ເອກສຏ຺ຐິມ ປຣິຈ຺ເຉທ

ສງ຺ຂຕ຺ຖລິປຸຣາຠິຄມໂນ

໑. ສຸຕ຺ວາ ທ຺ເວ ຠາຕໂຣ ອຎ຺ເຎ, ເຊຏ຺ຐສ຺ໂສ ປຣຕິໍສທາ;

ຂິປ຺ປໍ ສຣຏ຺ຐາ ອາຄມ຺ມ, ກາເຣສຸໍ ອນ຺ຕິມໍ ວິຘິໍ.

໒. ອຖ ກິຕ຺ຕິສິຣິເມໂຆ, ຣຏ຺ຐໍ ເຊຏ຺ຐສ຺ສ ຠາຕຸໂນ;

ອຕ຺ຕາຘີນໍ ກຣິຕ຺ວານ, ອາມນ຺ຕິຍ ກຓິຏ຺ຐກໍ.

໓. ທຕ຺ວາ ຣຏ຺ຐທ຺ວຍໍ ອຎ຺ຎໍ, ວຕ຺ຖຸໍ ຕຕ຺ເຖວ ອາທິສິ;

ໂສ’ປິ ເຊຏ຺ຐສ຺ສ ຠາຕຸສ຺ສ, ວຈນໍ ສມ຺ປຏິຈ຺ຉິຍ.

໔. ສມາທາຍ ກຸມາຣຎ຺ຈ, ເທວິຎ຺ຈ ຣຕນາວລິໍ;

ຘີຕໂຣ ທ຺ເວ ຈ ຄນ຺ຕານ, ມຫາ ນາມຫຸລໍ ປຸຣໍ.

໕. ສມຄ຺ຄາ ນິວສໍ ຕຕ຺ຖ, ກຸມາຣສ຺ສ ສິຂາມຫໍ;

ກາເຣຕ຺ວາ ປຣິຫາເຣນ, ວຑ຺ເຒສິ ມຫຕາ ສທາ.

໖. ຕໂຕ ໂສ ເທວິຍາ ເຊຏ຺ຐໍ-ຘີຕຣໍ ມິຕ຺ຕນາມິກໍ;

ທາຕຸກາໂມ ສປຸຕ຺ຕສ຺ສ, ສຫາມຈ຺ເຈຫິ ມນ຺ຕຍິ.

໗. ກາລິງ຺ຄນ຺ວຍສມ຺ຠູຕາ, ປາເຍນຂລຸ ຠູມິປາ;

ສາມິຠາວໍ ຄຕາ ອສ຺ມິໍ, ລງ຺ກາທີປມ຺ຫີ ຠູຍໂສ.

໘. ກາລິງ຺ຄໂຄຕ຺ຕ ສມ຺ຠູຕ, ຄຊພາຫຸສ຺ສ ທາຕເວ;

ຄູຬຣູເປນ ເທວີ’ຍໍ, ຍທິ ເປເສຍ຺ຍ ຘີຕຣໍ.

໙. ຠິຍ຺ໂຍ ວິວາຫສມ຺ພທ຺ໂຘ, ພລວາ ໂສ ຠວິສ຺ສຕິ;

ມຍ຺ຫໍ ເອໂສ ນິຣາລມ຺ໂພ, ປຸຕ຺ໂຕ ເຫຫີຕິ ສພ຺ພຖາ.

໑໐. ຕສ຺ມາ ເມ ສຸນູໂນ ເອສາ, ທາຕຸໍ ຍຸຕ຺ຕາ ກຸມາຣິກາ;

ເອວໍ ສຕິ ວຕມ຺ຫາກໍ, ວຑ຺ຒິເຍ’ວ ສິຍາ ‘‘ອິຕິ’’.

໑໑. ເທວີປິ ສຸຕ຺ວາ ຕໍ ສພ຺ພ-ມາທິຈ຺ຈນ຺ວຍ ມຓ຺ຑນາ;

ສພ຺ພຖາ ຕມນິຈ຺ຉນ຺ຕິ, ອິທມາຫ ມຫີປຕິໍ.

໑໒. ຆາເຕຕ຺ວາ ສກເລ ຍກ຺ເຂ, ກຸມາໂຣ ວິຊຍວ຺ຫໂຍ;

ລໍກາທີປມິມໍ’ກາສິ, ມນຸສ຺ສາວາສກໍ ສທາ.

໑໓. ຕໂຕ ປຠຸຕິ ອມ຺ຫາກໍ, ຆເຏສຸໍ ວິຊຍນ຺ວຍໍ;

ກາລິງ຺ຄວໍສເຊເຫວ, ສມ຺ພນ຺ຘໍ ກຕ຺ວ ປຸພ຺ພກໍ.

໑໔. ອຎ຺ຎຠູປາລ ສມ຺ພນ຺ໂຘ, ສຸຕປຸພ຺ໂພ ປິນຕ຺ຖິໂນ;

ໂສມວໍສ ສມຸມ຺ຠູເຕ, ຐເປຕ຺ວາ ຘຣຓິສ຺ສເຣ.

໑໕. ຕຸຍ຺ຫໍ ຊາໂຕຕິ ອມ຺ຫາກໍ, ສມ຺ພນ຺ໂຘ ໂສ ກຖໍ ສິຍາ;

ອຣິຍນ຺ວຍ ສມ຺ຠູຕ, ກຸມາເຣນ ສຫາມຸນາ.

໑໖. ເອວໍ ໂສ ເທວິຍາ ຕາຍ, ເນກໂສ ວາຣຍນ຺ຕິຍາ;

ປສຍ຺ຫສກ ປຸຕ຺ຖສ຺ສ, ຕໍ ກຸມາຣິມທາປຍິ.

໑໗. ໂສ ອເນກຄຸໂຓທາຣ- ຠຣິຍານຸຄໂຕ ຕໂຕ;

ຣຎ຺ຊຍນ຺ໂຕ ຊເນ ສພ຺ເພ, ຊນກສນ຺ຕິເກ ວສິ.

໑໘. ເອກວີສຕິໍ ວສ຺ສານິ, ຣຊ຺ຊໍ ວິກ຺ກມ ພາຫຸໂສ;

ອນຸໂຠຕ຺ວາ ຍຖາກມ຺ມໍ, ກາຍເຠທາ ຄໂຕ ປຣໍ.

໑໙. ຕໂຕ ຄຊຠຸໂຊ ຐິຕໍ, ສມ຺ປນ຺ນພລວາຫນໍ;

ຣຊ຺ຊໍ ຫຕ຺ຖຄຕໍ ກຕ຺ວາ, ປຸລຕ຺ຕິນຄເຣ ວສີ.

໒໐. ຕໂຕ ກິຕ຺ຕິສິຣີເມຆ, ສິຣີວລ຺ລຠ ຠູມິປາ;

ວຸຕ຺ຕນ຺ຕ ເມຕໍ ວິຎ຺ຎາຍ, ເອວໍ ສມນຸຈິນ຺ຕຍຸໍ.

໒໑. ຕສ຺ສ ວິກ຺ກມ ພາຫຸສ຺ສ, ວຸທ຺ຘຠາເວນ ເນກຘາ;

ມູລຣຊ຺ຊາຘິປຈ຺ຈໍ ຕໍ, ອມ຺ມໍ ນິນ຺ທາກຣໍ ນ ຫິ.

໒໒. ຕທຕ຺ຖຊສ຺ສ ພາລສ຺ສ, ມູລຣຊ຺ຊໍ ປສາສໂນ;

ອຸເປກ຺ຂຓໍ ປນມ຺ຫາກໍ, ເນວານຸຈ຺ຉວິກໍ ວຕ.

໒໓. ເຕ ໂສຍາວ ສຣຊ຺ຊມ຺ຫິ, ພທ຺ຘມູໂລ ຠວິສ຺ສຕິ;

ປສຍ຺ຫ ຕາວ ຕໍ ຣຊ຺ຊໍ, ວຏ຺ຏຕິ ຄຓ຺ຫິຕຸໍ ອິຕິ.

໒໔. ເວລກ຺ກາຣ ພລໍ ສພ຺ພໍ, ຠິນ຺ທິໍສຸ ຘນ ທານໂຕ;

ຐເປຕ຺ວາ ເສວເກ ເກຈິ, ຕສ຺ສພ຺ຠນ຺ຕຣິເກ ຕທາ.

໒໕. ຄຊພາຫຸ ມຫີປາເລ, ວິຣຕ຺ຕາ ຣຏ຺ຐວາສິໂນ;

ອຸຠິນ຺ນໍ ຣາຊູນໍ ທູເຕ, ເປສຍຸໍ ເນກໂສ ຕໂຕ.

໒໖. ຣຊ຺ຊໍ ສາເຘຕ຺ວາ ທສ຺ສາມ, ເອກີຠູຕາ ມຍໍ ປນ;

ອຸປຕ຺ຖມ຺ຠກຠາໂວ’ວ, ກາຕພ຺ໂພ ເກວລໍ ອິຕິ.

໒໗. ຕໂຕ ທ຺ເວ ຠາຕຸກາ ເສນໍ, ສກໍ ສນ຺ນຍ຺ຫ ເວຄສາ;

ອຸຠໂຕ ມຸຂໂຕ ຕສ຺ສ, ຣຏ຺ຐມຊ຺ຌມຸປາຄມຸໍ.

໒໘. ປຫິຓິໍສຸ ຈ ເຕ ທູເຕ, ຕໂຕ ຄຊໂພຫຸວ຺ຫໂຍ;

ຠູມິປາໂລ ນິຊາມຈ຺ເຈ, ສນ຺ນິປາຕິຍ ມນ຺ຕຍິ.

໒໙. ເວຬກ຺ກາຣພລໍ ສພ຺ພ-ມຸຊຸປຈ຺ຈຕ຺ຕິກໍ ອຫຸ;

ຣາຊາໂນ ທ຺ເວ ຈ ໂນ ຣຏ຺ຐໍ, ສງ຺ຄາມຕ຺ຖມຸປາຄຕາ.

໓໐. ປຐມໍ ເຕສຸ ປກ຺ຂສ຺ສ, ເອກສ຺ສ ພລິໂນ ຠຸສໍ;

ມຸຂຠງ຺ເຄ ກເຕ ຂິປ຺ປໍ, ຕໂຕ ອຎ຺ເຎ ສຸສາຘິຍາ.

໓໑. ອິຕິ ນິຈ຺ຉິຍ ເສນງ຺ຄໍ, ສພ຺ພມາທາຍ ອຕ຺ຕໂນ;

ສິຣິວລ຺ລຠຣາຊາຠິ-ມຸຂໍ ຍຸທ຺ຘາ’ຍຸປາຄມິ.

໓໒. ສິຣິວລ຺ລຠຣາຊາປິ, ສງ຺ຄາມ ມຫິຠິໍສນໍ;

ປາໂຕ ປຏ຺ຐາຍ ສາຍນ຺ຫ-ກາລໍ ຍາວ ປວຕ຺ຕຍໍ.

໓໓. ອສກ຺ກຸຓນ຺ໂຕ’ຠິຠວໍ, ວິຘາຕຸໍ ຕສ຺ສ ກຎ຺ຈິປິ;

ຕໂຕວ ໂສ ນິວຕ຺ຕິຕ຺ວາ, ສກໍ ຣຏ຺ຐໍ ຄໂຕ ລຫຸໍ.

໓໔. ຄຊພາຫຸສ຺ສໂຄກຓ຺ຓ-ສຈິເວນ ປຣາຊິໂຕ;

ອຄາ ຣຏ຺ຐໍ ສກໍ ກິຕ຺ຕິ-ສິຣິເມໂຆ’ປິ ຠູປຕິ.

໓໕. ຄຊພາຫຸນຣິນ຺ໂທປິ, ສງ຺ຄາເມ ຕມ຺ຫິ ກິຎ຺ຈິປິ;

ປຣິຫານິມສມ຺ປຕ຺ໂຕ, ປຸນາ’ຄມ຺ມ ປຸຣນ຺ຕິກໍ.

໓໖. ພລນາເຖ ວິນິຄ຺ຄຍ຺ຫ, ສາປຣາເຘ ພຫູ ພລີ;

ຣຏ຺ຐໍ ວູປສເມຕ຺ວານ, ປາເວກ຺ຂິ ນຄຣໍ ສກໍ.

໓໗. ຣຏ຺ເຐ ສເກ ສເກເຍວ, ຕໂຕ ປຠູຕິ ຠູມິປາ;

ອຎ຺ໂຎຎ຺ຎມິຕ຺ເຕ ສມ຺ພນ຺ຘໍ, ວິຘາຍ ວິຫຣິໍສຸ ເຕ.

໓໘. ຕໂຕ ປຣກ຺ກມຠຸໂຊ, ຘຣຓີ ປາລນນ຺ທໂນ;

ເມຘາວີເນກສິປ຺ເປສຸ, ສິກ຺ຂມາໂນ ສຸສາຘຸກໍ.

໓໙. ວິຈາຣກ຺ຂມປຎ຺ຎຕ຺ຕາ, ກິຈ຺ຈາ ກິຈ຺ເຈສຸ ເນກໂສ;

ອຈ຺ຈຸຬາຣາສຍຕ຺ຕາ ຈ, ມຫາຠາຄຕ຺ຕເນນ ຈ.

໔໐. ອຕ຺ຕໂນ ມາຕຸຠຄິນີ, ສຫວາສ ສຸຂມ຺ຫິ ຈ;

ອລຄ຺ຄມານໂສເນກ, ພລາກີຬາຣເສສຸ ຈ.

໔໑. ສູຣຠາວາທິສໍຍຸຕ຺ຕາ, ຣາຊປຸຕ຺ຕາ ຕຸ ມາທິສາ;

ປຈ຺ຈນ຺ເຕ ອີທິເສ ເທເສ, ກຖໍ ນາມ ວສິສ຺ສເຣ.

໔໒. ຊາຕເທສຎ຺ຈ ເມ ທານິ, ຍຸວຣາຊປໂຠຄິຍໍ;

ຄມິສ຺ສາມີຕິ ນິຄ຺ຄຎ຺ຉິ, ຕມ຺ຫາ ປຣິຊນຕ຺ຖິໂຕ.

໔໓. ກເມນ ສນ຺ຕິກໍ ສງ຺ຂ-ນາຍກຕ຺ຖລິສຎ຺ຎິໂນ;

ຄາມສ຺ສາຄາ ອຫິໍ ກິຕ຺ຕິ-ສິຣິເມໂຆ ນິສມ຺ມ ຕໍ.

໔໔. ອຠາວາ ຣຊ຺ຊ ທາຍາທ-ສມານສ຺ສ’ຕ຺ຣຊສ຺ສ ເມ;

ເອກາກີ’ຫນ຺ຕິ ໂຍ ຈິຕ຺ຕ-ສນ຺ຕາໂປ ສນ຺ຕຕໍ ຄໂຕ.

໔໕. ເຊຏ຺ຐໍວ ຠາຕຣໍ ມຍ຺ຫໍ, ຕໍ ເທຫປຏິພິມ຺ພກໍ;

ທຏ຺ຐຸໍ ເມ ສຕ຺ຕຕໍ ປຸຎ຺ຎໍ, ມຫນ຺ຕມຸທິຕໍຕິຈ.

໔໖. ປາມຸຊ຺ຊເວຄວສໂຄ, ນຄຣໍ ຕໍ ມໂນຫຣໍ;

ອລງ຺ກາຣາ ປຍິຕ຺ວານ, ໂຕຣຓາທີຫິ ເນກຘາ.

໔໗. ຄນ຺ຕ຺ວາ ປຏິປຖໍເຍວ, ພໂລຆປຣິວາຣິໂຕ;

ນຣິນ຺ໂທ ຕິຖິນກ຺ຂຕ຺ຕ-ວິເສເສ ສຸຠສມ຺ມເຕ.

໔໘. ອນຎ຺ຎສາຘາຣຓຕໍ, ສມ຺ປຕ຺ເຕຫິ ຄຸເຓຫິ ຈ;

ລກ຺ຂເຓຫິ ຈ ສພ຺ເພຫິ, ກລ຺ຍາເຓຍິ ສຸສໍຍຸຕໍ.

໔໙. ທິສ຺ວາ ກຸມາຣໍ ສນ຺ຕຸຏ຺ໂຐ, ອາລິງ຺ຄິຕ຺ວານ ເປມໂຕ;

ອຸເຣ ກຕ຺ວານ ຈຸມ຺ພິຕ຺ວາ, ມຕ຺ຖກມ຺ຫິ ປຸນປ຺ປຸນໍ.

໕໐. ຊນສ຺ສ ພລໂຕ ຕສ຺ສ, ປສ຺ສໂຕ ໂລຈເນຫິ ໂສ;

ສນ຺ໂຕສ ອສ຺ສຸຘາຣາໂຍ, ວສ຺ສາເປນ຺ໂຕ ນິຣນ຺ຕຣໍ.

໕໑. ມນຸຎ຺ຎເມກ ມາຣຸຍ຺ຫ, ວາຫນໍ ສຫ ສູນຸນາ;

ເຠຣິນິ ເທນ ປູເຣນ຺ໂຕ, ທິສາ ທສ ສມນ຺ຕໂຕ.

໕໒. ປວິສິຕ຺ວາ ປຸຣໍ ຕຕ຺ຖ, ອລງ຺ກາເຣ ມໂນຣເມ;

ທສ຺ສຍນ຺ໂຕ ສປຸຕ຺ຕສ຺ສ, ປາວິສິ ຣາຊມນ຺ທິຣໍ.

໕໓. ລທ຺ຘາ ຕໂຕ ກຎ຺ຈຸກີ-ສຸປກາຣ,

ວຄາທິເນເກ ປຣິຈາຣເກ ໂສ;

ນານາຄຸຓາ ຣາຘິຕມານສສ຺ສ,

ວສີສກາເສ ປິຕຸໂນ ສຸເຂນ.

ສຸຊນປ຺ປສາທສໍເວຄຕ຺ຖາຍ ກເຕ ມຫາວໍເສ

ສງ຺ຂຕ຺ຖລິປຸຣາຠິຄມໂນ ນາມ

ເອກສຏ຺ຐິໂມ ປຣິຈ຺ເຉໂທ.