ຕິວຎ຺ຎາສຕິມ ປຈ຺ເຉທ

ລໍກາວິໂລໂປນາມ

໑. ມຫິນ຺ໂທ ຕໍ ກຓິຏ຺ໂຐ ໂສ, ຣາຊປຸຕ຺ໂຕ ຕທຈ຺ຈເຍ;

ອຸສ຺ສາປິຍ ເສຕຈ຺ຉຕ຺ຕ-ມນຸຣາຘປຸເຣ ວເຣ.

໒. ເສນ ເສນານີນາ’ນີຕ ເທສນ຺ຕຣຊນາ ກຸເລ;

ຕຕ຺ຖ ວາສມກປ຺ເປສິ, ກິຈ຺ເຉນ ທສວຈ຺ຉເຣ.

໓. ອເປຕນີຕິ ມຄ຺ຄສ຺ສ, ມຸທຸຠູຕສ຺ສ ສພ຺ພໂສ;

ອຸປ຺ປາທຠາຄໍ ນາທໍສຸ, ຕສ຺ສ ຊານປທາ ຕທາ.

໔. ອຈ຺ຈນ຺ຕໍ ຂີຓຈິຕ຺ໂຕ ໂສ, ວສ຺ສມ຺ຫິ ທສເມ ວິຠູ;

ວຸຕ຺ຕິທາເນນ ນາສກ຺ຂິ, ສງ຺ຄເຫຕຸໍ ສກໍ ພລໍ.

໕. ອລທ຺ຘ ວຸຕ຺ຕິໂນ ສພ຺ເພ, ເກຣຬາ ສຫິຕາ ຕໂຕ;

ນ ວຸຕ຺ຕິທານໍ ໂນ ຍາວ, ໂຫຕິ ມາຕາວ ຠຸຎ຺ຊຕຸ.

໖. ອິຕິ ຣາຊຆຣທ຺ວາເຣ, ສາຫເສກຣສາ ຠຸສໍ;

ຈາປຫຕາ ນິສີທິໍສຸ, ສນ຺ນທ຺ຘຉຸຣິກາຍຸຘາ.

໗. ຫຕ຺ຖສາຣໍ ສມາທາຍ, ເຕ ວິວຎ຺ຈິຍ ຠູປຕິ;

ອຸມ຺ມຄ຺ຄໂຕ ວິນິຄ຺ຄມ຺ມ, ຕຸຣິໂຕ ໂຣຫຓໍ ອຄາ.

໘. ສີທຸປພ຺ພຕຄາມມ຺ຫິ, ຂນ຺ຘວາຣໍ ນິພນ຺ຘິຍ;

ຠາຕຸ ຊາຍມ຺ມ ເຫສິຕ຺ເຕ, ຐເປຕ຺ວາ ໂສ ຕຫິໍ ວສີ.

໙. ນ ຈິຣສ຺ເສວ ຕສ຺ສາຍ, ມຕາ ຍສມຫີປຕິ;

ມເຫສິຕ຺ເຕ ນິເວເສສິ, ສກຠາຕຸສ຺ສ ຘີຕຣໍ.

໑໐. ເທວິຍາ ຕາຍ ສຎ຺ຊາເຕ, ສຸເຕ ກສ຺ສປນາມເກ;

ອຊ຺ຌາວຸຕ຺ຕໍ ວິຫາຍາ’ຖ, ຂນ຺ຘາວາຣໍ ມຫີມຕິ.

໑໑. ກາຣຍິຕ຺ວານ ນຄຣໍ, ກປ຺ປຄລ຺ລກຄາມເກ;

ອຘິປຈ຺ຈໍ ປວຕ຺ເຕນ຺ໂຕ, ໂຣຫເຓ ສຸຈິຣໍ ວສີ.

໑໒. ຕໂຕ ເສເສສຸ ຐາເນສຸ, ເກຣຬາ ສີຫຬາ ຕທາ;

ກຓ຺ຓາຏາ ຈ ຍຖາກາມ-ມາຘິປຈ຺ຈໍ ປວຕ຺ຕຍຸໍ.

໑໓. ອຖສ຺ສ ວາຓິໂຊ ເອໂກ, ປຣຕີຣໍ ອິຘາຄໂຕ;

ຄນ຺ຕ຺ວາ ປວຕ຺ຕິໍ ລໍກາຍ, ໂຈຬຣຎ຺ໂຎ ນິເວທຍິ.

໑໔. ໂສຕໍ ສຸຓິຕ຺ວາ ເປເສສິ, ລໍກາຄຫຓມານໂສ;

ພລໍ ມຫນ຺ຕໍ ພລວາ, ຕໍ ຂິປ຺ປໍ ລໍກໂມຕຣິ.

໑໕. ປຏ຺ຐາໂຍ ຕິຓ຺ຓຐານມ຺ຫາ, ວິເຫເຐນ຺ຕໍ ພຫູ ຊເນ;

ອນຸກ຺ກເມນ ຕໍ ໂຈຬ-ພລໍ ໂຣຫຓມຊ຺ຌຄາ.

໑໖. ຉຕ຺ຕິໍເສ ຣາຊິໂນ ວສ຺ເສ, ມເຫສິໍ ຣຕນານິ ຈ;

ມກຸຏຎ຺ຈ ກມາຍາຕໍ, ສພ຺ພມາຠຣຓໍ ຕຖາ.

໑໗. ອມູລິກຎ຺ຈວຊິຣ-ວລຍໍ ເທວທຕ຺ຕິຍໍ;

ອຈ຺ເຉຊ຺ຊຈ຺ຉຸຣິກໍ ຉິນ຺ນ-ປຏ຺ຏິກາ ຘາຕຸກຎ຺ຈ ເຕ.

໑໘. ປວິຏ຺ຐໍ ວນທຸຄ຺ຄມ຺ຫິ, ຠຍາຕຎ຺ຈ ມຫີປຕິໍ;

ຊີວຄ຺ຄາຫມຄຓ຺ຫິໍສຸ, ສນ຺ຘິເລສມ຺ປທສ຺ສິຍ.

໑໙. ມຫີປາລໍ ຘນໍ ຕຎ຺ຈ, ສພ຺ພໍ ຫຕ຺ຖຄຕໍ ຕໂຕ;

ເປສຍິໍສຸ ລຫຸໍ ໂຈຬ-ມຫີປາລສ຺ສ ສນ຺ຕິກໍ.

໒໐. ນິກາຍຕ຺ຕິຕເຍ ຘາຕຸ-ຄພ຺ເຠ ລໍກາຕເລ ຂິເລ;

ມຫາຣເຫ ສຸວຓ຺ຓາທິ-ປຏິພິມ຺ເພ ຈ’ນປ຺ປເກ.

໒໑. ຠິນ຺ທິຕ຺ວາ ສຫສາ ສພ຺ເພ, ວິຫາເຣ ຈ ຕຫິໍ ຕຫິໍ;

ຍໂຖ ໂຊຫາຣິໂນ ຍກ຺ຂາ, ລງ຺ກາຍໍ ສາຣມຄ຺ຄຫຸໍ.

໒໒. ເຕ ໂຈຬາ ຣາຊຣຏ຺ຐໍ ຕໍ, ປຸລຕ຺ຖິປຸຣນິສ຺ສິຕາ;

ຣກ຺ຂປາສາຓກຓ຺ຑວ຺ຫ, ຐານາວຘິມຠຸຎ຺ຊິສຸໍ.

໒໓. ຕໍ ກຸມາຣກມາທາຍ, ກສ຺ສປໍ ຣຏ຺ຐວາສິໂນ;

ວຑ຺ເຒນ຺ຕິ ໂຈຬຠຍໂຕ, ໂຄປຍນ຺ຕາ ສຸສາທຣາ.

໒໔. ໂຈຬຣາຊາ ກຸມາຣໍ ຕໍ, ສຸຕ຺ວາ ທ຺ວາທສວສ຺ສິກໍ;

ຄຫຓຕ຺ຖາຍ ເປເສສິ, ມຫາມຈ຺ເຈ ມຫາພເລ.

໒໕. ອູນໍ ປຎ຺ຈສຫສ຺ເສນ, ໂຍຘລກ຺ຂໍ ສມາທິຍ;

ສພ຺ພໍ ເຕ ໂຣຫຓໍ ເທສໍ, ສງ຺ໂຂເຠສຸ ມິໂຕ ຕໂຕ.

໒໖. ກິຕ຺ຕິນາໂມ’ຖ ສຈິໂວ, ມກ຺ຂກຸທ຺ຣູສວາສິໂກ;

ມຸທ຺ຘນາໂມ ຕຖາມຈ຺ໂຈ, ມາຣຄລ຺ລກວາສິໂກ.

໒໗. ອຸໂຠປິ ເຕ ມຫາວີຣາ, ຍຸທ຺ໂຘປາຍວິຈກ຺ຂຓາ;

ໂຈຬເສນໍ ວິນາເສຕຸ-ມຈ຺ຈນ຺ຕກຕນິຈ຺ຉຍາ.

໒໘. ປລຸຏ຺ຐຄິຣິນາມມ຺ຫິ, ຐາເນ ທຸຄ຺ເຄ ນິເວສິຍ;

ກຕ຺ວາ ຉມາສໍ ສງ຺ຄາມໍ, ຫນິໍສຸ ທມິເຬ ພຫູໍ.

໒໙. ຫຕາວສິຏ຺ຐາ ໂຈຬາຕາ, ຣເຓ ຕສ຺ມິໍ ຠຍທ຺ທິຕາ;

ປລາຍິຕ຺ວາ ຍຖາປຸພ຺ພໍ, ປຸລຕ຺ຕິປຸຣມາວສຸໍ.

໓໐. ກຸມາໂຣ ຊຍິໂຕ ທິສ຺ວາ, ອຸໂຠ ເຕ ສຈິເວ ຕທາ;

ຫຏ຺ຐຕຸຏ຺ໂຐ ‘‘ວຣໍ ຕາຕາ, ຄຓ຺ຫຖາ’’ຕິ ສ ຈພ຺ຣວີ.

໓໑. ພຸທ຺ໂຘ ປເວຓິຄາມໍ ໂສ, ວຣໍ ຍາຈິຕ຺ຖ ກິຕ຺ຕິໂກ;

ສງ຺ຆິກໍ ຄຫິຕໍ ຠາຄໍ, ວິສ຺ສຊ຺ເຊຕຸໍ ວຣໍ ວຣິ.

໓໒. ຣາຊປຸຕ຺ຕວຣາລທ຺ຘ-ວຣາ’ມຈ຺ຈວຣາ ຕທາ;

ນິທ຺ທຣາ ສາທຣາ ວີຣາ, ປາເທ ວນ຺ທິໍສຸ ຕສ຺ສ ເຕ.

໓໓. ຣາຊາ ທ຺ວາທສວສ຺ສານິ, ວສິຕ຺ວາ ໂຈຬມຓ຺ຑເລ;

ອຏ຺ຐຕາລີສວສ຺ສມ຺ຫິ, ມຫິນ຺ໂທ ໂສ ທິວໍຄໂຕ.

໓໔. ປມາທ ໂທສານຄເຕນ ເອວໍ,

ລທ຺ຘາ’ປິ ໂຠຄານນຖິຣາ ຠວນ຺ຕິ;

ອິຈ຺ຈປ຺ປມໍທໍ ຫິຕມາສສາໂນ,

ນິຈ຺ຈໍ ສຸວິຎ຺ຎູສຸສມາ ຈເຣຍ຺ຍ.

ສຸຊນປ຺ປສາທສໍເວຄຕ຺ຖາຍ ກເຕ ມຫາວໍເສ

ລໍກາວິໂລໂປ ນາມ

ຕິປຎ຺ຎາສຕິໂມ ປຣິຈ຺ເຉໂທ.