ເອກູນສຏ຺ຐິມ ປຣິຈ຺ເຉທ

ຈຕຸຣາຊຈຣິຍ ນິທ຺ເທໂສ

໑. ຕທາຣຎ຺ໂຎ ນຸຊາມິຕ຺ຕາ, ຕສ຺ສ ປຸຕ຺ຕາ ຕໂຍ’ປິ ຈ;

ມຫາມຈ຺ຈາ ຈຍຕໂຍ, ຕຖາ ຍຕນວາສິໂນ.

໒. ຕພ຺ເພເຕ ອາທິປາທສ຺ສ, ໂຣຫເຓ ວສໂຕ ສໂຕ;

ອນາໂຣຈາປຍິຕ຺ວານ, ຠູປາລມຕສາສນໍ.

໓. ສມ຺ຠູຍມນ຺ຕຍິຕ຺ວານ, ສມານຈ຺ຉນ຺ທຕໍ ຄຕາ;

ອທໍສຸ ຍຸວຣາຊສ຺ສ, ລງ຺ກາຣຊ຺ຊາຠິເສຈນໍ.

໔. ໂອປຣຊ຺ເຊ ນິເວເສສຸໍ, ມານຠຣຓນາມກໍ;

ກຸມາຣໍ ປຸພ຺ພຈາຣິຕ຺ຕ-ມຄ຺ຄໍ ລງ຺ຆິຕ຺ຖ ເຕ’ຂິລາ.

໕. ຕໂຍ’ຖ ຠາຕໂຣ ສພ຺ເພ, ເຕ ມາຓຠຣຓາທໂຍ;

ຊຍພາຫຸມຫີປາລ-ສຫິຕາ ສຫສາ ຕທາ.

໖. ມຸຕ຺ຕາມຓິປ຺ປຠູຕິກໍ, ຣຕນໍ ສາຣສມ຺ມຕໍ;

ສພ຺ພໍ ຫຕ຺ຖຄຕໍ ກຕ຺ວາ, ວາຫນຎ຺ຈ ຄຊາທິກໍ.

໗. ສກລໍ ພລມາທາຍ, ປຸລຕ຺ຖິນຄຣາ ຕທາ;

ຂິປ຺ປໍ ຕໍ ວິກ຺ກມຠຸຊໍ, ຄຓ຺ຫິສາມາ’ຕິ ນິກ຺ຂມຸໍ.

໘. ສຸຕ຺ວາ ປວຕ຺ຕິໍ ສກລໍ, ອິມໍ ວິກ຺ກມພາຫຸໂສ;

ຕາ ຕສ຺ສນ຺ຕິມສກ຺ກາຣໍ, ວິຘາຕຸໍ ຫນ຺ທໂນ ລຠິໍ.

໙. ອິທານິ ຂິປ຺ປໍ ຄນ຺ຕ຺ວານ, ປຸລຕ຺ຖິນຄຣໍ ຕຫິໍ,

ຕາ ຕສ຺ສາຬາຫນຏ຺ຐານ ທສ຺ສເນ ເນວ ໂສ ອຫໍ.

໑໐. ໂສກຠາຣໍ ວິໂນເທສ຺ສໍ, ມມ ເຈໂຕ ຄຕໍ ອິຕິ;

ກຕທຬ຺ຫ ວວຕ຺ຖາໂນ, ວິນິຄ຺ຄມ຺ມ ຕໂຕ ປຸຣາ.

໑໑. ປຸລຕ຺ຖິປຸຣມາຄຈ຺ຉໍ, ອາທິປາໂທ’ຕິ ສາສໂສ;

ສຕ຺ຕຏ຺ຐສຕສງ຺ເຂນ, ພເລນ ປຣິວາຣິໂຕ.

໑໒. ອນ຺ຕຣາລປເຖເຍວ, ຄຸຕ຺ຕຫາລກມຓ຺ຑເລ;

ຄາເມ ປນ ສມຸກ຺ກວ຺ເຫ, ທິສ຺ວາ ເສນງ຺ຄມາຄຕໍ.

໑໓. ມຫນ຺ຕໍ ຍຸທ຺ຘສນ຺ນທ຺ຘໍ, ເອກວີໂຣ ຠຍາຕິໂກ;

ຍຸຊ຺ຌິຕ຺ວາ ເຕ ປລາເປສິ, ຂເຓເນວ ທິໂສທິສໍ.

໑໔. ຕໂຍ ເຕ ຠາຕໂຣ ຕຕ຺ຖ, ສມ຺ປຕ຺ຕາວ ຊຍາ ຕໂຕ;

ອຠິມານຸທ຺ຘຕາ ຂິປ຺ປໍ, ອນ຺ນຍ຺ຫ ພລວາຫນໍ.

໑໕. ອາທິປາທກຊມ຺ພູຕິ, ວິສ຺ສຸຕມ຺ຫິ ປເທສເກ;

ສງ຺ຄາເມສຸໍ ປຣາເຊສິ, ຠິຍ຺ໂຍ ຍຸຊ຺ຌິຕ຺ຖ ໂສ ຕໂຍ.

໑໖. ຕຕິຍໍ ກຏຄາມສ຺ມິໍ, ກາຬວາປ຺ຍໍ ຈຕຸຕ຺ຖກໍ;

ປຎ຺ຈມໍ ອຸທ຺ຘຏທ຺ວາເຣ, ຉຏ຺ຐໍໂສ ປງ຺ກເວລເກ.

໑໗. ເຕຫິ ຍຸທ຺ຘໍ ກຣິຕ຺ວານ, ຄຫີຕວິຊໂຍ ສທາ;

ປຸລຕ຺ຖິປຸຣມາຄຎ຺ຈິ, ສຫາມຈ຺ຈ ປຣິຊ຺ຊໂນ.

໑໘. ສຈິນ຺ຕິຕກ຺ກເມເນວ, ປສ຺ສິຕ຺ວາຬາຫນໍ ປິຕຸ;

ວິທູຣິຕມຫາເສໂກ, ລທ຺ຘສ຺ສາໂສ ປຸເຣວສໍ.

໑໙. ທຸກ຺ເຂ ສຫາຍ ຠູຕານ-ມຕ຺ຕໂນ ໂສ ຍຖາຣຫໍ;

ອມຈ຺ຈານມທາ ສພ຺ພ-ໂຠເຄ ຐານນ຺ຕເຣ ຫິ ໂສ.

໒໐. ຠຏານຎ຺ຈາປິ ສພ຺ເພສໍ, ສຫາຍາຕານມຕ຺ຕໂນ;

ອນຸຣູປມທາ ວຸຕ຺ຕິໍ, ສຣໍ ທຸກ຺ຂສຫາຍຕໍ.

໒໑. ມາຓາຠຣຓຠູໂປປິ, ສທ຺ຘິໍ ເສເສຫິ ຠາຕູຫິ;

ກຣິຕ຺ວາ ໂຣຫຓໍ ປສ຺ສໍ, ໂຣຫຓຎ຺ຈ ສຫຕ຺ຖຄໍ.

໒໒. ຕໂຕ ກິຕ຺ຕິສິຣີເມເຆ, ສທ຺ວາທສສຫສ຺ສກໍ;

ຣຏ຺ຐໍ ທຕ຺ວານ ວສິຕຸໍ, ຕຫິໍເຍວ ສມາທິສິ.

໒໓. ອາຓຕ຺ໂຕ ຠາຕຣາກິຕ຺ຕິ-ສິຣີເມໂຆ ຊນາຘິໂປ;

ຄນ຺ຕ຺ວາ ວສິ ປຸເຣຕຕ຺ຖ, ມຫານາຄຫຸລວ຺ຫເຍ.

໒໔. ສິຣີວລ຺ລຠນາມສ຺ສ, ກຸມາຣສ຺ສາປິ ຈາທິສິ;

ເທສມຏ຺ຐສຫສ຺ສວ຺ຫໍ, ທຕ຺ວານ ວສິຕຸໍ ຕຫິໍ.

໒໕. ຕເຖວ ໂສປິ ຄນ຺ຕ຺ວານ, ອຸທ຺ຘນທ຺ວາຣນາມກໍ;

ຄາມໍ ກຕ຺ວາ ຣາຊທານິໍ, ວສນ຺ໂຕ ອນຸສາສິຕໍ.

໒໖. ສຍຎ຺ຈ ສຫເສນາຍ, ຄນ຺ຕ຺ວາ ທກ຺ຂິຓປສ຺ສກໍ;

ວີຣພາຫູຕິ ປຎ຺ຎາໂຕ, ປຸງ຺ຂຄາມໍ ສມາວສິ.

໒໗. ມາຕາ ຈ ຕິຓ຺ຓໍ ຠາຕູນໍ, ຊຍພາຫຸ ຈ ຠູມິໂປ;

ນິວສິໍສຸ ຕທາ ກິຕ຺ຕິ-ສິຣິເມຆສ຺ສ ສນ຺ຕິເກ.

໒໘. ຕໂຕ ສໍວຈ຺ຉເຣ’ຕີເຕ, ເຕ ມາຓຠຣຓາທໂຍ;

ເຕນຕ຺ຕນິ ກຕໍ ຍຸທ຺ເຘ, ສພ຺ພໍ ວິກ຺ກມພາຫຸນາ.

໒໙. ທຸຣາໂຣຫໍ ມຫນ຺ຕໍ ຕໍ, ປຣາຊຍຕຣາຠວໍ;

ອນຸສ຺ສຣນ຺ຕພຫຸໂສ, ອຠິມານສມຸນ຺ນຕາ.

໓໐. ມຸທ຺ຘາຠິສິຕ຺ຕຣາຊູນ-ເມກາກີຣາຊຣຏ຺ຐກໍ;

ວິນາຍມຠິເສເກນ, ກຖໍ ນາມານຸໂຠສ຺ສຕິ.

໓໑. ອິຕິ ອິສ຺ສາ ປຣຕ຺ຕຎ຺ຈ, ຍາຕາ ສງ຺ຄຍ຺ຫສາວເກ;

ຠິຍ຺ໂຍ ສມ຺ຠູຍສງ຺ຄາມ-ກຣຓຕ຺ຖາຍ ນິກ຺ຂມຸໍ.

໓໒. ສຸຕ຺ວາ ຕມຕ຺ຖໍ ທູເຕຫິ, ໂສ ວິກ຺ກມຠຸໂຊປິ ຈ;

ອຄາ ເຕສໍວ ວິສຍໍ, ມຫາເສນາປຸຣກ຺ຂໂຕ.

໓໓. ເທເສ ທກ຺ຂິຓເກ ໂພຘິ-ເສນປພ຺ພຕຄາມເກ;

ຍຸຊ຺ຌິຕ຺ວາ ເຕ ປຣາເຊສິ, ຕໂຍ ວິກ຺ກມພາຫຸໂສ.

໓໔. ຣິປໂວ ທານິ ເມ ສພ຺ເພ, ອຸມ຺ມູເລສ຺ສາມຫໍ ອິຕິ;

ປລາຍນ຺ເຕ ນຸພນ຺ຘິຕ຺ຖ, ປທານຸປທິກໍ’ວ ເຕ.

໓໕. ເຕ ຈ ທຸຄ຺ຄໍ ປລາຍິໍສຸ, ປຎ຺ຈໂຍຊນຣຏ຺ຐເກ;

ຂິປ຺ປໍ ປາເວກ຺ຂິ ກລ຺ຍາຓິໍ, ໂສ’ປິ ເຕ ຄຫຓຕ຺ຖິໂກ.

໓໖. ວີໂຣ ອຣິຍເທສິໂຍ, ວີຣເທໂວຕິ ປາກໂຏ;

ປຬນ຺ທີປິສ຺ສໂຣ ເອໂກ, ຠູສໍ ສຫສິໂກ ຕທາ.

໓໗. ສທ຺ຘິໍ ສູເຣຫິ ໂຍເຘຫິ, ມຫາຕິຕ຺ຖມ຺ຫິ ໂອຕຣິ;

ກາຕຸໍ ຫຕ຺ຖຄຫໍ ສກ຺ກາ, ລໍກາທີປນ຺ຕິ ຈິນ຺ຕິຍ.

໓໘. ໂສ ວິກ຺ກມຠຸໂຊ ສຸຕ຺ວາ, ປວຕ຺ຕິໍ ຠູຠຸໂຊ ຕທາ;

ຍາວຕາ ນາຕ຺ຣ ລໍກາຍໍ, ລທ຺ໂຘຄາໂຫ ຠວິສ຺ສຕິ.

໓໙. ຕາວ ອຸມ຺ມູລນີໂຍຕິ, ກລ຺ຍາຓິມ຺ຫາ ວິນິຄ຺ຄໂຕ;

ມຫາຕິຕ຺ຖມ຺ຫິ ມນ຺ນາຣ-ນາມກໍ ຄາມກໍ ຄໂຕ.

໔໐. ກຕ຺ວານ ວີຣເທໂວ’ປິ, ສງ຺ຄາມໍ ເຕນ ຣາຊິນາ;

ອນີກງ຺ຄາທໂຍ ຣາຊ-ປຸຕ຺ເຕ ທ຺ເວ ຠາຕໂຣປິ ຈ.

໔໑. ເສນາຘິນາຍກຎ຺ເຈວ, ກິຕ຺ຕິນາມປ຺ປກາສິຕໍ;

ຆາເຕຕ຺ວາ ສຫສາ ວີຣ-ສມ຺ມເຕ ຈ ພຫູຊເນ.

໔໒. ຄາເຫຕ຺ວາ ຊີວຄ຺ຄາຫໍໂສ, ຣກ຺ຂກຎ຺ຈ ຈມູປຕິໍ;

ສພລໍ ຕໍ ປຣາເຊຕ຺ວາ, ອນຸພນ຺ຘິ ປທາປທໍ.

໔໓. ປລາຍມາໂນ ໂສ ຠີໂຕ, ອາຄນ຺ຕ຺ວານ ນິຊໍ ປຸຣໍ;

ຫຕ຺ຖສາຣໍ ສມາທາຍ, ໂກຏ຺ຐສາຣໍ ຄໂຕ ລຫຸໍ.

໔໔. ປຈ຺ຉໂຕ ປຈ຺ຉໂຕ ວີຣ-ເທໂວ ຕມນຸພນ຺ຘິຍ;

ອາຄນ຺ຕ຺ວານ ປຸເຣວາສໍ, ກຕິປາຫໍ ວິຘາຍໂສ.

໔໕. ຄຓ຺ຫິຕຸໍ ວິກ຺ກມຠຸຊໍ, ຕຕ຺ເຖວ ຕຸຣິຕໍ ອຄາ;

ເປສຍິຕ຺ວາ ສກໍ ໂສປິ, ມຫນ຺ຕໍ ສກລໍ ພລໍ.

໔໖. ຍຸຊ຺ຌາເປຕ຺ວານ ຆາເຕຕ຺ວາ, ຄາເມ ອນ຺ຕຣວິຏ຺ຐິເກ;

ມຫາກທ຺ທມທຸຄ຺ຄມ຺ຫິ, ວີຣເທວໍ ມຫພ຺ພໂລ.

໔໗. ອຠິເສກໍ ວິນາເຍວ, ປຸລຕ຺ຖິ ນຄເຣ ວສໍ;

ອກາສິ ຣາຊຣຏ຺ຐສ຺ສ, ປສາສນວິຘິໍ ວິຠູ.

໔໘. ອປນີຍຣເຓ ຉນ຺ທໍ, ຠາຕໂຣປິ ຕໂຍ ຕໂຕ;

ອາວສິໍສຸ ຍຖາປຸພ຺ພໍ, ຄນ຺ຕ຺ວາ ຣຏ຺ຐໍ ສກໍ ສກໍ.

໔໙. ຈຕຸໂຣປິ ມຫີປາລາ, ຍຕມານາ ຈິຣໍ ຕຫິໍ;

ເອກຈ຺ຉຕ຺ຕງ຺ກິຕໍ ກາຕຸໍ, ເນວ ສກ຺ຂິໍສຸ ສພ຺ພໂສ.

໕໐. ອນິສມ຺ມກາຣິຠາເວນ, ກຸລີເນ ປຣິຫາປຍຸໍ;

ຐເປສຸຎ຺ຈ ມຫນ຺ຕຕ຺ເຕ, ຫີເນ ສາຠິມເຕ ຊເນ.

໕໑. ວຑ຺ຒິຕໍເນກຘາ ສມ຺ມາ, ຣຎ຺ຎາ ວິຊຍພາຫຸນາ;

ສາສນຎ຺ຈ ຕຖາໂລກໍ, ຫາປຍິໍສຸ ສຸພຸທ຺ຘິໂນ.

໕໒. ກຸລີນານໍ ມນຸສ຺ສານ-ມຠາເວປິ ຈ ຕາທິເສ;

ໂທເສ ວິຕ຺ຕໍ ຕທາຍຕ຺ຕໍ, ປສຍ຺ຫາວຫຣິໍສຸ ຈ.

໕໓. ປີເຬຕຸໍ ສກລໍ ໂລກ-ມຸທ຺ຘຣນ຺ຕາຘິກໍ ພລິໍ;

ອຸຈ຺ຉູວ ອຸຈ຺ຉຸຍນ຺ເຕເຕ, ຂີຓໂກ ສາຘເນສິໂນ.

໕໔. ອຸທ຺ຘຣິຕ຺ວານ ພຸທ຺ຘາທິ-ສນ຺ຕເກ ໂຠຄຄາມເກ;

ໂສ ວິກ຺ກມຠຸໂຊ ຣາຊາ, ເສວເກສຸ ສມປ຺ປຍີ.

໕໕. ປຸລຕ຺ຖິນຄເຣ ເນກ-ວິຫາເຣ ຘາຕຸມຓ຺ຑິເຕ;

ໂສວ ເທສນ຺ຕຣີຍານໍ, ຠຏານໍ ວສິຕຸໍ ອທາ.

໕໖. ສທ຺ເຘຫິ ປຕ຺ຕຘາຕຸສ຺ສ, ທາຐາຘາຕຸວຣສ຺ສ ຈ;

ປູຊນຕ຺ຖາຍ ທິນ຺ນານິ, ມຓິມຸຕ຺ຕາທິການິ ຈ.

໕໗. ຈນ຺ທນາຄຣຸກປ຺ປຸຣໍ, ສຸວຓ຺ຓາທິມຍາ ພຫູ;

ປຏິມາໂຍ ຈ ອຈ຺ຉິຊ຺ຊ, ຍຖາກາມໍ ວຍໍ ນຍີ.

໕໘. ສາສນສ຺ສ ຈ ໂລກສ຺ສ, ກ຺ຣິຍມານມຸປທ຺ທວໍ;

ປສ຺ສນ຺ຕາ ພຫຸໂສ ຕສ຺ມິໍ, ຕທາ ນິພ຺ພນ຺ນມານສາ.

໕໙. ອຏ຺ຐມູລວິຫາເຣສຸ, ຍຕໂຍ ຄຣຸສມ຺ມຕາ;

ປໍສຸກູລິກຠິກ຺ຂູ ຈ, ໂກຏ຺ຐາສທ຺ວຍນິສ຺ສິຕາ.

໖໐. ເອວໍ ຕິຕ຺ຖິຍຕຸລ຺ຍານໍ, ສາສໂນປທ຺ທວໍ ພຫຸໍ;

ກໂຣນ຺ຕານໍ ສກາ ສມ຺ຠາ-ປຍາຕໍ ປວຣໍ ອິຕິ.

໖໑. ທາຐາຘາຕຸວຣໍ ປຕ຺ຕ-ຘາຕຸມາທາຍ ໂຣຫຓໍ;

ຄນ຺ຕ຺ວາ ວາສມກປ຺ເປສຸໍ, ຜາສຸຐາເນ ຕຫິໍ ຕຫິໍ.

໖໒. ຕເຖວ ຜາສຸຐາເນສຸ, ວິປ຺ປກິຓ຺ຓາ ຕຫິໍ ຕຫິໍ;

ເຕ ກຸລີນາ ນິລີນາ’ວ, ຫຸຕ຺ວາ ວາສມກປ຺ປຍຸໍ.

໖໓. ປກ຺ຂທ຺ວຍມຫີປາລ-ຄຍ຺ຫາສີມາ ສຸຐາປິຕາ;

ສາມນ຺ຕາ ອຎ຺ຎມຎ຺ເຎຫິ, ກໂຣນ຺ໂຕ ພຫຸໂສ ຣຓໍ.

໖໔. ສຸສມິທ຺ເຘສຸ ເນເກສຸ, ຄາເມສຸ ນິຄເມສຸ ຈ;

ອຄ຺ຄິໍ ເທນ຺ຕາ ຕຬາເກ ຈ, ຉິນ຺ທນ຺ຕາ ຊລປູຣິເຕ.

໖໕. ນາເສນ຺ຕາ ສພ຺ພຖາ ສພ຺ພ-ມາຕິກາວຣຓານິ ຈ;

ຉິນ຺ທນ຺ຕາ ນາຬິເກຣາທິ, ໂສ ປກາເຣ ຈ ຠູຣຸເຫ.

໖໖. ຍຖາ ໂປຣາຓກຄ຺ຄາມ-ຐານນ຺ຕິປິ ນ ຎາຍເຕ;

ວິນາເສສຸໍ ຕຖາ ຣຏ຺ຐໍ, ອຎ຺ຎມຎ຺ຎວິໂຣຘິໂນ.

໖໗. ເຕ ຈ ຠູມິ ປຕີຄາມ-ວິໂລປໍ ປຕ຺ຖໂມສນໍ;

ກາເຣນ຺ຕາ ນິຊຈາເຣຫິ, ອາຈຣຸໍ ໂລກຸປທ຺ທວໍ.

໖໘. ກຸລີນານໍ ມນຸສ຺ສານໍ, ທາສກມ຺ມກຣາປິ ຈ;

ສສາມິໂນ’ຕິ ວຕ຺ຕນ຺ຕາ, ນິສ຺ສງ຺ກາ ວີຕຠີຕິກາ.

໖໙. ຫຸຕ຺ວາ ຍຸຘີຍາ ຣາຊູນໍ, ອພ຺ຠນ຺ຕຣປວຕ຺ຕິໂນ;

ພລວນ຺ຕຕຣາ ຊາຕາ, ລທ຺ຘຐານນ຺ຕຣາ ຕທາ.

໗໐. ຊນາ ສມນ຺ຕກູຏາທິ-ເນກທຸຄ຺ຄນິວາສິໂນ;

ອເທນ຺ຕາ ຠູມິປາລານໍ, ປຸພ຺ພປຏ຺ຐປິຕໍ ກຣໍ.

໗໑. ຣາຊາຓມຄເຓນ຺ຕາ ເຕ, ຄຕາ ທາມຣິກຕ຺ຕນໍ;

ສກໍ ສກໍ’ວ ວິສຍ-ມາວສິໍສຸ ສມຸທ຺ຘຕາ.

໗໒. ອນຕ຺ເຖ ນິຈິຕາ ນາມ, ປຣິວຕ຺ຕນ຺ຕິ ສພ຺ພຕາ;

ອິຕິ ວຕ຺ຕພ຺ພ ຕໍເຍວ, ຍາຕໍ ລງ຺ກາຕລໍ ຕທາ.

໗໓. ເອວໍ ຄາມກໂຠຊກາ ວິຍ ຠຸສໍເຕໂຊ ວິຫີນາ ສທາ;

ອຈ຺ຈນ຺ຕໍ ພ຺ຍສນາຕິ ສຕ຺ຕຫທຍາ ຣາຊາຠິມານຸຊ຺ຌິຕາ.

໗໔. ນິຈ຺ຈໍ ອຕ຺ຕປຣຕ຺ຖສິທ຺ຘິວິຘຸຣາສງ຺ຄາ ວິຫີນາສຍາ;

ສພ຺ເພ ເຕ ວິຫຣິໍສຸ ຠູມິປຕໂຍ ຈາຣິຕ຺ຕມຄ຺ຄາຕິຄາ.