ຕິສຏ຺ຐິມ ປຣິຈ຺ເຉທ

ເສນາປຕິວໂຘ

໑. ນິຊາຍຸຘທຸຕິຍສ຺ສ, ນິກ຺ຂມນ຺ຕສ຺ສ ຕສ຺ສ ຫິ;

ຕໍ ຂຓໍ ປຸຣໂຕ ໂກ’ປິ, ສງ຺ຂສທ຺ໂທ ສມຸຄ຺ຄໂຕ.

໒. ຕໂຕ ເນກນິມິຕ຺ຕຎ຺ຎູ, ກຸມາໂຣ ຕໍ ສຸຓິ ຕ຺ວ ໂສ;

ນິປ຺ຜຊ຺ຊິສ຺ສຕິ ສງ຺ກປ຺ໂປ, ຂິປ຺ປໍ ເຍເວຕິ ໂມທວາ.

໓. ຕຕ຺ຖ ຕຕ຺ຖ ນິຍຸຕ຺ຕານໍ, ຣກ຺ຂການມຊານຕໍ;

ນິກ຺ຂມິຕ຺ວາ ປຸຣາວີຕ-ຠໂຍ ສີຫປຣກ຺ກໂມ.

໔. ເວເຄນ ມຄ຺ຄໍ ຄນ຺ຕ຺ວານ, ປຎ຺ຈຄາວຸຕມຕ຺ຕກໍ;

ພທລຕ຺ຖລຄາມສ຺ສ, ປເທເສນາຕິ ທູຣເກ.

໕. ຄາມ ເມກມຸປາຄຎ຺ຈິ, ປິລິໍ ວຕ຺ຖູຕິ ສຎ຺ຎິຕໍ;

ຊນານໍ ສນ຺ນິປາຕາຍ, ນິຊານໍ ໂສ ກຕາວຘິ.

໖. ນິຊາຄມນໂຕ ປຸພ຺ພໍ, ປຏິມຄ຺ເຄ ນິສີທິຕຸໍ;

ປຏິລທ຺ຘນິໂຍຄານໍ, ເຍຈິ ເທວາຄເຕ ຕທາ.

໗. ຕຫິໍ ຐິເຕ ໂສ ປສ຺ສິຕ຺ວາ, ເອຕ຺ຕກາ ກິນ຺ນຸ ອາຄຕາ;

ອິຕິ ປຸຈ຺ຉິ ກຸມາໂຣຖ, ເຕປິ ຕໍ ອິທ ມພ຺ຣວຸໍ.

໘. ໂລກປ຺ປວຕ຺ຕິໍ ສກລໍ, ຊານນ຺ເຕນາປິ ສາມິນາ;

ກິເມວ ມຸຈ຺ຈເຕ ມຈ຺ຈຸ-ຠຍໍ ເກສໍ ນ ວິຊ຺ຊຕິ.

໙. ພາລາຕານຸຄໂຕ ສາມິ, ຐິໂຕ ວຍສິ ອີທິເສ;

ອຊ຺ຊາປິ ຫິ ມຸເຂ ຕຸຍ຺ຫໍ, ຂີຣຄນ຺ໂຘ ປວາຍຕິ.

໑໐. ນ ເຫວຕ຺ຖິ ວິສຸໍ ວິຕ຺ຕ-ຊາຕໍ ສງ຺ຄຫິຕໍ ຕວ;

ຕທຎ຺ຎາ ໂຈປກຣຓ-ສາມຄ຺ຄີ ເນວ ວິຊ຺ຊເຕ.

໑໑. ຈິຣມ຺ປຣິຈິຕຕ຺ເຕຫິ, ທຬ຺ຫໍ ສາຣຸຬຠຕ຺ຕິຫິ;

ວິນາ’ມ຺ເຫຫິ ວິສຸໍ ເກວາ’ນຸຄນ຺ຕາໂຣ ຊນາຕຸວໍ.

໑໒. ກິຎ຺ຈາຄຕານມມ຺ຫາກໍ, ປິຕາ ຕຸຍ຺ຫໍ ນຣິສ຺ສໂຣ;

ກາເຣສ຺ສຕິ ອິທໍ ນາມ, ສພ຺ພຖາ ເນວ ຎາຍເຕ.

໑໓. ອມ຺ຫາກມນ຺ຕຣາມຄ຺ເຄ, ສງ຺ໂຂ ນາມ ຈມູປຕິ;

ມຫພ຺ພໂລ ມຫາວີໂຣ, ຣຊ຺ຊສີມໍ ຕມາວສໍ.

໑໔. ປຈ຺ຈຕ຺ຖິເຕ ຐເປຕ຺ວຎ຺ເຎ, ເອເຕ ກຕິປຍາ ມຍໍ;

ອຎ຺ຎມຎ຺ຎມ຺ຫິ ນິຍຕ-ມາສງ຺ກີ ຫທຍາ ຠຸສໍ.

໑໕. ອຣຸຓຸຄ຺ຄມເວລາ ຈ, ສມາສນ຺ນຕຣາຘຸນາ;

ອິຕິ ຠີຕິໍ ປກາເສສຸໍ, ປຈ຺ເຈກໍ ຫທຍສ຺ສິຕໍ.

໑໖. ນິສມ຺ມ ເຕສໍ ວຈນໍ, ວິຘາຍ ມຘຸຣໍ ສິຕໍ;

ວີຕສງ຺ໂກ ກຸມາໂຣ ໂສ, ມຸຂາເນ’ສໍ ວິໂລກິຍ.

໑໗. ຈຣິຕ຺ວາປິ ມຍາ ສທ຺ຘິ-ເມເຕ’ໂຫ ກາລເມຕ຺ຕກໍ;

ນ ຊານິໍສຸ ມມໍ ສພ຺ເພ, ເຍສຎ຺ຫິ ຠຍມິທິສໍ.

໑໘. ອິຕິ ວຕ຺ວາ ຠຍໍ ເຕສໍ, ວິໂນເທຕຸ ມຸປຏ຺ຐິຕໍ;

ສີຫນາທໍ ຕທາ’ກາສິ, ມຫນ຺ຕໍ ສີຫວິກ຺ກໂມ.

໑໙. ຕິຏ຺ຐນ຺ຕຸ ມານຸສາ ສພ຺ເພ, ມຍິ ຫຕ຺ຖຄຕາຍຸເຘ;

ສກ຺ໂກ ເທວານມິນ຺ໂທປິ, ກຸປິໂຕ ກິໍ ກຣິສ຺ສຕິ.

໒໐. ພາໂລຕິ ມໍ ຈິນ຺ຕຍ ຕໍ, ຊາຕາ ໂວ ກຸມຕີທິສີ;

ປຣິກ຺ຂີຍຕິ ເຕ ຊາຓາ, ນວໂຍ’ຕິ ນ ກິໍ ສຸຕໍ.

໒໑. ອຊ຺ເຊວ ກາຕຸເມເກນ, ກມ຺ມຸນາ ຈິນ຺ຕິເຕນ ເມ;

ສເທສປຣ ເທສຏ຺ຐາ, ຠຍຠຕ຺ຕີ ຍຖາມຍິ.

໒໒. ກຣິສ຺ສນ຺ຕິ ຍຖາ ເວທໍ, ຠຍໍ ຕຸມ຺ເຫ ຊຫິສ຺ສຖ;

ຕຖາ ຣຕ຺ຕິຍເມຕາຍ, ວິຠາຕາມຍ ຂເຓນ ເມ.

໒໓. ອຸນ຺ນເຕ ທສ຺ສຍິສ຺ສາມິ, ພຸທ຺ຘິ ສາຫສວິກ຺ກເມ;

ອນຸຘາວຕິ ມໍ ຕາຕ, ເສເຕຫິ ຍທິ ໂວ ຠຍໍ.

໒໔. ປຸຣໂຕ ໂຫຖ ຕຸມ຺ເຫຫິ, ວຕ຺ວາ ເຕ ຄຫິຕາຍຸໂຘ;

ສາຫເສກຣໂສ ວີໂຣ, ຕມ຺ຫາ ນິກ຺ຂມ຺ມ ຄາມໂຕ.

໒໕. ອຸທຍາ’ຈລສີສຏ຺ຐໍ, ເຊຕຸມາທິຈ຺ຈມຓ຺ຑລໍ;

ອປຣໍ ຣວິ ພິມ຺ພໍວ, ປຈ຺ຉິມາ ສາ ມຸໂຂທິຕໍ.

໒໖. ເຕຊສາ ປສຣນ຺ເຕນ, ຊນານໍ ປວິກາສຍໍ;

ເນຕມ຺ພຸຊວນໍ ປາໂຕ, ພທລຕ຺ຖລິມາຄມິ.

໒໗. ຊຆສງ຺ຂສ຺ສເຣນາ’ຖ, ເສນາ ນາໂຖ ປພຸຊ຺ຌິຍ;

ສຎ຺ຊາຕສມ຺ຠໂມ ຎຕ຺ວາ, ຣາຊປຸຕ຺ຕມຸປາຄຕໍ.

໒໘. ສທ຺ຘິໍ ພເລນ ມຫຕາ, ປຘຸຄ຺ຄມ຺ມກຕາທໂຣ;

ປຓາມມຸຈິຕໍ ກຕ຺ຕຸ-ມານໂຕ ວສຸຘາຕເລ.

໒໙. ອມ຺ຫາກເມສຊີວນ຺ໂຕ, ກິໍ ນາມຕ຺ຖໍ ກຣິສ຺ສຕິ;

ມາເຣຕພ຺ໂພ’ຘຸເນເວຕິ, ປສ຺ສນ຺ເຕ ສມຸຂໍ ຠເຏ.

໓໐. ເນວາ’ທິຏ຺ຐາປຣາຘສ຺ສ, ມຣຓໍ ປຸຣິໂສ ຈິຕໍ;

ວໂຘ ວິໂຣເຘ ສກ຺ກາ’ຕິ, ອິງ຺ຄິເຕນ ນິວາຣິຍ.

໓໑. ເສນາປຕິສ຺ສ ໂສ ຫຕ຺ຖໍ, ຄເຫຕ຺ວາ ສີຫສນ຺ນິໂຠ;

ຠາສນ຺ໂຕ ມຘຸຣໍ ວາຈໍ, ຕສ຺ເສວາ’ຄຎ຺ຉິ ມນ຺ທິຣໍ.

໓໒. ອຖສ຺ສ ຄມນໍ ຣຎ຺ໂຎ, ຠວິຕພ຺ພມຊານຕາ;

ສຣູປໍ ຍາວ ຊານາມິ, ຕາວສ຺ເສເຕ ສຫາຄຕາ.

໓໓. ຍຖາ ນ ສຫິຕາ ໂຫນ຺ຕິ, ຐເປຕພ຺ພາ ວິສຸໍ ວິສຸໍ;

ກຸມາໂຣ’ວ ມມາຄາເຣ, ວສຕູ’ຕິ ວິຈິນ຺ຕິຍ.

໓໔. ຕຖາ ເສນາປຕິ ກຕ຺ວາ, ວຎ຺ເຈຕຸໍ ຕໍ ມຫາມຕິໍ;

ທສ຺ເສຕ຺ວາ’ຕິ ຖີສກ຺ກາຣໍ, ຣຎ຺ໂຎ ທູເຕ ສ ເປສຍິ.

໓໕. ກຸມາໂຣ’ຖ ວິທິຕ຺ວານ, ເຕນ ຕໍ ວຎ຺ຈນໍ ກຕໍ;

ກຕ຺ຕພ຺ພເມຕ຺ຖາ’ກຕ຺ວາຫ, ມຸທາສີໂນ ຠເວ ຍທິ.

໓໖. ອິຈ຺ຉິຕຕ຺ຖສ຺ສ ນິປ຺ຜຕ຺ຕິ, ນ ເມ ຊາຕຸ ຠວິສ຺ສຕິ;

ອຍໍ ຕາວາ’ຘຸນາວສ຺ສໍ, ມາເຣຕພ຺ໂພຕິ ຈິນ຺ຕິຍ.

໓໗. ສຫາຄຕໍ ປໂຍເຊຕ຺ວາ, ຆາຕາປຍິ ຈມູປຕິໍ;

ຫໂຕ ເສນາຘິນາໂຖ’ຕິ, ມຫນ຺ຕໍ ຂຸຠິຕໍ ອຫຸ.

໓໘. ເສນານາຖຠໂຏ ເອໂກ, ສຸຕ຺ວາ ເສນາປຕິໍ ຫຕໍ;

ມາຣຓໍ ສາມິໂນ ມຍ຺ຫໍ, ກິໍ ນິມິຕ຺ຕມີຕິ ພ຺ຣວິ.

໓໙. ເນຕ຺ຕິໍ ສປາຓີ ສຫສາ, ກຸມາຣໍ ຐິຕເມກກໍ;

ອຠິທາວິ ສສາມິສ຺ສ, ປຣິຈຕ຺ຕຕ຺ຕຊີວິໂນ.

໔໐. ກຸມາຣສ຺ສ ມຸຂໍ ທິສ຺ວາ, ເວຘມາໂນ ຠເຍນ ໂສ;

ປຸເຣ ຐາຕຸມສກ຺ໂກນ຺ໂຕ, ປາທມູເລ ຕໂຕ ສຍິ.

໔໑. ຄຓ຺ຫເຖ’ຕນ຺ຕິວຈນາ-ກຸມາຣສ຺ສ ປຸເຣຕຣໍ;

ຕສ຺ເສເວໂກ ສຫຈໂຣ, ຠຏເມຕໍ ວິຆາຕຍິ.

໔໒. ນິໂຍຄໍ ເມ ວິນາ ເຕນ, ກຕໍ ກມ຺ມໍ ນ ຍຸຊ຺ຊຕິ;

ອິຕິ ທຓ຺ຑນເມຕສ຺ສ, ກາຣາເປສິຍໂຖຈິຕໍ.

໔໓. ອຖ ຕໍ ກາລຍມ຺ຠູຕ-ສງ຺ໂຂຠມຕິຠິໍສນໍ;

ຠມຸກ຺ຂິປນມຕ຺ເຕນ, ຣາຊປຸຕ຺ໂຕ ສມໍ ນຍິ.

໔໔. ວີໂຣ ຍໂສຘຣຘໂນ ຘິຕິມາ ກຸມາໂຣ;

ວີໂຣປກາຣຈຕຸໂຣ ວຣກິຕ຺ຕິສາໂຣ;

ເສນິນ຺ທສຎ຺ຈິຕມນປ຺ປຘນໍ ຠຏານໍ;

ສພ຺ພໍ ວິສຊ຺ຊຍິ ຍຖາຣຸຈິຍາ ຄເຫຕຸໍ.

ສຸຊນປ຺ປສາທສໍເວຄຕ຺ຖາຍ ກເຕ ມຫາວໍເສ

ເສນາປຕິວໂຘ ນາມ

ຕິສຏ຺ຐິໂມ ປຣິຈ຺ເຉໂທ.