ເອກູນຈຕ຺ຕາລີສຕິມ ປຣິຈ຺ເຉທ

ຣາຊທ຺ວຍທີປໂນ

໑. ຕໂຕ ກສ຺ສປນາໂມ ໂສ, ປາປໂກ ນຣປາລໂກ;

ອສ຺ສ ໂຄ ປຎ຺ຈສູທຎ຺ຈ, ເປສຍິຕ຺ວານ ຠາຕິກໍ.

໒. ມາຣາເປຕຸໍ ອສກ຺ໂກນ຺ໂຕ, ຠີໂຕ ສີຫຄິຣິໍ ຄໂຕ;

ທຸຣາໂຣຫໍ ມນຸສ຺ເສຫິ, ໂສຘາເປຕ຺ວາ ສມນ຺ຕໂຕ.

໓. ປາກາເຣນ ປຣິກ຺ຂິປ຺ປ, ສີຫາກາເຣນ ກາຣຍິ;

ຕຕ຺ຖ ນິສ຺ເສຓິ ເຄຫານິ, ເຕນ ຕໍ ນາມໂກ ອຫູ.

໔. ສໍຫຣິຕ຺ວາ ຘນໍ ຕຕ຺ຖ, ນິທຫິຕ຺ວາ ສຸໂຄປິຕໍ;

ອຕ຺ຕໂນ ນິຫິຕານໍ ໂສ, ຣກ຺ຂໍ ທຕ຺ວາ ຕຫິໍ ຕຫິໍ.

໕. ກຕ຺ວາ ຣາຊຆຣໍ ຕຕ຺ຖ, ທສ຺ສເນຍ຺ຍໍ ມໂນຣມໍ;

ທຸຕິຍາລກມນ຺ທໍວ, ກຸເວໂຣວ ຕຫິໍ ວສິ.

໖. ມິຄາໂຣ ນາມ ກາເຣສິ, ເສນາປຕິ ສນາມກໍ;

ປຣິເວຓໍ ຕຖາເຄຫ-ມຠິເສກຊິນິສ຺ສ ຈ.

໗. ຕສ຺ສາຠິເສກໍ ຍາຈິຕ຺ວາ, ສິລາສມ຺ພຸທ຺ຘໂຕ’ຘິຣໍ;

ອລທ຺ຘາສາມິ ໂນ ຣຊ຺ເຊ, ຊານິສ຺ສາມີຕິ ສຓ຺ຐຫິ.

໘. ຫຸຕ຺ວາ ວິປ຺ປຏິສາຣີ ໂສ, ອຕ຺ຕນາ ກຕກມ຺ມນາ;

ມຸຈ຺ຈິສ຺ສາມິ ກຕໍ ນຸ’ຕິ, ປຸຎ຺ຎໍ ກາສິ ອນປ຺ປກໍ.

໙. ມຫາ ວຕ຺ຖຸນິ ກາເຣສິ, ທ຺ວາເຣສຸ ນຄຣສ຺ສ ໂສ;

ອມ຺ພຸຍ຺ຍາເນ ຈ ກາເຣສິ, ທີເປ ໂຍຊນ ໂຍຊເນ.

໑໐. ອິສ຺ສຣສມຓາຣາມໍ, ກາເຣຕ຺ວາ ປຸພ຺ພວຕ຺ຖຸໂຕ;

ອຘິກໍ ໂຠຄຄາເມ ຈ, ອຘິກໍ ຕສ຺ສ ທາປຍິ.

໑໑. ໂພຘິ ອຸປ຺ປລວຓ຺ຓາ ຈ, ຕສ຺ສາສຸໍ ຘີຕໂຣ ທຸເວ;

ວິຫາຣສ຺ສ’ສ຺ສ ກາເຣສິ, ນາມໍ ຕາສຎ຺ຈ ອຕ຺ຕໂນ.

໑໒. ເທນ຺ເຕ ຕສ຺ມິໍ ນ ອິຈ຺ຉິໍສຸ, ສມຓາ ເຖຣວາທິໂນ;

‘‘ປິຕຸຆາຕິສ຺ສ ກມ຺ມ’’ນ຺ຕິ, ໂລກຄາຣຍ຺ຫ ຠີຣຸໂນ.

໑໓. ທາຕຸກາໂມສ ເຕສໍ’ວ, ສມ຺ພຸທ຺ຘ ປຏິມາຍ’ທາ;

ຠິກ຺ຂເວ ອຘິວາເສສຸໍ, ໂຠໂຄ ໂນ ສຕ຺ຖຸໂນ ອິຕິ.

໑໔. ກຖາ ນິຍ຺ຍນ຺ຕິ ອຸຍ຺ຍາເນ, ສມີເປ ປພ຺ພຕສ຺ສ ໂສ;

ກາຣາເປສິ ວິຫາຣໍ ໂສ, ເຕສໍ ນາໂມ ຕໂຕ ອຫຸ.

໑໕. ອທາ ຘມ຺ມຣຸຈິນໍ ຕໍ, ສມ຺ປຕ຺ຕ ຈຕຸປຈ຺ຈຍໍ;

ວິຫາຣຎ຺ເຈວ ອຸຍ຺ຍານໍ, ທິສາຠາຄມ຺ຫິ ອຸຕ຺ຕເຣ.

໑໖. ຠຕ຺ຕໍ ສນີຣປກ຺ກໍ ໂສ, ຠຸຎ຺ຊິຕ຺ວາ ທິນ຺ນມິຕ຺ຖິຍາ;

ສປ຺ປິຍຸຕ຺ຕໍ ມນຸຎ຺ເຎຫິ, ສູເປຫິ ອຠິສງ຺ຂຕໍ.

໑໗. ມນຸຎ຺ຎມິທມຍ຺ຍານໍ, ທສ຺ສເມວນ຺ຕິ ຕາທິສໍ;

ຠຕ຺ຕໍ ປາທາສິ ຠິກ຺ຂູນໍ, ສພ຺ເພສຎ຺ຈ ສຈີວຣໍ.

໑໘. ອຸໂປສຖມຘິຏ຺ຐາສິ, ອປ຺ປມຎ຺ຎຎ຺ຈ ຠາວຍິ,

ສມາທິຍິ ຘຸຕງ຺ເຄ ຈ, ລິຂາເປສິ ຈ ໂປຕ຺ຖເກ.

໑໙. ປຏິມາທານ ສາລາທິໍ, ກາຣາເປສິ ອນປ຺ປກໍ;

ຠິໂຕ ໂສ ປຣໂລກມ຺ຫາ, ໂມຄ຺ຄລ຺ລານາ ຈ ວຕ຺ຕຕິ.

໒໐. ຕໂຕ ອຏ຺ຐາຣເສ ວສ຺ເສ, ໂມຄ຺ຄລ຺ລາໂນ ມຫາຠໂຏ;

ອາເທເສນ ນິຄຓ຺ຐານໍ, ທ຺ວາທສຄ຺ຄສຫາຍ ວາ.

໒໑. ຊມ຺ພຸທີປາ ອິຘາຄມ຺ມ, ເທເສ ອມ຺ພຏ຺ຐໂກລເກ;

ກຸຬາຣີ ນາເມ ພນ຺ຘິຕ຺ຖ, ວິຫາເຣ ພລສຎ຺ຈຍໍ.

໒໒. ຣາຊາ ສຸຕ຺ວາ ຄເຫຕ຺ວາ ຕໍ, ຠຎ຺ຊິສ຺ສາມິຕິ ນິກ຺ຂມິ;

ເນມິຕ຺ເຕຫິ ນ ສກ຺ກາຕິ, ວທນ຺ເຕປິ ມຫາພໂລ.

໒໓. ໂມຄ຺ຄລ຺ລາໂນປິ ສນ຺ນທ຺ຘ ພໂລ ສູຣສຫາຍ ວາ;

ຄຈ຺ຉນ຺ໂຕ ສຸຣສງ຺ຄາມໍ, ເທໂວ ວິຍ ສຸຊມ຺ປຕິ.

໒໔. ອຎ຺ຎມຎ຺ຎໍ ອຸປາຄມ຺ມ, ຠິນ຺ນເວລາວ ສາຄຣາ;

ອາຣຠິໍສຸ ມຫາຍຸທ຺ຘໍ, ພລກາຍາ ອຸໂຠປິ ເຕ.

໒໕. ກສ຺ສໂປ ປຸຣໂຕ ທິສ຺ວາ, ມຫນ຺ຕໍ ກທ຺ທມາສຍໍ;

ຄນ຺ຕຸມຎ຺ເຎນ ມຄ຺ເຄນ, ປຣິວຕ຺ເຕສິ ທນ຺ຕິນໍ.

໒໖. ທິສ຺ວາ ຕໍ ສາມິໂກໂນ’ຍໍ, ປລາຍຕິ ຠເຓ ອິຕິ;

ພລກາໂຍ ປຠິຊ຺ຊິຕ຺ຖ, ‘‘ທິຏ຺ຐໍ ປິຐ’’ນ຺ຕິ ໂຆສຍຸໍ.

໒໗. ໂມຄ຺ຄລານ ພລາຣາຊາ, ເຉຕ຺ວາ ນິກຣເຓນ ໂສ;

ສີສໍ ອຸກ຺ຂິປິຍາ’ກາສໍ, ຉຸຣິກໍ ໂກສິຍໍ ຂິປິ.

໒໘. ກຕ຺ວາ’ຬາຫນ ກິຈ຺ຈໍ ໂສ, ຕສ຺ສ ກມ຺ເມ ປສີທິຍ;

ສພ຺ພໍໂສ ຘນມາທາຍ, ອາຄຎ຺ຉິ ນຄຣໍ ວຣໍ.

໒໙. ຠິກ຺ຂູ ສຸຕ຺ວາ ປວຕ຺ຕິໍ ຕໍ, ສຸນິວຕ຺ຖາ ສຸປາຣຸຕາ;

ສມ຺ມຊ຺ຊິຕ຺ວາ ວິຫາຣຎ຺ຈ, ອຏ຺ຐໍສຸ ປຏິປາຏິຍາ.

໓໐. ມຫາເມຆວນໍ ປຕ຺ວາ, ເທວຣາຊາວ ນນ຺ທນໍ;

ມຫາເສນ ນິວຕ຺ເຕຕ຺ວາ, ຫຕ຺ຖິປາກາຣໂຕ ພຫິ.

໓໑. ອຸປສງ຺ກມ຺ມ ວນ຺ທິຕ຺ວາ, ສງ຺ເຆ ຕສ຺ມິໍ ປສີທິຍ;

ຉຕ຺ຕຕ຺ເຕນ ສງ຺ຆໍ ປູເຊສິ, ສງ຺ໂຆ ຕສ຺ເສວ ຕໍ ອທາ.

໓໒. ຕໍ ຐານໍ ຉຕ຺ຕວຑ຺ຒີຕິ, ໂວຫຣິໍສຸ ຕຫິໍ ກຕໍ;

ປຣິເວຓມ຺ປິ ຕໍ ນາມໍ, ອໂຫສິ ປຸຣມາຄໂຕ.

໓໓. ວິຫາເຣ ທ຺ເວປິ ຄນ຺ຕ຺ວານ, ສງ຺ຆໍ ຕຕ຺ຖາ’ຠິວນ຺ທິຍ;

ປາປຸຓິຕ຺ວາ ມຫາຣຊ຺ຊໍ, ໂລກໍ ຘມ຺ເມນ ປາລຍິ.

໓໔. ກຸທ຺ໂຘ ນີຫຣິ ທາຐໍໂສ, ຆາຕກໍ ປິຕຸໂນ ມມ;

ອນຸວຕ຺ຕິຕ຺ວາ ມຈ຺ຈາຕິ, ເຕນ ຣກ຺ຂສ ນາມ ວາ.

໓໕. ອຕິເຣກສຫສ຺ສໍ ໂສ, ອມຈ຺ຈານໍ ວິນາສຍິ;

ກຓ຺ຓນາສາທິ ເຉເທສິ, ປພ຺ພາເຊສິ ຕຖາ ພຫູ.

໓໖. ຕໂຕ ສຸຕ຺ວານ ສທ຺ຘມ຺ມ-ມຸປສນ຺ໂນ ສຸມານໂສ;

ມຫາທານໍ ປວຕ຺ເຕສິ, ເມໂຆ ວິຍ ມຫີຕເລ.

໓໗. ຜຸສ຺ສປຸຓ຺ຓມີຍໍ ທານ-ມນຸວສ຺ສໍ ປວຕ຺ຕຍິ;

ຕໂຕ ປຏ຺ຐາຍ ຕໍ ທານໍ, ທີເປ ອຊ຺ຊາປິ ວຕ຺ຕຕິ.

໓໘. ໂສປິ ສາຣຖິໂກ ລາຊ-ທາຍໂກ ປິຕຸຣາຊິໂນ;

ອາເນຕ຺ວາ ປິຕຸສນ຺ເທ ສໍ, ໂມຄ຺ຄລ຺ລານສ຺ສ ທສ຺ສຍິ.

໓໙. ຕໍ ທິສ຺ວາ ປຣິເທວິຕ຺ວາ, ປິຕຸໂນ ເປມ ມຕ຺ຕນີ;

ວຓ຺ເຓຕ຺ວາ ຕສ຺ສ ປາທາສິ, ທ຺ວາຣນາຍກຕໍ ວິຠູ.

໔໐. ເສນາປຕິ ມິຄາໂຣຫິ, ນິເວເທຕ຺ວາ ຍຖາ ວິຘິໍ;

ອຠິເສກ ຊິນສ຺ສາ’ກາ, ອຠິເສກໍ ຍຖາຣຸຈິໍ.

໔໑. ສີຫາ’ຈເລ ທຬ຺ຫນາມໍ, ທາຐາ ໂກຓ຺ຑຎ຺ຎກມ຺ປິ ຈ;

ວິຫາຣໍ ຘມ຺ມຣຸຈິນໍ, ສາຄລິນຎ຺ຈ ທາປຍິ.

໔໒. ປພ຺ພຕນ຺ຕຸ ວິຫາຣໍໂສ, ກຕ຺ວາ ເຖຣສ຺ສ ທາປຍິ;

ມຫານາມສນາມສ຺ສ, ທີຆສຓ຺ຑ ວິຫາຣເກ.

໔໓. ຣາຊິນິນາມກຎ຺ເຈວ, ກຕ຺ວາ ຠິກ຺ຂຸນຸປສ຺ສຍໍ;

ອທາ ສາຄລິການໍ ໂສ, ຠິກ຺ຂຸນີນໍ ມຫາມຕິ.

໔໔. ລມ຺ພກຓ຺ຓກໂຄຕ຺ໂຕປິ, ທາຐາ ປຠຸຕິ ນາມໂກ;

ກສ຺ສປສ຺ສ ອຸປຐາເນ, ໂກຈິ ນິພ຺ພິນ຺ນ ມານໂສ.

໔໕. ຄນ຺ຕາ ເມ ເຣລິຍໍ ວຄ຺ຄໍ,

ວາສໍ ຕຕ຺ເຖວ ກປ຺ປຍິ;

ອໂຫສິ ປຸຕ຺ໂຕ ຕສ຺ເສໂກ,

ສິລາກາ ໂລຕິ ປິສ຺ສຸໂຕ.

໔໖. ໂສປິ ກສ຺ສປໂຕ ຠີໂຕ, ຎາຕເກນ ສຫ’ຕ຺ຕໂນ;

ໂມຄ຺ຄລ຺ລາເນນ ຄນ຺ຕ຺ວານ, ຊມ຺ພຸທີປຕລໍ ອິໂຕ.

໔໗. ໂພຘິປຓ຺ຑວິຫາຣມ຺ປິ, ປພ຺ພຊ຺ຊໍ ສມຸປາຄໂຕ;

ກໂຣນ຺ໂຕ ສງ຺ຆກິຈ຺ຈານິ, ສາທໂຣ ໂສ ສຸເປສໂລ.

໔໘. ອມ຺ມໍ ສງ຺ຆສ຺ສ ປາທາສິ, ສງ຺ໂຆ ຕສ຺ມິໍ ປສີທິຍ;

ອາຫ’ມ຺ພ ສາມເຓໂຣ’ຕິ, ເຕນ ຕໍ ນາມໂກ ອຫຸ.

໔໙. ໂສ ເກສຘາຕຸວໍສມ຺ຫິ, ວຸຕ຺ເຕນ ວິຘິນາ ຕໂຕ;

ເກສຘາຕຸໍ ລຠິຕ຺ວານ, ຕສ຺ສ ຣຊ຺ເຊ ອິຘາ’ນຍິ.

໕໐. ຕສ຺ສ ກຕ຺ວານ ສກ຺ກາຣໍ, ຄເຫຕ຺ວາ ເກສ ຘາຕຸໂຍ;

ມຫຄ຺ເຆ ນິທຫິຕ຺ວານ, ກຣຓ຺ເຑ ຜລິກຸມ຺ຠວ຺ເຫ.

໕໑. ທີປງ຺ກຣສ຺ສ ນາຖສ຺ສ, ປຏິມາຍ ຆເຣ ວເຣ;

ວຑ຺ເຒຕ຺ວາ ປຣິຫາເຣນ, ມຫາປູຊໍ ປວຕ຺ຕຍິ.

໕໒. ມາຕຸລໍ ຠຣິຍຎ຺ຈ’ສ຺ສ, ກຕ຺ວາ ໂສວຓ຺ຓຍໍ ຕຫິໍ;

ຐເປສິ ປຏິມາໂຍ ຈ, ອສ຺ສ ພິມ຺ພຎ຺ຈ ຈາຣຸກໍ.

໕໓. ເກສຘາຕຸກຣຓ຺ຑຎ຺ຈ, ຉຕ຺ຕໍ ຣຕນມຓ຺ຑປໍ;

ສາວກຄ຺ຄຍຸໍຄໍ ວາຬ-ພີຊນິຎ຺ຈ ສກາຣຍິ.

໕໔. ປຣິຫາຣຎ຺ຈ ຕສ຺ສ’ທາ, ຣາຊາ ອຘິກມຕ຺ຕໂນ;

ສິລາກາຬ ມສິຄ຺ຄາຫໍ, ກຕ຺ວາ ຣກ຺ຂາຍ ໂຍຊຍິ.

໕໕. ອສິຄ຺ຄາຫສິລາກາໂຬ, ອິຕິ ເຕນາ’ສິ ວິສ຺ສຸໂຕ;

ຠຄິນິຎ຺ຈ’ສ຺ສ ປາທາສິ, ສທ຺ຘິໍ ໂຠເຄນ ຠູມິໂປ.

໕໖. ວຸຕ຺ໂຕ’ຍມຕິ ສງ຺ເຂໂປ, ວິຕ຺ຖາໂຣ ປນ ສພ຺ພໂສ;

ເກສຘາຕຸກວໍສມ຺ຫາ, ຄເຫຕພ຺ໂພ ວິຠາວິນາ.

໕໗. ພນ຺ຘິຕ຺ວາ ສາຄຣາ ຣກ຺ຂໍ, ທີປຎ຺ຈ ກາສິນິພ຺ຠຍໍ;

ຘມ຺ມກມ຺ມນ ໂສເຘສິ, ສຘມ຺ມໍ ຊິນສາສນໍ.

໕໘. ເສນາປຕິສ ນາມໍ’ກາ, ປຘານຆຣ ມຸຕ຺ຕໂຣ;

ກຕ຺ວາ’ຏ຺ຐາຣສເມ ວສ຺ເສ, ໂສ ປຸຎ຺ຎານິ ຂຍໍ ຄໂຕ.

໕໙. ກສ຺ສປໂຕ ຊິໂຕ ອຕິພລິ ປຸຎ຺ຎກ຺ຂເຍ ສງ຺ຂເຕ;

ເຊຕຸໍ ໂນ ວິສຫິຕ຺ຖ ມຈ຺ຈຸມຸປຄໍ ໂສ ເຍວທາໂສວິຍ;

ຕສ຺ມາ ມຈ຺ຈຸພລໍ ນິຫຈ຺ຈ ສຸຂິໂນ ເຫສ຺ສນ຺ຕິ ເມຘາວິໂນ;

ນິພ຺ພານໍ ປຣມຈ຺ຈຸຕໍ ສິວປທໍ ປຕ຺ຕພ຺ພມຕ຺ຕຎ຺ຎຸນາ.

ສຸຊນປ຺ປສາທ ສໍເວຄຕ຺ຖາຍ ກເຕ ມຫາວໍເສ

ຣາຊທ຺ວຍທີປໂນ ນາມ

ເອກູນຈຕ຺ຕາລີສຕິໂມ ປຣິຈ຺ເຉໂທ.