ເຕຣສມ ປຣິຈ຺ເຉທ

ມຫິນ຺ທາຄມໂນ

໑. ມຫາມຫິນ຺ທຕ຺ເຖໂຣ ໂສ, ຕທາ ທ຺ວາທສວສ຺ສິໂກ;

ອຸປຊ຺ຌາເຍນ ອາຓຕ຺ໂຕ, ສງ຺ເຆນ ຈ ມຫາມຕີ.

໒. ລໍກາທີປໍ ປສາເທຕຸໍ,

ກາລໍ ເປກ຺ຂໍ ວິຈິນ຺ຕຍີ;

‘‘ວຸຑ຺ໂຒ ມຸຏສິໂວ ຣາຊາ,

ຣາຊາ ໂຫຕຸ ສຸໂຕ’’ ອິຕິ.

໓. ຕທນ຺ຕເຣ ຎາຕິຄຓໍ, ທຏ຺ຐຸໍ ກຕ຺ວານ ມານສໍ;

ອຸປຊ຺ຌາຍຎ຺ຈ ສງ຺ຆຎ຺ຈ, ວນ຺ທິຕ຺ວາ ປຸຈ຺ຉ ຠູປຕິໍ.

໔. ອາທາຍ ຈຕຸໂຣ ເຖເຣ, ສງ຺ຆມິຕ຺ຕາຍ ອຕ຺ຣຊໍ;

ສຸມນໍ ສາມເຓຣຎ຺ຈ, ຉຬາຠິຎ຺ຎໍ ມຫິທ຺ຘິກໍ.

໕. ຎາຕີນໍ ສງ຺ຄຫໍ ກາຕຸໍ, ອຄມາ ທກ຺ຂິຓາຄິຣິໍ;

ຕໂຕ ຕຕ຺ຖ ຈຣນ຺ຕສ຺ສ, ຉມ຺ມາສາ ສມຕິກ຺ກມຸໍ.

໖. ກເມນ ເວທິສຄິຣິໍ, ນຄຣໍ ມາຕຸເທວິຍາ;

ສມ຺ປຕ຺ວາ ມຕຣໍ ປສ຺ສິ, ເທວີ ທິສ຺ວາ ປິຍໍ ສຸຕໍ.

໗. ໂຠຊຍິຕ຺ວາ ສປຣິສໍ, ອຕ຺ຕນາເຍວ ກາຣິຕໍ;

ວິຫາຣໍ ເຈຕິຍຄິຣິໍ, ເຖຣໍ ອາໂຣປຍີ ສຸຠໍ.

໘. ອວນ຺ຕິຣຏ຺ຐໍ ຠຸຎ຺ຊນ຺ໂຕ, ປິຕຣາ ທິນ຺ນມຕ຺ຕໂນ;

ໂສ ອໂສກ ກຸມາໂຣ ຫິ, ອຸຊ຺ເຊນີຄມນາ ປຸຣາ.

໙. ເວທິເສ ນຄເຣ ວາສໍ, ອຸປຄນ຺ຕ຺ວາ ຕຫິໍ ສຸຠໍ;

ເທວິນ຺ນາມ ລຠິຕ຺ວານ, ກຸມາຣິໍ ເສຏ຺ຐິຘີຕຣໍ.

໑໐. ສໍວາສໍ ຕາຍ ກປ຺ເປສິ, ຄພ຺ຠໍ ຄຓ຺ຫິຍ ເຕນ ສາ;

ອຸຊ຺ເຊນິຍໍ ກຸມາຣໍ ຕໍ, ມຫິນ຺ທໍ ຊນຍີ ສຸຠໍ.

໑໑. ວສ຺ສທ຺ວຍມຕິກ຺ກມ຺ມ, ສງ຺ຆມິຕ຺ຕຎ຺ຈ ຘີຕຣໍ;

ຕສ຺ມິໍ ກາເລ ວສຕິ ສາ, ເວທິເສ ນຄເຣ ຕຫິໍ.

໑໒. ເຖໂຣ ຕຕ຺ຖ ນິສີທິຕ຺ວາ, ກາລຎ຺ຎູ ອິຕິ ຈິນ຺ຕຍິ;

ປິຕຣາ ເມ ສມາຓຕ຺ຕໍ, ອຠິເສກ ມຫຸສ຺ສວໍ.

໑໓. ເທວານໍປິຍຕິສ຺ໂສ ໂສ, ມຫາຣາຊາ’ນຸໂຠຕຸ ຈ;

ວຕ຺ຖຸຕ຺ຕຍຄຸເຓ ຈາປິ, ສຸຕ຺ວາ ຊານາຕຸ ທູຫໂຕ.

໑໔. ອາໂຣຫຕຸ ມິສ຺ສນຄໍ, ເຊຏ຺ຐມາສສ຺ສຸ’ໂປສເຖ;

ຕທເຫວ ຄມິສ຺ສາມ, ລໍກາທີປວຣໍ ມຍໍ.

໑໕. ມຫິນ຺ໂທ ອຸປສງ຺ກມ຺ມ, ມຫິນ຺ທຕ຺ເຖຣ ມຸຕ຺ຕມໍ;

ຍາຫິ ລໍກໍ ປສາເທຕຸໍ, ສມ຺ພຸທ຺ເຘນາ’ສິ ພ຺ຍາກໂຕ.

໑໖. ມຍມ຺ປິ ຕຕ຺ຖຸປຕ຺ຖມ຺ຠາ, ຠວິສ຺ສາມາ’ຕິ ອພ຺ຣວິ;

ເທວິຍາ ຠຄິນີ ຘີຕຸ-ປຸຕ຺ໂຕ ຠຓ຺ຑຸກ ນາມໂກ.

໑໗. ເຖເຣນ ເທວິຍາ ຘມ຺ມໍ, ສຸຕ຺ວາ ເທສິຕເມວ ຕຸ;

ອນາຄາມິຜລໍ ປຕ຺ວາ, ວສິ ເຖຣສ຺ສ ສນ຺ຕິເກ.

໑໘. ຕຕ຺ຖ ມາສໍ ວສິຕ຺ວານ, ເຊຏ຺ຐມາສສ຺ສຸ’ ໂປສເຖ;

ເຖໂຣ ຈຕູຫິ ເຖເຣຫິ, ສຸມເນນາ’ຖ ຠຓ຺ຑຸນາ.

໑໙. ສທ຺ຘິໍ ເຕນ ຄຫຏ຺ເຐນ, ນ ຣໂຕ ຎາຕິເຫຕຸນາ;

ຕສ຺ມາ ວິຫາຣາ ອາກາສໍ, ອຸຄ຺ຄນ຺ຕ຺ວາ ໂສ ມຫິທ຺ຘິໂກ.

໒໐. ຂເຓເນວ ອິຘາຄມ຺ມ, ຣມ຺ເມ ມິສ຺ສກ ປພ຺ພເຕ;

ອຏ຺ຐາສິ ວິລຸກູຏມ຺ຫິ, ຣຸຈິຣມ຺ພຕ຺ຖເລ ວເຣ.

໒໑. ລໍກາປສາທ ຄຸເຓນ ວິຍາກໂຕ ໂສ;

ລໍກາຫິຕາຍ ມຸນິນາ ສຍິເຕນ ອນ຺ເຕ;

ລໍກາຍ ສຕ຺ຖຸສທິໂສ ຫິຕເຫຕຸ ຕສ຺ສາ;

ລໍກາມຣູຫິ ມຫິໂຕ’ຠິນິສີທິ ຕຕ຺ຕາຕິ.

ສຸຊນປ຺ປສາທສໍເວຄຕ຺ຖາຍ ກເຕ ມຫາວໍເສ

ມຫິນ຺ທາຄມໂນ ນາມ

ເຕຣສໂມ ປຣິຈ຺ເຉໂທ.