ອຏ຺ຐມ ປຣິຈ຺ເຉທ

ປຓ຺ຑຸວາສຸເທວາຠິເສໂກ

໑. ວິຊໂຍ ໂສ ມຫາຣາຊາ, ວສ຺ເສ ອນ຺ຕິມເກ ຐິໂຕ;

ອິຕິ ຈິນ຺ຕຍິ ‘‘ວຸທ຺ໂຘ’ຫໍ, ນ ຈ ວິຊ຺ຊຕິ ເມ ສຸໂຕ.

໒. ກິຈ຺ເຉນ ວາສິຕໍ ຣຏ຺ຐໍ, ນສ຺ເສຍ຺ຍ ມມ ອຈ຺ຈເຍ;

ອາຓາເປຍ຺ຍໍ ຣຊ຺ຊເຫຕຸ-ສຸມິຕ຺ຕໍ ຠາຕຣໍ ມມ.

໓. ອຖາ’ມຈ຺ເຈຫິ ມນ຺ເຕຕ຺ວາ, ເລຂໍ ຕຕ຺ຖ ວິສຊ຺ຊຍິ;

ເລຂໍ ທຕ຺ວານ ວິຊໂຍ, ນ ຈິເຣນ ທິວງ຺ຄໂຕ.

໔. ຕສ຺ມິໍ ມເຕ ອມຈ຺ຈາ ເຕ, ເປກ຺ຂນ຺ຕາ ຂຕ຺ຕິຍາຄມໍ;

ອຸປຕິສ຺ສຄາເມ ຐຕ຺ວານ, ຣຏ຺ຐໍ ສມຸນຸສາສິສຸໍ.

໕. ມເຕ ວິຊຍຣາຊມ຺ຫິ, ຂຕ຺ຕິຍາຄມນາ ປຸຣາ;

ເອກໍ ວສ຺ສໍ ອຍໍ ລໍກາ-ທີໂປ ອາສິ ອຣາຊໂກ.

໖. ຕສ຺ມິໍ ສີຫປຸເຣ ຕສ຺ສ, ສີຫພາຫຸສ຺ສ ຣາຊິໂນ;

ອຈ຺ຈເຍນ ສຸມິຕ຺ໂຕ ໂສ, ຣາຊາ ຕສ຺ສ ສຸໂຕ ອຫຸ.

໗. ຕສ຺ສ ປຸຕ຺ຕາ ຕໂຍ ອາສຸໍ, ມທ຺ທຣາຊສ຺ສ ຘີຕຸຍາ;

ທູຕາ ສີຫປຸຣໍ ຄນ຺ຕ຺ວາ, ຣຎ຺ໂຎ ເລຂໍ ອທໍສຸ ເຕ.

໘. ເລຂໍ ສຸຕ຺ວານ ໂສ ຣາຊາ, ປຸຕ຺ເຕ ອາມນ຺ຕຍີ ຕໂຍ;

ອຫໍ ມຫລ຺ລໂກ ຕາຕາ, ເອໂກ ຕຸມ຺ເຫສຸ ຄຈ຺ຉຕຸ.

໙. ລໍກໍ ເນກຄຸຓໍ ກນ຺ຕໍ, ມມ ຠາຕຸສ຺ສ ສນ຺ຕກໍ;

ຕສ຺ສ’ຈ຺ຈ ເຍນ ຕຕ຺ເຖວ, ຣຊ຺ຊໍ ກາເຣຕຸ ໂສຠນໍ.

໑໐. ກຓິຏ຺ຐໂກ ປຓ຺ຑຸວາສຸ-ເທໂວ ຣາຊກຸມາຣໂກ;

‘‘ຄມິສ຺ສາມີຕິ ຈິນ຺ເຕຕ຺ວາ, ຎຕ຺ວາ ໂສຕ຺ຖິ ຄຕມ຺ປິ ຈ.

໑໑. ປິຕຣາ ສມນຸຎ຺ຎາໂຕ, ທ຺ວຕ຺ຕິໍສາມຈ຺ຈ ທາຣເກ;

ອາທາຍ ອາຣຸຫີ ນາວໍ, ປຣິພ຺ພາຊກລິງ຺ຄວາ.

໑໒. ມຫາກນ຺ທຣນຊ຺ຊາ ເຕ, ມຸຂທ຺ວາຣມ຺ຫິ ໂອຕຣໍ;

ເຕ ປຣິພ຺ພາຊເກ ທິສ຺ວາ, ຊໂນ ສກ຺ກຣິ ສາຘຸກໍ.

໑໓. ປຸຈ຺ຉິຕ຺ວາ ນຄຣໍ ເອຕ຺ຖ, ອຸປຍນ຺ຕໍ ກເມນ ເຕ;

ອຸປຕິສ຺ສ ຄາມໍ ສມ຺ປຕ຺ຕາ, ເທວຕາ ປຣິປາລິຕາ.

໑໔. ອມຈ຺ຈາ’ນຸມໂຕ’ມຈ຺ໂຈ, ປຸຈ຺ຉິ ເນມິຕ຺ຕກາ ຕຫິໍ;

ຂຕ຺ຕິຍາ’ຄມນໍ ຕສ຺ສ, ໂສ ພ຺ຍາກາສິ ປຣໍປິ ຈ.

໑໕. ສຕ຺ຕເມ ທີວເສເຍວ, ອາຄມິສ຺ສຕິ ຂຕ຺ຕິໂຍ;

ພຸທ຺ຘສາສນ ເມຕສ຺ສ, ວໍສໂຊ’ວ ຐເປສ຺ສຕິ.

໑໖. ສຕ຺ຕເມ ທິວເສເຍວ, ເຕ ປຣິພ຺ພາຊເກ ຕຫິໍ;

ປຕ຺ເຕ ທິສ຺ວານ ປຸຈ຺ຉິຕ຺ວາ, ອມຈ຺ຈາ ເຕ ວິຊານິຍ.

໑໗. ຕໍ ປຓ຺ຓຸວາສຸເທວໍ ເຕ, ລໍກາຣຊ຺ເຊນ ອປ຺ປຍຸໍ;

ມເຫສິຍາ ອຠາວາໂສ, ນ ຕາວ ອຠິເສຈຍິ.

໑໘. ອມິໂຕທນສກ຺ກສ຺ສ, ປຓ຺ຑຸສກ຺ໂກ ສຸໂຕ ອຫຸ;

ຎຕ຺ວາ ວິນາສໍ ສກ຺ຍານໍ, ໂສ ອາທາຍ ສກໍ ຊນໍ.

໑໙. ຄນ຺ຕ຺ວາ ອຎ຺ຎາປເທເສນ, ຄງ຺ຄາປາຣໍ ຕຫິໍ ປຸຣໍ;

ມາເປຕ຺ວາ ຕຕ຺ຖ ກາເຣສິ, ຣຊ຺ຊໍ ຕສ຺ສ ສຸເຕ ລຠິ.

໒໐. ຘີຕາ ກຓິຏ຺ຐິຕາ ອາສິ, ຠທ຺ທກຈ຺ຈານ ນາມິກາ;

ສພ຺ພລກ຺ຂຓສມ຺ປນ຺ນາ, ສຸຣູປາ ອຠິປຕ຺ຖິຕາ.

໒໑. ຕທຕ຺ຖໍ ສຕ຺ຕຣາຊາໂນ, ປຓ຺ຓາກາເຣ ມຫາຣເຫ;

ເປເສສຸໍ ຣາຊິໂນ ຕສ຺ສ, ຠີໂຕ ຣາຊູຫິ ໂສ ປນ.

໒໒. ຎຕ຺ວານ ໂສຕ຺ຖິຄມນໍ, ອຠິເສກຜລມ຺ປິ ຈ;

ສຫທ຺ວຕ຺ຕິໍສ ອິຕ຺ຖີຫິ, ນາວໍ ອາໂຣປິຍາ’ສຸຕໍ.

໒໓. ຄງ຺ຄາຍ ຂິປິ ຄຓ຺ຫາຕຸ, ປຫຸ ເມ ຘີຕຣໍ ອິຕິ;

ຄເຫຕຸໍ ເຕ ນ ສກ຺ຂິໍສຸ, ນາວາສາປນ ສີຆຄາ.

໒໔. ທຸຕິເຍ ທິວເສເຍວ, ໂຄຓາຄາມກ ປຏ຺ຏນໍ;

ປຕ຺ຕາປພ຺ພຊິຕາ ກາຣາ, ສພ຺ພາ ຕາ ຕຕ຺ຖ ໂອຕຣຸໍ.

໒໕. ປຸຈ຺ຉິຕ຺ວາ ນຄຣໍ ເອຕ຺ຖ, ຕາ ກເມໂນປຍນ຺ຕິໂຍ;

ອຸປຕິສ຺ສຄາມໍ ສມ຺ປຕ຺ຕາ, ເທວຕາ ປຣິປາລິຕາ.

໒໖. ເນມິຕ຺ຕກສ຺ສ ວຈນໍ, ສຸຕ຺ວາ ຕຕ຺ຖາ’ຄຕາ ຕຸ ຕາ;

ທິສ຺ວາ ອມຈ຺ໂຈ ປຸຈ຺ຉິຕ຺ວາ, ຎຕ຺ວາ ຣຎ຺ໂຎ ສມປ຺ປຍິ.

໒໗. ຕໍ ປຓ຺ຑຸວາສຸເທວໍ ເຕ, ອມຈ຺ຈາ ສຸທ຺ຘພຸທ຺ຘິໂນ;

ຣຊ຺ເຊ ສມຠິສິຎ຺ຈິໍສຸ, ປຸຓ຺ຓສພ຺ພມໂນຣຖໍ.

໒໘. ສຸຠທ຺ທກຈ຺ຈານ ມໂນມຣູປິນິໍ;

ມເຫສີຠາເວ ອຠິສິຎ຺ຈິຍ’ຕ຺ຕໂນ;

ສຫຄຕາ ຕາຍ ປທາສິ ອຕ຺ຕນາ;

ສຫາຄຕານໍ ວສິ ຠູມິໂປ ສຸຂນ຺ຕີ.

ສຸຊນປ຺ປສາທ ສໍເວຄຕ຺ຖາຍ ກເຕ ມຫາວໍເສ

ປຓ຺ຑຸວາສຸເທວາຠິເສໂກ ນາມ

ອຏ຺ຐໂມ ປຣິຈ຺ເຉໂທ.