໖. ອາຂ຺ຍາຕກຓ຺ຑ

ຠູວາທິຄຓ

ວິຠຕ຺ຕິວິຘານ

ອຖ ອາຂ຺ຍາຕວິຠຕ຺ຕິໂຍ ກ຺ຣິຍາວາຈີຫິ ຘາຕູຫິ ປຣາ ວຸຈ຺ຈນ຺ເຕ.

ຕຕ຺ຖ ກ຺ຣິຍໍ ອາຈິກ຺ຂຕີຕິ ອາຂ຺ຍາຕໍ, ກ຺ຣິຍາປທໍ. ວຸຕ຺ຕຎ຺ຫິ ‘‘ກາລກາຣກປຸຣິສປຣິທີປກໍ ກ຺ຣິຍາລກ຺ຂຓມາຂ຺ຍາຕິກ’’ນ຺ຕິ. ຕຕ຺ຖ ກາໂລຕິ ອຕີຕາທໂຍ, ກາຣກມິຕິ ກມ຺ມກຕ຺ຕຸຠາວາ, ປຸຣິສາຕິ ປຐມມຊ຺ຌິມຸຕ຺ຕມາ, ກ຺ຣິຍາຕິ ຄມນປຈນາທິໂກ ຘາຕ຺ວຕ຺ໂຖ, ກ຺ຣິຍາລກ຺ຂຓໍ ສຎ຺ຎາຓໍ ເອຕສ຺ສາຕິ ກ຺ຣິຍາລກ຺ຂຓໍ, ອຕິລິງ຺ຄຎ຺ຈ.

ວຸຕ຺ຕມ຺ປິ ເຈຕໍ –

‘‘ຍໍ ຕິກາລໍ ຕິປຸຣິສໍ, ກ຺ຣິຍາວາຈິ ຕິກາຣກໍ;

ອຕິລິງ຺ຄໍ ທ຺ວິວຈນໍ, ຕທາຂ຺ຍາຕນ຺ຕິ ວຸຈ຺ຈຕີ’’ຕິ.

ກາລາທິວເສນ ຘາຕ຺ວຕ຺ຖໍ ວິຠຊນ຺ຕີຕິ ວິຠຕ຺ຕິໂຍ, ຕ຺ຍາທໂຍ, ຕາ ປນ ວຕ຺ຕມານາ ປຎ຺ຈມີ ສຕ຺ຕມີ ປໂຣກ຺ຂາຫິຍ຺ຍຕ຺ຕນີ ອຊ຺ຊຕນີ ຠວິສ຺ສນ຺ຕີ ກາລາຕິປຕ຺ຕິ ຈາຕິ ອຏ຺ຐວິຘາ ຠວນ຺ຕິ.

ກ຺ຣິຍໍ ຘາເຣນ຺ຕີຕິ ຘາຕໂວ, ຠູວາທໂຍ, ຂາທິຘາຕຸປ຺ປຈ຺ຈຍນ຺ຕາ ຈ, ເຕ ປນ ອຕ຺ຖວສາ ທ຺ວິຘາ ຠວນ຺ຕິ ສກມ຺ມກາ, ອກມ຺ມກາ ຈາຕິ. ຕຕ຺ຣ ສກມ຺ມກາ ເຍ ຘາຕໂວກມ຺ມາເປກ຺ຂໍ ກ຺ຣິຍໍ ວທນ຺ຕິ, ຍຖາ – ກຏໍ ກໂຣຕິ, ຄາມໍ ຄຈ຺ຉຕິ, ໂອທນໍ ປຈຕີຕິອາທໂຍ, ອກມ຺ມກາ ເຍ ກມ຺ມນິຣເປກ຺ຂໍ ກ຺ຣິຍໍ ວທນ຺ຕິ, ຍຖາ – ອຈ຺ຉຕິ, ເສຕິ, ຕິຏ຺ຐຕີຕິອາທໂຍ.

ເຕ ປນ ສຕ຺ຕວິຘາ ຠວນ຺ຕິ ວິກຣຓປ຺ປຈ຺ຈຍເຠເທນ, ກຖໍ? ອວິກຣຓາ ຠູວາທໂຍ. ນິຄ຺ຄຫີຕປຸພ຺ພກອວິກຣຓາ ຣຸຘາທໂຍ, ຍວິກຣຓາ ທິວາທໂຍ, ຓຸຓາ ອຸຓາວິກຣຓາ ສ຺ວາທໂຍ, ນາປ຺ປຓ຺ຫາວິກຣຓາ ກິຍາທໂຍ, ໂອຍິຣວິກຣຓາ ຕນາທໂຍ, ສກຕ຺ເຖ ເຓ ຓຍນ຺ຕາ ຈຸຣາທໂຍຕິ.

ຕຕ຺ຖ ປຐມໍ ອວິກຣເຓສຸ ຠູວາທີສຸ ຘາຕູສຸ ປຐມຠູຕາ ອກມ຺ມກາ ຠູອິຈ຺ເຈຕສ຺ມາ ຘາຕຸໂຕ ຕ຺ຍາທໂຍ ປຣາ ໂຍຊີຍນ຺ເຕ.

ຠູສຕ຺ຕາຍໍ, ‘‘ຠູ’’ອິຈ຺ຈຍໍ ຘາຕຸ ສຕ຺ຕາຍມຕ຺ເຖ ວຕ຺ຕເຕ, ກ຺ຣິຍາສາມຎ຺ຎຠູເຕ ຠວເນ ວຕ຺ຕເຕຕິ ອຕ຺ໂຖ.

‘‘ຠູ’’ອິຕິ ຐິເຕ –

໔໒໔. ຠູວາທໂຍ ຘາຕໂວ.

ຠູອິຈ຺ເຈວມາທໂຍ ເຍ ກ຺ຣິຍາວາຈິໂນ ສທ຺ທຄຓາ, ເຕ ຘາຕຸສຎ຺ຎາ ໂຫນ຺ຕິ. ຠູ ອາທິ ເຍສໍ ເຕ ຠູວາທໂຍ, ອຖ ວາ ຠູວາ ອາທີ ປກາຣາ ເຍສໍ ເຕ ຠູວາທໂຍ.

ຠູວາທີສຸ ວກາໂຣຍໍ, ເຎຍ຺ໂຍ ອາຄມສນ຺ຘິໂຊ;

ຠູວາປ຺ປກາຣາ ວາ ຘາຕູ, ສກມ຺ມາກມ຺ມກຕ຺ຖໂຕ.

‘‘ກ຺ວຈິ ຘາຕູ’’ຕິອາທິໂຕ ‘‘ກ຺ວຈີ’’ຕິ ວຕ຺ຕເຕ.

໔໒໕. ຘາຕຸສ຺ສນ຺ໂຕ ໂລໂປເນກສ຺ສຣສ຺ສ.

ອເນກສ຺ສຣສ຺ສ ຘາຕຸສ຺ສ ອນ຺ໂຕ ກ຺ວຈິ ໂລໂປ ໂຫຕິ.

ກ຺ວຈິຄ຺ຄຫຓໍ ‘‘ມຫີຍຕິ ສມໂຖ’’ຕິອາທີສຸ ນິວຕ຺ຕນຕ຺ຖໍ, ອິຕິ ອເນກສ຺ສຣຕ຺ຕາຠາວາ ອິຘ ຘາຕ຺ວນ຺ຕໂລໂປ ນ ໂຫຕິ.

ຕໂຕ ຘາຕ຺ວາຘິກາຣວິຫິຕາເນກປ຺ປຈ຺ຈຍປ຺ປສງ຺ເຄ ‘‘ວຕ຺ຕິຈ຺ຉານຸປຸພ຺ພິກາ ສທ຺ທປ຺ປຏິປຕ຺ຕີ’’ຕິ ກຕ຺ວາ ວຕ຺ຕມານວຈນິຈ຺ຉາຍໍ –

໔໒໖. ວຕ຺ຕມານາ ຕິອນ຺ຕິ, ສິຖ, ມິມ, ເຕອນ຺ເຕ, ເສວ຺ເຫ, ເອມ຺ເຫ.

ຕ຺ຍາທໂຍ ທ຺ວາທສ ວຕ຺ຕມານາສຎ຺ຎາ ໂຫນ຺ຕີຕິ ຕ຺ຍາທີນໍ ວຕ຺ຕມານຕ຺ຖວິສຍຕ຺ຕາ ວຕ຺ຕມານາສຎ຺ຎາ.

໔໒໗. ກາເລ.

ອຍມຘິກາໂຣ.

ອິໂຕ ປຣໍ ຕ຺ຍາທິວິຠຕ຺ຕິວິຘາເນ ສພ຺ພຕ຺ຖ ວຕ຺ຕເຕ.

໔໒໘. ວຕ຺ຕມານາ ປຈ຺ຈຸປ຺ປນ຺ເນ.

ປຈ຺ຈຸປ຺ປນ຺ເນ ກາເລ ຄມ຺ຍມາເນ ວຕ຺ຕມານາວິຠຕ຺ຕິ ໂຫຕິ, ກາໂລຕິ ເຈຕ຺ຖ ກ຺ຣິຍາ, ກຣຓໍ ກາໂຣ, ຣກາຣສ຺ສ ລກາໂຣ, ກາໂລ.

ຕສ຺ມາ –

ກ຺ຣິຍາຍ ຄມ຺ຍມານາຍ, ວິຠຕ຺ຕີນໍ ວິຘານໂຕ;

ຘາຕູເຫວ ຠວນ຺ຕີຕິ, ສິທ຺ຘໍ ຕ຺ຍາທິວິຠຕ຺ຕິໂຍ.

ອິຘ ປນ ກາລສ຺ສ ອຕີຕານາຄຕປຈ຺ຈຸປ຺ປນ຺ນາຓຕ຺ຕິປຣິກປ຺ປກາລາຠິປຕ຺ຕິວເສນ ຉຘາ ຠິນ຺ນຕ຺ຕາ ‘‘ປຈ຺ຈຸປ຺ປນ຺ເນ’’ຕິ ວິເສເສຕິ. ຕໍ ຕໍ ກາຣຓໍ ປຏິຈ຺ຈ ອຸປ຺ປນ຺ໂນ ປຈ຺ຈຸປ຺ປນ຺ໂນ, ປຏິລທ຺ຘສຠາໂວ, ນ ຕາວ ອຕີໂຕຕິ ອຕ຺ໂຖ.

ປຈ຺ຈຸປ຺ປນ຺ນສມີເປປິ, ຕພ຺ໂພຫາຣູປຈາຣໂຕ;

ວຕ຺ຕມານາ ອຕີເຕປິ, ຕໍກາລວຈນິຈ຺ຉຍາຕິ.

ຕສ຺ມິໍ ປຈ຺ຈຸປ຺ປນ຺ເນ ວຕ຺ຕມານາວິຠຕ຺ຕິໍ ກຕ຺ວາ, ຕສ຺ສາ ຐານານິຍເມ ‘‘ຘາຕຸລິງ຺ເຄຫິ ປຣາ ປຈ຺ຈຍາ’’ຕິ ປຣິຠາສໂຕ ຘາຕຸໂຕ ປຣໍ ວຕ຺ຕມານປ຺ປຈ຺ຈເຍ ກຕ຺ວາ, ເຕສມນິຍມປ຺ປສງ຺ເຄສຕິ ‘‘ວຕ຺ຕິຈ຺ຉານຸປຸພ຺ພິກາ ສທ຺ທປ຺ປຏິປຕ຺ຕີ’’ຕິ ປຣສ຺ສປທວຈນິຈ຺ຉາຍໍ –

໔໒໙. ອຖ ປຸພ຺ພານິ ວິຠຕ຺ຕີນໍ ຉ ປຣສ຺ສປທານິ.

ອຖ ຕທ຺ຘິຕານນ຺ຕຣໍ ວຸຈ຺ຈມານານໍ ສພ຺ພາສໍ ວຕ຺ຕມານາທີນໍ ອຏ຺ຐວິຘານໍ ວິຠຕ຺ຕີນໍ ຍານິ ຍານິ ປຸພ຺ພການິ ຉ ປທານິ, ຕານິ ຕານິ ອຕ຺ຖໂຕ ອຏ຺ຐຈຕ຺ຕາລີສມຕ຺ຕານິ ປຣສ຺ສປທສຎ຺ຎານິ ໂຫນ຺ຕີຕິອາທິມ຺ຫິ ຉນ຺ນໍ ປຣສ຺ສປທສຎ຺ຎາ, ປຣສ຺ສຕ຺ຖານິ ປທານິ ປຣສ຺ສປທານິ, ຕພ຺ພາຫຸລ຺ລໂຕ ຕພ຺ໂພຫາໂຣ.

‘‘ຘາຕູຫິ ເຓ ຓຍ’’ອິຈ຺ຈາທິໂຕ ‘‘ຘາຕູຫີ’’ຕິ ວຕ຺ຕມາເນ –

໔໓໐. ກຕ຺ຕຣິ ປຣສ຺ສປທໍ.

ກຕ຺ຕຣິກາຣເກ ອຠິເຘຍ຺ເຍ ສພ຺ພຘາຕູຫິ ປຣສ຺ສປທໍ ໂຫຕີຕິ ປຣສ຺ສປທໍ ກຕ຺ວາ, ຕສ຺ສາປ຺ຍນິຍມປ຺ປສງ຺ເຄ ວຕ຺ຕິຈ຺ຉາວສາ –

ວິປຣິຓາເມນ ‘‘ປຣສ຺ສປທານໍ, ອຕ຺ຕໂນປທານ’’ນ຺ຕິ ຈ ວຕ຺ຕເຕ.

໔໓໑. ທ຺ເວ ທ຺ເວ ປຐມມຊ຺ຌິມຸຕ຺ຕມປຸຣິສາ.

ຕາສໍ ວິຠຕ຺ຕີນໍ ປຣສ຺ສປທານ’ມຕ຺ຕໂນປທານຎ຺ຈ ທ຺ເວ ທ຺ເວ ວຈນານິ ຍຖາກ຺ກມໍ ປຐມມຊ຺ຌິມຸຕ຺ຕມປຸຣິສສຎ຺ຎານິ ໂຫນ຺ຕິ. ຕໍ ຍຖາ? ຕິ ອນ຺ຕິອິຕິ ປຐມປຸຣິສາ, ສິ ຖອິຕິ ມຊ຺ຌິມປຸຣິສາ, ມິ ມອິຕິ ອຸຕ຺ຕມປຸຣິສາ. ອຕ຺ຕໂນປເທສຸປິ ເຕ ອນ຺ເຕອິຕິ ປຐມປຸຣິສາ, ເສ ວ຺ເຫອິຕິ ມຊ຺ຌິມປຸຣິສາ, ເອ ມ຺ເຫອິຕິ ອຸຕ຺ຕມປຸຣິສາ. ເອວໍ ເສສາສຸ ສຕ຺ຕສຸ ວິຠຕ຺ຕີສຸປິ ໂຍເຊຕພ຺ພນ຺ຕິ. ເອວໍ ອຏ຺ຐວິຠຕ຺ຕິວເສນ ຉນ຺ນວຸຕິວິເຘ ອາຂ຺ຍາຕປເທ ທ຺ວຕ຺ຕິໍສ ທ຺ວຕ຺ຕິໍສ ປຐມມຊ຺ຌິມອຸຕ຺ຕມປຸຣິສາ ໂຫນ຺ຕີຕິ ວຕ຺ຕມານປຣສ຺ສປທາທິມ຺ຫິ ທ຺ວິນ຺ນໍ ປຐມປຸຣິສສຎ຺ຎາ.

໔໓໒. ນາມມ຺ຫິ ປຍຸຊ຺ຊມາເນປິຕຸລ຺ຍາຘິກຣເຓ ປຐໂມ.

ຕຸມ຺ຫາມ຺ຫສທ຺ທວຊ຺ຊິເຕ ຕຸລ຺ຍາຘິກຣຓຠູເຕ ສາຘກວາຈເກ ນາມມ຺ຫິ ປຍຸຊ຺ຊມາເນປິ ອປ຺ປຍຸຊ຺ຊມາເນປິ ຘາຕູຫິ ປຐມປຸຣິໂສ ໂຫຕີຕິ ປຐມປຸຣິສໍ ກຕ຺ວາ, ຕສ຺ສາປ຺ຍນິຍມປ຺ປສງ຺ເຄ ກ຺ຣິຍາສາຘກສ຺ສ ກຕ຺ຕຸໂນ ເອກຕ຺ເຕ ວຕ຺ຕຸມິຈ຺ຉິເຕ ‘‘ເອກມ຺ຫິ ວຕ຺ຕພ຺ເພ ເອກວຈນ’’ນ຺ຕິ ວຕ຺ຕມານປຣສ຺ສປທປຐມປຸຣິເສກວຈນໍ ຕິ.

‘‘ປໂຣ, ປຈ຺ຈໂຍ, ຘາຕູ’’ຕິ ຈ ອຘິກາໂຣ, ‘‘ຍຖາ ກຕ຺ຕຣິ ຈາ’’ຕິ ອິໂຕ ‘‘ກຕ຺ຕຣີ’’ຕິ ວິກຣຓປ຺ປຈ຺ຈຍວິຘາເນ ສພ຺ພຕ຺ຖ ວຕ຺ຕເຕ.

໔໓໓. ຠູວາທິໂຕ ອ.

ຠູອິຈ຺ເຈວມາທິໂຕ ຘາຕຸຄຓໂຕ ປໂຣ ອປຈ຺ຈໂຍ ໂຫຕິ ກຕ຺ຕຣິ ວິຫິເຕສຸ ວິຠຕ຺ຕິປ຺ປຈ຺ຈເຍສຸ ປເຣສຸ. ສພ຺ພຘາຕຸກມ຺ຫິເຍວາຍມິສ຺ສເຕ.

‘‘ອສໍໂຍຄນ຺ຕສ຺ສ, ວຸທ຺ຘີ’’ຕິ ຈ ວຕ຺ຕເຕ.

໔໓໔. ອຎ຺ເຎສຸ ຈ.

ກາຣິຕໂຕ ອຎ຺ເຎສຸ ປຈ຺ຈເຍສຸ ອສໍໂຍຄນ຺ຕານໍ ຘາຕູນໍ ວຸທ຺ຘິ ໂຫຕິ. ຈຄ຺ຄຫເຓນ ຓຸປ຺ປຈ຺ຈຍສ຺ສາປິ ວຸທ຺ຘິ ໂຫຕິ. ເອຕ຺ຖ ຈ ‘‘ຆຏາທີນໍ ວາ’’ຕິ ອິໂຕ ວາສທ຺ໂທ ອນຸວຕ຺ເຕຕພ຺ໂພ, ໂສ ຈ ວວຕ຺ຖິຕວິຠາສຕ຺ໂຖ. ເຕນ –

ອິວຓ຺ຓຸວຓ຺ຓນ຺ຕານຎ຺ຈ, ລຫູປນ຺ຕານ ຘາຕຸນໍ;

ອິວຓ຺ຓຸວຓ຺ຓານເມວ, ວຸທ຺ຘິ ໂຫຕິ ປຣສ຺ສ ນ.

ຍຸວຓ຺ຓານມ຺ປິ ຍ ຓຸ ຓາ-ນານິຏ຺ຐາທີສຸ ວຸທ຺ຘິ ນ;

ຕຸທາທິສ຺ສາວິກຣເຓ, ນ ເຉຕ຺ວາທີສຸ ວາ ສິຍາ.

ຕສ຺ສາປ຺ຍນິຍມປ຺ປສງ຺ເຄ – ‘‘ອຍຸວຓ຺ຓານຎ຺ຈາໂຍ ວຸທ຺ຘີ’’ຕິ ປຣິຠາສໂຕ ອູກາຣສ຺ໂສກາໂຣ ວຸທ຺ຘິ.

ວິປຣິຓາເມນ ‘‘ຘາຕູນ’’ນ຺ຕິ ວຕ຺ຕເຕ.

໔໓໕. ໂອ ອວ ສເຣ.

ໂອກາຣສ຺ສ ຘາຕ຺ວນ຺ຕສ຺ສ ສເຣ ປເຣ ອວາເທໂສ ໂຫຕິ. ‘‘ສຣໂລໂປ ມາເທສ’’ອິຈ຺ຈາທິນາ ສຣໂລປາທິມ຺ຫິ ກເຕ ‘‘ນເຍ ປຣໍ ຍຸຕ຺ເຕ’’ຕິ ປຣນຍນໍ ກາຕພ຺ພໍ.

ໂສ ປຸຣິໂສ ສາຘຸ ຠວຕິ, ສາ ກຎ຺ຎາ ສາຘຸ ຠວຕິ, ຕໍ ຈິຕ຺ຕໍ ສາຘຸ ຠວຕິ.

ເອຕ຺ຖ ຫິ –

ກຕ຺ຕຸໂນຠິຫິຕຕ຺ຕາວ, ອາຂ຺ຍາເຕນ ນ ກຕ຺ຕຣິ;

ຕຕິຍາ ປຐມາ ໂຫຕິ, ລິງ຺ຄຕ຺ຖໍ ປນເປກ຺ຂິຍ.

ສຕິປິ ກ຺ຣິຍາເຍກຕ຺ເຕ ກຕ຺ຕູນໍ ພຫຸຕ຺ຕາ ‘‘ພຫຸມ຺ຫິ ວຕ຺ຕພ຺ເພ ພຫຸວຈນ’’ນ຺ຕິ ວຕ຺ຕມານປຣສ຺ສປທປຐມປຸຣິສພຫຸວຈນໍ ອນ຺ຕິ, ປຸເຣ ວິຍ ອປ຺ປຈ຺ຈຍວຸທ຺ຘິອວາເທສາ, ສຣໂລປາທິ. ເຕ ປຸຣິສາ ຠວນ຺ຕິ, ອປ຺ປຍຸຊ຺ຊມາເນປິ ຠວຕິ, ຠວນ຺ຕິ.

‘‘ປຍຸຊ຺ຊມາເນປິ, ຕຸລ຺ຍາຘິກຣເຓ’’ຕິ ຈ ວຕ຺ຕເຕ.

໔໓໖. ຕຸມ຺ເຫ ມຊ຺ຌິໂມ.

ຕຸລ຺ຍາຘິກຣຓຠູເຕ ຕຸມ຺ຫສທ຺ເທ ປຍຸຊ຺ຊມາເນປິ ອປ຺ປຍຸຊ຺ຊມາເນປິ ຘາຕູຫິ ມຊ຺ຌິມປຸຣິໂສ ໂຫຕີຕິ ວຕ຺ຕມານປຣສ຺ສປທມຊ຺ຌິມປຸຣິເສກວຈນໍສິ, ເສສໍ ປຸຣິມສມໍ. ຕ຺ວໍ ຠວສິ, ຕຸມ຺ເຫ ຠວຖ, ອປ຺ປຍຸຊ຺ຊມາເນປິ ຠວສິ, ຠວຖ.

ຕຸລ຺ຍາຘິກຣເຓຕິ ກິມຕ຺ຖໍ? ຕຍາ ປຈ຺ຈເຕ ໂອທໂນ.

ຕສ຺ມິໍເຍວາຘິກາເຣ –

໔໓໗. ອມ຺ເຫ ອຸຕ຺ຕໂມ.

ຕຸລ຺ຍາຘິກຣຓຠູເຕ ອມ຺ຫສທ຺ເທ ປຍຸຊ຺ຊມາເນປິ ອປ຺ປຍຸຊ຺ຊມາເນປິ ຘາຕູຫິ ອຸຕ຺ຕມປຸຣິໂສ ໂຫຕີຕິ ວຕ຺ຕມານປຣສ຺ສປທອຸຕ຺ຕມປຸຣິເສກວຈນໍ ມິ, ອປ຺ປຈ຺ຈຍວຸທ຺ຘິອວາເທສາ.

໔໓໘. ອກາໂຣ ທີຆໍ ຫິມິເມສຸ.

ອກາໂຣ ທີຆມາປຊ຺ຊເຕ ຫິມິມອິຈ຺ເຈຕາສຸ ວິຠຕ຺ຕີສຸ. ອຫໍ ຠວາມິ, ມຍໍ ຠວາມ. ຠວາມິ, ຠວາມ.

‘‘ວິຠຕ຺ຕີນໍ, ຉາ’’ຕິ ຈ ວຕ຺ຕເຕ.

໔໓໙. ປຣາຓ຺ຍຕ຺ຕໂນປທານິ.

ສພ຺ພາສໍ ວຕ຺ຕມານານໍ ອຏ຺ຐວິຘານໍ ວິຠຕ຺ຕີນໍ ຍານິ ຍານິ ປຣານິ ຉ ປທານິ, ຕານິ ຕານິ ອຕ຺ຕໂນປທສຎ຺ຎານິ ໂຫນ຺ຕີຕິ ເຕອາທີນໍ ອຕ຺ຕໂນປທສຎ຺ຎາ.

‘‘ຘາຕູຫິ, ອຕ຺ຕໂນປທານີ’’ຕິ ຈ ວຕ຺ຕເຕ.

໔໔໐. ກຕ຺ຕຣິ ຈ.

ກຕ຺ຕຣິ ຈ ກາຣເກ ອຠິເຘຍ຺ເຍ ຘາຕູຫິ ອຕ຺ຕໂນປທານິ ໂຫນ຺ຕິ. ຈຄ຺ຄຫຓໍ ກຕ຺ຖຈິ ນິວຕ຺ຕນຕ຺ຖໍ, ເສສໍ ປຣສ຺ສປເທ ວຸຕ຺ຕນເຍເນວ ເວທິຕພ຺ພໍ. ຠວເຕ, ຠວນ຺ເຕ, ຠວເສ, ຠວວ຺ເຫ, ຠເວ, ຠວາມ຺ເຫ.

ປຈ ປາເກ, ຘາຕຸສຎ຺ຎາຍໍ ຘາຕ຺ວນ຺ຕໂລໂປ, ວຸຕ຺ຕນເຍເນວ ຕ຺ຍາທ຺ຍຸປ຺ປຕ຺ຕິ, ອິວຓ຺ຓຸວຓ຺ຓານມຠາວາ ວຸທ຺ຘິອຠາໂວເວຕ຺ຖ ວິເສໂສ. ໂສ ເທວທຕ຺ໂຕ ໂອທນໍ ປຈຕິ, ປຈນ຺ຕິ, ປຈສິ, ປຈຖ, ປຈາມິ, ປຈາມ, ໂສ ໂອທນໍ ປຈເຕ, ເຕ ປຈນ຺ເຕ, ຕ຺ວໍ ປຈເສ, ຕຸມ຺ເຫ ປຈວ຺ເຫ, ອຫໍ ປເຈ, ມຍໍ ປຈາມ຺ເຫ.

ປຐມປຸຣິສາທີນເມກຊ຺ຌປ຺ປວຕ຺ຕິປ຺ປສງ຺ເຄ ປຣິຠາສມາຫ –

໔໔໑. ສພ຺ເພສເມກາຠິຘາເນ ປໂຣ ປຸຣິໂສ.

ສພ຺ເພສໍ ປຐມມຊ຺ຌິມານໍ, ປຐມຸຕ຺ຕມານໍ, ມຊ຺ຌິມຸຕ຺ຕມານໍ ຕິຓ຺ຓໍ ວາ ປຸຣິສານໍ ເອກໂຕຠິຘາເນ ກາຕພ຺ເພ ປໂຣ ປຸຣິໂສ ໂຍເຊຕພ຺ໂພ. ເອກກາລານເມວາຠິຘາເນ ຈາຍໍ. ໂສ ຈ ປຈຕິ, ຕ຺ວຎ຺ຈ ປຈສີຕິ ປຣິຍາຍປ຺ປສງ຺ເຄ ຕຸມ຺ເຫ ປຈຖາຕິ ຠວຕິ. ເອວໍ ໂສ ຈ ປຈຕິ, ອຫຎ຺ຈ ປຈາມີຕິ ມຍໍ ປຈາມ, ຕຖາ ຕ຺ວຎ຺ຈ ປຈສິ, ອຫຎ຺ຈ ປຈາມິ, ມຍໍ ປຈາມ, ໂສ ຈ ປຈຕິ, ຕ຺ວຎ຺ຈ ປຈສິ, ອຫຎ຺ຈ ປຈາມິ, ມຍໍ ປຈາມ. ເອວໍ ສພ຺ພຕ຺ຖ ໂຍເຊຕພ຺ພໍ.

ເອກາຠິຘາເນຕິ ກິມຕ຺ຖໍ? ‘‘ໂສ ຈ ປຈຕິ, ຕ຺ວຎ຺ຈ ປຈິສ຺ສສິ, ອຫໍ ປຈິໍ’’ ເອຕ຺ຖ ຠິນ຺ນກາລຕ຺ຕາ ‘‘ມຍໍ ປຈິມ຺ຫາ’’ຕິ ນ ຠວຕິ.

ຄມຸ ສປ຺ປ ຄຕິມ຺ຫິ, ປຸເຣ ວິຍ ຘາຕຸສຎ຺ຎາຍໍ ຘາຕ຺ວນ຺ຕໂລໂປ.

ກຕ຺ຕຣິ ຕ຺ຍາທ຺ຍຸປ຺ປຕ຺ຕິ.

໔໔໒. ຄມິສ຺ສນ຺ໂຕ ຈ຺ໂຉ ວາ ສພ຺ພາສຸ.

ຄມຸອິຈ຺ເຈຕສ຺ສ ຘາຕຸສ຺ສນ຺ໂຕ ມກາໂຣ ຈ຺ໂຉ ໂຫຕິ ວາ ສພ຺ພາສຸ ວິຠຕ຺ຕີສຸ, ສພ຺ພຄ຺ຄຫເຓນ ມານນ຺ຕ ຍ ກາຣິຕປ຺ປຈ຺ຈເຍສຸ ຈ. ວວຕ຺ຖິຕວິຠາສຕ຺ໂຖຍໍ ວາສທ຺ໂທ. ເຕນາຍໍ –

ວິຘິໍ ນິຈ຺ຈຎ຺ຈ ວາສທ຺ໂທ, ມານ’ນ຺ເຕສຸ ຕຸ ກຕ຺ຕຣິ;

ທີເປຕານິຈ຺ຈມຎ຺ຎຕ຺ຖ, ປໂຣກ຺ຂາຍມສນ຺ຕກໍ.

ອປ຺ປຈ຺ຈຍປຣນຍນານິ, ໂສ ປຸຣິໂສ ຄາມໍ ຄຈ຺ຉຕິ, ເຕ ຄຈ຺ຉນ຺ຕິ, ‘‘ກ຺ວຈິ ຘາຕູ’’ຕິອາທິນາ ຄຣຸປຸພ຺ພຣສ຺ສໂຕ ປຣສ຺ສ ປຐມປຸຣິສພຫຸວຈນສ຺ສ ເຣ ວາ ໂຫຕິ, ຄຈ຺ຉເຣ. ຕ຺ວໍ ຄຈ຺ຉສິ, ຕຸມ຺ເຫ ຄຈ຺ຉຖ. ອຫໍ ຄຈ຺ຉາມິ, ມຍໍ ຄຈ຺ຉາມ.

ຈ຺ຉາເທສາຠາເວ ‘‘ໂລປຎ຺ເຈຕ຺ຕມກາໂຣ’’ຕິ ອປ຺ປຈ຺ຈຍສ຺ສ ເອກາໂຣ. ຄເມຕິ, ຄເມນ຺ຕິ, ສຣໂລໂປ. ຄເມສິ, ຄເມຖ. ຄເມມິ, ຄເມມ.

ອຕ຺ຕໂນປເທປິ ໂສ ຄາມໍ ຄຈ຺ຉເຕ, ຄຈ຺ຉນ຺ເຕ, ຄຈ຺ຉເຣ. ຄຈ຺ຉເສ, ຄຈ຺ຉວ຺ເຫ. ຄຈ຺ເຉ, ຄຈ຺ຉາມ຺ເຫ.

‘‘ກຸໂຕ ນຸ ຕ຺ວໍ ອາຄຈ຺ຉສິ, ຣາຊຄຫໂຕ ອາຄຈ຺ຉາມີ’’ຕິອາທີສຸ ປນ ປຈ຺ຈຸປ຺ປນ຺ນສມີເປ ວຕ຺ຕມານວຈນໍ.

‘‘ວາ’’ຕິ ວຕ຺ຕເຕ.

໔໔໓. ຄມິສ຺ສ ຆມ຺ມໍ.

ຄມຸອິຈ຺ເຈຕສ຺ສ ຘາຕຸສ຺ສ ສພ຺ພສ຺ສ ຆມ຺ມາເທໂສ ໂຫຕິ ວາ. ຆມ຺ມຕິ, ຆມ຺ມນ຺ຕິ ອິຈ຺ຈາທິ.

ຠາວກມ຺ເມສຸ ປນ –

໔໔໔. ອຕ຺ຕໂນປທານິ ຠາເວ ຈ ກມ຺ມນິ.

ຠາເວ ຈ ກມ຺ມນິ ຈ ກາຣເກ ອຠິເຘຍ຺ເຍ ອຕ຺ຕໂນປທານິ ໂຫນ຺ຕິ, ຈສທ຺ເທນ ກມ຺ມກຕ຺ຕຣິປິ. ຠວນໍ ຠາໂວ, ໂສ ຈ ກາຣກນ຺ຕເຣນ ອສໍສຏ຺ໂຐ ເກວໂລ ຠວນລວນາທິໂກ ຘາຕ຺ວຕ຺ໂຖ. ກຣີຍຕີຕິ ກມ຺ມໍ. ອກມ຺ມກາປິ ຘາຕໂວ ໂສປສຄ຺ຄາ ສກມ຺ມກາປິ ຠວນ຺ຕິ, ຕສ຺ມາ ກມ຺ມນິ ອນຸປຸພ຺ພາ ຠູຘາຕຸໂຕ ວຕ຺ຕມານຕ຺ຕໂນປທປຐມປຸຣິເສກວຈນໍ ເຕ.

‘‘ຘາຕູຫິ ເຓ ຓຍ’’ອິຈ຺ຈາທິໂຕ ‘‘ຘາຕູຫີ’’ຕິ ວຕ຺ຕມາເນ –

໔໔໕. ຠາວກມ຺ເມສຸ ໂຍ.

ສພ຺ພຘາຕູຫິ ປໂຣ ຠາວກມ຺ເມສຸ ຍປ຺ປຈ຺ຈໂຍ ໂຫຕິ. ອຕ຺ຕໂນປທວິສເຍວາຍມິສ຺ສເຕ, ‘‘ອຎ຺ເຎສຸ ຈາ’’ຕິ ສຸຕ຺ເຕ ອນຸວຕ຺ຕິຕວາຄ຺ຄຫເຓນ ຍປ຺ປຈ຺ຈເຍ ວຸທ຺ຘິ ນ ຠວຕິ, ອນຸຠູຍເຕ ສຸຂໍ ເທວທຕ຺ເຕນ.

ອາຂ຺ຍາເຕນ ອວຸຕ຺ຕຕ຺ຕາ, ຕຕິຍາ ໂຫຕິ ກຕ຺ຕຣິ;

ກມ຺ມສ຺ສາຠິຫິຕຕ຺ຕາ ນ, ທຸຕິຍາ ປຐມາວິຘ.

ອນຸຠູຍນ຺ເຕ ສມ຺ປຕ຺ຕິໂຍ ຕຍາ. ອນຸຠູຍເສ ຕ຺ວໍ ເທວທຕ຺ເຕນ, ອນຸຠູຍວ຺ເຫ ຕຸມ຺ເຫ. ອຫໍ ອນຸຠູເຍ ຕຍາ, ມຍໍ ອນຸຠູຍາມ຺ເຫ.

‘‘ກ຺ວຈິ ຘາຕຸ’’ອິຈ຺ຈາທິໂຕ ‘‘ກ຺ວຈີ’’ຕິ ວຕ຺ຕມາເນ –

໔໔໖. ອຕ຺ຕໂນປທານິ ປຣສ຺ສປທຕ຺ຕໍ.

ອຕ຺ຕໂນປທານິ ກ຺ວຈິ ປຣສ຺ສປທຕ຺ຕມາປຊ຺ຊນ຺ເຕ, ອກຕ຺ຕຣິເຍເວຕໍ. ຍກາຣສ຺ສ ທ຺ວິຕ຺ຕໍ, ອນຸຠູຍ຺ຍຕິ ມຍາ ສຸຂໍ, ອນຸຠູຍ຺ຍເຕ ວາ, ອນຸຠູຍ຺ຍນ຺ຕິ. ອນຸຠູຍ຺ຍສິ, ອນຸຠູຍ຺ຍຖ. ອນຸຠູຍ຺ຍາມິ, ອນຸຠູຍ຺ຍາມ. ທ຺ວິຕ຺ຕາຠາເວ – ອນຸຠູຍຕິ, ອນຸຠູຍນ຺ຕິ.

ກ຺ວຈີຕິ ກິໍ? ອນຸຠູຍເຕ.

ຠາເວ ອທພ຺ພວຸຕ຺ຕິໂນ ຠາວສ຺ເສກຕ຺ຕາ ເອກວຈນເມວ, ຕຎ຺ຈ ປຐມປຸຣິສສ຺ເສວ, ຠູຍເຕ ເທວທຕ຺ເຕນ, ເທວທຕ຺ເຕນ ສມ຺ປຕິ ຠວນນ຺ຕິ ອຕ຺ໂຖ.

ປຈຘາຕຸໂຕ ກມ຺ມນິ ອຕ຺ຕໂນປເທ ຍປ຺ປຈ຺ຈເຍ ຈ ກເຕ –

ວິປຣິຓາເມນ ‘‘ຍສ຺ສາ’’ຕິ ວຕ຺ຕມາເນ –

໔໔໗. ຕສ຺ສ ຈວຄ຺ຄຍກາຣວກາຣຕ຺ຕໍ ສຘາຕ຺ວນ຺ຕສ຺ສ.

ຕສ຺ສ ຠາວກມ຺ມວິສຍສ຺ສ ຍປ຺ປຈ຺ຈຍສ຺ສ ຈວຄ຺ຄຍກາຣວກາຣຕ຺ຕໍ ໂຫຕິ ຘາຕ຺ວນ຺ເຕນ ສຫ ຍຖາສມ຺ຠວໍ. ເອຕ຺ຖ ຈ ‘‘ອິວຓ຺ຓາຄໂມ ວາ’’ຕິ ອິໂຕ ສີຫຄຕິຍາ ວາສທ຺ໂທ ອນຸວຕ຺ເຕຕພ຺ໂພ, ໂສ ຈ ວວຕ຺ຖິຕວິຠາສຕ຺ໂຖ. ເຕນ –

ຈວຄ຺ໂຄ ຈ ຕ ວຄ຺ຄານໍ, ຘາຕ຺ວນ຺ຕານໍ ຍວຕ຺ຕນໍ;

ຣວານຎ຺ຈ ສຍປ຺ປຈ຺ຈ-ຍານໍ ໂຫຕິ ຍຖາກ຺ກມນ຺ຕິ.

ຘາຕ຺ວນ຺ຕສ຺ສ ຈວຄ຺ຄາທິຕ຺ຕາ ຈກາເຣ ກເຕ ‘‘ປຣທ຺ເວຠາໂວ ຐາເນ’’ຕິ ຈກາຣສ຺ສ ທ຺ວິຕ຺ຕໍ. ປຈ຺ຈເຕ ໂອທໂນ ເທວທຕ຺ເຕນ, ‘‘ກ຺ວຈິ ຘາຕູ’’ຕິອາທິນາ ຄຣຸປຸພ຺ພຣສ຺ສໂຕ ປຣສ຺ສ ປຐມປຸຣິສພຫຸວຈນສ຺ສ ກ຺ວຈິ ເຣ ໂຫຕິ. ປຈ຺ຈເຣ, ປຈ຺ຈນ຺ເຕ. ປຈ຺ຈເສ, ປຈ຺ຈວ຺ເຫ. ປຈ຺ເຈ, ປຈ຺ຈາມ຺ເຫ.

ປຣສ຺ສປທາເທເສ ປຈ຺ຈຕິ, ປຈ຺ຈນ຺ຕິ. ປຈ຺ຈສິ, ປຈ຺ຈຖ. ປຈ຺ຈາມິ, ປຈ຺ຈາມ. ຕຖາ ກມ຺ມກຕ຺ຕຣິ ປຈ຺ຈເຕ ໂອທໂນ ສຍເມວ, ປຈ຺ຈນ຺ເຕ. ປຈ຺ຈຕິ, ປຈ຺ຈນ຺ຕິ ວາ ອິຈ຺ຈາທິ.

ຄມິໂຕ ກມ຺ມນິ ອຕ຺ຕໂນປເທ, ຍປ຺ປຈ຺ຈເຍ ຈ ກເຕ –

‘‘ຘາຕູຫິ, ຕສ຺ມິໍ, ເຍ’’ຕິ ຈ ວຕ຺ຕເຕ.

໔໔໘. ອິວຓ຺ຓາຄໂມ ວາ.

ສພ຺ເພຫິ ຘາຕູຫິ ຕສ຺ມິໍ ຠາວກມ຺ມວິສເຍ ຍປ຺ປຈ຺ຈເຍ ປເຣ ອິວຓ຺ຓາຄໂມ ໂຫຕິ ວາຕິ ອີກາຣາຄໂມ. ວວຕ຺ຖິຕວິຠາສຕ຺ໂຖຍໍ ວາສທ຺ໂທ. ຈ຺ຉາເທໂສ, ຄຈ຺ຉີຍເຕ ຄາໂມ ເທວທຕ຺ເຕນ, ຄຈ຺ຉີຍນ຺ເຕ. ຄຈ຺ຉີຍເສ, ຄຈ຺ຉີຍວ຺ເຫ. ຄຈ຺ຉີເຍ, ຄຈ຺ຉີຍາມ຺ເຫ.

ຈ຺ຉາເທສາຠາເວ –

‘‘ຘາຕູຫິ, ໂຍ, ວາ’’ຕິ ຈ ວຕ຺ຕເຕ.

໔໔໙. ປຸພ຺ພຣູປຎ຺ຈ.

ເຫຏ຺ຐານຸຕ຺ເຕຫິ ປຣສ຺ເສເວທໍ, ເຕນ ກຏປວຄ຺ຄຍກາຣລສນ຺ເຕເຫວ ຘາຕູຫິ ປໂຣ ຍປ຺ປຈ຺ຈໂຍ ປຸພ຺ພຣູປມາປຊ຺ຊເຕ ວາຕິ ມກາຣາ ປຣສ຺ສ ຍກາຣສ຺ສ ມກາໂຣ. ຄມ຺ມເຕ, ຄມີຍເຕ, ຄມ຺ມນ຺ເຕ, ຄມີຍນ຺ເຕ. ຄມ຺ມເສ, ຄມີຍເສ, ຄມ຺ມວ຺ເຫ, ຄມີຍວ຺ເຫ. ຄມ຺ເມ, ຄມີເຍ, ຄມ຺ມາມ຺ເຫ, ຄມີຍາມ຺ເຫ.

ປຣສ຺ສປທຕ຺ເຕ – ຄຈ຺ຉີຍ຺ຍຕິ, ຄຈ຺ຉີຍ຺ຍນ຺ຕິ. ຄຈ຺ຉີຍຕິ, ຄຈ຺ຉີຍນ຺ຕິ ວາ. ຄມ຺ມຕິ, ຄມ຺ມນ຺ຕິ. ຄມີຍຕິ, ຄມີຍນ຺ຕິ. ອິກາຣາຄເມ ຄມິຍ຺ຍຕິ, ຄມິຍ຺ຍນ຺ຕິ. ຕຖາ ຆມ຺ມີຍຕິ, ຆມ຺ມີຍນ຺ຕິ ອິຈ຺ຈາທິ.

ວຕ຺ຕມານາວິຠຕ຺ຕິ.

໔໕໐. ປຎ຺ຈມີ ຕຸ ອນ຺ຕຸ, ຫິ ຖ, ມິ ມ, ຕໍ ອນ຺ຕໍ, ສ຺ສຸວ຺ໂຫ, ເອ ອາມເສ.

ຕ຺ວາທໂຍ ທ຺ວາທສ ປຎ຺ຈມີສຎ຺ຎາ ໂຫນ຺ຕິ.

໔໕໑. ອາຓຕ຺ຍາສິຏ຺ເຐນຸຕ຺ຕກາເລ ປຎ຺ຈມີ.

ອາຓຕ຺ຍຕ຺ເຖ ຈ ອາສີສຕ຺ເຖ ອນຸຕ຺ຕກາເລ ປຎ຺ຈມີວິຠຕ຺ຕິ ໂຫຕິ.

ສຕິປິ ກາລາຘິກາເຣ ປຸນ ກາລຄ຺ຄຫເຓນ ວິຘິນິມນ຺ຕນາຊ຺ເຌສນານຸມຕິປຕ຺ຖນາປຕ຺ຕກາລາທີສຸ ຈ ປຎ຺ຈມີ. ອາຓາປນມາຓຕ຺ຕິ, ອາສີສນມາສິຏ຺ໂຐ, ໂສ ຈ ອິຏ຺ຐສ຺ສ ອສມ຺ປຕ຺ຕສ຺ສ ອຕ຺ຖສ຺ສ ປຕ຺ຖນໍ, ຕສ຺ມິໍ ອາຓຕ຺ຍາສິຏ຺ເຐ. ອນຸ ສມີເປ ອຸຕ຺ຕກາໂລ ອນຸຕ຺ຕກາໂລ, ປຈ຺ຈຸປ຺ປນ຺ນກາໂລຕິ ອຕ຺ໂຖ, ນ ອຸຕ຺ຕກາໂລຕິ ວາ ອນຸຕ຺ຕກາໂລ, ຕສ຺ມິໍ ອນຸຕ຺ຕກາເລ, ກາລມນາມສິຕ຺ວາ ໂຫຕີຕິ ອຕ຺ໂຖ.

ຕຕ຺ຖ ອາສີສນຕ຺ເຖ ຠູຘາຕຸໂຕ ປຎ຺ຈມີປຣສ຺ສປທປຐມປຸຣິເສກວຈນໍ ຕຸ, ອປ຺ປຈ຺ຈຍວຸທ຺ຘິອວາເທສາ. ໂສ ສຸຂີ ຠວຕຸ, ເຕ ສຸຂິຕາ ຠວນ຺ຕຸ.

ວິປຣິຓາເມນ ‘‘ອກາຣໂຕ’’ຕິ ວຕ຺ຕເຕ.

໔໕໒. ຫິໂລປໍ ວາ.

ອກາຣໂຕ ປໂຣ ຫິວິຠຕ຺ຕິ ໂລປມາປຊ຺ຊເຕ ວາ. ຕ຺ວໍ ສຸຂີ ຠວ, ຠວາຫິ ວາ, ຫິມ຺ຫິ ທີໂຆ. ຕຸມ຺ເຫ ສຸຂິຕາ ຠວຖ. ອຫໍ ສຸຂີ ຠວາມິ, ມຍໍ ສຸຂິໂນ ຠວາມ.

ອຕ຺ຕໂນປເທ ໂສ ສຸຂີ ຠວຕໍ, ເຕ ສຸຂິຕາ ຠວນ຺ຕໍ. ຕ຺ວໍ ສຸຂີ ຠວສ຺ສຸ, ຕຸມ຺ເຫ ສຸຂິຕາ ຠວວ຺ໂຫ. ອຫໍ ສຸຂີ ຠເວ, ມຍໍ ສຸຂິຕາ ຠວາມເສ.

ກມ຺ມນິ ອນຸຠູຍຕໍ ຕຍາ, ອນຸຠູຍນ຺ຕໍ. ອນຸຠູຍສ຺ສຸ, ອນຸຠູຍວ຺ໂຫ. ອນຸຠູເຍ, ອນຸຠູຍາມເສ. ປຣສ຺ສປທຕ຺ເຕ ອນຸຠູຍ຺ຍຕຸ, ອນຸຠູຍ຺ຍນ຺ຕຸ. ອນຸຠູຍຕຸ, ອນຸຠູຍນ຺ຕຸ ວາ, ອນຸຠູຍ຺ຍາຫິ ອິຈ຺ຈາທິ. ຠາເວ ຠູຍຕໍ.

ອາຓຕ຺ຕິຍໍ ກຕ຺ຕຣິ ເທວທຕ຺ໂຕ ທານິ ໂອທນໍ ປຈຕຸ, ປຈນ຺ຕຸ. ປຈ, ປຈາຫິ, ປຈຖ. ປຈາມິ, ປຈາມ. ປຈຕໍ, ປຈນ຺ຕໍ. ປຈສ຺ສຸ, ປຈວ຺ໂຫ. ປເຈ, ປຈາມເສ.

ກມ຺ມນິ ຍປ຺ປຈ຺ຈຍຈວຄ຺ຄາທິ, ປຈ຺ຈຕໍ ໂອທໂນ ເທວທຕ຺ເຕນ, ປຈ຺ຈນ຺ຕໍ. ປຈ຺ຈສ຺ສຸ, ປຈ຺ຈວ຺ໂຫ. ປຈ຺ເຈ, ປຈ຺ຈາມເສ. ປຣສ຺ສປທຕ຺ເຕ ປຈ຺ຈຕຸ, ປຈ຺ຈນ຺ຕຸ. ປຈ຺ຈ, ປຈ຺ຈາຫິ, ປຈ຺ຈຖ. ປຈ຺ຈາມິ, ປຈ຺ຈາມ.

ຕຖາ ໂສ ຄາມໍ ຄຈ຺ຉຕຸ, ຄຈ຺ຉນ຺ຕຸ. ຄຈ຺ຉ, ຄຈ຺ຉາຫິ, ຄຈ຺ຉຖ. ຄຈ຺ຉາມິ, ຄຈ຺ຉາມ. ຄເມຕຸ, ຄເມນ຺ຕຸ. ຄມ, ຄມາຫິ, ຄເມຖ. ຄເມມິ, ຄເມມ. ຄຈ຺ຉຕໍ, ຄຈ຺ຉນ຺ຕໍ. ຄຈ຺ຉສ຺ສຸ, ຄຈ຺ຉວ຺ໂຫ. ຄຈ຺ເຉ, ຄຈ຺ຉາມເສ. ຆມ຺ມາເທເສ ຆມ຺ມຕຸ, ຆມ຺ມນ຺ຕຸ ອິຈ຺ຈາທິ.

ກມ຺ມນິ ຄຈ຺ຉີຍຕໍ, ຄຈ຺ຉີຍຕຸ, ຄມີຍຕໍ, ຄມີຍຕຸ, ຄມ຺ມຕໍ, ຄມ຺ມຕຸ ອິຈ຺ຈາທິ.

ວິຘິມ຺ຫິ ອິຘ ປພ຺ພໂຕ ໂຫຕຸ, ອຍໍ ປາສາໂທ ສຸວຓ຺ຓມໂຍ ໂຫຕູຕິອາທິ.

ນິມນ຺ຕເນ ອຘິວາເສຕຸ ເມ ຠນ຺ເຕ ຠຄວາ ໂຠຊນໍ, ອິຘ ນິສີທຕຸ ຠວໍ.

ອຊ຺ເຌສເນ ເທເສຕຸ ຠນ຺ເຕ ຠຄວາ ຘມ຺ມໍ.

ອນຸມຕິຍໍ ປຸຈ຺ຉຕຸ ຠວໍ ປຎ຺ຫໍ, ປວິສຕຸ ຠວໍ, ເອຕ຺ຖ ນິສີທຕຸ.