໑໒໑. ນາໂຕ

ໂສ ຈ ອມາເທໂສ, ອາເທສສ຺ເສວາຕິ ອໍອາເທສສ຺ເສວ, ອປຎ຺ຈມິຍາຕິ ປຎ຺ຈມິໍ ວຊ຺ເຊຕ຺ວາ. ອຎ຺ຎຕ຺ຣ ວິຘີຍມາໂນ-ຍມມາເທໂສ ປຎ຺ຈມິຍມ຺ປຏິສິທ຺ຘຕ຺ຕາ ປຎ຺ຈມິຍາ ປຏິເສເຘນ ສຍມ຺ປິ ປຏິສິທ຺ໂຘ ນາມ ໂຫຕີຕ຺ຍາຫ ‘ອາເທສສ຺ເສວາຍໍ ປຏິເສໂຘ’ຕິ, ໂລປປຏິເສຘສ຺ສ ‘ນາໂຕ’ຕິ ປຸພ຺ພວາກ຺ເຍນ ວຸຕ຺ຕສ຺ສ ອຍມ຺ປຏິເສໂຘ ເນຕິ ສມ຺ພນ຺ໂຘ, ອຖ ກຖມິທມປຎ຺ຈມ຺ຍາຕ຺ຍມາເທເສເນວາຕິສມ຺ພນ຺ຘຕິ ນ ໂລປ ປຏິເສເຘນາຕິ ປຣິຠາສມາຫ-‘ອນນ຺ຕຣສ຺ສ ວິຘິ ວາ ໂຫຕິ ປຏິເສໂຘ ວາ’ຕິ, ເອຕ຺ຖ ອນ຺ຕຣສທ຺ທສ຺ສາເນກຕ຺ຖຕ຺ເຕປີຫານ຺ຕຣາຬວາຈີຕິ ນ ວິຊ຺ຊເຕ ອນ຺ຕຣມ຺ມຊ຺ຌມສ຺ເສຕ຺ຍນນ຺ຕໂຣ, ອນ຺ຕຣາຬມຕ຺ຕປຏິເສເຘ ປໂຍຊນໍ ນຕ຺ຖີຕ຺ຍນ຺ຕຣາຬຄຕສ຺ສ ວິຘິໂນ ປຏິເສຘສ຺ສ ຈາຠາວານນ຺ຕໂຣຕ຺ຍຸປ ຈຣີຍເຕ ອນນ຺ຕຣາ ຄາມາຕ຺ຍາທິ ວິຍ, ທິຏ຺ຐຕ຺ເຕ ປນ ມຊ຺ຌສ຺ສ ນ ວິຊ຺ຊເຕ-ນ຺ຕຣ ເມສນ຺ຕິ ວິຄ຺ຄເຫ ສຸຕ຺ເຕປ຺ຍນນ຺ຕຣສ຺ສ ວິຘານນ຺ຕຣສ຺ສາປິ ທິຏ຺ຐຕ຺ຕາ ທ຺ວິນ຺ນເມໂກປ຺ຍນນ຺ຕໂຣຕ຺ຍຸຈ຺ຈເຕ, ເຕເນວານນ຺ຕຣສ຺ສາຕິ ປຣິຠາສາຍເມກ ວຈນໍ, ອິຕິສທ຺ໂທ ອິທມຕ຺ເຖ, ອິຕິ ອິມາຍ ປຣິຠາສາຍາເທເສນາຠິສມ຺ພນ຺ຘຕີຕ຺ຍຕ຺ໂຖ, ເຕນາຕິ ຍຖາວຸຕ຺ຕປຣິຠາສາຍ ວເສນ, ເຍນ ກາຣເຓນາເທເສນາຠິສມ຺ພນ຺ຘຕິ ເຕນາຕ຺ຍຕ຺ໂຖ, ອໂລໂປຕິ ໂລປ ປຏິເສໂຘ, ສາມຕ຺ຖິຍາລທ຺ຘນ຺ຕິ ທ຺ວິນ຺ນມຕ຺ຖານໍ ວິຘານາຍ ທ຺ເວ ວາກ຺ຍານິ ຠວນ຺ຕິ, ຕຕ຺ຣ ‘ນາໂຕ’ຕີທໍ ປຏິເສຘວິຘາຍກເມກໍ ວາກ຺ຍໍ, ‘ອມປຎ຺ຈມິຍາ’ຕິ ທຸຕິຍມມາເທສສ຺ສ, ຕຕ຺ຣາປຎ຺ຈມິຍາຕ຺ຍາເທເສເນວາຕິ ສມ຺ພນ຺ຘຕິ, ວຸຕ຺ຕວິຘານາ ນ ໂລປປຏິເສເຘນ, ຕຖາສຕ຺ຍມປຎ຺ຈມິຍາຕິທໍ ວາກ຺ຍໍ ຍທິ ນ ວິເສສຕ຺ຖມາລມ຺ພເຕ ຕມນ຺ຕເຣນານຸປປຕ຺ຕິໂຕ-ຎ຺ຎຖາ ກິນ຺ຕ຺ຍເນນາຕ຺ຖພເລນ ລທ຺ຘນ຺ຕິ ອຕ຺ໂຖ, ອໂລໂປຕິ ໂຊເຕຕີຕິ ສມ຺ພນ຺ໂຘ, ວາກ຺ຍເຠເທນ ວິວຣຓໍ ກຕໍ, ນ ເອກວາກ຺ຍຕ຺ເຕນາຕິ ພ຺ຍຕິເຣໂກ ເອກວາກ຺ຍຕາຍຎ຺ຫິ ກາຣິຍ ທ຺ວຍສ຺ສປິ ປຎ຺ຈມິຍມ຺ປຏິເສໂຘ ສິຍາ ‘ປຎ຺ຈມິໍ ວຊ຺ເຊຕ຺ວາ ຕໍ ກາຣິຍທ຺ວຍໍ ເວທິຕພ຺ພ’ນ຺ຕິ, ຍທິປິ ສິທ຺ຘາຕິ ສມ຺ພນ຺ໂຘ, ເຍນ ນາປ຺ປຕ຺ຕິຍາຕ຺ຍເນນ ‘‘ເຍນ ນາປ຺ປຕ຺ເຕ ວິຘິຣາຣພ຺ຠເຕ, ຕສ຺ສ ພາຘນມ຺ຠວຕີ’’ຕິ ມມ຺ປຣິຠາສມຸປລກ຺ເຂຕິ, ກິມຕ຺ຖມິຫາຍໍ ປຣິຠາສາ ປຐ຺ຍເຕ ອິຫ ສຕ຺ເຖ-ປວາທາ ອຸສ຺ສຄ຺ເຄ ພາຘນ຺ເຕຕິ ນິຍໂມ, ຕຕ຺ຣ ຈຸສ຺ສຄ຺ຄາ ທຸວິຘາ ນິຍຕປ຺ປຕ຺ຕໂຍ ອນິຍຕປ຺ປຕ຺ຕໂຍ ເຈຕິ, ເຍ ສພ຺ພຕ຺ຖາປວາທວິສຍມ຺ປວິສນ຺ຕິ, ເຕ ນິຍຕປ຺ປຕ຺ຕໂຍ ວຸຈ຺ຈນ຺ເຕ, ເຍ ກ຺ວຈິເທວາປວາທວິສຍມວຄາຫນ຺ເຕ, ເຕ ອນິຍຕປ຺ປຕ຺ຕໂຍ ວຸຈ຺ຈນ຺ເຕ, ເອວໍ ທຸວິເຘສຸສ຺ສຄ຺ເຄສຸ ເຍ-ນິຍຕປ຺ປຕ຺ຕໂຍ, ເຕສເມວ ພາຘນມິຈ຺ຉີຍເຕ, ນ ນິຍຕິການໍ, ເຕນ ຕປ຺ປທສ຺ສນຕ຺ຖມຍມ຺ປຣິຠາສາ ປຐ຺ຍເຕຕິ, ເຍເນຕ຺ຍຸສ຺ສຄ຺ຄສ຺ສ ນິທ຺ເທໂສ, ເນຕິ ປຏິເສຘວາຈີ ນິປາໂຕ, ອປ຺ປຕ຺ເຕ ອສມ຺ຜຸຏ຺ເຐ ວິສເຍ ອິຕ຺ຍຊ຺ຌາຫາຣິຍໍ, ເຍນ ອຸສ຺ສຄ຺ເຄນ ນາປ຺ປຕ຺ເຕ ປຕ຺ເຕເອວ ສມ຺ຜຸຏ຺ເຐເອວ ວິສເຍຕ຺ຍຕ຺ໂຖ… ‘ທ຺ເວ ປຏິເສຘາ ປາກຕມຕ຺ຖໍ ຄເມນ຺ຕີ’ຕິ ກຕ຺ວາ, ວິຘີຍຕີຕິ, ປຏິເສໂຘ ວິຘານຎ຺ຈ, ອາຣພ຺ຠເຕ ວິຘີ

ຍເຕ ປຐ຺ຍເຕຕ຺ຍຕ຺ໂຖ, ອເນນາປວາທວິຘິນ຺ທສ຺ເສຕິ, ຕສ຺ເສຕິ ອາໂທເຍເນຕິ ນິທ຺ທິຏ຺ຐສ຺ສອຸສ຺ສຄ຺ຄສ຺ສພາຘນມ຺ຠວຕ຺ຍປວາເທນ, ເຍນ ຕ຺ວປ຺ປຕ຺ເຕ ວິສເຍ ອາຣພ຺ຠເຕ ຕສ຺ສ ພາຘນໍ ນ ຠວຕີຕ຺ຍຕ຺ໂຖ, ກຸໂຕຕິ ເຈ ອນວກາສຕ຺ຕາ, ຕຖາຫິ ຍທິ ອຸສ຺ສຄ຺ເຄນ ສພ຺ໂພ ວິສໂຍ ຄຫິໂຕ ສິຍາ, ໂກ-ປວາທສ຺ສອຎ຺ໂຎ ວິສໂຍ ສິຍາ, ຕສ຺ມາ ອນວກາສຕ຺ຕາ (ນ) ອປ (ວາເທ) ປນ ຕສ຺ສ ພາຘນມ຺ຠວຕີຕ຺ຍວເສຍໍ, ເຍນ ຕຸສ຺ສຄ຺ເຄນ ໂກຈິ ເທວາປວາທວິສໂຍ-ນຸປ຺ປຕ຺ໂຕສິຍາ, ນສພ຺ໂພ, ຕມ຺ປຕິ ສາວກາ ສຕ຺ຕາ ຕມ຺ພາຘເຕຕິ ວຸຕ຺ຕໍ ໂຫຕິ, ‘ປຎ຺ຈປູລິມານເຍ’ຕ຺ຍຕ຺ຣ ປຎ຺ຈນ຺ນໍ ປູລານໍ ສມາຫາໂຣຕິ ວິເສສນສມາໂສ ‘‘ນທາທິໂຕວີ’’ (໓-໒໗) ສມາຫຣຓໍ ສມາຫາໂຣຕິ ສມາຫາຣສ຺ສປິ ຠາວຣູປຕ຺ຕາ ອາຫ ‘ຠາວປ຺ປຘານຕ຺ເຕປີ’ຕິ, ຄຸຓຠູຕທພ຺ພານິ ປູລານິ.