໕໗. ລ຺ຕຸ

ເຕນາຕິ ຍໂຕ ລ຺ຕຸອິຕິ ວິເສສນຕ຺ເຕນ ວຕ຺ຕຸມິຈ຺ຉິຕສ຺ສ ປຈ຺ຈຍສ຺ສ ຄຫຓໍ, ເຕນາຕິ ອຕ຺ໂຖ, ປຈ຺ຈຍສ຺ສ ຄຫຓາ ຕທາທິຄຫຓໍ ລພ຺ຠເຕ… ‘‘ປຈ຺ຈຍຄ຺ຄຫເຓ ຍໂຕ ໂສ ວິຫິໂຕ, ຕທາທິໂນ ຄຫຓ’’ນ຺ຕິ ຎາຍາ, ວິເສສນຕ຺ເຕນ ວຕ຺ຕຸມິຈ຺ຉິຕຕ຺ຕາ ຕທນ຺ຕຄ຺ຄຫຓໍ… ‘‘ວິຘິພ຺ພິເສສນນ຺ຕສ຺ສາ’’ຕິ (໑-໑໓) ວຈນໂຕຕິ ມນສິ ນິຘາຍາຫ- ‘ຍໂຕ’ອິຈ຺ຈາທິ, ໂສ ກ຺ຣິຍຕ຺ໂຖ ອາທິ ຍສ຺ສ ໂສ ຕທາທິ, ໂສ ປຈ຺ຈໂຍ-ນ຺ໂຕ ຍສ຺ສ ສມຸທາຍສ຺ສ ໂສ ຕທນ຺ໂຕ, ຕາທິສສ຺ສ ຕທາ ທິຕທນ຺ຕສມຸທາຍວິເສສ(ສ຺ສ) ຄຫຓໍ, ນ ຕຸ ຕທນ຺ຕມຕ຺ຕສ຺ເສຕ຺ຍຕ຺ໂຖ, ນນຸ ຈ ‘ລ຺ຕ຺ວີ’ຕິ ວິເສສນຕ຺ເຕນ ວຕ຺ຕຸມິຈ຺ຉິເຕ ຠວຕຸ ‘‘ວິຘິພ຺ພິເສສນນ຺ຕສ຺ສາ’’ຕິ ຕທນ຺ຕສ຺ສ ຄຫຓໍ, ປຈ຺ຈຍຄ຺ຄຫເຓນ ປນ ຕທາທິໂນ ຄຫຓໍ ກຖໍ ສິຍາ ວຈນາຠາວາຕ຺ຍາຫ-‘ຕທວິນາຠາວິຕ຺ຕາ’ຕິ, ຍໂຕ ວິຫິໂຕ, ເຕນ ວິນາ ນ ຠວຕິ ສີເລນາຕິ ຕທວິນາຠາວີ, ຕສ຺ສ ຠາໂວ ຕສ຺ມາ. ‘‘ປຈ຺ຈຍຄ຺ຄຫເຓ ຍໂຕ ໂສ ວິຫິໂຕ ຕທາທິໂນ ຄຫຓ’’ນ຺ຕິ ຎາຍສ຺ສ ຍຕ຺ຖ ປຈ຺ຈຍຄ຺ຄຫຓໍ ຕຕ຺ຖ ສາຘາຣຓຕ຺ຕາ ‘ຕທາທິໂນ’ຕິ ວຸຕ຺ຕໍ, ຕທາທິສມຸທາຍສ຺ສ ຄຫເຓ ປເນຕ຺ຖ ວິເສໂສ ນ ທິສ຺ສຕິ… ອຘິກຕ຺ຕາຕິ [ອຘິຄຕນ຺ຕາວາຕິ (ໂປຕ຺ຖເກ)] ອາທີສຸ ວິເສສທສ຺ສນາສມ຺ຠວາ, ‘ຕຸໍສ຺ມາ ໂລໂປ ຈິຈ຺ຉາຍໍ ເຕ’’ ຕ຺ຍຕ຺ຣ (໕-໔) ຕຸ ທິສ຺ສຕິ ວິເສໂສ, ວກ຺ຂຕິຫິ ຕຕ຺ຖ ‘‘ຕຸໍຕາເຍຕເວ ຠາເວ ຠວິສ຺ສຕິ ກ຺ຣິຍາຍໍ ຕທຕ຺ຖາຍ’’ນ຺ຕິ (໕-໖໑) ຕຸໍປຈ຺ຈຍໍ ວກ຺ຂຕິ’’ຈ຺ຈາທິ.