໗. ປກິຓ຺ຓກກຓ຺ໂຑ

໑໓໘. ອິຕ຺ຖິມິສ຺ເສ ກຸໂຕສີລໍ,

ມໍສ ຠກ຺ເຂ ກຸໂຕທຍາ;

ສຸຣາ ປາເນ ກຸໂຕສຈ຺ຈໍ,

ມຫາໂລເຠ ກຸໂຕຫິຣີ;

ມຫາຕນ຺ເທ ກຸໂຕສິປ຺ປໍ,

ມຫາ ໂກເຘ ກຸໂຕຘນໍ.

໑໓໙. ສຸຣາ ໂຍໂຄ ວິກາໂລ ຈ,

ສມຊ຺ຊ ຈຣຓາລສໍ;

ຂິຑ຺ຑາຘຸຕ຺ໂຕ ປາປມິຕ຺ໂຕ,

ໂຠຄນາສມຸຂາ ອິເມ.

໑໔໐. ທິວາ ນາທິກ຺ຂາ ວຕ຺ຕພ຺ພໍ,

ຣຕ຺ໂຕ ນາວຈເນນ ຈ;

ສຎ຺ຈເຣຍ຺ຍ ຠຍາ ຠີໂຕ,

ວເນ ວນຈຣີ ຍຖາ.

໑໔໑. ຊີວນ຺ຕາປິ ມຕາປຎ຺ຈ,

ພ຺ຍາເສນ ປຣິກິຕ຺ຕິຕາ;

ທຸກ຺ຂິໂຕ ພ຺ຍາຘິໂຕມູຬ຺ໂຫ,

ອິຓວາ ນິຕ຺ຍເສວໂກ.

໑໔໒. ອນາຄຕໍ ຠຍໍ ທິສ຺ວາ,

ທູຣໂຕ ປຣິວຊ຺ຊເຍ;

ອາຄຕຎ຺ຈ ຠຍໍ ທິສ຺ວາ,

ອ ຠີໂຕ ໂຫຕິ ປຓ຺ຑິໂຕ.

໑໔໓. ນິທ຺ທາລຸໂກ ປມຕ຺ໂຕຈ,

ສຸຂຕ຺ໂຕ ໂຣຄວາລໂສ;

ມຫິຈ຺ໂຉ ກມ຺ມາຣາໂມຈ,

ສຕ຺ເຕ ເຕ ສຕ຺ຖວຊ຺ຊິຕາ.

໑໔໔. ທຸຄ຺ຄຕໍ ຄຈ຺ຉ ເຫ ລາຠ,

ລາຠີ ລາເຠນ ປູຣຕິ;

ຖເລ ປວສ຺ສ ປຊ຺ຊຸນ຺ນ,

ສິນ຺ຘຸ ອາເປນ ປູຣຕິ;

ນຕ຺ຖິທໍ ກມ຺ມປ຺ປຘານກໍ.

໑໔໕. ນ ຫິ ໂກຈິ ກເຕ ກິຈ຺ເຈ,

ກຕ຺ຕາຣໍ ສມຸເປກ຺ຂເຕ;

ຕສ຺ມາ ສພ຺ພານິ ກິຈ຺ຈານິ,

ສາວ ເສເສນ ກາຣເຍ.

໑໔໖. ຕູລໍ ສລ຺ລຫຸກໍ ໂລເກ,

ຕໂຕ ຈາປລ຺ລ-ຊາຕິໂກ;

ຕໂຕ ວຸຑ຺ຒ ມໂນວາໂທ,

ປມຕ຺ໂຕ ພຸທ຺ຘສາສເນ.

໑໔໗. ປາສາຓຉຕ຺ຕໍ ຄຣຸກໍ,

ຕໂຕ ເທວານຈິກ຺ຂຓໍ;

ຕໂຕ ວຸຑ຺ຒານໂມວາໂທ,

ຕໂຕ ພຸທ຺ຘສ຺ສ ສາສນໍ.

໑໔໘. ກາຍສ຺ສ ທກ຺ຂິຓ ຫຕ຺ໂຖ,

ໂທໂສ ເອຕ຺ຖ ກນິຏ຺ຐໂກ;

ກຓ຺ຓ ຆານານ-ມກ຺ຂີນໍ,

ວາໂມ ຕຸ ປາທ-ປາສໂກ.

໑໔໙. ຕມ຺ພູລສ຺ສ ມຊ຺ຌ ປຕ຺ເຕ,

ກຸເວໂຣ ຣກ຺ຂຕີ ສທາ;

ມູລມ຺ຫິ ຣກ຺ຂຕິ ຍກ຺ໂຂ,

ອຄ຺ຄມ຺ຫິ ກາລກຓ຺ຓິກາ;

ຕານິ ຠຸຎ຺ເຊຍ຺ຍ ຉິນ຺ທິຕ຺ວາ,

ສິຣີ ເອວໍ ປວຑ຺ຒຕິ.

໑໕໐. ສມ຺ປຸຓ຺ຓຣກ຺ໂຂ ພ຺ຣຫ຺ມາວ,

ອຈ຺ຈຸຣກ຺ໂຂ ຈ ພິສ຺ສໂຓ;

ຕສ຺ມາ ຫິ ເຕ ປູຊຍນ຺ຕຸ,

ສທາ ມາເນນ຺ຕິ ຕໍ ນຣໍ.

໑໕໑. ໂຄຓາ ຫິ ສພ຺ພຄິຫີນໍ,

ໂປສກາ ໂຠຄທາຍກາ;

ຕສ຺ມາ ຫິ ມາຕາ ປິຕູວ,

ມານເຍ ສກ຺ກເຣຍ຺ຍ ຈ.

໑໕໒. ເຍຈ ຂາທນ຺ຕິ ໂຄມໍສໍ,

ມາຕຸ ມໍສໍວ ຂາທເຣ;

ມເຕສຸ ເຕສຸ ຄິຊ຺ຌານໍ,

ທເທ ໂສເຕ ຈ ວາຫເຍ.

໑໕໓. ຄຸຣຸສິທ຺ໂຘ ສິປ຺ປາຣມ຺ໂຠ,

ຣວິ ໂສກ຺ຣາ ຈ ມຊ຺ຌິໂມ;

ນ ສິປ຺ໂປ ພຸທ຺ຘຈນ຺ທໂຣ,

ໂສຣີ ອງ຺ຄາຈ ມຣຓໍ.

໑໕໔. ອຏ຺ຐມິຍໍ ຄຸຣຸໍ ຫນ຺ຕິ,

ສິສ຺ສໍ ຫນ຺ຕິ ຈຕຸທ຺ທສິໍ;

ສິປ຺ປໍ ຫນ຺ຕິ ທສ ສິປ຺ປໍ,

ມາຕາປິຕາ ຈ ປຸຓ຺ຓມິໍ.

໑໕໕. ນາຬິກໍ ສຕ຺ຕ ນຠຸຎ຺ເຊ,

ນ ລາພຸໍ ນວມໍ ຕຖາ;

ທ຺ວາທສ ປ຺ຣິນ຺ນໍຕ຺ຣິມິນໍ,

ຠຸຎ຺ເຊ ສິປ຺ປໍ ວິນສ຺ສຕິ.

໑໕໖. ເອກໍ ຈເຊ ກຸລອຕ຺ຖໍ,

ຄາມສ຺ສຕ຺ຖໍ ກຸວໍ ຈເຊ;

ຄາມ ຈເຊ ຊນປທຕ຺ຖໍ,

ອຕ຺ຕຕ຺ຖໍ ປຖວິໍ ຈເຊ.

໑໕໗. ເທສໍ ໂອສ຺ສຊ຺ຊ ຄຈ຺ຉນ຺ຕິ,

ສີໂຫ ສປ຺ປຸຣິໂສ ຄໂຊ;

ຕຕ຺ເຖວ ນິຘນໍ ຍນ຺ຕິ,

ກາໂກ ກາປຸຣິໂສ ມິໂຄ.

໑໕໘. ຍມ຺ຫິ ປເທເສ ນ ມາໂນ,

ນ ເປມໍ ນ ຈ ພນ຺ຘວາ;

ນ ຈ ວິຊ຺ຊາຄາໂຫ ໂກຈິ,

ນ ຕຕ຺ຖ ວສນໍ ກເຣ.

໑໕໙. ຈຣຕ຺ເຍເກນ ປາເທນ,

ຕິຏ຺ຐຕ຺ເຍເກນ ປຓ຺ຑິໂຕ;

ອ ນິສມ຺ມ ປຣໍ ຐານໍ,

ນ ປຸພ຺ພມາລຍໍ ຊເຫ.

໑໖໐. ຘນ ຘຎ຺ຎ ປໂຍເຄສຸ,

ຕຖາ ວິຊ຺ຊາຄເມສຸ ຈ;

ທູເຕສຸ ອປຈາເຣສຸ,

ຈຊ຺ຊາ ລຊ຺ຊາ ຕທາ ຠເວ.

໑໖໑. ທ຺ວິ ຄຸໂຓ ຖີນມາຫາໂຣ,

ພຸທ຺ຘິຈາປິ ຈຕຸຄ຺ຄຸໂຓ;

ຉຄ຺ຄຸໂຓ ໂຫຕິ ວາຍາໂມ,

ກາໂມຕ຺ວຏ຺ຐ-ຄຸໂຓ ຠເວ.

໑໖໒. ປພ຺ເພ ປພ຺ເພ ກເມນຸຈ຺ຉຸ,

ວິເສສຣສວາຄ຺ຄໂຕ;

ຕຖາ ສຸເມຕ຺ຕິໂກ ສາຘຸ,

ວິປຣີໂຕວ ທຸຊ຺ຊໂນ.

໑໖໓. ກສ຺ສໂກ ວາຓິໂຊ ມຈ຺ໂຈ,

ສມໂຓ ສຸຕ ສີລວາ;

ເຕສຸ ວິປຸລ ຊາເຕສຸ,

ຣຏ຺ຐມ຺ປິ ວິປຸລໍ ສິຍາ.

໑໖໔. ອສຊ຺ຌາຍ ມລາ ມນ຺ຕາ,

ອນຸຏ຺ຐານ ມລາ ຆຣາ;

ມລໍ ວຓ຺ຓສ຺ສ ໂກສຊ຺ຊໍ,

ປມາໂທ ຣກ຺ຂໂຕ ມລໍ.

໑໖໕. ຫີນານໍ ຄຈ຺ຉເຕ ວິຕ຺ຕໍ,

ວີຣານໍ ສນ຺ຕກຕ຺ຕນໍ;

ວທນ຺ຕິ ຈ ຫີນາ ຊນາ,

ປຸພ຺ພ-ກມ຺ມປ຺ປຘານກາ.

໑໖໖. ນ ວທນ຺ຕິ ເຈວໍຘີຣາ,

ວາຍມິໍສຸ ສພ຺ພກມ຺ເມ;

ນ ເຈ ສິຊ຺ຌຕິ ຕໍ ກມ຺ມໍ,

ອ-ຜລໍ ເອວ ໂກ ໂທໂສ.

໑໖໗. ນີຈໍ ກຸລໍ ນິປຎ຺ຎໍ ວາ,

ນິຣູປໍ ນິພລໍ ສມໍ;

ອິມໍ ກາລໍ ຉຸຕ຺ຕກາລໍ,

ຘນເມວ ວິເສສກໍ.

ປກິຓ຺ຓກກຓ຺ໂຑ ນິຏ຺ຐິໂຕ.

ປຓ຺ຑິໂຕ ສຸຊໂນ ກຓ຺ໂຑ,

ທຸຊ຺ຊໂນ ມິຕ຺ຕ-ອິຕ຺ຖິ ຈ;

ຣາຊາ ປກິຓ຺ຓໂກ ຈາຕິ,

ສຕ຺ຕ-ກຓ຺ຑ-ວິຠູສິຕໍ.

ວິສຸທ຺ຘາ ຈາຣ-ເຖເຣນ,

ວິສຸທ຺ຘາຣາມ-ວາສິນາ;

ສພ຺ພ-ກຸລານມຕ຺ຖາຍ,

ວິໂສຘິຕໍ ປຖກ຺ຂເຍ.