ເອກປຎ຺ຎາສຕິມ ປຣິຈ຺ເຉທ

ປຎ຺ຈຣາຊໂກ ນາມ

໑. ຍຸວຣາຊາ ຕທາ ຫຸຕ຺ວາ, ຣາຊາ ທປ຺ປຸຬນາມໂກ;

ຐເປສິ ໂອປຣຊ຺ຊມ຺ຫິ, ອາທິປທໍ ສນາມກໍ.

໒. ມຣິຈວຏ຺ຏິວິຫາຣສ຺ສ, ຄາມໍ ທຕ຺ວາ ຕໂຕ ປຸເຣ;

ຈາຣິຕ຺ຕໍ ປຸພ຺ພຣາຊູນໍ, ຣກ຺ຂິຕ຺ວານ ມຫິໍ ອິມໍ.

໓. ອຠຸຕ຺ວາ ທີຆກາລຎ຺ຫິ, ປຸພ຺ພກມ຺ເມນ ອຕ຺ຕໂນ;

ຣາຊາ ໂສ ສຕ຺ຕເມ ມາເສ, ປວິຏ຺ໂຐ ປຈ຺ຈຸໂນ ມຸຂໍ.

໔. ອຸປຣາຊາ ອຫຸຣາຊາ, ທປ຺ປຸໂຬ ຕທນນ຺ຕຣໍ;

ອຸທຍສ຺ສາທິປາທສ຺ສ, ຍຸວຣາຊປທໍ ອທາ.

໕. ຕທາ ໂຈຬຠຍາ ປຓ຺ຑຸ-ຣາຊໍ ຊນປທໍ ສກໍ;

ຈຊິຕ຺ວາ ນາວມາຣຸຍ຺ຫ, ມຫາຕິຕ຺ຖມຸປາຄມິ.

໖. ອາຓາເປຕ຺ວານ ຕໍ ຣາຊາ, ທິສ຺ວາ ສນ຺ຕຸຏ຺ຐມານໂສ;

ມຫາໂຠຄໍ ອທາ ຕສ຺ສ, ນິວາເສສິ ປຸຣາ ພຫິ.

໗. ໂຈຬຣາເຊນ ຍຸຊ຺ຌິຕ຺ວາ, ຄເຫຕ຺ວາ ປຏ຺ຏນທ຺ວຍໍ;

ປຓ຺ຑຸຣາຊສ຺ສ ທມ຺ມີຕິ, ສນ຺ນທ຺ເຘ ລງ຺ກຣາຊິນິ.

໘. ເກນາ’ປິ ກຣຓີເຍນ, ຂຕ຺ຕິຍາ ທີປວາສິໂນ;

ອກໍສຸ ວິຄ຺ຄຫໍ ໂຆຣໍ, ປາປກມ຺ເມນ ປຓ຺ຑຸໂນ.

໙. ປຓ຺ຑຸຣາເຊ’ຕ຺ຖ ວາເສນ, ກມ຺ມໍ ນຕ຺ຖີຕິ ຈິນ຺ຕິຍ;

ຐເປຕ຺ວາ ມກຸຏາທີນິ, ຄໂຕ ເກຣຬສນ຺ຕິກໍ.

໑໐. ວິຄ຺ຄເຫ ນິຏ຺ຐິເຕ ຣາຊາ, ມຫາເມຆວເນ ຕທາ;

ມຫາໂພຘິຆຣສ຺ສາ’ທາ, ຄາມໍ ນຄຣສນ຺ຕິເກ.

໑໑. ອາວາສໍ ຣກ຺ຂໂກ ນາມ, ຕສ຺ສ ເສນາປຕີ ອກາ;

ຖູປາຣາມສມີປມ຺ຫິ, ອິຬງ຺ໂຄ ຣາຊນາມກໍ.

໑໒. ກຕໍ ຕໍ ປຸພ຺ພຣາເຊຫິ, ຣາຊາ ໂສ ປຣິປາລິຍ;

ປຕ຺ໂຕ ທ຺ວາທສມໍ ວສ຺ສໍ, ຍຖາກມ຺ມມຸປາຄມິ.

໑໓. ອຸທໂຍ ຍຸວຣາຊາ’ສິ, ລໍກາວາສີນມິສ຺ສໂຣ;

ເສນນາມາທິປາທໍ ໂສ, ໂອປຣຊ຺ເຊ’ຠິເສຈຍິ.

໑໔. ຣຎ຺ໂຎ ຠີຕາ ຕທາມຈ຺ຈາ, ປວິສິໍສຸ ຕໂປວນໍ;

ຣາໂຊປຣາຊາ ຄນ຺ຕ຺ວານ, ເຕສໍ ສີສານິ ເຉທຍຸໍ.

໑໕. ເຕນ ກມ຺ເມນ ນິພ຺ພິນ຺ນາ, ຍຕໂຍ ຕນ຺ນິວາສິໂນ;

ຫິຕ຺ວາ ຊນປທໍ ຣຎ຺ໂຎ, ຕທາຄຈ຺ຉິໍສຸ ໂຣຫຓໍ.

໑໖. ຕທາ ຊານປທາ ເຈວ, ນາຄຣາ ຈ ພລານິ ຈ;

ກຸປິຕາ ຈຓ຺ຑຸວາເຕນ, ສາຄໂຣ ວິຍ ກມ຺ປິໂຕ.

໑໗. ຣຕນປາສາທມາຣຸຍ຺ຫ, ວິຫາເຣ ອຠຍຸຕ຺ຕເຣ;

ສນ຺ຕາເສຕ຺ວານ ຣາຊານໍ, ທສ຺ເສຕ຺ວານ ວິຠີສິກໍ.

໑໘. ອຸປຕ຺ຖມ຺ຠກມຈ຺ຈານໍ, ວິຄ຺ຄຫສ຺ສ ຕໂປວເນ;

ຕທາ ສີສານິ ຉິນ຺ທິຕ຺ວາ, ກວາເຕນ ນິປາຕຍຸໍ.

໑໙. ຕໍ ສຸຕ຺ວາ ຍຸວຣາຊາ ຈ, ອາທິປາໂທ ຈ ຕໍ ສຂາ;

ອຸລ຺ລງ຺ຆິຕ຺ວານ ປາກາຣໍ, ສີຆໍ ຄຈ຺ຉິໍສຸ ໂຣຫຓໍ.

໒໐. ພລກາໂຍນຸພນ຺ຘິຕ຺ວາ, ຍາວ ກຓ຺ຫນທີຕຏາ;

ອລາເຠນ ຈ ນາວານໍ, ຕິຓ຺ຓຕ຺ຕາ ເຕສມາຄມິ.

໒໑. ຣາຊປຸຕ຺ຕາຄຕາ ຕຕ຺ຖ, ວເນ ອຠຍເຠທິໂນ;

ຍຕີນໍ ປຸຣໂຕ ເຕສໍ, ນິປຊ຺ຊິຕ຺ວາ ອຸເຣນ ເຕ.

໒໒. ອລ຺ລວຕ຺ຖາ’ລ຺ລເກສາ ຈ, ປຣິເທວິຕ຺ຖ’ເນກຘາ;

ກນ຺ທີຕ຺ວາ ໂຣທນໍ ກຕ຺ວາ, ຂມາເປສຸໍ ຕປສ຺ສິໂນ.

໒໓. ຂນ຺ຕິເມຕ຺ຕານຸຠາເວນ, ເຕສໍ ສາສນສາມິນໍ;

ປຸຎ຺ໂຎທໂຍ ອຫຸ ເຕສໍ, ອຸຠິນ຺ນໍ ທີປສາມິນໍ.

໒໔. ຍຸວຣາຊພລຎ຺ເຈວ, ນິກາຍຕ຺ຕຍວາສິໂນ;

ຄມິໍສຸ ເຕສມາເນຕຸໍ, ສນ຺ຕິຠູເຕ ມຫາພເລ.

໒໕. ຣາຊປຸຕ຺ຕາ ອຸໂຠ ພ຺ຍຕ຺ຕາ, ປຓ຺ຑິຕາ ປໍສຸກູລິໂນ;

ຍາຈິຕ຺ວາ ເຕສມາທາຍ, ອຄມໍສຸ ສກໍ ປຸຣໍ.

໒໖. ຠິກ຺ຂູນໍ ປຸຣໂຕ ມຄ຺ຄໍ, ຣາຊາຄນ຺ຕາ ຂມາປຍິ;

ອາທາຍ ເຕ ວນໍ ເຕສໍ, ເນຕ຺ວາ ຣາຊຆຣໍ ຄໂຕ.

໒໗. ຕໂຕ ປຏ຺ຐາຍ ຈາຣິຕ຺ຖໍ, ປາເລຕ຺ວາ ປຸພ຺ພຣາຊຸນໍ;

ຣາຊາ ໂສ ຕຕິເຍ ວສ຺ເສ, ຍຖາກມ຺ມມຸປາຄມິ.

໒໘. ລໍກາຠິເສກໍ ປຕ຺ວານ, ເສໂນ ໂສ ມຕິມາ ຕໂຕ;

ອຸທຍໍ ອາທິປາທໍ ຕໍ, ຍຸວຣາຊໍ ອກາ ສຂໍ.

໒໙. ກຫາປຓສຫສ຺ສໍ ໂສ, ທຸຄ຺ຄຕານໍ ອຸໂປສເຖ;

ໂຫຕຸ’ໂປສຖິໂກ ທຕ຺ວາ, ຍາວຊີວໍ ນຣາຘິໂປ.

໓໐. ປຏິມາ ຠຕ຺ຕວຕ຺ຖານິ, ຠິກ຺ຂູນໍ ຘຣຓີ ປຕິ;

ອທາ ທຓ຺ຑິສ຺ສຣໍ ທານໍ, ຍາຈການຎ຺ຈ ສິປ຺ປີນໍ.

໓໑. ຐາເນ ກຕ຺ຖຈິ ສິປ຺ປີນໍ, ປາສາເທສຸ ມໂນຫເຣ;

ກາເຣຕ຺ວາ ໂຠຄຄາເມ ຈ, ອທາເປສິ ມຫາມຕິ.

໓໒. ກຫາປຓສຫສ຺ສໍ ວາ, ທຕ຺ວາ ປຎ຺ຈສຕານິ ວາ;

ລງ຺ກາຍໍ ຊິຓ຺ຓກາວາເສ, ນວກມ຺ມມກາຣຍີ.

໓໓. ຈຕ຺ຕາລີສສຫສ຺ສານິ, ອຠຍຸຕ຺ຕຣເຈຕິເຍ;

ສິລາປຕ຺ຖຣຓຕ຺ຖາຍ, ທາເປສິ ຈ ມຫີປຕິ.

໓໔. ມຫາວາປີສຸ ລໍກາຍໍ, ຊິຓ຺ຓນິທ຺ຘມເນ ອກາ;

ນວກມ຺ມຎ຺ຈ ມຣິຍາທໍ, ຖິຍໍ ປາສາຓປໍສຸນາ.

໓໕. ອກາ ຣາຊຆເຣ ຣມ຺ມໍ, ມາລາເຄຫໍ ມຫາຣຫໍ;

ຐປິຕໍ ປຸນຣາຊູຫິ, ທານໍ ສມ຺ມາປວຕ຺ຕຍິ.

໓໖. ກຕໍ ມລຍຣາເຊນ, ອມຈ຺ເຈນ’ຄ຺ຄ ໂພຘິນາ;

ປຣິເວຓໍ ນາຄສາລໍ, ທິສ຺ວາ ຄາມ ມທາ ຕທາ.

໓໗. ກຕ຺ວາ ຈຕຸວິຫາເຣສຸ, ຣູປກມ຺ມານິ ສາຘຸກໍ;

ມຓ຺ຑປານິ ຈ ຣມ຺ມານິ, ຘາຕຸປູຊໍ ອກາ ສທາ.

໓໘. ເອວມາທີນິ ປຸຎ຺ຎານິ, ອເນການິ ອເນກຘາ;

ກຕ຺ວາ ໂສ ນວເມ ວສ຺ເສ, ຍຖາກມ຺ມມຸປາຄມິ.

໓໙. ລໍກາຠິເສກໍ ປຕ຺ວານ, ຍຸວຣາໂຊທໂຍ ຕໂຕ;

ເສນນາມາທິປາທໍ ໂສ, ໂອປຣຊ຺ເຊ’ຠິ ເສຈຍິ.

໔໐. ນິທ຺ທາລຸ ມຊ຺ຊໂປ ອາສິ, ຣາຊາ ປາເປນ ຊນ຺ຕຸນໍ;

ໂຈໂຬ ປມຕ຺ຕຕໍ ຕສ຺ສ, ສຸຕ຺ວາ ສນ຺ຕຸຏ຺ຐມານໂສ.

໔໑. ປຓ຺ຑຸເທສາຕິເສກໍ ໂສ, ປຕ຺ຕຸກາ ເມຕ຺ຖ ເປສຍິ;

ມກຸຏາທີນມຕ຺ຖາຍ, ຐປິຕານໍວ ປຓ຺ຑຸນາ.

໔໒. ຕານິ ນາທາສິ ໂສ ຣາຊາ, ເຕນ ໂຈໂຬ ມຫພ຺ພໂລ;

ພລໍ ສນ຺ນຍ຺ຫ ເປເສສິ, ພລກ຺ກາເຣນ ຄຓ຺ຫິຕຸໍ.

໔໓. ຕທາ ເສນາປຕິ ເອຕ຺ຖ, ປຈ຺ຈນ຺ເຕ ກຸປິເຕ ຄໂຕ;

ອາຓາເປຕ຺ວານ ຕໍ ຣາຊາ, ຍຸຊ຺ຌນຕ຺ຖາຍ ເປສຍິ.

໔໔. ຫໂຕ ເສນາປຕິ ຕຕ຺ຖ, ຍຸຊ຺ຌິ ນ ຣເຓ ມໂຕ;

ກກູຏາທີນິ ອາທາຍ, ຣາຊາ ໂສ ໂຣຫຓໍ ອຄາ.

໔໕. ຄນ຺ຕ຺ວາ ໂຈຬພລໍ ຕຕ຺ຖ, ອລຠິຕ຺ວາ ປເວສນໍ;

ນິວຕ຺ຕິຕ຺ວາ ສກໍ ຣຏ຺ຐໍ, ອຄມາສິ ອິຘຕາ ຠຍາ.

໔໖. ຕໂຕ ເສນາປຕິຏ຺ຐາເນ, ວິທຸຣຄ຺ຄໍ ຕຸ ນາຍກໍ;

ຐເປສິ ຣາຊາ ລໍກິນ຺ໂທ, ເຕຊວນ຺ຕໍ ມຫາມຕິໍ.

໔໗. ປຈ຺ຈນ຺ຕໍ ໂຈຬຣາຊສ຺ສ, ຆາເຕຕ຺ວາ ໂສ ຈມູປຕິ;

ອາຓາເປສິ ອິໂຕ ນີຕໍ, ທສ຺ເສຕ຺ວານ ວິຠີສິຕໍ.

໔໘. ຕໂຕ ທາເປສິ ໂສ ສພ຺ພ-ປຣິກ຺ຂາຣໍ ມຫາຣຫໍ;

ປໍສຸກູລິກຠິກ຺ຂູນໍ, ສພ຺ເພສໍ ທີປວາສິນໍ.

໔໙. ມຫາວິຫາເຣ ລໍກິນ຺ໂທ, ປຏິພິມ຺ພສ຺ສ ສຕ຺ຖຸໂນ;

ຊລນ຺ຕໍ ມຓິຣໍສີຫິ, ອກາ ຈູຬາມຓິໍ ຕທາ.

໕໐. ໂອໂຣຘາ ວິທຸຣາ ຕສ຺ສ, ປາທຊາເລນ ປູຊຍິ;

ມຓີຫິ ປຊ຺ຊລນ຺ເຕຫິ, ປຏິມໍ ຕໍ ສິລາມຍໍ.

໕໑. ຌາປິຕໍ ໂຈຬຣາຊສ຺ສ, ພເລນ ມຓິນາມກໍ;

ປາສາທໍ ກາຕຸມາຣທ຺ໂຘ, ຈຸໂຕ ວສ຺ສມ຺ຫິ ອຏ຺ຐເມ.

໕໒. ປຎ຺ເຈເຕ ວສຸຘາຘິປາ ວສຸມຫິໍ ເອກາຕປຕ຺ຕງ຺ກິຕໍ;

ຠຸຕ຺ວາ ນິຄ຺ຄຫສງ຺ຄເຫຫິ ສກລໍ ໂລກໍ ວເສ ວຕ຺ຕິຍ;

ຍາ ຕາ ມຈ຺ຈຸວສໍ ສປຸຕ຺ຕວຓິຕາ ສາມຈ຺ຈມິຕ຺ຕານຸຄາ;

ອິຈ຺ເຈວໍ ສຕຕໍ ສຣນ຺ຕຸ ສຸຊນາ ຫາຕຸໍ ປມາທໍ ມທໍ.

ສຸຊນປ຺ປສາທສໍເວຄຕ຺ຖາຍ ກເຕ ມຫາວໍເສ

ປຎ຺ຈຣາຊໂກ ນາມ

ເອກປຎ຺ຎາສຕິໂມ ປຣິຈ຺ເຉໂທ.