໒໙. ຣິເຕ

ຍທິ ວຊ຺ຊນກິຣິຍາຍ ສມ຺ພຊ຺ຌມານສ຺ສ ກມ຺ມຕ຺ຕາ ກມ຺ເມ ທຸຕິຍາ, ກິມຕ຺ຖໍ ຈຣຫິ ປຸນ ທຸຕິຍາວຈນນ຺ຕິ ອາຫ-‘ປຏິປທວິຘາເນ’ຈ຺ຈາທິ, ປຏິປທໍ ອຸຊຸກເມໂວຈ຺ຈາຣິຕໍ ວິຘານໍ ຍສ຺ສາ ສາ ປຏິປທວິຘານາ, ວິເສສວິຘານ ວຕີຕ຺ຍຕ຺ໂຖ, ຍຊ຺ຊຕ຺ຣ ທຸຕິຍາວຈນໍ ນ ສິຍາ ຕທາ ຣິເຕສທ຺ເທນ ໂຍເຄ ອຸຊຸກໍ ວິຘີຍມານາຍ ປຎ຺ຈມິຍາ ທຸຕິຍາ ພາຘີເຍຖາຕິ ມຎ຺ຎເຕ. ຍທ຺ຍຕ຺ຣ ປຎ຺ຈມິຍາ ທຸຕິຍາຍ ພາຘາຠາໂວ ເອວ ປໂຍຊນໍ, ເອວຎ຺ຈຣຫິ ‘ຣິເຕ ວາ’ຕິ ສຸຕ຺ຕຍິຕພ຺ພໍ ເອວໍ ສຕິ ປກ຺ເຂ ທຸຕິຍາ ຈ ຠວິສ຺ສຕິ, ລຫຸ ຈ ສຸຕ຺ຕມ຺ປຓີຕມ຺ຠວຕີ ຕ຺ຍາສງ຺ກິຍ ປໂຍຊນນ຺ຕຣມາຫ-‘ອຸຕ຺ຕຣຕ຺ຖຎ຺ເຈ’ຕິ, ອໂຕເຍວາຕິ ອຸຕ຺ຕຣຕ຺ຖຕ຺ຕາເຍວ, ປຸນ ປໂຍຊນນ຺ຕຣໍທຸຕິຍາ ຄຫຓສ຺ສ ທສ຺ສຍມາຫ-‘ວິຠຕ຺ຍນ຺ຕເຣ’ຈ຺ຈາທິ, ອາຫຈ຺ຈ ກຓ຺ຐາທິຏ຺ຐາເນ ວາຍຸນາອາຫນິຕ຺ວາ ອາຫຣິຕ຺ວາ ວາ ວຈນໍ ອາຫຈ຺ຈວຈນໍ, ອຸຊຸກວຈນນ຺ຕິ ວຸຕ຺ຕໍ ໂຫຕິ, ວິຠຕ຺ຍນ຺ຕຣໍ ຉຏ຺ຐີວິຠຕ຺ຕິ, ຕສ຺ສ ພ຺ຍຸທາສຕ຺ຖໍ, ນິຣາສຕ຺ຖນ຺ຕຸຕ຺ໂຖ, ອຎ຺ຎາປີຕິ ທຸຕິຍາຍ ອຎ຺ຎາ ຉຏ຺ຐີປິ, ປກຕາຍ ປຎ຺ຈມິຍາ ສມ຺ພນ຺ຘນຕ຺ໂຖ ປກຕສມ຺ພນ຺ຘນຕ຺ໂຖ.