໓໗. ປຐມາ

ປຐມາຕ຺ຖມຕ຺ເຕຕິ ເອຕ຺ຕເກ ວຸຕ຺ເຕປິ ວາກ຺ຍຕ຺ໂຖ ປທຕ຺ໂຖ ວາ ນ ວິຎ຺ຎາຍເຕ ນາມຄ຺ຄຫຓານຸວຕ຺ຕິໂຕຕິ ທສ຺ເສຕຸມາຫ-‘ທ຺ເວທ຺ເວກາເນກາທິ ສຸຕ຺ຕໂຕ’ຕິອາທິ, ນາເມນາຕ຺ໂຖ ປຏິປາທິຍມາໂນ ນາມສງ຺ຂາເຕ-ຕ຺ຕນິ ອຠິເຘຍ຺ຍຕ຺ເຕນາຊ຺ຌາໂຣປ຺ຍ ປຏິປາທຍຕ຺ຍນເປກ຺ຂິຕ ວິຠຕ຺ຕິວິເສສນ຺ຕິ ອາຫ-‘ອຠິຘີຍຕິ’ຈ຺ຈາທິ, ປກຕິຣູເປນາຕິ ນາເມນ, ຕສ຺ສ ອຠິເຘຍ຺ຍສ຺ສ, ມຕ຺ຕສທ຺ທສ຺ສາຕິອາທິນາ ສາມຎ຺ຎນ຺ຕີທໍ ມຕ຺ຕສທ຺ທສ຺ສຕ຺ຖວຈນນ຺ຕິ ທສ຺ເສຕິ, ອິທໍ ວຸຕ຺ຕໍ ໂຫຕີຕິ ນາມສ຺ສາຠິເຘຍ຺ຍມຕ຺ເຕຕິ ອິມິນາ ອິທໍ ວກ຺ຂມານໍ ວຸຕ຺ຕໍ ໂຫຕິ. ‘‘ປາຏິປທິກຕ຺ຖລິງ຺ຄປຣິມາຓວຈນມຕ຺ເຕ ປຐມາ’’ຕິ (໒-໓-໔໖) ລິງ຺ຄາທີສຸ ເຠເທນ ປຐມາວິຘານມ຺ປຏິປນ຺ນາ, ຕທາຫ-‘ລິງ຺ຄປຣິມາເຓ’ຈ຺ຈາທິ, ລິງ຺ຄໍ ອິຕ຺ຖິປຸນ຺ນປຸໍສການິ, ປຣິມາຓໍ ປຣິຈ຺ເຉໂທ, ສງ຺ຂ຺ຍາ ເອກຕ຺ຕພຫຸຕ຺ຕານິ, ຕພ຺ພນ຺ໂຕປິ ສທ຺ທຕ຺ໂຖເອວາຕິ ລິງ຺ຄາທິວນ຺ໂຕປິ ສຣູປາ ພ຺ຍຕິຣິຕ຺ໂຕ ສທ຺ທຕ຺ໂຖ ເອວ, ອຸຈ຺ຈຕ຺ຕນີຈຕ຺ຕສາມຎ຺ຎມ຺ປຸໂຣຘາຍ ປວຕ຺ຕິຍາ ອຸຈ຺ຈນີຈສທ຺ເທຫິ ປຐມາ ໂຫເຕວ, ຕໍຍຸຕ຺ຕສ຺ສາປິ ສທ຺ທຕ຺ຖຠາວໂຕ ‘ອຸຈ຺ຈໍ ຆຣານິ’ຕ຺ຍາທີນິປິ ອຸຈ຺ຈຕ຺ຕໍ ຄຸຓໍ ນິມິຕ຺ຕໍ ກຕ຺ວາ ໂສຍມິຕ຺ຍເຠທສມ຺ພນ຺ຘ ຆເຣສຸ ວຕ຺ຕນ຺ຕີຕິ. ປລມ຺ພເຕ ອຊ຺ຌາຄຈ຺ຉຕິຕ຺ຍາໂທ ‘‘ອສງ຺ຂ຺ເຍຫິ ສພ຺ພາສໍ’’ຕິ (໒-໑໑໙) ໂລປວິຘານສາມຕ຺ຖິຍາ ປາທີຫ຺ຍນຕ຺ຖເກຫິປິ ປຐມາ ສິທ຺ຘາເຍວ.