ເຕວີສຕິມ ປຣິຈ຺ເຉທ

ໂຍຘລາໂຠ

໑. ພລລກ຺ຂຓຣູເປຕິ,

ເຕໂຊຊວຄຸເຓຫິ ຈ;

ອຄ຺ໂຄ ຫຸຕ຺ວາ ມຫາກາໂຍ,

ໂສ ຈ ກຓ຺ຑູລວາຣໂຓ.

໒. ນນ຺ທີມິຕ຺ໂຕ ສຸຣນິມິໂລ, ມຫາໂສໂຓ ໂຄຏ຺ຐຍິມ຺ພໂຣ;

ເຖຣປຸຕ຺ຕາຠໂຍ ຠຣໂຓ, ເວຬຸສຸມໂນ ຕເຖວ ຈ.

໓. ຂຎ຺ຊເທໂວ ຜຸສ຺ສເທໂວ, ລຠິຍ຺ຍ ວສໂຠປິ ຈ;

ເອເຕ ທສ ມຫາໂຍຘາ, ຕສ຺ສາ’ເຫສຸໍ ມຫພ຺ພລາ.

໔. ອຫຸ ເອຬາຣຣາຊສ຺ສ, ມິຕ຺ໂຕ ນາມ ຈມູປຕິ;

ຕສ຺ສ ກມ຺ມນ຺ຕຄາມມ຺ຫິ, ປາຈີນຂຓ຺ຑຣາຊິຍາ.

໕. ຈິຕ຺ຕປພ຺ພຕສາມນ຺ຕາ, ອຫຸ ຠຄິນິຍາ ສຸໂຕ;

ໂກໂສຫິຕວຕ຺ຖຄຸຍ຺ໂຫ, ມາຕຸລສ຺ເສວ ນາມໂຕ.

໖. ທູຣມ຺ປິ ປຣິສປ຺ປນ຺ຕໍ, ທຫຣໍ ຕໍ ກຸມາຣກໍ;

ອາພຊ຺ຌ ນນ຺ທິຍາ ກຏ຺ຍໍ, ນິສທມ຺ຫິ ອພນ຺ຘິສຸ.

໗. ນິສທໍ ກຑ຺ຒໂຕ ຕສ຺ສ, ຠູມິຍໍ ປຣິສປ຺ປໂຕ;

ອຸມ຺ມາຣາຕິກ຺ກເມ ນນ຺ທິ, ສາ ຉຊ຺ຊຕິ ຍໂຕ ຕໂຕ.

໘. ນນ຺ທິມິຕ຺ໂຕຕິ ຎາຍິຕ຺ຖ, ທສນາຄພໂລ ອຫຸ;

ວຸທ຺ໂຘ ນຄຣມາຄມ຺ມ, ໂສ ອຸປຏ຺ຐາສິ ມາຕຸລໍ.

໙. ຖູປາທີສຸ ອສກ຺ກາຣໍ, ກໂຣນ຺ໂຕ ທມິເຬ ຕທາ;

ອູຣຸໍ ອກ຺ກມ຺ມປາເທນ, ຫຕ຺ເຖນ ອິຕຣໍ ຕຸໂສ.

໑໐. ຄເຫຕ຺ວາ ສມ຺ປທາເລຕ຺ວາ, ພຫິກ຺ຂປຕິໍ ຖາມວາ;

ເທວາ ອນ຺ຕຣຘາເປນ຺ຕິ, ເຕນ ຂິຕ຺ຕໍ ກເຬວຣໍ.

໑໑. ທມິຬານໍ ຂຍໍ ທິສ຺ວາ, ຣຎ຺ໂຎ ອາໂຣຈຍິໍ ສຸຕໍ;

‘‘ສໂຫຏ຺ຏໍ ຄຓ຺ຫເຖຕໍ’’ຕິ, ວຸຕ຺ຕໍ ກາຕຸໍ ນ ສກ຺ຂິສຸໍ.

໑໒. ຈິນ຺ເຕສິ ນນ຺ທິມິຕ຺ໂຕ ໂສ, ‘‘ເອວມ຺ປິ ກຣໂຕ ມມ;

ຊນກ຺ຂໂຍ ເກວລຎ຺ຫິ, ນຕ຺ຖິ ສາສນໂຊຕນໍ.

໑໓. ໂຣຫເຓ ຂຕ຺ຕິຍາ ສນ຺ຕິ, ປສນ຺ນໍ ຣຕນຕ຺ຕເຍ;

ຕຕ຺ຖ ກຕ຺ວາ ຣາຊເສວໍ, ຄຓ຺ຫິຕ຺ວາ ທມິເຬ’ຂິເລ.

໑໔. ຣຊ຺ຊໍ ທຕ຺ວາ ຂຕ຺ຕິຍານໍ, ໂຊເຕສ຺ສໍ ພຸທ຺ຘສາສນໍ’’;

ອິຕິ ຄນ຺ຕ຺ວາ ຄາມຓິສ຺ສ, ຕໍ ກຸມາຣສ຺ສ ສາວຍິ.

໑໕. ມາຕຸຍາ ມນ຺ຕຍິຕ຺ວາ ໂສ, ສກ຺ກາຣໍ ຕສ຺ສ ກາຣຍິ;

ສກ຺ກໂຕ ນນ຺ທິມິຕ຺ໂຕ ໂສ, ໂຍໂຘ ວສິ ຕທນ຺ຕິເກ.

໑໖. ກາກວຓ຺ໂຓ ຕິສ຺ສຣາຊາ, ວາເຣຕຸໍ ທມິຬິສທາ;

ມຫາຄງ຺ຄາຍ ຕິຕ຺ເຖສຸ, ຣກ຺ຂໍ ສພ຺ເພສຸ ກາຣຍິ.

໑໗. ອຫຸ ທີຆາຠໂຍ ນາມ, ຣຎ຺ໂຎ’ຎ຺ຎ ຠຣິຍາ ສຸໂຕ;

ກຈ຺ຉກຕິຕ຺ເຖ ຄງ຺ຄາຍ, ເຕນ ຣກ຺ຂມກາຣຍິ.

໑໘. ໂສ ຣກ຺ຂາກຣຓຕ຺ຖາຍ, ສມນ຺ຕາ ໂຍຊນທ຺ວເຍ;

ມຫາກຸລມ຺ຫາ ເອເກກໍ, ປຸຕ຺ຕໍ ອາຓາປຍິ ຕຫິໍ.

໑໙. ໂກຏ຺ຐິວາເລ ຊນປເທ, ຄາເມ ຂຓ຺ຑກວິຏ຺ຐິເກ;

ສຕ຺ຕປຸຕ຺ໂຕ ກຸລປຕິ, ສງ຺ໂຆ ນາມາ’ສິ ອິສ຺ສໂຣ.

໒໐. ຕສ຺ສາປິ ຘູຕໍ ປາເຫສິ, ຣາຊປຸຕ຺ໂຕ ສຸຕຕ຺ຖິໂກ;

ສຕ຺ຕໂມ ນິມິໂລ ນາມ, ທສຫຕ຺ຖິພໂລ ສຸໂຕ.

໒໑. ຕສ຺ສ ອກມ຺ມສີລຕ຺ຕາ, ຂີຍນ຺ຕາ ຉປິ ຠາຕໂຣ;

ໂຣຈຍຸໍ ຕສ຺ສ ຄມນໍ, ນ ຕຸ ມາຕາ ປິຕາ ປນ.

໒໒. ກຸຊ຺ຌິຕ຺ວາ ເສສຠາຕູນໍ, ປາໂຕເຍວ ຕິໂຍຊນໍ;

ຄນ຺ຕ຺ວາ ສຸຣຄ຺ຄເມເຍວ, ຣາຊປຸຕ຺ຕໍ ອປສ຺ສິໂສ.

໒໓. ໂສ ຕໍ ວິມໍສນຕ຺ຖາຍ, ທູເຣ ກິຈ຺ເຈ ນິໂຍຊຍິ;

ເຈຕິຍ ປພ຺ພຕາ ສນ຺ເນ, ທ຺ວາຣ ມຓ຺ຑລຄາມເກ.

໒໔. ພ຺ຣາຫ຺ມໂຓ ກຸຓ຺ຑໂລ ນາມ, ວິຊ຺ຊ ເຕ ເມ ສຫາຍໂກ;

ສມຸທ຺ທປາເຣ ຠຓ຺ຑານິ, ຕສ຺ສ ວິຊ຺ຊນ຺ຕິ ສນ຺ຕິເກ.

໒໕. ຄນ຺ຕ຺ວາ ຕໍ ເຕນ ທິນ຺ນານິ, ຠຓ຺ຑການິ ອິຘາ’ຫຣ;

ອິຕິ ວຕ຺ວານ ໂຠເຊຕ຺ວາ, ເລຂໍ ທຕ຺ວາ ວິສ຺ສຊ຺ຊຍິ.

໒໖. ຕໂຕ ນວ ໂຍຊນຎ຺ຫິ, ອນຸຣາຘປຸຣໍ ອິທໍ;

ປຸພ຺ພຓ຺ເຫເຍວ ຄນ຺ຕ຺ວານ, ໂສ ຕໍ ພ຺ຣາຫ຺ມຓ ມທ຺ທສ.

໒໗. ‘‘ນ຺ຫຕ຺ວາ ວາປິຍໍ ຕາຕ, ເອຫີ’’ຕິ ອາຫ ພ຺ຣາຫ຺ມໂຓ;

ອິຘາ’ນາຄຕ ປຸພ຺ພຕ຺ຕາ, ນ຺ຫຕ຺ວານ ຕິສ຺ສວາປິຍໍ.

໒໘. ມຫາໂພຘິຎ຺ຈ ປູເຊຕ຺ວາ, ຖູປາຣາເມ ຈ ເຈຕິຍໍ;

ນຄຣໍ ປວິສິຕ຺ວານ, ປສ຺ສິຕ຺ວາ ສກລໍ ປຸຣໍ.

໒໙. ອາປຓາ ຄນ຺ຘມາທາຍ, ອຸຕ຺ຕຣ ທ຺ວາຣໂຕ ຕໂຕ;

ນິກ຺ຂມ຺ມຸປ຺ປລ ເຂຕ຺ຕມ຺ຫາ, ຄເຫຕ຺ວາ ອຸປ຺ປລານິ ຈ.

໓໐. ອຸປາຄມິ ພ຺ຣາຫ຺ມຓໍ ຕໍ, ປຸຏ຺ໂຐ ເຕນາ’ຫ ໂສ ຄຕິໍ;

ສຸຕ຺ວາ ໂສ ພ຺ຣາຫ຺ມໂຓ ຕສ຺ສ, ປຸພ຺ພາຄມມິຘາຄມໍ.

໓໑. ວິມ຺ຫິໂຕ ຈິນ຺ຕຍີ ເອວໍ, ‘‘ປຸຣິສາ ຊານີໂຍ ອຍໍ;

ສເຈ ຊາເນຍ຺ຍ ເອຬາໂຣ, ອິມໍ ຫຕ຺ເຖ ກຣິສ຺ສຕິ.

໓໒. ຕສ຺ມາ’ຍໍ ທມິຬາ’ສນ຺ເນ, ວາເສຕຸໍ ເນວ ອຣຫຕິ;

ຣາຊປຸຕ຺ຕສ຺ສ ປິຕຸໂນ, ສນ຺ຕິເກ ວາສມຣຫຕິ’’.

໓໓. ເອວ ເມວໍ ລິຂິຕ຺ວານ, ເລຂໍ ຕສ຺ສ ສມປ຺ປຍິ;

ປຸຓ຺ຓວຑ຺ຒນ ວຕ຺ຖານິ, ປຓ຺ຓາກາເຣ ພຫູປິ ຈ.

໓໔. ທຕ຺ວາ ຕໍ ໂຠຊຍິຕ຺ວາ ຈ, ເປເສສີ ສຂິສນ຺ຕິກໍ;

ໂສ ວຑ຺ຒມານຈ຺ຉາຍາຍໍ, ຄຕ຺ວາ ຣາຊສຸຕນ຺ຕິ ກໍ.

໓໕. ເລຂຎ຺ຈ ປຓ຺ຓາກາເຣ ຈ, ຣາຊປຸຕ຺ຕສ຺ສ ອປ຺ປຍິ;

ຕຸຏ຺ໂຐ ອາຫ ‘‘ສຫສ຺ເສນ, ປສາເທຖ ອິມ’’ນ຺ຕິ ໂສ.

໓໖. ອິສ຺ສໍ ກຣິໍສຸ ຕສ຺ສ’ຎ຺ເຎ, ຣາຊປຸຕ຺ຕສ຺ສ ເສວກາ;

ໂສ ຕໍ ທສສຫສ຺ເສນ, ປສາທາເປສິ ທາຣກໍ.

໓໗. ຕສ຺ສ ເກສໍ ລິຂາເປຕ຺ວາ, ຄງ຺ຄາເຍວ ນຫາປິຍ;

ປຸຓ຺ຓວຑ຺ຒນ ວຕ຺ຖຍຸຄໍ, ຄນ຺ຘມາລຎ຺ຈ ສຸນ຺ທຣໍ;

ອຈ຺ຉາເທຕ຺ວາ ວິລິມ຺ເປຕ຺ວາ, ມຓ຺ຑຍິຕ຺ວາ ສຸຣູປກໍ.

໓໘. ສີສໍ ທຸກູລປຏ຺ເຏນ, ເວຐຍິຕ຺ວາ ອຸປານຍຸໍ;

ອຕ຺ຕໂນ ປຣິຫາເຣນ, ຠຕ຺ຕໍ ຕສ຺ສ ອທາປຍິ.

໓໙. ອຕ຺ຕໂນ ທສສຫສ຺ສ-ອຄ຺ຆນສຍນໍ ສຸຠໍ;

ສຍນຕ຺ຖໍ ອທາເປສິ, ຕສ຺ສ ໂຍຘສ຺ສ ຂຕ຺ຕິໂຍ.

໔໐. ໂສ ສພ຺ພໍ ເອກໂຕ ກຕ຺ວາ, ເນຕ຺ວາ ມາຕາປິຕນ຺ຕິກໍ;

ມາຕຸຍາ ທສສຫສ຺ສໍ, ສຍນໍ ປິຕຸໂນ ອທາ.

໔໑. ຕໍເຍວ ຣຕ຺ຕິໍ ອາຄນ຺ຕ຺ວາ, ຣກ຺ຂຐາເນ ອທ຺ທສ຺ສຍິ;

ປຠາເຕ ຣາຊປຸຕ຺ໂຕ ຕໍ, ສຸຕ຺ວາ ຕຸຏ຺ຐມໂນ ອຫຸ.

໔໒. ທຕ຺ວາ ປຣິຈ຺ຉທໍ ຕສ຺ສ, ປຣິວາຣຊນໍ ຕຖາ;

ທຕ຺ວາ ທສສຫສ຺ສານີ, ເປເສສິ ປິຕຸສນ຺ຕິກໍ.

໔໓. ໂຍໂຘ ທສສຫສ຺ສານິ, ເນຕ຺ວາ ມາຕາປິຕນ຺ຕິກໍ;

ເຕສໍ ທຕ຺ວາ ກາກວຓ຺ຓ-ຕິສ຺ໂສ ຣາຊາ ມຸປາຄມິ.

໔໔. ໂສ ຄາມຓິກຸມາຣສ຺ສ, ຕມປ຺ເປສິ ມຫີປຕິ;

ສກ຺ກໂຕ ສຸຣນິມິໂລ, ໂຍໂຘ ວສິ ຕທນ຺ຕິເກ.

໔໕. ກຸຏຸມ຺ພຣິກຓ຺ຓິກາຍໍ,

ຫຸນ຺ທຣີວາປິ ຄາມເກ;

ຕິສສ຺ສ ອຏ຺ຐໂມ ປຸຕ຺ໂຕ,

ອໂຫສິ ໂສຓ ນາມໂກ.

໔໖. ສຕ຺ຕວສ຺ສິກກາເລປິ, ຕາລຄຈ຺ເຉ ອລຸຎ຺ຈິ ໂສ;

ທສ ວສ຺ສິກກາລມ຺ຫິ, ຕາເລ ລຸຎ຺ຈິມຫພ຺ພໂລ.

໔໗. ກາເລ ນ ໂສ ມຫາໂສໂຓ,

ທສ ຫຕ຺ຖິ ພໂລ ອຫຸ;

ຣາຊາ ຕໍ ຕາທິສໍ ສຸຕ຺ວາ,

ຄເຫຕ຺ວາ ປິຕຸສນ຺ຕິກາ.

໔໘. ຄາມຓິສ຺ສ ກຸມາຣສ຺ສ, ອທາສິ ໂປສນຕ຺ຖິໂກ;

ເຕນ ໂສ ລທ຺ຘສກ຺ກາໂຣ, ໂຍໂຘ ວສິ ຕທນ຺ຕິເກ.

໔໙. ຄິຣິນາເມ ຊນປເທ, ຄາເມ ນິຈ຺ເຉລວິຏ຺ຐິເກ;

ທສຫຕ຺ຖິພໂລ ອາສິ, ມຫານາຄສ຺ສ ອຕ຺ຣໂຊ.

໕໐. ລກຸຓ຺ຏກສຣີຣຕ຺ຕາ, ອຫຸ ໂຄຏ຺ຐກ ນາມໂກ;

ກໂຣນ຺ຕິ ເກຬິປຣິຫາສໍ, ຕສ຺ສ ເຊຏ຺ຐາ ຉ ຠາຕໂຣ.

໕໑. ເຕ ຄນ຺ຕ຺ວາ ມາສເຂຕ຺ຕຕ຺ຖໍ, ໂກຏ຺ຏຍິຕ຺ວາ ມຫາວນໍ;

ຕສ຺ສ ຠາຄໍ ຐເປຕ຺ວານ, ຄນ຺ຕ຺ວາ ຕສ຺ສ ນິເວທຍຸໍ.

໕໒. ໂສ ຄນ຺ຕ຺ວາ ຕໍ ຂຓໍເຍວ, ຣຸກ຺ເຂ ອິມ຺ພຣສຎ຺ຎິເຕ;

ລຸຎ຺ຈິຕ຺ວານ ສມໍ ກຕ຺ວາ, ຠູມິໍ ຄນ຺ຕ຺ວາ ນິເວທຍິ.

໕໓. ຄນ຺ຕ຺ວານ ຠາຕໂຣ ຕສ຺ສ, ທິສ຺ວາ ກມ຺ມນ຺ຕ ມພ຺ຠຸຕໍ;

ຕສ຺ສ ກມ຺ມໍ ກິຕ຺ຕຍນ຺ຕາ, ອາຄຈ຺ຉິໍສຸ ຕທນ຺ຕິກໍ.

໕໔. ຕທຸປາທາຍ ໂສ ອາສິ, ໂຄຏ຺ຐຍິມ຺ພຣນາມໂກ;

ຕເຖວ ຣາຊາ ປາເຫສິ, ຕມ຺ພິ ຄາມຓິສນ຺ຕິກໍ.

໕໕. ໂກຏິປພ຺ພຕສາມນ຺ຕາ, ກິຕ຺ຕິຄາມມ຺ຫິ ອິສ຺ສໂຣ;

ໂຣຫໂຓ ນາມ ຄຫປຕິ, ຊາຕໍ ປຸຕ຺ຕກມຕ຺ຕໂນ.

໕໖. ສມານ ນາມໍ ກາເຣສິ, ໂຄຏ຺ຐກາຫຍຣາຊິໂນ;

ທາຣໂກ ໂສ ພລີ ອາສິ, ທສທ຺ວາທສວສ຺ສິໂກ.

໕໗. ອສກ຺ກຸເຓຍ຺ຍປາສາເຓ, ອຸທ຺ຘຕ຺ຕຸໍ ຈຕຸປຎ຺ຈຫິ;

ກີຬມາໂນ ຂິປິ ຕທາ, ໂສ ກີຬາຄຸຬເກ ວິຍ.

໕໘. ຕສ຺ສ ໂສຬສວສ຺ສສ຺ສ, ປິຕາ ຄທມກາຣຍິ;

ອຏ຺ຐຕິໍສງ຺ຄຸລວຏ຺ຏໍ, ໂສຬສຫຕ຺ຖທີຆກໍ.

໕໙. ກາລານໍ ນາຬິເກຣານໍ,

ຂນ຺ເຘ ອາຫຈ຺ຈ ຕາຍ ໂສ;

ເຕ ປາຕຍິຕ຺ວາ ເຕເນວ,

ໂຍ ໂຘ ໂສ ປາກໂຏ ອຫຸ.

໖໐. ຕເຖວ ຣາຊາ ປາເຫສິ, ຕມ຺ປິ ຄາມຓິສນ຺ຕິເກ;

ອຸປຏ຺ຐາໂກ ມຫາສຸມ຺ມ-ເຖຣສ຺ສາ’ສິ ປິຕາ ປນ.

໖໑. ໂສ ມຫາສຸມ຺ມເຖຣສ຺ສ, ຘມ຺ມໍ ສຸຕ຺ວາ ກຸຏຸມ຺ພິໂກ;

ໂສຕາປຕ຺ຕິຜລໍ ປຕ຺ໂຕ, ວິຫາເຣ ໂກຬປພ຺ພເຕ.

໖໒. ໂສຕຸ ສຎ຺ຊາຕສໍເວໂຄ, ອາໂຣເຈຕ຺ວານ ຣາຊິໂນ;

ທຕ຺ວາ ກຸຏຸມ຺ພໍ ປຸຕ຺ຕສ຺ສ, ປພ຺ພຊິ ເຖຣສນ຺ຕິເກ.

໖໓. ຠາວນໍ ອນຸຍຸຎ຺ຊິຕ຺ວາ, ອຣຫຕ຺ຕມປາປຸຓິ;

ປຸຕ຺ໂຕ ເຕນ’ສ຺ສ ປຎ຺ຎາຍິ, ເຖຣປຸຕ຺ຕາຠໂຍ ອິຕິ.

໖໔. ກປ຺ປກນ຺ທຣຄາມມ຺ຫິ, ກຸມາຣສ຺ສ ສຸໂຕ ອຫຸ;

ຠຣໂຓ ນາມ ໂສ ກາເລ, ທສທ຺ວາທສວສ຺ສິເກ.

໖໕. ທາຣເກຫິ ວນໍ ຄນ຺ຕ຺ວາ’-ນຸພນ຺ຘິຕ຺ວາ ສເສ ພຫູ;

ປາເທນ ປຫຣິຕ຺ວານ, ທ຺ວິຂຓ຺ຑໍ ຠູມິຍໍ ຂິປິ.

໖໖. ຄາມິເກຫິ ວນໍ ຄນ຺ຕ຺ວາ, ໂສຬສວສ຺ສິໂກ ປນ;

ຕເຖວ ປາເຕສິ ລຫຸໍ, ມິຄ ໂຄກຓ຺ຓສູກເຣ.

໖໗. ຠຣໂຓ ໂສ ມຫາໂຍໂຘ,

ເຕເນວ ປາກໂຏ ອຫຸ;

ຕເຖວ ຣາຊາ ວາເສສິ,

ຕມ຺ປິ ຄາມຓິສນ຺ຕິເກ.

໖໘. ຄິຣິຄາເມ ຊນປເທ, ກຸຏຸມ຺ພິຍງ຺ຄຓຄາມເກ;

ກຸຏຸມ຺ປິວສໂຠ ນາມ, ອໂຫສິ ຕຕ຺ຖ ສມ຺ມໂຕ.

໖໙. ເວໂຬ ຊນປໂທ ຕສ຺ສ, ສຸມໂນ ຄິຣິໂຠຊໂກ;