໕. ປຎ຺ຈໂມ ກຓ຺ໂຑ (ຂາທິ)
໑. ຕິຊ ມາເນຫິ ຂ ສາ ຂມາ ວີມໍສາສຸ.
ຂນ຺ຕິຍໍ ຕິຊາ ວີມໍສາຍໍ ມານາ ຈ ຂສປ຺ປຈ຺ຈຍາ ໂຫນ຺ຕິ ຍຖາກ຺ກມໍ, ຕິຕິກ຺ຂາ, ວີມໍສາ, ຕິຕິກ຺ຂຕິ, ວີມໍສຕິ. ຂມາວີມໍສາ, ສູຕິ ກິໍ? ເຕຊນໍ, ເຕໂຊ, ເຕຊຍຕິ, ມານນໍ, ມາໂນມາເນຕິ.
໒. ກິຕາ ຕິກິຈ຺ຉາສໍສເຍສຸ ໂຉ.
ຕິກິຈ຺ຉາຍໍ ສໍສເຍ ຈ ວຕ຺ຕມານາ ກິຕາ ໂຉ ໂຫຕິ. ຕິກິຈ຺ຉາ, ວິຈິກິຈ຺ຉາ, ຕິກິຈ຺ຉຕິ, ວິຈິກິຈ຺ຉຕິ. ອຎ຺ຎຕ຺ຣ ນິເກໂຕ, ສໍເກໂຕ, ເກຕນໍ, ເກໂຕ, ເກຕຍຕິ.
໓. ນິນ຺ທາຍໍ ຄຸປ ພຘາ ພສ຺ສ ໂຠ ຈ.
ນິນ຺ທາຍໍ ວຕ຺ຕມາເນຫິ ຄຸປ ພເຘຫິ ໂຉ ໂຫຕິ ພສ຺ສ ໂຠ ຈ. ຊິຄຸຈ຺ຉາ, ພີຠຈ຺ຉາ, ຊິຄຸຈ຺ຉຕິ, ພີຠຈ຺ຉຕິ, ອຎ຺ຎຕ຺ຣ ໂຄປນໍ, ໂຄໂປ, ໂຄເປຕິ, ພຘໂກ.
໔. ຕຸໍສ຺ມາ ໂລໂປ ຈິຈ຺ຉາຍໍ ເຕ.
ຕຸມນ຺ຕໂຕ ອິຈ຺ຉາຍມຕ຺ເຖ ເຕ ຂສຉາ ໂຫນ຺ຕິ ພຫຸລໍ, ໂລໂປ ຈ ຕຸໍປຈ຺ຈຍສ຺ສ ໂຫຕິ ສຸຕຕ຺ຕາ, ພຸຠຸກ຺ຂາ, ຊິຄີສາໍ, ຊິຆຈ຺ຉາ, ພຸຠຸກ຺ຂຕິ, ຊິຄີສຕິ ຊິຆຈ຺ຉຕິ. ອິຘ ກສ຺ມາ ນ ໂຫຕິ ‘ໂຠຕ຺ຕຸມິຈ຺ຉຕີ’ຕິ? ປທນ຺ຕເຣນາຠິຘານາ. ຕຸໍສ຺ມາຕິ ກິໍ? ໂຠຊນມິຈ຺ຉຕິ. ອິຈ຺ຉາຍນ຺ຕິ ກິໍ? ຠຸຎ຺ຊິຕຸໍ ຄຈ຺ຉຕິ. ກຖໍ ‘ກູລໍ ວິປຕິ ສຕີ’ຕິ? ຍຖາ ກູລໍ ປຕິຕຸ ມິຈ຺ຉຕີຕິ ວາກ຺ຍໍ ໂຫຕິ, ເອວໍ ວຸຕ຺ຕິປິ ໂຫສ຺ສຕິ. ວາກ຺ຍເມວ ຈຣຫິ ກຖໍ ໂຫຕິ? ໂລກສ຺ສ ຕຖາ ວຈນິຈ຺ຉາຍ.
໕. ອີໂຍ ກມ຺ມາ.
ອິຈ຺ຉາກມ຺ມໂຕ ອິຈ຺ຉາຍມຕ຺ເຖ ອີຍປ຺ປຈ຺ຈໂຍ ໂຫຕິ. ປຸຕ຺ຕມິຈ຺ຉຕິ ປຸຕ຺ຖີຍຕິ. ກມ຺ມາຕິ ກິໍ? ອສິເນຈ຺ຉຕິ. ອິຘ ກສ຺ມາ ນ ໂຫຕິ ‘ຣຎ຺ໂຎປຸຕ຺ຕມິຈ຺ຉຕີ’ຕິ? ສາເປກ຺ຂຕ຺ຕາ, ນ ຫິ ອຎ຺ຎມເປກ຺ຂມາໂນ ອຎ຺ເຎນ ສເຫກຕ຺ຖິຠາວມນຸຠວິຕຸໍ ສກ຺ໂກຕິ. ອິຘາປິ ຈຣຫິ ນ ສິຍາ ‘ອຕ຺ຕໂນ ປຸຕ຺ຕ ມິຈ຺ຉຕີ’ຕິ? ເນເວຕ຺ຖ ຠວິຕພ຺ພໍ, ນ ຫິ ຠວຕິ ‘ອຕ຺ຕໂນ ປຸຕ຺ຕີຍຕີ’ຕິ, ກຖໍ ຈຣຫິ ປຸຕ຺ຕສ຺ສ ອຕ຺ຕນິຍຕາ-ວຄມ຺ຍເຕ? ອຎ຺ຎສ຺ສາສຸຕຕ຺ຕາ ອິຈ຺ຉາຍ ຈ ຕພ຺ພິສຍຕ຺ຕາ.
໖. ອຸປມານາຈາເຣ.
ກມ຺ມໂຕ ອຸປມານາ ອາຈາຣຕ຺ເຖ ອີໂຍ ໂຫຕິ. ປຸຕ຺ຕມິ-ວາ-ຈຣຕິ ປຸຕ຺ຕີຍຕິ ມາຓວກໍ, ອຸປມານາຕິ ກິໍ? ປຸຕ຺ຕມາຈຣຕິ.
໗. ອາຘາຣາ.
ອາຘາຣຕູ-ປມານາ ອາຈາຣຕ຺ເຖ ອີໂຍ ໂຍຕິ. ກຸຏິຍມິວາ-ຈຣຕິ ກຸຏີຍຕີ ປາສາເທ, ປາສາທີຍຕິ ກຸຏິຍໍ ຠິກ຺ຂຸ.
໘. ກຕ຺ຕຸຕາໂຍ.
ກຕ຺ຕຸຕູ-ປມານາ ອາຈາຣຕ຺ເຖ ອາໂຍ ໂຫຕິ. ປພ຺ພໂຕ ອິວາຈຣຕິ ປພ຺ພຕາຍຕິ.
໙. ຍ຺ຈຕ຺ເຖ.
ກຕ຺ຕຸໂຕ ອຠູຕຕພ຺ຠາເວ ອາໂຍ ໂຫຕິ ພຫຸລໍ. ຠຸສາຍຕິ, ປຏປຏາຍຕິ, ໂລຫິຕາຍຕິ, ກຕ຺ຕຸໂຕຕ຺ເວວ? (ອຠຸສໍ) ຠຸສໍ ກໂຣຕີຫິ, ອິຫ ກສ຺ມາ ນ ໂຫຕິ ‘ຠຸສີ ຠວຕີ’ຕິ? ວຸຕ຺ຕຕ຺ຖຕາຍ.
໑໐. ສທ຺ທາທີນິ ກໂຣຕິ.
ສທ຺ທາທີຫິ ທຸຕິຍນ຺ເຕຫິ ກໂຣຕີຕິ ອສ຺ມິໍ ອຕ຺ເຖ ອາໂຍ ໂຫຕິ. ສທ຺ທາຍຕິ, ເວຣາຍຕິ, ກລຫາຍຕິ, ຘູປາຍຕິ.
໑໑. ນຸໂມຕ຺ວ-ສ຺ໂສ.
ນໂມອິຈ຺ຈສ຺ມາ ກໂຣຕີຕິ ອສ຺ມິໍ ອຕ຺ເຖ ອສ຺ໂສ ໂຫຕິ. ນມສ຺ສຕິ ຕຖາຄ຺ຕໍ.
໑໒. ຘາຕ຺ວຕ຺ເຖ ນາມສ຺ມິ.
ນາມສ຺ມາ ຘາຕ຺ວຕ຺ເຖ ພຫຸລມິໂຫຕິ. ຫຕ຺ຖິນາ ອຕິກ຺ກມຕິ ອຕິຫຕ຺ຖຍຕິ, ວີຓາຍ ອຸປຄາຍຕິ ອຸປວີຓຍຕິ, ທຬ຺ຫໍ ກໂຣຕິ ວິນຍໍ ທຬ຺ຫຍຕິ, ວິສຸທ຺ຘາ ໂຫຕິ ຣຕ຺ຕິ ວິສຸທ຺ຘຍຕິ, ກຸສລໍ ປຸຈ຺ຉຕິ ກຸສລຍຕິ.
໑໓. ສຈ຺ຈາທີຫາປິ.
ສຈ຺ຈາທີຫິ ຘາຕ຺ວຕ຺ເຖ ອາປິ ໂຫຕິ. ສຈ຺ຈາເປຕິ, ອຕ຺ຖາເປຕິ, ເວທາເປຕິ, ສຸກ຺ຂາເປຕິ, ສຸຂາເປຕິ, ທຸກ຺ຂາເປຕິ.
໑໔. ກ຺ຣິຍຕ຺ຖາ.
ອຍມຘິກາໂຣ ອາສຕ຺ຖປຣິສມຕ຺ຕິຍາ. ກ຺ຣິຍາ ອຕ຺ໂຖ ຍສ຺ສ ໂສ ກ຺ຣິຍຕ຺ໂຖ ຘາຕຸ.
໑໕. ຈຸຣາທິໂຕ ຓິ.
ຈຸຣາທີຫິ ກ຺ຣິຍຕ຺ເຖຫິ ສກຕ຺ເຖ ຓິ ປໂຣ ໂຫຕິ ພຫຸລໍ. ຓກາໂຣ ວຸທ຺ຘ຺ຍຕ຺ໂຖ, ເອວມຎ຺ຎຕ຺ຣາປິ, ໂຈຣຍຕິ, ລາຬຍຕິ, ກຖໍ ‘ຣຊ຺ຊໍ ກາເຣຕີ’ຕິ? ໂຍຄວິຠາຄໂຕ.
໑໖. ປໂຍຊກພ຺ຍາປາເຣ ຓາປິ ຈ.
ກຕ຺ຕາຣໍ ໂຍ ປໂຍຊຍຕິ, ຕສ຺ສ ພ຺ຍາປາເຣ ກ຺ຣິຍຕ຺ຖາ ຓິຓາປີ ໂຫນ຺ຕິ ພຫຸລໍ, ກາເຣຕິ, ກາຣາເປຕິ. ນນຸ ຈ ກຕ຺ຕາປິ ກຣຓາທີນໍ ປໂຍຊໂກຕິ ຕໍພ຺ຍາປາເຣປິ ຓິຓາປີ ປາປຸຓນ຺ຕິ? ປໂຍຊກຄ຺ຄຫຓສາມຕ຺ຖິຍາ ນ ຠວິສ຺ສນ຺ຕິ ຈຸຣາທີຫິ ວິສຸໍ ວຈນສາມຕ຺ຖິຍາ ຈ. ອໂຕ ຠິຍ຺ໂຍ ຓາປິເຍວ, ຓິເຍວຸວຓ຺ຓໂຕ, ທ຺ວຍເມວຎ຺ເຎຫິ.
໑໗. ກ຺ໂຍ ຠາວກມ຺ເມສ຺ວ-ປໂຣກ຺ເຂສຸ ມານ ນ຺ຕ ຕ຺ຍາທີສຸ. ຠາວກມ຺ມວິຫິເຕສຸ ປໂຣກ຺ຂາວຊ຺ຊິເຕສຸ ມານນ຺ຕຕ຺ຍາທີສຸ ປເຣສຸ ກ຺ໂຍ ໂຫຕິ ກ຺ຣິຍຕ຺ຖາ. ນ຺ຕຄ຺ຄຫຓມຸຕ຺ຕຣຕ຺ຖໍ, ກກາໂຣ ອວຸທ຺ຘ຺ຍຕ຺ໂຖ ເອວມຸຕ຺ຕຣຕ຺ຣາປິ. ຐີຍມານໍ, ຐີຍເຕ, ສູຍມານໍ, ສູຍເຕ, ອປໂຣກ຺ເຂສຸ ມານນ຺ຕຕ຺ຍາທີສູຕິ ກິໍ? ພຠູວ ເທວທຕ຺ເຕນ, ພິຠິທ ກຸສຸໂລ. ຠິຊ຺ຊເຕ ກຸສຸໂລ ສຍເມວາຕິ ‘ຠິຊ຺ຊເຕ’ຕິ ສວນາ ກມ຺ມຕາ-ວຄມ຺ຍເຕ, ‘ສຍເມວາ’ຕິ ສວນໂຕ ກຕ຺ຕຸຕາ, ກຕ຺ຕຸຕາວຈນິຈ຺ຉາຍນ຺ຕຸ ‘ຠິນ຺ທຕິ ກຸສຸໂລ ອຕ຺ຕານ’ນ຺ຕິ ຠວຕິ, ເອວມຎ຺ຎມ຺ປິ ຍຖາຄມມນຸຄນ຺ຕພ຺ພໍ. ‘ອປໂຣກ຺ເຂສຸ ມານນ຺ຕຕ຺ຍາທີສູ’ຕິ ອຍມຘິກາໂຣ ອາ ‘ຕນາທິຕ຺ໂວ’ຕິ ໕.໒໖. ອປິຈ ເອເຕ ກ຺ຍາທໂຍ ຕ຺ຍາທີສຸ ປຣຠູເຕສຸ ກຕ຺ຕຸກມ຺ມຠາວ ວິຫິເຕສຸ ກ຺ຍລາທີນໍ ວິຘານໂຕ ເຕສ຺ເວວ ວິຎ຺ຎາຍນ຺ຕີຕິ ອກມ຺ມເກຫິ ຘາຕູຫິ ກຕ຺ຕຸຠາເວສຸ, ສກມ຺ມເກຫິ ກຕ຺ຕຸກມ຺ເມສຸ, ກມ຺ມາວຈນິຈ຺ຉາຍໍ ຠາເວ ຈ ຠວນ຺ຕີຕິ ເວທິຕພ຺ພາ. ຍສ຺ສ ປນ ຘາຕຸສ຺ສ ກິຣິຍາ ກມ຺ມມເປກ຺ຂເຕ, ໂສ ສກມ຺ມໂກ, ຍສ຺ສ ຕຸ ກິຣິຍາ ກຕ຺ຕຸມຕ຺ຕມເປກ຺ຂເຕ, ສ຺ວາກມ຺ມໂກຕິ ຎາຕພ຺ພໍ.
໑໘. ກຕ຺ຕຣິ ໂລ.
ກ຺ຣິຍຕ຺ຖໂຕ ອປໂຣກ຺ເຂສຸ ກຕ຺ຕຸວິຫິຕມານ ນ຺ຕຕ຺ຍາທີສຸ ໂລ ໂຫຕິ. ລກາໂຣ, ‘‘ຎິລສ຺ເສ’’ຕິ ໕-໑໖໓ ວິເສສນຕ຺ໂຖ. ປຈມາໂນ, ປຈນ຺ໂຕ, ປຈຕິ.
໑໙. ມໍ ຈ ຣຸຘາທີນໍ.
ຣຸຘາທິໂຕ ກຕ຺ຕຸວິຫິຕມານນ຺ຕ ຕ຺ຍາທີສຸ ໂລ ໂຫຕິ ມໍ ຈ ອນ຺ຕສຣາ ປໂຣ. ມກາໂຣ-ນຸພນ຺ໂຘ, ອກາໂຣ ອຸຈ຺ຈາຣຓຕ຺ໂຖ. ຣຸນ຺ຘມາໂນ, ຣຸນ຺ຘນ຺ໂຕ, ຣຸນ຺ຘຕິ.
໒໐. ຓິຓາປ຺ຍາປີຫິ ວາ.
ຓິຓາປ຺ຍາປີຫິ ກຕ຺ຕຸວິຫິຕມານນ຺ຕ ຕ຺ຍາທີສຸ ໂລ ໂຫຕິ ວິຠາສາ, ໂອຣຍນ຺ໂຕ, ໂຈເຣນ຺ໂຕ, ກາຣຍນ຺ໂຕ, ກາເຣນ຺ໂຕ, ກາຣາປຍນ຺ໂຕ, ກາຣາເປນ຺ໂຕ, ສຈ຺ຈາປຍນ຺ໂຕ, ສຈ຺ຈາເປນ຺ໂຕ, ໂຈຣຍຕິ, ໂຈເຣຕິ, ກາຣຍຕິ, ກາເຣຕິ, ກາຣາປຍຕິ, ກາຣາເປຕິ, ສຈ຺ຈາປຍຕິ, ສຈ຺ຈາເປຕິ. ວວຕ຺ຖິຕວິຠາສຕ຺ໂຖ-ຍໍ ວາສທ຺ໂທ, ເຕນ ມາເນ ນິຈ຺ຈໍ, ໂຈຣຍມາໂນ, ກາຣຍມາໂນ, ກາຣາປຍມາໂນ, ສຈ຺ຈາປຍມາໂນ.
໒໑. ທິວາທີຫິ ຍກ.
ທິວາທີຫິ ລວິສເຍ ຍກ ໂຫຕິ. ທິພ຺ພນ຺ໂຕ, ທິພ຺ພຕິ.
໒໒. ຕຸທາທີຫິ ໂກ.
ຕຸທາທີຫິ ລວິສເຍ ໂກ ໂຫຕິ. ຕຸທມາໂນ, ຕຸທນ຺ໂຕ, ຕຸທຕິ.
໒໓. ຊ຺ຍາທີຫິ ກ຺ນາ.
ຊິອາທີຫິ ລວິສເຍ ກ຺ນາ ໂຫຕິ. ຊິນນ຺ໂຕ, ຊິນາຕິ. ກຖໍ ‘ຊຍນ຺ໂຕ’ ຊຍຕີ, ຕິ? ຠູວາທິປາຐາ.
໒໔. ກ຺ຍາທີຫິ ກ຺ຓາ.
ກີອາທີຫິ ລວິສເຍ ກ຺ຓາ ໂຫຕິ. ກິຓນ຺ໂຕ, ກິຓາຕິ.
໒໕. ສ຺ວາທີຫິ ກ຺ໂຓ.
ສຸອາທີຫິ ລວິສເຍ ກ຺ໂຓ ໂຫຕິ. ສຸຓມາໂນ, ສຸຓນ຺ໂຕ, ສຸໂຓຕິ. ກຖໍ ສຸຓາຕີຕິ? ກ຺ຍາທິປາຐາ.
໒໖. ຕນາທິຕ຺ໂວ.
ຕນາທິໂຕ ລວິສເຍ ໂອ ໂຫຕິ. ຕໂນຕິ.
໒໗. ຠາວກມ຺ເມສຸ ຕພ຺ພາ-ນີຍາ.
ຕພ຺ພອນີຍາ ກ຺ຣິຍຕ຺ຖາ ປເຣ ຠາວກມ຺ເມສຸ ພຫຸລໍ ຠວນ຺ຕິ. ກຕ຺ຕພ຺ພໍ, ກຣຓີຍໍ, ກຕ຺ຕພ຺ໂພ ກໂຏ, ກຣຓີໂຍ. ພຫຸລາຘິກາຣາ ກຣຓາທີສຸປິ ຠວນ຺ຕິ, ສິນານີຍໍ ຈຸຓ຺ຓໍ, ທານີໂຍ ພ຺ຣາຫ຺ມໂຓ, ສມ຺ມາວຕ຺ຕນີໂຍ ຄຸຣຸ, ປວຈນີໂຍ ອຸປຊ຺ຌາໂຍ, ອຸປຏ຺ຐານີໂຍ ສິສ຺ໂສ.
໒໘. ຆ຺ຍຓ.
ຠາວກມ຺ເມສຸ ກ຺ຣິຍຕ຺ຖາ ປໂຣ ຆ຺ຍຓ ໂຫຕິ ພຫຸລໍ. ວາກ຺ຍໍ, ກາຣິຍໍ, ເຈຍ຺ຍໍ, ເຊຍ຺ຍໍ.
໒໙. ອາສ຺ເສ ຈ.
ອາໂຕຆ຺ຍຓ ໂຫຕິ ຠາວກມ຺ເມສຸ, ອາສ຺ສ ເອ ຈ. ເທຍ຺ຍໍ.
໓໐. ວທາທີຫິ ໂຍ.
ວທາທີຫິ ກ຺ຣິຍຕ຺ເຖຫິ ໂຍ ໂຫຕິ ພຫຸລໍ ຠາວກມ຺ເມສຸ. ວຊ຺ຊໍ, ມຊ຺ຊໍ, ຄມ຺ມໍ. (໔໒) ‘‘ຠຸຊານ຺ເນ’’, ໂຠຊ຺ໂຊ ໂອທໂນ, ໂຠຊ຺ຊາ ຍາຄຸ, ໂຠຄ຺ຄມຎ຺ຎໍ.
໓໑. ກິຈ຺ຈ ຆຈ຺ຈ ຠຈ຺ຈ ຠພ຺ພ ເລຍ຺ຍາ.
ເອເຕ ສທ຺ທາ ຍປ຺ປຈ຺ຈຍນ຺ຕາ ນິປຈ຺ຈນ຺ເຕ.
໓໒. ຄຸຫາທີຫິ ຍກ.
ຄຸຕາທີຫິ ກ຺ຣິຍຕ຺ເຕຫິ ຠາວກມ຺ເມສຸ ຍກ ໂຫຕິ. ຄຸຍ຺ຫໍ, ທຸຍ຺ຫໍ, ສິສ຺ໂສ. ສິທ຺ຘາ ເອເວເຕ ຕພ຺ພາທໂຍ ເປສາຕິສຄ຺ຄປຕ຺ຕກາເລສຸປິ ຄມ຺ຍມາເນສຸ ສາມຎ຺ເຎນວິຘານໂຕ, ຕ຺ວຍາ ຂລຸ ກໂຏ ກຕ຺ຕພ຺ໂພ, ກຣຓີໂຍ, ກາຣິໂຍ, ກິຈ຺ໂຈ, ເອວໍ ຕ຺ວຍາ ກໂຏ ກຕ຺ຕພ຺ໂພ, ໂຠຕາ ກໂຏ ກຕ຺ຕພ຺ໂພ, ໂຠໂຕ ຫິ ປຕ຺ໂຕ ກາໂລ ກຏກຣເຓ. ເອວໍ ອຸທ຺ຘໂມຫຸຕ຺ຕິເກປິ ວຕ຺ຕມານໂຕ ເປສາທີສຸ ສິທ຺ຘາ ເອວ. ຕຖາ ອຣເຫ ກຕ຺ຕຣິ ສຕ຺ຕິວິສິຏ຺ເຐ ຈ ປຕີຍມາເນ ອາວສ຺ສກາຘມີຓຕາວິສິຏ຺ເຐ ຈ ຠາວາໂທ ສິທ຺ຘາ, ອຸທ຺ຘໍມຸຫຸຕ຺ຕໂຕ-ໂຠຕາ ກໂຏ ກຕ຺ຕພ຺ໂພ, ໂຠຕາ ຣຊ຺ຊໍ ກຕ຺ຕພ຺ພໍ. ຠວໍ ອຣໂຫ, ໂຠຕາ ສາໂຣ ວຫິຕພ຺ໂພ, ຠວໍ ສກ຺ໂກ, ໂຠຕາ ອວສ຺ສໍ ກໂຏ ກຕ຺ຕພ຺ໂພ, ໂຠຕາ ນິກ຺ໂຂ ທາຕພ຺ໂພ.
໓໓. ກຕ຺ຕຣິ ລ຺ຕຸຓກາ.
ກຕ຺ຕຣິ ກາຣເກ ກ຺ຣິຍຕ຺ຖາ ລ຺ຕຸຓກາ ໂຫນ຺ຕິ ພຫຸລໍ. ປຐິຕາ, ປາຐໂກ. ພຫຸລມິຕ຺ເວວ? ປາເທຫິ ຫຣີຍຕີຕິ ປາທຫາ-ຣໂກ, ຄເລ ຈຸປ຺ປເຕຕິ ຄເລໂຈປໂກ. ສິທ຺ໂຘວ ລ຺ຕຸ, ອຣເຫ ສີລສາຘຸຘມ຺ເມສຸ ຈ ສາມຎ຺ຎວິຫິຕຕ຺ຕາ, ຠວໍ ຂລຸ ກຎ຺ຎາຍ ປຣິຄ຺ຄຫິຕາ, ຠວເມຕໍ ອຣຫຕິ. ສີລາທີສຸ-ຂລ຺ວປິ ອຸປາທາຕາ ກຸມາຣເກ, ຄນ຺ຕາ ເຂລໍ, ມຸຓ຺ຑຍິຕາໂຣ ສາວິຏ຺ຐາຍນາ ວຘຸໍ ກຕປຣິຄ຺ຄຫໍ.
໓໔. ອາວີ.
ກ຺ຣິຍຕ຺ຖາ ອາວີ ໂຫຕິ ພຫຸລໍ ກຕ຺ຕຣິ. ຠຍທສ຺ສາວີ. ອປ຺ປວິສຍຕຎ຺ຎາປນຕ຺ຖໍ ຠິນ຺ນໂຍຄກຣຓໍ, ສາມຎ຺ຎວິຫິຕຕ຺ຕາ ສີລາ ທີສຸ ຈ ໂຫເຕວ.
໓໕. ອາສິໍສາຍມໂກ.
ອາສິໍສາຍໍ ຄມ຺ຍມານາຍໍ ກ຺ຣິຍຕ຺ຖາ ອໂກ ໂຫຕິ ກຕ຺ຕຣິ. ຊີວຕູຕິ ຊີວໂກ, ນນ຺ທຕູຕິ ນນ຺ທໂກ, ຠວຕູຕິ ຠວໂກ.
໓໖. ກຣາ ຓໂນ.
ກຣໂຕ ກຕ຺ຕຣິ ຓໂນ ໂຫຕິ. ກໂຣຕີຕິ ກາຣຓໍ, ກຕ຺ຕຣີຕິ ກິໍ? ກຣຓໍ.
໓໗. ຫາໂຕ ວີຫິກາເລສຸ.
ຫາໂຕ ວີຫິສ຺ມິໍ ກາເລ ຈ ຓໂນ ໂຫຕິ ກຕ຺ຕຣິ. ຫາຍນາ ນາມ ວິຫໂຍ, ຫາຍໂນ ສໍວຈ຺ຉໂຣ, ວີຫິກາເລສູຕິ ກິໍ? ຫາຕາ.
໓໘. ວິທາ ກູ.
ວິທສ຺ມາ ກູ ໂຫຕິ ກຕ຺ຕຣິ. ວິທູ, ໂລກວິທູ.
໓໙. ວິໂຕ ຎາໂຕ.
ວິປຸພ຺ພາ ຎາອິຈ຺ຈສ຺ມາ ກູ ໂຫຕິ ກຕ຺ຕຣິ. ວິຎ຺ຎູ. ວິໂຕຕິ ກິໍ? ປຎ຺ຎາ.
໔໐. ກມ຺ມາ.
ກມ຺ມໂຕ ປຣາ ຎາອິຈ຺ຈສ຺ມາ ກູ ໂຫຕິ ກຕ຺ຕຣິ. ສພ຺ພຎ຺ຎູ, ກາລຎ຺ຎູ.
໔໑. ກ຺ວຈຓ.
ກມ຺ມໂຕ ປຣາ ກ຺ຣິຍຕ຺ຖາ ກ຺ວຈິ ອຓ ໂຫຕິ ກຕ຺ຕຣິ. ກຸມ຺ຠກາໂຣ, ສຣລາໂວ, ມນ຺ຕຊ຺ຌາໂຍ, ພຫຸລາຘິກາຣາ ອິຘ ນ ໂຫຕິ ອາທິຈ຺ຈໍ ປສ຺ສຕິ, ຫິມວນ຺ຕໍ ສຸໂຓຕິ, ຄາມໍ ຄຈ຺ຉຕິ. ກ຺ວຈີຕິ ກິໍ? ກມ຺ມກໂຣ.
໔໒. ຄມາ ຣູ.
ກມ຺ມໂຕ ປຣາ ຄມາ ຣູ ໂຫຕິ ກຕ຺ຕຣິ. ເວທຄູ ປາຣຄູ.
໔໓. ສມານຎ຺ຎ ຠວນ຺ຕ ຍາທິຕູ-ປມານາ ທິສາ ກມ຺ເມ ຣີຣິກ຺ຂກາ.
ສມານາທີຫິ ຍາທີຫິ ໂຈປມາເນຫິ ປຣາ ທິສາ ກມ຺ມກາຣເກ ຣີຣິກ຺ຂກາ ໂຫນ຺ຕິ. ສມາໂນ ວິຍ ທິສ຺ສຕີຕິ ສທີ ສທິກ຺ໂຂ ສທິໂສ. ອຎ຺ຎາທີ ອຎ຺ຎາທິກ຺ໂຂ ອຎ຺ຎາທິໂສ. ຠວາທີ ຠວາທິກ຺ໂຂ ຠວາທິໂສ. ຍາທີ ຍາທິກ຺ໂຂ ຍາທິໂສ. ຕ຺ຍາທີ ຕ຺ຍາທິກ຺ໂຂ ຕ຺ຍາທິໂສ. ສມານາທີຫີຕິ ກິໍ? ຣຸກ຺ໂຂ ວິຍ ທິສ຺ສຕິ. ອຸປມານາຕິ ກິໍ? ໂສ ທິສ຺ສຕິ. ກມ຺ເມຕິ ກິໍ? ໂສ ວິຍ ປສ຺ສຕິ. ຣກາຣາ ອນ຺ຕສຣາທິໂລປຕ຺ຖາ, ກກາໂຣ ເອກາຣາຠາວຕ຺ໂຖ.
໔໔. ຠາວກາຣເກສ຺ວ-ຆຓ ຆກາ.
ຠາເວ ກາຣເກ ຈ ກ຺ຣິຍຕ຺ຖາ ອ ຆຓ ຆ ກາ ໂຫນ຺ຕິ ພຫຸລໍ. ອ-ປຄ຺ຄໂຫ, ນິຄ຺ຄໂຫ, ກໂຣ, ຄໂຣ, ຈໂຍ, ຊໂຍ, ຣໂວ, ຠໂວ, ປໂຈ, ວໂຈ, ອນ຺ນໂທ, ປຸຣິນ຺ທໂທ, ອີສກ຺ກໂຣ, ທຸກ຺ກໂຣ, ສຸກໂຣ. ຆຓ-ຠາເວ ປາໂກ, ຈາໂຄ, ຠາໂວ, ກາຣເກປິ ສຎ຺ຎາຍໍ ຕາວ ປຊ຺ຊເຕເນນາຕິ ປາໂທ, ຣຸຊຕີຕິ ໂຣໂຄ, ວິສຕີຕິ ເວໂສ, ສຣຕິ ກາລນ຺ຕຣນ຺ຕິ ສາໂຣ ຖິຣໍໂສ, ທຣີຍນ຺ເຕ ເອເຕຫີຕິ ທາຣາ, ຊີຣຍຕິ ເອເຕນາຕິ ຊາໂຣ, ອສຎ຺ຎາຍມ຺ປິ ທາໂຍ ທຕ຺ໂຕ, ລາໂຠ ລທ຺ໂຘ, ຆ-ວໂກ, ນິປໂກ, ກ-ປິໂຍ, ຂິໂປ, ຠຸໂຊ, ອາຍຸຘໍ.
໔໕. ທາຘາຕ຺ວິ.
ທາຘາຫິ ພຫຸລມິ ໂຫຕິ ຠາວກາຣເກສຸ. ອາທິ, ນິຘິ, ວາລມິ.
໔໖. ວມາທີຍ຺ຍຖຸ.
ວມາທີຫິ ຠາວກາຣເກສ຺ວຖຸ ໂຫຕິ. ວມຖຸ, ເວປຖຸ, (ອວຖຸ, ສຍຖຸ).
໔໗. ກ຺ວິ.
ກ຺ຣິຍຕ຺ຖາ ກ຺ວິ ໂຫຕິ ພຫຸລໍ ຠາວກາຣເກສຸ. ກກາໂຣ ການຸພນ຺ຘກາຣິຍຕ຺ໂຖ, ອຠິຠູ, ສຍມ຺ຠູ, ຠຕ຺ຕຄ຺ຄໍ, (ທານຄ຺ຄໍ) ສລາກຄ຺ຄໍ, ສຠາ, ປຠາ.
໔໘. ອໂນ.
ກ຺ຣິຍຕ຺ຕາ ຠາວກາຣເກສ຺ວໂນ ໂຫຕິ. ຄມນໍ, ທານໍ, ສມ຺ປທານໍ, ອປາທານໍ, ອຘິກຣຓໍ, ຈລໂນ, ຊລໂນ, ໂກຘໂນ, ໂກປໂນ, ມຓ຺ຑໂນ, ຠູສໂນ.
໔໙. ອິຕ຺ຖິຍມຓ ຕ຺ຕິ ກ ຍກ ຍາ ຈ.
ອິຕ຺ຖິລິງ຺ເຄ ຠາເວ ກາຣເກ ຈ ກ຺ຣິຍຕ຺ຖາ ອອາທໂຍ ໂຫນ຺ຕິ ອໂນ ຈ ພຫຸລໍ. ອ ຕິຕິກ຺ຂາ, ວີມໍສາ, ຊິຄຸຈ຺ຉາ, ປິປາສາ, ປຸຕ຺ຕິຍາ ອີຫາ ຠິກ຺ຂາ, ອາປທາ, ເມຘາ, ໂຄຘາ, ຓກາຣາ, ຫາຣາ, ຕາຣາ, ຘາຣາ, ອາຣາ, ກ຺ຕິ-ອິຏ຺ຐິ, ສິຏ຺ຐິ, ຠິຕ຺ຕິ, ຠຕ຺ຕິ, ຕນ຺ຕິ ຠູຕິ, ກ-ຄຸຫາ, ຣຸຊາ, ມຸທາ, ຍກ-ວິຊ຺ຊາ, ອິຊ຺ຊາ, ຍ-ເສຍ຺ຍາ, ສມຊ຺ຊາ, ປພ຺ພຊ຺ຊາ, ປຣິຈຣິຍາ, ຊາຄຣິຍາ, ອນກາຣຓາ, ຫາຣຓາ, ເວທນາ, ວນ຺ທນາ, ອຸປາສນາ.
໕໐. ຊາຫາຫິ ນິ.
ຊາຫາອິຈ຺ເຈເຕຫິ ນິ ໂຫຕິຕ຺ຖິຍໍ. ຊານິ, ຫານິ.
໕໑. ກຣາ ຣິຣິໂຍ.
ກຣໂຕ ຣິຣິໂຍ ໂຫຕິຕ຺ຖິຍໍ. ກຣຓໍ ກິຣິຍາ. ກຖໍ ‘ກ຺ຣິຍາ’ຕິ? ‘‘ກ຺ຣິຍາຍໍ’’ຕິ ນິປາຕນາ.
໕໒. ອິກິຕີ ສຣູເປ.
ກ຺ຣິຍຕ຺ຖສ຺ສ ສຣູເປ-ຠິເຘຍ຺ເຍ ກ຺ຣິຍຕ຺ຖາ ປເຣ ອິກິຕີ ໂຫນ຺ຕິ, ວຈິ, ຍຸຘິ, ປຈຕິ, ‘ອກາໂຣ ກກາໂຣ’ຕິ ອາທີສຸ ກາຣສທ຺ເທນ ສມາໂສ, ຍຖາ ເອວກາໂຣຕິ.
໕໓. ສີລາຠິກ຺ຂຎ຺ຎາ-ວສ຺ສເກສຸ ຓີ.
ກ຺ຣິຍຕ຺ຖາ ຓີ ໂຫຕິ ສີລາທີສຸ ປຕີຍມາເນສຸ, ອຸຓ຺ຫໂຠຊີ, ຂີຣປາຍີ, ອວສ຺ສກາຣີ, ສຕນ຺ທາຍີ.
໕໔. ຖາວຣິຕ຺ຕຣ ຠງ຺ຄຸຣ ຠິທຸຣ ຠາສຸຣ ຠສ຺ສຣາ.
ເອເຕ ສທ຺ທາ ນິປຈ຺ຈນ຺ເຕ ສີເລ ຄມ຺ຍມາເນ.
໕໕. ກຕ຺ຕຣິ ຠູເຕ ກ຺ຕວນ຺ຕຸ ກ຺ຕາວີ.
ຠູເຕ-ຕ຺ເຖ ວຕ຺ຕມານໂຕ ກ຺ຣິຍຕ຺ຖາ ກ຺ຕວນ຺ຕຸຕ຺ຕາວີ ໂຫນ຺ຕິ ກຕ຺ຕຣິ. ວິຊິຕວາ, ວິຊິຕາວີ, ຠູເຕຕິ ອຘິກາໂຣ ຍາວ ‘‘ອາຫາຣຕ຺ຖາ’’ຕິ (໕-໖໐).
໕໖. ກ຺ໂຕຠາວກມ຺ເມສຸ.
ຠາເວ ກມ຺ເມ ຈ ຠູເຕ ກ຺ໂຕ ໂຫຕິ. ອາສິຕໍ ຠວຕາ. ກໂຕ ກໂຏ ຠວຕາ.
໕໗. ກຕ຺ຕຣິ ຈາຣມ຺ເຠ.
ກ຺ຣິຍາຣມ຺ເຠ ກຕ຺ຕຣິ ກ຺ໂຕ ໂຫຕິ ຍຖາປຕ຺ຕຎ຺ຈ. ປກໂຕ ຠວໍ ກຏໍ, ປກໂຕ ກໂຏ ຠວຕາ, ປສຸຕ຺ໂຕ ຠວໍ, ປສຸຕ຺ຕໍ ຠວຕາ.
໕໘. ຐາ-ສ ວສ ສິລິສ ສີ ຣຸຫ ຊຣ ຊນີຫິ.
ຐາທີຫິ ກຕ຺ຕຣິ ກ຺ໂຕ ໂຫຕິ ຍຖາປຕ຺ຕຎ຺ຈ. ອຸປຏ຺ຐິໂຕ ຄຸຣຸໍ ຠວໍ, ອຸປຏ຺ຐິໂຕ ຄຸຣຸ ໂຠຕາ, ອຸປາສິໂຕ ຄຸຣຸໍ ຠວໍ, ອຸປາສິໂຕ ຄຸຣຸ ໂຠຕາ, ອນຸວຸສິໂຕ ຄຸຣຸໍ ຠວໍ, ອນຸວຸສິໂຕ ຄຸຣຸ ໂຠຕາ, ອາສິລິຏ຺ໂຐ ຄຸຣຸໍ ຠວໍ, ອາສິລິຏ຺ໂຐ ຄຸຣຸ ໂຠຕາ, ອຘິສ຺ສິໂຕ ຂໂຏປິກໍ ຠວໍ, ອຘິສ຺ສິຕາ ຂໂຏປິກາ ໂຠຕາ, ອາຣຬ຺ໂຫ ຣຸກ຺ຂໍ ຠວໍ, ອາຣຸຬ຺ໂຫ ຣຸກ຺ໂຂ ໂຠຕາ, ອນຸຊິຓ຺ໂຓ ວສລິໍ ເທວທຕ຺ໂຕ, ອນຸຊິຓ຺ຓາ ວສລີ ເທວທຕ຺ເຕນ, ອນຸຊາໂຕ ມາຓວໂກ ມາຓວິກໍ, ອນຸຊາຕາ ມາຓວິກາ ມາຓວເກນ.
໕໙. ຄມນຕ຺ຖາກມ຺ມກາຘາເຣ ຈ.
ຄມນຕ຺ຖໂຕ ອກມ຺ມກໂຕ ຈ ກ຺ຣິຍຕ຺ຖາ ອາຘາເຣ ກ຺ໂຕ ໂຫຕິ ກຕ຺ຕຣິ ຈ ຍຖາປຕ຺ຕຎ຺ຈ, ອິທເມສໍ ຍາຕໍ, ອິຫ ເຕ ຍາຕາ, ອິຫ ເຕຫິ ຍາຕໍ, ອຍໍ ເຕຫິ ຍາໂຕ ປໂຖ, ອິທເມສມາສິຕໍ, ອິຫ ເຕ ອາສິຕາ, ອິຫເຕຫິ ອາສິຕໍ, ‘ເທໂວ ເຈ ວຸຏ຺ໂຐ ສມ຺ປນ຺ນາ ສາລໂຍ’ຕິ ກາຣຓສາມຄ຺ຄີສມ຺ປຕ຺ຕິ ເອຕ຺ຖາຠິມຕາ.
໖໐. ອາຫາຣຕ຺ຖາ.
ອຊ຺ໂຌຫາຣຕ຺ຖາ ອາຘາເຣ ກ຺ໂຕ ໂຫຕິ ຍຖາປຕ຺ຕຎ຺ຈ, ອິທເມສໍ ຠຸຕ຺ຕໍ, ອິທເມສໍ ປີຕໍ, ອິຫ ເຕຫິ ຠຸຕ຺ຕໍ, ອິຫ ເຕຫິ ປີຕໍ, ໂອທໂນ ເຕຫິ ຠຸຕ຺ໂຕ ປີຕມຸທກໍ, ອກຕ຺ຕຕ຺ໂຖ ໂຍຄວິຠາໂຄ, ກຖໍ ‘ປີຕາ ຄາໂວ’ຕິ? ປີຕເມສໍ ວິຊ຺ຊຕີຕິ ປີຕາ, ພາຫຸລກາ ວາ, ‘ປສ຺ສິນ຺ໂນ’ຕິ ຍາ ເອຕ຺ຖ ຠູຕກາລຕາ, ຕຕ຺ຣ ຕ຺ໂຕ, ເອວໍ ຣຎ຺ຎໍ ມໂຕ ຣຎ຺ຎໍ ອິຏ຺ໂຐ, ຣຎ຺ຎໍ ພຸທ຺ໂຘ, ຣຎ຺ຎໍ ປູຊິໂຕ, ເອວໍ ສີລິໂຕ, ຣກ຺ຂິໂຕ, ຂນ຺ໂຕ, ອາກຸຏ຺ໂຐ, ຣຸຏ຺ໂຐ, ຣຸສິໂຕ, ອຠິພ຺ຍາຫໂຏ, ທຍິໂຍ, ຫຏ຺ໂຐ, ກນ຺ຕາ, ສໍຍໂຕ, ອມໂຕ, ‘ກຏ຺ຐ’ນ຺ຕິ ຠູຕຕາຍເມວ ເຫຕຸໂນ, ຜລໍ ຕ຺ວຕ຺ຣ ຠາວິ.
໖໑. ຕຸໍ ຕາເຍ ຕເວ ຠາເວ ຠວິສ຺ສຕິ ກ຺ຣິຍາຍໍ ຕທຕ຺ຖາຍ.
ຠວິສ຺ສຕິ ອຕ຺ເຖ ວຕ຺ຕມານໂຕ ກ຺ຣິຍຕ຺ຖາ ຠາເວ ຕຸໍ ຕາເຍ ຕເວ ໂຫນ຺ຕິ ກ຺ຣິຍາຍໍ ຕທຕ຺ຖາຍໍ ປຕີຍມານາຍໍ. ກາຕຸໍ ຄຈ຺ຉຕິ, ກຕ຺ຕາເຍ ຄຈ຺ຉຕິ, ກາຕເວ ຄຈ຺ຉຕິ, ອິຈ຺ຉຕິ ໂຠຕ຺ຕຸໍ ກາເມຕິ ໂຠຕ຺ຕຸນ຺ຕິ ອິມີນາວ ສິທ຺ຘໍ, ປຸນພ຺ພິຘາເນ ຕ຺ວິຫາປິ ສິຍາ ‘ອິຈ຺ຉນ຺ໂຕ ກໂຣຕີ’ຕິ, ເອວໍ ສກ຺ໂກຕິ ໂຠຕ຺ຕຸໍ, ຊານາຕິ ໂຠຕ຺ຕຸໍ, ຄິລາຍຕິ ໂຠຕ຺ຕຸໍ, ຆຏເຕ ໂຠຕ຺ຕຸໍ, ອາຣຠເຕ ໂຠຕ຺ຕຸໍ, ລຠເຕ ໂຠຕ຺ຕຸໍ, ປກ຺ກມຕິ ໂຠຕ຺ຕຸໍ, ອຸສ຺ສຫຕິ ໂຠຕ຺ຕຸໍ, ອຣຫຕິ ໂຠຕ຺ຕຸໍ, ອຕ຺ຖິ ໂຠຕ຺ຕຸໍ, ວິຊ຺ຊຕິ ໂຠຕ຺ຕຸໍ, ວຏ຺ຏ ຕິໂຠຕ຺ຕຸໍ, ກປ຺ປຕິ ໂຠຕ຺ຕຸນ຺ຕິ. ຕຖາ ປາຣຍຕິ ໂຠຕ຺ຕຸໍ, ປຫຸ ໂຠຕ຺ຕຸໍ, ສມຕ຺ໂຖ ໂຠຕ຺ຕຸໍ, ປຣິຍຕ຺ໂຕ ໂຠຕ຺ຕຸໍ, ອລໍ ໂຠຕ຺ຕຸນ຺ຕິ ຠວຕິສ຺ສ ສພ຺ພຕ຺ຖ ສມ຺ຠວາ. ຕຖາ ກາໂລ ໂຠຕ຺ຕຸໍ. ສມໂຍ ໂຠຕຸໍ, ເວລາ ໂຠຕຸນ຺ຕິ, ຍຖາ ໂຠຕ຺ຕຸໍມໂນ, ໂສຕ຺ຕຸໍ ໂສໂຕ, ທຏ຺ຐຸໍ ຈກ຺ຂຸ, ຍຸຊ຺ຌິຕຸໍ ຘນຸ, ວຕ຺ຕຸໍ ຊໂຬ, ຄນ຺ຕຸມໂນ, ກຕ຺ຕຸມລໂສຕິ, ອຸຈ຺ຈາຣຓນ຺ຕຸ ວຕ຺ຕາຍຕ຺ຕໍ. ຠາເວຕິ ກິໍ? ກຣິສ຺ສາມີຕິ ຄຈ຺ຉຕິ, ກ຺ຣິຍາຍນ຺ຕິ ກິໍ? ຠິກ຺ຂິສ຺ສໍ ອິຈ຺ຈສ຺ສ ຊຏາ, ຕທຕ຺ຖາຍນ຺ຕິ ກິໍ? ຄຈ຺ຉິສ຺ສໂຕ ເຕ ຠວິສ຺ສຕິ ຠຕ຺ຕໍ ໂຠຊນາຍ.
໖໒. ປຏິເສເຘ-ລໍຂລູນໍ ຕຸນ ຕ຺ວານ ຕ຺ວາ ວາ.
ອລໍ ຂລຸສທ຺ທານໍ ປຏິເສຘຕ຺ຖານໍ ປໂຍເຄ ຕຸນາທໂຍ ວາ ໂຫນ຺ຕິ ຠາເວ. ອລໍ ໂສຕຸນ, ຂລຸ ໂສຕຸນ, ອລໍ ສຸຕ຺ວານ, ຘລຸ ສຸຕ຺ວານ, ອລໍ ສຸຕ຺ວາ, ຂລຸ ສຸຕ຺ວາ, ອລໍ ສຸເຕນ, ຂລຸ ໂສເຕນ, ອລໍ ຂລູນນ຺ຕິ ກິໍ? ມາ ໂຫຕຸ, ປຏິເສເຘຕິ ກິໍ? ອລງ຺ກາໂຣ.
໖໓. ປຸພ຺ເພກກຕ຺ຖຸການໍ.
ເອໂກ ກຕ຺ຕາ ເຍສໍ ພ຺ຍາປາຣານໍ, ເຕສຸ ໂຍ ປຸພ຺ໂພ, ຕທຕ຺ຖໂຕ ກ຺ຣິຍຕ຺ຖາ ຕຸນາທໂຍ ໂຫນ຺ຕິ ຠາເວ, ໂສຕຸນ ຍາຕິ, ສຸຕ຺ວານ, ສຸຕ຺ວາ ວາ, ເອກກຕ຺ຕຸການນ຺ຕິກິໍ? ຠຸຕ຺ຕສ຺ມິໍ ເທວທຕ຺ເຕ ຍຎ຺ຎທຕ຺ໂຕ ວຊຕິ, ປຸພ຺ພາຕິ ກິໍ? ຠຸຎ຺ຊຠິ ຈ ປຈຕິ ຈ. ‘ອປ຺ປຕ຺ວາ ນທິໍ ປພ຺ພໂຕ ອຕິກ຺ກມ຺ມ ປພ຺ພຕໍ ນທີ’ຕິ ຠູຘາຕຸສ຺ສ ສພ຺ພຕ຺ຖ ສມ຺ຠວາ ເອກກຕ຺ຕຸກຕາ ປຸພ຺ພກາລຕາ ຈ ຄມ຺ຍເຕ. ‘ຠຸຕ຺ວາ ຠຸຕ຺ວາ ຄຈ຺ຉຕີຕິ’ ອິມິນາວ ສິທ຺ຘໍ ອາຠິກ຺ຂຎ຺ຎນ຺ຕຸ ທ຺ວິພ຺ພຈນາວຄມ຺ຍເຕ. ກຖໍ ‘ຊີວຄ຺ຄາຫໍ ອຄາຫຍິ, ກາຍປ຺ປຈາລກໍ ຄຈ຺ຉນ຺ຕີ’ຕິ ອາທິ? ຆຓນ຺ເຕນ ກ຺ຣິຍາວິເສສເນນ ສິທ຺ຘໍ ຍຖາ ‘ໂອທນປາກໍ ສຍຕີ’ຕິ.
໖໔. ນ຺ໂຕ ກຕ຺ຖຣິ ວຕ຺ຕມາເນ.
ວຕ຺ຕມານຕ຺ເຖ ວຕ຺ຕມານໂຕ ກ຺ຣິຍຕ຺ຕາ ນ຺ໂຕ ໂຫ ຕິ ກຕ຺ຕຣິ, ຕິຏ຺ຐນ຺ໂຕ.
໖໕. ມາໂນ.
ວຕ຺ຕມານຕ຺ເຖ ວຕ຺ຕມານໂຕ ກ຺ຣິຍຕ຺ຖາ ມາໂນ ໂຫຕິ, ກຕ຺ຕຣິ. ຕິຏ຺ຐມາໂນ.
໖໖. ຠາວກມ຺ເມສຸ.
ວຕ຺ຕມານຕ຺ເຖ ວຕ຺ຕມານໂຕ ກ຺ຣິໍຍຕ຺ຖາ ຠາເວ ກມ຺ເມຈ ມາໂນ ໂຫຕິ. ຐີຍມານໍ, ປຈ຺ຈມາໂນ ໂອທໂນ.
໖໗. ເຕ ສ຺ສປຸພ຺ພານາຄເຕ.
ອນາຄຕຕ຺ເຖ ວຕ຺ຕມານໂຕ ກ຺ຣິຍຕ຺ຖາ ເຕນ຺ຕມານາ ສ຺ສປຸພ຺ພາ ໂຫນ຺ຕິ. ຐສ຺ສນ຺ໂຕ, ຐສ຺ສມາໂນ, ຐີຍິສ຺ສມານໍ, ປຈ຺ຈິສ຺ສມາໂນ ໂອທໂນ.
໖໘. ຓ຺ວາທໂຍ.
ກ຺ຣິຍຕ຺ຖາ ປເຣ ພຫຸລໍ ຓ຺ວາທໂຍ ໂຫນ຺ຕິ. ຈາຣຸ, ທາຣຸ.
໖໙. ຂຉສານ ເມກສ຺ສໂຣທິ ທ຺ເວ.
ຂຉສປ຺ປຈ຺ຈຍນ຺ຕານໍ ກ຺ຣິຍຕ຺ຖານໍ ປຐເມກສ຺ສຣໍ ສທ຺ທຣູປໍ ທ຺ເວ ຠວຕິ. ຕິຕິກ຺ຂາ, ຊິຄຸຈ຺ຉາ, ວີມໍສາ.
໗໐. ປໂຣກ຺ຂາຍຎ຺ຈ.
ປໂຣກ຺ຂາຍໍ ປຐເມກສ຺ສຣໍ ສທ຺ທຣູປໍ ທ຺ເວ ຠວຕິ. ຊຄາມ, ຈກາໂຣ ອນຸຕ຺ຕສມຸຈ຺ຈຍຕ຺ໂຖ, ເຕນຎ຺ຎຕ຺ຣາປິ ຍຖາຄມໍ, ຊຫາຕິ, ຊຫິຕພ຺ພໍ, ຊຫິຕຸໍ, ທທ຺ທລ຺ລຕິ, ຈງ຺ກມຕິ. ‘ໂລລຸໂປ, ໂມມູໂຫຕິ ໂອຕ຺ຕໍ ຕທມິນາທິປາຐາ.
໗໑. ອາທິສ຺ມາ ສຣາ.
ອາທິຠູຕາ ສຣາ ປຣເມກສ຺ສຣໍ ທ຺ເວ ໂຫຕິ, ອສິສິສຕິ, ອາທິສ຺ມາຕິ ກິໍ? ຊຊຄາຣ, ສຣາຕິ ກິໍ? ປປາຈ.
໗໒. ນ ປຸນ.
ຍໍ ທ຺ວິຠູຕໍ, ນ ຕໍ ປຸນ ທ຺ວິຕ຺ຕມາປຊ຺ຊເຕ, ຕິຕິກ຺ຂິສຕິ, ຊິຄຸຈ຺ຉິສຕິ.
໗໓. ຍຖິຏ຺ຐໍ ສ຺ຍາທິໂນ.
ສ຺ຍາທ຺ຍນ຺ຕສ຺ສ ຍຖິຏ຺ຐເມກສ຺ສຣມາທິຠູຕມຎ຺ຎໍ ວາ ຍຖາຄມໍ ທ຺ວິຕ຺ຕປຊ຺ຊເຕ, ປຸປຸຕ຺ຕີຍິສຕິ, ປຸຕິຕ຺ຕີຍິສຕິ, ປຸຕ຺ຕີຍິຍິສຕິ.
໗໔. ຣສ຺ໂສ ປຸພ຺ພສ຺ສ.
ທ຺ວິຕ຺ເຕ ປຸພ຺ພສ຺ສ ສໂຣ ຣສ຺ໂສ ໂຫຕິ. ທທາຕິ.
໗໕. ໂລໂປ-ນາທິພ຺ຍຎ຺ຊນສ຺ສ.
ທ຺ວິຕ຺ເຕ ປຸພ຺ພສ຺ສາທິໂຕ-ຎ຺ຎສ຺ສ ພ຺ຍຎ຺ຊນສ຺ສ ໂລໂປ ໂຫຕິ. ອສິສິສຕິ.