໗. ກິພ຺ພິຘານກຓ຺ຑ

ເຕກາລິກ

ກິຈ຺ຈປ຺ປຈ຺ຈຍນ຺ຕນຍ

ອຖ ຘາຕູຫິເຍວ ຠາວກມ຺ມກຕ຺ຕຸກຣຓາທິສາຘນສຫິຕໍ ກິພ຺ພິຘານມາຣຠີຍເຕ.

ຕຕ຺ຖ ກິຈ຺ຈກິຕກວເສນ ທຸວິຘາ ຫິ ປຈ຺ຈຍາ, ເຕສຸ ກິຈ຺ຈສຎ຺ຎາຍ ປຐມໍ ວຸຕ຺ຕຕ຺ຕາ, ກິຈ຺ຈານມປ຺ປກຕ຺ຕາ ຈ ກິຈ຺ຈປ຺ປຈ຺ຈຍາ ຕາວ ວຸຈ຺ຈນ຺ເຕ.

ຠູ ສຕ຺ຕາຍໍ, ‘‘ຠູຍເຕ, ອຠວິຕ຺ຖ, ຠວິສ຺ສເຕ ວາ ເທວທຕ຺ເຕນາ’’ຕິ ວິຄ຺ຄເຫ –

‘‘ຘາຕຸຍາ ກມ຺ມາທິມ຺ຫິ ໂຓ’’ຕິ ອິໂຕ ‘‘ຘາຕຸຍາ’’ຕິ ສພ຺ພຕ຺ຖ ປຈ຺ຈຍາທິວິຘາເນ ວຕ຺ຕເຕ, ‘‘ປຣາ, ປຈ຺ຈຍາ’’ຕິ ຈ ອຘິກາໂຣ.

໕໔໕. ຠາວກມ຺ເມສຸ ຕພ຺ພານີຍາ.

ຠາວກມ຺ມອິຈ຺ເຈເຕສ຺ວຕ຺ເຖສຸ ສພ຺ພຘາຕູຫິ ຕພ຺ພ ອນີຍອິຈ຺ເຈເຕ ປຈ຺ຈຍາ ປຣາ ໂຫນ຺ຕິ. ໂຍຄວິຠາເຄນ ອຎ຺ຎຕ຺ຖາປິ.

ຕຕ຺ຖ –

ອກມ຺ມເກຫິ ຘາຕູຫິ, ຠາເວ ກິຈ຺ຈາ ຠວນ຺ຕິ ເຕ;

ສກມ຺ມເກຫິ ກມ຺ມຕ຺ເຖ, ອຣຫສກ຺ກຕ຺ຖທີປກາ.

ເຕ ຈ –

໕໔໖. ຓາທໂຍ ເຕກາລິກາ.

ຕິກາເລ ນິຍຸຕ຺ຕາ ເຕກາລິກາ, ເຍ ອິຘ ຕຕິເຍ ຘາຕ຺ວາຘິກາເຣ ວິຫິຕາ ອນິທ຺ທິຏ຺ຐກາລາ ຓາທໂຍ ປຈ຺ຈຍາ, ເຕ ເຕກາລິກາ ໂຫນ຺ຕີຕິ ປຣິຠາສໂຕ ກາລຕ຺ຕເຍປິ ໂຫນ຺ຕິ.

ສີຫຄຕິຍາ ‘‘ກ຺ວຈີ’’ຕິ ວຕ຺ຕເຕ.

໕໔໗. ຍຖາຄມມິກາໂຣ.

ຍຖາຄມໍ ຍຖາປໂຍຄໍ ຊິນວຈນານຸປໂຣເຘນ ຘາຕູຫິ ປໂຣ ອິກາຣາຄໂມ ໂຫຕິ ກ຺ວຈິ ພ຺ຍຎ຺ຊນາທິເກສຸ ກິຈ຺ຈກິຕກປ຺ປຈ຺ຈເຍສຸ, ‘‘ອຎ຺ເຎສຸ ຈາ’’ຕິ ວຸທ຺ຘິ, ‘‘ໂອ ອວ ສເຣ’’ຕິ ອວາເທໂສ, ‘‘ນເຍ ປຣໍ ຍຸຕ຺ເຕ’’ຕິ ປຣໍ ເນຕພ຺ພໍ.

໕໔໘. ເຕ ກິຈ຺ຈາ.

ເຍ ອິຘ ວຸຕ຺ຕາ ຕພ຺ພານີຍຓ຺ຍ ເຕຍ຺ຍ ຣິຈ຺ຈປ຺ປຈ຺ຈຍາ, ເຕ ກິຈ຺ຈສຎ຺ຎາ ໂຫນ຺ຕີຕິ ເວທິຕພ຺ພາ. ຕໂຕ ‘‘ອຎ຺ເຎ ກິຕິ’’ຕິ ວຈນໂຕ ກິຈ຺ຈປ຺ປຈ຺ຈຍານມກິຕກຕ຺ຕາ ນາມພ຺ຍປເທເສ ອສມ຺ປຕ຺ເຕ ‘‘ຕທ຺ຘິຕສມາສກິຕກາ ນາມໍວາຕເວຕຸນາທີສຸ ຈາ’’ຕິ ເອຕ຺ຖ ຈຄ຺ຄຫເຓນ ນາມພ຺ຍປເທໂສ, ຕໂຕ ສ຺ຍາທ຺ຍຸປ຺ປຕ຺ຕິ. ຠາເວ ຠາວສ຺ເສກຕ຺ຕາ ເອກວຈນເມວ, ‘‘ສິ’’ນ຺ຕິ ອມາເທໂສ. ຠວິຕພ຺ພໍ ຠວຕາ ປຎ຺ເຎນ, ຠວນີຍໍ.

ອິຘ ພ຺ຍຎ຺ຊນາທິຕ຺ຕາຠາວາ ອນຸວຕ຺ຕິຕກ຺ວຈິຄ຺ຄຫເຓນ ອິກາຣາຄມາຠາໂວ. ຠາເວ ກິຈ຺ຈປ຺ປຈ຺ຈຍນ຺ຕາ ນປຸໍສກາ. ກມ຺ເມ ຕິລິງ຺ຄາ.

ກມ຺ມນິ ອຠິປຸພ຺ໂພ, ອຠິຠູຍເຕ, ອຠິຠູຍິຕ຺ຖ, ອຠິຠູຍິສ຺ສເຕຕິ ອຠິຠວິຕພ຺ໂພ ໂກໂຘ ປຓ຺ຑິເຕນ, ອຠິຠວິຕພ຺ພາ ຕຓ຺ຫາ, ອຠິຠວິຕພ຺ພໍ ທຸກ຺ຂໍ, ເອວໍ ອຠິຠວນີໂຍ, ອຠິຠວນີຍາ, ອຠິຠວນີຍໍ, ປຸຣິສ ກຎ຺ຎາ ຈິຕ຺ຕສທ຺ທນເຍນ ເນຕພ຺ພໍ, ເອວໍ ສພ຺ພຕ຺ຖ.

ເອຕ຺ຖ ຫິ –

ຕພ຺ພາທີເຫວ ກມ຺ມສ຺ສ, ວຸຕ຺ຕຕ຺ຕາວ ປຸນຕ຺ຕນາ;

ວຕ຺ຕພ຺ພສ຺ສ ອຠາວາ ນ, ທຸຕິຍາ ປຐມາ ຕໂຕ.

ອາສ ອຸປເວສເນ, ອາສີຍິຕ຺ຖ, ອາສີຍເຕ, ອາສີຍິສ຺ສເຕຕິ ອາສິຕພ຺ພໍ ຕຍາ, ອາສນີຍໍ. ກມ຺ເມ ອຸປາສິຕພ຺ໂພ ຄຣຸ, ອຸປາສນີໂຍ.

ສີ ສເຍ, ອສີຍິຕ຺ຖ, ສີຍເຕ, ສີຍິສ຺ສເຕຕິ ສຍິຕພ຺ພໍ ຠວຕາ, ສຍນີຍໍ, ‘‘ເອ ອຍາ’’ຕິ ອຍາເທໂສ, ອຕິສຍິຕພ຺ໂພ ປໂຣ, ອຕິສຍນີໂຍ.

ປທ ຄຕິມ຺ຫິ, ອຸປ຺ປຊ຺ຊິຕ຺ຖ, ອຸປ຺ປຊ຺ຊເຕ, ອຸປ຺ປຊ຺ຊິສ຺ສເຕຕິ ອຸປ຺ປຊ຺ຊິຕພ຺ພໍ ເຕນ, ອຸປ຺ປຊ຺ຊນີຍໍ, ເອຕ຺ຖ ຈ ‘‘ກຕ຺ຕຣີ’’ຕິ ອຘິກາຣໍ ວິນາ ‘‘ທິວາທິໂຕ ໂຍ’’ຕິ ວິນາຘິກາຣໂຍຄວິຠາເຄນ ຍປ຺ປຈ຺ຈໂຍ, ‘‘ຕສ຺ສ ຈວຄ຺ຄຍກາຣ’’ອິຈ຺ຈາທິນາ ຈວຄ຺ໂຄ, ‘‘ປຣທ຺ເວຠາໂວ ຐາເນ’’ຕິ ທ຺ວິຠາໂວ, ປຏິປຊ຺ຊິຕພ຺ໂພ ມຄ຺ໂຄ, ປຏິປຊ຺ຊນີໂຍ.

ພຸຘ ອວຄມເນ, ອພຸຊ຺ຌິຕ຺ຖ, ພຸຊ຺ຌເຕ, ພຸຊ຺ຌິສ຺ສເຕຕິ ພຸຊ຺ຌິຕພ຺ໂພ ຘມ຺ໂມ, ພຸຊ຺ຌນີໂຍ.

ສຸ ສວເຓ, ອສູຍິຕ຺ຖ, ສູຍເຕ, ສູຍິສ຺ສເຕຕິ ໂສຕພ຺ໂພ ຘມ຺ໂມ, ອິຘ ຍຖາຄມຄ຺ຄຫເຓນ ອິກາຣາຄມາຠາໂວ, ສຸຓິຕພ຺ໂພ, ‘‘ສ຺ວາທິໂຕ ຓຸ ຓາ ອຸຓາ ຈາ’’ຕິ ວິນາຘິກາຣໂຍຄວິຠາເຄນ ຓາປຈ຺ຈໂຍ, ສວຓີໂຍ.

ກຣ ກຣເຓ, ກຣີຍິຕ຺ຖ, ກຣີຍຕິ, ກຣີຍິສ຺ສຕີຕິ ອຕ຺ເຖ ຕພ຺ພາ’ນີຍາ.

‘‘ອນ຺ຕສ຺ສ, ກຣສ຺ສ, ຈ, ຕຕ຺ຕ’’ນ຺ຕິ ຈ ວຕ຺ຕເຕ.

໕໔໙. ຕຸໍ ຕຸ ນ ຕພ຺ເພສຸ ວາ.

ກຣອິຈ຺ເຈຕສ຺ສ ຘາຕຸສ຺ສ ອນ຺ຕຠູຕສ຺ສ ຣກາຣສ຺ສ ຕກາຣຕ຺ຕໍ ໂຫຕິ ວາ ຕຸໍ ຕຸ ນ ຕພ຺ພອິຈ຺ເຈເຕສຸ ປຈ຺ຈເຍສຸ ປເຣສຸ. ກຕ຺ຕພ຺ໂພ ຠວຕາ ຘມ຺ໂມ, ກຕ຺ຕພ຺ພາ ປູຊາ, ກຕ຺ຕພ຺ພໍ ກຸສລໍ, ຕຕ຺ຕາຠາເວ ‘‘ກໂຣຕິສ຺ສາ’’ຕິ ວຕ຺ຕມາເນ ‘‘ຕເວຕຸນາທີສຸ ກາ’’ຕິ ເອຕ຺ຖ ອາທິສທ຺ເທນ ຕພ຺ເພປິ ກາເທໂສ, ກາຕພ຺ພໍ ຫິຕໍ.

໕໕໐. ຣຫາທິໂຕ ຓ.

ຣກາຣ ຫຫາຣາທ຺ຍນ຺ເຕຫິ ຘາຕູຫິ ປຣສ຺ສ ອນານີຍາທິນກາຣສ຺ສ ຓກາໂຣ ໂຫຕິ. ອາທິສທ຺ເທນ ຣມຸ ອປຎາຕາທິໂຕປິ.

ຣຫາທິໂຕ ປຣສ຺ເສຕ຺ຖ, ນກາຣສ຺ສ ອສມ຺ຠວາ;

ອນານີຍາທິນສ຺ເສວ, ສາມຖ຺ຍາຍໍ ຓກາຣຕາ.

ກຣຓີໂຍ ຘມ຺ໂມ, ກຣຓາຣໂຫຕິ ອຕ຺ໂຖ, ກຣຓີຍາ, ກຣຓີຍໍ.

ຠຣ ຠຣເຓ, ຠຣີຍຕີຕິ ຠຣິຕພ຺ໂພ, ຠຣຓີໂຍ.

ຄຫ ອຸປາທາເນ, ອຄຍ຺ຫິຕ຺ຖ, ຄຍ຺ຫຕິ, ຄຍ຺ຫິສ຺ສຕີຕິ ຄເຫຕພ຺ໂພ, ‘‘ເຕສຸ ວຸທ຺ຘີ’’ຕິອາທິນາ ອິກາຣສ຺ເສກາໂຣ, ສງ຺ຄຓ຺ຫິຕພ຺ໂພ, ‘‘ຄຫາທິໂຕ ປ຺ປຓ຺ຫາ’’ຕິ ວິນາຘິກາຣໂຍຄວິຠາເຄນ ຓ຺ຫາປຈ຺ຈໂຍ, ຫໂລປສຣໂລປາທິ, ສງ຺ຄຓ຺ຫຓີໂຍ, ຄຫຓີໂຍ.

ອາທິຄ຺ຄຫເຓນ ຣມຸ ກີຬາຍໍ, ຣມີຍິຕ຺ຖ, ຣມີຍຕິ, ຣມີຍິສ຺ສຕີຕິ ຣມິຕພ຺ໂພ, ຣມຓີໂຍ ວິຫາໂຣ.

ອປ ປາປຸຓເນ, ອຸຓາປຈ຺ຈໂຍ, ປາປີຍຕີຕິ ປາປຸຓິຕພ຺ໂພ, ‘‘ຄຸປາທີນຎ຺ຈາ’’ຕິ ຘາຕ຺ວນ຺ຕສ຺ສ ໂລໂປ, ທ຺ວິຕ຺ຕຎ຺ຈ, ປຕ຺ຕພ຺ໂພ, ປຕ຺ເຕຍ຺ໂຍ, ປາປຸຓຓີໂຍ, ປາປຓີໂຍ.

‘‘ອນ຺ຕສ຺ສ, ວາ’’ຕິ ຈ ວຕ຺ຕເຕ.

໕໕໑. ຄມ ຂນ ຫນາທີນໍ ຕຸໍຕພ຺ພາທີສຸ ນ.

ຄມ ຂນ ຫນອິຈ຺ເຈວມາທີນໍ ມກາຣ ນກາຣນ຺ຕານໍ ຘາຕູນມນ຺ຕສ຺ສ ນກາໂຣ ໂຫຕິ ວາ ຕຸໍ ຕພ຺ພ ຕເວ ຕຸນ ຕ຺ວານຕ຺ວາອິຈ຺ເຈວມາທີສຸ ຕກາຣາທິປ຺ປຈ຺ຈເຍສຸ ປເຣສຸ. ອຄຈ຺ຉີຍິຕ຺ຖ, ຄຈ຺ຉີຍຕິ, ຄຈ຺ຉີຍິສ຺ສຕີຕິ ຄນ຺ຕພ຺ໂພ ມຄ຺ໂຄ, ຄມິຕພ຺ພໍ, ຄມນີຍໍ.

ຂນຸ ອວທາຣເຓ, ອຂຎ຺ຎິຕ຺ຖ, ຂຎ຺ຎຕິ, ຂຎ຺ຎິສ຺ສຕີຕິ ຂນ຺ຕພ຺ພໍ ອາວາຏໍ, ຂນິຕພ຺ພໍ, ‘‘ກ຺ວຈິ ຘາຕູ’’ຕິອາທິນາ ຂນນ຺ຕສ຺ສ ຓຕ຺ຕຎ຺ຈ, ຂຓິຕພ຺ພໍ, ຂຓຓີຍໍ, ຂນນີຍໍ ວາ.

ຫນ ຫິໍສາ ຄຕີສຸ, ອຫຎ຺ຎິຕ຺ຖ, ຫຎ຺ຎເຕ, ຫຎ຺ຎິສ຺ສເຕຕິ ຫນ຺ຕພ຺ພໍ, ຫນິຕພ຺ພໍ, ຫນນີຍໍ.

ມນ ຎາເຓ, ອມຎ຺ຎິຕ຺ຖ, ມຎ຺ຎເຕ, ມຎ຺ຎິສ຺ສເຕຕິ ມນ຺ຕພ຺ໂພ, ມນິຕພ຺ໂພ, ຍປ຺ປຈ຺ຈເຍ ຈວຄ຺ຄາທິ, ມຎ຺ຎິຕພ຺ພໍ, ມຎ຺ຎນີຍໍ.

ປູຊ ປູຊາຍໍ, ອປູຊີຍິຕ຺ຖ, ປູຊີຍຕິ, ປູຊີຍິສ຺ສຕີຕິ ອຕ຺ເຖ ຕພ຺ພານີຍາ. ‘‘ຈຸຣາທິໂຕ ເຓ ຓຍາ’’ຕິ ອກຕ຺ຕຣິປິ ເຓຓຍາ, ອິກາຣາຄມານີເຍສຸ ‘‘ສຣໂລໂປ’’ຕິອາທິນາ ກາຣິຕສຣສ຺ສ ໂລໂປ, ປູເຊຕພ຺ໂພ, ປູຊຍິຕພ຺ໂພ, ປູຊນີໂຍ ຠຄວາ.

‘‘ຕພ຺ພານີຍາ’’ຕິ ໂຍຄວິຠາເຄນ ກຕ຺ຕຸກຣເຓສຸປິ, ຍາ ປາປຸຓເນ, ນິຍ຺ຍາຕີຕິ ນິຍ຺ຍານີໂກ ມຄ຺ໂຄ. ຄຈ຺ຉນ຺ຕີຕິ ຄມນີຍາ ໂຠຄາ. ນຫ ໂສເຈ, ນຫາຍຕິ ເອເຕນາຕິ ນຫານີຍໍ ຈຸຓ຺ຓໍ.

‘‘ຠາວກມ຺ເມສູ’’ຕິ ອຘິກາໂຣ.

໕໕໒. ຓ຺ໂຍ ຈ.

ຠາວກມ຺ເມສຸ ສພ຺ພຘາຕູຫິ ຓ຺ຍປ຺ປຈ຺ຈໂຍ ໂຫຕິ, ຈຄ຺ຄຫເຓນ ‘‘ຎາເຕຍ຺ຍ’’ນ຺ຕິອາທີສຸ ເຕຍ຺ຍປ຺ປຈ຺ຈໂຍ ຈ.

໕໕໓. ກາຣິຕໍ ວິຍ ຓານຸພນ຺ໂຘ.

ອນຸພນ຺ໂຘ ອປ຺ປໂຍຄີ, ຓກາຣານຸພນ຺ໂຘ ປຈ຺ຈໂຍ ກາຣິຕໍ ວິຍ ທຏ຺ຐພ຺ໂພຕິ ກາຣິຕພ຺ຍປເທໂສ, ‘‘ກາຣິຕານໍ ໂຓ ໂລປ’’ນ຺ຕິ ຓໂລໂປ, ‘‘ອສໍໂຍຄນ຺ຕສ຺ສ ວຸທ຺ຘິ ກາຣິເຕ’’ຕິ ວຸທ຺ຘິ, ອິກາຣາຄໂມ, ກຕ຺ຕພ຺ພໍ ກາຣິຍໍ.

ຫຣ ຫຣເຓ, ອຫຣີຍິຕ຺ຖ, ຫຣີຍຕິ, ຫຣີຍິສ຺ສຕີຕິ ວາ ຫຣິຕພ຺ພໍ ຫາຣິຍໍ.

ຠຣ ຠຣເຓ, ຠຣິຕພ຺ພໍ ຠາຣິຍໍ.

ລຠ ລາເຠ, ລຠິຕພ຺ພໍ ລພ຺ຠໍ, ‘‘ຍວຕໍ ຕລນ’’ອິຈ຺ຈາທິສຸຕ຺ເຕ ກາຣຄ຺ຄຫເຓນ ຍວໂຕ ຠກາຣສ຺ສ ຠກາໂຣ, ທ຺ວິຕ຺ຕໍ.

ສາສ ອນຸສິຏ຺ຐິມ຺ຫິ, ສາສິຕພ຺ໂພ ສິສ຺ໂສ, ‘‘ກ຺ວຈິ ຘາຕູ’’ຕິອາທິນາ ອາກາຣສ຺ສິກາໂຣ.

ວຈ ວິຍຕ຺ຕິຍໍ ວາຈາຍໍ, ຓ຺ຍປ຺ປຈ຺ຈຍາທິມ຺ຫິ ກເຕ ‘‘ອນ຺ຕານໍ, ຓານຸພນ຺ເຘ’’ຕິ ຈ ວຕ຺ຕເຕ.

໕໕໔. ກຄາ ຈຊານໍ.

ຈຊອິຈ຺ເຈເຕສໍ ຘາຕ຺ວນ຺ຕານໍ ກກາຣ ຄກາຣາເທສາ ໂຫນ຺ຕິ ຓກາຣານຸພນ຺ເຘ ປຈ຺ຈເຍ ປເຣຕິ ຈສ຺ສ ກາເທໂສ. ວຈນີຍໍ ວາກ຺ຍໍ.

ຠຊ ເສວາຍໍ, ຠຊນີຍໍ ຠາຄ຺ຍໍ, ຊສ຺ສ ຄາເທໂສ.

ຈິ ຈເຍ, ອຈີຍິຕ຺ຖ, ຈີຍຕິ, ຈີຍິສ຺ສຕີຕິ ເຈຕພ຺ພໍ ເຈຍ຺ຍໍ, ອິກາຣສ຺ເສກາໂຣ ວຸທ຺ຘິ, ຍກາຣສ຺ສ ທ຺ວິຕ຺ຕໍ, ວິນິປຸພ຺ໂພ ‘‘ໂທ ຘສ຺ສ ຈາ’’ຕິ ສຸຕ຺ເຕ ຈຄ຺ຄຫເຓນ ຈກາຣສ຺ສ ຉກາໂຣ, ວິນິຈ຺ເຉຍ຺ຍໍ, ວິນິຈ຺ຉິຕພ຺ພໍ, ວິນິຈ຺ຉນີຍໍ. ‘‘ກິຍາທິໂຕ ນາ’’ຕິ ວິນາຘິກາຣໂຍຄວິຠາເຄນ ຕພ຺ພານີຍ ຕຸໍ ຕຸນາ ທີສຸ ຈ ນາປຈ຺ຈໂຍ, ວິນິຈ຺ຉິນິຕພ຺ພໍ, ວິນິຈ຺ຉິນນີຍໍ.

ນີ ປາປຸຓເນ, ອນີຍິຕ຺ຖ, ນີຍຕິ, ນີຍິສ຺ສຕີຕິ ເນຍ຺ໂຍ, ເນຍ຺ຍາ, ເນຍ຺ຍໍ. ເນຕພ຺ພໍ.

ຓ຺ຍຄ຺ຄຫຓໍ ຉຏ຺ຐີຍນ຺ຕວເສນານຸວຕ຺ຕເຕ, ມຓ຺ຑູກຄຕິຍາ ອນ຺ຕຄ຺ຄຫຓຎ຺ຈ ຕຕິຍນ຺ຕວເສນ.

໕໕໕. ຠູໂຕພ຺ພ.

ຠູ ອິຈ຺ເຈຕສ຺ມາ ປຣສ຺ສ ຓ຺ຍປ຺ປຈ຺ຈຍສ຺ສ ສຫ ຘາຕ຺ວນ຺ເຕນ ອພ຺ພາເທໂສ ໂຫຕິ. ຠວິຕພ຺ໂພ ຠພ຺ໂພ, ຠພ຺ພາ, ຠພ຺ພໍ.

‘‘ຓ຺ຍສ຺ສ, ອນ຺ເຕນາ’’ຕິ ຈ ວຕ຺ຕເຕ.

໕໕໖. ວທ ມທ ຄມຸ ຍຸຊ ຄຣຫາກາຣາທີຫິ ຊ຺ຊມ຺ມຄ຺ຄຍ຺ເຫຍ຺ຍາຄາໂຣ ວາ.

ວທ ມທ ຄມຸ ຍຸຊ ຄຣຫອິຈ຺ເຈວມາທີຫິ ຘາຕູຫິ, ອາກາຣນ຺ເຕຫິ ຈ ປຣສ຺ສ ຓ຺ຍປ຺ປຈ຺ຈຍສ຺ສ ຘາຕ຺ວນ຺ເຕນ ສຫ ຍຖາກ຺ກມໍ ຊ຺ຊ ມ຺ມ ຄ຺ຄ ຍ຺ຫ ເອ ຍ຺ຍອິຈ຺ເຈເຕ ອາເທສາ ໂຫນ຺ຕິ ວາ, ຄຣສ຺ສ ຈ ຄາຣາເທໂສ, ຄຣຫສ຺ສ ຄຣສ຺ເສວາຍໍ ຄາໂຣ. ວວຕ຺ຖິຕວິຠາສຕ຺ໂຖຍໍ ວາສທ຺ໂທ.

ວທ ວິຍຕ຺ຕິຍໍ ວາຈາຍໍ, ອວຊ຺ຊິຕ຺ຖ, ວຊ຺ຊຕິ, ວຊ຺ຊິສ຺ສຕີຕິ ວາ ວຊ຺ຊໍ ວທນີຍໍ, ຣສ຺ສຕ຺ຕໍ. ວຊ຺ຊໍ ໂທໂສ.

ມທ ອຸມ຺ມາເທ, ອມຊ຺ຊິຕ຺ຖ, ມຊ຺ຊເຕ, ມຊ຺ຊິສ຺ສຕິ ເອເຕນາຕິ ມຊ຺ຊໍ ມທນີຍໍ. ມທຄ຺ຄຫເຓນ ກຣເຓປິ ຓ຺ຍປ຺ປຈ຺ຈໂຍ. ຄມຸ ສປ຺ປ ຄຕິມ຺ຫິ, ຄນ຺ຕພ຺ພໍ ຄມ຺ມໍ.

ຍຸຊ ໂຍເຄ, ອຍຸຊ຺ຊິຕ຺ຖ, ຍຸຊ຺ຊເຕ, ຍຸຊ຺ຊິສ຺ສຕີຕິ ໂຍຄ຺ຄໍ, ນິໂຍຊ຺ໂຊ ວາ.

ຄຣຫ ນິນ຺ທາຍໍ, ອຄຣຍ຺ຫິຕ຺ຖ, ຄຣຫີຍຕິ, ຄຣຫີຍິສ຺ສຕີຕິ ອຕ຺ເຖ ຓ຺ຍປ຺ປຈ຺ຈໂຍ, ຕສ຺ສິມິນາ ຘາຕ຺ວນ຺ເຕນ ສຫ ຍ຺ຫາເທໂສ, ຄຣສ຺ສ ຄາຣາເທໂສ ຈ, ຄາຣຍ຺ໂຫ, ຄາຣຍ຺ຫາ, ຄາຣຍ຺ຫໍ, ຄຣຫຓີຍໍ.

ອາທິສທ຺ເທນ ອຎ຺ເຎປິ ທມຊຫນ຺ຕາ ຄຍ຺ຫນ຺ເຕ. ຄທ ວິຍຕ຺ຕິຍໍ ວາຈາຍໍ, ຄຊ຺ຊເຕ, ຄທນີຍໍ ວາ ຄຊ຺ຊໍ. ປທ ຄຕິມ຺ຫິ, ປຊ຺ຊນີຍໍ ປຊ຺ຊໍ ຄາຖາ. ຂາທ ຠກ຺ຂເຓ, ຂຊ຺ຊເຕຕິ ຂຊ຺ຊໍ ຂາທນີຍໍ. ທມຸ ທມເນ, ອທມ຺ມິຕ຺ຖ, ທມ຺ມເຕ, ທມີຍິສ຺ສຕີຕິ ທມ຺ໂມ ທມນີໂຍ. ຠຸຊ ປາລນພ຺ຍວຫຣເຓສຸ, ອຠຸຊ຺ຊິຕ຺ຖ, ຠຸຊ຺ຊຕິ, ຠຸຊ຺ຊິສ຺ສຕີຕິ ໂຠຄ຺ຄໍ, ໂຠຊ຺ຊໍ ວາ, ກາຣຄ຺ຄຫເຓນ ຍສ຺ສ ຊກາໂຣ. ຄເຫຕພ຺ພໍ ຄຍ຺ຫມິຈ຺ຈາທິ.

ອາກາຣນ຺ຕໂຕ ປນ ທາ ທາເນ, ອທີຍິຕ຺ຖ, ທີຍຕິ, ທີຍິສ຺ສຕີຕິ ອຕ຺ເຖ ຓ຺ຍປ຺ປຈ຺ຈໂຍ, ຕສ຺ສິມິນາ ຘາຕ຺ວນ຺ເຕນ ອາກາເຣນ ສຫ ເອຍ຺ຍາເທໂສ, ເທຍ຺ຍໍ, ທາຕພ຺ພໍ. ອນີເຍ ‘‘ສຣໂລໂປ’’ຕິອາທິນາ ປຸພ຺ພສຣສ຺ສ ໂລເປ ສມ຺ປຕ຺ເຕ ຕຕ຺ເຖວ ຕຸຄ຺ຄຫເຓນ ນິເສເຘຕ຺ວາ ‘‘ສຣາ ສເຣ ໂລປ’’ນ຺ຕິ ອາກາເຣ ລຸຕ຺ເຕ ປຣສຣສ຺ສ ທີໂຆ, ທານີຍໍ.

ປາ ປາເນ, ອປີຍິຕ຺ຖ, ປີຍຕິ, ປີຍິສ຺ສຕີຕິ ເປຍ຺ຍໍ, ປາຕພ຺ພໍ, ປານີຍໍ. ຫາ ຈາເຄ, ອຫີຍິຕ຺ຖ, ຫີຍຕິ, ຫີຍິສ຺ສຕີຕິ ເຫຍ຺ຍໍ, ຫາຕພ຺ພໍ, ຫານີຍໍ. ມາ ມາເນ, ອມີຍິຕ຺ຖ, ມີຍຕິ, ມີຍິສ຺ສຕີຕິ ເມຍ຺ຍໍ, ມາຕພ຺ພໍ, ມິນິຕພ຺ພໍ, ເມຕພ຺ພໍ ວາ. ຎາ ອວໂພຘເນ, ອຎ຺ຎາຍິຕ຺ຖ, ຎາຍຕິ, ຎາຍິສ຺ສຕີຕິ ເຎຍ຺ຍໍ, ຎາຕພ຺ພໍ, ຎາເຕຍ຺ຍໍ. ‘‘ຎາສ຺ສ ຊາ ຊໍ ນາ’’ຕິ ຊາເທເສ ‘‘ກິຍາທິໂຕ ນາ’’ຕິ ວິນາຘິກາຣໂຍຄວິຠາເຄນ ນາປຈ຺ຈໂຍ, ອິກາຣາຄໂມ ຈ, ຊານິຕພ຺ພໍ, ວິຊານນີຍໍ. ຂ຺ຍາປກຖເນ, ສງ຺ຂ຺ຍາຕພ຺ພໍ, ສງ຺ຂ຺ເຍຍ຺ຍໍ ອິຈ຺ຈາທິ.

໕໕໗. ກຣມ຺ຫາ ຣິຈ຺ຈ.

ກຣຘາຕຸໂຕ ຣິຈ຺ຈປ຺ປຈ຺ຈໂຍ ໂຫຕິ ຠາວກມ຺ເມສຸ.

໕໕໘. ຣມ຺ຫິ ຣນ຺ໂຕ ຣາທິ ໂນ.

ຣກາຣານຸພນ຺ເຘ ປຈ຺ຈເຍ ປເຣ ສພ຺ໂພ ຘາຕ຺ວນ຺ໂຕ ຣາທິ ປຈ຺ຈຍຣກາຣມຣິຍາໂທ ໂນ ໂຫຕິ, ໂລປມາປຊ຺ຊເຕຕິ ອຕ຺ໂຖ. ຣນ຺ໂຕຕິ ເອຕ຺ຖ ຣກາໂຣ ສນ຺ຘິໂຊ, ກຕ຺ຕພ຺ພໍ ກິຈ຺ຈໍ. ‘‘ຣິຈ຺ຈາ’’ຕິ ໂຍຄວິຠາເຄນ ຠຣາທິໂຕປິ ຣິຈ຺ຈປ຺ປຈ຺ຈໂຍ, ຍຖາ, ຠຣີຍຕີຕິ ຠຈ຺ໂຈ, ສຣໂລໂປ. ອິ ຄຕິມ຺ຫິ, ປຕິ ເອຕພ຺ໂພ ປຏິຈ຺ໂຈ.

໕໕໙. ເປສາຕິສຄ຺ຄປຕ຺ຕກາເລສຸ ກິຈ຺ຈາ.

ເປສ ອຕິສຄ຺ຄ ປຕ຺ຕກາລອິຈ຺ເຈເຕສ຺ວຕ຺ເຖສຸ ກິຈ຺ຈປ຺ປຈ຺ຈຍາ ໂຫນ຺ຕິ. ເປສນໍ ນາມ ‘‘ກຕ຺ຕພ຺ພມິທໍ ຠວຕາ’’ຕິ ອາຓາປນໍ, ອຊ຺ເຌສນຎ຺ຈ. ອຕິສຄ຺ໂຄນາມ ‘‘ກິມິທໍ ມຍາ ກຕ຺ຕພ຺ພ’’ນ຺ຕິ ປຸຏ຺ຐສ຺ສ ວາ ‘‘ປາໂຓ ນ ຫນ຺ຕພ຺ໂພ’’ຕິອາທິນາ ປຏິປຕ຺ຕິທສ຺ສນມຸເຂນ ວາ ກຕ຺ຕພ຺ພສ຺ສ ອນຸຎ຺ຎາ. ປຕ຺ຕກາໂລ ນາມ ສມ຺ປຕ຺ຕສມໂຍ ໂຍ ອຕ຺ຕໂນ ກິຈ຺ຈກຣຓສມຍມນຸປປຣິກ຺ຂິຕ຺ວາ ນ ກໂຣຕິ, ຕສ຺ສ ສມຍາໂຣຈນໍ, ນ ຕຕ຺ຖ ອຊ຺ເຌສນມຕ຺ຖີຕິ. ເຕ ຈ ‘‘ຠາວກມ຺ເມສຸ ກິຈ຺ຈຕ຺ຕກ຺ຂຕ຺ຖາ’’ຕິ ວຸຕ຺ຕຕ຺ຕາ ຠາວກມ຺ເມສ຺ເວວ ຠວນ຺ຕິ.

ເປສເນ ຕາວ – ກຣີຍຕຸ ຠວຕາ ກມ຺ມນ຺ຕິ ອຕ຺ເຖ ອິມິນາ ຕພ຺ພານີຍາ, ເສສໍ ວຸຕ຺ຕນຍເມວ, ກຕ຺ຕພ຺ພໍ ກມ຺ມໍ ຠວຕາ, ກຣຓີຍໍ ກິຈ຺ຈໍ ຠວຕາ.

ອຕິສຄ຺ເຄ ຠຸຊ຺ຊຕຸ ຠວຕາຕິ ອຕ຺ເຖ ຕພ຺ພາທິ, ‘‘ອຎ຺ເຎສຸ ຈາ’’ຕິ ວຸທ຺ຘິ.

‘‘ຕສ຺ສາ’’ຕິ ວຕ຺ຕເຕ.

໕໖໐. ຠຸຊາທີນມນ຺ໂຕ ໂນ ທ຺ວິ ຈ.

ຠຸຊອິຈ຺ເຈວມາທີນໍ ຊກາຣາທິອນ຺ຕານໍ ຘາຕູນມນ຺ໂຕ ໂນ ໂຫຕິ, ປຣສ຺ສ ກິຈ຺ຈກິຕກປ຺ປຈ຺ຈຍຕກາຣສ຺ສ ຈ ທ຺ເວຠາໂວ ໂຫຕິ. ໂຠຕ຺ຕພ຺ພໍ ໂຠຊນໍ ຠວຕາ, ໂຠຊນີຍໍ ໂຠຊ຺ຊໍ ຠວຕາ.

ອິກາຣາຄມຍຸຕ຺ຕຕກາເຣ ປນ – ‘‘ນມກຣານມນ຺ຕານໍ ນິຍຸຕ຺ຕຕມ຺ຫີ’’ຕິ ເອຕ຺ຖ ‘‘ອນ຺ຕານໍ ນິຍຸຕ຺ຕຕມ຺ຫີ’’ຕິ ໂຍຄວິຠາເຄນ ຘາຕ຺ວນ຺ຕໂລປາທິນິເສໂຘ, ‘‘ຣຸຘາທິໂຕ ນິຄ຺ຄຫີຕປຸພ຺ພ’’ນ຺ຕິ ວິນາຘິກາຣໂຍຄວິຠາເຄນ, ‘‘ນິຄ຺ຄຫີຕຎ຺ຈາ’’ຕິ ວາ ນິຄ຺ຄຫີຕາຄໂມ, ຠຸຎ຺ຊິຕພ຺ພໍ ຕຍາ, ຍຸຎ຺ຊິຕພ຺ພໍ.

ສມຍາໂຣຈເນ ປນ – ອິ ອຊ຺ຌຍເນ ອຘິປຸພ຺ໂພ, ອຘີຍຕໍ ຠວຕາຕິ ອຕ຺ເຖ ຕພ຺ພານີຍາທິ, ອິກາຣາຄມວຸທ຺ຘິອຍາເທສອຊ຺ຌາເທສາ ຈ, ຓ຺ຍປ຺ປຈ຺ຈເຍ ຕຸ ວຸທ຺ຘິ, ຍກາຣສ຺ສ ທ຺ວິຕ຺ຕຎ຺ຈ, ອຊ຺ຌຍິຕພ຺ພໍ, ອຊ຺ເຌຍ຺ຍໍ ຠວຕາ, ອຊ຺ຌຍນີຍໍ ຠວຕາ, ອວສ຺ສໍ ກຕ຺ຕພ຺ພນ຺ຕິ ວາກ຺ເຍ ປນ ‘‘ກິຈ຺ຈາ’’ຕິ ອຘິກິຈ຺ຈ ‘‘ອວສ຺ສກາຘມິເຓສຸ ຓີ ຈາ’’ຕິ ອວສ຺ສກາຘມິຓຕ຺ເຖ ຈ ຕພ຺ພາທໂຍ, ກຕ຺ຕພ຺ພໍ ເມ ຠວຕາ ເຄຫໍ, ກຣຓີຍໍ, ກາຣິຍໍ. ເອວໍ ທາຕພ຺ພໍ ເມ ຠວຕາ ສຕໍ, ທານີຍໍ, ເທຍ຺ຍໍ.

ຘຣ ຘາຣເຓ, ຈຸຣາທິຕ຺ຕາ ເຓຓຍາ, ວຸທ຺ຘິ, ອິກາຣາຄໂມ ຈ, ຘາເຣຕພ຺ພໍ, ຘາຣຍິຕພ຺ພໍ ອິຈ຺ຈາທິ.

‘‘ນຸທາທີຫິ ຍຸຓ຺ວູນມນານນາການນກາ ສກາຣິເຕຫິ ຈາ’’ຕິ ສກາຣິເຕຫິປິ ຍຸຓ຺ວູນມາເທສວິຘານໂຕເຍວ ຘາຕຸປ຺ປຈ຺ຈຍນ຺ຕໂຕປິ ກິຈ຺ຈກິຕກປ຺ປຈ຺ຈຍາ ຠວນ຺ຕີຕິ ທຏ຺ຐພ຺ໂພ. ເຕນ ຕິຕິກ຺ຂາປີຍຕີຕິ ຕິຕິກ຺ຂາເປຕພ຺ໂພ. ເອວໍ ຕິກິຈ຺ຉາເປຕພ຺ໂພ ຕິກິຈ຺ຉາປນີໂຍ. ອຠາວີຍິຕ຺ຖ, ຠາວີຍຕິ, ຠາວີຍິສ຺ສຕີຕິ ຠາເວຕພ຺ໂພ ມຄ຺ໂຄ. ຠາວຍິຕພ຺ໂພ, ຠາວນີໂຍ, ຠາວນີຍໍ, ຠາວນີຍາ, ອກາຣີຍິຕ຺ຖ, ກາຣີຍຕິ, ກາຣີຍິສ຺ສຕີຕິ ກາເຣຕພ຺ພໍ, ກາຣຍິຕພ຺ພໍ, ກາຣາເປຕພ຺ພໍ, ກາຣາປຍິຕພ຺ພໍ, ກາຣາປນີຍມິຈ຺ຈາທິ ຈ ສິທ຺ຘໍ ຠວຕິ.

ກຕ຺ຕພ຺ພໍ ກຣຓີຍຎ຺ຈ, ກາຣິຍໍ ກິຈ຺ຈມິຈ຺ຈປິ;

ກາເຣຕພ຺ພໍ ຕຖາ ກາຣາ-ເປຕພ຺ພໍ ກິຈ຺ຈສງ຺ຄໂຫ.

ກິຈ຺ຈປ຺ປຈ຺ຈຍນ຺ຕນໂຍ.

ເຕກາລິກ

ກິຕກປ຺ປຈ຺ຈຍນ຺ຕນຍ

ອິທານິ ກິຕກປ຺ປຈ຺ຈຍາ ວຸຈ຺ຈນ຺ເຕ.

ກຣ ກຣເຓ, ປຸເຣ ວິຍ ຘາຕຸສຎ຺ຎາທິ.

ກຸມ຺ຠອິຈ຺ຈຸປປທໍ, ຕໂຕ ທຸຕິຍາ.

‘‘ກຸມ຺ຠໍ ກໂຣຕິ, ອກາສິ, ກຣິສ຺ສຕີ’’ຕິ ວາ ວິຄ຺ຄເຫ –

‘‘ປຣາ, ປຈ຺ຈຍາ’’ຕິ ຈ ວຕ຺ຕເຕ.

໕໖໑. ຘາຕຸຍາ ກມ຺ມາທິມ຺ຫິ ໂຓ.

ກມ຺ມສ຺ມິໍ ອາທິມ຺ຫິ ສຕິ ຘາຕຸຍາ ປໂຣ ຓປ຺ປຈ຺ຈໂຍ ໂຫຕິ.

ໂສ ຈ –

໕໖໒. ອຎ຺ເຎ ກິຕ.

ຕຕິເຍ ຘາຕ຺ວາຘິກາເຣ ວິຫິຕາ ກິຈ຺ເຈຫິ ອຎ຺ເຎ ປຈ຺ຈຍາ ກິຕິຈ຺ເຈວ ສຎ຺ຎາ ໂຫນ຺ຕີຕິ ກິຕສຎ຺ຎາ ກຕາ.

໕໖໓. ກຕ຺ຕຣິ ກິຕ.

ກຕ຺ຕຣິ ກາຣເກ ກິຕປຈ຺ຈໂຍ ໂຫຕີຕິ ນິຍມໂຕ ກຕ຺ຕຣິ ຠວຕິ, ໂສ ຈ ‘‘ຓາທໂຍ ເຕກາລິກາ’’ຕິ ວຸຕ຺ຕຕ຺ຕາ ກາລຕ຺ຕເຍ ຈ ໂຫຕິ. ປຸເຣ ວິຍ ກາຣິຕພ຺ຍປເທສຓໂລປວຸທ຺ຘິໂຍ, ປຈ຺ຈຍນ຺ຕສ຺ສາລິງ຺ຄຕ຺ຕາ ສ຺ຍາທິມ຺ຫິ ອສມ຺ປຕ຺ເຕ ‘‘ຕທ຺ຘິຕສມາສກິຕກາ ນາມໍວາຕເວຕຸນາທີສຸ ຈາ’’ຕິ ກິຕກນ຺ຕຕ຺ຕາ ນາມໍວ ກເຕ ສ຺ຍາທ຺ຍຸປ຺ປຕ຺ຕິ, ຕໂຕ ກຸມ຺ຠໍ ກໂຣຕີຕິ ອຕ຺ເຖ ‘‘ອມາທໂຍ ປຣປເທຠີ’’ຕິ ທຸຕິຍາຕປ຺ປຸຣິສສມາໂສ, ‘‘ນາມານ’’ນ຺ຕິອາທິນາ ສມາສສຎ຺ຎາ, ‘‘ເຕສໍ ວິຠຕ຺ຕິໂຍ ໂລປາ ຈາ’’ຕິ ວິຠຕ຺ຕິໂລໂປ, ‘‘ປກຕິ ຈສ຺ສ ສຣນ຺ຕສ຺ສາ’’ຕິ ປກຕິຠາໂວ, ປຸນ ສມາສຕ຺ຕາ ນາມມິວ ກເຕ ສ຺ຍາທ຺ຍຸປ຺ປຕ຺ຕິ.

ໂສ ກຸມ຺ຠກາໂຣ, ເຕ ກຸມ຺ຠກາຣາ ອິຈ຺ຈາທິ. ອິຕ຺ຖິຍໍ ກຸມ຺ຠກາຣີ, ກຸມ຺ຠກາຣິໂຍ ອິຈ຺ຈາທິ, ຕຖາ ກມ຺ມໍ ກໂຣຕີຕິ ກມ຺ມກາໂຣ. ເອວໍ ມາລາກາໂຣ, ກຏ຺ຐກາໂຣ, ຣຖກາໂຣ, ສຸວຓ຺ຓກາໂຣ, ສຸຕ຺ຕກາໂຣ, ວຸຕ຺ຕິກາໂຣ, ຏີກາກາໂຣ.

ຄຫ ອຸປາທາເນ, ປຕ຺ຕໍ ອຄຓ຺ຫິ, ຄຓ຺ຫາຕິ, ຄຓ຺ຫິສ຺ສຕີຕິ ວາ ປຕ຺ຕຄ຺ຄາໂຫ. ເອວໍ ຣສ຺ມິຄ຺ຄາໂຫ, ຣຊ຺ຊຸຄ຺ຄາໂຫ.

ເວ ຕນ຺ຕສນ຺ຕາເນ, ຕນ຺ຕໍ ອວາຍິ, ວາຍຕິ, ວາຍິສ຺ສຕີຕິ ວາ ຕນ຺ຕວາໂຍ, ‘‘ເຕ ອາວາຍາ ກາຣິເຕ’’ຕິ ອາຍາເທໂສ, ວາກ຺ເຍ ປເນຕ຺ຖ ‘‘ເຕ ອາວາຍາ’’ຕິ ໂຍຄວິຠາເຄນ ອາຍາເທໂສ. ເອວໍ ຕຸນ຺ນວາໂຍ.

ມາ ປຣິມາເຓ, ຘຎ຺ຎໍ ອມິນິ, ມິນາຕິ, ມິນິສ຺ສຕີຕິ ວາ ອຕ຺ເຖ ຓປ຺ປຈ຺ຈເຍ ກເຕ –

‘‘ຓມ຺ຫີ’’ຕິ ວຕ຺ຕເຕ.

໕໖໔. ອາກາຣນ຺ຕານມາໂຍ.

ອາກາຣນ຺ຕານໍ ຘາຕູນໍ ອນ຺ຕສ຺ສ ອາຍາເທໂສ ໂຫຕິ ຓກາຣານຸພນ຺ເຘ ປຈ຺ຈເຍ ປເຣ, ສຣໂລປາທິ. ຘຎ຺ຎມາໂຍ. ເອວໍ ທານໍ ທທາຕີຕິ ທານທາໂຍ.

ກມຸ ກນ຺ຕິມ຺ຫິ, ຘມ຺ມໍ ອກາມຍິ, ກາມຍຕິ, ກາມຍິສ຺ສຕີຕິ ວາ ຘມ຺ມກາໂມ ປຸຣິໂສ, ຘມ຺ມກາມາ ກຎ຺ຎາ, ຘມ຺ມກາມໍ ຈິຕ຺ຕໍ. ເອວໍ ອຕ຺ຖກາໂມ, ຫິຕກາໂມ, ສຸຂກາໂມ, ຘມ຺ມໍ ປາເລຕີຕິ ຘມ຺ມປາໂລ ອິຈ຺ຈາທິ.

ທມຸ ທມເນ, ‘‘ອຣິໍ ອທມິ, ທເມຕິ, ທມິສ຺ສຕີ’’ຕິ ວິຄ຺ຄເຫ ‘‘ຘາຕຸຍາ’’ຕິ ອຘິກາໂຣ, ‘‘ກມ຺ມາທິມ຺ຫີ’’ຕິ ຈ ວຕ຺ຕເຕ.

໕໖໕. ສຎ຺ຎາຍມນຸ.

ກມ຺ມູປປເທ ອາທິມ຺ຫິ ສຕິ ສຎ຺ຎາຍໍ ຄມ຺ຍມານາຍໍ ຘາຕຸຍາ ອປ຺ປຈ຺ຈໂຍ ໂຫຕິ, ອຸປປທນ຺ເຕ ນຸກາຣາຄໂມ ຈ. ເອຕ຺ຖ ຈ ‘‘ນຸ ນິຄ຺ຄຫີຕໍ ປທນ຺ເຕ’’ຕິ ສຸຕ຺ເຕ ‘‘ປທນ຺ເຕ’’ຕິ ວຈນໂຕ ອຸປປທນ຺ເຕເຍວ ນຸກາຣາຄໂມ ໂຫຕີຕິ ທຏ຺ຐພ຺ພໍ. ‘‘ເຕສຸ ວຸທ຺ຘີ’’ຕິອາທິນາ ອຸກາຣໂລໂປ. ອຍໍ ປນ ນ຺ວາຄໂມ ສມາສໍ ກຕ຺ວາ ອຸປປທວິຠຕ຺ຕິໂລເປ ກເຕເຍວ ໂຫຕີຕິ ເວທິຕພ຺ພໍ.

໕໖໖. ນຸ ນິຄ຺ຄຫີຕໍ ປທນ຺ເຕ.

ອຸປປທຠູຕນາມປທນ຺ເຕ ວຕ຺ຕມາໂນ ນຸກາຣາຄໂມ ນິຄ຺ຄຫີຕມາປຊ຺ຊເຕ, ນິຄ຺ຄຫີຕສ຺ສ ວຄ຺ຄນ຺ຕຕ຺ຕໍ, ເສສໍ ສມໍ, ວຸທ຺ຘາຠາໂວວ ວິເສໂສ, ອຣິນ຺ທໂມ ຣາຊາ.

ຕຖາ ຕຣ ຕຣເຓ, ເວສ຺ສໍ ຕຣຕີຕິ ເວສ຺ສນ຺ຕໂຣ, ຕຓ຺ຫໍ ກໂຣຕິ ຫິໍສຕີຕິ ຕຓ຺ຫງ຺ກໂຣ ຠຄວາ. ເອວໍ ເມຘງ຺ກໂຣ, ສຣຓງ຺ກໂຣ, ທີປງ຺ກໂຣ.

‘‘ອາທິມ຺ຫິ, ອ’’ອິຕິ ຈ ວຕ຺ຕເຕ.

໕໖໗. ປຸເຣ ທທາ ຈ ອິໍ.

ປຸຣສທ຺ເທ ອາທິມ຺ຫິ ສຕິ ‘‘ທທ ທາເນ’’ອິຈ຺ເຈຕາຍ ຘາຕຸຍາ ອປ຺ປຈ຺ຈໂຍ ໂຫຕິ, ປຸຣສທ຺ເທ ອກາຣສ຺ສ ອິຎ຺ຈ ໂຫຕິ. ເອຕ຺ຖ ຈ ‘‘ຕທນຸປໂຣເຘນາ’’ຕິ ປຣິຠາສໂຕ ປຸຣສທ຺ທນ຺ຕສ຺ເສວ ອິໍ ໂຫຕີຕິ ທຏ຺ຐພ຺ພໍ. ຓາທີນໍ ເຕກາລິກຕ຺ເຕປິ ອຸປປທຕ຺ຖວິເສເສນ ອຕີເຕເຍວາຍມປ຺ປຈ຺ຈໂຍ ໂຫຕີຕິ ທຏ຺ຐພ຺ພໍ. ປຸເຣ ທານໍ ອທທີຕິ ປຸຣິນ຺ທໂທ ສກ຺ໂກ. ອິຘາປິ ວິຠຕ຺ຕິໂລເປ ກເຕເຍວ ອິໍອາເທໂສ.

‘‘ກມ຺ມາທິມ຺ຫິ, ອ’’ອິຕິ ຈ ວຕ຺ຕເຕ.

໕໖໘. ສພ຺ພໂຕ ຓ຺ວຸ ຕ຺ວາວີ ວາ.

ສພ຺ພໂຕ ຘາຕຸໂຕ ກມ຺ມາທິມ຺ຫິ ວາ ອກມ຺ມາທິມ຺ຫິ ວາ ສຕິ ອ ຓ຺ວຸ ຕຸ ອາວີ ອິຈ຺ເຈເຕ ຈຕ຺ຕາໂຣ ປຈ຺ຈຍາ ໂຫນ຺ຕິ. ວາຄ຺ຄຫຓໍ ‘‘ອກມ຺ມາທິມ຺ຫິ ວາ’’ຕິ ວິກປ຺ປນຕ຺ຖໍ.

ອປ຺ປຈ຺ຈເຍ ຕາວ – ຘຣ ຘາຣເຓ, ຘມ຺ມໍ ອຘຣິ, ຘຣຕິ, ຘຣິສ຺ສຕີຕິ ວາ ຘມ຺ມຘໂຣ. ເອວໍ ວິນຍຘໂຣ. ຕຖາ ຕໍ ກໂຣຕີຕິ ຕກ຺ກໂຣ, ທ຺ວິຕ຺ຕໍ. ເອວໍ ຫິຕກໂຣ, ທິວສກໂຣ, ທິນກໂຣ, ທິວາກໂຣ, ນິສາກໂຣ, ຘນຸໍ ຄຓ຺ຫາຕີຕິ ຘນຸຄ຺ຄໂຫ. ເອວໍ ກຏຄ຺ຄໂຫ, ສພ຺ພກາມໍ ທທາຕີຕິ ສພ຺ພກາມທໂທ, ສພ຺ພທໂທ.

ອາໂຕ ປນ – ອນ຺ນໍ ອທາສິ, ທທາຕິ, ທທິສ຺ສຕີຕິ ອນ຺ນໂທ. ເອວໍ ຘນໂທ, ສຈ຺ຈໍ ສນ຺ທຫຕີຕິ ສຈ຺ຈສນ຺ໂຘ. ປາ ປາເນ, ມຊ຺ຊໍ ປິວຕີຕິ ມຊ຺ຊໂປ. ຕາ ປາລເນ, ຄວໍ ສທ຺ທໍ ຕາຍຕີຕິ ໂຄຕ຺ຕໍ. ເອວໍ ກຕ຺ຕຣິ.

ອກມ຺ມາທິມ຺ຫິ ປນ ‘‘ຍສ຺ມາ ທເປຕີ’’ຕິ ສຸຕ຺ເຕ ຠຍຄ຺ຄຫເຓນ ເສສສາຘເນປິ ອປ຺ປຈ຺ຈໂຍ.

ນີ ປາປຸຓເນ ວິປຸພ຺ໂພ, ວິເນສິ, ວິເນຕິ, ວິເນສ຺ສຕິ ເອເຕນ, ເອຕ຺ຖາຕິ ວາ ວິນໂຍ, ‘‘ອຎ຺ເຎສຸ ຈາ’’ຕິ ວຸທ຺ຘິ, ອຍາເທໂສ ຈ, ນຍນໍ ນໂຍ. ສິ ເສວາຍໍ ນິປຸພ຺ໂພ, ນິສ຺ສີຍິຕ຺ຖ, ນິສ຺ສີຍຕິ, ນິສ຺ສີຍິສ຺ສຕີຕິ ວາ ນິສ຺ສໂຍ. ສິ ສເຍ, ອນຸສຍິ, ອນຸເສຕິ, ອນຸເສສ຺ສຕີຕິ ວາ ອນຸສໂຍ.

ອິ ຄຕິມ຺ຫິ ປຕິປຸພ຺ໂພ, ປຏິຈ຺ຈ ເອກສ຺ມາ ຜລເມຕີຕິ ປຈ຺ຈໂຍ, ສມຸທໂຍ. ຈິ ຈເຍ, ວິນິຈ຺ຉີຍເຕ ອເນນ, ວິນິຈ຺ຉຍນໍ ວາ ວິນິຈ຺ຉໂຍ, ອຸຈ຺ຈຍນໍ ອຸຈ຺ຈໂຍ, ສຎ຺ຈໂຍ, ຘມ຺ມໍ ວິຈິນາຕີຕິ ຘມ຺ມວິຈໂຍ. ຂີ ຂເຍ, ຂຍນໍ ຂໂຍ. ຊິ ຊເຍ, ວິຊຍນໍ ວິຊໂຍ, ຊໂຍ. ກີ ທພ຺ພວິນິມເຍ, ວິກ຺ກຍນໍ ວິກ຺ກໂຍ, ກໂຍ. ລີ ສິເລສເນ, ອລ຺ລີຍຕິ ເອຕ຺ຖາຕິ ອາລໂຍ, ລໂຍ. ເອວໍ ອິວຓ຺ຓນ຺ຕໂຕ.

ອາສຸຓນ຺ຕີຕິ ອສ຺ສວາ, ອວາເທໂສ, ປຏິສ຺ສວນໍ ປຏິສ຺ສໂວ. ສຸ ຄຕິມ຺ຫິ, ອາຠວຄ຺ຄາ ສວນ຺ຕີຕິ ອາສວາ. ຣຸ ສທ຺ເທ, ຣວຕີຕິ ຣໂວ. ຠວຕີຕິ ຠໂວ. ປຠວຕິ ເອຕສ຺ມາຕິ ປຠໂວ. ລູ ເຉທເນ, ລວນໍ ລໂວ. ເອວໍ ອຸວຓ຺ຓນ຺ຕໂຕ.

ນິຄ຺ຄຓ຺ຫາຕິ, ນິຄ຺ຄຫຓໍ ວາ ນິຄ຺ຄໂຫ, ປຄ຺ຄໂຫ, ສງ຺ຄຓ຺ຫາຕິ ເຕນ, ສງ຺ຄຫຓໍ ວາ ສງ຺ຄໂຫ. ວຣ ວຣເຓ, ສໍວຣຓໍ ສໍວໂຣ. ທຣ ອາທເຣ, ອາທຣຓໍ ອາທໂຣ. ອາຄຈ຺ຉຕິ, ອາຄມນນ຺ຕິ ວາ ອາຄໂມ, ອາຄມີຍນ຺ຕິ ເອຕ຺ຖ, ເອເຕນ ວາ ອຕ຺ຖາຕິ ອາຄໂມ ປຣິຍຕ຺ຕິ. ສປ຺ປຕີຕິ ສປ຺ໂປ. ທິພ຺ພຕີຕິ ເທໂວ. ກມຸ ປທວິກ຺ເຂເປ, ປກ຺ກມນໍ, ປກ຺ກມຕີຕິ ວາ ປກ຺ກໂມ. ເອວໍ ວິກ຺ກໂມ.

ຈຣ ຈຣເຓ, ວເນ ຈຣຕີຕິ ວນຈໂຣ, ກາໂມ ອວຈຣຕິ ເອຕ຺ຖາຕິ ກາມາວຈໂຣ ໂລໂກ, ກາມາວຈຣາ ສຎ຺ຎາ, ກາມາວຈຣໍ ຈິຕ຺ຕໍ. ຄາໂວ ຈຣນ຺ຕິ ເອຕ຺ຖາຕິ ໂຄຈໂຣ, ຉຏ຺ຐີຕປ຺ປຸຣິໂສ.

ປາເທນ ປິວຕີຕິ ປາທໂປ. ເອວໍ ກຈ຺ຉໂປ, ຕຕິຍາຕປ຺ປຸຣິໂສ.

ຣຸຫ ຊນເນ, ສິຣສ຺ມິໍ ຣຸຫຕີຕິ ສິໂຣຣຸໂຫ, ຄຸຫາຍໍ ສຍຕີຕິ ຄຸຫາສຍໍ ຈິຕ຺ຕໍ. ເອວໍ ກຸຈ຺ຉິສຍາ ວາຕາ. ຐາ ຄຕິນິວຕ຺ຕິມ຺ຫິ, ປພ຺ພເຕ ອຏ຺ຐາສິ, ຕິຏ຺ຐຕິ, ຐສ຺ສຕີຕິ ວາ ປພ຺ພຕຏ຺ໂຐ ປຸຣິໂສ, ປພ຺ພຕຏ຺ຐາ ນທີ, ປພ຺ພຕຏ຺ຐໍ ໂອສຘໍ. ເອວໍ ຖລຏ຺ຐໍ, ຊລຏ຺ຐໍ, ສຕ຺ຕມີຕປ຺ປຸຣິໂສ.

໕໖໙. ຄຫສ຺ສຸປຘສ຺ເສ ວາ.

ຄຫອິຈ຺ເຈຕສ຺ສ ຘາຕຸສ຺ສ ອຸປຘສ຺ສ ເອຕ຺ຕໍ ໂຫຕິ ວາ, ອຸປຘາຕິ ອນ຺ຕກ຺ຂຣໂຕ ປຸພ຺ພກ຺ຂຣສ຺ສ ປຣສມຎ຺ຎາ, ຄຍ຺ຫຕີຕິ ເຄຫໍ, ຄຫໍ ວາ.

ຓ຺ວຸປ຺ປຈ຺ຈເຍ ຣຖໍ ກໂຣຕີຕິ ອຕ຺ເຖ ຓ຺ວຸປ຺ປຈ຺ຈໂຍ, ໂສ ຈ ‘‘ອຎ຺ເຎ ກິຕ’’ຕິ ກິຕສຎ຺ຎຕ຺ຕາ ‘‘ກຕ຺ຕຣິ ກິຕ’’ຕິ ກຕ຺ຕຣິເຍວ ຠວຕິ, ຕໂຕ ກາຣິຕພ຺ຍປເທສ ຓໂລປວຸທ຺ຘິໂຍ.

໕໗໐. ອນກາ ຍຸຓ຺ວູນໍ.

ຍຸຓ຺ວຸອິຈ຺ເຈເຕສໍ ປຈ຺ຈຍານໍ ອນ ອກອິຈ຺ເຈເຕ ອາເທສາ ໂຫນ຺ຕີຕິ ອກາເທໂສ. ເສສໍ ກຸມ຺ຠກາຣສທ຺ທສມໍ, ຣຖກາຣໂກ. ຕຖາ ອນ຺ນໍ ທທາຕີຕິ ອນ຺ນທາຍໂກ, ‘‘ອາກາຣນ຺ຕານມາໂຍ’’ຕິ ອາຍາເທໂສ, ‘‘ອິຕ຺ຖິຍມໂຕ ອາປຈ຺ຈໂຍ’’ຕິ ອາປຈ຺ຈໂຍ, ‘‘ເຕສຸ ວຸທ຺ຘີ’’ຕິອາທິນາ ອກາຣສ຺ສ ອິກາໂຣ, ອນ຺ນທາຍິກາ ກຎ຺ຎາ, ອນ຺ນທາຍກໍ ກຸລໍ. ໂລກໍ ເນຕີຕິ ໂລກນາຍໂກ, ວິເນຕິ ສຕ຺ເຕຕິ ວິນາຍໂກ, ‘‘ເຕ ອາວາຍາ ກາຣິເຕ’’ຕິ ອາຍາເທໂສ.

ອກມ຺ມູປປເທ ກໂຣຕີຕິ ກາຣໂກ, ກາຣິກາ, ກາຣກໍ. ທທາຕີຕິ ທາຍໂກ, ທາຍິກາ, ທາຍກໍ. ເນຕີຕິ ນາຍໂກ, ນາຍິກາ, ນາຍກໍ. ຠຄວໂຕ ໂອວາທານຸສາສນິໍ ອສຸຓິ, ສຸຓາຕິ, ສຸຓິສ຺ສຕີຕິ ວາ ສາວໂກ, ສາວິກາ, ອາວາເທໂສ. ລຸນາຕີຕິ ລາວໂກ. ປຸ ປວເນ, ປຸນາຕີຕິ ປາວໂກ, ຠວຕີຕິ ຠາວໂກ, ອຸປາສຕີຕິ ອຸປາສໂກ, ອຸປາສິກາ. ຄຓ຺ຫາຕີຕິ ຄາຫໂກ.

ປຈຕີຕິ ປາຈໂກ. ອຍຊິ, ຍຊຕິ, ຍຊິສ຺ສຕີຕິ ວາ ຍາຊໂກ. ເອຕ຺ຖ ຫິ ‘‘ກຄາ ຈຊານ’’ນ຺ຕິ ຈຊານໍ ກຄຕ຺ເຕ ສມ຺ປຕ຺ເຕ –

໕໗໑. ນ ກຄຕ຺ຕໍ ຈຊາ ຓ຺ວຸມ຺ຫິ.

ຘາຕ຺ວນ຺ຕຠູຕາ ຈກາຣຊກາຣາ ກກາຣ ຄກາຣຕ຺ຕໍ ນາປຊ຺ຊນ຺ເຕ ຓ຺ວຸປ຺ປຈ຺ຈເຍ ປເຣຕິ ປຏິສິທ຺ຘຕ຺ຕາ ນ ຠວຕິ.