໓໒. ສຕ຺ຕ

ຍນ຺ຕໍ ສທ຺ທານໍ ນິຈ຺ຈຕ຺ຕາ ສມ຺ພນ຺ຘສ຺ສ ຍຕ຺ຖາຕິ ປຣາມຏ຺ຐໍ ໂສຕິ, ໂຍຕິ ປຣາມຏ຺ຐໍ ຕສ຺ສາຕິ ຈ ນິທ຺ທິສຕິ, ໂຍ ຍຕ຺ເຖຕ຺ຍາທິກຎ຺ຈ ‘ກິຣິຍາຘາຣຠູເຕ’ຈ຺ຈາທິວຸຕ຺ຕິຄນ຺ຖ ວິວຣຓນ຺ຕິ ໂຍຕິ ກິຣິຍາເຘຍ຺ຍຠູຕາຘິປ຺ເປຕາ, ເອຕເນວາຫ‘ກິຣິຍາ ຈາ’ຕິອາທິ, ເຕນາຍມາຘາຣີຍຕິ ກຕ຺ຕຸກມ຺ມ ສມເວຕາ ກິຣິຍາສ຺ມິນ຺ຕ຺ຍຘິກຣເຓ ວາ ຕໍ ອາຘາຣຍຕີຕິ ກຕ຺ຕຣິ ວາ ຆຓນ຺ເຕນ ທຏ຺ຐພ຺ໂພ, ກຕ຺ຕາຣໍ ກມ຺ມຎ຺ຈ ກິຣິຍານິສ຺ສຍຠູຕມາຘາຣ ຍຕີຕ຺ຍາຘາໂຣຕິ ວາ ກຕ຺ຕຣິ ຆຓ, ວຸຕ຺ຕໍ ຫິ–

ອາຘາຣຍຕິ ໂຍ ກຕ຺ຕຸ, ກມ຺ມໍ ກິຣິຍນິສ຺ສຍໍ;

ອາຘາຣໍ ກາຣກຎ຺ຈາຫຸ, ຕໍ ຈຕຸພ຺ພິຘເມວ ເຈຕິ.

ນນຸ ຈ ກິຣິຍາຘາຣເຓນາຘາໂຣຕ຺ຍຸຈ຺ຈເຕ, ຕໍ ກິເມວມຸຈ຺ຈເຕຕິ ເຈ, ເນສໂທໂສ ຍເທວ ຫິ ກິຣິຍາຘາຣຓມສ຺ສ, ຕນ຺ຕນ຺ນິສ຺ສຍຠູຕ ກຕ຺ຕຸກມ຺ມຘາຣຓໍ, ນຫ຺ຍຎ຺ຎຕາ ຕທ຺ຘາຣຓໍ ສມ຺ຠວຕິ ຕໂຕ ກິຣິຍາ ກາຣເຓນາຘາຣເຓນາຘາໂຣຕ຺ຍ ຍເມວຕ຺ໂຖ, ນ ກຕ຺ຕຸກມ຺ມປຣິຈ຺ຈາເຄນາຘາເຣນ ອຸຊຸກໍ ກິຣິຍາ ຄຍ຺ຫເຕ, ເຕເນວ ວກ຺ຂຕິ-‘ກິຣິຍາຍໂຍ ອາຘາໂຣ’ຈ຺ຈາທິ, ນນຸ ຍທ຺ຍປ຺ຍຸຊຸກເມວ ກິຣິຍໍ ຘາຣຍຕິ ກຕ຺ຕາ ກຕ຺ຕຸສມວາຍິນິໍ, ກມ຺ມສມເວຕຎ຺ຈ ວິກ຺ເຕທນາທິໍ ກິຣິຍໍ ກມ຺ມໍ… ຕຖາ ສຕິ ຕາເນວາຘາໂຣຕິ, ນ… ໂລເກ ສຕ຺ເຖ ຈ ເຕສມາຘາຣຕ຺ເຖ ນາປ຺ປຕີຕິໂຕ, ກຕ຺ຕຸກມ຺ມຕາເຍວ ຫິ ເຕສມ຺ປຕີຕີຕິ ທສ຺ເສຕຸມາຫ-‘ກິຣິຍາ ເຈ’ຕ຺ຍາທິ, ຕຖາ ຈ ວຸຕ຺ຕໍ–

ກຕ຺ຕຸກມ຺ມ ພ຺ຍວຫິຕໍ, ຘາເຣນ຺ຕມນຸຊຸ ກ຺ຣິຍໍ;

ກ຺ຣິຍາສິທ຺ຘຸປກາຣິ ຈ, ສຕ຺ເຖ-ຘິກຣຓໍ ມຕນ຺ຕິ.

ກຕ຺ຕຸກມ຺ມພ຺ຍວຫິຕນ຺ຕິ ກຕ຺ຕຸກມ຺ເມຫິ ຕໍສມເວຕຠາເວນ ພ຺ຍວຫິຕໍ, ອນຸຊຸ ປາຣມ຺ປຣິເຍນ, ກ຺ຣິຍາສິທ຺ຘຸປກາຣິຕິ ກຕ຺ຕຸກມ຺ມສມເວຕາຍ ກິຣິຍາຍ ປສິທ຺ຘິຍໍ ອຸປກາຣີ ອຸປກຸພ຺ພນ຺ຕໍ, ນນຸ ຈ ນ ກິຣິຍາ ຘາຣເຓເນວາຍມາຘາໂຣ, ກຕ຺ຕຸກມ຺ມານໍ ຘາຣເຓນາປ຺ຍາຘາໂຣຕິ ສກ຺ກາ ວວຕ຺ຖເປຕຸນ຺ຕິ ໂຈທນມ຺ມນສິ ນິຘາຍາຫ-‘ນ ເຈ’ຕ຺ຍາທິ, ກິຣິຍາ ນິມິຕ຺ຕສ຺ເສວາຕິ ກຕ຺ຕຸກມ຺ມສມວາຍິນິຍາ ກິຣິຍາຍ ນິມິຕ຺ຕສ຺ເສວ, ຕເທວໍວິຘມາຘາຣໍ ຈຕຸພ຺ພິຘມ຺ມຕນ຺ຕິ ທສ຺ເສຕຸມາຫ-‘ອາຘາໂຣ ຈາຍ’ມິຈ຺ຈາທິ, ຈຕ຺ຕາໂຣ ວິຘາປກາຣາ ອສ຺ສາຕິ ຈຕຸພ຺ພິໂຘ, ອາເຘຍ຺ເຍນ ສໂຫປສິເລໂສ ສໍໂຍຄລກ຺ຂໂຓ-ສ຺ສ ອຕ຺ຖີຕິ ໂອປສິເລສິໂກ ອາຘາໂຣ-‘ກເຏນິສີທຕິ ຖາລິຍໍ ປຈຕິ’ຕ຺ຍາໂທ ກຏາທິ, ຕຖາຫິ ເທວທຕ຺ຕສມເວຕໍ ນິສີທນກິຣິຍໍ ກໂຏ ເທວທຕ຺ຕໍ ຘາຣຍໍ ຘາຣຍຕິ ເທວທຕ຺ຕພ຺ຍວຫິຕໍ, ເອວໍ ຖາລີປິ ຕຓ຺ຑຸລສມເວຕໍ ວິກ຺ເລທນາທິກິຣິຍໍ ຕຓ຺ຑຸເລ ຘາຣຍໍ ຘາຣຍຕີຕ຺ໂຍປສິເລສິກາຘາຣຕ຺ຕໍ ກຏາທິໂນ. ຍໂຕ-ຎ຺ຎຕ຺ຣາເຘຍ຺ຍໍ ນ ວຕ຺ຕເຕ ສພ຺ພຖາ ຠິຍ຺ໂຍ ວາ, ໂສ ເວສຍິໂກ, ວິສໂຍຫ຺ຍາເຘຍ຺ຍສ຺ສານຎ຺ຎຕ຺ຣຠາໂວ, ຍຖາ ຈກ຺ຂາທິປ຺ປວຕ຺ຕີນມຎ຺ຎຕ຺ຣາຠາວາ ຈກ຺ຂາທີນໍ ຣູປາທໂຍ ວິສຍາຕິ ວຸຈ຺ຈນ຺ເຕ, ເອວມາກາເສ ສກຸນໂຍຕ຺ຍາໂທ ສກຸນ຺ຍາທີນມາກາສາທິໂຕ-ຎ຺ຎຕ຺ຣາຠາວາເຕ ເຕສໍ ວິສຍາຕ຺ຍຸຈ຺ຈນ຺ເຕ, ວິສໂຍ ເອວ ເວສຍິໂກ. ໂຍ ອາຘາຣາເຘຍ຺ຍານມຠິພ຺ຍາເປຕ຺ຍາເຘຍ຺ຍມິຕ຺ຍຠິພ຺ຍາປໂກ, ຕຖາ ຫິ‘ຕິເລສຸ ເຕລໍ, ທຘິມ຺ຫິ ສປ຺ປິ,ຕ຺ຍຕ຺ຣ ຕິລາທິກໍ ເຕລາທິກມາເຘຍ຺ຍໍ ພ຺ຍາເປຕ຺ວາ ຕິຏ຺ຐຕີຕິ ຕິລາທິ ພ຺ຍາປກາຘາໂຣ. ສມີເປ ຠໂວ, ສມີໂປ ເອວ ວາ ສາມີປິໂກ, ຍສ຺ສ ສມີປເທເສ ອາເຘຍ຺ຍໍ ວຕ຺ຕເຕ ໂສ ເອວມຸຈ຺ຈເຕ, ອຕ຺ໂຣທາຫຣຓໍ ‘ຄຸຣູສຸ ວສຕິ ຄງ຺ຄາຍໍ ໂຆໂສ’ຕິ. ນນຸ ຈາຕ຺ຣາປ຺ຍາຘາເຣ ສຕ຺ຕມີ ວິຘີຍເຕ ອາຘາໂຣ ຈ ນິສ຺ສໂຍ ວຸຈ຺ຈເຕ, ນິສ຺ສໂຍ ຈ ສໍໂຍຄສມວາເຍຫິ ໂຫຕິ, ນ ຈ ສິສ຺ສາທີນໍ ຄຸຣຸປ຺ປຠຸຕີຕິ ເທວທຕ຺ຕສກຸນ຺ຍາທີນມິວ ກຏາກາສາທີຫິ ສໍໂຍໂຄ, ເຕລາທີນມິວ ຈ ຕິລາທີຫິ ສມວາໂຍ ວາ ອຕ຺ຖິ, ເຕນາຍຸຕ຺ຕໍ ເຕ ສມາຘາຣຕ຺ຕນ຺ຕິ, ເນຕທຕ຺ຖິ, ຍທາຍຕ຺ຕາ ຫິ ຍສ຺ສ ຐິຕິ ໂສ ວິນາປິ ສໍໂຍຄສມວາເຍຫິ ຕສ຺ສ ນິສ຺ສໂຍ ຠວຕິ, ຕຖາຫິ ປຸຣິສສ຺ສ ນ ຣຎ຺ຎາ ສຫ ສໍໂຍໂຄສມວາໂຍ ວາຕ຺ຖິ, ອຖ ປນ ຕທຘີນຏ຺ຐິຕິຕ຺ຕາ ຣາຊນິສ຺ສໂຍ ປຸຣິໂສຕິ ພ຺ຍປທິສ຺ສີຍເຕ, ສິສ຺ສາທີນຎ຺ຈ ຄຸຣຸປ຺ປຠຸຕິນ ມາຍຕ຺ຕາ ຐິຕີຕິ ເຕສມຍໍ [ເຕນສ຺ສາຍໍ (ໂປຕ຺ຖເກ) ຍຸຕ຺ໂຖ ເຕ ປຕິ ຄຸຣຸປຠຸຕີນໍ ນິສ຺ສຍຠາໂວ (ຊິນິນ຺ທພຸທ຺ຘິ)] ຍຸຕ຺ໂຕ ຄຸຣຸປ຺ປຠຸຕິນໍ ນິສ຺ສຍຠາໂວຕິ, ເອຕ຺ຖ ປນ ຍຊ຺ຊປິ ເວສຍິກາຠິພ຺ຍປການມາຘາຣາເຘຍ຺ໂຍປສິເລໂສ ອຕ຺ຖິ, ຕຖາປິ ປກາຣນ຺ຕຣສ຺ເສວ ປຣິປ຺ຜຸຏຕ຺ຕາ ຕເຖວ ວຈນິຈ຺ຉາ, ນາຎ຺ຎຖາ ໂອປສິເລສິເກນ ວາ [ໂອປສິເລສິເກວ] ວິສຍາຠິພ຺ຍາປການມຄ຺ຄຫຓໂຕ ອຸປສິເລສສ຺ເສ ວາ [ອຸປສິເລສສ຺ເສວ] ປຣິພ຺ຍຕ຺ຕຕ຺ຕາ ຕເຖວ ໂວຫາໂຣຕິ ນ ສງ຺ກໂຣ ສງ຺ກນີໂຍຕິ.