໗. ກິຕກຓ຺ຑ

ຘາຕ຺ວນ຺ຕວິກາຣຣາສິ

ວິສໍໂຍຄຣູປຣາສິ

ອຖ ຘາຕຸປຈ຺ຈຍສໍສິທ຺ຘໍ ກາລ, ກາຣກ, ລິງ຺ຄ, ສງ຺ຂ຺ຍາ, ກ຺ຣິຍາເຠທທີປກໍ ທພ຺ພປ຺ປຘານວາຈກໍ ກິຕກປທໍ ທີປິຍເຕ.

ຕຕ຺ຖ ອຕີຕາທໂຍ ກາລເຠໂທ ນາມ.

ກຕ຺ຕາ ຈ ກມ຺ມຎ຺ຈ ກຣຓຎ຺ຈ ສມ຺ປທານຎ຺ຈ ອປາທານຎ຺ຈ ອຘິກຣຓຎ຺ຈ ຠາໂວ ຈາຕິ ສຕ຺ຕ ສາຘນານິ ກາຣກເຠໂທ ນາມ.

ອິຕ຺ຖິລິງ຺ຄາທີນິ ລິງ຺ຄເຠໂທ ນາມ.

ເອກຕ຺ຕ, ພຫຸຕ຺ຕເຠໂທ ສງ຺ຂ຺ຍາເຠໂທ ນາມ.

ຕສ຺ສີລກ຺ຣິຍາ, ຕທ຺ຘມ຺ມກ຺ຣິຍາ, ຕສ຺ສາຘຸກາຣກ຺ຣິຍາ, ອຕ຺ຕມານກ຺ຣິຍາ, ອຠິກ຺ຂຎ຺ຎກ຺ຣິຍາ, ອຣຫກ຺ຣິຍາ, ສກ຺ກກ຺ຣິຍາ, ເປສນກ຺ຣິຍາ, ອຕິສຄ຺ຄກ຺ຣິຍາ, ປຕ຺ຕກາລາໂຣຈນກ຺ຣິຍາ, ອວສ຺ສມ຺ຠາວີກ຺ຣິຍາທໂຍ ກ຺ຣິຍາເຠໂທ ນາມ.

‘‘ຄມນໍ ຠວຕິ, ປຈນໍ ຊານາຕິ’’ ອິຈ຺ຈາທີສຸ ປຈ຺ຈຍຕ຺ຖຠູໂຕ ຠາໂວ ນາມ ສາຘນຣູໂປ ໂຫຕິ. ຊາຕິ ວິຍ ສງ຺ຂຕຘມ຺ມສ຺ສ ຘາຕ຺ວຕ຺ຖຠູຕາຍ ສາຘ຺ຍກ຺ຣິຍາຍ ສາຘກຕ຺ຕາ ລິງ຺ຄຕ຺ຕຍຍຸຕ຺ໂຕ ຈ ໂຫຕິ, ກ຺ຣິຍາ, ກາໂຣ, ກຣຓນ຺ຕິ ສິທ຺ຘຕ຺ຕາ ສງ຺ຂ຺ຍາເຠທຍຸຕ຺ໂຕ ຈ ໂຫຕິ-ນານາຘາຕ຺ວຕ຺ຖານຎ຺ຈ ກຕ຺ຕຸ, ກມ຺ມານຎ຺ຈ ກາລາທີນຎ຺ຈ ເຠເທນ ສຣູປເຠທສພ຺ຠວໂຕ, ຕສ຺ມາ ໂສປິ ທພ຺ເພ ເອວ ສງ຺ຄຍ຺ຫຕີຕິ ກຕ຺ວາ ‘ທພ຺ພປ຺ປຘານວາຈກ’ນ຺ຕິ ວຸຕ຺ຕໍ. ເສສໍ ສພ຺ພໍ ຕ຺ຍາທິກຓ຺ເຑ ຠາວສາຘນວິນິຈ຺ຉເຍ ວຸຕ຺ຕເມວ.

‘ພຫຸລ’ນ຺ຕິ ຈ ‘ກ຺ຣິຍຕ຺ຖາ’ຕິ ຈ ວຕ຺ຕນ຺ເຕ –

໗໑໕. ກຕ຺ຕຣິ ຠູເຕ ກ຺ຕ ກ຺ຕວນ຺ຕຸ ກ຺ຕາວີ [ກ. ໕໕໕; ຣູ. ໖໑໒; ນີ. ໑໑໔໒; ຈໍ. ໑.໒.໖໖ …ເປ… ໓.໒.໑໐໒].

ອຠວີຕິ ຠູໂຕ, ອຕີໂຕ, ຠູເຕ ວຕ຺ຕພ຺ເພ ກ຺ຣິຍຕ຺ຖາ ກຕ຺ຕຣິ ການຸພນ຺ຘາ ຕ, ຕວນ຺ຕຸ, ຕາວີປຈ຺ຈຍາ ໂຫນ຺ຕິ, ການຸພນ຺ຘາ ‘ນ ເຕ ການຸພນ຺ຘນາຄເມສູ’ຕິ ສຸຕ຺ເຕ ວິເສສນຕ຺ຖາ.

໗໑໖. ກ຺ໂຕ ຠາວກມ຺ເມສຸ [ກ. ໕໕໖; ຣູ. ໖໒໒; ນີ. ໑໑໔໓; ຈໍ. ໑.໒.໖໗ …ເປ… ໓.໒.໑໐໒; ໓.໔.໗໐].

ຠູເຕ ວຕ຺ຕພ຺ເພ ກ຺ຣິຍຕ຺ຖາ ຠາວ, ກມ຺ເມສຸ ການຸພນ຺ໂຘ ຕປຈ຺ຈໂຍ ໂຫຕິ.

ອຠວີຕິ ຠູໂຕ-ປຸຣິໂສ, ຠູຕາ-ອິຕ຺ຖີ, ຠູຕໍ-ກຸລໍ, ກາຣິເຕ ຘາຕຸໂຕ ຓານຸພນ຺ຘານໍ ປຐມໍ ສມ຺ປຕ຺ຕຕ຺ຕາ ‘ນ ເຕ ການຸພນ຺ຘນາຄເມສູ’ຕິ ປຏິເສໂຘ ນ ປາປຸຓາຕິ, ‘ຍຸວຓ຺ຓານເມໂອ ປຈ຺ຈເຍ’ຕິ ໂອວຸທ຺ຘິ, ‘ອາວາຍາ ຓານຸພນ຺ເຘ’ຕິ ໂອສ຺ສ ອາວຕ຺ຕໍ, ຕໂຕ ຕປຈ຺ຈໂຍ.

໗໑໗. ຎີ ພ຺ຍຎ຺ຊນສ຺ສ [ກ. ໖໐໕; ຣູ. ໕໔໗; ນີ. ໑໒໑໐].

ພ຺ຍຎ຺ຊນາທິປຈ຺ຈຍສ຺ສ ອາທິມ຺ຫິ ຎານຸພນ຺ໂຘ ອີກາໂຣ ອາຄຈ຺ຉຕິ.

ກຕ຺ຕຣິ-ອຠາວຍິຕ຺ຖາຕິ ຠາວິໂຕ-ປຸຣິໂສ, ຠາວິຕາອິຕ຺ຖີ, ຠາວິຕໍ-ກຸລໍ.

ກມ຺ເມ-ອນຸຠູຍິຕ຺ຖາຕິ ອນຸຠູໂຕ-ໂຠໂຄ, ອນຸຠູຕາສມ຺ປຕ຺ຕິ, ອນຸຠູຕໍ-ສຸຂໍ.

ກາຣິເຕ-ຠາວີຍິຕ຺ຖາຕິ ຠາວິໂຕ-ມຄ຺ໂຄ, ຠາວິຕາປຏິປທາ, ຠາວິຕໍ-ຈິຕ຺ຕໍ.

ຕວນ຺ຕຸ, ຕາວີສຸ-ອຠວີຕິ ຠູຕວາ-ປຸຣິໂສ, ຠູຕວນ຺ຕີ, ຠູຕວຕີ-ອິຕ຺ຖີ, ຠູຕວໍ-ກຸລໍ, ຄຸຓວນ຺ຕຸສມໍ. ຠູຕາວີ-ປຸຣິໂສ. ຠູຕາວິນີ-ອິຕ຺ຖີ, ຠູຕາວິ-ຈິຕ຺ຕໍ, ທຓ຺ຑີ, ທຓ຺ຑິນີສມໍ. ປຸຣິໂສ ໂຠຄໍ ອນຸຠູໂຕ, ປຸຣິເສນ ໂຠໂຄ ອນຸຠູໂຕ.

ເອຕ຺ຖ ຈ ກິຕປຈ຺ຈຍານໍ ອຕ຺ໂຖ ທຸວິໂຘ ວາຈ຺ຈຕ຺ໂຖ, ອຠິເຘຍ຺ຍຕ຺ໂຖ ຈາຕິ ສພ຺ພໍ ຕ຺ຍາທິກຓ຺ເຑ ວຸຕ຺ຕນເຍນ ເວທິຕພ຺ພໍ.

ປຸຣິເມສຸ ປນ ຉສຸ ສາຘເນສຸ ປຈ຺ຈຍານໍ ອຠິເຘຍ຺ຍຕ຺ໂຖ ປທນ຺ຕເຣນ ອາຈິກ຺ຂີຍຕິ, ຠາວສາຘເນ ປນ ອຕ຺ຕໂນ ຘາຕຸນາ ເອວ.

ຕຕ຺ຖ ຈ ກຕ຺ຕຸສຕ຺ຕິ, ກມ຺ມສຕ຺ຕິ, ກຣຓສຕ຺ຕິ, ສມ຺ປທານສຕ຺ຕິ, ອປາທານສຕ຺ຕິ, ອຘິກຣຓສຕ຺ຕິສງ຺ຂາຕໍ ວາຈ຺ຈຕ຺ຖໍ ອຸຊຸໍ ວທນ຺ຕາ ກິຕປຈ຺ຈຍາ ອຕ຺ຕໂນ ອຠິເຘຍ຺ຍປເທນ ສມານລິງ຺ຄ, ວິຠຕ຺ຕິ, ສງ຺ຂ຺ຍາຍຸຕ຺ຕາ ຫຸຕ຺ວາ ວທນ຺ຕິ.

ຕໍ ຍຖາ? –

ກຕ຺ຕຣິ ຕາວ-ປຸຣິໂສ ໂຠຄໍ ອນຸຠູໂຕ, ປຸຣິສາ ໂຠຄໍ ອນຸຠູຕາ…ເປ… ປຸຣິເສສຸ ໂຠຄໍ ອນຸຠູເຕສຸ, ອິຕ຺ຖີ ໂຠຄໍ ອນຸຠູຕາ, ອິຕ຺ຖິໂຍ ໂຠຄໍ ອນຸຠູຕາໂຍ…ເປ… ອິຕ຺ຖີສຸ ໂຠຄໍ ອນຸຠູຕາສຸ, ກຸລໍ ໂຠຄໍ ອນຸຠູຕໍ, ກຸລານິ ໂຠຄໍ ອນຠູຕານິ…ເປ… ກຸເລສຸ ໂຠຄໍ ອນຸຠູເຕສຸ.

ກມ຺ເມ-ໂຠໂຄ ປຸຣິເສນ ອນຸຠູໂຕ, ໂຠຄາ ປຸຣິເສນ ອນຸຠູຕາ…ເປ… ໂຠເຄສຸ ປຸຣິເສນ ອນຸຠູເຕສຸ, ສມ຺ປຕ຺ຕິ ປຸຣິເສນ ອນຸຠູຕາ, ສມ຺ປຕ຺ຕິໂຍ ປຸຣິເສນ ອນຸຠູຕາໂຍ…ເປ… ສມ຺ປຕ຺ຕີສຸ ປຸຣິເສນ ອນຸຠູຕາສຸ, ສຸຂໍ ປຸຣິເສນ ອນຸຠູຕໍ, ສຸຂານິ ປຸຣິເສນ ອນຸຠູຕານິ…ເປ… ສຸເຂສຸ ປຸຣິເສນ ອນຸຠູເຕສຸ. ເອສ ນໂຍ ກຣຓາທີສຸປິ.

ເອວໍ ກິຕວາຈກາ ອຕ຺ຕໂນ ອຠິເຘຍ຺ຍປເທນ ສມານລິງ຺ຄ, ວິຠຕ຺ຕິ, ສງ຺ຂ຺ຍາຍຸຕ຺ຕາ ຫຸຕ຺ວາ ຕໍ ຕໍ ສາຘນໍ ວທນ຺ຕິ.

‘ອິຕ຺ຖິຍມຓຕິກຍກ຺ຍາ ຈາ’ຕິ ອິຕ຺ຖິຍໍ ຕິປຈ຺ຈໂຍ, ອນຸຠວນໍ, ອນຸຠູຍເຕ ວາ ອນຸຠູຕິ. ‘‘ຕິສ຺ສສ຺ສ ອນຸຠູຕິ, ຜຸສ຺ສສ຺ສ ອນຸຠູຕິ’’ ອິຈ຺ຈາທິກາ ພຫູ ອນຸຠູຕິໂຍປິ ສິຊ຺ຌນ຺ຕິ, ຕສ຺ມາ ‘‘ອນຸຠູຕິ, ອນຸຠູຕິໂຍ, ອນຸຠູຕິໍ, ອນຸຠູຕິໂຍ…ເປ… ອນຸຠູຕີສູ’’ຕິ ຍຸຊ຺ຊຕິ.

໕໐໓. ໗໑໘. ກຕ຺ຕຣິ ລ຺ຕຸຓກາ [ກ. ໕໒໗, ໕໓໐; ຣູ. ໕໖໘, ໕໙໐; ນີ. ໑໑໐໙, ໑໑໑໔; ຈໍ. ໑.໑.໑໓໙; ປາ. ໓.໑.໑໓໓, ໑໓໔].

ກຕ຺ຕຸກາຣເກ ກ຺ຣິຍຕ຺ຖາ ລ຺ຕຸ, ຓກາ ໂຫນ຺ຕິ, ລານຸພນ຺ໂຘ ຕຸສ຺ສ ກຕ຺ຕຣິ ນິພນ຺ຘນຕ຺ໂຖ, ‘ລ຺ຕຸປິຕາທີນມາ’ຕິ ວິເສສນຕ຺ໂຖ ຈ.

ອນຸຠວຕີຕິ ອນຸຠູຕາ, ອນຸຠູຕາໂຣ, ສຕ຺ຖຸສມໍ.

ສາມຎ຺ຎວິຘານຕ຺ຕາ ອຣຫຕ຺ເຖ ສຕ຺ຕິອຕ຺ເຖ ຕສ຺ສີລ, ຕທ຺ຘມ຺ມ, ຕສ຺ສາຘຸກາຣ, ອຕ຺ຕມາເນສຸ ຈ ກາລຕ຺ຕເຍ ຈ ຠວນ຺ຕິ.

ອຣຫຕ຺ເຖ-ພ຺ຣຫ຺ມໂຓ ພ຺ຣຫ຺ມຓິຍາ ປຣິຄ຺ຄຫິຕາ.

ສຕ຺ຕິອຕ຺ເຖ-ຠຄວາ ອນຸປ຺ປນ຺ນສ຺ສ ມຄ຺ຄສ຺ສ ອຸປ຺ປາເທຕາ.

ຕສ຺ສີລາທີສຸ-ປສຍ຺ຫປວຕ຺ຕາ.

ອຕ຺ຕມາເນ-ອຕ຺ຕານໍ ປຓ຺ຑິຕໍ ມຎ຺ຎຕີຕິ ປຓ຺ຑິຕມານິຕາ.

໗໑໙. ປຸພ຺ເພກກຕ຺ຕຸການໍ [ກ. ໕໖໔; ຣູ. ໖໔໐; ນີຕິ. ໑໑໕໐-໖; ຈໍ. ໑.໓.໑໓໑; ປາ. ໓.໔.໒໑].

ຍາສໍ ວິເສສນ, ວິເສສ຺ຍານໍ ທ຺ວິນ຺ນໍ ປຸພ຺ພາ’ປຣກ຺ຣິຍານໍ ກຕ຺ຕາ ເອໂກວ ໂຫຕິ. ຕາສຸ ປຸພ຺ພກ຺ຣິຍາຍໍ ຠາວຕ຺ເຖ ຕຸນ, ຕ຺ວານ, ຕ຺ວາປຈ຺ຈຍາ ໂຫນ຺ຕິ. ‘ເອໂອນມຍວາ ສເຣ’ຕິ ອີກາເຣ ປເຣ ໂອວຸທ຺ຘິຍາ ອວຕ຺ຕໍ.

ໂຠຄໍ ອນຸຠວິຕຸນ, ອນຸຠຸຕ຺ວານ, ອນຸຠຸຕ຺ວາ.

ເອກກຕ຺ຕຸການນ຺ຕິ ກິໍ? ເທວທຕ຺ໂຕ ຠຸຎ຺ຊິ, ຍຎ຺ຎທຕ຺ໂຕ ຄຈ຺ຉຕິ.

ປຸພ຺ເພຕິ ກິໍ? ປຈ຺ຉາ ຠຸຎ຺ຊຕິ, ປຐມໍ ປຈຕິ.

ພຫຸລາຘິກາຣາ ສມານາ’ປຣກ຺ຣິຍາສຸປິ ນານາກຕ຺ຕຸກາສຸປິ ຕຸນາທໂຍ ຠວນ຺ຕິ. ຖກ຺ກຈ຺ຈ ທຓ຺ໂຑ ປຕຕິ, ທ຺ວາຣໍ ສໍວຣິຕ຺ວາ ນິກ຺ຂມຕິ, ປຸຣິໂສ ສີຫໍ ທິສ຺ວາ ຠຍໍ ອຸປ຺ປຊ຺ຊຕີຕິ.

ຍສ຺ມິໍ ວາກ຺ເຍ ອປຣກ຺ຣິຍາປທໍ ນ ທິສ຺ສຕິ. ຍຖາ? ປພ຺ພຕໍ ອຕິກ຺ກມ຺ມ ນທີ, ອຕິກ຺ກມ຺ມ ນທິໍ ປພ຺ພໂຕ, ເຍ ເຕ ສນ຺ຕາ ວິໂມກ຺ຂາ ອຕິກ຺ກມ຺ມ ຣູເປ ອຣູປາຕິ, ຕຕ຺ຖປິ ສຕ຺ຕາກ຺ຣິຍາ ວິຎ຺ຎາຍເຕວ ສພ຺ພປທຕ຺ຖານໍ ສຕ຺ຕານາຕິວຕ຺ຕນໂຕ. ອປຣກ຺ຣິຍາຣຫິເຕ ອສມານກຕ຺ຕຸເກ ຈ ວາກ຺ເຍ ປຐມນ຺ຕໂຍຄສ຺ສ ທິຏ຺ຐຕ຺ຕາ ກຕ຺ຕຣິປິ ຕຸນາທີນໍ ສມ຺ຠໂວ ຍຸຕ຺ໂຕ.

໗໒໐. ປຏິເສຘາລໍຂລູນໍ ຕຸນ ຕ຺ວານ ຕ຺ວາ ວາ [ປຏິເສເຘລໍຂລູນໍ ຕຸນຕ຺ຕ຺ວານ ຕ຺ຕ຺ວາ ວາ’ (ພຫູສຸ)].

ປຏິເສຘຕ຺ຖານໍ ອລໍ, ຂລູນໍ ໂຍເຄ ຕຸນາທໂຍ ໂຫນ຺ຕິ ວາ.

ອລໍ ຠຸຕ຺ວາ, ຂລຸ ຠຸຕ຺ວາ, ອລໍ ຠຸຕ຺ເຕນ, ຂລຸ ຠຸຕ຺ເຕນ ວາ.

໗໒໑. ຕຸໍຕາເຍຕເວ ຠາເວ ຠວິສ຺ສຕິກ຺ຣິຍາຍໍ ຕທຕ຺ຖາຍໍ [ກ. ໕໖໑-໒-໓; ຣູ. ໖໓໖, ໖໓໘-໙; ນີ. ໑໑໔໘-໙].

ຕສ຺ສາ ຕສ຺ສາ ກ຺ຣິຍາຍ ອຕ຺ຖຠູຕາຍ ຠວິສ຺ສມານກ຺ຣິຍາຍ ຄມ຺ຍມານາຍ ຠາວຕ຺ເຖ ຕຸໍ, ຕາເຍ, ຕເວປຈ຺ຈຍາ ຠວນ຺ຕິ. ສຸຕ຺ຕປທວຑ຺ຒເນນ ຕຸເຍປຈ຺ຈໂຍປິ.

ອນຸຠວິຕຸໍ ຄຈ຺ຉຕິ, ອນຸຠວິຕາເຍ ຄຈ຺ຉຕິ, ອນຸຠວິຕເວ ຄຈ຺ຉຕິ, ອນຸຠວິຕຸໍ ອິຈ຺ຉຕິ, ກາເມຕິ, ສກ຺ໂກຕິ, ຊານາຕິ. ຕຖາ ກາໂລ ອນຸຠວິຕຸໍ, ສມໂຍ ອນຸຠວິຕຸໍ, ເວລາ ອນຸຠວິຕຸໍ. ຕຖາ ອນຸຠວິຕຸໍ ມໂນ, ອນຸຠວິຕຸໍ ໂສໂກ, ຈກ຺ຂຸ ທຏ຺ຐຸໍ, ໂສຕໍ ໂສຕຸໍ, ມໂນ ວິຎ຺ຎາຕຸໍ, ຫຕ຺ໂຖ ກາຕຸໍ, ປາໂທ ຄນ຺ຕຸໍ, ຘນຸ ຍຸຊ຺ຌິຕຸໍ, ຊໂຬ ວຕ຺ຕຸໍ, ມນ຺ໂທ ຄນ຺ຕຸໍ, ອລໂສ ກຕ຺ຕຸນ຺ຕິ.

ເອຕ຺ຖ ຈ ‘‘ກາໂລ ອນຸຠວິຕຸ’’ນ຺ຕິອາທີສຸ ສຕ຺ຕາວເສນ ເຫຕຸກ຺ຣິຍາ ສິຊ຺ຌຕິ, ຕສ຺ມາ ‘‘ອນຸຠວິຕຸໍ ກາໂລ ຠວຕີ’’ຕິອາທິນາ ອຕ຺ໂຖ ເວທິຕພ຺ໂພ.

ອິເມ ປເນຕ຺ຖ ຕາເຍ, ຕຸເຍປໂຍຄາ – ອາຄຕາມ຺ຫ ອິມໍ ຘມ຺ມສມຍໍ, ທກ຺ຂິຕາເຍ ອປຣາຊິຕສງ຺ຆໍ [ທີ. ນິ. ໒.໓໓໒]. ອລຎ຺ຫິ ເຕ ຊຄ຺ຆິຕາເຍ, ມມໍ ທິສ຺ວານ ເອທິສໍ [ຊາ. ໑.໕.໑໓໗]. ໂກ ຕາທິສໍ ອຣຫຕິ ຂາທິຕາເຍ [ຊາ. ໑.໑໖.໙໒], ອຕ຺ຖິ ເຫຫິຕິ ໂສ ມຄ຺ໂຄ, ນ ໂສ ສກ຺ກາ ນ ໂຫຕຸເຍ [ພຸ. ວໍ. ໒.໙ ‘ເຫຕຸເຍ’], ອຣຫສິ ນໍ ຍາຈິຕຸເຍ ຕຸວມ຺ປິ, ອຣຫສິ ໂນ ຊານິຕຸເຍ ກຕານິ ອິຈ຺ຈາທິ.

໗໒໒. ຠາວກມ຺ເມສຸ ຕພ຺ພານີຍາ [ກ. ໕໔໐; ຣູ. ໕໔໕; ນີ. ໑໑໒໕].

ຠາເວ ກມ຺ມນິ ຈ ຕພ຺ພ, ອນີຍາ ໂຫນ຺ຕິ. ສຸຕ຺ຕປທວຑ຺ຒເນນ ຕພ຺ຍ, ຕາຍ, ເຕຍ຺ຍປຈ຺ຈຍາປິ ໂຫນ຺ຕິ.

ອນຸຠວິຕພ຺ໂພ-ໂຠໂຄ, ອນຸຠວິຕພ຺ພາ-ສມ຺ປຕ຺ຕິ, ອນຸຠວິຕພ຺ພໍ-ສຸຂໍ.

ພຫຸລາຘິກາຣາ ກຕ຺ຕາທີສ຺ວປິ ຠວນ຺ຕິ, ຕປນ຺ຕີຕິ ຕປນີຍາປາປຘມ຺ມາ, ອຸປຏ຺ຐາຕີຕິ ອຸປຏ຺ຐານີໂຍ-ສິສ຺ໂສ. ປວຸຈ຺ຈຕິ ເອເຕນາຕິ ປວຈນີໂຍ-ອຸປຊ຺ຌາໂຍ, ນິຍ຺ຍນ຺ຕິ ເອເຕນາຕິ ນິຍ຺ຍານີໂຍ, ໂສ ເອວ ນິຍ຺ຍານິໂກ.

ສິນາ-ໂສເຈຍ຺ເຍ, ສິນາຍນ຺ຕິ ເອເຕນາຕິ ສິນານີຍໍຈຸຓ຺ຓໍ, ທີຍເຕ ອສ຺ສາຕິ ທານີໂຍ-ພ຺ຣາຫ຺ມໂຓ. ສມ຺ມາ ວຕ຺ຕຕິ ເອຕ຺ຖາຕິ ສມ຺ມາວຕ຺ຕນີໂຍ-ຄຸຣຸ.

ອິຘ ຄາຖາ ວຸຈ຺ຈຕິ –

ອຣຫຕ຺ເຖ ຈ ສກ຺ກຕ຺ເຖ, ປຕ຺ຕກາເລ ຈ ເປສເນ;

ຕພ຺ພາທໂຍ ອຕິສຄ຺ເຄ, ອວສ຺ສາຘມິເຓສຸ ຈ.

ຕຕ຺ຖ ‘‘ອຣຫ ສກ຺ກ ວິສິຏ຺ເຐ ກຕ຺ຕຣີ’’ຕິ ວຸຕ຺ຕິຍໍ ວຸຕ຺ຕໍ, ຕສ຺ມາ ຠວຕີຕິ ຠພ຺ໂພ, ຠວິຕຸໍ ອຣຫຕີຕິ ອຕ຺ໂຖ, ມຊ຺ຊຕີຕິ ມຊ຺ຊໍ, ມທນີຍໍ, ມຊ຺ຊິຕຸໍ ສກ຺ໂກຕີຕິ ອຕ຺ໂຖ, ເອວມ຺ປິ ຍຸຊ຺ຊຕິ.

ປຕ຺ຕກາເລ-ກຕ຺ຕພ຺ໂພ ຠວຕາ ກໂຏ, ເອສ ກາໂລ ກຏກຣຓສ຺ສາຕິ ທີເປຕິ.

ເປສເນ-ຄນ຺ຕພ຺ໂພ ຠວຕາ ຄາໂມ, ຄຈ຺ຉຕຸ ຠວໍ ຄາມນ຺ຕິ ທີເປຕິ.

ອຕິສຊ຺ຊນໍ ສມ຺ໂພຘນໍ ອຕິສຄ຺ໂຄ, ອຸປເທໂສ ເຈວ ວິຘິ ຈ. ຕຕ຺ຖ ກຕ຺ຕພ຺ພາ’ກຕ຺ຕພ຺ພສ຺ສ ກມ຺ມສ຺ສ ອາຈິກ຺ຂຓໍ ອຸປເທໂສ, ທານໍ ທາຕພ຺ພໍ, ສີລໍ ຣກ຺ຂິຕພ຺ພໍ, ປາໂຓ ນ ຫນ຺ຕພ຺ໂພ, ອທິນ຺ນໍ ນ ອາທາຕພ຺ພໍ [ທີ. ນິ. ໓.໘໕]. ກຕ຺ຕພ຺ພາ’ກຕ຺ຕພ຺ພາກາຣທສ຺ສນໍ ວິຘິ, ສກ຺ກຈ຺ຈໍ ທານໍ ທາຕພ຺ພໍ, ໂນ ອສກ຺ກຈ຺ຈໍ.

ອວສ຺ສເກ-ຄມນີໂຍ ອຠິສມ຺ປຣາໂຍ, ອວສ຺ສໍ ຄນ຺ຕພ຺ໂພຕິ ອຕ຺ໂຖ.

ຍໍ ອິຓໍ ອເທນ຺ຕສ຺ສ ທຓ຺ໂຑ ອາຄຈ຺ຉຕິ, ອິທໍ ອຘມິຓໍ ນາມ, ສຕໍ ເມ ທາຕພ຺ພໍ ຠວຕາຕິ.

ອິເມ ປເນຕ຺ຖ ຕພ຺ຍ, ຕາຍ, ເຕຍ຺ຍປໂຍຄາ – ນ ພ຺ຣາຫ຺ມເຓ ອທ຺ຘິເກ ຕິຏ຺ຐມາເນ, ຄນ຺ຕພ຺ຍມາຫຸ ທ຺ວິປທິນ຺ທ ເສຏ຺ຐ [ຊາ. ໑.໑໐.໑໓ (ຄນ຺ຕພ຺ພ)]. ຠູຕຄາມປາຕພ຺ຍຕາ, ກາເມສຸ ປາຕພ຺ຍຕາ [ປາຈິ. ໙໐], ອລຊ຺ຊິຕາເຍ ລຊ຺ຊນ຺ຕິ [ຘ. ປ. ໓໑໖], ລຊ຺ຊິຕາເຍ ນ ລຊ຺ຊເຣ. ຆາເຕຕາຍໍ ວາ ຆາເຕຕຸໍ, ປພ຺ພາເຊຕາຍໍ ວາ ປພ຺ພາເຊຕຸໍ [ມ. ນິ. ໑.໓໕໗], ຎາເຕຍ຺ຍໍ, ທິຏ຺ເຐຍ຺ຍໍ, ປຕ຺ເຕຍ຺ຍໍ, ວິທ຺ເຘຍ຺ຍໍ ມໍ ອມຎ຺ຎຖ [ຊາ. ໒.໒໒.໒໙໗].

ຕ,ຕິ, ຕຸ, ຕວນ຺ຕຸ, ຕາວີ, ຕ຺ວາ, ຕ຺ວານ, ຕຸນ, ຕຸໍ, ຕເວ, ຕາເຍ, ຕຸເຍ, ຕພ຺ພ. ອິເມ ຕກາຣປຈ຺ຈຍາ ນາມ.

ກຣ, ຂນຸ, ຄາ, ຄມຸ, ຊນ, ຐາ, ຕນຸ, ຖຣ, ຘາ, ຘຣ, ນມຸ, ປາ, ຜຣ, ຠຣ, ມນ, ມຣ, ຣມຸ, ສຣ, ຫຣ, ຫນ.

໗໒໓. ຄມາທິຣານໍ ໂລໂປນ຺ຕສ຺ສ [ກ. ໕໘໖-໗; ຣູ. ໖໐໐, ໖໓໒; ນີ. ໑໑໙໐, ໑໑໙໑].

ຄມາທີນໍ ມກາຣ, ນກາຣນ຺ຕານໍ ຣກາຣນ຺ຕານຎ຺ຈ ຘາຕູນໍ ອນ຺ຕສ຺ສ ໂລໂປ ໂຫຕິ ການຸພນ຺ເຘ ຕປຈ຺ຈເຍ ປເຣ ຕ຺ວາທິວຊ຺ຊິເຕ.

ກຣ-ກຣເຓ, ກຣີຍິຕ຺ຖາຕິ ກໂຕ-ວິຫາໂຣ, ກຕາຄູຫາ, ກຕໍ-ເຄຫໍ, ສກ຺ກຣີຍິຕ຺ຖາຕິ ສກ຺ກໂຕ, ມຫາວຸຕ຺ຕິນາ ສນ຺ຕສ຺ສ ໂສ.

‘ກໂຣຕິສ຺ສ ໂຂ’ຕິ ປາທິໂຕ ກຣສ຺ສ ກສ຺ສ ໂຂ, ສງ຺ຂຣີຍິຕ຺ຖາຕິ ສງ຺ຂໂຕ, ອຠິສງ຺ຂໂຕ, ວິສງ຺ຂຣິຕ຺ຖ ວິກິຣີຍິຕ຺ຖາຕິ ວິສງ຺ຂໂຕ, ອຸປກຣີຍິຕ຺ຖ ສຊ຺ຊີຍິຕ຺ຖາຕິ ອຸປກ຺ຂໂຏ, ‘ຕຖນຣານໍ ຏຐຓລາ’ຕິ ຕສ຺ສ ໂຏ. ເອວໍ ທຸກ຺ກຏໍ.

ປຣິໂຕ ກຣີຍິຕ຺ຖາຕິ ປຣິກ຺ຂໂຕ, ປຸຣໂຕ ກຣີຍິຕ຺ຖາຕິ ປຸຣກ຺ຂໂຕ, ປຸເຣກ຺ຂໂຕ ວາ, ມຫາວຸຕ຺ຕິນາ ປຸຣສ຺ສ ເອຕ຺ຕໍ.

ຂນຸ-ອວທາຣເຓ, ຂຎ຺ຎິຕ຺ຖາຕິ ຂໂຕ-ອາວາໂຏ.

ຄາ-ສທ຺ເທ.

໗໒໔. ຄາປານມີ [ກ. ໕໘໘; ຣູ. ໖໒໐; ນີ. ໑໑໙໒].

ຄາ, ປານໍ ອນ຺ໂຕ ອີກາໂຣ ໂຫຕິ ການຸພນ຺ເຘ ຕປຈ຺ຈເຍ ປເຣ ຕ຺ວາທິວຊ຺ຊິເຕ.

ຄາຍິຕ຺ຖາຕິ ຄີຕໍ, ສໂມຘາເນຕ຺ວາ ຄາຍິຕ຺ຖາຕິ ສງ຺ຄີໂຕປຣິຍຕ຺ຕິຘມ຺ໂມ.

ຄມຸ-ຄຕິມ຺ຫິ ອຄຈ຺ຉີຕິ ຄໂຕ, ອຄຈ຺ຉີຍິຕ຺ຖາຕິ ວາ ຄໂຕ. ເອວໍ ອາຄໂຕ, ອຸຄ຺ຄໂຕ, ທຸຄ຺ຄໂຕ, ນິຄ຺ຄໂຕ, ວິຄໂຕ, ສຸຄໂຕ, ສງ຺ຄໂຕ, ອນຸຄໂຕ, ອປຄໂຕ, ອວຄໂຕ, ອຸປຄໂຕ, ອຘິຄໂຕ.

ຊນ-ຊາຕິຍໍ.

໗໒໕. ຊນິສ຺ສາ [ກ. ໕໘໕; ຣູ. ໖໑໙; ນີ. ໑໑໘໙].

ຊນິສ຺ສ ນສ຺ສ ອາ ໂຫຕິ ການຸພນ຺ເຘ ຕປຈ຺ຈເຍ ປເຣ ຕ຺ວາທິວຊ຺ຊິເຕ.

ອຊາຍິຕ຺ຖາຕິ ຊາໂຕ, ທຸຊ຺ຊາໂຕ, ສຸຊາໂຕ, ສຎ຺ຊາໂຕ, ອນຸຊາໂຕ, ອວຊາໂຕ, ອຕິຊາໂຕ.

ສຸຕ຺ຕວິຠຕ຺ເຕນ ອຎ຺ຎສ຺ມິມ຺ປິ ວຓ຺ເຓ ປເຣ ນສ຺ສ ອາ ໂຫຕິ, ປຸຕ຺ຕໍ ວິຊາຍິຕ຺ວາ, ວິຊາຍິຕຸໍ, ວິຊາຍນໍ, ວິຊາຍນ຺ຕີ-ອິຕ຺ຖີ, ວິຊາຍມານາ, ປຸຕ຺ຕໍ ຊເນຕີຕິ ຊາຍາ ອິຈ຺ຈາທິ, ສພ຺ພຕ຺ຖ ມຫາວຸຕ຺ຕິນາ ສເຣ ປເຣ ຍາຄໂມ, ມຫາວຸຕ຺ຕິນາ ວາ ສພ຺ພຕ຺ຖ ນສ຺ສ ຍາເທໂສ ອາທິທີໂຆ ຈ.

ຐາ-ຄຕິນິວຕ຺ຕິຍໍ.

໗໒໖. ຐາສ຺ສິ [ກ. ໕໘໘; ຣູ. ໖໒໐; ນີ. ໑໑໙໒].

ຐາສ຺ສ ອິ ໂຫຕິ ການຸພນ຺ເຘ ຕກາເຣ ຕ຺ວາທິວຊ຺ຊິເຕ.

ອຏ຺ຐາສີຕິ ຐິໂຕ, ອຸຏ຺ຐິໂຕ, ນິຏ຺ຐິໂຕ, ສຓ຺ຐິໂຕ, ອຘິຏ຺ຐິໂຕ.

ຕນຸ-ວິຕ຺ຖາເຣ, ອາຕຎ຺ຎິຕ຺ຖາຕິ ອາຕຕໍ, ວິຕຕໍ, ອາຕຕວິຕຕໍ, ຕູຣິຍເຠໂທ.

ຖຣ-ສນ຺ຖຣເຓ, ສນ຺ຖຣີຍິຕ຺ຖາຕິ ສນ຺ຖໂຕ, ວິຕ຺ຖໂຕ.

ຘາ-ຘາຣເຓ.

໗໒໗. ຘາສ຺ສ ຫິ [ກ. ໕໑໗; ຣູ. ໔໘໘; ນີ. ໑໑໐໕].

ຘາຘາຕຸສ຺ສ ຘສ຺ສ ຫິ ໂຫຕິ ການຸພນ຺ເຘ ຕກາເຣ ຕ຺ວາທິວຊ຺ຊິເຕ.

ອາຘີຍິຕ຺ຖາຕິ ອາຫິໂຕ, ອາຄ຺ຍາຫິໂຕ, ວິຘີຍິຕ຺ຖາຕິ ວິຫິໂຕ, ນິຘີຍິຕ຺ຖາຕິ ນິຫິໂຕ, ສນ຺ຘີຍິຕ຺ຖາຕິ ສໍຫິໂຕ, ໂອຘີຍິຕ຺ຖາຕິ ໂອຫິໂຕ, ອຠິຘີຍິຕ຺ຖາຕິ ອຠິຫິໂຕ, ປິຘີຍິຕ຺ຖາຕິ ປິຫິໂຕ, ອປິຫິໂຕ. ທ຺ວິຕ຺ເຕ ປຸພ຺ພສ຺ສ ຕຕິຍຕ຺ຕໍ, ‘ຘາສ຺ສ ໂຫ’ຕິ ສຸຕ຺ເຕນ ປຣສ຺ສ ຫຕ຺ຕໍ, ອາທຫິໂຕ, ວິທຫິໂຕ, ນິທຫິໂຕ, ສໍທຫິໂຕ, ສທ຺ທຫິໂຕ ວາ, ສນ຺ນິທຫິໂຕ, ໂອທຫິໂຕ, ປິທຫິໂຕ, ອປິທຫິໂຕ, ປຣິທຫິໂຕ.

ຘຣ-ຘາຣເຓ, ອຸທ຺ຘຣີຍິຕ຺ຖາຕິ ອຸທ຺ຘໂຏ, ສມຸທ຺ຘໂຏ, ນິທ຺ຘໂຏ, ຕສ຺ສ ຏຕ຺ຕໍ.

ນມຸ-ນມເນ, ນມິຕ຺ຖາຕິ ນໂຕ, ອຸນ຺ນໂຕ, ສມຸນ຺ນໂຕ, ໂອນໂຕ, ອວນໂຕ.

ປາ-ປາເນ, ‘ຄາປານມີ’ຕິ ອີຕ຺ຕໍ, ປີຍິຕ຺ຖາຕິ ປີຕໍ.

ຜຣ-ຜຣເຓ, ຜຣິຕ຺ຖ, ຜຣີຍິຕ຺ຖາຕິ ວາ ຜຸໂຏ, ວິປ຺ຜຸໂຏ, ສມ຺ຜຸໂຏ, ໂອຜຸໂຏ, ມຫາວຸຕ຺ຕິນາ ຜສ຺ສ ອຸຕ຺ຕໍ, ຕສ຺ສ ຏຕ຺ຕໍ.

ຠຣ-ຘາຣເຓ, ຠຣີຍິຕ຺ຖາຕິ ຠໂຕ, ອາຠໂຕ, ອາຠໂຏ ວາ. ອຸທກາຕລມຸພ຺ຠໂຕ, ອຸພ຺ຠຕໍ ສງ຺ເຆນ ກຖິນໍ [ມຫາວ. ໓໑໗], ສມ຺ຠຕໍ ຘນໍ.

ມນ-ຎາເຓ, ມໂຕ, ມຫາຊເນນ ສມ຺ມໂຕຕິ ມຫາສມ຺ມໂຕ, ສມ຺ມຕາ ສີມາ [ມຫາວ. ໑໓໙], ອນຸມໂຕ, ອຠິມໂຕ.

ມຣ-ປາຓຈາເຄ, ມຣິຕ຺ຖາຕິ ມໂຕ, ກາລງ຺ກໂຕ.

ຣມຸ-ກີຬາຍໍ, ຣມິຕ຺ຖາຕິ ຣໂຕ, ອຠິຣໂຕ.

ຣມຸ-ອຸປຣເມ, ວິຣໂຕ, ປຏິວິຣໂຕ, ອຸປຣໂຕ.

ສຣ-ຄຕິ, ຈິນ຺ຕາສຸ, ພຫຸລາຘິກາຣາ ກາລຕ຺ຕເຍປິ ຕປຈ຺ຈໂຍ, ສຣຕິ, ອສຣິ, ສຣິສ຺ສຕີຕິ ສໂຕ, ອນຸສ຺ສໂຕ, ປຕິສ຺ສໂຕ.

ຫຣ-ຫຣເຓ, ຫຣີຍິຕ຺ຖາຕິ ຫໂຕ, ອາຫໂຕ, ນິຫໂຕ.

ຕສ຺ສ ຏຕ຺ເຕ-ອາຫໂຏ, ນິຫໂຏ, ອຸທາຫໂຏ, ສມຸທາຫໂຏ, ອວຫໂຏ.

ຫນ-ຫິໍສາຍໍ, ຫຎ຺ຎິຕ຺ຖາຕິ ຫໂຕ, ວິຫໂຕ, ສມູຫໂຕ ອວິປ຺ປວາໂສ [ມຫາວ. ໑໔໕], ສມູຫຕາ ສີມາ [ມຫາວ. ໑໔໖].

ຕິປຈ຺ຈຍມ຺ຫິ ພຫຸລາຘິກາຣາ ອການຸພນ຺ເຘປິ ອນ຺ຕໂລໂປ. ປຐມໍ ກຣີຍຕີຕິ ປກຕິ, ອາກາໂຣ ອາກຕິ, ວິກາໂຣ ວິກຕິ, ຄາຍນໍ ຄີຕິ, ອຸຄ຺ຄີຕິ, ສງ຺ຄີຕິ, ອນຸຄາຍນໍ ອນຸຄີຕິ, ຄມນໍ ຄຕິ, ຄນ຺ຕພ຺ພາຕິ ວາ ຄຕິ, ຄຈ຺ຉນ຺ຕິ ເອຕ຺ຖາຕິ ວາ ຄຕິ, ອາຄມນໍ ອາຄຕິ, ສຸຄຕິ, ທຸຄ຺ຄຕິ, ສມາຄມນໍ ສງ຺ຄຕິ, ຊນນໍ ຊາຕິ, ຊາຍນ຺ຕິ ເອຕາຍ, ເອຕ຺ຖາຕິ ວາ ຊາຕິ, ຐານໍ ຐິຕິ, ສຓ຺ຐິຕິ, ອວຏ຺ຐິຕິ, ປຸນປ຺ປຸນໍ ຕນນໍ ສນ຺ຕຕິ, ຘາເຣນ຺ຕິ ເອຕາຍາຕິ ຘີຕິ, ມຫາວຸຕ຺ຕິນາ ອີຕ຺ຕໍ.

ນມນໍ ນຕິ, ອຸນ຺ນຕິ, ສມຸນ຺ນຕິ, ໂອນຕິ, ອວນຕິ, ຠຣິຕພ຺ພາຕິ ຠຕິ, ມນຕິ ຊານາຕິ ເອຕາຍາຕິ ມຕິ, ວິວິຘາ ມຕິ ວິມຕິ, ຣມຓໍ ຣຕິ, ອາຣມຓໍ ອາຣຕິ, ວິຣມຓໍ ວິຣຕິ, ອຠິຣມຓໍ ອຠິຣຕິ, ປຏິວິຣມຓໍ ປຕິວິຣຕິ, ສຣຓໍ ສຕິ, ສຣນ຺ຕິ ເອຕາຍາຕິ ວາ ສຕິ, ອນຸສ຺ສຕິ, ປຏິສ຺ສຕິ, ອຸປຫນນໍ ອຸປຫຕິ.

ຕວນ຺ຕຸປຈ຺ຈຍມ຺ຫິ-ອກາສີຕິ ກຕວາ, ອຫນີຕິ ຫຕວາ.

ຕາວີປຈ຺ຈຍມ຺ຫິ-ກຕາວີ, ຫຕາວີ.

ຕ຺ວາທີສຸ –

໗໒໘. ຕຸໍຕຸນຕພ຺ເພສຸ ວາ.

ກຣຘາຕຸສ຺ສ ຣ-ກາຣສ຺ສ ອາ ໂຫຕິ ວາ ຕຸໍ, ຕຸນ, ຕພ຺ເພສຸ. ຕຸນສທ຺ເທນ ຕ຺ວານ, ຕ຺ວາປິ ສງ຺ຄຍ຺ຫນ຺ຕິ.

໗໒໙. ກຣສ຺ສາ ຕເວ.

ກຣສ຺ສ ຣ-ກາຣສ຺ສ ອາ ໂຫຕິ ຕເວປຈ຺ຈຍມ຺ຫິ.

ກາຕຸໍ, ກາຕເວ, ກາຕຸນ, ກາຕພ຺ພໍ.

ຍຖາ ກຣສ຺ສ, ຕຖາ ມຫາວຸຕ຺ຕິນາ ຫຣສ຺ສ ຣູປໍ ສິຊ຺ຌຕິ, ຫາຖຸໍ, ຫາຕເວ, ຫາຕຸນ. ເຕສໍ ຕຸຓ຺ເຑນ ຫາຕູນ, ມຸຎ຺ເຈ ປຸພ຺ພກຕໍ ອິຓໍ [ຊາ. ໑.໑໔.໑໐].

ຕ຺ວາມ຺ຫິ ອາສ຺ສ ອິຕ຺ຕໍ, ອາຫິຕ຺ວາ, ໂສຓ຺ຑາຍຸທກມາຫິຕ຺ວາ [ຊາ. ໑.໑໐.໙ (…ຫຕ຺ວາ)].

ອິຕິ ວິສໍໂຍຄຣູປຣາສິ.

ສທິສສໍໂຍຄຣູປຣາສິ

ອຖ ສທິສສໍໂຍຄຣູປຣາສິ ວຸຈ຺ຈເຕ.

ຕຸປຈ຺ຈຍມ຺ຫິ –

໗໓໐. ປຣຣູປມຍກາເຣ ພ຺ຍຎ຺ຊເນ.

ຍກາຣວຊ຺ຊິເຕ ພ຺ຍຎ຺ຊນປຈ຺ຈເຍ ປເຣ ສພ຺ພຘາຕູນໍ ອນ຺ຕພ຺ຍຎ຺ຊໂນ ປຣຣູປໍ ອາປຊ຺ຊເຕ.

ກໂຣຕີຕິ ກຕ຺ຕາ, ກາຕຸໍ ອຣຫຕິ, ກາຕຸໍ ສກ຺ໂກຕິ, ກຣຓສີໂລ, ກຣຓຘມ຺ໂມ, ສກ຺ກຈ຺ຈໍ ວາ ກໂຣຕີຕິ ອຕ຺ໂຖ. ຠຣຕີຕິ ຠຕ຺ຕາ, ຫຣຕີຕິ ຫຕ຺ຕາ.

ຕ຺ວາທີສຸ ຣ-ກາຣສ຺ສ ອາຕ຺ຕໍ, ສໍໂຍເຄ ປເຣ ຣສ຺ສຕ຺ຕຎ຺ຈ, ກຕ຺ວາ, ກຕ຺ວານ.

ປຣຣູປຕ຺ຕໍ, ກຕ຺ຕຸນ, ກຕ຺ຕຸໍ, ກຕ຺ຕພ຺ພໍ, ຠຣຓໍ ຠຕ຺ຕຸໍ, ຠຕ຺ຕເວ, ຫຣຓໍ ຫຕ຺ຕຸໍ, ອຠິຫຕ຺ຕຸໍ, ຫຕ຺ຕເວ.

ອາປ, ຓາປ, ຂິປ, ຄຸປ, ຈຊ, ຎປ, ຎາປ, ຕປ, ທີປ, ຘູປ, ປທ, ຠຊ, ຠຸຊ, ມທ, ມິທ, ຍຸຊ, ຣິຈ, ຣນ຺ຊ, ລິປ, ລຸປ, ວຈ, ວຕຸ, ວທ, ວປ, ວິຈ, ສນ຺ຊ, ສິຈ, ສມ຺ຠຸ, ສູຈ, ສູທ, ສຸປ.

ຘາຕ຺ວນ຺ຕພ຺ຍຎ຺ຊນສ຺ສ ປຣຣູປຕ຺ຕໍ, ຕປຈ຺ຈຍມ຺ຫິ ວິປຸພ຺ໂພ ອາປພ຺ຍາປເນ, ພ຺ຍາປຍຕິ ຂິປ຺ປໍ ຎາຓພ຺ຍາປເນນ ພ຺ຍາປິຕຸໍ ສກ຺ໂກຕີຕິ ພ຺ຍຕ຺ໂຕ, ວິຍຕ຺ໂຕ.

ປຣິປຸພ຺ໂພ ປຣິຍາປຸຓເນ ປຫຸຕ຺ເຕ ຈ, ປຣິຍຕ຺ໂຕ.

ສໍປຸພ຺ໂພ ປຣິປຸຓ຺ຓຠາເວ, ສມາປຍິຕ຺ຖາຕິ ສມຕ຺ໂຕ, ປຣິສມຕ຺ໂຕ.

ອາປຸພ຺ໂພ ຓາປ-ເປສເນ, ອາຓາປີຍິຕ຺ຖາຕິ ອາຓຕ຺ໂຕ.

ຂິປ-ຂິປເນ, ຂິປີຍິຕ຺ຖາຕິ ຂິຕ຺ໂຕ-ທຓ຺ໂຑ, ຂິຕ຺ຕາ-ມຕ຺ຕິກາ, ຂິຕ຺ຕໍ-ເລຏ຺ຏຸ. ເອວໍ ສພ຺ພຕ຺ຖ. ປກ຺ຂິຕ຺ໂຕ, ອຸກ຺ຂິຕ຺ໂຕ, ນິກ຺ຂິຕ຺ໂຕ, ວິກ຺ຂິຕ຺ໂຕ, ໂອກ຺ຂິຕ຺ໂຕ, ສໍຂິຕ຺ໂຕ.

ຄຸປ-ຄຸຕ຺ຕິຍໍ, ໂຄປີຍິຕ຺ຖາຕິ ຄຸຕ຺ໂຕ, ສໍຄຸຕ຺ໂຕ.

ຈຊ-ຈາເຄ, ຈຊີຍິຕ຺ຖາຕິ ຈຕ຺ໂຕ.

ອຸປ-ປຎ຺ຎາປເນ, ປຎ຺ຎປີຍິຕ຺ຖາຕິ ປຎ຺ຎຕ຺ໂຕ-ວິນໂຍ, ປຎ຺ຎຕ຺ຕໍສິກ຺ຂາປທໍ, ປຎ຺ຎຕ຺ຕໍ-ອາສນໍ.

ຎາປ-ຎາປເນ, ວິກຕິຘາຕຸ ນາເມສາ ກາຣິຕນ຺ຕຕ຺ຕາ, ປຎ຺ຎາປີຍິຕ຺ຖາຕິ ປຎ຺ຎຕ຺ໂຕ, ສຎ຺ຎາປີຍິຕ຺ຖາຕິ ສຎ຺ຎຕ຺ໂຕ, ວິຎ຺ຎາປີຍິຕ຺ຖາຕິ ວິຎ຺ຎຕ຺ໂຕ.

ຕປ-ສນ຺ຕາເປ, ອຕປ຺ປີຕິ ຕຕ຺ໂຕ, ສນ຺ຕຕ຺ໂຕ.

ທີປ-ທິຕ຺ຕິຍໍ, ອທີປິຕ຺ຖາຕິ ທິຕ຺ໂຕ, ປທິຕ຺ໂຕ, ອາທິຕ຺ໂຕ.

ຘູປ-ໂສຓ຺ຑິເຍ, ຘູປຕິ, ອຘູປິ, ຘູປິສ຺ສຕີຕິ ຘຸຕ຺ໂຕ, ສຸຣາຘຸຕ຺ໂຕ, ອກ຺ຂຘຸຕ຺ໂຕ [ສຸ. ນິ. ໑໐໖].

ປທ-ຄຕິຍໍ, ອປຊ຺ຊີຕິ ປຕ຺ໂຕ, ນິປຕ຺ໂຕ, ສມ຺ປຕ຺ໂຕ.

ຠຊ-ສມ຺ຠຕ຺ຕິຍໍ, ຠຊຕີຕິ ຠຕ຺ໂຕ, ສມ຺ຠຕ຺ໂຕ.

ວິປຸພ຺ໂພ ປຸຖກ຺ກຣເຓ, ວິຠຊິຕ຺ຖາຕິ ວິຠຕ຺ໂຕ.

ຠຸຊ-ປາລນ, ພ຺ຍວຫຣເຓສຸ, ຠຸຎ຺ຊິຕ຺ຖ, ຠຸຎ຺ຊີຍິຕ຺ຖາຕິ ວາ ຠຸຕ຺ໂຕ, ປຣິຠຸຕ຺ໂຕ.

ມທ-ອຸມ຺ມາເທ, ມຊ຺ຊິຕ຺ຖາຕິ ມຕ຺ໂຕ, ສມ຺ມຕ຺ໂຕ, ປມຕ຺ໂຕ, ອຸມ຺ມຕ຺ໂຕ.

ມິທ-ສິເນຫເນ, ມິຊ຺ຊຕີຕິ ມິຕ຺ໂຕ.

ຍຸຊ-ໂຍເຄ, ຍຸຎ຺ຊຕີຕິ ຍຸຕ຺ໂຕ, ປຍຸຕ຺ໂຕ, ອຸຍ຺ຍຸຕ຺ໂຕ, ນິຍຸຕ຺ໂຕ, ວິຍຸຕ຺ໂຕ, ສໍຍຸຕ຺ໂຕ, ສຎ຺ຎຸຕ຺ໂຕ.