ອຏ຺ຐຕິໍສຕິມ ປຣິຈ຺ເຉທ

ທສຣາຊໂກ

໑. ມຫານາມ ສຸໂຕ ອາສິ, ທມິຬີ ກຸຈ຺ຉິສມ຺ຠໂວ;

ໂສຕ຺ຖິເສໂນ, ຕຖາສງ຺ໂຆ-ຘີຕາ ຈາ’ສິ ມເຫສິຍາ.

໒. ໂສຕ຺ຖິເສໂນ ຕທາ ຣຊ຺ຊໍ, ປຕ຺ວາ ສງ຺ຆຍນາສິໂຕ;

ຕສ຺ມິໍເຍວ ທິເນ ເຠຣິໍ, ຈຣາເປຕ຺ວາ ຕທາ ຕຸ ສາ.

໓. ອຕ຺ຕໂນ ສາມິກສ຺ສທາ, ຉຕ຺ຕຄ຺ຄາຫກຊນ຺ຕຸໂນ;

ຉຕ຺ຕຄ຺ຄາຫກວາປິໍ ໂສ, ກຕ຺ວາ ສໍວຈ຺ຉເຣ ມໂຕ.

໔. ອຖ ມຈ຺ໂຈ ມຫາປຎ຺ໂຎ, ສຫາໂຍ ຕສ຺ສ ຕໍ ມຕໍ;

ອນ຺ໂຕວຕ຺ຖຸມ຺ຫິ ຌາເປຕ຺ວາ, ວີຫິໂຈຣໍ ມຫາພລໍ.

໕. ຣຊ຺ຊໂຍຄ຺ໂຄຕິ ຈິນ຺ເຕຕ຺ວາ, ກຕ຺ວາ ຕໍ ຠູປຕິໍ ຣໂຫ;

ອນ຺ໂຕເຍວ ນິວາເສຕ຺ວາ, ຣາຊາ ໂຣຄາຕຸໂຣ ອິຕິ.

໖. ຍສໍ ຣຊ຺ຊໍ ວິຈາເຣສິ, ຉເຓ ປຕ຺ເຕ ມຫາຊນາ;

ຣາຊາ ເຈ ອຕ຺ຖິ ອມ຺ເຫຫິ, ສທ຺ຘິໍ ເມຕູຕິ ໂຆສຍຸໍ.

໗. ຕໍ ສຸຕ຺ວາ ນຣປາໂລ ໂສ, ສພ຺ພລງ຺ກາຣມຓ຺ຑິໂຕ;

ສມານໍເຕ ມຫານາເຄ, ເນສໂຍຄ຺ຄາ ມມາ’ຕິໂສ.

໘. ທາຏ຺ຐາຘາຕຸຆຣຐາເນ, ສຸວາ ນາຄໍ ສມາທິສິ;

ຣຎ຺ໂຎ ອາຓາຕິ ວຸຕ຺ເຕ ໂສ, ອຄາ ອາຣຸຍ຺ຫ ຕໍ ປຸຣໍ.

໙. ກຕ຺ວາ ປທກ຺ຂິຓໍ ຄນ຺ຕ຺ວາ, ປາຈິນທ຺ວາຣໂຕ ພຫິ;

ປຐເມ ເຈຕິຍຐາເນ, ຘາຕຸນາຄໍ ສມປ຺ປຍິ.

໑໐. ມຫາເຈຕິຕ຺ຕເຍ ຫຕ຺ຖິ-ປາກາເຣ’ກາສິ ໂຕຣຓໍ;

ມິຕ຺ຕເສໂນ ພຫຸໍ ປຸຎ຺ຎໍ, ກຕ຺ວາ ວສ຺ເສນ ໂສ ຈຸໂຕ.

໑໑. ມິຕ຺ຕເສນໍ ຣເຓ ຫນ຺ຕ຺ວາ, ທມິໂຬ ປຓ຺ຑຸນາມໂກ;

ອາຄໂຕ ປຣຕີຣມ຺ຫາ, ລງ຺ກາຣຊ຺ຊມກາຣຍິ.

໑໒. ຊນາ ກຸລີນາ ສພ຺ເພປິ, ໂຣຫຓໍ ສມຸປາຄຕາ;

ໂອຣຄງ຺ຄາຍ ອິສ຺ເສຣໍ, ທມິຬາ ເອວ ກປ຺ປຍຸໍ.

໑໓. ເຍ ສຸຠສ຺ສ ພລຏ຺ຐສ຺ສ, ຠີຕາໂມຣິຍວໍສຊາ;

ພລາຍິຕ຺ວາ ນຣາວາສໍ, ກປ຺ປຍິໍສຸ ຕຫິໍ ຕຫິໍ.

໑໔. ເຕສມຎ຺ຎຕໂມ ນນ຺ທິ-ວາປິ ຄາເມ ກຸຏິມ຺ພໂກ;

ຘາຕຸເສນວ຺ຫໂຍ ອາສິ, ທາຐານາໂມ ຈ ຕໍ ສຸໂຕ.

໑໕. ຄາເມ ອມ຺ພິລຍາຄຸມ຺ຫິ, ວສໍ ປຸຕ຺ເຕ ທຸເວ ລຠິ;

ຘາຕຸເສນໍ ສິລາຕິສ຺ສ-ໂພຘິໍຈ ສມ຺ປຊາຕິເກ.

໑໖. ມາຕຸໂສ ທຣິໂຍ ເຕສໍ, ສທ຺ໂຘ ປພ຺ພຊ຺ຊ ວຕ຺ຕຕິ;

ທີຆສນ຺ທກຕາວາເສ, ຘາຕຸເສນາປິ ມາຓໂວ.

໑໗. ສນ຺ຕິເກ ຕສ຺ສ ປພ຺ພຊ຺ຊ-ຣຸກ຺ຂມູລມ຺ຫິ ເອກທາ;

ສຊ຺ຌາຍຕິ ປວິສ຺ສິຕ຺ຖ, ເມໂຆ ນາໂຄຕຸປສ຺ສິຍ.

໑໘. ປຣິກ຺ຂິປິຕ຺ວາ ໂຠເຄຫິ, ຉາທຍິຕ຺ວາ ຜເຓນ ຈ;

ໂປຕ຺ຖກຎ຺ຈ ກຸມາຣຎ຺ຈ, ຣກ຺ຂິຕໍ ປສ຺ສິ ມາຕຸໂລ.

໑໙. ສີເສ ອາກິຣິ ສງ຺ກາຣໍ, ຕສ຺ສ ຣຸຏ຺ໂຐ ປໂຣຍຕິ;

ຕສ຺ມິໍ ຈິຕ຺ຕໍ ນ ທູເສສິ, ຕມ຺ປິ ທິສ຺ວານ ມາຕຸໂລ.

໒໐. ອຸຕ຺ຕໂມ ວຕ’ຍໍ ສຕ຺ໂຕ, ຣາຊາ ເຫສ຺ສຕິ ນິຈ຺ຉຍໍ;

ຣກ຺ຂິຕພ຺ໂພ’ຕິ ອາທາຍ, ຕໍ ວິຫາຣມຸປາຄໂຕ.

໒໑. ໂຄຓິສາທິ ວິຫາເຣ’ຍໍ, ກຕ຺ຕພ຺ໂພ ນີຕິມາ ອິຕິ;

ສິກ຺ຂາເປສິ ກຸມາຣໍ ຕໍ, ປຓ຺ຑຸໂກ ຕໍ ວິຊານິຍ.

໒໒. ຄຓ຺ຫເຖຕນ຺ຕິເປເສສິ, ເສວເກ ຕສ຺ສາຣຕ຺ຕິຍໍ;

ທິສ຺ວານ ສຸປິນໍ ເຖໂຣ, ນີຫຣິຕ຺ຖ ກຸມາຣກໍ.

໒໓. ຕສ຺ມິໍ ນິກ຺ຂນ຺ຕມຕ຺ຕມ຺ຫິ, ເສວກໍ ປຣິວາຣິຍ;

ປຣິເວເຓ ນ ປສ຺ສິໍສຸ, ຕໂຕ ນິກ຺ຂມ຺ມ ເຕ ອຸໂຠ.

໒໔. ທກ຺ຂິຓສ຺ມິໍ ທິສາຠາເຄ, ໂຄຓ ນາມໍ ມຫານທິໍ;

ປຕ຺ວາ ສມ຺ປຸຓ຺ຓມຏ຺ຐໍສຸ, ຄນ຺ຕຸກາມາປິ ເວຄສາ.

໒໕. ຍຖາ ນທິຍໍ ວາເຣຕິ, ອມ຺ເຫ ຕໍ ຕ຺ວມ຺ປິ ວາຣຍ;

ວາປິໍຄເຫຕ຺ວາ ເອຕ຺ເຖ’ຕິ, ວຕ຺ວາ ເຖໂຣ ຕທາ ນທິໍ.

໒໖. ໂອຕຣິຕ຺ຖກຸມາເຣນ, ສທ຺ຘິໍ ທິສ຺ວານ ເຕ ອຸໂຠ;

ນາຄຣາຊາ ຕທາ ເອໂກ, ປິຏ຺ຐິໍ ປາທາສິ ເຕນ ໂສ.

໒໗. ອຸຕ຺ຕຣິຕ຺ວາ ກຸມາຣໍ ຕໍ, ເນຕ຺ວາ ປຈ຺ຈນ຺ຕມາວສໍ;

ລທ຺ຘາ ຂີໂຣທນໍ ສຸຕ຺ວາ, ເສສໍ ປຕ຺ເຕນ ຕສ຺ສ’ທາ.

໒໘. ຈິຕ຺ຕກາເຣນ ເຖຣມ຺ຫິ, ຠຕ຺ຕໍ ປກ຺ຂິປ຺ປ ຠູມິຍໍ;

ຠຸຎ຺ຊິ ເຖໂຣປິ ຕໍ ຊານິ, ຠຸຎ຺ຊ ເຕ ຍໍ ມຫິໍ ອິຕິ.

໒໙. ປຓ຺ຑຸຣາຊາປິ ກຕ຺ວານ, ຣຊ຺ຊໍ ວສ຺ສມ຺ຫິ ປຎ຺ຈເມ;

ຈຸໂຕ ປຸຕ຺ໂຕ ປິປາຣິນ຺ໂທ, ຕຕິໂຍ ຕສ຺ສ ຠາຕຸໂກ.

໓໐. ກຓິຏ຺ໂຐ ຂຸທ຺ທປາຣິນ຺ໂທ, ກຸພ຺ພໍ ຣຊ຺ຊໍ ມຫາມຫິໍ;

ຘາຕຸເສນານຸເຄ ສພ຺ເພ, ວິເຫເຐສິ ມຫາຊເນ.

໓໑. ສງ຺ຄເຫຕ຺ວາ ຊເນ ສາຘຸ-ເສໂນ ຍຸຊ຺ຊິຕ຺ຖ ຣາຊິນາ;

ໂສ ໂສຬສຫິ ວສ຺ເສຫິ, ປຸຎ຺ຎປາປກໂຣມໂຕ.

໓໒. ນິຣິຕໂຣ ຕໂຕ ອາສິ, ຣາຊາມາສທ຺ວເຍນ ຕໍ;

ຘາຕຸເສໂນ ວິນາເສສິ, ເຕນ ກຕ຺ວາ ມຫາຫວໍ.

໓໓. ຫເຕ ຕສ຺ມິໍ ມຫີປາເລ, ທາຐິໂຍ ທມິໂຬ ຕໂຕ;

ຣາຊາ ວສ຺ສຕ຺ຖ ເຍ ຫຸຕ຺ວາ, ຘາຕຸເສນຫໂຕຕໂຕ.

໓໔. ປິຏ຺ຐິໂຍ ທມິໂຬ ສຕ຺ຕ-ມາເສນ ນິຘນໍ ຄໂຕ;

ຘາຕຸເສເນນ ຍຸຊ຺ຌິຕ຺ວາ, ວໍໂສ ປຈ຺ຉິຊ຺ຊິ ທາມິໂຬ.

໓໕. ອຖາ’ສິ ຣາຊາລງ຺ກາຍໍ, ຘາຕຸເສໂນ ອິຣາຘິໂປ;

ຠາຕຣາ ສຫ ທີປມ຺ຫິ, ທມິເຬ ທີປຆາຕເກ.

໓໖. ອຸປາເຍຫິ ອເນເກຍິ, ເອກວີສປ຺ປມາຓເກ;

ຂນ຺ຘວາເຣ ນິເວເສຕ຺ວາ, ກຕ຺ວາ ຍຸທ຺ຘມເສສໂຕ.

໓໗. ໂສເຘຕ຺ວາ ເມທິນິໍ ສາຘຸ, ກຕ຺ວາ ຈ ສຸຂິຕໍຊນໍ;

ສາສນຎ຺ຈ ຍຖາຐາເນ, ຐເປສິ ປຣນາສິຕໍ.

໓໘. ທມິເຬ ເຍ’ນຸວຕ຺ຕິໍສຸ, ກຸລີນາ ກຸລຄາມວາ;

ເຕ ມໍ ວາ ສາສນໍ ວາ ໂນ, ຣກ຺ຂິໍສູ’ຕິ ປກຸປ຺ປິຍ.

໓໙. ເຕສໍ ຄາເມ ຄເຫຕ຺ວານ, ຄາເມ ສ຺ວາກາສິຣກ຺ຂເກ;

ໂຣຫຓາ’ຄມ຺ມ ເຕ ສພ຺ເພ, ກຸລີນາ ຕມຸປຏ຺ຐຫຸໍ.

໔໐. ເຕສໍ ສກ຺ກາຣສມ຺ມານໍ, ຍຖາໂຍຄມກາສິ ໂສ;

ອມຈ຺ເຈ ອຕ຺ຕໂນ ທຸກ຺ຂ-ສຫາເຍຈາ’ຠິ ໂຕສຍິ.

໔໑. ພນ຺ຘາເປຕ຺ວາ ມຫາຄງ຺ຄໍ, ເກທາເຣ’ກາ ຖິໂຣທເກ;

ມຫາປາຬມ຺ຫິ ຠິກ຺ຂູນໍ, ສາລິຠຕ຺ຕຎ຺ຈ ທາປຍິ.

໔໒. ປງ຺ຄຸໂຣຄາ ຕຸຣຏ຺ຏານໍ, ສາລາໂຍກາສິ ພຸທ຺ຘິມາ;

ກາຬວາປິໍຈ ຄຓ຺ຫິຕ຺ວາ, ພນ຺ຘິ ໂຄຓໍ ມຫານທິໍ.

໔໓. ມຫາວິຫາຣໍ ກຕ຺ວານ, ປນ຺ຕິຍຸຕ຺ຕມນາກຸລໍ;

ຕຖາ ໂພຘິຆຣຎ຺ເຈວ, ທສ຺ສເນຍ຺ຍ ມກາຣຍິ.

໔໔. ຠິກ຺ຂໂວ ປຣິໂຕເສຕ຺ວາ, ປຈ຺ຈເຍຫິ ຈຕູຫິປິ;

ຘມ຺ມາໂສໂກ’ວ ໂສກາສິ, ສງ຺ຄຫໍ ປິຏກຕ຺ຕເຍ.

໔໕. ອຏ຺ຐາຣສວິຫາເຣ ຈ, ເຖຣິຍານ ມກາຣຍິ;

ສມ຺ປນ຺ນໂຠເຄ ທີປມ຺ຫິ, ອຏ຺ຐາຣສ ຈ ວາປິໂຍ.

໔໖. ກາຬວາປີ ວິຫາໂຣ ຈ, ໂກຏິປສ຺ສາວນາມໂກ;

ທກ຺ຂິຓ ຄິຣິນາໂມ ຈ, ວິຫາໂຣ ວຑ຺ຒມານໂກ.

໔໗. ປຓ຺ຓວລ຺ລກຠູໂຕ ຈ, ຠລ຺ລາຕກສນາມໂກ;

ປາສາຓສິນ຺ເນ ເທສມ຺ຫິ, ຘາຕຸເສໂນ ຈ ປພ຺ພໂຕ.

໔໘. ມໍ ຄໂນ ຖູປວິຏ຺ຐິ ຈ, ຘາຕຸເສໂນປິ ອຸຕ຺ຕເຣ;

ປາຈິນ ກມ຺ພວິຏ຺ຐິ ຈ, ຕຖາ ອນ຺ຕຣເມ ຄິຣິ.

໔໙. ອນ຺ຕາຬິ ຘາຕຸເສໂນ ຈ, ກສ຺ສປິຏ຺ຐິກ ປຸພ຺ພໂກ;

ໂຣຫເຓທາຍຄາໂມ ຈ, ສາລວາໂຓ ວິຠີສໂນ.

໕໐. ວິຫາໂຣ ຠລ຺ລິວາໂຓ ຈ, ອຏ຺ຐາຣສນຣຸຕ຺ຕໂມ;

ປາທູລກໍ ຫມ຺ພລຏ຺ຐິ, ມຫາທຕ຺ຖາທິວາປິ ໂຍ.

໕໑. ຂຸທ຺ທເກ ຈ ວິຫາເຣໂສ, ອຏ຺ຐາຣສນຣຸຕ຺ຕໂມ;

ວາປີໂຍ ຈ ຕຖາກຕ຺ວາ, ເຕສເມວ ຕຸ ທາປຍິ.

໕໒. ປຎ຺ຈວີສຕິ ຫຕ຺ຖຎ຺ຈ, ມຍູຣປຣິເວຓກໍ;

ຫຣິຕ຺ວາ’ກາສິປາສາທ-ເມກວີສຕິ ຫຕ຺ຖກໍ.

໕໓. ກຸມາຣເສນສ຺ສ’ເປຕ຺ວາ, ປຸພ຺ພໂຠຄໍ ວິໂສຘຍິ;

ກາຬວາປິມ຺ມິຠາຄທ຺ຘໍ, ເຂຕ຺ຕານຎ຺ຈ ສຕທ຺ວຍໍ.

໕໔. ໂລຫ ປາສທເກ ຊິຓ຺ເຓ, ນວກມ຺ມມກາຣຍິ;

ມຫາຖູເປສຸ ຉຕ຺ຕານິ, ຕີສຸ ຊິຓ຺ຓານິ ກາຣຍິ.

໕໕. ເທວານໍປິຍຕິສ຺ເສນ, ກຕໍ ໂພຘິມຫໍ ວິຍ;

ສິນ຺ຫານປູຊໍ ໂພຘິສ຺ສ, ວຣໂພຘິສ຺ສ ກາຣຍິ.

໕໖. ຘາວນາ ໂລຠນາວາໂຍ, ຕຕ຺ຖ ປູເຊສິ ໂສຬສ;

ອລງ຺ກາຣໍ ມຸນິນ຺ທສ຺ສ, ອຠິເສກຎ຺ຈ ກາຣຍິ.

໕໗. ມຫາໂພຘິ ປຕິຏ຺ຐານາ, ໂອຣໍ ລງ຺ກາຍ ຠູມິປາ;

ຍາວ ທ຺ວາທສມໍ ວສ຺ສໍ, ໂພຘິປູຊມກາຣຍຸໍ.

໕໘. ມຫາມຫິນ຺ທຕ຺ເຖຣສ຺ສ, ກາເຣຕ຺ວາ ປຏິພິມ຺ພກໍ;

ເຖຣສ຺ສາ’ລາຫນໍ ເນຕ຺ວາ, ກາຕຸໍ ປູຊໍ ມຫາຣຫໍ.

໕໙. ທຕ຺ວາ ສຫສ຺ສໍ ທີເປຕຸໍ, ທີປວໍສໍ ສມາທິສິ;

ຐິຕານໍ ຕຕ຺ຖ ຠິກ຺ຂູນໍ, ທາຕຸຎ຺ຈາຓາປຍິຄຸຬໍ.

໖໐. ຠິກ຺ຂຸສ຺ສ ອຕ຺ຕໂນ ສີເສ, ສງ຺ກາໂຣກິຣຓໍ ສຣໍ;

ລາຠໍ ນາທາສິ ວຸຕ຺ຖສ຺ສ, ປຣິເວຓສ຺ສ ອຕ຺ຕໂນ.

໖໑. ຜາຕິກມ຺ມໍ ພຫຸໍ’ກາສິ, ວິຫາເຣ ອຠຍຸຕ຺ຕເຣ;

ສິລາສຕ຺ຖຸສ຺ສ ກາເຣສິ, ມນ຺ທິຣຎ຺ຈ ສມຓ຺ຑປໍ.

໖໒. ພຸທ຺ຘ ທາສກເຕເນຕ຺ເຕ, ນຏ຺ເຐ’ນຄ຺ຆມຓິ ທ຺ວຍໍ;

ອກາສິ ເນຕ຺ຕໍ ສຕ຺ຖຸສ຺ສ, ຣໍສິ ຈູຬາມຓິໍຕຖາ.

໖໓. ມຓິຫິ ຆນນີເລຫິ, ເກສາ ວຕ຺ຕໍ ສຸມຸຕ຺ຕມໍ;

ເຫມປຏ຺ຏໍ ຕເຖວຸຓ຺ຓ-ໂລມໍ ໂສວຓ຺ຓ ຈີວຣໍ.

໖໔. ປາທຊາລໍ ສຸວຓ຺ຓສ຺ສ, ປທຸມໍ ທີປມຸຕ຺ຕມໍ;

ນານາຣາຄມ຺ພຣໍ ຕຕ຺ຖ, ປູຊຍິຕ຺ຖ ອສໍຂິຍໍ.

໖໕. ອກາສິ ປຏິມາ ເຄເຫ, ພຫຸມງ຺ຄລເຈຕິເຍ;

ໂພຘິສຕ຺ເຕ ຕຖາ’ກາສິ, ກາຬເສລສ຺ສ ສຕ຺ຖຸໂນ.

໖໖. ອຸປສຸມ຺ຠວ຺ຫຍສ຺ສາປິ, ໂລກນາຖສ຺ສ ກາຣຍິ;

ຣໍສີຈູຬາມຓິຎ຺ເຈວ, ອຠິເສກວ຺ຫຍສ຺ສ ຈ.

໖໗. ພຸທ຺ຘພິມ຺ພສ຺ສ ກາເຣສິ, ປຸພ຺ເພ ວຸຕ຺ຕໍ ປິຬນ຺ຘນໍ;

ວາມປສ຺ສມ຺ຫິ ໂພຘິສ຺ສ, ໂພຘິສຕ຺ຕຆຣໍ ຕຖາ.

໖໘. ເມຕ຺ເຕຍ຺ຍສ຺ສ ຈ ກາເຣສິ, ສພ຺ພໍ ຣາຊປິຬນ຺ຘນໍ;

ສມນ຺ຕາ ໂຍຊເນ ຕສ຺ສ, ຕທາ ຣກ຺ຂຎ຺ຈ ໂຍຊຍິ.

໖໙. ກາຣາເປສິ ວິຫາເຣສຸ, ຘາຕຸຣາຊວ຺ຫປນ຺ຕິໂຍ;

ຕຖາ ສຕສຫສ຺ເສນ, ມຫາໂພຘິຆຣໍ ວຣໍ.

໗໐. ຖູປາຣມມ຺ຫິ ຖູປສ຺ສ, ປູຊໍ ຊິຓ຺ຓວິໂສຘນໍ;

ທາຐາ ຘາຕຸຆເຣຈາປິ, ຊິຓ຺ຓສ຺ສ ປຏິສງ຺ຂຣໍ.

໗໑. ທາຐາຘາຕຸກຣຸຓ຺ຑຎ຺ຈ, ຣໍສິຎ຺ຈ ຆນໂກຏ຺ຏິມໍ;

ມຫຄ຺ຆມນິສໍກິຓ຺ຓໍ, ສຸວຓ຺ຓ ປທຸມານິ ຈ.

໗໒. ທາຐາຘາຕຸມ຺ຫິ ປູເຊສິ, ປູຊາຈາກາ ອສງ຺ຂິຍາ;

ຈີວຣາທີນິ ທາເປສິ, ຠິກ຺ຂູນໍ ທີປວາສິນໍ.

໗໓. ກາຣາເປຕ຺ວາ ວິຫາເຣສຸ, ນວກມ຺ມໍ ຕຫິໍ ຕຫິໍ;

ປາກາເຣ ຈ ຆເຣຕ຺ວາ’ກາ, ສຸຘາກມ຺ມໍ ມໂນຫຣໍ.

໗໔. ມຫາເຈຕິຕ຺ຕເຍ ກຕ຺ວາ, ສຸຘາກມ຺ມໍ ມຫາຣຫໍ;

ສຸວຓ຺ຓຉຕ຺ຕໍ ກາເຣສິ, ຕຖາ ວຊິຣຈຸມ຺ພຏໍ.