ຈຸທ຺ທສມ ປຣິຈ຺ເຉທ

ນຄຣປ຺ປເວສໂນ

໑. ເທວານໍປິຍຕິສ຺ໂສ ໂສ, ຣາຊາ ສລິລກີຬິຕໍ;

ທຕ຺ວາ ນຄຣວາສີນໍ, ມິຄວໍ ກີຬິຕຸໍ ອຄາ.

໒. ຈຕ຺ຕາລີສສຫສ຺ເສຫິ, ນເຣຫິ ປຣິວາຣິໂຕ;

ຘາວນ຺ໂຕ ປທສາເຍວ, ອຄມາ ມິສ຺ສກໍ ນຄໍ.

໓. ເຖເຣ ທສ຺ເສຕຸມິຈ຺ຉນ຺ໂຕ, ເທໂວ ຕສ຺ມິໍ ມຫີຘເຣ;

ຄຸມ຺ຠໍຠກ຺ຂຍມາໂນ’ວ, ອຏ຺ຐາ ໂຄກຓ຺ຓຣູປວາ.

໔. ຣາຊາ ທິສ຺ວາ ‘‘ປມຕ຺ຕໍ ຕໍ, ນ ຍຸຕ຺ຕໍ ວິຊ຺ຌິຕຸໍ’’ ອິຕິ;

ຊິຍາ ສທ຺ທມກາຘາປິ, ໂຄກຓ຺ໂຓ ປພ຺ພຕນ຺ຕຣໍ.

໕. ຣາຊາ’ນຸຘາວິ ໂສຘິໍ, ເຖຣານໍ ສນ຺ຕິກໍ ຄໂຕ;

ເຖເຣ ທິຏ຺ເຐ ນຣິນ຺ເທນ, ສຍມນ຺ຕຣຘາຍິໂສ.

໖. ເຖໂຣ ‘‘ພຫູສຸ ທິຏ຺ເຐສຸ, ອຕິຠາຍິສ຺ສຕີ’’ ຕິໂສ;

ອຕ຺ຕານເມວ ທສ຺ເສສິ, ປສ຺ສິຕ຺ວາ ຕໍ ມຫີປຕິໍ.

໗. ຠີໂຕ ອຏ຺ຐາສິ ຕໍ ເຖໂຣ, ‘‘ເອຫິ ຕິສ຺ສາຕິ ອພ຺ຣວິ;

ຕິສ຺ສາ’ຕິ ວຈເນເນວ, ຣາຊາ ຍກ຺ໂຂ’’ຕິ ຈິນ຺ຕຍີ.

໘. ສມຓາ ມຍໍ ມຫາຣາຊ, ຘມ຺ມຣາຊສ຺ສ ສາວກາ;

ຕເມວ ອນຸກມ຺ປາຍ, ຊມ຺ພຸທີປາ ອິຘາຄຕາ.

໙. ອິຈ຺ຈາຫ ເຖໂຣ ຕໍ ສຸຕ຺ວາ, ຣາຊາ ວີຕຠໂຍ ອຫຸ;

ສຣິຕ຺ວາ ສຂີສນ຺ເທສໍ, ‘‘ສມາຓາ’’ ອິຕິ ນິຈ຺ຉິໂຕ.

໑໐. ຘນຸໍ ສຣຎ຺ຈ ນິກ຺ຂິປ຺ປ, ອຸປສງ຺ກມ຺ມ ຕໍ ອິສິໍ;

ສມ຺ໂມທມາໂນ ເຖເຣນ, ໂສ ນິສີທິ ຕທນ຺ຕິເກ.

໑໑. ຕທາ ຕສ຺ສ ມນຸສ຺ສາ ເຕ, ອາຄມ຺ມ ປຣິວາຣຍຸໍ;

ຕທາ ເສເສ ຉ ທສ຺ເສສິ, ມຫາເຖໂຣ ສຫາຄເຕ.

໑໒. ເຕ ທິສ຺ວາ ອພ຺ຣວີ ຣາຊາ, ‘‘ກທາ’’ ເມ ອາຄຕາ ອິຕິ;

‘‘ມຍາ ສທ຺ຘິໍ’’ຕິ ເຖເຣນ, ວຸຕ຺ເຕ ປຸຈ຺ຉິ ອິທໍ ປຸນ.

໑໓. ‘‘ສນ຺ຕິ ອີທິສກາ ອຎ຺ເຎ, ຊມ຺ພຸທີເປ ຍຕີ’’ ອິຕິ;

ອາຫ ‘‘ກາສາວປຊ຺ໂຊ ໂຕ, ຊມ຺ພຸທີໂປ ຕຫິໍ ປນ.

໑໔. ເຕວິຊ຺ຊາ ອິທ຺ຘິປ຺ປຕ຺ຕາ ຈ, ເຈໂຕປຣິຍໂກວິທາ;

‘‘ທິພ຺ພໂສຕາ’ຣຫນ຺ໂຕ ຈ, ພຫູ ພຸທ຺ຘສ຺ສ ສາວກາ’’.

໑໕. ປຸຈ຺ຉິ ‘‘ເກນາຄຕຕ຺ຖາ’’ຕິ, ນ ຖເລນ ນ ວາຣິນາ;

ອາຄຕມ຺ຫາ’’ຕິ ວຸຕ຺ເຕ ໂສ, ວິຊານິ ນຠສາຄມໍ.

໑໖. ວີມໍສໍໂສ ມຫາປຎ຺ໂຎ, ກຓ຺ຫໍ ປຎ຺ຫມປຸຈ຺ຉິຕໍ;

ປຸຏ຺ໂຐ ປຸຏ຺ໂຐ ວິຍາກາສິ, ຕໍຕໍ ປຎ຺ຫໍ ມຫີປຕິ.

໑໗. ຣຸກ຺ໂຂຍໍ ຣາຊກິນ຺ນາໂມ, ອຎ຺ໂຎ ນາມ ອຍໍ ຕຣຸ;

ອິມໍ ມຸຎ຺ຈິຍ ອຕ຺ຖ’ມ຺ໂພ, ສນ຺ຕິ ອມ຺ພຕຣູ ພຫຸໍ.

໑໘. ອິມຎ຺ຈ ອມ຺ພໍ ເຕຈ’ມ຺ເພ, ມຸຎ຺ຈິຍຕ຺ຖິ ມຫີຣຸຫາ;

ສນ຺ຕິ ຠນ຺ເຕ ພຫຸ ຣຸກ຺ຂາ, ອນມ຺ພາປນ ເຕ ຕຣຸ.

໑໙. ອຎ຺ເຎ ອມ຺ເພ ອນມ຺ເພ ຈ, ມຸຎ຺ຈິຍ’ຕ຺ຖິ ມຫີຣຸຫາ;

ອຍໍ ຠນ຺ເຕ ອມ຺ພຣຸກ຺ໂຂ, ປຓ຺ຑິໂຕ’ສິ ນຣິສ຺ສຣ.

໒໐. ສນ຺ຕິ ເຕ ຎາຕກາ ຣາຊ, ສນ຺ຕິ ຠນ຺ເຕ ພຫຸຊ຺ຊນາ;

ສນ຺ຕິ ອຎ຺ຎາຕກາ ຣາຊ, ສນ຺ຕິ ເຕ ຎາຕິໂຕ ພຫູ.

໒໑. ຎາຕເກ ເຕ ຈ ອຎ຺ເຎ ຈ, ມຸຎ຺ຈິຍ’ຎ຺ໂຎປິ ອຕ຺ຖິ ນຸ;

‘‘ຠນ຺ເຕ’’ ຫເມວ ສາຘຸ ຕ຺ວໍ, ປຓ຺ຑິໂຕ’ສິ ນຣິສ຺ສຣ.

໒໒. ປຓ຺ຑິໂຕ’ຕິ ວິທິຕ຺ວານ, ຈູຬຫຕ຺ຖິປໂທປມໍ;

ສຸຕ຺ຕນ຺ຕໍ ເທສຍີ ເຖໂຣ, ມຫີປສ຺ສ ມຫາມຕີ.

໒໓. ເທສນາປຣິໂຍສາເນ, ສທ຺ຘິໍ ເຕຫິ ນເຣຫິ ໂສ;

ຈຕ຺ຕາລີສສຫສ຺ເສຫິ, ສຣເຓສຸ ປຕິຏ຺ຐຫິ.

໒໔. ຠຕ຺ຕາ’ຠີຫາຣໍ ສາຍນ຺ເຫ, ຣຎ຺ໂຎ ອຠິຫຣຸໍ ຕທາ;

‘‘ນ ຠຸຎ຺ຊິສ຺ສ’’ນ຺ຕິ ທານິ ເມ, ອິຕິ ຊນມ຺ມິ ຠູປຕິ.

໒໕. ປຸຈ຺ຉິຕຸໍເຍວ ຍຸຕ຺ຕນ຺ຕິ, ຠຕ຺ເຕນາ’ປຸຈ຺ຉິເຕ ອິສິ;

ນ ຠຸຎ຺ຊາມ ອິທານີ’ຕິ, ວຸຕ຺ເຕ ກາລຎ຺ຈ ປຸຈ຺ຉິໂສ.

໒໖. ກາລໍ ວຸຕ຺ເຕ’ພ຺ຣວິ ເອວໍ, ‘‘ຄຈ຺ຉາມ ນຄຣໍ’’ອິຕິ;

ຕຸວໍ ຄຈ຺ຉ ມຫາຣາຊ, ວສິສ຺ສາມ ມຍໍ ອິຘ.

໒໗. ເອວໍ ສຕິ ກຸມາໂຣ’ຍໍ, ອມ຺ເຫຫິ ສຫ ຄຈ຺ຉຕຸ;

ອຍຎ຺ຫິ ອາຄຕຜໂລ, ຣາຊ ວິຎ຺ຎາຕສາສໂນ.

໒໘. ອເປກ຺ຂມາໂນ ປພ຺ພຊ຺ຊໍ, ວສຕ’ມ຺ຫາກມນ຺ຕິເກ;

ອິທານິ ປພ຺ພເຊສ຺ສາມ, ອິມໍ ຕ຺ວໍ ຄຈ຺ຉ ຠູມິປ.

໒໙. ປາໂຕ ຣຖໍ ເປສຍິສ຺ສໍ, ຕຸມ຺ເຫ ຕຕ຺ຖ ຐິຕາ ປຸຣໍ;

ຍາຖາ’ຕິ ເຖເຣ ວນ຺ທິຕ຺ວາ, ຠຓ຺ຑຸໍເນຕ຺ວ’ກ ມນ຺ຕກໍ.

໓໐. ປຸຈ຺ຉິ ເຖຣາຘິກາຣໍໂສ, ຣຎ຺ໂຎ ສພ຺ພມຠາສິ ໂສ;

ເຖຣໍ ຎຕ຺ວາ’ຕິ ຕຸຏ຺ໂຐໂສ, ‘‘ລາຠາ ເມ’’ອິຕິ ຈິນ຺ຕຍິ.

໓໑. ຠຓ຺ຑຸສ຺ສ ຄີຫິຠາເວນ, ຄຕາສງ຺ໂກ ນຣິສ຺ສໂຣ;

ອຎ຺ຎາສິ ນຣຠາວໍ ໂສ, ‘‘ປພ຺ພາເຊມ ອິມໍ’’ ອິຕິ.

໓໒. ເຖໂຣ ຕໍ ຄາມສີມາຍໍ, ຕສ຺ມິໍເຍວ ຂເຓ ອກາ;

ຠຓ຺ຑຸກສ຺ສ ກຸມາຣສ຺ສ, ປພ຺ພຊ຺ຊມຸປສມ຺ປທໍ.

໓໓. ຕສ຺ມິໍເຍວ ຂເຓ ໂສ ຈ, ອຣຫຕ຺ຕມປາປຸຓິ;

ສຸມນໍ ສາມເຓຣໍ ຕໍ, ເຖໂຣ ອາມນ຺ຕຍີ ຕໂຕ.

໓໔. ຘມ຺ມສວນກາລໍ ຕ຺ວໍ, ໂຆເສຫີ’’ຕິ ອປຸຈ຺ຉິໂສ;

ສາເວນ຺ໂຕ ກິຕ຺ຕກໍ ຐານໍ, ຠນ຺ເຕ ໂຆເສມ’ຫໍ ອິຕິ.

໓໕. ‘‘ສກລໍ ຕມ຺ພປຓ຺ຓີ’’ຕິ, ວຸຕ຺ເຕ ເຖເຣນ ອິທ຺ຘິຍາ;

ສາເວນ຺ໂຕ ສກລໍ ລໍກໍ, ຘມ຺ມກາລມໂຆສຍີ.

໓໖. ຣາຊາ ນາຄຈຕຸຕ຺ເຕໂສ, ໂສຓ຺ຓິປສ຺ເສ ນິສີທິຍ;

ຠຸຎ຺ຊນ຺ໂຕ ຕໍ ຣວໍ ສຸຕ຺ວາ, ເຖຣນ຺ຕິກ ມເປສຍິ.

໓໗. ‘‘ອຸປທ຺ທໂວ ນຸ ອຕ຺ຖີ’’ຕິ, ອາຫ ນຕ຺ຖິ ອຸທ຺ທໂວ;

ໂສຕຸໍ ສມ຺ພຸທ຺ຘວຈນໍ, ກາໂລ ໂຆສາປິໂຕ ອິຕິ.

໓໘. ສາມເຓຣ ຣວໍ ສຸຕ຺ວາ, ຠຸມ຺ມາເທວາ ອໂຆສຍຸໍ;

ອນຸກ຺ກເມນ ໂສ ສທ຺ໂທ, ພ຺ຣຫ຺ມໂລກໍ ສມາຣຸຫິ.

໓໙. ເຕນ ໂຆເສນ ເທວານໍ, ສນ຺ນິປາໂຕ ມຫາ ອຫຸ;

ສມຈິຕ຺ຕສຸຕ຺ຕໍ ເທເສສິ, ເຖໂຣ ຕສ຺ມິໍ ສມາຄເມ.

໔໐. ອສໍຂິຍານໍ ເທວານໍ, ຘມ຺ມາຠິສມໂຍ ອຫຸ;

ພຫູ ນາຄາ ສຸປຓ຺ຓາ ຈ, ສຣເຓສຸ ປຕິຏ຺ຐຍຸໍ.

໔໑. ຍເຖທໍ ສາຣິປຸຕ຺ຕສ຺ສ, ສຸຕ຺ຕໍ ເຖຣສ຺ສ ຠາສໂຕ;

ຕຖາ ມຫິນ຺ທຕ຺ເຖຣສ຺ສ, ອຫຸ ເທວສມາຄໂມ.

໔໒. ຣາຊາ ປຠາ ເຕ ປາເຫສິ, ຣຖໍ ສາຣຖິ ໂສ ຄໂຕ;

‘‘ອາໂຣຫຖ ຣຖໍ ຍາມ, ນຄຣໍ’’ ອິຕິ ເຕ’ພ຺ຣວິ.

໔໓. ນາ’ໂຣຫາມ ຣຖໍ ຄຈ຺ຉ, ຄຈ຺ຉາມ ຕວ ປຈ຺ຉໂຕ;

ອິຕິ ວຕ຺ວານ ເປເສຕ຺ວາ, ສາຣຖິໍ ສຸມໂນຣຖໍ.

໔໔. ເວຫາສມພ຺ຠຸຄນ຺ຕ຺ວາ, ເຕ ນຄຣສ຺ສ ປຸຣຕ຺ຖໂຕ;

ປຐມຕ຺ຖູປຏ຺ຐານມ຺ຫິ, ໂອຕຣິໍສຸ ມຫິທ຺ຘິກາ.

໔໕. ເຖເຣຫິ ປຐໂມຕິຓ຺ຓ-ຐານມ຺ຫິ ກຕເຈຕິຍໍ;

ອຊ຺ຊາປິ ວຸຈ຺ຈເຕ ເຕນ, ເອວໍ ປຐມເຈຕິຍໍ.

໔໖. ຣຎ຺ຎາ ເຖຣຄຸຓໍ ສຸຕ຺ວາ, ສພ຺ພາ ອນ຺ເຕປຸຣິຕ຺ຖິໂຍ;

ເຖຣທສ຺ສນມິຈ຺ຉິໍສຸ, ຍສ຺ມາ ຕສ຺ມາມຫີປຕິ.

໔໗. ອນ຺ໂຕ’ວ ຣາຊວຕ຺ຖຸສ຺ສ, ຣມ຺ມໍ ກາເຣສິ ມຓ຺ຑປໍ;

ເສເຕຫິ ວຕ຺ຖປຸປ຺ເຜຫິ, ຉາທິຕໍ ສມລງ຺ກຕໍ.

໔໘. ອຸຈ຺ຈເສຍ຺ຍາວິຣມຓໍ, ສຸຕຕ຺ຕາ ເຖຣສນ຺ຕິເກ;

ກງ຺ຂີ ‘‘ອຸຈ຺ຈາສເນ ເຖໂຣ, ນິສີທິເທຍ຺ຍນຸໂນຕິ ຈ.

໔໙. ຕທນ຺ຕເຣ ສາຣຖິ ໂສ, ເຖເຣ ທິສ຺ວາ ຕຫິໍ ຐິເຕ;

ຈີວຣໍ ປາຣຸປນ຺ເຕ ເຕ, ອຕິວິມ຺ຫິຕ ມານໂສ.

໕໐. ຄນ຺ຕ຺ວາ ຣຎ຺ໂຎ ນິເວເທສິ, ສຸຕ຺ວາ ສພ຺ພໍ ມຫີມຕິ;

‘‘ນິສຊ຺ຊໍ ນ ກຣິສ຺ສນ຺ຕິ, ປີຐເກສູ’’ຕິ ນິຈ຺ຉິໂຕ.

໕໑. ‘‘ສຸສາຘຸ ຠຸມ຺ມຕ຺ຖຣຓໍ, ປຎ຺ຎາເປຖາ’’ຕິ ຠາສິຍ;

ຄນ຺ຕ຺ວາ ປຏິປຖໍ ເຖເຣ, ສກ຺ກຈ຺ຈໍ ອຠິວາທິຍ.

໕໒. ມຫາມຫິນ຺ທຕ຺ເຖຣສ຺ສ, ຫຕ຺ຖໂຕ ປຕ຺ຕມາທິຍ;

ສກ຺ກາຣປູຊາວິຘິນາ, ປຸຣໍ ເຖຣໍ ປເວສຍິ.

໕໓. ທິສ຺ວາ ອາສນປຎ຺ຎຕ຺ຕິໍ, ເນມິຕ຺ຕາ ພ຺ຍາກຣຸໍ ອິຕິ;

‘‘ຄຫິຕາ ປຖວີ’ເມຫິ, ທີເປ ເຫສ຺ສນ຺ຕິ ອິສ຺ສຣາ.

໕໔. ນຣິນ຺ໂທ ປູຊຍນ຺ໂຕ ເຕ, ເຖເຣ ອນ຺ເຕປຸຣໍ ນຍິ;

ຕຕ຺ຖ ເຕ ທຸສ຺ສປີເຐສຸໍ, ນິສີທິໍສຸ ຍຖາຣຫໍ.

໕໕. ເຕ ຍາຄຸຂຊ຺ຊໂຠຊ຺ເຊຫິ, ສຍໍ ຣາຊາ ອຕປ຺ປຍິ;

ນິຏ຺ຐິເຕ ຠຕ຺ຕກິຈ຺ຈມ຺ຫິ, ສຍໍ ອຸປນິສີທິຍ.

໕໖. ກນິຏ຺ຐສ຺ໂສປຣາຊສ຺ສ, ມຫານາຄສ຺ສ ຊາຍິກໍ;

ວສນ຺ຕິໍ ຣາຊເຄເຫ’ວ, ປກ຺ໂກສາ ເປສິຈາ’ນຸລໍ.

໕໗. ອາຄມ຺ມ ອນຸລາເທວີ, ປຎ຺ຈ ອິຕ຺ຖິສເຕຫິ ສາ;

ເຖເຣວນ຺ທິຍ ປູເຊຕ຺ວາ, ເອກມນ຺ຕມຸປາວິສິ.

໕໘. ເປຕວຕ຺ຖຸໍ ວິມານຎ຺ຈ, ສຈ຺ຈສໍຍຸຕ຺ຕເມວ ຈ;

ເທເສສິ ເຖໂຣ ຕາ ອິຕ຺ຖີ, ປຐມໍ ຜລມຊ຺ຌຄຸໍ.

໕໙. ຫິຍ຺ໂຍ ທິຏ຺ຐມນຸສ຺ເສຫິ, ສຸຕ຺ວາ ເຖຣຄຸເຓ ພຫູ;

ເຖຣທສ຺ສນມິຈ຺ຉນ຺ຕາ, ສມາຄນ຺ຕ຺ວານ ນາຄຣາ.

໖໐. ຣາຊທ຺ວາເຣ ມຫາສທ຺ທໍ, ອກຣຸໍ ຕໍ ມຫີປຕິ;

ສຸຕ຺ວາ ປຸຈ຺ຉິຍ ຊານິຕ຺ວາ, ອາຫ ເຕສໍ ຫິຕຕ຺ຖິໂກ.

໖໑. ສພ຺ເພສໍ ອິຘ ສມ຺ພາໂຘ, ສາລາມງ຺ຄລຫຕ຺ຖິໂນ;

ໂສເຘຖ ຕຕ຺ຖ ທກ຺ຂນ຺ຕິ, ເຖເຣ’ເມ ນາຄຣາ’ອິຕິ.

໖໒. ໂສເຘຕ຺ວາ ຫຕ຺ຖິສາລໍ ຕໍ, ວິຕານາທີຫິ ສຊ຺ຊຸກໍ;

ອລງ຺ກຣິຕ຺ວາ ສຍເນ, ປຎ຺ຎເປສຸໍ ຍຖາຣຫໍ.

໖໓. ສເຖໂຣ ຕຕ຺ຖ ຄນ຺ຕ຺ວານ, ມຫາເຖໂຣ ນິສີທິຍ;

ໂສ ເທວທູຕສຸຕ຺ຕນ຺ຕໍ, ກເຖສີ ກຖິໂກ ມຫາ.

໖໔. ຕໍ ສຸຕ຺ວານ ປສີທິໍສຸ, ນຄຣາ ເຕ ສມາຄຕາ;

ເຕສຸ ປາຓສຫສ຺ສໍຕຸ, ປຐມໍ ຜລມຊ຺ຌຄາ.

໖໕. ລໍກາທີເປ ໂສ ສຕ຺ຖຸກປ຺ໂປ ອກປ຺ໂປ;

ລໍກາຘິຏ຺ຐາເນ ທ຺ວີສຸ ຐາເນສຸ ເຖໂຣ;

ຘມ຺ມໍ ຠາສິຕ຺ວາ ທີປຠາສາຍ ເອວໍ;

ສທ຺ຘມ຺ໂມ ຕາຣໍ ກາຣຍີ ທີປທີໂປຕິ.

ສຸຊນປ຺ປສາທສໍເວຄຕ຺ຖາຍ ກເຕ ມຫາວໍເສ

ນຄຣປ຺ປເວສໂນ ນາມ

ຈຸທ຺ທສໂມ ປຣິຈ຺ເຉໂທ.