ທ຺ວາທສມ ປຣິຈ຺ເຉທ

ນານາເທສປສາໂທ

໑. ເຖໂຣ ໂມຄ຺ຄລິປຸຕ຺ໂຕ ໂສ, ຊິນສາສນ ໂຊຕໂກ;

ນິຏ຺ຐາເປຕ຺ວານ ສໍຄີຕິໍ, ເປກ຺ຂມາໂນ ອນາຄຕໍ.

໒. ສາສນສ຺ສ ປຕິຏ຺ຐານໍ, ປຈ຺ຈນ຺ເຕສຸ ອເວກ຺ຂິຍ;

ເປເສສິ ກຕ຺ຕິເກ ມາເສ, ເຕເຕ ເຖເຣ ຕຫິໍ ຕຫິໍ.

໓. ເຖຣໍ ກສ຺ມີຣຄນ຺ຘາຣໍ, ມຊ຺ຌນ຺ຕິກມເປສຍິ;

ອເປສຍີ ມຫາເທວ-ຕ຺ເຖຣໍ ມຫິສມຓ຺ຑລໍ.

໔. ວນວາສິໍ ອເປສຍິ, ເຖຣໍ ຣກ຺ຂິຕນາມກໍ;

ຕຖາ’ປຣນ຺ຕກໍ ໂຍນ-ຘມ຺ມຣກ຺ຂິຕນາມກໍ.

໕. ມຫາຣຏ຺ຐໍ ມຫາຘມ຺ມ-ຣກ຺ຂິຕຕ຺ເຖຣ ນາມກໍ;

ມຫາຣກ຺ຂິຕ ເຖຣໍ ຕໍ, ໂຍນ ໂລກມເປສຍິ.

໖. ເປເສສິ ມຊ຺ຌິມໍ ເຖຣໍ, ຫິມວນ຺ຕປເທສກໍ;

ສຸວຓ຺ຓຠູມິໍ ເຖເຣ ທ຺ເວ, ໂສຓມຸຕ຺ຕຣ ເມວ ຈ.

໗. ມຫາມຫິນ຺ທຕ຺ເຖຣໍ ຕໍ, ເຖຣ ອິຏ຺ຏິຍມຸຕ຺ຕິຍໍ;

ສມ຺ພລໍ ຠທ຺ທສາລຎ຺ຈ, ສເກ ສທ຺ຘິວິຫາຣິເກ.

໘. ລໍກາທີເປ ມນຸຎ຺ຎມ຺ຫິ, ມນຸຎ຺ຎໍ ຊິນສາສນໍ;

ປຕິຏ຺ຐາເປຖ ຕຸມ຺ເຫ’ຕິ, ປຎ຺ຈ ເຖເຣ ອເປສຍິ.

໙. ຕທາ ກສ຺ມີຣຄນ຺ຘາເຣ, ປກ຺ກໍ ສສ຺ສໍ ມຫິທ຺ຘິໂກ;

ອຣວາໂລ ນາຄຣາຊາ, ວສ຺ສໍ ກຣກສຎ຺ຎິຕໍ.

໑໐. ວສ຺ສາ ເປຕ຺ວາ ສມຸທ຺ທສ຺ມິໍ, ສພ຺ພໍ ຂິປຕິທາຣຸໂຓ;

ຕຕ຺ຣ ມຊ຺ຌນ຺ຕິກຕ຺ເຖໂຣ, ຂິປ຺ປໍ ຄນ຺ຕ຺ວາ ວິຫາຍສາ.

໑໑. ອຣວາລທເຫວາຣິ-ປິຏ຺ເຐ ຈງ຺ກມນາທິເກ;

ອກາສິ ທິສ຺ວາ ຕໍນາຄາ, ຣຸຏ຺ຐາຣຎ຺ໂຎ ນິເວທຍຸໍ.

໑໒. ນາຄຣາຊາ’ຖຣຸຏ຺ໂຐ ໂສ, ວິວິຘາ ຠິສິກາ’ກຣິ;

ວາຕາ ມຫນ຺ຕາ ວາຍນ຺ຕິ, ເມໂຆ ຄຊ຺ຊຕິ ວສ຺ສຕິ.

໑໓. ຜລນ຺ຕ຺ຍ’ສນິໂຍ ວິຊ຺ຊຸ, ນິຈ຺ຉຣນ຺ຕິ ຕໂຕ ຕໂຕ;

ມຫິຣຸຫາ ປພ຺ພຕານໍ, ກູຏານິ ປປຕນ຺ຕິ ຈ.

໑໔. ວິຣູປຣູປາ ນາຄາ ຈ, ຠິໍສາເປນ຺ຕິ ສມນ຺ຕໂຕ;

ສຍໍ ຘຸປາຍຕິ ຊລຕິ, ອກ຺ໂກສນ຺ໂຕ ອເນກຘາ.

໑໕. ສພ຺ພໍ ຕໍ ອິທ຺ຘິຍາ ເຖໂຣ, ປຏິພາຫິຍ ຠິໍສນໍ;

ອໂວຈ ນາຄຣາຊໍ ຕໍ, ທສ຺ເສນ຺ໂຕ ພລມຸຕ຺ຕມໍ.

໑໖. ສເທວ ໂກປິ ເຈ ໂລໂກ, ອາຄນ຺ຕ຺ວາ ຕາສເຍຍ຺ຍ ມໍ;

ນ ເມ ປຏິພໂລ ອສ຺ສ, ຊເນຕຸໍ ຠຍເຠຣວໍ.

໑໗. ສເຈ’ປິ ຕ຺ວໍ ມຫິໍ ສພ຺ພໍ, ສສມຸທ຺ທໍ ສປພ຺ພຕໍ;

ອຸກ຺ຂິປິຕ຺ວາ ມຫານາຄ, ຂິເປຍ຺ຍາສິ ມໂມ’ປຣິ.

໑໘. ເນວ ເມ ສກ຺ກຸເຓຍ຺ຍາສິ, ຊເນຕຸໍ ຠຍເຠຣວໍ;

ອຎ຺ຎທຕ຺ຖຸ ຕເວ‘ວ’ສ຺ສ, ວິຆາໂຕ ອຸຣຄາຘິປ.

໑໙. ຕໍສຸຕ຺ວາ ນິມ຺ມທສ຺ສ’ສ຺ສ, ເຖໂຣ ຘມ຺ມມເທສຍິ;

ຕໂຕ ສຣຓສີເລສຸ, ນາຄຣາຊາ ປຕິຏ຺ຐຫິ.

໒໐. ຕເຖວ ຈຕຸຣາສີຕິ-ສຫສ຺ສານິ ຠຸຊງ຺ຄມາ;

ຫິມວນ຺ເຕວ ຄນ຺ຘພ຺ພາ, ຍກ຺ຂາ ກຸມ຺ຠຓ຺ຑກາ ພຫູ.

໒໑. ປຓ຺ຑໂກ ນາມ ຍກ຺ໂຂ ຕຸ, ສທ຺ຘິໍຫາຣິຕ ຍກ຺ຂິຍາ;

ປຎ຺ຈສເຕຫິ ປຸຕ຺ເຕຫິ, ຜລໍ ປາປຸຓິ ອາທິກໍ.

໒໒. ‘‘ມາ’’ທານິ ໂກຘໍ ຊນິຍິຕ຺ຖ, ອິໂຕ ອຸທ຺ຘໍ ຍຖາປຸເຣ;

ສສຆາຕຎ຺ຈ ມາ’ກຕ຺ຖ, ສຸຂກາມາຫິ ປາຓິໂນ.

໒໓. ກໂຣຖ ເມຕ຺ຕໍ ສຕ຺ເຕສຸ, ວສນ຺ຕຸ ມນຸຊາ ສຸຂໍ;

ອິຕິ ເຕນາ’ນຸສິຏ຺ຐາ ເຕ, ຕເຖວ ປຏິປຊ຺ຊິສຸໍ.

໒໔. ຕໂຕ ຣຕນປລ຺ລງ຺ເກ, ເຖຣໍ ໂສ ອຸຣຄາຘິໂປ;

ນິສີທາປິຍ ອຏ຺ຐາສິ, ພີຊມາໂນ ຕທນ຺ຕິເກ.

໒໕. ຕທາ ກສ຺ມີຣຄນ຺ຘາຣ-ວາສິໂນ ມນຸຊາ’ຄຕາ;

ນາຄຣາຊສ຺ສ ປູຊຕ຺ຖໍ, ມນ຺ຕ຺ວາ ເຖຣໍ ມຫິທ຺ຘິກໍ.

໒໖. ເຖຣເມວາ’ຠິ ວາເທຕ຺ວາ, ເອກມນ຺ຕໍ ນິສີທິສຸໍ;

ເຕສໍ ຘມ຺ມມເທເສສິ, ເຖໂຣ ອາສິວິໂສປມໍ.

໒໗. ອສີຕິຍາ ສຫສ຺ສານໍ, ຘມ຺ມາຠິສມໂຍ ອຫຸ;

ສຕສຫສ຺ສ ປຸຣິສາ, ປພ຺ພຊຸໍ ເຖຣສນ຺ຕິເກ.

໒໘. ຕໂຕປ຺ປຠຸປຕິ ກສ຺ມິຣ-ຄນ຺ຘາຣໍ ເຕ ອິທານິປິ;

ອາສຸໍ ກາສາວ ປຊ຺ໂຊຕາ, ວຕ຺ຖຸຕ຺ຕຍປຣາຍນາ.

໒໙. ຄນ຺ຕ຺ວາ ມຫາເທວຕ຺ເຖໂຣ, ເທສໍ ມຫິສມຓ຺ຑລໍ;

ສຸຕ຺ຕນ຺ຕໍ ເທວທູຕໍ ໂສ, ກເຖສິ ຊນມຊ຺ຌໂຄ.

໓໐. ຈຕ຺ຕາລີສ ສຫສ຺ສານິ, ຘມ຺ມຈກ຺ຂຸໍ ວິໂສຘຍຸໍ;

ຈຕ຺ຕາລີສ ສຫສ຺ສານິ, ປພ຺ພຊິໍສຸ ຕທນ຺ຕິເກ.

໓໑. ຄນ຺ຕ຺ວາ’ຖ ຣກ຺ຂິຕຕ຺ເຖໂຣ, ວນວາສິໍ ນເຠ ຐິໂຕ;

ສໍຍຸຕ຺ຕມນມຕຄ຺ຄໍ, ກເຖສິ ຊນມຊ຺ຌໂຄ.

໓໒. ສຏ຺ຐິ ນຣສຫສ຺ສານໍ, ຘມ຺ມາຠິສມໂຍ ອຫຸ;

ສຕ຺ຕຕິໍສ ສຫສ຺ສານິ, ປພ຺ພຊິໍສຸ ຕທນ຺ຕິເກ.

໓໓. ວິຫາຣານໍ ປຎ຺ຈສຕໍ, ຕສ຺ມິໍເທເສ ປຕິຏ຺ຐຫິ;

ປຕິຏ຺ຐາເປສິ ຕຕ຺ເຖວໍ, ເຖໂຣ ໂສ ຊິນສາສນໍ.

໓໔. ຄນ຺ຕ຺ວາ’ປຣນ຺ຕກໍ ເຖໂຣ, ໂຍນໂກ ຘມ຺ມຣກ຺ຂິໂຕ;

ອຄ຺ຄິກ຺ຂນ຺ໂຘປມໍ ສຸຕ຺ຕໍ, ກເຖຕ຺ວາ ຊນມຊ຺ຌໂຄ.

໓໕. ສຕ຺ຕຕິໍສ ສຫສ຺ສານິ, ປາເຓ ຕຕ຺ຖ ສມາຄເຕ;

ຘມ຺ມາມຕມປາເຍສິ, ຘມ຺ມາ ຘມ຺ເມສຸ ໂກວິໂທ.

໓໖. ປຸຣິສານຎ຺ຈ ສຫສ຺ສຎ຺ຈ, ອິຕ຺ຖິໂຍ ຈ ຕໂຕ’ຘິກາ;

ຂຕ຺ຕິຍານໍ ກຸລາເຍວ, ນິກ຺ຂມິຕ຺ວານ ປພ຺ພຊຸໍ.

໓໗. ມຫາຣຏ຺ຐມິສີ ຄນ຺ຕ຺ວາ, ໂສ ມຫາຘມ຺ມຣກ຺ຂິໂຕ;

ມຫານາຣທກສ຺ສປວ຺ຫໍ, ຊາຕກໍ ກຖຍີ ຕຫິໍ.

໓໘. ມຄ຺ຄຜລໍ ປາປຸຓິໍສຸ, ຈຕຸຣາສີຕິ ສຫສ຺ສກາ;

ເຕຣສນ຺ຕຸ ສຫສ຺ສານິ, ປພ຺ພຊິໍສຸ ຕທນ຺ຕິເກ.

໓໙. ຄນ຺ຕ຺ວານ ໂຍນວິສຍໍ, ໂສ ມຫາຘມ຺ມຣກ຺ຂິໂຕ ອິສິ;

ກາຬກາຣາມ ສຸຕ຺ຕນ຺ຕໍ, ກເຖສິ ຊນມຊ຺ຌໂຄ.

໔໐. ປາຓສຕ ສຫສ຺ສານິ, ສຫສ຺ສານິ ຈ ສຕ຺ຕຕິ;

ມຄ຺ຄຜລໍ ປາປຸຓິໍສຸ, ທສ ສຫສ຺ສານິ ປພ຺ພຊຸໍ.

໔໑. ຄນ຺ຕ຺ວາ ຈຕູຫິ ເຖເຣຫິ, ເທເສສິ ມຊ຺ຌິໂມ ອິສິ;

ຫິມວນ຺ຕປເທສສ຺ມິໍ, ຘມ຺ມຈກ຺ກປວຕ຺ຕນໍ.

໔໒. ມຄ຺ຄຜລປາປຸຓິໍສຸ, ອສີຕິປາຓ ໂກຏິໂຍ;

ວິສຸໍ ເຕ ປຎ຺ຈຣຏ຺ຐານິ, ປຎ຺ຈເຖຣາ ປສາທຍຸໍ.

໔໓. ປຸຣິສສຕສຫສ຺ສານິ, ເອເກກສ຺ເສວ ສນ຺ຕິເກ;

ປພ຺ພຊິໍສຸ ປສາເທນ, ສມ຺ມາສມ຺ພຸທ຺ຘ ສາສເນ.

໔໔. ສທ຺ຘິໍ ອຸຕ຺ຕຣເຖເຣນ, ໂສຓຕ຺ເຖໂຣ ມຫິທ຺ຘິໂກ;

ສຸວຓ຺ຓຠູມິໍ ອຄມາ, ຕສ຺ມິໍ ຕຸ ສມເຍ ປນ.

໔໕. ຊາເຕ ຊາເຕ ຣາຊເຄເຫ, ທາຣເກ ຣຸທ຺ທຣກ຺ຂສີ;

ສມຸທ຺ທໂຕ ນິກ຺ຂມິຕ຺ວາ, ຠກ຺ຂິຕ຺ວາ ປນ ຄຈ຺ຉຕິ.

໔໖. ຕສ຺ມິໍ ຂເຓ ຣາຊເຄເຫ,

ຊາໂຕ ໂຫຕິ ກຸມາຣໂກ;

ເຖເຣ ມນຸສ຺ສາ ປສ຺ສິຕ຺ວາ,

ຣກ຺ຂສານໍ ສຫາຍກາ.

໔໗. ອິຕິ ຈິນ຺ຕິຍ ມາເຣຕຸໍ, ສາ ຍຸວາ ອຸປສງ຺ກມຸໍ;

‘‘ກິເມຕນ຺ຕິ’’ຈ ປຸຈ຺ຉິຕ຺ວາ, ເຖຣໍ ເຕ ເອວ ມາຫຸເຕ.

໔໘. ສມຓາ ມຍໍ ຫິມວນ຺ຕາ, ນ ຣກ຺ຂສິ ສຫາຍກາ;

ຣກ຺ຂສີ ສາ ສປຣິສາ, ນິກ຺ຂນ຺ຕາ ໂຫຕິ ສາຄຣາ.

໔໙. ຕໍ ທິສ຺ວານ ມຫາຣາວໍ, ວິຣວິໍສຸ ມຫາຊນາ;

ທິຄຸເຓ ຣກ຺ຂເສ ເຖໂຣ, ມາປຍິຕ຺ວາ ຠຍານເກ.

໕໐. ຕໍ ຣກ຺ຂສິໍ ສປຣິສໍ, ປຣິກ຺ຂິປິ ສມນ຺ຕໂຕ;

ອິທໍ ອິເມຫິ ອຸທ຺ຘນ຺ຕິ, ມນ຺ຕ຺ວາ ຠີຕາ ປລາຍິສາ.

໕໑. ຕສ຺ສ ເທສສ຺ສ ອາຣກ຺ຂໍ, ຐເປຕ຺ວານ ສມນ຺ຕໂຕ;

ຕສ຺ມິໍ ສມາຄເມ ເຖໂຣ, ພ຺ຣຫ຺ມຊາລມເທສຍິ.

໕໒. ສຣເຓສຸ ຈ ສີເລສຸ, ອຏ຺ຐໍສຸ ພຫໂວ ຊນາ;

ສຏ຺ຐິຍາ ຕຸ ສຫສ຺ສານໍ, ຘມ຺ມາຠິສມໂຍ ອຫຸ.

໕໓. ອຑ຺ຒຸຑ຺ຒານິ ສຫສ຺ສານິ, ປພ຺ພຊຸໍ ກຸລທາຣກາ;

ປພ຺ພຊິໍສຸ ທິຍຑ຺ຒນ຺ຕຸ, ສຫສ຺ສໍ ກຸລຘີຕໂຣ.

໕໔. ຕໂຕປ຺ປຠຸຕິ ສຎ຺ຊາເຕ, ຣາຊເຄເຫ ກຸມາຣເກ;

ນາມໍ ກຣິໍສຸ ຣາຊາໂນ, ໂສຓຸຕ຺ຕຣ ສນາມເກ.

໕໕. ມຫາຊນສ຺ສາປິ ຊິນສ຺ສ ກຑ຺ຒນໍ;

ວິຫາຍ ປຕ຺ຕໍ ອມຕໍ ສຸຂມ຺ປິເຕ;

ກຣິໍສຸ ໂລກສ຺ສ ຫິຕໍ ຕຫິໍ ຕຫິໍ;

ຠເວຍ຺ຍ ໂຍ ໂລກຫິເຕ ປມາທວາຕິ.

ສຸຊນປ຺ປສາທ ສໍເວຄຕ຺ຖາຍ ກເຕ ມຫາວໍເສ

ນານາເທສປສາໂທ ນາມ ທ຺ວາທສໂມ ປຣິຈ຺ເຉໂທ.