ທ຺ວິປຎ຺ຎາສຕິມ ປຣິຈ຺ເຉທ

ຕິຣາຊໂກນາມ

໑. ຕໂຕ ລງ຺ກາຠິເສກໍ ໂສ, ປຕ຺ວາ ເສໂນ ກມາຄຕໍ;

ມຫິນ຺ທສ຺ສາທິປາທສ຺ສ, ຍຸວຣາຊປທໍ ອທາ.

໒. ປຎ຺ໂຎ ມຫາກວີ ພ຺ຍຕ຺ໂຕ, ມຊ຺ຌຕ຺ໂຕ ມິຕ຺ຕສຕ຺ຕຸສຸ;

ຍຸຕ຺ໂຕ ທຍາຍ ເມຕ຺ຕາຍ, ຣາຊາ ໂສ ສພ຺ພທາ ອຫຸ.

໓. ກາລໍ ເທໂວ’ນຕິກ຺ກມ຺ມ, ສມ຺ມາ ຘາຣາຠິວສ຺ສຕິ;

ຣຏ຺ເຐ ຕສ຺ມິໍ ວສນ຺ຕາ’ສຸໍ, ສຸຂິຕາ ນິພ຺ຠຍາ ສທາ.

໔. ສຸຕ຺ຕນ຺ຕໍ ໂລຫປາສາເທ, ນິສິນ຺ໂນ ວຓ຺ຓຍີ ຕທາ;

ນິກາຍຕ຺ຕຍວາສີຫິ, ຣາຊາ ໂສ ປຣິວາຣິໂຕ.

໕. ທາຐຘາຕຸກຣຓ຺ຑໍ ໂສ, ນານາຣຕນຠູສິຕໍ;

ອກາ ຈຕຸວິຫາເຣສຸ, ຘາຕຸປູຊາ ຈ’ເນກຘາ.

໖. ປຣິເວຓໍ ສິຕ຺ຖຄາມໍ, ກາເຣຕ຺ວາ ວຸຕ຺ຖມຕ຺ຕນາ;

ໂລກໍ ປຸຕ຺ຕໍວ ປາເລຕ຺ວາ, ຕິວສ຺ເສນ ທິວງ຺ຄໂຕ.

໗. ຍຸວຣາຊາ ມຫິນ຺ໂທ ໂສ, ຣາຊາສິ ຕທນນ຺ຕຣໍ;

ມຫາປຸຎ຺ໂຎ ມຫາເຕໂຊ, ມຫາເສໂນ ມຫາຍໂສ.

໘. ເອກຈ຺ຉຕ຺ຕໍ ອກາ ລງ຺ກໍ, ຆາເຕຕ຺ວາ ໂຈຣຸປທ຺ທວໍ;

ອກໍສຸ ຕມຸປຏ຺ຐານໍ, ນິຈ຺ຈມຓ຺ຑລນາຍກໍ.

໙. ວິຊ຺ຊມາເນປິ ລງ຺ກາຍໍ, ຂຕ຺ຕິຍານໍ ນຣາຘິໂປ;

ກາລິງ຺ຄຈກ຺ກວຕ຺ຕິສ຺ສ, ວໍເສ ຊາຕໍ ກຸມາຣິກໍ.

໑໐. ອາຓາເປຕ຺ວານ ຕໍ ອຄ຺ຄ-ມເຫສິໍ ອຕ຺ຕໂນ ອກາ;

ຕສ຺ສາ ປຸຕ຺ຕາ ທຸເວ ຊາຕາ, ຘີຕາ ເອກາ ມໂນຣມາ.

໑໑. ອາທິປາເທ ອກາ ປຸຕ຺ເຕ, ຘີຕຣໍ ໂຈປຣາຊິນິໍ;

ອິຕິ ສີຫຬວໍສຎ຺ຈ, ປຏ຺ຐເປສິ ສຠູປຕິ.

໑໒. ພລກາຍໍ ອິມໍ ເທສໍ, ມທ຺ທນຕ຺ຖາຍ ວລ຺ລໂຠ;

ເປເສສິ ນາຄທີປໍ ໂສ, ສຸຕ຺ວາ ຕໍ ຠູປຕິ ອິຘ.

໑໓. ພລໍ ທຕ຺ວານ ເສນວ຺ຫ-ຣາຊເສນາປຕິໍ ຕທາ;

ວລ຺ລຠສ຺ສ ພເລເນ’ສ, ຍຸຊ຺ຌິຕຸໍ ຕຕ຺ຖ ເປສຍິ.

໑໔. ຄນ຺ຕ຺ວາ ເສນາປຕີ ຕຕ຺ຖ, ພເລເນ’ຕສ຺ສ ຣາຊິໂນ;

ຍຸຊ຺ຌິຕ຺ວາ ຕໍ ວິນາເສຕ຺ວາ, ຄຓ຺ຫິ ໂສ ຍຸທ຺ຘມຓ຺ຑເລ.

໑໕. ອສກ຺ເກນ຺ໂຕ ອິມໍ ເຊຕຸໍ, ຣາຊາ ນໍ ວລ຺ລຠາທໂຍ;

ຣາຊາໂນ ມິຕ຺ຕສມ຺ພນ຺ຘໍ, ລໍກິນ຺ເທນ ອກໍສຸ ເຕ.

໑໖. ອິຈ຺ເຉວໍ ຣາຊິໂນ ເຕໂຊ, ຊມ຺ພຸທີປມວຕ຺ຖຣິ;

ປຕ຺ຖຣິຕ຺ວານ ລໍກາຍໍ, ອຸລ຺ລງ຺ຆິຕ຺ວານ ສາຄຣໍ.

໑໗. ສທ຺ຘມ຺ມໍ ກຖາຍນ຺ຕານໍ, ກຕ຺ວາ ສມ຺ມາ ນ ມຸຕ຺ຕມໍ;

ຘມ຺ມໍ ສຸຕ຺ວານ ໂສ ຣາຊາ, ປສນ຺ໂນ ພຸທ຺ຘສາສເນ.

໑໘. ຣາຊາ ໂສ ສນ຺ນິປາເຕຕ຺ວາ, ປໍສຸກູລິກຠິກ຺ຂໂວ;

ຍາຈິຕ຺ວາ ອຕ຺ຕໂນ ເຄຫໍ, ອາຓາເປຕ຺ວານ ສາຘຸກໍ.

໑໙. ອາສນໍ ປຎ຺ຎເປຕ຺ວານ, ນິສີທາປິຍ ໂຠຊນໍ;

ທາເປສິ ວິປຸລໍ ສຸທ຺ຘໍ, ສທາ ເອກທິເນ ວິຍ.

໒໐. ອເນກພ຺ຍຎ຺ຊນໍ ຣາຊາ-ຣຎ຺ຎການໍ ຕປສ຺ສິນໍ;

ເປເສສິ ໂຠຊນໍ ສຸທ຺ຘໍ, ມຫຄ຺ຆໍ ວິປຸລໍ ສທາ.

໒໑. ເວຊ຺ເຊວ ເປສຍິຕ຺ວານ, ວິລານານໍ ຕປສ຺ສິນໍ;

ສນ຺ຕິກໍ ໂສ ທຍາວາໂສ, ຕິກິຈ຺ຉາເປສິ ນິຈ຺ຈໂສ.

໒໒. ຄຸຬານິ ຆນປາການິ, ລສຸຓານໍ ຣສານິ ຈ;

ຕມ຺ພຸລມຸຂວາສຎ຺ຈ, ປຈ຺ຉຠຕ຺ເຕ ອທາ ສທາ.

໒໓. ປຕ຺ເຕສຸ ປູຣຍິຕ຺ວານ, ລສຸຓໍ ມຣິຈມ຺ປິ ຈ;

ປິປ຺ຜລິສງ຺ຄີເວຣານິ, ຄຸຬານິ ຕິຜລານິ ຈ.

໒໔. ຆຕໍ ເຕລໍ ມຘຸຎ຺ຈາຍ, ປາປຸຣຕ຺ຖຣຓານິ ຈ;

ປໍສຸກູລິກຠິກ຺ຂູນໍ, ປຈ຺ເຈກໍ ສພ຺ພທາ ອທາ.

໒໕. ຈີວຣາທີນິ ສພ຺ພານິ, ປຣິກ຺ຂາຣານິ ຠູປຕິ;

ກາຣາເປຕ຺ວານ ທາເປສິ, ຠິກ຺ຂູນໍ ປໍສຸກຸລິນໍ.

໒໖. ຣາຊາ ມຫາວິຫາຣສ຺ມິໍ, ເອເກກສ຺ສ ຫິ ຠິກ຺ຂຸໂນ;

ປຈ຺ເຈກໍ ນວວຕ຺ຖານິ, ຈີວຣຕ຺ຖາຍ ທາປຍິ.

໒໗. ນິກາຍຕ຺ຕຍວາສີນໍ, ຠິກ຺ຂູນໍ ລາຠວາສິນໍ;

ຕຸລາຠາຣມທາ ທ຺ວີສຸ, ວາເຣສຸ ສມຫີປຕິ.

໒໘. ຣາຊາ ໂສ ນາຄເຕໂຠຄໍ,

ຣາຊາໂນ ສງ຺ຆໂຠຄໂຕ;

ນ ຄຓ຺ຫນ຺ຕູນິ ປາສາເຓ,

ລິຂາເປຕ຺ວາ ນິຘາປຍິ.

໒໙. ກຖາເປຕ຺ວານ ພຸທ຺ຘສ຺ສ, ສຣຓານິ ຄຸເຓນວ;

ອນາເຖຫິ ຈ ເຕສຎ຺ຈ, ຠຕ຺ຕວຕ຺ຖານິ ທາປຍິ.

໓໐. ທານສາລໍ ກຣິຕ຺ວານ, ຫຕ຺ຖິສາລກຠູມິຍໍ;

ຍາຈການໍ ອທາ ທານໍ, ເຕສຎ຺ຈ ສຍນາສນໍ.

໓໑. ເວຊ຺ຊສາລາສຸ ສພ຺ພາສຸ, ເຠສຊ຺ຊໍ ມຎ຺ຈກຎ຺ຈ ໂສ;

ໂຈຣານໍ ພນ຺ຘນາຄາເຣ, ນິຈ຺ຈໍ ຠຕ຺ຕານິ ທາປຍິ.

໓໒. ວານຣານໍ ວຣຫານໍ, ມິຄານໍ ສຸນຂານ ຈ;

ຠຕ຺ຕໍ ປູວຎ຺ຈ ທາເປສິ, ທຍາວາໂສ ຍຖິຈ຺ຉກໍ.

໓໓. ຣາຊາ ຈຕຸວິຫາເຣສຸ, ກຕ຺ວາ ໂສ ວີຫິຣາສໂຍ;

ຍຖິຈ຺ຉິເຕນ ຄຓ຺ຫນ຺ຕຸ, ອນາຖາ ອິຕິ ທາປຍິ.

໓໔. ນານາປູຊາຫິ ປູເຊຕ຺ວາ, ກຕ຺ວາ ມງ຺ຄລມຸຕ຺ຕມໍ;

ກຖາເປສິ ຈ ຠິກ຺ຂູຫິ, ພ຺ຍຕ຺ເຕຫິ ວິນຍໍ ຕທາ.

໓໕. ເຖເຣນ ຘມ຺ມມິຕ຺ເຕນ-ສິຕ຺ຖຄາມກວາສິນາ;

ປູຊຍິຕ຺ວານ ກາເຣສິ, ອຠິຘມ຺ມສ຺ສ ວຓ຺ຓນໍ.

໓໖. ທາຐານາຄາ’ຠິຘາເນນ, ເຖເຣນາ’ຣຎ຺ຎວາສິນາ;

ລໍກາລໍກາຣຠູເຕນ, ອຠິຘມ຺ມໍ ກຖາປຍິ.

໓໗. ປຏ຺ຏກຎ຺ຈຸກປູຊາຫິ, ເຫມມາລິກເຈຕິຍໍ;

ນຈ຺ຈຄີເຕຫິ ຄນ຺ເຘຫິ, ປຸປ຺ເຜຫິ ວິວິເຘຫິ ຈ.

໓໘. ທີປມາລາຫິ ຘູເປຫິ, ປູຊຍິຕ຺ວານ’ເນກຘາ;

ຕສ຺ສ ວຕ຺ຖານິ ຠາເຊຕ຺ວາ, ຠິກ຺ຂູນໍ ທາປຍີ ສຍໍ.

໓໙. ສທາ ໂສ ອຕ຺ຕໂນ ຣຊ຺ເຊ, ອຸຍ຺ຍາເນສຸ ຕຫິໍຕຫິໍ;

ອາຓາເປຕ຺ວານ ປຸປ຺ຜານິ, ປູເຊສິ ຣຕນຕ຺ຕຍໍ.

໔໐. ປາສາທໍ ຈນ຺ທນໍ ນາມ, ກາຕຸໍ ມຣິຈວຏ຺ຏິຍໍ;

ອກາຣມ຺ຠຎ຺ຈ ຠິກ຺ຂູນໍ ໂຠຄຄາເມ ຈ ທາປຍິ.

໔໑. ເກສຘາຕຸໍ ນິຘາເປຕ຺ວາ, ກຣຓ຺ຑໍ ຣຕເນຫິ ໂສ;

ກາຣຍິຕ຺ວານ ປູເຊສິ, ຐເປຕ຺ວາ ຕຕ຺ຖ ຠູປຕິ.

໔໒. ໂສຓ຺ຓຣຊຕປຏ຺ເຏຫິ, ຖູປາຣາມມ຺ຫິ ເຈຕິຍໍ;

ຉາທາເປຕ຺ວາ ຍຖາຣຊ຺ຊໍ, ປູຊໍ ກາເຣສິ ຠູປຕິ.

໔໓. ຕສ຺ມິໍ ຘາຕຸຆເຣ ຣາຊາ, ໂສຓ຺ຓທ຺ວາຣມກາຣຍິ;

ປຊ຺ຊລນ຺ຕໍ ສິເນຣຸໍວ, ຣໍສີຫິ ສູຣິຍສ຺ສ ໂສ.

໔໔. ຌາປິຕໍ ໂຈຬຣາຊສ຺ສ, ພເລນ ປທລຎ຺ຉເນ;

ຈຕຸນ຺ນໍ ເຈຕິຍານໍ ໂສ, ຣມນີຍໍ ຆຣໍ ອກາ.

໔໕. ຌາຕໍ ນຄຣມຊ຺ຌມ຺ຫິ, ທາຐາຘາຕຸຆຣໍ ອກາ;

ຘມ຺ມສງ຺ຄຓີເຄຫຎ຺ຈ, ມຫາປາຬິຎ຺ຈ ຠູປຕິ.

໔໖. ຕມ຺ພູລມຓ຺ຑປໍ ກຕ຺ວາ, ຕຕ຺ຖ ສຸງ຺ກໍ ມຫີປຕິ;

ຠິກ຺ຂູນໍ ເຖຣວໍເສ ໂສ, ເຠສຊ຺ຊຕ຺ຖາຍ ທາປຍິ.

໔໗. ອຸປສ຺ສຍໍ ກຣິຕ຺ວານ, ມຫາມງ຺ຄລນາມກໍ;

ເຖຣວໍສມ຺ຫິ ຊາຕານໍ, ຠິກ຺ຂຸນີນໍ ອທາປຍິ.

໔໘. ມາຕຸໂລທຍຣາເຊນ, ອາຣທ຺ຘໍ ສາຘຸນາ ຕທາ;

ນິຏ຺ຐາເປສິ ມຫີປາໂລ, ປາສາທໍ ມຓິນາມກໍ.

໔໙. ປຣິເວຓານິ ຈຕ຺ຕາຣິ, ຕສ຺ມິໍ ເຊຕວເນ ຕທາ;

ກາຣາປຍິໍສຸ ຈຕ຺ຕາໂຣ, ອມຈ຺ຈາ ຕສ຺ສ ຣາຊິໂນ.

໕໐. ຣຎ຺ໂຎ ກິຕ຺ຕິສມາເທວີ, ກິຕ຺ຕິນາມາ ມໂນຣມາ;

ປຣິເວຓໍ ອກາຣາມໍ, ຖູປາຣາມສ຺ສ ປຈ຺ຉໂຕ.

໕໑. ສາ ຕສ຺ມິໍ ປຣິເວເຓ ຈ, ອກາ ກປ຺ປາສຄາມເກ;

ຈີວຣເຈຕິເຍ ເຈວ, ຕິສ຺ໂສ ໂປກ຺ຂຣຓີ ສຸຈິ.

໕໒. ທ຺ວາທສຣຕນາຍາມໍ, ຘຊໍ ໂສຓ຺ຓມຍຎ຺ຈ ສາ;

ປູເຊສິ ປຸຎ຺ຎສມ຺ຠາຣໍ, ເຫມມາລິກ ເຈຕິເຍ.

໕໓. ຄິຫີນໍ ວຊ຺ຊສາລຎ຺ຈ, ປຸຕ຺ໂຕ ຕສ຺ສາ ປຸເຣອກາ;

ຄຸຓວາສກ຺ກເສນານີ, ຠິກ຺ຂູນຎ຺ຈ ປຸຣາພຫິ.

໕໔. ຣາຊາ ຈຕຸວິຫາເຣສຸ, ທິພ຺ພປາສາທສນ຺ນິເຠ;

ມຓ຺ຑເປ ກາຣຍິຕ຺ວານ, ຘາຕຸປູຊາ ອເນກຘາ.

໕໕. ວສ຺ສເມກມຕິກ຺ກມ຺ມ, ກາຣາເປຕ຺ວາ ມຫີປຕິ;

ຈາຣິຕ຺ຕໍ ປຸພ຺ພຣາຊູນໍ, ປຣິປາເລສິ ສາຘຸກໍ.

໕໖. ເອວມາທີນິ ປຸຎ຺ຎານິ, ອຸຬາຣານິ ອເນກຘາ;

ກຕ຺ວາ ໂສຬສເມ ວສ຺ເສ, ຣາຊາ ໂສ ຕິທິວໍ ຄໂຕ.

໕໗. ຊາໂຕ ປຏິຈ຺ຈ ຕໍ ຣາຊໍ, ເສນາ ທ຺ວາທສວສ຺ສິໂກ;

ກາລິງ຺ຄເທວິຍາ ປຸຕ຺ໂຕ, ປຕ຺ຕຣຊ຺ໂຊ ຕທາ ອຫຸ.

໕໘. ອຸທຍສ຺ສ ກນິຏ຺ຐສ຺ສ, ຍຸວຣາຊປທໍ ອທາ;

ປິຕຸ ເສນາປຕິ ເສໂນ, ຕສ຺ສ ເສນາປຕິ ອຫຸ.

໕໙. ປຈ຺ຈນ຺ຕໍ ພລມາທາຍ, ຄເຕ ເສນາປຕິມ຺ຫິ ໂສ;

ມາຕຣາ ສຫ ວຕ຺ຕນ຺ຕໍ, ກຓິຏ຺ຐໍ ຕສ຺ສ ຠາຕຣໍ.

໖໐. ມາຣາເປຕ຺ວາ ມຫາມລ຺ລໍ, ອກາ ເສນາປຕິໍ ຕທາ;

ອມຈ຺ຈໍ ອຸທຍໍ ນາມ, ສກໍ ວຈນກາຣກໍ.

໖໑. ຕໍ ສຸຕ຺ວາ ກຸປິໂຕ ຫຸຕ຺ວາ, ເສໂນ ເສນາປຕິ ຕທາ;

ພລມາທາຍ ອາຄຎ຺ຉິ, ຄຓ຺ຫິສ຺ສາມີຕິ ສຕ຺ຕໂວ.

໖໒. ສຸຕ຺ວານ ຕໍ ມຫີປາໂລ, ກຕວນ຺ຕໍ ວາຈມຕ຺ຕໂນ;

ຣກ຺ຂາມິ ຕໍ ອມຈ຺ຈນ຺ຕິ, ຄໂຕ ນິກ຺ຂມ຺ມ ໂຣຫຓໍ.

໖໓. ຕສ຺ສ ມາຍາ ນິວຕ຺ຕິຕ຺ວາ, ຍຸວຣາຊຎ຺ຈ ຣາຊິນິໍ;

ອາທາຍ ກຸປິຕາ ເຕນ ອາຓາເປສິ ຈມູປຕິໍ.

໖໔. ຕາຍ ໂສ ສງ຺ຄຫີໂຕວ, ທມິເຬ ສນ຺ນິປາຕິຍ;

ທຕ຺ວາ ຊນປທໍ ເຕສໍ, ປຸຏຕ຺ຖິນຄເຣ ວສີ.

໖໕. ຍຸຊ຺ຌິຕຸໍ ເຕນ ໂສ ຣາຊາ, ພລໍ ເປເສສິ ໂຣຫຓາ;

ເສນາປຕິ ວິນາເສສິ, ສພ຺ພໍ ຕໍ ຣາຊິໂນ ພລໍ.

໖໖. ທມິຬາ ເຕ ຊນປທໍ, ປີເຬຕ຺ວາ ຣກ຺ຂສາ ວິຍ;

ວິລຸມ຺ປິຕ຺ວານ ຄຓ຺ຫນ຺ຕິ, ນຣານໍ ສນ຺ຕກໍ ຕທາ.

໖໗. ຂິຕ຺ຕາ ມນຸສ຺ສາ ຄນ຺ຕ຺ວານ, ໂຣຫຓໍ ຣາຊສນ຺ຕິກໍ;

ນິເວເທສຸໍ ປວຕ຺ຕິໍ ຕໍ, ມນ຺ເຕຕ຺ວາ ສຈີເວຫິ ໂສ.

໖໘. ຣກ຺ຂິຕຸໍ ສາສນໍ ຣຏ຺ຐໍ, ຕມ຺ປຫາຍ ຈມູປຕິໍ;

ສນ຺ຘິໍ ກຕ຺ວານ ເສເນນ, ປຸຬຕ຺ຖິນຄຣໍ ອຄາ.

໖໙. ມເຫສິໍ ອຕ຺ຕຊໍ ກຕ຺ວາ, ປາເລຕຸໍ ວໍສມຕ຺ຕໂນ;

ປຸຕ຺ຕໍ ອຸປ຺ປາທຍິຕ຺ວານ, ກສ຺ສປໍ ນາມ ອຸຕ຺ຕມໍ.

໗໐. ວສນ຺ເຕ ຕຕ຺ຖ ລໍກິນ຺ເທ, ອຫິຕາ ວລ຺ລຠາ ຊນາ;

ອລຠນ຺ຕາ ສຸຣໍ ປາຕຸ-ມາຣິຍາ ຕສ຺ສ ສນ຺ຕິເກ.

໗໑. ມຊ຺ຊປາເນ ຄຸຓໍ ວຕ຺ວາ, ປາເຍສຸໍ ຕໍ ມຫີປຕິໍ;

ປິວິຕ຺ວາ ມຊ຺ຊປານໍ ໂສ, ມຕ຺ຕພ຺ຍາໂຬ ອຫຸ ຕທາ.

໗໒. ອາຫາຣານໍ ຂຍໍ ປຕ຺ວາ, ຈຊິຕ຺ວາ ທຸລ຺ລຠໍ ປທໍ;

ມໂຕ ໂສ ທສເມ ວສ຺ເສ, ຕຣຸໂຓເຍວ ຠູປຕິ.

໗໓. ອິໂຕ ວິທິຕ຺ວາ ຂລຸປາປມິຕ຺ຕ-

ວິເຘຍ຺ຍຠາວໍ ປຣິຫານິ ເຫຕຸໍ;