ຉຏ຺ຐປຣິຈ຺ເຉທ

ວິຊຍາຄມນໍ

໑. ວງ຺ເຄສຸ ວງ຺ຄນຄເຣ, ວງ຺ຄຣາຊາ ອຫຸ ປຸເຣ;

ກາລິງ຺ຄຣຎ຺ໂຎ ຘີຕາ’ສິ, ມເຫສີ ຕສ຺ສ ຣາຊິໂນ.

໒. ໂສ ຣາຊາ ເທວິຍາ ຕສ຺ສາ, ເອກໍ ອລຠິ ຘີຕຣໍ;

ເນມິຕ຺ຕາພ຺ຍາກຣຸໍ ຕສ຺ສາ, ສໍວາສໍ ມຄຣາຊິນາ.

໓. ອຕີວ ຣູປິນິໍ ອາສິ, ອຕີວ ກາມຄິທ຺ຘິນີ;

ເທເວນ ເທວິຍາ’ຈາປິ, ລຊ຺ຊາຍາ’ສິ ຊຄຸຈ຺ຉິຕາ.

໔. ເອກາກິນີ ສາ ນິກ຺ຂມ຺ມ, ເສຣີຈາຣສຸຂຕ຺ຖິນີ;

ສຕ຺ເຖນ ສຫ ອຎ຺ຎາຕາ, ອຄາ ມຄຘຄາມິນາ.

໕. ລາຬຣຏ຺ເຐ ອຏວິຍາ, ສີໂຫ ສຕ຺ຖມຠິທ຺ຘວິ;

ອຎ຺ຎຕ຺ຖ ເສສາ ຘາວິໍສຸ, ສີຫຄຕທິສນ຺ຕຸສາ.

໖. ຄຓ຺ຫິຕ຺ວາ ໂຄຈຣໍ ສີໂຫ, ຄຈ຺ຉໍ ທິສ຺ວາ ຕມາ’ຣໂຕ;

ຣຕ຺ໂຕ ອຸປາຄລາເລນ຺ໂຕ, ລງ຺ຄຸລໍ ປຕ຺ຕກຓ຺ຓໂກ.

໗. ສາ ຕໍ ທິສ຺ວາ ສຣິຕ຺ວານ, ເນມິຕ຺ຕວຈນໍ ສຸຕໍ;

ອຠີຕາ ຕສ຺ສ ອງ຺ຄານິ, ຣຎ຺ຊຍນ຺ຕິ ປຣາມສິ.

໘. ຕສ຺ສາ ຜສ຺ເສນາ’ຕິ ຣຕ຺ໂຕ, ປິຏ຺ຐິໍ ອາໂຣປິຍາ’ສຸຕໍ;

ສີໂຫ ສກໍ ຄຸຫໍ ເນຕ຺ວາ, ຕາຍ ສໍວາສມາຈຣິ.

໙. ເຕນ ສໍວາສມນ຺ວາຍ, ກາເລນ ຍມເກ ທຸເວ;

ປຸຕ຺ຕຎ຺ຈ ຘີຕຣຎ຺ຈາຕິ, ຣາຊຘີຕາ ຊເນສິ ສາ.

໑໐. ປຸຕ຺ຕສ຺ສ ຫຕ຺ຖປາທາ’ສຸໍ, ສີຫາກາຣາ ຕໂຕ ອກາ;

ນາເມນ ສີຫພາຫຸໍ ຕໍ, ຘີຕຣໍ ສີຫສີວລິໍ.

໑໑. ປຸຕ຺ໂຕ ໂສຬສວສ຺ໂສ ໂສ, ມາຕຣໍ ປຸຈ຺ຉິ ສໍສຍໍ;

ຕຸວໍ ປິຕາ ຈ ໂນ ອມ຺ມ, ກສ຺ມາ ວິສທິສາ ອິຕິ.

໑໒. ສາ ສພ຺ພມພ຺ຣວີ ຕສ຺ສ, ກິໍນຍາມາ’ຕິ ໂສ’ພ຺ຣວິ;

ຄຸຫໍ ຖເກຕິຕາໂຕ ເຕ, ປາສາເຓນາຕິ ສາ’ພ຺ຣວິ.

໑໓. ມຫາຄຸຫາຍ ຖກນໍ, ຂນ຺ເຘນາ’ທາຍ ໂສ ອກາ;

ເອກາເຫເນ’ວ ປຎ຺ຎາສ-ໂຍຊນານິ ຄຕາຄຕໍ.

໑໔. ໂຄຈຣາຍ ຄເຫ ສີເຫ, ທກ຺ຂິຓສ຺ມິຎ຺ຫິ ມາຕຣໍ;

ວາເມ ກຓິຏ຺ຐິໍ ກຕ຺ວານ, ຕໂຍ ສີຆໍ ອປກ຺ກມີ.

໑໕. ນິວາເສຕ຺ວານ ສາຂໍ ເຕ, ປຈ຺ຈນ຺ຕໍ ຄາມມາຄມຸໍ;

ຕຕ຺ຖາສິ ຣາຊິຘີຕາຍ, ມາຕຸລສ຺ສ ສຸໂຕ ຕທາ.

໑໖. ເສນາປຕິ ວງ຺ຄຣຎ຺ໂຎ, ຐິໂຕ ປຈ຺ຈນ຺ຕ ຄາມໂກ;

ນິສິນ຺ໂນວຏມູລເລໂສ, ກມ຺ມນ຺ຕໍ ສໍວິຘາຍກໍ.

໑໗. ທິສ຺ວາ ເຕ ປຸຈ຺ຉິເຕ’ໂວຈຸໍ, ອຏວີ ວາສິໂນ ມຍໍ;

ອິຕິ ໂສ ທາປຍີ ເຕສໍ, ວຕ຺ຖານິ ຘຊິນີ ປຕິ.

໑໘. ຕານາ’ເຫສຸໍ ອຸຬາຣານິ, ຠຕ຺ຕໍ ປຓ຺ເຓສຸ ທາປຍິ;

ໂສວຓ຺ຓຠາຊນນາ’ສຸໍ, ເຕສໍ ປຸຎ຺ເຎນ ຕານິ ຈ.

໑໙. ເຕນ ໂສ ວິມ຺ຫິໂຕ ປຸຈ຺ຉິ, ເກ ຕຸມ຺ເຫຕິ ຈມູປຕິ;

ຕສ຺ສ ສາ ຊາຕິໂຄຕ຺ຕານິ, ຣາຊຘີຕາ ນິເວທຍິ.

໒໐. ປິຕຸຈ຺ຉາ ຘີຕຣໍ ຕໍ ໂສ, ອາທາຍ ຘຊິນີ ປຕິ;

ຄນ຺ຕ຺ວານ ວງ຺ຄນຄຣໍ, ສໍວາສໍ ຕາຍ ກປ຺ປຍິ.

໒໑. ສີໂຫ ສີຆໍ ຄຸຫໍ ຄນ຺ຕ຺ວາ, ເຕ ອທິສ຺ວາ ຕໂຍ ຊເນ;

ອຏ຺ຏິໂຕ ປຸຕ຺ຕໂສເກນ, ນ ຈ ຂາທິ ນ ຈາ’ປິວິ.

໒໒. ທາຣເກ ເຕ ຄເວສນ຺ໂຕ, ອຄາ ປຈ຺ຈນ຺ຕຄາມເກ;

ອຸພ຺ພາສີຍຕິ ໂສ ໂສ’ວ, ຍໍຍໍ ຄາມມຸເປຕິ ໂສ.

໒໓. ປຈ຺ຈນ຺ຕວາສິໂນ ຄນ຺ຕ຺ວາ, ຣຎ຺ໂຎ ຕໍ ປຏິເວທຍຸໍ;

ສີໂຫ ປິເຬຕິ ເຕ ຣຏ຺ຐໍ, ຕໍ ເທວ ປຏິເສຘຍ.

໒໔. ອລກໍ ນິເສຘກໍ ຕສ຺ສ, ຫຕ຺ຖິກ຺ຂນ຺ຘຄຕໍ ປຸເຣ;

ອາເທຕຸ ສີຫທາຍີຕິ, ສຫສ຺ສໍ ໂສ ປຈາຣຍິ.

໒໕. ຕເຖວ ທ຺ເວສຫສ຺ສານິ, ຕີຓິຈາ’ປິ ນຣິສ຺ສໂຣ;

ທ຺ວີສຸ ວາເຣສຸ ວາເຣສິ, ມາຕາ ສີຫຠຸຊໍ ຫິຕໍ.

໒໖. ອຄ຺ຄຫິ ຕຕິເຍ ວາເຣ, ສີຫພາຫຸ ອປຸຈ຺ຉິຍ;

ມາຕຣໍ ຕິສຫສ຺ສໍ ຕໍ, ຆາເຕຕຸໍ ປິຕຣໍ ສກໍ.

໒໗. ຣຎ຺ໂຎ ກຸມາຣໍ ທສ຺ເສສຸໍ, ຕໍ ຣາຊາ ອິຘ ມພ຺ຣວິ;

ຄຫິໂຕ ຍທິ ສີໂຫ ເຕ, ທມ຺ມິ ຣຏ຺ຐໍ ຕເທວ ເຕ.

໒໘. ໂສ ຕໍ ຄນ຺ຕ຺ວາ ຄຸຫາທ຺ວາຣໍ, ສີຫໍ ທິສ຺ວາວ ອາຣກາ;

ເອນ຺ຕໍ ປຸຕ຺ຕສິເນເຫນ, ວິຊ຺ຌິຕຸໍ ຕໍ ສຣໍ ຂິປິ.

໒໙. ສໂຣ ນຬາຕມາຫຈ຺ຈ, ເມຕ຺ຕຈິຕ຺ເຕນ ຖສ຺ສ ຕຸ;

ກຸມາຣປາທມູເລ’ວ, ນິວຕ຺ໂຕ ປຕິ ຠູມິຍໍ.

໓໐. ຕຖາ’ສິ ຍາວ ຕຕິຍໍ, ຕໂຕ ກຸຊ຺ຌິມິຄາມິໂປ;

ຕໂຕ ຂິຕ຺ໂຕ ສໂຣຕສ຺ສ, ກາຍໍ ນິພ຺ພິຊ຺ຊ ນິກ຺ຂມິ.

໓໑. ສເກສຣໍ ສີຫສີສໍ, ອາທາຍ ສປຸຣໍ ອຄາ;

ມຕສ຺ສ ວງ຺ຄຣາຊສ຺ສ, ສຕ຺ຕາຫານິ ຕທາ ອຫຸ.

໓໒. ຣຎ຺ໂຎ ອປຸຕ຺ຕກຕ຺ຕາ ຈ, ປຕີຕາ ຈສ຺ສ ກມ຺ມຸນາ;

ສຸຕ຺ວາ ຈ ຣຎ຺ໂຎ ນຕ຺ຕຸຕ຺ຕໍ, ສຎ຺ຊານິຕ຺ວາ ຈ ມາຕຣໍ.

໓໓. ອມຈ຺ຈາ ສນ຺ນິປຕິຕາ, ອຂິລາ ເອກມານສາ;

ສີຫພາຫຸ ກຸມາຣສ຺ສ, ຣາຊາ ໂຫຫີຕິ ອພ຺ຣວຸໍ.

໓໔. ໂສ ຣຊ຺ຊໍ ສມ຺ປຏິຈ຺ຉິຕ຺ວາ, ທຕ຺ວາ ມາຕຸ ປຕິສ຺ສ ຕໍ;

ສີຫສີວລິມາທາຍ, ຊາຕຠູມິໍ ຄໂຕ ສຍໍ.

໓໕. ນຄຣໍ ຕຕ຺ຖ ມາເປສິ, ອຫຸ ສີຫປຸຣນ຺ຕິ ຕໍ;

ອຣຎ຺ເຎ ໂຍຊນສເຕ, ຄາເມ ຈາປິ ນິເວສຍິ.

໓໖. ລາຬຣຏ຺ເຐ ປຸເຣ ຕສ຺ມິໍ, ສີຫພາຫຸນຣາຘິໂປ;

ຣຊ຺ຊໍ ກາເຣສິ ກຕ຺ວານ, ມເຫສິໍ ສີຫສີວລິໍ.

໓໗. ມເຫສີ ໂສຬສກ຺ຂຕ຺ຕຸໍ, ຍມເກ ຈ ທຸເວ ທຸເວ;

ປຸຕ຺ເຕ ຊນຍິ ກາເລສາ, ວິຊໂຍ ນາມ ເຊຏ຺ຐໂກ.

໓໘. ສຸມິຕ຺ໂຕ ນາມ ທຸຕິໂຍ, ສພ຺ເພ ທ຺ວຕ຺ຕິໍສ ປຸຕ຺ຕກາ;

ກາເລນ ວິຊຍໍ ຣາຊາ, ອຸປຣຊ຺ເຊ’ຠິ ເສຈຍິ.

໓໙. ວິຊໂຍ ວິສມາຈາໂຣ, ອາສິ ຕມ຺ປຣິສາປິ ຈ;

ສາຫສານິ ອເນການິ, ທຸສ຺ສຫານິ ກຣິໍສຸເຕ.

໔໐. ກຸທ຺ໂຘ ມຫາຊໂນ ຣຎ຺ໂຎ, ຕມຕ຺ຖໍ ປຏິເວທຍິ;

ຣາຊາ ເຕ ສຎ຺ຎເປຕ຺ວານ, ປຸຕ຺ຕໍ ໂອວທິ ສາຘຸກໍ.

໔໑. ສພ຺ພໍ ຕເຖວ ທຸຕິຍໍ, ອໂຫສິ ຕຕິຍໍ ປນ;

ກຸທ຺ໂຘ ມຫາຊໂນ ອາຫ, ປຸຕ຺ຕໍ ຆາເຕຫິ ເຕ ອິຕິ.

໔໒. ຣາຊາ’ຖວິຊຍໍ ຕຎ຺ຈ, ປຣິວາຣຎ຺ຈ ຕສ຺ສ ຕໍ;

ສຕ຺ຕສຕານິ ປຸຣິເສ, ກາເຣຕ຺ວາ ອທ຺ຘມຸຓ຺ຓເກ.

໔໓. ນາວາຍ ປກ຺ຂິປາເປຕ຺ວາ, ວິສ຺ສຊ຺ຊາເປສິ ສາຄເຣ;

ຕຖາ ເຕສໍ ຠຣິຍາໂຍ, ຕເຖວ ຈ ກຸມາຣເກ.

໔໔. ວິສຸໍ ວິສຸໍ ເຕ ວິສ຺ສຏ຺ຐາ, ປຸຣິສິຕ຺ຖິກຸມາຣກາ;

ວິສຸໍ ວິສຸໍ ທີປກສ຺ມິໍ, ໂອກ຺ກມິໍສຸ ວສິໍສຸ ຈ.

໔໕. ນຄ຺ຄທີໂປຕິ ຎາຍິຕ຺ຖ, ກຸມາໂຣກ຺ກນ຺ຕທີປໂກ;

ຠຣິໂຍກ຺ກນ຺ຕທີໂປ ຕຸ, ມຫິນ຺ທທີປໂກ ອິຕິ.

໔໖. ສຸປ຺ປາຣເກ ປຏ຺ຏນມ຺ຫິ, ວິຊໂຍ ປນ ໂອກ຺ກມິ;

ປຣິສາ ສາຫເສເນ’ຕ຺ຖ, ຠີໂຕ ນາວໍ ປຸນາ’ຣຸຫິ.

໔໗. ລໍກາຍໍ ວິຊຍສນາມໂກ ກຸມາໂຣ;

ໂອຕິຓ຺ໂຓ ຖິຣມຕິ ຕມ຺ພປຓ຺ຓິທີເປ;

ສາລານໍ ຍມກຄຸຓານມນ຺ຕຣສ຺ມິໍ;

ນິພ຺ພາຕຸໍ ສຍິຕທິເນ ຕຖາຄຕສ຺ສ.

ສຸຊນປສາທສໍເວ ຄຕ຺ຖາຍກເຕ ມຫາວໍເສ

ວິຊຍາຄມນໍນາມ

ຉຏ຺ຐາປຣິຈ຺ເຉໂທ.