ທສມ ປຣິຈ຺ເຉທ

ປຓ຺ຑຸກາຠຍາຠິເສໂກ

໑. ອຸມ຺ມາທຈິຕ຺ຕາຍາຓຕ຺ຕາ, ທາສີ ອາທາຍ ທາຣກໍ;

ສມຸຄ຺ເຄ ປກ຺ຂິປິຕ຺ວານ, ທ຺ວາຣມຓ຺ຑລ ເກ ອຄາ.

໒. ຣາຊປຸຕ຺ຕາ ຈ ມິຄວໍ, ຄຕາ ຕຸມ຺ພຣກນ຺ທເຣ;

ທິສ຺ວາ ທາສິໍ ກຸຫິໍ ຍາສິ, ກິໍ ເມ ກນ຺ຕິ ຈ ປຸຈ຺ຉິສຸໍ.

໓. ທ຺ວາຣມຓ຺ຑລກໍ ຍາມິ, ຘີຕຸເມຄຸຬປູວກໍ;

ອິຈ຺ຈາຫ ໂອໂຣເປຫີຕິ, ຣາຊປຸຕ຺ຕໍ ກມພ຺ຣວຸໍ.

໔. ຈິຕ຺ໂຕ ຈ ກາລເວໂລ ຈ, ຕສ຺ສາ’ຣກ຺ຂາຍ ນິຄ຺ຄຕາ;

ມຫນ຺ຕໍ ສູກຣເວສໍ, ຕໍ ຂຓໍເຍວ ທສ຺ສຍຸໍ.

໕. ເຕ ຕໍ ສມນຸພນ຺ຘິໍສຸ, ສາສມາທາຍ ຕຕ຺ຣ’ຄາ;

ທາຣກຎ຺ຈ ສຫສ຺ສຎ຺ຈ, ອາຍຸຕ຺ຕສ຺ສ ອທາຣໂຫ.

໖. ຕສ຺ມິໍເຍວ ທິເນ ຕສ຺ສ, ຠຣິຍາ ຊນຍີ ສຸຕໍ;

ຍມເກ ຊນຍີ ປຸຕ຺ເຕ, ຠຣິຍໍ ເມ’ຕິ ໂປສິຕໍ.

໗. ໂສ ສຕ຺ຕວສ຺ສິໂກ ຈາ’ສິ, ຕໍ ວິຊານິຍ ມາຕຸລາ;

ຄນ຺ຕຸໍ ສຣສິ ກີຬນ຺ເຕ, ທາຣເກ ຈ ປໂຍຊຍຸໍ.

໘. ຊລຏ຺ຐໍ ຣຸກ຺ຂສຸສິຣໍ, ຊລຈ຺ຉາທິຕຉິທ຺ທກໍ;

ນິມຸຊ຺ຊມາໂນ ຉິທ຺ເທນ, ປວິສິຕ຺ວາ ຈິຣຏ຺ຐິໂຕ.

໙. ຕໂຕ ຕເຖວ ນິກ຺ຂມ຺ມ, ກຸມາເຣ ເສສທາຣເກ;

ອຸປຈ຺ຈ ປຸຈ຺ຉິຍນ຺ໂຕປິ, ວຎ຺ເຈຕ’ຎ຺ຎວໂຈຫິ ໂສ.

໑໐. ມນຸສ຺ເສຫາ’ຄເຕເຫໂສ, ນິວາເສຕ຺ວານ ວຕ຺ຖກໍ;

ກຸມາໂຣ ວາຣິໂມ ຄຍ຺ຫ, ສຸສິຣມ຺ຫິ ຐິໂຕ ອຫຸ.

໑໑. ວຕ຺ຖການິ ຄເຓຕ຺ວານ, ມາເຣຕ຺ວາ ເສສທາຣເກ;

ຄນ຺ຕ຺ວາ ອາໂຣຈຍຸໍ ສພ຺ເພ, ທາຣກາ ມາຣິຕາ ອິຕິ.

໑໒. ຄເຕສຸ ເຕສຸ ໂສ ຄນ຺ຕ຺ວາ, ອາຍຸຕ຺ຕກຆຣໍ ສກໍ;

ວສໍ ອສ຺ສາສິໂຕ ເຕນ, ອຫູ ທ຺ວາທສວສ຺ສິໂກ.

໑໓. ປຸນ ສຸຕ຺ວານ ຊີວນ຺ຕໍ, ກຸມາຣໍ ຕສ຺ສ ມາຕຸລໍ;

ຕຕ຺ຖ ໂຄປາລເກ ສພ຺ເພ, ມາເຣຕຸໍ ສນ຺ນິໂຍຊຍຸໍ.

໑໔. ຕສ຺ມິໍ ອຫນິ ໂຄປາລາ, ລທ຺ຘາ ເອກໍ ຈຕຸປ຺ປທໍ;

ອຄ຺ຄິໍ ອາຫຣິຕຸໍ ຄາມໍ, ເປເສຕຸໍ ຕໍ ກຸມາຣກໍ.

໑໕. ໂສ ຄນ຺ຕ຺ວາ ຆຣມາຍຸຕ຺ຕ-ປຸຕ຺ຕກໍເຍວ ເປສຍິ;

ປາທາ ຣຸຊນ຺ຕິ ເມ ເຕຫິ, ອຄ຺ຄິໍ ໂຄປາລສນ຺ຕິກໍ.

໑໖. ຕຕ຺ຖ ອງ຺ຄາຣ ມໍສຎ຺ຈ,

ຂາທິສ຺ສສິ ຕຸວໍ ອິຕິ;

ເນ ສິ ໂສ ຕໍ ວໂຈ ສຸຕ຺ວາ,

ອຄ຺ຄິໍ ໂຄປາລສນ຺ຕິກໍ.

໑໗. ຕສ຺ມິໍ ຂເຓ ເປສິຕາ ເຕ, ປຣິກ຺ຂິປິຍ ມາຣຍຸໍ;

ສພ຺ເພ ໂຄເປ ມາຣຍິຕ຺ວາ, ມາຕຸລານໍ ນິເວທຍຸໍ.

໑໘. ຕໂຖ ໂສຬສວສ຺ສໍ ຕໍ, ວິຊານິໍສຸ ຈ ມາຕຸລາ;

ມາຕາ ສຫສ຺ສຎ຺ຈາ’ທາສິ, ຕສ຺ສາ ຣກ຺ຂຎ຺ຈ ອາທິສິ.

໑໙. ອາຍຸຕ຺ໂຕ ມາຕຸສນ຺ເທສໍ, ສພ຺ພໍ ຕສ຺ສ ນິເວທິຍ;

ທຕ຺ວາ ທາສໍ ສຫສ຺ສຎ຺ຈ, ເປເສສິ ປຓ຺ຑຸລນ຺ຕິກໍ.

໒໐. ປຓ຺ຑຸລພ຺ຣາຫ຺ມໂຓ ນາມ, ໂຠຄວາ ເວທປາຣໂຄ;

ທກ຺ຂິຓສ຺ມິໍ ທິສາຠາເຄ, ວສີ ປຓ຺ຑຸລຄາມເກ.

໒໑. ກຸມາໂຣ ຕຕ຺ຖ ຄນ຺ຕ຺ວານ, ປສ຺ສິ ປຓ຺ຑຸລພ຺ຣາຫ຺ມຓໍ;

‘‘ຕ຺ວໍ ປຓ຺ຑຸກາຠໂຍ ຕາຕ’’, ອິຕິ ປຸຈ຺ຉິຍ ພ຺ຍາກເຕ.

໒໒. ຕສ຺ສ ກຕ຺ວານ ສກ຺ກາຣໍ, ອາຫ ຣາຊາ ຠວິສ຺ສສິ;

ສມສຕ຺ຕຕິວສ຺ສານິ, ຣຊ຺ຊໍ ຕ຺ວໍ ກາຣຍິສ຺ສສິ.

໒໓. ສິປ຺ປໍ ອຸຄ຺ຄຓ຺ຫ ຕາຕາຕິ, ສິປ຺ປຸຄ຺ຄຫມກາຣຍີ;

ຈນ຺ເທນ ຕສ຺ສ ປຸຕ຺ເຕນ, ຂິປ຺ປໍ ສິປ຺ປໍ ສມາປິຕໍ.

໒໔. ອທາ ສຕສຫສ຺ສໍ ໂສ, ໂຍຘສງ຺ຄຫກາຣຓາ;

ໂຍເຘສຸ ສງ຺ຄຫິເຕສຸ, ເຕນ ປຎ຺ຈສເຕສຸ ໂສ.

໒໕. ສິຍຸໍ ຍາຍ ຄຍິຕານິ, ປຓ຺ຓານິ ກນການິ ຕໍ;

ມເຫສິໍ ກຸຣຸຈນ຺ທຎ຺ຈ, ມມ ປຸຕ຺ຕໍ ປຸໂຣຫິຕໍ.

໒໖. ອິຠິ ວຕ຺ວາ ຘນໍ ທຕ຺ວາ, ສໂຍຘໍ ນິຫຣິ ຕໂຕ;

ໂສ ນາມໍ ສາວຍິຕ຺ວານ, ຕໂຕ ນິກ຺ຂມ຺ມ ປຸຎ຺ຎວາ.

໒໗. ລທ຺ຘພໂລ ນຄຣເກ, ກາສປພ຺ພຕ ສນ຺ຕິເກ;

ສຕ຺ຕສຕານິ ປຸຣິເສ, ສພ຺ເພສໍ ໂຠຊນານິ ຈ.

໒໘. ຕໂຕ ນຣສຫສ຺ເສນ, ທ຺ວິສເຕນ ກຸມາຣໂກ;

ຄິຣິກຓ຺ຑ ປພ຺ພຕໍ ນາມ, ອຄມາ ປຣິວາຣິໂຕ.

໒໙. ຄິຣິກຓ຺ຑສິໂວ ນາມ, ປຓ຺ຑຸກາຠຍ ມາຕຸໂລ;

ຕໍ ປຓ຺ຑຸວາສຸເທເວນ, ທິນ຺ນໍ ຠຸຎ຺ຊຕິ ເທສກໍ.

໓໐. ໂສ ກຣິສສຕໍ ປກ຺ກໍ, ຕທາ ລາເວຕິ ຂຕ຺ຕິໂຍ;

ຕສ຺ສ ຘີຕາ ຣູປວຕີ, ປາລີ ນາມາ’ສິ ຂຕ຺ຕິຍາ.

໓໑. ສາ ມຫາປຣິວາເຣນ, ຍານມາຣຸຍ຺ຫ ໂສຠນໍ;

ປິຕຸຠຕ຺ຕໍ ຄາຫຍິຕ຺ວາ, ລາວການຎ຺ຈ ຄຈ຺ຉຕິ.

໓໒. ກຸມາຣສ຺ສ ມນຸສ຺ສານໍ, ທິສ຺ວາ ຕຕ຺ຖ ກຸມາຣິກໍ;

ອາໂຣເຈສຸໍ ກຸມາຣສ຺ສ, ກຸມາໂຣ ສຫສາ’ຄໂຕ.

໓໓. ທ຺ເວຘາ ຕໍ ປຣິສໍ ກຕ຺ວາ, ສຕໍ ຍານມເປສຍິ;

ຕທນ຺ຕິກໍ ສປຣິສາ, ກຕ຺ຖ ຍາສີຕິ ປຸຈ຺ຉິຕໍ.

໓໔. ຕາຍ ວຸຕ຺ເຕຕຸ ສພ຺ພສ຺ມິໍ, ຕສ຺ສໍສາຣຕ຺ຕ ມານໂສ;

ອຕ຺ຕໂນ ສໍວິຠາຄຕ຺ຖໍ, ຠນ຺ເຕນາ’ຍາຈິ ຂຕ຺ຕິໂຍ.

໓໕. ສາສໂມຣຸຍ຺ຫ ຍານມ຺ຫາ, ອທາ ໂສວຓ຺ຓປາຕິຍາ;

ຠຕ຺ຕໍ ນິຄ຺ໂຣຘ ມູລສ຺ມິໍ, ຣາຊປຸຕ຺ຕສ຺ສ ຂຕ຺ຕິຍາ.

໓໖. ຄຓ຺ຫິ ນິຄ຺ໂຣຘປຓ຺ຓານິ, ໂຠເຊຕຸໍ ເສສເກ ຊເນ;

ໂສວຓ຺ຓຠາຊນານາ’ສຸໍ, ຕານິ ປຓ຺ຓານິ ຕໍ ຂເຓ.

໓໗. ຕານິ ທິສ຺ວາ ຣາຊປຸຕ຺ໂຕ, ສຣິຕ຺ວາ ທິຊຠາສິຕໍ;

ມເຫສິຠາວ ໂຍຄ຺ຄາເມ, ກຎ຺ຎາລທ຺ຘາຕິ ຕຸສ຺ສິໂສ.

໓໘. ສພ຺ເພ ໂຠຊາປຍີ ເຕສາ, ຕໍ ນ ຂີຍິຕ຺ຖ ໂຠຊນໍ;

ເອກສ຺ສ ປຏິວິໂສ’ວ, ຄຫິໂຕ ຕຕ຺ຖ ທິສ຺ສຖ.

໓໙. ເອວໍ ປຸຎ຺ຎຄຸຓູເປຕາ, ສຸກຸມາຣີ ກຸມາຣິກາ;

ສຸວຓ຺ຓປາລິ ນາເມນ, ຕໂຕປ຺ປຠຸຕ ອາສິ ສາ.

໔໐. ຕໍ ກຸມາຣ ຄເຫຕ຺ວານ, ຍານມາຣຸຍ຺ຫ ຂຕ຺ຕິໂຍ;

ມຫພ຺ພລ ປຣິພ຺ຍູຬ຺ໂຫ, ອນຸສໍຓີ ອປກ຺ກມິ.

໔໑. ຕໍ ສຸຕ຺ວານ ປິຕາ ຕສ຺ສາ, ນເຣ ສພ຺ເພ ອເປສຍິ;

ເຕ ຄນ຺ຕ຺ວາ ກລຫໍ ກຕ຺ວາ, ຕຊ຺ຊິຕາ ເຕຫິ ອາຄມຸໍ.

໔໒. ກລຫນຄຣໍ ນາມ, ຄາໂມ ຕຕ຺ຖ ກເຕ ອຫຸ;

ຕໍ ສຸຕ຺ວາ ຠາຕໂຣ ຕສ຺ສາ, ປຎ຺ຈຍຸທ຺ຘາຍຸ’ປາຄມຸໍ.

໔໓. ສພ຺ເພ ເຕ ປຓ຺ຑຸລສຸໂຕ, ຈນ຺ໂທເຍວ ອຆາຕຍິ;

ໂລຫິຕ ວາຫຂຓ຺ໂຑຕິ, ເຕສໍ ຍຸທ຺ຘມຫີ ອຫຸ.

໔໔. ມຫຕາ ພລ ກາຘຍນ,

ຕໂຕ ໂສ ປຓ຺ຑຸກາຠໂຍ;

ຄງ຺ຄາຍ ປາຣິເມ ຕິເຣ,

ໂທຬປພ຺ພຕກໍ ອຄາ.

໔໕. ຕຕ຺ຖ ຈຕ຺ຕາຣິ ວສ຺ສານິ, ວສິ ຕໍ ຕຕ຺ຖ ມາຕຸລາ;

ສຸຕ຺ວາ ຐເປຕ຺ວາ ຣາຊານໍ, ຕໍ ຍຸທ຺ຘຕ຺ຖມຸປາຄມຸໍ.

໔໖. ຂນ຺ຘາວາຣໍ ນິເວເສຕ຺ວາ, ຘູມຣກ຺ຂາຄ ສນ຺ຕິເກ;

ຠາຄິເນຍ຺ເຍນ ຍຸຊ຺ຌິໍສຸ, ຠາຄິເນຍ຺ໂຍ ຕຸ ມາຕຸເລ.

໔໗. ອນຸພນ຺ຘີ ໂອຣຄງ຺ຄໍ, ມລາເປຕ຺ວາ ນິວຕ຺ຕິຍ;

ເຕສຎ຺ຈ ຂນ຺ຘາວາຣມ຺ຫິ, ທຸເວ ວສ຺ສານິ ໂສ ວສີ.

໔໘. ຄນ຺ຕ຺ໂວ’ປຕິສ຺ສຄາມໍ ເຕ, ຕມຕ຺ຖໍ ຣາຊິໂນ’ພ຺ຣວຸໍ;

ຣາຊາເລຂໍ ກຸມາຣສ຺ສ, ສຣຫສ຺ສໍ ສປາຫິຓິ.

໔໙. ‘‘ປຸຎ຺ຊສ຺ສຸ ປາຣຄງ຺ຄໍ ຕ຺ວໍ, ມາ’ຄາ ໂອຣໍຕໂຕ’’ອິຕິ;

ຕໍ ສຸຕ຺ວາ ຕສ຺ສ ກຸຊ຺ຊິໍສຸ, ຠາຕໂຣ ນວ ຣາຊິໂນ.

໕໐. ອຸປຕ຺ຖມ຺ໂຠ ຕ຺ວເມວາ’ສິ, ຈິຣໍ ຕສ຺ສ ອິທານິ ຕຸ;

ຣຏ຺ຐໍ ທທາສິ ຕສ຺ມາ ຕ຺ວໍ, ມາເຣສ຺ສາມາ’ຕິ ອພ຺ຣວຸໍ.

໕໑. ໂສ ເຕສໍ ຣຊ຺ຊມປ຺ເປສິ, ເຕ ຕິສ຺ສໍ ນາມ ຠາຕຣໍ;

ສພ຺ເພວ ສຫິຕາ’ກໍສຸ, ຣຊ຺ຊສ຺ສ ປຣິນາຍກໍ.

໕໒. ເອໂສ ວີສຕິວສ຺ສານິ, ອຠໂຍ’ຠຍ ທາຍໂກ;

ຕຕ຺ໂຖ’ປຕິສ຺ສຄາມມ຺ຫິ, ຣາຊາ ຣຊ຺ຊມກາຣຍິ.

໕໓. ວສນ຺ຕິ ຘູມຣກ຺ຂາເຄ, ສເຣ ຕຸມ຺ພຣິຍງ຺ຄເຓ;

ຈຣເຕ ວຬວາ ຣຸປາ, ຍກ຺ຂີ ເຈຕິຍນາມິກາ.

໕໔. ເອໂກ ທິສ຺ວານ ເສນງ຺ຄໍ, ອຸຕ຺ຕປາທໍ ມໂນຣມໍ;

ອາໂຣເຈສິ ກຸມາຣສ຺ສ, ວຬເວ’ຕ຺ຕີ’ທິສີ ອິຕິ.

໕໕. ກຸມາໂຣ ຣສ຺ມິມາທາຍ, ຄເຫຕຸໍ ຕໍ ອຸປາຄມິ;

ປຈ຺ຉໂຕ ອຄຕໍ ທິສ຺ວາ, ຠີຕາ ເຕເຊນ ຕສ຺ສສາ.

໕໖. ຘາວິ’ນນ຺ຕຣຘາຍິຕ຺ວາ, ຘາວນ຺ຕິ ມນຸພນ຺ຘິໂສ;

ຘາວມານາ ສຣໍ ຫໍ ສາ, ສຕ຺ຕກ຺ຂຕ຺ຕຸໍ ປຣິກ຺ຂິປິ.

໕໗. ໂອຕຣິຕ຺ວາ ມຫາຄງ຺ຄໍ, ອຸຕ຺ຕຣິຕ຺ວາ ຕໂຕ ປນ;

ຘຸມຣກ຺ຂໍ ປພ຺ພຕໍ ຕໍ, ສຕ຺ຕກ຺ຂຕ຺ຕຸໍ ປຣິກ຺ຂິປິ.

໕໘. ຕໍ ສຣໍ ປຸນ ຕິກ຺ຂຕ຺ຕຸໍ, ປຣິກ຺ຂິປິ ຕໂຕ ປຸນ;

ຄງ຺ຄໍ ກຈ຺ຉກຕິຕ຺ເຖນ, ສໂມຕຣິ ຕຫິໍ ຕຸ ໂສ.

໕໙. ຄເຫສິຕໍ ວາລຘິສ຺ມິໍ, ຕາລປຕ຺ຕຎ຺ຈ ໂຕຍຄໍ;

ຕສ຺ສ ປຸຎ຺ຎານຸຠາເວນ, ໂສ ອໂຫສິ ມຫາ ອສິ.

໖໐. ອຸຈ຺ຈາເຣສິ ອສິໍ ທຊ຺ຊໍ, ‘‘ມາໂຣມີ’’ຕິ ຕມາຫ ສາ;

ຣຊ຺ຊໍ ຄເຫຕ຺ວາ ເຕ ທຊ຺ຊໍ, ສາມິ ມາມໍ ອມາຣຍິ.

໖໑. ຄີວາຍ ຕໍ ຄເຫຕ຺ວາ ໂສ, ວິຊ຺ຌິຕ຺ວາ ອສິໂກຏິຍາ;

ນາສາຍ ຣຊ຺ຊຸຍາ ພນ຺ຘິ, ສາ ອໂຫສິ ວສານຸຄາ.

໖໒. ຄນ຺ຕ຺ວາ ຕໍ ຘຸມຣກ຺ຂໍ ໂສ, ຕມາຣຸຍ຺ຫ ມຫພ຺ພໂລ;

ຕຕ຺ຖ ຈຕ຺ຕາຣິ ວສ຺ສານິ, ຘູມຣກ຺ຂນ ເຄ ວສິ.

໖໓. ຕໂຕ ນິກ຺ຂມ຺ມ ສພໂລ, ອາຄມ຺ມາ’ຣິຏ຺ຐປພ຺ພຕໍ;

ສຸທ຺ຘິກາລມເປກ຺ຂນ຺ໂຕ, ຕຕ຺ຖ ສຕ຺ຕສມາວສິ.

໖໔. ທ຺ເວ ມາຕຸເລ ຐເປຕ຺ວານ, ຕສ຺ສ ເສສຏ຺ຐມາຕຸລາ;

ຍຸທ຺ຘສຊ຺ຊາ ອຣິຏ຺ຐໍ ຕໍ, ອຸປສງ຺ກມ຺ມ ປພ຺ພຕໍ.

໖໕. ຂນ຺ຘາວາຣໍ ນຄຣເກ, ນິເວເສຕ຺ວາ ຈມູປຕິໍ;

ທຕ຺ວາ ປຣິກ຺ຂິປາເປສຸໍ, ສມນ຺ຕາ’ຣິຏ຺ຐປພ຺ພຕໍ.

໖໖. ຍກ຺ຂິນິຍາ ມນ຺ຕຍິຕ຺ວາ, ຕສ຺ສາ ວຈນຍຸຕ຺ຕິຍາ;

ທຕ຺ວາ ຣາຊປຣິກ຺ຂາຣໍ, ປຓ຺ຓາກາຣາ ຍຸວານິ ຈ.

໖໗. ‘‘ຄຓ຺ຫາຖ ສພ຺ພາເນ’ຕານິ, ຂມາເປສ຺ສາມິ ໂວ ອຫໍ’’;

ອິຕິ ວຕ຺ວານ ເປເສສິ, ກຸມາໂຣ ປຸຣໂຕ ພລໍ.

໖໘. ຄຓ຺ຫິສ຺ສາມິ ປວິຏ຺ຐນ຺ຕິ, ວິສ຺ສຏ຺ເຐສຸ ຕຸ ເຕສຸ ໂສ;

ອາຣຸຍ຺ຫ ຍກ຺ຂວຬວໍ, ມຫາພລປຸຣກ຺ຂໂຕ.

໖໙. ຍຸທ຺ຘາຍ ປາວິສິ ຍກ຺ຂີ, ມຫາຣາວ ມຣາປິສາ;

ອນ຺ໂຕ ພຫິພລຎ຺ຈສ຺ສ, ອຸກ຺ກຸຏ຺ຐິໍ ມຫຕິໍ ອກາ.

໗໐. ກຸມາຣປຸຣິສາ ສພ຺ເພ, ປຣເສນາ ນເຣ ພຫູ;

ຆາເຕຕ຺ວາ ມາຕຸເລ ຈ’ຕ຺ຖ, ສີສຣາສິໍ ອກໍສຸ ເຕ.

໗໑. ເສນາປຕິ ປາລຍິຕ຺ວາ, ຄຸມ຺ພຏ຺ຐານໍ ສປາວິສິ;

ເສນາປຕິ ຄຸມ຺ພໂກ’ຕິ, ເຕນ ເອສ ປວຸຈ຺ຈຕິ.

໗໒. ອຸປຣິຏ຺ຐມາຕຸລສິຣໍ, ສີສຣາສິໍ ສປສ຺ສິຍ;

ລາພຸຣາສີ’ວ ອິຈ຺ຉາຫ, ເຕນາ’ສິ ລາພຸຄາມໂກ.