ຈຕຸວີສຕິມ ປຣິຈ຺ເຉທ

ທ຺ເວຠາຕິກຍຸທ຺ຘໍ

໑. ຫຕ຺ຖສ຺ສ ຖຣຸກມ຺ມສ຺ສ, ກຸສໂລ ກຕຸປາສໂນ;

ໂສ ຄາມຓິຣາຊສຸໂຕ, ມຫາຄາເມ ວສີ ຕທາ.

໒. ຣາຊາ ຣາຊສຸຕໍ ຕິສ຺ສໍ, ທີຆວາປິມ຺ຫິ ວາສຍິ;

ອາຣກ຺ຂິຕຸໍ ຊນປທໍ, ສມ຺ປນ຺ນ ພລວາຫນໍ.

໓. ກຸມາໂຣ ຄາມຓິກາເລ, ສມ຺ປສ຺ສນ຺ໂຕ ພລໍ ສກໍ;

‘‘ຍຸຊ຺ຌິສ຺ສໍ ທມິເຬຫີ’’ຕິ, ປິຕຸຣຎ຺ໂຎ ກຖາປຍີ.

໔. ຣາຊາ ຕໍ ອນຸຣກ຺ຂນ຺ໂຕ, ‘‘ໂອຣຄງ຺ຄໍ ອລໍ’’ ອິຕິ;

ວາເຣສິ ຍາວຕຕິຍໍ, ໂສ ຕເຖວ ກຖາປຍີ.

໕. ປິຕາ ເມ ປຸຣິໂສ ໂຫນ຺ໂຕ, ເນ’ວໍ ວກ຺ຂຕິ ເຕນິ’ທໍ;

ປິລນ຺ຘຕູຕິ ເປເສສິ, ອິຕ຺ຖາລງ຺ກາຣມສ຺ສ ໂສ.

໖. ຣາຊາ’ຫ ຕສ຺ສ ກຸຊ຺ຌິຕ຺ວາ, ‘‘ກໂຣຖ ເຫມສງ຺ຂລິໍ;

ຕາຍ ຕໍ ພນ຺ຘຍິສ຺ສາມິ, ນາ’ຎ຺ຎຖາ ຣກ຺ຂິໂຍ ຫິ ໂສ.

໗. ປລາຍິຕ຺ວານ ມລຍໍ, ກຸຊ຺ຌິຕ຺ວາ ປິຕຸໂນ ອຄາ;

ທຸຏ຺ຐຕ຺ຕາເຍວ ປິຕຣິ, ອາຫຸ ຕໍ ທຸຏ຺ຐຄາມຓິ.

໘. ຣາຊາ’ຖ ອາຣຠີ ກາຕຸໍ, ມຫາມງ຺ຄລເຈຕິຍໍ;

ນິຏ຺ຐິເຕ ເຈຕິເຍ ສງ຺ຆໍ, ສນ຺ນິປາຕຍິ ຠູປຕິ.

໙. ທ຺ວາທສາ’ສຸໍ ສຫສ຺ສານິ, ຠິກ຺ຂູ ຈິຕ຺ຕລປພ຺ພຕາ;

ຕໂຕ ຕໂຕ ທ຺ວາທເສວ, ສຫສ຺ສານິ ສມາຄມຸໍ.

໑໐. ກຕ຺ວານ ເຈຕິຍມຫໍ, ຣາຊາ ສງ຺ຆສ຺ສ ສມ຺ມຸຂາ;

ສພ຺ເພ ໂຍເຘ ສມາເນຕ຺ວາ, ກາເຣສິ ສປຖໍ ຕທາ.

໑໑. ‘‘ປຸຕ຺ຕານໍ ກລຫຏ຺ຐານໍ, ນ ຄຈ຺ຉິສ຺ສາມ ໂນ’’ອິຕິ;

ອກໍສຸ ສປຖໍ ສພ຺ເພ, ຕໍ ຍຸທ຺ຘໍ ເຕນ ນາຄມຸໍ.

໑໒. ຈຕຸສຏ຺ຐິ ວິຫາເຣ ໂສ, ກາຣາເປຕ຺ວາ ມຫີປຕິ;

ຕຕ຺ຕກາເນວ ວສ຺ສານິ, ຐຕ຺ວາ ມຣິຕຫິໍ ຕທາ.

໑໓. ຣຎ຺ໂຎ ສຣີຣໍ ຄາເຫຕ຺ວາ, ຉນ຺ນຍາເນນ ຣາຊິນິ;

ເນຕ຺ວາ ຕິສ຺ສ ມຫາຣາມໍ, ຕໍ ສງ຺ຆສ຺ສ ນິເວທຍິ.

໑໔. ສຸຕ຺ວາ ຕິສ຺ສກຸມາໂຣ ຕໍ, ອາຄນ຺ຕ຺ວາ ທີຆວາປິໂຕ;

ສຣີຣກິຈ຺ຈໍ ກາເຣຕ຺ວາ, ສກ຺ກຈ຺ຈໍ ປິຕຸໂນ ສຍໍ.

໑໕. ມາຕຣໍ ກຓ຺ຑຸລໍ ຫຕ຺ຖິໍ, ອາທິຍິຕ຺ວາ ມຫພ຺ພໂລ;

ຠາຕຸຠຍາ ທີຆວາປິໍ, ອຄມາສິ ລຫຸໍ ຕໂຕ.

໑໖. ຕໍ ປວຕ຺ຕິໍ ນິເວເທຕຸໍ, ທຸຏ຺ຐຄາມຓິ ສນ຺ຕິກໍ;

ເລຂໍ ທຕ຺ວາ ວິສຊ຺ເຊສຸໍ, ສຈ຺ເຈມຈ຺ຈາ ສມາຄຕາ.

໑໗. ໂສ ຄຸຕ຺ຕຫາລມາຄນ຺ຕ຺ວາ, ຕຕ຺ຖ ຈາເຣ ວິສຊ຺ຊິຍ;

ມຫາຄາມມຸປຄນ຺ຕ຺ວາ, ສຍໍ ຣຊ຺ເຊ’ຠິເສຈຍິ.

໑໘. ມາຕຕ຺ຖໍ ກຓ຺ຑູລຕ຺ຖຎ຺ຈ, ຠາຕຸເລຂໍ ວິສຊ຺ຊຍິ;

ອລທ຺ຘາ ຍາວຕຕິຍໍ, ຍຸທ຺ຘາຍ ສມຸປາຄມິ.

໑໙. ອຫຸ ທ຺ວິນ຺ນໍ ມຫາຍຸທ຺ຘໍ, ຈູຬງ຺ຄຓິຍປິຏ຺ຐິຍໍ;

ຕຕ຺ຖ ເນກສຫສ຺ສານິ, ປຕິໍສຸ ຣາຊິໂນ ນຣາ.

໒໐. ຣາຊາ ຈ ຕິສ຺ສາມຈ຺ໂຈ ຈ, ວຬວາທີຆຸຕຸນິກາ;

ຕໂຍເຍວ ປລາຍິໍສຸ, ກຸມາໂຣ ອນຸພນ຺ຘິເຕ.

໒໑. ອຸຠິນ຺ນມນ຺ຕເຣ ຠິກ຺ຂູ, ມນ຺ຕຍິໍສຸ ມຫີຘຣໍ;

ຕໍ ທິສ຺ວາ ‘‘ຠິກ຺ຂຸສງ຺ຆສ຺ສ, ກມ຺ມໍ’’ ອິຕິ ນິວຕ຺ຕິ ໂສ.

໒໒. ກປ຺ປກນ຺ທຣນຊ຺ຊາໂສ, ຊວມາລິຕິຕ຺ຖມາຄໂຕ;

ຣາຊາ’ຫ ຕິສ຺ສມຈ຺ຈໍ ຕໍ, ‘‘ຉາຕຊ຺ຌຕ຺ຕາ ມຍໍ’’ອິຕິ.

໒໓. ສຸວຓ຺ຓສຣເກ ຂິຕ຺ຕ-ຠຕ຺ຕໍ ນີຫຣິຕສ຺ສ ໂສ;

ສງ຺ເຆ ທຕ຺ວາ ຠຸຎ຺ຊນໂຕ, ກາເຣຕ຺ວາ ຈຕຸຠາຄກໍ.

໒໔. ‘‘ໂຆເສຫິ ກາລ’’ມິຈ຺ຈາ’ຫ,

ຕິສ຺ໂສ ກາລມໂຆສຍິ;

ສຸຓິຕ຺ວາ ທິພ຺ພໂສເຕນ,

ຣຎ຺ໂຎ ສກ຺ຂາຍ ທາຍໂກ.

໒໕. ເຖໂຣ ປິຍງ຺ຄຸ ທີປຏ຺ໂຐ, ເຖຣໍ ຕຕ຺ຖ ນິໂຍຊຍິ;

ຕິສ຺ສໍ ກຸຏຸມ຺ພິກສຸຕໍ, ໂສ ຕຕ຺ຖ ນຠສາ’ຄມາ.

໒໖. ຕສ຺ສ ຕິສ຺ໂສ ກຣາປຕ຺ຕ-ອາທາຍາ’ທາສິ ຣາຊິໂນ;

ສງ຺ຆສ຺ສ ຠາຄໍ ສມ຺ຠາຄໍ, ຣາຊາ ປຕ຺ເຕ ຂິປາປຍິ.

໒໗. ສມ຺ຠາຄໍ ຂິປິ ຕິສ຺ໂສ ຈ, ສມ຺ຠາຄໍ ວຬວາປິ ຈ;

ນ ອິຈ຺ຉິຕສ຺ສາຠາຄຎ຺ຈ, ຕິສ຺ໂສ ປຕ຺ຕມ຺ຫິ ປກ຺ຂິປິ.

໒໘. ຠຕ຺ຕສ຺ສ ປຸຓ຺ຓປຕ຺ຕໍ ຕໍ, ອທາເຖຣສ຺ສ ຠູປຕິ;

ອທາ ໂຄຕມເຖຣສ຺ສ, ໂສ ຄນ຺ຕ຺ວາ ນຠສາ ລຫຸໍ.

໒໙. ຠິກ຺ຂູນໍ ຠຸຎ຺ຊມານານໍ, ທຕ຺ວາ ອາໂລປຠາຄໂສ;

ປຎ຺ຈສຕານໍ ໂສ ເຖໂຣ, ລທ຺ເຘຫິ ຕຸ ຕທນ຺ຕິກາ.

໓໐. ຠາເຄຫິ ປຕ຺ຕໍ ປູເຣຕ຺ວາ, ອາກາເສ ຂິປິ ຣາຊິໂນ;

ທິສ຺ວາ’ ຄຕໍ ຄເຫຕ຺ວາ ຕໍ, ຕິສ຺ໂສ ໂຠຊິສິ ຠູປຕິໍ.

໓໑. ຠຸຎ຺ຊິຕ຺ວານ ສຍຎ຺ຊາປິ, ວຬວຎ຺ຈ ອໂຠຊຍິ;

ສຕ຺ຕາຫໍ ຈຸມ຺ພຏໍ ກຕ຺ວາ, ຣາຊາ ປຕ຺ຕໍ ວິສຊ຺ຊຍິ.

໓໒. ຄນ຺ຕ຺ວານ ໂສ ມຫາຄາມໍ, ສມາທາຍ ພລໍ ປຸນ;

ສຏ຺ຐິສຫສ຺ສໍ ຍຸທ຺ຘາຍ, ຄນ຺ຕ຺ວາ ຍຸຊ຺ຌິ ສຠາຕຣາ.

໓໓. ຣາຊາ ວຬວມາຣຸຍ຺ຫ, ຕິສ຺ໂສ ກຓ຺ຑູລ ຫຕ຺ຖິນໍ;

ທ຺ເວ ຠາຕໂຣ ສມາຄຎ຺ຉຸໍ, ຍຸຊ຺ຌມານາ ຣເຓ ຕທາ.

໓໔. ຣາຊາ ກຣິໍ ກຣິຕ຺ວ’ນ຺ໂຕ, ວຬວາມຓ຺ຑລໍ ອກາ;

ຕຖາປິ ຉິທ຺ທໍ ໂນ ທິສ຺ວາ, ລງ຺ຆາ ເປຕຸໍ ມຕິໍອກາ.

໓໕. ວຬວໍ ລງ຺ຆຍິຕ຺ວານ, ຫຕ຺ຖິນໍ ຠາຕິໂກ’ປຣິ;

ໂຕມຣໍ ຂິປິ ຈມ຺ມໍວ, ຍຖາ ຉິຊ຺ຊຕິ ປິຏ຺ຐິຍໍ.

໓໖. ອເນການິ ສຫສ຺ສານິ, ກຸມາຣສ຺ສ ນຣາຕຫິໍ;

ປຕິໍສຸ ຍຸທ຺ເຘ ຍຸຊ຺ຌນ຺ຕາ, ຠິຊ຺ຊ ເຈວ ມຫພ຺ພລໍ.

໓໗. ‘‘ອາໂຣຫກສ຺ສ ເວກລ຺ລາ, ອິຕ຺ຖີ ມໍ ລງ຺ຆຍີ’’ອິຕິ;

ກຸທ຺ໂຘກຣີ ຕໍ ຈາເລນ຺ໂຕ, ຣຸກ຺ຂເມກ ມຸປາຄມິ.

໓໘. ກຸມາໂຣ ອາຣຸຫີ ຣຸກ຺ຂໍ, ຫຕ຺ຖີ ສາມິມຸປາຄມິ;

ຕມາຣຸຍ຺ຫ ປລາຍນ຺ຕໍ, ກຸມາໂຣ ມນຸພນ຺ຘິ ໂສ.

໓໙. ປວິສິຕ຺ວາ ວິຫາຣໍ ໂສ, ມຫາເຖຣ ຆຣໍຄໂຕ;

ນິປຊ຺ຊເຫຏ຺ຐາ ມຎ຺ຈສ຺ສ, ກຸມາໂຣ ຠາຕຸໂນຠຍາ.

໔໐. ປສາຣຍິ ມຫາເຖໂຣ, ຈີວຣໍ ຕຕ຺ຖ ມຎ຺ຈເກ;

ຣາຊາ ອນຸປທໍ ຄນ຺ຕ຺ວາ, ‘‘ກຸຫິໍ ຕິສ຺ໂສ’’ຕິ ປຸຈ຺ຉຖ.

໔໑. ‘‘ມຎ຺ເຈ ຕຕ຺ຖ ມຫາຣາຊ’’, ອິຕິ ເຖໂຣ ອໂວຈ ຕໍ;

ເຫຏ຺ຐາ ມຎ຺ເຈຕິ ຊານິຕ຺ວາ, ຕໂຕ ນິກ຺ຂມ຺ມ ຠູປຕິ.

໔໒. ສມນ຺ຕໂຕ ວິຫາຣສ຺ສ, ຣກ຺ຂໍ ກາຣຍິ ຕໍ ປນ;

ປຎ຺ຈກມ຺ຫິ ນິປຊ຺ເຊຕ຺ວາ, ທຕ຺ວາ ອຸປຣິ ຈີວຣໍ.

໔໓. ມຎ຺ຈປາເທສຸ ຄຓ຺ຫິຕ຺ວາ, ຈຕ຺ຕາໂຣ ທຫຣາ ຍຕີ;

ມຕຠິກ຺ຂຸນິຍາເມນ, ກຸມາຣໍ ພຫິ ນີຫຣຸໍ.

໔໔. ນີຍມານນ຺ຕຸ ຕໍ ຎຕ຺ວາ, ອິຘ ມາຫ ມຫີປຕິ;

‘‘ຕິສ຺ສ ຕ຺ວໍ ກຸລເທວຕານໍ, ສີເສ ຫຸຕ຺ວານ ນິຍ຺ຍາສິ.

໔໕. ພລກ຺ກາເຣນ ຄຫຓໍ, ກຸລເທເວຫິ ນຕ຺ຖິ ເມ;

ຄຸຓໍ ຕ຺ວໍ ກຸລເທວານໍ, ສເຣຍ຺ຍາສິ ກທາຈິປິ’’.

໔໖. ຕໂຕເຍວ ມຫາຄາມໍ, ອຄມາສິ ມຫີປຕິ;

ອາຓາເປສິ ຈ ຕຕ຺ເຖວ, ມາຕຣໍ ມາຕຸຄາຣໂວ.

໔໗. [ວສ຺ສານິ ອຏ຺ຐສຏ຺ຐິໍໂສ, ອຏ຺ຐາ ຘມ຺ມຏ຺ຐມານໂສ;

ອຏ຺ຐສຏ຺ຐິວິຫາເຣ ຈ, ກາຣາເປສິ ມຫີປຕິ.]

໔໘. ນິກ຺ຂາມິໂຕ ໂສ ຠິກ຺ຂູຫິ, ຕິສ຺ໂສຣາຊ ສຸໂຕ ປນ;

ທີຆວາປິໍ ຕໂຕເຍວ, ອຄມ’ຎ຺ຎຕໂຣ ວິຍ.

໔໙. ກຸມາໂຣ ໂຄຘຄຕ຺ຕສ຺ສ, ຕິສ຺ສເຖຣສ຺ສ ອາຫ ໂສ;

‘‘ສາປຣາໂຘ ອຫໍ ຠນ຺ເຕ, ຂມາເປສ຺ສາມິ ຠາຕຣໍ.

໕໐. ເວຍ຺ຍາວຈ຺ຈກຣາ ກາຣໍ, ຕິສ຺ສໍ ປຎ຺ຈສຕານິ ຈ;

ຠິກ຺ຂຸນມາທິຍິຕ຺ວາ ໂສ, ເຖໂຣ ຣາຊ ມຸປາຄມິ.

໕໑. ຣາຊປຸຕ຺ຕໍ ຐເປຕ຺ວານ, ເຖໂຣ ໂສປານ ມຕ຺ຖເກ;

ສສງ຺ໂຆ ປາວິສິ ສທ຺ໂຘ, ນິສີທາວິຍ ຠູມິໂປ.

໕໒. ອຸປານຍີ ຍາຄຸອາທິໍ, ເຖໂຣ ປຕ຺ຕໍ ວິເຘສິໂສ;

‘‘ກິນ຺ຕິ ວຸຕ຺ໂຕ’ພ຺ຣວິ ຕິສ຺ສໍ, ອາທາຍ ອຄຕາ’’ອິຕິ.

໕໓. ‘‘ກຸຫິໍ ໂຈໂຣ’’ຕິ ວຸຕ຺ໂຕ ຈ, ຐິຕຐານໍ ນິເວທຍິ;

ວິຫາຣເທວີ ຄນ຺ຕ຺ວານ, ຉາທິຍຐາສິ ປຸຕ຺ຕກ.

໕໔. ຣາຊາ’ຫ ເຖຣໍ ‘‘ຎາໂຕ ໂວ,

ທາສຠາໂວ ອິທານິ ໂນ;

ສາມເຓຣໍ ເປສເຍຖ,

ຕຸມ຺ເຫ ເມ ສຕ຺ຕວສ຺ສິກໍ.

໕໕. ຊນກ຺ຂຍໍ ວິນາເຍວ, ກລໂຫ ນ ຠເວຍ຺ຍ ໂນ;

ຣາຊາ ສງ຺ຆສ຺ສ ໂທເສໂສ, ຠໍເຆ ທຓ຺ຑໍ ກຣິສ຺ສຕິ.

໕໖. ເຫສ຺ສຕາ’ຄຕກິຈ຺ຈາ ໂວ,

ຍາຄາທິໍ ຄຓ຺ຫາຖາຕິ ໂສ;

ທຕ຺ວາ ຕໍ ຠິກ຺ຂຸສງ຺ຆສ຺ສ,

ປກ຺ໂກສິຕ຺ວານ ຠາຕຣໍ.

໕໗. ຕຕ຺ເຖວ ສງ຺ຆມຊ຺ຌມ຺ຫິ, ນິສິນ຺ໂນ ຠາຕຣາ ສຫ;

ຠຸຎ຺ຊິຕ຺ວາ ເອກໂຕເຍວ, ຠິກ຺ຂຸ ສງ຺ຆໍ ວິສຊ຺ຊຍິ.

໕໘. ສສ຺ສກມ຺ມານິ ກາເຣຕຸໍ, ຕິສ຺ສໍ ຕຕ຺ເຖວ ປາຫິຓິ;

ສຍມ຺ປິ ເຠຣິໍ ຈາເຣຕ຺ວາ, ສສ຺ສກມ຺ມານິ ກາຣຍິ.

໕໙. ອິຕິ ເວຣມເນກວິກປ຺ປຈິຕໍ,

ສມຍນ຺ຕິ ພຫຸໍ ອປິ ສປ຺ປຸຣິສໍ;

ອິຕິ ຈິນ຺ຕິຍ ໂກຫິ ນໂຣ ມຕິມາ,

ນ ຠເວຍ຺ຍ ປເຣສຸ ສຸສນ຺ຕ ມໂນຕິ.

ສຸຊນປ຺ປສາທສໍເວຄຕ຺ຖາຍ ກເຕ ມຫາວໍເສ

ທ຺ເວຠາຕິກຍຸທ຺ຘໍ ນາມ

ຈຕຸວີສຕິໂມ ປຣິຈ຺ເຉໂທ.