໒. ນາມກຓ຺ຑ

ອຖ ນາມິກວິຠຕ຺ຍາວຕາໂຣ ວຸຈ຺ຈເຕ.

ອຕ຺ຖາຠິມຸຂໍ ນມນໂຕ, ອຕ຺ຕນິ ຈຕ຺ຖສ຺ສ ນາມນໂຕ ນາມໍ, ທພ຺ພາຠິຘານໍ.

ຕໍ ປນ ທຸວິຘໍ ອນ຺ວຕ຺ຖຣຸຬ຺ຫີວເສນ, ຕິວິຘໍ ປຸມິຕ຺ຖິນປຸໍສກລິງ຺ຄວເສນ. ຍຖາ – ຣຸກ຺ໂຂ, ມາລາ, ຘນໍ.

ຈຕຸພ຺ພິຘໍ ສາມຎ຺ຎຄຸຓກ຺ຣິຍາຍທິຈ຺ຉາວເສນ, ຍຖາ – ຣຸກ຺ໂຂ, ນີໂລ, ປາຈໂກ, ສິຣິວຑ຺ໂຒຕິອາທິ.

ອຏ຺ຐວິຘໍ ອວຓ຺ຓິວຓ຺ຓຸວຓ຺ໂຓກາຣນິຄ຺ຄຫີຕນ຺ຕປກຕິເຠເທນ.

ປຸລ຺ລິງ຺ຄ

ຕຕ຺ຖ ປຐມໍ ອກາຣນ຺ຕມ຺ຫາ ປຸລ຺ລິງ຺ຄາ ຊາຕິນິມິຕ຺ຕາ ປຸຣິສສທ຺ທາ ສ຺ຍາທິວິຠຕ຺ຕິໂຍ ປຣາ ໂຍຊີຍນ຺ເຕ.

໖໐. ຊິນວຈນຍຸຕ຺ຕຎ຺ຫິ.

ອຘິກາໂຣຍໍ. ຕຕ຺ຖ ປຎ຺ຈ ມາເຣ ຊິຕວາຕິ ຊິໂນ, ພຸທ຺ໂຘ. ຊິນສ຺ສ ວຈນໍ ຊິນວຈນໍ, ຕສ຺ສ ຊິນວຈນສ຺ສ ຍຸຕ຺ຕໍ ຊິນວຈນຍຸຕ຺ຕໍ, ເຕປິຏກສ຺ສ ພຸທ຺ຘວຈນສ຺ສ ມາຄຘິກາຍ ສຠາວນິຣຸຕ຺ຕິຍາ ຍຸຕ຺ຕໍ ອນຸຣູປເມວາຕິ ອິທໍ ອຘິກາຣຕ຺ຖໍ ເວທິຕພ຺ພໍ.

ສາ ມາຄຘີ ມູລຠາສາ, ນຣາ ຍາຍາທິກປ຺ປິກາ;

ພ຺ຣຫ຺ມາໂນ ຈ’ສ຺ສຸຕາລາປາ, ສມ຺ພຸທ຺ຘາ ຈາປິ ຠາສເຣ.

ອຘິກາໂຣ ປນ ຕິວິໂຘ ສີຫຄຕິກມຓ຺ຑູກຄຕິກຍຖານຸປຸພ຺ພິກວເສນ, ອຍໍ ປນ ສີຫຄຕິໂກ ປຸພ຺ພາປຣວິໂລກນໂຕ, ຍຖານຸປຸພ຺ພິໂກເຍວ ວາ.

ສກ຺ກຕວິສທິສໍ ກຕ຺ວາ ຊິນວຈນານຸຣູປວເສນ ປກຕິຏ຺ຐປນຕ຺ຖໍ ປຣິຠາສມາຫ.

໖໑. ລິງ຺ຄຎ຺ຈ ນິປຈ຺ຈເຕ.

ລິງ຺ຄໍປາຏິປທິກໍ, ຍຖາ ຍຖາ ຊິນວຈນຍຸຕ຺ຕຎ຺ຫິ ລິງ຺ຄໍ, ຕຖາ ຕຖາ ອິຘ ລິງ຺ຄໍ ນິປຈ຺ຈເຕ ຐປີຍຕິ. ຈສທ຺ເທນ ຘາຕໂວ ຈາຕິ ຊິນວຈນານຸຣູປໂຕ ‘‘ປຸຣິສ’’ອິຕິ ລິງ຺ເຄ ຐປິເຕ ຕໂຕ ຕສ຺ສ ຘາຕຸປ຺ປຈ຺ຈຍວິຠຕ຺ຕິວຊ຺ຊິຕສ຺ສ ອຕ຺ຖວໂຕ ສທ຺ທສ຺ສ ‘‘ປຣສມຎ຺ຎາ ປໂຍເຄ’’ຕິ ປຣິຠາສໂຕ ລິງ຺ຄສຎ຺ຎາຍໍ –

ອິໂຕ ປຣໍ ວິຠຕ຺ຕິປ຺ປຈ຺ຈຍາທິວິຘາເນ ສພ຺ພຕ຺ຖ ລິງ຺ຄຄ຺ຄຫຓມນຸວຕ຺ຕເຕ.

໖໒. ຕໂຕ ຈ ວິຠຕ຺ຕິໂຍ.

ຕໂຕ ຊິນວຈນຍຸຕ຺ເຕຫິ ລິງ຺ເຄຫິ ປຣາ ວິຠຕ຺ຕິໂຍ ໂຫນ຺ຕິ. ຈສທ຺ທຄ຺ຄຫເຓນ ຕເວຕຸນາທິປຈ຺ຈຍນ຺ຕນິປາຕໂຕປິ. ກມ຺ມາທິວເສນ, ເອກຕ຺ຕາທິວເສນ ຈ ລິງ຺ຄຕ຺ຖໍ ວິຠຊນ຺ຕີຕິ ວິຠຕ຺ຕິໂຍ.

ກາ ຈ ປນ ຕາ ວິຠຕ຺ຕິໂຍ? ‘‘ວິຠຕ຺ຕິໂຍ’’ຕິ ອຘິກາໂຣ.

໖໓. ສິໂຍ, ອໍໂຍ, ນາຫິ, ສນໍ, ສ຺ມາຫິ, ສນໍ, ສ຺ມິໍສຸ.

ສ຺ຍາທໂຍ ທ຺ວິສຕ຺ຕ ວິຠຕ຺ຕິໂຍ ນາມ ໂຫນ຺ຕິ. ຕຕ຺ຖ ສິ, ໂຍ ອິຕິ ປຐມາ, ອໍ, ໂຍ ອິຕິ ທຸຕິຍາ, ນາ, ຫິ ອິຕິ ຕຕິຍາ, ສ, ນໍ ອິຕິ ຈຕຸຕ຺ຖີ, ສ຺ມາ, ຫິ ອິຕິ ປຎ຺ຈມີ, ສ, ນໍ ອິຕິ ຉຏ຺ຐີ, ສ຺ມິໍ, ສຸ ອິຕິ ສຕ຺ຕມີ.

ອິທໍ ປນ ສຎ຺ຎາຘິກາຣປຣິຠາສາວິຘິສຸຕ຺ເຕສຸ ສຎ຺ຎາສຸຕ຺ຕນ຺ຕິ ທຏ຺ຐພ຺ພໍ, ວຸຕ຺ຕຎ຺ຫິ ວຸຕ຺ຕິຍໍ ‘‘ວິຠຕ຺ຕິອິຈ຺ຈເນນ ກ຺ວຕ຺ໂຖ, ອມ຺ຫສ຺ສ ມມໍ ສວິຠຕ຺ຕິສ຺ສ ເສ’’ຕິ, ອິຕຣຖາ ປຸຣິມສຸຕ຺ເຕນ ເອກໂຍໂຄ ກຕ຺ຕພ຺ໂພຕິ. ເອຕ຺ຖ ຈ ປຐມາທິໂວຫາໂຣ, ເອກວຈນາທິໂວຫາໂຣ ຈ ອນ຺ວຕ຺ຖວເສນ, ປຣສມຎ຺ຎາວເສນ ວາ ສິທ຺ໂຘຕິ ເວທິຕພ຺ໂພ.

ເອກສ຺ສ ວຈນໍ ເອກວຈນໍ, ພຫູນໍ ວຈນໍ ພຫຸວຈນໍ, ທ຺ວິນ຺ນໍ ປູຣຓີ ທຸຕິຍາຕິອາທິ, ອິຕຣຖາ ປຸຣິມສຸຕ຺ເຕ ຈສທ຺ເທນ ສຎ຺ຎາກຣເຓ ອປ຺ປກຕນິຣຕ຺ຖກວິຘິປ຺ປສງ຺ໂຄ ສິຍາ.

‘‘ຊິນວຈນຍຸຕ຺ຕຎ຺ຫິ, ລິງ຺ຄຎ຺ຈ ນິປຈ຺ຈເຕ’’ຕິ ຈ ວຕ຺ຕເຕ. ອິຘ ປນ ປທນິປ຺ຜາທນມ຺ປິ ຊິນວຈນສ຺ສາວິໂຣເຘນາຕິ ຎາເປຕຸໍ ປຣິຠາສນ຺ຕຣມາຫ.

໖໔. ຕທນຸປໂຣເຘນ.

ຍຖາ ຍຖາ ເຕສໍ ຊິນວຈນານໍ ອຸປໂຣໂຘ ນ ໂຫຕິ, ຕຖາ ຕຖາ ອິຘ ລິງ຺ຄໍ, ຈສທ຺ເທນາຂ຺ຍາຕຎ຺ຈ ນິປຈ຺ຈເຕ, ນິປ຺ຜາທີຍຕີຕິ ອຕ຺ໂຖ. ເຕເນວ ອິຘ ຈ ອາຂ຺ຍາເຕ ຈ ທ຺ວິວຈນາຄ຺ຄຫຓໍ, ສກ຺ກຕວິສທິສໂຕ ວິຠຕ຺ຕິປ຺ປຈ຺ຈຍາທິວິຘານຎ຺ຈ ກຕນ຺ຕິ ທຏ຺ຐພ຺ພໍ.

ຕຕ຺ຖ ອວິເສເສນ ສພ຺ພສ຺ຍາທິວິຠຕ຺ຕິປ຺ປສງ຺ເຄ ‘‘ວຕ຺ຕິຈ຺ຉານຸປຸພ຺ພິກາ ສທ຺ທປ຺ປວຕ຺ຕີ’’ຕິ ວຕ຺ຕິຈ຺ຉາວສາ –

໖໕. ລິງ຺ຄຕ຺ເຖ ປຐມາ.

ລິງ຺ຄຕ຺ຖາຠິຘານມຕ຺ເຕ ປຐມາວິຠຕ຺ຕິ ໂຫຕີຕິ ປຐມາ. ຕຕ຺ຖາປິ ອນິຍເມເນກວຈນພຫຸວຈນປ຺ປສງ຺ເຄ ‘‘ເອກມ຺ຫີ ວຕ຺ຕພ຺ເພ ເອກວຈນ’’ນ຺ຕິ ປຣິຠາສໂຕ ລິງ຺ຄຕ຺ຖສ຺ເສກຕ຺ຕວຈນິຈ຺ຉາຍໍ ປຐເມກວຈນໍ ສິ.

‘‘ອໂຕ ເນນາ’’ຕິ ອິໂຕ ‘‘ອໂຕ’’ຕິ ວຕ຺ຕເຕ, ລິງ຺ຄຄ຺ຄຫຓຎ຺ຈ.

໖໖. ໂສ.

ສິ, ໂອອິຕິ ທ຺ວິປທມິທໍ. ລິງ຺ຄສ຺ສ ອກາຣໂຕ ປຣສ຺ສ ສິວຈນສ຺ສ ໂອກາໂຣ ໂຫຕິ.

ສຸຕ຺ເຕສຸ ຫິ ປຐມານິທ຺ທິຏ຺ຐສ຺ສ ກາຣິຍິໂນ ຉຏ຺ຐີວິປຣິຓາເມນ ວິວຣຓໍ ອາເທສາເປກ຺ຂນ຺ຕິ ທຏ຺ຐພ຺ພໍ.

ເອຕ຺ຖ ຈ ສີຕິ ວິຠຕ຺ຕິ ຄຍ຺ຫເຕ ວິຠຕ຺ຕິກາຣິຍວິຘິປ຺ປກຣຓໂຕ, ‘‘ຕໂຕ ຈ ວິຠຕ຺ຕິໂຍ’’ຕິ ອິໂຕ ວິຠຕ຺ຕິຄ຺ຄຫຓານຸວຕ຺ຕນໂຕ ວາ, ເອວໍ ສພ຺ພຕ຺ຖ ສ຺ຍາທີນໍ ກາຣິຍວິຘາເນ ວິຠຕ຺ຕິເຍວາຕິ ທຏ຺ຐພ຺ພໍ.

‘‘ວາ ປໂຣ ອສຣູປາ’’ຕິ ປຣໂລເປ ສມ຺ປຕ຺ເຕ ຕທປວາເທນ ປຸພ຺ພໂລປມາຫ.

໖໗. ສຣໂລໂປ’ມາເທສປ຺ປຈ຺ຈຍາທິມ຺ຫິ ສຣໂລເປ ຕຸ ປກຕິ.

ປຸພ຺ພສ຺ສຣສ຺ສ ໂລໂປ ໂຫຕິ ອໍວຈເນ, ອາເທສປ຺ປຈ຺ຈຍາທິຠູເຕ ຈ ສເຣ ປເຣ, ສຣໂລເປ ກເຕ ຕຸ ປຣສຣສ຺ສ ປກຕິຠາໂວ ໂຫຕິ. ເອຕ຺ຖ ຈ ‘‘ສຣໂລເປ’’ຕິ ປຸນຄ຺ຄຫຓໍ ອິມິນາວ ກຕສຣໂລປນິມິຕ຺ເຕເຍວ ປຣສ຺ສ ວິກາເຣ ສມ຺ປຕ຺ເຕ ປກຕິຠາວຕ຺ຖໍ. ປຣສຣສ຺ສ ປກຕິຠາວວິຘານສາມຕ຺ຖິຍໂຕ ອມາເທສປ຺ປຈ຺ຈຍາທິຠູເຕ ສເຣ ປເຣຕິປິ ສິທ຺ຘໍ.

ຕ຺ຍາທິວິຠຕ຺ຕິໂຍ ເຈຕ຺ຖ, ປຈ຺ຈຍຕ຺ເຕນ ຄຍ຺ຫເຣ;

ອາທິຄ຺ຄຫຓມາຂ຺ຍາຕ-ກິຕເກສ຺ວາຄມຕ຺ຖິທໍ.

ປຈ຺ຈຍສາຫຈຣິຍາ, ຈາເທໂສ ປກຕີປໂຣ;

ປທນ຺ຕສ຺ສຣໂລໂປ ນ, ເຕນ’ພ຺ຠາຫາທິເກ ປເຣ.

ຕຸຄ຺ຄຫຓໍ ຠິກ຺ຂຸນີອາທີສຸ ສຣໂລປນິວຕ຺ຕນຕ຺ຖໍ, ‘‘ນເຍ ປຣໍ ຍຸຕ຺ເຕ’’ຕິ ປຣໍ ເນຕພ຺ພໍ. ປຸຣິໂສ ຕິຏ຺ຐຕິ.

ປຸຣິໂສ ຈ ປຸຣິໂສ ຈາຕິ ປຸຣິສ ປຸຣິສອິຕິ ວຕ຺ຕພ຺ເພ –

໖໘. ສຣູປານເມກເສສ຺ວສກິໍ.

ສຣູປານໍ ສມານຣູປານໍ ປທພ຺ຍຎ຺ຊນານໍ ມຊ຺ເຌ ເອໂກວ ສິສ຺ສເຕ, ອຎ຺ເຎ ໂລປມາປຊ຺ຊນ຺ເຕ ອສກິນ຺ຕິ ເອກເສໂສ. ເອຕ຺ຖ ຈ ‘‘ສຣູປານ’’ນ຺ຕິ ວຸຕ຺ຕຕ຺ຕາວ ສິທ຺ເຘ ອສກິມ຺ປໂຍເຄ ປຸນາສກິໍຄຫຓໍ ເອກວິຠຕ຺ຕິວິສຍານເມວາສກິມ຺ປໂຍເຄ ເອວາຍນ຺ຕິ ທສ຺ສນຕ຺ຖໍ, ນ ຈ ວິຈ຺ຉາປໂຍເຄ’ຕິປ຺ປສງ຺ໂຄ. ‘‘ວຄ຺ຄາ ປຎ຺ຈປຎ຺ຈໂສ ມນ຺ຕາ’’ຕິ ເອຕ຺ຖ ‘‘ປຎ຺ຈປຎ຺ຈໂສ’’ຕິ ນິທ຺ເທເສເນວ ວິຈ຺ຉາປໂຍຄສິທ຺ຘິຍາ ຎາປິຕຕ຺ຕາ, ອຖ ວາ ສຫວຈນິຈ຺ຉາຍ’ມຍ’ເມກເສໂສ.

ໂຍຄວິຠາຄໂຕ ເຈຕ຺ຖ, ເອກເສສ຺ວສກິໍ ອິຕິ;

ວິຣູເປກເສໂສ ໂຫຕິ, ວາ ‘‘ປິຕູນ’’ນ຺ຕິອາທິສຸ.

ຕຕ຺ເຖວ ລິງ຺ຄຕ຺ຖສ຺ສ ພຫຸຕ຺ຕວຈນິຈ຺ຉາຍໍ ‘‘ພຫຸມ຺ຫິ ວຕ຺ຕພ຺ເພ ພຫຸວຈນ’’ນ຺ຕິ ປຐມາພຫຸວຈນໍ ໂຍ, ປຸຣິສ ໂຍ ອິຕີຘ ‘‘ອໂຕ, ວາ’’ຕິ ຈ ວຕ຺ຕເຕ.

໖໙. ສພ຺ພໂຍນີນມາເອ.

ອກາຣນ຺ຕໂຕ ລິງ຺ຄມ຺ຫາ ປເຣສໍ ສພ຺ເພສໍ ປຐມາໂຍນີນໍ, ທຸຕິຍາໂຍນີນຎ຺ຈ ຍຍາກ຺ກມໍ ອາກາເຣກາຣາເທສາ ໂຫນ຺ຕິ ວາຕິ ອາກາໂຣ, ສພ຺ພຄ຺ຄຫຓໍ ສພ຺ພາເທສຕ຺ຖໍ, ສຣໂລປາທິ ປຸຣິມສທິສເມວ, ປຸຣິສາ ຕິຏ຺ຐນ຺ຕິ.

ວາ ອິຈ຺ເຈວ ຣູປາ ຣູປານິ, ອຄ຺ຄໂຍ, ມຸນໂຍ.

ວາສທ຺ໂທຍໍ ວວຕ຺ຖິຕປິຠາສຕ຺ໂຖ, ເຕນ ເຈຕ຺ຖ –

ນິຈ຺ຈເມວ ຈ ປຸລ຺ລິງ຺ເຄ, ອນິຈ຺ຈຎ຺ຈ ນປຸໍສເກ;

ອສນ຺ຕໍ ເຌ ກຕຕ຺ເຕ ຕຸ, ວິຘິໍ ທີເປຕິ ວາສຸຕິ.

ຕຕ຺ເຖວາລປນວຈນິຈ຺ຉາຍໍ ‘‘ລິງ຺ຄຕ຺ເຖ ປຐມາ’’ຕິ ວຕ຺ຕເຕ.

໗໐. ອາລປເນ ຈ.

ອຠິມຸຂໍ ກຕ຺ວາ ລປນໍ ອາລປນໍ, ສມ຺ໂພຘນໍ. ຕສ຺ມິໍ ອາລປນຕ຺ຖາຘິເກ ລິງ຺ຄຕ຺ຖາຠິຘານມຕ຺ເຕ ຈ ປຐມາວິຠຕ຺ຕິ ໂຫຕິ. ປຸເຣ ວິຍ ເອກວຈນາທິ.

ປຸຣິສ ສິ ອິຈ຺ຈຕ຺ຣ –

໗໑. ອາລປເນ ສິ ຄສຎ຺ໂຎ.

ອາລປນຕ຺ເຖ ວິຫິໂຕ ສິ ຄສຎ຺ໂຎ ໂຫຕີຕິ ຄສຎ຺ຎາຍໍ ‘‘ໂຠ ເຄ ຕູ’’ຕິ ອິໂຕ ‘‘ເຄ’’ຕິ ວຕ຺ຕເຕ.

໗໒. ອກາຣປິຕາທ຺ຍນ຺ຕານມາ.

ລິງ຺ຄສ຺ສ ສມ຺ພນ຺ຘີ ອກາໂຣ ຈ ປິຕຸສຕ຺ຖຸອິຈ຺ເຈວມາທີນມນ຺ໂຕ ຈ ອາກາຣຕ຺ຕມາປຊ຺ຊເຕ ເຄ ປເຣ.

‘‘ເຄ, ຣສ຺ສ’’ມິຕິ ຈ ວຕ຺ຕເຕ.

໗໓. ອາກາໂຣ ວາ.

ລິງ຺ຄສ຺ສ ສມ຺ພນ຺ຘີ ອາກາໂຣ ຣສ຺ສມາປຊ຺ຊເຕ ເຄ ປເຣ ວິກປ຺ເປນ, ອທູຣຏ຺ຐສ຺ສາລປເນວາຍໍ.

໗໔. ເສສໂຕ ໂລປໍ ຄສິປິ.

‘‘ສິໍ, ໂສ, ສ຺ຍາ ຈ, ສຂໂຕ ຄສ຺ເສ ວາ, ຆເຕ ຈາ’’ຕິ ເອວມາທີຫິ ນິທ຺ທິຏ຺ເຐຫິ ອຎ຺ໂຎ ເສໂສ ນາມ, ຕໂຕ ເສສໂຕ ລິງ຺ຄມ຺ຫາ ຄສິອິຈ຺ເຈເຕ ໂລປມາປຊ຺ຊນ຺ເຕ. ອປິຄ຺ຄຫຓໍ ທຸຕິຍຕ຺ຖສມ຺ປິຓ຺ຑນຕ຺ຖໍ, ເອຕ຺ຖ ຈ ສຕິປິ ສິຄ຺ຄຫເຓ ວອິຕິ ວຈນເມວ ຎາປກມຎ຺ຎຕ຺ຖາປິ ສິຄ຺ຄຫເຓ ອາລປນາຄ຺ຄຫຓສ຺ສ. ເກຈິ ອາລປນາຠິພ຺ຍຕ຺ຕິຍາ ຠວນ຺ຕສທ຺ທໍ ວາ ເຫສທ຺ທໍ ວາ ປຍຸຊ຺ຊນ຺ເຕ. ໂຠ ປຸຣິສ ຕິຏ຺ຐ, ເຫ ປຸຣິສາ ວາ.

ພຫຸວຈເນ ນ ວິເສໂສ, ຠວນ຺ໂຕ ປຸຣິສາ ຕິຏ຺ຐຖ.

ຕຕ຺ເຖວ ກມ຺ມຕ຺ຖວຈນິຈ຺ຉາຍໍ ‘‘ວ,’’ຕິ ວຕ຺ຕເຕ.

໗໕. ຍໍ ກໂຣຕິ ຕໍ ກມ຺ມໍ.

ຍໍ ວາ ກໂຣຕິ, ຍໍ ວາ ວິກໂຣຕິ, ຍໍ ວາ ປາປຸຓາຕິ, ຕໍ ກາຣກໍ ກ຺ຣິຍານິມິຕ຺ຕໍ ກມ຺ມສຎ຺ຎໍ ໂຫຕິ.

໗໖. ກມ຺ມຕ຺ເຖ ທຸຕິຍາ.

ກມ຺ມຕ຺ເຖ ທຸຕິຍາວິຠຕ຺ຕິ ໂຫຕິ. ປຸເຣ ວິຍ ທຸຕິເຍກວຈນໍ ອໍ, ‘‘ສຣໂລໂປ’’ຕິອາທິນາ ສເຣ ລຸຕ຺ເຕ ‘‘ທີຆ’’ນ຺ຕິ ທີເຆ ສມ຺ປຕ຺ເຕ ປກຕິຠາໂວ ຈ, ປຸຣິສໍ ປສ຺ສ.

ພຫຸວຈເນ ‘‘ສພ຺ພໂຍນີນມາເອ’’ຕິ ໂຍວຈນສ຺ເສກາໂຣ, ປຸຣິເສ ປສ຺ສ.

ຕຕ຺ເຖວ ກຕ຺ຕຸວຈນິຈ຺ຉາຍໍ –

໗໗. ໂຍ ກໂຣຕິ ສ ກຕ຺ຕາ.

ໂຍ ອຕ຺ຕປ຺ປຘາໂນ ກ຺ຣິຍໍ ກໂຣຕິ, ໂສ ກຕ຺ຕຸສຎ຺ໂຎ ໂຫຕິ.

‘‘ຕຕິຍາ’’ຕິ ວຕ຺ຕເຕ.

໗໘. ກຕ຺ຕຣິ ຈ.

ກຕ຺ຕຣິ ຈ ກາຣເກ ຕຕິຍາວິຠຕ຺ຕິ ໂຫຕີຕິ ຕຕິເຍກວຈນໍ ນາ.

໗໙. ອໂຕ ເນນ.

ເອນາຕິ ອວິຠຕ຺ຕິກນິທ຺ເທໂສ. ອກາຣນ຺ຕໂຕ ລິງ຺ຄມ຺ຫາ ປຣສ຺ສ ນາວຈນສ຺ສ ເອນາເທໂສ ໂຫຕິ, ສຣໂລປາທິ, ປຸຣິເສນ ກຕໍ.

ພຫຸວຈນມ຺ຫິ –

໘໐. ສຸຫິສ຺ວກາໂຣ ເອ.

ສຸ, ຫິອິຈ຺ເຈເຕສຸ ວິຠຕ຺ຕິຣູເປສຸ ປເຣສຸ ລິງ຺ຄສ຺ສ ສມ຺ພນ຺ຘີ ອກາໂຣ ເອຕ຺ຕມາປຊ຺ຊເຕ.

໘໑. ສ຺ມາຫິສ຺ມິໍນໍ ມ຺ຫາຠິມ຺ຫິ ວາ.

ສພ຺ພໂຕ ລິງ຺ຄມ຺ຫາ ສ຺ມາ ຫິ ສ຺ມິໍອິຈ຺ເຈເຕສໍ ຍຖາກ຺ກມໍ ມ຺ຫາ, ຠິ, ມ຺ຫິອິຈ຺ເຈເຕ ອາເທສາ ໂຫນ຺ຕິ ວາ, ປຸຣິເສຫິ, ປຸຣິເສຠິ ກຕໍ.

ຕຕ຺ເຖວ ກຣຓວຈນິຈ຺ຉາຍໍ –

໘໒. ເຍນ ວາ ກຍິຣເຕ ຕໍ ກຣຓໍ.

ເຍນ ວາ ກຍິຣເຕ, ເຍນ ວາ ປສ຺ສຕິ, ເຍນ ວາ ສຸຓາຕິ, ຕໍ ກາຣກໍ ກຣຓສຎ຺ຎໍ ໂຫຕິ.

໘໓. ກຣເຓ ຕຕິຍາ.

ກຣຓກາຣເກ ຕຕິຍາວິຠຕ຺ຕິ ໂຫຕິ, ເສສໍ ກຕ຺ຕຸສມໍ, ອາວິຏ຺ເຐນ ປຸຣິເສນ ໂສ ປຸຎ຺ຎໍ ກໂຣຕິ, ປຸຣິເສຫິ, ປຸຣິເສຠິ.

ຕຕ຺ເຖວ ສມ຺ປທານວຈນິຈ຺ຉາຍໍ –

໘໔. ຍສ຺ສ ທາຕຸກາໂມ ໂຣຈເຕ ຘາຣຍເຕ ວາ ຕໍ ສມ຺ປທານໍ.

ຍສ຺ສ ວາ ທາຕຸກາໂມ, ຍສ຺ສ ວາ ໂຣຈເຕ, ຍສ຺ສ ວາ ຘາຣຍເຕ, ຕໍ ກາຣກໍ ສມ຺ປທານສຎ຺ຎໍ ໂຫຕິ.

໘໕. ສມ຺ປທາເນ ຈຕຸຕ຺ຖີ.

ສມ຺ປທານກາຣເກ ຈຕຸຕ຺ຖີວິຠຕ຺ຕິ ໂຫຕີຕິ ຈຕຸຕ຺ຖິຍາ ເອກວຈນໍ ສ.

໘໖. ສາຄໂມ ເສ.

ສພ຺ພໂຕ ລິງ຺ຄມ຺ຫາ ສກາຣາຄໂມ ໂຫຕິ ເສ ວິຠຕ຺ຕິມ຺ຫິ ປເຣ. ປຸຣິສສ຺ສ ຘນໍ ທທາຕິ.

ພຫຸວຈນມ຺ຫິ ‘‘ທີຆ’’ນ຺ຕິ ວຕ຺ຕເຕ.

໘໗. ສຸນໍຫິສຸ ຈ.

ສຸ ນໍ ຫິອິຈ຺ເຈເຕສຸ ປເຣສຸ ລິງ຺ຄສ຺ສ ອນ຺ຕຠູຕາ ສພ຺ເພ ຣສ຺ສສຣາ ທີຆມາປຊ຺ຊນ຺ເຕ, ຈຄ຺ຄຫຓມິກາຣຸກາຣານໍ ກ຺ວຈິ ນິວຕ຺ຕນຕ຺ຖໍ. ປຸຣິສານໍ.

ຕຕ຺ເຖວາປາທານວຈນິຈ຺ຉາຍໍ –

໘໘. ຍສ຺ມາ ທເປຕິ ຠຍມາທຕ຺ເຕ ວາ ຕທປາທານໍ.

ຍສ຺ມາ ວາ ອວຘິຠູຕາ ອເປຕິ, ຍສ຺ມາ ວາ ຠຍໍ, ຍສ຺ມາ ວາ ອາທຕ຺ເຕ, ຕໍ ກາຣກໍ ອປາທານສຎ຺ຎໍ ໂຫຕິ.

໘໙. ອປາທາເນ ປຎ຺ຈມີ.

ອປາທານກາຣເກ ປຎ຺ຈມີວິຠຕ຺ຕິ ໂຫຕີຕິ ປຎ຺ຈມິຍາ ເອກວຈນໍ ສ຺ມາ.

‘‘ອໂຕ, ສພ຺ເພສໍ, ອາ ເອ’’ຕິ ຈ ວຕ຺ຕເຕ.

໙໐. ສ຺ມາສ຺ມິໍນ ວາ.

ອກາຣນ຺ຕໂຕ ລິງ຺ຄມ຺ຫາ ສພ຺ເພສໍ ສ຺ມາ ສ຺ມິໍອິຈ຺ເຈເຕສໍ ຍຖາກ຺ກມໍ ອາກາເຣກາຣາເທສາ ໂຫນ຺ຕິ ວາ, ອຎ຺ຎຕ຺ຖ ມ຺ຫາເທໂສ. ປຸຣິສາ ອເປຕິ, ປຸຣິສມ຺ຫາ, ປຸຣິສສ຺ມາ.

ພຫຸວຈເນ ສພ຺ພຕ຺ຖ ຕຕິຍາສມໍ, ຫິສ຺ສ ຠິອາເທໂສ ໂຫຕິ. ປຸຣິເສຫິ, ປຸຣິເສຠິ ອເປຕິ.

ຕຕ຺ເຖວ ສາມິວຈນິຈ຺ຉາຍໍ –

໙໑. ຍສ຺ສ ວາ ປຣິຄ຺ຄໂຫ ຕໍ ສາມິ.

ຍສ຺ສ ວາ ປຣິຄ຺ຄໂຫ, ຕໍ ສາມິສຎ຺ຎໍ ໂຫຕິ.

໙໒. ສາມິສ຺ມິໍ ຉຏ຺ຐີ.

ສາມິສ຺ມິໍ ຉຏ຺ຐີວິຠຕ຺ຕິ ໂຫຕິ. ຐເປຕ຺ວາ ອາຍາເທສໍ ສພ຺ພຕ຺ຖ ຈຕຸຕ຺ຖີຉຏ຺ຐີນໍ ສມານໍ ຣູປໍ. ປຸຣິສສ຺ສ ເອຕໍ ຘນໍ, ປຸຣິສານໍ.

ຕຕ຺ເຖວ ໂອກາສວຈນິຈ຺ຉາຍໍ –

໙໓. ໂຍຘາໂຣ ຕໂມກາສໍ.

ໂຍ ກຕ຺ຕຸກມ຺ມານໍ ກ຺ຣິຍາຍ ອາຘາໂຣ, ຕໍ ກາຣກໍ ໂອກາສສຎ຺ຎໍ ໂຫຕິ.

໙໔. ໂອກາເສ ສຕ຺ຕມີ.

ໂອກາສກາຣເກ ສຕ຺ຕມີວິຠຕ຺ຕິ ໂຫຕີຕິ ສຕ຺ຕມິຍາ ເອກວຈນໍ ສ຺ມິໍ, ຕສ຺ສ ‘‘ສ຺ມາສ຺ມິໍນໍ ວາ’’ຕິ ເອກາໂຣ, ມ຺ຫິອາເທໂສ ຈ, ປຸຣິເສ ປຕິຏ຺ຐິຕໍ, ປຸຣິສມ຺ຫິ, ປຸຣິສສ຺ມິໍ.

ພຫຸວຈເນ ‘‘ສຸຫິສ຺ວກາໂຣ ເອ’’ຕິ ເອກາໂຣ, ປຸຣິເສສຸ.

ປຸຣິໂສ, ປຸຣິສາ, ໂຠ ປຸຣິສ ໂຠ ປຸຣິສາ ວາ, ຠວນ຺ໂຕ ປຸຣິສາ, ປຸຣິສໍ, ປຸຣິເສ, ປຸຣິເສນ, ປຸຣິເສຫິ ປຸຣິເສຠິ, ປຸຣິສສ຺ສ, ປຸຣິສານໍ, ປຸຣິສາ ປຸຣິສສ຺ມາ ປຸຣິສມ຺ຫາ, ປຸຣິເສຫິ ປຸຣິເສຠິ, ປຸຣິສສ຺ສ, ປຸຣິສານໍ, ປຸຣິເສ ປຸຣິສສ຺ມິໍ ປຸຣິສມ຺ຫິ, ປຸຣິເສສຸ.

ຕຖາ ສຸຄໂຕ, ສຸຄຕາ, ໂຠ ສຸຄຕ ໂຠ ສຸຄຕາ ວາ, ຠວນ຺ໂຕ ສຸຄຕາ, ສຸຄຕໍ, ສຸຄເຕ, ສຸຄເຕນ, ສຸຄເຕຫິ ສຸຄເຕຠິ, ສຸຄຕສ຺ສ, ສຸຄຕານໍ, ສຸຄຕາ ສຸຄຕສ຺ມາ ສຸຄຕມ຺ຫາ, ສຸຄເຕຫິ ສຸຄເຕຠິ, ສຸຄຕສ຺ສ, ສຸຄຕານໍ, ສຸຄເຕ ສຸຄຕສ຺ມິໍ ສຸຄຕມ຺ຫິ, ສຸຄເຕສຸ.

ເອວໍ ສຸຣາ’ສຸຣ ນໂຣ’ຣຄ ນາຄ ຍກ຺ຂາ,

ຄນ຺ຘພ຺ພ ກິນ຺ນຣ ມນຸສ຺ສ ປິສາຈ ເປຕາ;

ມາຕງ຺ຄ ຊງ຺ຄມ ຕຸຣງ຺ຄ ວຣາຫ ສີຫາ,

ພ຺ຍຄ຺ຆ’ຈ຺ຉ ກຈ຺ຉປ ຕຣຈ຺ຉ ມິຄ’ສ຺ສ ໂສຓາ.

ອາໂລກ ໂລກ ນິລຍາ’ນິລ ຈາຄ ໂຍຄາ, ວາຍາມ ຄາມ

ນິຄມາ’ຄມ ຘມ຺ມ ກາມາ;

ສງ຺ໂຆ’ຆ ໂຆສ ປຏິຆາ’ສວ ໂກຘ ໂລຠາ,

ສາຣມ຺ຠ ຖມ຺ຠ ມທ ມານ ປມາທ ມກ຺ຂາ.

ປຸນ຺ນາຄ ປູຄ ປນສາ’ສນ ຈມ຺ປກ’ມ຺ພາ,

ຫິນ຺ຕາລ ຕາລ ພກຸລ’ຊ຺ຊຸນ ກິໍສຸກາ ຈ;

ມນ຺ທາຣ ກຸນ຺ທ ປຸຈິມນ຺ທ ກຣຎ຺ຊ ຣຸກ຺ຂາ,

ເຎຍ຺ຍາ ມຍູຣ ສກຸນຓ຺ຑຊ ໂກຎ຺ຈ ຫໍສາ –

ອິຈ຺ຈາທໂຍປິ.

ມໂນຄຓາທິສ຺ສ ຕຸ ນາສສ຺ມາສ຺ມິໍສຸ ວິເສໂສ. ອຎ຺ຎຕ຺ຖ ປຸຣິສສມໍ.

ມໂນ, ມນາ, ເຫ ມນ ເຫ ມນາ ວາ, ຠວນ຺ໂຕ ມນາ, ມນໍ, ມເນ.

‘‘ວາ’’ຕິ ວຕ຺ຕເຕ.

໙໕. ມໂນຄຓາທິໂຕ ສ຺ມິໍນານມິອາ.

ມໂນປຠຸຕິ ຄໂຓ ມໂນຄໂຓ, ມໂນຄຓາທິໂຕ ສ຺ມິໍ, ນາອິຈ຺ເຈເຕສໍ ຍຖາກ຺ກມໍ ອິກາຣາກາຣາເທສາ ໂຫນ຺ຕິ ວາ. ອາທິຄ຺ຄຫເຓນ ພິລປທາທິໂຕປິ.

‘‘ມໂນຄຓາທິໂຕ’’ຕິ ວຕ຺ຕເຕ.

໙໖. ສ ສເຣ ວາຄໂມ.

ເອເຕເຫວ ມໂນຄຓາທີຫິ ສເຣ ປເຣ ສາຄໂມ ໂຫຕິ ວາ. ມນສາ, ມເນນ.

ວວຕ຺ຖິຕວິຠາສຕ຺ໂຖຍໍ ວາສທ຺ໂທ, ເຕນ ‘‘ມໂນ ມນາ ມນໍ ມເນ ມນອາຍຕນ’’ນ຺ຕິອາທີສຸ ນ ໂຫຕິ. ‘‘ມານສິກໍ, ເຈຕສິກ’’ນ຺ຕິອາທີສຸ ນິຈ຺ຈໍ. ມເນຫິ, ມເນຠິ.

‘‘ມໂນຄຓາທິໂຕ, ວາ’’ຕິ ຈ ວຕ຺ຕເຕ.

໙໗. ສສ຺ສ ໂຈ.

ມໂນຄຓາທິໂຕ ປຣສ຺ສ ສສ຺ສ ວິຠຕ຺ຕິສ຺ສ ໂອກາໂຣ ໂຫຕິ ວາ. ສາຄໂມ.