ນິຄມ ປຣມຕ຺ຖທີປນີ

໑໗໒. ຈາຣິຕ຺ເຕນ ກຸລາຈາເຣນ ໂສຠິເຕ ຎາຕິ ມິຕ຺ຕ ຘນ ໂຠຄສມ຺ປຕ຺ຕິຍາ ວິສາເລ ກຸເລ ອຸທໂຍ ວຑ຺ຒິ ຍສ຺ສ ໂສຕິ ຈາຣິຕ຺ຕໂສຠິຕວິສາລກຸໂລທໂຍ. ເຕນ. ສທ຺ຘາຍ ອຠິວຸຑ຺ຒານໍ ປຣິສຸທ຺ຘານຎ຺ຈ ອຕ຺ຕໂນ ສີລສຸຕຈາຄາທິຄຸຓານໍ ອຸທໂຍ ວຑ຺ຒິ ເອຕສ຺ມິນ຺ຕິ ສທ຺ຘາຕິວຸຑ຺ຒປຣິສຸທ຺ຘຄຸໂຓທໂຍ. ເຕນ. ນມ຺ປວ຺ຫເຍນາຕິ ນມ຺ປນາມເກນ ອຸປາສເກນ. ປຓິຘາຍາຕິ ຠຸສໍ ນິຘາຍ ຫທເຍ ຖເປຕ຺ວາ ອຸປາທາຍ ປຏິຈ຺ຈ. ປຣານຸກມ຺ປນ຺ຕິ ປເຣສໍ ອຕ຺ຕໂນ ມນ຺ທພຸທ຺ຘີນໍ ປຈ຺ຉິມຊນານໍ ອນຸກມ຺ປໍ ອນຸທຍໍ ກາຣຸຎ຺ຎໍ ປຓິຘາຍາຕິ ສມ຺ພນ຺ໂຘ. ປຕ຺ຖິຕນ຺ຕິ ອຠິຍາຈິຕໍ. ປຸຎ຺ເຎນ ເຕນ ວິປຸເລນາຕິ ເຕນ ວິປຸເລນ ອຠິຘມ຺ມຕ຺ຖ ສງ຺ຄຫປກຣຓສ຺ສ ກຣຓປຸຎ຺ເຎນ. ຕຸມູລໂສມນ຺ຕິ ເອວໍ ນາມກໍ ວິຫາຣໍ. ວຸຕ຺ຕຎ຺ຫິ ຂຸທ຺ທສິກ຺ຂາຏີກາຍໍສີຫຬທີເປ ຕຸມູລໂສມວິຫາເຣ ສງ຺ຆສ຺ສ ປາກວຕ຺ຕໍປິ ຕາລ ປຓ຺ຓໍ ວິກ຺ກິຓິຕ຺ວາ ກຣີຍຕິ. ນ ຫິ ຕຕ຺ຖ ປຓ຺ເຓນ ອຕ຺ໂຖ ອຕ຺ຖິ. ສພ຺ເພປິ ອິຏ຺ຐກຈ຺ຉນ຺ນາ ປາສາທາທໂຍຕິ. ເອໂສ ກິຣ ວິຫາໂຣ ອາທິໂຕ ອຠຍຄິຣິຣຎ຺ໂຎ ອຄ຺ຄມເຫສິຠູຕາຍ ໂສມເທວິຍາ ກາຣາປິຕຕ຺ຕາ ຍາວຊ຺ຊຕນາປິ ໂສມວິຫາໂຣຕ຺ເວວ ປຎ຺ຎາຍິຕ຺ຖ. ຕຸມູລສທ຺ໂທ ປນ ວິປຸລສທ຺ທປຣິຍາໂຍ.

ອເຖຕ຺ຖ ວຕ຺ຕຕິ ສທ຺ໂທ, ຕຸມູໂລ ເຠຣໂວ ມຫາ;

ຫຕ຺ຖິນາເຄ ປທິນ຺ນມ຺ຫິ, ສິວີນໍ ຣຏ຺ຐວຑ຺ຒເນຕິ.

ອາທີສຸ

ວິຍ. ໂສຈ ວິຫາໂຣ ສຏ຺ຐິມຕ຺ເຕຫິ ມຫາປຣິເວເຓຫິ ສຓ຺ຐິໂຕ ໂຫຕີຕິ ອຕິວິຍ ວິປຸໂລ ມຫນ຺ໂຕ ວິຕ຺ຖິຓ຺ໂຓ ໂຫຕິ. ຕສ຺ມາ ໂສ ວິປຸລຕ຺ຕາ ມຫນ຺ຕຕ຺ຕາ ວິຕ຺ຖິຓ຺ຓຕ຺ຕາ ຕຸມູລ ໂສໂມຕິ ວຸຈ຺ຈຕິ. ຕໍ ຕຸມູລໂສມໍ. ອຕ຺ຖໂຕ ມຫາໂສມ ວິຫາຣນ຺ຕິ ວຸຕ຺ຕໍ ໂຫຕິ. ເອເຕນ ເຖໂຣ ອຕ຺ຕໂນ ອາຈຣິຍວໍສສ຺ສ ວສນ ວິຫາຣໍ ກິຕ຺ເຕຕິ. ອຕ຺ຕໂນ ວສນຏ຺ຐານໍ ປນ ນາມຣູປປຣິຈ຺ເຉເທ ກິຕ຺ຕິຕໍ. ຘຎ຺ຎາຘິວາສນ຺ຕິ ຕສ຺ມິໍ ວິຫາເຣ ອາທິກມ຺ມິກຠູຕ ມຫິນ຺ທຕ຺ເຖຣາທີນໍ ປຸຎ຺ຎວນ຺ຕຕ຺ເຖຣານໍ ອຊ຺ຌາວຸຏ຺ຐຠູຕໍ. ທີປປສາທກ ມຫາມຫິນ຺ທຕ຺ເຖຣສ຺ສ ຫິ ວໍເສ ຊາຕຕ຺ຕາ ຕສ຺ມິໍ ວິຫາເຣ ອາທິກມ຺ມິກຠູໂຕ ມຫາເຖໂຣປິ ມຫິນ຺ທຕ຺ເຖໂຣນາມາຕິ ຘາຕຸວໍເສ ວຸຕ຺ໂຕ. ອຸທິໂຕທິຕນ຺ຕິ ອຕິວິຍ ອຸທິຕໍ. ນຠມຊ຺ເຌ ປຸຓ຺ຓຈນ຺ທມຓ຺ຑລໍ ວິຍ ສກລສີຫຬທີເປ ອຕິວິຍ ອຸຄ຺ຄຕນ຺ຕິ ອຕ຺ໂຖ. ອຣິຍມຄ຺ຄປຎ຺ຎາວເສນ ປຣິຍຕ຺ຕິເວສາຣຊ຺ຊາທິ ປຎ຺ຎາວເສນວາ ອວທາເຕຫິ ປຣິໂຍທາເຕຫິ ຄຸເຓຫິ ໂສຕິຕາຕິ ປຎ຺ຎາວທາຕຄຸຓໂສຕິຕາ. ເຕ ເອວ ລຊ຺ຊີປາປຄຣຫິໂນ. ມຎ຺ຎນ຺ຕູຕິ ອນຸສ຺ສຣນ຺ຕຸ. ປຸຎ຺ຎວິຠາໂວທຍ ມງ຺ຄລາຍາຕິ ວິປຸລານໍ ປຸຎ຺ຎານໍ ວຑ຺ຒິສງ຺ຂາຕ ມງ຺ຄລຕ຺ຖາຍ. ຕຕ຺ຣາຍໍ ໂຍຊນາ, ປຸຎ຺ເຎນ ເຕນ ວິປຸເລນ ຘຎ຺ຎາຘິວາສໍ ອຸທິໂຕທິຕໍ ຕຸມູລໂສມ ວິຫາຣຎ຺ຈ ຕຕ຺ຖ ນິປາສິໂນ ມຫິນ຺ທຕ຺ເຖຣາທິເກ ປຎ຺ຎາວທາຕ ຄຸຓໂສຠິເຕ ລຊ຺ຊິຠູເຕ ຠິກ຺ຂູຈ ປຸຎ຺ຎວິຠໂວທຍມງ຺ຄລາຍ ອາຍຸກນ຺ຕໍ ມຎ຺ຎນ຺ຕຸ ປຈ຺ຉິມາ ຊນາຕິ. ອຖວາ, ຕໍວິຫາຣໍ ອຎ຺ເຎ ປຎ຺ຎາວທາຕ ຄຸຓໂສຠິຕ ລຊ຺ຊີ ຠິກ຺ຂູ ມຎ຺ຎນ຺ຕູຕິ ໂຍຊນາ. ເອເຕນ ເຖໂຣ ປຈ຺ຉິມຊນານໍ ຉສຸ ອນຸຕ຺ຕຣິຍຘມ຺ເມສຸ ອນຸສ຺ສຕານຸຕ຺ຕຣິຍສງ຺ຂາຕໍ ປຸຎ຺ຎວິເສສຎ຺ຈ ມຍໍປິ ຕາທິສຄຸຓຠາຄິໂນ ຠວິສ຺ສາມາຕິ ອຸສ຺ສາຫນຸປາຍຎ຺ຈ ປຏິປາເທສີຕິ.

ປຣມຕ຺ຖທີປນີ ນິຄມກຖາ

ເອຕ຺ຕາວຕາຈ –

ນຄເຣ ທີປຣງ຺ຄມ຺ຫິ, ຄາເມ ຕິ ນາມເກ;

ອຏ຺ຐສຸຎ຺ຎທ຺ວເຍກມ຺ຫິ, ສາເກ ຊາເຕນ ຍາ ມຍາ.

ມຸໍຣ຺ວາຄາເມ ອຣຎ຺ຎມ຺ຫິ, ລງ຺ຆຕີຕິ ວິສ຺ສຸຕາລເຍ;

ວສຕາ ມຫໂຕ ຠິກ຺ຂຸ, ຄຓສ຺ສ ຫິຕກາຣິນາ.

ປຣມຕ຺ຖທີປນີນາມ, ສງ຺ຂຕາ ສາຣທສ຺ສິນາ;

ສາເຣສີນໍ ຫິຕຕ຺ຖາຍ, ສາຣາສາຣວິເວກິນໍ.

ສຸນິຏ຺ຐິຕາ ອຍໍ ຏີກາ, ນິພ຺ຠຍາ ນິຣຸປທ຺ທວາ;

ນວປຎ຺ຈທ຺ວເຍກມ຺ຫິ, ສາເກ ໂກມຸທສາຣເທ.

ຕຖາ ກລ຺ຍາຓສງ຺ກປ຺ປາ, ສາຘູນໍ ອມຕປ຺ຜລາ;

ນິຏ຺ຐໍ ຄຈ຺ຉນ຺ຕຸ ສພ຺ເພປິ, ນິພ຺ຠຍາ ນິຣຸປທ຺ທວາ.

ຍຖາ ໂລກມ຺ຫິ ໂຊຕນ຺ຕິ, ອຸໂຠ ຈນ຺ທິມສູຣິຍາ;

ຕເຖວ ປຣມຕ຺ເຖສຸ, ອຍໍ ປຣມຕ຺ຖທີປນີ.

ປາຬິຍຕ຺ເຕສຸ ສາ ສຸຠາ, ສທ຺ທນິຣຸຕ຺ຕິທີປນີ;

ອຸໂຠ ໂລກມ຺ຫິ ໂຊຕນ຺ຕຸ, ສທ຺ຘມ຺ໂມ ຍາວ ຕິຏ຺ຐຕີຕິ.

ຕຕ຺ຖ ນຄເຣ ທີປຣງ຺ຄມ຺ຫີຕິ ທີປວາສິມຫາຊນໍ ຣຎ຺ເຊຕີຕິ ທີປຣງ຺ຄນ຺ຕິ ລທ຺ຘນາເມ ນຄເຣ. ຄາເມ ນາມເກຕິ ໂຣຫິຕມິຄານໍ ນິວາສຠູມິຕເລ ປຕິຏ຺ຐິຕຕ຺ຕາ ເອວໍນາມເກ ມຫາຄາເມ. ສາເກຕິ ກລິຍຸເຄ. ຍາ ມຍາຕິ ປຣມຕ຺ຖທີປນີນາມ ຍາຏີກາ ມຍາ ສງ຺ຂຕາຕິ ສມ຺ພນ຺ໂຘ. ລງ຺ຆຕີຕິ ວິສ຺ສຸຕາລເຍຕິ ເອວໍວິສ຺ສຸເຕ ອຣຎ຺ຎວິຫາເຣ. ສາເຣສີນນ຺ຕິ ສາຣຄເວສີນໍ. ສາຣາສາຣວິເວກິນນ຺ຕິ ອຍໍ ສາໂຣ ອຍໍ ອສາໂຣຕິ ເອວໍ ສາຣຎ຺ຈ ອສາຣຎ຺ຈວິເວ ເຈຕ຺ວາ ຊານິຕຸໍ ສມຕ຺ຖານໍ. ສາເກຕິ ກລິຍຸເຄ. ໂກມຸທສາຣ ເທຕິ ກຸມຸທປຸປ຺ຜຍຸຕ຺ເຕ ສຣທອຸຕຸ ປຣິຍາປນ຺ເນປຈ຺ຉິ ມກຕ຺ຕິກມາເສ. ອມຕປ຺ຜລາຕິ ນິພ຺ພານປໂຍຊນາ. ສຸຠາຕິ ອຕ຺ຖພ຺ຍຎ຺ຊນສມ຺ປຕ຺ຕິຍາ ໂສຠຓາ. ສທ຺ຘມ຺ໂມຕິ ຕິວິຘໍ ສຕ຺ຖຸສາສນໍ ວຸຈ຺ຈຕີຕິ.

ອິຕິ ອຠິຘມ຺ມຕ຺ຖສງ຺ຄຫປກຣຓສ຺ສ ຈຕຸຕ຺ຖສໍວຓ຺ຓນາ

ຠູຕາ ປຣມຕ຺ຖທີປນີນາມາ ຍໍຏີກາ

ສພ຺ພາກາເຣນ ນິຏ຺ຐິຕາ.