິ ໂຍຊນາ. ເອຕ຺ຖຈ ປຈ຺ຉິມານິ ທສຣູປານິ ສຠາວໂຕ ອນຸປລພ຺ຠມານຕ຺ຕາ ປຈ຺ຈເຍຫິ ນິປ຺ຜາທິຕານິ ຣູປານິ ນ ໂຫນ຺ຕີຕິ ອນິປ຺ຜນ຺ນານິ ນາມ. ອປິ ເຈຕ຺ຖ ອຠິຘມ຺ເມ ວິສຸໍ ອຸທ຺ທິຏ຺ຐານິ ນິທ຺ທິຏ຺ຐານິຈ ເອຕານິ ສຠາວໂຕ ອນຸປລພ຺ຠມານານີຕິ ວາ ປຣມຕ຺ຖໂຕ ອວິຊ຺ຊມານານີຕິວາ ນສກ຺ກາ ວຕ຺ຕຸໍ. ໂວຫາຣສິທ຺ຘ ມຕ຺ຕຠາວໍ ອຕິກ຺ກມ຺ມ ຕາທິເສນ ສຸທ຺ຘຘມ຺ມຄຕິຍາ ສິທ຺ເຘນ ປຣມຕ຺ຖ ລກ຺ຂເຓນ ອຸປລທ຺ຘຕ຺ຕາ. ອິຕຣຖາ ນິພ຺ພຕ຺ຕິລກ຺ຂຓຣຫິຕໍ ອສງ຺ຂຕ ນິພ຺ພານໍປິ ສຠາວໂຕ ອນຸປລພ຺ຠມານໍ ປຣມຕ຺ຖໂຕ ອວິຊ຺ຊມານຎ຺ຈ ນາມ ສິຍາຕິ. ຕສ຺ມາ ນິພ຺ພຕ຺ຕິ ລກ຺ຂຓຣຫິຕຕ຺ຕາເອວ ເອຕານິ ອນິປ຺ຜນ຺ນານິນາມ. ນ ສຠາວໂຕ ອນຸປລພ຺ຠມານຕ຺ຕາຕິ ຍຸຕ຺ຕໍ ສິຍາຕິ. [ຣູປສມຸທ຺ເທໂສ]

໑໕໗. ຣູປວິຠາເຄສພ຺ພຎ຺ຈ ປນ ເອຕໍ ຍຖາສມຸທ຺ທິຏ຺ຐໍ ອຏ຺ຐວີສຕິ ວິຘໍ ຣູປໍ ອເຫຕຸກຏ຺ເຐນ ເອກວິຘເມວ. ນ ສເຫຕຸກາ ເຫຕຸກ ວເສນ ທຸວິຘໍ. ຕຖາສປ຺ປຈ຺ຈຍຏ຺ເຐນ ເອກວິຘເມວ. ນ ສປ຺ປຈ຺ຈຍາປຈ຺ຈຍ ວເສນ ທຸວິຘນ຺ຕິ ເອວໍ ປວຕ຺ຕໍ ເອກວິຘນຍໍ ຕາວ ທສ຺ເສຕຸໍ ສພ຺ພຎ຺ຈາຕິອາທິມາຣທ຺ຘໍ.

[໑໘໔] ວິຠາວນິຍໍ ປນ

ເອກວິຘນໂຍປິ ຣູປວິຠາໂຄເອວາຕິ ກຕ຺ວາ ‘‘ຍຖາ ອຸທ຺ທິຏ຺ຐ ຣູປານໍ ເອກວິຘາທິນຍໍ ທສ຺ສນຕ຺ຖໍ ສພ຺ພຎ຺ຈ ປເນຕນ຺ຕິອາທິ ວຸຕ຺ຕ’’ນ຺ຕິ ວຸຕ຺ຕໍ. ຕໍ ນ ສເມຕິ.

ວກ຺ຂຕິ ຫິ –

ອຊ຺ຌຕ຺ຕິກາທິເຠເທນ, ວິຠຊນ຺ຕິ ຍຖາຣຫນ຺ຕິ.

ເອເຕນ ອຊ຺ຌຕ຺ຕິກາທິເຠໂທ ເອວ ຣູປວິຠາໂຄນາມາຕິ ວິຎ຺ຎາຍຕິ.

ຕຕ຺ຖ ສພ຺ພໍປິ ຣູປໍ ເຫຕຸສມ຺ປໂຍຄາ ຠາວໂຕ ອເຫຕຸກ ເມວ, ນ ກິຎ຺ຈິ ສເຫຕຸກໍ. ກິຎ຺ຈິ ອເຫຕຸກນ຺ຕິ ເອວໍ ວິຠາໂຄ ອຕ຺ຖີຕິ ອຘິປ຺ປາໂຍ. ສປ຺ປຈ຺ຈຍໍ ສາສວໍ ສງ຺ຂຕໍ ໂລກິຍນ຺ຕິ ປາໂຐ. ສປ຺ປຈ຺ຈຍໍ ສງ຺ຂຕໍ ໂລກິຍໍ ສາສວນ຺ຕິ ປນ ຍຸຕ຺ໂຕ. ປາຬິຍໍປິ ຕຖາ ທິຏ຺ຐຕ຺ຕາ ສຠາຄຍຸຄຬສມ຺ຠວໂຕຈາຕິ. ອິຕຣານິ ປນ ປາຬິກເມນ ອສເມນ຺ຕານິປິ ສຠາຄ ຍຸຄຬຕ຺ຕາ ຠາຄໂຕ ຍຸຕ຺ຕານິເອວ. ຕຕ຺ຖ ອຕ຺ຕໂນ ຊນເກນ ປຈ຺ຈເຍນ ສເຫວ ວຕ຺ຕຕີຕິ ສປຈ຺ຈຍໍ. ປຈ຺ຈເຍຫິ ສງ຺ຄມ຺ມ ກຣີຍຕີຕິ ສງ຺ຂຕໍ. ປຎ຺ຈຸປາທາ ນກ຺ຂນ຺ຘສງ຺ຂາເຕ ໂລເກເອວ ປຣິຍາປນ຺ນນ຺ຕິ ໂລກິຍໍ. ອຕ຺ຕານໍ ອາຣພ຺ຠ ປວຕ຺ເຕຫິ ອາສເວຫິ ສເຫວ ວຕ຺ຕຕີຕິ ສາສວໍ. ອກນິຏ຺ຐ ພ຺ຣຫ຺ມສນ຺ຕານ ຠູຕໍປິ ຣູປໍ ກາມຕຓ຺ຫາ ວິສຍຠາເວນ ກາເມເອວ ປຣິຍາປນ຺ນຕ຺ຕາ ກາມາວຈຣໍ. ນຕ຺ຖິ ອຕ຺ຕນາ ຄຫິຕໍ ກິຎ຺ຈິ ອາຣມ຺ມຓໍນາມ ອສ຺ສາຕິ ອນາຣມ຺ມຓໍ. ໂຍ ຘມ຺ໂມ ອຎ຺ເຎນ ປໂຍເຄນ ປຫີໂນປິ ສມຸທຍປຫາເນ ອສຕິ ອປຫີໂນວ ໂຫຕິ. ປຸນ ອວສ຺ສໍ ອຸປ຺ປຊ຺ຊມານຕ຺ຕາ. ອປ຺ປຫີໂນປິ ຕສ຺ມິໍ ສຕິ ປຫີໂນວ ໂຫຕິ. ປຸນ ອນຸປ຺ປຊ຺ຊມານຕ຺ຕາ. ຕາທິໂສ ຘມ຺ໂມ ປຫານວາຍາມສ຺ສ ອຏ຺ຐານຕ຺ຕາ ອປ຺ປຫາຕພ຺ໂພນາມ. ຣູປໍປິ ເອທິສເມວ ໂຫຕີຕິ ວຸຕ຺ຕໍ ອປ຺ປຫາຕພ຺ພ ເມວາຕິ. ອຏ຺ຐານຕ຺ຕາ ປຫານ ວາຍາມໍ ນ ອຣຫຕີຕິ ອຕ຺ໂຖ. ອຖວາ, ວິນາ ສມຸທຍປຫາເນນ ປຫາຕຸໍ ອສກ຺ກຸເຓຍ຺ໂຍຕິ ອຕ຺ໂຖ. ຍທິ ເອວໍ ຣູປໍ ຠິກ຺ຂເວ ນ ຕຸມ຺ຫາກໍ. ຕໍ ປຊຫຖ. ຕໍ ໂວ ປຫີນໍ ທີຆຣຕ຺ຕໍ ອຕ຺ຖາຍ ຫິຕາຍ ສຸຂາຍ ຠວິສ຺ສຕີຕິ ອິທໍ ກຖນ຺ຕິ. ຕໍປິ ຕພ຺ພິສຍສ຺ສ ຣາຄສ຺ສ ປຫານໍ ສນ຺ຘາຍ ວຸຕ຺ຕນ຺ຕິ ທຏ຺ຐພ຺ພໍ. ຍຖາຫ –

ຣູເປ ໂຂ ຣາຘ ໂຍ ຉນ຺ໂທ, ໂຍ ຣາໂຄ, ຍານນ຺ທີ, ຍາ ຕຓ຺ຫາ, ຕໍ ປຊຫຖ. ເອວໍ ຕໍຣູປໍ ປຫີນໍ ຠວິສ຺ສຕິ ອຸຈ຺ຉິນ຺ນມູລໍ ຕາລາວຕ຺ຖຸກຕໍ ອນຠາວໍກຕໍ ອາຍຕິໍ ອນຸປ຺ປາທຘມ຺ມນ຺ຕິ.

ອຍໍ ນໂຍ ອຎ຺ເຎສຸປິ ກຸສລາທີສຸ ອປ຺ປຫາຕພ຺ເພສຸ ເວທິຕພ຺ໂພຕິ. ເອວສທ຺ໂທ ເຈຕ຺ຖ ປຸຣິມປເທສຸປິ ໂຍເຊຕພ຺ໂພ. ອິຕິສທ຺ໂທ ອາທິອຕ຺ໂຖ, ປກາຣຕ຺ໂຖວາ. ເຕນ ປາຬິຍໍ ອາຄຕໍ ນ ເຫຕຸ ເຫຕຸວິປ຺ປຍຸຕ຺ຕນ຺ຕິອາທິໍ ສງ຺ຄຓ຺ຫາຕິ. ຕສ຺ສ ຕສ຺ສ ປຸຄ຺ຄລສ຺ສ ອຕ຺ຕຠາວປຣິຍາປນ຺ໂນ ຘມ຺ມສມູໂຫ ອຊ຺ຌຕ຺ຕໍນາມ. ຕສ຺ມິໍປິຈ ຍຕ຺ຖ ຕຓ຺ຫາຍ ອຕິເຣກຕຣໍ ທຬ຺ຫປຣິຄ຺ຄໂຫ ໂຫຕິ. ໂສ ຈກ຺ຂາທິໂກ ຈິຕ຺ເຕນ ສຫ ຉພ຺ພິໂຘ ຘມ຺ໂມ ອຊ຺ຌຕ຺ຕິໂກ ນາມ. ອຊ຺ຌຕ຺ເຕ ວິທິໂຕ ປາກໂຏຕິ ກຕ຺ວາ. ຕຖາ ຫິ ໂສ ອຊ຺ຌຕ຺ຕຊ຺ຌຕ຺ຕນ຺ຕິປິ ວຸຕ຺ໂຕ. ອິຕຣານິ ປນ ຣູປາທິນິ ຜສ຺ສາທີນິຈ ຕທຸປາທາຍ ຕຓ຺ຫາປຣິຄ຺ຄຫສ຺ສ ມນ຺ທຕ຺ຕາ ພາຫິຣານິ ນາມ. ຍຖາ ຫິ ໂລເກ ມຓິວາ ສຸວຓ຺ຓໍວາ ຣຊຕໍວາ ພຫິເຄເຫ ນິທຫິຕ຺ວາ ຖປິຕໍ ໂຫຕິ. ປຈ຺ຉິວາ ສຸປ຺ປໍວາ ຆໂຏວາ ສຣາໂວວາ ອນ຺ໂຕ ເຄເຫ ຖປິໂຕ. ຕຕ຺ຖ ປຈ຺ຉິມານິ ຉຑ຺ເຑຕ຺ວາປິ ປຸຣິມານິ ຣກ຺ຂນ຺ຕິ. ຕສ຺ມາ ຕາເນວ ຕຓ຺ຫາປຣິຄ຺ຄຫທຬ຺ຫຕາຍ ອນ຺ໂຕປຣິໂຠຄາຕ຺ເວວ ວຸຈ຺ຈນ຺ຕິ. ປຈ຺ຉິມານິ ປນ ພາຫິຣ ປຣິໂຠຄາຕ຺ເວວ. ເອວໍ ສມ຺ປທມິທໍ ທຏ຺ຐພ຺ພໍ. ອິຘປິ ຫິ ຍທິ ສກ຺ກຸເຓຍ຺ຍ. ຣູປາທີນິ ຜສ຺ສາທິນິຈ ສພ຺ພານິ ຉຑ຺ເຑຕ຺ວາປິ ຈກ຺ຂາທິກໍ ຉພ຺ພິຘເມວ ອວສ຺ສໍ ຣກ຺ຂິສ຺ສນ຺ຕີຕິ. ອິຕິ ຕຓ຺ຫາ ປຣິຄ຺ຄຫສ຺ສ ທຬ຺ຫມນ຺ທຕາ ວເສເນວ ເຕສໍ ທ຺ວິນ຺ນໍ ອຊ຺ຌຕ຺ຕິກ ພາຫິຣຕາ ວຸຕ຺ຕາ. ນ ປວຕ຺ຕິເທສວເສນາຕິ ນິຏ຺ຐເມຕ຺ຖ ຄນ຺ຕພ຺ພໍ.

[໑໘໕] ຍໍ ປນ ວິຠາວນິຍໍ

‘‘ອຊ຺ຌຕ຺ຕິກຣູປໍ ອຕ຺ຖຠາວສງ຺ຂາຕໍ ອຕ຺ຕານໍ ອຘິກິຈ຺ຈ ອຸທ຺ທິສ຺ສ ປວຕ຺ຕຕ຺ຕາ. ກາມໍ ອຎ຺ເຎປິ ອຊ຺ຌຕ຺ຕສມ຺ຠູຕາ ອຕ຺ຖິ. ຣຸຬ຺ຫີວເສນ ປນ ຈກ຺ຂາທິກເມວ ອຊ຺ຌຕ຺ຕິກນ຺ຕິ’’ ວຸຕ຺ຕໍ. ຕໍ ນ ສຸນ຺ທຣໍ.

[໑໘໖] ຍຎ຺ຈ ຕຕ຺ຖ

‘‘ອຕ຺ຕສງ຺ຂາຕໍປາ ຈິຕ຺ຕໍ ອຘິກິຈ຺ຈ ຕສ຺ສ ທ຺ວາຣຠາເວນ ປວຕ຺ຕຕີຖິ ອຊ຺ຌຕ຺ຕໍ. ຕເທວ ອຊ຺ຌຕ຺ຕິກນ຺ຕິ’’ ວຸຕ຺ຕໍ. ຕໍປິ ນ ສຸນ຺ທຣໍ.

ຕສ຺ມິໍ ອຕ຺ເຖ ຫິ ສຕິ ຈິຕ຺ຕສ຺ສ ອຊ຺ຌຕ຺ຕຕາ ນ ສມ຺ປຊ຺ຊຕິ. ອຊ຺ຌຕ຺ຕຘມ຺ມ ອຊ຺ຌຕ຺ຕິກມ຺ໂມນຎ຺ຈ ອວິເສໂສ ອາປຊ຺ຊຕີຕິ.

ຍໍ ປນ ຕຕ຺ຖ

ອຖວາ ຍທິ ມຍໍ ນ ໂຫມ, ຕ຺ວໍ ກຏ຺ຐກລິງ຺ຄຣູປໂມ ຠວິສ຺ສຕີຕິ ວທນ຺ຕາ ວິຍ ອຕ຺ຕຠາວສ຺ສ ສາຕິສຍໍ ອຸປກາຣກຕ຺ຕາ ຈກ຺ຂາທິເນວ ວິເສສໂຕ ອຊ຺ຌຕ຺ຕິການີຕິ ວຸຕ຺ຕໍ. ຕໍ ຍຸຕ຺ຕຕຣໍ.

ຕຖາ ອຸປກາຣາຕິສຍຕ຺ຕາເອວ ຫິ ເຕສຸ ສຕ຺ຕານໍ ປຣິຄ຺ຄຫ ທຬ຺ຫຕາ ໂຫຕີຕິ. ສຕ຺ຕວິຘໍປິ ທ຺ວາຣຣູປໍນາມ. ຍຖາກ຺ກມໍ ວີຖິ ຈິຕ຺ຕານໍ ປາຓາຕິປາຕາທິກມ຺ມານຎ຺ຈ ປວຕ຺ຕິມຸຂຕ຺ຕາ. ຕຕ຺ຖ ປນ ປຎ຺ຈ ວິຘໍ ປສາທຣູປໍ ອຸປປຕ຺ຕິທ຺ວາຣໍນາມ. ວິຎ຺ຎຕ຺ຕິທ຺ວຍໍ ກມ຺ມທ຺ວາຣໍນາມາຕິ ໂອຬາຣິກຣູປໍ ປກຕິຍາ ຖູລສຠາວຕ຺ຕາ ຆຏ຺ຏນສງ຺ຂາຕສ຺ສຈ ອຕ຺ຕໂນ ກິຈ຺ຈສ຺ສ ໂອຬາຣິກຕ຺ຕາ. ສນ຺ຕິເກຣູປໍ ທູເຣ ປວຕ຺ຕສ຺ສປິ ສີຆຕຣໍ ຎາເຓນ ຄຫຓໂຍຄ຺ຍຕ຺ຕາ. ສປ຺ປຏິຆຣູປຎ຺ຈາຕິ ເອຕ຺ຖ ປຏິຫນນໍ ປຏິໂຆ. ໂສ ທຸວິໂຘ ວິສຍວິສຍີນໍ ປຏິຆຏ຺ຏນໍ ມຫາ ຠູຕານໍ ອຎ຺ຎມຎ຺ຎປຏິຆຏ຺ຏນນ຺ຕິ. ຕຕ຺ຖ ເຍນ ປຏິຆຏ຺ຏເນນ ປສາທ ທ຺ວາຣານໍ ຠວງ຺ຄສ຺ສຈ ວິກາຣປ຺ປຕ຺ຕິ ໂຫຕິ. ອິທໍ ວິສຍວິສຍີນໍ ປຏິຆຏ຺ຏນໍນາມ. ເຍນ ຣຸປ຺ປນລກ຺ຂຓານໍ ຣູປຘມ຺ມານໍ ຣຸປ຺ປນ ກຸປ຺ປນ ຆຏ຺ຏນ ປີຬນ ຠິຊ຺ຊນາທໂຍ ປວຕ຺ຕນ຺ຕິ. ອິທໍ ມຫາຠູຕານໍ ອຎ຺ຎມຎ຺ຎປຏິຆຏ຺ຏນໍ ນາມ. ປຏິເຆນ ສຫ ວຕ຺ຕຕີຕິ ສປ຺ປຏິຆໍ.

[໑໘໗] ວິຠາວນິຍໍ ປນ

‘‘ໂຍ ສຍໍ ນິສ຺ສຍວເສນຈ ສມ຺ປຕ຺ຕານໍ ອສມ຺ປຕ຺ຕານຎ຺ຈ ປຏິມຸຂຠາໂວ ອຎ຺ຎມຎ຺ຎປຕນໍ. ໂສ ປຏິໂຆ ວິຍາຕິ ປຏິໂຆ. ຍຖາຫິ ປຏິຆາເຕ ສຕິ ທຸພ຺ພລສ຺ສ ຈລນໍ ໂຫຕິ. ເອວໍ ອຎ຺ຎມຎ຺ຎປຏິມຸຂຠາເວ ສຕິ ອຣູປສຠາວຕ຺ຕາ ທຸພ຺ພລສ຺ສ ຠວງ຺ຄສ຺ສ ຈລນໍ ໂຫຕີຕິ’’ ເອວໍ ມຫາຠູຕຆຏ຺ຏນໍ ອຸປມາມຕ຺ຕໍ ກຕ຺ວາ ວິສຍວິສຍິຆຏ຺ຏນເມວ ຄຫິຕໍ. ຕໍ ອນຸປປນ຺ນໍ.

ເອວຎ຺ຫິ ສຕິ ຍານິ ໂລເກ ອຊ຺ຌຕ຺ຕພຫິທ຺ຘາສນ຺ຕາເນສຸ ຆຏ຺ຏນານິ ທິສ຺ສນ຺ຕິ. ເຍສໍ ວເສນ ຣູປຘມ຺ເມສຸ ອຎ຺ຎມຎ຺ຎໍ ລຄ຺ຄນ ພນ຺ຘນ ຖມ຺ຠນ ຘາຣຓ ຈລນາທີນິວາ ວຑ຺ຒນ ຫາຍນ ເຉທນ ເຠທນ ວິລີນ ວິກິຣຓາທີນິວາ ປວຕ຺ຕນ຺ຕິ. ຕານິ ອິຘ ອສງ຺ຄຫິຕານິ ສິຍຸໍ. ນຈ ຕານິ ອນຸຄ຺ຄຫ ອຸປຆາຕ ວເສນ ປວຕ຺ຕິຠູຕ ສນ຺ນິປາຕ ສງ຺ຂາຕໍ ຆຏ຺ຏນໍວິນາ ອຎ຺ຎປກາຣານິເອວ ສກ຺ກາ ຠວິຕຸນ຺ຕິ. ອິຕຣໍ ໂສຬສວິຘໍ ວຸຕ຺ຕປຏິປກ຺ຂວເສນ ສຸຂຸມຣູປໍ ທູເຣຣູປໍ ອປຏິຆຣູປຎ຺ຈ. ອຸປາທິນ຺ນຣູປໍ ນາມ ກຕ຺ຖຈິ ຍໍກິຎ຺ຈິ ສຣີຣຏ຺ຐກຣູປໍ ວຸຈ຺ຈຕິ. ກຕ຺ຖຈິ ກມ຺ມສມຸຏ຺ຐານ ເມວ ຕທຸຠຍໍປິ ຕຓ຺ຫາທິຏ຺ຐີຫິ ຕຸສໍ ອາທິນ຺ນປຣາມຏ຺ຐຕ຺ຕາ ອຸປາທິນ຺ນໍ ນາມ ນິປ຺ປຣິຍາຍໂຕ ປນ ກມ຺ມສມຸຏ຺ຐານເມວ ອຸປາທິນ຺ນໍນາມ. ກສ຺ມາ ຕສ຺ເສວ ສຕ຺ຕສນ຺ຕາເນ ນິຈ຺ຈກາລໍ ປວຕ຺ຕິວເສນ ສາຕິສຍໍ ຠຸສໍ ອາທິນ຺ນຄຫິຕປຣາມຏ຺ຐຕາສມ຺ຠວໂຕຕິ ວຸຕ຺ຕໍ ກມ຺ມຊໍອຸປາທິນ຺ນຣູປນ຺ຕິ. ເອຕໍ ມມາຕິອາທິນາ ຕຓ຺ຫາທິຏ຺ຐີຫິ ຠຸສໍ ອາທິຍຕີຕິ ອຸປາທິນ຺ນໍ. ອຏ຺ຐກຖາຍໍ ປນ ຕຓ຺ຫາທິຏ຺ຐີຫິ ອຸເປເຕນ ກມ຺ມຸນາ ອຕ຺ຕໂນ ຜລຠາເວນ ອາທິນ຺ນໍ ຄຫິຕນ຺ຕິ ອິມມຕ຺ຖໍ ທສ຺ເສຕິ. ສຫ ນິທສ຺ສເນນ ສນິທສ຺ສນໍ. ນິທສ຺ສນນ຺ຕິ ຈກ຺ຂຸວິຎ຺ຎາເຓນ ທຏ຺ຐພ຺ພຠາໂວ ວຸຈ຺ຈຕິ. ໂສ ປນ ຘມ຺ມໂຕ ອນຎ຺ຎຕ຺ເຕປິ ອຎ຺ເຎ ວິຍ ກຕ຺ວາ ອຸປຈຣີຍຕິ. ເອວຎ຺ຫິ ສຕິ ອຕ຺ຖວິເສສໂພໂຘ ໂຫຕີຕິ. ນິທສ຺ສນນ຺ຕິວາ ຈກ຺ຂຸວິຎ຺ຎາຓກິຈ຺ຈໍ ວຸຈ຺ຈຕິ. ເຕນ ສຫ ວຕ຺ຕຕີຕິ ສນິທສ຺ສນນ຺ຕິປິ ຍຸຊ຺ຊຕິເຍວ. ຈກ຺ຂາທິທ຺ວຍໍ ອສມ຺ປຕ຺ຕວເສນ ໂຄຈຣຄ຺ຄາຫິກໍ. ຆານາທິຕ຺ຕຍໍ ສມ຺ປຕ຺ຕວເສນ ໂຄຈຣຄ຺ຄາຫິກນ຺ຕິ ປຎ຺ຈວິຘໍປິ ໂຄຈຣຄ຺ຄາຫິກຣູປນ຺ຕິ ໂຍຊນາ. ຕຕ຺ຖ ປສາເທ ອລ຺ລີຍິຕ຺ວາ ລຄ຺ຄິຕ຺ວາ ອຸປ຺ປນ຺ນໍ ອາຣມ຺ມຓໍ ສມ຺ປຕ຺ຕໍນາມ. ເກສຄ຺ຄມຕ຺ຕໍປິ ມຸຎ຺ຈິຕ຺ວາ ອຸປ຺ປນ຺ນໍ ອສມ຺ປຕ຺ຕໍນາມ. ກສ຺ມາ ປເນຕ຺ຖ ຈກ຺ຂາທິທ຺ວຍໍ ອສມ຺ປຕ຺ຕເມວ ຄຓ຺ຫາຕິ. ຆານາທິຕ຺ຕຍໍ ສມ຺ປຕ຺ຕເມວາຕິ, ປຈ຺ຈຍວິເສສໂຕ. ອາໂລໂກ ຫິ ຣູປຄຫເຓ ຈກ຺ຂຸສ຺ສ ປຈ຺ຈໂຍ. ອາກາໂສຈ ສທ຺ທຄຫເຓ ໂສຕສ຺ສາຕິ ຈກ຺ຂຸຣູເປສຸຈ ອຎ຺ຎມຎ຺ຎໍ ລຄ຺ຄິຕ຺ວາ ອຸປ຺ປຊ຺ຊມາເນສຸ ອາໂລກປຣິວາຣສ຺ສ ໂອກາໂສ ນຕ຺ຖິ. ຕຖາ ໂສຕສທ຺ເທສຸຈ ອາກາສປຣິວາຣສ຺ສາຕິ. ວາຍຸອາປປຖວິໂຍ ປນ ຆານາທິຕ຺ຕຍສ຺ສ ຄນ຺ຘາທິຄຫເຓ ປຈ຺ຈຍາ ໂຫນ຺ຕິ. ຕຕ຺ຖ ວາຍຸນາມ ຄນ຺ຘາກຑ຺ຒນໂກ ນາສວາໂຕເຍວ, ໂສຈ ສມ຺ປຕ຺ຕສ຺ເສວ ປຈ຺ຈໂຍ. ອາໂປນາມ ຊິວ຺ຫາເຕມນໂກ ອາໂປ, ໂສປິ ສມ຺ປຕ຺ຕສ຺ເສວ ປຈ຺ຈໂຍ. ນ ຫິ ຣໂສ ສຸກ຺ຂຊິວ຺ຫາຍ ຜຣຕີຕິ. ປຖວີຈ ຆຏ຺ຏນຕ຺ຖາຍ ປຈ຺ຈໂຍ. ນ ຫິ ທຸພ຺ພລປຖວີສນ຺ນິສ຺ສໂຍ ອາໂລໂກວາ ຣໂຊວາກາເຍ ປຕມາໂນປິ ປສາເທ ຆຏ຺ເຏຕີຕິ. ອິຕິ ປຈ຺ຈຍວິເສສໂຕ ເຕສໍ ສມ຺ປຕ຺ຕາສມ຺ປຕ຺ຕວເສນ ຄຫຓ ວິເສໂສ ໂຫຕີຕິ. ຕຕ຺ຖ ຈກ຺ຂຸສ຺ສ ຕາວ ອສມ຺ປຕ຺ຕຄຫຓໍ ປາກຏໍ. ຕຎ຺ຫິ ສມີເປ ອກ຺ຂິວຓ຺ຓໍວາ ຠມຸກມູລໍວາ ນປສ຺ສຕິ. ທູເຣ ປນ ມຫນ຺ຕໍ ຈນ຺ທມຓ຺ຑລາທິກໍວາ ຜລິກາທິຕິໂຣຫິຕໍວາ ວຓ຺ຓໍ ປສ຺ສຕິ. ທິສາເທສວວຕ຺ຖານຎ຺ຈສ຺ສ ປຎ຺ຎາຍຕີຕິ. ໂສຕສ຺ສ ປນ ກຖນ຺ຕິ, ຕຕ຺ຖ ຫິ ທູເຣ ສທ຺ໂທ ຈິເຣນ ສຸຍ຺ຍມາໂນ ທິສ຺ສຕິ ປຈ຺ຉິມທິສາຠາເຄ ອຸປ຺ປນ຺ໂນປິ ສທ຺ໂທ ອນ຺ຕຣາ ມຫນ຺ເຕ ເຈຕິຍາທິເກ ອນ຺ຕຣິເຕ ສຕິ ທກ຺ຂິຓປສ຺ສໂຕວາ ສຸຍ຺ຍຕິ. ອຸຕ຺ຕຣປສ຺ສໂຕວາ. ອສຸຍ຺ຍມາໂນວາ ໂຫຕີຕິ. ວຸຈ຺ຈເຕ, ອຸປ຺ປນ຺ໂນ ສທ຺ທສງ຺ຆາໂຏ ອາສນ຺ເນ ຐິຕານໍ ອາທິໂຕ ປຏ຺ຐາຍ ຍາວ ອວສານາ ກເມນ ປາກຏີຠູໂຕ ໂຫຕິ. ປຏິຆຏ຺ຏນານິຆໍໂສຈ ພລວາ ໂຫຕິ. ອຫໍ ສຸໂຓມີຕິ ປວຕ຺ຕາ ສລ຺ລກ຺ຂຓວີຖິໂຍ ສີຆຕຣໍ ນິຣນ຺ຕຣໍ ວິຍ ປວຕ຺ຕນ຺ຕິ. ທູເຣ ຐິຕານໍ ປນ ປຏິຆຏ຺ຏນານິຆໍໂສ ມນ຺ທຕໂຣ ໂຫຕິ. ອາທິໂຕ ອປາກໂຏ. ມຊ຺ເຌວາ ອວສາເນວາ ປິຓ຺ຑວເສນ ປາກຏີຠູໂຕ. ສລ຺ລກ຺ຂຓວີຖິໂຍ ຈິເຣນ ປເຣນ ປວຕ຺ຕນ຺ຕິ. ຕສ຺ມາ ເຕສໍ ລຫຸໍ ສຸໂຕ. ຈິເຣນ ສຸໂຕຕິ ອຕິມາໂນ ໂຫຕີຕິ. ອປິຈ, ສທ຺ໂທນາມ ນິສ຺ສຍຘາຕຸປຣໍປຣາຍ ປວຕ຺ຕິຕ຺ວາ ທູຣໍປິ ເທສໍ ຄຈ຺ຉຕິເຍວ. ເອວໍ ຄຈ຺ຉນ຺ໂຕຈ ຄຕຄຕຏ຺ຐາເນເອວ ຐຕ຺ວາ ສວນູປຈາເຣ ຐິຕານໍ ໂສຕສຫສ຺ສໍປິ ຆຏ຺ເຏຕິ. ມຫນ຺ເຕ ປນ ເຈຕິຍາທິເກ ອນ຺ຕຣິເຕ ສຕິ ຍໂຕ ອາກາໂສ ອຸຊຸໍ ວິວໂຏ ໂຫຕິ. ຕໂຕ ທກ຺ຂິຓປສ຺ສໂຕວາ ອຸຕ຺ຕຣປສ຺ສໂຕວາ ຄຕຄຕຐານໂຕວໂສຕໍ ຆຏ຺ເຏຕິ. ມນ຺ທຕໂຣ ປນ ສທ຺ໂທອສຸຍ຺ຍ ມາໂນປິ ໂຫຕິ. ເອວໍ ຄຈ຺ຉນ຺ໂຕຈ ຍາວ ໂສຕປສາເທ ອລ຺ລີຍິຕ຺ວາ ນຸປ຺ປຊ຺ຊຕິ. ຕາວ ອສມ຺ປຕ຺ໂຕເຍວ ໂຫຕິ. ໂຍ ປນ ອລ຺ລີ ຍິຕ຺ວາ ອຸປ຺ປຊ຺ຊຕິ. ໂສ ສມ຺ປຕ຺ໂຕນາມ ໂຫຕິ. ນ ໂສ ສຸຍ຺ຍຕີຕິ. ຍທິ ປນ ໂສຕໍ ສມ຺ປຕ຺ຕວິສຍໍ ສິຍາ. ຍຖາ ອນ຺ໂຕ ກຸຈ຺ຉິຄໂຕ ຄນ຺ໂຘ ພຫິ ນຆາຍິຍຕິ. ຕຖາ ອນ຺ໂຕ ກຸຈ຺ຉິຄໂຕ ສທ຺ໂທປິ ພຫິ ນສຸເຍຍ຺ຍ. ຄນ຺ຘສ຺ສ ວິຍ ທິສາເທສວວຕ຺ຖານໍ ວິສ຺ສນ ສິຍາຕິ.

[໑໘໘] ວິຠາວນິຍໍ ປນ

‘‘ຄນ຺ຕ຺ວາ ວິສຍເທສໍ ຕໍ, ຜຣິຕ຺ວາ ຄຓ຺ຫຕີຕິ ເຈ. ອຘິຏ຺ຐານ ວິຘາ ເນປິ, ຕສ຺ສ ໂສ ໂຄຈໂຣ ສິຍາ.’’ ຕິປິ ວິຈາຣິຕໍ. ຕໍ ນ ສຸນ຺ທຣໍ.

ນ ຫິ ຈກ຺ຂາທິທ຺ວຍສ຺ສ ພຫິທ຺ຘາ ວິສຍເທສຄມນສງ຺ໂຄ ອຕ຺ຖີຕິ. ໂຄຈຣໍ ຄຓ຺ຫາຕີຕິ ໂຄຈຣຄ຺ຄາຫິກໍ. ປສາທ ມຓ຺ຑຠູຕຕ຺ຕາ ອາປາຕມາຄຕໍ ອາຣມ຺ມຓນິມິຕ຺ຕໍ ສມ຺ປຏິຈ຺ຉຕີຕິ ອຕ຺ໂຖ.

ວິຠາວນິຍໍ ປນ

ວິຎ຺ຎາຓາຘິຏ຺ຐິຕໍ ຫຸຕ຺ວາ ຕໍຕໍ ໂຄຈຣຄຫຓ ສຠາວຕ຺ຕາຕິ ວຸຕ຺ຕໍ.

ວຓ຺ໂຓຕິ ຣູປາຣມ຺ມຓສ຺ເສຕໍ ນາມໍ. ໂອຊາຕິ ອາຫາຣ ຣູປ ມາຫ. ວິນິຠຸຊ຺ຊຕີຕິ ວິນິພ຺ໂຠໂຄ. ຐານໂຕ ເທສໂຕ ອຸປ຺ປຕ຺ຕິກາຣຓໂຕ ວິສຸໍວິສຸໍ ວວຕ຺ຖປີຍຕີຕິ ອຕ຺ໂຖ. ນວິນິພ຺ໂຠ ໂຄຕິ ອວິນິພ຺ໂຠໂຄ. ໂສ ເອວ ຣູປນ຺ຕິ ອວິນິພ຺ໂຠຄຣູປໍ. ອາຈຣິຍານນ຺ທຕ຺ເຖເຣນປເນຕ຺ຖ ຄນ຺ຘຣສໂອຊາ ກຕ຺ຖຈິ ວິນີຠຸຕ຺ຕາ ທິສ຺ສນ຺ຕີຕິ ປຎ຺ຈວິຘເມວ ອວິນິພ຺ໂຠຄຣູປໍ ອິຈ຺ຉິຕໍ. ຕໍ ປຣໂຕ ອາຄມິສ຺ສຕີຕິ. [ຣູປວິຠາໂຄ].

໑໕໘. ກມ຺ມນ຺ຕິ ເອກາ ເຈຕນາເອວ. ສາເຍວ ຫິ ປຏ຺ຐາເນ ນານາກ຺ຂຓິກ ກມ຺ມປຈ຺ຈຍຠາເວນ ວຸຕ຺ຕາ. ຍຖາຫ-ນານາກ຺ຂຓິກາ ກຸສລາກຸສລາ ເຈຕນາ ວິປາການໍ ຂນ຺ຘານໍ ກຏຕ຺ຕາຈ ຣູປານໍ ກມ຺ມປຈ຺ຈເຍນ ປຈ຺ຈໂຍຕິ. ຈິຕ຺ຕນ຺ຕິ ປນ ສສມ຺ປຍຸຕ຺ຕຘມ຺ມໍ ອຘິປ຺ເປຕໍ. ປຏ຺ຐາເນ ເຈຕສິກຘມ຺ມານໍປິ ຣູປສມຸຏ຺ຐາປນຠາເວນ ວຸຕ຺ຕຕ຺ຕາ. ຍຖາຫ-ເຫຕູ ເຫຕຸສມ຺ປຍຸຕ຺ຕການໍ ຘມ຺ມານໍ ຕໍ ສມຸຏ຺ຐານານຎ຺ຈ ຣູປານໍ ເຫຕຸ ປຈ຺ຈເຍນ ປຈ຺ຈໂຍຕິອາທິ. ອຸຕູຕິ ເຕໂຊເຍວ. ໂສ ຫິ ກປ຺ປສຓ຺ຐາປນວເສນ ສກລໍ ໂອກາສ ໂລກໍປິ ນານາສຣີຣສຓ຺ຐາປນວເສນ ສກ ລໍ ຣູປມຍໍ ກາຍໍ ສຕ຺ຕໂລກໍປິ ນານາຣຸກ຺ຂຕິຓາທີນໍ ອພ຺ຠປຏລເມຆວຸຏ຺ຐິຊລອຄ຺ຄິ ວາຕາທີນຎ຺ຈ ສຓ຺ຐາປນວເສນ ສກລໍ ສງ຺ຂາຣໂລກໍປິ ອຸທຍຕິ ປສວຕິ ຊເນຕິ ວຑ຺ເຒຕິ. ຕສ຺ມາ ອຸຕູຕິ ວຸຈ຺ຈຕີຕິ. ອຣຕິ ຄຈ຺ຉຕິ ປວຕ຺ຕຕີຕິ ອຸຕູຕິປິ ວທນ຺ຕິ. ອາຫາໂຣຕິ ໂອຊາເອວ. ຣູປວິຣາຄຠາວນາຠູຕໍ ອຣູປກຸສລໍ ກມ຺ມຊຣູປໍ ນຊເນຕີຕິ ວຸຕ຺ຕໍ ປຎ຺ຈວີສຕິວິຘໍປີຕິ. ອຕິສງ຺ຂຕນ຺ຕິ ອຕີຕກາເລ ຍຖາກາ ລນ຺ຕເຣ ຣູປໍ ຊເນຕິ, ຕຖາ ວິເສເສຕ຺ວາ ສຸຏ຺ຐຸກຕໍ. ອຊ຺ຌຕ຺ຕິ ກສນ຺ຕາເນຕິ ວຸຕ຺ຕໍ, ອຊ຺ຌຕ຺ຕສນ຺ຕາເນຕິ ປນ ວຕ຺ຕພ຺ພໍ. ອຊ຺ຌຕ຺ຕ ເມວ ອຊ຺ຌຕ຺ຕິກນ຺ຕິວາ ອິກສທ຺ທສ຺ສ ອຕ຺ໂຖ ທຏ຺ຐພ຺ໂພ. ປຏິສນ຺ຘິມຸປາທາຍາຕິ ປຏິສນ຺ຘິຈິຕ຺ຕສ຺ສ ອຸປ຺ປາທກ຺ຂຓໍ ອຸປາທາຍ. ຂເຓຂເຓຕິ ເອເກກສ຺ສ ຈິຕ຺ຕສ຺ສ ຕີສຸ ຕີສຸ ຂເຓສຸ. ອາຈຣິຍານນ຺ທຕ຺ເຖໂຣ ປນ ສພ຺ເພສໍປິ ຈຕຸສມຸຏ຺ຐານິກຣູປານໍ ເອເກກສ຺ສ ຈິຕ຺ຕສ຺ສ ອຸປ຺ປາທກ຺ຂເຓເອວ ອຸປ຺ປາທໍ ຠງ຺ຄກ຺ຂເຓເອວ ນິໂຣຘຎ຺ຈ ອາຫ. ອຫໍ ປນສ຺ສາ ຘິປ຺ປາໂຍ-ສພ຺ພານິປິ ຈຕຸສມຸຏ຺ຐານິກຣູປານິ ຈິຕ຺ຕສ຺ສ ອຸປ຺ປາທກ຺ຂເຓເອວ ອຸປ຺ປຊ຺ຊນ຺ຕິ, ນ ຠງ຺ຄກ຺ຂເຓ. ຍຖາຫ –

ຍສ຺ສວາ ປນ ສມຸທຍສຈ຺ຈໍ ນິຣຸຊ຺ຌຕິ, ຕສ຺ສ ທຸກ຺ຂສຈ຺ຈໍ ອຸປ຺ປຊ຺ຊຕີຕິ. ໂນຕິ.

ຕຖາ ຕານິ ຈິຕ຺ຕສ຺ສ ຠງ຺ຄກ຺ຂເຓເອວ ນິຣຸຊ຺ຌນ຺ຕິ. ນ ອຸປ຺ປາທກ຺ຂເຓ. ຍຖາຫ –

ຍສ຺ສ ກຸສລາ ຘມ຺ມາ ອກຸສລາ ຘມ຺ມາ ອຸປ຺ປຊ຺ຊນ຺ຕິ, ຕສ຺ສ ອພ຺ຍາກຕາ ຘມ຺ມາ ນິຣຸຊ຺ຌນ຺ຕີຕິ. ໂນຕິ.

ອຣູປຠວໍ ສນ຺ຘາຍ ເອຕໍ ຍມກທ຺ວຍໍ ວຸຕ຺ຕໍ. ຣູປານິ ປນ ຈິຕ຺ຕສ຺ສ ຠງ຺ຄກ຺ຂເຓປິ ອຸປ຺ປຊ຺ຊນ຺ຕິ. ອຸປ຺ປາທກ຺ຂເຓປິ ນິຣຸຊ຺ຌນ຺ຕີຕິ ເຈ. ນ. ເອວຎ຺ຫິ ສຕິ –

ຍສ຺ສວາ ປນ ສມຸທຍສຈ຺ຈໍ ນິຣຸຊ຺ຌຕິ, ຕສ຺ສ ທຸກ຺ຂສຈ຺ຈໍ ອຸປ຺ປຊ຺ຊຕີຕິ. ອຣູເປ ຕຓ຺ຫາຍ ຠງ຺ຄກ຺ຂເຓ ເຕສໍ ສມຸທຍສຈ຺ຈໍ ນິຣຸຊ຺ຌຕິ. ໂນຈ ເຕສໍ ທຸກ຺ຂສຈ຺ຈໍ ອຸປ຺ປຊ຺ຊຕິ. ປຎ຺ຈໂວກາເຣ ຕຓ຺ຫາຍ ຠງ຺ຄກ຺ຂເຓ ເຕສໍ ສມຸທຍສຈ຺ຈຎ຺ຈ ນິຣຸຊ຺ຌຕິ, ທຸກ຺ຂສຈ຺ຈຎ຺ຈ ອຸປ຺ປຊ຺ຊຕີຕິຈ.

ອິຕຣຕ຺ຖຈ

ອຣູເປ ກຸສລານໍ ອຸປ຺ປາທກ຺ຂເຓ ເຕສໍ ກຸສລາ ຘມ຺ມາ ອຸປ຺ປຊ຺ຊນ຺ຕິ. ໂນຈ ເຕສໍ ອພ຺ຍາກຕາ ຘມ຺ມາ ນິຣຸຊ຺ຌນ຺ຕິ. ປຎ຺ຈໂວກາເຣ ກຸສລານໍ ອຸປ຺ປາທກ຺ຂເຓ ເຕສໍ ກຸສລາ ຘມ຺ມາຈ ອຸປ຺ປຊ຺ຊນ຺ຕິ. ອພ຺ຍາກຕາ ຘມ຺ມາຈ ນິຣຸຊ຺ຌນ຺ຕີຕິຈ.

ເອວໍ ປຣິປຸຓ຺ຓປຎ຺ຫາເອວ ອຸທ຺ຘຏາ ສິຍຸໍ. ໂນຕິ ປນ ປຏິເສໂຘວ ອຸທ຺ຘໂຏ. ຕສ຺ມາ ນຍິທໍ ອຣູປຠວໍ ສນ຺ຘາຍ ວຸຕ຺ຕນ຺ຕິ ສກ຺ກາ ວຕ຺ຕຸນ຺ຕິ. ຈິຕ຺ຕຊຣູປໍ ສນ຺ຘາຍ ວຸຕ຺ຕນ຺ຕິ ເຈ. ຕມ຺ປິ ນ. ກມ຺ມຊຣູປສ຺ສ ວິຄຫເຓ ວິໂຣຘສ຺ສ ຍມກປາຐນ຺ຕຣສ຺ສ ອຠາວໂຕ. ອນຸໂລມສ຺ເສວຈ ຠາວໂຕ. ຍຖາຫ –

ຍສ຺ສວາປນ ຍຕ຺ຖ ມນິນ຺ທ຺ຣິຍໍ ນ ອຸປ຺ປຊ຺ຊຕິ. ຕສ຺ສ ຕຕ຺ຖ ຊີວິຕິນ຺ທ຺ຣິຍໍ ນອຸປ຺ປຊ຺ຊຕີຕິ. ອສຎ຺ຎສຕ຺ຕານໍ ເຕສໍ ຕຕ຺ຖ ມນິນ຺ທ຺ຣິຍໍ ນ ອຸປ຺ປຊ຺ຊຕິ. ໂນຈ ເຕສໍ ຕຕ຺ຖ ຊີວິຕິນ຺ທ຺ຣິຍໍ ນ ອຸປ຺ປຊ຺ຊຕິ.

ສພ຺ເພສໍ ຈວນ຺ຕານໍ ປວຕ຺ເຕ ຈິຕ຺ຕສ຺ສ ຠງ຺ຄກ຺ຂເຓ ເຕສໍ ຕຕ຺ຖ ມນິນ຺ທ຺ຣິຍຎ຺ຈ ນອຸປ຺ປຊ຺ຊຕິ. ຊີວິຕິນ຺ທ຺ຣິຍຎ຺ຈ ນອຸປ຺ປຊ຺ຊຕີຕິ.

ເອຕ຺ຖ ຫິ ອສຎ຺ຎສຕ຺ຕານນ຺ຕິ ເອເຕນ ຣູປຊີວິຕິນ຺ທ຺ຣິຍ ເມວ ວຸຕ຺ຕໍ. ຍທິຈ ຕໍ ຈິຕ຺ຕສ຺ສ ຠງ຺ຄກ຺ຂເຓປິ ອຸປ຺ປຊ຺ເຊຍ຺ຍ, ປຸຣິມໂກຏ຺ຐາເສ ປວຕ຺ເຕ ຈິຕ຺ຕສ຺ສ ຠງ຺ຄກ຺ຂເຓ ອສຎ຺ຎສຕ຺ຕານໍ ເຕສໍ.ລ. ຊີວິຕິນ຺ທ຺ຣິຍໍ ນອຸປ຺ປຊ຺ຊຕີຕິ ວຸຕ຺ຕໍ ສິຍາ, ປຈ຺ຉິມໂກຏ຺ຐາເສຈ ສພ຺ເພສໍ ຈວນ຺ຕານໍ ອິຈ຺ເຈວ ວຸຕ຺ຕໍ ສິຍາຕິ. ປຈ຺ຉິມໂກຏ຺ຐາເສ ປນ ອຣູປ ຊີວິຕິນ຺ທ຺ຣິຍໍ ສນ຺ຘາຍ ວຸຕ຺ຕນ຺ຕິ ເຈ. ນ. ຕຖາ ຄຫຓຕ຺ຖໍ ຍມກ ປາຐນ຺ຕຣາຠາວໂຕ ສພ຺ພຎ຺ຎຸວິສເຍຈ ຐາເນ ປາຬິໂຍ ສໍສນ຺ທິຕ຺ວາ ພລວຕິຍາ ປາຬິຍຸຕ຺ຕິຍາເອວ ຐາຕພ຺ພໂຕຕິ. ຍສ຺ມາຈ ຣູປຘມ຺ມາ ນາມ ທນ຺ຘປວຕ຺ຕິໂນ ໂຫນ຺ຕິ. ອຣູປຘມ຺ມາ ລຫຸປວຕ຺ຕິໂນ ຐິຕິກ຺ຂໂຓຈ ເຕສໍ ວິສຸໍ ຄຓນູປໂຄ ນຕ຺ຖິ. ຕສ຺ມາ ອຎ຺ໂຎເຍວ ຣູປ ຘມ຺ມານໍ ຂຓປພນ຺ໂຘ. ອຎ຺ໂຎ ອຣູປຘມ຺ມານໍ. ຕຕ຺ຖ ສພ຺ເພປິ ຣູປຘມ຺ມາ ເອກຈິຕ຺ຕກ຺ຂຓປຣິມາເຓນ ອຕ຺ຕໂນ ອຸປ຺ປາທກ຺ຂເຓນ ຍຸຕ຺ຕາ ຂເຓ ຂເຓ ນິຣນ຺ຕຣເມວ ອຸປ຺ປຊ຺ຊນ຺ຕິ. ປຏິສນ຺ຘິໂຕ ປຏ຺ຐາຍ ສຫຸປ຺ປນ຺ນຕ຺ຕາຈ ປນ ທ຺ວິນ຺ນໍ ເຕສໍ ອຸປ຺ປາທາທິວາ ນິໂຣຘນ຺ໂຕວາ ຍາວຊີວໍປິສເຫວ ໂຫຕີຕິປິ ຕສ຺ສ ອຘິປ຺ປາໂຍຕິ. ຍມກ ປາຬິໂຍ ປນ ນານາຕ຺ຖາ, ນານາພ຺ຍຎ຺ຊນາ, ຄມ຺ຠີໂຣຈ ສຕ຺ຖຸ ອຘິປ຺ປາໂຍ. ຕສ຺ມາ ສຸຏ຺ຐຸ ວິຈາເຣຕ຺ວາ ສລ຺ລກ຺ເຂຕພ຺ໂພ. ນ ປນ ຘມ຺ມຕາ ເອສາ ຍມກສ຺ສ. ຍທິທໍ ຍຖາລາຠໂຍຊນາຕິ ກຕ຺ວາ ອຕ຺ຕໂນ ອຘິປ຺ປາເຍ ຐຕ຺ວາ ທິຏ຺ຐໍ ທິຏ຺ຐໍ ຍມກປາຐໍ ຍຖາລາຠໂຍ ຊນາຍເອວ ສກ຺ກາ ໂຍເຊຕຸນ຺ຕິ. ຣູປວິຣາຄຠາວນາວິເສສຠູຕໍ ອຣູປກຸສລໍ ຕສ຺ມິໍ ໂລເກ ຣູປສຫິຕໍ ປຏິສນ຺ຘິໍ ນຊເນຕິ. ສຸທ຺ຘອຣູປເມວ ຊເນຕິ. ຕສ຺ມາ ຣູປສນ຺ຕຕິສີສສ຺ສ ສພ຺ພໂສ ອຠາວາ ຕຕ຺ຣຸປ຺ປນ຺ນານິ ສພ຺ພານິ ຉຈຕ຺ຕາລີສຈິຕ຺ຕານິ ຣູປໍ ຊເນຕຸໍ ນ ນ ສກ຺ໂກນ຺ຕິ. ອຣູປວິປາກາ ປນ ຕຕ຺ເຖວ ນິຍມຸປ຺ປນ຺ນາຕິ ອຣູປປາກສ຺ເສວ ຄຫຓໍ ກຕໍ, ເຕເນວ ອຏ຺ຐກຖາຍໍ, ອຎ຺ຎານິປິ ພຫູນິ ອາຣຸປ຺ເປ ອຸປ຺ປນ຺ນານິ ອໂນກາສຕ຺ຖາ ຣູປໍ ນສມຸຏ຺ຐາເປນ຺ຕີຕິ ວຸຕ຺ຕໍ ຕຕ຺ຖ ອໂນກາສຕານາມ ອາທິໂຕ ປຏ຺ຐາຍ ອຸປ຺ປນ຺ນສ຺ສ ຣູປສນ຺ຕຕິສີສສ຺ສ ອຠາໂວ ເອວ ທຏ຺ຐພ຺ໂພຕິ.

[໑໘໙] ວິຠາວນິຍໍ ປນ

‘‘ຣູປວິຣາຄຠາວນານິພ຺ພຕ຺ຕຕ຺ຕາ ເຫຕຸໂນ ຕພ຺ພິຘຸຣຕາຍາ’’ຕິປິ ກາຣຓໍ ວຸຕ຺ຕໍ. ຕໍ ອກາຣຓໍ.

ຣູປາຣູປວິຣາຄຠາວນາຠູຕມຄ຺ຄນິພ຺ພຕ຺ຕສ຺ສ ໂລກຸຕ຺ຕຣວິປາກສ຺ສ ຣູໂປກາເສ ສຕິ ຣູປຊນກຕາທສ຺ສນໂຕຕິ. ຌານງ຺ຄວິຣເຫນ ອງ຺ຄທຸພ຺ພລານິປິ ຣູປໍ ນ ຊເນນ຺ຕີຕິ ທ຺ວິປຎ຺ຈວິຎ຺ຎາຓຄຫຓໍ ກຕໍ. ອິຕຣາ ນິປິ ປນ ປນ຺ນຣສກາມຣູປ ປຏິສນ຺ຘິຈິຕ຺ຕານິ ຂີຓາສວານໍ ປຣິນິພ຺ພານຈຸຕິ ຈິຕ຺ຕນ຺ຕິ ອິມານິ ຈິຕ຺ຕານິ ຣູປໍ ນ ສມຸຏ຺ຐາເປນ຺ຕິເຍວ. ເອວໍສນ຺ເຕປິ ຕານິ ສພ຺ພານິປິ ຠວງ຺ຄກາເລ ອຂີຓາສວານຎ຺ຈ ຈຸຕິກາເລ ສມຸຏ຺ຐາເປນ຺ຕີຕິ ເຕສໍ ອິຘ ອຄຫຓໍ ທຏ຺ຐພ຺ພໍ.

[໑໙໐] ວິຠາວນິຍໍ ປນ

ປຏິສນ຺ຘິຈິຕ຺ຕໍ ປນ ຈຸຕິຈິຕ຺ຕຎ຺ຈ ເອກູນວີສຕິ ຠວງ຺ຄສ຺ເສວ ອນ຺ໂຕຄຘຕ຺ຕາ ຈິຕ຺ຕນ຺ຕຣໍ ນ ໂຫຕີຕິ ນ ຕສ຺ສ ວຊ຺ຊນໍ ກຕ’’ນ຺ຕິ ວຸຕ຺ຕໍ. ຕຕ຺ຖ ເອກູນວີສຕິ ຠວງ຺ຄສ຺ເສວາຕິ ນ ວຕ຺ຕພ຺ພໍ.

ອຣູປວິປາກສ຺ສ ສຣູປໂຕ ວຊ຺ຊິຕຕ຺ຕາຕິ. ກສ຺ມາ ປນ ຍຖາ ວຸຕ຺ຕານິ ປນ຺ນຣສ ປຏິສນ຺ຘິຈິຕ຺ຕານິ ປຏິສນ຺ຘິກ຺ຂເຓ ຣູປໍ ນ ສມຸຏ຺ຐາເປນ຺ຕີຕິ, ປຣິທຸພ຺ພລຕ຺ຕາ. ຈິຕ຺ຕຎ຺ຫິນາມ ອຸປ຺ປາທກ຺ຂເຓເອວ ປຣິປຸຓ຺ຓໍ ປຈ຺ຈຍໍ ລຠິຕ຺ວາ ພລວໍ ໂຫຕິ. ຣູປຎ຺ຈ ຐິຕິກ຺ຂເຓວ.

ຕສ຺ມາ ອຕ຺ຕໂນ ພລວນ຺ຕກ຺ຂເຓ ອຸປ຺ປຊ຺ຊມານຠາເວນ ທຸພ຺ພລໍ ວຕ຺ຖຸໍ ນິສ຺ສາຍ ອຸປ຺ປນ຺ນຕ຺ຕາ ສຍໍປິ ປຣິທຸພ຺ພລໍ ໂຫຕີຕິ ສພ຺ພານິປິ ຕານິ ຕທາ ຣູປໍ ນສມຸຏ຺ຐາ ເປນ຺ຕີຕິ. ເອຕ຺ຖຈ ເກຈິ ອນນ຺ຕຣາເສວນາທິປຈ຺ຈຍາ ຈິຕ຺ຕສ຺ສ ອຸປ຺ປາທກ຺ຂເຓເອວ ຜຣນ຺ຕິ. ຣູປສ຺ສ ປນ ອຸປຕ຺ຖມ຺ຠກຠູຕາ ອຸຕຸອາຫາຣາ ປຈ຺ຉາຊາຕປຈ຺ຈຍຘມ຺ມາຈ ຐິຕິກ຺ຂເຓເອວຜຣນ຺ຕີຕິ ເຕສໍ ຍຖາກ຺ກມໍ ອຸປ຺ປາທກ຺ຂເຓ ຐິຕິກ຺ຂເຓຈ ປຣິປຸຓ຺ຓປຈ຺ຈຍລາໂຠ ເວທິຕພ຺ໂພ.

[໑໙໑] ວິຠາວນິຍໍ ປນ

‘‘ປຈ຺ຉາຊາຕ ປຈ຺ຈຍຣຫິຕໍ ປນ ອາຫາຣາທີຫິຈ ອນຸປຕ຺ຖທ຺ຘໍ ທຸພ຺ພລວຕ຺ຖຸໍ ນິສ຺ສາຍ ປວຕ຺ຕຕ຺ຕາ ອຕ຺ຕໂນຈ ອາຄນ຺ຕຸກຕາຍ ກມ຺ມຊຣູເປຫິຈ ຈິຕ຺ຕສມຸຏ຺ຐານຣູປານໍ ຐານໍ ຄເຫຕ຺ວາ ຐິຕຕ຺ຕາ’’ຕິ ກາຣຓໍ ວຸຕ຺ຕໍ. ຕຕ຺ຖ ປຈ຺ຉາຊາຕ ປຈ຺ຈຍ ຣຫິຕນ຺ຕິ ອິທໍ ວິຈາເຣຕພ຺ພໍ.

ປຏິສນ຺ຘິຈິຕ຺ຕສ຺ສ ຐິຕິກ຺ຂເຓ ປຈ຺ຉາຊາຕ ປຈ຺ຈຍ ຣຫິຕສ຺ສ ປິອຸຕຸສ຺ສ ຣູປຊນກຠາວສ຺ສ ວກ຺ຂມານຕ຺ຕາ. ນ ຫິ ອຕ຺ຕນາ ອວິຊ຺ຊມານໍ ປຈ຺ຉິມຈິຕ຺ຕໍ ປຸຣິມຈິຕ຺ຕກ຺ຂເຓ ຐິຕສ຺ສ ກສ຺ສຈິ ຣູປສ຺ສ ປຈ຺ຉາຊາຕ ປຈ຺ຈໂຍ ໂຫຕິ. ອຕ຺ຖິ ປຈ຺ຈເຍກເທສຕ຺ຕາ ຕສ຺ສ ປຈ຺ຈຍສ຺ສາຕິ. ຂີຓາສວານໍ ຈຸຕິຈິຕ຺ຕໍ ປນ ປກຕິຍາວ ວູປສນ຺ຕວຏ຺ຏມູເລ ສນ຺ຕາເນ ປວຕ຺ຕຕ຺ຕາ ສນ຺ຕຕຣໍ ໂຫຕິ. ປຸນ ອາຍຸສງ຺ຂາຣານໍ ປຣິກ຺ຂເຍນ ທຸພ຺ພລຕເຣ ປຣິຍນ຺ຕຄເຕ ຈ ວຕ຺ຖຸມ຺ຫິ ນິສ຺ສິຕຕ຺ຕາ ທຸພ຺ພລຕຣຎ຺ຈ ໂຫຕີຕິ ຕໍ ຣູປໍ ນສມຸຏ຺ຐາເປຕີຕິ, ອາຈຣິຍານນ຺ທຕ຺ເຖໂຣ ປນ ສພ຺ພສຕ຺ຕານໍປິ ຈຸຕິຈິຕ຺ຕໍ ຣູປໍ ນສມຸຏ຺ຐາເປຕີຕິ ອິຈ຺ຉຕິ. ຍຖາຫ-ຂີຓາສວານໍ ຈຸຕິຈິຕ຺ຕນ຺ຕິ ວິເສເສຕ຺ວາ ວຸຕ຺ຕໍ.

ກາມາວຈຣານໍ ປຈ຺ຉິມຈິຕ຺ຕສ຺ສ ອຸປ຺ປາທກ຺ຂເຓ ຍສ຺ສ ຈິຕ຺ຕສ຺ສ ອນນ຺ຕຣາ ກາມາວຈຣານໍ ປຈ຺ຉິມຈິຕ຺ຕໍ ອຸປ຺ປຊ຺ຊິສ຺ສຕິ. ຣູປາວຈເຣ ອຣູປາວຈເຣ ປຈ຺ຉິມຠວິການໍ ເຍຈ ຣູປາວຈຣໍ ອຣູປາວຈຣໍ ອຸປປຊ຺ຊິຕ຺ວາ ປຣິນິພ຺ພາຍິສ຺ສນ຺ຕິ, ເຕສໍ, ຈວນ຺ຕານໍ ເຕສໍ ວຈີ ສງ຺ຂາໂຣ ນິຣຸຊ຺ຌິສ຺ສຕິ, ໂນຈ ເຕສໍ ກາຍສງ຺ຂາໂຣ ນິຣຸຊ຺ຌຕີຕິ –

ປນ ວຈນໂຕ ອຎ຺ເຎສໍປິ ຈຸຕິຈິຕ຺ຕໍ ຣູປໍ ນສມຸຏ຺ຐາເປຕີຕິ ວິຎ຺ຎາຍຕິ. ນ ຫິ ຣູປສມຸຏ຺ຐາປກ ຈິຕ຺ຕສ຺ສ ຄພ຺ຠຄມນາທິ ວິນິພທ຺ຘາຠາເວ ກາຍສງ຺ຂາຣາສມຸຏ຺ຐາປນໍ ອຕ຺ຖິ, ນ ຈ ຍຸຕ຺ຕໍ ຈຸໂຕຈ ຈິຕ຺ຕສມຸຏ຺ຐານຎ຺ຈສ຺ສ ປວຕ຺ຕຕີຕິ. ນາປິ ຈຸຕິຈິຕ຺ຕໍ ຣູປໍ ສມຸຏ຺ຐາເປຕີຕິ ປາຬິ ອຕ຺ຖີຕິ.

ອນຸຏີກາຍໍ ປນ

ຕສ຺ມິໍ ປາເຐ ເຕສໍ ຈວນ຺ຕານໍ ໂນຈ ກາຍສງ຺ຂາໂຣ ນິຣຸຊ຺ຌຕີຕິ ວຈນໍ ນ ເກວລໍ ຈຸຕິຈິຕ຺ຕສ຺ເສວ ຣູປສມຸຏ຺ຐາປນາຠາວໍ ສາເຘຕິ, ອຖໂຂ ຕໂຕ ປຸຣິມານໍ ສພ຺ເພສໍ ມຣຓາສນ຺ນ ຈິຕ຺ຕານໍ ຣູປສມຸຏ຺ຐາປນາຠາວໍປິ ສາເຘຕິເຍວາຕິ ທີເປຕິ. ຈຸຕິ ຈິຕ຺ຕສ຺ມິໍຫິ ກາຍສງ຺ຂາຣສ຺ສ ນິໂຣເຘ ປຏິສິທ຺ເຘ ຕໂຕ ປຸພ຺ເພ ຍາວ ສຕ຺ຕຣສມຈິຕ຺ຕາ ເອຕ຺ຖນ຺ຕເຣ ຕສ຺ສ ອຸປ຺ປາໂທປິ ປຏິສິທ຺ໂຘເອວ ໂຫຕີຕິ. ສພ຺ພຎ຺ເຈຕໍ ວິຈາເຣຕພ຺ພໍ.

ກາຍສງ຺ຂາໂຣຕິ ຫິ ອສ຺ສາສປສ຺ສາໂສ ວຸຈ຺ຈຕິ. ໂສຈ ສຸຏ຺ຐຸ ໂອຬາຣິໂກ ຣູປຘມ຺ໂມຕິ ນຈຸຕິຈິຕ຺ເຕ ຕນ຺ນິໂຣຘາຠາວ ວຈເນນ ອິຕຣານິ ສຸຂຸມານິປິ ຣູປານິ ຈຸຕິຈິຕ຺ຕໍ ນຊເນຕີຕິ ສກ຺ກາ ວຕ຺ຕຸໍ.

[໑໙໒] ຍຎ຺ຈ ຕຕ຺ຖ

ນ ຫິ ຣູປສມຸຏ຺ຐາປກຈິຕ຺ຕສ຺ສ ຄພ຺ຠຄມນາທິ ວິນິພທ຺ຘາຠາເວ ກາຍສງ຺ຂາຣາສມຸຏ຺ຐາປນໍ ອຕ຺ຖີຕິ ວຸຕ຺ຕໍ. ຕໍປິ ນ ຍຸຊ຺ຊຕິ.

ຕານິເອວ ຫິ ຄພ຺ຠຄມນາທີນິ ອິມສ຺ສຕ຺ຖສ຺ສ ສາຘການິ ຠວິຕຸໍ ອຣຫນ຺ຕິ ໂອຬາຣິກສ຺ສ ກາຍສງ຺ຂາຣສ຺ສ ອສມຸຏ຺ຐາປກໍປິ ຈິຕ຺ຕໍ ອິຕຣໍ ສຸຂຸມຣູປໍ ປນ ສມຸຏ຺ຐາເປຕິເຍວາຕິ.

[໑໙໓] ຍໍປິ ຕຕ຺ຖ

ນ ຈ ຍຸຕ຺ຕໍ ຈຸໂຕຈ ຈິຕ຺ຕສມຸຏ຺ຐານຎ຺ຈສ຺ສ ປວຕ຺ຕຕີຕິ ວຸຕ຺ຕໍ. ຕໍປິ ອກາຣຓໍ.

ນ ຫິ ຈຸຕິໂຕ ປຣໍ ກຕິປຍຂຓມຕ຺ຕໍ ຈິຕ຺ຕຊຣູປປວຕ຺ຕິຍາ ໂກຈິ ວິໂຣໂຘ ອຕ຺ຖີຕິ.

ຍຎ຺ຈ ຕຕ຺ຖ

ນາປິ ຈຸຕິຈິຕ຺ຕໍ ຣູປໍ ສມຸຏ຺ຐາເປຕີຕິ ປາຬິ ອຕ຺ຖີຕິ ວຸຕ຺ຕໍ. ຕຕ຺ຖປິ ຈຸຕິຈິຕ຺ຕໍ ຣູປໍ ນສມຸຏ຺ຐາເປຕີຕິປິ ນຕ຺ຖິ, ອຎ຺ຎຕ຺ຣ ກາຍສງ຺ຂາຣາຕິ ນ ນ ສກ຺ກາ ວຕ຺ຕຸນ຺ຕິ.

ເອວໍ ປນ ຍຸຕ຺ຕໍ ສິຍາ, ຍຖາ ຣູປຘມ຺ມາ ອາທິໂຕ ປຏິສນ຺ຘິກາເລ ເອກຈິຕ຺ຕກ຺ຂຓມຕ຺ເຕ ປຈ຺ຈຍປຣິຕ຺ຕຕາຍວາ ອຕ຺ຕໂນ ທນ຺ຘວຸຕ຺ຕິ ຕາຍວາ ທຸພ຺ພລາ ໂຫນ຺ຕິ, ຕຖາ ປຣິໂຍສາເນປິ ມຣຓກາເລ ປຣິກ຺ຂີຍມານປຈ຺ຈຍຕາຍວາ ນິໂຣຘາສນ຺ນຕາຍວາ ປຣິທຸພ຺ພລາເອວ ໂຫນ຺ຕີຕິ ສກ຺ກາ ວຕ຺ຕຸໍ. ຕສ຺ມາ ວຕ຺ຖຸສ຺ສ ອາທິອນ຺ຕນິສ຺ສິຕານິ ປຏິສນ຺ຘິຈຸຕິຈິຕ຺ຕານິ ສມທຸພ຺ພລານິເອວ ໂຫນ຺ຕີຕິ ສກ຺ກາ ວິຎ຺ຎາຕຸນ຺ຕິ.

ວິຠາວນິຍໍ ປນ

ອຠິຘມ຺ມຕ຺ຖວິກາສນິຍຎ຺ຈ ປາຬິວິໂຣຘໍ ມຎ຺ຎມາໂນ ກິຎ຺ຈິມຕ຺ຕມ຺ປິ ອວິຈາເຣຕ຺ວາ ຏີກາສຸ ວຸຕ຺ຕນຍເມວ ສຸຏ຺ຐຸ ວິກາສຍິຕ຺ວາ ຄໂຕຕິ.

ປຖມຠວງ຺ຄມຸປາທາຍາຕິ ປຖມ ຠວງ຺ຄຈິຕ຺ຕສ຺ສ ອຸປ຺ປາທກ຺ຂຓໂຕ ປຏ຺ຐາຍ. ຊາຍນ຺ຕເມວາຕິ ອຸປ຺ປາທກ຺ຂເຓ ອຸປ຺ປາທກ຺ຂເຓ ອຸປ຺ປຊ຺ຊ ມານເມວ, ນ ຕິຏ຺ຐນ຺ຕໍ. ນຈ ຠິຊ຺ຊມານນ຺ຕິ ອຕ຺ໂຖ. ກາຣຓໍ ວຸຕ຺ຕເມວ. ຕຕ຺ຖາຕິ ຕສ຺ມິໍ ປຎ຺ຈສຕ຺ຕຕິວິເຘ ຈິຕ຺ເຕ. ອປ຺ປນາຊວນນ຺ຕິ ອຠິຎ຺ຎາທ຺ວຍວຊ຺ຊິຕໍ ຉພ຺ພີສຕິວິຘໍ ອປ຺ປນາຊວນຈິຕ຺ຕໍ. ອິຣິຍາປຖນ຺ຕິ ຄມນວຊ຺ຊິຕໍ ຕິວິຘໍປິ ອິຣິຍາປຖໍ.

[໑໙໔] ວິຠາວນິຍໍ ປນ

‘‘ຄມນາທີ’’ຕິ ວຸຕ຺ຕໍ. ຕໍ ນ ຍຸຊ຺ຊຕິ.

ນ ຫິ ອງ຺ຄປຈ຺ຈງ຺ຄານໍ ຈລນຜນ຺ທນມຕ຺ຕໍປິ ວິຎ຺ຎຕ຺ຕິຍາ ວິນາ ສິຊ຺ຌຕິ. ກຸໂຕ ຄມນໍ. ນຈ ຍຖາວຸຕ຺ຕໍ ອປ຺ປນາຊວນໍ ວິຎ຺ຎຕ຺ຕິໍ ສມຸຏ຺ຐາເປຕຸໍ ສກ຺ໂກຕີຕິ. ປິ ສທ຺ເທນ ຕໍ ນເກວລໍ ຣູປສມຸຏ຺ຐາປກມຕ຺ຕໍຕິ ທສ຺ເສຕິ. ສນ຺ນາເມຕີຕິ ສນ຺ຘາເຣຕິ ອຍເມວວາ ປາໂຐ ສິຍາ, ວກ຺ຂມາເນຫິ ຈິຕ຺ເຕຫິ ອຠິສງ຺ຂຕໍ ຍຖາປວຕ຺ຕໍ ອິຣິຍາປຖໍ ອປຕມານໍ ອຈລມານໍ ຘາເຣຕິ ອຸປຕ຺ຖມ຺ເຠຕີຕິ ອຕ຺ໂຖ. ອຸປຕ຺ຖມ຺ຠນຎ຺ເຈຕ຺ຖ ຍຖາປວຕ຺ຕສ຺ສ ອິຣິຍາປຖສ຺ສ ຣກ຺ຂນມຕ຺ຕໍ ທຏ຺ຐພ຺ພໍ. ນອຸກ຺ຂິປິຕ຺ວາ ວິຍ ອຠິນີຫຣຓໍ. ອິຕຣຖາ ຖມ຺ຠນວິຎ຺ຎຕ຺ຕິຍາ ປສງ຺ໂຄ ສິຍາຕິ. ເອຕ຺ຖຈ ຍຖານິສິນ຺ນສ຺ສວາ ຐິຕສ຺ສວາ ຠວງ຺ຄ ຈິຕ຺ເຕ ອພ຺ໂພກິຓ຺ເຓ ປວຕ຺ຕມາເນ ອງ຺ຄານິ ໂອສີທນ຺ຕິ ປຕນ຺ຕິ. ນ ຕຖາ ອິມສ຺ມິໍ ຉພ຺ພີສຕິວິເຘ ຊາຄຣຓຈິຕ຺ເຕ ວກ຺ຂມາເນສຸຈທ຺ວຕ຺ຕິໍສ ວິເຘສຸ ຊາຄຣຓຈິຕ຺ເຕສຸປວຕ຺ຕມາເນສຸ. ເຕສຸ ປນ ປວຕ຺ຕມາເນສຸ ອງ຺ຄານິ ອຸປຕ຺ຖທ຺ຘານິ ໂຫນ຺ຕິ. ນ ໂອສີທນ຺ຕິ ນ ປຕນ຺ຕິ. ປຸພ຺ເພ ຍຖາ ຖປິຕາເນວ ປວຕ຺ຕນ຺ຕີຕິ ເວທິຕພ຺ພໍ.

[໑໙໕] ວິຠາວນິຍໍ ປນ

‘‘ນ ເອວ ເມເຕສຸ ທ຺ວຕ຺ຕິໍສວິເຘສຸ ວກ຺ຂມາເນສຸ ຈ ຉພ຺ພີສຕິ ຍາ ຊາຄຣຓຈິຕ຺ເຕສຸ ປວຕ຺ຕມາເນສູ’’ຕິ ປາໂຐ.

ນ ເອວເມເຕສຸ ຉພ຺ພີສຕິຍາ ຊາຄຣຓຈິຕ຺ເຕສຸ ວກ຺ຂມາເນ ສຸຈ ທ຺ວຕ຺ຕິໍສ ວິເຘສຸ ປວຕ຺ຕມາເນສູຕິ ປນ ປາໂຐ ຍຸຕ຺ໂຕ. ໂວຏ຺ຐພ຺ພນນ຺ຕິ ມໂນທ຺ວາເຣ ອາວຊ຺ຊນມາຫ. ນ ຫິ ປຎ຺ຈທ຺ວາຣິການິ ຊວນ ຈິຕ຺ຕານິປິ ວິຎ຺ຎຕ຺ຕິໍ ສມຸຏ຺ຐາເປນ຺ຕິ. ອິຣິຍາປຖຸປຕ຺ຖມ຺ຠນ ມຕ຺ຕໍ ວາ ປິສທ຺ເທນ ຄຫິຖໍ ສນ຺ຘາຍ ໂວຏ຺ຐພ຺ພນາທີນິ ປຎ຺ຈທ຺ວາຣິການິປິ ຄຫິຕານິຕິ ທຏ຺ຐພ຺ພໍ. ເອຕ຺ຖຈ ອິຣິຍາປໂຖນາມ ຄມນາທິນາ ເຕນ ເຕນ ອວຕ຺ຖາວິເສເສນ ປວຕ຺ຕາ ຣູປຘມ຺ມາເອວ. ເອວໍ ສນ຺ເຕປິ ກິຎ຺ຈິຈິຕ຺ຕໍ ຣູປ ສາມຎ຺ຎເມວ ຊເນຕິ ນ ຕໂຕປຣໍ. ກິຎ຺ຈິ ອຎ຺ຎຈິຕ຺ຕສ຺ສ ວເສນ ຍຖາປວຕ຺ຕໍ ອິຣິຍາປຖໍ ຣກ຺ຂິຕຸໍເອວ ສກ຺ໂກຕິ, ນ ອປ຺ປວຕ຺ຕໍ ອິຣິຍາປຖໍ ປວຕ຺ເຕຕຸໍ. ກິຎ຺ຈິ ວິຎ຺ຎຕ຺ຕິໍ ສມຸຏ຺ຐາເປຕ຺ວາ ອປ຺ປວຕ຺ຕຎ຺ຈ ອິຣິຍາປຖໍ ປວຕ຺ເຕຕຸໍ ສກ຺ໂກຕິ. ອຎ຺ຎານິຈ ກາຍິກ ວາຈສິກ ວິກາຣານິ ຊເນຕຸໍ ສກ຺ໂກຕິ. ຍານິຈ ຈິຕ຺ຕານິ ອຸຕ຺ຕຣກິຈ຺ຈໍ ຊເນຕຸໍ ສກ຺ໂກນ຺ຕິ. ຕານິ ເຫຏ຺ຐິມເຫຏ຺ຐິມໍ ກິຈ຺ຈໍ ຊເນຕຸໍ ສກ຺ໂກນ຺ຕິເຍວາຕິ ທສ຺ສນຕ຺ຖໍ ອຍໍ ວິຠາໂຄ ກໂຕຕິ ເວທິຕພ຺ໂພ.

[໑໙໖] ຍໍ ປນ ວິຠາວນິຍໍ

‘‘ຍໍປນ ຈິຕ຺ຕໍ ວິຎ຺ຎຕ຺ຕິຊນກໍ, ຕໍ ເອກໍສໂຕ ອິຣິຍາປຖຸ ປຕ຺ຖມ຺ຠກໍ. ອິຣິຍາ ປຖສ຺ສ ວິຎ຺ຎຕ຺ຕິຍາ ສຫ ອວິນາຠາວໂຕ’’ຕິ ວຸຕ຺ຕໍ. ຕໍ ນ ຍຸຊ຺ຊຕິ.

ອິຘ ຫິ ອິຣິຍາປຖຸປຕ຺ຖມ຺ຠນໍນາມ ວິຎ຺ຎຕ຺ຕິຣຫິຕເມວາ ຘິປ຺ເປຕໍ, ນ ວິຎ຺ຎຕ຺ຕິສຫິຕໍ. ອິຕຣຖາ ອປ຺ປນາຊວນານໍປິ ວິຎ຺ຎຕ຺ຕິຊນກຕາ ອາປຊ຺ເຊຍ຺ຍາຕິ. ໂສມນສ຺ສຊວນານິ ເຕຣສາຕິ ຫສິຕຸປ຺ປາເທນ ສທ຺ຘິໍ ໂລຠມູລໂຕ ມຫາ ກຸສລໂຕ ມຫາ ກ຺ຣິຍໂຕ ຈ ຈຕ຺ຕາຣິຈຕ຺ຕາຣີຕິ ເຕຣສ ໂສມນສ຺ສຊວນານິ. ເຕສຸປນ ກຸສລາ ກຸສລໂຕ ອຏ຺ຐປຸຖຸຊ຺ຊນານໍ. ທິຏ຺ຐິວິປ຺ປຍຸຕ຺ຕາ ກຸສລກຸສລໂຕ ຉເສກ຺ຂານໍ. ກ຺ຣິຍໂຕ ປຎ຺ຈຂີຓາສວານນ຺ຕິ ທຏ຺ຐພ຺ພໍ. ສພ຺ພໍ ກາຍວຈີມໂນກມ຺ມໍ ຎາຓປຸພ຺ພງ຺ຄມໍ ຎາຓານຸປຣິວຕ຺ຕນ຺ຕິ ວຈນໂຕ ວິຈາຣຓກິຈ຺ຈຣຫິໂຕ ຫສິຕຸປ຺ປາໂທ ສພ຺ພຎ຺ຎຸພຸທ຺ຘານໍ ນສມ຺ຠວຕີຕິ ເອວໍ ປວຕ຺ໂຕ ວາໂທ ອຏ຺ຐກຖາຍໍ ປຏິກ຺ຂິຕ຺ໂຕເຍວ. ຕສ຺ມິໍວາເທ ຫິ ສຕິ ອິຕເຣສໍປິ ອເຫຕຸກຈິຕ຺ຕານໍ ຎາຓວິປ຺ປຍຸຕ຺ຕມຫາ ກ຺ຣິຍຊວນານຎ຺ຈ ພຸທ຺ຘານໍ ອສມ຺ຠໂວ ອາປຊ຺ຊຕິ. ຕສ຺ມາ ເຕສໍ ຫສິຕຸປ຺ປາທຈິຕ຺ເຕນ ປວຕ຺ຕສ຺ສ ສິຕກມ຺ມສ຺ສ ປຸພ຺ພາປຣປວຕ຺ຕານໍ ຎາຓານໍ ວເສນ ຎາຓປຸພ຺ພງ຺ຄມຕາ ຎາຓານຸປຣິວຕ຺ຕຕາ ຈ ເວທິຕພ຺ພາຕິ. ສີຕຸຓ຺ໂຫຕຸ ສມຎ຺ຎາຕາຕິ ອິທໍ ສີຕໍ ອິທໍ ອຸຓ຺ຫນ຺ຕິ ເອວໍ ສພ຺ພ ໂລກິຍມຫາຊເນຫິ ສຸຏ຺ຐຸ ປຣິຈ຺ຉິນ຺ທິຕ຺ວາ ຎາຕາ. ຐິຕິປ຺ປຕ຺ຕາວາຕິ ອຕ຺ຕໂນ ຐິຕິຠາວໍ ຐິຕິກ຺ຂຓໍວາ ປຕ຺ຕາເອວ. ນ ປນ ຈິຕ຺ຕມິວ ຊາຍນ຺ຕ ມຕ຺ຕາຕິ ອຕ຺ໂຖ. ກາຣຓໍ ວຸຕ຺ຕເມວ.

[໑໙໗] ຍໍ ປນ ວິຠາວນິຍໍ

‘‘ປຈ຺ຉາຊາຕາທິປຈ຺ຈຍຸປຕ຺ຖມ຺ຠລາເຠນ ຐິຕິກ຺ຂເຓເອວ ອຸຕຸໂອຊານໍ ພລວຠາໂວຕິ ວຸຕ຺ຕໍ ເຕໂຊຘາຕຸ ຐິຕິປ຺ປຕ຺ຕາຕິອາທິ’’. ຕຕ຺ຖ ປຈ຺ຉາຊາຕປຈ຺ຈຍວຈນໍ ເຫຏ຺ຐາ ວິຈາຣິຕເມວ.

ອປິຈ, ຍທິ ອຸຕຸໂນ ພລວຠາໂວ ຣູປຸປ຺ປາທນຎ຺ຈ ປຈ຺ຉາຊາຕປຈ຺ຈຍາຍຕ຺ຕໍ ສິຍາ. ເອວໍ ສຕິ ໂສ ປຏິສນ຺ຘິຈິຕ຺ຕສ຺ສ ຐິຕິກ຺ຂເຓ ຣູປໍ ນ ສມຸຏ຺ຐາເປຍ຺ຍ, ຕທາ ປຈ຺ຉາຊາຕປຈ຺ຈຍສ຺ເສວ ອຠາວໂຕ. ວກ຺ຂຕິຈ ຐິຕິກາລມຸປາທາຍ ອຸຕຸສມຸຏ຺ຐານາຕິ. ເອຕ຺ຖຈ ຐິຕິກາລນ຺ຕິ ປຏິສນ຺ຘິຈິຕ຺ຕສ຺ສ ຐີຕິກາໂລ ວຸຕ຺ໂຕຕິ. ຕສ຺ມາ ປຈ຺ຉາຊາຕປຈ຺ຈຍວຈນໍ ວິຈາເຣຕ຺ວາ ສມ຺ປຏິຈ຺ຉິຕພ຺ພນ຺ຕິ. ໂອຊາສງ຺ຂາໂຕ ອາຫາໂຣຕິ ກມ຺ມສມຸຏ຺ຐານາທິວເສນ ຈຕຸພ຺ພິໂຘ ອຊ຺ຌຕ຺ຕສນ຺ຕານ ຄໂຕອສິຕປີຕຂາຍິຕສາຍິຕວເສນ ຈຕຸພ຺ພິໂຘ, ພຫິທ຺ຘສນ຺ຕາ ນຄໂຕຈ ໂອຊາສງ຺ຂາໂຕ ທຸວິຘາຫາໂຣ. ຕທຸຠຍາປິຈ ສໍສຄ຺ຄ ວເສນ ລທ຺ຘຸປຕ຺ຖມ຺ຠາ ເອວຣູປໍ ສມຸຏ຺ຐາເປນ຺ຕີຕິ ວຸຕ຺ຕໍ ອຊ຺ໂຌຫຣຓ ກາເລຕິ. ເອຕ຺ຖຈ ພຫິທ຺ຘາສມ຺ຠູເຕນ ອຸຕຸນາ ສຫ ອຊ຺ຌຕ຺ຕ ສມ຺ຠູຕານໍ ຈຕຸສມຸຏ຺ຐານານໍ ອຸຕຸໂອຊານໍ ວິຍ ພຫິທ຺ຘາສມ຺ຠູຕາຍ ໂອຊາຍປິ ອຊ຺ຌຕ຺ຕໍ ຣູປສມຸຏ຺ຐານໍ ສພ຺ພອຏ຺ຐກຖາສຸ ວຸຕ຺ຕໍ.

ຍຖາຫ-ມຊ຺ຌິມຏ຺ຐກຖາຍໍ

ກພຬີກາຣາຫາໂຣ ຕາວ ມຸເຂ ຖປິຕມຕ຺ໂຕ ເອວ ອຏ຺ຐຣູປານິ ສມຸຏ຺ຐາເປຕິ. ທນ຺ຕວິຈຸຓ຺ຓິຕໍ ປນ ອຊ຺ໂຌຫຣີຍມານໍ ເອເກກໍ ສິຕ຺ຖໍ ອຏ຺ຐ ອຏ຺ຐ ຣູປານິ ສມຸຏ຺ຐາເປຕີຕິ.

ອາຈຣິຍຘມ຺ມປາລຕ຺ເຖເຣນ ປນ ຍທິ ພຫິທ຺ຘສມ຺ຠູຕາ ໂອຊາ ຣູປໍ ສມຸຏ຺ຐາເປຍ຺ຍ, ເອວໍ ສຕິ ຍຖາ ພຫິທ຺ຘສມ຺ຠູໂຕ ອຸຕຸ ອຊ຺ຌຕ຺ຕຎ຺ຈ ພຫິທ຺ຘາຈ ຣູປໍ ສມຸຏ຺ຐາເປຕິ. ຕຖາ ສາ ພຫິທ຺ຘາປິ ຣູປໍ ສມຸຏ຺ຐາເປຍ຺ຍ. ນ ປນ ສມຸຏ຺ຐາເປຕິ. ຕສ຺ມາ ສາ ອຊ຺ຌຕ຺ຕໍ ປຕ຺ວາປິ ຣູປໍ ນ ສມຸຏ຺ຐາ ເປຕິເຍວ. ເອກນ຺ເຕນ ປນ ອຊ຺ຌຕ຺ຕໂອຊາເອວ ສມຸຏ຺ຐາເປຕິ. ສາ ປນ ຕສ຺ສາ ອຸປຕ຺ຖມ຺ຠນປຈ຺ຈໂຍເອວ ໂຫຕີຕິ ອຘິປ຺ປາເຍນ ມຸເຂ ຖປິຕມຕ຺ໂຕເອວ. ນ ສງ຺ຂາທິໂຕ. ຕຕ຺ຕເກນປິ ອພ຺ຠນ຺ຕຣສ຺ສ ປຈ຺ຈໂຍ ໂຫຕິເຍວ, ເກນາຫ ອຏ຺ຐ ອຏ຺ຐ ຣູປານິ ສມຸຏ຺ຐາເປຕີຕິ ມຊ຺ຌິມຏີກາຍໍ ວຸຕ຺ຕໍ. ຍສ຺ມາ ປນ ອຸປາທິນ຺ນກາ ອຸຕຸ ໂອຊານາມ ສຸຏ຺ຐຸ ປຓີຕຣູປາ ໂຫນ຺ຕິ, ຕສ຺ມາ ພຫິທ຺ຘາ ໂອຊາປິ ອຊ຺ຌຕ຺ຕໍ ປຕ຺ວາ ເຕນ ອຸຕຸນາ ສຸຏ຺ຐຸ ເສທິຍມານາ ຕາຍຈ ໂອຊາຍ ສຸຏ຺ຐຸ ອຸປຕ຺ຖມ຺ຠີຍ ມານາ ສຣີເຣ ເມທສິເນຫຸປຈຍວເສນ ຣູປໍ ສມຸຏ຺ຐາເປຕິເຍວາຕິ ຍຸຕ຺ຕໍ. ອຊ຺ໂຌຫຣຓກາເລຕິ ອິທຎ຺ຈ ສຸຏ຺ຐຸ ພລວຠາວປ຺ປຕ຺ຕ ກາລໍ ສນ຺ຘາຍ ວຸຕ຺ຕໍ. ວິສຸທ຺ຘິມຄ຺ເຄ ປນ ມາຕຣາ ປຣິຠຸຕ຺ຕາຫາໂຣປິ ທາຣກສ຺ສ ສຣຣໍ ຜຣິຕ຺ວາ ຣູປໍ ສມຸຏ຺ຐາເປຕິ. ສຣີເຣ ມກ຺ຂິຕາຫາ ໂຣປິ ຣູປໍ ສມຸຏ຺ຐາເປຕີຕິ ວຸຕ຺ຕໍ. ມຸເຂ ຖປິຕມຕ຺ໂຕເອວ ອຏ຺ຐຣູປານິ ສມຸຏ຺ຐາເປຕີຕິຈ ປຸພ຺ເພ ວຸຕ຺ຕນ຺ຕິ. ຐານ ປຕ຺ໂຕວາຕິ ອຕ຺ຕໂນ ຐິຕິກ຺ຂຓໍ ປຕ຺ໂຕເອວ. ເອຕ຺ຖຈ ຈຕູສຸ ສມຸຏ຺ຐາເນສຸ ອຸຕຸເອວ ມຫນ຺ໂຕ ມຫາຖາໂມ ມຫາວິປ຺ຜາໂຣຈ ໂຫຕິ. ໂສ ຫິ ສກລສ຺ສປິ ໂອກາສໂລກສ຺ສ ພຫິທ຺ຘາ ສງ຺ຂາຣໂລກສ຺ສຈ ສມຸຏ຺ຐາ ປໂກ ວິນາສໂກ ຈ ໂຫຕິ. ສຕ຺ຕໂລກສ຺ສຈ ໂສເອວ ມຫນ຺ໂຕ ອຊ຺ຌຕ຺ຕສມ຺ຠາຣຠູໂຕ ໂຫຕິ. ອິຕຣານິ ປນ ຕີຓິ ຕສ຺ສ ປຣິວາຣມຕ຺ຕານິເອວ ສມ຺ປຊ຺ຊນ຺ຕີຕິ.

ຫທຍ ອິນ຺ທ຺ຣິຍ ຣູປານິ ກມ຺ມຊາເນວ, ນ ຈິຕ຺ຕຊາທິນິ. ຍທິເອວໍ ວິປ຺ປສນ຺ນານິ ໂຂ ເຕ ອາວຸໂສ ສາຣິປຸຕ຺ຕ ອິນ຺ທ຺ຣິຍານິ. ກຕເຣນ ຕ຺ວໍ ເອຕຣຫິ ວິຫາເຣນ ວິຫຣສີຕິ ກສ຺ມາ ວຸຕ຺ຕນ຺ຕິ. ອິນ຺ທ຺ຣິຍສມ຺ຠາຣານໍ ວຓ຺ຓານໍ ສມາປຕ຺ຕິ ຈິຕ຺ຕສມຸຏ຺ຐິຕານໍ ວິສທວິປ຺ປສນ຺ນຕາວເສນ ອຸປຈຣິ ຕຕ຺ຕາຕິ. ຕຖາ ຫິ ເອກາພທ຺ຘປວຕ຺ຕານິ ຈຕຸຊຣູປານິ ເອກສ຺ມິໍ ວິປ຺ປສນ຺ເນ ສພ຺ພານິ ວິປ຺ປສນ຺ນາເນວ ໂຫນ຺ຕິ. ມິລາເຕຈ ມິລາຕາເນວາຕິ. ອຸຕຸຈິຕ຺ຕາຫາຣາ ປນ ເຕສໍ ນວນ຺ນໍ ອຸປຕ຺ຖມ຺ຠນປຈ຺ຈຍາ ໂຫນ຺ຕີຕິ ເວທິຕພ຺ພໍ. ເອຕ຺ຖ ຈ ອຸປ຺ປລປທຸມານິ ວິຍ ກມ຺ມຊຣູປານິ ທຏ຺ຐພ຺ພານິ. ເຕສໍ ພີຊໍ ວິຍ ກມ຺ມໍ. ກທ຺ທໂມທການິ ວິຍ ອຸຕຸອາຫາຣາທີນິ. ວິຎ຺ຎຕ຺ຕິ ທ຺ວຍໍ ຈິຕ຺ຕຊເມວ. ຕຖາ ຫິ ຕໍ ຈິຕ຺ຕສຫຠູ ຈິຕ຺ຕານຸປຣິວຕ຺ຕິຘມ຺ເມສຸ ຠຄວຕາ ນິທ຺ທິຏ຺ຐນ຺ຕິ. ສທ຺ໂທຈິຕ຺ໂຕຕຸໂຊຕິ ກສ຺ມາ ວຸຕ຺ຕໍ. ນນຸນິຘິກຓ຺ຑສຸຕ຺ເຕ ສຸວຓ຺ຓຕາ ສຸສຣຕາ ສຸສຓ຺ຐານໍ ສຸຣູປຕາຕິອາທິນາ ຕາທິເສນ ກມ຺ມວິເສເສນ ສທ຺ທສມ຺ປຕ຺ຕິນາມ ວຸຕ຺ຕາຕິ. ສຈ຺ຈໍ, ກມ຺ມວິເສເສນ ປນ ຍຖາ ສຸວິສໂທ ສຸມຘຸໂຣ ສທ຺ໂທ ປວຕ຺ຕຕິ, ຕຖາ ຐານກຣຓຄຕານໍ ອຸປາທິນ຺ນກສຣີຣານໍ ສຸສຓ຺ຐິຕຕາ ວາຕ ເສມ຺ຫາທີຫິ ອປລິພຸທ຺ຘຕາຈ ໂຫຕິ. ຕສ຺ມາ ຕມ຺ມູລິກາສທ຺ທສມ຺ປຕ຺ຕິ ກມ຺ມຜເລສຸ ປກ຺ຂິປິຕ຺ວາ ສຸສຣຕາຕິ ວຸຕ຺ຕາ. ນ ເອກນ຺ເຕນ ສທ຺ທສ຺ສ ກມ຺ມຊນິຕຕ຺ຕາຕິ ເວທິຕພ຺ພາ.

ລຫຸຕາທິຕ຺ຕຍໍ ອຸຕຸຈິຕ຺ຕາຫາເຣຫິ ສມ຺ໂຠຕີຕິ ກສ຺ມາ ວຸຕ຺ຕໍ. ນນຸ ອປ຺ປາພາຘສໍວຕ຺ຕນິກາ ເອສາ ມາຓວ ປຏິປທາ, ຍທິທໍ ອວິຫິໍສາຕິ ວຸຕ຺ຕໍ. ອປ຺ປາພາຘ ປຈ຺ຈຍສມຸຏ຺ຐິຕຎ຺ຈ ເອຕໍ ຣູປຕ຺ຕຍໍ. ຕຖາ ຫິ ທນ຺ຘຕ຺ຕາທິ ກຣ ຘາຕຸກ຺ໂຂຕ ປຏິປກ຺ຂປຈ຺ຈຍ ສມຸຏ຺ຐານຕາ ເອຕສ຺ສ ວຸຕ຺ຕາຕິ. ວຸຈ຺ຈເຕ, ກມ຺ມຊຣູປານິນາມ ອຸທເກ ປກ຺ຂິຕ຺ຕານິ ສຕປາກເຕລານິ ວິຍ ປກຕິຍາວ ກມ຺ມານຸຣູປໍ ລຫຸ ມຸທຸ ກມ຺ມຎ຺ຎ ຠູຕານິ ໂຫນ຺ຕິ. ຕສ຺ມາ ເຕສໍ ວິສຸໍ ລຫຸຕາທິ ວິກາໂຣນາມ ນຕ຺ຖິ. ຍໂຕ ເຕສໍ ເອກສ຺ມິໍຠເວ ເອກາອທ຺ຘາ ປຈ຺ຈຸປ຺ປນ຺ນຕາວ ລພ຺ຠຕີຕິ. ເອວຎ຺ຈ ກຕ຺ວາ ຍມເກສຸປິ ເຕສໍ ກາລເຠໂທ ປຏິສນ຺ຘິວຸຕິປຣິຈ຺ຉິນ຺ເນນ ອທ຺ຘາ ປຈ຺ຈຸປ຺ປນ຺ເນເນວ ຄຫິໂຕຕິ. ຍສ຺ມາ ປນ ຈິຕ຺ຕໍນາມ ນານານີວຣຓເຠທວເສນວາ ສຸຂ ທຸກ຺ຂ ປີຕິ ປສ຺ສທ຺ຘິ ສທ຺ຘາ ປຎ຺ຎາທິ ວເສນວາ ນານາ ຂເຓສຸ ນານາ ອວຕ຺ຖາ ຍຸຕ຺ຕໍ ໂຫຕິ. ຕຖາ ອຸຕຸອາຫາຣາຈ ສປ຺ປາຍາ ສປ຺ປາຍເຠທວເສນ. ຕສ຺ມາ ເຕຫິ ຕີຫິ ສມຸຏ຺ຐິຕ ຣູປານິເອວ ນານາຂເຓສຸ ຄຣຸກລຫຸກາທິ ວເສນ ນານາວິກາຣຍຸຕ຺ຕານິ ໂຫນ຺ຕິ. ຍໂຕ ເຕສໍ ສນ຺ຕຕິ ສມຍ ວເສນ ກາລເຠໂທ ລພ຺ຠຕິ. ເອວຎ຺ຈ ກຕ຺ວາ ຍມເກສຸປິ ອກມ຺ມຊານໍ ປວຕ຺ຕິກາເລ ຂຓສນ຺ຕຕິວເສນປິ ກາລເຠໂທ ຄຫິໂຕຕິ. ນນຸ ກມ຺ມວິປາກຊາ ອາພາຘາຕິ ວຸຕ຺ຕໍ. ສຕິຈ ກມ຺ມ ສມຸຏ຺ຐາເນ ອາພາຘຣູເປ ຕໂຕວຸຏ຺ຐານຠູໂຕ ກມ຺ມໂຊ ລຫຸຕາທິ ຄຸໂຓປິ ວິສຸໍ ລພ຺ຠມາໂນ ສິຍາຕິ. ນ. ເຍສຎ຺ຫິ ວເສນ ອິມສ຺ມິໍ ສຣີເຣ ກມ຺ມວິປາກຊານາມ ອາພາຘາ ອຸປ຺ປຊ຺ຊນ຺ຕິ. ຕານິ ອຸປປີຬກຸປ ຆາຕກກມ຺ມານິປິ ຄຕິກາລປໂຍຄ ວິປຕ຺ຕິໂຍ ລຠມານານິ ເອວ ສຣີຣຏ຺ຐກາ ປຖວາທໂຍ ວາຕປິຕ຺ຕາທໂຍຈ ອຸຕຸສມຸຏ຺ຐານາ ຘາຕຸໂຍ ໂຂເຠຕ຺ວາ ນານາພາເຘ ອຸປ຺ປາເທນ຺ຕິ. ອຸຕຸສມຸຏ຺ຐານາສຸ ປນ ຂຸພ຺ຠິຕາສຸ ອິຕຣານິ ຕທນຸຄຕິການິ ເອວ ໂຫນ຺ຕິ. ເຕເນວ ຫິ ສີເຕນປິ ຣຸປ຺ປຕິ, ອຸຓ຺ເຫນປິ ຣຸປ຺ປຕິ, ຊິຄຈ຺ຉາຍປິ ຣຸປ຺ປຕິ, ວິປາສາຍປິ ຣຸປ຺ປຕີຕິອາທິນາ ອຸຕຸປຘາໂນວ ຣູປຘມ຺ມານໍ ຣຸປ຺ປນປຈ຺ຈໂຍ ວຸຕ຺ໂຕຕິ. ຕສ຺ມາ ເກວລໍ ກມ຺ມສມຸຏ຺ຐາໂນ ອາພາໂຘນາມ ນຕ຺ຖິ. ຍໂຕ ຍຖາວຸຕ຺ໂຕ ກມ຺ມໂຊ ລຫຸຕາທິຄຸໂຓນາມ ວິສຸໍ ລພ຺ຠມາໂນ ສິຍາຕິ.

ຍສ຺ມາ ປນ ອວິຫິໍສາ ກມ຺ມນິພ຺ພຕ຺ຕາ ສຕ຺ຕາ ເຕສໍ ອຸປປີຬກາທີນໍ ກມ຺ມານໍ ສຸວິທູຣຕາຍເຈວ ສຣີຣໂກຏ຺ຐາສານໍ ຆນສິນິທ຺ຘສຓ຺ຐິຕິຍາ ທຸກ຺ໂຂຠນິຍຕາຍຈ ນິພ຺ພຕ຺ຕຠເວ ນິຣາພາຘາ ໂຫນ຺ຕິ. ຕສ຺ມາ ຕທຕ຺ຖໍ ສນ຺ຘາຍ ອປ຺ປາພາຘສໍວຕ຺ຕນິກາ ເອສາ ມາຓວປຏິປທາ. ຍທິທໍ ອວິຫິໍສາຕິ ວຸຕ຺ຕໍ, ນ ປນ ອປ຺ປາພາຘນິມິຕ຺ຕສ຺ສ ລຫຸຕາທິຕ຺ຕຍສ຺ສ ກມ຺ມສມຸຏ຺ຐານຕາຍ. ເອວຎ຺ຈ ກຕ຺ວາ ຣູປກຓ຺ເຑນ ກມ຺ມສ຺ສກຏຕ຺ຕາຣູເປສຸ ເອວ ເອຕໍ ຣູປຕ຺ຕຍໍ ນິທ຺ທິຏ຺ຐນ຺ຕິ ທຏ຺ຐພ຺ພໍ. ຣູປກລາປານາມ ເອກສ຺ມິໍ ປຣມາຓຸສ຺ມິໍປິ ພຫຸວິຘາ ຫຸຕ຺ວາ ປວຕ຺ຕນ຺ຕິ. ຕສ຺ມາ ຈຕຸຊຣູປ ກລາເປສຸ ຆນຠາເວນ ປວຕ຺ຕມາເນສຸ ກລາປນ຺ຕຣຠູຕາ ອາກາສຘາຕຸປິ ທິສ຺ສມານາເອວ ໂຫຕີຕິ ກຕ຺ວາ ຈຕຸເຊສຸ ຕສ຺ສາ ຄຫຓໍ ກຕໍ. ກາມໍ ສພ຺ພານິປິ ອນິປ຺ຜນ຺ນຣູປານິ ເກນຈິ ປຈ຺ຈເຍນ ອນິປ຺ຜາທິຕານິ ໂຫນ຺ຕິ. ເຕສຸ ປນ ນ ຕຖາ ລກ຺ຂຓຣູປານິ. ຍຖາ ອິຕຣານິ ຈິຕ຺ຕາທິ ປຈ຺ຈຍ ວິເສເສນ ທິສ຺ສມານ ວິເສສານິ ໂຫນ຺ຕີຕິ ວຸຕ຺ຕໍ ລກ຺ຂຓຣູປານິ ນ ກຸໂຕຈິ ຊາຍນ຺ຕີຕິ. ຊາຍມານາທິ ຣູປານນ຺ຕິ ຊາຍມານ ຊິຍ຺ຍມານ ມິຍ຺ຍມານານໍ ຣູປກລາປານໍ. ສຠາວຕ຺ຕາຕິ ຊາຕິຊຣາມຣຓສງ຺ຂາຕລກ຺ຂຓສຠາວມຕ຺ຕຕ຺ຕາ. ເອຕ຺ຖຈ ຣູປກຓ຺ເຑ ອຸຕຸສມຸຏ຺ຐານນ຺ຕິ ຈ ອາຫາຣສມຸຏ຺ຐານນ຺ຕິ ຈ ວຸຕ຺ຕໍ ນຕ຺ຖິ. ປຏ຺ຐາເນ ເອວ ວຸຕ຺ຕໍ.

ເອຕ຺ຖ ສິຍາ, ຊຣຕາ ອນິຈ຺ຈຕາ ປາຬິຍເມວ ນ ກຸໂຕຈິ ສມຸຏ຺ຐານາຕິ ວຸຕ຺ຕາ. ຕສ຺ມາ ອິຘປິ ຕາສໍ ນກຸໂຕຈິ ສມຸຏ຺ຐາເນສຸ ຄຫຓໍ ຍຸຕ຺ຕໍ. ອຸປຈຍສນ຺ຕຕິໂຍ ປນ ປາຬິຍໍປິ ກຸໂຕຈິ ສມຸຏ຺ຐາເນສຸ ວຸຕ຺ຕາ. ອຏ຺ຐກຖາຍໍປິ ຕາຫິ ສທ຺ຘິໍ ວິສຕິ ກມ຺ມຊຣູປານິ ສຕ຺ຕຣສ ຈິຕ຺ຕຊຣູປານິ ຈຸທ຺ທສ ອຸຕຸຊຣູປານິ ເຕຣສ ອາຫາຣຊ ຣູປານິ ວຸຕ຺ຕານິ. ຕສ຺ມາ ອິຘ ຕາສໍ ນກຸໂຕຈິສມຸຏ຺ຐານຕາ ນວຕ຺ຕພ຺ພາຕິ. ວຸຈ຺ຈເຕ, ຣູປຊນການໍ ຊນນພ຺ຍາປາໂຣນາມ ອຕ຺ຕນາ ຊນິຕຣູປານໍ ອຸປ຺ປາທກ຺ຂເຓ ເອວ ຜຣຕິ. ນ-ຕໂຕ ປຣໍ, ຕສ຺ມາ ຕສ຺ມິໍ ຂເຓ ລພ຺ຠມານາ ອຸປຈຍສນ຺ຕຕິໂຍເຍວ ກຸໂຕຈິ ຊາຕປຣິຍາຍໍ ອຣຫນ຺ຕິ, ນ ຊຣຕາ ອນິຈ຺ຈຕາໂຍຕິ ກຕ຺ວາ ປາຬິຍໍ ອຏ຺ຐກຖາ ຍໍຈ ຕາສໍເອວ ກຸໂຕຈິ ສມຸຏ຺ຐາເນສຸ ຄຫຓໍ ກຕໍ. ອປິຈ, ປຸພ຺ເພ ອຊາຕາ ຘມ຺ມາ ປຈ຺ຈເຍ ສຕິ ຊາຍນ຺ຕິ. ອສຕິ ນ ຊາຍນ຺ຕີຕິ ອຕ຺ຖິ. ຊາຕາ ປນ ຘມ຺ມາ ປຈ຺ຈເຍ ສຕິ ຊິຍ຺ຍນ຺ຕິ, ມິຍ຺ຍນ຺ຕິ. ອສຕິ ນຊິຍ຺ຍນ຺ຕິ ນມິຍ຺ຍນ຺ຕີຕິ ນຕ຺ຖິ, ຕສ຺ມາ ປຸຣິມານໍ ທ຺ວິນ຺ນໍ ປວຕ຺ຕິ ເອກນ຺ເຕນ ປຈ຺ຈຍາຍຕ຺ຕາ ໂຫຕິ. ປຈ຺ຉິມານໍ ທ຺ວິນ຺ນໍ ປວຕ຺ຕິ ປນ ເອກນ຺ເຕນ ປຈ຺ຈຍ ນິຣເປກ຺ຂາ ໂຫຕີຕິ ອິມິນາ ປຣິຍາເຍນ ຕາສໍ ເຕສຸ ຄຫຓໍ ອຄຫຓຎ຺ຈ ເວທິຕພ຺ພໍ. ຍໍ ປນ ສຸຕ຺ຕປເທສຸ ຊຣາມຣຓໍ ຠິກ຺ຂເວ ສງ຺ຂຕໍ ປຏິຈ຺ຈ ສມຸປ຺ປນ຺ນນ຺ຕິ ວຸຕ຺ຕໍ. ຕໍ ຊາຕິຍາ ສຕິເອວ ຕທຸຠຍໍ ປຎ຺ຎາຍຕິ. ອສຕິ ນ ປຎ຺ຎາຍຕີຕິ ອິມິນາ ປຣິຍາເຍນ ວຸຕ຺ຕນ຺ຕິ ເວທິຕພ຺ພໍ. ອິຘ ປນ ປຸພ຺ເພ ວຸຕ຺ຕນເຍນ ອິຕຣ ອນິປ຺ຜນ຺ນຣູປານິ ວິຍ ຈຕ຺ຕາຣິປິ ເອຕານິ ຈິຕ຺ຕາທິປຈ຺ຈຍວິເສເສນ ທິສ຺ສມານວິເສສານິ ນ ໂຫນ຺ຕີຕິ ຈຕຸນ຺ນໍປິ ນ ກຸໂຕຈິ ຊາຕຕາ ວຸຕ຺ຕາ. ເອວໍສນ຺ເຕປິ ສາຣຕຣໍ ປາຬິນຍໍ ອຕິຘາວນ຺ໂຕ ວິຍ ໂຫຕີຕິ ອຸປຈຍສນ຺ຕ ຕີນໍ ກຸໂຕຈິ ສມຸຏ຺ຐາເນສຸ ສງ຺ຄໂຫເອວ ເສຍ຺ໂຍຕິ. [ຣູປສມຸຏ຺ຐານນໂຍ]

໑໕໙. ເອໂກ ເອວ ຊາຕິ ສງ຺ຂາໂຕ ອຸປ຺ປາໂທ ເອເຕສນ຺ຕິ ເອກຸປ຺ປາທາ. ເອໂກເອວ ອນິຈ຺ຈຕາສງ຺ຂາໂຕ ນິໂຣໂຘ ເອເຕສນ຺ຕິ ເອກນິໂຣຘາ. ເອກສທ຺ໂທ ເຈຕ຺ຖ ສງ຺ຂາເນ ປວຕ຺ໂຕ. ຕສ຺ມາ ເຕນ ຍານິ ຣູປານິ ເອກາຍເອວ ຊາຕິຍາ ຊາຍນ຺ຕິ. ເອກາຍ ເອວ ອນິຈ຺ຈຕາຍ ນິຣຸຊ຺ຌນ຺ຕິ. ເຕສໍ ປິຓ຺ຑິ ອິຘ ຣູປກລາໂປນາມາຕິ ທສ຺ເສຕິ. ເຍ ປນ ກລາປຄຕ ຣູປຄຓນາຍ ເອກສ຺ມິໍ ກລາເປປິ ອເນການິ ຊາຕິອາທີນິ ກປ຺ເປນ຺ຕິ, ເຕສໍ ມູລຏີກາຍ ນສເມຕິ. ຍຸຕ຺ຕິຈ ນຕ຺ຖິ. ວຸຕ຺ຕຎ຺ຫິ ຕຕ຺ຖ ເອເກກກລາປ ປຣິຍາປນ຺ນານໍ ຣູປານໍ ສເຫວ ອຸປ຺ປາທາທິປວຕ຺ຕິໂຕ ເອເກກກລາປສ຺ສ ອຸປ຺ປາທາທໂຍ ເອເກກາວ ໂຫນ຺ຕີຕິ ຍຖາ ເອເກກສ຺ສ ກລາປສ຺ສ ຊີວິຕິນ຺ທ຺ຣິຍໍ ກລາປາ ນຸປາລກໍ ອຸປາທາຍ ຣູປນ຺ຕິ ວຸຈ຺ຈຕິ. ເອວໍ ກລາປຸປ຺ປາທາທິ ສຠາວາ ຊາຕິອາທໂຍ ອຸປາທາຍຣູປານິຈ຺ເຈວ ວຸຈ຺ຈນ຺ຕິ. ເອວໍ ວິກາຣປຣິຈ຺ເຉທ ຣູປານິຈ ໂຍເຊຕພ຺ພານີຕິ. ຍທິຈ ໂຍ ອາຍຕນານໍ ອາຈໂຍ. ໂສ ຣູປສ຺ສ ອຸປຈໂຍຕິຈ ໂຍ ຣູປສ຺ສ ອຸປຈໂຍ. ສາຣູປສ຺ສ ສນ຺ຕຕີຕິຈ ວຸຕ຺ຕຕ຺ຕາ ຕານິ ຊາຕິອາທີນິ ລກ຺ຂຓຣູປານິ ວິສຸໍວິສຸໍ ຣູປານໍເອວ, ນກລາປສ຺ສາຕິ ວຸຈ຺ເຈຍ຺ຍຸໍ. ຈຕຸນ຺ນໍ ມຫາຠູຕານໍ ອຸປາທາຍ ປສາໂທ ຣູປີນໍ ຘມ຺ມານໍ ອາຍູຕິອາທິນາ ວຸຕ຺ຕຕ຺ຕາ ຈກ຺ຂາທິ ຊີວິຕາທີນິປິ ເອກສ຺ມິໍ ກລາເປ ອເນການິເອວ ອາປຊ຺ເຊຍ຺ຍຸໍ. ຕສ຺ມາ ຕຖາ ກປ຺ປນໍ ອກຕ຺ວາ ເອກສ຺ມິໍ ກລາເປ ອຎ຺ຎານິ ອຸປາທາຣູປານິ ວິຍ ລກ຺ຂຓຣູປານິປິ ເອເກການິເອວາຕິ ນິຏ຺ຐໍ ຄນ຺ຕພ຺ພນ຺ຕິ.

ເອໂກ ສມາໂນ ມຫາຠູຕສງ຺ຂາໂຕ ນິສ຺ສໂຍ ເອເຕສນ຺ຕິ ເອກນິສ຺ສຍາ. ເອຕ຺ຖ ປນ ສມານຕ຺ເຖ ເອກສທ຺ໂທ ຍຸຕ຺ໂຕ. ຈຕຸນ຺ນໍ ຠູຕານໍ ນິສ຺ສຍຕາສມ຺ຠວໂຕ. ຍານິຈເອກຸປ຺ປາທຕາທີຫິຕີຫິລກ຺ຂເຓຫິ ຍຸຕ຺ຕານິ. ຕານິ ເອກນ຺ເຕນ ສຫວຸຕ຺ຕີນິ ນາມ ໂຫນ຺ຕີຕິ ວຸຕ຺ຕໍ ສຫວຸຕ຺ຕິໂນຕິ. ທສປຣິມາຓານິອສ຺ສາຕິທສກໍ. ທສນ຺ນໍ ສມູໂຫ ວາ ທສກໍ. ຈກ຺ຂຸນາ ອຸປລກ຺ຂິຕໍ ທສກນ຺ຕິ ຈກ຺ຂຸທສກໍ. ຈກ຺ຂຸປຘານໍວາ ທສກໍ ຈກ຺ຂຸທສກໍ. ເອສນໂຍ ເສເສສຸປິ. ຍສ຺ມາ ປນ ຈິຕ຺ຕໂຊ ສທ຺ໂທ ວິຎ຺ຎຕ຺ຕິວິກາເຣນ ວິນາ ນປວຕ຺ຕຕິ. ວິຎ຺ຎຕ຺ຕິວິກາໂຣຈ ເຕນ ສທ຺ເທນ ວິນາ ນປວຕ຺ຕຕິ. ຕສ຺ມາ ຈິຕ຺ຕຊໍ ສທ຺ທນວກໍວາ ວຈີວິຎ຺ຎຕ຺ຕິນວກໍວາ ນສມ຺ຠວຕີຕິ ອຘິປ຺ປາເຍນ ວຈີວິຎ຺ຎຕ຺ຕິ ສທ຺ເທ ຫິ ຈ ສຫວຈີວິຎ຺ຎຕ຺ຕິ ທສກນ຺ຕິ ວຸຕ຺ຕໍ. ເອຕ຺ຖ ປນ ວິຎ຺ຎຕ຺ຕິ ວິກາໂຣ ສທ຺ເທນ ວິນາ ນປວຕ຺ຕຕີຕິ ອິທໍ ຕາວ ຍຸຊ຺ຊຕິ. ຍາ ຕາຍ ວາຈາຍ ວິຎ຺ຎຕ຺ຕິ ວິຎ຺ຎາປນາ ວິຎ຺ຎາປິຕຕ຺ຕໍ. ອິທໍ ຕໍຣູປໍ ວຈີວິຎ຺ຎຕ຺ຕີຕິ ຫິ ວຸຕ຺ຕໍ. ວິຎ຺ຎຕ຺ຕິວິກາຣຣຫິຕໍ ປນ ຈິຕ຺ຕຊໍ ສທ຺ທນວກໍ. ອຏ຺ຐກຖາສຸ ອາຄຕເມວ. ຍຖາຫ-ປຏິຈ຺ຈສມຸປ຺ປາທ ນິທ຺ເທເສສຸ ປຏິສນ຺ຘິກ຺ຂຓໂຕ ອຸທ຺ຘໍ ປວຕ຺ຕອຸຕຸໂຕເຈວ ຈິຕ຺ຕໂຕຈ ສທ຺ທນວກນ຺ຕິ.

ມຫາອຏ຺ຐກຖາ ນເຍນ ວິຎ຺ຎຕ຺ຕິ ຣຫິໂຕ ວິຕກ຺ກ ວິປ຺ຜາຣ ສທ຺ໂທນາມ ອໂສຕ ວິຎ຺ເຎຍ຺ໂຍ ຈິຕ຺ຕໂຊ ສທ຺ໂທ ລພ຺ຠຕິ. ໂສ ປນ ສງ຺ຄຫກາເຣນ ປຏິສິທ຺ໂຘ. ຍຖາຫ-ປຏ຺ຐາເນປິ ຈິຕ຺ຕສມຸຏ຺ຐານໍ ສທ຺ທາຍຕນໍ ໂສຕວິຎ຺ຎາຓສ຺ສ ອາຣມ຺ມຓປຈ຺ຈເຍນ ປຈ຺ຈໂຍຕິ ອາວຕໍ. ຕສ຺ມາ ວິນາ ວິຎ຺ຎຕ຺ຕິຆຏ຺ຏນາຍ ອຸປ຺ປຊ຺ຊມາໂນ ອໂສຕ ວິຎ຺ເຎຍ຺ໂຍ ວິຕກ຺ກວິປ຺ຜາຣສທ຺ໂທນາມ ນຕ຺ຖີຕິ. ວິສຸທ຺ຘິມຄ຺ເຄ ອສ຺ສາສ ປສ຺ສາເສ ຈິຕ຺ຕຊໍ ສທ຺ທນວກໍ ວຸຕ຺ຕໍ. ຍຖາຫ-ຈິຕ຺ຕເຊ ອສ຺ສາສ ປສ຺ສາສ ໂກຏ຺ຐາເສປິ ໂອຊຏ຺ຐມກຎ຺ເຈວ ສທ຺ໂທຈາຕິ ນວາຕິ, ສທ຺ທນວເກຈ ອາຄເຕ ສທ຺ທລຫຸຕາທິ ທ຺ວາທສກໍປິ ອາຄຕເມວ ໂຫຕິ. ຕສ຺ມາ ສຸທ຺ຘຏ຺ຐກໍ, ສທ຺ທນວກໍ, ກາຍວິຎ຺ຎຕ຺ຕິ ນາກໍ, ວຈີວິຎ຺ຎຕ຺ຕິ ທສກໍ, ລຫຸຕາເທກາ ທສກໍ, ສທ຺ທລຫຸຕາທິທ຺ວາທສກໍ, ກາຍວິຎ຺ຎຕ຺ຕິ ລຫຸຕາທິ ທ຺ວາທສກໍ, ວຈີວິຎ຺ຎຕ຺ຕິສທ຺ທລຫຸຕາທິ ເຕ ຣສກນ຺ຕິ ອຏ຺ຐຈິຕ຺ຕຊກລາປາ ປຈ຺ເຈຕພ຺ພາຕິ. ສຈ຺ຈສງ຺ເຂເປ ປນ ສທ຺ທ ລຫຸຕາທິ ທ຺ວາທສກໍ ວິສຸໍ ອຄເຫຕ຺ວາ ຈິຕ຺ຕຊ ກລາປາ ສຕ຺ເຕວ ວຸຕ຺ຕາ.

ຏີກາສຸ ປນສ຺ສ ໂປຣາຓຏີກາຍໍ

ມຫາຏ຺ຐກຖານເຍນ ວິຎ຺ຎຕ຺ຕິຣຫິເຕ ອໂສຕ ວິຎ຺ເຎຍ຺ເຍ ວິຕກ຺ກ ວິປ຺ຜາຣສທ຺ເທ ສທ຺ທນວກໍ ທສ຺ເສຕ຺ວາ ປຸນ ວາທນ຺ຕຣໍ ທສ຺ເສນ຺ເຕນ. ອປິຈ, ມຫາຊນສນ຺ນິປາຕສ຺ສ ທູຣໂຕ ອປຎ຺ຎາຍມານກ຺ຂຣປທພ຺ຍຎ຺ຊນຕ຺ໂຖ ຈິຕ຺ຕສມຸຏ຺ຐານນິໂຆສສທ຺ໂທ ອວິຎ຺ຎຕ຺ຕິໂກ ເອວາຕິ ວທນ຺ຕິ. ຕຖາ ມິຄປກ຺ຂີນໍຈ ອຎ຺ຎມຎ຺ຎໍ ຠາສໍ ອຊານນ຺ຕານໍ ອນ຺ຘທມິຬາທິນໍ ອວິຎ຺ຎຕ຺ຕິໂກ ຈິຕ຺ຕສມຸຏ຺ຐານສທ຺ໂທ ອຕ຺ຖີຕິ ວຸຕ຺ຕໍ.

ຕຕ຺ຖ ວິຎ຺ຎຕ຺ຕິຣຫິໂຕ ອໂສຕວິຎ຺ເຎຍ຺ໂຍ ວິຕກ຺ກວິປ຺ຜາຣ ສທ຺ໂທ ອຏ຺ຐສາລິນິຍໍ ປຏິກ຺ຂິຕ຺ໂຕ. ມຫາຊນສນ຺ນິປາຕສ຺ສ ຈິຕ຺ຕ ສມຸຏ຺ຐານ ນິໂຆສສທ຺ໂທປິ ອາສນ຺ເນ ຐິຕານໍ ປຎ຺ຎາຍມານກ຺ຂຣປທ ພ຺ຍຎ຺ຊນຕ຺ໂຖ ສວິຎ຺ຎຕ຺ຕິໂກເອວ ໂຫຕິ. ອິຕຣຖາ ສພ຺ເພປິ ຈິຕ຺ຕ ຊສທ຺ທາ ທູຣຕເຣ ຐິຕານໍ ອປຎ຺ຎາຍມານ ປທພ຺ຍຎ຺ຊນາເອວ ໂຫນ຺ຕີຕິ ສພ຺ເພປິ ວິຎ຺ຎຕ຺ຕິຣຫິຕາ ສິຍຸນ຺ຕິ. ນຈ ມິຄປກ຺ຂິອາທີນໍ ຈິຕ຺ຕໂຊ ສທ຺ໂທ ວິຎ຺ຎຕ຺ຕິຣຫິໂຕ ໂຫຕິ. ສມານຊາຕິຍານໍ ປເຣສໍ ອຘິປ຺ປາຍຕ຺ຖ ວິຎ຺ຎາປນໂຕຕິ.

ປຈ຺ຉິມ ຏີກາຍໍ ປນສ຺ສ

ສທ຺ທນວກໍ ປເນຕ຺ຖ ອຈ຺ຉຣາ ສງ຺ຆາຕ ປາຓິປ຺ປຫາຣາທິ ສທ຺ທ ສຫິຕໍ ອຏ຺ຐກເມວາຕິ ວຸຕ຺ຕໍ. ຕໍປິ ນ ຍຸຕ຺ຕໍ.

ຕາທິໂສ ຫິ ສທ຺ໂທ ຈິຕ຺ຕປຈ຺ຈໂຍ ອຸຕຸສມຸຏ຺ຐາໂນເອວ. ຕສ຺ມາ ວິສຸທ຺ຘິມຄ຺ເຄ ວຸຕ຺ຕນເຍນ ອສ຺ສາສປສ຺ສາເສວາ ອວຈີໂຆເສສຸ ກທາຈິ ຈິຕ຺ຕສຫິເຕສຸ ອຸກ຺ກາສິຕ ຂິປິຕ ວມິຕ ຉຑ຺ຑິຕສທ຺ທາທີສຸ ປິວາ ເອຕໍ ສທ຺ທນວກໍ ເວທິຕພ຺ພນ຺ຕິ. ອຸຕຸຊກລາເປສຸ ປຈ຺ຉິມາ ທ຺ເວປິ ກສ຺ມາ ພຫິທ຺ຘາ ນລພ຺ຠນ຺ຕິ. ນນຸ ພຫິທ຺ຘາປິ ຣູປານໍ ລຫຸ ຄຣຸ ມຸທຸ ຖທ຺ຘ ກມ຺ມຎ຺ຎຕາ ທິສ຺ສນ຺ຕີຕິ. ສຈ຺ຈໍ, ຕາ ປນ ຠູຕານໍ ໂອມຕ຺ຕາຘິມຕ຺ຕ ວເສນ ໂຫນ຺ຕິ, ນ ປນ ລຫຸຕາທິຕ຺ຕຍວເສນາຕິ ທຏ຺ຐພ຺ພໍ. ກສ຺ມາ ປນ ອາກາສຘາຕຸຈ ລກ຺ຂຓຣູປານິຈ ຣູປກລາເປສຸ ນຄຫິຕານີຕິ ວຸຕ຺ຕໍ ກລາປານນ຺ຕິອາທິ. ອາກາສຘາຕຸກລາປານໍ ປຣິຈ຺ເຉທ ມຕ຺ຕຕ຺ຕາ ກສ຺ສຈິ ຣູປກລາປສ຺ສ ອງ຺ຄຠູຕາ ອວຍວຠູຕາ ນ ໂຫຕິ, ລກ຺ຂຓຣູປານິຈ ສພ຺ເພສໍປິ ກລາປານໍ ອຸປ຺ປາທາທິ ລກ຺ຂຓ ມຕ຺ຕຕ຺ຕາ ວິກາຣຣູປານິ ວິຍ ກລາປານໍ ເຠທກຣານິ ອງ຺ຄຠູຕານິ ກລາປວິເສສປຎ຺ຎາປນສ຺ສ ກາຣຓຠູຕານິ ນ ໂຫນ຺ຕິ. ຕສ຺ມາ ຕານິ ເຕສຸ ນຄຫິຕານີຕິ ທສ຺ເສຕິ. ເອເຕນ ເອກຸປ຺ປາທາຕິອາທິນາ ປຸພ຺ເພ ວຸຕ຺ຕນິຍໂມ ນິປ຺ຜນ຺ນຣູປານຎ຺ເຎວ, ນ ອນິປ຺ຜນ຺ນຣູປານໍ. ເຕສໍ ປນ ກລາປ ເຠທ ກຣຓ ເມວ ກລາປງ຺ຄນ຺ຕິ ຈ ທີເປຕິ. ເອວຎ຺ຈ ກຕ຺ວາ ເອກນິໂຣຘງ຺ຄຣຫິຕສ຺ສປິ ວິຎ຺ຎຕ຺ຕິທ຺ວຍສ຺ສ ກລາປເຠທ ກຣຕ຺ຕາເອວ ເຕສຸ ຄຫຓໍ ສຸຏ຺ຐຸ ອຸປປນ຺ນໍ ໂຫຕີຕິ ເວທິຕພ຺ພນ຺ຕິ. [ກລາປໂຍຊນາ]

໑໖໐. ຍຖາຣຫນ຺ຕິ ສຠາວກາ ຠາວການໍ ປຣິປຸຓ຺ຓາປຣິ ປຸຓ຺ຓິນ຺ທ຺ຣິຍານຎ຺ຈ ອຣຫານຸຣູປໂຕ. ອນູນານີຕິ ປຣິປຸຓ຺ຓານິ. ນຎ຺ຫິ ອິທໍ ນາມຣູປໍ ກາມໂລເກ ປວຕ຺ຕິຍໍ ນ ລພ຺ຠຕີຕິ ອຕ຺ຖີຕິ.

[໑໙໘] ວິຠາວນິຍໍ ປນ

‘‘ຍຖາຣຫນ຺ຕິ ສຠາວກປຣິປຸຓ຺ຓາຍຕນານໍ ອນຸຣູປໂຕ’’ຕິ ວຸຕ຺ຕໍ, ຕໍ ນ ສຸນ຺ທຣໍ.

ນ ຫິ ອນູນານີຕິ ອິທໍ ປຸຄ຺ຄລວເສນ ວິເສສນໍ ໂຫຕີຕິ. ສໍເສທຊານຎ຺ເຈວໂອປປາຕິການຎ຺ຈາຕິ ເອຕ຺ຖ ມຫາສີຫນາທສຸຕ຺ເຕ-

ຈຕສ຺ໂສ ໂຂ ອິມາ ສາຣິປຸຕ຺ຕ ໂຍນິໂຍ. ກຕມາ ຈຕສ຺ໂສ, ອຓ຺ຑຊາ ໂຍນິ ຊລາພຸຊາ ໂຍນິ ສໍເສທຊາໂຍນິ ໂອປປາຕິກາ ໂຍນີຕິ. ເຍ ໂຂ ເຕ ສາຣິປຸຕ຺ຕ ສຕ຺ຕາ ອຓ຺ຑໂກສໍ ອຠິນິພ຺ຠິຊ຺ຊ ອຠິນິພ຺ຠິຊ຺ຊ ຊາຍນ຺ຕິ, ອຍໍ ວຸຈ຺ຈຕິ ສາຣິປຸຕ຺ຕ ອຓ຺ຑຊາ ໂຍນິ. ເຍ ໂຂ ເຕ ສາຣິປຸຕ຺ຕ ສຕ຺ຕາ ວຕ຺ຖິໂກສໍ ອຠິນິພ຺ຠິຊ຺ຊ ອຠິນິພ຺ຠິຊ຺ຊ ຊາຍນ຺ຕິ. ອຍໍ ວຸຈ຺ຈຕິ ສາຣິປຸຕ຺ຕ ຊລາພຸຊາ ໂຍນິ. ເຍ ໂຂ ເຕສາຣິ ປຸຕ຺ຕສຕ຺ຕາປູຕິມຈ຺ເຉວາ ຊາຍນ຺ຕິ. ປູຕິກຸຓເປວາ ປູຕິກຸມ຺ມາເສວາ ຈນ຺ທນິກາຍວາ ໂອຬິຄລ຺ເລວາ ຊາຍນ຺ຕິ, ອຍໍ ວຸຈ຺ຈຕິ ສາຣິປຸຕ຺ຕ ສໍເສທຊາ ໂຍນິ. ເທວາ ເນຣກາ ເອກຈ຺ເຈ ຈ ມນຸສ຺ສາ ເອກຈ຺ເຈຈ ວິນິປາຕິກາ ອຍໍ ວຸຈ຺ຈຕິ ສາຣິປຸຕ຺ຕ ໂອປປາຕິກາ ໂຍນີຕິ ວຸຕ຺ຕໍ.

ອຏ຺ຐກຖາຍຎ຺ຈ ອຓ຺ເຑ ຊາຕາ ອຓ຺ຑຊາ. ຊລາພຸມ຺ຫິ ຊາຕາ ຊລາພຸຊາ. ສໍເສເທ ຊາຕາ ສໍເສທຊາ. ວິນາ ເອເຕຫິ ກາຣເຓຫິ ອຸປ຺ປຕ຺ຕິຕ຺ວາ ວິຍ ນິພ຺ພຕ຺ຕາ ອຠິນິພ຺ພຕ຺ຕາຕິ ໂອປປາຕິກາ. ອຠິນິພ຺ຠິຊ຺ຊ ຊາຍນ຺ຕີຕິ ຠິນ຺ທິຕ຺ວາ ນິກ຺ຂມນວເສນ ຊາຍນ຺ຕິ. ປູຕິ ກຸຓເປຕິອາທີຫິ ອນິຏ຺ຐຏ຺ຐານາເນວ ທສ຺ສິຕານິ. ອິຏ຺ເຐສຸ ສປ຺ປິ ເຕລມຘຸຜາຓິຕາທີສຸ ສຕ຺ຕາ ຊາຍນ຺ຕິເອວາຕິ ວຸຕ຺ຕໍ. ເອຕ຺ຖຈ ປຸຣິເມສຸ ທ຺ວີສຸ ປາຬິນເຍນ ອຓ຺ຑໍ ວຸຈ຺ຈຕິ ອຓ຺ຑໂກໂສ. ຊລາພຸວຸຈ຺ຈຕິ ວຕ຺ຖິໂກໂສ, ຕໂຕ ຊາຕາ ວິຊາຕາ ນິກ຺ຂນ຺ຕາຕິ ອຓ຺ຑຊາ ຊລາພຸຊາຕິຈ ວຸຈ຺ຈນ຺ຕີຕິ ເວທິຕພ຺ພາ. ຕຕ຺ຖ ຊຣໍ ຊີຣຓໍ ເຠທໍ ຍາຕິ ອຸເປຕີຕິ ຊລາພູຕິ ສທ຺ທນີຕິຍໍ ວຸຕ຺ຕໍ. ຊລໍ ວຸຈ຺ຈຕິ ກລລໍ. ຕໍ ອາວຸນາຕິ ປຏິຈ຺ຉາເທຕິ ອວຕິວາ ຣກ຺ຂຕີຕິ ຊລາພຸ, ຄພ຺ຠປລິເວຐນາສໂຍ. ສໍສີທນ຺ຕິ ເອຕ຺ຖາຕິ ສໍເສໂທ. ປູຕິມຈ຺ຉາ ທິໂກ ສປ຺ປິເຕລາທິໂກ ປທຸມຄພ຺ຠເວຬຸຄພ຺ຠຣຸກ຺ຂສຸສິຣປຸປ຺ຜຜລາທິ ໂກຈ ອລ຺ລກິລິນ຺ນປເທໂສ. ອຸປປຕ຺ຕິກ຺ຂເຓເອວ ປຣິປຸຓ຺ຓອງ຺ຄປຈ຺ຈງ຺ຄຕ຺ຕາ ຕໂຕ ຕໂຕ ອຸປ຺ປຕິຕ຺ວາ ວິຍ ຊາຍນ຺ຕີຕິ ໂອປປາຕິກາ.

ວິຠາວນິຍໍ ປນ

ອຓ຺ຑຊາທໂຍປິ ອຓ຺ຑໂກສາທິມ຺ຫິ ໂອກ຺ກມນ຺ຕາ ອຸປ຺ປຕນ຺ຕາ ເອວ ນາມ ໂຫນ຺ຕີຕິ ເຕສໍປິ ໂອປປາຕິກຕ຺ຕປສງ຺ຄໍ ມຎ຺ຎມາໂນ ອຸປປາໂຕ ເນສໍ ອຕ຺ຖີຕິ ໂອປປາຕິກາຕິ ວຕ຺ວາ ອຸກ຺ກໍສຄຕິ ປຣິຈ຺ເຉທວເສນ ເຈຕ຺ຖ ວິສິຏ຺ຐໂອປປາໂຕ ຄຫິໂຕ. ຍຖາ ອຠິຣູປສ຺ສ ກຎ຺ຎາ ທາຕພ຺ພາຕິ ວທຕິ.

ອຸກ຺ກຏ຺ຐວເສນາຕິ ປຣິປຸຓ຺ຓາຍຕນຠາວສງ຺ຂາເຕນ ອຸກ຺ກໍສຕາເວນ, ຕຕ຺ຖ ໂອປປາຕິກາ ອງ຺ຄປຈ຺ຈງ຺ເຄຫິ ສຫ ສພ຺ພໂສ ປຣິປຸຓ຺ເຓນ ອຕ຺ຕຠາເວນ ຊາຍນ຺ຕິ. ປຸນ ເຕສໍ ວຑ຺ຒນກິຈ຺ຈໍ ນຕ຺ຖິ. ສໍເສທຊານໍ ປນ ອາຍຕນານິ ເອວ ປຣິປຸຓ຺ຓານິ ໂຫນ຺ຕິ. ອງ຺ຄປຈ຺ຈງ຺ຄານິ ປນ ປຸນ ວຑ຺ຒິຕ຺ວາເອວ ປຣິປຸຓ຺ຓານິ ຊາຕານີຕິ ເວທິຕພ຺ພໍ. ໂອມກວເສນາຕິ ອວກໍສວເສນ. ຈກ຺ຂຸໂສຕຆານຠາວເສການິກທາຈິປິ ນ ລພ຺ຠນ຺ຕິ ຊາຕິພຘິຣ ຊຈ຺ຈຆານການໍ ອຠາວການຎ຺ຈ ສມ຺ຠວໂຕຕິ ອປ຺ໂປໂຍ. ຕຕ຺ຖ ຕານິ ສພ຺ພານິປິ ສຸຄຕິ ທຸຄ຺ຄຕິ ຊາຕິຍານໍ ອເຫຕຸກສໍເສທຊານໍ ກທາຈິ ນລພ຺ຠນ຺ຕິ. ສຸຄຕິຍໍ ປນ ໂອປປາຕິກຠາໂວນາມ ເສຏ຺ໂຐ ອຕ຺ຕຠາວ ປຏິລາໂຠຕິ ນເຍນ ເກນຈິ ໂອມເກນ ກມ຺ເມນ ລພ຺ຠຕິ. ຕສ຺ມາ ສຸຄຕິຊາຕິ ຍານໍ ໂອປປາຕິການໍ ອປຣິປຸຓ຺ຓິນ຺ທ຺ຣິຍຕານາມ ນຕ຺ຖິ ອຎ຺ຎຕ຺ຣ ອຠາວເກຫິ ອາທິກປ຺ປິເກຫິຕິ. ທຸຄ຺ຄຕິຊາຕິຍານໍປິ ປນ ເຕສໍ ກທາຈິ ຈກ຺ຂຸ ໂສຕ ຠາວ ເວກລ຺ລຕາເອວ ວຕ຺ຕພ຺ພາ. ນ ຆານເວກລ຺ລຕາ. ກາມຘາຕຸຍໍ ປນ ອຆານໂກ ໂອປປາຕິໂກ ນຕ຺ຖີຕິ ຫິ ອຏ຺ຐ ກຖາຍໍ ວຸຕ຺ຕໍ. ຊິວ຺ຫາເວກລ຺ລຕານາມ ສພ຺ເພສໍປິ ນຕ຺ຖິ ເຍວາຕິ ເວທິຕພ຺ພໍ. ຕຖາ ຫິ ຘມ຺ມຫທຍວິຠງ຺ເຄ –

ກາມຘາຕຸຍາ ອຸປປຕ຺ຕິກ຺ຂເຓ ກສ຺ສຈິ ເອກາທສາ ຍຕນານິ ປາຕຸຠວນ຺ຕິ. ກສ຺ສຈິ ທສ. ກສ຺ສຈິອປຣານິ ທສ. ກສ຺ສຈິ ນວ. ກສ຺ສຈິ ສຕ຺ຕາຍຕນານິ ປາຕຸຠວນ຺ຕີຕິ ວຸຕ຺ຕໍ.

ຕຕ຺ຖ ກາມຘາຕຸຍນ຺ຕິ ກາມໂລເກ. ອຸປປຕ຺ຕິກ຺ຂເຓຕິ ປຏິສນ຺ຘິຈິຕ຺ຕສ຺ສ ອຸປ຺ປາທກ຺ຂເຓ. ກສ຺ສຈິ ເອກາທສາ ຍຕນານີຕິອາທິສຸ ຈຕູສຸ ວາກ຺ເຍສຸ ສໍເສທໂຊປປາຕິກາ ວຸຕ຺ຕາ. ກສ຺ສຈິ ສຕ຺ຕາຍຕນານີຕິ ເອຕ຺ຖ ປນ ຄພ຺ຠເສຍ຺ຍໂກວ ວຸຕ຺ໂຕ. ຕຕ຺ຖ ຍສ຺ມາ ສຕ຺ຕາຍຕນໍ ນາມ ປຏິສນ຺ຘິກ຺ຂເຓ ນ ລພ຺ຠຕິ. ປວຕ຺ຕິ ກາເລເຍວ ລພ຺ຠຕິ. ຕສ຺ມາ ເອກາທສຍຕນານີຕິ ວຸຕ຺ຕໍ. ກສ຺ສຈິ ທສາຕິ ຈກ຺ຂຸເວກລ຺ລວເສນ. ກສ຺ສຈິ ອປຣານິ ທສາຕິ ໂສຕ ເວກລ຺ລວເສນ. ກສ຺ສຈິ ນວາຕິ ຈກ຺ຂຸໂສຕ ທ຺ວຍ ເວກລ຺ລ ວເສນ ວຸຕ຺ຕໍ. ຍທິຈ ອຆານໂກ ໂອປປາຕິໂກນາມ ສິຍາ. ຕທາ ສຸທ຺ຘຊຈ຺ຈຆານເກນ ສທ຺ຘິໍ ຕໂຍ ທສກວາຣາ ວຸຕ຺ຕາ ສິຍຸໍ. ຕຖາ ຊຈ຺ຈນ຺ຘຆານກ ຊຈ຺ຈພຘິຣຆານເກຫິ ສທ຺ຘິໍ ຕໂຍ ນວກວາຣາ ເອໂກຈ ອຏ຺ຐກວາໂຣ ວຸຕ຺ໂຕ ສິຍາ ຕິຓ຺ຓໍ ວິປນ຺ນານໍ ວເສນ. ຕຖາ ອວຸຕ຺ຕຕ຺ຕາ ປນ ນຕ຺ຖິ ອຆານໂກ ໂອປປາຕິ ໂກຕິ ວິຎ຺ຎາຍຕີຕິ. ຕສ຺ມິໍ ປນ ວິຠງ຺ເຄ ອິນ຺ທ຺ຣິຍວາເຣ ນປຸໍສການໍ ໂອປປາຕິການນ຺ຕິ ອວຸຕ຺ຕຕ຺ຕາ ຖເປຕ຺ວາ ອາທິກປ຺ປິເກ ອຠາວໂກປິ ໂອປປາຕິໂກ ນຕ຺ຖິເຍວາຕິ. ປາຬິຍໍ ອວຸຕ຺ຕໍປິ ປນ ສໍເສທຊານໍ ວຸຕ຺ຕປກາຣໍ ຈກ຺ຂາທິເວກລ຺ລໍ ອຏ຺ຐກຖາວເສນ ເວທິຕພ຺ພໍ. ຍຖາຫ-ສຕ຺ຕຕິ ອຸກ຺ກໍສໂຕວ ຣູປານິ ສໍເສທໂຊປປາຕ ໂຍນີສຸ. ອຖວາ, ອວກໍສໂຕ ຕິໍສາຕິ. ຕຕ຺ຖ ຕິໍສາຕິ ຊິວ຺ຫາກາຍ ວຕ຺ຖຸ ທສການໍ ວເສນ ຕິໍສຣູປານີຕິ ຈ ວຸຕ຺ຕໍ. ອິທຎ຺ຫິ ວຈນໍ ສໍເສທຊານໍ ວເສນ ວຸຕ຺ຕນ຺ຕິ ມຫາຏີກາຍໍ ວຸຕ຺ຕໍ. ອາຈຣິຍາ ນນ຺ທຕ຺ເຖເຣນ ປນ ຍມເກ ຆານຊິວ຺ຫານໍ ອຎ຺ຎມຎ຺ຎໍ ອວິນາຠາວ ວຸຕ຺ຕິຕາ ວຸຕ຺ຕາຕິ ຊິວ຺ຫາ ເວກລ຺ລຕາ ວິຍ ຆານເວກລ຺ລຕາປິ ນຕ຺ຖີຕິ ອິຈ຺ຉິຕໍ. ອິນ຺ທ຺ຣິຍ ຍມເກ ປນ –

ຍສ຺ສວາ ປນ ອິຕ຺ຖິນ຺ທ຺ຣິຍໍ ອຸປ຺ປຊ຺ຊຕິ, ຕສ຺ສ ຆານິນ຺ທ຺ຣິຍໍ ອຸປ຺ປຊ຺ຊຕີຕິ. ອຆານການໍ ອິຕ຺ຖີນໍ ອຸປປຊ຺ຊນ຺ຕີນໍ ຕາສໍ ອິຕ຺ຖິນ຺ທ຺ຣິຍໍ ອຸປ຺ປຊ຺ຊຕິ, ໂນຈ ຕາສງ຺ຆານິນ຺ທ຺ຣິຍໍ ອຸປ຺ປຊ຺ຊຕີຕິຈ. ຍສ຺ສວາ ປນ ປຸຣິສິນ຺ທ຺ຣິຍໍ ອຸປ຺ປຊ຺ຊຕິ, ຕສ຺ສ ຆານິນ຺ທ຺ຣິຍໍ ອຸປ຺ປຊ຺ຊຕີຕິ. ອຆານການໍ ປຸຣິສານໍ ອຸປປຊ຺ຊນ຺ຕານໍ ເຕສໍ ປຸຣິສິນ຺ທ຺ຣິຍໍ ອຸປ຺ປຊ຺ຊຕິ, ໂນຈ ເຕສໍ ຆານິນ຺ທ຺ຣິຍໍ ອຸປ຺ປຊ຺ຊຕີຕິຈ ວຸຕ຺ຕໍ.

ຕສ຺ມາ ອຏ຺ຐກຖາຍໍ ວຸຕ຺ຕນເຍນ ຆານເວກລ຺ລຕາປິ ອຕ຺ຖີຕິ ຍຸຕ຺ຕໍ.