ທ຺ວິສຏ຺ຐິມປຣິຈ຺ເຉທ

ປຣມຓ຺ຑລາຠິຄມໂນ

໑. ອຕ຺ຕນາຠິມຕສ຺ສາ’ສຸ, ຊາຕເທສສ຺ສ ປຕ຺ຕິຍາ;

ສມ຺ປຸຓ຺ຓມນສງ຺ກປ຺ໂປ, ທຸສ຺ສງ຺ກປວິວຊ຺ຊິໂຕ.

໒. ວຊິຣູປໂມຣຸປຎ຺ຎາ, ພເລນ ຄຸຣຸສນ຺ຕິເກ;

ລຫຸໍ ພຫຸຎ຺ຈ ຄຓ຺ຫນ຺ໂຕ, ສິປ຺ປຊາຕມເນກ ກໍ.

໓. ຊິນາຄເມສຸ ເນເກສຸ, ໂກຏິລ຺ລາ ທີສຸ ນີຕິສຸ;

ສທ຺ທສຕ຺ເຖ ຈ ກາເວຍ຺ເຍ, ສນິຆຓ຺ຑຸກ ເກຏຸເຠ.

໔. ນຈ຺ຈຄີເຕສຸ ສຕ຺ເຖສຸ, ຫຕ຺ຖິສິປ຺ປາທິເກສຸ ຈ;

ຘນຸ ຂຄ຺ຄາທິເນເກສຸ, ສຕ຺ເຖສຸ ຈ ວິເສສໂຕ.

໕. ປາຣປ຺ປຕ຺ໂຕ ວິນີຕຕ຺ໂຕ, ປິຕຸ ຣຎ຺ໂຎ ສມາຈຣິ;

ອຘິປ຺ປາຍານຸກຸລໍ’ວ, ສທາ ຠຕ຺ຕິປຸຣສ຺ສໂຣ.

໖. ຕທາ ສທາ ທຣາຈາຣ-ຄຸຓາຣາຘິຕມານໂສ;

ປິເຍນ ວິຍ ມິຕ຺ເຕນ, ເຕນ ສທ຺ຘິໍ ມຫີປຕິ.

໗. ອຸຍ຺ຍານຊລກີຬາທິ-ສຸຂໍ ນານປ຺ປກາຣກໍ;

ອນຸໂຠຕ຺ວາ ສເທສສ຺ມິໍ, ສຎ຺ຈຣນ຺ໂຕ ຕຫິໍ ຕຫິໍ.

໘. ເອກທາສງ຺ຂເສນາຘິ-ປຕິນາ ທຬ຺ຫຠຕ຺ຕິນາ;

ສຣຏ຺ຐສີມາ ຣກ຺ຂາຍ, ໂຍ ຊິເຕນ ພລີຍສາ.

໙. ອຊ຺ຌາວຸຕ຺ຖສ຺ສ ຈ ພລຕ຺ຖ-ລິນມສ຺ສ ຈ ສນ຺ຕິກໍ;

ຄາມສາ’ຄຎ຺ຉິ ສຸຕ຺ວານ, ຕມຕ຺ຖໍ ຘຊິນີປຕິ.

໑໐. ຄາມໍ ຕໍ ສາຘຸກໍ ສຊ຺ຊຸ, ສຊ຺ຊາເປຕ຺ວາ ສປຸຕ຺ຕກໍ;

ປຈ຺ຈຸຄ຺ຄນ຺ຕ຺ວາ ມຫີປາລໍ, ປຓມິຕ຺ວາ ຐິໂຕ ຕທາ.

໑໑. ປິຕາ ປຸຕ຺ໂຕ ອຸໂຠ ຕສ຺ສ, ສມ຺ຠາສິຍ ປິຍໍ ວໂຈ;

ເນກຘາ’ຣາຘິຕາ ເຕນ, ຕໍ ຄາມໍ ສມຸປາຄຄຸໍ.

໑໒. ຕຫິໍ ກຕິຈິ ຠູປາໂລ, ວາສເຣ ວີຕິນາມິຍ;

ເສນາປຕິໍ ສມາຫູຍ, ອິທໍ ວຈນໍ ມພ຺ຣວິ.

໑໓. ປຸຕ຺ໂຕ ເມ ທານິວຍສິ, ຐິໂຕ’ ປນຍນາຣເຫ;

ຕສ຺ໂສປນຍນໍ ກາຕຸໍ, ມໂຫປກຣຓໍ ລຫຸໍ.

໑໔. ສຊ຺ເຊຕພ຺ພນ຺ຕິ ຕໍ ສຸຕ຺ວາ, ໂສປິ ເສນາຘິນາຍໂກ;

ສພ຺ພຸປກຣຓໍ ຂິປ຺ປໍ, ມງ຺ຄລຕ຺ຖໍ ສຸສຊ຺ຊຍິ.

໑໕. ສຸຄນ຺ຘ ທີປປຸປ຺ຜາທິ-ວຕ຺ຖູຫິ ທິວສຕ຺ຕຍໍ;

ປຸພ຺ພກາຣໍ ກຣິຕ຺ວານ, ມຫນ຺ຕໍ ຣຕນຕ຺ຕເຍ.

໑໖. ເວທິກາຈາຣທກ຺ເຂຫິ, ທ຺ວິເຊຫິ ປຸຖຸວີປຕິ;

ສມ຺ປຠາວານຸ ຣູປໍວ, ມງ຺ຄລໍ ຕໍ ສມາປິຍ.

໑໗. ປຣກ຺ກມກຸມາເຣນ, ເຕນ ສທ຺ຘິໍ ສມາຣຠິ;

ວສນ຺ຕກີຬໍ ມຫຕິໍ, ສາມຈ຺ໂຈ ກີຬິຕຸໍ ຕທາ.

໑໘. ຣາຊາ ກິຕ຺ຕິ ສິຣີເມໂຆ-ໂຣຫເຓ ວສໂຕ ຕທາ;

ສິຣີວລ຺ລຠນາມສ຺ສ, ສຠາຕຸ ມຣຓມ຺ປິ ຈ.

໑໙. ມາຓຠຣຓນາມສ຺ສ, ຣຊ຺ຊລາຠຎ຺ຈ ເທວິຍາ;

ມິຕ຺ຕາຍ ປຏິລາຠຎ຺ຈ, ສິຣີວລ຺ລຠສູນຸ ໂນ.

໒໐. ໂຣຫຓາຄຕທູເຕຫິ, ສຸຓິຕ຺ວາ ສກຠາຕຸໂນ;

ກາລກ຺ຣິຍາຍ ສຎ຺ຊາຕ-ໂສກເວຄໍ ສຸທຸສ຺ສຫໍ.

໒໑. ມິຕ຺ຕາຍຕນຍຸປ຺ປຕ຺ຕິ ປວຕ຺ຕິໍ ສວເຓນ ຕໍ;

ວິເນຍ຺ຍ ວິຣໂຕ ຕມ຺ຫາ, ວສນ຺ຕສມຍຸສ຺ສວາ.

໒໒. ນິວຕ຺ເຕຕ຺ວານ ຕຕ຺ເຖວ, ເສນານິໍ ສງ຺ຂນາມກໍ;

ປຸຕ຺ເຕນ ສຫ ໂສ ສງ຺ຂ-ຕ຺ຖລິ ນາມໍ ປຸຣໍ ຄມິ.

໒໓. ປຣກ຺ກມກຸມາເຣນ, ເຕນ ສທ຺ຘິໍ ຕຫິໍ ສຸຂໍ;

ວສໂຕ ຕສ຺ສ ຠູປສ຺ສ, ວສ຺ສເມກມຕິກ຺ກມິ.

໒໔. ມາຓາຠຣຓຠູປສ຺ສ, ເທວີ ຈາປິ ປຠາວຕີ;

ລຠິຕ຺ຖ ທຸຕິຍາ ກິຕ຺ຕິ-ສິຣີ ເມຆວ຺ຫຍໍ ສຸຕໍ.

໒໕. ສຸຓິຕ຺ວາ ຕຎ຺ຈ ໂສ ອມ຺ຫໍ, ວໍໂສ ຊາໂຕ ມຫາ’’ອິຕິ;

ອຫຸ ກິຕ຺ຕິສິຣີເມໂຆ, ຕທາ ອຕ຺ຕມໂນ ຠຸສໍ.

໒໖. ລໍກາທີໂປປໂຠເຄກ-ເຫຕຸນາ ມຫຕາ ສຕາ;

ອສາຘາຣຓຠູເຠນ, ໂຈທິໂຕ ປຸຎ຺ຎກມ຺ມຸນາ.

໒໗. ກຸມາໂຣ ໂສ’ຖ ປິຕຣາ, ປິຍມິຕ຺ເຕ ວິຍຕ຺ຕນິ;

ກຣິຍມານໍ ສສ຺ເນຫໍ, ມຫນ຺ຕໍ ໂຈ’ປລາລນໍ.

໒໘. ສຈິວານມເນເກສໍ, ຠຍຠຕ຺ຕີ ປຸຣສ຺ສຣໍ;

ກ຺ຣິຍມານມຸປຏ຺ຐານໍ, ນ ມຎ຺ຎນ຺ໂຕ ຕິຓາຍປິ.

໒໙. ລໍກາທີປມິມໍ ສພ຺ພ ເມກຈ຺ຉຕ຺ໂຕ ປໂສຠິຕໍ;

ຂິປ຺ປໍ ກາເຣຕຸກາໂມ ໂສ, ສຍໍ ອິຕິ ວິຈິນ຺ຕຍິ.

໓໐. ເກສ ອກ຺ຂກ ຄີວຏ຺ຐິ-ທາຐາ ປຕ຺ຕານ ເມວ ຈ;

ປທເຈຕ຺ຍ ມຫາໂພຘິ-ສາຂານຎ຺ຈາປິ ສຕ຺ຖຸໂນ.

໓໑. ຈຕຸຣາສີຕິສຫສ຺ສານໍ, ຘມ຺ມກ຺ຂນ຺ຘານ ເມວ ຈ;

ສມ຺ມາສມ຺ພຸທ຺ຘກປ຺ປານໍ, ອາຘາຣຕ຺ຕາ ຈ ນິຈ຺ຈໂສ.

໓໒. ອາກຣຕ຺ຕາ ຈ ເນເກສໍ, ມຓິມຸຕ຺ຕາທິວຕ຺ຖູນໍ;

ສມ຺ມໂຕປິ ວິສິຏ຺ໂຐຕິ, ທີໂປນາຕິ ມຫາ ອຍໍ.

໓໓. ຕໂຍ ເມ ປິຕໂຣ ຠູປາ, ມາຕຸໂລປິ ຈ ສພ຺ພຖາ;

ເອກຈ຺ຉຕ຺ເຕນ ວຕ຺ເຕຕຸ, ມສມຕ຺ຖາ ວິຠຊ຺ຊິ’ມໍ.

໓໔. ຠຸຎ຺ຊນ຺ຕາ ເອຕ຺ຕເກເນວ, ກຕກິຈ຺ຈາ ມຍໍ ອິຕິ;

ມຎ຺ຎນ຺ຕາ ວິຄຕຈ຺ຉນ຺ທາ’ຠິເສກມ຺ຫິ ກຸໂລຈິເຕ.

໓໕. ຣຏ຺ເຐສເກ ສເກເຍວ, ອິສ຺ເສຣໍ ສມ຺ປວຕ຺ຕຍຸໍ;

ກສິກມ຺ມາທິກໍ ຄາມ-ໂຠຊກາ ວິຍ ນິສ຺ສິຕາ.

໓໖. ເຕສຸ ກິຕ຺ຕິສິຣິ ເມຆໍ, ເປຕ຺ເຕຍ຺ຍໍ ເມ ຐເປຕ຺ວ ເຕ;

ອຄມໍສຸ ຍຖາກມ຺ມໍ, ເສສາ ຠູປຕໂຍ ຕໂຍ.

໓໗. ມຈ຺ຈານໍ ປຣມໍ ອາຍຸ, ວເຕ’ທານິ ປຣິຕ຺ຕກໍ;

ພາລາຍຸວາໂນ ວຸທ຺ຘາ ຈ, ອິເມ ສຕ຺ຕາ’ນຸປຸພ຺ພໂສ.

໓໘. ປາປຸຓິສ຺ສນ຺ຕິ ມຣຓ-ມີຕິ’ຍໍ ນິຍໂມປິ ຈ;

ນ ເຫວ ອສ຺ມິໍ ໂລກສ຺ມິໍ, ສໍວິຊ຺ຊຕິ ກທາຈິປິ.

໓໙. ຕສ຺ມາ ສຣີຣເກ ອສ຺ມິໍ, ຠງ຺ຄຸເຣ ສາຣວຊ຺ຊິເຕ;

ຫີຬິເຕ ສາຣທສ຺ສີຫິ, ອເປກ຺ຂໍ ຫິຕ຺ວາ ສພ຺ພຖາ.

໔໐. ປິຫນິເຍ ຍໂສເທເຫ, ຈິຣຏ຺ຐາຍິມ຺ຫິ ສພ຺ພທາ;

ອມ຺ຫາທິເສຫິ ກຕ຺ຕພ຺ໂພ, ຣາຊປຸຕ຺ເຕຫິ ອາທໂຣ.

໔໑. ອຸມ຺ມຄ຺ຄຊາຕກາທີສຸ, ຈາຣິຕ຺ຕຎ຺ຈາປິ ຠູມິສຸ;

ວິຫິຕໍ ໂພຘິສຕ຺ເຕນ, ວີຣຠາວາທິນິສ຺ສິຕໍ.

໔໒. ຣາມາຍຓຠາຣຕາທິ-ໂລກິຍາສຸ ກຖາສຸປິ;

ຣາມສ຺ສ ວິກ຺ກມຎ຺ເຈວ, ຕສ຺ສ ຣາວຓຆາຕິໂນ.

໔໓. ທຸໂຍຘນາທິຣາຊາໂນ, ຫນ຺ຕ຺ວາຍຸທ຺ເຘ ປວຕ຺ຕິຕໍ;

ວິກ຺ກມາຕິ ສຍຎ຺ເຈວ, ປຎ຺ຈນ຺ນໍ ປຓ຺ຑຸສູນູນໍ.

໔໔. ອິຕິຫາສກຖາຍຎ຺ຈ, ເທວາສຸຣຣເຓ ປຸຣາ;

ທຸສ຺ສນ຺ຕາທິມຫີເປຫິ, ກຕຎ຺ຈ ຈຣິຕພ຺ຠູຕໍ.

໔໕. ອຸມ຺ມູລິຕວໂຕ ຕສ຺ສ, ນນ຺ທວໍສນຣິສ຺ສເຣ;

ຈາຣກ຺ກທ຺ວິຊເສຏ຺ຐສ຺ສ, ສຸຕ຺ວາ ພຸທ຺ຘິພລມ຺ປິ ຈ.

໔໖. ສພ຺ພາ ເນຕານິ ໂລກມ຺ຫິ, ຍາວຊ຺ຊທິວສາ ຠຸວິ;

ເຕສໍ ອສນ຺ນິຘາເນປິ, ສຸປ຺ປສິທ຺ຘິໍ ຄຕານິ ຫິ.

໔໗. ສຸລທ຺ຘໍ ຊີວິຕໍ ເຕສໍ, ອສາຘາຣຓມີທິສໍ;

ຈຣິຕາຕິສຍໍ ກຕ຺ຕຸໍ, ສມຕ຺ຖາ ໂຫນ຺ຕິ ເຍ ຠຸວິ.

໔໘. ຊາຍິຕ຺ວາ ຂຕ຺ຕວໍສມ຺ຫິ, ຂຕ຺ຕວີຣວໂຣຘິຕໍ;

ຍທິຫໍ ນ ກຣິສ຺ສາມິ, ໂມຆາ ເມ ຊາຕິ ເຫສ຺ສຕິ.

໔໙. ເຕສມພ຺ຠຘິກາ ກາລ-ສມ຺ປທາເຍວ ເກວລໍ;

ມຍາ ເຕ ອຘິກາ ກິນ຺ຕຸ, ປຎ຺ຎາທີຫີຕິ ຈິນ຺ຕິຍ.

໕໐. ປິຕຸຣາຊາ ຈ ເມ’ທານິ, ປຈ຺ຉິເມ ວຍສິຏ຺ຐິໂຕ;

ຍທິທໍ ເປຕ຺ຕິກໍ ຣຊ຺ຊໍ, ມມ ຫຕ຺ຖຄຕພ຺ຠເວ.

໕໑. ຣາຊລກ຺ຂິວ ໂສ ເປຕ-ເຈຕໂສ ເມ ປມາທໂຕ;

ຍຖິຈ຺ຉິຕຎ຺ເຈ ນ ຠເວ, ມຫຕີ ຊານິ ເມ ຠຸສໍ.

໕໒. ເອຕ຺ເຖວ ນິວສນ຺ໂຕ’ຫໍ, ຈຣາປິຍ ສເກ ວເຣ;

ປຣມຓ຺ຑລວຸຕ຺ຕນ຺ຕໍ, ຊາເນຍ຺ຍໍ ຍທິ ຕຕ຺ຕໂນ.

໕໓. ຣນ຺ຘໍ ປຈ຺ຈຕ຺ຖິການນ຺ຕຸ, ປກາເສຕຸໍ ຣຖາຕຖໍ;

ອຘິປ຺ປາຍານຸຣູປໍ ເມ, ສມຕ຺ຖາ ວາ ນ ວາຈຣາ.

໕໔. ເຍ ເກຈິ’ຘ ຊນາ ສນ຺ຕິ, ສພ຺ເພ ເຕ ມມ ສມ຺ມຸຂາ;

ພລີຍຕ຺ຕໍ’ວ ສຕ຺ຕູນໍ, ກຖຍນ຺ຕິ ອເນກໂສ.

໕໕. ປຈ຺ເຈກຣຏ຺ຐສາມີຫິ, ປິຕຸຠູເປຫິ ຕິຫິປິ;

ເອກີຠູຍ ກຣິຕ຺ວານ, ສຕ຺ຕກ຺ຂຕ຺ຕຸໍ ມຫາຫວໍ.

໕໖. ສາເຘຕຸໍ ທຸກ຺ກຣໍ ຣຏ຺ຐໍ, ຠວເຕ ກາກິນາ ກຖໍ;

ສິສຸນາ ຄຓ຺ຫິຕຸໍ ສກ຺ກາ, ຂຸທ຺ທຣຊ຺ໂຊ ປໂຠຄິນາ.

໕໗. ສຸກຣໍ ມູລຠູຕສ຺ສ, ຕສ຺ສ ຣຊ຺ຊສ຺ສ ສາຘນໍ;

ອິຕິ ທຸຈ຺ຈິນ຺ຕໍຕໍ ຕຸຍ຺ຫໍ, ທູເຣ ຕພ຺ພມິທໍ’’ອິຕິ.

໕໘. ກຓ຺ເຓ ຕຕ຺ຖສລາກາໂຍ, ປເວເສນ຺ຕາ’ວ ເນກໂສ;

ມຫນ຺ຕຕ຺ຕໍ ກເຖນ຺ເຕ’ວໍ, ພຫຸຘາ ປຣມຓ຺ຑເລ.

໕໙. ອຊານນໍ ຍຖາຠູຕໍ, ວທນ຺ຕານໍ ກຸພຸທ຺ຘິນໍ;

ສພ຺ພເມຕໍ ວໂຈ ຊາຕຸ, ສທ຺ຘາຕພ຺ພໍ ສິຍາ ນ ຫິ.

໖໐. ເລເສເນເກນ ຄນ຺ຕ຺ວານ, ຂິປ຺ປໍ’ວ ປຣມຓ຺ຑລໍ;

ສຣູປໍ ຕຕ຺ຖ ອຸສ຺ສາມິ, ອຫເມເວຕິ ຈິນ຺ຕຍິ.

໖໑. ຍທິ ເມ ປີຕຸຠູປາໂລ, ວິຎ຺ຎາເຍຕໍ ວິຕກ຺ກິຕໍ;

ອຠິຊາຕສ຺ສ ປຸຕ຺ຕສ຺ສ, ວໍສໂຊຕິກຣສ຺ສ ເມ.

໖໒. ຄຕສ຺ສ ສຕ຺ຖຸ ວິສຍ-ມນຕ຺ໂຖປິ ສິຍາ ອິຕິ;

ອນຸກມ຺ປາຘິຍາ ມຍ຺ຫໍ, ຄມນໍ ວາຣຍິສ຺ສຕິ.

໖໓. ມໂນຣຖສ຺ສ ສໍສິທ຺ຘິ, ສພ຺ພຖາ ເມນ ເຫສ຺ສຕິ;

ຕສ຺ມາ ນິຄຸຬຣູເປນ, ຄມນໍ ຠທ຺ທກໍ ອິຕິ.

໖໔. ລທ຺ຘານ ຣຕ຺ຕິຍມ ເຖກທິນໍ ຂຓຎ຺ຎູ,

ໂສ ຕາທິສໍ ຂຓມຂີຓຕໂຣຣູປາໂຍ;

ຊານາຕິ ໂນ ສກປິຕາຄມນໍ ຕຖາຕໍ,

ເຄຫາ’ຠິນິກ຺ຂມິຕຖາ ຈຕຸໂຣ ກຸມາໂຣ.

ສຸຊນປ຺ປສາທສໍເວຄຕ຺ຖາຍ ກເຕ ມຫາວໍເສ

ປຣມຓ຺ຑລາຠິຄມໂນ ນາມ

ທ຺ວິສຏ຺ຐິໂມ ປຣິຈ຺ເຉໂທ.