ປຎ຺ຈມ ປຣິຈ຺ເຉທ

ຕຕິຍຘມ຺ມສໍຄີຕິ

໑. ຍາ ມຫາກສ຺ສປາທີຫິ, ມຫາເຖເຣຫິ ອາທິໂຕ;

ກຕາ ສທ຺ຘມ຺ມ ສໍຄີຕິ, ເຖຣິຍາ’ຕິ ປວຸຈ຺ຈຕິ.

໒. ເອໂກ’ວ ເຖຣວາໂທ ໂສ, ອາທິວສ຺ສສເຕ ອຫຸ;

ອຎ຺ຎາຈຣິຍວາທາຕຸ, ຕໂຕ ໂອຣໍ ອຊາຍິສຸໍ.

໓. ເຕຫິ ສໍຄີຕິກາເຣຫິ, ເຖເຣຫິ ທຸຕິເຍຫິ ເຕ;

ນິຄ຺ຄຫິຕາ ປາປຠິກ຺ຂູ, ສພ຺ເພ ທສສຫສ຺ສກາ.

໔. ອກໍສາ’ຈຣິຍວາທໍ ເຕ, ມຫາສໍຄີຕິນາມກາ;

ຕໂຕ ໂຄກຸລິກາ ຊາຕາ, ເອກພ຺ໂພຫາຣິກາປິ ຈ.

໕. ໂຄກຸລິເກຫິ ປຓ຺ຓຕ຺ຕິ-ວາທາ ພາຫຸລິກາປິ ຈ;

ເຈຕິຍວາທາ ເຕສ຺ເວວ, ສມຕາສງ຺ຆິກາ ຉ ເຕ.

໖. ປຸນາປິ ເຖຣວາເທຫິ, ມຫິໍສາສກຠິກ຺ຂໂວ;

ວຊ຺ຊີປຸຕ຺ຕກຠິກ຺ຂູ ຈ, ທຸເວ ຊາຕາ ອິເມ ຂລຸ.

໗. ຊາຕາ’ຖ ຘມ຺ມຸຕ຺ຕຣິຍາ, ຠທ຺ຣຍານິກຠິກ຺ຂໂວ;

ຉນ຺ນາຄາຣາ ສມ຺ມິຕິຍາ, ວຊ຺ຊີປຸຕ຺ຕິຍຠິກ຺ຂູຕິ.

໘. ມຫິໍສາສກຠິກ຺ຂູຫິ, ຠິກ຺ຂູ ສພ຺ພຕ຺ຖ ວາທິໂນ;

ຘມ຺ມຄຸຕ຺ຕິຍຠິກ຺ຂູ ຈ, ຊາຕາ ຂລຸ ອິເມ ທຸເວ.

໙. ຊາຕາ ສພ຺ພຕ຺ຖິວາທີຫິ, ກສ຺ສປິຍາ ຕໂຕ ປນ;

ຊາຕາ ສງ຺ກນ຺ຕິກາ ຠິກ຺ຂູ, ສຸຕ຺ຕວາທາ ຕໂຕ ປນ.

໑໐. ເຖຣວາເທນ ສຫ ເຕ, ໂຫນ຺ຕິ ທ຺ວາທສິ’ເມປິ ຈ;

ປຸພ຺ເພ ວຸຕ຺ຕຉວາທາ ຈ, ອິຕິ ອຏ຺ຐາຣສາ ຂິລາ.

໑໑. ສຕ຺ຕຣສາປິ ທຸຕິເຍ, ຊາຕາ ວສສ຺ສເຕ ອິຕິ;

ອຎ຺ຎາຈຣິຍວາທາ ຕຸ, ຕໂຕ ໂອຣມຊາຍິສຸໍ.

໑໒. ເຫມຕາ ຣາຊຄິຣິຍາ, ຕຖາ ສິທ຺ຘຕ຺ຖິກາປິ ຈ;

ປຸພ຺ພເສລິຍຠິກ຺ຂູ ຈ, ຕຖາ ອປຣເສລິຍາ.

໑໓. ວາຊິຣິຍາ ຉ ເອເຕຫິ, ຊມ຺ພຸທີປມ຺ຫິ ຠິນ຺ນກາ;

ຘມ຺ມຣຸຈິ ຈ ສາຄລິຍາ, ລໍກາທີປມ຺ຫິ ຠິນ຺ນກາ.

ອາຈຣິຍກຸລວາທກຖາ ນິຏ຺ຐິຕາ.

ຘມ຺ມາໂສກາຠິເສກ

໑໔. ກາຬາໂສກສ຺ສ ປຸຕ຺ຕາ ຕຸ, ອເຫສຸໍ ທສຠາຕິກາ;

ພາວີສຕິໍ ເຕ ວສ຺ສານິ, ຣຊ຺ຊໍ ສມນຸສາສິສຸໍ.

໑໕. ນວ ນນ຺ທາ ຕໂຕ ອາສຸໍ, ກເມເນວ ນຣາຘິປາ;

ເຕ’ປິ ພາວີສວສ຺ສານິ, ຣຊ຺ຊໍ ສມນຸສາສິສຸໍ.

໑໖. ໂມຣິຍານໍ ຂຕ຺ຕິຍານໍ, ວໍເສ ຊາຕໍ ສິຣິຘຣໍ;

ຈນ຺ທຄຸຕ຺ໂຕຕິ ປຎ຺ຎາຕໍ, ຈາຓກ຺ໂກ ພ຺ຣາຫ຺ມໂຓ ຕໂຕ.

໑໗. ນວມໍ ຘນນນ຺ທໍ ຕໍ, ຆາເຕຕ຺ວາ ຈຓ຺ຑໂກຘສາ;

ສກເລ ຊມ຺ພຸທີປສ຺ມິໍ, ຣຊ຺ເຊ ສມຠິສິຎ຺ຈີ ໂສ.

໑໘. ໂສ ຈຕຸວີສວສ຺ສານິໍ, ຣາຊາ ຣຊ຺ຊມກາຣຍິ;

ຕສ຺ສ ປຸຕ຺ໂຕ ພິນ຺ທຸສາໂຣ, ອຏ຺ຐວີສຕິ ກາຣຍິ.

໑໙. ພິນ຺ທຸສາຣສຸຕາ ອາສຸໍ, ສຕໍ ເອໂກ ຈ ວິສ຺ສຸຕາ;

ອໂສໂກ ອາສິ ເຕສໍ ຕຸ, ປຸຎ຺ຎເຕໂຊພລິທ຺ຘິໂກ.

໒໐. ເວມາຕິເກ ຠາຕໂຣ ໂສ, ຫນ຺ຕ຺ວາ ເອກູນກໍ ສຕໍ;

ສກເລ ຊມ຺ພຸທີປສ຺ມິໍ, ເອກຣຊ຺ຊມປາປຸຓິ.

໒໑. ຊິນນິພ຺ພານໂຕ ປຈ຺ຉາ, ປຸເຣ ຕສ຺ສາຠິເສກໂຕ;

ສາຏ຺ຐາຣສໍ ວສ຺ສສຕ-ທ຺ວຍເມວໍ ວິຊານິຍ.

໒໒. ປຕ຺ວາ ຈຕູຫິ ວສ຺ເສຫິ, ເອກຣຊ຺ຊໍ ມຫາຍໂສ;

ປຸເຣ ປາຏລິປຸຕ຺ຕສ຺ມິໍ, ອຕ຺ຕານມຠິເສຈຍິ.

໒໓. ຕສ຺ສາ’ຠິເສເກນ ສມໍ, ອາກາເສ ຠູມິຍໍ ຕຖາ;

ໂຍຊເນ ໂຍຊເນ ອາຓາ, ນິຈ຺ຈໍ ປວຕ຺ຕິຕາ ອຫຸ.

໒໔. ອໂນຕຕ຺ໂຕ ທກາກາເຊ, ອຏ຺ຐເນສຸໍ ທິເນ ທິເນ;

ເທວາ ເທໂວ ອກາ ເຕຫິ, ສໍວິຠາຄໍ ຊນສ຺ສຈ.

໒໕. ນາຄລຕາທນ຺ຕກຏ຺ຐໍ, ອາເນສຸໍ ຫິມວນ຺ຕໂຕ;

ອເນເກສໍ ສຫສ຺ສານໍ, ເທວາ ເອວ ປໂຫນກໍ.

໒໖. ອຄທາ’ມລກຎ຺ເຈວ, ຕຖາຄທ ຫຣິຕກໍ;

ຕໂຕ’ວ ອມປກ຺ກຎ຺ຈ, ວຓ຺ຓຄນ຺ຘຣສຸຕ຺ຕມໍ.

໒໗. ປຎ຺ຈວຓ຺ຓານິ ວຕ຺ຖານິ, ຕຕ຺ຖປຸຎ຺ຊນປຏ຺ຏກໍ;

ປີຕຎ຺ຈ ທິພ຺ພປານຎ຺ຈ, ຉທ຺ທນ຺ຕທຫໂຕ ມຣຸ.

໒໘. ມຣນ຺ຕາ ນຄເຣ ຕສ຺ມິໍ, ມິຄສູກຣປກ຺ຂິໂນ;

ອາຄນ຺ຕ຺ວານ ມຫານສໍ, ສຍເມວ ມຣນ຺ຕິ ຈ.

໒໙. ຄາໂວ ຕຕ຺ຖ ຈຣາເປຕ຺ວາ, ວຊມາເນນ຺ຕິ ທີປິໂນ;

ເຂຕ຺ຕ ວຕ຺ຖຸຕຬາກາທິໍ, ປາເລນ຺ຕິ ມິຄສູກຣາ.

໓໐. ສຸມນໍ ປຸປ຺ຜປຏກໍ, ອຠຸຕ຺ຕໍ ທິພ຺ພມຸປ຺ປລໍ;

ວິເລປນໍ ອຎ຺ຊນຎ຺ຈ, ນາຄານາຄາວິມານໂຕ.

໓໑. ສາລິວາຫສຫສ຺ສານິ, ນວຸຕິໍ ຕຸ ສຸວາ ປນ;

ຉທ຺ທນ຺ຕທຫໂຕເຍວ, ອາຫຣິໍສຸ ທິເນ ທິເນ.

໓໒. ເຕ ສາລິນິຕ຺ຖຸສກເຓ, ອຂຓ຺ເຑຕ຺ວານ ຕຓ຺ຑຸເລ;

ອກໍສຸ ມູສິກາ ເຕຫິ, ຠຕ຺ຕໍ ຣາຊກຸເລ ອຫຸ.

໓໓. ອກໍສຸ ສສ຺ສຕໍ ຕສ຺ສ, ມຘູນິ ມຘຸມກ຺ຂິກາ;

ຕຖາ ກມ຺ມາຣສາລາສຸ, ອຈ຺ຉາກູຏານິ ປາຕຍຸໍ.

໓໔. ກຣວິກາ ສກຸຓິກາ, ມນຸຎ຺ຎມຘຸຣສ຺ສຣາ;

ອກໍສຸ ຕສ຺ສາ’ຄນ຺ຕ຺ວານ, ຣຎ຺ໂຎ ມຘຸຣວສ຺ສິຕໍ.

໓໕. ຣາຊາ’ຠິສິຕ຺ໂຕ ໂສ’ໂສໂກ,

ກຸມາຣໍ ຕິສ຺ສສວ຺ຫຍໍ;

ກຓິຏ຺ຐໍ ສໍໂສທຣິຍໍ, ອຸປຣຊ຺ເຊ’ຠິເສຈຍິ.

ຘມ຺ມາໂສກາຠິເສໂກ ນິຏ຺ຐິໂຕ

ນິຄ຺ໂຣຘສາມເຓຣ ທສ຺ສນ

໓໖. ປິຕາ ສຏ຺ຐິສຫສ຺ສານິ, ພ຺ຣາຫ຺ມເຓ ພ຺ຣຫ຺ມປກ຺ຂິເກ;

ໂຠເຊສິ ໂສປິ ເຕເຍວ, ຕີຓິ ວສ຺ສານິ ໂຠຊຍິ.

໓໗. ທິສ຺ວາ’ນຸປສມໍ ເຕສໍ, ອໂສໂກ ປຣິເວສເນ;

ວິເຈຍ຺ຍ ທານໍ ທສ຺ສນ຺ຕິ, ອມຈ຺ເຈ ສນ຺ນິໂຍຊິຍ.

໓໘. ອາຓາປຍິຕ຺ວາ ມຕິມາ, ນານາປາສຓ຺ຑິເກ ວິສຸໍ;

ວີມໍສິຕ຺ວາ ນິສຊ຺ຊາຍ, ໂຠຊາເປຕ຺ວາ ວິສຊ຺ຊຍິ.

໓໙. ກາເລ ວາຕາຍນຄໂຕ, ສນ຺ຕໍ ຣຈ຺ຉາຄຕໍ ຍຕິໍ;

ນິຄ຺ໂຣຘສາມເຓຣໍ ໂສ, ທິສ຺ວາ ຈິຕ຺ຕໍ ປສາທຍິ.

໔໐. ພິນ຺ທຸສາຣສ຺ສ ປຸຕ຺ຕານໍ, ສພ຺ເພສໍ ເຊຏ຺ຐຠາຕຸໂນ;

ສຸມນສ຺ສ ກຸມາຣສ຺ສ, ປຸຕ຺ໂຕ ໂສ ຫິ ກຸມາຣໂກ.

໔໑. ອໂສໂກ ປິຕຣາ ທິນ຺ນໍ, ຣຊ຺ຊມຸຊ຺ເຊນິຍຎ຺ຫິ ໂສ;

ຫິຕ຺ວາ’ຄໂຕ ປຸປ຺ຜປຸຣໍ, ພິນ຺ທຸສາເຣ ຄິລານເກ.

໔໒. ກຕ຺ວາ ປຸຣໍ ສກາຍຕ຺ຕໍ, ມເຕ ປິຕຣິ ຠາຕຣໍ;

ຆາເຕຕ຺ວາ ເຊຏ຺ຐກໍ ຣຊ຺ຊໍ, ອຄ຺ຄເຫສິ ປຸເຣ ວເຣ.

໔໓. ສຸມນສ຺ສ ກຸມາຣສ຺ສ, ເທວີ ຕນ຺ນາມິກາ ຕໂຕ;

ຄພ຺ຠິນີ ນິກ຺ຂມິຕ຺ວານ, ປາຈິນທ຺ວາຣໂຕ ພຫິ.

໔໔. ຈຓ຺ຑາລຄາມ ມຄມາ, ຕຕ຺ຖ ນິຄ຺ໂຣຘເທວຕາ;

ຕມາລປິຍນາເມນ, ມາ ປຕ຺ວາ ຆຣກໍ ອທາ.

໔໕. ຕທເຫ’ວ ວຣໍ ປຸຕ຺ຕໍ, ວິຊາຍິຕ຺ວາ ສຸຕສ຺ສ ສາ;

ນິຄ຺ໂຣໂຘຕິ ອກາ ນາມໍ, ເທວຕາ ນຸຄ຺ຄຫານຸຄາ.

໔໖. ທິສ຺ວາ ຕໍ ເຊຏ຺ຐຈຓ຺ຑາໂລ, ອຕ຺ຕໂນ ສາມິນິໍ ວິຍ;

ມຎ຺ຎນ຺ໂຕ ຕໍ ອຸປຏ຺ຐາສິ, ສຕ຺ຕວສ຺ສານິ ສາຘຸກໍ.

໔໗. ຕໍ ມຫາວຣຸໂຓ ເຖໂຣ, ຕທາ ທິສ຺ວາ ກຸມາຣກໍ;

ອຸປນິສ຺ສຍ ສມ຺ປນ຺ນໍ, ອຣຫາ ປຸຈ຺ຉິ ມາຕຣໍ.

໔໘. ປພ຺ພາເຊສິ ຂຸຣຄ຺ເຄ ໂສ, ອຣຫຕ຺ຕມປາປຸຓິ;

ທສ຺ສນາໂຍ’ປ ຄຈ຺ຉນ຺ໂຕ, ໂສ ຕໂຕ ມາຕຸເທວິຍາ.

໔໙. ທກ຺ຂິເຓນ ຈ ທ຺ວາເຣນ, ປວິສິຕ຺ວາ ປຸຣຸຕ຺ຕມໍ;

ຕໍ ຄາມຄາມິມຄ຺ເຄນ, ຍາຕິ ຣາຊງ຺ຄເຓ ຕທາ.

໕໐. ສນ຺ຕາຍ ອິຣິຍາ ຍສ຺ມິໍ, ປສີທິ ສມຫີປຕິ;

ປຸພ຺ເພ’ວ ສນ຺ນິວາເສນ, ເປມໍ ຕສ຺ມິໍ ອຊາຍຖ.

໕໑. ປຸພ຺ເພ ກິຣ ຕໂຍ ອາສຸໍ, ຠາຕໂຣ ມຘຸ ວາຓິຊາ;

ເອໂກ ມຘຸໍ ວິກ຺ກິຓາຕິ, ອາຫຣນ຺ຕິ ມຘຸໍ ທຸເວ.

໕໒. ເອໂກ ປຈ຺ເຈກສມ຺ພຸທ຺ໂຘ, ວຓໂຣຄາຕຸໂຣ ອຫຸ;

ອຎ຺ໂຎ ປຈ຺ເຈກສມ຺ພຸທ຺ໂຘ, ຕທຕ຺ຖໍ ມຘຸວຕ຺ຖິໂກ.

໕໓. ປິຓ຺ຑຈາຣິກວຕ຺ເຕນ, ນຄຣໍ ປາວິສີ ຕທາ;

ຕິຕ຺ຖໍ ຊລຕ຺ຖໍ ຄຈ຺ຉນ຺ຕິ, ເອກາ ເຈຏີ ຕມທ຺ທສ.

໕໔. ປຸຈ຺ຉິຕ຺ວາ ມຘຸກາມຕ຺ຕໍ, ຎຕ຺ວາ ຫຕ຺ເຖນ ອາທິສິ;

ເອໂສ ມຘ຺ວາປໂຓ ຠນ຺ເຕ, ຕຕ຺ຖ ຄຈ຺ຉາ’ຕິ ອພ຺ຣວິ.

໕໕. ຕຕ຺ຖ ປຕ຺ຕສ຺ສ ພຸທ຺ຘສ຺ສ, ວາຓິໂຊ ໂສ ປສາທວາ;

ວິສ຺ສນ຺ທຍນ຺ໂຕ ມຸຂໂຕ, ປຕ຺ຕປຸຣໍ ມຘຸໍ ອທາ.

໕໖. ປຸຓ຺ຓຎ຺ຈ ອຸປ຺ປຕນ຺ຕຎ຺ຈ, ປຕິຕຎ຺ຈ ມຫີຕເລ;

ທິສ຺ວາ ມຘຸໍ ປສນ຺ໂນ ໂສ, ເອວໍ ປຓິທຫີ ຕທາ.

໕໗. ຊມ຺ພຸທີເປ ເອກຣຊ຺ຊໍ, ທາເນນາ’ເນນ ໂຫຕຸ ເມ;

ອາກາເສ ໂຍຊເນ ອາຓາ, ຠູມິຍໍ ໂຍຊເນຕິ ຈ.

໕໘. ຠາຕເຣ ອາຄເຕ ອາຫ, ເອທິສສ຺ສ ມຘຸໍ ອທໍ;

ອນຸໂມທຖ ຕຸມ຺ເຫ ຕໍ, ຕຸມ຺ຫາກຎ຺ຈ ຍໂຕ ມຘຸ.

໕໙. ເຊຏ຺ໂຐ ອາຫ ອຕຸຏ຺ໂຐ ໂສ,

ຈຓ຺ຑາໂລ ນູນ ໂສສິຍໍ;

ນິວາເສນ຺ຕີຕິ ຈຓ຺ຑາລາ,

ກາສາຍານິ ສທາ ອິຕິ.

໖໐. ມຊ຺ໂຌ ປຈ຺ເຈກພຸທ຺ຘໍ ຕໍ, ຂິປປາຣຓ຺ຓເວ ອິຕິ;

ປຕ຺ຕິທານວໂຈ ຕສ຺ສ, ສຸຕ຺ວາ ເຕ ຈານຸໂມທິສຸໍ.

໖໑. ອາປຓາ ເທສິກໍ ຍາຕຸ, ເທວິຕ຺ຕໍ ຕສ຺ສ ປຕ຺ຖຍິ;

ອາທິສ຺ສມານສນ຺ຘິ ຈ, ຣູປໍ ອຕິມໂນຣມໍ.

໖໒. ອໂສໂກ ມຘຸໂທ’ສນ຺ຘິ-ມິຕ຺ຕາເທວີ ຕຸ ເຈຏິກາ;

ຈຓ຺ຑາລວາທີ ນິຄ຺ໂຣໂຘ, ຕິສ຺ໂສ ໂສ ປາຣວາທິໂກ.

໖໓. ຈຓ຺ຑາລວາທີ ຈຓ຺ຑາລ-ຄາເມ ອາສິ ຍໂຕ ຕຸ ໂສ;

ປຕ຺ເຖສິ ໂມກ຺ຂໍ ໂມກ຺ຂຎ຺ຈ, ສຕ຺ຕ ວສ຺ໂສວ ປາປຸຓິ.

໖໔. ນິວິຏ຺ຐເປໂມ ຕສ຺ມິໍ ໂສ, ຣາຊາ’ຕິ ຕຸຣິໂຕ ຕໂຕ;

ປກ຺ໂກສາເປສິ ຕໍ ໂສ ຕຸ, ສນ຺ຕວຸຕ຺ຕີ ອຸປາຄມິ.

໖໕. ນິສິທ ຕາຕາ’ນຸຣູເປ, ອາສເນ ຕາ’ຫ ຠູປຕິ;

ອທິສ຺ວາ ຠິກ຺ຂຸມຎ຺ຎໍ ໂສ, ສີຫາສນມຸປາຄມິ.

໖໖. ຕສ຺ມິໍ ປລ຺ລງ຺ກມາຍາເຕ, ຣາຊາອິຕິ ວິຈິນ຺ຕຍິ;

ອຊ຺ຊາ’ຍໍ ສາມເຓໂຣ ເມ, ຆເຣ ເຫສ຺ສຕິ ສາມິໂກ.

໖໗. ອາລມ຺ພິຕ຺ວາ ກຣໍ ຣຎ຺ໂຎ, ໂສ ປລ຺ລງ຺ເກ ສມາຣຸຫິ;

ນິສີທິ ຣາຊປລ຺ລງ຺ເກ, ເສຕຈ຺ຉຕ຺ຕສ຺ສ ເຫຏ຺ຐໂຕ.

໖໘. ທິສ຺ວາ ຕຖາ ນິສິນ຺ນໍ ຕໍ, ອໂສໂກ ໂສ ມຫີປຕິ;

ສມ຺ຠາເວຕ຺ວານ ຄຸຓໂຕ, ຕຸຏ຺ໂຐ’ຕີວ ຕທາ ອຫຸ.

໖໙. ອຕ຺ຕໂນ ປຏິຍຕ຺ເຕນ, ຂຊ຺ຊໂຠຊ຺ເຊນ ຕປ຺ປິຍ;

ສມ຺ພຸທ຺ຘເທສິຕໍ ຘມ຺ມໍ, ສາມເຓຣມປຸຈ຺ຉິຕໍ.

໗໐. ຕສ຺ສ’ປ຺ປມາທວຄ຺ຄໍ ໂສ, ສາມເຓໂຣ ອຠາສຖ;

ຕໍ ສຸຕ຺ວາ ຠູມິປາໂລ ໂສ, ປສນ຺ໂນ ຊິນສາສເນ.

໗໑. ອຏ຺ຐ ເຕ ນິຈ຺ຈຠຕ຺ຕານິ, ທມ຺ມິ ຕາຕາ’ຕິ ອາຫ ຕໍ;