ປຎ຺ຈິກາຏີກາ

ປຓາມາທິກຖາ

ວິຊ຺ຊາຘນສ຺ສ ສມນຸສ຺ສຣຓມ຺ປິ ຍສ຺ສ,

ປຎ຺ຎາວິສຸທ຺ຘຣຕນານຍເນກເຫຕຸ;

ຕໍ ຘມ຺ມຣາຊມມລຸຊ຺ຊລກິຕ຺ຕິມາລໍ,

ສາໂມທມາທຣມເຍ ຫທເຍ ນິຘາຍ.

ລທ຺ຘມ຺ມໂຫທຍ ມຫາທຍ (ສມ຺ປສາທາ) [ຊປໂສ (ໂປຕ຺ຖເກ)],

ສກ຺ກາ(ທິ) ສກ຺ກຕຄຸຓໍ ຣຕນ (ທ຺ວຍຎ຺ຈ) [ຕ຺ຕຍຕາ (ໂປຕ຺ຖເກ)];

(ຍາປຎ຺ຈິກາ) ຄຸຣຸວຣປ຺ປ(ຠວາຕ຺ຍຄາຫາ) [ຫປາ ຕ຺ຍ ຄາຍາ (ໂປຕ຺ຖເກ)],

ຕໍ ສາຘຸ ສິສ຺ສຊນ ມຊ຺ຊວຄາຫ ຍາມ.

ຊຍຕີຫ ມຫາປຎ຺ໂຎ, ໂສ ໂມຄ຺ຄລ຺ລາຍໂນ ມຸນິ;

ຍສ຺ສ ສາຘຸຄຸຓຸພ຺ຠູຕ,ກິຕ຺ຕິ ສພ຺ພຕ຺ຖ ປຕ຺ຖຏາ.

ອິຈ຺ເຈວ ມນວເສສ ມຕ຺ຕໂນ ຠຍາທ຺ຍູປທ຺ທໂວປຆາຠກຣສາມຕ຺ຖິຍ ໂຍເຄນ ສກລຊ຺ຌຕ຺ຕິກພາຫິຍນ຺ຕຣາຍ ນິວາຣຓ ມຘິປ຺ເປຕສິທ຺ຘິ ວິເສສ ມຠິກງ຺ຂິຍ ຣຕນຕ຺ຕຍ ວິສຍຠູຕໍ ຕໍສາຘເນ ກນ຺ຕນິທານ ຠູຕສ຺ສ ອາໂລກິຍຍາຕິສຍຄຸຓວິເສສຍຸຕ຺ຕສ຺ສ ມຫໂຕ ປ຺ຍຕິມຫນີຍສ຺ສ ຣຕນຕ຺ຕຍສ຺ສ ສປ຺ປສາທານຸຣູປໍ ປູຊາວິສຍໍ ຕທນຸສ຺ສ(ຣຓໍ ກຕ຺ວາ) ຄຸຣຸສນ຺ນິໂຍຄມນຸຏ຺ຐາຕຸໍ–

ກິນ຺ເຕຫິ ປາທສຸສ຺ສູສາ, ເຍສໍ ນຕ຺ຖິ ຄຸຣູນິຫ;

ເຍ ຕປ຺ປາທຣໂຊກິຓ຺ຓາ, ເຕວ ສາຘູ ວິເວກິໂນຕິ.

ວຈນໂຕ ອຕ຺ຕໂນ ຄຸຣຸປູຊາ ປຸຣສ຺ສຣໍ ປຎ຺ຈິກາວິວຣຓໍ ປຖິ’ຍາ ປຎ຺ຈິກາ’ຕິອາທິນາ ກຕປຏິຎ຺ຎຕ຺ຕາ ສມ຺ປຕິ ມຫາທໂຍຕິອາທິໂນ ຄນ຺ຖສ຺ສ ສາຘຸຊນວຓ຺ຓນໍ ວຓ຺ຓນມາຣຠິສ຺ສາມ.

ນນຸ ຈ ວຸຕ຺ຕິຄນ຺ຖສ຺ສ ວຓ຺ຓນາຍໍ ກຕາຠິນິເວໂສ-ຍມາຈຣິໂຍຕິ ກຖມິຫານຘິກເຕ ມຫາທໂຍຕິອາທິເກ ປຏິປນ຺ໂນຕິ ຣຕນຕ຺ຕປ຺ປຓາມຄນ຺ຖກຕ຺ຕຸຄນ຺ຖນິສ຺ສຍຄນ຺ຖາຣມ຺ຠຜລອຠິເຘຍ຺ຍສງ຺ຂາຕ- ປໂຍຊນໂສຕຸຊນສມຸສ຺ສາຫນານໍ ສນ຺ທສ຺ສນຕ຺ຖໍ. ຕຕ຺ຖ ຣຕນຕ຺ຕຍປ຺ປຓາມ ກຣຓໍ ອນ຺ຕຣາຍກຣາປຸຎ຺ຎວິຆາຕກຣປຸຎ຺ຎວິເສສຸປ຺ປາທເນນ ກຕ຺ຕຸ ມິຈ຺ຉິຕສ຺ສ ຄນ຺ຖສ຺ສ ອນນ຺ຕຣາເຍນໍ ປຣິສມາປນຕ຺ຖໍ. ວຈີປຓາໂມ ປເນຕ຺ຖ ໂສຕູນມ຺ປິ ຍຖາວຸຕ຺ຕຕ຺ຖນິປ຺ຜາທນໂກ ອາຈຣິເຍນາປ຺ຍຍ ມຕ຺ໂຖ ທສ຺ສິໂຕເຍວ’ຕຕ຺ຖ ຣຕນຕ຺ຕຍປ຺ປຓາມສນ຺ທສ຺ສນ’ນ຺ຕິອາທິນາ, ວາຈສິກສຕ຺ຖາຘິກາຣໂຕປິ ວຈີປຓາໂມຕິ ກາຍປ຺ປຓາໂມ ມໂນປຓາໂມ ຈ. ນ ກໂຕ, ຄນ຺ຖກຕ຺ຕຸສນ຺ທສ຺ສນໍ ຄນ຺ຖສ຺ສ ປມາຓ ຠາວວິຠາວນຕ຺ຖໍ, ຄນ຺ຖນິສ຺ສຍສນ຺ທສ຺ສນໍ ອຕ຺ຕນິຍຠາວສນ຺ຘສ຺ສເນນ ຕພ຺ພິສຸທ຺ຘິທສ຺ສນຕ຺ຖໍ, ຄນ຺ຖາຣມ຺ຠຜລທສ຺ສນໍ ຕປ຺ປຏິກ຺ເຂປກຊນນິເສຘາຍ, ອຠິເຘຍ຺ຍສງ຺ຂາຕຍໂຍຊນສນ຺ທສ຺ສນໍ ວີມໍສາປຸພ຺ພກາຣີນໍ ປໂຍຊໂນ ປາລມ຺ຠປຸພ຺ພິກາ ສຕ຺ເຖ ປວຕ຺ຕຕີຕິ ໂສຕຸຊນສມຸສ຺ສາຫນໍ (ກຕ຺ວາ) ອາທເຣນ ຄນ຺ເຖ ປວຕ຺ຕນຕ຺ຖໍ, ຍທາຫຸ –

ສພ຺ພສ຺ເສວ ຫິ ສຕ຺ຖສ຺ສ, ກມ຺ມສ຺ສາປິ ຈ ກສ຺ສຈິ;

ເກເນຕໍ ຄຍ຺ຫເຕ ຕາວ, ຍາວ-ວຸຕ຺ຕມ຺ປໂຍຊນໍຕິ.

ນນຸ ສຕ຺ຖປ຺ປໂຍຊນານໍ ສມ຺ພນ຺ໂຘປິ ວຕ຺ຕພ຺ໂພ ອິທມສ຺ສ ປໂຍຊນນ຺ຕິ ຍໂຕ–

ສິທ຺ຘປ຺ປໂຍຊນໍ ສິທ຺ຘ,ສມ຺ພນ຺ຘໍ ໂສຕຸມິຈ຺ຉຕິ;

ໂສຕາໂທ ເຕນ ວຕ຺ຕພ຺ໂພ, ສມ຺ພນ຺ໂຘ ສປ຺ປໂຍຊໂນຕິ.

ຕຕ຺ເຣທມຸຕ຺ຕຣໍ–

ສຕ຺ຕໍ ປໂຍຊນຎ຺ເຈວ, ອຸໂຠ ສມ຺ພນ຺ຘນິສ຺ສຍາ;

ຕໍ ວຸຕ຺ຕນ຺ໂຕຄຘຕ຺ຕາ ນ, ຠິນ຺ໂນ ວຸຕ຺ໂຕ ປໂຍຊນາຕິ.

ປໂຍຊນປ຺ປໂຍຊນມ຺ປນ ສາມຕ຺ຖິຍລທ຺ຘພ຺ພໍ ສຍມາຈຣິເຍນ ‘‘ໂກ ປນ ສທ຺ທລກ຺ຂຓສ຺ສ ອຊານເນ ໂທໂສ’’ຕິອາທິນາ ວຸຕ຺ຕນເຍນ ວິຎ຺ຎາຕພ຺ພໍ.

ຕຕ຺ຖ‘ມຫາທໂຍ’ຕ຺ຍາທິນາ ຄາຖາທ຺ວເຍນ ຣຕນຕ຺ຕຍປຓາໂມ ທສ຺ສິໂຕ, ‘ໂຍ ອິທ຺ຘິມນ຺ເຕສູ’ຕິອາທິນາ ຄນ຺ຖກຕ຺ຕາ, ‘ສທ຺ທສຕ຺ຖ’ນ຺ຕິອາທິນາ ຄນ຺ຖນິສ຺ສໂຍ, ‘ສງ຺ເຂປນເຍນາ’ຕິຈ ‘ສາຣຠູຕໍ ວິປຸລຕ຺ຖຄາ ຫິໍ ອນາກຸລ’ນ຺ຕິ ຈ ອິເມຫິ ຄນ຺ຖາຣມ຺ຠຜລໍ ໂສຕຸຊນສມຸສ຺ສາຫນຎ຺ຈ, ອຠິເຘຍ຺ຍສງ຺ຂາຕປ຺ປໂຍຊນມ຺ປນ‘ສໍວຓ຺ຓນ’ນ຺ຕິ ອິມິນາ ທສ຺ສິຕໍ ອນ຺ວຕ຺ຖ ພ຺ຍປເທເສນ ສໍວຓ຺ຓີຍຕິ ວິວຣິຕ຺ວາ ວິຕ຺ຖາເຣຕ຺ວາ ກຖີຍຕິ ອຕ຺ໂຖ ເອຕາຍາຕິ ສໍວຓ຺ຓນາຠິ ກຕ຺ວາ, ຕມ຺ປນ ວິວຣິຕ຺ວາ ກຖນໍ ສທ຺ທານຸສາສນສຕ຺ຖສນ຺ນິສ຺ສຍຕ຺ຕາ ອຠິເຘຍ຺ໂຍ ນາມ ສມຸທິເຕນ ສຕ຺ເຖນ ວຈນີຍຕ຺ໂຖ ຕໍ [ວຈນີຍຕ຺ໂຖຕິ (ໂປຕ຺ຖເກ)] ວຸຕ຺ຕສທ຺ທານຸສິຏ຺ຐິສງ຺ຂາຕປໂຍຊນເມວາຕິ ອຍເມຕ຺ຖ ສມຸທາຍຕ຺ໂຖ.

ອຍມ຺ປເນຕ຺ຖ ອວຍວຕ຺ໂຖ-ໂຍຕິ ອນິຍມວຈນໍ ຘມ຺ມຣາຊສທ຺ທາ ເປກ຺ຂາຍ ເຈຕ຺ຖ ປຸລ຺ລິງ຺ຄຕາ, ເຕເນຕ຺ຖ ວຸຈ຺ຈມານຄຸຓວິເສສາ ຘາຣປຸຄ຺ຄລວິເສສນິທສ຺ສນໍ, ທຍຕິ ທຸກ຺ຂໍ ອປເນຕ຺ວາ ປເຣສໍ ສຸຂໍ ທທາຕິ, ທຍີຍຕິ ວາ ສປ຺ປຸຣິເສຫິ ຄມິຍ(ຕິ ສ) ສນ຺ຕາເນ ປວຕ຺ຕີຍຕິ, ທຍຕິ ວາ ປຣທຸກ຺ຂໍ ຫິໍສຕິ, ທຍຕິ ວາ ປຣທຸກ຺ຂໍ ຄຓ຺ຫາຕິ ຕໍວເສນ ອຕ຺ຕໂນ ຫທຍເຂທໍ ກໂຣຕີຕິ ທຍາ, ‘‘ທຍ=ທານຄຕິ ຫິໍສາທາເນສຸ’’ ອິຈ຺ຈສ຺ມາ ‘‘ອິຕ຺ຖິຍມຓຕ຺ຕິກຍກ຺ຍາເຈ’’ຕິ (໕-໔໙) ອປ຺ປຈ຺ຈໂຍ, ວິສຍມຫນ຺ຕຕາຍ ມຫຕີ ປສຕ຺ຖາ ວາ ທຍາ ອສ຺ສາຕິ ມຫາທໂຍ, ວິເສສນ ສມາເສ ‘‘ສທ຺ຘາທິຕ຺ວ’’ (໔-໘໔) ວກ຺ຂມານປາຣມິຕາສມ຺ຠຣຓທຸກ຺ຂານຸຠວ ນານມິທໍ ເຫຕຸວຈນໍ, ກມ຺ມກິເລເສຫິ ຊນິຕາຕິ ຊນາ ສຕ຺ຕໂລໂກ, ອິມິນາ ຂີຓາສວາປິ ສງ຺ຄຍ຺ຫນ຺ຕິ ເຕສມ຺ປິ ທິຏ຺ຐຘມ຺ມິກສຸຂວິຫາຣສງ຺ຂາຕ ຫິຕສ຺ສ ທານໂຕ, ຊນານໍ ສມູໂຫ ຊນຕາ ຕສ຺ສາ ຫິຕາຍ ອຠິວຑ຺ຒິຍາ ສກລວຏ຺ຏ ທຸກ຺ຂນິສ຺ສຏນິພ຺ພານສຸຂຠາຄິຍກຣຓາຍາຕິ ວຸຕ຺ຕໍ ໂຫຕິ, ອສ຺ສຈ’ສມ຺ປູຣຍ’ນ຺ຕິ ອິມິນາ’ທຸກ຺ຂມນຸຠວີ’ຕິ ອິມິນາ ຈ ສມ຺ພນ຺ໂຘ, ສມ຺ໂພຘີຕິ ເອຕ຺ຖ ສໍສທ຺ໂທ ສາມນ຺ຕິ ອິມມຕ຺ຖໍ ທີເປຕິ, ຕສ຺ມາ ສໍສຍເມວ ອນຎ຺ຎໂພຘິໂຕ ຫຸຕ຺ວາ ຈຕ຺ຕາຣິ ສຈ຺ຈານິ ພຸຊ຺ຌຕິ ປຏິວິຊ຺ຌຕິ ເອຕາຍາຕິ ສມ຺ໂພຘິ, ສໍປຸພ຺ພາ ພຸຘຘາຕຸໂຕ ‘‘ອິ’’ອິຕິ ຓ຺ວາທິ (ໂກ) ອິປ຺ປຈ຺ຈໂຍ, ສວາສນສກລສໍກິເລສປ຺ປຫາຍກໍ ຠຄວໂຕ ອຣຫຕ຺ຕມຄ຺ຄຎ຺ຎາຓໍ ສພ຺ພຎ຺ຎຸຕຎ຺ຎາຓນ຺ຕິປິ ວທນ຺ຕິ, ສມ຺ປາປຍຕີຕິ ສມ຺ປາປກໍ, ສມ຺ໂພຘິຍາ ສມ຺ປາປກນ຺ຕິ ຉຏ຺ຐີສມາໂສ, ກິນ຺ຕິ ຘມ຺ມຊາຕໍ ຘມ຺ມສທ຺ເທເນຕ຺ຖ ປາຣມິຘມ຺ມາ ປຎ຺ຈມຫາປຣິຈ຺ຈາຄາທໂຍ ຈ ອຘິປ຺ເປຕາ, ເຕປິ ຫິ ອຕ຺ຕານໍ ຘາເຣນ຺ຕໍ ຘາເຣນ຺ຕິ ສມ຺ໂພຘິ ສມ຺ປາປນສາມຕ຺ຖິຍໂຍເຄນ ປເຣປິ ຘາເຣນ຺ຕິ ນາມາຕິ ຘມ຺ມາຕິ ວຸຈ຺ຈນ຺ຕິ, ‘ຘຣ=ຘາຣເຓ’ອິຈ຺ຈສ຺ມາ ຂີສຸ, ວິຍາທິສຸຕ຺ເຕນ ຓ຺ວາທິ(ໂກ) ມປ຺ປຈ຺ຈໂຍ, ຘມ຺ມານໍຊາຕໍ, ຘມ຺ມາເອວວາ ຊາຕໍ, ສມ຺ໂພຘິສມ຺ປາປກຎ຺ຈ ຕໍ ຘມ຺ມຊາຕໍ ເຈຕິ ວິເສສນສມາໂສ, ‘ສມ຺ປູຣຍ’ນ຺ຕິ ມສ຺ເສຕໍ ກມ຺ມໍ, ສມ຺ປູຣຍນ຺ຕິ ປໂຍຄສມ຺ປຕ຺ຕິໂຍຄາ ທີປງ຺ກຣ (ປາທ)ມູເລ ຫຕ຺ໂຖປຄຕມ຺ປິ ນິພ຺ພານມ຺ປຫາຍ ຍຖາວຸຕ຺ຕກຣຸຓາຄຸຓໂຍຄສີຕລີຠູຕຫທຍຕາຍ ‘‘ກຖນ຺ນາເມເຕ ອຈ຺ຈນ຺ຕ ທຸສ຺ສຫວຏ຺ຏທຸກ຺ໂຂປຄເຕ ສຕ຺ເຕ ຕໍມຫາທຸກ຺ຂາ ໂມເຈສ຺ສາມີ’’ຕິ ວຏ຺ຏທຸກ຺ຂນິສ຺ສຣເຓກເຫຕຸຕາຍ ສມ຺ມາ ປູເຣນ຺ໂຕ ວຑ຺ເຒນ຺ໂຕ ວຸຑ຺ຒິໍ ວິຣູຬ຺ຫໍ ເວປຸລ຺ລໍ ຄເມນ຺ໂຕຕິ ວຸຕ຺ຕໍ ໂຫຕິ, ເຫຕຸເຍເວທມປິ ທຸກ຺ຂານຸຠວນສ຺ສ, ມຫາທຍຕາ ປນສ຺ສ ປຣມ຺ປຣເຫຕຸ, ທຸຏ຺ຐຸ ຂນຕິ ກາຍິກໍ ອສ຺ສາທນ຺ຕິ’ທຸປຸພ຺ພາ ຂນິສ຺ມາ’ ‘‘ກ຺ວີ’’ຕິ (໕-໔) ກ຺ວິ, ທຸກ຺ຂໍ ກາຍິກທຸກ຺ຂ ເວທນາ, ກີທິສນ຺ຕິ ອາຫ-’ອນນ຺ຕຣູປ’ນ຺ຕິ, ສຠາວວຈໂນ ຍໍ ຣູປສທ຺ໂທ ‘‘ປິຍຣູປ’’ນ຺ຕິອາທີສຸວິຍ, ເຕ ຈ ທຸກ຺ຂສຠາວາ (ອນນ຺ຕາ) ອນນ຺ຕກາຣຓານໍ ວເສນ, ຕສ຺ມາ ອນນ຺ຕໍ ຣູປໍ ສຠາໂວ ອສ຺ສາຕິ ອນນ຺ຕຣູປໍ, ຕໍ ທຸກ຺ຂໍ ອນຸຠວີ ວິນ຺ທີ, ກິມິວາຕິ ອາຫ-‘ສຸຂໍ ວາ’ຕິ, ສຸຏ຺ຐຸ ຂນຕິ ກາຍິກໍ ອາພາຘນ຺ຕິ ສຸຂໍ, ອິວສທ຺ໂທ ສຘມ຺ມຕ຺ຕສງ຺ຂາໂຕປມາໂຊຕໂກ, ສຘມ຺ມຕ຺ຕຎ຺ຫິ ອຸປມາ, ວຸຕ຺ຕຎ຺ຫິ ‘‘ອຸປມາໂນປເມຍ຺ຍານໍ, ສຘມ຺ມຕ຺ຕໍ ສິໂຍ ປມາ’’ຕິ, ກິໍ ວຸຕ຺ຕໍ ໂຫຕິ ‘‘ອນິຏ຺ຐານຸຠວນສຠາວາຍາປິ ທຸກ຺ຂເວທນາຍ ອນຸຠວນສຠາວສາມຎ຺ເຎນ ອຊ຺ຌາສຍສມ຺ປຕ຺ຕິວິເສສໂຍຄາ ມຫາກາຣຸຓິກສ຺ສ ສຸເຂນ ສທິສຕາປຕ຺ຕິໂຫຕີຕິ ທຸກ຺ຂມ຺ປິ ສມານໍ ຕໍ ສຸຂມິວ ວິນ຺ທີ’’ຕິ. ກຖມຎ຺ຎຖາ ວຏ຺ຏທຸກ຺ຂໂຕ ສກລໂລກສ຺ສ ສມຸທ຺ຘຣຓໍ ສິຍາຕິ, ອຖວາ ສຸຂມິວ ສຸຂໍ ວິນ຺ທນ຺ໂຕ ວິຍ ອນຎ຺ຎວິນ຺ທິຍມປິ ຕາທິສໍ ທຸກ຺ຂໍ ສກລໂລກຫິຕາວ ຫິຕມນຕາຍ ວິນ຺ທີຕິ ອຕ຺ໂຖ, ເຕນາຫ ‘ອຂິນ຺ນຣູໂປ’ຕິ, ອຂິນ຺ນໍ ປຣິສ຺ສມມປ຺ປຕ຺ຕໍ ຣູປໍ ສຠາໂວ ອສ຺ສາຕິ ວິຄ຺ຄໂຫ.

ຕໍ ຘມ຺ມຣາຊນ຺ຕິ ໂຍຕິ ອນິຍມນິທ຺ທິຏ຺ຐສ຺ສ ວຸຕ຺ຕຄຸຓວິເສສາຘາຣ ປຸຄ຺ຄລສ຺ສນິຍມນວຈນໍ, ຘມ຺ເມນ ຣາຊຕິ ໂນ ອຘມ຺ເມນາຕິ ວາ, ອຕ຺ຕນາ ປຏິວິທ຺ຘສ຺ສ ສາມິຠາເວນ ຘມ຺ມສ຺ສ ຣາຊາ ສາມີຕິ ວາ, ອຕ຺ຕນາ ປຏິວິຊ຺ຌິຍມາເນ ຘມ຺ເມ ປຏິວິຊ຺ຌນ຺ໂຕວ ຕຕ຺ຖ ຣາຊຕິ ທິປ຺ປຕີຕິ ວາ, ປຣູປກາຣວເສນ ຕທຕ຺ຖາເຍວ ປຏິປນ຺ນຕ຺ຕາ ປເຣສໍ ຘມ຺ມໍ ຣາເຊຕິ ປກາເສຕີຕິ ວາ ຘມ຺ມຣາຊາ, ຕໍ ຘມ຺ມຣາຊໍ ນມິຕ຺ວາຕິ ສມ຺ພນ຺ໂຘ, ນມສ຺ສິຕ຺ວາຕິ ອຕ຺ໂຖ, ກີທິສນ຺ຕິ ອາຫ-‘ຊິຕມາຣວີຣໍ ສຸຘນ຺ຕ ໂສວຓ຺ຓນິຠ’ນ຺ຕິ. ຕຕ຺ຖ ມາໂຣ ຈ ໂສ ວີໂຣຈາຕິ ມາຣວີໂຣ ຊິໂຕ ວິທ຺ເຕຘສ຺ຕພໂລ ມາຣວີໂຣ ນາຕິ ຊິຕມາຣວີໂຣ, ຕໍ, ກິຎ຺ຈາປິ ເທວປຸຕ຺ຕກິເລສາຠິສງ຺ຂາຣມຈ຺ຈຸກ຺ຂນ຺ຘ ມາຣາ-ເນນ ຊິຕາ ເອວ, ຕຖາປິ ວີຣສທ຺ທສນ຺ນິຘາເນນ ເທວປຸຕ຺ຕມາເຣ ຄຫິເຕ ຕໍວິຊຍາ ອຎ຺ເຎປິ ຊິຕາ ເອວ ນາມ ໂຫນ຺ຕີຕິ ວິຎ຺ເຎຍ຺ຍໍ, ສຸຏ຺ຐຸ ຘນ຺ຕໍ ຘມິຕໍ ອຸທ຺ຘຣິຕໍ ສຸຘນ຺ຕໍ, ສຸວຓ຺ຓເມວ ໂສວຓ຺ຓໍ, ສຸຘນ຺ຕ ຈ ຕໍ ໂສວຓ຺ຓຎ຺ຈ, ຕສ຺ເສວ ນິຠາ ໂສຠາ ອສ຺ເສຕິ ສມາໂສ, ອຖວາ ສຸຘນ຺ຕຎ຺ຈ ຕໍ ສຸວຓ຺ຓໍ ເຈຕິ ສມາເສ ຕສ຺ສິທນ຺ຕິ ‘‘ໂຓ’’ຕິ (໔-໓໔) ຓປ຺ປຈ຺ຈເຍ ‘‘ມຊ຺ເຌ’’ຕິ (໔-໑໒໖) ມຊ຺ຌວຸທ຺ຘິຍໍ ສຸຘນ຺ຕໂສວຓ຺ຓໍ ປຏິມາຣູປໍ, ເຕນ ນິໂຠ ສທິໂສ, ຕໍ.

ເອຕ຺ຕາວຕາ ຈ –

ເຫຕຸ ຜລໍ ປຣຕ຺ໂຖ ຈ, ສພ຺ໂພປິ ຖຸຕິສງ຺ຄໂຫ;

ເຫຕຸ ສມ຺ໂພຘິໂຕ, ປຸພ຺ເພວ, ຍມຎ຺ຎໍ ຕໂຕປຣີຕິ.

ວຸຕ຺ຕເຫຕຸຜລສຕ຺ໂຕປກາຣວເສນ ພຸທ຺ຘຣຕນສ຺ສ ຖຸຕິປຸພ຺ພກມ຺ປຓາມໍ ທສ຺ເສຕ຺ວາ ອິທານິ ຘມ຺ມຣາເຊນ ເຕນາປິ ປູຊນີຍສ຺ສ ຘມ຺ມຣຕນສ຺ສ ນິປຈ຺ຈກາຣໍ ທສ຺ເສຕຸໍ‘ຘມ຺ມຎ຺ຈ ໂມຫນ຺ຘຕມປ຺ປຘໍສິ’ນ຺ຕິ ອາຫ, ຕຕ຺ຖ ຈ ສທ຺ໂທ ‘ຘມ຺ມຎ຺ຈ ນມິຕ຺ວາ’ຕິ [ນມສ຺ສິຕ຺ວາ (ໂປຕ຺ຖເກ)] ນມສ຺ສນກ຺ຣິຍາຍ ຘມ຺ມໍ ສມ຺ປິຓ຺ເຑຕິ, ກິມ຺ຠູຕນ຺ຕິ ອາຫ, ‘ໂມຫນ຺ຘຕມປ຺ປຘໍສິ’ນ຺ຕິ, ມຸຍ຺ຫຕີຕິ ໂມໂຫ=ອຎ຺ຎາຓໍ, ອນ຺ຘຍຕິ ສມຕ຺ຖຈກ຺ຂຸວິຎ຺ຎາຓປຣິຫາເນນາຕິ ອນ຺ຘໍ, ອນ຺ຘຎ຺ຈ ຕໍ ຕມຎ຺ເຈຕິ ອນ຺ຘຕມໍ=ພາຬ຺ຫຕິມິຣໍ, ໂມໂຫເຍວ ຕໍສທິສຕາຍ ອນ຺ຘຕມນ຺ຕິ ໂມ ຫນ຺ຘຕມໍ, ຕໍ ປຘໍເສຕິ ປກາເຣນ ນາເສຕິ ສີເລນາຕິ ໂມຫນ຺ຘຕມປ຺ປຘໍສີ, ປສທ຺ທສ຺ສປກາສນຕ຺ຖໍ ຫິຕ຺ວາ ປກາຣຕ຺ຖສ຺ເສວ ຄຫຓໂຕ ປຣິຍຕ຺ຕິຍາ ສຫ–

ໂສຕາປຕ຺ຕາທໂຍ ມຄ຺ຄາ,ຈຕ຺ຕາໂຣ ຕປ຺ຜລານິຈ;

ຈຕ຺ຕາຣິ ອຖ ນິພ຺ພານໍ, ຘມ຺ມາ ໂລກຸຕ຺ຕຣາ ນວາຕິ.

ວຸຕ຺ຕນວໂລກຸຕ຺ຕຣມ຺ໂມ ຄຫິຕາຕິ ວິຎ຺ຎາຕພ຺ພໍ, ອຎ຺ຎຖາ ອຣຫຕ຺ຕມຄ຺ໂຄວ ຄຍ຺ເຫຍ຺ຍ, ກສ຺ມາ ປເນຕ຺ຖ ໂມຫສ຺ເສວ ປຫານໍ ວຸຕ຺ຕໍ, ເນຕເຣສນ຺ຕິ ຕມ຺ມູລກຕ຺ຕາ ສພ຺ພກິເລສານໍ, ຕປ຺ປຫານສ຺ມິຎ຺ຫິ ວຸຈ຺ຈມາເນ ຕມ຺ມຸເຂເນຕເຣສມ຺ປິ ປຫານໍ ວຸຕ຺ຕເມວ ໂຫຕີຕິ.

ເອວໍ ຘມ຺ມຣຕນສ຺ສ ນມກ຺ກາຣໍ ທສ຺ເສຕ຺ວາ ອິທານິ ຕທາຘາຣຠູຕສງ຺ຆຣຕນໍ ນມສ຺ສິຕຸໍ ‘ສງ຺ຆໍ ຕຖາ ສງ຺ຆຏິຕໍ ຄຸເຓຫີ’ຕິ ວຸຕ຺ຕໍ, ຕຕ຺ຖ ຕຖາສທ຺ໂທ ສມຸຈ຺ຈເຍ ວາ, ວໂຈຍຸຕ຺ຕິຍໍ ວາ, ວໂຈຍຸຕ຺ຕິປກ຺ເຂ ຈ ສທ຺ໂທ ອາເນຕ຺ວາ ສມ຺ພນ຺ຘິຕພ຺ໂພ, ກິເລສາທໂຍ ສໍຫນຕິ ຫິໍສຕີຕິ ສງ຺ໂຆ, ສໍປຸພ຺ພໂຕ ຫນຕິສ຺ມາ ກ຺ວິມ຺ຫິ ‘‘ກ຺ວິມ຺ຫິ ໂຆປຣິປຈ຺ຈສໂມ ຫີ’’ຕິ (໕.໑໐໐) ຫນສ຺ສ ໂຆ, ກິເລສຫິໍສນຎ຺ເຈຕ຺ຖ ຕທງ຺ຄາທິວເສນ ຄຫິຕໍ, ຄຸເຓຫີຕິ ສາມຎ຺ຎນິທ຺ເທສໂຕ ສມ຺ມຸຕິສງ຺ເຆນ ສທ຺ຘິໍ

ຈຕ຺ຕາໂຣ ຈ ປຏິປນ຺ນາ, ຈຕ຺ຕາໂຣ ຈ ຜເລຐິຕາ;

ເອສ ສງ຺ໂຆ ອຸຊຸຠູໂຕ, ປຎ຺ຎາສີລສມາຫິໂຕຕິ.

ວຸຕ຺ຕອຏ຺ຐອຣິຍປຸຄ຺ຄລາ ຄຍ຺ຫນ຺ຕິ, ຄຸເຓຫີຕິ ໂລກິຍໂລກຸຕ຺ຕເຣຫິ ສີລາທິຄຸເຓຫິ, ສງ຺ຆຏິຕນ຺ຕິ ສໍຫຕໍ.

ເອວມນນ຺ຕຣາເຍນ ຄນ຺ຖປຣິສມາປນຕ຺ຖມນນ຺ຕ ຄຸຓວິສິຏ຺ຐໂລກຕ຺ຕຍຄ຺ຄສີຂາມຓິຠູຕສ຺ສ ຣຕນຕ຺ຕຍສ຺ສ ປຓາມໍ ທສ຺ເສຕ຺ວາ ອິທານິ ຄນ຺ຖ ກຕ຺ຕາທິຍຖາວຸຕ຺ຕຕ຺ໂຖປທສ຺ສນ ປຸພ຺ພງ຺ຄມມຕ຺ຕນາ ສມາຣຠິຕພ຺ພໍ ຄນ຺ຖ ກຣຓໍ ປຏິຎ຺ຎາຕຸກາໂມ’ໂຍ ອິທ຺ຘິມນ຺ເຕສູ’ຕິອາທິມາຫ, ຕຕ຺ຖ ‘ໂຍ’ຕິ ອິມສ຺ສ ‘ຕນ຺ນາມເຘຍ຺ເຍນາ’ຕິ ອິມິນາ ສມ຺ພນ຺ໂຘ, ເອຕາຍ ສຕ຺ຕາ ອິຊ຺ຌນ຺ຕິ ອິທ຺ຘາ ວຸທ຺ຘາ ອຸກ຺ກໍສຄຕາ ໂຫນ຺ຕີຕິ ອິທ຺ຘິ=ອິທ຺ຘິວິຘາທໂຍ ໂລກິຍາ ໂລກຸຕ຺ຕຣາ ຈ ສາ ເອເຕສມຕ຺ຖີຕິ ອິທ຺ຘິມນ຺ໂຕ, ເຕສຸ ອິທ຺ຘິມນ຺ເຕສຸ, ອິທ຺ຘິມນ຺ຕານໍ ມຫາສາວການໍ ມຊ຺ເຌຕິ ອຕ຺ໂຖ, ມຫຕ຺ຕປ຺ປຕ຺ໂຕຕິ ມຫຕ຺ຕໍ ມຫນ຺ຕຠາວໍ ຄໂຕ, ຕນ຺ນາມເຘຍ຺ເຍນາຕິ ຕສ຺ເສວ ນາມເຘຍ຺ຍມສ຺ສາຕິ ຕນ຺ນາມເຘຍ຺ໂຍ, ເຕນ, ຕໂປຘເນນາຕິ ມຸນິນາ, ກິໍ ວຸຕ຺ຕໍ ໂຫຕິ- ‘‘ເອຕທຄ຺ຄໍ ຠິກ຺ຂເວ ມມ ສາວການໍ ຠິກ຺ຂູນໍ ອິທ຺ຘິມນ຺ຕານໍ ຍທິທໍ ໂມຄ຺ຄລ຺ລາໂນ’’ຕິ ຠຄວຕາ ອິທ຺ຘິມນ຺ເຕສຸ ເອຕທຄ຺ເຄ ຐປິໂຕ ມຫາໂມຄ຺ຄລ຺ລານຕ຺ເຖໂຣ ນາມ ໂຍ ທຸຕິໂຍ ອຄ຺ຄສາວໂກ… (ເຕນ ສມານນາມເຘຍ຺ເຍນາຕິ) ຕມປທິສນ຺ໂຕ-ຍມາຈຣິໂຍ ອນຸທ຺ຘຕຠາເວນ ອຸຊຸນາກ຺ກເມນ ນາມາທິກມວຕ຺ວາ ວງ຺ກວຸຕ຺ຕິຍາ ອຕ຺ຕໂນ ໂມຄ຺ຄລ຺ລາໂນຕິ ນາມໍ ມຫາສາມິຏ຺ຐານນ຺ຕຣປ຺ປຕ຺ຕິໍ ກາໂລຈິຕປຎ຺ຎາ ເວຍ຺ຍຕ຺ຕິຍໍ ພຸທ຺ຘສາສໂນປກາຣິຕາທິຎ຺ຈ ວິຠາເວຕິ. ‘ຍໍ ຣຈິຕ’ນ຺ຕິ ສມ຺ພນ຺ໂຘ, ຣຈິຕນ຺ຕິ ກຕໍ, ກິນ຺ຕິ ອາຫ ສທ຺ທສຕ຺ຖ’ນ຺ຕິ, ສທ຺ທສຕ຺ຖໍ ນາມ ສຸຕ຺ຕ, ສທ຺ທລກ຺ຂຓພ຺ຍາກຣຓາທ຺ຍປຣນາມເຘຍ຺ຍໍ, ສຸຕ຺ຕໍ(ຫິ) ‘ສທ຺ທາ (ລກ຺ຂີຍນ຺ຕິ) ສາສີຍນ຺ຕິ ອນຸສາສີຍນ຺ຕິ ປກຕິປ຺ປຈ຺ຈຍາທິວິຠາຄກປ຺ປນາຍ ເອເຕນາ’ຕິ ສທ຺ທລກ຺ຂຓນ຺ຕິ ຈ ‘ພ຺ຍາກຣີຍນ຺ຕິ ສທ຺ທນິປ຺ຜາທນວເສນ ກຖີຍນ຺ຕິ ເອເຕນາ’ຕິ ພ຺ຍາກຣຓນ຺ຕິ ຈ ວຸຈ຺ຈຕິ, ອປຣມ຺ປນ ວຸຕ຺ຍາທິ ຕທຸປກຣຓຠາເວນ ສທ຺ທສຕ຺ຖໍ ສທ຺ທລກ຺ຂຓໍ ພ຺ຍາກຣຓນ຺ຕິ ຈ ວຸຈ຺ຈຕີຕິ ທຏ຺ຐພ຺ພໍ, ອນຸນນ຺ຕິ ຕພ຺ພິເສສນໍ, ອເສສລກ຺ຂິໂຍປສງ຺ຄາຫກຠາເວນ ວຕ຺ຕພ຺ພສ຺ສາປຣສ຺ສາຠາວາ ສມ຺ປຸຓ຺ຓນ຺ຕິ ອຕ຺ໂຖ, ອຖາຕິ ອນນ຺ຕຣຕ຺ເຖ ນິປາໂຕ, ສທ຺ທສຕ຺ຖຣຈນານນ຺ຕຣນ຺ຕິ ອຕ຺ໂຖ, ຕສ຺ເສຕິ ສທ຺ທສຕ຺ຖສ຺ສ, ວຸຕ຺ຕິ ຈ ສມາສາ ກຕາຕິ ສມ຺ພນ຺ໂຘ, ສຸຕ຺ຕໍ ວິວຣີຍຕິ ເອຕາຍາຕິ ວຸຕ຺ຕິ, ສມສ຺ສເຕ ສງ຺ຂິປີຍຕີຕິ ສມາສາ.

ຕສ຺ສາປີຕິ ວຸຕ຺ຕິຍາປິ, ສງ຺ຄເຫຕ຺ວາ ສທ຺ທວເສນ ສງ຺ກຸຈິຕໍ ວິຍ ກຕ຺ວາ ຂິປນໍ ສງ຺ເຂໂປ, ຕສ຺ສ ນໂຍ ກໂມ ສງ຺ເຂປນໂຍ, ເຕນ, ໂຠວາຕິ ໂຍ ສທ຺ທສຕ຺ຖສ຺ສ ວຸຕ຺ຕິຍາ ຈ ກຕ຺ຕາ ໂສ ເອວ, ອິທານິ ສຸຕ຺ຕວຸຕ຺ຕິຣຈນານນ຺ຕຣມວສຣປ຺ປຕ຺ເຕ ອິມສ຺ມິໍ ກາເລ, ສມາຣເຠຍ຺ຍ ສມ຺ມາ ອາຣມ຺ຠໍ ກເຣຍ຺ຍ ພຫຸນ຺ນໍ ກ຺ຣິຍາກ຺ຂຓານມາທິຠູຕໍ ກ຺ຣິຍາກ຺ຂຓມນຸຕິຏ຺ເຐຍ຺ຍ, ກິນ຺ຕິ ສໍວຓ຺ຓນໍ, ສໍວຓ຺ຓີຍຕິ ອຕ຺ໂຖ ເອຕາຍາຕິ ສໍວຓ຺ຓນາ, ປຎ຺ຈີຍຕິ ວິປຎ຺ຈີຍຕິ ພ຺ຍຕ຺ຕີ ກຣີຍຕິ ວຸຕ຺ຕິ ອຕ຺ໂຖ ເອຕາຍາຕິ ວາ, ຕໍ ປຎ຺ຈຍຕີຕິ ວາ ລທ຺ຘນາມປຎ຺ຈິກາ, ຕໍ.

ເອວມຕ຺ຕນາ ກຣຓີຍສຕ຺ຖມ຺ປຏິຊານິຕ຺ວາ ຕທນນ຺ຕຣໍ ‘‘ທ຺ເວ ເມ ຠິກ຺ຂເວ ປຈ຺ຈຍາ ສມ຺ມາທິຏ຺ຐິຍາ ອຸປ຺ປາທາຍ (ກຕເມ ທ຺ເວ) ປຣໂຕ ຈ ໂຆໂສ (ອຊ຺ຌຕ຺ຕຎ຺ຈ) ໂຍນິໂສ ມນສິກາໂຣ’’ຕິ ວຈນໂຕ ສມ຺ມາສວນປຏິພທ຺ຘາ ສພ຺ພາປິ ສາສນ (ປ຺ປຏິ) ສມ຺ປຕ຺ຕີຕິ ສາສນປ຺ປຏິປຕ຺ຕິຍາ ພ຺ຍາກຣຓສ຺ສ ມູລກາຣຓຕ຺ຕາ ຕໍ ສວເນ ສາຘຸຊເນ ນິໂຍເຊນ຺ໂຕ ‘ຕໍ ສາຣຠູຕ’ນ຺ຕິອາທິມາຫ, ຕຕ຺ຖ ຕນ຺ຕິ ຍສທ຺ທວິຣເຫປິ ອຘິກຕຕ຺ຕາ ສໍວຓ຺ຓນໍ ປຣາມສຕິ, ຕໍ ສຸຓນ຺ຕູ’ຕິ ສມ຺ພນ຺ໂຘ, ສາຘູຕິ ສວນກ຺ຣິຍາວິເສສນໍ, ອຕ຺ຖານຸຣູປໍ ພ຺ຍຎ຺ຊນໍ, ພ຺ຍຎ຺ຊນານຸຣູປຎ຺ຈ ອຕ຺ຖໍສລ຺ລກ຺ເຂຕ຺ວາ ອນຎ຺ຎມນາ ຫຸຕ຺ວາ ສກ຺ກຈ຺ຈໍ ສຸຓນ຺ຕູຕິ ອຕ຺ໂຖ ສຸວຓ຺ຓຠາຊເນ ນິກ຺ຂິຕ຺ຕສີຫວສາວິຍ ອວິນສ຺ສມານໍ ກຕ຺ວາ ຫທເຍ ຐປນວເສນ, ສກ຺ກຈ຺ຈສວນເມວ ຫິ ໂສຕູນມຕ຺ຖາວຫໍ ໂຫຕີຕິ, ສນ຺ໂຕຕິ ສວນກ຺ຣິຍາຍ ກຕ຺ຕາໂຣ ທສ຺ເສຕິ, ຕຖາ ສາຕິສຍພ຺ຍາກຣຓໍ… ຕຖາວິຘາ ເອວ ສປ຺ປຸຣິສາ ສາຘຸກໍ ໂສຕຸກາມາ ໂຫນ຺ຕີຕິ, ກິມ຺ຠູຕນ຺ຕິ ອາຫ ‘ສາຣຠູຕ’ນ຺ຕິອາທິ, ຠູຕສທ຺ໂທ ເອຕ຺ຖ ‘‘ຠູຕສ຺ມິໍ ປາຈິຕ຺ຕິຍ’ນ຺ຕິອາທີສຸ ວິຍ ວິຊ຺ຊມານຕ຺ໂຖ, ເຜຄ຺ຄຸຕ຺ຕາຠາເວນ ອປຣິຈ຺ຈຊນີຍຕາຍ ສາໂຣ ຖິຣໍ ໂສ ອຕ຺ໂຖ ພ຺ຍຎ຺ຊນຎ຺ຈ ອສ຺ສາ ອຕ຺ຖີຕິ ສາຣາ ຈ ສາ ຠູຕາຈ, ອຖ ວາ ໂລກິຍໂລກຸຕ຺ຕຣຄຸຓາຕິສຍສາຘເນກສາຘນຠາວໂຕ ເສຏ຺ຐຏ຺ເຐນ ສາຣຎ຺ຈ ສາ ຠູຕາຈາຕິ ສາຣຠູຕາ, ຕໍ ຄນ຺ໂຖ ເຍເວຕ຺ຖ ສງ຺ເຂປິໂຕ, ອຕ຺ໂຖ ປນ ນຍຄ຺ຄາຫິຕຕາຍປິ ສພ຺ພຖາ ທສ຺ສິໂຕເຍວາຕິ ວິປຸລໍ ອຕ຺ຖໍ ຄຓ຺ຫາຕີຕິ ວິປຸລຕ຺ຖຄາຫີ, ຕໍ, ວິຘີຍມານວຓ຺ຓນາກ຺ກມວິເສເສນ ພ຺ຍາກຸລສ຺ສ ວຓ຺ຓນາກ຺ກມສ຺ສ ນິຣສນໂຕ ນຕ຺ຖິ ອາກຸລໍ ກິຎ຺ຈິ ອສ຺ສາຕິ ອນາກຸລໍ, ຕໍ, ອິມິນາ ຈ ກຈ຺ຈາຍນວຸຕ຺ຕິວຓ຺ຓນາສຸ ນ ຕຖາຠາວໍ ທສ຺ເສຕິ.

ຕເທວມຘິກຕຕ຺ຕາເຍວາຍມາຈຣິໂຍ ຄນ຺ຖາຣມ຺ເຠ’ມຫາທໂຍ ໂຍ’ຕິອາທິເກ ປຏິປຊ຺ຊິຕ຺ວາ ທານິ ອຕ຺ຕນາ ວຓ຺ຓນີຍສ຺ສ ຄນ຺ຖສ຺ສາທິ ຠູຕໍ ວາກ຺ຍມນຘິກຕປຣິຫາຣມຸເຂເນໂວປນ຺ຍສ຺ຍ ພ຺ຍາຂ຺ຍາຕຸມາຫ- ‘ອິຘາ’ຕິອາທິ, ຕຕ຺ຖ ອິຘາຕິ ອິມສ຺ມິໍ ມາຄຘິກສທ຺ທລກ຺ຂຓວິຣຈນາຘິກາເຣ, ມາຄຘານໍ ສທ຺ທານໍ ອິທນ຺ຕິ ມາຄຘິກໍ, ມາຄຘິກໍ ສທ຺ທລກ຺ຂຓນ຺ຕິ ວິເສສນ ສມາໂສ, ວິຣຈຍິຕຸກາໂມຕິ ກຕ຺ຕຸກາໂມ, ຣຕິໍຊເນຕີຕິ ຣຕນໍ, ຣມຍຕີ [ຣ ຕຍຕີ (ໂປຕ຺ຖເກ)] ຕິ (ວາ) ຣຕນໍ ອນປ຺ປຈ຺ຈເຍນ, ອຖວາ ຍໍ ໂລເກ ຈິຕ຺ຕີກຕາທິກໍ ຣຕນນ຺ຕິ ວຸຈ຺ຈຕິ, ອິທມ຺ປິ ຕໍ ສທິສຕາຍ ຣຕນນ຺ຕິ ວຸຈ຺ຈຕິ, ຕຖາຈາຫຸ–

ຈິຕ຺ຕີກຕໍ ມຫຄ຺ຆຎ຺ຈ, ອຕຸລໍ ທຸລ຺ລຠທສ຺ສນໍ;

ອໂນມສຕ຺ຕປຣິໂຠຄໍ, ຣຕນໍ ເຕນ ວຸຈ຺ຈຕີຕິ.

ພຸທ຺ຘາທີນເມຕມຘິວຈນໍ, ຕໂຍ ອວຍວາ ອສ຺ສາຕິ ຕຍໍ, ສມຸທາໂຍ, ຣຕນານໍ ຕຍໍ ຣຕນຕ຺ຕຍໍ, ອວຍວວິນິມ຺ມຸຕ຺ຕສ຺ສ ປນ ສມຸທາຍສ຺ສ ອຠາວໂຕ ຕີຓິ ເອວ ຣຕນານິ ວຸຈ຺ຈນ຺ຕິ, ປຓມນໍ ປຓາໂມ, ຣຕນຕ຺ຕຍຄຸຓນິນ຺ນຕາ, ປຓມນ຺ຕິ ເອຕາຍາຕິ ວາ ປຓາໂມ, ປຓາມກ຺ຣິຍານິປ຺ຜາທິກາ ກຸສລເຈຕນາ, ຣຕນຕ຺ຕຍສ຺ສ ປຓາໂມຕິ ຉຏ຺ຐີສມາໂສ, ອຠິຘີຍຕິ ປຏິປາທີຍຕີຕ຺ຍຠິເຘຍ຺ໂຍ ສມຸທິເຕນ ສຕ຺ເຖນ ວຈນີຍຕ຺ໂຖ, ເຍນ ຈ ໂຍ ປຏິປາທີຍຕິ ໂສ ຕສ຺ສ ອຕ຺ໂຖ ໂຫຕີຕິ, ໂສ ຈ ປກຕິປ຺ປຈ຺ຈຍາທິວິຠາຄກປ຺ປນາຍ ສທ຺ທານໍ ສງ຺ຂຣຓໍ, ສທ຺ທສຕ຺ເຖນ ຫິ ສທ຺ທສງ຺ຂຣຓເມວ ປຏິປາທີຍຕິ, (ຣຕນຕ຺ຕຍປ຺ປຓາໂມ ຈ ອຠິເຘຍ຺ໂຍ ຈ) ຣຕນຕ຺ຕຍປ຺ປຓາມາຠິເຘຍ຺ຍນ຺ຕິ ຈຕ຺ຖສມາໂສ, ຕສ຺ສ ສນ຺ທສ຺ສນໍ ອຕ຺ໂຖ ຍສ຺ສາຕິ ອຎ຺ຎປທຕ຺ໂຖ, ກິນ຺ຕໍ ວາກ຺ຍໍ, ຕາ ວາຕິ ວາກ຺ຍາລງ຺ກາເຣ, ນນຸເຈວມຘິກຕຕ຺ເຕປິ ອຠິເຘຍ຺ຍມຕ຺ຕເມວທສ຺ເສຕພ຺ພໍ ສິຍາ ກິໍ ວາຈາປຓາເມນ, ກາຍມໂນມເຍນາປິ ປຸຎ຺ຎາຕິ ສຍປ຺ປຕ຺ຕິຍາ ອຠິສມີຫິຕຕ຺ຖສິທ຺ຘິ ໂຫເຕວາຕິ ໂຈທນໍ ມນສິ ນິຘາຍ ວຈີປຓາມສ຺ສ ປຣຕ຺ຖສນ຺ນິສ຺ສຍຕຎ຺ຈ ຕສ຺ເສວ ວິຠາເຄນ ປໂຍຊນຎ຺ຈ ທສ຺ເສຕຸມາຫ- ‘ຕຕ຺ຖ’ອິຈ຺ຈາທິ, ຄຸຓສທ຺ໂທ ເອຕ຺ຖ ‘‘ສຕຄຸຓາ ທກ຺ຂິຓາ ປາຏິກງ຺ຂາ’’ຕິອາທີສຸ ວິຍ ອານິສໍສຏ຺ໂຐ, ຄຸຓານມານິສໍສານໍ ອນຸກູລໍ ອນຸຄຸຓໍ, ເຫຕຸມນ຺ຕວິເສສນເມຕໍ, ປຘານຠາວໍ ນີຕໍ ປຓີຕໍ ອຕິອຸຕ຺ຕມນ຺ຕິ ອຕ຺ໂຖ, ອຕີສເຍນ ປຓີຕໍ ປຓີຕຕຣໍ, ຈິຕ຺ຕສ຺ສສນ຺ຕານໍ ປພນ຺ໂຘ ຈິຕ຺ຕສນ຺ຕານໍ, ປຓີຕຕຣຎ຺ຈ ຕໍ ຈິຕ຺ຕສນ຺ຕານຎ຺ຈ, ອນຸຄຸຓຎ຺ຈ ຕໍ ປຓີຕຕຣຈິຕ຺ຕສນ຺ຕານຎ຺ຈາຕິ ວິເສສນສມາໂສ, ຕປ຺ປຓາມກຣເຓນ ອນຸຄຸຓ…ເປ… ສນ຺ຕານໍ ເຍສນ຺ຕິ ອຎ຺ຎປທຕ຺ໂຖ, ເຕສໍ, ຍຖາ ເຕ ໂສຕາໂຣ ຣຕນຕ຺ຕຍສ຺ສ ປຓາມກຣເຓນ ປຸຎ຺ຎາຕິສຍປ຺ປຏິລາຠາ ອເນການິສໍສາຕິສຍປ຺ປຏິລາຠານຸກູລ ຈິຕ຺ຕສນ຺ຕານຕາຍ ປຘານຕຣຈິຕ຺ຕສນ຺ຕານາ ໂຫນ຺ຕິ, ຕຖາ ປວຕ຺ຕານນ຺ຕິ ອຘິປ຺ປາໂຍ, ອິທມ຺ປິ ອຘິຄຕາ…ເປ… ນ຺ຕຣາຘານນ຺ຕີເມສໍ ເຫຕຸຠາເວນ ຕິຏ຺ຐຕິ, ອຘິຄຕາ ປຕ຺ຕາ ອເນເກ ພຫູ ອານິສໍສວິເສສາ ອາຍຸ ວຓ຺ຓສຸຂພລປຏິຠານາທໂຍ ເຍສນ຺ຕິ ວິຄ຺ຄໂຫ, ວິໂສສິຕາ ສຸກ຺ຂາປິຕາ ອນ຺ຕຣາຍາ ຠຍາທໂຍ ອຊ຺ຌຕ຺ຕິກາ ພາຫິຍາ ວາ ເຍສໍ ຕຖາວິຘານໍ ໂສຕູນໍ, ເອເຕປິ ອຠິ,ເປ,ທ຺ຘຕ຺ຖນ຺ຕິ ອິຈ຺ຈສ຺ສ ເຫຕູ, ອຠິສມີຫິຕສ຺ສ ອນຸຏ຺ຐິຕສ຺ສ ກຕນິຏ຺ຐິຕສ຺ສ ຄນ຺ຖສ຺ສ ອວໂພໂຘເຍວ ຜລໍ, ຕສ຺ສ ສິຊ຺ຌນຕ຺ຖໍ, ກິນ຺ຕໍ ຣຕນຕ຺ຕຍປ຺ປຓາມສນ຺ທສ຺ສນໍ.

ສຈ຺ຈໍ ປຸນປິ ສຈ຺ຈນ຺ຕິ, ຠຸຊມຸກ຺ຂິປ຺ປ ວຸຈ຺ຈເຕ;

ສກຕ຺ໂຖ ນຕ຺ຖີ ນຕ຺ເຖວ,ປຣສ຺ສຕ຺ຖມກຸພ຺ພໂຕຕິ.

ວຈນໂຕ ປຣຕ຺ໂຖວ ສປ຺ປຸຣິເສຫິ ກຕ຺ຕພ຺ໂພ, ປຣຕ຺ເຖ ສມ຺ປາທິເຕ ປນ ສກຕ຺ໂຖ ສມ຺ປນ຺ໂນວ ນາມ ສິຍາຕິ ມນສິ ກຕ຺ວາ ອາຫ- ‘ເອຕເທວາ’ຕິອາທິ. ກາຍມໂນສມາຈຣເຓນ ສມ຺ປຊ຺ຊມານຎ຺ຈ ວຈີສມາຈຣເຓນ ສມ຺ປຊ຺ຊເຕວາຕິ ອເນເນວ ວາກ຺ເຍນ ວິຎ຺ຎາຍຕີຕິ ອວຄນ຺ຕພ຺ພໍ, ພຸທ຺ຘິ ປຸພ຺ພາ ຍສ຺ມິໍ ກຣເຓ ຕໍ ພຸທ຺ຘິ ປຸພ຺ພໍ, ຕໍ ສີເລນ ກໂຣນ຺ຕາ ພຸທ຺ຘິປຸພ຺ພກາຣິໂນ, ອຠິເຘຍ຺ຍສ຺ສ ອຘິຄໂມ ຊານນໍ ປຸພ຺ໂພ ຍສ຺ສ ໂສ ອຠິເຘຍ຺ຍາຘິຄມປຸພ຺ພໂກ, ອວຕາໂຣ ປວຕ຺ຕິ, ເອກເທສທສ຺ສເນ ‘‘ສມຸທ຺ໂທ ທິຏ຺ໂຐ’’ຕິ ວິຍ ເອກເທເສປິ ສມຸທາຍໂວຫາຣທສ຺ສນໂຕ ປຈ຺ຉິມ ປາເທນາຕິ ວຸຕ຺ຕໍ, ປຈ຺ຉິມປາທສ຺ເສກເທສຠູເຕນ ‘ສທ຺ທລກ຺ຂຓ’ມິຈ຺ຈເນນາຕິ ອຕ຺ໂຖ, ສາຘິຍໍ ສທ຺ທານໍ ສງ຺ຂຣຓໍ, ສາຘນໍ ພ຺ຍາກຣຓໍ, ຕໍ ລກ຺ຂຓໍ ສຠາໂວ ອສ຺ສາຕິ ສາຘິຍສາຘນລກ຺ຂໂຓ, ສາຘິຍສ຺ເສທໍ ສາຘນໍ, ສາຘນສ຺ສ ເຈທໍ ສາຘິຍນ຺ຕິ ເອວມສ຺ເສທມ຺ຠາວເຫຕຸສຠາໂວ ສມ຺ພນ຺ໂຘຕິ ວຸຕ຺ຕໍ ໂຫຕິ, ປໂຍຊນໍ ອຠິເຘຍ຺ຍສທ຺ໂທປທສ຺ສິຕໍ ສທ຺ທສງ຺ຂຣຓໍ, ຕຕ຺ຖ ສມ຺ພນ຺ຘສ຺ສນ຺ໂຕຄຘຕ຺ຕໍ… ສາຘິໂຍປທສ຺ສນມຸເຂນ ສາຘນສ຺ສາປິ ທສ຺ສິຕຕ຺ຕາ ນິສ຺ສໂຍປທສ຺ສນໂຕ, ອຸສ຺ສຸກ຺ກໍ ສມ຺ມາວາຍາມໍ, ພຸທ຺ຘຕ຺ຕໍ ສພ຺ພຎ຺ຎຸຕຎ຺ຎາຓໍ, ປູເຣຕ຺ວາຕິ–

ມນຸສ຺ສຕ຺ຕໍ ລິງ຺ຄສມ຺ປຕ຺ຕິ, ເຫຕຸ ສຕ຺ຖາຣທສ຺ສນໍ;

ປພ຺ພຊ຺ຊາ ຄຸຓສມ຺ປຕ຺ຕິ, ອຘິກາໂຣ ຈ ຉນ຺ທຕາ;

ອຏ຺ຐຘມ຺ມສໂມຘານາ, ອຠິນີຫາໂຣ ສມິຊ຺ຌຕີຕິ.

ວຸຕ຺ຕອຏ຺ຐຘມ຺ມສມນ຺ນາຄເຕນ ອຠິນີຫາເຣນ ສມນ຺ນາຄຕາ ຫຸຕ຺ວາ ຍຖາວຸຕ຺ເຕ ປາຣມິຕາທໂຍ ຘມ຺ເມ ປູເຣຕ຺ວາຕິ ອຕ຺ໂຖ, ອາຄຕາຕິ ສຕ຺ຕຕ຺ຕິໍສໂພຘິປກ຺ຂິຍຘມ຺ມານຸພ຺ຣູຫເນນ ອາຄຕາ, ອິຘາຕິ ອິມສ຺ມິໍ ໂລເກ, ອາຄຕາຕິ ປຕ຺ຕາ ອຸປ຺ປນ຺ນາ, ຕຖາຄໂຕຕິ ຍຖາ ສມ຺ປຕິ ຊາຕາ ເຕ ຠຄວນ຺ໂຕ ສຕ຺ຕປທວີຕິຫາເຣນ ຄຕາ, ຕຖາ ອຍມ຺ປິ ອຸຕ຺ຕຣາຠິມຸຂໍ ຄໂຕຕິ ອຕ຺ໂຖ, ມຸຫຸຕ຺ຕຊາໂຕວາຕິ ສມ຺ປຕິຊາໂຕ ເອວ, ຊາຕສມນນ຺ຕຣເມວາຕິ ວຸຕ຺ຕໍ ໂຫຕິ, ວິກ຺ກມີຕິ ອຄມາສິ, ສຕ຺ຕ ປທານິ ຄນ຺ຕ຺ວານ ທິສາ ວິໂລເກສີຕິ ອິທໍ ‘‘ຘມ຺ມຕາ ເອສາ ຠິກ຺ຂເວ ສມ຺ປຕິ ຊາໂຕ ໂພຘິສຕ຺ຕາ ສເມຫິ ປາເທຫິ ປຕິຏ຺ຐຫິຕ຺ວາ’’ຕິ ເອວ ມາທິກາຍ ປາຬິຍາ ສຕ຺ຕປທວີຕິຫາຣູປຣິຐິຕສ຺ສ ສພ຺ພທິສານຸວິໂລກນສ຺ສ ວຸຕ຺ຕຕ຺ຕາ ວຸຕ຺ຕໍ, ທິສາ ວິໂລເກສິ ສມນ຺ຕໂຕຕິ ອິທມ຺ປນ ‘ສເມຫິ ປາເທຫິ ຜຸສີ ວສຸນ຺ຘຣ’ນ຺ຕິ ເອຕສ຺ສ ອນນ຺ຕຣໍ ທຏ຺ຐພ຺ພໍ… ປາເທຫິ ວສຸນ຺ຘຣາຜຸສນານນ຺ຕຣເມວ ທສທິສາວໂລກິຕຕ຺ຕາ, ອຏ຺ຐງ຺ຄານິ ນາມ–

ວິສຏ຺ຐໍ ມຎ຺ຊຸ ວິຎ຺ເຎຍ຺ຍໍ, ສວນີຍາ-ວິສາຣິໂນ;

ພິນ຺ທຸ ຄມ຺ຠີຣນິນ຺ນາທິ,ຈ຺ເຈວມຏ຺ຐງ຺ຄິໂກ ສໂຣຕິ.

ວຸຕ຺ຕານິ ອຏ຺ຐງ຺ຄານິ, ຕຖາຄໂຕຕິ ອິມສ຺ເສວ ວິສຸໍ ອຕ຺ຖປຣິຍາຍໍ ທສ຺ເສຕຸໍ ‘ອຖວາ’ຕິອາທິມາຫ, ອຣິເຍນ ເສຕຸນາຕິ ສມຖວິປສ຺ສນາສງ຺ຂາເຕນ ອຸຕ຺ຕເມນ ມຄ຺ເຄນ, ເອວມາທິນາຕິອາທິສທ຺ເທນ ເຕສໍ ເຕສໍ ຘມ຺ມານໍ ສຠາວສຣສລກ຺ຂຓໍ ຕຖໍ ອາຄໂຕ ຍຖາວໂຕ ອຘິຄໂຕ’ເຍຄຕ຺ຍຕ຺ຖາ ເຕ ພຸທ຺ຘ຺ຍຕ຺ຖາ, ເຍ ພຸທ຺ຘ຺ຍາ ເຕ ຄຕ຺ຍຕ຺ຖາ’ຕິຕຖາຄໂຕຕິ ເອວມາທິໍ ສງ຺ຄຓ຺ຫາຕິ, ຕຕ຺ຖຕຕ຺ຖາຕິ ເຕສຸ ເຕສຸ ທີຆາຄມາທີສຸ, ຕຖາຄຕຠາໂວຕິ ຕຖາຄໂຕຕິ ຠວນໍ ນິປ຺ຜຕ຺ຕິ ນມສ຺ສນກິຣິຍາຠິສມ຺ພນ຺ຘາຕິ’ນມສ຺ສິຕ຺ວາ’ຕິ ເອຕ຺ຖ ນມສ຺ສນກິຣິຍາຍ ອຠິສມ຺ພນ຺ຘາ ອິມິນາ ຕຖາຄຕາທີນໍ ກມ຺ມຕ຺ຕໍ ວິຠາເວຕິ, ນມສ຺ສນກິຣິຍາວິເສສນຕ຺ຕາຕິ ‘ນມສ຺ສິຕ຺ວາ’ຕິ ນມສ຺ສນໍ ກຕ຺ວາຕິ ວຸຕ຺ຕໍ ນາມ ສິຍາຕິ ນມສ຺ສນນ຺ຕິ ວຸຕ຺ຕນມສ຺ສນກິຣິຍາຍ ວິເສສນຕ຺ຕາ, ໂພຘິຍາຕິ ໂພຘິວຸຈ຺ຈຕິ ຈຕູສຸ ມຄ຺ເຄສຸ ຎາຓໍ, ຕໍ ຠຄວາ ເອຕ຺ຖ ປຕ຺ໂຕຕິ (ໂພຘິ, ຕສ຺ສາ) ໂພຘິຣຸກ຺ຂສ຺ສາຕິ ອຕ຺ໂຖ, ມູເລຕິ ມູລສມີເປ ‘‘ຍາວ ມຊ຺ຌນ຺ຫິເກ ກາເລ ຉາຍາ ຜຣຕິ ນິວາເຕ ປຓ຺ຓານິ ປຕນ຺ຕິ ເອຕາວຕາ ຣຸກ຺ຂມູລໍ’’ຕິອາທີສຸ ວິຍ, ນນຸ ອຎ຺ເຎປິ ຂີຓາສວາ ‘ອຄ຺ຄມຄ຺ເຄເນ’ຈ຺ຈາທິນາ ວກ຺ຂມານ ນເຍນ ນິປ຺ຜນ຺ນາ ເອວາຕິ ອນຸໂຍຄໍ ມນສິກຕ຺ວາ ວຸຕ຺ຕໍ ‘ສເຫວ ວາສນາຍາ’ຕິ, ນ ຫິ ຠຄວນ຺ຕໍ ຐເປຕ຺ວາ ອຎ຺ເຎ ສຫ ວາສນາຍ ກິເລເສ ປຫາຕຸໍ ສກ຺ໂກນ຺ຕິ, ເອເຕນ ອຎ຺ເຎຫິ ອສາຘາຣຓໍ ຠຄວໂຕ ອຣຫຕ຺ຕນ຺ຕິ ທສ຺ເສຕິ, ເຕເນວ ອິທ຺ຘສທ຺ທສ຺ສ ອຕ຺ຖໍ ທສ຺ເສນ຺ໂຕ’ເຕປິ ຫິ’ຈ຺ຈາທິກໍ ວກ຺ຂຕິ, ກາປນາຍໍ ວາສນາ ນາມ ປຫີນກິເລສສ຺ສາປິ ອປ຺ປຫີນກິເລສສ຺ສ ປໂຍຄສທິສປໂຍຄເຫຕຸຠູໂຕ ກິເລສນິຫິໂຕ ສາມຕ຺ຖິຍວິເສໂສ’ອາຍສ຺ມໂຕ ປິລິນ຺ທວຈ຺ຉສ຺ສ ວສລສມຸທາຈາຣນິມິຕ຺ຕໍ ວິຍ’, ອຄ຺ຄມຄ຺ເຄນາຕິ ອຣຫຕ຺ຕມຄ຺ເຄນ, ສພ຺ພກິເລເສ ຣາຄາທິເກ, ອຣຫຕ຺ຕໍ ອຄ຺ຄຜລໍ, ສມ຺ມຸຕິ ອຸປປຕ຺ຕິເທວຠາວໂຕ ອຎ຺ເຎນ ວິສຸທ຺ຘິ ເທວຠາເວນາຕິນິປ຺ຜນ຺ນຕ຺ຕາ ອາຫ-‘ວິສຸທ຺ຘິເທວຠາເວນາ’ຕິ, ສກລກິເລສກາລຸສ຺ສິຍາປຄເມນ ວິສຸທ຺ຘິປ຺ປຕ຺ຕິຍາ ສພ຺ພຎ຺ຎຸຄຸຓາ ລງ຺ກາເຣນ ວິສຸທ຺ຘິເທວຠາເວນາຕິ ອຕ຺ໂຖ.

‘ອິຘ=ສໍສິທ຺ຘິຍໍ’ ອິທ຺ຘວນ຺ໂຕ ອິທ຺ຘາຕ຺ຕປ຺ປຈ຺ຈເຍນ, ‘ຄຸຓ=ອາມນ຺ຕເຓ’ ຠູວາທິເສໂສ, ຄຸຓີຍນ຺ຕິ ປຣິຈີຍນ຺ຕິ ເສຍ຺ຍຕ຺ຕິເກຫີຕິ ຄຸຓາ ກປ຺ປຈ຺ຈເຍນ, ເຕປີຕິ ສາວກປຈ຺ເຈກພຸທ຺ຘາປິ, ຫິ ສທ຺ໂທ ເຫຕຸມ຺ຫິ, ຍສ຺ມາ ອຄ຺ຄໍ…ເປ… ອນູນຄຸຓາ, ຕສ຺ມາຕິ ອຕ຺ໂຖ, ສພ຺ພຎ຺ຎຸຕາທີນນ຺ຕິອາທິກໍ ເຕສໍ ສພ຺ພຎ຺ຎຸພຸທ຺ເຘຫິ ອູນຄຸຓຕາຍ ເຫຕຸວຈນໍ, ເກຈິ ‘ສິທ຺ໂຘ ມິທ຺ຘຄຸໂຓ ອສ຺ສາຕິ ສິທ຺ຘມິທ຺ຘຄຸຓນ຺ຕິ ທຸຏ຺ຐມຕ຺ຖໍ ປຣິກປ຺ເປຕ຺ວາ ວາກ຺ຍມິທໍ ທູເສນ຺ຕິ, ເຕ ປນ ‘ມິທ຺ໂຘ ນາມ ໂກຈິ ຄຸໂຓ ນຕ຺ຖີ’ຕິ ຈ, ‘ຕຖາຄໂຕ ນາມ ມິທ຺ຘ ຄຸໂຓ ນ ໂຫຕີ’ຕິ ຈ, ‘ຕາທິໂສ ເຈ ສິຍາ ນ ຎາຓນິສ຺ສິຕປູຊາ ປກໂຕປໂຍຄິນີ ຠວຕີ’ຕິ ຈ ອຊານິຕ຺ວາ ວທຖ ຕຸມ຺ເຫຫິ ວຕ຺ວາ ອຸຍ຺ໂຍເຊຕພ຺ພາ, ມງ຺ຄລຕ຺ຖຎ຺ເຈຕ຺ຖາໂທ ສິທ຺ຘສທ຺ໂທປາທານໍ, ມງ຺ຄລາທີນິ ຫິ ສຕ຺ຖານ຺ຍພ຺ຍາຫຕປ຺ປສຣານິ ໂຫນ຺ຕ຺ຍາຍສ຺ມນ຺ຕພ຺ຍາຂ຺ຍາຕຸໂສຕຸການິ ຈ, ຘມ຺ມສງ຺ຆານມ຺ປີຕິ ອິມິນາ ອວຍເວນ ວິຄ຺ຄເຫປິ ສມຸທາຍສ຺ສ ສມາສຕ຺ຖຕ຺ຕາ ອຎ຺ຎປທຕ຺ຖສມາໂສຍໍ ຕຄ຺ຄຸຓສໍວິຎ຺ຎາໂຓຕິ ທີເປຕິ, ເຕນາຫ- ‘ອຎ຺ຎປທຕ຺ເຖ’ຈ຺ຈາທິ, ຄຸຓີຠູຕານມ຺ປີຕິ ອປ຺ປຘານຠູຕານມ຺ປິ ວິເສສນຠູຕານມ຺ປິ ອຎ຺ຎປທຕ຺ຖສ຺ສ ປຘານຕ຺ຕາ, ກິຣິຍາຕິສມ຺ພນ຺ໂຘ ວຄມ຺ຍເຕ ຘມ຺ມສງ຺ຆານໍ ຄຸຓີຠູຕານມ຺ປິ ຕທວິນາຠາວິຕ຺ເຕນ ນມສ຺ສນາຕິສມ຺ພນ຺ຘາ, ຕເທວ ສມຕ຺ເຖຕິ ‘ຕຖາຫ’ຈ຺ຈາທິນາ, ປຸຕ຺ເຕນ ສຫ ວຕ຺ຕມາໂນຕິ ຕຄ຺ຄຸຓສໍວິຎ຺ຎາຓອຎ຺ຎປທຕ຺ຖສມາສຕ຺ຕາ ຕຸລ຺ຍມຸຠິນ຺ນມ຺ປິ ອາຄມນນ຺ຕິ ປຸຕ຺ໂຕປິ ອາຄໂຕຕິ ປຕີຍເຕ, ຕຕ຺ຖາຕິ ນິທ຺ຘາຣເຓ ສຕ຺ຕຘີ, ອຕ຺ຕານນ຺ຕິ ຘມ຺ມໍ ທສ຺ເສຕິ, ຘາເຣນ຺ເຕຕິ ອຕ຺ຕນິ ຐເປນ຺ເຕ ປວຕ຺ເຕນ຺ເຕ ອຸປ຺ປາເທນ຺ເຕ, ຈຕ຺ຕາໂຣປິ ອປາຍາ ສາມຎ຺ຎວເສນ’ອປາເຍ’ຕິ ວຸຕ຺ຕາ, ກິເລສວຏ຺ຏ ກມ຺ມວຏ຺ຏ ວິປາກວຏ຺ຏວເສນ ຕໂຍ ວຏ຺ຏາ, ເຕສຸ ທຸກ຺ຂໍ, ຕສ຺ມິໍ, ຘາເຣຕີຕິ ວຸຕ຺ຕຘາຣຓໍ ນາມ ອຕ຺ຖໂຕ ອປາຍາທິນິພ຺ພຕ຺ຕກກິເລສວິທ຺ຘໍສນໍ, ຕຎ຺ຈ ຍຖາຣູປໍ ກິເລສສມຸຈ຺ຉິນ຺ທນຕປ຺ປຏິປ຺ປສ຺ສທ຺ຘິ ອາລມ຺ພນຠາເວນ ໂຫຕີຕິ ອາຫ- ‘ໂສ…ເປ… ວເສນາ’ຕິ, ນວນ຺ນມ຺ປິ, ເຕ ສມຘິຄມເຫຕຸຕາຍ ຘມ຺ໂມເຍວ ນາມາຕິ ‘ທສາ’ຕິອາທິ ວຸຕ຺ຕໍ, ຕຕ຺ຖ ກາຣຓມາຫ- ‘ຕມ຺ມູລກຕ຺ຕາ’ຕິອາທິ, ຕມ຺ມູລກຕ຺ຕາຕິ ຕໍ ກາຣຓຕ຺ຕາ, ສີລທິຏ຺ຐິສາມຎ຺ເຎນາຕິ ອຣິເຍນ ສີເລນ ອຣິຍາຍ ຈ ທິຏ຺ຐິຍາ ສມານຠາເວນ, ອຣິຍານຎ຺ຫິ ສີລທິຏ຺ຐິໂຍ ມຄ຺ເຄນາຄຕຕ຺ຕາ ສພ຺ພຖາ ສມານາວ, ເຕນ ເຕ ຍຕ຺ຖກຕ຺ຖຈິ ຐິຕາປິ ສຫຄຕາວາຕິ ສໍຫໂຕຕິ ອິມສ຺ມິໍ ອຕ຺ເຖ ສງ຺ໂຆຕິ ປທສິທ຺ຘິ ທຏ຺ຐພ຺ພາ, ອຘິປ຺ເປຕວເສນ ປເນຕໍ ວຸຕ຺ຕໍ, ໂລກິຍສີລທິຏ຺ຐິຍາ ສາມຎ຺ເຎນ ສໍຫຕຕ຺ຕາ ສມ຺ມຸຕິສງ຺ໂຆປິ ປຓາມາຣໂຫເຍວາຕິ ທຏ຺ຐພ຺ພໍ.

ອຖ ເກເຕ ສທ຺ທາ, ເຍສມິທໍ ລກ຺ຂຓໍ ຠາສິສ຺ສນ຺ຕິ ປຏິຎ຺ຎາຕນ຺ຕິ ອາຫ-‘ສທ຺ທາ ຆຏປຏາທໂຍ’ຕິ, ອາທິສທ຺ເທນ ຣຸກ຺ຂາທໂຍ, ນນຸ ສນ຺ຕິ ເມຆສທ຺ທສມຸທ຺ທສທ຺ທາທໂຍປີຕິ ນ ນິຣຕ຺ຖການມິຘານຸປໂຍຄິຕ຺ຕາ, ເຍ ໂລກສງ຺ເກຕານຸໂຣເຘນາຕ຺ຖປ຺ປກາສກາ ເຕສໍ ສາຕ຺ຖການເມ ວິທໍ ລກ຺ຂຓນ຺ຕິ, ອປິຈ ‘ສທ຺ທາ ຆຏປຏາທໂຍ’ຕິ ວທນ຺ໂຕ ເວທິການໍ ວິຍ ອຸນ຺ຕິ [ຎຕ຺ຖິ (ໂປຕ຺ຖເກ)] ອາທີນໍ ອນຸປຸພ຺ພີນິຍມາວຕ຺ຖານມສມ຺ຠວາ ຕທນຸກ຺ກເມນ ນິປ຺ຜາທິຍມານນມ຺ປິ ສທ຺ທານໍ ໂລກິຍຕ຺ຕານຠິວຕ຺ຕນຎ຺ຈ ໂພເຘຕີຕິ ທຏ຺ຐພ຺ພໍ, ນຸ ຕຕ຺ຖ ປກາສກຕ຺ຖໍ ສທ຺ທສ຺ສ ສມຸທາຍວເສນ ວາ ສິຍາ ປຈ຺ເຈກວຓ຺ຓວເສນ ວາ, ຕຕ຺ຖ ຍທິ ປຈ຺ເຈກວຓ຺ຓາ ປກາສເຍຍ຺ຍຸໍ, ຆຏສທ຺ເທ ຆກາໂຣເຍວ ຆຏຕ຺ຖໍ, ປກາສເຍຍ຺ຍ, ຕຖາ ຈາຎ຺ເຎສມກາຣາທີນມນຕ຺ຖ ກຕາ ສິຍາ, ອຖ ສມຸທິຕາ ປກາສເຍຍ຺ຍຸໍ, ຕທາ ວຓ຺ຓານມຸຈ຺ຈາຣຓານນ຺ຕຣວິນາສິຕ຺ຕາ ສມຸທາໂຍເຍວ ນ ສິຍາ, ຕຖາ ສຕິ ກຖ ມຕ຺ຖໍ ສທ຺ໂທ ປກາສຍຕີຕິ ເຈ ກເມນ ໂສຕຈິຕ຺ຕາທິຄຫິຕກ຺ຂຣ ປາຬິຍາ ຈ ໂຍ ສທ຺ໂທຕິ ວິຎ຺ເຎຍ຺ໂຍ ສາຕ຺ຖໂກ ຈິຕ຺ຕໂຄຈໂຣ, ຈິຕ຺ຕໂຄຈຣສ຺ສາປິ ສທ຺ທສ຺ສ ປນ ພາລຊນປ຺ປໂພຘາຍ ກປ຺ປນາມຕ຺ເຕນ ປກຕ຺ຍາທິວິຠາຄໂຕ, ນ ສຠາເວນານ຺ວາຂ຺ຍານໍ, ເຕນາຫ-‘ປກຕ຺ຍາ’ທິ ອາທິ, ນນຸ ໂຄອິຈ຺ຈາທິສາຘຸສທ຺ທນິຍເມ ສຕິ ໂຄຕາທໂຍ ອສາຘຸ ສທ຺ທາຕິ ວິຎ຺ຎາຍນ຺ຕິ ຄນ຺ຕພ຺ພມຄ຺ຄນິຍເມ ອຄນ຺ຕພ຺ພມຄ຺ໂຄ ວິຍ, ໂຄຕາທິ ອສາຘຸສທ຺ທນິຍເມ ວາ ໂຄອິຈ຺ຈາທໂຍ ສທ຺ທາ ສາຘໂວຕິ ອຄນ຺ຕພ຺ພມຄ຺ຄນິຍເມ ຄນ຺ຕພ຺ພມຄ຺ໂຄ ວິຍ, ກິໍ ສທ຺ທານມນ຺ວາຂ຺ຍາເນນາ ຕິທມາສງ຺ກິຍ ປໂຍຊນມາຫ- ‘ລກ຺ຂຓາຠິຘານໍເຈ’ຈ຺ຈາທິ, ສທ຺ທານມ຺ປຏິປຕ຺ຕິຍໍ ປຏິປທປາຐສ຺ສານູປາຍຕ຺ຕໍ ທສ຺ເສຕຸມາຫ- ‘ອຎ຺ຎເຖ’ຈ຺ຈາທິ, ອຎ຺ຎຖາຕິ ອສຕິ ລກ຺ຂຓາຠິຘາເນ, ສກ຺ກຕາທີຕິອາທິສທ຺ເທນ ປາກຕາທິໍ ສງ຺ຄຓ຺ຫາຕິ, ພຫຸວິຘຕ຺ຕໍ ສກ຺ກຕປາກຕເປສາຈິກອປພ຺ຠໍສວເສນ, ມຄເຘສຸ ວິທິຕາຕິ ອິມສ຺ມິໍ ອຕ຺ເຖ ‘‘ອຎ຺ຎສ຺ມິ’’ນ຺ຕິ (໔-໑໒໑) ມາຄຘານໍ ອິທນ຺ຕິ ອຕ຺ເຖ ‘‘ໂຓ’’ຕິ (໔-໓໔) ຓປ຺ປຈ຺ຈເຍ ມາຄຘາ ມາຄຘນ຺ຕິ ຈ ປທນິປ຺ຜຕ຺ຕິ ເວທິຕພ຺ພາຕິ ທສ຺ເສຕຸມາຫ- ‘ມຄເຘສ຺ມິ’ຈ຺ຈາທິ, ມຄເຘສຸ ວິທິຕາຕິອາທິໂນ ອຘິປ຺ປາຍໍ ວິວຣິຕຸມາຫ- ‘ອິທໍ ວຸຕ຺ຕໍ ໂຫຕີ’ຕິອາທິ, ຕຕ຺ຖ ອິທນ຺ຕິ ອິທານິ ວກ຺ຂມານໍ ມາຄຘໍ…ເປ… ໂຫຕີຕິ ເອຕໍ ວຸຕ຺ຕໍ ໂຫຕີຕິ ມຄເຘສຸ…ເປ… ລກ຺ຂຓໍ ມາຄຘນ຺ຕິ ວທຕາ ປກາສິຕໍ ໂຫຕີຕິ ອຕ຺ໂຖ, ຫິສທ຺ໂທ’ມຄເຘສ຺ວິ’ຈ຺ຈາທິນາ ວຸຕ຺ຕໍ ສມຕ຺ຖຍຕິ, ລກ຺ຂຓໍ ວິເສສຍຕາຕິ ສທ຺ທລກ຺ຂຓ ສທ຺ທສ຺ສ ອຸຕ຺ຕຣປທຕ຺ຖປ຺ປຘານຕ຺ຕາ ມາຄຘນ຺ຕິ ອິມິນາ ລກ຺ຂຓໍ ວິເສສຍຕາ ພ຺ຍວຈ຺ເຉທຍຕາ ວຸຕ຺ຕິກາເຣນ, ອຕ຺ຖໂຕຕິ ສາມຕ຺ຖິຍໂຕ, ສທ຺ເທ ຈ ວິເສສິໂຕ ໂຫຕີຕິ ສທ຺ທລກ຺ຂຓສທ຺ໂທ ມາຄເຘ ເອວ [ສທ຺ເທເອວ (ໂປຕ຺ຖເກ)] ພ຺ຍວຈ຺ເຉທິໂຕ ໂຫຕິ, ອຍເມຕ຺ຖາຘິປ຺ປາໂຍ ‘ມຄເຘສຸ ວິທິຕາ ມາຄຘາຕິ ສທ຺ເທ ຄເຫຕ຺ວາ ເຕສມິທໍ ມາຄຘນ຺ຕິ ມາຄຘສທ຺ເທນ ຍສ຺ມາ ສທ຺ທລກ຺ຂຓສທ຺ເທ ລກ຺ຂຓໍ ວິເສສິຕໍ, ຕສ຺ມາ ສທ຺ທລກ຺ຂຓສທ຺ເທ ສທ຺ໂທ ຍທິ ອມາຄໂຘ ກຖໍ ລກ຺ຂຓໍ ມາຄຘໍ ສິຍາຕິ ສາມຕ຺ຖິຍາ ສທ຺ໂທປິ ວິເສສິໂຕ ໂຫຕີ’ຕິ, ນນຸ ມາຄຘນ຺ຕິ ລກ຺ຂຓສ຺ສ ມາຄຘ ສທ຺ທສມ຺ພນ຺ຘິຕ຺ຕຌາປນໂຕ ສທ຺ທລກ຺ຂຓນ຺ຕິ ເອຕ຺ຖ ສທ຺ທສທ຺ທສ຺ສ ນິຣຕ຺ຖກ ຕາປຕ຺ຕິ ໂຫຕີຕິ, ນ ໂຫຕິ ຄມ຺ມມານຕ຺ຖສ຺ສ ສທ຺ທສ຺ສ ປໂຍຄມ຺ປຕິ ກາມຈາຣຕ຺ຕາ ສທ຺ທລກ຺ຂຓສທ຺ທສ຺ສ ວາ ສມາສຕ຺ເຖ ນິຣຸຬ຺ຫຕ຺ຕາ ‘‘ຕຕ຺ຣິທໍ ສຸຄຕສ຺ສ ສຸຄຕຈີວຣປ຺ປມາຓ’’ນ຺ຕິອາທີສຸ ວິຍ, ໂກປນາຕິອາທິສທ຺ທລກ຺ຂຓນ຺ຕິ ອິມິນາ ອຠິເຘຍ຺ຍສງ຺ຂາຕປໂຍຊນສ຺ສ ທສ຺ສິຕຕ຺ຕາ ຕປ຺ປໂຍຊນປຸຈ຺ຉນປຣາ ໂຈທນາ, ວຸຈ຺ຈເຕຈ຺ຈາທິ ປຣິຫາໂຣ, ຍຖາ ສພ຺ພຖາຕ຺ຕປຣຫິຕກາເມນ.

ປິໂຍ ຈ ຄຣຸ ຠາວນີໂຍ, ວຕ຺ຕາ ຈ ວຈນກ຺ຂໂມ;

ຄມ຺ຠີຣຎ຺ຈ ກຖໍ ກຕ຺ຕາ,ໂນຈາ ຐາເນ ນິໂຍຊໂກຕິ.

ວຸຕ຺ເຕຫິ ຕໂຕ ປເຣຫິ ຈ ປສຕ຺ຖຕເຣຫິ ຄຸຓວິເສເສຫິ ສມຸເປຕໍ ຄຸຣຸໍ.

ຕສ຺ມາ ອກ຺ຂຣໂກສລ຺ລໍ, ສມ຺ປາເທຍ຺ຍ ຫິຕຕ຺ຖິໂກ;

ອຸປຏ຺ຐຫໍ ຄຸຣຸໍ ສມ຺ມາ, ອຸຏ຺ຐານາທີຫິ ປຎ຺ຈຫີຕິ.

ວຈນໂຕ ອຸຏ຺ຐານ-ອຸປຏ຺ຐານ-ປຣິຈຣິຍາ-ສຸສ຺ສູສາ ສກ຺ກຈ຺ຈສິປ຺ປປຏິຄ຺ຄຫເຓຫິ ສມ຺ມາ ອຸປຏ຺ຐຫນ຺ເຕນ ສວນ,ອຸຄ຺ຄຫນ-ຘາຣຓ-ປຣິປຸຈ຺ຉາ-ຠາວນາ ຫິ ກງ຺ຂາວິຈ຺ເຉທໍ ກຕ຺ວາ ວິຎ຺ຎາຕພ຺ພໍ ສທ຺ທລກ຺ຂຓໍ, ຕຖາ ອວິຎ຺ຎາຕໍ ສທ຺ທລກ຺ຂຓມເນນາຕິ ອວິຎ຺ຎາຕສທ຺ທລກ຺ຂໂຓ ປຸຄ຺ຄໂລ, ຫິສທ຺ໂທ ອວຘາຣເຓ, ໂສ ‘ຘມ຺ມວິນເຍສຸ ກຸສໂລ ນ ໂຫຕີ’ຕິ ເອຕ຺ຖ ທຏ຺ຐພ຺ໂພ, ກຸສໂລ ທກ຺ໂຂ ນ ໂຫຕິ, ຕຕ຺ຖ ຘມ຺ມວິນເຍສຸ ສຸຕ຺ຕນ຺ຕາຕາຠິຘມ຺ມສງ຺ຂາເຕສຸ ຘມ຺ເມສຸ ເຈວ ວິນເຍ ຈ, ກສ຺ມາ–

ໂຍ ນິຣຸຕ຺ຕິໍ ນ ສິກ຺ເຂຍ຺ຍ, ສິກ຺ຂນ຺ໂຕ ປິຏກຕ຺ຕຍໍ;

ປເທປເທ ວິກງ຺ເຂຍ຺ຍ, ວເນ ອນ຺ຘຄໂຊ ຍຖາຕິ.

ວຈນໂຕ, ອຍເມຕ຺ຖາຘິປ຺ປາໂຍ ‘‘ຍຖາ ວຸຕ຺ຕນເຍນ ສມ຺ຠູຕປທ ພ຺ຍາໂມຫວເສນ ປທຕ຺ເຖປິ ພ຺ຍາໂມຫສມ຺ຠວໂຕ ສຸຕ຺ຕນ຺ໂຕປທສ຺ສິຕາຍ ທິຏ຺ຐິວິນິເວຏ຺ຐນາຍ ຈ ອຠິຘມ຺ມາຄເຕ ນາມຣູປປຣິຈ຺ເຉເທ ຈ ວິນຍ ນິທ຺ທິຏ຺ເຐ ສໍວຣາສໍວເຣ ຈ ອໂກສລ຺ລໍ ສິຍາ’’ຕິ, ຍຖາຘມ຺ມນ຺ຕິ ຘມ຺ມວິນຍ ສທ຺ທສ຺ສ ໂຍ-ຕ຺ໂຖ ວິນຍສຸຕ຺ຕາຠິຘມ຺ມສງ຺ຂາໂຕ, ຕສ຺ສ ໂສ-ຕ຺ໂຖ, ຕທນຕິກ຺ກເມນ, ປຏິປຊ຺ຊິຕຸມສກ຺ໂກນ຺ໂຕຕິ ຕຕ຺ຖຕຕ຺ເຖວ ວຸຕ຺ຕາສຸ ອຘິສີລ ອຘິຈິຕ຺ຕ ອຘິປຎ຺ຎາສິກ຺ຂາສຸ ປວຕ຺ຕິຕຸໍ ອສມຕ຺ໂຖ, ກຸສໂລ ປນ ສມຕ຺ໂຖ ປຎ຺ຎາວິເສສາໂລກປຏິລາຠໂຕ, ວຸຕ຺ຕໍ ຫິ–

ຍາວ ຕິຏ຺ຐນ຺ຕິ ສຸຕ຺ຕນ຺ຕາ, ວິນໂຍ ຍາວ ທິປ຺ປຕິ;

ຕາວ ທກ຺ຂນ຺ຕິ ອາໂລກໍ, ສູຣິເຍ ອພ຺ຠຸຄ຺ຄເຕ ຍຖາຕິ.

ປຏິປຕ຺ຕິນ຺ຕິ ປຏິປຊ຺ຊີຍຕີຕິ ປຏິປຕ຺ຕີຕິ ຍຖາວຸຕ຺ຕໍ ຕິວິຘມ຺ປິ ປຏິປຕ຺ຕິໍ, ວິຣາເຘຕ຺ວາຕິ ນາເສຕ຺ວາ, ນສ຺ສຕິ ຫິ ປຏິປຕ຺ຕິ ເຕສຸເຍວາ ໂກ ສລ຺ລຕມຄຕຕ຺ຕາ, ຕຖາ ຈາຫຸ–

ສຸຕ຺ຕນ຺ເຕສຸ ອສນ຺ເຕສຸ, ປມຸຏ຺ເຐ ວິນຍມ຺ຫິ ຈ;

ຕໂມ ຠວິສ຺ສຕິ ໂລເກ, ສູຣິເຍ ອຕ຺ຖງ຺ຄເຕ ຍຖາຕິ.

ສໍສາຣທຸກ຺ຂສ຺ເສວ ຠາຄີ ໂຫຕິ… ຍຖາວຸຕ຺ຕາ-ນຸກ຺ກມປຣິຈ຺ຈາເຄນ ອນຸຣູປປຏິປຕ຺ຕິຍາ ປຏິລຠິຕພ຺ພຕ຺ຕາ ອຘິຄມວິສຍສ຺ສ [ວິສຖຕ຺ຕາ (ໂປຕ຺ຖເກ)] ໂຍ ຄກ຺ເຂມສ຺ສ, ວຸຕ຺ຕຎ຺ຫິ ຕສ຺ສານຸໂລມປຏິປຕ຺ຕິມູລກຕ຺ຕໍ–

ສຸຕ຺ຕນ຺ເຕ ຣກ຺ຂິເຕ ສນ຺ເຕ, ປຏິປຕ຺ຕິ ໂຫຕິ ຣກ຺ຂິຕາ;

ປຏິປຕ຺ຕິຍໍ ຐິໂຕ ຘີໂຣ, ໂຍຄກ຺ເຂມາ ນ ຘໍສຕີຕິ.

ເອຕາວຕາ ອວິຎ຺ຎາຕສທ຺ທລກ຺ຂຓສ຺ສ ສກຕ຺ຖປຣິຫານິໍ ທສ຺ເສຕ຺ວາ ອິທານິ ສກຕ຺ຖສມ຺ປຕ຺ຕິມູລິກາ ປຣຕ຺ຖສມ຺ປຕ຺ຕີຕິ ຕທຠາວາ ຕາທິໂສ ປຸຄ຺ຄໂລ ປເຣສມ຺ປິ ປຈ຺ຈໂຍ ຠວິຕຸໍ ນ ສກ຺ໂກຕີຕິ ທສ຺ເສຕຸໍ ‘ນຈາ’ຕິອາທິ ວຸຕ຺ຕໍ, ປຕິຏ຺ຐາຕິ ຘາຣຓໍ, ຕຎ຺ເຈຕ຺ຖ ເຕສໍ ເຕສໍ ກຸລ ປຸຕ຺ຕານໍ ຘມ຺ມວິນຍສິກ຺ຂາປນໍ ຕໍຕໍ ກມ຺ມໂຕ ນິຕ຺ຖຣຓາທິ ຈ, ຕທຸຠຍ ເມວາ-ນ຺ຫສງ຺ຄິກໍ ປຕິຏ຺ຐໍ, ມຸຂ຺ຍຠູຕມ຺ປນ ຕມ຺ມູລເກ ສຸປຣິສຸທ຺ຘສີເລ ປຕິຏ຺ຐາປນເມວ, ຕທຸປກຣຓຕ຺ໂຖ ສິກ຺ຂາປນາທິ, ອິຘ ປນ ຕໍ ສາຘນຠູໂຕ ປຸຄ຺ຄໂລ ອຸປຈາຣໂຕ ປຕິຏ຺ຐາຕິ ຄເຫຕພ຺ໂພ, ຫິສທ຺ໂທ ຍຖາວຸຕ຺ຕ ສມຕ຺ຖນຕ຺ເຖ ນິປາໂຕ, ສທ຺ທລກ຺ຂຓຎ຺ຎູເຍວາຕິ ອວຘາຣຓມ຺ປນ ເຕສຸ ຕພ຺ພິທູເຍວ ສມຕ຺ໂຖຕິ ທສ຺ສນຕ຺ຖໍ ປກຣຓວເສນ ວຸຕ຺ຕໍ, ອຕ຺ຕໂນ ປນ ສຸຄຸຕ຺ຕສີລກ຺ຂນ຺ຘວິຣເຫນ ກທາຈິ ໂກຈິ ຍຖາວຸຕ຺ຕານໍ ປຕິຏ຺ຐາຠວິຕຸໍ ນ ສກ຺ໂກຕິ… ຕມ຺ມູລກຕ຺ຕາ ສທ຺ຘມ຺ມຏ຺ຐິຕິຍາ ສປຣປຕິຏ຺ຐາ ຠາວສ຺ສ ຈ, ເຕເນວ ວິນຍຘເຣ ອານິສໍສໍ ທສ຺ເສນ຺ເຕນ ຠຄວຕາ ຕປ຺ປຘານໍ ຕປ຺ປມຸຂໍວ ກຕ຺ວາ ‘‘ປຎ຺ຈິເມ ຠິກ຺ຂເວ ອານິສໍສາ ວິນຍຘຣ ປຸຄ຺ຄເລ, ກຕເມ ປຎ຺ຈ ອຕ຺ຕໂນ ສີລກ຺ຂນ຺ໂຘ ສຸຄຸຕ຺ໂຕ ໂຫຕິ ສຸ ຣກ຺ຂິໂຕ, ກຸກ຺ກຸຈ຺ຈປກຕານໍ ປຏິສຣຓໍ ໂຫຕິ, ວິສາຣໂທ ສງ຺ຆ ມຊ຺ເຌ ວິຫຣຕິ, ປຈ຺ຈຕ຺ຕ຺ຖິເກ ສຫຘມ຺ເມນ ສຸນິຄ຺ຄຫິຕໍ ນິຄ຺ຄຓ຺ຫາຕິ, ສທ຺ຘມ຺ມຏ຺ຐິຕິຍາ ປຏິປນ຺ໂນ ຈ ໂຫຕີ’’ຕິ ວຸຕ຺ຕໍ, ອຕ຺ຖານຸຣູປນ຺ຕິ ອຕ຺ຕໂນ ວຈນີຍສ຺ສຕ຺ຖສ຺ສ ວາຈກຕ຺ເຕນ ໂຍຄ຺ຍໍ, ພ຺ຍຎ຺ຊນານຸຣູປນ຺ຕິ ອຕ຺ຕໂນ ວາຈກສ຺ສ ວຈນີຍຕ຺ເຕນ ໂຍຄ຺ຍໍ, ປຣິວາສາທີສູຕິອາທິສທ຺ເທນ ອພ຺ຠານາທິໍ ສງ຺ຄຓ຺ຫາຕິ, ຕໍຕໍກມ຺ມນ຺ຕິ ປຣິວາສາທິກໍ ຕໍຕໍກມ຺ມໍ, ອຎ຺ໂຎຕິ ອສທ຺ທລກ຺ຂຓຎ຺ຎູ, ນ ເກວລມເນນ ສກຕ຺ຖປຣຕ຺ຖາວ ນາສິຕາ, ອຖ ໂຂຕິ ວິໂຘ ສທ຺ຘມ຺ໂມປິ ນາສິໂຕເຍວາຕິ ວຕ຺ຖຸມາຫ ‘ອຊານນ຺ໂຕ ປນາ’ຕິອາທິ, ອຍຖາປຏິປຊ຺ຊມາໂນຕິ ສທ຺ທລກ຺ຂຓຎ຺ຎຸນາ ຍຖາ ເຍນ ປກາເຣນ ອຕ຺ຖານຸຣູປໍ ພ຺ຍຎ຺ຊເນ ພ຺ຍຎ຺ຊນານຸຣູປຎ຺ຈ ອຕ຺ເຖ ປຏິປຊ຺ຊິຕພ຺ພໍ, ຕຖາ ອປ຺ປຏິປຊ຺ຊມາໂນ, ຕຖາ ຈ ວກ຺ຂຕິ– ຕຖາ ຫິ ໂສ ສທ຺ທລກ຺ຂຓ ມຊານນ຺ໂຕ’ຕິອາທິ. ຕິວິຘມ຺ປິ ສທ຺ຘມ຺ມນ຺ຕິ ປຣິຍຕ຺ຕິປຏິປຕ຺ຕິອຘິຄມວເສນຕິ ວິຘເມວ ສທ຺ຘມ຺ມໍ, ຕຕ຺ຖ ຕິປິຏກພຸທ຺ຘວຈນໍ ປຣິຍຕ຺ຕິສທ຺ຘມ຺ໂມ ນາມ, ເຕຣສ ຘຸຕຄຸຓາ ຈຸທ຺ທສ ຂນ຺ຘກວຕ຺ຕານິ ທ຺ເວ ອສີຕິ ມຫາວຕ຺ຕານີຕິ ອຍໍ ປຏິປຕ຺ຕິສທ຺ຘມ຺ໂມ ນາມ, ຈຕ຺ຕາໂຣ ມຄ຺ຄາ ຈຕ຺ຕາຣິ ຈ ຜລານິ ອຍໍ ອຘິຄມສທ຺ຘມ຺ໂມ ນາມ, ຕຖາຫິຈ຺ຈາທິນາ ວຸຕ຺ຕມຕ຺ຖໍ ສມຕ຺ເຖຕິ, ຕມ຺ປິ ປາຬິຍາ ຖິຣີກາຕຸໍ ‘ວຸຕ຺ຕໍ ເຫຕ’ນ຺ຕິອາທິມາຫ, ຕຕ຺ຖ ຘມ຺ມາຕິ ເຫຕູ, ສທ຺ຘມ຺ມສ຺ສາຕິ ຍຖາວຸຕ຺ຕສ຺ສ ຕິວິຘສ຺ສ ສທ຺ຘມ຺ມສ຺ສ, ປທພ຺ຍຎ຺ຊນນ຺ຕິ ປທຎ຺ຈ ພ຺ຍຎ຺ຊນຎ຺ຈ ຕໍ, ຕຕ຺ຖ ປທໍ ນາມ ສ຺ຍາທ຺ຍນ຺ຕໍ ຕ຺ຍາທ຺ຍນ຺ຕຎ຺ຈ, ພ຺ຍຎ຺ຊີຍຕິ ອຕ຺ໂຖ ເອເຕນາຕິ ພ຺ຍຎ຺ຊນໍ-ວາກ຺ຍໍ ອຖວາ ປຊ຺ຊເຕ ຄມ຺ຍເຕ ອຕ຺ໂຖ ເອເຕນາຕິ ປທໍ-ສ຺ຍາທ຺ຍນ຺ຕາທິ, ວາກ຺ຍໍວ ພ຺ຍຎ຺ຊນໍ, ສິຖິລຘນິຕາທິປທເມວວາ ວຸຕ຺ຕນເຍນ ພ຺ຍຎ຺ຊນນ຺ຕິ ປທພ຺ຍຎ຺ຊນໍ, ຕໍ, ທຸນ຺ນິກ຺ຂິຕ຺ຕໍ ທຸຏ຺ຐຸ ນິກ຺ຂິຕ຺ຕໍ ຐປິຕໍ ວິຣາເຘຕ຺ວາ ກຖິຕໍ, ອຕ຺ໂຖ ຈ ທຸນ຺ນີໂຕຕິ ທຸນ຺ນິກ຺ຂິຕ຺ຕຕ຺ຕາເຍວ ປທພ຺ຍຎ຺ຊນສ຺ສ ຕພ຺ພຈນີໂຍປິ ທຸຏ຺ຐຸວິຎ຺ຎາໂຕ ໂຫຕິ, ວຸຕ຺ຕປຏິປກ຺ຂໂຕຕິ ‘ອວິຎ຺ຎາຕສທ຺ທລກ຺ຂໂຓຫິ’ຈ຺ຈາທິນາ ວຸຕ຺ຕສ຺ສ ວິຎ຺ຎາຕສທ຺ທລກ຺ຂຓຕ຺ຕາທິນາ ປຏິປກ຺ຂຠາວໂຕ, ຠາວປ຺ປຘາໂນ ຫິ ອຍໍ ນິທ຺ເທໂສ,ຕ຺ຕປ຺ປຈ຺ຈຍໂລໂປ ວາ, ນ ຫິ ອຕ຺ຕາວ ອຕ຺ຕນາ ເວທິຕພ຺ໂພຕິ ຍຸຕ຺ຕນ຺ຕິ.

ຕເທວນ຺ຕິອາທິນາ ຍຖາວຸຕ຺ຕໍ ນິຄເມຕ຺ວາ ສຎ຺ຎາວິຘາເນ ປໂຍຊນໍ ທສ຺ເສຕິ, ຕນ຺ຕິ ເຫຕ຺ວຕ຺ເຖ ນິປາໂຕ, ຍສ຺ມາ ສທ຺ທລກ຺ຂຓສ຺ສ ຊານນໍສານິ ສໍສໍ ຕສ຺ມາຕິ ອຕ຺ໂຖ, ເອວນ຺ຕິ ນິທສ຺ສນຕ຺ເຖ ນິປາໂຕ, ເອວໍ ສປ຺ປໂຍຊນນ຺ຕິ ສມ຺ພນ຺ໂຘ, ຕເທວນ຺ຕິ ວາ ນິປາຕສມຸທາໂຍ ຍໍ, ວຸຕ຺ເຕນ ປກາເຣເນຕ຺ຍສ຺ມິໍ ອຕ຺ເຖ ວຕ຺ຕເຕ. ນນຸຈ ສຎ຺ຎີນໍ ສຎ຺ຎານໍ ວຕ຺ຕພ຺ພຕ຺ເຕ ‘‘ອອາທໂຍ ຕິຕາລີສວຓ຺ຓາ’’ຕິອາທີນໍ ວາກ຺ຍານໍ ວິສຸໍວິສຸໍ ມຫນ຺ຕຕ຺ຕາ ກຸໂຕ ລາຆວໍ ສຕ຺ຖສ຺ສາຕິ ມຎ຺ຎມາໂນ ‘ຕຖາຫິ’ຈ຺ຈາທິນາ ສຎ຺ຎາວິຘາເນ ລາຆວສພ຺ຠາວໍ ສມຕ຺ເຖຕິ, ໂຫເຕວາຕິ ອວຘາຣເຓນ ກຕ຺ຖຈິ ປຣສຕ຺ເຖ ວິຍ ໂນ ນ ໂຫຕີຕິ ທສ຺ເສຕິ, ປຏິປຕ຺ຕິລາຆວມ຺ປິ ເຈຕ຺ຖ ໂຫເຕວ, ຕຖາຫິ ‘‘ວຓ຺ຓປເຣນ ສວຓ຺ໂຓປິ’’ຈ຺ຈາໂທ (໑-໒໔) ວຓ຺ຓາທິສຎ຺ຎາສມຸທ຺ຘຣິຕາ ນາຕ຺ຕານມຕ຺ຕາວຄເມຕຸມລນ຺ຕິ ປເຣ ປຸຈ຺ຉິຕ຺ວາ ຊານິຕພ຺ພາ ອສ຺ສ, ຕໂຕ ສຎ຺ຎາ-ວເສຍາ, ຕໂຕສ຺ສ ສຎ຺ຎາຕິ ສຎ຺ຎາສຎ຺ຎີວິເວຈນໍ ຕທນຸຏ຺ຐານນ຺ຕິ ປຣມ຺ປຣາເປກ຺ຂາຍ ຠວິຕພ຺ພໍ ປຏິປຕ຺ຕິ ຄາຣວາຠາວາ. ອິທານິ ສງ຺ເຂປໂຕ ສຕ຺ຖກ຺ກມໍ ທສ຺ເສຕຸມາຫ-ເອວໍ ຕາວິ’ຈ຺ຈາທິ, ຕາວາຕິ ປຐມໍ, ອຸປຍຸຊ຺ຊມານຕ຺ຕາຕິ ພ຺ຍາປາຣິຍມານຕ຺ຕາ, ວິສໂຍ ໂຄຈໂຣ ຍຕ຺ເຖເຕ ສ຺ຍາທໂຍ ວິຘີ ຍນ຺ເຕ, ສຫ ວິສເຍນາຕິ ສວິສຍາ, ປຐມໍ ກຣີຍຕີຕິ ປກຕິ ຍໂຕ ສ຺ຍາທໂຍ ວິຘີຍນ຺ເຕ, ສຫ ປກຕິຍາຕິ ສປ຺ປກຕິກາ, ລິງ຺ຄາທິກນ຺ຕິ ອາທິສທ຺ເທນ‘ສລຠຈ຺ຉາຍ’ມິຈ຺ຈາໂທ ເອກຕ຺ຕາທິ, ລິງ຺ເຄຠວາ ລິງ຺ຄິກາ-ອິຕ຺ຖິວິຘໂຍ, ເອກຕ຺ຖີຠາໂວ ສມາໂສ, ເຕນ, ສາມຎ຺ຎໂຕ ສມານຕ຺ຕາ, ສມານຕ຺ຕນ຺ຕຸຓາທິວຸຕ຺ຕິຍາ ‘‘ຣາຊາທິວິສິຏ຺ເຐ ປຸຣິສາ ໂທວິຍ’ວສິຏ຺ຐາທິວິສິຏ຺ເຐ ອປຈ຺ຈາທິມ຺ຫິ ອຕ຺ເຖ ປວຕ຺ຕນໂຕ.

ອິຕິ ໂມຄ຺ຄລ຺ລານປຎ຺ຈິກາຏີກາຍໍ ສາຣຕ຺ຖວິລາສິນິຍໍ

ຣຕນຕ຺ຕຍປຓາມາທິກຖາ ສມຕ຺ຕາ.