ພາວີສຕິມ ປຣິຈ຺ເຉທ

ຄາມຓິກຸມາຣ ສຸຕິ

໑. ເອຬາຣໍ ຆາຕຍິຕ຺ວານ, ຣາຊາ’ຫຸ ທຸຏ຺ຐຄາມຓິ;

ຕທຕ຺ຖ ທີປນຕ຺ຖາຍ, ອນຸປຸພ຺ພກຖາ ອຍໍ.

໒. ເທວານໍ ປິຍຕິສ຺ສສ຺ສ, ຣຎ຺ໂຎ ທຸຕິຍຠາຕິໂກ;

ອຸປຣາຊາ ມຫານາໂຄ, ນາມານຸ ຠາຕຸໂນ ປິໂຍ.

໓. ຣຎ຺ໂຎ ເທວີ ສປຸຕ຺ຕສ຺ສ, ພາລາ ຣຊ຺ຊາຠິກາມິນິ;

ອຸປຣາຊວຘຕ຺ຖາຍ, ຊາຕຈິຕ຺ຕາ ນິຣນ຺ຕຣໍ.

໔. ວາປິໍ ຕຣຈ຺ຉນາມໍ ສາ, ກາຣາເປນ຺ຕສ຺ສ ປາຫິຓິ;

ອມ຺ພໍ ວິເສນ ໂຍເຊຕ຺ວາ, ຐເປຕ຺ວາ ອມ຺ພມຕ຺ຖເກ.

໕. ຕສ຺ສາ ປຸຕ຺ໂຕ ສຫຄໂຕ, ອຸປຣາເຊນ ພາລໂກ;

ຠາຊເນ ວິວເຏເຍວ, ຕໍ ອມ຺ພໍ ຂາທິຍາ’ມຣິ.

໖. ອຸປຣາຊາ ຕໂຕເຍວ, ສທາຣ ພລ ວາຫໂນ;

ຣກ຺ຂິຫຸໍ ສກມຕ຺ຕານໍ, ໂຣຫຓາ’ຠິມຸໂຂ ອຄາ.

໗. ຍຏ຺ຐາລຍ ວິຫາຣສ຺ມິໍ, ມເຫສີ ຕສ຺ສ ຄພ຺ຠິນີ;

ປຸຕ຺ຕໍ ຊເນສິ ໂສ ຕສ຺ສ, ຠາຕຸ ນາມ ມກາຣຍິ.

໘. ຕໂຕ ຄນ຺ຕ຺ວາ ໂຣຫຓໍ ໂສ,

ອິສ຺ສໂຣ ໂຣຫເຓ’ຂິໂລ;

ມຫາ ຠາໂຄ ມຫາ ຄາເມ,

ຣຊ຺ຊໍ ກາເຣສິ ຂຕ຺ຕິໂຍ.

໙. ກາເຣສິ ໂສ ນາຄມຫາ-ວິຫາຣໍ ສກນາມກໍ;

ອຸທ຺ຘກນ຺ທຣກາທີ ຈ, ປິຫາເຣ ກາຣຍີ ພຫູ.

໑໐. ຍຏ຺ຐາລຍ ກຕິສ຺ໂສ ໂສ, ຕສ຺ສ ປຸຕ຺ໂຕ ຕທຈ຺ຈເຍ;

ຫຕ຺ເຖວ ຣຊ຺ຊໍ ກາເຣສິ, ຕສ຺ສ ປຸຕ຺ໂຕ’ຠໂຍ ຕຖາ.

໑໑. ໂຄຏ຺ຐາຠຍສຸໂຕ ກາກ-ວຓ຺ຓຕິສ຺ໂສຕິ ວິສ຺ສຸໂຫ;

ຕທຈ຺ຈເຍ ຕຕ຺ຖ ຣຊ຺ຊໍ, ໂສ ອກາເຣສິ ຂຕ຺ຕິໂຍ.

໑໒. ວິຫາຣເທວິ ນາມາ’ສິ, ມເຫສີ ຕສ຺ສ ຣາຊິໂນ;

ສທ຺ຘສ຺ສ ສທ຺ຘາສມ຺ປນ຺ນາ, ຘີຕາ ກລ຺ຍາຓິ ຣາຊິໂນ.

໑໓. ກລ຺ຍາຓິຍໍ ນຣິນ຺ໂທ ຫິ, ຕິສ຺ໂສ ນາມາສິ ຂຕ຺ຕິໂຍ;

ເທວິສຎ຺ໂຎຄຊນິຕ-ໂກ ໂປຕສ຺ສ ກນິຏ຺ຐໂກ.

໑໔. ຠີໂຕ ຕໂຕ ປລາຍິຕ຺ວາ, ອຍ຺ຍອຸຕ຺ຕິຍ ນາມໂກ;

ອຎ຺ຎຕ຺ຖ ວສິ ໂສ ເທໂສ, ເຕນ ຕໍ ນາມໂກ ອຫຸ.

໑໕. ທຕ຺ວາ ຣຫສ຺ສເລຂໍ ໂສ, ຠິກ຺ຂຸເວສຘຣໍ ນຣໍ;

ປາເຫສິ ເທວິຍາ ຄນ຺ຕ຺ວາ, ຣາຊທ຺ວາເຣ ຐິໂຕ ຕຸໂສ.

໑໖. ຣາຊ ເຄເຫ ອຣຫຕາ, ຠຸຎ຺ຊມາເນນ ສພ຺ພທາ;

ອຎ຺ຎາຍມາໂນ ເຖເຣນ, ຣຎ຺ໂຎ ຆຣມຸປາຄມິ.

໑໗. ເຖເຣນ ສທ຺ຘິໍ ຠຸຎ຺ຊິຕ຺ວາ, ຣຎ຺ໂຎ ສຫ ວິນິຄ຺ຄເມ;

ປາເຕສິ ຠູມິຍໍ ເລຂໍ, ເປກ຺ຂມານາຍ ເທວິຍາ.

໑໘. ສທ຺ເທນ ເຕນ ຣາຊານໍ, ນິວຕ຺ຕິຕ຺ວາ ວິໂລກຍໍ;

ຎຕ຺ວານ ເລຂສນ຺ເທສໍ, ກຸທ຺ໂຘ ເຖຣສ຺ສ ທຸມ຺ມຕິ.

໑໙. ເຖຣໍ ຕໍ ປຸຣິສໍ ຕຎ຺ຈ, ມາຣາເປຕ຺ວານ ໂກຘສາ;

ສມຸທ຺ທສ຺ມິໍ ຂິປາເປສິ, ກຸຊ຺ຌິຕ຺ວາ ເຕນ ເທວຕາ.

໒໐. ສມຸທ຺ເທໂນ’ຕ຺ຖຣາ ເປສຸໍ, ຕໍ ເທສໍ ໂສຕຸຠູປຕິ;

ອຕ຺ຕໂນ ຘີຕຣໍ ຍຸທ຺ຘໍ, ເທວິໍ ນາມ ສຸຣຸປິນິໍ.

໒໑. ລິຂິຕ຺ວາ ຣາຊຘີຕາຕິ, ໂສວຓ຺ຓກ຺ຂລິຍາ ລຫຸໍ;

ນິສີທາປິຍ ຕຕ຺ເຖວ, ສມຸທ຺ທສ຺ມິໍ ວິສ຺ສຊ຺ຊຍິ.

໒໒. ໂອກ຺ກນ຺ຕໍ ຕໍ ຕໂຕ ລໍເກ-ກາກວຓ຺ໂຓ ມຫີປຕິ;

ອຠິເສຈຍິ ເຕນາ’ສິ, ວິຫາໂຣປປທວ຺ຫຍາ.

໒໓. ຕິສ຺ສ ມຫາວິຫາຣຎ຺ຈ, ຕຖາ ຈິຕ຺ຕລປພ຺ພຕໍ;

ຄມິຕ຺ຖວາລິໍ ກຸຏາລິໍ, ວິຫາເຣ ເອວມາທິເກ.

໒໔. ກາເຣຕ຺ວາ ສຸປສນ຺ເນນ, ມນສາຣຕນຕ຺ຕເຍ;

ອຸປຏ຺ຐຫິ ຕທາ ສງ຺ຆໍ, ປຈ຺ຈເຍຫິ ຈຕູຫິ ໂສ.

໒໕. ໂກຏິປພ຺ພຕ ນາມມ຺ຫິ, ວິຫາເຣ ສີລວຕ຺ຕິມາ;

ຕທາ ອຫຸ ສາມເຓໂຣ, ນານາປຸຎ຺ຎກໂຣ ສທາ.

໒໖. ສຸເຂນາໂຣຫຓຕ຺ຖາຍ, ອກາສ ເຈຕິຍງ຺ຄເຓ;

ຐເປສິ ຕີຓິ ປາສາເຓ, ປາສາຓ ຜລການິ ໂສ.

໒໗. ອທາ ປານີຍ ທານຎ຺ຈ, ວຕ຺ຕໍ ສງ຺ຆສ຺ສ ຈາ’ກຣິ;

ສທາ ກິລນ຺ຕກາຍສ຺ສ, ຕສ຺ສາ’ໂພໂຘ ມຫາ ອຫຸ.

໒໘. ສິວິກາຍ ກມາເນຕ຺ວາ, ຠິກ຺ຂໂວ ກຕເວທິໂນ;

ສິລາປສ຺ສຍ ປຣິເວເຓ, ຕິສ຺ສາຣາເມ ອຸປຏ຺ຐຫຸໍ.

໒໙. ສທາ ວິຫາຣເທວີສາ, ຣາຊເຄເຫ ສຸສງ຺ຂເຕ;

ປຸເຣຠຕ຺ຕໍ ມຫາທານໍ, ທຕ຺ວາ ສງ຺ຆສ຺ສ ສຎ຺ຎຕາ.

໓໐. ປຈ຺ຉາຠຕ຺ຕໍ ຄນ຺ຘມາລໍ, ເຠສຊ຺ຊວສນານິ ຈ;

ຄາຫຍິຕ຺ວາ ຄຕາ’ຣາມໍ, ສກ຺ກໂຣຕິ ຍຖາຣຫໍ.

໓໑. ຕທາ ຕເຖວ ກຕ຺ວາ ສາ, ສງ຺ຆຕ຺ເຖຣສ຺ສ ສນ຺ຕິເກ;

ນິສີທິ ຘມ຺ມໍ ເທເສນ຺ໂຕ, ເຖໂຣ ຕໍ ອິຘ ມພ຺ຣວິ.

໓໒. ‘‘ມຫາສມ຺ປຕ຺ຕິ ຕຸມ຺ເຫຫິ, ລທ຺ຘາ’ຍໍ ປຸຎ຺ຎກມ຺ມຸນາ;

ອປ຺ປມາໂທ’ວ ກາຕພ຺ໂພ, ປຸຎ຺ຎກມ຺ເມ ອິທານິປິ’’.

໓໓. ເອວໍ ວຸຕ຺ເຕ ຕຸ ສາ ອາຫ, ‘‘ກິໍ ສມ຺ປຕ຺ຕິ ອຍໍ ອິຘ;

ເຍສໍ ໂນ ທາຣກາ ນຕ຺ຖິ, ວຎ຺ຌາສມ຺ປຕ຺ຕິ ເຕນ ໂນ’’.

໓໔. ຉຬຠິຎ຺ໂຎ ມຫາເຖໂຣ, ປຸຕ຺ຕລາຠມເວກ຺ຂິຍ;

‘‘ຄິລານໍ ສາມເຓຣໍ ຕໍ, ປສ຺ສເທວີ’’ຕິ ອພ຺ຣວິ.

໓໕. ສາ ຄນ຺ຕ຺ວາ’ສນ຺ນ ມຣຓໍ, ສາມເຓຣມໂວຈ ຕໍ;

‘‘ປຕ຺ເຖຫິ ມມ ປຸຕ຺ຕຕ຺ຕໍ, ສມ຺ປຕ຺ຕີ ມຫຕີ ຫິ ໂນ’’.

໓໖. ນ ອິຈ຺ຉຕີຕິ ຎຕ຺ວານ, ຕທຕ຺ຖໍ ມຫຕິໍ ສຸຠໍ;

ປຸປ຺ຜປູຊໍ ກາຣຍິຕ຺ວາ, ປຸນ ຍາຈິ ສຸເມຘສາ.

໓໗. ເອວມ຺ປ’ນິຈ຺ຉມານສ຺ສ, ອຕ຺ຖາຍຸ’ປາຍໂກວິທາ;

ນານາ ເຠສຊ຺ຊ ວຕ຺ຖານິ, ສງ຺ເຆ ທຕ຺ວາ’ຖ ຍາຈິຕໍ.

໓໘. ປຕ຺ເຖສິ ໂສ ຣາຊກຸລໍ, ສາ ຕໍ ຐານໍ ອເນກຘາ;

ອລງ຺ກຣິຕ຺ວາ ວນ຺ທິຕ຺ວາ, ຍານມາຣຸຍ຺ຫ ປກ຺ກມິ.

໓໙. ຕໂຕ ຈຸໂຕ ສາມເຓໂຣ, ຄຈ຺ຉມານາຍ ເທວິຍາ;

ຕສ຺ສາ ກຸຈ຺ຉິມ຺ຫິ ນິພ຺ພຕ຺ຕິ, ຕໍ ຊານິຍ ນິວຕ຺ຕິສາ.

໔໐. ຣຎ຺ໂຎ ຕໍ ສາສນໍ ທຕ຺ວາ, ຣຎ຺ຎາ ສຫ ປຸນາ’ຄມາ;

ສຣີຣກິຈ຺ຈໍ ກາເຣຕ຺ວາ, ສາມເຓຣສ຺ສຸ’ໂຠປິເຕ.

໔໑. ຕສ຺ມິໍເຍວ ປຣິເວເຓ, ວສນ຺ຕາ ສນ຺ຕມານສາ;

ມຫາທານໍ ປວຕ຺ເຕສຸໍ, ຠິກ຺ຂຸສງ຺ຆສ຺ສ ສພ຺ພທາ.

໔໒. ຕສ຺ເສ’ວໍ ໂທຫໂຬ ອາຫິ, ມຫາ ປຸຎ຺ຎາຍ ມາຕຸຍາ;

‘‘ອຸສຠມຕ຺ຕໍ ມຘຸຄຓ຺ຑໍ, ກຕ຺ວາ ອຸສ຺ສີສເກ ສຍໍ.

໔໓. ວາເມຕເຣນ ປສ຺ເສນ, ນິປນ຺ນາສຍເນ ສຸເຠ;

ທ຺ວາທສນ຺ນໍ ສຫສ຺ສານໍ, ຠິກ຺ຂູນໍ ທິນ຺ນເສສກໍ.

໔໔. ມຘຸໍ ຠຸຎ຺ຊິຕຸກາມາ’ສິ, ອຖ ເອຬາຣ ຣາຊິໂນ;

ໂຍຘານ ມຄ຺ຄໂຍຘສ຺ສ, ສີສຈ຺ຉິນ຺ນາສິເທວນໍ.

໔໕. ຕສ຺ເສວ ສີເສ ຐຕ຺ວານ, ປາຕຸຎ຺ເຈວ ອກາມຍິ;

ອນຸຣາຘ ປຸຣສ຺ເສວ, ອຸປ຺ປລກ຺ເຂຕ຺ຕໂຕ ປນ.

໔໖. ອານີຕຸປ຺ປລມາລຎ຺ຈ, ອມິລາ ຕໍ ປິລນ຺ຘິຕຸໍ;

ຕໍ ເທວີ ຣາຊິໂນ ອາຫ, ເນມິຕ຺ເຕ ປຸຈ຺ຉິ ຠູປຕິ.

໔໗. ຕໍ ສຸຕ຺ວາ ອາຫຸ ເນມິຕ຺ຕາ, ‘‘ເທວິປຸຕ຺ໂຕ ນິຆາຕິຍ;

ທມິເຬ ກຕ຺ເວ’ກຣຊ຺ຊໍ, ສາສນໍ ໂຊຕຍິສ຺ສຕິ’’.

໔໘. ເອທິສໍ ມຘຸຄຓ຺ຑໍ ໂສ, ທສ຺ເສຕິ ຕສ຺ສ ອີທິສິໍ;

ສມ຺ປຕ຺ຕິໍ ເທຕິ ຣາຊາ’’ຕິ, ໂຆສາເປສິ ມຫີປຕິ.

໔໙. ໂຄຏ຺ຐສມຸທ຺ທເວລນ຺ເຕ, ມຘຸປຸຓ຺ຓໍ ນິກຸຊ຺ຊິຕໍ;

ນາວໍ ຎຕ຺ວານ ອາຈິກ຺ຂິ, ຣຎ຺ໂຎ ຊນປເທ ນໂຣ.

໕໐. ຣາຊາ ເທວິໍ ຕຫິໍ ເນຕ຺ວາ, ມຓ຺ຑປມ຺ຫິ ສຸສງ຺ຂເຕ;

ຍຖິຈ຺ຉິຖໍ ຕາຍ ມຘຸໍ, ປຣິໂຠຄມກາຣຍິ.

໕໑. ອິຕເຣ ໂທຫເຬ ຕສ຺ສາ, ສມ຺ປາເທຕຸໍ ມຫີປຕິ;

ເວຬຸສຸມນ ນາມໍ ຕໍ, ໂຍຘໍ ຕຕ຺ຖ ນິໂຍຊຍິ.

໕໒. ໂສ’ນຸຣາຘປຸຣໍ ຄນ຺ຕ຺ວາ, ຣຎ຺ໂຎ ມງ຺ຄລວາຊິໂນ;

ໂຄປເກນ ອກາ ເມຕ຺ຕິໍ, ຕສ຺ສ ກິຈ຺ຈຎ຺ຈ ສພ຺ພທາ.

໕໓. ຕສ຺ສ ວິສ຺ສຕ຺ຖ ຕໍ ຎຕ຺ວາ, ປາໂຕວ ອຸປ຺ປລານ’ສິໍ;

ກທມ຺ພນທິຍາ ຕີເຣ, ຐເປຕ຺ວານ ອສງ຺ກິໂຕ.

໕໔. ອສ຺ສໍ ເນຕ຺ວາ ຕມາຣຸຍ຺ຫ, ຄຓ຺ຫິຕ຺ວານ ອຸປ຺ປລານ’ສິໍ;

ນິເວທຍິຕ຺ວານ ອຕ຺ຕານໍ, ອສ຺ສເວເຄນ ປກ຺ກມິ.

໕໕. ສຸຕ຺ວາ ຣາຊາ ຄເຫຕຸໍ ຕໍ, ມຫາ ໂຍຘານເປສຍິ;

ທຸຕິຍໍ ສມ຺ມຖໍ ອສ຺ສໍ, ອາຣຸຍ຺ຫ ໂສນຸຘາປິຕໍ.

໕໖. ໂສ ຄຸມ຺ພນິສ຺ສິໂຕ ອສ຺ສ-ປິຏ຺ເຐເຍວ ນິສີທິຍ;

ເອນ຺ຕສ຺ສ ປິຏ຺ຐິໂຕ ຕສ຺ສ, ອຸພ຺ພຍ຺ຫາ’ສິໍ ປສາຣຍິ.

໕໗. ອສ຺ສເວເຄນຍນ຺ຕສ຺ສ, ສີສໍ ຉິຊ຺ຊ ອຸໂຠຫເຍ;

ສີສຎ຺ຈາ’ທາຍ ສາຍໍ ໂສ, ມຫາຄາມມຸປາຄມິ.

໕໘. ໂທຫເຬ ເຕ ຈ ສາ ເທວີ, ປຣິຠຸຎ຺ຊິ ຍຖາຣຸຈິ;

ຣາຊາ ໂຍຘສ຺ສ ສກ຺ກາຣໍ, ກາຣາເປສິ ຍຖາຣຫໍ.

໕໙. ສາ ເທວີ ສມເຍ ຘຎ຺ຎໍ, ຊນຍີ ປຸຕ຺ຕມຸຕ຺ຕມໍ;

ມຫາຣາຊກຸເລ ຕສ຺ມິໍ, ອານນ຺ໂທ ຈ ມຫາ ອຫຸ.

໖໐. ຕສ຺ສ ປຸຎ຺ຎານຸຠາເວນ, ຕທເຫວ ອຸປາຄມຸໍ;

ນານາຣຕນສມ຺ປຸຓ຺ຓາ, ສຕ຺ຕນາວາ ຕໂຕ ຕໂຕ.

໖໑. ຕສ຺ເສວ ປຸຎ຺ຎເຕເຊນ, ຉທ຺ທນ຺ຕກຸລໂຕ ກຣີ;

ຫຕ຺ຖິຈ຺ຉາປໍ ອາຫຣິຕ຺ວາ, ຐເປຕ຺ວາ ອິຘ ປກ຺ກມິ.

໖໒. ຕໍ ຕິຕ຺ຖສຣຕີຣມ຺ຫິ, ທິສ຺ວາ ຄຸມ຺ພນ຺ຕເຣ ຐິຕໍ;

ກຓ຺ຑຸລວ຺ໂຫ ພາລິສິໂກ, ຣຎ຺ໂຎ ອາຈິກ຺ຂິ ຕາວເທ.

໖໓. ເປເສຕ຺ວາ’ຈຣິເຍ ຣາຊາ, ຕມາຓາປິຍ ໂປສຍິ;

ກຓ຺ຑຸໂລ ອິຕິ ຎາຍິຕ຺ຖ, ທິຏ຺ຐຕ຺ຕາ ກຓ຺ຑຸເລນ ໂສ.

໖໔. ‘‘ສຸວຓ຺ຓຠາຊນາທີນໍ, ປຸຓ຺ຓາ ນາວາ ອິຘາຄຕາ’’;

ອິຕິ ຣຎ຺ໂຎ ນິເວທສຸໍ, ຣາຊາ ຕານາ’ຫຣາປຍິ.

໖໕. ປຸຕ຺ຕສ຺ສ ນາມກຣເຓ, ມງ຺ຄລມ຺ຫິ ມຫີປຕິ;

ທ຺ວາທສ ສຫສ຺ສສງ຺ຂໍ, ຠິກ຺ຂຸສງ຺ຆໍ ນິມນ຺ຕິຍ.

໖໖. ເອວໍ ຈິນ຺ເຕສິ ‘‘ຍທິເມ, ປຸຕ຺ໂຕ ລໍກາຕເລ’ຂິເລ;

ຣຊ຺ຊໍ ຄເຫຕ຺ວາ ສມ຺ພຸທ຺ຘ-ສາສນໍ ໂຊຕຍິສ຺ສຕິ.

໖໗. ອຏ຺ຐຸຕ຺ຕຣສຫສ຺ສຎ຺ຈ, ຠິກ຺ຂໂວ ປວິສນ຺ຕຸ ຈ;

ສພ຺ເພ ເຕ ອຸທ຺ຘປຕ຺ຕຎ຺ຈ, ຈີວຣໍ ປາຣປນ຺ຕຸ ຈ.

໖໘. ປຐມໍ ທກ຺ຂິຓໍ ປາທໍ, ອຸມ຺ມາຣນ຺ໂຕ ຐເປນ຺ຕຸ ຈ;

ເອກຈ຺ຉຕ຺ຕຍຸຕໍ ຘມ຺ມ-ກຣຓໍ ນີຫຣນ຺ຕຸ ຈ.

໖໙. ໂຄຕໂມ ນາມ ເຖໂຣ ຈ, ປຕິຄ຺ຄຓ຺ຫາຕຸ ປຸຕ຺ຕກໍ;

ໂສ ຈ ສຣຓສິກ຺ຂາ ໂຍ, ເທຕຸ’’ ສພ຺ພໍ ຕຖາ ອຫຸ.

໗໐. ສພ຺ພໍ ນິມິຕ຺ຕໍ ທິສ຺ວານ, ຕຸຏ຺ຐຈິຕ຺ໂຕ ມຫີປຕິ;

ທຕ຺ວາ ສງ຺ຆສ຺ສ ປາຍາສໍ, ນາມໍ ປຸຕ຺ຕສ຺ສ ກາຣຍິ.

໗໑. ມຫາຄາເມ ນາຍກຕ຺ຕໍ, ປິຕຸນາມຎ຺ຈ ເອກໂຕ;

ອຸໂຠ ກຕ຺ວານ ເອກຊ຺ຌໍ, ຄາມຓິອຠໂຍ ອິຕິ.

໗໒. ມຫາຄາມໍ ປວິສິຕ຺ວາ, ນວເມ ທິວເສ ຕໂຕ;

ສງ຺ຄມໍ ເທວິຍາ ກາສິ, ເຕນ ຄພ຺ຠມຄຓ຺ຫິ ສາ.

໗໓. ກາເລ ຊາຕໍ ສຸຕໍ ຣາຊາ, ຕິສ຺ສນາມໍ ອກາຣຍິ;

ມຫຕາ ປຣິຫາເຣນ, ອຸຠໂຕ ວຑ຺ຒິໍສຸ ທາຣກາ.