ນວມ ປຣິຈ຺ເຉທ

ອຠຍາຠິເສໂກ

໑. ມເຫສີ ຊນຍີ ປຸຕ຺ເຕ, ທສ ເອກຎ຺ຈ ຘີຕຣໍ;

ສພ຺ພເຊຏ຺ໂຐ’ຠໂຍ ນາມ, ຈິຕ຺ຕານາມ ກນິຏ຺ຐິກາ.

໒. ປສ຺ສິຕ຺ວາ ຕໍ ວິຍາກໍສຸ, ພ຺ຣາຫ຺ມຓາ ມນ຺ຕປາຣຄາ;

‘‘ຣຊ຺ຊເຫຕຸ ສຸໂຕ ອສ຺ສາ, ຆາຕຍິສ຺ສຕິ ມາຕຸເລ’’.

໓. ຆາເຕສ຺ສາມິ ກນິຏ຺ຐິນ຺ຕິ, ນິຈ຺ຉິເຕ ຠາຕຣາ’ຠໂຍ;

ວາເຣສິ ກາເລ ວາເສສຸໍ, ເຄຫໍ ຕໍ ເອກຖຸຓິເກ.

໔. ຣຎ຺ໂຎ ຈ ສິຣິຄພ຺ເຠນ, ຕສ຺ສ ທ຺ວາຣມກາຣຍຸໍ;

ອນ຺ໂຕ ຐເປສຸໍ ເອກຎ຺ຈ, ທາສິໍ ນຣສຕໍ ພຫິ.

໕. ຣູເປນຸ’ມ຺ມາທຍີ ນເຣ, ທິຏ຺ຐມຕ຺ຕາວ ສາຍໂຕ;

ຕໂຕ ອຸມ຺ມາທຈິຕ຺ຕາ’ຕິ, ນາມໍ ໂສປປທໍ ລຠິ.

໖. ສຸຕ຺ວານ ລໍກາຄມນໍ, ຠທ຺ທກຈ຺ຈານເທວິຍາ;

ມາຕຣາ ໂຈທິຕາ ປຸຕ຺ຕາ, ຐເປຕ຺ເວ’ກຎ຺ຈ ອາຄມຸໍ.

໗. ທິສ຺ວານ ເຕ ປຓ຺ຑຸວາສຸ-ເທວໍ ລງ຺ກິນ຺ທມາຄຕາ;

ທິສ຺ວານ ຕໍ ກນິຏ຺ຐິຎ຺ຈ, ໂຣທິຕ຺ວາ ສຫ ຕາຍ ຈ.

໘. ຣຎ຺ຎາ ສຸກຕສກ຺ກາຣາ, ຣຎ຺ໂຎ’ນຸຎ຺ຎາຍ ຈາຣິກໍ;

ຈຣິໍສຸ ລໍກາທີປມ຺ຫິ, ນິວສຸຎ຺ຈ ຍຖາຣຸຈິໍ.

໙. ຣາເມນ ວຸສິຕຐານໍ, ຣາມໂຄຓນ຺ຕິ ວຸຈ຺ຈຕິ;

ອຸຣຸເວລາ’ນຸຣາຘານໍ, ນິວາສາ ຈ ຕຖາ ຕຖາ.

໑໐. ຕຖາ ວິຊິຕທີຆາຍຸ-ໂຣຫຓານໍ ນິວາສກາ;

ວິຊິຕຄາໂມ ທີຆາຍຸ-ໂຣຫຓນ຺ຕິ ຈ ວຸຈ຺ຈຕິ.

໑໑. ກາເຣສິ ອນຸຣາໂຘ ໂສ, ວາປິໍ ທກ຺ຂິຓໂຕ ຕໂຕ;

ກາຣາເປຕ຺ວາ ຣາຊເຄຫໍ, ຕຕ຺ຖ ວາສມກປ຺ປຍີ.

໑໒. ມຫາຣາຊາ ປຓ຺ຑຸວາສຸ-ເທໂວ ຊຏ຺ຐສຸຕໍ ສກໍ;

ອຠຍໍ ອຸປຣຊ຺ຊມ຺ຫິ, ກາເລ ສມຠິເສຈຍິ.

໑໓. ທີຆາຍຸສ຺ສ ກຸມາຣສ຺ສ, ຕນໂຍ ທີຆຄາມຓິ;

ສຸຕ຺ວາ ອຸມ຺ມາທຈິຕ຺ຕໍ ຕໍ, ຕສ຺ສໍ ຊາຕກຸຕູຫໂລ.

໑໔. ຄເຫຕ຺ວາ’ປຕິສ຺ສ ຄາມໍ, ຕໍ ອປສ຺ສິ ມນຸຊາຘິປໍ;

ອທາ ສໂຫປຣາເຊນ, ຣາຊຸປຏ຺ຐານມສ຺ສໂສ.

໑໕. ຄວກ຺ຂາຠິມຸຂຏ຺ຐາເນ, ຕໍ ອຸເປຈ຺ຈ ຐິຕໍ ຕຸສາ;

ທິສ຺ວານ ຄາມິຓິໍ ຈິຕ຺ຕາ, ຣຕ຺ຕຈິຕ຺ຕາ’ຫ ທາສິກໍ.

໑໖. ‘‘ໂກ ເອໂສ’’ຕິ ຕໂຕ ສຸຕ຺ວາ,

ມາຕຸລສ຺ສ ສຸໂຕອິຕິ;

ທາສິໍ ຕຕ຺ຖ ນິໂຍເຊສິ,

ສທ຺ຘິໍກຕ຺ວານ ໂສ ຕໂຕ.

໑໗. ຄວກ຺ຂມ຺ຫິ ຑສາເປຕ຺ວາ, ຣຕ຺ຕິໍ ກກ຺ກຏຍນ຺ຕກໍ;

ອາຣຸຍ຺ຫ ຉິນ຺ທຍິຕ຺ວານ, ກວາຏໍ ເຕນ ປາວິສິ.

໑໘. ຕາຍ ສທ຺ຘິໍ ວສິຕ຺ວານ, ປຈ຺ຈູເສເຍວ ນິກ຺ຂມິ;

ເອວໍ ນິຈ຺ຈໍ ວສີ ຕຕ຺ຖ, ຉິທ຺ທາຠາວາ ອປາກໂຏ.

໑໙. ສາ ເຕນ ອຄ຺ຄຫີ ຄພ຺ຠໍ, ຄພ຺ເຠ ປຣິຓເຕ ຕໂຕ;

ມາຕຸ ອາໂຣຈຍີ ທາສີ, ມາຕາ ປຸຈ຺ຉິຍ ຘີຕຣໍ.

໒໐. ຣຎ຺ໂຎ ອາໂຣຈຍີ ຣາຊາ, ອມນ຺ເຕຕ຺ວາ ສຸເຕ’ພ຺ຣຫ຺ມາ;

ໂປສິໂຍໂສ’ປິ ອມ຺ເຫຫິ, ເທວ ຕສ຺ເສວ ຕໍ ອິຕິ.

໒໑. ປຸຕ຺ໂຕ ເຈ ມາຣຍິສ຺ສາມ, ຕ’ນ຺ຕິ ຕສ຺ສ ອທໍສຸ ຕໍ;

ສາ ສູຕິກາລສມ຺ປຕ຺ເຕ, ສູຕິ ເຄຫຎ຺ຈ ປາວິສິໍ.

໒໒. ສງ຺ກິຕ຺ວາ ໂຄປກໍ ຈິຕ຺ຕໍ, ກາລເວລຎ຺ຈ ທາສກໍ;

ຕສ຺ມິໍ ກມ຺ເມ ນິສ຺ສາຍາ’ຕິ, ຄາມຓິ ປຣິຈາຣເກ.

໒໓. ເຕ ປຏິຎ຺ຎໍ ອເທນ຺ເຕ ເຕ, ຣາຊປຸຕ຺ຕາ ອຆາຕຍຸໍ;

ຍກ຺ຂາ ຫຸຕ຺ວານ ຣກ຺ຂິໍສຸ, ອຸໂຠ ຄພ຺ເຠ ກຸມາຣກໍ.

໒໔. ອຎ຺ຎໍ ອຸປວິຊຎ຺ຎໍ ສາ, ສລ຺ລກ຺ຂາ ເປສິ ທາສິຍາ;

ຈິຕ຺ຕາ ສາ ຊນຍີ ປຸຕ຺ຕໍ, ສາ ອິຕ຺ຖິ ປນ ຘີຕຣໍ.

໒໕. ຈິຕ຺ຕໍ ສຫສ຺ສໍ ທາເປຕ຺ວາ, ຕສ຺ສາ ປຸຕ຺ຕໍ ສກມ຺ປິ ຈ;

ອາຓາເປຕ຺ວາ ຘີຕຣໍ ຕໍ, ນິປຊ຺ຊາເປສິ ສນ຺ຕິເກ.

໒໖. ຘີຕາ ລທ຺ຘາ’ຕິ ສຸຕ຺ວານ, ຕຸຏ຺ຐາ ຣາຊສຸຕາ ອຫຸໍ;

ມາຕາ ຈ ມາຕຸມາຕາ ຈ, ອຸໂຠ ປນ ກຸມາຣກໍ.

໒໗. ມາຕາມຫສ຺ສ ນາມຎ຺ຈ, ເຊຏ຺ຐສ຺ສ ມາຕຸລສ຺ສ ຈ;

ເອກໍ ກຕ຺ວາ ຕມກຣຸໍ, ປຓ຺ຑຸກາຠຍນາມກໍ.

໒໘. ລໍກາ ປາໂລ ປຓ຺ຑຸວາສຸ-ເທໂວ ຣຊ຺ຊມກາຣຍິ;

ຕິໍສ ວສ຺ສມ຺ຫິ ຊາຕມ຺ຫິ, ມໂຕ ໂສ ປຓ຺ຑຸກາຠເຍ.

໒໙. ຕສ຺ມິໍ ມຕສ຺ມິໍ ມນຸຊາຘິປສ຺ມິໍ,

ສພ຺ເພ ສມາຄມ຺ມ ນຣິນ຺ທປຸຕ຺ຕາ;

ຕສ຺ສາຠຍສ຺ສາຠຍທສ຺ສ ຠາຕຸ,

ຣາຊາຠິເສກໍ ອກຣຸໍ ອຸຬາຣາຕິ.

ສຸຊນປ຺ປສາທ ສໍເວຄຕ຺ຖາຍ ກເຕ ມຫາວໍເສ

ອຠຍາຠິເສໂກ ນາມ

ນວໂມ ປຣິຈ຺ເຉໂທ.