ສມຸຈ຺ຈຍ ສງ຺ຄຫ ປຣມຕ຺ຖທີປນີ

໑໖໒. ເອວໍ ຉຫິ ປຣິຈ຺ເຉເທຫິ ຈຕ຺ຕາໂຣ ປຣມຕ຺ເຖ ທສ຺ເສຕ຺ວາ ອິທານິ ເຕສໍ ຕໍຕໍຣາສິສງ຺ຂາຕໍ ສມຸຈ຺ຈຍໍ ທສ຺ເສນ຺ໂຕ ອາທິຄາຖ ມາຫ. ເຍ ສລກ຺ຂຓາ ທ຺ວາສຕ຺ຕຕິວິຘາ ວຕ຺ຖຸຘມ຺ມາ ມຍາ ວຸຕ຺ຕາ. ອິທານິ ເຕສໍ ສມຸຈ຺ຈຍໍ ຍຖາໂຍຄໍ ປວກ຺ຂາມີຕິ ໂຍຊນາ. ຕຕ຺ຖ ສລກ຺ຂຓາວຕ຺ຖຸຘມ຺ມາຕິ ປເທຫິ ທສວິຘານິ ອນິປ຺ຜນ຺ນຣູປານິ ປຏິກ຺ຂິປຕິ. ນ ຫິ ຕານິ ອຕ຺ຕໂນ ອາເວນິກຠູເຕນ ສຠາວ ລກ຺ຂເຓນ ອນິຈ຺ຈຕາທິ ສາມຎ຺ຎລກ຺ຂເຓນຈ ສລກ຺ຂຓານິ ໂຫນ຺ຕິ. ເອກນ຺ຕປຣມຕ຺ຖຕາຍ ອຠາວໂຕ. ຕໂຕເຍວຈ ວຕ຺ຖຸຘມ຺ມາຈ ນໂຫນ຺ຕິ. ສຣູປໂຕ ອນຸປລພ຺ຠມານຕ຺ຕາ. ທພ຺ພວາຈໂກ ຫິ ອິຘ ວຕ຺ຖຸສທ຺ໂທ. ທພ຺ພຎ຺ຈນາມ ອິຘ ສຣູປໂຕ ລພ຺ຠມາໂນ ສຠາໂວ ເອວ. ເອເຕນ ນິພ຺ພານສ຺ສປິ ມຄ຺ຄຜລ ປຈ຺ຈເວກ຺ຂນຎາເຓສຸ ສຣູປໂຕ ລພ຺ຠມານ ສຠາວຕາ ວຸຕ຺ຕາ ໂຫຕິ. ອນິປ຺ຜນ຺ນຣູປານໍ ວິຍ ຈ ວຕ຺ຖຸຘມ຺ມ ສນ຺ນິສ຺ສເຍນ ທິສ຺ສມານຘມ຺ມມຕ຺ຕຠາວໍ ວາ ປຎ຺ຎຕ຺ຕິຘມ຺ມານໍ ວິຍ ປຣິກປ຺ປິຕາກາຣມຕ຺ຕຠາວໍວາ ສສວິສາຓ ກຈ຺ຉປໂລມາທີນໍ ວິຍ ສພ຺ພໂສ ອຠູຕ ປຣິກປ຺ປິຕ ມຕ຺ຕຠາວໍວາ ນິວາເຣຕີຕິ ເວທິຕພ຺ພໍ. ເອຕ຺ຖຈ ທ຺ວາສຕ຺ຕຕິວິຘາສລກ຺ຂຓາວຕ຺ຖຸຘມ຺ມາຕິ ວຈເນ ປໂຍຊນໍ ນທິສ຺ສຕິ. ເຕສຸ ຫິ ທ຺ວາສຕ຺ຕຕິວິເຘສຸ ເອກຈ຺ເຈ ເອວ ຘມ຺ມາ ປຸຣິເມສຸ ຕີສຸ ສງ຺ຄເຫສຸ ອາຄຕາ. ປຈ຺ຉິເມຈ ສພ຺ພສງ຺ຄເຫ ອນິປ຺ຜນ຺ນຣູປານິປິ ອຘິປ຺ເປຕານິເອວາຕິ. ເອຕ຺ຖຈ ວຕ຺ຖຸຘມ຺ມາສລກ຺ຂຓາຕິ ປເທຫິ ອນິປ຺ຜນ຺ນຣູປານໍ ສລກ຺ຂຓຕາ ປຏິກ຺ຂິປເນ ຍໍ ວຕ຺ຕພ຺ພໍ. ຕໍ ຣູປສມຸທ຺ເທສ ທີປນິຍໍ ວຸຕ຺ຕເມວາຕິ. ເອກນ຺ຕາກຸສລຊາຕິຍານໍ ອາສວ ຈຕຸກ຺ກາທີນໍ ສງ຺ຄໂຫ ອກຸສລສງ຺ຄໂຫ, ນ ອກຸສລ ສມ຺ປຍຸຕ຺ຕຕ຺ຕາເຍວ ອກຸສລຠູຕານໍ ຈິຕ຺ຕຜສ຺ສາທີນນ຺ຕິ. ກຸສລາ ກຸສລາພ຺ຍາກຕມິສ຺ສການໍ ສງ຺ຄໂຫ ມິສ຺ສກສງ຺ຄໂຫ.

ໂພຘິ ວຸຈ຺ຈຕິ ຈຕູສຸ ມຄ຺ເຄສຸ ຎາຓໍ, ພຸຊ຺ຌນ຺ຕິ ເອຕາຍາຕິ ກຕ຺ວາ. ໂພຘິຍາ ປກ຺ຂາ ໂພຘິປກ຺ຂາ. ໂພຘິສມ຺ຠາຣາຕິ ອຕ຺ໂຖ. ໂພຘິ ປກ຺ເຂສຸ ຠວາ ອນ຺ໂຕຄຘາຕິ ໂພຘິປກ຺ຂິຍາ. ເຕສໍ ສງ຺ຄໂຫຕິ ໂພຘິປກ຺ຂິຍສງ຺ຄໂຫ. ສພ຺ເພສໍ ອນວເສສານໍ ປຣມຕ຺ຖຘມ຺ມານໍ ສງ຺ຄໂຫ ສພ຺ພສງ຺ຄໂຫ. ຈິຣປາຣິວາສິຍຏ຺ເຐນ ມທນິຍຏ຺ເຐນຈ ອາສວ ສທິສຕ຺ຕາ ອາສວາ. ຍທິຈ ຕທຸຠຍຏ຺ເຐນ ອາສວານາມ ສິຍຸໍ. ອິເມ ໂລຠາທໂຍ ເອວ ອາສວານາມ ສິຍຸໍ. ປຸປ຺ຜາສວາທໂຍ ຫິ ໂລເກ ຉ ປຎ຺ຈ ຣຕ຺ຕິມຕ຺ຕໍ ວາ ສຕ຺ຕຏ຺ຐຣຕ຺ຕິມຕ຺ຕໍ ວາ ສຍໍປິ ກຸມ຺ເຠສຸ ປຣິວາສໍ ຄຓ຺ຫນ຺ຕິ. ກຸມ຺ເຠຈ ປຣິວາສໍ ຄາຫາເປນ຺ຕິ. ອິເມ ປນ ອນມຕຄ຺ເຄ ສໍສາເຣ ສຍໍປິ ສຕ຺ຕສນ຺ຕາເນ ປຣິວາສໍ ຄຓ຺ຫນ຺ຕິ. ສຕ຺ຕສນ຺ຕານຎ຺ຈ ປຣິວາສໍ ຄາຫາເປນ຺ຕິ. ສກລໍ ສຕ຺ຕສນ຺ຕານໍ ສທາ ອາສວປູຣິຕເມວ ໂຫຕິ. ຍຖາຫ-ຈກ຺ຂຸໍ ໂລເກ ປິຍຣູປໍ ສາຕຣູປໍ ເອຕ຺ເຖສາ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ. ເອຕ຺ຖ ນິວີສມານາ ນິວີສຕີຕິອາທິ. ຕຕ຺ຖ ເອສາ ຕຓ຺ຫາ ປຣິຍຸຏ຺ຐານວເສນ ອຸປ຺ປຊ຺ຊມານາ ເອຕ຺ເຖວ ອຸປ຺ປຊ຺ຊຕິ. ອຸປ຺ປຊ຺ຊິຕ຺ວາຈ ປຸນ ອນຸສຍຠາເວນ ປຣິວາສໍ ກຕ຺ວາ ນິວີສມານາ ເອຕ຺ເຖວ ນິວີສຕີຕິ ອຕ຺ໂຖ. ຍາວຈ ອຣິຍມຄ຺ຄໂຘວນໍ ນລພ຺ຠຕິ. ຕາວ ສນ຺ຕານໍ ຄູຖປູຣິຕກູປໍ ວິຍ ທຸພ຺ພິໂສຘໍ ກຕ຺ວາ ປວຕ຺ຕຕິ. ປຸປ຺ຜາສວາທໂຍຈ ມທໍ ຊເນນ຺ຕາ ມຸຫຸຕ຺ຕເມວ ຊເນນ຺ຕິ. ອິເມ ປນ ຍາວ ອຣິຍມຄ຺ຄໍ ນລຠຕິ. ຕາວ ນິຈ຺ຈມທໍ ຊເນນ຺ຕິ. ຕສ຺ມາ ເອກນ຺ເຕນ ອິເມເຍວ ຈິຣປາຣິວາສິຍຏ຺ເຐນ ມທນິ ຍຏ຺ເຐນຈ ອາສວານາມ ຠວິຕຸໍ ອຣຫນ຺ຕີຕິ.

ວິສນ຺ທນຏ຺ເຐນວາ ອາສວສທິສຕ຺ຕາ ອາສວາ, ຍຖາ ຫິ ກຸຘິຕ ກຸຏ຺ຐິໂນ ມຫາວຓມຸເຂຫິ ຍູສສງ຺ຂາໂຕ ອາສໂວ ວິສນ຺ທິຕ຺ວາ ປິໂລຕິກຂຓ຺ຑານິ ທູເສຕິ, ເອວໍ ອິເມປິ ຉຫິທ຺ວາເຣຫິ ວິສນ຺ທິຕ຺ວາ ຉຬາຣມ຺ມຓານິທູເສນ຺ຕີຕິ. ອາຍຕໍວາ ສໍສາຣທຸກ຺ຂໍ ສວນ຺ຕິປສວນ຺ຕິ ວຑ຺ເຒນ຺ຕີຕິ ອາສວາ. ອຖວາ, ຠວໂຕ ອາຠວຄ຺ຄາ ຘມ຺ມໂຕ ອາໂຄຕ຺ຣຕຸມ຺ຫາ ສວນ຺ຕິ ອາຣມ຺ມຓກຣຓວເສນ ປວຕ຺ຕນ຺ຕີຕິ ອາສວາ. ອາສທ຺ທສ຺ສ ອວຘິອຕ຺ຖໂຊຕກຕ຺ຕາ. ອວຘິຈ ທຸວິໂຘ ມຣິຍາທວິສໂຍ ອຠິວິຘິວິສໂຍຈາຕິ ຕຕ຺ຖ ຍສ຺ສ ສມ຺ພນ຺ຘິນີກ຺ຣິຍາ ອວຘິຠູຕໍ ອຕ຺ຕານໍ ພຫິກຕ຺ວາ ປວຕ຺ຕຕິ. ໂສ ມຣິຍາທວິສໂຍ ນາມ. ຍຖາ ອາປາຕລິປຸຕ຺ຕາ ເທໂວ ວຸຏ຺ໂຐຕິ. ຍສ຺ສ ສມ຺ພນ຺ຘິນີກ຺ຣິຍາ ອວຘິຠູຕໍ ອຕ຺ຕານໍ ພ຺ຍາເປຕ຺ວາ ອນ຺ໂຕ ກຕ຺ວາ ປວຕ຺ຕຕິ, ໂສ ອຠິວິຘິວິສໂຍນາມ. ຍຖາ ອາພ຺ຣຫ຺ມໂລກາ ຠຄວໂຕ ກິຕ຺ຕິສທ຺ໂທ ອພ຺ຠຸຄ຺ຄໂຕຕິ. ອິຘ ປນ ອຠິວິຘິວິສໂຍ ທຏ຺ຐພ຺ໂພ. ຕສ຺ມາ ຠວຄ຺ຄຎ຺ຈ ໂຄຕ຺ຣຠຸຎ຺ຈ ພ຺ຍາເປຕ຺ວາ ອນ຺ໂຕ ກຕ຺ວາ ສວນ຺ຕີຕິ ອຕ຺ໂຖ ເວທິຕພ຺ໂພ.

[໒໐໔] ວິຠາວນິຍໍ ປນ

ອວຘິຈ ມຣິຍາທອຠິວິຘິວເສນ ທຸວິໂຘຕິ ວຕ຺ວາ ປຸນ ຕໍ ວິຠາເວນ຺ໂຕ ‘‘ຕຕ຺ຖ ອາປາຕລິປຸຕ຺ຕາ ເທໂວ ວຸຏ຺ໂຐຕິອາທີສຸວິຍ ກ຺ຣິຍໍ ພຫິກຕ຺ວາ ປວຕ຺ໂຕ ມຣິຍາໂທ. ອາຠວຄ຺ຄາສທ຺ໂທ ອພ຺ຠຸຄ຺ຄໂຕຕິອາທີສຸວິຍ ກ຺ຣິຍໍ ພ຺ຍາເປຕ຺ວາ ປວຕ຺ໂຕ ອຠິວິຘີ’’ຕິ ວທຕິ. ຕໍ ນ ຍຸຊ຺ຊຕິ.

ນ ຫິ ອວວິຘິວິສຍຠູໂຕ ຠວຄ຺ໂຄ ໂລກຕ຺ຕຍພ຺ຍາປກໍ ສທ຺ທສ຺ສ ອພ຺ຠຸຄ຺ຄມນກ຺ຣິຍໍ ພ຺ຍາເປຕ຺ວາ ປວຕ຺ຕຕິ. ນຈ ອວຘິຠູໂຕ ອຕ຺ໂຖ ກ຺ຣິຍໍ ພຫິວາ ອນ຺ໂຕວາ ກຕ຺ວາ ປວຕ຺ຕຕີຕິ ຍຸຕ຺ໂຕ. ກ຺ຣິຍາເອວ ປນ ຕໍ ພຫິວາ ອນ຺ໂຕວາ ກຕ຺ວາ ປວຕ຺ຕຕີຕິ ຍຸຕ຺ໂຕ. ເອວຎ຺ຈ ກຕ຺ວາ ມູລຏີກາຍໍ-ທຸວິໂຘຫິ ອວຘິ ອຠິວິຘິວິສໂຍ ອນຠິວິຘິວິສໂຍຈ. ອຠິວິຘິວິສຍໍ ກ຺ຣິຍາພ຺ຍາເປຕ຺ວາ ປວຕ຺ຕຕິ, ອາຠວຄ຺ຄາ ຠຄວໂຕ ຍໂສ ຄໂຕຕິ. ອິຕຣໍ ພຫິກຕ຺ວາ, ອາປາຕລິປຸຕ຺ຕາ ວຸຏ຺ໂຐ ເທໂວຕິ. ກາເມຕິ ອິຈ຺ຉຕີຕິ ກາໂມ. ໂສເອວ ອາສໂວຕິ ກາມາສໂວ. ກາມີຍຕິວາ ໂອຬາຣິເກນ ກາເມນ ອິຈ຺ຉີຍຕີຕິ ກາໂມ. ປຎ຺ຈກາມຄຸຓມຸເຂນ ເທສິໂຕ ສພ຺ໂພ ກາມາວຈຣຘມ຺ໂມ. ອິຘ ປນ ຕໍ ນາເມນ ຕທາຣມ຺ມຓາ ຕຓ຺ຫາເອວ ອຘິປ຺ເປຕາ, ກາໂມເອວ ອາສໂວຕິ ກາມາສໂວ. ກາມາວຈຣຘມ຺ເມສຸ ອສ຺ສາທນາຠິນນ຺ທນ ວເສນ ປວຕ຺ໂຕ ກາມຣາໂຄ. ເຖເຣນ ປນ ອຍມຕ຺ໂຖວ ອິຈ຺ຉິໂຕ. ວກ຺ຂຕິ ຫິ ກາມຠວ ນາເມນ ຕພ຺ພຕ຺ຖຸກາ ຕຓ຺ຫາ ອຘິປ຺ເປຕາຕິ.

[໒໐໕] ວິຠາວນິຍໍ ປນ

ປຸຣິມຕ຺ໂຖວ ວຸຕ຺ໂຕ. ໂສ ອນຸປປນ຺ໂນ, ເຖຣມຕານຸຄຕສ຺ສ ອິຘາຘິປ຺ເປຕສ຺ສ ອຕ຺ຖສ຺ສ ອວຸຕ຺ຕຕ຺ຕາ.

ຠວາສໂວຕິ ເອຕ຺ຖ ທຸວິໂຘ ຠໂວ ກມ຺ມຠໂວ ອຸປປຕ຺ຕິຠໂວ ຈ. ຕຕ຺ຖ ມຫຄ຺ຄຕກຸສລຘມ຺ມາ ກມ຺ມຠໂວ. ຕໍນິພ຺ພຕ຺ຕາ ວິປາກ ຘມ຺ມາ ອຸປປຕ຺ຕິຠໂວ. ອິຘປິ ຠວສທ຺ເທນ ຕທາຣມ຺ມຓາ ຕຓ຺ຫາເອວ ອຘິປ຺ເປຕາ. ຠໂວເອວ ອາສໂວຕິ ຠວາສໂວ. ຕສ຺ມິໍ ທຸວິເຘ ຠເວ ນິກນ຺ຕິວເສນ ປວຕ຺ໂຕ ຣູປາຣູປຣາໂຄ.

[໒໐໖] ຍໍ ປນ ວິຠາວນິຍໍ

‘‘ສສ຺ສຕ ທິຏ຺ຐິສຫຄໂຕຈ ຣາໂຄ ເອຕ຺ເຖວ ສງ຺ຄຍ຺ຫຕີ’’ຕິ ວຸຕ຺ຕໍ. ຕໍ ນ ຍຸຕ຺ຕໍ.

ຠວາສໂວ ຈຕູສຸ ທິຏ຺ຐິຄຕ ວິປ຺ປຍຸຕ຺ຕ ໂລຠສຫຄເຕສຸ ຈິຕ຺ຕຸປ຺ປາເທສຸ ອຸປ຺ປຊ຺ຊຕີຕິ ຫິ ອຏ຺ຐກຖາກຓ຺ເຑ ວຸຕ຺ຕໍ. ຍຕ຺ຖ ປນ ກາມຕຓ຺ຫາ ຠວຕຓ຺ຫາ ວິຠວຕຓ຺ຫາຕິ ອາຄຕໍ. ຕຕ຺ເຖວ ສສ຺ສຕທິຏ຺ຐິ ສຫຄໂຕ ຣາໂຄ ຍາກາຈິ ກຸສລາກຸສລ ກມ຺ມຠວນິກນ຺ຕິ ຍາກາຈິ ອຸປປຕ຺ຕິຠວປຕ຺ຖນາ. ສພ຺ພາ ຠວຕຓ຺ຫາຍໍ ສງ຺ຄຫິຕາຕິ ຍຸຕ຺ຕາ. ອິຘ ປນ ຍຖາວຸຕ຺ຕໍ ຠວາສວໍ ຖເປຕ຺ວາ ສພ຺ໂພ ໂລໂຠ ກາມາສເວ ເອວ ສງ຺ຄຫິໂຕຕິ ຍຸຕ຺ໂຕຕິ.

[໒໐໗] ເອເຕເນວ ຍຎ຺ຈ ຕຕ຺ຖ ວຸຕ຺ຕໍ.

‘‘ຕຕິໂຍ ຠາທິຏ຺ຐິສຫຄໂຕ’’ຕິ. ຕໍປິ ປຏິກ຺ຂິຕ຺ຕໍ ໂຫຕິ.

ຍາກາຈິ ທິຏ຺ຐິ ທິຏ຺ຐາສໂວ. ໂຍໂກຈິ ໂມໂຫ ອວິຊ຺ຊາສໂວ. ເອຕ຺ຖ ສິຍາ, ກສ຺ມາ ອິເມ ເອວ ອາສວາຕິ ວຸຕ຺ຕາ. ນນຸ ອຎ຺ເຎປິ ມານາທໂຍ ຈິຣປາຣິວາສິຍຏ຺ຐາທິຍຸຕ຺ຕາ ເອວ ໂຫນ຺ຕີຕິ. ສຈ຺ຈໍ. ອິເມສຸ ປນ ກາມາສເວ ປຣິວຸຏ຺ເຐ ສຕິ ສພ຺ເພກາມວິສຍາ ມານາທໂຍ ປຣິວຸຏ຺ຐາເອວ ໂຫນ຺ຕິ. ຕສ຺ມິໍ ວິມຸຕ຺ເຕ ວິມຸຕ຺ຕາເອວ, ຕຖາ ຠວາສເວ ປຣິວຸຏ຺ເຐ ສຕິ ຠວວິສຍາ. ທິຏ຺ຐາສເວຈ ປຣິວຸຏ຺ເຐ ສຕິ ທິຏ຺ຐິວິສຍາຕິ. ອວິຊ຺ຊາປນ ເຕສໍ ຕິຓ຺ຓໍປິ ມູລຠູຕາຕິ. ອິຕິ ອິເມ ເອວ ປາຣິວາສິຍຏ຺ຐາທີສຸ ປຘານຠູຕາ ໂຫນ຺ຕິ. ອິຕເຣ ປນ ຕທນຸພນ຺ຘມຕ຺ຕາເອວ ສມ຺ປຊ຺ຊນ຺ຕີຕິ ນ ເຕ ອາສວາຕິ ວິສຸໍ ວຕ຺ຕຸໍ ອຣຫນ຺ຕີຕິ. ອຕ຺ຕນິ ປຕິຕໍ ຊນໍ ອນສ຺ສາສິກໍ ກຕ຺ວາ ອຊ຺ໂຌຕ຺ຖ ຣນ຺ໂຕ ຫນຕິ ມາເຣຕີຕິ ໂອໂຆ. ປກຕິມໂຫໂຆ. ຕຖາ ອວຫນນຏ຺ເຐນ ທຸຕ຺ຕຣຏ຺ເຐນຈ ໂອຆສທິສາຕິ ໂອຆາ. ຍທິຈ ອວຫຎ຺ຎນຏ຺ເຐຈ ທຸຕ຺ຕຣຏ຺ເຐນຈ ໂອຆານາມ ສິຍຸນ຺ຕິອາທິໂກ ປສງ຺ໂຄ ມານາທີນຎ຺ຈ ໂອຆຠາວ ປຣິຫາໂຣ ວຸຕ຺ຕ ນເຍນ ເວທິຕພ຺ໂພ.

ວຏ຺ຏສ຺ມິໍວາ ຠວຍນ຺ຕເກວາ ສຕ຺ເຕ ໂຍເຊນ຺ຕີຕິ ໂຍຄາ. ຠວນ຺ຕຣຈຸຕິຍາ ສຫ ຠວນ຺ຕຣປຏິສນ຺ຘິໍ ຄນ຺ເຕນ຺ຕິ ຆເຏນ຺ຕີຕິ ຄນ຺ຖາ. ອຠິຊ຺ຌາຕິ ສພ຺ພສ຺ສ ຣາຄສ຺ເສຕໍ ນາມໍ. ຕສ຺ມາ ຣູປາຣູປ ຣາຄາປິ ເອຕ຺ຖ ສງ຺ຄຫິຕາຕິ ທຏ຺ຐພ຺ພາ. ພ຺ຍາປາໂທຕິປິ ສພ຺ໂພ ໂທໂສ ເອວ. ອິທໍ ສຈ຺ຈາຕິ ນິເວໂສຕິ ອິທເມວ ສຈ຺ຈໍ, ໂມຆມຎ຺ຎນ຺ຕິ ປວຕ຺ໂຕ ມິຈ຺ຉາຠິນິເວໂສ. ວຏ຺ຏທຸກ຺ຂໂຕ ວິມຸຕ຺ຕິຍາ ອມຄ຺ຄຠູຕໍເຍວ ໂຄສີລໂຄວຕາທິກໍ ປຣໂຕ ອາມສນໍ ຕຖາ ຕຖາ ກປ຺ເປຕ຺ວາ ຄຫຓໍ ສີລພ຺ພຕປຣາມາໂສ. ເອຕ຺ຖຈ ປຣໂຕຕິ ຠູຕສຠາວປຈ຺ຈນິກໂຕຕິ ອຕ຺ໂຖ. ກາຍສທ຺ໂທ ປນ ສພ຺ພຕ຺ຖ ຣູປກາເຍ ນາມກາເຍຈ ປວຕ຺ໂຕຕິ ອຕິຕກາເຍນ ປຈ຺ຈຸປ຺ປນ຺ນ ກາຍໍ ປຈ຺ຈຸປ຺ປນ຺ນກາເຍນຈ ອນາຄຕກາຍໍ ຄນ຺ເຖຕິ ຆເຏຕີຕິ ກາຍຄນ຺ໂຖ. ອຖວາ, ກາເຍ ຄຓ຺ໂຐຕິ ກາຍຄຓ຺ໂຐ. ອຊ຺ຌຕ຺ຕ ຄຓ຺ໂຐຕິ ອຕ຺ໂຖ. ນິຄຓ຺ໂຐນາຏປຸຕ຺ໂຕຕິອາທີສຸວິຍ ຄຓ຺ຐສທ຺ໂທ ຄຓ຺ຐິຍໍ ປວຕ຺ໂຕ. ຠຸສໍ ອາທິຍນ຺ຕິ ອມຸຎ຺ຈນຄາຫໍ ຄຓ຺ຫນ຺ຕີຕິ ອຸປາທານານິ. ກິເລສຠູໂຕ ກາໂມເອວ ອຸປາທານໍ ກາມຸ ປາທານໍ. ວຕ຺ຖຸຠູຕໍວາ ກາມໍ ອຸປາທິຍຕີຕິ ກາມຸປາທານໍ.

ທ຺ວາສຏ຺ຐິທິຏ຺ຐິໂຍ ຕິວິຘ ມຫາທິຏ຺ຐິໂຍ ອຎ຺ຎາປິວາ ສາສເນ ໂລເກຈ ສນ຺ທິສ຺ສມານາ ວິປຣີຕຄາຫຠູຕາ ທິຏ຺ຐິໂຍ ທິຏ຺ຐຸປາທານໍ. ຍຖາຄຫິຕໍວາ ປຸຣິມທິຏ຺ຐິໍ ອິທເມວ ສຈ຺ຈໍ ໂມຆມຎ຺ຎນ຺ຕິ ອຸປາທິຍຕີຕິ ທິຏ຺ຐຸປາທານໍ. ໂຄຓກຸກ຺ກຸຣາທີນໍ ຕໍຕໍປກຕິຈາຣິຕ຺ຕໍ ສີລໍ ນາມ. ຕເມວ ສຸຏ຺ຐຸໍ ສມາທິນ຺ນໍ ວຕໍນາມ. ຕທຸຠຍໍ ສໍສາຣມຸຕ຺ຕິຍາ ມຄ຺ໂຄຕິ ທຬ຺ຫຄຫຓໍ ສີລພ຺ພຕຸ ປາທານໍ ນາມ. ອຕ຺ຕວາທຸປາທານນ຺ຕິ ເອຕ຺ຖ ອຕ຺ຕາ ວຸຈ຺ຈຕິ ປຣິກປ຺ປພຸທ຺ຘິຍາ ຄຫິໂຕ ເອເກກສ຺ມິໍ ສຕ຺ຕ ສນ຺ຕາເນ ປຘານິສ຺ສໂຣ. ຍໍ ໂລກິຍມຫາຊນາ ສຕ຺ໂຕຕິວາ ປຸຄ຺ຄໂລຕິວາ ຊີໂວຕິວາ ຕຖາຄໂຕຕິວາ ໂລໂກຕິວາ ສຎ຺ຊານນ຺ຕິ. ຍຎ຺ຈ ນານາຕິຕ຺ຖິຍາ ອິສ຺ສຣນິມ຺ມິຕໍວາ ອຘິຈ຺ຈສມຸປ຺ປນ຺ນໍວາ ອຈ຺ຈນ຺ຕສສ຺ສຕໍວາ ເອກຈ຺ຈສສ຺ສຕໍວາ ອຸຈ຺ເຉທໍວາ ປຎ຺ຎເປນ຺ຕີຕິ. ຕໍ ອຕ຺ຕານໍ ອຠິວທນ຺ຕິເຈວ ອຸປາທິຍນ຺ຕິຈ ສຕ຺ຕາ ເອເຕນາຕິ ອຕ຺ຕວາ ທຸປາທານໍ. ວີສຕິວິຘາ ສກ຺ກາຍທິຏ຺ຐິ. ຕຕ຺ຖ ອຠິວທນ຺ຕີຕິ ວິສິຏ຺ຐໍ ປຘານໍ ກຕ຺ວາ ວທນ຺ຕິ. ອຸປາທິຍນ຺ຕີຕິ ທຬ຺ຫໍ ອາທິຍນ຺ຕິ. ຍຖາຫ –

ຕຕ຺ຖ ກຕມາ ສກ຺ກາຍທິຏ຺ຐິ. ອິຘ ອສ຺ສຸຕວາ ປຸຖຸຊ຺ຊໂນ ຣູປໍ ອຕ຺ຕໂຕ ສມນຸປສ຺ສຕິ. ຣູປວນ຺ຕໍວາ ອຕ຺ຕານໍ. ອຕ຺ຕນິ ວາ ຣູປໍ. ຣູປສ຺ມິໍວາ ອຕ຺ຕານໍ. ເວທນໍ ອຕ຺ຕໂຕ ສມນຸປສ຺ສຕິ. ເວທນາວນ຺ຕໍວາ ອຕ຺ຕານໍ. ອຕ຺ຕນິວາ ເວທນໍ. ເວທນາປວາ ອຕ຺ຕານໍ. ສຎ຺ຎໍ. ສງ຺ຂາເຣ. ວິຎ຺ຎາຓນ຺ຕິ.

ຕຕ຺ຖ ຣູປໍ ອຕ຺ຕໂຕ ສມນຸປສ຺ສຕີຕິ ຣູປເມວ ອຕ຺ຕາຕິ ຄຓ຺ຫາຕິ. ຣູປວນ຺ຕໍວາ ອຕ຺ຕານນ຺ຕິ ອຕ຺ຕາ ເມ ຣູປວາຕິ ຄຓ຺ຫາຕິ. ອຕ຺ຕນິ ວາ ຣູປນ຺ຕິ ອຕ຺ຕານໍ ປຏິຈ຺ຈ ຣູປໍ ຕິຏ຺ຐຕີຕິ ຄຓ຺ຫາຕິ. ຣູປສ຺ມິໍວາ ອຕ຺ຕານນ຺ຕິ ຣູປໍ ປຏິຈ຺ຈ ອຕ຺ຕາ ຕິຏ຺ຐຕີຕິ ຄຓ຺ຫາຕິ. ກຖໍ ຣູປກາຍໍ ອຸທ຺ທິສ຺ສ ອຊ຺ຊ ອຫໍ ຖທ຺ໂຘມ຺ຫີຕິ ວາ ອຊ຺ຊ ອຫໍ ມຸທຸໂກມ຺ຫີຕິວາ ວທນ຺ໂຕ ປຖວິ ສງ຺ຂາຕໍ ຣູປໍ ອຕ຺ຕໂຕ ສມນຸປສ຺ສຕິນາມ. ອຊ຺ຊ ມມ ກາໂຍ ຖທ຺ໂຘຕິວາ ມຸທູຕິວາ ວທນ຺ໂຕ ເສສຘມ຺ເມວາ ຘມ຺ມມຸຕ຺ຕກໍວາ ອຕ຺ຕານໍ ຄເຫຕ຺ວາ ຕໍ ອຕ຺ຕານໍ ປຖວີວນ຺ຕໍ ສມນຸປສ຺ສຕິນາມ. ອຊ຺ຊ ຖທ຺ຘຠາໂວວາ ມຸທຸຠາໂວວາ ມຍິ ຊາໂຕຕິ ວທນ຺ໂຕ ອຕ຺ຕນິ ປຖວິໍສ ມນຸປສ຺ສຕິນາມ. ອຊ຺ຊາຫໍ ຖທ຺ຘຠາເວ ຐິໂຕມ຺ຫິ ມຸທຸຠາເວ ຐິໂຕ ມ຺ຫີຕິ ວທນ຺ໂຕປຖວິມ຺ຫິ ອຕ຺ຕານໍ ສມນຸສ຺ສຕິນາມ. ອຍໍ ປຖວິມ຺ຫິ ຈຕຸຣາວຕ຺ຖິກາຍ ສໍກ຺ກາຍທິຏ຺ຐິຍາ ປວຕ຺ຕາກາໂຣ. ເສເສສຸ ສຕ຺ຕວີສຕິຣູເປສຸ ຍຖາສມ຺ຠວໍ ວຕ຺ຕພ຺ໂພ. ອຫໍ ມຣາມິ ມຣິສ຺ສາມີຕິອາທິນາ ຫິ ອນິຈ຺ຈຕາຍໍປິ ສາທິຏ຺ຐິ ປວຕ຺ຕຕິເຍວ. ເສສຣູເປສຸ ວຕ຺ຕພ຺ພໍ ນຕ຺ຖິ. ອິທໍ ນາມ ອຫໍ ປຸພ຺ເພ ສໍຠຸຎ຺ຊິໍ. ອຊ຺ຊ ສໍຠຸຎ຺ຊາມິ. ປຣໂຕ ສໍຠຸຎ຺ຊິສ຺ສາມີຕິວາ ສຸຂິໂຕມ຺ຫິ ທຸກ຺ຂິໂຕມ຺ຫີຕິວາ ເວທນໍ ອຕ຺ຕໂຕ ສມນຸປສ຺ສຕິ. ອຊ຺ຊ ມມ ກາໂຍ ສຸຂິໂຕ ທຸກ຺ຂິໂຕຕິວາ ມມຈິຕ຺ຕໍ ສຸຂິຕໍ ທຸກ຺ຂິຕນ຺ຕິວາ ອຕ຺ຕານໍ ເວທນາວນ຺ຕໍ ສມນຸປສ຺ສຕິ. ອຊ຺ຊສຸຂໍວາ ທຸກ຺ຂໍວາ ມຍິຊາຕນ຺ຕິ ອຕ຺ຕນິ ເວທນໍ ສມນຸປສ຺ສຕິ. ອຊ຺ຊາຫໍ ສຸຂິຕ ຠາເວ ຐິໂຕມ຺ຫິ ທຸກ຺ຂິຕຠາເວ ຐິໂຕມ຺ຫີຕິ ເວທນາຍ ອຕ຺ຕານໍ ສມນຸປສ຺ສຕີຕິ.

ສຎ຺ຎາຍ ສພ຺ເພສຸຈ ປຎ຺ຎາສມຕ຺ເຕສຸ ສງ຺ຂາເຣສຸ ວິສຸໍ ວິສຸໍ ວິຕ຺ຖາເຣຕ຺ວາ ວຕ຺ຕພ຺ໂພ. ອຫໍ ປສ຺ສາມີຕິ ຈກ຺ຂຸວິຎ຺ຎາຓໍ ອຕ຺ຕໂຕ ສມນຸປສ຺ສຕິ. ທສ຺ສນໍ ເມຕິ ອຕ຺ຕານໍ ວິຎ຺ຎາຓວນ຺ຕໍ ສມນຸປສ຺ສຕິ. ມຍິທສ຺ສນໍນາມ ອຕ຺ຖີຕິ ອຕ຺ຕນິ ວິຎ຺ຎາຓໍ ສມນຸປສ຺ສຕິ, ອຫໍ ທສ຺ສເນ ສມຕ຺ໂຖມ຺ຫີຕິ ວິຎ຺ຎາຓສ຺ມິໍ ອຕ຺ຕານໍ ສມນຸປສ຺ສຕິ. ເອເສ ວນໂຍ ເສເສສຸ ປຎ຺ຈສຸ ວິຎ຺ຎາເຓສູຕິ. ອຫ ມສ຺ມິ ອຫໍ ເອໂກ ສຕ຺ໂຕ ເອໂກປຸຄ຺ຄໂລ ເອໂກ ຊີໂວ ເອໂກ ໂລໂກ ເອໂກ ນໂຣ ມນຸສ຺ໂສ ເທໂວສກ຺ໂກ ພ຺ຣຫ຺ມາຕິວາ ອຫໍຄຈ຺ຉາມິ ອຫໍ ຕິຏ຺ຐາມິ ອຫໍ ນິສີທາມິ ອຫໍ ນິປ຺ປຊ຺ຊາມິ ອຫໍ ສມິຎ຺ເຊມິ ປສາເຣມີຕິອາທິນາ ວາ ຂນ຺ຘປຎ຺ຈກໍວາ ເອກເມກໍວາ ຂນ຺ຘໍ ສມູຫໂຕ ຄເຫຕ຺ວາ ປວຕ຺ຕິປິ ວຕ຺ຕພ຺ພາ. ອປຣິຎ຺ຎາຕວຕ຺ຖຸການຎ຺ຫິ ເອກມຸຫຸຕ຺ຕ ມຕ຺ເຕປິ ຍໍກິຎ຺ຈິ ອຕ຺ຕໂນວາ ປຣສ຺ສວາ ອຕ຺ຕປຏິສໍຍຸຕ຺ຕວຈນໍ ກເຖນ຺ຕານໍ ຈິຕ຺ຕໍວາ ວຈນໍວາ ຍຖາວຸຕ຺ເຕ ຣູປາຣູປຘມ຺ເມ ກທາຈິ ອຕ຺ຕໂຕ ອຸປາທິຍິຕ຺ວາ ປວຕ຺ຕຕິ. ກທາຈິ ອຕ຺ຕປຣິວາຣ ຠາເວນ. ກທາຈິ ອຕ຺ຕນິສ຺ສິຕຠາເວນ. ກທາຈິ ອຕ຺ຕນິສ຺ສຍຠາເວນ. ກທາຈິ ເອເກກຘມ຺ມວເສນ. ກທາຈິ ສມູຫຘມ຺ມວເສນາຕິ.

ຍສ຺ມາ ປນ ອຕ຺ຕນິມິຕ຺ຕໍນາມ ວສວຕ຺ຕນາກາຣໍ ປຏິຈ຺ຈ ອຸປຏ຺ຐາຕິ. ວສວຕ຺ຕນາ ກາໂຣຈ ຣູປາຣູປຘມ຺ມານໍ ປຈ຺ຈຍາຍຕ຺ຕ ວຸຕ຺ຕິກຕ຺ຕໍ ຂຓິ ກຕ຺ຕຎ຺ຈ ສຸຏ຺ຐຸ ປສ຺ສນ຺ຕານໍ ນຕ຺ຖິ. ຕສ຺ມາ ປຣິຎ຺ຎາຕວຕ຺ຕຸການໍ ອຕ຺ຕ ປຏິສໍຍຸຕ຺ຕວຈນໍ ກເຖນ຺ຕານໍປິ ຈິຕ຺ຕໍ ປທຸມິນິປຕ຺ເຕ ອຸທກພິນ຺ທຸ ວິຍ ເຕສຸ ຘມ຺ເມສຸ ອລຄ຺ຄິຕ຺ວາເອວ ປວຕ຺ຕຕີຕິ ເວທິຕພ຺ພໍ. ສຕ຺ຕານໍ ຈິຕ຺ຕສນ຺ຕາເນ ກຸສເລ ຘມ຺ເມ ອນຸປ຺ປນ຺ເນວາ ອຸປ຺ປາເທຕຸໍ ອຸປ຺ປນ຺ເນວາ ວາ ເສຕຸໍ ອທຕ຺ວາ ນີວາເຣນ຺ຕີຕິ ນີວຣຓານິ. ກາມນຏ຺ເຐນ ກາໂມ, ຉນ຺ທນຏ຺ເຐນຉນ຺ໂທຕິ ກາມຈ຺ຉນ຺ໂທ. ພລວຣາໂຄ. ໂສເອວນີວຣຓນ຺ຕິ ກາມຈ຺ຉນ຺ທນີວຣຓໍ. ປຏ຺ຐາເນອາຣຸປ຺ເປກາມຈ຺ຉນ຺ທໍ ນີວຣຓໍ ປຏິຈ຺ຈອຸທ຺ຘຈ຺ຈນີວຣຓນ຺ຕິ ວຸຕ຺ຕຕ຺ຕາ ປນ ຖເປຕ຺ວາ ຣູປາຣູປຣາເຄ ອວເສໂສ ສພ຺ໂພໂລໂຠ ກາມຈ຺ຉນ຺ເທ ອສງ຺ຄຫິໂຕນາມ ນຕ຺ຖິ. ຌານປຏິປກ຺ຂຠາໂວປນ ປຎ຺ຈກາມຄຸຓິກຣາຄສ຺ເສວ ໂຫຕີຕິ ເວທິຕພ຺ໂພ. ພ຺ຍາປຊ຺ຊນໍ ພ຺ຍາປາໂທ. ຈິຕ຺ຕສ຺ສ ປູຕິຠາໂວຕິ ອຕ຺ໂຖ. ໂຍໂກຈິໂທໂສ. ກສ຺ມາ ປເນຕ຺ຖ ຖິນມິທ຺ຘ ນີວຣຓນ຺ຕິ ຈ ອຸທ຺ຘຈ຺ຈ ກຸກ຺ກຸຈ຺ຈ ນີວຣຓນ຺ຕິ ຈ ທ຺ເວ ທ຺ເວ ຘມ຺ມາ ເອກໍ ນີວຣຓໍ ກຕ຺ວາ ວຸຕ຺ຕາຕິ. ກິຈ຺ຈໂຕ ປຈ຺ຈຍໂຕ ປຏິປກ຺ຂໂຕຈ ສທິສຕ຺ຕາ. ຕຖາ ຫິ ກິຈ຺ຈໂຕ ຕາວ ຖິນມິທ຺ຘທ຺ວຍໍ ຈິຕ຺ຕຸປ຺ປາທານໍ ລີນຠາວາ ປາທນກິຈ຺ຈໍ. ອຸທ຺ຘຈ຺ຈກຸກ຺ກຸຈ຺ຈທ຺ວຍໍ ອວູປສນ຺ຕຠາວາປາທນກິຈ຺ຈໍ. ປຈ຺ຈຍໂຕ ປຸຣິມທ຺ວຍໍ ຕນ຺ທິວິຊມ຺ຠິ ຕຕາປຈ຺ຈຍໍ. ປຈ຺ຉິມທ຺ວຍໍ ຎາຕິພ຺ຍສນາທິວິຕກ຺ກປຈ຺ຈຍໍ. ປຏິປກ຺ຂໂຕ ປຸຣິມທ຺ວຍໍ ວີຣິຍປຏິປກ຺ຂໍ. ປຈ຺ຉິມທ຺ວຍໍ ສມຖປຏິປກ຺ຂນ຺ຕິ.

ອນຸເສນ຺ຕີຕິ ອນຸສຍາ. ອນຸຣູປໍ ກາຣຓໍ ລຠິຕ຺ວາ ອຸປ຺ປຊ຺ຊນ຺ຕີຕິ ອຕ຺ໂຖ. ອນຸອນຸ ເສນ຺ຕີຕິວາ ອນຸສຍາ. ຍາວ ມຄ຺ຄໍ ນປຏິລຠຕິ. ຕາວ ອນ຺ຕຣາ ອປຣິກ຺ຂິຍ຺ຍມານາ ຫຸຕ຺ວາ ກາຣຓລາເຠ ສຕິ ປຸນປ຺ປຸນໍ ອຸປ຺ປຊ຺ຊນ຺ຕີຕິ ອຕ຺ໂຖ. ອຸປ຺ປຊ຺ຊນຎ຺ເຈຕ຺ຖ ອປ຺ປຫີນຏ຺ເຐນ ອຸປ຺ປຊ຺ຊນາ ຣຫຠາໂວ ເວທິຕພ຺ໂພ. ນ ປນ ສຣູປໂຕ ອຸປ຺ປຕ຺ຕິ, ກຖໍ ວິຎ຺ຎາ ຍຕີຕິ ເຈ. ຍສ຺ສ ກາມຣາຄານຸສໂຍ ອຸປ຺ປຊ຺ຊຕິ, ຕສ຺ເສວ ປຏິຆານຸສໂຍ ອຸປ຺ປຊ຺ຊຕີຕິ ວຸຕ຺ຕຕ຺ຕາ. ເອວຎ຺ຈ ກຕ຺ວາ ປາຬິຍໍ ປຸຖຸຊ຺ຊນສ຺ສ ສຕ຺ຕປິ ອນຸສຍາ ອນຸສຍວາເຣ ສຫ ອນຸເສນ຺ຕີຕິ ອຸປ຺ປຊ຺ຊນວາເຣ ສຫ ອຸປ຺ປຊ຺ຊນ຺ຕີຕິ ວຸຕ຺ຕາ. ຍຖາຫ ປຸຖຸຊ຺ຊນສ຺ສ ອວິຊ຺ຊານຸສໂຍຈ ອນຸເສຕິ. ກາມຣາຄ. ປຏິຆ. ມານ. ທິຏ຺ຐິ. ວິຈິກິຈ຺ຉາ. ຠວຣາຄນຸສໂຍຈ ອນຸເສຕີຕິ. ຕຖາ ອຸປ຺ປຊ຺ຊນວາເຣປີຕິ.

ອປິຈ, ສຣູປໂຕ ປຣິຍຸຏ຺ຐານໍ ອປຕ຺ວາ ສນ຺ຕາເນ ປວຕ຺ຕມາເນຫິ ກຸສລາກຸສລາ ພ຺ຍາກຕຈິຕ຺ຕຸປ຺ປາເທຫິ ສຫ ອນຸຣູປາ ອວິຣຸທ຺ຘາ ຫຸຕ຺ວາ ເສນ຺ຕິ. ວິສຸໍ ສມ຺ປຍຸຕ຺ຕຘມ຺ມຠາເວນ ອວຸຏ຺ຐິຕາ ຫຸຕ຺ວາ ສຍິຕາ ໂຫນ຺ຕີຕິ ອນຸສຍາ. ອນຸ ອນຸ ເສນ຺ຕີຕິວາ ອນຸສຍາ. ປກຕິຍາ ຍຖານຸສຍິເຕສຸເອວ ກາມຣາຄາທີສຸ ປຸນປ຺ປຸນໍ ອຸປ຺ປຊ຺ຊິຕ຺ວາ ທິຄຸຓ ຕິຄຸຓາທິ ວເສນ ປຸນປ຺ປຸນໍ ເສນ຺ຕິ. ສຍນາກາເຣນ ອຸປຣຸປຣິ ປລິເວເຐນ຺ຕີຕິ ອຕ຺ໂຖ.

ຕີສຸ ຣາຄາທີນໍ ອວຕ຺ຖາສຸ ປຖມາວຕ຺ຖາຍ ຐິຕານໍ ກາມຣາຄາ ທີນເມຕໍ ອຘິວຈນໍ. ຕິສ຺ໂສ ຫິ ອວຕ຺ຖາ ອນຸສຍາວຕ຺ຖາ ປຣິຍຸຏ຺ຐານາວຕ຺ຖາ ວີຕິກ຺ກມາວຕ຺ຖາຕິ. ຕຕ຺ຖ ເຍ ກາມຣາຄາທໂຍ ອຸປ຺ປຊ຺ຊິຕ຺ວາ ກາຍງ຺ຄວາຈງ຺ຄໍ ຈາເລນ຺ຕິ, ເຕສໍ ຕຖາປວຕ຺ຕາ ອວຕ຺ຖາ ວີຕິກ຺ກມາວຕ຺ຖານາມ. ເຍ ມນສ຺ມິໍ ເອວ ຊວນຈິຕ຺ຕສຫຊາຕາ ຫຸຕ຺ວາ ປວຕ຺ຕນ຺ຕິ, ເຕສໍ ຕຖາປວຕ຺ຕາ ອວຕ຺ຖາ ປຣິຍຸຏ຺ຐານາວຕ຺ຖານາມ. ເຍ ປນ ຊວນສຫຊາຕຠາວໍປິ ອປຕ຺ວາ ວາສນາຘາຕຸໂຍ ວິຍ ຈິກ຺ກສນ຺ຕານາ ນຸສຍິຕາ ຫຸຕ຺ວາ ປຣິຍຸຏ຺ຐານປ຺ປຕ຺ຕິຍາ ພີຊຠາເວນ ຕິຏ຺ຐນ຺ຕິ, ສຸຠນິມິຕ຺ຕາທິເກຈ ອາຣມ຺ມເຓ ອາປາຕມາຄເຕ ເຍສໍ ວເສນ ອາວຊ຺ຊນໍ ຣາຄາທິປາຕຸຠາວຕ຺ຖາຍ ອໂຍນິໂສ ຠວງ຺ຄໍ ອາວຏ຺ເຏຕິ, ອຠາວິຕຎ຺ຈ ຈິຕ຺ຕໍ ເຍສໍ ວເສນ ທມຖໍ ນອຸເປຕິ, ເຕສໍ ຕຖາ ປວຕ຺ຕາ ອວຕ຺ຖາ ອນຸສຍາວຕ຺ຖານາມ. ຕທວຕ຺ຖິກາ ກາມຣາຄາທໂຍ ອນຸສຍານາມ. ເຕ ປນ ອປຣມຕ຺ຖຠູຕາປິ ນ ໂຫນ຺ຕິ. ເອກນ຺ຕປຣມຕ຺ຖຊາຕິກຕ຺ຕາ. ນຈ ກຸສລາພ຺ຍາກຕຠູຕາ ເອກນ຺ຕາກຸສລຊາຕິກຕ຺ຕາ. ນາປິ ກຸສລາພ຺ຍາກຕວິຣຸທ຺ຘາ, ວິສຸໍ ສມ຺ປຍຸຕ຺ຕຘມ຺ມຠາເວນ ອນຸປລທ຺ຘຕ຺ຕາ. ນາປິ ກາລຕ຺ຕຍວິນິມຸຕ຺ຕາ, ເຕກາລິກຘມ຺ມສນ຺ນິສ຺ສເຍນ ປວຕ຺ຕນໂຕ. ຍທາ ປນ ເຕ ສມຸຏ຺ຐ ຫິຕ຺ວາ ປຣິຍຸຏ຺ຐານຠາວໍ ຄຈ຺ຉນ຺ຕິ, ຕທາ ວິສຸໍ ສມ຺ປຍຸຕ຺ຕຘມ຺ມ ຠາວຎ຺ຈ ຄຈ຺ຉນ຺ຕິ. ສາຣມ຺ມຓາທິຠາໂວຈ ເຕສໍ ປຣິພ຺ຍຕ຺ໂຕ ໂຫຕິ. ເອຕທຕ຺ຖໍ ສນ຺ຘາຍ ກຖາວຕ຺ຖຸມ຺ຫິ ເຕສໍ ສາຣມ຺ມຓຘມ຺ມຠາໂວ ສງ຺ຂາຣກ຺ຂນ຺ຘຠາໂວຈ ປຕິຏ຺ຐາປິໂຕ ໂຫຕີຕິ.

ຍຖາ ປນ ຜລຘາຣິມ຺ຫິ ຣຸກ຺ຂມ຺ຫິ ວິສກຓ຺ຏເກ ທິນ຺ເນ ຣຸກ຺ຂານຸສຍິໂຕ ຜລຸປ຺ປຕ຺ຕິຍາ ປຈ຺ຈຍຠູໂຕ ສິເນໂຫ ປຣິກ຺ຂຍໍ ຄຈ຺ຉຕິ. ສມເຍ ອຸປ຺ປຊ຺ຊິສ຺ສມານານິ ຜລານິ ນຸປ຺ປຊ຺ຊນ຺ຕິ. ເອວໍ ສານຸສເຍ ຈິຕ຺ຕ ສນ຺ຕາເນ ຍສ຺ມິໍ ຂເຓ ມຄ຺ໂຄ ປາຕຸຠວຕິ, ຕສ຺ມິໍ ສຫມຄ຺ຄຸປ຺ປາທາ ໂສ ໂສ ອນຸສໂຍ ປຣິກ຺ຂຍໍ ຄຈ຺ຉຕິ. ປຣິກ຺ຂີຓສ຺ສ ປນ ປຸນ ປຣິຍຸຏ຺ຐານໍນາມ ນຕ຺ຖິ, ກຸໂຕ ວີຕິກ຺ກໂມຕິ ອິມມຕ຺ຖໍ ສນ຺ຘາຍ ມຄ຺ໂຄ ອນາຄຕສາມຎ຺ຎໍ ກິເລສຊາຕໍ ປຊຫຕີຕິ ຕຕ຺ຖ ຕຕ຺ຖ ວຸຕ຺ໂຕ. ຕຕ຺ຖ ອນາຄຕສາມຎ຺ຎນ຺ຕິ ອນາຄຕສມ຺ມຕໍ, ນ ເອກນ຺ຕ ອນາຄຕໍ. ເຕເນວ ຫິ ອຏ຺ຐກຖາຍໍ ມຄ຺ໂຄ ເຍກິເລເສ ປຊຫຕິ, ເຕ ອຕີຕາກິວາ ອນາຄຕາຕິວາ ປຈ຺ຈຸປ຺ປນ຺ນາຕິວາ ນວຕ຺ຕພ຺ພາຕິ ວຸຕ຺ຕໍ. ເອເຕນຈ ມຄ຺ໂຄ ກິເລສມຸເຂນ ຍານິ ກຸສລາກຸສລກມ຺ມານິຈ ອຸປາທິນ຺ນກຂນ຺ຘປຎ຺ຈເກຈ ປຊຫຕິ, ເຕ ອຕີຕາຕິວາອນາຄຕາຕິວາ ປຈ຺ຈຸປ຺ປນ຺ນາຕິວາ ນວຕ຺ຕພ຺ພາຕິ ທີເປຕິ. ຍທິ ເອວໍ ມຄ຺ເຄນ ປຫີນາ ສພ຺ເພ ເຕຠູມກຘມ຺ມາ ກາລວິມຸຕ຺ຕານາມ ອຕງ຺ຂຕາ ນາມ ອປຈ຺ຈຍານາມ ສິຍຸນ຺ຕິ.ນ. ເຕກາລິກຊາຕິກຕ຺ຕາ ສງ຺ຂຕ ສປຈ຺ຈຍຊາຕິກຕ຺ຕາ ຈ. ເຕ ຫິ ມຄ຺ເຄ ອນຸປ຺ປນ຺ເນ ອິເມ ນາມຘມ຺ມາ ອຸປ຺ປຊ຺ຊິສ຺ສນ຺ຕິ ນິຣຸຊ຺ຌິສ຺ສນ຺ຕີຕິ ເອວໍ ສງ຺ຂຕລກ຺ຂຓໍ ອາຫຈ຺ຈ ຎາເຓນ ຄຫິຕຕ຺ຕາ ລກ຺ຂຓວເສນ ເຕຠູມກາທິຠາວໍ ຠຊນ຺ຕີຕິ. ເອວຎ຺ຈ ກຕ຺ວາ ວິສຸໍ ສມ຺ປຍຸຕ຺ຕຘມ຺ມຠາວໍ ອປຕ຺ຕານໍ ອນຸສຍາວຕ຺ຖາຍ ວາ ວາສນາວຕ຺ຖາຍວາ ກມ຺ມສມງ຺ຄີຕາວຕ຺ຖາຍວາ ອາສຍຊ຺ຌາສຍາ ຘິມຸຕ຺ຕິຈຣິຕວຕ຺ຖາສຸວາ ຐິຕານໍ ສຠາວານໍ ຊາຕິວເສນ ປຣມຕ຺ຖ ຘມ຺ມຕາ ອກຸສລາທິຕາຈ ປຈ຺ເຈຕພ຺ພາ ໂຫຕີຕິ.

[໒໐໘] ວິຠາວນິຍໍ ປນ

‘‘ອປ຺ປຫີນາ ຫິ ກິເລສາ ກາຣຓລາເຠ ສຕິ ອຸປ຺ປຊ຺ຊນາ ຣຫາ ສນ຺ຕາເນ ອນຸອນຸສຍິຕາ ວິຍ ໂຫນ຺ຕີຕິ ຕທວຕ຺ຖາ ອນຸສຍາຕິ ວຸຈ຺ຈນ຺ຕິ. ເຕ ປນ ນິປ຺ປຣິຍາຍໂຕ ອນາຄຕ ກິເລສາ. ອຕີຕປຈ຺ຈຸປ຺ປນ຺ນາປິ ຕໍສຠາວຕ຺ຕາ ຕຖາ ວຸຈ຺ຈນ຺ຕີ’’ຕິ ວຸຕ຺ຕໍ. ຕຕ຺ຖ ອນຸສຍານາມ ສນ຺ຕາເນ ກທາຈິປິ ອນຸປ຺ປນ຺ນ ປຸພ຺ພາ ອນາຄຕ ກິເລສາ ເອວາຕິ ກຕ຺ວາ ສນ຺ຕາເນ ອນຸ ອນຸສຍິຕາ ວິຍ ໂຫນ຺ຕີຕິ ວຸຕ຺ຕໍ. ຕໍ ນ ຍຸຊ຺ຊຕິ.

ນ ຫິ ເຕ ອນຸອນຸສຍິຕາ ວິຍ ໂຫນ຺ຕິ. ເອກນ຺ເຕນ ອນຸສຍິຕາເອວ ໂຫນ຺ຕີຕິ.

[໒໐໙] ຍຎ຺ຈ ຕຕ຺ຖ

‘‘ເຕ ປນ ນິປ຺ປຣິຍາຍໂຕ ອນາຄຕກິເລສາ’’ຕິ ວຸຕ຺ຕໍ. ຕໍປິ ນ ຍຸຕ຺ຕໍ.

ນ ຫິ ມຄ຺ເຄນ ອປ຺ປຫີນາ ອນຸສຍາ ອນາຄຕານາມ ໂຫນ຺ຕິ. ປຫີນາປິຈ ນິປ຺ປຣິຍາຍໂຕ ອນາຄຕາຕິ ນສກ຺ກາ ວຕ຺ຕຸໍ. ອນາຄຕ ສາມຎ຺ຎສ຺ສ ອຘິປ຺ເປຕຕ຺ຕາຕິ. ເອເຕນ ອຕີຕປຈ຺ຈຸປ຺ປນ຺ນາປິ ຕໍສຠາວຕ຺ຕາຕຖາ ວຸຈ຺ຈນ຺ຕີຕິ ອິທໍວິປຏິກ຺ຂິຕ຺ຕໍ ໂຫຕິ. ອປິຈ, ອຸປ຺ປາທຏ຺ຐິຕິຠງ຺ຄ ປຕ຺ຕານໍເອວ ເອກນ຺ເຕນ ເຕກາລິກຕາ ໂຫຕີຕິ ຕທປຕ຺ຕານໍ ອນຸສຍານໍ ປຈ຺ຈຸປ຺ປນ຺ນຕາ ປຣິຍາໂຍວ ວຕ຺ຕຸໍ ຍຸຕ຺ໂຕ. ເອວຎ຺ຈ ກຕ຺ວາ ປາຬິຍໍ ຍສ຺ສ ກາມຣາຄນຸສໂຍ ອຸປ຺ປຊ຺ຊຕິ, ຕສ຺ສ ປຏິຆານຸສໂຍ ອຸປ຺ປຊ຺ຊຕີຕິອາທິນາ ປຈ຺ຈຸປ຺ປນ຺ນກາລິໂກ ອຸປ຺ປາທວາໂຣ ເອວ ວຸຕ຺ໂຕ, ນ ນິໂຣຘວາໂຣ, ນຈ ອຕີຕານາຄຕ ວາຣາຕິ. ຍໍ ປນ ປຏິສມ຺ຠິທາມຄ຺ເຄ ຫຎ຺ຈິ ປຈ຺ຈຸປ຺ປນ຺ເນ ກິເລເສ ປຊຫຕິ. ເຕນ ຫິ ຣຕ຺ໂຕ ຣາຄໍ ປຊຫຕິ, ທຸຏ຺ໂຐ ໂທສໍ, ມຸຬ຺ໂຫ ໂມຫນ຺ຕິ ວຸຕ຺ຕໍ. ຕໍ ປຣິຍຸຏ຺ຐານປຕ຺ຕານໍ ເອກນ຺ຕປຈ຺ຈຸປ຺ປນ຺ນກ຺ຂຓໍ ສນ຺ຘາຍ ວຸຕ຺ຕນ຺ຕິ ທຏ຺ຐພ຺ພໍ. ເຕເນວ ຫິ ອຏ຺ຐກຖາຍໍ ວຕ຺ຕມານຸປ຺ປນ຺ນໍ ຠຸຕ຺ວາ ວິຄຕຸປ຺ປນ຺ນໍ ໂອກາສກຕຸປ຺ປນ຺ນໍ ສມຸທາຈາຣຸປ຺ປນ຺ນນ຺ຕິ ຈຕຸພ຺ພິຘໍ ອຸປ຺ປນ຺ນໍ ນ ມຄ຺ຄວຊ຺ຌໍ. ຠູມິລທ຺ຘຸປ຺ປນ຺ນໍ ອາຣມ຺ມຓາ ຘິຄ຺ຄຫິ ຕຸປ຺ປນ຺ນໍ ອວິກ຺ຂມ຺ຠິຕຸປ຺ປນ຺ນໍ ອສມຸຄ຺ຆາຏິຕຸປ຺ປນ຺ນນ຺ຕິ ຈຕຸພ຺ພິຘໍ ມຄ຺ຄວຊ຺ຌນ຺ຕິ ວຸຕ຺ຕໍ. ຕຕ຺ຖ ວຕ຺ຕມານຸປ຺ປນ຺ນໍ ສມຸທາ ຈາຣຸປ຺ປນ຺ນນ຺ຕິ ອິທໍ ທ຺ວຍໍ ຂຓປຈ຺ຈຸປ຺ປນ຺ນເມວ. ຠຸຕ຺ວາວິຄຕຸປ຺ປນ຺ນໍ ອຕີຕເມວ. ໂອກາສ ກຕຸປ຺ປນ຺ນໍ ອນາຄຕເມວ. ຕທຸຠຍໍ ປນ ປຈ຺ຈຸປ຺ປນ຺ນສມີປຕ຺ຕາ ອຸປ຺ປນ຺ນນ຺ຕິ ວຸຕ຺ຕໍ. ສມີປປຈ຺ຈຸປ຺ປນ຺ນນ຺ຕິ ວຸຕ຺ຕໍ ໂຫຕິ.

ຠູມິລທ຺ຘຸປ຺ປນ຺ນໍນາມ ອຕ຺ຕໂນ ຂນ຺ເຘສຸ ອນຸສຍິຕານໍ ມຄ຺ເຄນ ອປ຺ປຫີນານໍ ອນຸສຍານໍເອວ ນາມໍ. ອາຣມ຺ມຓາຘິຄ຺ຄຫິຕຸປ຺ປນ຺ນໍ ນາມ ສຸຠນິມິຕ຺ຕາທິເກ ອາຣມ຺ມເຓ ສກິໍ ຊວິຕ຺ວາ ຍາວ ຕມ຺ມູລໂກ ປຣິຍຸຏ຺ຐານເວໂຄ ນ ວູປສມ຺ມຕິ, ຕາວ ອຘິມຕ຺ຕຖາມຄຕ ຠາເວນ ຐິຕານໍ ເຕສຎ຺ເຎວ ນາມໍ. ອນຸສຍາ ຫິ ນາມ ອນມຕຄ຺ເຄ ສໍສາເຣ ປຸນປ຺ປຸນໍ ປຣິຍຸຏ຺ຐານປຕ຺ຕານໍ ກິເລສານໍ ວເສນ ອຸປຣຸປຣິ ຖິຣ ຕຣ ທຬ຺ຫຕຣ ປຕ຺ຕິຍາ ປກຕິຍາປິ ຖາມຄຕາເອວນາມ ໂຫນ຺ຕິ. ນ ເຍນວາ ເຕນວາ ວາຍາເມນ ປຊຫິຕຸໍ ສກ຺ກຸເຓຍ຺ຍາ. ເອວໍ ສນ຺ເຕປິ ຍທາ ໂຍ ໂຍ ອນຸສໂຍ ປຈ຺ຈຍລາເຠນ ປຣິຍຸຏ຺ຐານ ພຫຸໂລ ໂຫຕິ, ຕທາ ໂສ ໂສ ວິເສເສນ ອຘິມຕ຺ຕຖາມ ຄຕຠາວໍ ປຕ຺ວາ ຐິໂຕ ໂຫຕິ. ຍທາ ໂຍ ໂຍ ປຏິປກ຺ຂຘມ຺ມ ສມາທາເນນ ນິຄ຺ຄຫປຕ຺ໂຕ ໂຫຕິ, ຕທາ ໂສ ໂສ ມນ຺ທຖາມ ຄຕຠາວໍ ປຕ຺ວາ ຐິໂຕ ໂຫຕີຕິ. ອວິກ຺ຂມ຺ຠິຕຸປ຺ປນ຺ນໍນາມ ສມຖ ວິປສ຺ສນາຫິ ສຸຏ຺ຐຸອນິຄ຺ຄຫິຕານໍ ເຕສຎ຺ເຎວ ນາມໍ. ອສມຸຄ຺ຆາຏິ ຕຸປ຺ປນ຺ນໍນາມ ມຄ຺ເຄນ ອປ຺ປຫີນານໍ ຠູມິລທ຺ຘານໍ ເຕສໍເອວ ນາມນ຺ຕິ. ຍສ຺ມາ ປນ ໂລກຸຕ຺ຕຣຘມ຺ມານາມ ກິເລສານໍ ອຈ຺ຈນ຺ຕປຏິປກ຺ຂາ ໂຫນ຺ຕີຕິ ເຫຏ຺ຐິມາ ມຄ຺ຄຏ຺ຐຜລຏ຺ຐາ ເສກ຺ຂາ ອຕ຺ຕໂນ ມຄ຺ຄຜລກ຺ຂເຓສຸ ອຸປຣິ ມຄ຺ຄາຊ຺ເຌຫິປິ ອນຸສເຍຫິ ສານຸສຍາຕິວາ ນິຣານຸສຍາຕິວາ ຖາມວຕາຕິວາ ອຖາມຄຕາຕິວາ ນວຕ຺ຕພ຺ພາ. ຕສ຺ມາ ອນຸສຍານໍ ຕາທິເສ ປຈ຺ຈຸປ຺ປນ຺ນ ຠາເວ ສຕິປິ ຫຎ຺ຈິ ປຈ຺ຈຸປ຺ປນ຺ເນ ກິເລເສ ປຊຫຕິ. ເຕນຫິ ຖາມຄໂຕ ອນຸສຍໍ ປຊຫຕີຕິ ວຸຕ຺ຕ ໂທໂສ ນຕ຺ຖີຕິ ເວທິຕພ຺ໂພຕິ. ກາມຣາໂຄເອວ ອນຸສໂຍ ກາມຣາຄານຸສໂຍ.

ສໍໂຍເຊນ຺ຕິ ພນ຺ຘນ຺ຕີຕິ ສໍໂຍຊນານິ, ຕານິ ປນ ສກ຺ກາຍທິຏ຺ຐິ ວິຈິກິຈ຺ຉາ ສີລພ຺ພຕປຣາມາໂສ ກາມຈ຺ຉນ຺ໂທ ພ຺ຍາປາໂທຕິ ປຎ຺ຈ ໂອຣມ຺ຠາຄິຍານິ. ຣູປຣາໂຄ ອຣູປຣາໂຄ ມາໂນ ອຸທ຺ຘຈ຺ຈໍ ອວິຊ຺ຊາຕິ ປຎ຺ຈ ອຸທ຺ຘໍຠາຄິຍານີຕິ ສຸຕ຺ຕນ຺ເຕ ອຠິຘມ຺ເມຈ ທສສໍໂຍຊນານິ ອາຄຕານິ. ອິຕຣານິ ປນ ອຠິຘມ຺ເມເອວ ອາຄຕານີຕິ ຕໂຕ ວິເສສກຣຓຕ຺ຖໍ ສຸຕ຺ຕນ຺ເຕຕິ ວຸຕ຺ຕໍ. ກໂມ ປນ ທ຺ວິນ຺ນໍປິ ປາຬິຍາ ນສເມຕິ. ສຠາຄ ຘມ຺ມສງ຺ຄຫວເສນ ປນ ອິຘ ອຎ຺ຎຖາ ກໂມ ວຸຕ຺ໂຕ ສິຍາຕິ. ຈິຕ຺ຕໍ ກິລິສ຺ສນ຺ຕິ ວິພາເຘນ຺ຕິ ອຸປຕາເປນ຺ຕິຈາຕິ ກິເລສາ. ກິລິສ຺ສນ຺ຕິວາ ມລີນຠາວໍ ນິຫີນຠາວຎ຺ຈ ຄຈ຺ຉນ຺ຕິ ສຕ຺ຕາ ເອເຕຫີຕິ ກິເລສາ. ກາມຠວນາເມນາຕິ ວຕ຺ຖຸກາມທີປເກນ ກາມນາເມນ ຣູປາຣູປຠວທີປເກນ ຈ ຠວນາເມນ. ຕາທິສໍ ກາມ ຠວສງ຺ຂາຕໍ ອາຣມ຺ມຓຠູຕໍ ວຕ຺ຖຸ ເອຕິສ຺ສາຕິ ຕພ຺ພຕ຺ຖຸກາ. ຕຖາ ປວຕ຺ຕນ຺ຕິ ສີລພ຺ພຕານິ ປຣໂຕ ອາມສນາກາເຣນ ອິທໍ ເມ ສຈ຺ຈໍ ໂມຆມຎ຺ຎນ຺ຕິ ອຠິນິວິສນາກາເຣນ ຂນ຺ເຘສຸ ອຕ຺ຕາຠິນິເວສາກາເຣນຈ ປວຕ຺ຕໍ. ວຕ຺ຖຸໂຕຕິ ສຠາວຘມ຺ມໂຕ. ອຍໍ ປາປສງ຺ຄໂຫ ອກຸສລງ຺ຄໂຫ ນວຘາ ວຸຕ຺ໂຕຕິ ໂຍຊນາ. [ອກຸສລສງ຺ຄໂຫ]

໑໖໓. ມິສ຺ສກ ສງ຺ຄເຫ ປາຓາຕິປາຕາທີນິ ປາປກມ຺ມານິ ກໂຣນ຺ຕານໍປິ ຈິຕ຺ຕສ຺ສ ອາຣມ຺ມເຓ ອຸຊຸກຣຓໍນາມ ຌາເນນ ວິນາ ນ ສິຊ຺ຌຕີຕິ ວຸຕ຺ຕໍ ສຕ຺ຕຌານງ຺ຄານີຕິ. ກລ຺ຍາເຓວາ ປາປເກວາ ອາຣມ຺ມເຓ ອຸຊຸກໍ ຈິຕ຺ຕປຏິປາທນສງ຺ຂາຕສ຺ສ ອຸປນິຊ຺ຌາຍນ ກິຈ຺ຈສ຺ສ ອງ຺ຄານີຕິ ອຕ຺ໂຖ. ຕຕ຺ຖ ໂທມນສ຺ສໍ ອກຸສລຊ຺ຌານງ຺ຄໍ. ເສສານິ ກຸສລາກຸສລາພ຺ຍາກຕານີຕິ. ກລ຺ຍາຓກມ຺ມ ປາປກມ຺ມສງ຺ຂາຕາສຸ ສຸຄຕິ ທຸຄ຺ຄຕິ ວິວຏ຺ຏສງ຺ຂາຕາສຸຈ ນານາທິສາສຸ ຕໍຕໍທິສາຕິ ມຸຂປ຺ປວຕ຺ຕິສງ຺ຂາຕາ ຈິຕ຺ຕສ຺ສ ຄຕິນາມ ສມ຺ມາວາ ມິຈ຺ຉາວາ ປວຕ຺ເຕຫິ ທສ຺ສນາທີຫິ ເອວ ສິຊ຺ຌຕີຕິ ວຸຕ຺ຕໍ ທ຺ວາທສມຄ຺ຄງ຺ຄານີຕິ. ຈິຕ຺ຕສ຺ສ ອຸຊຸຄຕິຍາວາ ວງ຺ກຄຕິຍາວາ ຄມນສ຺ສ ປຖງ຺ຄານິ ອຸປາຍງ຺ຄານີຕິ ອຕ຺ໂຖ. ຕຕ຺ຖ ມິຈ຺ຉາທິຏ຺ຐິ ມິຈ຺ຉາສງ຺ກປ຺ປ ມິຈ຺ຉາວາຍາມ ມິຈ຺ຉາສມາຘໂຍ ປາປກມ຺ມ ທຸຄ຺ຄຕິຠວ ສງ຺ຂາຕາສຸ ອຫິຕທິສາສຸ ຈິຕ຺ຕສ຺ສ ວງ຺ກຄຕິຍາ ຄມນສ຺ສ ອຸປາຍງ຺ຄານິ, ອິຕຣານິ ກລ຺ຍາຓກມ຺ມ ສຸຄຕິຠວ ວິວຏ຺ຏຘມ຺ມສງ຺ຂາຕາສຸ ຫິຕທິສາສຸ ອຸຊຸຄຕິຍາຕິ ທຏ຺ຐພ຺ພໍ. ຕຕ຺ຖ ປາຓາຕິປາຕກມ຺ເມ ວິຕກ຺ກ ວິຈາຣ ໂທມນສ຺ເສກຄ຺ຄຕາ ສງ຺ຂາຕໍ ຈຕຸຣງ຺ຄິກຊ຺ຌານໍ ມິຈ຺ຉາສງ຺ກປ຺ປ ມິຈ຺ຉາວາຍາມ ມິຈ຺ຉາສມາຘິ ສງ຺ຂາໂຕ ຕິຍງ຺ຄີກມຄ຺ໂຄຈ ເວທິຕພ຺ໂພ. ເອວໍ ເສເສສຸ ສຸຈຣິຕທຸຈ຺ຈຣິຕກມ຺ເມສຸ ຌານມຄ຺ຄາ ອຸທ຺ຘຣິຕພ຺ພາ. ວິຠງ຺ເຄ ປນ ສຸຕ຺ຕນ຺ເຕສຸຈ ມິຈ຺ຉາວາຈາ ມິຈ຺ຉາກມ຺ມນ຺ໂຕ ມິຈ຺ຉາອາຊີໂວ ມິຈ຺ຉາສຕີຕິ ອິເມປິ ຈຕ຺ຕາໂຣ ອາຄຕາ. ອິເມ ປນ ວິສຸໍ ເຈຕສິກຘມ຺ມາ ນໂຫນ຺ຕິ. ຕຖາ ຕຖາ ປວຕ຺ຕານໍ ຈຕຸນ຺ນໍ ຂນ຺ຘານໍ ອຘິວຈນນ຺ຕິ ກຕ຺ວາ ອິຘ ນຄຫິຕາ.

[໒໑໐] ຍໍ ປນ ວິຠາວນິຍໍ

‘‘ສຸຄຕິ ທຸຄ຺ຄຕີນໍ ນິພ຺ພານສ຺ສ ຈ ອຠິມຸຂໍ ປາປນໂຕ ມຄ຺ຄາ; ເຕສໍ ປຖຠູຕານິ ອງ຺ຄານິ ມງ຺ຄານີ’’ຕິ ວຸຕ຺ຕໍ; ຕໍ ນ ສຸນ຺ທຣໍ;

ນ ຫິ ອງ຺ຄານິ ມຄ຺ຄານໍ ປຖຠູຕານິນາມ ໂຫນ຺ຕິ; ມຄ຺ຄສທ຺ໂທເຍວ ປຖປຣິຍາໂຍ ອຏ຺ຐກຖາສຸ ວຸຕ຺ໂຕ ນ ອງ຺ຄສທ຺ໂທຕິ;

[໒໑໑] ຍຎ຺ຈ ຕຕ຺ຖ

‘‘ມຄ຺ຄສ຺ສວາ ອຏ຺ຐງ຺ຄິກສ຺ສ ອງ຺ຄານິ ມຄ຺ຄງ຺ຄານີ’’ຕິ ວຸຕ຺ຕໍ. ຕໍປິ ອນຸປປນ຺ນໍ.

ອິຘ ຫິ ກຕ຺ຖຈິ ຈິຕ຺ເຕ ຕິຍງ຺ຄິໂກ ກຕ຺ຖຈິ ຈຕຸຣງ຺ຄິໂກຕິອາທິນາ ນານາມຄ຺ໂຄວ ອຘິປ຺ເປໂຕຕິ. ອາຘິປຈ຺ຈຏ຺ເຐນ ອິນ຺ທ຺ຣິຍານິ. ກິຎ຺ຈ ອາຘິປຈ຺ຈໍ. ອຕ຺ຕາຘີນວຸຕ຺ຕິເກ ຘມ຺ເມ ອຕ຺ຕໂນ ຄຕິຍໍ ສພ຺ພໂສ ວຕ຺ເຕຕຸໍ ສມຕ຺ຖຠາໂວ. ອິຕິ ເຕສຸ ເຕສຸ ກິຈ຺ເຈສຸ ອຕ຺ຕໂນ ອາຘິປຈ຺ຈສງ຺ຂາຕໍ ອິນ຺ທຏ຺ຐໍ ກໂຣນ຺ຕິ ສາເຘນ຺ຕີຕິ ອິນ຺ທ຺ຣິຍານິ. ອິນ຺ທຏ຺ຐໍ ກາເຣນ຺ຕີຕິປິ ອິນ຺ທ຺ຣິຍານິ. ອິສ຺ສຣາ ອຘິປຕິໂນຕິ ວຸຕ຺ຕໍ ໂຫຕິ. ຕຕ຺ຖ ປຎ຺ຈຈກ຺ຂາທີນິ ທສ຺ສນາທິກິຈ຺ເຈສຸ ຈກ຺ຂຸວິຎ຺ຎາຓາທີນໍ ອິສ຺ສຣາໂຫນ຺ຕິ. ພລວທຸພ຺ພລມນ຺ທ ຕິກ຺ຂາທີສຸ ອຕ຺ຕາກາຣານຸວຕ຺ຕາປນໂຕ. ຠາວທ຺ວຍໍ ອິຕ຺ຖາກາຣາທິວເສນ ປວຕ຺ຕິຍໍ ຈຕຸສມຸຏ຺ຐານິກ ຣູປານໍ ສກລຂນ຺ຘປຎ຺ຈກສ຺ເສວ ວາ ອິສ຺ສໂຣ ໂຫຕິ. ອຎ຺ຎຖາ ອປ຺ປວຕ຺ຕິໂຕ. ຕຖາ ຫິ ຍສ຺ມິໍ ສນ຺ຕາເນ ປຏິສນ຺ຘິຍໍ ອິຕ຺ຖິຠາໂວ ປວຕ຺ຕຕິ. ຕສ຺ມິໍ ສພ຺ເພ ກມ຺ມາທິປຈ຺ຈຍາ ຈຕຸສມຸຏ຺ຐານຣູປສນ຺ຕຕິໍ ສມຸຏ຺ຐາເປນ຺ຕາ ອິຕ຺ຖາກາຣສຫິຕເມວ ສມຸຏ຺ຐາເປນ຺ຕິ, ໂນ ອຎ຺ຎຖາ. ຉນ຺ທຈິຕ຺ຕາຘິປ຺ປາຍາປິ ຕສ຺ມິໍ ມນ຺ທາກາຣສຫິຕາວ ປວຕ຺ຕນ຺ຕິ. ຕພ຺ພິປຣີເຕນ ປຸຣິສສນ຺ຕານໍ ເວທິຕພ຺ພໍ. ຊີວິຕທ຺ວຍໍ ຣູປາ ຣູປສນ຺ຕຕີນໍ ຣຕ຺ຕິ ທິວ ມາສ ສໍວຈ຺ຉຣານຸກ຺ກເມນ ອທ຺ຘານຜຣເຓ ສຫຊາຕຘມ຺ມານໍ ອິສ຺ສໂຣ ໂຫຕິ. ເຕສໍ ຕທາຍຕ຺ຕວຸຕ຺ຕິ ກຕ຺ຕາ. ມໂນ ວິຊານນກິຈ຺ເຈ. ເວທນາປຎ຺ຈກໍ ຕຖາ ຕຖາ ອາຣມ຺ມຓຣສານຸຠວເນ. ສທ຺ຘາ ອາຣມ຺ມຓາວີມຸຈ຺ຈເນ. ວີຣິຍໍ ກມ຺ມນິ ອລີນ ວຸຕ຺ຕິຠາເວ. ສຕິ ອາຣມ຺ມຓຸປຏ຺ຐາເນ. ສມາຘິ ອາຣມ຺ມເຓ ນິຈ຺ຈລຏ຺ຐິ ຕິຍໍ. ປຎ຺ຎາ ອສມ຺ໂມຫກິຈ຺ເຈ ສມ຺ປຍຸຕ຺ຕຘມ຺ມານໍ ອິສ຺ສໂຣ ໂຫຕິ. ອນຎ຺ຎາຠິຠວນີຍຠາເວນ ປວຕ຺ຕນໂຕ. ຍຖາ ຫິ ສິລາຍໍ ປຖວີ ສຫຊາເຕຫິ ອນຠິຠວນີຍາ ໂຫຕິ. ອຕ຺ຕນາວເຕ ອຠິຠວິຕ຺ວາ ວິສຸໍ ອວິຊ຺ຊມາເນວິຍ ກຕ຺ວາ ປວຕ຺ຕຕິ. ຍຖາ ຈ ອຸທເກ ອາໂປ ອຄ຺ຄິມ຺ຫິ ເຕໂຊ ວາເຕ ວາໂຍ. ເອວໍ ສມ຺ປທມິທໍ ທຏ຺ຐພ຺ພໍ.

ອຎ຺ຎາຍິຕ຺ຖ ປຏິວິຊ຺ຌິຕ຺ຖາຕິ ອຎ຺ຎາຕໍ. ນ ອຎ຺ຎາຕໍ ອນຎ຺ຎາຕໍ. ຈຕຸສຈ຺ຈຘມ຺ໂມ. ອມຕໍວາ ປທໍ. ອນຎ຺ຎາຕໍ ຎສ຺ສາມິ ຊານິສ຺ສາມີຕິ ອນຎ຺ຎາຕຎ຺ຎສ຺ສາມິ. ອາຂ຺ຍາຕິກໍປິ ຫິ ປທໍ ສຎ຺ຎາສທ຺ທຠາເວ ຐິຕໍ ນາມິກຏ຺ຐາເນ ຕິຏ຺ຐຕິ. ຍຖາ ມກ຺ຂລິໂຄສາໂລ ເອຫິປສ຺ສິ ໂກຕິ. ເອວຎ຺ຫິ ສຕິ ຕສ຺ສ ປທນ຺ຕເຣນ ສຫ ສມາສຠາໂວ ນວິຣຸຊ຺ຌຕີຕິ. ອນຎ຺ຎາຕຎ຺ຎສ຺ສາມີຕິ ເອວໍ ປຏິປນ຺ນສ຺ສ ອິນ຺ທ຺ຣິຍໍ ອນຎ຺ຎາ ຕຎ຺ຎສ຺ສາມີຕິນ຺ທ຺ຣິຍໍ. ອາທິມນສິກາຣໂຕ ປຏ຺ຐາຍ ຕາທິເສນ ອຸສ຺ສາເຫນ ສຫ ວິປສ຺ສນໍ ອາຣຠນ຺ຕສ຺ສ ຕສ຺ມິໍ ອຸສ຺ສາເຫ ອປຏິປສ຺ສທ຺ເຘເຍວ ໂສຕາມຕ຺ຕິມຄ຺ຄໍ ປຏິລຠນ຺ຕສ຺ສ ອິນ຺ທ຺ຣິຍນ຺ຕິ ວຸຕ຺ຕໍ ໂຫຕິ. ອາຊານາຕີຕິ ອຎ຺ຎໍ. ຕເມວ ອິນ຺ທ຺ຣິຍນ຺ຕິ ອຎ຺ຎິນ຺ທ຺ຣິຍໍ, ປຖມມຄ຺ເຄນ ອນຎ຺ຎາຕໍ ຎຕ຺ວາປິ ກິເລສປ຺ປຫານກິຈ຺ຈສ຺ສ ອປຣິນິຏ຺ຐິຕຕ຺ຕາ ຕສ຺ສ ຊານນກິຈ຺ຈສ຺ສ ວິປ຺ປກຕຠາເວນ ຍຖາ ທິຏ຺ເຐ ຕສ຺ມິໍ ຈຕຸສຈ຺ຈຘມ຺ເມ ອມຕປເທເອວ ວາ ປຸນປ຺ປຸນໍ ຊານນກິຈ຺ຈ ຍຸຕ຺ຕານໍ ອິນ຺ທ຺ຣິຍນ຺ຕິ ວຸຕ຺ຕໍ ໂຫຕິ. ອຎ຺ຎາຕາວິນ຺ທ຺ຣິຍນ຺ຕິ ອຎ຺ຎາ ຕາວິໂນ ປຣິນິຏ຺ຐິຕ ອາຊານນ ກິຈ຺ຈສ຺ສ ຂີຓາສວສ຺ສ ອິນ຺ທ຺ຣິຍນ຺ຕິ ອຎ຺ຎາຕາວິນ຺ທ຺ຣິຍໍ. ຕິວິຘໍ ເປຕໍ ຕຖາຣູເປ ຊານເນ ສມ຺ປຍຸຕ຺ຕ ຘມ຺ມານໍ ອິສ຺ສໂຣ ໂຫຕີຕິ ເວທິຕພ຺ພໍ.

ຕຕ຺ຖ ອິເມສໍ ສຕ຺ຕານໍ ປາກເຏ ຣູປກາເຍ ອຕ຺ຕຄາຫທຬ຺ຫຕ຺ຕໍ ຕພ຺ພິມຸຕ຺ຕິຈ ອິເມສໍ ອປຣິຎ຺ຎາຍ ປຣິຎ຺ຎາຍຈ ໂຫຕີຕິ ທີເປຕຸໍ ອາທິໂຕ ປຎ຺ຈ ປສາທິນ຺ທ຺ຣິຍານິ ວຸຕ຺ຕານິ. ຕສ຺ສ ອຕ຺ຕສ຺ສ ອິຕ຺ຖິປຸມ ຕາເຠໂທ ອິເມສໍ ວເສນ ໂຫຕິ. ຕສ຺ມິໍ ວາ ອິຕ຺ຖິປຸຣິສ ຄາໂຫ ຕພ຺ພິມຸຕ຺ຕິຈ ອິເມສໍ ອປຣິຎ຺ຎາຍ ປຣິຎ຺ຎາຍຈ ໂຫຕີຕິ ທີເປຕຸໍ ກທນນ຺ຕຣໍ ຠາວິນ຺ທ຺ຣິຍທ຺ວຍໍ ວຸຕ຺ຕໍ. ໂສຈ ອຕ຺ຕາ ອິມສ຺ສ ວເສນ ຊີວສຎ຺ຎໍ ລຠຕິ. ຕສ຺ມິໍວາ ຊີວຄາໂຫ ຕພ຺ພິມຸຕ຺ຕິຈ ອິມສ຺ສ ອປຣິຎ຺ຎາຍ ປຣິຎ຺ຎາຍຈ ໂຫຕີຕິ ທີເປຕຸໍ ຕທນນ຺ຕຣໍ ຊີວິຕິນ຺ທ຺ຣິຍໍ ວຸຕ຺ຕໍ. ອິທໍ ປນ ຠາວິນ຺ທ຺ຣິຍໂຕ ປຸເຣ ວຕ຺ຕພ຺ພໍປິ ຣູປາຣູປ ມິສ຺ສກຕ຺ຕາ ອິຘ ວຸຕ຺ຕນ຺ຕິ ທຏ຺ຐພ຺ພໍ. ນາມກາເຍ ອຕ຺ຕຄາຫທຬ຺ຫຕ຺ຕໍ ຕພ຺ພິມຸຕ຺ຕິຈ ອິມສ຺ສ ອປຣິຎ຺ຎາຍ ປຣິຎ຺ຎາຍຈ ໂຫຕີຕິ ທີເປຕຸໍ ນາມິນ຺ທ຺ຣິເຍສຸ ມນິນ຺ທ຺ຣິຍໍ ອາທິໂຕ ວຸຕ຺ຕໍ. ໂສຈ ອຣູປີ ອຕ຺ຕາ ອິເມສໍ ວເສນ ສໍກິລິຏ຺ໂຐ ວິປ຺ຜນ຺ທິໂຕຈ ໂຫຕິ. ຕສ຺ມິໍວາ ສຸຂິຕທຸກ຺ຂິຕຄາໂຫ ຕພ຺ພິມຸຕ຺ຕິຈ ອິເມສໍ ອປຣິຎ຺ຎາຍ ປຣິຎ຺ຎາຍຈ ໂຫຕີຕິ ທີເປຕຸໍ ຕທນນ຺ຕຣໍ ເປທນິນ຺ທ຺ຣິຍປຎ຺ຈກໍ ວຸຕ຺ຕໍ. ຕສ຺ສ ສໍກິລິຏ຺ຐສ຺ສ ໂວທານປ຺ປຕ຺ຕິຍາ ຕໍຕໍຄາຫວິມຸຕ຺ຕິຍາວາ ປຏິປຕ຺ຕິທສ຺ສນຕ຺ຖໍ ຕທນນ຺ຕຣໍ ສທ຺ຘາທິປຎ຺ຈິນ຺ທ຺ຣິຍໍ ວຸຕ຺ຕໍ. ຕາຍ ປຏິປຕ຺ຕິຍາ ໂວທານປ຺ປຕ຺ຕິ ຍາ ອາທິ ມຊ຺ຌ ປຣິໂຍສານ ທສ຺ສນຕ຺ຖໍ ອນ຺ເຕ ຕີຓິ ໂລກຸຕ຺ຕຣິນ຺ທ຺ຣິຍານິ ວຸຕ຺ຕານີຕິ.

[໒໑໒] ວິຠາວນິຍໍ ປນ

‘‘ເອຕ຺ຕາວຕາ ອຘິປ຺ເປຕຕ຺ຖສິທ຺ຘີຕິ ອຎ຺ເຎສໍ ອຄຫຓນ຺ຕິ’’ ວຸຕ຺ຕໍ. ຕໍ ນ ຍຸຊ຺ຊຕິ.

ນຫິ ສນ຺ເຕສຸປິ ອຎ຺ເຎສຸ ອິນ຺ທ຺ຣິຍຠາວາຣເຫສຸ ຘມ຺ເມສຸ ເອຕ຺ຕາວຕາ ອຘິປ຺ເປຕຕ຺ຖສິທ຺ຘິຍາ ເຕສໍ ອຎ຺ເຎສໍ ຠຄວໂຕ ເຖຣສ຺ສຈ ອຄຫຓນ຺ຕິ ຍຸຕ຺ຕໍ ວຕ຺ຕຸໍ. ອິນ຺ທ຺ຣິຍຠາວາຣຫສ຺ສ ອຎ຺ຎສ຺ສ ອສມ຺ຠວໂຕ. ຍທິ ຫິ ສມ຺ຠເວຍ຺ຍ, ສຕໍປິ ສຫສ຺ສໍປິ ຄຓ຺ຫິສ຺ສຕິເຍວາຕິ. ພລິຍນ຺ຕິ ອຸປ຺ປນ຺ນຸປ຺ປນ຺ເນ ປຏິປກ຺ຂຘມ຺ເມ ສຫນ຺ຕິ ມທ຺ທນ຺ຕີຕິ ພລານິ. ຍຖາ ອພລານໍ ພລິຍນ຺ຕິ. ມທ຺ທນ຺ເຕນໍ ປຣິສ຺ສຍາຕິ. ເອຕ຺ຖຈ ອພລາຕິ ທຸພ຺ພລາ. ນນ຺ຕິ ຫີນວີຣິຍໍ ຊນໍ. ພລິຍນ຺ຕີຕິ ພລສາ ກໂຣນ຺ຕິ ອຊ຺ໂຌຕ຺ຖຣນ຺ຕິ. ປຣິສ຺ສຍາຕິ ອພລາ ຣາຄາທິ ປຣິສ຺ສຍາຕິ ອຕ຺ໂຖ. ອປິຈ, ປຏິປກ຺ຂຘມ຺ເມຫິ ອກມ຺ປິຍຏ຺ເຐນ ອກ຺ໂຂ ຠຓິຍຏ຺ເຐນ ພລານິນາມ. ຕສ຺ມາ ອສ຺ສທ຺ຘິຍສງ຺ຂາເຕນ ປຏິປກ຺ຂຘມ຺ເມນ ກມ຺ເປຕຸໍ ອສກ຺ກຸເຓຍ຺ຍຕາ ສທ຺ຘາພລໍນາມ. ໂກສຊ຺ຊສງ຺ຂາເຕນ ກມ຺ເປຕຸໍ ອສກ຺ກຸເຓຍ຺ຍຕາ ວີຣິຍພລໍນາມ. ມຸຏ຺ຐສຈ຺ເຈນ ກມ຺ເປຕຸໍ ອສກ຺ກຸເຓຍ຺ຍຕາສຕິພລໍນາມ. ອຸທ຺ຘຈ຺ເຈນ ກມ຺ເປຕຸໍ ອສກ຺ກຸເຓຍ຺ຍຕາສມາຘິພລໍນາມ. ອວິຊ຺ຊາຍກມ຺ເປຕຸໍ ອສກ຺ກຸເຓຍ຺ຍຕາ ປຎ຺ຎາພລໍ ນາມ. ເສສທຸກທ຺ວຍໍ ປນ ອຎ຺ຎມຎ຺ຎໍ ປຏິປກ຺ເຂນໂຍເຊຕພ຺ພໍ.

[໒໑໓] ວິຠາວນິຍໍ ປນ

ປາປພລທຸກໍ ປຏິປກ຺ເຂນ ໂຍເຊຕຸໍ ນລພ຺ຠຕີຕິ ກຕ຺ວາ ‘‘ອຫິຣິກາໂນຕ຺ຕປ຺ປທ຺ວຍໍ ປນ ສມ຺ປຍຸຕ຺ຕຘມ຺ເມສຸ ຖິຣຠາເວ ເນວາຕິ’’ ວຸຕ຺ຕໍ. ຕໍ ນ ສຸນ຺ທຣໍ.

ສມ຺ປຍຸຕ຺ຕຘມ຺ເມສຸ ຖິຣຠາໂວຕິຈ ປຏິປກ຺ເຂຫິ ອກມ຺ປິຍຕາ ຕິຈ ອຕ຺ຖໂຕ ນານຕ຺ຕາຠາວໂຕຕິ. ວີຣິຍສມາຘິພລານິ ກຸສລາກຸສລາພ຺ຍາກຕານິ. ອຫິຣິກາໂນຕ຺ຕປ຺ປານິ ອກຸສລພລານິ. ເສສານິ ກຸສລາພ຺ຍາກຕານີຕິ. ອຘິປຕີຕິ ເອຕ຺ຖ ປຕີຕິ ສາມິ ອິສ຺ສໂຣ. ໂສ ປນ ປເທສ ອິສ຺ສໂຣ ສກລິສ຺ສໂຣຕິ ທຸວິໂຘ. ຕຕ຺ຖ ອິນ຺ທ຺ຣິຍານິ ປເຣສໍ ວິສເຍ ສຍໍ ປຣວເສ ວຕ຺ຕິຕ຺ວາ ອຕ຺ຕໂນ ວິສເຍເອວ ປເຣຫິ ອຕ຺ຕໂນ ວເສ ວຕ຺ຕາເປນ຺ຕີຕິ ປເທສິສ຺ສຣາ ນາມ. ປຸພ຺ພາຕິ ສງ຺ຂາຣວເສນ ປຸພ຺ພາຄມນວເສນ ວາ ວິເສເສຕ຺ວາ ປວຕ຺ຕໍ ອຘິປຕິຏ຺ຐານໍ ປຕ຺ວາ ປນ ອຎ຺ໂຎ ທຸຕິໂຍ ອິສ຺ສໂຣນາມ ນຕ຺ຖິ. ຕສ຺ມາ ອຘິໂກ ປຕີຕິ ອຘິປຕິ. ອຕ຺ຕາ ຘີນວຸຕ຺ຕີນໍ ປຕີຕິ ອຘິປຕີຕິຈ ວທນ຺ຕິ.

ຉນ຺ໂທເອວ ອຘິປຕີຕິ ຉນ຺ທາຘິປຕິ. ຉນ຺ທວໂຕ ກິໍນາມ ກມ຺ມໍ ນສິຊ຺ຌຕີຕິ ເອວໍ ປຸພ຺ພາຠິສງ຺ຂາຣວເສນວາ ປຸພ຺ເພ ອຕີຕຠເວສຸ ສຸຏ຺ຐຸ ອາເສວິຕຉນ຺ທາຄມນວເສນວາ ເຕສຸ ເຕສຸ ກລ຺ຍາຓ ປາປກມ຺ເມສຸ ສມ຺ປຍຸຕ຺ຕຘມ຺ເມ ມໂຫໂຆວິຍ ຕິຓປຓ຺ຓກສເຏ ອຕ຺ຕປຣາຘີເນ ນິຈ຺ຈໍ ປຄ຺ຄຫິຕຘຸເຣ ກຕ຺ວາ ປວຕ຺ໂຕ ກຕ຺ຕຸກມ຺ຍຕາ ຉນ຺ໂທ. ເອສ ນໂຍ ເສເສສຸປິ. ນນຸ ເຈຕ຺ຖ ປຈ຺ຉິມາ ຕໂຍ ຘມ຺ມາ ອຘິປຕິຠາວໍ ຄຓ຺ຫນ຺ຕາ ອິນ຺ທ຺ຣິຍຠາວໍ ອວິຊຫິຕ຺ວາວ ຄຓ຺ຫນ຺ຕີຕິ ອຘິປຕິຠູຕາວ ສມານາ ອິນ຺ທ຺ຣິຍກິຈ຺ຈວເສນ ປຣວເສປິ ວຕ຺ຕນ຺ຕີຕິ. ສຈ຺ຈໍ, ອຎ຺ຎໍ ປນ ອຘິປຕິກິຈ຺ຈໍ, ອຎ຺ຎໍ ອິນ຺ທ຺ຣິຍກິຈ຺ຈນ຺ຕິ ນຕ຺ເຖຕ຺ຖ ໂທໂສຕິ. ຍຖາ ຫິ ຣາຊາ ຈກ຺ກວຕ຺ຕີ ເອກສ຺ສ ອຕ຺ຕໂນ ປຸໂຣຫິຕສ຺ສ ສນ຺ຕິເກ ເອກໍ ທິພ຺ພວິຊ຺ຊໍ ຄຓ຺ຫາຕິ. ນ ເອຕ຺ຕາວຕາ ຣາຊາ ຈກ຺ກວຕ຺ຕິນາມ ນໂຫຕິ. ນຈ ວິຊ຺ຊາເຫຕຸ ອຎ຺ຎສ຺ສ ວເສນ ວຕ຺ຕຕິ. ອຎ຺ຎຎ຺ຫິ ຈກ຺ກວຕ຺ຕິ ຣຊ຺ຊກິຈ຺ຈໍ, ອຎ຺ຎໍ ວິຊ຺ຊາຄຫຓ ກິຈ຺ຈນ຺ຕິ. ເອວໍ ສມ຺ປທມິທໍ ທຏ຺ຐພ຺ພໍ. ຕຕ຺ຖ ອຘິປຕິກິຈ຺ຈໍນາມ ຕໍຕໍກິຈ຺ຈ ວິເສສໍ ອນເປກ຺ຂິຕ຺ວາ ອຕຸລ຺ຍພເລນ ອຠິຠວິຕ຺ວາ ສຫຊາຕ ຘມ຺ເມ ອຕ຺ຕໂນ ອຕ຺ຕໂນ ກິຈ຺ເຈສຸ ອນິວຕ຺ຕມາເນ ກຕ຺ວາ ຘຸຣ ວາຫິຕາ. ອິນ຺ທ຺ຣິຍກິຈ຺ຈໍ ປນ ວິຊານນາທິກິຈ຺ຈໍ ອາຣພ຺ຠ ປວຸຈ຺ຈຕີຕິ.

ອາຫຣນ຺ຕິ ສຫຊາຕາທິປຈ຺ຈຍສາມຎ຺ຎໂຕ ອຕິເຣເກນ ອສາຘາຣຓປຈ຺ຈຍສຕ຺ຕິວິເສເສນ ຫຣນ຺ຕິ ປວຕ຺ເຕນ຺ຕີຕິ ອາຫາຣາ. ອາຫຣນ຺ຕິວາ ອຊ຺ຌຕ຺ຕສມ຺ຠູຕາ ເຕ ເຕ ປຈ຺ຈຍຘມ຺ມາ ປຈ຺ຈຍຸປ຺ປນ຺ນຘມ຺ມາຈ ອຕ຺ຕານຎ຺ເຈວ ອຕ຺ຕໂນ ອຕ຺ຕໂນ ປຈ຺ຈຍກິຈ຺ຈໍ ປຈ຺ຈຍຸປ຺ປນ຺ນກິຈ຺ຈຎ຺ຈ ສຸຏ຺ຐຸ ຫຣນ຺ຕິ ວຫນ຺ຕິ ເອເຕຫີຕິ ອາຫາຣາ. ຍຖາຫສພ຺ເພ ສຕ຺ຕາ ອາຫາຣຏ຺ຐິຕິກາຕິ. ເອຕ຺ຖຈ ສພ຺ເພ ສຕ຺ຕາຕິ ເອເຕນ ສພ຺ເພ ອຊ຺ຌຕ຺ຕສມ຺ຠູຕາ ປຈ຺ຈຍປຈ຺ຈຍຸປ຺ປນ຺ນຘມ຺ມາ ວຸຕ຺ຕາ. ອາຫາຣຏ຺ຐິຕິກາຕິ ປຈ຺ຈຍຏ຺ຐິຕິກາ. ຍຖາຣຫໍ ຈຕຸວີສຕິປຈ຺ຈເຍຫິ ຐິຕິສຠາວາຕິ ອຕ຺ໂຖ. ນນຸເຈຕ຺ຖ ປຈ຺ຈຍາຫາໂຣວ ວຸຕ຺ໂຕ. ນ ອາຫາຣປຈ຺ຈໂຍ. ອິຘ ປນ ຈຕຸພ຺ພິໂຘ ອາຫາຣປຈ຺ຈຍຘມ຺ໂມວ ວຸຕ຺ໂຕຕິ. ສຈ຺ຈໍ, ປຈ຺ຈຍຏ຺ເຐນ ປນ ອາຫາຣນາມການໍ ສພ຺ເພສໍ ຈຕຸວີສຕິປຈ຺ຈຍຘມ຺ມານໍ ມຊ຺ເຌ ເຍຘມ຺ມາ ຈຕ຺ຕາໂຣ ອາຫາຣາຕິ ວິເສເສຕ຺ວາ ວຸຕ຺ຕາ. ເຕ ເຕສໍ ປຈ຺ຈຍາຫາຣານໍປິ ອາຫາຣຠູຕາຕິ ສິທ຺ຘາ ໂຫນ຺ຕີຕິ. ອິມສ຺ມິໍ ອຕ຺ເຖ ຈຕຸນ຺ນໍ ອາຫາຣານໍ ມຫນ຺ຕ ຠາໂວ ປາກໂຏ ໂຫຕີຕິ.

ຕຕ຺ຖ ຍຖາ ຍວພີຊານໍວາ ສາລິພີຊານໍວາ ອານຸຠາໂວ ນາມ ກຬິຣງ຺ກຸຣານໍ ອຸປ຺ປາທານ ປຘານໍ ໂຫຕິ. ຕໂຕປຣໍ ປນ ສສ຺ສຠາວໍ ປຕ຺ວາ ຉ ປຎ຺ຈ ມາເສ ວຑ຺ຒິຍາວາ ຐິຕິຍາວາ ປຖວິ ຣສອາໂປຣສານໍ ອານຸຠາໂວ ປຘານໍ ໂຫຕິ. ເອວເມວໍ ກພຬີ ກາຣາຫາຣູປຊີວີນໍ ກາມສຕ຺ຕານໍ ກມ຺ມສ຺ສ ອານຸຠາໂວນາມ ປຏິສນ຺ຘິຣູປຸປ຺ປາທເນ ປຘານໍ ໂຫຕິ. ຕໂຕປຣໍ ປນ ຍາວຕາຍຸກໍ ວຑ຺ຒີຍາວາຐິຕິຍາວາ ອຸຕຸອາຫາຣານໍ ອານຸຠາໂວ ປຘານໍ ໂຫຕິ. ກມ຺ມຊຣູປານິ ຫິ ຍາວ ອາສນ຺ນມຣຓາ ປວຕ຺ຕມານານິປິ ອຸຕຸອາຫາເຣຫິ ອນຸຄ຺ຄຫິຕານິເອວ ປວຕ຺ຕນ຺ຕິ. ອຸຕຸຈ ອາຫາຣຸ ປຕ຺ຖມ຺ຠິໂຕເຍວ ອຕ຺ຕໂນ ກິຈ຺ຈໍ ກໂຣຕິ. ຕສ຺ມາ ເຕສໍ ສຕ຺ຕານໍ ຈຕຸສນ຺ຕຕິຣູປໍ ກພຬີກາຣາຫາເຣນ ອນຸປຕ຺ຖມ຺ຠີຍມານໍ ຈິຣໍ ນປວຕ຺ຕຕິ. ອຸປຕ຺ຖມ຺ຠີຍມານໍເອວ ຍາວຕາຍຸກໍ ປວຕ຺ຕຕິ. ຍຖາຈ ສກຸຓາວາ ຑໍສມກສາ ທໂຍວາ ຕຸຓ຺ເຑນ ອາຫາຣໍ ຄເຫຕ຺ວາ ອຕ຺ຕຠາວໍ ໂປເສນ຺ຕິ. ຕຸຓ຺ເຑ ອສນ຺ເຕ ອາຫາຣໍ ອລຠນ຺ຕາ ມຣນ຺ຕິ. ເອວເມວ ອິເມ ສຕ຺ຕາ ຜສ຺ເສນ ອາຣມ຺ມເຓສຸ ຣສໍ ຄເຫຕ຺ວາ ເວທນາສງ຺ຂາຕໍ ອຸປໂຠຄປຣິໂຠຄໍ ສມ຺ປາເທຕ຺ວາ ຕຓ຺ຫາເວປຸລ຺ລໍ ປຕ຺ວາ ຕິວິຘໍ ວຏ຺ຏໍ ປູເຣຕ຺ວາ ຍາວຊ຺ຊຕນາປິ ວຏ຺ເຏ ອນຸກຓ຺ຐມານາ ປວຕ຺ຕນ຺ຕິ.

ຍທິ ຫິ ຜສ຺ໂສນາມ ນ ສິຍາ, ອາຣມ຺ມຓຣສໍ ອລຠິຕ຺ວາ ເວທນາ ປຣິໂຠຄຣຫິເຕນ ຕຓ຺ຫຸປ຺ປຕ຺ຕິຍາ ໂອກາໂສ ນຕ຺ຖີຕິ ຕິວິຘວຏ຺ຏເມວ ນສິຍາຕິ. ຍຖາຈ ເຕ ສກຸຓາທໂຍ ປກ຺ເຂ ວິຍູຫິຕ຺ວາ ອນ຺ຕຣາ ອປຕມານາ ຣຸກ຺ຂໂຕ ຣຸກ຺ຂໍ ວນໂຕ ວນໍ ວິຈຣິຕ຺ວາ ອຕ຺ຕານໍ ຍາເປນ຺ຕິ. ປກ຺ເຂສຸ ອສນ຺ເຕສຸ ຄມນໍ ອສມ຺ປາເທນ຺ຕາ ປຕິຕ຺ວາ ມຣນ຺ຕິ. ເອວເມວໍ ອິເມ ສຕ຺ຕາ ອາຍູຫນລກ຺ຂຓາຍ ເຈຕນາຍ ເຈຕຍິຕ຺ວາ ກມ຺ມສມງ຺ຄິຕໍ ສມ຺ປາເທຕ຺ວາ ຠວໂຕ ຠວໍ ວິຈຣິຕ຺ວາ ຍາວຊ຺ຊຕນາ ວຏ຺ເຏ ສໍສຣນ຺ຕິ. ຍທິ ຫິ ເຈຕນານາມ ນ ສິຍາ, ກມ຺ມວຏ຺ຏສ຺ສ ອຠາໂວ. ຕທຠາເວຈ ວິປາກວຏ຺ຏສ຺ສ ອຠາໂວ. ຕທຠາເວຈ ຕທນຸສຍິຕສ຺ສ ກິເລສວຏ຺ຏສ຺ສ ອຠາໂວຕິ ວຏ຺ຏໍນາມ ນ ສິຍາຕິ. ຍຖາຈ ເຕ ສກຸຓາທໂຍ ຈກ຺ຂຸນາ ໂຄຈຣຏ຺ຐານໍວາ ຕໍຕໍທິສາຠາຄໍວາ ວິຠາເວຕ຺ວາ ຍາວຊີວໍ ອຕ຺ຕານໍ ຍາເປນ຺ຕິ. ຈກ຺ຂຸສ຺ມິໍ ອສນ຺ເຕ ກິຎ຺ຈິຄເຫຕພ຺ພວຕ຺ຖຸໍວາ ຄນ຺ຕພ຺ພຏ຺ຐານໍວາ ອລຠິຕ຺ວາ ຕຕ຺ເຖວ ມຣນ຺ຕິ. ເອວເມວໍ ສມ຺ປຍຸຕ຺ຕາ ຘມ຺ມາ ອາຣມ຺ມຓວິຊານລກ຺ຂເຓນ ວິຎ຺ຎາເຓນ ຕໍຕໍອາຣມ຺ມຓໍ ລຠິຕ຺ວາ ຕສ຺ມິໍ ຕສ຺ມິໍ ຜສ຺ສາທໂຍ ອຸປ຺ປາເທຕ຺ວາ ຕິວິຘໍ ວຏ຺ຏໍ ວຏ຺ເຏນ຺ຕິ. ຍທິ ຫິ ວິຎ຺ຎາຓໍນາມ ນ ສິຍາ, ຜສ຺ສາທີນໍ ອາຣມ຺ມຓລາໂຠເຍວ ນຕ຺ຖີຕິ ວຏ຺ຏເມວ ນ ສິຍາຕິ. ເຕນາຫ ຈຕ຺ຕາໂຣ ອາຫາຣາ.ລ. ວິຎ຺ຎາຓໍ ຈຕຸຕ຺ຖນ຺ຕິ. ສໍຍຸຕ຺ຕເກຈ –

ຈຕ຺ຕາໂຣເມ ຠິກ຺ຂເວ ອາຫາຣາ ຠູຕານໍ ວາ ສຕ຺ຕານໍ ຐິຕິຍາ ສມ຺ຠເວສີນໍວາ ສຕ຺ຕານໍ ອນຸຄ຺ຄຫາຍ ກພຬີກາໂຣ ອາຫາໂຣ ໂອຬາຣິໂກວາ ສຸຂຸໂມວາ, ຜສ຺ໂສ ທຸຕີໂຍ, ມໂນສຎ຺ເຈຕນາ ຕຕີຍາ, ວິຎ຺ຎາຓໍ ຈຕຸຕ຺ຖນ຺ຕິ ວຸຕ຺ຕໍ.

ຕຕ຺ຖ ຠູຕານນ຺ຕິ ວຸທ຺ຘິປ຺ປຕ຺ຕານໍ. ສມ຺ຠເວສີນນ຺ຕິ ກລລາທິ ກາເລ ຐິຕານໍ. ຈຕຸນ຺ນໍປນ ອາຫາຣານໍ ຍຖາສມ຺ຠວໍ ອນມຕຄ຺ເຄ ສໍສາຣວຏ຺ເຏວາ ຕສ຺ມິໍ ຕສ຺ມິໍ ຠເວວາ ຐິຕິຍາວາ ອນຸຄ຺ຄຫາຍວາ ປວຕ຺ຕິ ອາກາໂຣ ວຸຕ຺ຕນເຍນ ເວທິຕພ຺ໂພ. ອຏ຺ຐກຖາຍໍ ປນ ໂກປເນຕ຺ຖ ອາຫາໂຣ. ກິໍ ອາຫາເຣຕີຕິ. ກພຬີກາຣາ ຫາໂຣ ໂອຊຏ຺ຐມກຣູປານິ ອາຫາເຣຕິ. ຜສ຺ສາຫາໂຣ ຕິສ຺ໂສ ເວທນາ. ມໂນສຎ຺ເຈຕນາຫາໂຣ ຕໂຍ ຠເວ. ວິຎ຺ຎາຓາ ຫາໂຣ ປຏິສນ຺ຘິນາມຣູປນ຺ຕິ ວຸຕ຺ຕໍ. ຕໍ ປາກຏຜລວເສນ ວຸຕ຺ຕນ຺ຕິ ທຏ຺ຐພ຺ພໍ. ໂອຊຏ຺ຐມກຣູປຸປ຺ປາທນໍ ປນ ກພຬີກາຣາຫາຣສ຺ສ ມຫນ຺ຕໍ ກິຈ຺ຈໍ ນໂຫຕິ. ຈຕຸສນ຺ຕຕິຣູປຸປຕ຺ຖມ຺ຠນເມວ ມຫນ຺ຕໍ. ເຕເນວ ຫິ ປາຬິຍໍ ຐິຕິຍາຕິຈ ອນຸຄ຺ຄຫາຍາຕິຈ ວຸຕ຺ຕໍ.

ອປິຈ ຍຖາ ອຸປນິສ຺ສຍາເສວນປຈ຺ຈຍາ ສຸຕ຺ຕນ຺ຕິ ກປຣິຍາຍາ ອຠິຘມ຺ມປຣິຍາຍາຕິຈ ທຸວິຘາ ໂຫນ຺ຕິ. ຕຖາ ອາຫາຣປຈ຺ຈໂຍປິ ທຸວິໂຘ. ຕຕ຺ຖ ຍໍ ວຸຕ຺ຕໍ ມໂນສຎ຺ເຈຕນາຫາໂຣ ຕໂຍຠເວຕິ. ຕໍ ສຸຕ຺ຕນ຺ຕິກປຣິຍາຍໍ ສນ຺ຘາຍ ວຸຕ຺ຕໍ. ນຫິ ປຏ຺ຐາເນ ອຣູປາ ຫາຣາ ອສຫຊາຕານໍ ຘມ຺ມານໍ ອາຫາຣຏ຺ເຐນ ປຈ຺ຈຍານາມ ໂຫນ຺ຕີຕິ. ປຎ຺ຈວິຎ຺ຎາເຓສຸ ຌານງ຺ຄານິ ນລພ຺ຠນ຺ຕິ. ຕານິ ຫິ ທຸພ຺ພລກິຈ຺ຈຏ຺ຐານວຕ຺ຖຸກຕ຺ຕາ ຣູປາທີສຸ ອຠິນິປາຕມຕ຺ຕານິ ໂຫນ຺ຕີຕິ ນ ເຕສຸ ວິຊ຺ຊມານາ ເວທນາ ເອກຄ຺ຄຕາ ຌານກິຈ຺ຈໍ ສາເຘນ຺ຕີຕິ. ວິຕກ຺ກປຈ຺ຉິມກໍ ຌານນ຺ຕິຈ ວຸຕ຺ຕໍ. ຌານງ຺ຄານໍ ນາຍກຠູໂຕຈ ວິຕກ຺ໂກ ເຕສຸ ນຕ຺ຖີຕິ ຕຕ຺ຖ ຕາເວທນາ ເອກຄ຺ຄຕາໂຍ ຕໍ ນ ສາເຘນ຺ຕີຕິ. ວີຣິຍຸປຕ຺ຖມ຺ຠຣຫິຕາ ຘມ຺ມາ ສມ຺ປຍຸຕ຺ຕຘມ຺ເມສຸ ຖິຣຠາວປ຺ປຕ຺ຕາ ນໂຫນ຺ຕີຕິ ອວີຣິເຍສຸ ໂສຬສາເຫຕຸກຈິຕ຺ເຕສຸ ສມາຘິພລກິຈ຺ຈໍ ນ ສາເຘຕິ. ວີຣິຍປຈ຺ຉິມກໍ ພລນ຺ຕິ ຫິ ວຸຕ຺ຕນ຺ຕິ ອາຫ ອວີຣິເຍສຸ ພລານິ ນລພ຺ຠນ຺ຕີຕິ. ເຫຕຸຣຫິຕາ ຈ ຘມ຺ມາ ວຏ຺ຏສ຺ສ ວິວຏ຺ຏສ຺ສຈ ປຕ຺ຕິຍາ ປຖຠາວໍ ນຄຈ຺ຉນ຺ຕິ. ເຫຕຸປຈ຺ຉິມໂກ ມຄ຺ໂຄຕິ ຫິ ວຸຕ຺ຕນ຺ຕິ ອາຫ ອເຫຕຸເກສຸ ມຄ຺ຄງ຺ຄານິ ນ ລພ຺ຠນ຺ຕີຕິ. ວິຈິກິຈ຺ຉາສມ຺ປຍຸຕ຺ເຕຈິຕ຺ເຕ ເອກຄ຺ຄຕາ ອຘິໂມກ຺ຂຣຫິ ຕຕ຺ຕາ ເອກນ຺ເຕນ ສໍສປ຺ປນສຠາວາຍ ວິຈິກິຈ຺ຉາຍ ອຠິຠູຕຕ຺ຕາ ຈ ມຄ຺ຄິນ຺ທ຺ຣິຍພລຠາວາຍ ພລວຕີ ນໂຫຕີຕິ ວຸຕ຺ຕໍ ວິຈິກິຈ຺ຉາ ຈິຕ຺ເຕ ເອກຄ຺ຄຕາ ມຄ຺ຄິນ຺ທ຺ຣິຍພລຠາວໍ ນ ຄຈ຺ຉຕີຕິ. ທ຺ວິເຫຕຸກ ຕິເຫຕຸກ ຊວເນສ຺ເວວາຕິ ເອຕ຺ຖ ທ຺ວິເຫຕຸກ ຕິເຫຕຸກສທ຺ເທນ ໂມມູຫທ຺ວຍຫສນຊວນານິ ນິວຕ຺ເຕຕິ. ຊວນສທ຺ເທນ ຕິຠູມການິ ທ຺ວິເຫຕຸກຕິເຫຕຸກວິປາການິ ນິວຕ຺ເຕຕິ.

[໒໑໔] ວິຠາວນິຍໍ ປນ

‘‘ທ຺ວິເຫຕຸກຕິເຫຕຸກຄຫເຓນ ເອກເຫຕຸເກສຸ ອຘິປຕີນໍ ອຠາວໍ ທສ຺ເສຕີ’’ຕິ ວຸຕ຺ຕໍ, ຊວນຠາວສາມຎ຺ຎຕ຺ຕາ ປນ ຫສນຈິຕ຺ເຕປິ ເຕສໍ ອຠາໂວ ທສ຺ເສຕພ຺ໂພເຍວ ໂຫຕີຕິ.

ຍຖາສມ຺ຠວນ຺ຕິ ລທ຺ຘປຸພ຺ພາຕິ ສງ຺ຂາຣສ຺ສ ລທ຺ຘປຸພ຺ພາຄມສ຺ສ ຈ ເອເກກສ຺ສ ອຘິປຕິໂນ ສມ຺ຠວານຸຣູປໍ ເອໂກວ ລພ຺ຠຕິ. ນ ທຸຕິໂຍ. ອິຕຣຖາ ອຘິປຕິເອວ ນສິຍາຕິ. ເອວຎ຺ຈ ກຕ຺ວາ ປຏ຺ຐາເນ ຍຖາ ອິນ຺ທ຺ຣິຍປຈ຺ຈຍວິຠງ຺ເຄ ອຣູປິໂນອິນ຺ທ຺ຣິຍາ ສມ຺ປຍຸຕ຺ຕການໍຘມ຺ມານໍ ຕໍສມຸຏ຺ຐານານຎ຺ຈ ຣູປານໍ ອິນ຺ທ຺ຣິຍປຈ຺ຈເຍນ ປຈ຺ຈໂຍຕິ ວຸຕ຺ຕໍ. ນ ຕຖາ ອຘິປຕິປຈ຺ຈຍວິຠງ຺ເຄ. ຕຕ຺ຖ ປນ ຉນ຺ທາຘິປຕິ ຉນ຺ທສມ຺ປຍຸຕ຺ຕການນ຺ຕິອາທິນາ ເອເກກາຘິປຕິ ວິຠາຄວເສເນວ ວຸຕ຺ຕນ຺ຕິ. ເອວຎ຺ຫິ ສຕິ ອຘິປຕິ ອິນ຺ທ຺ຣິຍານໍ ວິເສໂສ ປາກໂຏ ໂຫຕີຕິ. ນເວຣິຕາຕິ ນວ ອີຣິຕາ ກຖິຕາ. ກຸສລາ ກຸສລາ ພ຺ຍາກເຕຫິ ສມາກິຓ຺ໂຓ ກຸສລາທິ ສມາກິຓ຺ໂຓ. [ມິສ຺ສກສງ຺ຄໂຫ]

໑໖໔. ຈຕ຺ຕາຣິ ສຈ຺ຈານິ ພຸຊ຺ຌຕີຕິ ໂພຘິ. ພຸຊ຺ຌນ຺ຕິວາ ຕານິ ຕໍ ສມງ຺ຄິໂນ ເອຕາຍາຕິ ໂພຘິ. ຈຕຸມຄ຺ຄຎາຓໍ. ວຸຕ຺ຕຎ຺ເຫຕໍ ມຫາ ນິທ຺ເທເສ ໂພຘິ ວຸຈ຺ຈຕິ ຈຕູສຸ ມຄ຺ເຄສຸ-ຎາຓນ຺ຕິ. ປກ຺ໂຂຕິ ໂກຏ຺ຐາໂສ ສມ຺ຠາໂຣ. ໂພຘິຍາ ປກ຺ເຂ ຠວາຕິ ໂພຘິປກ຺ຂິຍາ. ອຘິສີລາ ຘິຈິຕ຺ຕາ ຘິປຎ຺ຎາ ສງ຺ຂາຕາສຸ ຕີສຸ ສິກ຺ຂາສຸ ປຣິຍາປນ຺ນານໍ ສຕ຺ຖຸສາສນຘມ຺ມານໍ ເອຕໍນາມໍ. ເຕ ປນ ໂກຏ຺ຐາສໂຕ ສຕ຺ຕ ວິຘາ ໂຫນ຺ຕີຕິ ອາຫ ຈຕ຺ຕາໂຣສຕິປຏ຺ຐານາຕິອາທິ. ສມ຺ປຍຸຕ຺ຕ ຘມ຺ເມສຸ ປມຸຂາ ປຘານາ ຫຸຕ຺ວາ ກາຍາທີສຸ ອາຣມ຺ມເຓສຸ ຕິຏ຺ຐນ຺ຕິ ນານາຣມ຺ມເຓສຸ ຈິຕ຺ຕຄມນໍ ນິວຕ຺ເຕຕ຺ວາ ເຕສ຺ເວວ ກາຍາທີສຸ ຈິຕ຺ຕ ນິພນ຺ຘນວເສນ ປວຕ຺ຕນ຺ຕີຕິ ປຏ຺ຐານານິ. ສຕິເອວ ປຏ຺ຐານານີຕິ ສຕິ ປຏ຺ຐານານິ. ຈຕ຺ຕາຣິສຕິປຏ຺ຐານານີຕິ ວຕ຺ຕພ຺ເພ ຘມ຺ມຠາວໍ ອເປກ຺ຂິຕ຺ວາ ຈຕ຺ຕາໂຣສຕິປຏ຺ຐານາ ຕິວຸຕ຺ຕນ຺ຕິ ທຏ຺ຐພ຺ພໍ. ກາເຍອນຸປສ຺ສນາ ກາຍາ ນຸປສ຺ສນາ. ຣູປກາເຍ ຣູປສມູເຫ ອສ຺ສາສປສ຺ສາສາທິກສ຺ສ ອວຍວກາຍສ຺ສ ຕໍຕໍກາຍຠາເວນວາ ອນິຈ຺ຈາທິຠາເວນວາ ຍາວ ຕສ຺ມິໍ ຕສ຺ມິໍ ກາເຍ ສມ຺ໂມໂຫ ປຫິຍ຺ຍຕິ. ຕາວ ປຸນປ຺ປຸນໍ ນິຣນ຺ຕຣໍ ສມນຸປສ຺ສນາຕິ ອຕ຺ໂຖ. ນວປ຺ປເຠທາສຸ ເວທນາສຸ ສຸຂເວທນາທິ ກາຍອວຍວເວທນາຍ ຕໍຕໍ ເວທນາຠາເວນ ອຸທຍພ຺ພຍວເສນ ຈ ອນຸປສ຺ສນາ ເວທນານຸປສ຺ສນາ. ໂສຬສ ປເຠເທສຸ ສຣາຄາ ທີສຸ ຈິຕ຺ເຕສຸ ສຣາຄາທິກສ຺ສ ອວຍວຈິຕ຺ຕສ຺ສ ຕໍຕໍ ຈິຕ຺ຕຠາເວນ ອຸທຍພ຺ພຍວເສນຈ ອນຸປສ຺ສນາ ຈິຕ຺ຕານຸປສ຺ສນາ. ປຎ຺ຈປເຠເທສຸ ນີວຣຓາທີສຸ ຘມ຺ເມສຸ ກາມຈ຺ຉນ຺ທາທິກສ຺ສ ອວຍວຘມ຺ມສ຺ສ ຕໍ ຕໍ ຘມ຺ມຠາເວນ ອຸທຍພ຺ພຍວເສນຈ ອນຸປສ຺ສນາ ຘມ຺ມານຸປສ຺ສນາ.

[໒໑໕] ຍໍ ປນ ວິຠາວນິຍໍ

‘‘ກຸຈ຺ຉິຕານໍ ເກສາທີນໍ ອາໂຍຕິ ກາໂຍ. ອສ຺ສາສ ປສ຺ສາສານໍວາ ສມູໂຫ ກາໂຍ’’ຕິ ວຸຕ຺ຕໍ. ຕໍ ນ ສຸນ຺ທຣ ເມວ.

[໒໑໖] ຍຎ຺ຈ ຕຕ຺ຖ

‘‘ກາຍສ຺ສ ອນຸປສ຺ສນາ ກາຍານຸປສ຺ສນາ’’ຕິ ວຸຕ຺ຕໍ. ຕໍປິ ນ ສຸນ຺ທຣໍ.

ກາເຍ ກາຍານຸປສ຺ສີ ວິຫຣຕີຕິ ຫິ ວຸຕ຺ຕໍ. ເອເຕນ ຫິ ກາເຍ ອນຸປສ຺ສນາ ກາຍານຸປສ຺ສນາຕິ ອຍມຕ຺ໂຖວ ປຘານໂຕ ທສ຺ສິໂຕຕິ.

[໒໑໗] ຍຎ຺ຈ ຕຕ຺ຖ

‘‘ເວທນານໍ ວເສນ ອນຸປສ຺ສນາ’’ຕິ ວຸຕ຺ຕໍ. ຕໍປິ ນ ສຸນ຺ທຣໍ. ເວທນາສຸ ເວທນານຸປສ຺ສີຕິ ຫິ ວຸຕ຺ຕໍ. ຕຖາ ຈິຕ຺ຕານຸປສ຺ສນາ ປເທປິ.

[໒໑໘] ຍໍປິ ຕຕ຺ຖ

‘‘ສຎ຺ຎາສງ຺ຂາຣານໍ ຘມ຺ມານໍ ຠິນ຺ນລກ຺ຂຓານເມວ ອນຸປສ຺ສນາ ຘມ຺ມານຸປສ຺ສນາ’’ຕິ ວຸຕ຺ຕໍ. ຕໍປິ ນ ສຸນ຺ທຣເມວ.

ນ ຫິ ກຕ຺ຖຈິ ປາຬິຍໍ ສຎ຺ຎາສງ຺ຂາຣາວ ວິເສເສຕ຺ວາ ຘມ຺ມາຕິ ວຸຕ຺ຕາ ອຕ຺ຖີຕິ. ປາຬິຍຎ຺ຫິ ຉນີວຣຓາ ປຖມໍ ຘມ຺ມາຕິ ວຸຕ຺ຕາ. ຕໂຕ ປຎ຺ຈຸປາທານກ຺ຂນ຺ຘາ. ຕໂຕ ທ຺ວາທສາຍຕນານິ. ຕໂຕ ສຕ຺ຕໂພຊ຺ຌງ຺ຄາ. ຕໂຕ ຈຕ຺ຕາຣິ ສຈ຺ຈານີຕິ. ຍທິເອວໍ ເອກາຍ ຘມ຺ມານຸປສ຺ສນາຍ ວຸຕ຺ຕາຍ ອິຕຣາປິ ສິທ຺ຘາຕິ ສຕິປຏ຺ຐານໍ ເອກເມວ ວຕ຺ຕພ຺ພໍ, ນ ຈຕ຺ຕາໂຣຕິ.ນ. ໂຍ ຫິ ຘມ຺ມານຸປສ຺ສນາຍໍ ຣູປກ຺ຂນ຺ໂຘ ວຸຕ຺ໂຕ. ໂສ ຣຸປ຺ປນລກ຺ຂຓານຸປສ຺ສນວເສນ ວຸຕ຺ໂຕ. ຣຸປ຺ປນລກ຺ຂຓຎ຺ຫິ ນິພ຺ພຕ຺ຕິຕປຣ ມຕ຺ຖຘມ຺ໂມ. ໂສຈ ຕຖາ ອນຸປສ຺ສນ຺ຕສ຺ສ ວິເສສໂຕ ສຸຂຸມສ຺ສ ອຕ຺ຕວິປລ຺ລາສສ຺ສ ປຫານາຍ ໂຫຕີຕິ. ກາໂຍຕິ ປນ ຕໍຕໍ ສມູຫຠູຕຣູປຘມ຺ມວເສນ ເວທິຕພ຺ໂພ. ນຣຸປ຺ປນລກ຺ຂຓວເສນ. ນຈ ຕໍຕໍ ກາຍຠາເວນ ຄຫິໂຕ ຕໍຕໍ ຣູປຘມ຺ມສມູໂຫ ນິພ຺ພຕ຺ຕິຕ ປຣມຕ຺ຖຘມ຺ໂມນາມ ໂຫຕິ. ປຎ຺ຎຕ຺ຕິມິສ຺ສກຕ຺ຕາ. ໂສຈ ຕຖາ ອນຸປສ຺ສນ຺ຕສ຺ສ ວິເສສໂຕ ໂອຬາຣິກສ຺ສ ສຸຠາທິ ວິປລ຺ລາສສ຺ສ ປຫານາຍ ໂຫຕີຕິ. ຕຖາ ເວທນາຈິຕ຺ເຕສຸປິ ໂອຬາຣິກວິປລ຺ລາໂສ ສຸຂຸມວິປລ຺ລາໂສຕິ ທ຺ເວ ທ຺ເວ ວິປລ຺ລາສາ ໂຫນ຺ຕິ. ຕຕ຺ຖ ອຕ຺ຕຸປນິພນ຺ຘາ ນິຈ຺ຈສຸຂ ວິປລ຺ລາສາ ໂອຬາຣິກາ. ອຕ຺ຕວິປລ຺ລາໂສ ສຸຂຸໂມ. ຕຕ຺ຖ ເວທນາ ຈິຕ຺ຕາ ນຸປສ຺ສນາ ໂອຬາຣິກວິປລ຺ລາສານໍ ປຫານາຍ ວິສຸໍ ວຸຕ຺ຕາ. ຘມ຺ເມສຸ ເວທນາກ຺ຂນ຺ຘວິຎ຺ຎາຓກ຺ຂນ຺ຘາ ສຸຂຸມ ວິປລ຺ລາສ ປຫານາຍາຕິ. ຕສ຺ມາ ຈຕ຺ຕາໂຣວ ສຕິປຏ຺ຐານາ ວຕ຺ຕພ຺ພາຕິ. ສມ຺ມາ ປທຫນ຺ຕິ ເອເຕຫີຕິ ສມ຺ມປ຺ປຘານານິ. ກາມໍ ຕໂຈຈ ນ຺ຫາຣຸຈ, ອຏ຺ຐິຈ ອວສິສ຺ສຕຸ. ອຸປສ຺ສຸສ຺ສຕຸ ເມ ສຣີເຣ ມໍສໂລຫິຕໍ. ຍນ຺ຕໍ ປຸຣິສຖາເມນ ປຸຣິສປຣກ຺ກເມນ ປຕ຺ຕພ຺ພໍ. ນ ຕໍ ອປຕ຺ວາ ວີຣິຍສ຺ສ ສຓ຺ຐານໍ ຠວິສ຺ສຕີຕິ ເອວໍ ອນິວຕ຺ຕນວຸຕ຺ຕິ ວເສນ ປວຕ຺ຕສ຺ສ ສມ຺ມາວາຍາມສ຺ສ ເອຕໍ ນາມໍ. ໂສ ປນ ຕຖາ ປວຕ຺ໂຕ ເອໂກປິ ສມາໂນ ກິຈ຺ຈສິທ຺ຘິວເສນ ຈຕຸຘາ ໂຫຕີຕິ. ວຸຕ຺ຕໍ ອຸປ຺ປນ຺ນານນ຺ຕິອາທິ.

ຕຕ຺ຖ ອຸປ຺ປນ຺ນານໍປາປການນ຺ຕິ ອສຸກສ຺ມິໍ ກາເລ ເທເສ ຐາເນ ວາ ອຫໍ ອິທຎ຺ຈິທຎ຺ຈ ນາມ ປາປໍ ອກາສິໍ, ອິທຎ຺ຈິທຎ຺ຈນາມ ມຍ຺ຫໍ ອຸປ຺ປນ຺ນນ຺ຕິ ເອວໍ ອຕ຺ຕໂນ ສນ຺ຕາເນ ອຸປ຺ປນ຺ນຠາເວນ ວິທິຕານໍ ອກຸສລານໍ. ປຫານາຍາຕິ ເຕສໍ ອຕ຺ຕໂນ ສນ຺ຕາເນ ອຊ຺ຊຕຄ຺ເຄ ຍາວປຣິນິພ຺ພານາປຸນ ອນຸປ຺ປາທຘມ຺ມຕາປາທນກຣຓຕ຺ຖໍ. ວາຍາໂມຕິ ສີລ ປູຣຓ ສມຖ ວິປສ຺ສນາຠາວນາກມ຺ເມສຸ ທຬ຺ຫໍ ວາຍາໂມ. ອນຸປ຺ປນ຺ນານນ຺ຕິ ອຕ຺ຕໂນ ສນ຺ຕາເນ ອຸປ຺ປນ຺ນປຸພ຺ພນ຺ຕິ ອວິທິຕານໍ ປຣສນ຺ຕາເນສຸວາ ສຸຕ຺ຕນ຺ເຕສຸວາ ທິສ຺ວາວາ ສຸຕ຺ວາວາ ວິທິຕານໍ. ອນຸປ຺ປາທາຍາຕິ ເຍສໍ ອກຸສລ ມູລານໍ ອຕ຺ຖິຕາຍ ອິເມສໍ ສຕ຺ຕານໍ ອີທິສານິ ກິເລສຊາຕານິ ວາ ປາປກມ຺ມານິວາ ອຸປ຺ປຊ຺ຊນ຺ຕິ. ຕານິ ມຍິ ວິຊ຺ຊນ຺ຕິເອວ. ອຫໍປິ ເຕຫິ ກິເລເສຫິວາ ກມ຺ເມຫິວາ ອປຣິມຸຕ຺ໂຕເຍວ. ອຫໍປິ ສ຺ເວວາ ປຣສຸເວວາ ຠວນ຺ຕເຣສຸວາ ຕານິ ອຕ຺ຕໂນ ສນ຺ຕາເນ ອຸປ຺ປາເທສ຺ສາ ມິເຍວາຕິ ເອວໍ ປຈ຺ຈເວກ຺ຂິຕ຺ວາ ເຕສໍ ອກຸສລມູລານໍ ອຕ຺ຕໂນ ສນ຺ຕາເນ ອຸປ຺ປຕ຺ຕິຍາ ປຈ຺ຈຍສມຸຈ຺ຉິນ຺ທນຕ຺ຖໍ. ອນຸປ຺ປນ຺ນານໍກຸສລານນ຺ຕິ ຈຕຸຠູມເກສຸ ກຸສລຘມ຺ເມສຸ ສຕ຺ຕວິສຸທ຺ຘິປເຠເທສຸ ອິເມນາມ ວິສຸທ຺ຘິຘມ຺ມາ ມຍາ ອປ຺ປຕ຺ຕາ ອນຘິຄຕາເອວ ໂຫນ຺ຕີຕິ ເອວໍ ຎຕ຺ວາ ສມເຍ ອນຕິກ຺ກນ຺ເຕເອວ ອປ຺ປຕ຺ຕານໍ ອນຘິຄຕານໍ ອຸປຣິ ວິສຸທ຺ຘິຘມ຺ມານໍ ອຘິຄມນຕ຺ຖາຍ.

ອຸປ຺ປນ຺ນານໍ ກຸສລານໍ ຠິຍ຺ໂຍ ຠາວາຍາຕິ ຍານິ ສີລາທີນິ ກຸສລານິ ມຍິ ອຸປ຺ປນ຺ນານິ. ຕານິ ຍາວ ນິຍາມໍ ນໂອກ຺ກມນ຺ຕິ, ຕາວ ມຍ຺ຫໍ ເອຕານີຕິ ວຕ຺ຕຸໍ ນາຣຫນ຺ຕິ. ສ຺ເວວາ ປຣສຸເວວາ ຠວນ຺ຕຣໍ ປຕ຺ວາວາ ຠິຊ຺ຊິສ຺ສນ຺ຕິ ເຍວາຕິ ເອວໍ ປຈ຺ຈເວກ຺ຂິຕ຺ວາ ອຕ຺ຕໂນ ສນ຺ຕາເນ ອຸປ຺ປນ຺ນານໍ ເຕສໍ ສພ຺ພໂສ ອກຸປ຺ປຘມ຺ມຕາປາທນວເສນ ສຸຏ຺ຐຸຕຣໍ ວຑ຺ຒນຕ຺ຖາຍ. ເອເຕສຸ ປນ ຈຕູສຸ ມຸເຂສຸ ເຍນ ເກນຈິ ເອເກນ ມຸເຂນ ອຸປ຺ປນ຺ໂນ ວາຍາໂມ ຈຕຸກິຈ຺ຈສາຘໂກເອວ ໂຫຕີຕິ ເວທິຕພ຺ໂພ. ອຏ຺ຐກຖາຍໍ ປນ ມຄ຺ຄກ຺ຂເຓ ເອວ ເອກສ຺ສ ຕສ຺ສ ຈຕຸກິຈ຺ຈສາຘກຕາ ວຸຕ຺ຕາຕິ.

ອິຊ຺ຌນໍ ອິທ຺ຘິ, ຕສ຺ສ ຕສ຺ສ ໂຍຄກມ຺ມສ຺ສ ສິທ຺ຘິ ສມິທ຺ຘິ ນິພ຺ພຕ຺ຕີຕິ ອຕ຺ໂຖ. ສາ ປນ ສງ຺ເຂປໂຕ ອຠິຎ຺ເຎຍ຺ຍານໍ ຘມ຺ມານໍ ອຠິຎ຺ຎາສິທ຺ຘິ, ປຣິຎ຺ເຎຍ຺ຍານໍ ປຣິຎ຺ຎາສິທ຺ຘິ, ປຫາຕພ຺ພານໍ ປຫານສິທ຺ຘິ, ສຈ຺ຉິກາ ຕພ຺ພານໍ ສຈ຺ຉິກຣຓສິທ຺ຘິ, ຠາເວຕພ຺ພານໍ ຠາວນາສິທ຺ຘີຕິ ປຎ຺ຈວິຘາ ໂຫຕິ. ອິຊ຺ຌຕີຕິວາ ອິທ຺ຘິ ສຕ຺ຖຸສາສເນ ໂຍຄກມ຺ເມນ ອິຊ຺ຌນ຺ຕານໍ ສພ຺ເພສໍ ມຫຄ຺ຄຕ ໂລກຸຕ຺ຕຣຘມ຺ມານໍ ນາມໍ. ປຊ຺ຊຕິ ເອເຕນາຕິ ປາໂທ. ອິທ຺ຘິຍາ ປາໂທຕິ ອິທ຺ຘິປາໂທ. ອິທ຺ຘິປຕ຺ຕິຍາ ພລວຸປາໂຍ ປຘານກາຣຓນ຺ຕິ ວຸຕ຺ຕໍ ໂຫຕິ. ໂສ ປນ ຈຕຸນ຺ນໍ ອຘິປຕິຘມ຺ມານໍ ວເສນ ຈຕຸຘາ ໂຫຕີຕິ ວຸຕ຺ຕໍ ຈຕ຺ຕາໂຣ ອິທ຺ຘິປາທາຕິອາທິ. ອຘິປຕິຠູໂຕ ຉນ຺ໂທວ ອິທ຺ຘິປາໂທຕິ ຉນ຺ທິທ຺ຘິປາໂທ. ເອສນໂຍ ເສເສສຸປີຕິ. ເອຕ຺ຖຈ ສພ຺ເພ ມຫຄ຺ຄຕານຸຕ຺ຕຣຠູຕາ ອຸຕ຺ຕຣິມນຸສ຺ສ ຘມ຺ມານາມ ນປາກຕິເກນ ຉນ຺ເທນວາ ວີຣິເຍນວາ ຈິຕ຺ເຕນວາ ປຎ຺ຎາຍ ວາ ອຘິຄນ຺ຕພ຺ພາ ໂຫນ຺ຕິ. ເຍນ ເກນຈິ ປລິໂພເຘນ ປຏິພາຫິຕຸໍ ອສກ຺ກຸເຓຍ຺ເຍນ ອຘິປຕິຠາວປຕ຺ເຕນ ຉນ຺ທາທິນາເອວ ອຘິຄນ຺ຕພ຺ພາ. ຕສ຺ມາ ອິເມ ຈຕ຺ຕາໂຣ ຘມ຺ມາ ອຘິປຕິຠູຕາວ ອິຘ ອຘິປ຺ເປຕາຕິ ທຏ຺ຐພ຺ພາຕິ.

[໒໑໙] ຍໍປນ ວິຠາວນິຍໍ

‘‘ອິຊ຺ຌຕິ ອຘິຏ຺ຐານາທິກໍ ເອຕາຍາຕິ ອິທ຺ຘິ, ອິທ຺ຘິວິຘຎ຺ຎາຓໍ. ອິທ຺ຘິຍາ ປາໂທ ອິທ຺ຘິປາໂທ’’ຕິ ວຸຕ຺ຕໍ. ຕໍ ສໍຍຸຕ຺ຕເກ ກຕມາຈ ຠິກ຺ຂເວ ອິທ຺ຘິ. ອິຘ ຠິກ຺ຂເວ ຠິກ຺ຂຸ ອເນກວິຫິຕໍ ອິທ຺ຘິວິຘໍ ປຈ຺ຈນຸໂຠຕິ. ເອໂກປິ ຫຸຕ຺ວາ ພຫຸຘາ ໂຫຕິ.ລ. ຍາວ ພ຺ຣຫ຺ມໂລກາປິ ກາເຍນ ວສໍ ວຕ຺ເຕຕິ. ອຍໍ ວຸຈ຺ຈຕິ ຠິກ຺ຂເວ ອິທ຺ຘີຕິ ອິມາຍ ປາຬິຍາ ສເມຕິ. ເອວໍສນ຺ເຕປິ ອິຘ ອຠິຘມ຺ມປຣິຍາໂຍວ ອຘິປ຺ເປໂຕຕິ ຕໍ ນ ຍຸຊ຺ຊຕິເຍວ.

ວິຠງ຺ເຄ ປນ ປຖມວາເຣ ໂລກິຍ ໂລກຸຕ຺ຕຣມິສ຺ສກາ ຈິຕ຺ຕ ເຈຕສິກຣາສີເອວ ອິທ຺ຘິປາທາຕິ ວຸຕ຺ຕາ. ອຏ຺ຐກຖາຍຎ຺ຈ-ປຖມຊ຺ຌານ ປຣິກມ຺ມໍຫິ ອິທ຺ຘິປາໂທນາມ. ປຖມຊ຺ຌານໍ ອິທ຺ຘິນາມ.ລ. ເນວສຎ຺ຎາ ນາສຎ຺ຎາຍຕນຊ຺ຌານປຣິກມ຺ມໍ ອິທ຺ຘິປາໂທນາມ. ເນວສຎ຺ຎານາສຎ຺ຎາ ຍຕນຊ຺ຌານໍ ອິທ຺ຘິນາມ. ໂສຕາປຕ຺ຕິມຄ຺ຄສ຺ສ ວິປສ຺ສນາ ອິທ຺ຘິປາໂທ ນາມ. ໂສຕາປຕ຺ຕິມຄ຺ໂຄ ອິທ຺ຘິນາມ.ລ. ອຣຫຕ຺ຕມຄ຺ຄສ຺ສ ວິປສ຺ສນາ ອິທ຺ຘິປາໂທນາມ. ອຣຫຕ຺ຕມຄ຺ໂຄ ອິທ຺ຘິນາມາຕິຈ. ປຖມຊ຺ຌານໍ ອິທ຺ຘິປາໂທນາມ. ທຸຕິຍຊ຺ຌານໍ ອິທ຺ຘິນາມ. ລ. ອາກິຎ຺ຈຎ຺ຎາຍຕນຊ຺ຌານໍ ອິທ຺ຘິ ປາໂທນາມ. ເນວສຎ຺ຎາ ນາສຎ຺ຎາ ຍຕນຊ຺ຌານໍ ອິທ຺ຘິນາມ. ໂສຕາ ປຕ຺ຕິມຄ຺ໂຄ ອິທ຺ຘິປາໂທນາມ. ສກທາຄາມິມຄ຺ໂຄ ອິທ຺ຘິນາມ.ລ. ອຣຫຕ຺ຕມຄ຺ໂຄ ອິທ຺ຘິນາມາຕິ ຈ ວຸຕ຺ຕໍ. ຕໍຕໍ ປາທກຊ຺ຌານໍ ອິທ຺ຘິປາໂທນາມ. ຕໂຕ ຕໂຕ ວຸຏ຺ຐຫິຕ຺ວາ ອຸປ຺ປາທິຕມຄ຺ໂຄ ອິທ຺ຘິນາມາຕິປິ ວຕ຺ຕຸໍ ວຏ຺ຏຕິເຍວ. ອິຘ ປນ ອຸຕ຺ຕຣຈູຬຠາຊນິເຍ ອາຄຕນເຍນ ຈຕ຺ຕາໂຣ ອຘິປຕິຘມ຺ມາເອວ ອິທ຺ຘິປາທາຕິ ວຸຕ຺ຕາ.

ຕຕ຺ຖ ປນ ໂລກຸຕ຺ຕຣຠູຕາເອວ ອຘິປ຺ເປຕາ. ອິຘ ໂລກິຍ ໂລກຸຕ຺ຕຣ ມິສ຺ສກຠູຕາຕິ. ອິນ຺ທ຺ຣິຍພລານິ ອຕ຺ຖໂຕ ເຫຏ຺ຐາ ວຸຕ຺ຕາເນວ. ປາກຏຏ຺ຐານໂຕ ປນ ຈຕູສຸ ໂສຕາປຕ຺ຕິຍງ຺ເຄສຸ ສທ຺ຘາຍ ຖາໂມ ເວທິຕພ຺ໂພ. ຍຖາຫ-ກຕ຺ຖ ຠິກ຺ຂເວ ສທ຺ຘິນ຺ທ຺ຣິຍໍ ທຏ຺ຐພ຺ພໍ. ຈຕູສຸ ໂສຕາປຕ຺ຕິຍງ຺ເຄສຸ ເອຕ຺ຖ ສທ຺ຘິນ຺ທ຺ຣິຍໍ ທຏ຺ຐພ຺ພນ຺ຕິ. ຈຕູສຸ ສມ຺ມປ຺ປຘາເນສຸ ວີຣິຍສ຺ສ. ຍຖາຫ-ກຕ຺ຖ ຠິກ຺ຂເວ ວີຣິຍິນ຺ທ຺ຣິຍໍ ທຏ຺ຐພ຺ພໍ. ຈຕູສຸ ສມ຺ມປ຺ປຘາເນສຸ ເອຕ຺ຖ ວີຣິຍິນ຺ທ຺ຣິຍໍ ທຏ຺ຐພ຺ພນ຺ຕິ. ຈຕູສຸ ສຕິປຏ຺ຐາເນສຸ ສຕິຍາ. ຍຖາຫ-ກຕ຺ຖ ຠິກ຺ຂເວສຕິນ຺ທ຺ຣິຍໍ ທຏ຺ຐພ຺ພໍ. ຈຕູສຸ ສຕິປຏ຺ຐາເນສຸເອຕ຺ຖ ສຕິນ຺ທ຺ຣິຍໍ ທຏ຺ຐພ຺ພນ຺ຕິ. ຈຕູສຸ ຌາເນສຸ ສມາຘິສ຺ສ. ຍຖາຫ-ກຕ຺ຖ ຠິກ຺ຂເວ ສມາຘິນ຺ທ຺ຣິຍໍ ທຏ຺ຐພ຺ພໍ. ຈຕູສຸ ຌາເນສຸ ເອຕ຺ຖ ສມາຘິນ຺ທ຺ຣິຍໍ ທຏ຺ຐພ຺ພນ຺ຕິ. ຈຕູສຸ ອຣິຍສຈ຺ເຈສຸ ປຎ຺ຎາຍ ຖາໂມ ເວທິຕພ຺ໂພ. ຍຖາຫ-ກຕ຺ຖ ຠິກ຺ຂເວ ປຎ຺ຎິນ຺ທ຺ຣິຍໍ ທຏ຺ຐພ຺ພໍ. ຈຕູສຸ ອຣິຍສຈ຺ເຈສຸ ເອຕ຺ຖ ປຎ຺ຎິນ຺ທ຺ຣິຍໍ ທຏ຺ຐພ຺ພນ຺ຕິ. ສມ຺ໂພຘິ ວຸຈ຺ຈຕິ ຈຕູສຸ ມຄ຺ເຄສຸ ຎາຓໍ, ສມນ຺ຕໂຕ ພຸຊ຺ຌຕິ ປຏິວິຊ຺ຌຕິ ພຸຊ຺ຌນ຺ຕິ ວາ ເອຕາຍາຕິ ກຕ຺ວາ. ສາ ຫິ ຈຕຸສຈ຺ຈຘມ຺ມໍ ພຸຊ຺ຌມານາ ເອກກ຺ຂເຓ ໂສຬສຫິ ອຕ຺ເຖຫິ ສທ຺ຘິໍ ສມນ຺ຕໂຕ ພຸຊ຺ຌຕິ, ນ ເອກເທສ ໂຕຕິ ຕສ຺ສາ ສມ຺ໂພຘິຍາ ສມຸຏ຺ຐາປນຏ຺ເຐນ ສມ຺ໂພຘິຍາ ອງ຺ໂຄ ສຫກາຣີພລວປຈ຺ຈໂຍຕິ ສມ຺ໂພຊ຺ຌງ຺ໂຄ. ສຕິເອວ ສມ຺ໂພຊ຺ຌງ຺ໂຄ ສຕິສມ຺ໂພຊ຺ຌງ຺ໂຄ. ສາ ຫິ ກາຍາທີສຸ ຈຕູສຸ ອຕ຺ຕໂນ ໂຄຈເຣສຸ ຠາວນາວເສນ ສຸຏ຺ຐຸສໍວຑ຺ຒມານາ ອນຸປຸພ຺ເພນ ສພ຺ພປມາທ ປກ຺ຂໍ ວິຘເມຕ຺ວາ ສພ຺ພໍ ອປ຺ປມາທປກ຺ຂຎ຺ຈ ປູເຣຕ຺ວາ ຈຕຸມຄ຺ຄຎ຺ຎາຓ ສງ຺ຂາຕໍ ສມ຺ໂພຘິໍ ສມຸຏ຺ຐາເປຕີຕິ. ວິປສ຺ສນາຍ ຠູມິຠູເຕ ອຊ຺ຌຕ຺ຕ ພຫິທ຺ຘາຘມ຺ເມ ວິຈິນາຕິ ກກ຺ຂຬຕ຺ຕຜຸສນາທີຫິ ອນິຈ຺ຈຕາທີຫິຈ ວິວິຘາ ກາເຣຫິ ຈຸຓ຺ຓວິຈຸຓ຺ຓໍ ກຸຣຸມາໂນວິຍ ເຕສຸ ທຏ຺ຐພ຺ພາກາຣໍ ອເສສໍ ອຸປຘາເຣຕີຕິ ຘມ຺ມວິຈໂຍ. ໂສເອວ ສມ຺ໂພຊ຺ຌງ຺ໂຄຕິ ຘມ຺ມວິຈຍ ສມ຺ໂພຊ຺ຌງ຺ໂຄ. ໂສປິ ຫິ ອຕ຺ຕໂນ ໂຄຈຣຠູເຕສຸ ເຕສຸ ຘມ຺ເມສຸ ຠາວນາວເສນ ສຸຏ຺ຐຸສໍວຑ຺ຒມາໂນ ອນຸປຸພ຺ເພນ ສພ຺ພໍສມ຺ໂມຫ ປກ຺ຂໍ ວິຘເມຕ຺ວາ ສພ຺ພໍ ອສມ຺ໂມຫປກ຺ຂໍ ປູເຣຕ຺ວາ ສຍໍ ຈຕຸມຄ຺ຄຎາຓ ສມ຺ໂພຘິ ຫຸຕ຺ວາ ສມຸຏ຺ຐຫຕີຕິ. ສມ຺ມປ຺ປຘານວີຣິຍເມວ ສມ຺ໂພຊ຺ຌງ຺ໂຄຕິ ວີຣິຍສມ຺ໂພຊ຺ຌງ຺ໂຄ. ຕມ຺ປິ ຫິ ຈຕຸພ຺ພິເຘສຸ ອຕ຺ຕໂນ ໂຄຈເຣສຸ ຠາວນາວເສນ ສຸຏ຺ຐຸ ສໍວຑ຺ຒມານໍ ອນຸປຸພ຺ເພນ ສພ຺ພໍ ກຸສເລສຸ ຘມ຺ເມສຸ ລີນສງ຺ໂກຈ ໂກສຊ຺ຊປກ຺ຂໍ ກິເລສຊາຕໍ ວິຘເມຕ຺ວາ ສພ຺ພໍ ຘຸຣສໍປຄ຺ຄຫປກ຺ຂໍ ປູເຣຕ຺ວາ ວຸຕ຺ຕປ຺ປກາຣໍ ສມ຺ໂພຘິໍ ສມຸຏ຺ຐາ ເປຕີຕິ.

ປີຕິເຍວ ສມ຺ໂພຊ຺ຌງ຺ໂຄ ປີຕິ ສມ຺ໂພຊ຺ຌງ຺ໂຄ. ສາປິ ຫິ ວຸຕ຺ຕປ຺ປກາເຣສຸ ໂຄຈເຣສຸ ສຸຏ຺ຐຸ ສໍວຑ຺ຒມານາ ກຸສເລສຸ ຘມ຺ເມສຸ ສພ຺ພໍ ຈິຕ຺ຕສ຺ສ ອຣຕິອຸກ຺ກຓ຺ຐປກ຺ຂໍ ວິຘເມຕ຺ວາ ສພ຺ພໍ ຘມ຺ມຣຕິ ຘມ຺ມນນ຺ທິຘມ຺ມາຣາມ ປກ຺ຂໍ ປູເຣຕ຺ວາ ວຸຕ຺ຕປ຺ປກາຣໍ ສມ຺ໂພຘິໍ ສມຸຏ຺ຐາເປຕິ. ປສ຺ສທ຺ຘິເອວ ສມ຺ໂພຊ຺ຌງ຺ໂຄ ປສ຺ສທ຺ຘິ ສມ຺ໂພຊ຺ຌງ຺ໂຄ. ສາປິ ຫິ ວຸຕ຺ຕປກາເຣສຸ ໂຄຈເຣສຸ ຠາວນາວເສນ ສຸຏ຺ຐຸ ສໍວຑ຺ຒມານາ ສພ຺ພໍ ຈິຕ຺ຕສ຺ສ ສາຣມ຺ຠ ທຣຖປກ຺ຂໍ ວິຘເມຕ຺ວາ ສພ຺ພໍ ວູປສນ຺ຕສີຕລປກ຺ຂໍ ປູເຣຕ຺ວາ ວຸຕ຺ຕປ຺ປກາຣໍ ສມ຺ໂພຘິໍ ສມຸຏ຺ຐາເປຕິ. ສມາຘິເອວ ສມ຺ໂພຊ຺ຌງ຺ໂຄຕິ ສມາຘິ ສມ຺ໂພຊ຺ຌງ຺ໂຄ. ຕສ຺ສ ສມ຺ໂພຘິສມຸຏ຺ຐາປນຕາ ປາກຏາ. ຕຕ຺ຣມຊ຺ຌຕ຺ຕຕາ ສງ຺ຂາຕາ ອຸເປກ຺ຂາເອວ ສມ຺ໂພຊ຺ຌງ຺ໂຄຕິ ອຸເປກ຺ຂາ ສມ຺ໂພຊ຺ຌງ຺ໂຄ. ສາປິຫິ ວຸຕ຺ຕປ຺ປກາເຣສຸ ສຕິອາທີນໍ ໂຄຈເຣສຸ ຠາວນາວເສນ ສຸຏ຺ຐຸ ສໍວຑ຺ຒມານາ ສພ຺ພໍ ຈິຕ຺ຕສ຺ສ ລີນຸທ຺ຘຈ຺ຈປກ຺ຂໍ ວິຘເມຕ຺ວາ ສມວາຫິຕປກ຺ຂໍ ປູເຣຕ຺ວາ ວຸຕ຺ຕປ຺ປກາຣໍ ສມ຺ໂພຘິໍ ສມຸຏ຺ຐາເປຕີຕິ. ສມ຺ມາ ອວິປຣີຕໂຕ ທສ຺ສນໍ ສມ຺ມາທິຏ຺ຐິ. ສາ ປນ ທຸກ຺ເຂ ຎາຓໍ, ທຸກ຺ຂສມຸທເຍ ຎາຓໍ, ທຸກ຺ຂນິໂຣເຘ ຎາຓໍ, ທຸກ຺ຂນິໂຣ ຘຄາມິນິປຏິປທາຍ ຎາຓນ຺ຕິ ຈຕຸພ຺ພິຘາ ໂຫຕິ. ສມ຺ມາ ອວິປຣີຕໂຕ ສໍກປ຺ປນໍ ສມ຺ມາສງ຺ກປ຺ໂປ. ຍຖາ ສມ຺ມາທິຏ຺ຐິ ທຏ຺ຐພ຺ພສຠາເວສຸ ຜຣມານາ ປວຕ຺ຕຕິ ຕຖາ ຕສ຺ສາ ສໍວິຘານນ຺ຕິ ອຕ຺ໂຖ. ເຕເນວ ຫິ ໂສ ປຎ຺ຎາກ຺ຂນ຺ເຘ ສງ຺ຄຫິໂຕຕິ. ຍຖາຫ-ຍາຈາວຸໂສ ວິສາຂ ສມ຺ມາທິຏ຺ຐິ, ໂຍຈ ສມ຺ມາສງ຺ກປ຺ໂປ, ອິເມ ຘມ຺ມາ ປຎ຺ຎາກ຺ຂນ຺ເຘ ສງ຺ຄຫິຕາຕິ. ສມ຺ມາວາຈາ ທໂຍ ປຸພ຺ເພ ວຸຕ຺ຕຕ຺ຖາເຍວ. ສມ຺ມາ ວາຍມນ຺ຕິ ເອເກນາຕິ ສມ຺ມາວາຍາໂມ. ຈຕຸກິຈ຺ຈສາຘກໍ ສມ຺ມປ຺ປຘານ ວີຣິຍໍ. ປສ຺ສທ຺ຘິທ຺ວຍໍ ປສ຺ສທ຺ຘິສາມຎ຺ເຎນ ເອກໍ ກຕ຺ວາ ຈຸທ຺ທເສເຕ ສຠາວໂຕຕິ ວຸຕ຺ຕໍ. ສຕ຺ຕຘາຕິ ວຸຕ຺ຕປ຺ປກາຣານໍ ສຕິປຏ຺ຐານຈຕຸກ຺ກ ສມ຺ມປ຺ປຘານຈຕຸກ຺ກາທີນໍ ວເສນ ສຕ຺ຕຘາ. ອິທານິ ເຕສໍ ຈຸທ຺ທສນ຺ນໍ ກິຈ຺ຈານໍ ຐານເຠທໍ ທສ຺ເສຕຸໍ ສງ຺ກປ຺ປປສ຺ສທ຺ຘິຈາຕິອາທິມາຫ.

[໒໒໐] ຍໍປນ ວິຠາວນິຍໍ

‘‘ສຕ຺ຕຘາ ຕຕ຺ຖ ສງ຺ຄໂຫຕິ ວຕ຺ວາ ປຸນ ຕໍ ທສ຺ເສຕຸໍ ສງ຺ກປ຺ປປສ຺ສທ຺ຘິຈາຕິອາທິມາຫາ’’ຕິ ວຸຕ຺ຕໍ. ຕໍ ນ ຍຸຊ຺ຊຕິ.

ນ ຫິ ຕຕ຺ຖ ສຕ຺ຕ ສຣູປໍ ລພ຺ຠຕີຕິ. ສງ຺ກປ຺ໂປ ວິຣຕິຕ຺ຕຍຎ຺ຈ ເອກໍ ມຄ຺ຄງ຺ຄຏ຺ຐານໍ ປາປຸຓາຕິ. ປສ຺ສທ຺ຘິຈ ປີຕິຈ ອຸເປກ຺ຂາຈ ເອກໍ ໂພຊ຺ຌງ຺ຄຏ຺ຐານໍ. ຉນ຺ໂທຈ ຈິຕ຺ຕຎ຺ຈ ເອກໍ ອິທ຺ຘິປາທຏ຺ຐານນ຺ຕິ ເອວໍ ນວຘມ຺ມາ ເອກຏ຺ຐານິກາ ໂຫນ຺ຕິ. ເອກໍ ວີຣິຍໍ ຈຕຸສມ຺ມປ຺ປຘານ ອິທ຺ຘິ ປາທິນ຺ທ຺ຣິຍ ພລໂພຊ຺ຌງ຺ຄ ມຄ຺ຄງ຺ຄ ວເສນ ນວຏ຺ຐານິກໍ. ເອກາ ສຕິ ຈຕຸສຕິປຏ຺ຐານ ອິນ຺ທ຺ຣິຍ ພລ ໂພຊ຺ຌງ຺ຄ ມຄ຺ຄງ຺ຄ ວເສນ ອຏ຺ຐຏ຺ຐານິກາ. ເອໂກ ສມາຘິ ອິນ຺ທ຺ຣິຍ ພລ ໂພຊ຺ຌງ຺ຄ ມຄ຺ຄງ຺ຄ ວເສນ ຈຕຸຏ຺ຐານິໂກ. ເອກາປຎ຺ຎາ ອິທ຺ຘິປາທິນ຺ທ຺ຣິຍ ພລ ໂພຊ຺ຌງ຺ຄ ມຄ຺ຄງ຺ຄ ວເສນ ປຎ຺ຈຏ຺ຐານິກາ. ເອກາ ສທ຺ຘາ ອິນ຺ທ຺ຣິຍ ພລ ວເສນ ທຸຏ຺ຐານິກາຕິ. ເຕ ປນ ສຕ຺ຕຕິໍສ ປເຠທາ ຘມ຺ມາ ປຸພ຺ພຠາເຄ ນານາຣມ຺ມຓາ ນານາຂຓິກາຈ ໂຫນ຺ຕິ. ມຄ຺ຄຜເລສຸ ປນ ນວຏ຺ຐານິກໍ ວີຣິຍໍ ເອກເມວ ນິພ຺ພານໍ ອາຣມ຺ມຓໍກຕ຺ວາ ນວສຸຐາເນສຸ ອຕ຺ຕ ປຏິປກ຺ຂານໍ ປາປ ຘມ຺ມານໍ ປຈ຺ຈຍ ຍມຸຄ຺ຆາຕວເສນ ນວ ກິຈ຺ຈານິ ສາຘຍມານໍ ເອກເມວ ປວຕ຺ຕຕິ. ເອສ ນໂຍ ອຏ຺ຐຏ຺ຐານິກາທີສຸ. ຕສ຺ມາ ເຕ ເອກກ຺ຂເຓ ເອກຈິຕ຺ເຕ ສພ຺ເພ ເອກໂຕ ອຸປລພ຺ຠນ຺ຕີຕິ ວຸຕ຺ຕໍ ສພ຺ເພ ໂລກຸຕ຺ຕເຣ ໂຫນ຺ຕີຕິ. ນວາສງ຺ກປ຺ປ ປີຕິໂຍຕິ ເອຕ຺ຖ ວາສທ຺ໂທ ກ຺ວຈິ ສທ຺ທຕ຺ໂຖ. ສງ຺ກປ຺ໂປ ກ຺ວຈິ ທຸຕີຍຊ຺ຌານິກາ ທິເກປີຕິຈ ກ຺ວຈິ ຈຕຸຕ຺ຖຊ຺ຌານິກາທິເກ ໂລກຸຕ຺ຕເຣ ນໂຫນ຺ຕີຕິ ອຕ຺ໂຖ.

ໂລກິເຍປີຕິ ສີລວິໂສຘນາທິວເສນ ປວຕ຺ເຕ ກາມາ ວຈຣກຸສລາທິເກ ໂລກິຍກຸສລ ກ຺ຣິຍຈິຕ຺ຕຸປ຺ປາເທປິ. ຍຖາ ໂຍຄນ຺ຕິ ສີລວິໂສຘນກມ຺ມ ສມຖກມ຺ມນາມຣູປປຣິຄ຺ຄຫາທິກມ຺ເມສຸ ຍຸຊ຺ຊິຕພ຺ພານໍ ວິຣຕິຕ຺ຕຍາທີນໍ ອນຸຣູປໍ. ຉພ຺ພິສຸທ຺ຘິປວຕ຺ຕິຍນ຺ຕິ ສີລ ວິສຸທ຺ຘາທີນໍ ຉນ຺ນໍ ວິສຸທ຺ຘີນໍ ອນຸກ຺ກເມນ ປວຕ຺ຕິກາເລ. ເອເຕນ ທິຏ຺ເຐວ ຘມ຺ເມ ມຄ຺ຄຜລປຕິຏ຺ຐາຠາວຕ຺ຖາຍ ປູຣິເຕ ຈຕຸປາຣິສຸທ຺ຘິ ສີເລປິ ສທ຺ຘາສຕິອາທໂຍ ໂພຘິປກ຺ຂິເຍສຸ ສງ຺ຄຫິຕາ ເອວ ໂຫນ຺ຕິ. ຕຖາ ມຄ຺ຄປາທກຕ຺ຖາຍ ອຸປ຺ປາທິເຕສຸ ມຫຄ຺ຄຕຊ຺ຌາເນສຸ ມີຕິ ທສ຺ເສຕິ. ຕຖາ ຫິ ໂພຊ຺ຌງ຺ຄສໍຍຸຕ຺ຕເກ –

ເອວໍ ຠາວິໂຕ ໂຂ ກຸຓ຺ຑລິຍ ອິນ຺ທ຺ຣິຍສໍວໂຣ ຕີຓິ ສຸຈຣິຕານິ ປຣິປູເຣຕິ. ເອວໍ ຠາວິຕານິ ຕີຓິ ສຸຈຣິຕານິ ຈຕ຺ຕາໂຣ ສຕິປຏ຺ຐາເນ ປຣິປູເຣນ຺ຕິ. ເອວໍ ຠາວິຕາ ຈຕ຺ຕາໂຣ ສຕິປຏ຺ຐານາ ສຕ຺ຕ ໂພຊ຺ຌງ຺ເຄ ປຣິປູເຣນ຺ຕິ. ເອວໍ ຠາວິຕາ ສຕ຺ຕ ໂພຊ຺ຌງ຺ເຄ ວິຊ຺ຊາວິມຸຕ຺ຕິໂຍ ປຣິປູເຣນ຺ຕີຕິ ວຸຕ຺ຕໍ.

ອຏ຺ຐກຖາຍໍປິ ນເກວລໍ ພລວວິປສ຺ສນາ ມຄ຺ຄຜເລສຸເອວ ໂພຊ຺ຌງ຺ເຄ ອຸທ຺ຘຣນ຺ຕິ. ວິປສ຺ສນາປາທກ ກສິຓຊ຺ຌານ ອານາປາຓາ ສຸກ ພ຺ຣຫ຺ມວິຫາຣຊ຺ຌາເນສຸປິ ອຸທ຺ຘຣນ຺ຕີຕິ ວຸຕ຺ຕໍ. [ໂພຘິປກ຺ຂິຍສງ຺ຄໂຫ]

໑໖໕. ສພ຺ພສງ຺ຄເຫ ປຎ຺ຈກ຺ຂນ຺ຘາຕິ ປຎ຺ຈ ຣາສໂຍ. ອຕີຕາທິ ເຠທ ຠິນ຺ນານໍ ຣູປານໍ ຂນ຺ໂຘ ຣາສີຕິ ຣູປກ຺ຂນ຺ໂຘ. ເອກສ຺ມິໍ ຣຸປ຺ປນ ລກ຺ຂເຓ ຣາສິໍ ກຕ຺ວາ ຎາເຓນ ປຣິຄ຺ຄຫິຕາ ຣູປຘມ຺ມາເອວ. ຕຖາ ເອກສ຺ມິໍ ເວທຍິຕລກ຺ຂເຓ ສຎ຺ຊານນ ລກ຺ຂເຓ ຣາສິໍ ກຕ຺ວາ ປຣິຄ຺ຄຫິຕາ ອຕີຕາທິເຠທຠິນ຺ນາ ເວທນາສຎ຺ຎາໂຍ ເວທນາກ຺ຂນ຺ໂຘ ສຎ຺ຎາກ຺ຂນ຺ໂຘ ຈນາມ. ສງ຺ຂໂຣນ຺ຕີຕິ ສງ຺ຂາຣາ. ຜສ຺ສ ເຈຕນາ ທໂຍ. ເຕຫິ ຉສຸວາ ອຸປປຕ຺ຕິທ຺ວາເຣສຸ ຕີສຸວາ ກມ຺ມທ຺ວາເຣສຸ ເອກໂຕ ສງ຺ຄມ຺ມ ສມາຄມ຺ມ ຜຸສນເຈຕຍິຕາທີຫິ ອຕ຺ຕໂນ ອຕ຺ຕໂນ ກິຈ຺ເຈຫິ ທສ຺ສນສວນາທີນິ ສາຘາຣຓກິຈ຺ຈານິວາ ກາຍິກ ວາຈສິກມານສິການິວາ ສຍນ ນິສຊ຺ຊຏ຺ຐານ ຄມນ ກຖນ ຈິນ຺ຕນາທີນິ ສພ຺ພານິ ກິຈ຺ຈານິ ກໂຣນ຺ຕິ ວິທຫນ຺ຕີຕິ. ວຸຕ຺ຕຎ຺ເຫຕໍ ສໍຍຸຕ຺ຕເກ –

ກິຎ຺ຈ ຠິກ຺ຂເວ ສງ຺ຂາເຣ ວເທຖ. ສງ຺ຂຕໍ ອຠິສງ຺ຂໂຣນ຺ຕີຕິ ໂຂ ຠິກ຺ຂເວ ຕສ຺ມາ ສງ຺ຂາຣາຕິ ວຸຈ຺ຈນ຺ຕິ. ກິຎ຺ຈ ສງ຺ຂຕໍ ອຠິ ສງ຺ຂໂຣນ຺ຕິ, ຣູປໍ ຣູປຕ຺ຖາຍ ສງ຺ຂຕໍ ອຠິສງ຺ຂໂຣນ຺ຕິ. ເວທນໍ ເວທນຕ຺ຖາຍ ສງ຺ຂຕໍ ອຠິສງ຺ຂໂຣນ຺ຕິ. ສຎ຺ຎໍ ສຎ຺ຎຕ຺ຖາຍ ສງ຺ຂຕ ອຠິສງ຺ຂໂຣນ຺ຕິ. ສງ຺ຂາເຣ ສງ຺ຂາຣຕ຺ຖາຍ ສງ຺ຂຕ ມຠິສງ຺ຂໂຣນ຺ຕິ. ວິຎ຺ຎາຓໍ ວິຎ຺ຎາຓຕ຺ຖາຍ ສງ຺ຂຕ ມຠິ ສງ຺ຂໂຣນ຺ຕີຕິ. ສງ຺ຂຕ ມຠິສງ຺ຂໂຣນ຺ຕີຕິ ໂຂ ຠິກ຺ຂເວ ຕສ຺ມາ ສງ຺ຂາຣາຕິ ວຸຈ຺ຈນ຺ຕີຕິ.

ຕຕ຺ຖ ຣູປໍ ຣູປຕ຺ຖາຍ ສງ຺ຂຕມຠິສງ຺ຂໂຣນ຺ຕີຕິ ຍສ຺ມິໍ ຍສ຺ມິໍ ກາເລ ສຍນ ນິສຊ຺ຊາທິວເສນ ປວຕ຺ຕາ ຍາ ຍາ ຣູປວິກຕິ ອິຈ຺ຉີຍຕິ, ຕສ຺ມິໍຕສ຺ມິໍ ກາເລ ຕສ຺ສາ ຕສ຺ສາ ຣູປວິກຕິຍາ ຊາຕຕ຺ຖາຍ ອິຣິຍາປຖ ປຣິວຕ຺ຕນາທິ ວເສນ ຕໍ ຕໍ ຣູປວິກຕິໍ ສງ຺ຂຕໍ ອຠິສງ຺ຂໂຣນ຺ຕີຕິ ອຕ຺ໂຖ. ຂຊ຺ຊໂຠຊ຺ຊາທິກໍ ວຕ຺ຖາລງ຺ກາຣາທິກໍ ມຎ຺ຈ ປີຐ ເຄຫ ຣຖາທິກໍ ສພ຺ພໍ ອຸປໂຠຄ ປຣິໂຠຄຠູຕໍ ພາຫິຣ ຣູປໍປິ ຄເຫຕ຺ວາ ໂຍເຊຕຸໍ ວຏ຺ຏຕິເຍວ. ເວທນນ຺ຕິ ທິຏ຺ຐຘມ຺ມິກໍ ສມ຺ປຣາຍິກຎ຺ຈ ສພ຺ພໍປິ ເວທນໍ. ຕຕ຺ຖ ທິຏ຺ຐຘມ຺ມິກໍ ເວທນໍ ສງ຺ຂຕໍ ອຠິສງ຺ຂໂຣນ຺ຕາ ຈິຕ຺ຕກມ຺ມນຈ຺ຈຄີຕາທີນິ ຕໍ ຕໍ ເວທນຸປກຣຓານິ ສມ຺ປາທນ ວເສນ ສມ຺ປຣາຍິກຎ຺ຈ ອຠິສງ຺ຂໂຣນ຺ຕາ ມານຸສກໍວາ ທິພ຺ພໍວາ ຕໍຕໍ ເວທນໍ ປຕ຺ເຖຕ຺ວາ ທານ ສີລາທິ ສມ຺ປາທນ ວເສນ ອຠິສງ຺ຂໂຣນ຺ຕິ. ເອສນໂຍ ເສເສສຸປິ. ສງ຺ຂາເຣສຸ ປນ ຜສ຺ສໍ ຜສ຺ສຕ຺ຖາຍ ເຈຕນໍ ເຈຕນຕ຺ຖາຍາຕິອາທິນາ ທານໍ ທານຕ຺ຖາຍ ສີລໍ ສີລຕ຺ຖາຍ ປາຓາຕິປາຕໍ ປາຓາຕິປາຕຕ຺ຖາຍາຕິອາທິນາ ວາ ສພ຺ພໍ ໂລກປວຕ຺ຕິໍ ຎຕ຺ວາ ວິຕ຺ຖາເຣຕພ຺ພາຕິ. ເອຕ຺ຖ ສິຍາ, ກສ຺ມາ ສງ຺ຂາເຣສຸ ປາກຏາ ເຈຕນາທໂຍ ວິຕກ຺ກາທໂຍ ໂລຠາທໂຍ ສທ຺ຘາສຕິປຎ຺ຎາທໂຍຈ ຘມ຺ເມ ວິສຸໍ ວິສຸໍ ຂນ຺ຘຠາເວນ ອວຕ຺ວາ ເວທນາສຎ຺ຎາວ ວຸຕ຺ຕາຕິ. ວຸຈ຺ຈເຕ.

ຍຖາ ຫິ ເຉໂກ ມຫາຠິສກ຺ໂກ ເຠສຊ຺ຊມູລານິ ຄເຫຕ຺ວາ ຈຸຓ຺ຓໍ ກໂຣນ຺ໂຕ ເຕສຸ ມູເລສຸ ອິມານິ ຖູລານິປິ ມຸທູນິ ໂຫນ຺ຕິ. ອິມານິ ຂຸທ຺ທການິປິ ກກ຺ຂຬານິ ໂຫນ຺ຕີຕິ ຎຕ຺ວາ ຕໂຕ ປຖມຕຣໍ ກກ຺ຂຬານິ ວິສຸໍ ອຸທ຺ຘຣິຕ຺ວາ ສຸຏ຺ຐຸ ໂກຏ຺ເຏຕ຺ວາ ຈຸຓ຺ຓໍ ກໂຣຕິ. ເສສານິ ປນ ສພ຺ພານິ ມຸທູນິ ເອກໂຕ ກຕ຺ວາ ໂກຏ຺ເຏຕ຺ວາ ຈຸຓ຺ຓໍ ກໂຣຕິ. ຕໂຕ ອຸຠຍານິ ມິສ຺ເສຕ຺ວາ ສິລາຍໍ ປິເສຕ຺ວາ ເຠສຊ຺ຊກມ຺ເມ ອຸປເນຕິ. ເອວໍ ກໂຣນ຺ໂຕ ນກິລມຕິ. ເອວເມວໍ ຠຄວາປິ ນາມຣູປຘມ຺ເມສຸ ຕິລກ຺ຂຓໍ ອາໂຣເປຕ຺ວາ ນິຈ຺ຈສຸຂອຕ຺ຕ ວິປລ຺ລາສານໍ ປຫານຕ຺ຖາຍ ອນຸຍຸຎ຺ຊນ຺ຕາ ເທວມນຸສ຺ສາ ວິຠາເຄ ອກເຕ ຕີສຸ ຘມ຺ເມສຸ ກິລມິສ຺ສນ຺ຕີຕິ ຎຕ຺ວາ ນາມຘມ຺ເມສຸ ເວທນາສຎ຺ຎາຈິຕ຺ຕສງ຺ຂາເຕ ຕໂຍ ຘມ຺ເມ ວິສຸໍ ອຸທ຺ຘຣິຕ຺ວາ ເອກເມກໍ ຂນ຺ຘໍ ນາມ ກຕ຺ວາ ເທເສສິ. ຕຖາ ຫິ ຍຖາ ມຈ຺ຉານາມ ອຸທເກ ສຕິ ອຸກ຺ກຓ຺ຐິຕາ ນາມ ນຕ຺ຖິ. ອສຕິ ປນ ເອກນ຺ເຕນ ອຸກ຺ກຓ຺ຐິຕາເຍວ ໂຫນ຺ຕິ. ຍຖາວາ ມຘຸກຣາວາ ຠມຣາວາ ຍສ຺ມິໍ ວເນ ປຸປ຺ຜຣສ ຜລຣເສ ລຠນ຺ຕິ, ຕຕ຺ຖ ອຸກ຺ກຓ຺ຐິຕານາມ ນຕ຺ຖິ. ອລຠມານາ ປນ ເອກນ຺ເຕນ ອຸກ຺ກຓ຺ຐິຕາເອວ ໂຫນ຺ຕິ. ເອວເມວ ອິເມສໍ ສຕ຺ຕານໍ ສຸຂ ສຎ຺ຎິເຕສຸ ປຕິສຣເຓສຸ ເວທນາສທິສໍ ປຕິສຣຓໍນາມ ນຕ຺ຖິ. ມນຸສ຺ສເທວພ຺ຣຫ຺ມສມ຺ປຕ຺ຕິໂຍ ອສ຺ສາເທນ຺ຕາປິ ສຸຂເວທນຕ຺ຖາຍເອວ ອສ຺ສາເທນ຺ຕິ. ຍທິຈ ຕາຫິ ວິນາ ຍຖິຈ຺ຉິຕໍ ສຸຂເວທນໍ ລເຠຍ຺ຍຸໍ. ໂກນາມ ຕາ ສາທິຍິສ຺ສຕິ. ຕຖາ ຜສ຺ສເຈຕນາທີຫິ ວິຕກ຺ກວິຈາຣວີຣິຍາທີຫິ ໂລຠໂທສາທີຫິ ສທ຺ຘາສຕິປຎ຺ຎາທີຫິ ຈ ສງ຺ຂາຣກ຺ຂນ຺ຘຘມ຺ເມຫິ ທິຏ຺ຐຘມ຺ມິກໍ ສມ຺ປຣາຍິກຎ຺ຈ ຍໍກິຎ຺ຈິ ສງ຺ຂຕໍ ອຠິສງ຺ຂໂຣນ຺ຕາປິ ສຸຂເວທນຕ຺ຖາຍເອວ ອຠິສງ຺ຂໂຣນ຺ຕິ. ຍທິຈ ຕາທິເສນ ອຠິສງ຺ຂຣເຓນ ວິນາປິ ຍຖິຈ຺ຉິຕໍ ສຸຂໍ ລເຠຍ຺ຍຸໍ, ເຕຫິ ຘມ຺ເມຫິ ອຕ຺ໂຖ ນຕ຺ຖີຕິ ໂກນາມ ເຕ ຘມ຺ເມ ອຠິສງ຺ຂຣິສ຺ສຕີຕິ.

ອິຕິ ສຸຂສຎ຺ຎິເຕສຸ ຘມ຺ເມສຸ ເວທນານາມ ອິເມສໍ ສຕ຺ຕານໍ ປຣມຸກ຺ກໍສຄຕໍ ສຸຂສຎ຺ຎິຕຏ຺ຐານໍ ໂຫຕິ. ຕສ຺ມາ ຠຄວາ ຕໍ ວິສຸໍ ເອກໍ ຂນ຺ຘໍ ກຕ຺ວາ ຂນ຺ຘເທສນໍ ເທເສຕີຕິ. ຕຖາ ອິເມສໍ ສຕ຺ຕານໍ ອຕ຺ຕສຎ຺ຎິເຕສຸ ປຕິສຣເຓສຸ ສຎ຺ຎາສທິສໍ ປຕິສຣຓໍ ນາມ ນຕ຺ຖິ. ຕຖາ ຫິ ຕສ຺ມິໍ ຕສ຺ມິໍ ສຕ຺ຕນິກາເຍ ອຸປ຺ປນ຺ນາ ເຕ ເຕ ສຕ຺ຕາ ອຕ຺ຕາໂນ ອຕ຺ຕໂນ ວິສເຍສຸ ສພ຺ພໍ ຊານິຕພ຺ພໍ ສຎ຺ຎາຍ ສຎ຺ຊານິຕ຺ວາ ວິຎ຺ຎຸຕ຺ຕໍ ອາປຊ຺ຊນ຺ຕິ. ຕຖາ ວິຎ຺ຎຸຕ຺ຕໍ ອາປຊ຺ຊນ຺ຕາ ຍຕ຺ຕກໍ ປເຣ ຊານນ຺ຕິ. ຕຕ຺ຕກໍ ມຍໍປິ ຊານາມ. ໂກ ອມ຺ຫາກໍ ອຸຕ຺ຕຣິຕໂຣຕິ ເອວໍ ໂລເກ ຎາຓສມ຺ມຠໍ ສຎ຺ຎໍ ປຣມໍ ອຕ຺ຕານໍ ກຕ຺ວາ ວິຈຣນ຺ຕິ. ອິຕິ ອຕ຺ຕສຎ຺ຎິເຕສຸ ຘມ຺ເມສຸ ສຎ຺ຎານາມ ອິເມສໍ ສຕ຺ຕານໍ ປຣມຸກ຺ກໍ ສຄຕໍ ອຕ຺ຕສຎ຺ຎິຕຏ຺ຐານໍ ໂຫຕິ. ຕສ຺ມາ ຠຄວາຕໍປິ ວິສຸໍ ເອກໍ ຂນ຺ຘໍ ກຕ຺ວາ ຂນ຺ຘເທສນໍ ເທເສຕີຕິ. ຕຖາ ອິເມສໍ ສຕ຺ຕານໍ ນິຈ຺ຈສຎ຺ຎິເຕສຸ ປຕິສຣເຓສຸ ຈິຕ຺ຕສທິສໍ ປຕິສໍຣຓໍ ນາມ ນຕ຺ຖິ. ຕຖາ ຫິ ສຕ຺ຕາ ສຸຂໍ ທຸກ຺ຂໍນາມ ອນິຈ຺ຈໍ ສຸຂປຕ຺ຕານໍ ທຸກ຺ຂໍ ນຕ຺ຖິ. ທຸກ຺ຂ ປຕ຺ຕານໍ ສຸຂໍ ນຕ຺ຖີຕິວາ. ສຎ຺ຎານາມ ອນິຈ຺ຈາ, ກທາຈິ ປມຸສ຺ສຕິ ກທາຈິ ນປມຸສ຺ສຕີຕິວາ. ວີຣິຍໍນາມ ອນິຈ຺ຈໍ. ກທາຈິ ອາຣຠຕິ, ກທາຈິ ນ ອາຣຠຕີຕິວາ. ໂລໂຠນາມ ອນິຈ຺ໂຈ. ກທາຈິ ອຸປ຺ປຊ຺ຊຕິ, ກທາຈິ ນອຸປ຺ປຊ຺ຊຕີຕິວາ. ໂທໂສນາມ ອນິຈ຺ໂຈ. ກທາຈິ ອຸປ຺ປຊ຺ຊຕິ, ກທາຈິ ນ ອຸປ຺ປຊ຺ຊຕີຕິວາ. ສທ຺ຘານາມ ອນິຈ຺ຈາ. ກທາຈິ ປສນ຺ນຈິຕ຺ໂຕ ໂຫຕິ, ກທາຈິ ອປ຺ປສນ຺ນຈິຕ຺ໂຕ ໂຫຕີຕິວາ. ປຎ຺ຎານາມ ອນິຈ຺ຈາ. ຊານິຕພ຺ພໍປິ ກທາຈິ ຊານາຕິ, ກທາຈິ ນ ຊານາຕີຕິວາ ເອວໍ ເຈຕສິກຘມ຺ມານໍ ອນິຈ຺ຈ ຠາໂວນາມ ເກສຎ຺ຈິ ໂລກິຍຊນານໍປິ ປາກໂຏ ໂຫຕິ. ນ ປນ ຈິຕ຺ຕສ຺ສ. ນ ຫິ ສຕ຺ຕາ ຈິຕ຺ຕໍນາມ ອນິຈ຺ຈໍ. ກທາຈິ ອຸປ຺ປຊ຺ຊຕິ, ກທາຈິ ນ ອຸປ຺ປຊ຺ຊຕີຕິ ຄຓ຺ຫນ຺ຕິ. ຕໍ ປນ ສຍໍ ນິຈ຺ຈໍ ປວຕ຺ຕມານໍ ຫຸຕ຺ວາ ກທາຈິ ສຸເຂນ ຍຸຕ຺ຕໍ ໂຫຕິ, ກທາຈິ ທຸກ຺ເຂນາຕິອາທິນາ ຕສ຺ມິໍ ນິຈ຺ຈສຎ຺ຎເມວ ອຸປ຺ປາເທນ຺ຕີຕິ. ອິຕິ ຈິຕ຺ຕໍນາມ ນິຈ຺ຈສຎ຺ຎິເຕສຸ ຘມ຺ເມສຸ ປຣມຸກ຺ກໍ ສຄຕໍ ນິຈ຺ຈສຎ຺ຎິຕຏ຺ຐານໍ ໂຫຕິ. ຕສ຺ມາ ຠຄວາ ຕໍປິ ວິສຸໍ ເອກໍ ຂນ຺ຘໍ ກຕ຺ວາ ຂນ຺ຘເທສນໍ ເທເສຕີຕິ.

[໒໒໑] ຍໍປນ ວິຠາວນິຍໍ

‘‘ຠາຊນ ໂຠຊນ ພ຺ຍຎ຺ຊນ ຠຕ຺ຕກາຣກ ຠຸຎ຺ຊກ ວິກປ຺ປວເສນ ປຎ຺ເຈວ ວຸຕ຺ຕາ’’ຕິ ວຕ຺ວາ ຕໍ ວິຠາວນ຺ເຕນ ‘‘ຣູປຎ຺ຫິ ເວທນາ ນິສ຺ສຍຕ຺ຕາ ຠາຊນຏ຺ຐານິຍໍ. ເວທນາ ຠຸຎ຺ຊິຕພ຺ພຕ຺ຕາ ໂຠຊນຏ຺ຐານິຍາ. ສຎ຺ຎາ ເວທນສ຺ສາທ ລາຠ ເຫຕຸຕ຺ຕາ ພ຺ຍຎ຺ຊນຏ຺ຐານິຍາ. ສງ຺ຂາຣາ ອຠິສງ຺ຂຣຓໂຕ ຠຕ຺ຕກາຣກຏ຺ຐານິຍາ. ວິຎ຺ຎາຓໍ ອຸປຠຸຎ຺ຊກຕ຺ຕາ ຠຸຎ຺ຊກຏ຺ຐານິຍໍ. ເອຕ຺ຕາວຕາຈ ອຘິປ຺ເປ ຕຕ຺ຖສິທ຺ຘີຕິ ປຎ຺ເຈວ ວຸຕ຺ຕາ’’ຕິ ວຸຕ຺ຕໍ. ຕໍ ສາຣໂຕ ນທຏ຺ຐພ຺ພໍ.

ນ ຫິ ຕໍ ອຏ຺ຐກຖາຍໍ ເອຕປ຺ປຣມວິນິຈ຺ຉເຍ ອາຄຕໍ. ອຸປມາທີປເນເອວ ອາຄຕໍ. ນ ຈ ຠຄວຕາ ຠາຊນາທິວິກປ຺ປສິທ຺ຘິມຕ຺ຕໍ ອຸທ຺ທິສ຺ສ ປຎ຺ເຈວ ຂນ຺ຘາ ວຸຕ຺ຕາຕິ ສກ຺ກາ ວຕ຺ຕຸໍ. ຕຖາສິທ຺ຘສ຺ສ ອຕ຺ຖສ຺ສ ປໂຍຊນາຠາວໂຕຕິ.

[໒໒໒] ຍຎ຺ຈ ຕຕ຺ຖ

‘‘ເທສນາກ຺ກເມປິ ອິທເມວ ກາຣຓໍ. ຍຕ຺ຖ ຠຸຎ຺ຊຕິ, ຍຎ຺ຈ ຠຸຎ຺ຊຕິ, ເຍນຈ ຠຸຎ຺ຊຕິ, ໂຍຈ ໂຠຊໂກ, ໂຍຈ ຠຸຎ຺ຊິຕາ. ເຕສໍ ອນຸກ຺ກເມນ ທສ຺ເສຕຸກາມຕ຺ຕາ’’ຕິ ວຸຕ຺ຕໍ. ຕໍປິ ອສາຣໍ.

ຈຕຸນ຺ນໍ ອຸປາທານານໍ ວິສຍຠູຕາ ຂນ຺ຘາ ອຸປາທານກ຺ຂນ຺ຘາ. ສພ຺ພ ສຠາຄຘມ຺ມ ປຣິຍາທານວເສນ ສາສວາ ອນາສວາຈ ຘມ຺ມາ ປຎ຺ຈກ຺ຂນ຺ຘາຕິ ວຸຕ຺ຕາ, ວິປສ຺ສນາ ຠູມິປຣິຄ຺ຄຫວເສນ ສາສວາເອວ ປຎ຺ຈຸປາທານກ຺ຂນ຺ຘາຕິ ວຸຕ຺ຕາ. ອາຍຕນ຺ຕິ ອຕ຺ຕໂນ ຜລຸປ຺ປຕ຺ຕິຍາ ຠຸສໍ ອຸສ຺ສຫນ຺ຕາ ວິຍ ໂຫນ຺ຕີຕິ ອາຍຕນານິ. ອາຍຕນສທ຺ໂທ ປນ ຉສຸ ອຊ຺ຌຕ຺ຕິເກສຸ ທ຺ວາຣຘມ຺ເມສຸ ປວຕ຺ຕມາໂນ ສຎ຺ຊາຕິເທສຏ຺ເຐນ ນິວາສຏ຺ຐານຏ຺ເຐນ ອາກຣຏ຺ເຐນ, ຉສຸ ພາຫິເຣສຸ ອາຣມ຺ມຓຘມ຺ເມສຸ ປວຕ຺ຕມາໂນ ສໂມສຣຓຏ຺ເຐນ, ອຸຠຍຕ຺ຖປິ ກາຣຓຏ຺ເຐນ ປວຕ຺ຕຕິ. ຕຕ຺ຖ ຈິຕ຺ຕ ເຈຕສິກາ ຘມ຺ມາ ເອກສ຺ມິໍວາ ຠເວ ອນມຕຄ຺ເຄວາ ສໍສາເຣ ປຸນປ຺ປຸນໍ ສຫ ຊາຍມານາ ຈກ຺ຂາທີສຸ ຉສຸ ທ຺ວາຣປເທເສສຸເອວ ຊາຍນ຺ຕິ, ນ ອຎ຺ຎຕ຺ຖ. ສນ຺ຕານານຸພນ຺ຘວເສນ ນິວສນ຺ຕາປິ ເຕສ຺ເວວ ນິວສນ຺ຕິ, ນ ອຎ຺ຎຕ຺ຖ. ອາກິຣິຕ຺ວາ ຖປິຕາ ວິຍ ປວຕ຺ຕມານາປິ ເຕສ຺ເວວ ປວຕ຺ຕນ຺ຕິ, ນ ອຎ຺ຎຕ຺ຖ. ຕສ຺ມາ ຈກ຺ຂາທີນິ ຉສຎ຺ຊາຕິເທສຏ຺ເຐນ ນິວາສຏ຺ຐານຏ຺ເຐນ ອາກຣຏ຺ເຐນຈ ອາຍຕນານິນາມ. ເທວາຍຕນໍ ວິຍ ອຘິຏ຺ຐານຏ຺ເຐນາຕິປິ ວຕ຺ຕຸໍ ວຏ຺ຏຕິເຍວ.

ຍຖາຈ ສມ຺ປນ຺ນປຸປ຺ຜຜເລສຸ ເຂເມສຸ ຣຸກ຺ເຂສຸ ຕໂຕ ຕໂຕ ປກ຺ຂິໂນ ນິລິນຕ຺ຖາຍ ອາຫາຣຕ຺ຖາຍຈ ນິຈ຺ຈໍ ສໂມສຣນ຺ຕິ. ເອວໍ ຣູປາທີສຸ ຉສຸຐາເນສຸ ຕໂຕ ຕໂຕ ຈິຕ຺ຕເຈຕສິກາ ຘມ຺ມາ ອາຣມ຺ມຓກຣຓຕ຺ຖາຍ ນິຈ຺ຈໍ ສໂມສຣນ຺ຕິ. ຕສ຺ມາ ຣູປາທີນິ ຉ ສໂມສຣຓຏ຺ເຐນ ອາຍຕນານິນາມ. ຕທຸຠຍານິ ປນ ເຕສໍ ຈິຕ຺ຕ ເຈຕສິການໍ ກາຣຓຏ຺ເຐນ ອາຍຕນານິນາມ. ຈກ຺ຂຸຈ ຕໍ ອາຍຕນຎ຺ຈາຕິ ຈກ຺ຂາຍຕນໍ. ເອວໍ ເສສານິ. ຕຕ຺ຖ ຈກ຺ຂຸໂສຕານິ ສຕ຺ຕານໍ ຫິຕກ຺ຣິຍາສຸ ພຫຸປກາຣຕ຺ຕາ ກາມຣູປ ພ຺ຍາປິຕຕ຺ຕາ ຈ ປາກຏານີຕິອາທິມ຺ຫິ ວຸຕ຺ຕານິ. ເຕຫິ ອາສນ຺ນຕ຺ຕາ ຕທນນ຺ຕຣໍ ຆານໍ. ຕໂຕ ຊິວ຺ຫາຕິ ອິມານິ ຈຕ຺ຕາຣິ ປເທສາຍຕນານິນາມ. ຕໂຕ ສກລກາຍພ຺ຍາປໂກ ກາໂຍ. ຕໂຕ ເຕສໍ ສພ຺ເພສໍ ໂຄຈຣວິສຍຄ຺ຄາຫກໍ ມໂນຕິ. ເສສານິ ປນ ເຕສໍ ວິສຍຕ຺ຕາ ຕທນຸກ຺ກເມເນວ ວຸຕ຺ຕານີຕິ.

ກສ຺ສຈິ ປນ ປຸຄ຺ຄລສ຺ສວາ ສຕ຺ຕສ຺ສວາ ມນຸສ຺ສສ຺ສວາ ເທວສ຺ສວາ ພ຺ຣຫ຺ມຸໂນວາ ວເສ ອວຕ຺ຕິຕ຺ວາ ອຕ຺ຕໂນເອວ ສຠາວໍ ຘາເຣນ຺ຕີຕິ ຘາຕຸໂຍ. ວິສຸໍ ວິສຸໍ ວວຕ຺ຖິຕສຠາວຕ຺ຕາວາ ຍຖາສຠາວໍ ຘາຣີຍນ຺ຕິ ສລ຺ລກ຺ຂີຍນ຺ຕິ ວວຕ຺ຖປີຍນ຺ຕີຕິ ຘາຕຸໂຍ. ອປິຈ, ນິສ຺ສຕ຺ຕ ນິຊ຺ຊີວຏ຺ເຐນ ຘາຕຸໂຍ. ຕຕ຺ຖ ນິສ຺ສຕ຺ຕຏ຺ເຐນາຕິ ສຕ຺ຕາກາຣາ ຠາວຏ຺ເຐນ ສຕ຺ຕກິຈ຺ຈາຠາວຏ຺ເຐນ. ໂກ ປເນຕ຺ຖ ສຕ຺ຕາກາໂຣ ກິໍ ສຕ຺ຕກິຈ຺ຈນ຺ຕິ. ຊີວໂຍໂຄ ສຕ຺ຕາກາໂຣ. ອີຫາຈ ພ຺ຍາປາໂຣ ຈ ສຕ຺ຕກິຈ຺ຈໍ. ນິຊ຺ຊີວຏ຺ເຐນາຕິ ເອກສ຺ມິໍ ຠເວ ຍາວ ນມຣຕິ. ຠວປຣໍປຣາຍວາ ຍາວ ສໍສາໂຣ ນ ນິວຕ຺ຕຕິ. ຕາວ ອຠິຊ຺ຊມາໂນ ອຈ຺ຉິຊ຺ຊມາໂນ ເອໂກວ ວຕ຺ຕຕີຕິ ເອວໍ ຄຫິຕສ຺ສ ຊີວສ຺ສ ອຠາວຏ຺ເຐນ. ຈກ຺ຂາທໂຍຈ ຘມ຺ມາ ສພ຺ພໂສ ສຕ຺ຕາກາຣຣຫິຕາ ສຕ຺ຕ ກິຈ຺ຈຣຫິຕາຈ ໂຫນ຺ຕິ. ນຈ ສຍໍ ຊີວານາມ ໂຫນ຺ຕິ. ນາປິ ຊີວໂຍຄາຕິ. ອິຕິ ນິສ຺ສຕ຺ຕຏ຺ເຐນ ນິຊ຺ຊີວຏ຺ເຐນຈເຕຘາຕຸໂຍນາມາຕິ. ເຕສໍ ປນ ທຏ຺ຐພ຺ພາກາໂຣ ອຏ຺ຐກຖາຍໍ ວຸຕ຺ໂຕ. ຍຖາຫ-ເຠຣິຕລໍ ວິຍ ຈກ຺ຂຸຘາຕຸ ທຏ຺ຐພ຺ພາ. ທຓ຺ໂຑ ວິຍ ຣູປຘາຕຸ. ສທ຺ໂທວິຍ ຈກ຺ຂຸວິຎ຺ຎາຓຘາຕຸ. ຕຖາ ອາທາສຕລໍ ວິຍ ຈກ຺ຂຸຘາຕຸ. ມຸຂໍ ວິຍ ຣູປຘາຕຸ. ມຸຂນິມິຕ຺ຕໍ ວິຍ ຈກ຺ຂຸວິຎ຺ຎາຓຘາຕຸ. ອຖວາ, ອຸຈ຺ຉຸຍນ຺ຕ ກິລຍນ຺ຕໍ ວິຍ ຈກ຺ຂຸຘາຕຸ. ຍນ຺ຕຈກ຺ກຍຏ຺ຐິ ວິຍ ຣູປຘາຕຸ. ອຸຈ຺ຉຸຣສ ເຕລານິ ວິຍ ຈກ຺ຂຸວິຎ຺ຎາຓຘາຕຸ. ຕຖາ ອຘຣາຣຓິ ວິຍ ຈກ຺ຂຸຘາຕຸ. ອຸຕ຺ຕຣາຣຓິ ວິຍ ຣູປຘາຕຸ. ອຄ຺ຄິ ວິຍ ຈກ຺ຂຸວິຎ຺ຎາຓຘາຕຸ. ເອສນໂຍ ໂສຕວິຎ຺ຎາຓຘາຕຸອາທີສຸ. ມໂນຘາຕຸ ປນ ຍຖາສມ຺ຠວໂຕ ຈກ຺ຂຸວິຎ຺ຎາຓຘາຕຸອາທີນໍ ປຸເຣຈຣານຸຈຣາ ວິຍ ທຏ຺ຐພ຺ພາ.

ຘມ຺ມຘາຕຸຍາ ເວທນາກ຺ຂນ຺ໂຘ ສລ຺ລມິວ ສູລມິວຈ ທຏ຺ຐພ຺ໂພ. ສຎ຺ຎາ ສງ຺ຂາຣກ຺ຂນ຺ຘາ ເວທນາສລ຺ລ ສູລໂຍຄາ ອາຕຸຣາ ວິຍ ທຏ຺ຐພ຺ພາ. ປຸຖຸຊ຺ຊນານໍວາ ສຎ຺ຎາ ອາສາ ທຸກ຺ຂຊນນໂຕ ຣິຕ຺ຕມຸຏ຺ຐິ ວິຍ ອຍຖາຠຸຈ຺ຈນິມິຕ຺ຕຄາຫໂຕ ວນມິໂຄວິຍ. ສງ຺ຂາຣາ ປຏິສນ຺ຘິຍໍ ປກ຺ຂິປນໂຕ ອງ຺ຄາຣກາສຸຍໍ ຂິປນປຸຣິສາ ວິຍ. ຊາຕິທຸກ຺ຂານຸພນ຺ຘໂຕ ຣາຊປຸຣິສານຸພນ຺ຘໂຈໂຣ ວິຍ. ສພ຺ພານຕ຺ຖາວຫສ຺ສ ຂນ຺ຘສນ຺ຕານສ຺ສ ເຫຕຸໂຕ ວິສຣຸກ຺ຂພີຊານິ ວິຍ. ຣູປໍ ນານາວິຘຸປທ຺ທວນິມິຕ຺ຕໂຕ ຂຸຣ ຈກ຺ກໍວິຍ ທຏ຺ຐພ຺ພໍ. ອສງ຺ຂຕາປິຘາຕຸ ອມຕໂຕ ສນ຺ຕໂຕ ເຂມໂຕ ຈ ທຏ຺ຐພ຺ພາ. ກສ຺ມາ, ສພ຺ພານຕ຺ຖປຏິປກ຺ຂຠູຕຕ຺ຕາ. ມໂນວິຎ຺ຎາຓຘາຕຸ ຄຫິຕາຣມ຺ມຓໍ ມຸຎ຺ຈິຕ຺ວາປິ ອຎ຺ຎໍ ຄເຫຕ຺ວາ ປວຕ຺ຕນໂຕ ວນມກ຺ກໂຏ ວິຍ, ທຸທ຺ທມນໂຕ ອສ຺ສຂລຸງ຺ໂຄ ວິຍ, ຍຕ຺ຖ ກາມນິປາຕິໂຕ ເວຫາສໍ ຂິຕ຺ຕທຓ຺ໂຑ ວິຍ, ໂລຠໂທສາທິ ນານາປ຺ປກາຣ ກິເລສໂຍຄໂຕ ຣງ຺ຄນໂຏ ວິຍ ທຏ຺ຐພ຺ພາຕິ. ອຣິຍສຈ຺ຈານີຕິ ເອຕ຺ຖ ສນ຺ຕສ຺ສ ຘມ຺ມສ຺ສ ຠາໂວ ສຈ຺ຈໍ. ສນ຺ຕສ຺ສາຕິ ຠູຕສ຺ສ ຕຖສ຺ສ ອວິປຣີຕສ຺ສ. ອປິຈ, ເກນຏ຺ເຐນ ສຈ຺ຈນ຺ຕິ. ຕຖຏ຺ເຐນ ອວິຕຖຏ຺ເຐນ ອນຎ຺ຎຖຏ຺ເຐນ. ຍຎ຺ຫິ ຈກ຺ຂຸສ຺ສ ທຸກ຺ຂຕ຺ຕໍ, ຕໍ ຕຖໍ ໂຫຕິ ອວິຕຖໍ ອນຎ຺ຎຖໍ. ທຸກ຺ຂທຸກ຺ຂ ສງ຺ຂາຣທຸກ຺ຂ ວິປຣິຓາມທຸກ຺ຂ ສງ຺ຂາເຕຫິ ຕີຫິ ທຸກ຺ເຂຫິ ຕໍ ສມງ຺ຄິປຸຄ຺ຄລສ຺ສ ອຠິຓ຺ຫປີຬນໂຕ. ຕຕ຺ຖ ສງ຺ຂາຣທຸກ຺ຂໍ ນາມ ກມ຺ມຊານໍ ອຸປ຺ປຕ຺ຕິຍາ ປເຄວ ຕໍຕໍກມ຺ມາ ຠິສງ຺ຂຣຓທຸກ຺ຂໍ. ຕຖາ ອຸຕຸຊາທີນໍ ອຸປ຺ປຕ຺ຕິຍາ ປເຄວ ຕໍຕໍ ອຸຕຸຈິຕ຺ຕາຫາຣານໍ ອຠິສງ຺ຂຣຓທຸກ຺ຂໍ.

ຈກ຺ຂຸ ຫິ ນາມ ຣູປິພ຺ຣຫ຺ມານໍປິ ປຸຣິມຠເວ ຌານຠາວນາ ສງ຺ຂາຕໍ ມຫນ຺ຕໍ ກມ຺ມາຠິສງ຺ຂຣຓ ທຸກ຺ຂໍ ອນຸຠວນ຺ຕານໍເຍວ ອຸປ຺ປຊ຺ຊຕິ. ໂນ ອຎ຺ຎຖາ. ກາມສຕ຺ຕານໍ ປນ ປຸຣິມຠເວ ກມ຺ມສງ຺ຂາຣທຸກ຺ຂໍ ອນຸຠວິຕ຺ວາ ອຸປ຺ປນ຺ນໍປິ ຍາວຊີວໍ ປວຕ຺ຕິຍາ ອາຫາຣາທິສງ຺ຂາຣທຸກ຺ຂຎ຺ຈ ປຏິຊຄ຺ຄນ ທຸກ຺ຂຎ຺ຈ ອນຸຠວນ຺ຕານຎ຺ເຎວ ປວຕ຺ຕຕິ, ໂນ ອຎ຺ຎຖາ. ປວຕ຺ຕມານຎ຺ຈ ປຈ຺ຈຍເວກລ຺ເລວາ ຊາເຕ ອນ຺ຕຣາເຍວາ ອາຄເຕ ຍທາກທາຈິ ຠິຊ຺ຊຕິ. ມຣຓກາລໍ ປຕ຺ວາ ປນ ເອກນ຺ເຕນ ຠິຊ຺ຊຕິເຍວ. ຕສ຺ມາ ຕໍ ອສ຺ສາເທຕ຺ວາ ຕທຕ຺ຖາຍ ກມ຺ມໍວາ ອາຫາຣາທິປຈ຺ຈຍໍວາ ປຏິຊຄ຺ຄນໍ ວາ ສງ຺ຂໂຣນ຺ຕານໍ ອນມຕຄ຺ເຄ ສໍສາເຣ ສງ຺ຂາຣທຸກ຺ຂສ຺ສ ປຣິຍນ຺ໂຕນາມ ນຕ຺ຖິ. ອິຕິ ສພ຺ພໍ ຈກ຺ຂຸ ອປຣິຍນ຺ເຕນ ສງ຺ຂາຣທຸກ຺ເຂນ ປຸຄ຺ຄລໍ ອຠິຓ຺ຫໍ ປີເຬຕິເຍວ. ອິທມສ຺ສ ສງ຺ຂາຣທຸກ຺ຂໍ. ອິທໍ ຈກ຺ຂຸ ນາມ ປຈ຺ຈຍເວກລ຺ເລວາ ຊາເຕ ອນ຺ຕຣາເຍວາ ອາຄເຕ ຍທາ ກທາຈິ ຠິຊ຺ຊນຊາຕິກໍ. ຕສ຺ມາ ຕສ຺ສ ຠິຊ຺ຊນຠເຍນ ປເຄວ ປຈ຺ຈຍ ສມ຺ປາທນທຸກ຺ຂໍ ຣກ຺ຂາວຣຓຄຸຕ຺ຕິສໍວິຘານທຸກ຺ຂໍ ຠິຊ຺ຊນນິມິຕ຺ຕານິ ທິສ຺ວາ ວາ ຠິຊ຺ຊມາເນວາ ຠິນ຺ເນວາ ໂສຈນປຣິເທວນາທິທຸກ຺ຂຎ຺ຈ ວິປຣິຓາມ ທຸກ຺ຂໍນາມ. ອິຕິ ສພ຺ພໍ ຈກ຺ຂຸ ອປຣິຍນ຺ເຕນ ວິປຣິຓາມທຸກ຺ເຂນ ປຸຄ຺ຄລໍ ອຠິຓ຺ຫໍ ປີເຬຕິເຍວ. ອິທມສ຺ສ ວິປຣິຓາມທຸກ຺ຂໍ. ທຸກ຺ຂທຸກ຺ຂໍ ປນ ຕທຸຠເຍນ ທຸກ຺ເຂນ ສເຫວ ສິຊ຺ຌຕິ. ເອວໍ ຈກ຺ຂຸ ທຸກ຺ຂທຸກ຺ຂ ສງ຺ຂາຣ ທຸກ຺ຂ ວິປຣິຓາມ ທຸກ຺ຂສງ຺ຂາເຕຫິ ຕີຫິ ທຸກ຺ເຂຫິ ຕໍ ສມງ຺ຄິປຸຄ຺ຄລໍ ອຠິຓ຺ຫໍ ປີເຬຕິເຍວ. ຍຎ຺ຈ ຕສ຺ສ ຕຖາປີຬນໍ, ຕໍ ຕຖໍ ໂຫຕິ, ອວິຕຖໍ, ອນຎ຺ຎຖໍ. ຕສ຺ມາ ຈກ຺ຂຸ ທຸກ຺ຂສຈ຺ຈໍນາມ. ເອສ ນໂຍ ໂສຕາທີສຸ ເຕຠູມກຘມ຺ເມສຸ.

ເສສສຈ຺ເຈສຸປິ ຍໍ ໂລຠສ຺ເສວ ທຸກ຺ຂສມຸທຍຕ຺ຕໍ. ຍໍ ນິພ຺ພານສ຺ເສວ ທຸກ຺ຂນິໂຣຘຕ຺ຕໍ. ຍໍ ອຏ຺ຐງ຺ຄິກມຄ຺ຄສ຺ເສວ ທຸກ຺ຂນິໂຣຘມຄ຺ຄຕ຺ຕໍ ຕໍ ກຖໍ ໂຫຕີຕິອາທິນາ ວຕ຺ຕພ຺ພໍ. ຍາວຈ ໂລໂຠ ນ ປຫິຍ຺ຍຕິ. ຕາວ ຈກ຺ຂາທີນິ ອສ຺ສາເທຕິເຍວ. ຍາວຈ ຕານິ ອສ຺ສາເທຕິ. ຕາວ ເຕສໍ ປວຕ຺ຕິຍາ ກມ຺ມາທີນິ ສງ຺ຂໂຣນ຺ຕິເຍວ. ຍາວຈ ກມ຺ມາທີນິ ສງ຺ຂໂຣນ຺ຕິ. ຕາວ ຈກ຺ຂາທີນິ ປວຕ຺ຕນ຺ຕິເຍວ. ຍາວຈຕານິ ປວຕ຺ຕນ຺ຕິ. ຕາວ ເຕສໍ ວຸຕ຺ຕປ຺ປກາເຣຫິ ສງ຺ຂາຣ ທຸກ຺ຂາທີຫິ ນມຸຈ຺ຈຕິເຍວ. ຕສ຺ມາ ໂລຠສ຺ສ ທຸກ຺ຂສມຸທຍຕ຺ຕໍ ຕຖໍ ໂຫຕິ. ຈກ຺ຂາທີສຸຈ ປວຕ຺ຕມາເນສຸ ວຸຕ຺ຕປ຺ປກາຣໍ ສພ຺ພໍ ທຸກ຺ຂໍ ອາຄຈ຺ຉຕິເຍວ. ອປວຕ຺ຕມາເນສຸ ນາຄຈ຺ຉຕິ. ຕສ຺ມາ ເຕສໍ ປວຕ຺ຕິນິໂຣຘຠູຕສ຺ສ ນິພ຺ພານສ຺ເສວ ທຸກ຺ຂນິໂຣຘຕ຺ຕໍ ຕຖໍ ໂຫຕິ. ຕຖາ ໂລຠປຫານໂຕ ອຎ຺ໂຎ ທຸກ຺ຂມຸຕ຺ຕິມຄ຺ໂຄນາມ ນຕ຺ຖິ. ອຏ຺ຐງ຺ຄິກມຄ຺ໂຄຈ ອຸປ຺ປຊ຺ຊ ມາໂນ ເອກນ຺ເຕນ ຕໍ ປຊຫຕິ. ຕສ຺ມາ ອຏ຺ຐງ຺ຄິກມຄ຺ຄສ຺ເສວ ທຸກ຺ຂນິໂຣຘມຄ຺ຄຕ຺ຕໍ ຕຖໍ ໂຫຕິ, ອວິຕຖໍ, ອນຎ຺ຎຖນ຺ຕິ.

ເອວໍສນ຺ເຕປິ ສຈ຺ຈສທ຺ໂທ ປຣິຍາຍ ສຈ຺ເຈສຸປິ ວຕ຺ຕຕີຕິ ວຸຕ຺ຕໍ ຈຕ຺ຕາຣິອຣິຍສຈ຺ຈານີຕິ. ຕຕ຺ຖ ທຸກ຺ຂສຈ຺ເຈ ຕາວ ສກ຺ກາຍປຣິຍາ ປນ຺ນາ ອຊ຺ຌຕ຺ຕຘມ຺ມາເອວ ອຣິຍສຈ຺ຈໍນາມ. ເຕເຍວ ຫິ ອສ຺ມິມານສ຺ສ ອຘິຏ຺ຐານຠູຕາ ຫຸຕ຺ວາ ຍາວຕໍ ມານໍ ນ ສມູຫນຕິ. ຕາວ ທຸກ຺ຂກິຈ຺ຈໍ ກໂຣນ຺ຕິ. ທຸກ຺ຂປຣິຎ຺ຎາຈນາມ ຍາວເທວ ອສ຺ມິມານສມຸຄ຺ຆາຕາຍ ໂຫຕິ. ອສ຺ມິມາໂນຈ ເຕສ຺ເວວ ອຊ຺ຌຕ຺ຕຘມ຺ເມສຸ ນິວິສຕີຕິ ເຕສຸ ປຣິຎ຺ຎາເຕສຸ ປຣິຎ຺ຎາກິຈ຺ຈໍ ສິທ຺ຘເມວ ໂຫຕີຕິ. ຕພ຺ພິປຣີ ເຕນ ປນ ອນິນ຺ທ຺ຣິຍ ພທ຺ຘຘມ຺ມາ ມຄ຺ຄຜລຘມ຺ມາຈ ອຏ຺ຐງ຺ຄິກວຊ຺ຊາ ອຸທຍພ຺ພຍ ປີຬນໂຕ ສງ຺ຂາຣທຸກ຺ຂວິປຣິຓາມທຸກ຺ເຂຫິຈ ອປຣິມຸຕ຺ຕຕ຺ຕາ ທຸກ຺ຂສຈ຺ຈໍ ນາມ. ສມຸທຍສຈ຺ເຈ ເອໂກ ໂລໂຠເຍວ ອຣິຍສຈ຺ຈໍນາມ. ໂສຫິ ອຕ຺ຕສມງ຺ຄິໂນ ສຕ຺ເຕ ອຕ຺ຕນິຈ ອາຣມ຺ມຓຘມ຺ເມສຸຈ ອສ຺ສາທໍ ຊນຍິຕ຺ວາ ນິຈ຺ຈໍ ວຏ຺ຏທຸກ຺ຂໂຕ ອນຸກ຺ກຓ຺ຐມາເນ ກໂຣຕີຕິ ເຕສໍ ໂລຠສທິໂສ ອຎ຺ໂຎ ຎາຕິວາ ມິຕ຺ໂຕວາ ສຫາໂຍວາ ອຕ຺ຕາວາ ອຕ຺ຕນິຍໍວາ ນຕ຺ຖິວິຍ ຂາຍຕິ. ຕສ຺ມາ ຕໍສທິໂສ ອຎ຺ໂຎ ໂກຈິ ວຏ຺ຏທຸກ຺ຂສໍວິຘາຍໂກນາມ ນຕ຺ຖິ. ຕຎ຺ຈ ປຊຫິຕຸໍ ສກ຺ໂກນ຺ຕສ຺ສ ອຎ຺ໂຎ ທຸຊ຺ຊໂຫນາມ ນຕ຺ຖິ. ອວເສສາປນ ສພ຺ເພປິ ສາສວາ ກຸສລາກຸສລຘມ຺ມາ ສມຸທຍສຈ຺ຈໍນາມ.

ເອຕ຺ຖ ສິຍາ, ນນຸ ອວິຊ຺ຊາປິ ສພ຺ພສ຺ສ ວຏ຺ຏທຸກ຺ຂສ຺ສ ມູລຠາເວນ ວຸຕ຺ຕາຕິ ສາປິ ສມຸທເຍ ອຣິຍສຈ຺ເຈເອວ ວຕ຺ຕພ຺ພາຕິ. ວຸຈ຺ຈເຕ, ຍຖາຫິ ເອໂກ ເຉໂກ ອຸຍ຺ຍານປາໂລ ສມ຺ປຕ຺ຕິຍຸຕ຺ຕໍ ຠູມິ ຠາຄໍ ລຠິຕ຺ວາ ອຕ຺ຕໂນ ຎາຓພເລນ ຠູມິຠາຄຎ຺ຈ ນານາພີຊານິຈ ອຠິສງ຺ຂຣິຕ຺ວາ ນນ຺ທນສທິສໍ ອຸຍ຺ຍານໍ ມາເປສິ. ຕຕ຺ຖ ຠູມິ ອຸຍ຺ຍານ ປາລສ຺ສ ພີຊານໍ ຣຸກ຺ຂານຎ຺ຈ ປຕິຏ຺ຐານກິຈ຺ຈໍ ສາເຘຕິ. ພີຊານິຈ ອງ຺ກຸຣຸປ຺ປາທນກິຈ຺ຈໍ ສາເຘນ຺ຕິ, ອຸຍ຺ຍານປາໂລເຍວ ປນ ສພ຺ພກິຈ຺ຈານິ ສາເຘຕິ. ໂສ ຫິ ຠູມິຍໍ ພີເຊສຸ ຣຸກ຺ເຂສຸຈ ຍໍຍໍ ກຕ຺ຕພ຺ພໍ ໂຫຕິ. ຕໍ ສພ຺ພໍ ກໂຣຕິ. ມເມຕນ຺ຕິ ປຣິຄ຺ຄຓ຺ຫາຕິ ຣກ຺ຂຕິ. ຕໂຕ ອຸປ຺ປນ຺ເນ ໂຠເຄ ຠຸຎ຺ຊຕິ. ຕສ຺ມາ ໂກ ອິທໍ ມາເປສິ, ກສ຺ເສທໍ ອຸຍ຺ຍານນ຺ຕິ ວຸຕ຺ເຕ ອຸຍ຺ຍານປາໂລເຍວ ມາເປສິ. ຕສ຺ເສທໍ ອຸຍ຺ຍານໍ ອິຈ຺ເຈວ ວຸຈ຺ຈຕິ. ນ ຠູມິໍ ມາເປສິ. ພີຊານິ ມາເປນ຺ຕິ. ເຕສໍ ອິທໍ ອຸຍ຺ຍານນ຺ຕິ ວຸຈ຺ຈຕິ. ກາ ປນ ອຸຍ຺ຍານສມ຺ປຕ຺ຕິຍາ ປຈ຺ຈຍປຣໍປຣາຕິ ວຸຕ຺ເຕ ປນ ຠູມິເອວ ອາທິໂຕ ວຕ຺ຕພ຺ພາ. ນ ອຸຍ຺ຍານປາໂລ. ນຈ ພີຊານີຕິ. ເອວໍ ສມ຺ປທມິທໍ ທຏ຺ຐພ຺ພໍ. ປຏິຈ຺ຈສມຸປ຺ປາທ ນຍຎ຺ຫິ ປຕ຺ວາ ປຈ຺ຈຍປຣໍ ປຣວເສນ ທຸກ຺ຂ ຘມ຺ມານໍ ປວຕ຺ຕິ ນິວຕ຺ຕິວິຘາເນ ອວິຊ຺ຊາເອວ ອາທິ ປຠວປຘານຠູຕາ ໂຫຕິ, ນ ຕຓ຺ຫາ. ສຈ຺ຈເທສນາຍໍ ປນ ເຕສໍ ນິພ຺ພຕ຺ຕກຘມ຺ມວິຘາເນ ຕຓ຺ຫາເອວ ສາມິເຊຏ຺ຐກ ປຘານຠູຕາ ໂຫຕິ. ນ ອວິຊ຺ຊາຕິ ນຕ຺ຖິ ສມຸທຍາຣິຍສຈ຺ຈຠາເວ ອວິຊ຺ຊາຍ ໂອກາໂສຕິ ທຏ຺ຐພ຺ໂພ. ກິເລສານໍ ຕທງ຺ຄນິໂຣຘວິກ຺ຂມ຺ຠນ ນິໂຣຘາ ນິໂຣຘສຈ຺ຈໍນາມ. ນິພ຺ພານໍ ນິໂຣຘາຣິຍສຈ຺ຈໍນາມ. ຉສຸ ໂລກິຍວິສຸທ຺ຘີສຸ ມຄ຺ຄງ຺ຄານິ ມຄ຺ຄສຈ຺ຈໍ ນາມ. ອຏ຺ຐງ຺ຄິໂກ ໂລກຸຕ຺ຕຣມຄ຺ໂຄເອວ ມຄ຺ຄອຣິຍສຈ຺ຈໍນາມາຕິ.

ອຣິຍສທ຺ໂທ ເຈຕ຺ຖ ກຕ຺ຖຈິ ກທາຈິ ເກສຎ຺ຈິ ກຸໂຕຈິ ກຖຎ຺ຈິ ອວິຕຖຠາເວນ ອຸຕ຺ຕມຕ຺ຖວາຈໂກຕິ. ວິຠາວນິຍໍ ປນ ອຏ຺ຐກຖາຍໍ ວຸຕ຺ຕນເຍນ ສຈ຺ຈສທ຺ທສ຺ສ ອຕ຺ໂຖ ວິຠາວິໂຕ ທຸກ຺ຂໍອຣິຍ ສຈ຺ຈນ຺ຕິ ເອຕ຺ຖ ປີຬນຏ຺ໂຐ, ສງ຺ຂຕຏ຺ໂຐ, ສນ຺ຕາປຏ຺ໂຐ, ວິປຣິຓາມຏ຺ໂຐຕິ ອິເມຫິ ຈຕູຫິ ອຕ຺ເຖຫິ ຈກ຺ຂາທິກສ຺ສ ເອເກກສ຺ສ ເຕຠູມກຘມ຺ມສ຺ສ ທຸກ຺ຂສຈ຺ຈຕາ ເວທິຕພ຺ພາ. ຕຕ຺ຖ ສງ຺ຂຕຏ຺ຐ ວິປຣິຓາມຏ຺ຐາ ປຸພ຺ເພ ສງ຺ຂາຣ ທຸກ຺ຂວິປຣິຓາມທຸກ຺ເຂສຸ ວຸຕ຺ຕນຍາເອວ. ປທຕ຺ຖໂຕປນ ປຈ຺ຈເຍຫິ ສງ຺ຂຣີຍຕີຕິ ສງ຺ຂໂຕ. ປເຄວ ກມ຺ມາທິປຈ຺ຈຍາຠິສງ຺ຂຣຓທຸກ຺ເຂນ ວິນາ ນ ອຸປ຺ປຊ຺ຊຕິ, ນປວຕ຺ຕຕີຕິ ວຸຕ຺ຕໍ ໂຫຕິ. ວິຣູໂປ ຫຸຕ຺ວາ ປຣິຓາໂມ ວິປຣິຓາໂມ. ປຣິຫານິເຈວ ປຣິເຠໂທຈ. ປີຬນຏ຺ໂຐຕິ ເອຕ຺ຖ ປີຬິຕພ຺ພນ຺ຕິ ປີຬນໍ. ປີເຬຕີຕິ ປີຬນໍ. ປີຬີຍເຕ ປີຬນໍ. ອຕ຺ໂຖຕິ ສຠາໂວ. ປີຬນໍ ອຕ຺ໂຖ ຍສ຺ສາຕິ ວິຄ຺ຄໂຫ. ຕຕ຺ຖ ຍຖາ ເອກິສ຺ສາ ທຸຄ຺ຄຕິຕ຺ຖິຍາ ກຸຈ຺ຉິມ຺ຫິ ປຸຕ຺ໂຕ ອຸປ຺ປຊ຺ຊຕິ. ໂສຈ ນານາໂຣເຄຫິ ສຍໍ ນິຈ຺ຈໍ ປີຬິໂຕ ຫຸຕ຺ວາ ປຏິຊຄ຺ຄນທຸກ຺ເຂຫິ ມາຕຣຎ຺ຈ ນິຈ຺ຈໍ ປີເຬຕິເຍວ. ຍຎ຺ຈ ຕສ຺ສາ ກຸຈ຺ຉິມ຺ຫິ ຕາທິສສ຺ສ ປຸຕ຺ຕສ຺ສ ອຸປ຺ປຊ຺ຊນໍ, ຕຎ຺ຈ ຕສ຺ສາ ອິຕ຺ຖິຍາ ປີຬນກິຈ຺ຈເມວ ໂຫຕິ. ເອວເມວໍ ເຍ ຈກ຺ຂາທໂຍ ຘມ຺ມາ ຊຣາມຣເຓຫິ ນິຈ຺ຈໍ ປີຬີຍນ຺ຕິ, ເຕ ປຏິຊຄ຺ຄນທຸກ຺ເຂຫິ ຕໍ ສມງ຺ຄີນໍ ປຸຄ຺ຄລໍ ນິຈ຺ຈໍ ປີເຬນ຺ຕິເຍວ. ຍຎ຺ຈ ຕສ຺ສ ສນ຺ຕາເນ ເຕສໍ ອຸປ຺ປຊ຺ຊນໍ, ຕຎ຺ຈ ຕສ຺ສ ປີຬນກິຈ຺ຈເມວາຕິ. ຍຖາຫໂຍ ຠິກ຺ຂເວ ຈກ຺ຂຸສ຺ສ ອຸປ຺ປາໂທ ຐິຕິ ອຠິນິພ຺ພຕ຺ຕິ ປາຕຸຠາໂວ. ທຸກ຺ຂສ຺ເສໂສ ອຸປ຺ປາໂທ. ໂຣຄານໍ ຐິຕິ ຊຣາມຣຓສ຺ສ ປາຕຸຠາໂວ. ໂຍ ຠິກ຺ຂເວ ໂສຕສ຺ສ ຆານສ຺ສ ຊິວ຺ຫາຍ ກາຍສ຺ສ ມນສ຺ສ ອຸປ຺ປາໂທຕິອາທິ.

ສນ຺ຕາປຏ຺ໂຐຕິ ຣາຄຄ຺ຄິອາທີຫິ ເອກາທສຫິ ອຄ຺ຄີຫິ ຠຸສໍ ປຣິທຍ຺ຫນຏ຺ໂຐ. ຍຖາຫ –

ຈກ຺ຂຸໍ ອາທິຕ຺ຕໍ. ເກນ ອາທິຕ຺ຕໍ. ຣາຄຄ຺ຄິນາ ອາທິຕ຺ຕໍ. ໂທສຄ຺ຄິນາ. ໂມຫຄ຺ຄິນາ. ຊາຕິຍາ. ຊຣາຍ. ມຣເຓນ. ໂສເກນ. ປຣິເທເວນ. ທຸກ຺ເຂນ. ໂທມນສ຺ເສນ. ອຸປາຍາເສນ ອາທິຕ຺ຕນ຺ຕິ ວທາມິ. ໂສຕໍ ອາທິຕ຺ຕໍ. ຆານໍ ອາທິຕ຺ຕໍ. ຊິວ຺ຫາ ອາທິຕ຺ຕາ. ກາໂຍ ອາທິຕ຺ໂຕ. ມໂນ ອາທິຕ຺ໂຕຕິ.

ອາທິປນໍ ສນ຺ຕາປນໍ ປຣິທຍ຺ຫນນ຺ຕິ ອິຘ ອຕ຺ຖໂຕ ເອກນ຺ຕິ. ເອຕ຺ຖ ສິຍາ, ອຣິຍມຄ຺ໂຄປິ ຈິຣກາລໍ ປາຣມິຕາຠິສງ຺ຂຣຓທຸກ຺ເຂນ ອນ຺ຕິມຠເວຈ ສີລາທິວິສຸທ຺ຘິຠາວນາຠິສງ຺ຂຣຓທຸກ຺ເຂນ ປຸຄ຺ຄລໍ ສຸສໍ ປີເຬຕິເຍວ. ຕຖາ ວິປຣິຓາມຘມ຺ໂມຈ. ຕສ຺ມາ ໂສປິ ປິຬນາທິອຕ຺ເຖນ ທຸກ຺ຂສຈ຺ຈສງ຺ຄໂຫ ສິຍາຕິ.ນ. ສພ຺ພທຸກ຺ຂສນ຺ຕິ ວໍຫຕ຺ຕາ. ໂສ ຫິ ວຸຕ຺ຕປ຺ປກາຣໍ ອຠິສງ຺ຂຣຓທຸກ຺ຂໍ ປຣິປຸຓ຺ຓໍ ອນຸຠູຕສ຺ສ ປຸຄ຺ຄລສ຺ສ ສກິໍ ອຸປ຺ປຊ຺ຊມາໂນ ສພ຺ພໍ ກິເລສຊາຕໍ ເຂເປນ຺ໂຕ ອຸປ຺ປຊ຺ຊຕິ. ນິຣຸຊ຺ຌມາໂນຈ ສພ຺ພໍ ອາຍຕິໍ ອນມຕຄ຺ເຄ ສໍສາເຣ ວຏ຺ຏທຸກ຺ຂໍ ວູປສເມນ຺ໂຕ ນິຣຸຊ຺ຌຕິ. ວູປສນ຺ຕໍຈ ອນາຄຕ ທຸກ຺ຂໍ ອຸປາທາຍ ວຸຕ຺ຕປ຺ປກາຣໍ ອຠິສງ຺ຂຣຓທຸກ຺ຂໍ ຄຓນຸປຄໍ ນໂຫຕິ. ຠິຊ຺ຊນ຺ໂຕຈ ອນຸຕ຺ຕຣໍ ວິມຸຕ຺ຕິສຸຂໍ ທຕ຺ວາວ ຠິຊ຺ຊຕິ. ຕສ຺ມາ ຕສ຺ສ ວິປຣິຓາມປຈ຺ຈຍາປິ ປຸຄ຺ຄລສ຺ສ ກາຈິ ຫານິນາມ ນຕ຺ຖີຕິ ນ ໂສ ທຸກ຺ຂສຈ຺ຈສງ຺ຄໂຫຕິ. ໂລກິຍຘມ຺ມາ ປນ ອຸປ຺ປຊ຺ຊມານາ ປວຕ຺ຕ ມານາຈ ປຸພ຺ເພ ວຸຕ຺ຕປກາເຣຫິ ສງ຺ຂາຣທຸກ຺ເຂຫິ ຠຸສໍ ປີເຬຕ຺ວາ ເອວ ອຸປ຺ປຊ຺ຊນ຺ຕິ ປວຕ຺ຕນ຺ຕິຈ. ນິຣຸຊ຺ຌມານາ ມຫນ຺ຕໍ ປຣິຬາຫທຸກ຺ຂໍ ຊເນຕ຺ວາ ອປຣິຍນ຺ເຕ ຂຸຣຈກ຺ກສທິເສ ວຏ຺ຏທຸກ຺ຂຍນ຺ເຕ ປຸຄ຺ຄລໍ ໂຍເຊນ຺ຕາວ ນິຣຸຊ຺ຌນ຺ຕິ. ຕສ຺ມາ ເຕເອວ ປີຬນາທິອຕ຺ເຖຫິ ເອກນ຺ຕທຸກ຺ຂາ ໂຫນ຺ຕີຕິ. ເອເຕນ ນິພ຺ພານສ຺ສປິ ສມ຺ປາປກປຈ຺ຈຍາຠິສງ຺ຂຣຓເລສໍ ຄເຫຕ຺ວາ ທຸກ຺ຂສຈ຺ຈຕ຺ຕປສງ຺ໂຄ ນິວຕ຺ຕິໂຕ ໂຫຕີຕິ.

ທຸກ຺ຂສມຸທໂຍ ອຣິຍສຈ຺ຈນ຺ຕິ ເອຕ຺ຖ ຠວາຠວສງ຺ຂາຕໍ ທຸກ຺ຂກ຺ຂນ຺ຘໍ ສມຸເທຕິ. ປຸນປ຺ປຸນໍ ອພ຺ໂພຈ຺ຉິນ຺ນໍ ກຕ຺ວາ ອຸທຍຕິ ອຸຏ຺ຐາເປຕິ ວຑ຺ເຒຕິວາຕິ ທຸກ຺ຂສມຸທໂຍ, ອາຍູຫນຏ຺ໂຐ, ນິທານຏ຺ໂຐ, ສໍໂຍຄຏ຺ໂຐ, ປລິໂພຘຏ຺ໂຐຕິ ຈຕູຫິ ອຕ຺ເຖຫິ ໂລຠສ຺ສ ທຸກ຺ຂສມຸທຍຕາ ເວທິຕພ຺ພາ. ຕຕ຺ຖ ອາຍູຫນຏ຺ໂຐຕິ ຠວາຠວ ສງ຺ຂາຕສ຺ສ ເອເກກສ຺ມິໍ ຠເວປິ ວຕ຺ຖຸກາມປຏິສໍຍຸຕ຺ຕສ຺ສ ທຸກ຺ຂກ຺ຂນ຺ຘສ຺ສ ຠິຍ຺ໂຍ ປຣິພ຺ຍູຫນຏ຺ໂຐ ຣາສິກຣຓຏ຺ໂຐ ນິທານຏ຺ໂຐຕິ ຕເທວ ນິຣນ຺ຕຣໍ ກຕ຺ວາ ອນຸປ຺ປທານຏ຺ໂຐ ນິຍ຺ຍາຕນຏ຺ໂຐຕິ ວຸຕ຺ຕໍ ໂຫຕິ. ສໍໂຍຄຏ຺ໂຐຕິ ທຸກ຺ຂກ຺ຂນ຺ຘສ຺ມິໍເອວ ທຬ຺ຫໍ ພນ຺ຘນຏ຺ໂຐ. ປລິໂພຘຏ຺ໂຐຕິ ຕໂຕ ຕສ຺ສ ຕສ຺ສ ມຸຈ຺ຈນຸປາຍສ຺ສ ນີວາຣຓ ວເສນ ປລິພຸນ຺ຘນຏ຺ໂຐ ອຸປຣຸນ຺ຘນຏ຺ໂຐຕິ ອຕ຺ໂຖ. ທຸກ຺ຂນິໂຣໂຘ ອຣິຍສຈ຺ຈນ຺ຕິ ເອຕ຺ຖ ວຏ຺ຏທຸກ຺ຂສ຺ສ ນິຣຸຊ຺ຌນໍ ອນຸປ຺ປາທ ຘມ຺ມຕາປຕ຺ຕິ ວເສນ ຂິຍ຺ຍານໍ ທຸກ຺ຂນິໂຣໂຘ. ທຸກ຺ຂໍ ວາ ນິຣຸຊ຺ຌຕິ ນປວຕ຺ຕຕິ ເອຕສ຺ມິນ຺ຕິ ທຸກ຺ຂນິໂຣໂຘ. ນິສ຺ສຣຓຏ຺ໂຐ ວິເວກຏ຺ໂຐ, ອສງ຺ຂຕຏ຺ໂຐ, ອມຕຏ຺ໂຐຕິ ຈຕູຫິ ອຕ຺ເຖຫິ ນິພ຺ພານສ຺ສ ທຸກ຺ຂນິໂຣຘຕາ ເວທິຕພ຺ພາ. ຕຕ຺ຖ ນິສ຺ສຣຓຏ຺ໂຐຕິ ນິສ຺ສຣຓ ວິມຸຕ຺ຕິຍາ ວິມຸຈ຺ຈນຏ຺ໂຐ. ວິເວກຏ຺ໂຐຕິ ວຏ຺ຏທຸກ຺ຂປລິໂພຘໂຕ ວິວິຈ຺ຈນຏ຺ໂຐ. ອສງ຺ຂຕຏ຺ໂຐຕິ ສງ຺ຂາຣທຸກ຺ຂສ຺ສ ອຠາວຏ຺ໂຐ. ອມຕຏ຺ໂຐຕິ ມຣຓທຸກ຺ຂສ຺ສ ອຠາວຏ຺ໂຐຕິ.

ທຸກ຺ຂນິໂຣຘຄາມິນິປຏິປທາຕິ ເອຕ຺ຖ ທຸກ຺ຂນິໂຣຘໍ ຄເມຕິ ສມ຺ປາເປຕີຕິ ທຸກ຺ຂນິໂຣຘຄາມິນີ. ອຕ຺ຕໂນ ສນ຺ຕາເນ ປຏິລາຠກຣຓ ວເສນ ປຏິປຊ຺ຊິຕພ຺ພາຕິ ປຏິປທາ. ທຸກ຺ຂນິໂຣຘຄາມິນີຈ ສາ ປຏິປທາ ຈາຕິ ວິຄ຺ຄໂຫ. ນິຍ຺ຍານຏ຺ໂຐ, ເຫຕ຺ວຏ຺ໂຐ, ທສ຺ສນຏ຺ໂຐ, ອຘິປເຕຍ຺ຍຏ຺ໂຐຕິ ຈຕູຫິ ອຕ຺ເຖຫິ ອຏ຺ຐງ຺ຄິກມຄ຺ຄສ຺ສ ທຸກ຺ຂນິໂຣຘມຄ຺ຄຕາ ເວທິຕພ຺ພາ. ຕຕ຺ຖ ນິຍ຺ຍານຏ຺ໂຐຕິ ອວິຊ຺ຊາປຈ຺ຈຍາ ສງ຺ຂາຣາຕິອາທິກໍ ວຏ຺ຏໂສຕໍ ປຏິນິວຕ຺ເຕຕ຺ວາ ອວິຊ຺ຊານິໂຣຘາ ສງ຺ຂາຣນິໂຣໂຘຕິອາທິກໍ ວຏ຺ຏປຏິໂສຕໍ ອຠິມຸຂໍ ນິຄ຺ຄມນຏ຺ໂຐ. ເຫຕ຺ວຏ຺ໂຐຕິ ສພ຺ເພສໍ ອຣິຍຄຸຓານໍ ສຸປ຺ປຕິຏ຺ຐິຕຠາວ ສາຘນຏ຺ໂຐ. ທສ຺ສນຏ຺ໂຐຕິ ອຎ຺ຎາຓອທສ຺ສນສງ຺ຂາຕສ຺ສ ສມ຺ໂມຫສ຺ສ ປຫານ ວເສນ ຈຕຸສຈ຺ຈຘມ຺ມສ຺ສ ປຏິວິຊ຺ຌນຏ຺ໂຐ. ອຘິປເຕຍ຺ຍຏ຺ໂຐຕິ ຕຓ຺ຫາ ທາສພ຺ຍວິມຸຕ຺ຕິຍາ ຠູຊິສ຺ສຠາວປຕ຺ຕິວເສນ ສຍເມວ ອຕ຺ຕໂນ ອຘິປຕິ ຫຸຕ຺ວາ ວິໂຣຈນຏ຺ໂຐ. ໂລກິຍມຄ຺ຄາ ຫິ ຕຓ຺ຫາຍ ອາຣມ຺ມຓຠາເວ ຐິຕາ ຕຓ຺ຫາທາສພ຺ຍໍ ນາຕິວຕ຺ຕນ຺ຕີຕິ. ເອຕ຺ຖຈ ອິເມ ສຕ຺ຕານາມ ເອກນ຺ເຕນ ທຸກ຺ຂປຏິກູລາ ໂຫນ຺ຕິ ທຸກ຺ຂຠີຣຸກາ. ເຍຈ ອຕ຺ຕນິ ທຸກ຺ຂໍ ຊເນນ຺ຕິ. ເຕສຸ ເວຣິສຎ຺ຎໍ ອຸປ຺ປາເທນ຺ຕິ. ອຕ຺ຕໂນ ປນ ເອກນ຺ຕທຸກ຺ຂໍວາ ເອກນ຺ຕທຸກ຺ຂຊນກໍວາ ເຕ ນຊານນ຺ຕິ. ຕສ຺ມາ ເຕ ອຕ຺ຕໂນ ທຸກ຺ຂມຸຕ຺ຕິຍາ ຍໍ ຍໍ ກມ຺ມໍ ອາຍູຫນ຺ຕິ. ຕໍ ຕໍ ອຕ຺ຕໂນ ທຸກ຺ຂວຑ຺ຒິຍາເອວ ສມ຺ປຊ຺ຊຕິ. ກິໍ ປນ ເອກນ຺ຕທຸກ຺ຂໍ, ກິໍຈ ເອກນ຺ຕ ທຸກ຺ຂຊນກນ຺ຕິ. ອຕີຕານາຄຕປຈ຺ຈຸປ຺ປນ຺ນຠູຕາ ອຕ຺ຕໂນ ອຕ຺ຕໂນ ອຕ຺ຕຫາວປຣິຍາປນ຺ນາ ເຕຠູມກຘມ຺ມາເອວ ອຕ຺ຕໂນ ອຕ຺ຕໂນ ເອກນ຺ຕທຸກ຺ຂານາມ. ກສ຺ມາ, ເຕຫິ ມຸຕ຺ເຕເອວ ສພ຺ພທຸກ຺ເຂຫິ ມຸຈ຺ຈນໂຕ, ອມຸຕ຺ເຕຈ ອມຸຈ຺ຈນໂຕຕິ. ອຕ຺ຕໂນ ຕຓ຺ຫາເອວ ອຕ຺ຕໂນ ເອກນ຺ຕທຸກ຺ຂຊນກໍນາມ. ກສ຺ມາ, ຕາຍ ປຫີນາຍເອວ ເອກນ຺ຕ ທຸກ຺ເຂຫິ ມຸຈ຺ຈນໂຕ, ອປຫີນາຍຈ ອມຸຈ຺ຈນໂຕຕິ.

ຕຖາ ອິເມ ສຕ຺ຕາ ເອກນ຺ເຕນ ສຸຂກາມາ ໂຫນ຺ຕິ ສຸຂາຠິນນ຺ທິໂນ. ເຍຈ ອຕ຺ຕນິ ສຸຂໍ ຊເນນ຺ຕິ. ເຕສຸ ປິຍມິຕ຺ຕສຎ຺ຎໍ ອຸປ຺ປາເທນ຺ຕິ. ອຕ຺ຕໂນປນ ເອກນ຺ຕສຸຂໍວາ ເອກນ຺ຕສຸຂມຄ຺ຄໍວາເຕ ນຊານນ຺ຕິ. ຕສ຺ມາ ເຕ ອຕ຺ຕໂນ ສຸຂວຑ຺ຒິຍາ ຍໍ ຍໍ ກມ຺ມໍ ອາຍູຫນ຺ຕິ. ຕໍ ຕໍ ອຕ຺ຕໂນ ທຸກ຺ຂວຑ຺ຒິຍາເອວ ສມ຺ປຊ຺ຊຕິ. ກິໍ ປນ ເອກນ຺ຕສຸຂໍ ໂກຈ ເອກນ຺ຕ ສຸຂມຄ຺ໂຄຕິ. ເອກນ຺ຕທຸກ຺ຂຘມ຺ມສ຺ສ ອຠາໂວເອວ ອຕ຺ຕໂນ ເອກນ຺ຕ ສຸຂໍນາມ. ເອກນ຺ຕທຸກ຺ຂຊນກສ຺ສ ປຫານມຄ຺ໂຄເອວ ອຕ຺ຕໂນ ເອກນ຺ຕ ສຸຂມຄ຺ໂຄນາມາຕິ ອິມມຕ຺ຖໍ ທສ຺ເສນ຺ໂຕ ອິມານິ ຈຕຸສຈ຺ຈປທານິ ກເຖສີຕິ ເວທິຕພ຺ພໍ.

[໒໒໓] ຍໍ ປນ ວິຠາວນິຍໍ

‘‘ທຸກ຺ຂສ຺ສ ອນຸປ຺ປາທນິໂຣໂຘ ເອຕ຺ຖ ເອເຕນາຕິວາ ທຸກ຺ຂນິໂຣໂຘ’’ຕິ ວຸຕ຺ຕໍ. ຕຕ຺ຖ ເອເຕນາຕິ ອິທໍ ນຍຸຊ຺ຊຕິ.

ນ ຫິ ນິພ຺ພານໍ ທຸກ຺ຂສ຺ສ ອນຸປ຺ປາທນິໂຣຘ ກ຺ຣິຍາສາຘເນ ທຸກ຺ເຂນ ສຫກາຣີ ກາຣຓໍ ໂຫຕີຕິ. ເສສເຈຕສິກາຕິ ເວທນາ ສຎ຺ຎາຫິ ເສສາ ປຎ຺ຎາສ ເຈຕສິກາ. ອຕີຕາທິວເສນ ຕິວິຘ ຠິນ຺ນານໍ ອຊ຺ຌຕ຺ຕາທິ ໂອຬາຣິກາທິ ຫີນາທິ ທູຣາທິວເສນ ທຸວິຘຠິນ຺ນານຎ຺ຈ ຘມ຺ມານໍ ຣາສຏ຺ເຐນ ຂນ຺ຘໂວຫາໂຣ ໂຫຕິ. ນິພ຺ພານສ຺ສ ປນ ຕາທິ ໂສ ເຠໂທ ນຕ຺ຖີຕິ ວຸຕ຺ຕໍ ເຠທາຠາເວນາຕິອາທິ. ຕຎ຺ຫິ ອຕີຕາທິເກ ຕິວິຘເຠເທ ເອກໍປິ ນ ໂຫຕິ. ກສ຺ມາ. ອນິທ຺ທິສິຕພ຺ພ ຘມ຺ມຕ຺ຕາ. ຕຎ຺ຫິ ເຕກາລິກຘມ຺ມານໍ ຂຍວິຣາຄນິໂຣຘຠູໂຕ ອນິມິຕ຺ຕ ຘມ຺ໂມເຍວ ໂຫຕິ. ຕສ຺ມາ ອິທໍ ອຕີເຕ ອສຸກພຸທ຺ຘກາເລ ນິພ຺ພານໍ. ອິທໍ ອນາຄເຕ. ອິທໍ ເອຕຣຫີຕິ ເອວໍ ກາລເຠເທນ ນິທ຺ທິສິຕພ຺ພໍ ນໂຫຕິ. ຕຖາ ທິສາ ເທສຐານເຠເທນ ປຣິນິພ຺ພຸຕປຸຄ຺ຄລເຠເທນ ຈ. ເກວລໍ ປນ ອນມຕຄ຺ເຄ ສໍສາຣວຏ຺ເຏ ຍຕ຺ຕການິ ອນຕ຺ຖ ປທານິ ທິສ຺ສນ຺ຕິ. ຕປ຺ປຏິປກ຺ຂສິທ຺ເຘຫິ ຄຸຓປເທຫິເອວ ຕໍ ກເຖ ຕພ຺ພນ຺ຕິ. ທຸເກສຸ ປນ ອຊ຺ຌຕ຺ຕທຸກໍ ປຕ຺ວາ ຕໍ ພຫິທ຺ຘາເອວ ໂຫຕິ. ນ ອຊ຺ຌຕ຺ຕໍ. ໂອຬາຣິກທຸກໍ ປຕ຺ວາ ສຸຂຸມເມວ ໂຫຕິ, ນ ໂອຬາຣິກໍ. ຫີນທຸກໍ ປຕ຺ວາ ປຓີຕເມວ ໂຫຕິ, ນ ຫີນໍ. ທູເຣ ທຸກໍ ປຕ຺ວາ ທູເຣເອວ ໂຫຕິ, ນ ສນ຺ຕິເກຕິ. ຂນ຺ຘສງ຺ຄຫນິສ຺ສຏນ຺ຕິ ຂນ຺ຘສງ຺ຄຫໂຕ ວິມຸຕ຺ຕໍ.

ທ຺ວາຣາລມ຺ພຓເຠເທນາຕິ ທ຺ວາຣຉກ຺ກ ອາຣມ຺ມຓຉກ຺ການໍ ເຠເທນ. ອາຍຕນານິ ທ຺ວາທສ ຠວນ຺ຕີຕິ ໂຍຊນາ. ເອຕ຺ຖຈ ທ຺ວາຣຉກ຺ກໍ ຘມ຺ມາຣມ຺ມຓໍເອວາຕິ ເສສຘມ຺ມາລມ຺ພຓໍ ສນ຺ຘາຍ ອາຣມ຺ມຓຉກ຺ກໍ ວຸຕ຺ຕນ຺ຕິ ທຏ຺ຐພ຺ພໍ. ທ຺ວາຣາ.ລ. ປຣິຍາເຍນາຕິ ຉນ຺ນໍ ທ຺ວາຣານໍ ຉນ຺ນໍ ອາລມ຺ພຓານໍ ເຕສຸ ທ຺ວາຣາລມ຺ພເຓສຸ ອຸປ຺ປນ຺ນານໍ ວິຎ຺ຎາຓານຎ຺ຈ ກເມນ ຘາຕຸໂຍ ອຏ຺ຐາຣສ ຠວນ຺ຕີຕິ ໂຍຊນາ. ເອຕ຺ຖປິ ທ຺ວາຣຉກ຺ເກ ມໂນທ຺ວາຣໍ ວິຎ຺ຎາເຓກເທສເມວ ໂຫຕິ. ທ຺ວາຣຉກ຺ກໍ ວິຎ຺ຎາຓສຕ຺ຕກຎ຺ຈ ຘມ຺ມາ ລມ຺ພເຓກເທສເມວາຕິ. ມຄ຺ໂຄ ໂລກຸຕ຺ຕໂຣ ມຄ຺ໂຄນາມ ມໂຕຕິ ໂຍຊນາ. ມຄ຺ຄຍຸຕ຺ຕາ ເອກູນຕິໍສຘມ຺ມາ ຜລຠູຕາຈ ສຕ຺ຕຕິໍສ ຘມ຺ມາ ຈຕຸສຈ຺ຈ ວິນິສ຺ສຏາ ຈຕູຫິ ອຣິຍສຈ຺ເຈຫິ ວິນິສ຺ສຏາ ວິມຸຕ຺ຕາ. ຍເມຕ຺ຖ ວຕ຺ຕພ຺ພໍ, ຕໍ ເຫຏ຺ຐາ ວຸຕ຺ຕເມວາຕິ.

ອິຕິ ປຣມຕ຺ຖທີປນິຍານາມ ອຠິຘມ຺ມຕ຺ຖສງ຺ຄຫສ຺ສ

ຈຕຸຕ຺ຖວຓ຺ຓນາຍ ສມຸຈ຺ຈຍ ສງ຺ຄຫສ຺ສ

ປຣມຕ຺ຖທີປນາ ນິຏ຺ຐິຕາ.