ສຏ຺ຐິມ ປຣິຈ຺ເຉທ

ກຸມາໂຣທໂຍ

໑. ໂຣຫເຓ ນິວສິຕ຺ຖາ’ວ, ຊຍພາຫຸມຫີປຕິ;

ມິຕ຺ຕາວ຺ຫາ ຣາຊິນີ ເຈວ, ຕທາ ກາລມກໍສຸ ເຕ.

໒. ສິຣີວລ຺ລຠຊາຍາ’ຖ, ຊເນສິ ສຸຄລາ ທຸເວ;

ມາຓຠຣຓກໍ ປຸຕ຺ຕໍ, ປຸຕ຺ຕິໍ ລີລາວຕິມ຺ປິ ຈ.

໓. ມາຓາຠຣຓຠູປາລ-ເທວີ’ປິ ຣຕນາວລີ;

ມິຕ຺ຕໍ ປຠາວຕິຎ຺ຈາປິ, ອລຠີ ຘີຕໂຣ ທຸເວ.

໔. ປສ຺ສນ຺ຕສ຺ສ ອຸໂຠ ຕາໂຍ, ຘີຕໂຣ ວີຣພາຫຸໂນ;

ຕທາ ມຫາທິປາທສ຺ສ, ເອວໍ ອາສິ ວິຕກ຺ກິຕໍ.

໕. ໂລກາຠິສມ຺ມເຕ ສພ຺ພ-ຠູປາລນ຺ວຍມຸທ຺ຘນິ;

ວິສຸທ຺ເຘ ໂສມວໍສມ຺ຫິ, ອຠິຊາຕາ ມຍໍ ປນ.

໖. ປິຫນີຍຕຣາກາຣາ, ສພ຺ພສຕ຺ຕິສມຸນ຺ນຕາ;

ນານາວິຊ຺ຊາສຸ ນິປຸຓາ, ຫຕ຺ຖິອສ຺ສາທິສຸກ຺ຂມາ.

໗. ຕຖາ ເປກາກິນາ ເວ’ເຕ, ຕໂຍ ວິກ຺ກມພາຫຸນາ;

ປຣາຊຍໍ ປຣິຠວໍ, ປາປິຕາ ພຫຸໂສ ຣເຓ.

໘. ສູນຸໂນ ສຸສມຕ຺ຖສ຺ສ, ວິໂສເຘຕຸ ມິມໍ ມລໍ;

ນ ທິສ຺ສເຕ ປາຕຸຠາໂວ, ອໂຫ ໂນ ອປ຺ປປຸຎ຺ຎຕາ.

໙. ຊນວາທກິລິຏ຺ເຐນ, ຣາຊຕ຺ເຕນາປິ ກິໍ ມມ;

ອິທານິ ວິສຍາສງ຺ຄໍ, ຫິຕ຺ວາ ກລ຺ຍາຓກມ຺ມສຸ.

໑໐. ອປ຺ປມຕ຺ຕສ຺ສ ສຕຕໍ, ເນຕພ຺ພາ ວາສຣາ’ອິຕິ;

ນິຍ຺ຍາເຕຕ຺ວາ ອມຈ຺ຈານໍ, ສພ຺ພໍ ຣຊ຺ຊວິຈາຣຓໍ.

໑໑. ຕຫິໍ ສຕ຺ຕ’ຏ຺ຐມາສຎ຺ຫິ, ວສໍ ຣຕ຺ຕິຍເມກທາ;

ເທວຣາຊຆເຣເສຍ຺ຍໍ, ກປ຺ເປສິ ສີລສໍຍໂຕ.

໑໒. ຕໂຕ ປຈ຺ຈູສກາລມ຺ຫິ, ເທວປຸຕ຺ຕໍ ມຫິທ຺ຘິກໍ;

ວິຈິຕ຺ຕວຕ຺ຖາຠຣຓໍ, ຄນ຺ຘມາລາວິຠູສິຕໍ.

໑໓. ອຸຬາຣຕຣຣູເປນ, ເທໂຫຠາເສນ ອຕ຺ຕໂນ;

ໂອຠາເສນ຺ຕໍ ອເສສາ’ສາ, ສູຣິຍຎ຺ຈ ນ ຠຸຄ຺ຄຕໍ.

໑໔. ວທນ຺ຕໍ ສຸປິເນ ເອວໍ, ອທກ຺ຂິ ທຣຓີປຕິ;

ປສີທສ຺ສຸ ມຫາຠາຄ, ປິໂຕຠວ ມຫິປຕິ.

໑໕. ຘຎ຺ຎລກ຺ຂຓສມ຺ປນ຺ໂນ, ອິຈ຺ຉິຕຕ຺ຖສ຺ສສາຘໂກ;

ວິນີໂຕ ໂລກກຸຫຣ-ພ຺ຍາປິເຕໂຊ ປຣກ຺ກໂມ.

໑໖. ອາຓພລຍໂສກິຕ຺ຕິ-ຠາສຸໂຣ ສຄ຺ຄຸຓາກໂຣ;

ໂລກສາສນສໍວຸທ຺ຘິ-ກໂຣ ປຸຕ຺ຕວໂຣ ຕວ.

໑໗. ລພ຺ຠີສ຺ສເຕ ມຫາຣາຊ, ນ ຈິຣສ຺ເສວ ສມ຺ປຕິ;

ປຸຕ຺ຕທາຣາຘິວຸຕ຺ຖໍ ຕໍ, ປຸຣໍ ຂິປ຺ປໍ ປຍາຫີຕິ.

໑໘. ປພຸຊ຺ຌິຕ຺ວານ ສຎ຺ຊາຕ-ປີຕິເວໂຄຖ ຣຕ຺ຕິຍາ;

ວິຠາຕາຍ ຕໂຕໂປງ຺ຂ-ຄາມໍ ຄຎ຺ຉິນຣຸຕ຺ຕໂມ.

໑໙. ຍຖາ ທິຏ຺ຐປ຺ປກາຣນ຺ຕໍ, ກເຖສິ ສຸປິນໍ ສຸຠໍ;

ມເຫສີ ປມຸຂານໍ ໂສ, ອມຈ຺ຈານໍ ມຫີປຕິ.

໒໐. ສທ຺ຘິໍ ມເຫສິຍາ ຕຕ຺ຖ, ປຕ຺ເຖນ຺ໂຕ ປຸຕ຺ຕມຸຕ຺ຕມໍ;

ຈິນ຺ໂຕນ຺ໂຕ ທານສີລາທິໍ, ສຸຠໍ ນານປ຺ປກາຣກໍ.

໒໑. ອເຖກທິວສໍກາເລ, ປຈ຺ຈູເສ ສຸປິເນ ປນ;

ສພ຺ພລກ຺ຂຓສມ຺ປນ຺ນໍ, ສພ຺ພເສຕໍ ມໂນຫຣໍ.

໒໒. ທນ຺ຕີໂປຕວຣໍ ທນ຺ຕໍ, ກຓ຺ເຓ ຄຓິຍເປມໂຕ;

ປວິສນ຺ຕມິວຕ຺ຕານໍ, ເສຍ຺ຍາຄພ຺ຠໍ ມເຫສິຍາ.

໒໓. ສມ຺ປສ຺ສິຍ ປພຸຊ຺ຌິຕ຺ວາ, ອຸຏ຺ຐາຍ ສຍນາວຣາ;

ສຎ຺ຊາຕປີຕິປາໂມຊ຺ຊ-ເວຄປີຓິຕມານໂສ.

໒໔. ຕາຍໍ ເວລາຍເມທາສຸ-ເສຍ຺ຍາຄພ຺ຠໍ ມເຫສິຍາ;

ປວິສ຺ສສຸປິນໍ ຕສ຺ສາ, ຍຖາທິຏ຺ຐໍ ປກາສຍີ.

໒໕. ອຫມ຺ປິ ຕາທິສໍ ຫຕ຺ຖິ-ໂປຕກໍ ສຍນໍ ມມ;

ປທກ຺ຂິຓໍ ກຣິຕ຺ວານ, ຐິຕໍ ໂສຓ຺ເຑ ສມາທິຍ.

໒໖. ອາກຑ຺ຒິຕ຺ວານ ສຍນໍ, ສມາໂຣປິຍ ເປມໂຕ;

ອາລິງ຺ຄິໍ ສຸປິນມ຺ຫີຕິ, ເທວີ ຈາປິ ຕມພ຺ຣວີ.

໒໗. ອຸໂຠ ເຕ ອຎ຺ຎມຎ຺ຎສ຺ສ, ທິຏ຺ຐເມວໍ ປກາສິຍ;

ອຸຏ຺ຐາເປສຸໍ ປຫຏ຺ຐາວ, ວີຕນິທ຺ທາຣຸຓໍ ຕທາ.

໒໘. ຕໂຕ ປາໂຕ ອຸປຏ຺ຐາຕຸ, ມຸປຍາຕໍ ປຸໂຣຫິຕໍ;

ເນມິຕ຺ຕເກ ຈ ປຸຈ຺ຉິໍສຸ, ສຸນິຕ຺ວາ ເຕ ປໂມທິຕາ.

໒໙. ນ ຈິຣສ຺ເສວ ປຸຕ຺ຕສ຺ສ, ຘຎ຺ຎລກ຺ຂຓສາລິໂນ;

ອຸປ຺ປຕ຺ຕິຍາ ອວສ຺ສໍ’ວ, ຠວໍຕພ຺ພນ຺ຕິ ກິຕ຺ຕຍຸໍ.

໓໐. ຕໍ ສຸຓິຕ຺ວາ ອມຈ຺ຈາ ຈ, ຕຖາ ນຄຣວາສິໂນ;

ອວິນ຺ທິໍສຸ ຊນິນ຺ໂທ ຈ, ສພ຺ເພປີຕິ ມຫຸສ຺ສວໍ.

໓໑. ຕໂຕ ປຏ຺ຐາຍ ໂສຕ຺ຖານໍ, ປຕ຺ຖຍໍ ປຕ຺ຖິໂວຠຸສໍ;

ຠິກ຺ຂຸສງ຺ເຆນ ພຫຸໂສ, ຠຓາເປສິ ປຣິຕ຺ຕກໍ.

໓໒. ມຓິມຸຕ຺ຕາທິກໍ ຈິຕ຺ຕໍ, ມຫຄ຺ຆມນຸວາສຣໍ;

ປຣິຈ຺ຈຊິ ທານມຸເຂ, ຍາຈການມເນກໂສ.

໓໓. ປຸໂຣຫິຕາທິວິປ຺ເປຫິ, ເວທເວທງ຺ຄວິຎ຺ຎູຫິ;

ວຕ຺ຕາເປສິ ຈ ໂຫມາທິ-ວິຘານໍ ໂສຕ຺ຖິ ສມ຺ມຕໍ.

໓໔. ສຸວິນຏ຺ເຐ ວິຫາເຣ ຈ, ຘາຕຸຄພ຺ເຠ ຈ ວາປິໂຍ;

ຊິຓ຺ຓາ ຈ ປຏິສງ຺ຂຕ຺ຕຸໍ, ໂຍຊຍີ ຣາຊກປ຺ປິເກ.

໓໕. ທິນໍ ນຍນ຺ເຕ ກລ຺ຍາຓ-ກມ຺ເມເນ’ວໍ ນຣິສ຺ສເຣ;

ນ ຈິຣໍ ສຓ຺ຐຫິ ຄພ຺ຠ-ວໂຣ ກຸຈ຺ຉິມ຺ຫິ ເທວິຍາ.

໓໖. ຕໂຕວຄມ຺ມ ຕໍ ຫຏ຺ຐ-ປຫຏ຺ໂຐ ໂສ ນຣິສ຺ສໂຣ;

ມຫນ຺ຕໍ ເທວິຍາ ຄພ຺ຠ-ປຣິຫາຣມທາປຍິ.

໓໗. ປຣິປກ຺ກຄພ຺ຠາ ເທວີ, ກເມນ ຊນຍີສຸກໍ;

ສມເຍ ຠທ຺ທນກ຺ຂຕ຺ຕ-ມຸຫຸຕ຺ເຕນຠິລກ຺ຂິເຕ.

໓໘. ສຸປ຺ປສນ຺ນາ ອເສສາ ຈ, ທິສາໂຍ ຕໍຂເຓ ອຫຸ;

ສມີຣເຓ ຈ ວາສິໍສຸ, ສຸຄນ຺ຘິມຸທຸສີຕລາ.

໓໙. ທນ຺ຕີນໍ ໂກຎ຺ຈນາເທນ, ຫຍານໍ ເຫສິເຕນ ຈ;

ຣາຊງ຺ຄຓໍ ຕທາຊາຕໍ, ມຫາໂກລາຫລາ ກູລໍ.

໔໐. ອຈ຺ເຉຣາຕິສເຍ ເອວໍ, ປາຕຸຠູເຕ ອເນກຘາ;

ທິສ຺ວາ ຕໍ ວິມ຺ຫຍປ຺ປຕ຺ໂຕ, ມາຓຠຣຓຠູປຕິ.

໔໑. ສຸຕ຺ວາ ນິຊສ຺ສ ປຸຕ຺ຕສ຺ສ, ຕທາ ສຎ຺ຊາຕສາສນໍ;

ອມເຕນາຠິສິຕ຺ໂຕວ, ປີຕິປຸຓ຺ຓມໂນຣໂຖ.

໔໒. ໂມຈາເປຕ຺ວາ ຕທາ ກາຣາ-ຆເຣ ພທ຺ເຘ ພຫູຊເນ;

ທານໍ ອຸຬາຣໍ ສມຓ-ພ຺ຣາຫ຺ມຓານໍ ປທາປຍິ.

໔໓. ອມຈ຺ຈປມຸຂາ ຈາປິ, ຊນາປຸຣນິວາສິໂນ;

ກທລີໂຕຣຓາທີຫິ, ຣາຊຘານີ ມເນກຘາ.

໔໔. ອລງ຺ກຣິຕ຺ວາ ສກລໍ, ສຸມຓ຺ຑິຕປສາຘິຕາ;

ຉຓໍ ມຫນ຺ຕໍ ວຕ຺ເຕສຸໍ, ກຕິປາຫໍ ມໂນຣມໍ.

໔໕. ເວເທ ວຸຕ຺ຕວິຘາເນນ, ຊາຕກມ຺ມາທິກໍ ວິຘິໍ;

ສພ຺ພໍ ສມາປຍິຕ຺ວານ, ກຸມາຣສ຺ສາ’ວນີປຕິ.

໔໖. ປຸໂຣຫິຕາທໂຍ ວິປ຺ເປ, ຕໂຕ ລກ຺ຂຓປາຐເກ;

ອາຓາເປຕ຺ວານ ສກ຺ກາຣ-ສມ຺ມານວິຘິປຸພ຺ພກໍ.

໔໗. ນິໂຍເຊສິ ກຸມາຣສ຺ສ, ລກ຺ຂຓານໍ ປຏິຄ຺ຄເຫ;

ສາຘກໍ ສກລໍ ຕສ຺ສ, ຍຕ຺ຖປາທາທິລກ຺ຂຓໍ.

໔໘. ອຸປຘາຣິຍ ມຫາມຈ຺ຈ-ຄຓມຊ຺ຌຄຕສ຺ສ ເຕ;

ຣາຊິໂນ ເທວິຍາ ຈາປິ, ປກາເສສຸໍ ປໂມທິຕາ.

໔໙. ລງ຺ກາທີປໍ ຐເປຕ຺ວານ, ຊມ຺ພຸທີປຕລມ຺ປິ ຈ;

ເອກຈ຺ຉຕ຺ຕງ຺ກິຕໍ ກຕ຺ວາ-ນຸໂຠຕ຺ຕຸໍ ນິປຸໂຓ ອິຕິ.

໕໐. ເຕ ສນ຺ຕປ຺ປິຍ ໂຠເຄຫິ, ຠິຍ຺ໂຍ ປຸຈ຺ຉິຕ຺ຖ ສາທຣໍ;

ສນ຺ທິສ຺ສມານໍ ຍໍກິຎ຺ຈິ, ອຣິຏ຺ຐໍ ອຕ຺ຖິ ນຕ຺ຖີ’ຕິ.

໕໑. ທີຆາຍຸໂກ ກຸມາໂຣ’ຍໍ, ກິຎ຺ຈິ ປຎ຺ຎາຍເຕ ວຕ;

ຊນກາຣິຏ຺ຐໂຍໂຄ’ຕິ, ເຕ ມຫີປຕິໂນ’ພ຺ຣວຸໍ.

໕໒. ຕສ຺ສາຣິຊນສມ຺ມທ຺ທິ-ປຕາປຠຸຊໂຍ ຄໂຕ;

ໂສ ປຣກ຺ກມພາຫູ’ຕິ, ອນ຺ວຕ຺ຖນາມມຄ຺ຄຫີ.

໕໓. ກຓ຺ຓເວ ຘມຫຎ຺ເຈວ, ອນ຺ນຸປາສນມງ຺ຄລໍ;

ກາຣາປິຍ ວິຘານຎ຺ຎູ, ຍຖາວິຘິມເສສໂຕ.

໕໔. ຣຎ຺ໂຎ ວິກ຺ກມພາຫຸສ຺ສ, ສປຸຕ຺ຕຸປ຺ປຕ຺ຕິສາສນໍ;

ວຕ຺ຕຸໍ ສທູເຕ ເປເສສິ, ປຸລຕ຺ຖິນຄຣໍ ຕທາ.

໕໕. ເຕຫິໂສ ຠາຄິເນຍ຺ຍສ຺ສ, ມຫາຠາຄຕ຺ຕນມ຺ປິ ຈ;

ຊນກາຣິຏ຺ຐໂຍຄຎ຺ຈ, ສຸຕ຺ວາ ວິກ຺ກມພາຫຸໂສ.

໕໖. ຘຎ຺ຎໍ ວິຊຍຣາຊາທິ-ຣາຊມາລາຍ ນາຍກໍ;

ມຓິໍວ ຠາສຸຣໍ ມຍ຺ຫໍ, ຠາຄິເນຍ຺ຍໍ ຊເນສິໂສ.

໕໗. ຫານິ ຍາກາຈິສຕຕໍ, ຍຖາ ຕສ຺ສ ນ ເຫສ຺ສຕິ;

ຕຖາ ມມນ຺ຕິເກເຍວ, ກຸມາໂຣ ເອຕ຺ຖ ວຑ຺ຒຕໍ.

໕໘. ອລທ຺ຘໍ ລຠິຕຸໍ ລາຠໍ, ລທ຺ຘຎ຺ຈ ປຣິຣກ຺ຂິຕຸໍ;

ສພ຺ພຖາ ນ ສມຕ຺ໂຖຍໍ, ປຸຕ຺ໂຕ ຄຊພາຫຸ ມມ.

໕໙. ສູຣຠາວາທິຍຸຕ຺ໂຕ’ປິ, ມຫິນ຺ທວ຺ຫປໂຣສຸໂຕ;

ນິຫີໂນ ມາຕຸໂຄຕ຺ເຕນ, ນ ຣຊ຺ຊສ຺ສ ຣໂຫ ມມ.

໖໐. ຐິຕສ຺ສ ວິກ຺ກຊາເຕນ, ເນກໂສ ສຎ຺ຈິເຕນ ເມ;

ຣຊ຺ຊສ຺ສ ຠາຄິເນຍ຺ໂຍ’ວ, ກາມໍ ຠາຄີ ຠວິສ຺ສຕິ.

໖໑. ອິຕິເປເສສິ ທູເຕ ໂສ, ອາເນຕຸໍ ຕໍ ກຸມາຣກໍ;

ກຸມາຣາ ຠຣຓໍ ທຕ຺ວາ, ເສສໍ ສາຣຎ຺ຈຸປາຍນໍ.

໖໒. ສພ຺ພໍ ທູຕມຸຂາ ສຸຕ຺ວາ, ວີຣພາຫຸ ມຫີປຕິ;

ຕສ຺ເສຕໍ ວຈນໍ ຍຸຕ຺ຕໍ, ວຸຕ຺ຕໍ ເມຫິຕ ພຸທ຺ຘິຍາ.

໖໓. ຕຖາປິ ຈ ນິຊາຣິຏ຺ຐ-ປຏິກາຣຕ຺ຖມີທິສໍ;

ໂອຣສໍ ປຸຕ຺ຕຣຕນໍ, ເປເສຕຸໍ ນາ’ນຸຣູປກໍ.

໖໔. ກິຎ຺ຈ ຕຕ຺ຖ ກຸມາຣມ຺ຫິ, ນີເຕ ວິກ຺ກມ ພາຫຸໂນ;

ປກ຺ໂຂ ລທ຺ຘມຫາວາຫ-ພໂລ ວິຍ ຫຸຕາສໂນ.

໖໕. ອຈ຺ຈຸນ຺ນເຕນ ມຫຕາ, ເຕຊສາ ສຎ຺ຊລິສ຺ສຕິ;

ຫານິເຣວ ວຕມ຺ຫາກໍ, ມຫຕີ ເຫສ຺ສເຕ ຠຸສໍ.

໖໖. ອິຕິ ຫຕ຺ເຖ ຄຕານໍ ໂສ, ທູຕານໍ ຖນຍໍ ສກໍ;

ອເປເສຕ຺ວາ ວິສຊ຺ເຊສິ, ປສາທິຍ ມເນນ ໂສ.

໖໗. ສປຸຕ຺ຕທາເຣຫິ ສມຄ຺ຄວາສໍ,

ນຣາທິນາໂຖ ນິວສໍ ຕຫິໍໂສ;

ຕິພ຺ເພນ ຜຸຏ຺ໂຐ ມຫຕາຄເທນ,

ຣຊ຺ເຊນ ສທ຺ຘິໍ ວິຊຫິຕ຺ຖ ເທສໍ.

ສຸຊນປ຺ປສາທສໍເວ ຄຕ຺ຖາຍ ກເຕ ມຫາວໍເສ

ກຸມາໂຣທໂຍ ນາມ

ສຏ຺ຐິໂມ ປຣິຈ຺ເຉໂທ.