໑໑໘. ອສໍ

ລິງ຺ຄວຈນເຠເທປິ ພ຺ຍຍຣຫິຕຕ຺ຕາ ອພ຺ຍຍວນ຺ຕອຸປສງ຺ຄນິປາຕານໍ ປຸພ຺ພາຈຣິຍສຎ຺ຎາ, ອສຕີ ສງ຺ຂ຺ຍາ ເຍສນ຺ຕ຺ຍານ຺ຍສງ຺ຂ຺ຍານີຕ຺ຍາຫ- ‘ເອກຕ຺ເຕ’ຈ຺ຈາທິ, ເອກາເນເກສູຕິ ວຸຕ຺ຕຕ຺ຕາ ສງ຺ຂ຺ຍາວິເສເສ ວິຘີຍມານາສ຺ຍາທໂຍ ກຖມສງ຺ຂ຺ເຍຫິ ອຸປ຺ປຊ຺ຊິຕຸມຸສ຺ສຫນ຺ເຕ ອິຈ຺ຈາສເຍນາຫ- ‘ກຖມສງ຺ຂ຺ເຍຫິ ສ຺ຍາທີນໍ ສມ຺ຠໂວ’ຕິ. ອຖ ນິສ຺ສງ຺ຂ຺ເຍຫິ ໂຫຕຸສ຺ຍາທີນມສມ຺ຠໂວ ອຸຈ຺ຈໍ ຣຸກ຺ຂສ຺ສິຈ຺ຈາໂທຕຸ ສງ຺ຂ຺ຍາສມ຺ຠເວ ຠວິຕພ຺ພເມວ ສ຺ຍາທີຫິຈ຺ຈາຫ-‘ສງ຺ຂ຺ຍາສມ຺ຠເວເວ’ຈ຺ຈາທິ. ວຸຕ຺ຕິຄນ຺ຖສ຺ສາຘິປ຺ປາຍໍ ວິວຣຕິ ‘ອຎ຺ຎເຖ’ ຕ຺ຍາທິນາ, ກິເມສມຸປ຺ປຕ຺ຕິຍມ຺ປໂຍຊນໍ ເຍນາສງ຺ຂ຺ເຍຫິ ຕທຸປ຺ປຕ຺ຕິ ໂນ-ນຸມີຍເຕ ຈ຺ຈາສງ຺ກິຍາຫ-‘ຕສ຺ສຎ຺ຈ ສຕິຍ’ນ຺ຕ຺ຍາທິ, ອສຕິ ຫິ ສ຺ຍາທີນມຸປ຺ປຕ຺ຕິຍມຸຈ຺ຈມາທີນມສງ຺ຂ຺ຍານມ຺ປທຕ຺ຕໍ ນຕ຺ຖີຕິ ໂຍ ອາທີສຸ ປທສ຺ມາ ປເຣສໍ ຕຸມ຺ຫາມ຺ຫສທ຺ທານໍ ສວິຠຕ຺ຕີນໍ ໂວໂນອາທິກໍ ປທນິມິຕ຺ຕໍ ກາຣິຍໍ ນ ສິຍາຕິ ‘ອຸຈ຺ຈໍ ໂວ, ອຸຈ຺ຈໍ ໂນ’ຕິອາທໂຍ ປໂຍຄາ ນ ສິຊ຺ຌນ຺ຕິ, ສຕິ ຕຸ ສ຺ຍາທຸປ຺ປຕ຺ຕິຍໍ ລຸຕ຺ເຕສຸປິ ເຕສຸ ປທຕ຺ຕນິປ຺ຜຕ຺ຕິຍາເຍວ ຕທຸປ຺ປຕ຺ຕິໂຕ ປທຕ຺ເຕ ສິທ຺ເຘ ປທລກ຺ຂຓໍ ກາຣິຍໍ ສິຊ຺ຌເຕວາຕິ ຠາໂວ. ປເຣຫິ ເອຕ຺ຖ ‘ຕສ຺ສໍ ສາລາຍ’ນ຺ຕິ ວຈນິຈ຺ຉາຍໍ ‘ຕຕ຺ຣ ສາລາຍ’ນ຺ຕິ ຍຖາ ສິຍາຕິ ‘‘ອພ຺ຍຍຕ຺ວາ ສ຺ຍາທິໂນ’’ຕິ (ປາ, ໒-໔-໘໒) ອພ຺ຍຍໂຕ ປຣສ຺ສິຕ຺ຖິຍມາປ຺ປຈ຺ຈຍສ຺ສາປິ ໂລໂປ ວິຫິໂຕ, ເຕນາຫ- ‘ອສງ຺ຂ຺ເຍຫິ’ຈ຺ຈາທິ, ຕທຍຸຕ຺ຕນ຺ຕິ ອາປ຺ປຈ຺ຈຍສ຺ສ ໂລປວິຘານ ມຍຸຕ຺ຕໍຕ຺ຍຕ຺ໂຖ. ອຖ ເກນາຕ຺ຣ ອາປ຺ປຈ຺ຈໂຍ ວິຘີຍເຕ ເຍນາສ຺ສາປິ ໂລໂປ-ນຸສາສີຍເຕ ‘‘ອິຕ຺ຖິຍມຕ຺ວາ’’ຕິ (໓-໒໖) ເຈ ເນຕທຕ຺ຖິ, ອິຕ຺ຖິຍມາປ຺ປຈ຺ຈຍສ຺ສ ວິຘານໂຕ-ສງ຺ຂ຺ຍານຎ຺ຈາລິງ຺ຄຕ຺ຕາ, ຕສ຺ມາ ອສງ຺ຂ຺ເຍຫິ ອາປ຺ປຈ຺ຈຍສ຺ສ ສມ຺ຠໂວເຍວ ນຕ຺ຖີຕ຺ຍນຕ຺ຖກມາປ຺ປຈ຺ຈຍສ຺ສ ໂລປວຈນນ຺ຕິ ນານຕ຺ຖກໍ ອິຕ຺ຖິຍນ຺ຕິ (໓-໒໖) ຫິ ຄຸຓິປ຺ປຘາໂນ ນິທ຺ເທໂສ ອິຕ຺ຖຕ຺ຕວຕິ ອາປ຺ປຈ຺ຈຍາທໂຍ ວິຘີຍນ຺ເຕ ‘ຕສ຺ສໍ ສາລາຍ (ມິຈ຺ເຈ ຕສ຺ມິໍ ປທຕ຺ເຖ) ຕຕ຺ເຣ’ຕິ ອສງ຺ຂ຺ຍມິທມິຕ຺ຖຕ຺ຕວຕິ ວຕ຺ຕເຕ, ຕສ຺ມາ ສິຍາເຍ ເວຕສ຺ມາ ອາປ຺ປຈ຺ຈໂຍຕ຺ຍວສ຺ສມາປ຺ປຈ຺ຈຍສ຺ສ ໂລໂປ ວິເຘຍ຺ໂຍຕິ ໂຍ ມຎ຺ຎເຕ, ຕມ຺ປຕິ ອາຫ-‘ຍທີປິ’ຈ຺ຈາທິ, ວິເສສາຠິຘານາຕ຺ຍຸປຄເມ ວຕ຺ຕ ມາໂນຍມສງ຺ຂ຺ຍສມຸທາໂຍ‘ນິທ຺ເທໂສ ວຕ຺ຕເຕ’ຕິ ໂຈຠຍມິກ຺ຂເຕ, ອິຕ຺ຖິຍນ຺ຕິ ນິທ຺ເທສສ຺ສ ຄຸຓິປ຺ປຘານຕ຺ຕໍ ສາເຘຕຸໍ ‘ອິຕ຺ຖຕ຺ຕວຕິ ຫິ ອາປ຺ປຈ຺ຈຍາທໂຍ’ຕິອາຫ, ຕຕ຺ເຣຕີມສ຺ສາສງ຺ຂ຺ຍສ຺ສ ສາລາຍໍ ວຕ຺ຕນໂຕ ອາຫ- ‘ອິຕ຺ຖຕ຺ຕວຕິ ຈາ’ຕິ, ອຍມ຺ປສິທ຺ຘິຣູເປນ ນ ວຕ຺ຕເຕຕິ ສມ຺ພນ຺ໂຘ, ຍທິ ອຍມ຺ປສິທ຺ຘິຣູເປນ ວຕ຺ຕເຕ, ກຸໂຕ ຈຣຫິ ອິຕ຺ຖຕ຺ຕາວສາໂຍຕ຺ຍາຫ- ‘ອິຕ຺ຖຕ຺ຕາວສາໂຍ’ຈ຺ຈາທິ. ອິທານິ ຊິນິນ຺ທພຸທ຺ຘິວຈນມານີຍ ຕສ຺ສາ ຍຸຕ຺ຕຕ຺ຕມຸພ຺ຠາວຍິຕຸມາຫ- ‘ໂຍປ຺ຍາຫິ’ຈ຺ຈາທິ, ຍທີປິຈ຺ຈາທິ ຊິນິນ຺ທພຸທ຺ຘິວຈນໍ, ຕສ຺ສາຕິ ອິຕ຺ຖຕ຺ຕສ຺ສ, ປທຕ຺ໂຖ ຈ ອິຕ຺ຖຕ຺ຕໍ ສິຍາຕິ ໂຍປ຺ຍາເຫຕິ ສມ຺ພນ຺ໂຘ, ຄມ຺ມມານຕ຺ຖຕ຺ຕາ ອິຕິສທ຺ທາປ຺ປໂຍໂຄ, ຕສ຺ສາຍຸຕ຺ຕນ຺ຕິ ຕສ຺ເສວໍ ວາທິໂນ ຊິນິນ຺ທພຸທ຺ຘິໂນ ວຈນມຍຸຕ຺ຕໍຕ຺ຍຕ຺ໂຖ, ກຸໂຕຈ຺ຈາຫ- ‘ເອວໍ ຫິ’ຈ຺ຈາທິ, ຍທິ ອິຕ຺ຖຕ຺ຕສ຺ສ ວາກ຺ຍຕ຺ຖຕາ ອິຕ຺ຖິປ຺ປຈ຺ຈຍນິວຕ຺ຕິກຕາ, ເອວໍ ສຕິ ສາລາຍມິຈ຺ຈາທິສທ຺ທນ຺ຕຣາເປກ຺ຂາ ອິຕ຺ຖຕ຺ຕປ຺ປຕີຕິ ຕຕ຺ເຣຕ຺ຍາທີສຸ ສິຍາຕິ ອຕ຺ໂຖ, ເນວ ຕຖາ ປຕີຍຕີຕິ ຠາໂວ, ວຸຕ຺ຕເມວຕ຺ຖໍ ຜຸຏຍິຕຸມາຫ- ‘ຕຖາຫິ’ຈ຺ຈາທິ, ອວິທ຺ທສຸອຍນ຺ຕິ ທິຏ຺ຐນ຺ໂຕ ປຎ຺ຎາໂສ, ອວິທ຺ທສຸ ອຍນ຺ຕິ ອຸຠຍຕ຺ຣາປ຺ຍຕ຺ເຣກວຈນສິສ຺ສ ນິວຕ຺ຕິຍາ ກຕໍ ຍເມກຕ຺ຕໍ, ຕໍ ສທ຺ທນ຺ຕຣາທ຺ຍນເປກ຺ຂເມວ ປຕີຍເຕຕ຺ຍຕ຺ໂຖ, ອິຕ຺ຖຕ຺ຕ ວຸຕ຺ຕິນາ ສາລາທິສທ຺ເທນ ສາມານາຘິກຣຓ຺ຍໍ ຕຕ຺ເຣຕ຺ເຍຕສ຺ສາຕິ ເອຕາວຕາ ອາປ຺ປຈ຺ຈໂຍ ອຸປ຺ປຊ຺ຊຕີຕິ ຈ ນ ສກ຺ກາ ວຕ຺ຕຸນ຺ຕິ ທສ຺ເສນ຺ໂຕ ອາຫ-‘ສມານາຘິກຣຓຕ຺ຕມ຺ປິ’ຈ຺ຈາທິ, ສມານາຘິກຣຓຕ຺ຕມ຺ປີຕິ (ອິຕ຺ຖິ) ວຸຕ຺ຕິນາ ສາລາທິສທ຺ເທນ ສາມານາຘິກຣຓ຺ຍມ຺ປິ, ອາປ຺ປຈ຺ຈຍາທີນໍ ນາງ຺ຄນ຺ຕິ ສມ຺ພນ຺ໂຘ.