໑໑໔. ໂລໂປ

ອກາຣສ຺ສນ຺ຕຣງ຺ຄຕ຺ເຕ ກາຣຓມາຫ-‘ປກຕິນິສ຺ສິຕຕ຺ຕາ’ຕິ, ປກຕິຍາ ອິທໍ ປາກຕໍ ‘‘ໂຓ’’ຕິ (໔-໓໔) ໂຓ, ໂລປສ຺ສ ພຫິຣງ຺ຄຕ຺ເຕ ກາຣຓມາຫ-‘ປຈ຺ຈຍນິສ຺ສິຕຕ຺ຕາ’ຕິ, ອນ຺ຕຣງ຺ເຄຈ຺ຈາທິນາ ‘‘ອນ຺ຕຣງ຺ຄພຫິຣງ຺ເຄສ຺ວນ຺ຕຣງ຺ຄວິຘິ ພລວາ’’ຕິ ປຣິຠາສມຸປລກ຺ເຂຕິ, ອງ຺ຄສທ຺ໂທ-ວຍວວາຈີ, ອນ຺ເຕ ສທ຺ໂທ ສຕ຺ຕມ຺ຍຕ຺ເຖ, ອງ຺ເຄ ຠວມນ຺ຕຣງ຺ຄໍ ວິຠຕ຺ຖ຺ຍຕ຺ເຖ-ສງ຺ຂ຺ຍສມາໂສ ‘‘ເອໂອນມ ວຓ຺ເຓ’’ຕິ (໑-໓໗) ອຕ຺ຕໍ ຣາຄໂມ, ອງ຺ຄໂຕ ພຫິ ພຫິຣງ຺ຄໍ ‘‘ປຍ຺ຍປາພຫິຕິໂຣ ປຸເຣປຈ຺ຉາ ວາ ປຎ຺ຈມ຺ຍາ’’ຕິ (໓-໕) ອສງ຺ຂ຺ຍສມາໂສ, ອຕ຺ຣ ຈານ຺ຕຣງ຺ຄໍ ພຫິຣງ຺ຄນ຺ຕິ ນາງ຺ເຄຠວມນ຺ຕຣງ຺ຄໍ, ອປິຕ຺ວນ຺ຕຣງ຺ຄນິສ຺ສິຕໍ ກາຣິຍມນ຺ຕຣງ຺ຄໍ, ນາປ຺ຍງ຺ຄໂຕ ພຫິຠູໂຕ ສມຸທາໂຍ ພຫິຣງ຺ຄໍ, ກິນ຺ຕຸ ພຫິຣງ຺ຄນິສ຺ສິຕໍ ກາຣິຍມ຺ພຫິຣງ຺ຄໍ ຍຖາ ມຎ຺ຈນິສ຺ສິເຕສຸ ສທ຺ທາຍນ຺ເຕສຸ ‘ມຎ຺ຈາ ສທ຺ທາຍນ຺ຕີ’ຕ຺ຍຸຈ຺ຈເຕ ຕໍ ວິເຍຕິ ອໂຕເຍວາ ສງ຺ຂ຺ຍສມາເສປິ ລິງ຺ຄວິຠຕ຺ຕິວຈນນ຺ຕຣໂຍໂຄ ‘ອນ຺ຕຣງ຺ໂຄ ອນ຺ຕຣງ຺ຄາ’ຕິ, ສງ຺ເກຕິໂກ ຫ຺ຍຍມສງ຺ຂ຺ຍສມາໂສ, ນ ປຸພ຺ພປທຕ຺ຖປ຺ປຘາໂນ, ຍຖາ-ປຈ຺ຈກ຺ຂສ຺ສາກ຺ຂນິສ຺ສິຕຕ຺ຕາວໂພຘຕ຺ຖໍ ‘ອກ຺ຂມກ຺ຂມ຺ປຕິ ວຕ຺ຕເຕ’ຕິ ວິຈ຺ຉາຍ-ມສງ຺ຂ຺ຍສມາເສປິ ກເຕ ປຈ຺ຈກ຺ຂ ຎາຓສ຺ສາກ຺ຂນິສ຺ສິຕຕ຺ຕຎາປນຕ຺ຖໍ ສງ຺ເກຕວເສນ ກໂຕ-ຍມສງ຺ຂ຺ຍ ສມາໂສ, ນ ປຸພ຺ພປທຕ຺ຖປ຺ປຘາໂນຕິ‘ປຈ຺ຈກ຺ໂຂ ປຈ຺ຈກ຺ຂາ’ຕິ ລິງ຺ຄວິຠຕ຺ຕິ ວຈນນ຺ຕຣໂຍໂຄ, ຕເຖວາຍ-ມນ຺ຕຣງ຺ຄນິສ຺ສິໂຕ-ຍໍ ສມຸທາຍນິສ຺ສິໂຕຕິ ຎາປນຕ຺ຖໍ ສງ຺ເກຕວເສນ ກໂຕ-ຍມສງ຺ຂ຺ຍສມາໂສຕິ ລິງ຺ຄວິຠຕ຺ຕິວຈນນ຺ຕຣໂຍໂຄ ນ ວິຣຸຊ຺ຌເຕ, ອຖວາ ອນ຺ຕຣມງ຺ຄມສ຺ສ ກາຣິຍສ຺ສາຕ຺ຖີຕິ ‘‘ສທ຺ຘາທິຕ຺ວ’’ (໔-໘໔) ຕຖາ ພຫິຣງ຺ຄນ຺ຕິ, ອນ຺ຕຣງ຺ຄຎ຺ຈ ພຫິຣງ຺ຄຎ຺ຈ ອນ຺ຕຣງ຺ຄພຫິຣງ຺ຄານິ, ເຕສ຺ວນ຺ຕຣງ຺ໂຄ ພລວາຕິ. ອນ຺ຕຣງ຺ຄ ກາຣິຍສ຺ສ ພລວຕ຺ຕໍ ສາເຘຕຸໍ ‘ສພ຺ພປຐມໍ ວິເຘຍ຺ຍຕ຺ຕາ’ຕິອາທິ ວຸຕ຺ຕໍ, ອິທມ຺ປນ ອນ຺ຕຣງ຺ຄກາຣິຍສ຺ສ ພລວຠາວສາຘເນ ກາຣຓໍ ນ ໂຫຕິ, ອນ຺ຕຣງ຺ຄຕ຺ຕາ ພລວຠາໂວເຍວ ຫິ ສພ຺ພປຐມໍ ວິເຘຍ຺ຍຕ຺ຕ ກາຣຓໍ, ຕຖາ ຈາຫ-‘ໂຍ ໂລປໂຕ ອກາຣສ຺ສ ປຐມເມວ ຠວເນ ກາຣຓມາຫ ອນ຺ຕຣງ຺ຄຕ຺ຕາ ອກາຣສ຺ສາ’ຕິ, ຕສ຺ມາ ນາຍໍ ປາໂຐ ຆຏເຕ, ອນ຺ຕຣງ຺ຄພລວຠາວສາຘນສ຺ສ ປນ ໂລກໂຕ ອິຈ຺ຉິຕຕ຺ຕາ ອຍເມວຕ຺ເຖ ປາໂຐ ຆຏເຕ’’ອນ຺ຕຣງ຺ຄເມວ ກາຣິຍມ຺ພລວໍ ໂລເກ ຕຖາທິຏ຺ຐຕ຺ຕາ, ຕຖາ ຫິ ໂລໂກ ປາໂຕວາ’’ຕ຺ຍາທິ, ໂລເກ ຕຖາທິຏ຺ຐຕ຺ຕາຕິ ອນ຺ຕຣງ຺ຄພລວຠາວສ຺ສ ໂລເກ ເອວໍ ວກ຺ຂມານນເຍນ ທິຏ຺ຐຕ຺ຕາ, ອຖວາ ເກນຈິ ວິຘຸຣປ຺ປຈ຺ຈໂຍປນິປາເຕນ ກາຣຓເວ ກລ຺ເລນ ວາ ກທາຈິ ກຕ຺ຕຸມສກ຺ກຸເຓຍ຺ຍຕ຺ເຕປິ ອນ຺ຕຣງ຺ຄສ຺ສ ອວສ຺ສໍ ວິເຘຍ຺ຍຕ຺ຕໍ ທສ຺ເສຕຸມາຫ ສພ຺ພປຐມໍ ວິເຘຍ຺ຍຕ຺ຕາ’ຕິ, ສຕິສມ຺ຠເວຕິ ນິມິຕ຺ຕສ຺ສານຸປຫຕຕ຺ຕາ ກາຣິຍສ຺ສ ສມ຺ຠເວ ສຕິ.