ເອກວີສຕິມ ປຣິຈ຺ເຉທ

ວຎ຺ຈ ຣາຊໂກ

໑. ອຸຕ຺ຕິຍສ຺ສ ກນິຏ຺ໂຐ ຕຸ, ມຫາສິໂວ ຕທຈ຺ຈເຍ;

ທສ ວສ຺ສານິ ກາເຣສິ, ຣຊ຺ຊໍ ສຸຊນ ເສວໂກ.

໒. ຠທ຺ທສາລມ຺ຫິ ໂສ ເຖເຣ, ປສີທິຕ຺ວາ ມໂນຣມໍ;

ກາເຣສິ ປຸຣິມາຍນ຺ຕຸ, ວິຫາຣໍ ນຄຣງ຺ຄຓໍ.

໓. ມຫາສິວກນິຏ຺ໂຐ ຕຸ, ສຸຣຕິສ຺ໂສ ຕທຈ຺ຈເຍ;

ທສວສ຺ສານິ ກາເຣສິ, ຣຊ຺ຊໍ ປຸຎ຺ເຎສຸ ສາທໂຣ.

໔. ທກ຺ຂິຓາຍ ທິສາຍໍ ໂສ, ວິຫາຣໍ ນຄຣໍ ຄຓໍ;

ປຸຣິມາຍ ຫຕ຺ຖິກ຺ຂນ຺ຘຎ຺ຈ, ໂຄກຓ຺ຓຄິຣິເມວ ຈ.

໕. ວງ຺ຄຸຕ຺ຕເຣ ປພ຺ພຕມ຺ຫິ, ປາຈິນ ປພ຺ພຕວ຺ຫຍໍ;

ຣເຫຓກສມີປມ຺ຫິ, ຕຖາ ໂກຬມ຺ພກາຬກໍ.

໖. ອຣິຏ຺ຐປາເທ ມໍ ຄຸລກໍ, ປຸຣິມາຍ’ຈ຺ຉ ຄລ຺ລກໍ;

ຄິຣິເນລປນາຍກຓ຺ຑໍ, ນຄຣສ຺ສຸຕ຺ຖຣາຍ ຕຸ.

໗. ປຎ຺ຈສຕາ ເນວ ມາທິ-ວິຫາເຣ ປຸຖວີ ປຕິ;

ຄງ຺ຄາຍ ໂອຣປາຣຎ຺ຫິ, ລໍກາທີເປ ຕຫິໍ ຕຫິໍ.

໘. ປຸເຣ ຣຊ຺ຊາ ຈ ຣຊ຺ເຊ ຈ, ສຏ຺ຐີວສ຺ສານິ ສາຘຸກໍ;

ກາເຣສິ ຣມ຺ເມ ຘມ຺ເມນ, ຣຕນຕ຺ຕຍ ຄາຣໂວ.

໙. ສຸວຓ຺ຓປິຓ຺ຑຕິສ຺ໂສຕິ, ນາມໍ ຣຊ຺ຊາ ຕສ຺ສາ ອຫຸ;

ສຸຣຕິສ຺ໂສຕິ ນາມນ຺ຕຸ, ຕສ຺ສາ’ປຸຣຊ຺ຊປຕ຺ຕິຍາ.

໑໐. ອສ຺ສນາວິກປຸຕ຺ຕາ ທ຺ເວ, ທມິຬາ ເສນຄຸຕ຺ຕິກາ;

ສຸຣຕິສ຺ສມຫີປາລໍ, ຕໍ ຄເຫຕ຺ວາ ມຫພ຺ພລາ.

໑໑. ທຸເວ ວີສຕິວສ຺ສານິ, ຣຊ຺ຊໍ ຘມ຺ເມນ ກາຣຍຸໍ;

ເຕ ຄເຫຕ຺ວາ ອເສໂລ ຕຸ, ມຸຏສິວສ຺ສ ອຕ຺ຣໂຊ.

໑໒. ໂສທຣິຍານໍ ຠາຕູນໍ, ນວໂມ ຠຕຸໂກ ຕໂຕ;

ອນຸຣາຘປຸເຣ ຣຊ຺ຊໍ, ທສວສ຺ສານິ ກາຣຍິ.

໑໓. ໂຈຬຣຏ຺ຐາ ອິຘ ຄມ຺ມ, ຣຊ຺ຊຕ຺ຖໍ ອຸຊຸຊາຕິໂກ;

ເອຬາໂຣ ນາມ ທມິໂຬ, ຄເຫຕ຺ວາ’ເສລຠູປຕິໍ.

໑໔. ວສ຺ສານິ ຈຕ຺ຕາຣີສຎ຺ຈ, ຈຕ຺ຕາຣິ ຈ ອກາຣຍິ;

ຣຊ຺ຊໍ ໂວຫາຣສມເຍ, ມຊ຺ຌຕ຺ໂຕ ມິຕ຺ຕສຕ຺ຕຸສຸ.

໑໕. ສຍນສ຺ສ ສິໂຣປສ຺ເສ, ຆຓ຺ຏໍ ສຸທີຆໂຍຕ຺ຕກໍ;

ລມ຺ພາເປສິ ວີຣາເວຕຸໍ, ອິຈ຺ຉນ຺ເຕຫິ ວິນິຈ຺ຉຍໍ.

໑໖. ເອໂກ ປຸຕ຺ໂຕ ຈ ຘີຕາ ຈ, ອເຫສຸໍ ຕສ຺ສ ຣາຊິໂນ;

ຣເຖນ ຕິສ຺ສວາປິໍ ໂສ, ຄຈ຺ຉນ຺ໂຕ ຠູມິປາລໂຊ.

໑໗. ຕຣຸຓໍ ວຈ຺ຉກໍ ມຄ຺ເຄ, ນິປນ຺ນໍ ສຫເຘນຸກໍ;

ຄີວໍ ອກ຺ກມ຺ມຈກ຺ເກນ, ອສຎ຺ຈິຈ຺ຈ ອຆາຕຍິ.

໑໘. ຄນ຺ຕ຺ວານ ເຘນຸຆຓ຺ຏໍ ຕໍ, ຆຏ຺ເຏສິ ຆຏ຺ຏິຕາສຍາ;

ຣາຊາ ເຕເນວ ຈກ຺ເກນ, ສີສໍ ປຸຕ຺ຕສ຺ສ ເຉທຍິ.

໑໙. ທິຊໂປຕໍ ຕາລຣຸກ຺ເຂ, ເອໂກ ສປ຺ໂປ ອຠກ຺ຂຍິ;

ຕມ຺ໂປຕມາຕາ ສກຸຓີ, ຄນ຺ຕ຺ວາ ຆຓ຺ຏມຆຏ຺ຏຍິ.

໒໐. ອາຓາເປຕ຺ວານ ຕໍ ຣາຊາ, ກຸຈ຺ຉິໍ ຕສ຺ສ ວິທາຬິຍ;

ໂປຕໍ ຕໍ ນີຫຣາເປຕ຺ວາ, ຕາເລ ສປ຺ປມສປ຺ປຍິ.

໒໑. ຣຕນຄ຺ຄສ຺ສ ຣຕນ-ຕ຺ຕຍສ຺ສ ຄຸຓສາຣຕໍ;

ອຊານນ຺ໂຕປິ ໂສ ຣາຊາ, ຈາຣິຕ຺ຕມນຸປາລຍໍ.

໒໒. ເຈຕິຍທພ຺ພຕໍ ຄນ຺ຕ຺ວາ, ຠິກ຺ຂຸສງ຺ຆໍ ປວາຣິຍ;

ອາຄຈ຺ຉນ຺ໂຕ ຣຖຄໂຕ, ຣຖສ຺ສ ຍຸຄໂກຏິຍາ.

໒໓. ອກາສິ ຊິນຖູປສ຺ສ,

ເອກເທສສ຺ສ ຠຎ຺ຊນໍ;

ອມຈ຺ຈາ ‘‘ເທວ ຖູໂປໂນ,

ຕຍາ ຠິນ຺ໂນ’ຕິ ອາຫຸ ຕໍ.

໒໔. ອສຎ຺ຈິຈ຺ຈ ກເຕ‘ເປ’ສ, ຣາຊາ ໂອຣຸຍ຺ຫ ສນ຺ທນາ;

‘‘ຈກ຺ເກນ ມມ ສີສມ຺ປິ, ຉິນ຺ທຖາ’ຕິ ປເຖສຍິ.

໒໕. ‘‘ປຣຫິໍສໍ ມຫາຣາຊ, ສຕ຺ຖາ ໂນ ເນວ ອິຈ຺ຉຕິ;

ຖູປໍ ປາກຕິກໍ ກຕ຺ວາ, ຂມາເປຫີ’’ຕິ ອາຫຸ ຕໍ.

໒໖. ເຕ ຐເປຕຸໍ ປຎ຺ຈທສ, ປາສາເຓ ປຕິເຕ ຕຫິໍ;

ກຫາປຓ ສຫສ຺ສານິ, ອທາ ປຎ຺ຈທເສ ວໂສ.

໒໗. ອກາ ມຫລ຺ລິກາ ວີຫິໍ, ໂສ ເສຕຸໍ ອາຕເປ ຂິປິ;

ເທໂວ ອກາເລ ວສ຺ສິຕ຺ວາ, ຕສ຺ສາ ວິຫິໍ ອເຕມຍິ.

໒໘. ວີຫິໍ ຄເຫຕ຺ວາ ຄນ຺ຕ຺ວາ ສາ, ຆຓ຺ຏໍ ຕໍ ສມຆຏ຺ຏຍິ;

ອກາລວສ຺ສໍ ສຸຕ຺ວາ ຕໍ, ວິສ຺ສຊ຺ເຊຕ຺ວາ ຕມຕ຺ຕິກໍ.

໒໙. ຣາຊາ ຘມ຺ມມ຺ຫິ ວຕ຺ຕນ຺ໂຕ, ‘‘ກາເລ ວສ຺ສໍ ລເຠ’’ອິຕິ;

ຕສ຺ສາ ວິນິຈ຺ຉຍຕ຺ຖາຍ, ອຸປວາສໍ ນິປຊ຺ຊິ ໂສ.

໓໐. ພລິຄ຺ຄາຫີ ເທວປຸຕ຺ໂຕ, ຣຎ຺ໂຎ ເຕເຊນ ໂອຕ຺ຖໂຏ;

ຄນ຺ຕ຺ວາ ຈາຕຸມຫາຣາຊ-ສນ຺ຕິກໍ ຕໍ ນິເວທຍິ.

໓໑. ເຕ ຕມາທາຍ ຄນ຺ຕ຺ວານ, ສກ຺ກສ຺ສ ປຏິເວທຍຸໍ;

ສກ຺ໂກ ປຊ຺ຊຸນ຺ນມາຫຸຍ, ກາເລ ວສ຺ສໍ ອຸປາທິຍິ.

໓໒. ພລິຄ຺ຄາຫີ ເທວປຸຕ຺ໂຕ, ຣາຊິໂນ ຕໍ ນິເວທຍິ;

ຕໂຕປ຺ປຠຸຕິ ຕໍ ຣຊ຺ເຊ, ທິວາ ເທໂວ ນ ວສ຺ສຖ.

໓໓. ຣຕ຺ຕິໍ ເທໂວ’ນຸ ສຕ຺ຕາຫໍ, ວສ຺ສິຍາມມ຺ຫິ ມຊ຺ຌິເມ;

ປຸຓ຺ຓານ’ເຫສຸໍ ສພ຺ພຕ຺ຖ, ຂຸທ຺ທກາ ວາຏການິປິ.

໓໔. ອຄຕິຄມນໂທໂສ ມຸຕ຺ຕມຕ຺ເຕນ ເອໂສ,

ອນຸປຫຕ ກຸທິຏ຺ຐິປີທິສິໍ ປາປຸຓີ’ທ຺ຘິໍ;

ອຄຕິຄມນໂທສໍ ສຸທ຺ຘທິຏ຺ຐິສມາໂນ,

ກຖມິຘຫິ ມນຸສ຺ໂສ ພຸທ຺ຘິມາ ໂນ ຊເຫຍ຺ຍາຕິ.

ສຸຊນປ຺ປສາທສໍເວຄຕ຺ຖາຍ ກເຕ ມຫາວໍເສ

ປຎ຺ຈຣາຊໂກ ນາມ

ເອກວີສຕິໂມ ປຣິຈ຺ເຉໂທ.