ຈຕ຺ຕາລີສຕິມ ປຣິຈ຺ເຉທ

ອຏ຺ຐຣາຊໂກ

໑. ຕສ຺ສຈ຺ຈເຍ ກຸມາຣາທິ-ຘາຕຸເສໂນຕິ ວິສ຺ສຸໂຕ;

ອຫຸ ຕສ຺ສ ສຸໂຕ ຣາຊາ, ເທວຣູໂປ ມຫາພໂລ.

໒. ກາຣິເຕ ປິຕຣາ’ກາສິ, ວິຫາເຣ ນວກມ຺ມກໍ;

ກາເຣຕ຺ວາ ຘມ຺ມສງ຺ຄີຕິໍ ປຣິໂສເຘຕິ ສາສນໍ.

໓. ສນ຺ຕປ຺ເປສິ ມຫາສງ຺ຆໍ, ປຈ຺ຈເຍຫິ ຈຕູຫິປິ;

ກຕ຺ວາ ປຸຎ຺ຎານິ’ເນການິ, ນວເມ ຫາຍເນ’ຕິຄາ.

໔. ຕິຕ຺ຕິເສໂນ ສຸໂຕ ຕສ຺ສ, ຣາຊາ ຫຸຕ຺ວາ ອເນກຘາ;

ກຕ຺ວາ ປຸຎ຺ຎານິ ຣຊ຺ຊໍ ຕໍ, ມາສມ຺ປິ ນວເມ ຊຫິ.

໕. ສິໂວ ຕໍ ມາຕຸໂລ ຫນ຺ຕ຺ວາ, ຫຸຕ຺ວາ ຣາຊາ ອນປ຺ປກໍ;

ປຸຎ຺ຎໍ ກຕ຺ໂວ’ປຕິສ຺ເສນ, ປຎ຺ຈວີສ ທິເນ ຫໂຕ.

໖. ອຸປຕິສ຺ໂສ ຕໂຕ ອາສິ, ຣາຊາ ຫນ຺ຕ຺ວານ ສີວກໍ;

ໂມຄ຺ຄລ຺ລານສ຺ສ ຠຄິນີ, ສາມິໂກ ຘຊິນີປຕິ.

໗. ຣາຊາ ຐານນ຺ຕຣາທີຫິ, ກຕ຺ວານ ຊນສງ຺ຄຫໍ;

ສີລາກາຬສ຺ສ ປາທາສິ, ສຫ ໂຠ ກນຘີວຣໍ.

໘. ເອໂກ ປຸຕ຺ໂຕ ອຫຸ ຣຎ຺ໂຎ, ອຸປຕິສ຺ສສ຺ສ ກສ຺ສໂປ;

ສໂສຬສ ສຫາເຍຫິ, ສູໂຣ ສູເປຫິ ສຎ຺ຎຸໂຕ.

໙. ເອກ ວຸຕ຺ຕິສຫາເຍຫິ, ທານມານ ມຫາຘໂນ;

ຘມ຺ມຏ຺ໂຐ ວີຣິຍາຊີວິ, ສາຘຸ ເຊຏ຺ຐປຈາຍໂກ.

໑໐. ສິລາ ກາໂຬຕໂຕ ຣຊ຺ຊ-ໂລຠວຎ຺ຈິຕ ມານໂສ;

ທກ຺ຂິຓໍ ມລຍໍ ຄນ຺ຕ຺ວາ, ສງ຺ຄຓ຺ຫິຕ຺ວາ ມຫາ ພລໍ.

໑໑. ວິລຸມ຺ປມາໂນ ປຈ຺ຈນ຺ຕິ, ສມ຺ປຕ຺ໂຕ ນຄຣນ຺ຕິກໍ;

ຕໍ ສຸຕ຺ວາ ກສ຺ສໂປ ເຊຏ຺ໂຐ, ວຣມາຣຸຍ຺ຫ ກຸຎ຺ຊຣໍ.

໑໒. ອສ຺ສາ ເສຕ຺ວານ ປິຕຣໍ, ສມາທາຍ ສຫາຍເກ;

ນິກ຺ຂມ຺ມ ນຄຣາ ຄຈ຺ຉິ, ສິລາກາລສ຺ສ ທສ຺ສນໍ.

໑໓. ເອວໍ ສຕ຺ຕ’ຏ຺ຐ ວາເຣສຸ, ປລາໂຕ ລີນວຸຕ຺ຕິໂກ;

ຫຕ຺ເຖ ກຕ຺ວາ ອຸປາເຍນ, ເທເສ ປາຈິນ ປຈ຺ຉິເມ.

໑໔. ຍຸຊ຺ຌິຕຸໍ ປຸນ ປາຈິນ-ຕິສ຺ສ ປພ຺ພຕມາຄມິ;

ກສ຺ສໂປປິ ສຫາເຍຫິ, ສທ຺ຘິມາຣຸຍ຺ຫ ທນ຺ຕິນໍ.

໑໕. ຕຕ຺ຖ ຄນ຺ຕ຺ວາ ປລາເປຕ຺ວາ, ໂຈຣໍ ປພ຺ພຕມຕ຺ຖກໍ;

ອາໂຣເປສິ ມຫານາຄໍ, ເຕນາ’ສິ ຄິຣິກສ຺ສໂປ.

໑໖. ມານຕ຺ຖທ຺ໂຘ ສິລາກາໂຬ, ຠິຍ຺ໂຍ ຣຏ຺ຐໍ ປຠິນ຺ທິຍ;

ສພ຺ພໍ ຫຕ຺ຖຄຕໍ ກຕ຺ວາ, ອເຊຍ຺ຍ ພລວາຫໂນ.

໑໗. ອາຄມ຺ມ ນຄຣໍ ຣຸນ຺ຘິ, ສຕ຺ຖາຫໍ ຣາຊເສວກາ;

ຍຸຊ຺ຌິຕ຺ວາ ວິຣລາ ອາສຸໍ, ຕໂຕ ຈິນ຺ເຕສິ ກສ຺ສໂປ.

໑໘. ເອເຕ ນຄຣໂຣເຘນ, ສພ຺ເພ ຠິຊ຺ຊນ຺ຕິ ປາຓິໂນ;

ປຣິຫີນໍ ພລໍ ຣາຊາ, ອນ຺ຘໂກ ຈ ມຫລ຺ລໂກ.

໑໙. ເມຣຸກນ຺ທຣເກ ກຕ຺ວາ, ມາຕຣໍ ປິຕຣຎ຺ຈ ເມ;

ອງ຺ຄເຫຕ຺ວາ ພລໍ ປຈ຺ຉາ, ໂຈໂຣ ນິຄ຺ຄຓ຺ຫິ ໂຍ ອິຕິ.

໒໐. ຣຕ຺ຕິຍໍ ໂສ ສຫາເຍ ຈ, ຣາຊສາຘນເມວຈ;

ອາທາຍ ປິຕໂຣ ເຈວ, ມລຍໍ ຄນ຺ຕຸມາຣຠິ.

໒໑. ຕທາ ມຄ຺ຄມຊານນ຺ຕາ, ສມ຺ມູຬາ ມຄ຺ຄເທສກາ;

ນຄຣສ຺ສ ສມີເປວ, ສມ຺ຠມິໍສຸ ອິໂຕ ຕໂຕ.

໒໒. ສິລາກາໂຬ ປວຕ຺ຕິໍ ຕໍ, ສຸຕ຺ວາ ສງ຺ຄມ຺ມ ເວຄສາ;

ປຣິວາເຣສິ ສງ຺ຄາໂມ, ຕຕ຺ຖ ຠິໍສນໂກ ອຫຸ.

໒໓. ເທວາສຸຣຣຓາກາເຣ, ວຕ຺ຕມາເນ ມຫາຫເວ;

ປຕິເຕສຸ ສຫາເຍສຸ, ສີທມາເນ ມຫາຄເຊ.

໒໔. ຫຕ຺ຖາໂຣຫສ຺ສ ທຕ຺ວາ, ຉິນ຺ທິຕ຺ວາ ສີສມຕ຺ຕໂນ;

ປຸຎ຺ຉິຕ຺ວາ ໂລຫິຕໍ ກຕ຺ວາ, ໂກສິຍໍ ອສິ ປຸຕ຺ຕິກໍ.

໒໕. ຫຕ຺ຖິກຸມ຺ເຠ ອຸໂຠ ຫຕ຺ເຖ, ຐເປຕ຺ວານ ອວຕ຺ຖຣິ;

ອຸປຕິສ຺ໂສປິ ຕໍ ສຸຕ຺ວາ, ໂສກສລ຺ລາຫໂຕ ມຣິ.

໒໖. ເອວໍ ທິຍຑ຺ຒວສ຺ເສນ, ອຸປຕິສ຺ເສ ທິວໍຄເຕ;

ຣາຊາ’ໂຫສິ ສິລາກາໂຬ, ປຸພ຺ພນາເມນ ເອກໂຕ.

໒໗. ຕໍ ອມ຺ພສາມເຓຣາທິ-ສິລາກາໂຬຕິ ໂວຫຣຸໍ;

ຕິຕ຺ຖໍ ເຕຣສວສ຺ສານິ, ທິປໍ ຘມ຺ເມນ ປາລຍິ.

໒໘. ມຫາປາຬິມ຺ຫິ ທາເປສິ, ປຈ຺ຈຄ຺ຆໍ ຣາຊໂຠຊນໍ;

ເວຊ຺ຊສາລາສຸ ໂຠເຄ ຈ, ວຑ຺ເຒສິ ຊນຕາຫິໂຕ.

໒໙. ອນ຺ວຫໍ ປູຊຍິ ໂພຘິໍ, ປຏິມາໂຍ ຈ ກາຣຍິ;

ສພ຺ເພສໍ ທີປວາສີນໍ, ຠິກ຺ຂູນໍ’ທາ ຕິຈີວຣໍ.

໓໐. ມາຆາຕໍ ກາຣຍິທີເປ, ສພ຺ເພສໍເຍວ ປາຓິນໍ;

ອານິຕໍ ອຕ຺ຕນາ ເກສ-ຘາຕຸໍ ສມ຺ມາ ອປູຊຍິ.

໓໑. ຣເຫຣທກວາຣຎ຺ຈ, ອທາສິ ອຠຍຸຕ຺ຕເຣ;

ປຸຣຕ຺ຖິມາ ເຖຣີຍານໍ, ວິຫາຣກຸນ຺ຖນາມ ໂສ.

໓໒. ອາເນຕ຺ວາ ອາສນໍ ຕຕ຺ຖ, ຐເປສິ ທຸມຣາຊເກ;

ຍາວຊີວໍ ປວຕ຺ເຕສິ, ປຸຎ຺ຎກມ຺ມມສງ຺ຂິຍໍ.

໓໓. ໂມຄ຺ຄລ຺ລາໂນ ຕຖາ ທາຐາ, ປຠຸຕິ ໂຈ’ປຕິສ຺ສໂກ;

ປຸຕ຺ໂຕ ຕສ຺ສາ’ສຸມຄ຺ຄສ຺ສ, ເທສໍ ທຕ຺ວາ ປຸຣຕ຺ຖິມໍ.

໓໔. ທຕ຺ວາ ຐານນ຺ຕຣຎ຺ຈາທິ-ປາທສຎ຺ຎໍ ວິສຊ຺ຊຍິ;

ຄນ຺ຕ຺ວາ ຕຕ຺ຖ ວສາຫີຕິ, ໂສປິ ຄນ຺ຕ຺ວາ ຕຫິໍ ວສິ.

໓໕. ຐານໍ ມລຍຣາຊຄ຺ຄໍ, ເທສໍ ທຕ຺ວານ ທກ຺ຂິຓໍ;

ຣກ຺ຂຓຕ຺ຖໍ ສມຸທ຺ທສ຺ສ, ມຊ຺ຌິມໍ ຕຸ ນິໂຍຊຍິ.

໓໖. ອຸປຕິສ຺ສໍ ຕຸ ວາເສສິ, ສນ຺ຕິເກເຍວ ອຕ຺ຕໂນ;

ວິເສເສນ ມມາຍນ຺ໂຕ, ຍູນໍ ກລ຺ຍານທສ຺ສນໍ.

໓໗. ຕສ຺ສ ທ຺ວາທສເມ ວສ຺ເສ, ອິໂຕ ກາສິ ປຸຣໍ ຄໂຕ;

ຘມ຺ມາຕຸ ມິຘາ’ເນສິ, ຕໂຕ ວາຓິຊ ມາຓໂວ.

໓໘. ຣາຊາ ທິສ຺ວາ’ສມຕ຺ໂຖ ໂສ, ຘມ຺ມາຘມ຺ມວິຈາຣເຓ;

ເຫມສຎ຺ຎາຍ ທີປມ຺ຫິ, ປຕນ຺ໂຕ ສລໂຠ ວິຍ.

໓໙. ພຸທ຺ຘຘມ຺ໂມຕິ ສຎ຺ຎາຍ, ຕໍ ຄເຫຕ຺ວານ ສາຘຸກໍ;

ກຕ຺ວາ ສກ຺ກາຣສມ຺ມານໍ, ເຄເຫ ຣາຊຆຣນ຺ຕິເກ.

໔໐. ຐເປຕ຺ວາ ອນຸວສ຺ສໍ ຕຸ, ເນຕ຺ວາ ເຊຕວນໍ ມຫໍ;

ກາຕຸໍ ກາເຣສິ ຈາຣິຕ຺ຕໍ, ຫິຕໍ ມນ຺ຕ຺ວານ ປາຓິນໍ.

໔໑. ເອວໍ ກຕ຺ວາ ສິລາກາໂຬ, ປຸຎ຺ຎກມ຺ມມນປ຺ປກໍ;

ປຕ຺ເຕ ເຕຣສເມ ວສ຺ເສ, ຍຖາກມ຺ມມຸປາຄມິ.

໔໒. ທາຐປ຺ປຠຸຕິໂກ ຣຊ຺ຊໍ, ຄເຫຕ຺ວາ ຠາຕຣໍສກໍ;

ອກ຺ກໂມຕິ ນິວາເຣນ຺ຕໍ, ມາຣາເປສິ ວິພຸທ຺ຘິໂກ.

໔໓. ໂມຄ຺ຄລ຺ລາໂນ’ຖ ຕໍ ສຸຕ຺ວາ, ອປ຺ປຕ຺ຕໍ ຣຊ຺ຊມຄ຺ຄຫິ;

ອກາຣເຓ ເມ ມາເຣສິ, ກຓິຏ຺ຐໍ ຘມ຺ມວາທີນໍ.

໔໔. ກາຣາເປສ຺ສາມຫມ຺ປຊ຺ຊ, ຣຊ຺ຊນ຺ຕິ ປຣິກຸປ຺ປິຍ;

ສມາທາຍ ມຫາເສນໍ, ອຄາຣາເຫຣ ປພ຺ພຕໍ.

໔໕. ຣາຊາປິ ສຸຕ຺ວາ ສນ຺ນທ຺ຘ-ພລກາໂຍ ກຣິນ຺ທເກ;

ປພ຺ພເຕ ສິວິຣໍ ພນ຺ຘິ, ໂມຄ຺ຄລ຺ລາໂນ ນິສມ຺ມຕໍ.

໔໖. ສາປຣາຘານ ເຕ ເມ ວາ, ມນຸສ຺ສາ ທີປວາສິໂນ;

ເອກສ຺ມິຎ຺ຈ ມເຕ ຣຊ຺ຊ-ມຸຠິນ຺ນໍເຍວ ໂນສິຍາ.

໔໗. ຕສ຺ມາ ອຎ຺ເຎນ ຍຸຊ຺ຌນ຺ຕຸ, ອຸໂຠເຍວ ມຍໍ ອິຘ;

ຫຕ຺ຖິຍຸທ຺ຘໍ ກໂຣມາຕິ, ຣຎ຺ໂຎ ເປເສສິ ສາສນໍ.

໔໘. ໂສປິ ສາຘູຕິ ວຕ຺ວານ, ພທ຺ຘປຎ຺ຈາຍຸໂຘ ຄຊໍ;

ອາຣຸຍ຺ຫ ມຸນິໂນ ມາໂຣ ວິຍ ໂອຕ຺ຖຣິ ຕາວເທ.

໔໙. ໂມຄ຺ຄລ຺ລາໂນປິ ສນ຺ນທ຺ໂຘ, ອາຣຸຍ຺ຫ ກຣີນໍ ວຣໍ;

ຕຕ຺ຖາ’ໂຄ ອຎ຺ຎມຎ຺ຎໍ ເຕ, ປາປຸຓິໍສຸ ມຫາຄຊາ.

໕໐. ສທ຺ໂທ ສູຍິຕ຺ຖ ສງ຺ຆຏ຺ເຏ, ອສນິຣາວ ສນ຺ນິໂຠ;

ທນ຺ຕຆາເຕນ ອຸຏ຺ຐາສິ, ຊາລາ ວິຊ຺ຊຸລ຺ລຕາ ວິຍ.

໕໑. ສຎ຺ຌາຆນສຠາຄາ’ສຸໍ, ຄຊາ ໂລຫິຕມກ຺ຂິຕາ;

ໂມຄ຺ຄລ຺ລານຄຊາວິທ຺ໂຘ, ຣຎ຺ໂຎໂອສກ຺ກິ ກຸຎ຺ຊໂຣ.

໕໒. ຣາຊາ ອາຣຠິ ຕໍ ທິສ຺ວາ, ຉິນ຺ທິຕຸໍ ສີສມຕ຺ຕໂນ;

ໂມຄ຺ຄລ຺ລາໂນ’ຖ ວນ຺ທນ຺ໂຕ, ຍາຈິ’ເມ’ວໍ ກິຣີອິຕິ.

໕໓. ຍາຈມາເນປິ ໂສມານໍ, ມາເນນ຺ໂຕ ຉິນ຺ທິກນ຺ຘຣໍ;

ຉຑ຺ເຑສິ ຉຫິ ໂສ ຣຊ຺ຊໍ, ມາເສຫິ ທິວເສຫິ ຈ.

໕໔. ໂມຄ຺ຄລ຺ລາໂນ ຕໂຕ ຣາຊາ, ອາສິ ທີເປ ມຫາພໂລ;

ມາຕຸລຎ຺ຈ ປຏິຈ຺ເຈມໍ, ຈູລນາເມນ ໂວຫຣຸໍ.

໕໕. ອາສາຘາຣຓກາເວຍ຺ໂຍ, ວຕ຺ຖຸຕ຺ຕຍ ປຣາຍໂຓ;

ທານສໍຍມ ໂສເຈຍ຺ໂຍ, ໂສຣຈ຺ຈາທິຄຸຓາລໂຍ.

໕໖. ທາເນນ ປິຍວາຈາຍ, ອຕ຺ຖສ຺ສ ຈຣິຍາຍ ຈ;

ສມານຕ຺ຕສ຺ສຠາເວນ, ສງ຺ຄເຫສິ ມຫາຊນໍ.

໕໗. ປິຓ຺ຑປາຕວິຫາເຣຫິ, ເຠສຊ຺ຊຈ຺ຉາທເນຫິ ຈ;

ຠິກ຺ຂຸສງ຺ຆຎ຺ຫິ ສງ຺ຄຓ຺ຫິ, ຘມ຺ມິກາຍ ຈ ຄຸຕ຺ຕິຍາ.

໕໘. ອຕິເຣກາຍ ປູຊາຍ, ປູເຊຕ຺ວາ ຘມ຺ມຠາຓເກ;

ປິຏເກ ຕີຓິ ວາເຈສິ, ສທ຺ຘິມຏ຺ຐກຖາຍ ໂສ.

໕໙. ກຸມາເຣ ອຸປລາເລຕ຺ວາ, ນິວາເປນ ຍຖາຣຸຈິໍ;

ສຊ຺ຌາເປສິ ສທາ ຘມ຺ມໍ, ຘມ຺ມທີໂປ ມຫາມຕິ.

໖໐. ຘມ຺ມທີປຎ຺ຈ ໂສ ກຕ຺ວາ, ກຸຎ຺ຊຣເສຂເຣນິ ສາ;

ຘມ຺ມາວາສາເນ ວາເຈສິ, ປຸຣມ຺ຫິ ປຸຣິສຸຕ຺ຕໂມ.

໖໑. ພນ຺ຘາເປສິ ກທມ຺ພຎ຺ຈ, ນທິໍປພ຺ພຕມຊ຺ຌໂຕ;

ປຕ຺ຕປສາຓວາປິຎ຺ຈ, ຘນວາປິໍ ຄຣິຕຣໍ.

໖໒. ຄຓ຺ຫາເປສິ ສທີຆາຍຸ-ເຫຕຸ ກມ຺ມນ຺ຕິ ສາທໂຣ;

ລິຂາເປສິ ຈ ສທ຺ຘມ຺ມໍ, ວຕ຺ຖຸປູຊຎ຺ຈ ກາຣຍິ.

໖໓. ໂລກໍ ໂສ ອນຸກມ຺ປິຕ຺ວາ, ມາຕາປຸຕ຺ຕໍວ ໂອຣສໍ;

ທຕ຺ວາ ຠຸຕ຺ວາ ຍຖາກາມໍ, ວສ຺ເສ ວີສຕິເມ ມຣິ.

໖໔. ມເຫສີ ຕສ຺ສ ຆາເຕຕ຺ວາ, ວິສໂຍເຄນ ຎາຕເກ;

ປຸຕ຺ຕໍ ຣຊ຺ເຊ’ຠິສິຎ຺ຈິຕ຺ວາ, ສຍໍ ຣຊ຺ຊໍ ວິຈາຣຍິ.

໖໕. ຕຖາຠິສິຕ຺ໂຕ ໂສ ກິຕ຺ຕິ-ສິຣິເມໂຆ ນຣາຘິໂປ;

ຕິປຸປຕ຺ເຕຫິ ຉາເທສິ, ທຸມິນ຺ທຘຣມາທິໂຕ.

໖໖. ກປຓທ຺ຘິວຓິພ຺ພານໍ, ມຫາທານໍ ປວຕ຺ຕຍິ;

ມຄ຺ຄປາໂລ ຕຖາກາໂຣ, ອຫຸ ສພ຺ໂພປໂຠຄິໂຍ.

໖໗. ມເຫສີ ສາ ສທາ ອາສິ, ປຘານາ ສພ຺ພກມ຺ມສຸ;

ຣຊ຺ຊໍ ຕສ຺ສາ’ສິ ເຕເນວ, ເຫຏ຺ຐຸປຣິຍວຕ຺ຕິກໍ.

໖໘. ຣາຊາປາທາ ມຫາມຈ຺ຈາ’-ເຫສຸໍ ລຎ຺ຈປຣາຍນາ;

ທຸພ຺ພເລ ຈ ວິເຫເຐສຸໍ, ພລີ ຊານປທາ ນຣາ.

໖໙. ສິລາກາຬສ຺ສ ກາລມ຺ຫິ, ຄາເມ ສງ຺ຄິລ຺ລນາມເກ;

ຠຍວສີວ຺ຫໂຍ ໂປໂສ, ອຫຸ ໂມຣິຍວໍສໂຊ.

໗໐. ອໂຫສິ ປຸຕ຺ໂຕ ສີວສ຺ສ, ອຄ຺ຄໂພຘິ ສນາມໂກ;

ຠາຄິເນຍ຺ໂຍປິ ຕສ຺ສາສິ, ມຫານາໂຄຕິ ວິສ຺ສຸໂຕ.

໗໑. ຠາຄິເນໂຍ ມຫານາໂຄ, ອຄ຺ຄໂພຘິ ຈ ສຸນ຺ທໂຣ;

ອຸຬາຣຊ຺ຌາສຍຕ຺ຕາ ໂສ, ມຫານາໂຄ ມຫພ຺ພໂລ.

໗໒. ຫິຕ຺ວາ ກສ຺ສກກມ຺ມານິ, ໂຈຣກມ຺ມມກາ ວເນ;

ໂຄຘໍ ລທ຺ຘານ ເປເສສິ, ມາຕຸລານິຍ ສນ຺ຕິກໍ.

໗໓. ໂຄຘໍ ທິສ຺ວາ’ວສາ ຎຕ຺ວາ, ຘຎ຺ຎປຈ຺ຉິມເປສຍິ;

ກມ຺ມາຣສ຺ສາ’ປິ ເປເສສິ, ສສໍ ໂສປິ ຕເຖວກາ.

໗໔. ພີຊໍ ຠຄິນີ ມາຍາຈິ, ພີຊຄາຫຎ຺ຈ ຕສ຺ສ ສາ;

ທາສຎ຺ຈ ຎຕ຺ວາ ເປເສສິ, ອນ຺ນປານາທິນາ ຣໂຫ.