໕. ຕທ຺ຘິຕກຓ຺ຑ

ອປຈ຺ຈຕທ຺ຘິຕ

ອຖ ນາມໂຕ ເອວ ວິຠຕ຺ຍນ຺ຕາ ອປຈ຺ຈາທິອຕ຺ຖວິເສເສ ຕທ຺ຘິຕຸປ຺ປຕ຺ຕີຕິ ນາມໂຕ ປຣໍ ຕທ຺ຘິຕວິຘານມາຣຠີຍເຕ.

ຕຕ຺ຖ ຕສ຺ມາ ຕິວິຘລິງ຺ຄໂຕ ປຣໍ ຫຸຕ຺ວາ ຫິຕາ ສຫິຕາຕິ ຕທ຺ຘິຕາ, ຓາທິປຈ຺ຈຍານເມຕໍ ອຘິວຈນໍ, ເຕສໍ ວາ ນາມິການໍ ຫິຕາ ອຸປກາຣາ ຕທ຺ຘິຕາຕິ ອນ຺ວຕ຺ຖຠູຕປຣສມຎ຺ຎາວເສນາປິ ຓາທິປ຺ປຈ຺ຈຍາວ ຕທ຺ຘິຕາ ນາມ.

‘‘ວສິຏ຺ຐສ຺ສ ອປຈ຺ຈ’’ນ຺ຕິ ວິຄ຺ຄເຫ –

‘‘ລິງ຺ຄຎ຺ຈ ນິປຈ຺ຈເຕ’’ຕິ ອິໂຕ ລິງ຺ຄຄ຺ຄຫຓມນຸວຕ຺ຕເຕ.

໓໖໑. ວາ ຓ’ປຈ຺ເຈ.

ຉຏ຺ຐິຍນ຺ຕໂຕ ລິງ຺ຄມ຺ຫາ ຓປ຺ປຈ຺ຈໂຍ ໂຫຕິ ວິກປ຺ເປນ ‘‘ຕສ຺ສ ອປຈ຺ຈ’’ມິຈ຺ເຈຕສ຺ມິໍ ອຕ຺ເຖ.

ໂສ ຈ –

໓໖໒. ຘາຕຸລິງ຺ເຄຫິ ປຣາ ປຈ຺ຈຍາ.

ຘາຕູຫິ, ລິງ຺ເຄຫິ ຈ ປຈ຺ຈຍາ ປຣາວ ໂຫນ຺ຕີຕິ ປຣິຠາສໂຕ ອປຈ຺ຈຕ຺ຖສມ຺ພນ຺ຘິລິງ຺ຄໂຕ ຉຏ຺ຐິຍນ຺ຕາເຍວ ປໂຣ ໂຫຕິ. ປຏິຈ຺ຈ ເອຕສ຺ມາ ອຕ຺ໂຖ ເອຕີຕິ ປຈ຺ຈໂຍ, ປຕີຍນ຺ຕິ ອເນນ ອຕ຺ຖາຕິ ວາ ປຈ຺ຈໂຍ, ‘‘ວຸຕ຺ຕຕ຺ຖານມປ຺ປໂຍໂຄ’’ຕິ ອປຈ຺ຈສທ຺ທສ຺ສ ອປ຺ປໂຍໂຄ, ‘‘ເຕສໍ ວິຠຕ຺ຕິໂຍ ໂລປາ ເຈ’’ຕິ ວິຠຕ຺ຕິໂລໂປ ຈ.

໓໖໓. ເຕສໍ ໂຓ ໂລປໍ.

ເຕສໍ ຕທ຺ຘິຕປ຺ປຈ຺ຈຍານໍ ຓານຸພນ຺ຘານໍ ຓກາໂຣ ໂລປມາປຊ຺ຊເຕ.

໓໖໔. ວຸທ຺ຘາທິສຣສ຺ສ ວາສໍໂຍຄນ຺ຕສ຺ສ ສເຓ ຈ.

ອາທິສຣສ຺ສ ວາ ອາທິພ຺ຍຎ຺ຊນສ຺ສ ວາ ອສໍໂຍຄນ຺ຕສ຺ສ ວຸທ຺ຘິ ໂຫຕິ ສຓກາຣປ຺ປຈ຺ຈເຍ ປເຣ. ສໍໂຍໂຄ ອນ຺ໂຕ ອສ຺ສາຕິ ສໍໂຍຄນ຺ໂຕ, ຕທຎ຺ໂຎ ອສໍໂຍຄນ຺ໂຕ. ອຖ ວາ ວວຕ຺ຖິຕວິຠາສຕ຺ໂຖຍໍ ວາສທ຺ໂທ, ຕທາ ຈ ປກຕິຠູເຕ ລິງ຺ເຄ ສຣານມາທິສຣສ຺ສ ອສໍໂຍຄນ຺ຕສ຺ສ ວຸທ຺ຘິ ໂຫຕິ ສຓກາເຣ ຕທ຺ຘິຕປ຺ປຈ຺ຈເຍ ປເຣຕິ ອຕ຺ໂຖ.

ເຕນ –

ວາສິຏ຺ຐາທີສຸ ນິຈ຺ຈາຍໍ, ອນິຈ຺ໂຈຬຸມ຺ປິກາທິສຸ;

ນ ວຸທ຺ຘິ ນີລປີຕາໂທ, ວວຕ຺ຖິຕວິຠາສໂຕ.

ຈສທ຺ທຄ຺ຄຫຓມວຘາຣຓຕ຺ຖໍ.

ຕສ຺ສາ ວຸທ຺ຘິຍາ ອນິຍມປ຺ປສງ຺ເຄ ນິຍມຕ຺ຖໍ ປຣິຠາສມາຫ.

໓໖໕. ອຍຸວຓ຺ຓານຎ຺ຈາໂຍ ວຸທ຺ຘີ.

ເຕສໍ ອກາຣອິວຓ຺ຓຸວຓ຺ຓານເມວ ຍຖາກ຺ກມໍ ອາ ເອໂອອິຈ຺ເຈເຕ ວຸທ຺ຘິໂຍ ໂຫນ຺ຕິ. ຈສທ຺ທຄ຺ຄຫຓມວຸທ຺ຘິສມ຺ປິຓ຺ຑນຕ຺ຖໍ, ອວຘາຣຓຕ຺ຖໍ ວາ. ອິ ຈ ອຸ ຈ ຍຸ, ຍຸ ເອວ ວຓ຺ຓາ ຍຸວຓ຺ຓາ, ອ ຈ ຍຸວຓ຺ຓາ ຈ ອຍຸວຓ຺ຓາ. ອາ ຈ ເອ ຈ ໂອ ຈ ອາໂຍ. ປຸນ ວຸທ຺ຘິຄ຺ຄຫຓໍ ‘‘ເນຄມຊານປທາ’’ຕິອາທີສຸ ອຸຕ຺ຕຣປທວຸທ຺ຘິຠາວຕ຺ຖໍ, ເອຕ຺ຖ ຈ ‘‘ອຍຸວຓ຺ຓານ’’ນ຺ຕິ ຐານນິຍມວຈນໍ ອາໂຍນໍ ວຸທ຺ຘິຠາວປ຺ປສງ຺ຄນິວຕ຺ຕນຕ຺ຖໍ.

ຍຖາ ຫິ ກຕວຸທ຺ຘີນໍ, ປຸນ ວຸທ຺ຘິ ນ ໂຫຕິຫ;

ຕຖາ ສຠາວວຸທ຺ຘີນໍ, ອາໂຍນໍ ປຸນ ວຸທ຺ຘິ ນ.

ຕໂຕ ອກາຣສ຺ສ ອາກາໂຣ ວຸທ຺ຘິ, ‘‘ສຣໂລໂປມາເທສປ຺ປຈ຺ຈຍາທິມ຺ຫິ ສຣໂລເປ ຕຸ ປກຕີ’’ຕິ ສຣໂລປປກຕິຠາວາ, ‘‘ນເຍ ປຣໍ ຍຸຕ຺ເຕ’’ຕິ ປຣນຍນໍ ກຕ຺ວາ ຕທ຺ຘິຕຕ຺ຕາ ‘‘ຕທ຺ຘິຕສມາສ’’ອິຈ຺ຈາທິນາ ນາມພ຺ຍປເທເສ ກເຕ ປຸເຣ ວິຍ ສ຺ຍາທ຺ຍຸປ຺ປຕ຺ຕິ.

ວາສິຏ຺ໂຐ, ວສິຏ຺ຐສ຺ສ ປຸຕ຺ໂຕ ວາ, ວາສິຏ຺ຐາ ອິຈ຺ຈາທິ ປຸຣິສສທ຺ທສມໍ. ຕສ຺ສ ນຕ຺ຕຸປນຕ຺ຕາທໂຍປິ ຕທຸປຈາຣໂຕ ວາສິຏ຺ຐາເຍວ. ເອວໍ ສພ຺ພຕ຺ຖ ໂຄຕ຺ຕຕທ຺ຘິເຕ ປຐມປ຺ປກຕິໂຕເຍວ ປຈ຺ຈໂຍ ໂຫຕິ.

ອິຕ຺ຖິຍໍ ຓປ຺ປຈ຺ຈຍນ຺ຕຕ຺ຕາ ‘‘ຓວ ຓິກ ເຓຍ຺ຍ ຓ ນ຺ຕູຫີ’’ຕິ ວາສິຏ຺ຐສທ຺ທໂຕ ອີປຈ຺ຈໂຍ. ສຣໂລປາທິໍ ກຕ຺ວາ ອິຕ຺ຖິປ຺ປຈ຺ຈຍນ຺ຕຕ຺ຕາ ‘‘ຕທ຺ຘິຕສມາສ’’ອິຈ຺ຈາທິສຸຕ຺ເຕ ຈຄ຺ຄຫເຓນ ນາມພ຺ຍປເທເສ ກເຕ ສ຺ຍາທ຺ຍຸປ຺ປຕ຺ຕິ, ວາສິຏ຺ຐີ ກຎ຺ຎາ, ວາສິຏ຺ຐີ, ວາສິຏ຺ຐິໂຍ ອິຈ຺ຈາທິ ອິຕ຺ຖິສທ຺ທສມໍ.

ນປຸໍສເກ ວາສິຏ຺ຐໍ ອປຈ຺ຈໍ, ວາສິຏ຺ຐານິ ອປຈ຺ຈານິ ອິຈ຺ຈາທິ ຈິຕ຺ຕສທ຺ທສມໍ. ເອວໍ ອຸປຣິປິ ຕທ຺ຘິຕນ຺ຕສ຺ສ ຕິລິງ຺ຄຕາ ເວທິຕພ຺ພາ.

ຠາຣທ຺ວາຊສ຺ສ ປຸຕ຺ໂຕ ຠາຣທ຺ວາໂຊ, ເວສາມິຕ຺ຕສ຺ສ ປຸຕ຺ໂຕ ເວສາມິຕ຺ໂຕ, ໂຄຕມສ຺ສ ປຸຕ຺ໂຕ ໂຄຕໂມ. ເອຕ຺ຖ ຈ ອຍຸວຓ຺ຓຕ຺ຕາຠາວາ ອາກາຣາທີນໍ ນ ວຸທ຺ຘິ ໂຫຕິ. ວສຸເທວສ຺ສ ອປຈ຺ຈໍ ວາສຸເທໂວ, ພລເທໂວ. ‘‘ຈິຕ຺ຕໂກ’’ຕິອາທີສຸ ປນ ສໍໂຍຄນ຺ຕຕ຺ຕາ ວຸທ຺ຘິ ນ ຠວຕິ.

‘‘ວຈ຺ຉສ຺ສ ອປຈ຺ຈ’’ນ຺ຕິ ວິຄ຺ຄເຫ ຓມ຺ຫິ ສມ຺ປຕ຺ເຕ ‘‘ວາ ຓ’ປຈ຺ເຈ’’ຕິ ອິໂຕ ວາຕິ ຕທ຺ຘິຕວິຘາເນ ສພ຺ພຕ຺ຖ ວຕ຺ຕເຕ, ເຕນ ສພ຺ພຕ຺ຖ ວາກ຺ຍວຸຕ຺ຕິໂຍ ຠວນ຺ຕິ. ‘‘ອປຈ຺ເຈ’’ຕິ ປທໍ ຍາວ ສໍສຏ຺ຐຄ຺ຄຫຓາວ ວຕ຺ຕເຕ.

໓໖໖. ຓາຍນ ຓານ ວຈ຺ຉາທິໂຕ.

ວຈ຺ຉ ກຈ຺ຈອິຈ຺ເຈວມາທິໂຕ ຉຏ຺ຐິຍນ຺ຕໂຕ ໂຄຕ຺ຕຄຓໂຕ ຓາຍນ ຓານອິຈ຺ຈເຕ ປຈ຺ຈຍາ ໂຫນ຺ຕິ ວາ ‘‘ຕສ຺ສາປຈ຺ຈ’’ມິຈ຺ເຈຕສ຺ມິໍ ອຕ຺ເຖ. ສພ຺ພຕ຺ຖ ຓກາຣານຸພນ຺ໂຘ ວຸທ຺ຘຕ຺ໂຖ, ເສສໍ ປຸພ຺ພສມໍ, ສໍໂຍຄນ຺ຕຕ຺ຕາ ວຸທ຺ຘິອຠາໂວວ ວິເສໂສ.

ວຈ຺ຉາຍໂນ ວຈ຺ຉາໂນ ວຈ຺ຉສ຺ສ ປຸຕ຺ໂຕ ວາ. ເອວໍ ກຈ຺ຈສ຺ສ ປຸຕ຺ໂຕ ກຈ຺ຈາຍໂນ ກຈ຺ຈາໂນ, ໂມຄ຺ຄລ຺ລສ຺ສ ປຸຕ຺ໂຕ ໂມຄ຺ຄລ຺ລາຍໂນ ໂມຄ຺ຄລ຺ລາໂນ. ເອວໍ ອຄ຺ຄິເວສ຺ສາຍໂນ ອຄ຺ຄິເວສ຺ສາໂນ, ກຓ຺ຫາຍໂນ ກຓ຺ຫາໂນ, ສາກຏາຍໂນ ສາກຏາໂນ, ມຸຎ຺ຈາຍໂນ ມຸຎ຺ຈາໂນ, ກຸຎ຺ຊາຍໂນ ກຸຎ຺ຊາໂນ ອິຈ຺ຈາທິ. ອາກຕິຄໂຓ’ຍໍ.

‘‘ກຕ຺ຕິກາຍ ອປຈ຺ຈ’’ນ຺ຕິ ວິຄ຺ຄເຫ –

໓໖໗. ເຓຍ຺ໂຍ ກຕ຺ຕິກາທີຫິ.

ອາທິສທ຺ໂທຍໍ ປກາເຣ ວຕ຺ຕເຕ. ກຕ຺ຕິກາ ວິນຕາໂຣຫິຓີອິຈ຺ເຈວມາທີຫິ ອິຕ຺ຖິຍໍ ວຕ຺ຕມາເນຫິ ລິງ຺ເຄຫິ ເຓຍ຺ຍປ຺ປຈ຺ຈໂຍ ໂຫຕິ ວາ ‘‘ຕສ຺ສາປຈ຺ຈ’’ມິຈ຺ເຈຕສ຺ມິໍ ອຕ຺ເຖ.

ວິຠຕ຺ຕິໂລເປ ‘‘ປກຕິ ຈສ຺ສ ສຣນ຺ຕສ຺ສາ’’ຕິ ປກຕິຠາໂວ. ກຕ຺ຕິເກຍ຺ໂຍ, ກຕ຺ຕິກາຍ ປຸຕ຺ໂຕ ວາ. ເອວໍ ວິນຕາຍ ອປຈ຺ຈໍ ເວນເຕຍ຺ໂຍ, ອິກາຣສ຺ເສກາໂຣ ວຸທ຺ຘິ, ໂຣຫິຓິຍາ ປຸຕ຺ໂຕ ໂຣຫິເຓຍ຺ໂຍ, ຄງ຺ຄາຍ ອປຈ຺ຈໍ ຄງ຺ເຄຍ຺ໂຍ, ຠຄິນິຍາ ປຸຕ຺ໂຕ ຠາຄິເນຍ຺ໂຍ, ນທິຍາປຸຕ຺ໂຕ ນາເທຍ຺ໂຍ. ເອວໍ ອນ຺ເຕຍ຺ໂຍ, ອາເຫຍ຺ໂຍ, ກາເມຍ຺ໂຍ. ສຸຈິຍາ ອປຈ຺ຈໍ ໂສເຈຍ຺ໂຍ, ເອຕ຺ຖ ອຸກາຣສ຺ໂສກາໂຣ ວຸທ຺ຘິ, ພາລາຍ ອປຈ຺ຈໍ ພາເລຍ຺ໂຍ ອິຈ຺ຈາທິ.

‘‘ທກ຺ຂສ຺ສາປຈ຺ຈ’’ນ຺ຕິ ວິຄ຺ຄເຫ ຓມ຺ຫິ ສມ຺ປຕ຺ເຕ –

໓໖໘. ອໂຕ ຓິ ວາ.

ອກາຣນ຺ຕໂຕ ລິງ຺ຄມ຺ຫາ ຓິປຈ຺ຈໂຍ ໂຫຕິ ວາ ‘‘ຕສ຺ສາປຈ຺ຈ’’ມິຈ຺ເຈຕສ຺ມິໍ ອຕ຺ເຖ. ທກ຺ຂິ, ທກ຺ຂີ, ທກ຺ຂໂຍ, ໂທຓສ຺ສ ອປຈ຺ຈໍ ໂທຓິ. ເອວໍ ວາສວິ, ສກ຺ຍປຸຕ຺ຕິ, ນາຏປຸຕ຺ຕິ, ທາສປຸຕ຺ຕິ, ທາສຣຖິ. ວາຣຸຓິ, ກຓ຺ຑິ, ພາລເທວິ, ປາວກິ, ຊິນທຕ຺ຕສ຺ສ ອປຈ຺ຈໍ ເຊນທຕ຺ຕິ, ສຸທ຺ໂຘທນິ, ອນຸຣຸທ຺ຘິ ອິຈ຺ຈາທິ.

ປຸນ ວາຄ຺ຄຫເຓນ ອປຈ຺ຈຕ຺ເຖ ຓິກປ຺ປຈ຺ຈໂຍ, ອທິຕິອາທິໂຕ ຓ຺ຍປ຺ປຈ຺ຈໂຍ ຈ. ຍຖາ – ສກ຺ຍປຸຕ຺ຕສ຺ສ ປຸຕ຺ໂຕ ສກ຺ຍປຸຕ຺ຕິໂກ, ‘‘ເຕສຸ ວຸທ຺ຘີ’’ຕິອາທິນາ ກກາຣສ຺ສ ຍກາໂຣ, ສກ຺ຍປຸຕ຺ຕິໂຍ. ເອວໍ ນາຏປຸຕ຺ຕິໂກ, ເຊນທຕ຺ຕິໂກ, ວິມາຕຸຍາ ປຸຕ຺ໂຕ ເວມາຕິໂກ.

‘‘ອທິຕິຍາ ປຸຕ຺ໂຕ’’ຕິ ອຕ຺ເຖ ຓ຺ຍປ຺ປຈ຺ຈໂຍ, ວຸທ຺ຘິ ຈ.

໓໖໙. ອວຓ຺ໂຓ ເຍ ໂລປຎ຺ຈ.

ອວຓ຺ໂຓ ຕທ຺ຘິຕຠູເຕ ຍປ຺ປຈ຺ຈເຍ ປເຣ ໂລປມາປຊ຺ຊເຕ. ຈສທ຺ເທນ ອິວຓ຺ໂຓປີຕິ ອິກາຣໂລໂປ, ‘‘ຍວຕໍ ຕລນທກາຣານໍ ພ຺ຍຎ຺ຊນານິ ຈ ລ ຎ ຊກາຣຕ຺ຕ’’ນ຺ຕິ ຕ຺ຍກາຣສໍໂຍຄສ຺ສ ຈກາໂຣ, ‘‘ປຣທ຺ເວຠາໂວ ຐາເນ’’ຕິ ທ຺ວິຕ຺ຕໍ, ອາທິຈ຺ໂຈ. ເອວໍ ທິຕິຍາ ປຸຕ຺ໂຕ ເທຈ຺ໂຈ.

‘‘ກຸຓ຺ຑນິຍາ ປຸຕ຺ໂຕ’’ຕິ ອຕ຺ເຖ ຓ຺ຍປ຺ປຈ຺ຈເຍ ກເຕ –

‘‘ກ຺ວຈາທິມຊ຺ຌຸຕ຺ຕເຣສູ’’ຕິ ວຕ຺ຕເຕ.

໓໗໐. ເຕສຸ ວຸທ຺ຘິໂລປາຄມວິກາຣວິປຣີຕາເທສາ ຈ.

ເຕສຸ ອາທິມຊ຺ຌຸຕ຺ຕເຣສຸ ອວິຫິຕລກ຺ຂເຓສຸ ຊິນວຈນານຸປໂຣເຘນ ກ຺ວຈິ ວຸທ຺ຘິ ໂລປ ອາຄມ ວິກາຣ ວິປຣີຕອາເທສາ ໂຫນ຺ຕີຕິ ສໍໂຍຄນ຺ຕຕ຺ເຕປິ ອາທິວຸທ຺ຘິ, ອິກາຣໂລເປ ນ຺ຍສ຺ສຎາເທໂສ, ໂກຓ຺ຑຎ຺ໂຎ, ກຸຣຸໂນ ປຸຕ຺ໂຕ ໂກຣພ຺ໂຍ, ເອຕ຺ຖາປິ ເຕເນວ ອຸກາຣສ຺ສ ອວາເທໂສ, ຠາຕຸໂນ ປຸຕ຺ໂຕ ຠາຕພ຺ໂຍ.

‘‘ອຸປຄຸສ຺ສ ອປຈ຺ຈ’’ນ຺ຕິ ວິຄ຺ຄເຫ –

໓໗໑. ຓໂວປຄ຺ວາທີຫິ.

ອຸປຄຸ ມນຸອິຈ຺ເຈວມາທີຫິ ອຸກາຣນ຺ເຕຫິ ໂຄຕ຺ຕຄເຓຫິ ຓວປ຺ປຈ຺ຈໂຍ ໂຫຕິ ວາ ‘‘ຕສ຺ສາປຈ຺ຈ’’ມິຈ຺ເຈຕສ຺ມິໍ ອຕ຺ເຖ. ອາທິສທ຺ທສ຺ສ ເຈຕ຺ຖ ປກາຣວາຈກຕ຺ຕາ ອຸກາຣນ຺ຕໂຕເຍວາຍໍ. ໂອປຄໂວ, ໂອປຄວີ, ໂອປຄວໍ, ມນຸໂນ ອປຈ຺ຈໍ ມານໂວ, ‘‘ມານຸໂສ’’ຕິ ຓປ຺ປຈ຺ຈເຍ, ສາຄເມ ຈ ກເຕ ຣູປໍ, ຠຄ຺ຄຸໂນ ອປຈ຺ຈໍ ຠຄ຺ຄໂວ, ປຓ຺ຑຸໂນ ອປຈ຺ຈໍ ປຓ຺ຑໂວ, ອຸປວິນ຺ທຸສ຺ສ ອປຈ຺ຈໍ ໂອປວິນ຺ທໂວ ອິຈ຺ຈາທິ.

‘‘ວິຘວາຍ ອປຈ຺ຈ’’ນ຺ຕິ ອຕ຺ເຖ –

໓໗໒. ເຓຣ ວິຘວາທິໂຕ.

ວິຘວາທິໂຕ ເຓຣປ຺ປຈ຺ຈໂຍ ໂຫຕິ ວາ ອປຈ຺ຈຕ຺ເຖ. ວິຄໂຕ ຘໂວ ປຕິ ເອຕິສ຺ສາຕິ ວິຘວາ, ເວຘເວໂຣ, ພນ຺ຘຸກິຍາ ອຠິສາຣິຓິຍາ ປຸຕ຺ໂຕ ພນ຺ຘຸເກໂຣ, ສມຓສ຺ສ ອຸປຊ຺ຌາຍສ຺ສ ປຸຕ຺ໂຕ ປຸຕ຺ຕຏ຺ຐານິຍຕ຺ຕາຕິ ສາມເຓໂຣ, ນາຬິເກໂຣ ອິຈ຺ຈາທິ.

ອປຈ຺ຈຕທ຺ຘິຕໍ.

ສໍສຏ຺ຐາທິອເນກຕ຺ຖຕທ຺ຘິຕ

‘‘ຕິເລນ ສໍສຏ຺ຐ’’ນ຺ຕິ ວິຄ຺ຄເຫ –

໓໗໓. ເຍນ ວາ ສໍສຏ຺ຐໍ ຕຣຕິ ຈຣຕິ ວຫຕິ ຓິໂກ.

ເຍນ ວາ ສໍສຏ຺ຐໍ, ເຍນ ວາ ຕຣຕິ, ເຍນ ວາ ຈຣຕິ, ເຍນ ວາ ວຫຕິ, ຕໂຕ ຕຕິຍນ຺ຕໂຕ ລິງ຺ຄມ຺ຫາ ເຕສຸ ສໍສຏ຺ຐາທີສ຺ວຕ຺ເຖສຸ ຓິກປ຺ປຈ຺ຈໂຍ ໂຫຕິ ວາ. ເຕລິກໍ ໂຠຊນໍ, ຕິເລນ ອຠິສງ຺ຂຕນ຺ຕິ ອຕ຺ໂຖ. ເຕລິກີ ຍາຄຸ. ຄຸເຬນ ສໍສຏ຺ຐໍ ເອຄາຬິກໍ. ເອວໍ ຆາຕິກໍ, ທາຘິກໍ, ມາຣິຈິກໍ, ໂລຓິກໍ.

ນາວາຍ ຕຣຕີຕິ ນາວິໂກ, ອຸຬຸມ຺ເປນ ຕຣຕີຕິ ໂອຬຸມ຺ປິໂກ, ວຸທ຺ຘິອຠາວປກ຺ເຂ ອຸຬຸມ຺ປິໂກ. ເອວໍ ກຸລ຺ລິໂກ, ໂຄປຸຈ຺ຉິໂກ. ສກເຏນ ຈຣຕີຕິ ສາກຏິໂກ. ເອວໍ ປາທິໂກ, ທຓ຺ຑິໂກ, ຘມ຺ເມນ ຈຣຕິ ປວຕ຺ຕຕີຕິ ຘມ຺ມິໂກ. ສີເສນ ວຫຕີຕິ ສີສິໂກ, ວາຄ຺ຄຫເຓນ ອີກາຣສ຺ສ ວຸທ຺ຘິ ນ ໂຫຕິ. ເອວໍ ອໍສິໂກ, ຂນ຺ຘິໂກ, ຫຕ຺ຖິໂກ, ອງ຺ຄຸລິໂກ.

ປຸນ ວາຄ຺ຄຫເຓນ ອຎ຺ຎຕ຺ເຖສຸປິ ຓິກປ຺ປຈ຺ຈໂຍ, ປຣທາຣໍ ຄຈ຺ຉຕີຕິ ປາຣທາຣິໂກ, ປຖໍ ຄຈ຺ຉຕີຕິ ປຖິໂກ.

‘‘ວິນຍມຘີເຕ, ອເວຈ຺ຈາຘີເຕ’’ຕິ ວາ ວິຄ຺ຄເຫ –

‘‘ຓິໂກ’’ຕິ ວຕ຺ຕເຕ.

໓໗໔. ຕມຘີເຕ ເຕນກຕາທິສນ຺ນິຘານນິໂຍຄສິປ຺ປຠຓ຺ຑຊີວິກຕ຺ເຖສຸ ຈ.

ຈຕຸປ຺ປທມິທໍ. ຕມຘີເຕຕິ ອຕ຺ເຖ, ເຕນ ກຕາທີສ຺ວຕ຺ເຖສຸ ຈ ຕມ຺ຫິ ສນ຺ນິຘາໂນ, ຕຕ຺ຖ ນິຍຸຕ຺ໂຕ, ຕມສ຺ສ ສິປ຺ປໍ, ຕມສ຺ສ ຠຓ຺ຑໍ, ຕມສ຺ສ ຊີວິກາ ອິຈ຺ເຈເຕສ຺ວຕ຺ເຖສຸ ຈ ທຸຕິຍາທິວິຠຕ຺ຍນ຺ເຕຫິ ລິງ຺ເຄຫິ ຓິກປ຺ປຈ຺ຈໂຍ ໂຫຕິ ວາ. ເວນຍິໂກ. ເອວໍ ສຸຕ຺ຕນ຺ຕິໂກ, ອາຠິຘມ຺ມິໂກ.

‘‘ພ຺ຍາກຣຓມຘີເຕ’’ຕິ ອຕ຺ເຖ ຓິກປ຺ປຈ຺ຈຍາທິມ຺ຫິ ກເຕ –

‘‘ວຸທ຺ຘາທິສຣສ຺ສ ວາສໍໂຍຄນ຺ຕສ຺ສ ສເຓ ຈາ’’ຕິ ວຕ຺ຕມາເນ –

໓໗໕. ມາຍູນມາຄໂມ ຐາເນ.

ອິ ອຸອິຈ຺ເຈເຠສໍ ອາທິສຣານໍ ອສໍໂຍຄນ຺ຕານໍ ມາ ວຸທ຺ຘິ ໂຫຕິ ສເຓ, ຕຕ຺ເຣວ ວຸທ຺ຘິ ອາຄໂມ ໂຫຕິ ຈ ຐາເນຕິ ເອກາຣວຸທ຺ຘາຄໂມ.

‘‘ຐາເນ’’ຕິ ວຈນາ ເຈຕ຺ຖ, ຍູນມາເທສຠູຕໂຕ;

ຍເວຫິ ປຸພ຺ເພວ ເອໂອ-ວຸທ຺ຘິໂຍ ໂຫນ຺ຕິ ອາຄມາ.

ຍກາຣສ຺ສ ທ຺ວິຠາໂວ.

ເວຍ຺ຍາກຣຓິໂກ, ນ຺ຍາຍມຘີເຕຕິ ເນຍ຺ຍາຍິໂກ. ເອວໍ ຕກ຺ກິໂກ, ເວທິໂກ, ເນມິຕ຺ຕິໂກ, ກາເຍນ ກໂຕ ປໂຍໂຄ ກາຍິໂກ, ກາເຍນ ກຕໍ ກມ຺ມໍ ກາຍິກໍ, ວຈສາ ກຕໍ ກມ຺ມໍ ວາຈສິກໍ. ເອວໍ ມານສິກໍ, ເອຕ຺ຖ ຈ ‘‘ສສເຣ ວາຄໂມ’’ຕິ ສຸຕ຺ເຕ ວວຕ຺ຖິຕວາສທ຺ເທນ ປຈ຺ຈເຍ ປເຣປິ ສາຄໂມ, ເຖເຣຫິ ກຕາ ສງ຺ຄີຕິ ເຖຣິກາ. ເອວໍ ປຎ຺ຈສຕິກາ, ສຕ຺ຕສຕິກາ, ເອຕ຺ຖ ‘‘ຓວຓິກາ’’ທິສຸຕ຺ເຕ ອນຸວຕ຺ຕິຕວາຄ຺ຄຫເຓນ ອີປຈ຺ຈໂຍ ນ ໂຫຕິ.

ສນ຺ນິຘານຕ຺ເຖ ສຣີເຣ ສນ຺ນິຘານາ ເວທນາ ສາຣີຣິກາ, ສາຣີຣິກໍ ທຸກ຺ຂໍ. ເອວໍ ມານສິກາ, ມານສິກໍ.

ນິຍຸຕ຺ຕຕ຺ເຖ ທ຺ວາເຣ ນິຍຸຕ຺ໂຕ ໂທວາຣິໂກ, ເອຕ຺ຖ ‘‘ມາຍູນມາຄໂມ ຐາເນ’’ຕິ ວກາຣໂຕ ປຸພ຺ເພໂອກາຣາຄໂມ. ເອວໍ ຠຓ຺ຑາຄາຣິໂກ, ນາຄຣິໂກ, ນວກມ຺ມິໂກ, ວນກມ຺ມິໂກ, ອາທິກມ຺ມິໂກ, ໂອທຣິໂກ, ຣຖິໂກ, ປຖິໂກ, ອຸປາເຍ ນິຍຸຕ຺ໂຕ ໂອປາຍິໂກ, ເຈຕສິ ນິຍຸຕ຺ຕາ ເຈຕສິກາ.

ສິປ຺ປຕ຺ເຖ ວີຓາວາທນໍ ວີຓາ, ວີຓາ ອສ຺ສ ສິປ຺ປໍ ເວຓິໂກ. ເອວໍ ປາຓວິໂກ, ໂມທິງ຺ຄິໂກ, ວໍສິໂກ.

ຠຓ຺ຑຕ຺ເຖ ຄນ຺ໂຘ ອສ຺ສ ຠຓ຺ຑນ຺ຕິ ຄນ຺ຘິໂກ. ເອວໍ ເຕລິໂກ, ໂຄຬິໂກ, ປູວິໂກ, ປຓ຺ຓິໂກ, ຕມ຺ພູລິໂກ, ໂລຓິໂກ.

ຊີວິກຕ຺ເຖ ອຸຣພ຺ຠໍ ຫນ຺ຕ຺ວາ ຊີວຕິ, ອຸຣພ຺ຠມສ຺ສ ຊີວິກາຕິ ວາ ໂອຣພ຺ຠິໂກ. ເອວໍ ມາຄວິໂກ, ເອຕ຺ຖ ວກາຣາຄໂມ. ສູກຣິໂກ, ສາກຸຓິໂກ, ມຈ຺ຉິໂກ ອິຈ຺ຈາທິ.

‘‘ເຕນ ກຕາທີ’’ຕິ ເອຕ຺ຖ ອາທິຄ຺ຄຫເຓນ ເຕນ ຫຕໍ, ເຕນ ພທ຺ຘໍ, ເຕນ ກີຕໍ, ເຕນ ທິພ຺ພຕິ, ໂສ ອສ຺ສ ອາວຸໂຘ, ໂສ ອສ຺ສ ອາພາໂຘ, ຕຕ຺ຖ ປສນ຺ໂນ, ຕສ຺ສ ສນ຺ຕກໍ, ຕມສ຺ສ ປຣິມາຓໍ, ຕສ຺ສ ຣາສິ, ຕໍ ອຣຫຕິ, ຕມສ຺ສ ສີລໍ, ຕຕ຺ຖ ຊາໂຕ, ຕຕ຺ຖ ວສຕິ, ຕຕ຺ຣ ວິທິໂຕ, ຕທຕ຺ຖາຍ ສໍວຕ຺ຕຕິ, ຕໂຕ ອາຄໂຕ, ຕໂຕ ສມ຺ຠູໂຕ, ຕທສ຺ສ ປໂຍຊນນ຺ຕິ ເອວມາທິອຕ຺ເຖ ຈ ຓິກປ຺ປຈ຺ຈໂຍ ໂຫຕິ. ຍຖາ – ຊາເລນ ຫໂຕ, ຫນຕີຕິ ວາ ຊາລິໂກ. ເອວໍ ພາຬິສິໂກ, ວາກຣິໂກ, ສຸຕ຺ເຕນ ພທ຺ໂຘ ສຸຕ຺ຕິໂກ, ວຣຕ຺ຕາຍ ພທ຺ໂຘ ວາຣຕ຺ຕິໂກ ນາໂຄ.

ວຕ຺ເຖນ ກີຕໍ ຠຓ຺ຑໍ ວຕ຺ຖິກໍ. ເອວໍ ກຸມ຺ຠິກໍ, ຜາລິກໍ, ໂສວຓ຺ຓິກໍ, ສາຕິກໍ. ອກ຺ເຂນ ທິພ຺ພຕີຕິ ອກ຺ຂິໂກ. ເອວໍ ສາລາກິໂກ, ຕິນ຺ທຸກິໂກ, ອມ຺ພຜລິໂກ. ຈາໂປ ອສ຺ສ ອາວຸໂຘຕິ ຈາປິໂກ. ເອວໍ ໂຕມຣິໂກ, ມຸຄ຺ຄຣິໂກ, ໂມສລິໂກ.

ວາໂຕ ອສ຺ສ ອາພາໂຘຕິ ວາຕິໂກ. ເອວໍ ເສມ຺ຫິໂກ, ປິຕ຺ຕິໂກ.

ພຸທ຺ເຘ ປສນ຺ໂນ ພຸທ຺ຘິໂກ. ເອວໍ ຘມ຺ມິໂກ, ສງ຺ຆິໂກ. ພຸທ຺ຘສ຺ສ ສນ຺ຕໂກ ພຸທ຺ຘິໂກ. ເອວໍ ຘມ຺ມິໂກ, ສງ຺ຆິໂກ ວິຫາໂຣ, ສງ຺ຆິກາ ຠູມິ, ສງ຺ຆິກໍ ຈີວຣໍ, ປຸຄ຺ຄລິກໍ.

ກຸມ຺ໂຠ ອສ຺ສ ປຣິມາຓນ຺ຕິ ກຸມ຺ຠິກໍ. ເອວໍ ຂາຣິກໍ, ໂທຓິກໍ. ກຸມ຺ຠສ຺ສ ຣາສິ ກຸມ຺ຠິໂກ. ກຸມ຺ຠໍ ອຣຫຕີຕິ ກຸມ຺ຠິໂກ. ເອວໍ ໂທຓິໂກ, ອຏ຺ຐມາສິໂກ, ກຫາປຓິໂກ, ອາສີຕິກາ ຄາຖາ, ນາວຸຕິກາ, ສາຕິກໍ, ສາຫສ຺ສິກໍ. ສນ຺ທິຏ຺ຐມຣຫຕີຕິ ສນ຺ທິຏ຺ຐິໂກ, ‘‘ເອຫິ ປສ຺ສາ’’ຕິ ອິມໍ ວິຘິໍ ອຣຫຕີຕິ ເອຫິປສ຺ສິໂກ.

ສີລຕ຺ເຖ ປໍສຸກູລຘາຣຓໍ ປໍສຸກູລໍ, ຕໍ ສີລມສ຺ສາຕິ ປໍສຸກູລິໂກ. ເອວໍ ເຕຈີວຣິໂກ, ເອກາສເນ ໂຠຊນສີໂລ ເອກາສນິໂກ, ຣຸກ຺ຂມູເລ ວສນສີໂລ ຣຸກ຺ຂມູລິໂກ, ຕຖາ ອາຣຎ຺ຎິໂກ, ໂສສານິໂກ.

ຊາຕຕ຺ເຖ ອປາເຍ ຊາໂຕ ອາປາຍິໂກ. ເອວໍ ເນຣຍິໂກ, ສາມຸທ຺ທິໂກ ມຈ຺ໂຉ, ວສ຺ເສສຸ ຊາໂຕ ວສ຺ສິໂກ, ວສ຺ສິກາ, ວສ຺ສິກໍ ປຸປ຺ຜໍ, ສາຣທິໂກ, ເຫມນ຺ຕິໂກ, ວາສນ຺ຕິໂກ, ຈາຕຸທ຺ທສິໂກ, ຣາຊຄເຫ ຊາໂຕ, ຣາຊຄເຫ ວສຕີຕິ ວາ ຣາຊຄຫິໂກ ຊໂນ, ມຄເຘສຸ ຊາໂຕ, ວສຕີຕິ ວາ ມາຄຘິໂກ, ມາຄຘິກາ, ມາຄຘິກໍ, ສາວຕ຺ຖິຍໍ ຊາໂຕ, ວສຕີຕິ ວາ ສາວຕ຺ຖິໂກ, ກາປິລວຕ຺ຖິໂກ, ເວສາລິໂກ.

ໂລເກ ວິທິໂຕ ໂລກິໂກ, ໂລກາຍ ສໍວຕ຺ຕຕີຕິປິ ໂລກິໂກ. ຕຖາ ມາຕິໂຕ ອາຄຕໍ ມາຕິກໍ, ປິຕິໂຕ ອາຄຕໍ ເປຕ຺ຕິກໍ ນາມໍ.

ສມ຺ຠູຕຕ຺ເຖ ມາຕິໂຕ ສມ຺ຠູຕໍ ມຕ຺ຕິກໍ. ເອວໍ ເປຕ຺ຕິກໍ. ອຸປຘິຕສ຺ສ ປໂຍຊນໍ ໂອປຘິກໍ.

ສກຕ຺ເຖປິ ອສງ຺ຂາໂຣເຍວ ອສງ຺ຂາຣິກໍ. ເອວໍ ສສງ຺ຂາຣິກໍ, ນາມເມວ ນາມິກໍ. ເອວໍ ອາຂ຺ຍາຕິກໍ, ໂອປສຄ຺ຄິກໍ, ເນປາຕິກໍ, ຈຕຸມຫາຣາເຊ ຠຕ຺ຕິ ເອເຕສນ຺ຕິ ຈາຕຸມຫາຣາຊິກາ. ເອວໍ ອຎ຺ຎຕ຺ເຖປິ ໂຍເຊຕພ຺ພໍ.

‘‘ກສາເວນ ຣຕ຺ຕ’’ນ຺ຕິ ວິຄ຺ຄເຫ –

໓໗໖. ຓ ຣາຄາ ເຕນຣຕ຺ຕໍ ຕສ຺ເສທມຎ຺ຎຕ຺ເຖສຸ ຈ.

ຣາຄຕ຺ຖວາຈກາ ລິງ຺ຄມ຺ຫາ ‘‘ເຕນ ຣຕ຺ຕ’’ມິຈ຺ເຈຕສ຺ມິໍ ອຕ຺ເຖ, ‘‘ຕສ຺ເສ’’ຕິ ຉຏ຺ຐິຍນ຺ຕໂຕ ‘‘ອິທ’’ມິຈ຺ເຈຕສ຺ມິໍ ອຕ຺ເຖ ຈ ອຎ຺ຎຕ຺ເຖສຸ ຈ ຓປ຺ປຈ຺ຈໂຍ ໂຫຕິ ວາ.

ກາສາວໍ ວຕ຺ຖໍ. ເອວໍ ກາສາຍໍ, ກຸສຸມ຺ເຠນ ຣຕ຺ຕໍ ໂກສຸມ຺ຠໍ, ຫລິທ຺ທິຍາ ຣຕ຺ຕໍ ຫາລິທ຺ທໍ, ປຕ຺ຕງ຺ຄໍ, ມຎ຺ຊິຏ຺ຐໍ, ກຸງ຺ກຸມໍ, ນີເລນ ຣຕ຺ຕໍ ນີລໍ. ເອວໍ ປີຕໍ.

ອິທມຕ຺ເຖ ມຫິໍສສ຺ສ ອິທໍ ມາຫິໍສໍ ມໍສໍ, ທຘິ ສປ຺ປິ ຈມ຺ມາທິກໍ ວາ, ສູກຣສ຺ສ ອິທໍ ສູກຣໍ, ກຈ຺ຈາຍນສ຺ສ ອິທໍ ກຈ຺ຈາຍນໍ ພ຺ຍາກຣຓໍ. ເອວໍ ໂສຄຕໍ ສາສນໍ.

‘‘ອິສິສ຺ສ ອິທ’’ນ຺ຕິ ອຕ຺ເຖ ຓປ຺ປຈ຺ຈເຍ ກເຕ ວຸທ຺ຘິມ຺ຫິ ສມ຺ປຕ຺ເຕ –

‘‘ສເຓ, ຍູນມາຄໂມ ຐາເນ’’ຕິ ຈ ວຕ຺ຕເຕ.

໓໗໗. ອາຕ຺ຕຎ຺ຈ.

ອິ ອຸອິຈ຺ເຈເຕສໍ ອາທິສຣານໍ ອາຕ຺ຕຎ຺ຈ ໂຫຕິ ສຓກາຣປ຺ປຈ຺ຈເຍ ປເຣ, ຈສທ຺ເທນ ຣິກາຣາຄໂມ ຈ ຐາເນຕິ ອິກາຣສ຺ສ ອາຕ຺ຕໍ.

ຐານາຘິກາຣໂຕ ອາຕ຺ຕໍ, ອິສູສຠອຸຊາທິນໍ;

ອິສິສ຺ສ ຕຸ ຣິກາຣາຄ-ໂມ ຈາຕ຺ຕານນ຺ຕເຣ ຠເວ.

ອາຣິສ຺ຍໍ, ອຸສຠສ຺ສ ອິທໍ ອາສຠໍ ຐານໍ, ອາສຠີ ວາຈາ.

ອຎ຺ຎຕ຺ຖຄ຺ຄຫເຓນ ປນ ອວິທູຣຠໂວ, ຕຕ຺ຣ ຠໂວ, ຕຕ຺ຣ ຊາໂຕ, ຕໂຕ ອາຄໂຕ, ໂສ ອສ຺ສ ນິວາໂສ, ຕສ຺ສ ອິສ຺ສໂຣ, ກຕ຺ຕິກາທີຫິ ນິຍຸຕ຺ໂຕ ມາໂສ, ສາສ຺ສ ເທວຕາ, ຕມເວຈ຺ຈາຘີເຕ, ຕສ຺ສ ວິສໂຍ ເທໂສ, ຕສ຺ມິໍ ເທເສ ອຕ຺ຖິ, ເຕນ ນິພ຺ພຕ຺ຕໍ, ຕໍ ອຣຫຕິ, ຕສ຺ສ ວິກາໂຣ, ຕມສ຺ສ ປຣິມາຓນ຺ຕິ ອິຈ຺ເຈວມາທີສ຺ວຕ຺ເຖສຸ ຈ ຓປ຺ປຈ຺ຈໂຍ. ຍຖາ – ວິທິສາຍ ອວິທູເຣ ຠໂວ ເວທິໂສ ຄາໂມ, ອຸທຸມ຺ພຣສ຺ສ ອວິທູເຣ ຠວໍ ໂອທຸມ຺ພຣໍ ວິມານໍ.

ຠວຕ຺ເຖ ມນສິ ຠວໍ ມານສໍ ສຸຂໍ, ສາຄໂມ. ສເຣ ຠໂວ ສາຣໂສ ສກຸໂຓ, ສາຣສາ ສກຸຓີ, ສາຣສໍ ປຸປ຺ຜໍ, ອຸຣສິ ຠໂວ ໂອຣໂສ ປຸຕ຺ໂຕ, ອຸຣສິ ສໍວຑ຺ຒິຕຕ຺ຕາ, ມິຕ຺ເຕ ຠວາ ເມຕ຺ຕາ, ເມຕ຺ຕີ ວາ, ປຸເຣ ຠວາ ໂປຣີ ວາຈາ.

ຊາຕາທີສຸ ປາວຸເສ ຊາໂຕ ປາວຸໂສ ເມໂຆ, ປາວຸສາ ຣຕ຺ຕິ, ປາວຸສໍ ອພ຺ຠໍ, ສຣເທ ຊາໂຕ ສາຣໂທ ມາໂສ, ສາຣທາ ຣຕ຺ຕິ, ສາຣທໍ ປຸປ຺ຜໍ. ເອວໍ ສິສິໂຣ, ເຫມນ຺ໂຕ, ວສນ຺ໂຕ, ວິມ຺ໂຫ, ມຖຸຣາຍໍ ຊາໂຕ ມາຖຸໂຣ ຊໂນ, ມາຖຸຣາ ຄຓິກາ, ມາຖຸຣໍ ວຕ຺ຖໍ. ມຖຸຣາຍ ອາຄໂຕ ມາຖຸໂຣ, ມຖຸຣາ ອສ຺ສ ນິວາໂສຕິ ມາຖຸໂຣ, ມຖຸຣາຍ ອິສ຺ສໂຣ ມາຖຸໂຣ ຣາຊາ. ‘‘ສພ຺ພໂຕ ໂກ’’ຕິ ເອຕ຺ຖ ປຸນ ສພ຺ພໂຕຄ຺ຄຫເຓນ ຕທ຺ຘິຕໂຕປິ ກ຺ວຈິ ສສຣກກາຣາຄໂມ, ມາຖຸຣໂກ ວາ, ຣາຊຄເຫ ຊາໂຕ, ຣາຊຄຫາ ອາຄໂຕ, ຣາຊຄໂຫ ອສ຺ສ ນິວາໂສຕິ ວາ, ຣາຊຄຫສ຺ສ ອິສ຺ສໂຣຕິ ວາ ຣາຊຄໂຫ, ຣາຊຄຫໂກ ວາ. ເອວໍ ສາຄໂລ, ສາຄລໂກ ວາ, ປາຏລິປຸຕ຺ໂຕ, ປາຏລິປຸຕ຺ຕໂກ ວາ, ເວສາລິຍໍ ຊາໂຕຕິອາທິອຕ຺ເຖ ເວສາໂລ, ເວສາລໂກ ວາ, ກຸສິນາເຣ ຊາໂຕ ໂກສິນາໂຣ, ໂກສິນາຣໂກ ວາ. ເອວໍ ສາເກໂຕ, ສາເກຕໂກ ວາ, ໂກສມ຺ໂພ, ໂກສມ຺ພໂກ ວາ, ອິນ຺ທປຕ຺ໂຕ, ອິນ຺ທປຕ຺ຕໂກ ວາ, ກປິລ຺ໂລ, ກປິລ຺ລໂກ ວາ, ຠາຣຸກຈ຺ໂຉ, ຠາຣຸກຈ຺ຉໂກ ວາ, ນຄເຣ ຊາໂຕ, ນຄຣາ ອາຄໂຕ, ນຄເຣ ວສຕີຕິ ວາ ນາຄໂຣ, ນາຄຣໂກ ວາ. ເອວໍ ຊານປໂທ.

ຊນປທນາເມສຸ ປນ ສພ຺ພຕ຺ຖ ພຫຸວຈນເມວ ຠວຕິ. ຍຖາ – ອງ຺ເຄສຸ ຊາໂຕ, ອງ຺ເຄຫິ ອາຄໂຕ, ອງ຺ຄາ ອສ຺ສ ນິວາໂສ, ອງ຺ຄານໍ ອິສ຺ສໂຣ ວາ ອງ຺ໂຄ, ອງ຺ຄໂກ ວາ, ມາຄໂຘ, ມາຄຘໂກ ວາ, ໂກສໂລ, ໂກສລໂກ ວາ, ເວເທໂຫ, ເວເທຫໂກ ວາ, ກມ຺ໂພໂຊ, ກມ຺ໂພຊໂກ ວາ, ຄນ຺ຘາໂຣ, ຄນ຺ຘາຣໂກ ວາ, ໂສວີໂຣ, ໂສວີຣໂກ ວາ, ສິນ຺ຘໂວ, ສິນ຺ຘວໂກ ວາ, ອສ຺ສໂກ, ກາລິງ຺ໂຄ, ປຎ຺ຈາໂລ, ສກ຺ໂກ, ຕຖາ ສຸຣຏ຺ເຐ ຊາໂຕ, ສຸຣຏ຺ຐສ຺ສ ອິສ຺ສໂຣ ວາ ໂສຣຏ຺ໂຐ, ໂສຣຏ຺ຐໂກ ວາ. ເອວໍ ມຫາຣຏ຺ໂຐ, ມຫາຣຏ຺ຐໂກ ວາ ອິຈ຺ຈາທິ.

ນກ຺ຂຕ຺ຕໂຍເຄ ກຕ຺ຕິກາຍ ປຸຓ຺ຓຈນ຺ທຍຸຕ຺ຕາຍ ຍຸຕ຺ໂຕ ມາໂສ ກຕ຺ຕິໂກ, ມຄສິເຣນ ຈນ຺ທຍຸຕ຺ເຕນ ນກ຺ຂຕ຺ເຕນ ຍຸຕ຺ໂຕ ມາໂສ ມາຄສິໂຣ. ເອວໍ ຜຸສ຺ເສນ ຍຸຕ຺ໂຕ ມາໂສ ຜຸສ຺ໂສ, ມຆາຍ ຍຸຕ຺ໂຕ ມາໂສ ມາໂຆ, ຜຄ຺ຄຸນິຍາ ຍຸຕ຺ໂຕ ມາໂສ ຜຄ຺ຄຸໂນ, ຈິຕ຺ຕາຍ ຍຸຕ຺ໂຕ ມາໂສ ຈິຕ຺ໂຕ, ວິສາຂາຍ ຍຸຕ຺ໂຕ ມາໂສ ເວສາໂຂ, ເຊຏ຺ຐາຍ ຍຸຕ຺ໂຕ ມາໂສ ເຊຏ຺ໂຐ, ອຸຕ຺ຕຣາສາຬ຺ຫາຍ ຍຸຕ຺ໂຕ ມາໂສ ອາສາຬ຺ໂຫ, ອາສາຬ຺ຫີ ວາ, ສວເຓນ ຍຸຕ຺ໂຕ ມາໂສ ສາວໂຓ, ສາວຓີ. ຠທ຺ເທນ ຍຸຕ຺ໂຕ ມາໂສ ຠທ຺ໂທ, ອສ຺ສຍຸເຊນ ຍຸຕ຺ໂຕ ມາໂສ ອສ຺ສຍຸໂຊ, ພຸທ຺ໂຘ ອສ຺ສ ເທວຕາຕິ ພຸທ຺ໂຘ. ເອວໍ ໂສຄໂຕ, ມາຫິນ຺ໂທ, ຍາໂມ, ໂສໂມ.

ພ຺ຍາກຣຓໍ ອເວຈ຺ຈາຘີເຕ ເວຍ຺ຍາກຣໂຓ. ເອວໍ ໂມຫຸຕ຺ໂຕ, ເນມິຕ຺ໂຕ, ອງ຺ຄວິຊ຺ໂຊ, ວຕ຺ຖຸວິຊ຺ໂຊ. ວສາຕີນໍ ວິສໂຍ ເທໂສ ວາສາໂຕ, ອຸທຸມ຺ພຣາ ອສ຺ມິໍ ປເທເສ ສນ຺ຕີຕິ ໂອທຸມ຺ພໂຣ ເທໂສ.

ສຫສ຺ເສນ ນິພ຺ພຕ຺ຕາ ສາຫສ຺ສີ ປຣິຂາ, ປຍສາ ນິພ຺ພຕ຺ຕໍ ປາຍາສໍ, ສຫສ຺ສໍ ອຣຫຕີຕິ ສາຫສ຺ສີ ຄາຖາ, ອຍໂສ ວິກາໂຣ ອາຍໂສ. ເອວໍ ໂສວຓ຺ໂຓ, ປຸຣິໂສ ປຣິມາຓມສ຺ສາຕິ ໂປຣິສໍ ອຸທກໍ.

ຈຄ຺ຄຫເຓນ ຕຕ຺ຖ ຊາໂຕ, ຕຕ຺ຖ ວສຕິ, ຕສ຺ສ ຫິຕໍ, ຕໍ ອຣຫຕີຕິອາທີສຸ ເຓຍ຺ຍປ຺ປຈ຺ຈໂຍ. ພາຣາຓສິຍໍ ຊາໂຕ, ວສຕີຕິ ວາ ພາຣາຓເສຍ຺ຍໂກ, ປຸເຣ ວິຍ ກກາຣາຄໂມ. ເອວໍ ຈມ຺ເປຍ຺ຍໂກ, ສາຄເລຍ຺ຍໂກ, ມິຖິເລຍ຺ຍໂກ ຊໂນ, ຄງ຺ເຄຍ຺ໂຍ ມຈ຺ໂຉ, ສິລາຍ ຊາຕໍ ເສເລຍ຺ຍກໍ, ກຸເລ ຊາໂຕ ໂກເລຍ຺ຍໂກ ສຸນໂຂ, ວເນ ຊາຕໍ ວາເນຍ຺ຍໍ ປຸປ຺ຜໍ. ເອວໍ ປພ຺ພເຕຍ຺ໂຍ ມານຸໂສ, ປພ຺ພເຕຍ຺ຍາ ນທີ, ປພ຺ພເຕຍ຺ຍໍ ໂອສຘໍ, ປຖສ຺ສ ຫິຕໍ ປາເຖຍ຺ຍໍ, ສປຕິສ຺ສ ຫິຕໍ ສາປເຕຍ຺ຍໍ ຘນໍ, ປທີເປຍ຺ຍໍ ເຕລໍ, ມາຕຸ ຫິຕໍ ມຕ຺ເຕຍ຺ຍໍ. ເອວໍ ເປຕ຺ເຕຍ຺ຍໍ. ທກ຺ຂິຓມຣຫຕີຕິ ທກ຺ຂິເຓຍ຺ໂຍ ອິຈ຺ຈາທິ.

໓໗໘. ຊາຕາທີນມິມິຍາ ຈ.

ຊາຕອິຈ຺ເຈວມາທີນໍ ສທ຺ທານໍ ອຕ຺ເຖ ອິມ ອິຍອິຈ຺ເຈເຕ ປຈ຺ຈຍາ ໂຫນ຺ຕິ ວາ.

ປຈ຺ຉາ ຊາໂຕ ປຈ຺ຉິໂມ, ປຈ຺ຉິມາ ຊນຕາ, ປຈ຺ຉິມໍ ຈິຕ຺ຕໍ, ອນ຺ເຕ ຊາໂຕ ອນ຺ຕິໂມ, ອນ຺ຕິມາ, ອນ຺ຕິມໍ. ເອວໍ ມຊ຺ຌິໂມ, ປຸຣິໂມ, ອຸປຣິໂມ, ເຫຏ຺ຐິໂມ, ປຈ຺ຈນ຺ຕິໂມ, ໂຄປ຺ຜິໂມ, ຄນ຺ຖິໂມ.

ຕຖາ ອິຍປ຺ປຈ຺ຈເຍ ມນຸສ຺ສຊາຕິຍາ ຊາໂຕ ມນຸສ຺ສຊາຕິໂຍ, ມນຸສ຺ສຊາຕິຍາ, ມນຸສ຺ສຊາຕິຍໍ. ເອວໍ ອສ຺ສຊາຕິໂຍ, ຫຕ຺ຖິຊາຕິໂຍ, ໂພຘິສຕ຺ຕຊາຕິໂຍ, ທພ຺ພຊາຕິໂຍ, ສມານຊາຕິໂຍ, ໂລກິໂຍ ອິຈ຺ຈາທິ.

ອາທິຄ຺ຄຫເຓນ ຕຕ຺ຖ ນິຍຸຕ຺ໂຕ, ຕທສ຺ສ ອຕ຺ຖິ, ຕຕ຺ຖ ຠໂວຕິອາທີສ຺ວປິ ອິມ ອິຍປ຺ປຈ຺ຈຍາ ໂຫນ຺ຕິ, ຈສທ຺ເທນ ອິກປ຺ປຈ຺ຈໂຍ ຈ. ອນ຺ເຕ ນິຍຸຕ຺ໂຕ ອນ຺ຕິໂມ, ອນ຺ຕິໂຍ, ອນ຺ຕິໂກ, ປຸຕ຺ໂຕ ອສ຺ສ ອຕ຺ຖິ, ຕສ຺ມິໍ ວາ ວິຊ຺ຊຕີຕິ ປຸຕ຺ຕິໂມ, ປຸຕ຺ຕິໂຍ, ວຸຕ຺ຕິໂກ, ກປ຺ໂປ ອສ຺ສ ອຕ຺ຖີຕິ ກປ຺ປິໂຍ, ຊຏາ ອສ຺ສ ອຕ຺ຖີຕິ ຊຏິໂຍ, ຫານຠາໂຄ ອສ຺ສ ອຕ຺ຖີຕິ ຫານຠາຄິໂຍ. ເອວໍ ຐິຕິຠາຄິໂຍ, ໂພຘິສ຺ສ ປກ຺ເຂ ຠວາ ໂພຘິປກ຺ຂິຍາ, ປຎ຺ຈວຄ຺ເຄ ຠວາ ປຎ຺ຈວຄ຺ຄິຍາ. ເອວໍ ຉພ຺ພຄ຺ຄິຍາ, ອຸທຣິຍໍ, ອຕ຺ຕໂນ ອິທນ຺ຕິ ອຕ຺ຕນິຍໍ, ນກາຣາຄໂມ.

ຈສທ຺ທຄ຺ຄຫເຓນ ກິຍ ຍຓ຺ຍປ຺ປຈ຺ຈຍາ ຈ. ຊາຕິຍາ ນິຍຸຕ຺ໂຕ ຊາຕິກິໂຍ. ເອວໍ ອນ຺ຘກິໂຍ, ຊຈ຺ຈນ຺ເຘ ນິຍຸຕ຺ໂຕ ຊຈ຺ຈນ຺ຘກິໂຍ. ສສ຺ສ ອຍນ຺ຕິ ສກິໂຍ. ເອວໍ ປຣກິໂຍ.

ຍປ຺ປຈ຺ຈໂຍ ສາຘຸຫິຕຠວຊາຕາທິອຕ຺ເຖສຸ. ຍຖາ – ກມ຺ມນິ ສາຘຸ ກມ຺ມຎ຺ຎໍ. ສຠາຍໍ ສາຘຸ ສພ຺ຠໍ, ‘‘ຍວຕໍ ຕລນາ’’ທິນາ ອຸກາຣາທິ. ເອວໍ ເມຘາຍ ຫິຕໍ ເມຊ຺ຌໍ ຆຏໍ. ປາທານໍ ຫິຕໍ ປຊ຺ຊໍ ເຕລໍ, ຣຖສ຺ສ ຫິຕາ ຣຈ຺ຉາ, ຄາເມ ຠໂວ ຄມ຺ໂມ, ຄເວ ຠວໍ ຄພ຺ຍໍ, ‘‘ໂອສເຣ ຈາ’’ຕິ ສຸຕ຺ເຕ ຈສທ຺ເທນ ຍປ຺ປຈ຺ຈເຍ ປເຣປິ ອວາເທໂສ. ກວິມ຺ຫິ ຠວໍ ກພ຺ຍໍ, ທິວິ ຠວາ ທິພ຺ຍາ, ຖນໂຕ ຊາຕໍ ຖຎ຺ຎໍ, ຘນາຍ ສໍວຕ຺ຕຕີຕິ ຘຎ຺ຎໍ.

ຓ຺ຍປ຺ປຈ຺ຈໂຍ ປຣິສາຍໍ ສາຘຸ ປາຣິສຊ຺ໂຊ, ທກາຣາຄໂມ, ສມຓານໍ ຫິຕາ ສາມຎ຺ຎາ ຊນາ, ພ຺ຣາຫ຺ມຓານໍ ຫິຕາ ພ຺ຣາຫ຺ມຎ຺ຎາ, ອຣູເປ ຠວາ ອາຣຸປ຺ປາ ອິຈ຺ຈາທິ.

‘‘ຣາຊປຸຕ຺ຕານໍ ສມູໂຫ’’ຕິ ວິຄ຺ຄເຫ –

໓໗໙. ສມູຫຕ຺ເຖ ກຓຓາ.

ຉຏ຺ຐິຍນ຺ຕໂຕ ‘‘ເຕສໍ ສມູໂຫ’’ຕິ ອຕ຺ເຖ ກຓຓອິຈ຺ເຈເຕ ປຈ຺ຈຍາ ໂຫນ຺ຕິ. ຣາຊປຸຕ຺ຕໂກ, ຣາຊປຸຕ຺ຕກໍ ວາ, ຣາຊປຸຕ຺ໂຕ. ເອວໍ ມານຸສ຺ສໂກ, ມານຸສ຺ໂສ, ມາຖຸຣໂກ, ມາຖຸໂຣ, ໂປຣິສໂກ, ໂປຣິໂສ, ວຸທ຺ຘານໍ ສມູໂຫ ວຸທ຺ຘໂກ, ວຸທ຺ໂຘ. ເອວໍ ມາຍູຣໂກ, ມາຍູໂຣ, ກາໂປໂຕ, ໂກກິໂລ, ມາຫິໍສໂກ, ມາຫິໍໂສ, ໂອຏ຺ຐໂກ, ໂອຣພ຺ຠໂກ, ອຏ຺ຐນ຺ນໍ ສມູໂຫ ອຏ຺ຐໂກ, ຣາຊານໍ ສມູໂຫ ຣາຊໂກ, ຠິກ຺ຂານໍ ສມູໂຫ ຠິກ຺ໂຂ, ສິກ຺ຂານໍ ສມູໂຫ ສິກ຺ໂຂ, ທ຺ວິນ຺ນໍ ສມູໂຫ ທ຺ວຍໍ, ‘‘ເຕສຸ ວຸທ຺ຘີ’’ຕິອາທິນາ ອິກາຣສ຺ສ ອຍາເທໂສ. ເອວໍ ຕິຓ຺ຓໍ ສມູໂຫ ຕຍໍ ອິຈ຺ຈາທິ.

‘‘ສມູຫຕ຺ເຖ’’ຕິ ວຕ຺ຕເຕ.

໓໘໐. ຄາມຊນພນ຺ຘຸສຫາຍາທີຫິ ຕາ.

ຄາມຊນພນ຺ຘຸສຫາຍອິຈ຺ເຈວມາທີຫິ ຕາປຈ຺ຈໂຍ ໂຫຕິ ສມູຫຕ຺ເຖ. ຄາມານໍ ສມູໂຫ ຄາມຕາ. ເອວໍ ຊນຕາ, ພນ຺ຘຸຕາ, ສຫາຍຕາ, ນາຄຣຕາ. ‘‘ຕາ’’ຕິ ໂຍຄວິຠາເຄນ ສກຕ຺ເຖປິ ເທໂວເຍວ ເທວຕາ, ຕາປຈ຺ຈຍນ຺ຕສ຺ສ ນິຈ຺ຈມິຕ຺ຖິລິງ຺ຄຕາ.

໓໘໑. ຕທສ຺ສ ຐານມິໂຍ ຈ.

‘‘ຕທສ຺ສ ຐານ’’ມິຈ຺ເຈຕສ຺ມິໍ ອຕ຺ເຖ ຉຏ຺ຐິຍນ຺ຕໂຕ ອິຍປ຺ປຈ຺ຈໂຍ ໂຫຕິ. ມທນສ຺ສ ຐານໍ ມທນິໂຍ, ມທນິຍາ, ມທນິຍໍ, ພນ຺ຘນສ຺ສ ຐານໍ ພນ຺ຘນິຍໍ. ເອວໍ ມຸຈ຺ຉນິຍໍ. ຣຊນິຍໍ, ຄມນິຍໍ, ທສ຺ສນິຍໍ, ອຸປາທານິຍໍ, ປສາທນິຍໍ. ຈສທ຺ເທນ ຫິຕາທິອຕ຺ເຖປິ ອຸປາທານານໍ ຫິຕາ ອຸປາທານິຍາ ອິຈ຺ຈາທິ.

໓໘໒. ອຸປມຕ຺ຖາຍິຕຕ຺ຕໍ.

ອຸປມຕ຺ເຖ ອຸປມາວາຈິລິງ຺ຄໂຕ ອາຍິຕຕ຺ຕປ຺ປຈ຺ຈໂຍ ໂຫຕິ. ຘູໂມ ວິຍ ທິສ຺ສຕີຕິ ຘູມາຍິຕຕ຺ຕໍ. ເອວໍ ຕິມິຣາຍິຕຕ຺ຕໍ.

‘‘ຕທສ຺ສ ຐານ’’ນ຺ຕິ ວຕ຺ຕເຕ.

໓໘໓. ຕນ຺ນິສ຺ສິຕຕ຺ເຖ ໂລ.

‘‘ຕນ຺ນິສ຺ສິຕ’’ນ຺ຕິ ອຕ຺ເຖ, ‘‘ຕທສ຺ສຐານ’’ນ຺ຕິ ອຕ຺ເຖ ຈ ລປ຺ປຈ຺ຈໂຍ ໂຫຕິ. ທຸຏ຺ຐຸ ນິສ຺ສິຕໍ, ທຸຏ຺ຐຸ ຐານໍ ວາ ທຸຏ຺ຐຸລ຺ລໍ, ທຸຏ຺ຐຸລ຺ລາ ວາຈາ, ລສ຺ສ ທ຺ວິຠາໂວ. ເອວໍ ເວທລ຺ລໍ.

‘‘ອຠິຊ຺ຌາ ອສ຺ສ ປກຕິ, ອຠິຊ຺ຌາ ອສ຺ສ ພຫຸລາ’’ຕິ ວາ ວິຄ຺ຄເຫ –

໓໘໔. ອາລຸ ຕພ຺ພຫຸເລ.

ປຐມາວິຠຕ຺ຍນ຺ຕໂຕ ອາລຸປ຺ປຈ຺ຈໂຍ ໂຫຕິ ‘‘ຕທສ຺ສ ພຫຸລ’’ມິຈ຺ເຈຕສ຺ມິໍ ອຕ຺ເຖ. ອຠິຊ຺ຌາລຸ, ອຠິຊ຺ຌາລູ, ອຠິຊ຺ຌາລໂວ. ເອວໍ ສີຕາລຸ, ຘຊາລຸ, ທຍາລຸ. ‘‘ສພ຺ພໂຕ ໂກ’’ຕິ ເອຕ຺ຖ ປຸນ ສພ຺ພໂຕຄ຺ຄຫເຓນ ກກາຣາຄໂມ, ອຠິຊ຺ຌາລຸໂກ, ອຠິຊ຺ຌາລຸກາ, ອຠິຊ຺ຌາລຸກໍ. ເອວໍ ສີຕາລຸໂກ, ທຍາລຸໂກ, ຕຖາ ຫີໂນວ ຫີນໂກ. ເອວໍ ໂປຕໂກ, ກຸມາຣໂກ, ມາຓວໂກ, ມຸທຸໂກ, ອຸຊຸໂກ, ອປ຺ປມຕ຺ຕກໍ, ໂອຣມຕ຺ຕກໍ, ສີລມຕ຺ຕກໍ ອິຈ຺ຈາທິ.

‘‘ຍທນຸປປນ຺ນາ ນິປາຕນາ ສິຊ຺ຌນ຺ຕີ’’ຕິ ອິມິນາ ປຏິຠາຄກຸຈ຺ຉິຕສຎ຺ຎານຸກມ຺ປາທິອຕ຺ເຖສຸ ກປ຺ປຈ຺ຈໂຍ. ປຏິຠາຄຕ຺ເຖ ຫຕ຺ຖິໂນ ອິວ ຫຕ຺ຖິກາ. ເອວໍ ອສ຺ສກາ. ກຸຈ຺ຉິຕຕ຺ເຖ ກຸຈ຺ຉິໂຕ ສມໂຓ ສມຓໂກ. ເອວໍ ພ຺ຣາຫ຺ມຓໂກ, ມຸຓ຺ຑໂກ, ປຓ຺ຑິຕໂກ, ເວຍ຺ຍາກຣຓໂກ. ສຎ຺ຎາຍໍ ກຕໂກ, ຠຏໂກ. ອນຸກມ຺ປາຍໍ ປຸຕ຺ຕໂກ.

ຕຖາ ກິໍຍເຕຕໂຕ ປຣິມາຓຕ຺ເຖ ຕ຺ຕກວນ຺ຕຸປ຺ປຈ຺ຈຍາ. ກິໍ ປຣິມາຓມສ຺ສາຕິ ກິຕ຺ຕກໍ. ເອວໍ ຍຕ຺ຕກໍ, ຕຕ຺ຕກໍ, ເອຕ຺ຕກໍ. ວນ຺ຕຸມ຺ຫິ ອາຕ຺ຕຎ຺ຈ, ຍໍ ປຣິມາຓມສ຺ສາຕິ ຍາວາ, ຍາວນ຺ໂຕ, ຄຸຓວນ຺ຕຸສມໍ. ເອວໍ ຕາວາ, ຕາວນ຺ໂຕ. ເອຕາວາ, ເອຕາວນ຺ໂຕ ອິຈ຺ຈາທິ.

‘‘ສຸວຓ຺ເຓນ ປກຕ’’ນ຺ຕິ ວິຄ຺ຄເຫ –

໓໘໕. ຕປ຺ປກຕິວຈເນ ມໂຍ.

ຕປ຺ປກຕິວຈນຕ຺ເຖ ມຍປ຺ປຈ຺ຈໂຍ ໂຫຕິ, ປກຣີຍຕີຕິ ປກຕິ, ເຕນ ປກຕິ ຕປ຺ປກຕິ, ຕປ຺ປກຕິຍາ ວຈນໍ ກຖນໍ ຕປ຺ປກຕິວຈນໍ. ສຸວຓ຺ຓມໂຍ ຣໂຖ, ໂສວຓ຺ຓມໂຍ ວາ, ສຸວຓ຺ຓມຍາ ຠາຊນວິກຕິ, ສຸວຓ຺ຓມຍໍ ຠາຊນໍ. ເອວໍ ຣູປິຍມຍໍ, ຣຊຕມຍໍ, ຊຕຸມຍໍ, ທາຣຸມຍໍ, ມຕ຺ຕິກາມຍໍ, ອິທ຺ຘິຍາ ນິພ຺ພຕ຺ຕໍ ອິທ຺ຘິມຍໍ.

ມນໂຕ ນິປ຺ຜນ຺ນາ ມໂນມຍາ, ອຍສາປກຕໍ ອໂຍມຍໍ. ເອຕ຺ຖ ຈ ‘‘ມໂນຄຓາທີນ’’ນ຺ຕິ ວຕ຺ຕມາເນ –

໓໘໖. ເອເຕສໂມ ໂລເປ.

ເອເຕສໍ ມໂນຄຓາທີນໍ ອນ຺ໂຕ ໂອຕ຺ຕມາປຊ຺ຊເຕ ວິຠຕ຺ຕິໂລເປ ກເຕຕິ ໂອກາໂຣ.

ຄເວນ ປກຕໍ ກຣີສໍ, ໂຄໂຕ ນິພ຺ພຕ຺ຕນ຺ຕິ ວາ ໂຄມຍໍ. ‘‘ມໂຍ’’ຕິໂຍຄວິຠາເຄນ ສກຕ຺ເຖປິ ທານເມວ ທານມຍໍ, ສີລມຍໍ ອິຈ຺ຈາທິ.

ສໍສຏ຺ຐາທິອເນກຕ຺ຖຕທ຺ຘິຕໍ.

ຠາວຕທ຺ຘິຕ

‘‘ອລສສ຺ສ ຠາໂວ’’ຕິ ວິຄ຺ຄເຫ –

໓໘໗. ຓ຺ຍຕ຺ຕຕາ ຠາເວ ຕຸ.

ຉຏ຺ຐິຍນ຺ຕໂຕ ຓ຺ຍຕ຺ຕຕາອິຈ຺ເຈເຕ ປຈ຺ຈຍາ ໂຫນ຺ຕິ ‘‘ຕສ຺ສ ຠາໂວ’’ ອິຈ຺ເຈຕສ຺ມິໍ ອຕ຺ເຖ, ຕຸສທ຺ທຄ຺ຄຫເຓນ ຕ຺ຕນເຓຍ຺ຍາທິປ຺ປຈ຺ຈຍາ ຈ. ຠວນ຺ຕິ ເອຕສ຺ມາ ພຸທ຺ຘິສທ຺ທາ ອິຕິ ຠາໂວ, ສທ຺ທປ຺ປວຕ຺ຕິນິມິຕ຺ຕໍ ວຸຈ຺ຈຕິ, ວຸຕ຺ຕຎ຺ຈ – ‘‘ຍສ຺ສ ຄຸຓສ຺ສ ຫິ ຠາວາ ທພ຺ເພ ສທ຺ທນິເວໂສ ຕທຠິຘາເນຓ຺ຍຕ຺ຕຕາທໂຍ’’ຕິ. ຓ຺ຍຕ຺ຕຕ຺ຕນນ຺ຕານໍ ນິຈ຺ຈໍ ນປຸໍສກຕ຺ຕໍ, ຕາປຈ຺ຈຍນ຺ຕສ຺ສ ສຠາວໂຕ ນິຈ຺ຈມິຕ຺ຖິລິງ຺ຄຕາ. ຓ຺ຍປ຺ປຈ຺ຈໂຍຍໍ ຄຸຓວຈເນ ພ຺ຣາຫ຺ມຓາທີຫິ, ຕຕ຺ຖ ‘‘ອວຓ຺ໂຓ ເຍ ໂລປຎ຺ຈາ’’ຕິ ອວຓ຺ຓໂລໂປ, ອາທິວຸທ຺ຘິ.

ອາລສ຺ຍໍ. ເອວໍ ອາໂຣຄ຺ຍໍ, ອຸທຄ຺ຄສ຺ສ ຠາໂວ ໂອທຄ຺ຍໍ, ສຂິໂນ ຠາໂວ ສຂ຺ຍໍ, ອຓຓສ຺ສ ຠາໂວ ອາຓຓ຺ຍໍ, ວິຘວາຍ ຠາໂວ ເວຘພ຺ຍໍ, ທຸພ຺ພລສ຺ສ ຠາໂວ ທຸພ຺ພລ຺ຍໍ, ຈປລສ຺ສ ຠາໂວ ຈາປລ຺ຍໍ.

ວິຍຕ຺ຕສ຺ສ ຠາໂວ ເວຍ຺ຍຕ຺ຕິຍໍ, ມຈ຺ຉຣສ຺ສ ຠາໂວ ມຈ຺ຉຣິຍໍ. ເອວໍ ອິສ຺ສຣິຍໍ, ອາລສິຍໍ, ມຸຓ຺ຑິຍໍ, ມູຬ຺ຫິຍໍ. ເອຕ຺ຖ ‘‘ເວຍ຺ຍຕ຺ຕິຍ’’ນ຺ຕິອາທີສຸ ‘‘ເຕສຸ ວຸທ຺ຘີ’’ຕິອາທິນາ ຍມ຺ຫິ ອິກາຣາຄໂມ.

‘‘ປຓ຺ຑິຕສ຺ສ ຠາໂວ ປຓ຺ຑິຕ຺ຍ’’ນ຺ຕິອາທີສຸ ‘‘ຍວຕໍ ຕລນທກາຣານໍ ພ຺ຍຎ຺ຊນານິ ຈລຎຊກາຣຕ຺ຕ’’ນ຺ຕິ ຕ຺ຍກາຣສໍໂຍຄາທີນໍ ຈລຎຊກາຣາເທສາ, ທ຺ວິຕ຺ຕໍ. ປຓ຺ຑິຈ຺ຈໍ, ພຫຸສ຺ສຸຕສ຺ສ ຠາໂວ ພາຫຸສ຺ສຈ຺ຈໍ, ‘‘ເຕສຸ ວຸທ຺ຘີ’’ຕິອາທິນາ ອຸກາຣສ຺ສ ອກາໂຣ, ເອວໍ ໂປໂຣຫິຈ຺ຈໍ, ອຘິປຕິສ຺ສ ຠາໂວ ອາຘິປຈ຺ຈໍ, ມຸຏ຺ຐສ຺ສຕິສ຺ສ ຠາໂວ ມຸຏ຺ຐສ຺ສຈ຺ຈໍ, ອິວຓ຺ຓໂລໂປ. ກຸສລສ຺ສ ຠາໂວ ໂກສລ຺ລໍ. ເອວໍ ເວປຸລ຺ລໍ, ສມານານໍ ຠາໂວ ສາມຎ຺ຎໍ, ຄິລານສ຺ສ ຠາໂວ ເຄລຎ຺ຎໍ, ‘‘ກ຺ວຈາທິມຊ຺ຌຸຕ຺ຕຣາ’’ທິສຸຕ຺ເຕນ ສໍໂຍເຄ ປເຣ ຣສ຺ສຕ຺ຕໍ.

ສຸຫທສ຺ສ ຠາໂວໂສຫຊ຺ຊໍ. ເອວໍ ເວສາຣຊ຺ຊໍ, ກຸສີທສ຺ສຠາໂວໂກສຊ຺ຊໍ, ‘‘ເຕສຸ ວຸທ຺ຘີ’’ຕິອາທິນາ ອີກາຣສ຺ສ ອກາໂຣ. ຕຖາ ‘‘ປຸຣິສສ຺ສ ຠາໂວ ໂປຣິສ’’ນ຺ຕິອາທີສຸ ‘‘ຍວຕໍ ຕລນາ’’ທິສຸຕ຺ເຕ ກາຣຄ຺ຄຫເຓນ ຍວຕໍ ສກາຣກຈຏປວຄ຺ຄານໍ ສກາຣກຈຏປວຄ຺ຄາເທສາ. ສຸມນສ຺ສ ຠາໂວ ໂສມນສ຺ສໍ. ເອວໍ ໂທມນສ຺ສໍ, ໂສວຈສ຺ສໍ, ໂທວຈສ຺ສໍ, ເອຕ຺ຖ ສກາຣາຄໂມ. ຕຖາ ນິປກສ຺ສ ຠາໂວ ເນປກ຺ກໍ, ທ຺ວິຕ຺ຕໍ. ເອວໍ ອາຘິກ຺ກໍ, ທຸຠຄສ຺ສ ຠາໂວ ໂທຠຄ຺ຄໍ, ວາຓິຊສ຺ສ ຠາໂວ ວາຓິຊ຺ຊໍ, ຣາຊິໂນ ຠາໂວ ຣຊ຺ຊໍ, ‘‘ກ຺ວຈາ’’ທິນາ ຣສ຺ສຕ຺ຕໍ. ສຣູປສ຺ສ ຠາໂວ ສາຣຸປ຺ປໍ. ເອວໍ ໂອປມ຺ມໍ, ໂສຂຸມ຺ມໍ.