ນິຄ຺ຄຫີຕສນ຺ຘິວິຘານ

ອຖ ນິຄ຺ຄຫີຕສນ຺ຘິ ວຸຈ຺ຈເຕ.

ຕຓ຺ຫໍ ກໂຣ, ຣຓໍ ຊໂຫ, ສໍ ຐິໂຕ, ຊຸຕິໍ ຘໂຣ, ສໍ ມໂຕ ອິຕີຘ ‘‘ນິຄ຺ຄຫີຕ’’ນ຺ຕິ ອຘິກາໂຣ, ‘‘ພ຺ຍຎ຺ຊເນ’’ຕິ ວຕ຺ຕເຕ.

໔໙. ວຄ຺ຄນ຺ຕໍ ວາ ວຄ຺ເຄ.

ວຄ຺ຄຠູເຕ ພ຺ຍຎ຺ຊເນ ປເຣ ນິຄ຺ຄຫີຕໍ ໂຂ ວຄ຺ຄນ຺ຕໍ ວາ ປປ຺ໂປຕີຕິ ນິມິຕ຺ຕານຸສ຺ວຣານໍ ຐານາສນ຺ນວເສນ ຕພ຺ພຄ຺ຄປຎ຺ຈໂມ ໂຫຕິ. ວວຕ຺ຖິຕວິຠາສຕ຺ໂຖຍໍ ວາສທ຺ໂທ. ເຕນ ‘‘ຕຓ຺ຫງ຺ກໂຣ, ຣຓຎ຺ຊໂຫ, ສຓ຺ຐິໂຕ, ຊຸຕິນ຺ຘໂຣ, ສມ຺ມໂຕ’’ຕິອາທີສຸ ນິຈ຺ຈໍ.

ຕງ຺ກໂຣຕິ ຕໍ ກໂຣຕິ, ຕງ຺ຂຓໍ ຕໍຂຓໍ, ສງ຺ຄໂຫ ສໍຄໂຫ, ຕງ຺ຆຕໍ ຕໍ ຆຕໍ. ຘມ຺ມຎ຺ຈເຣ ຘມ຺ມໍ ຈເຣ, ຕຎ຺ຉນ຺ນໍ ຕໍ ຉນ຺ນໍ, ຕຎ຺ຊາຕໍ ຕໍ ຊາຕໍ, ຕຎ຺ຎາຓໍ ຕໍ ຎາຓໍ. ຕຓ຺ຐານໍ ຕໍ ຐານໍ, ຕຓ຺ຑຫຕິ ຠໍ ຑຫຕິ. ຕນ຺ຕໂນຕິ ຕໍ ຕໂນຕິ, ຕນ຺ຖິຣໍ ຕໍ ຖິຣໍ, ຕນ຺ທານໍ ຕໍ ທານໍ, ຕນ຺ຘນໍ ຕໍ ຘນໍ, ຕນ຺ນິຈ຺ຈຸຕໍ ຕໍ ນິຈ຺ຈຸຕໍ. ຕມ຺ປຕ຺ໂຕ ຕໍ ປຕ຺ໂຕ, ຕມ຺ຜລໍ ຕໍ ຜລໍ, ເຕສມ຺ໂພໂຘ ເຕສໍ ໂພໂຘ, ສມ຺ຠູໂຕ ສໍຠູໂຕ, ຕມ຺ມິຕ຺ຕໍ ຕໍ ມິຕ຺ຕໍ. ກິງ຺ກໂຕ ກິໍ ກໂຕ, ທາຕຸງ຺ຄໂຕ ທາຕຸໍ ຄໂຕຕິ ເອວມາທີສຸ ວິກປ຺ເປນ.

ອິຘ ນ ຠວຕິ, ນ ຕໍ ກມ຺ມໍ ກຕໍ ສາຘຸ, ສຣຓໍ ຄຈ຺ຉາມິ.

ສຕິ ໂຈປຣິ ວາຄ຺ຄຫເຓ ວິຊ຺ຌນ຺ຕເຣ ວາ ອິຘ ວາຄ຺ຄຫຓກຣຓມຕ຺ຖນ຺ຕຣວິຎ຺ຎາປນຕ຺ຖໍ, ເຕນ ນິຄ຺ຄຫີຕສ຺ສ ສໍອຸປສຄ຺ຄປຸມນ຺ຕສ຺ສ ເລ ລກາໂຣ. ຍຖາ – ປຏິສໍລີໂນ ປຏິສລ຺ລີໂນ, ເອວໍ ປຏິສລ຺ລາໂຓ, ສລ຺ລກ຺ຂຓາ, ສລ຺ເລໂຂ, ສລ຺ລາໂປ, ປຸໍລິງ຺ຄໍ ປຸລ຺ລິງ຺ຄໍ.

ປຈ຺ຈຕ຺ຕໍ ເອວ, ຕໍ ເອວ, ຕຎ຺ຫິ ຕສ຺ສ, ເອວຎ຺ຫິ ໂວ ອິຕີຘ ‘‘ວາ’’ຕິ ອຘິກາໂຣ.

໕໐. ເອເຫ ຎໍ.

ເອກາຣຫກາເຣ ປເຣ ນິຄ຺ຄຫີຕໍ ໂຂ ຎກາຣໍ ປປ຺ໂປຕິ ວາ, ເອກາເຣ ຎາເທສສ຺ສ ທ຺ວິຠາໂວ.

ປຈ຺ຈຕ຺ຕຎ຺ເຎວປຈ຺ຈຕ຺ຕໍ ເອວ, ຕຎ຺ເຎວ ຕໍ ເອວ, ຕຎ຺ຫິ ຕສ຺ສ ຕຎ຺ຫິ ຕສ຺ສ, ເອວຎ຺ຫິ ໂວ ເອວຎ຺ຫິ ໂວ.

ວວຕ຺ຖິຕວິຠາສຕ຺ຕາ ວາສທ຺ທສ຺ສ ເອວຫິນິປາຕໂຕ ອຎ຺ຎຕ຺ຖ ນ ໂຫຕິ, ຍຖາ – ເອວເມຕໍ, ເອວໍ ໂຫຕິ.

ສໍໂຍໂຄ, ສໍໂຍຊນໍ, ສໍຍໂຕ, ສໍຍາຈິກາຍ, ຍໍ ຍເທວ, ອານນ຺ຕຣິກໍ ຍມາຫຸ ອິຕີຘ ‘‘ຎ’’ມິຕິ ວຕ຺ຕເຕ.

໕໑. ສ ເຍ ຈ.

ນິຄ຺ຄຫີຕໍ ໂຂ ຍກາເຣ ປເຣ ສຫ ຍກາເຣນ ຎກາຣໍ ປປ຺ໂປຕິ ວາ, ຎາເທສສ຺ສ ທ຺ວິຕ຺ຕໍ.

ສຎ຺ໂຎໂຄ ສໍໂຍໂຄ, ສຎ຺ໂຎຊນໍ ສໍໂຍຊນໍ, ສຎ຺ຎໂຕ ສໍຍໂຕ, ສຎ຺ຎາຈິກາຍ ສໍຍາຈິກາຍ, ຍຎ຺ຎເທວ ຍໍ ຍເທວ, ອານນ຺ຕຣິກຎ຺ຎມາຫຸ ອານນ຺ຕຣິກໍ ຍມາຫຸ.

ວາສທ຺ທສ຺ສ ວວຕ຺ຖິຕວິຠາສຕ຺ຕາວ ສໍປທນ຺ຕໂຕ ຈ ສພ຺ພນາມຍກາຣປຣໂຕ ຈ ນິຄ຺ຄຫີຕາ ອຎ຺ຎຕ຺ຖ ນ ໂຫຕິ. ຍຖາ – ເອຕໍ ໂຍຊນໍ, ຕໍ ຍານໍ, ສຣຓໍ ຍນ຺ຕິ.

ເອຕ຺ຖ ຈ ‘‘ສຫ ເຍ ຈາ’’ຕິ ວຕ຺ຕພ຺ເພ ‘‘ສ ເຍ ຈາ’’ຕິ ວຈນໂຕ ສຸຕ຺ຕນ຺ເຕສຸ ສຸຂຸຈ຺ຈາຣຓຕ຺ຖມກ຺ຂຣໂລໂປປີຕິ ທຏ຺ຐພ຺ພໍ, ເຕນ ປຏິສງ຺ຂາຍ ໂຍນິໂສ ປຏິສງ຺ຂາ ໂຍນິໂສ, ສຍໍ ອຠິຎ຺ຎາຍ ສຈ຺ຉິກຕ຺ວາ ສຍໍ ອຠິຎ຺ຎາ ສຈ຺ຉິກຕ຺ວາ, ປຣິເຍສນາຍ ປຣິເຍສນາຕິອາທິ ສິຊ຺ຌຕິ.

ຕໍ ອຫໍ ພ຺ຣູມິ, ຍໍ ອາຫຸ, ຘນໍ ເອວ, ກິໍ ເອຕໍ, ນິນ຺ທິຕຸໍ ອຣຫຕິ, ຍໍ ອນິຈ຺ຈໍ, ຕໍ ອນຕ຺ຕາ, ເອຕໍ ອໂວຈ, ເອຕໍ ເອວ ອິຈ຺ຈຕ຺ຣ –

໕໒. ມທາ ສເຣ.

ນິຄ຺ຄຫີຕສ຺ສ ໂຂ ສເຣ ປເຣ ມກາຣທກາຣາເທສາ ໂຫນ຺ຕິ ວາ. ເອຕ຺ຖ ຈ ວາສທ຺ທາຘິກາຣສ຺ສ ວວຕ຺ຖິຕວິຠາສຕ຺ຕາ ທກາໂຣ ຍເຕຕສທ຺ທໂຕ ປຣສ຺ເສວ.

ຕມຫໍ ພ຺ຣູມິ, ຍມາຫຸ, ຘນເມວ, ກິເມຕໍ, ນິນ຺ທິຕຸມຣຫຕິ, ຍທນິຈ຺ຈໍ, ຕທນຕ຺ຕາ, ເອຕທໂວຈ, ເອຕເທວ.

ວາຕິ ກິໍ? ຕໍ ອຫໍ, ເອຕໍ ເອວ, ອກ຺ໂກຈ຺ຉິ ມໍ ອວຘິ ມໍ.

ເອຕ຺ຖ ຈ ມທາຕິ ໂຍຄວິຠາເຄນ ພ຺ຍຎ຺ຊເນປິ ວາ ມກາໂຣ. ເຕນ ‘‘ພຸທ຺ຘມ ສຣຓມ ຄຈ຺ຉາມີ’’ຕິອາທິ ສິຊ຺ຌຕິ.

ຕາສໍ ອຫໍ ສນ຺ຕິເກ, ວິທູນໍ ອຄ຺ຄໍ, ຕສ຺ສ ອທາສິໍ ອຫໍ ອິຕີຘ ‘‘ສເຣ’’ຕິ ວຕ຺ຕເຕ.

໕໓. ກ຺ວຈິ ໂລປໍ.

ນິຄ຺ຄຫີຕໍ ໂຂ ສເຣ ປເຣ ໂລປໍ ປປ຺ໂປຕິ ກ຺ວຈິ ຉນ຺ທານຸຣກ຺ຂເຓ ສຸຂຸຈ຺ຈາຣຓຏ຺ຐາເນ. ປຸພ຺ພສ຺ສຣໂລໂປ, ປຣສ຺ສ ອສໍໂຍຄນ຺ຕສ຺ສ ທີໂຆ.

ຕາສາຫໍ ສນ຺ຕິເກ, ວິທູນຄ຺ຄໍ, ຕສ຺ສ ອທາສາຫໍ, ຕຖາຄຕາຫໍ, ເອວາຫໍ, ກ຺ຍາຫໍ.

ກ຺ວຈີຕິ ກິໍ? ເອວມສ຺ສ, ກິມຫໍ.

ອຣິຍສຈ຺ຈານໍ ທສ຺ສນໍ, ເອຕໍ ພຸທ຺ຘານໍ ສາສນໍ, ສໍຣຕ຺ໂຕ, ສໍຣາໂຄ, ສໍຣມ຺ໂຠ, ອວິສໍຫາໂຣ, ຈິຣໍ ປວາສິໍ, ຄນ຺ຕຸໍ ກາໂມ, ຄນ຺ຕຸໍ ມໂນ ອິຕີຘ ‘‘ກ຺ວຈິ ໂລປ’’ນ຺ຕິ ວຕ຺ຕເຕ.

໕໔. ພ຺ຍຎ຺ຊເນ ຈ.

ນິຄ຺ຄຫີຕໍ ໂຂ ພ຺ຍຎ຺ຊເນ ຈ ປເຣ ໂລປໍ ປປ຺ໂປຕິ ກ຺ວຈິ ຉນ຺ທານຸຣກ຺ຂຓາທິມ຺ຫິ. ຣກາຣຫກາເຣສຸ ອຸປສຄ຺ຄນ຺ຕສ຺ສ ທີໂຆ.

ອຣິຍສຈ຺ຈານ ທສ຺ສນໍ, ເອຕໍ ພຸທ຺ຘານ ສາສນໍ, ສາຣຕ຺ໂຕ, ສາຣາໂຄ, ສາຣມ຺ໂຠ, ອວິສາຫາໂຣ, ຈິຣປ຺ປວາສິໍ, ທ຺ວິຕ຺ຕໍ, ຄນ຺ຕຸກາໂມ, ຄນ຺ຕຸມໂນ.

ກ຺ວຈີຕິ ກິໍ? ເອຕໍ ມງ຺ຄລມຸຕ຺ຕມໍ.

ກຕໍ ອິຕິ, ກິໍ ອິຕິ, ອຠິນນ຺ທຸໍ ອິຕິ, ອຸຕ຺ຕຕ຺ຕໍ ອິວ, ຈກ຺ກໍ ອິວ, ກລິໍ ອິທານິ, ກິໍ ອິທານິ, ຕ຺ວໍ ອສິ, ອິທໍ ອປິ, ອຸຕ຺ຕຣິໍ ອປິ, ທາຕຸໍ ອປິ, ສທິສໍ ເອວ ອິຕີຘ ‘‘ນິຄ຺ຄຫີຕມ຺ຫາ, ໂລປ’’ນ຺ຕິ ຈ ວຕ຺ຕເຕ.

໕໕. ປໂຣ ວາ ສໂຣ.

ນິຄ຺ຄຫີຕມ຺ຫາ ປໂຣ ສໂຣ ໂລປໍ ປປ຺ໂປຕິ ວາ. ນິຄ຺ຄຫີຕສ຺ສ ວຄ຺ຄນ຺ຕຕ຺ຕໍ.

ກຕນ຺ຕິ, ກິນ຺ຕິ, ອຠິນນ຺ທຸນ຺ຕິ, ອຸຕ຺ຕຕ຺ຕໍວ, ຈກ຺ກໍວ, ກລິນ຺ທານິ, ກິນ຺ທານິ, ຕ຺ວໍສິ, ອິທມ຺ປິ, ອຸຕ຺ຕຣິມ຺ປິ, ທາຕຸມ຺ປິ, ສທິສໍວ.

ວາຕິ ກິໍ? ກຕໍ ອິຕິ, ກິມິຕິ, ທາຕຸມປິ, ສາມໍ ເອວ.

ອຍມ຺ປິ ວາສທ຺ທສ຺ສ ວວຕ຺ຖິຕວິຠາສຕ຺ຕາ ອິຕີວີທານິສີເປວາທິໂຕ ອຎ຺ຎຕ຺ຖ ນ ໂຫຕິ. ຍຖາ – ອຫໍ ເອຕ຺ຖ, ເອຕໍ ອໂຫສິ.

ເອວໍ ອສ຺ສ ເຕ ອາສວາ, ປຸປ຺ຜໍ ອສ຺ສາ ອຸປ຺ປຊ຺ຊຕິ ອິຕີຘ ສເຣ ປເຣ ລຸຕ຺ເຕ ວິປຣິຓາເມນ ‘‘ປຣສ຺ມິໍ, ສເຣ, ລຸຕ຺ເຕ’’ຕິ ຈ ວຕ຺ຕເຕ.

໕໖. ພ຺ຍຎ຺ຊໂນ ຈ ວິສຎ຺ໂຎໂຄ.

ນິຄ຺ຄຫີຕມ຺ຫາ ປຣສ຺ມິໍ ສເຣ ລຸຕ຺ເຕ ພ຺ຍຎ຺ຊໂນ ສຎ຺ໂຎໂຄ ເຈ, ວິສຎ຺ໂຎໂຄວ ໂຫຕີຕິ ສໍໂຍເຄກເທສສ຺ສ ປຸຣິມພ຺ຍຎ຺ຊນສ຺ສ ໂລໂປ.

ທ຺ວິນ຺ນໍ ພ຺ຍຎ຺ຊນານເມກຕ຺ຣ ຐິຕິ ສຎ຺ໂຎໂຄ, ອິຘ ປນ ສໍຍຸຊ຺ຊຕີຕິ ສຎ຺ໂຎໂຄ, ປຸຣິໂມ ວຓ຺ໂຓ, ວິຄໂຕ ສຎ຺ໂຎໂຄ ອສ຺ສາຕິ ວິສຎ຺ໂຎໂຄ, ປໂຣ.

ເອວໍ ສ ເຕ ອາສວາ, ປຸປ຺ຜໍສາ ອຸປ຺ປຊ຺ຊຕິ.

ລຸຕ຺ເຕຕິ ກິໍ? ເອວມສ຺ສ.

ຈສທ຺ເທນ ຕິຓ຺ຓໍ ພ຺ຍຎ຺ຊນານໍ ສຣູປສໍໂຍໂຄປິ ວິສຎ຺ໂຎໂຄ ໂຫຕິ. ຍຖາ – ອຄ຺ຍາຄາຣໍ, ວຸຕ຺ຍສ຺ສ.

ຈກ຺ຂຸ ອຸທປາທິ, ອວ ສິໂຣ, ຍາວຈິຘ ຠິກ຺ຂເວ, ອຓຸຖູລານິ, ຕ ສມ຺ປຍຸຕ຺ຕາ ອິຠີຘ ‘‘ສເຣ, ອາຄໂມ, ກ຺ວຈິ, ພ຺ຍຎ຺ຊເນ’’ຕິ ຈ ວຕ຺ຕເຕ.

໕໗. ນິຄ຺ຄຫິຕຎ຺ຈ.

ນິຄ຺ຄຫີຕຎ຺ຈ ອາຄໂມ ໂຫຕິ ສເຣ ວາ ພ຺ຍຎ຺ຊເນ ວາ ກ຺ວຈິ ສຸຂຸຈ຺ຈາຣຓຏ຺ຐາເນ. ນິຄ຺ຄຫີຕສ຺ສ ຣສ຺ສານຸຄຕຕ຺ຕາ ຣສ຺ສໂຕເຍວາຍໍ.

ຈກ຺ຂຸໍ ອຸທປາທິ, ອວໍສິໂຣ, ຍາວຎ຺ຈິຘ ຠິກ຺ຂເວ, ອຓຸໍຖູລານິ, ຕໍສມ຺ປຍຸຕ຺ຕາ, ເອວໍ ຕງ຺ຂເຓ, ຕໍສຠາໂວ.

ກ຺ວຈີຕິ ກິໍ? ນ ຫິ ເອເຕຫິ, ອິຘ ເຈວ.

ເອວໍ ວຸຕ຺ເຕ, ຕໍ ສາຘຸ, ເອກໍ ສມຍໍ ຠຄວາ, ອຄ຺ຄິໍວ ສນມໍ ອິຕີຘ ໂລປາເທສກາຣິເຍ ສມ຺ປຕ຺ເຕ ເຍຠຸຍ຺ເຍນ ຕທປວາທຕ຺ຖມາຫ.

໕໘. ອໍ ພ຺ຍຎ຺ຊເນ ນິຄ຺ຄຫີຕໍ.

ນິຄ຺ຄຫີຕໍ ໂຂ ພ຺ຍຎ຺ຊເນ ປເຣ ອໍອິຕິ ໂຫຕິ.

ອກາໂຣ ອຸຈ຺ຈາຣຓຕ຺ໂຖ, ‘‘ສຣໂລໂປ’’ຕິອາທິນາ ປຸພ຺ພສ຺ສຣໂລໂປ ວາ.

ເອວໍ ວຸຕ຺ເຕ, ຕໍ ສາຘຸ, ເອກໍ ສມຍໍ ຠຄວາ, ອຄ຺ຄິໍວ ສນ຺ຘມໍ.

ອິຘ ອວຸຕ຺ຕວິເສສານມ຺ປິ ວຸຕ຺ຕນຍາຕິເທສຕ຺ຖມຕິເທສມາຫ.

໕໙. ອນຸປທິຏ຺ຐານໍ ວຸຕ຺ຕໂຍຄໂຕ.

ເຍ ອິຘ ອມ຺ເຫຫິ ວິເສສໂຕ ນ ອຸປທິຏ຺ຐາ ອຸປສຄ຺ຄນິປາຕາທໂຍ, ເຕສໍ ວຸຕ຺ຕໂຍຄໂຕ ວຸຕ຺ຕນເຍນ ສຣສນ຺ຘາທີສຸ ວຸຕ຺ຕນຍານຸສາເຣນ ຣູປສິທ຺ຘິ ເວທິຕພ຺ພາ.

ເຕນ ‘‘ໂທ ຘສ຺ສ ຈາ’’ຕິ ສຸຕ຺ເຕ ຈສທ຺ເທນ ປຣິຍາທີນໍ ຣຫນາທິວຓ຺ຓສ຺ສ ວິປຣິຍໂຍ ຍວາທີຫິ, ຍຖາ – ປຣິຍຸທາຫາສິ ປຍິຣຸທາຫາສິ, ອຣິຍສ຺ສ ອຍິຣສ຺ສ, ພຫ຺ວາພາໂຘ ພວ຺ຫາພາໂຘ, ນ ອຠິເນຍ຺ຍ ອນຠິເນຍ຺ຍ.

‘‘ຕໍ ອິມິນາປິ ຊານາຖາ’’ຕິ ເອຕ຺ຖ ‘‘ປໂຣ ວາ ສໂຣ’’ຕິ ສເຣ ລຸຕ຺ເຕ ‘‘ຕຕ຺ຣາກາໂຣ’’ຕິ ໂຍຄວິຠາເຄນ ອກາໂຣ ນິຄ຺ຄຫີຕສ຺ສ ທກາໂຣ, ຕທມິນາປິ ຊານາຖ ອິຈ຺ຈາທິ.

ອິຕິ ນິຄ຺ຄຫີຕສນ຺ຘິວິຘານໍ ນິຏ຺ຐິຕໍ.

ສຎ຺ຎາວິຘານໍ ສຣສນ຺ຘິ ສນ຺ຘິ,

ນິເສຘນໍ ພ຺ຍຎ຺ຊນສນ຺ຘິ ສນ຺ຘິ;

ໂຍ ນິຄ຺ຄຫີຕສ຺ສ ຈ ສນ຺ຘິກປ຺ເປ,

ສຸນິຈ຺ຉໂຍ ໂສປິ ມເຍຕ຺ຖ ວຸຕ຺ໂຕ.

ອິຕິ ຣູປສິທ຺ຘິຍໍ ສນ຺ຘິກຓ຺ໂຑ

ປຐໂມ.